<a href="https://kyzylorda-news.kz/">Kyzylorda-news.kz</a> Мемлекет басшысының тапсырмасымен қолға алынған «Таза Қазақстан» республикалық акциясы шеңберіндегі «Мөлдір бұлақ» апталығы сенбіде қорытындыланды. Қармақшыда өткен сенбілікке мемлекеттік мекеме қызметкерлері, жеке ұйымдар, жастар және волонтерлер, сондай-ақ тұрғындармен техникалар қатысты.Ұйымдастырылған тазалық іс-шарасында аймақ бойынша су айдындары мен өзен-көл жағалаулары, аяқ су арықтары тазартылып, қала, аудан, ауылдарда көркейту-көгалдандыру жұмыстары жүргізілді. Акцияның негізгі мақсаты да сол. Табиғатты таза ұстап, тұрғындардың хал ахуалын, мәдениетін көтеру.Қармақшы ауданында өткізілген сенбілікте Сырдария өзенінің бойы мен су каналдары қоқыс қалдықтарынан тазартылып, техникамен шығарылды. Бұл жұмыстар ауданға қарасты барлық ауылдық округтерде де атқарылды. Кент ішіндегі көшелерге бөлінген мекеме қызметкерлері тазалық жүргізді. Сенбілік бойынша облыс әкімі Нұрлыбек Нәлібаевтың «Таза Қазақстан» республикалық экологиялық акциясына аймақ жұртшылығын белсене қатысуға шақырған үндеуі жарияланған болатын. Бұл жұмыстар көктемнің алғашқы күні 1 наурыздан бастау алған-ды. Содан бері акцияның нәтижесі аймағымызға оң өзгеріс әкелуде.Бүгінде ауданымызда көркейту-көгалдандыру, абаттандыру бойынша атқарылып жатқан жұмыс көп. Уақыт өткен сайын кентіміз көрік беріп, тұрғындарға жайлылық сыйлауда. Бір ауық күндіз немесе кешкілік серуенге шығып кентті араласаңыз, сөзсіз көзіңіз жетеді. Бұрынғыдай шаңы бұрқыраған қара жолдардың ауылы алыстап, тақтайдай тегіс жолдар мен төбеден жарық шашқан қаз-қатар түнгі шамдар діттеген жеріңізге дейін апарады. Басты көшелерге салынған жаяу жүргіншілер жолы жол қауіпсіздігін қамтамасыз етсе, орынтақтар сіздің аяқ сергітіп демалуыңызға ол да бір жайлылық сыйлауда. Жалпы ауданда аудан әкімінің бастамасымен бірқатар жұмыс қолға алынып, өз нәтижесін беруде. Соның негізгілері сенбіде бақыланды.Аудан басшысы Жандос Еркінбек кент орталығындағы Т.Рысқұлов пен К.Тәуекелов көшелеріндегі абаттандыру жұмыстарын аралап көрді. Қазіргі таңда мұнда жаяу жүргінші жолы салынуда. Сондай-ақ жарық шамдар орнату, көгалдандыру секілді жұмыстар жүргізілетін болады. Одан бөлек темір жолдың арғы бетіндегі «Шығыс» каналын абаттандыру бақыланды. Тексеру барысында тиісті сала басшыларына жұмыстың сапалы орындалуын қатаң қадағалауды міндеттесе, мердігерге жұмыстың мерзімінде аяқталуын тапсырды. &nbsp;

Қармақшыда экологиялық акция қорытындыланды

<a href="https://kyzylorda-news.kz/">Kyzylorda-news.kz.</a> БҰҰ Бас Ассамблеясының 1993 жылдың қыркүйек айындағы резолюциясында 15 мамыр – Халықаралық отбасы күні болып белгіленген болатын. Бұл бастама әлемдік қауымдастықтың қазіргі замандағы отбасының жағдайына алаңдаушылығынан туындаған еді. Сол 1994 жылдан бастап биыл отызыншы жыл әлемде «Отбасы күні» аталып өтеді.Қызылорда қаласындағы былтыр &nbsp;пайдалануға берілген «Отбасы орталығы» негізінен шаңырақтың беріктігін сақтауда жас жұбайлардың қарым-қатынасын нығайтып, тәрбиедегі ұлттық құндылықтарды қалыптастыруға қолдау танытады. &nbsp;Мәселен, ынтымақ пен жарастықты нығайту бағытында ел тарихындағы белгілі тұлғалардың үйде алған тәрбиесін, олардың ел өміріндегі алатын орнын, қоғамға сіңірген еңбегі, өнегелі өмірін отау құрған жастарға насихаттау арқылы отбасы құндылығын арттыру жұмыстары жыл бойы үздіксіз жүргізіледі. Жаңа өмірге қадам басқан жұптарға отбасы &nbsp;ұғымының қадір-қасиетін, ата-ананың бала тәрбиесіндегі жауапкершілігін түсіндіре отырып, оларды өмірге даярлайды. Өмірде кездесетін қиындықтарға төтеп беріп, қандай жағдайда болсын, шаңырақтың беріктігін сақтап қалу бағытында қажетті кеңестер ұсынылады. Бұдан бөлек, үйленуге бір ай бұрын өтініш білдірген жас жұбайлар отбасын жоспарлау мақсатында медициналық тексеруден өте алады. «Жастар денсаулығы» орталығының мамандары оларға жүктілікті жоспарлау, бедеуліктің алдын алу бойынша кеңес береді. Сонымен қатар, қазіргі күрделі мәселенің бірі жастар арасындағы жұмыссыздық екенін жасыра алмаймыз. Осы орайда жұмыссыз жастар «Отбасы орталығындағы» «Мансап» бөліміне келсе, мамандығы бойынша жұмысқа орналасуына қолдау көрсетіледі.«Бақытты отбасы» бөлімі жас отбасын тұрғын үймен қамтамасыз етудің жолын қарастырады. Бұл ретте «Отбасы банк» филиалының қызметкерлері жастарға үй алудың тиімді жолдарын ұсынып, бағыт береді. Сондай-ақ «Бақыт мекені» бөлімінде қазақы отбасының құндылығы мен ұлттық тәрбие туралы түсіндіріледі. Осындай жан-жақты жұмыстар отау құратын жастарды өз бетінше шешім қабылдауға үйретіп, болашаққа деген сенімін қалыптастырып, жаңа өмірге дайындауға септігін тигізері &nbsp;сөзсіз.<blockquote>– «Отбасы» орталығында «Неке қию», «Алтын той», «Күміс той», «Маржан той» рәсімдері өткізіледі. Сонымен қатар, «Туу туралы куәлік», «Зейнетақы кітапшасын» табыстау да салтанатты іс-шараның біріне айналып отыр. Орталық ашылғалы, яғни, өткен жылдың қыркүйек-желтоқсан айы аралығында 54, биыл жыл басынан бері 58 жұптың некесі қиылды. Алтын той рәсімі өтті.Орталықтың қызметіне жүгініп, қажетті кеңес алған жас жұбайлардың сөзінен болашаққа деген үміт пен сенімді байқап, іштей қуанып тұрамыз. Осы мекен олардың берекелі ғұмырының алғашқы баспалдағы болса деп тілектестігімізді білдіреміз, – дейді орталық басшысының орынбасары Ұлбосын Қылышбаева.</blockquote>«Отбасы орталығынан» жаңа өмірге қадам басып, заңды неке куәлігін алған жас жұбайлар, олардың ата-аналары, сондай-ақ, өмірге келген сәбиінің «Туу туралы куәлігін» алған &nbsp;жастар жүрекжарды алғыс-тілектерін арнайы кітапқа жазып қалдырады.Былтыр ҚР Үкіметінің қаулысымен 12 мамыр – Аналар күні болып мерекелер тізіміне енгізілгенін білеміз. Осы мерекеге орай мұнда «Сәлем, Анашым…» терапиялық кеші өтті. Алғаш шымылдығын түрген «Күретамыр» отбасылық лабораториясында еркін форматта өткен шарада қоғам қайраткері Сәпен Аңсат, жыршы Жұмабай Шерниязов, ардагер-ұстаз Құрбанкүл Уахитқызы бастаған «Асыл жандар» әжелер ансамблі, Райкүл Байназарова, Нұржамал Бектайқызы, Қаламқас Арыстанқызы, Орынкүл Бұрханова сынды әр салада қызмет етіп жүрген қыз-келіншектер асыл аналары жайлы сағынышқа толы естеліктерін бөлісті. Айта кетейік, терапиялық кештің шарты бойынша кеш қонақтары анасына арнап хат жазып, жүрек түкпіріндегі сырын бөлісті. Осы орайда о дүниелік анасына хат жазып, перзенттік сырын ақтарған қоғам қайраткері Сәпен Аңсатов, жыршы Жұмабай Шерниязовтың хаттары тыңдаушыларды толғанысқа жетелеп, көздеріне еріксіз жас үйірді.Қармақшы ауданы «Ақжар» ауылының әкімі Нұржамал Бектайқызы анасының бойындағы қайсарлық пен қажырды, шыдамдылықты әңгімесіне арқау етіп, бүгінгі өмір жолында сол тәрбиенің жемісін көріп келе жатқанын айтты. Ал режиссер Орынкүл Бұрханова «Бұл өмірде адам қанша жетістікке жетсе де ананың бір ауыз жылы лебізіне, мейіріміне ештеңе тең келмейді» деп естеліктерін ортаға салды.«Ғаламнын сұлулары татымайды, Анамның күліп тұрған бейнесіне» деген жыр шумақтарының авторы Ержеңіс Әбді сол сәттегі басынан кешкен хәлді баяндай отырып, анасына арнаған жырын орындап, көпшіліктің көңілін босатты. Жас ақын, «Ақмешіт жастары» газетінің бас редакторы Айдар Сайлауов ана туралы өлең жолдарын назарға ұсынды. «Сенімен болашақ» қоғамдық бірлестігі Қызылорда филиалының басшысы Шакизат Қаратайұлы анасына арнап жазған «Мизам шуақ» атты кітабын орталыққа сыйға тартты. Кеште ана тақырыбында жазылған әндер шырқалып, көрермендер бір мезет әуен құшағында тербелді. Терапиялық кешке қатысқан әрбір көрерменге орталық басшысы Жанат Ашанқызы алғысын білдіріп, аналарға ақ жаулық сыйға тартты. &nbsp;

«Отбасы орталығының» жұмысы жандануда

<a href="https://kyzylorda-news.kz/">Kyzylorda-news.kz</a> «AMANAT» партиясының бастамасымен еліміз бойынша сайлауалды уәделердің орындалу барысын жүйелі бақылап отыру мақсатында ауданымызда салынып жатқан құрылыс нысандарына партиялық бекеттер ашылуда. Жыл басынан бері Шиелі ауданында барлығы 5 партиялық бақылау бекеті ашылған болатын.Бүгін яғни, 14 мамыр күні осындай нысандардың бірі партияның сайлауалды бағдарламасы аясында Бестам ауылындағы құрылысы басталған&nbsp;150 орындық клубқа партиялық бақылау бекеті ашылды.&nbsp;Клуб құрылысының жобалық құны – 431,0 миллион теңгені құрайды. Құрылыс жұмыстарын мемлекеттік сатып алу жұмыстары аясында жеңімпаз болып танылған Бас мердігер – «СК Дәнекер» ЖШС-гі жүргізуде. Авторлық қадағалаушы – «ПроектСервис» ЖШС-гі. Техникалық қадағалаушы – «ARTERIA» ЖШС-гі. Осы мамыр айында басталған құрылыстың 30 пайыздан астам жұмыстары атқарылған. Аяқталуы 2024 жылдың қараша айы деп жоспарлануда.&nbsp;Бақылау бекетінің ашылуына «AMANAT» партиясы Шиелі аудандық партия филиалының төрағасы Болат Сыздық, партиялық бақылау комиссиясының төрағасы Насырбек Мырзабеков және комиссия мүшелері, аудандық құрылыс бөлімі мен мердігер мекеменің өкілдері қатысты.&nbsp;Алдағы уақытта партиялық бақылау бекетінің жетекшілері мен комиссия мүшелері құрылыстың сапасына басты назар аударып, клубтың толық құрылысы аяқталғанға дейін қадағалайтын болады.

Шиеліде партиялық бақылау бекеті ашылды

<a href="https://kyzylorda-news.kz/">Kyzylorda-news.kz</a> Ел Президенті Қасым-Жомарт Тоқаевтың аймақтарды абаттандыру мен көгалдандыруды бастау жөніндегі тапсырмасына сәйкес облыс әкімі Нұрлыбек Нәлібаевтың ауыл-аймақтарда санитарлық тазарту жұмыстарын жүргізу жөніндегі үндеуіне орай 6 сәуірден бастау алған «Таза Қазақстан» экологиялық акциясы өз мәресіне жетті. Осы ретте Жалағаш ауданының әкімі Ардақ Ибраимов акцияға белсене қатысқан бірқатар табиғат жанашырын марапаттады. Табиғат – ананың мейіріміне бөленген бүгінгі белсенді тұрғындарға аудан әкімі шынайы алғысын білдіріп, үлгілі бастамаларға тоқталды.<blockquote>– Бұған дейін аудан тұрғындарын тазалық жұмыстарына белсене қаты­суға шақыратын үндеулер жарияла­ған болатынбыз. Осы ретте жерлесте­рі­міз­дің басым көпшілігі тазалық жұмыс­тарына белсенді араласты. Алдағы уақытта «Үздік көше» байқауын жа­рия­лап, көшелерімізге де сән бе­ре­міз деген ойдамын. Бұл да аудан тұр­ғындарының Жалағаш ортақ ме­кен екенін түсінгенін және аудан көше­лерінің айнадай таза болуына септігін тигізетінін білдіреді. Қоршаған ор­таның та­залығына жауапкершілікпен қарау, өзі тұратын үйді, аймақты, өл­кені таза ұстау және ағаш отырғызу, оны күтіп баптау әрбір азаматтың елжан­дылық парызы деп білемін, –&nbsp; деді аудан әкімі Ардақ Ибраимов.&nbsp;</blockquote>Белсенділерді марапаттау шара­сын­­да Ардақ Әбдіғаппар­ұлы елімізде су тасқыны орын алған ай­мақ­тарға көмек қолын созған аза­мат­тарға ерекше тоқталды. Тілсіз жау­­ды тізгіндеуде батылдық танытқан бү­­гінгі батырларды құрмет төріне шы­ға­рып, аудан халқы атынан алғы­с білдірді.&nbsp;«Таза Қазақс­тан» рес­пуб­ликалық ак­циясы ба­ры­сында ауданда «Таза өлке», «Кие­лі мекен», «Жасыл аймақ», «Өне­гелі ұрпақ» және «Мөлдір бұлақ» ап­та­лықтары аясында экологиялық мәде­ниетті қалыптастыру бағытында бір­қа­тар жұмыстар атқарылды. Мәселен, акцияның «Таза өлке» деп аталған алғашқы аптасында жала­ғаш­тықтар Таң елді мекенінде ағаш отырғызу, санитарлық тазалық жұмыс­тарын жүргізу, аллеяларды және аяқ су келетін арықтар мен каналдарды та­зарту жұмыстарын жүргізді. Акция­ға ауыл ардагерлері, белсенді жас­тар мен еріктілер өз үлесін қосты. Оған елді мекендегі шаруашылық құ­рылымдарынан 20 техника және 360 адам қатысты. Мұнан кейін «Киелі мекен» апталығында тарихи киелі орын «Түмен әулие» кесенесі аумағында абаттандыру жұмыстары жүргізілді. Шараға ардагерлер, ерікті жастар, мәдениет саласының қызметкерлері қатысты. Алдымен баба рухына құран бағышталып, кесене күмбезін сырлау, қорым аумағын тазарту, әктеу жұмыстары атқарылды.&nbsp;Ауданда республикалық және жергілікті маңызы бар тарихи және мәдениет ескерткіштердің саны – 71. Соның ішінде «Түмен әyлие» кесенесі «Қазақстанның киелі жерлерінің географиясы» жобасы аясында «Өңірлік қасиетті нысандар» тізіміне енген.Тарихына тоқтала өтсек, Түмен әулие ХІХ ғасырдың бірінші жартысында (1821-1875 жж) Қаракеткен, Амангелді ауылдық кеңестері, қазіргі М.Шәменов ауылдық округі елді мекенінде туып өскен. Әулиенің қасиеті, кереметтері ел аузында аңыз ретінде әлі күнге дейін айтылып жүр. Түменнің шешесі – жеті өлікке жан берген Мүсірәлі софы әзиздің баласы Қосым қожаның қызы. Өзі туып өскен жерде небәрі 54 жыл өмір сүрген.&nbsp;Тарихи жазба деректерге сүйенсек, Түмен әулиенің кесенесі 1876 жылы салынған. Аудан тарихы үшін маңызы зор бұл кесенеге 2011 жылы қайта жаңғыртуға респуб­ли­калық бюджеттен қаржы қаралып, қалпына келтірілген.Мұнан кейін аудан тұрғындары «Жасыл аймақ» апта­лығы аясында «Тағзым» аллеясында тал егу рәсімін өткізіп, санитарлық тазарту жұмыстарын жүргізілді. Шара барысында аллеядағы Социалистік еңбек Ері, мемлекет және қоғам қайраткерлері, Ауған соғысына, Семей, Чернобыль апаты зардаптарын жоюға қатысушылардың құрметіне арналған ескерткіш аумағында талдарды әктеу, санитарлық тазалық жұмыстары ұйымдастырылып, көр­кейту-көгалдандыру бағытында 100 түп сыр талы мен терек көшеттері отырғызылды. Сонымен бірге кент көше­леріндегі аяқсу арналары тазартылып, талдар әктелді.&nbsp;Одан әрі акция «Менің туған өлкем» апталығына ұласты. Акцияға аудан әкімі Ардақ Ибраимов пен облыстық ана­лар кеңесінің төрайымы Райкүл Мансұрқызы бастаған Жалағаштан шыққан, бүгінде Қызылорда қаласында тұратын аза­мат­шаларымыз қатысты. Шара барысында олар «Ақте­рек» сауықтыру лагеріне санитарлық тазалық жұ­мыс­тарын жүргізіп, 300 тал көшетін егіп, 100 ясень ағашы, 100 терек, 100 жеміс ағаштарын отыр­ғызды. Ал «Өнегелі ұрпақ» пен «Мөлдір бұлақ» апталығы аясында аудан бойынша жаппай сенбілік жұмыстары ұйым­дас­ты­рылды. Кенттің орталық алаңында орналасқан Ұлы Отан соғысынан оралмағандар ескерткіші айнала­сына аудан­дық ардагерлер кеңесі, ақсақалдар кеңесінің мүшелері санитарлық тазарту жұмыстарына белсене атсалысты.Айта кетейік, биыл көктемгі тазалық айлығы бастал­ғалы ауданда апта сайын сенбілік жұмыстары ұйым­дастырылып, бүгінге дейін 15 мыңға жуық ағаш отырғызылып, 65 мың тонна күл-қоқыс арнайы бел­гіленген орындарға шығарылған. Сондай-ақ кент және ауылдық округтерде аяқ су жүретін арықтар қазылып, жалғызбасты қариялардың ауласы тазаланып, тарихи-мәдени ескерткіштердің аумағына, орталық көшелерде, аллеялар мен саябақтарда көркейту-көгалдандыру, абат­тандыру жұмыстары жүргізілген.

Тазалық жанашырлары марапатталды 

Фото: видеодан скриншот<a href="https://kyzylorda-news.kz/">Kyzylorda-news.kz.</a> Танымал актриса, блогер Айшолпан Байтүгел Асхат Садырбайға берген сұхбатында толықтығының кесірінен өзін кем сезінетінін жасырмады, - деп хабарлайды <a href="https://massaget.kz/">Massaget.kz</a>.Актрисаның айтуынша, ол толық болғандықтан, махаббаттан да жолы болмаған.&nbsp;<blockquote>"Бәрі маған толықсың деп айтады, мен тіпті бұдан қысыламын. Менің бойым - 1 метр 60 сантиметр, ал салмағым - 82 келі. Менің бойым мен салмағым сәйкес келмейді. Сондай-ақ, маған қоғам тарапынан келетін хейттің барлығы осы толықтығыма қатысты. Мен сондықтан да әлеуметтік желілердегі парақшаларыма тамақтанып отырған сурет, видеоларымды жүктемеймін.&nbsp;Осы толықтығымның кесірінен махаббаттан да жолым болмаған. Сөйлесіп көрген жігіттерім болды. Бірақ 99 пайызы бетімді қайтарды десем болады. Кәдімгідей кездесуге шығып келемін, ертесіне менің нөмірімді, әлеуметтік желілерде бұғаттап тастайтын. Мен бұл туралы қиналмай айта беремін. Білмеймін, сырт келбетім ұнамаған шығар. Бірнеше кездесуге шықтым, жақсы көрген адамдарға өзім бірінші болып айтқан кездерім де, олар менің бетімді қайтарған кездері де болды. Сондықтан мен бұл нәрсені&nbsp; қабылдадым, айта алдым, мойындадым. Негізі сол кезде ғана жеңіл болады екен. Осы себепті маған біреу өліп ғашық болды деп айта алмаймын.Мұның себебі менің сол кездегі жан-дүниемнің күйінен деп ойлаймын. Кез келген ішкі дүние - адамның айнасы деп жатады ғой. Мен өзім неден қысыламын, сол нәрсені маған бәрі көрсететін. Ал қазір мен олай ойламаймын, мен қазір өзімді жақсы көремін", - деді актриса.&nbsp;</blockquote><figure class="media"><div data-oembed-url="https://www.youtube.com/watch?v=cuFHvY95aIA&amp;t=157s"><div style="position: relative; padding-bottom: 100%; height: 0; padding-bottom: 56.2493%;"><iframe src="https://www.youtube.com/embed/cuFHvY95aIA?start=157" style="position: absolute; width: 100%; height: 100%; top: 0; left: 0;" frameborder="0" allow="autoplay; encrypted-media" allowfullscreen=""></iframe></div></div></figure>

Айшолпан Байтүгел: Толықтығымның кесірінен махаббаттан да жолым болмаған

<a href="https://kyzylorda-news.kz/">Kyzylorda-news.kz</a> Жуырда бір құрбымның туған күніне бардым. Дәмді асқа толған дастарқанынан бұрын, көздің жауын алар әдемі мерекелік тортына сүйсіндік. Әрине, нәзікжанды болған соң әдемілікті көзіміз шалып қалса, дереу қайдан алғанын сұрастыра кетеміз. Кеш барысында құрбымнан мұны әзірлеген келіншектің мекен-жайын алып, ертеңіне жұмысына табан тіредім.&nbsp;Кәсіпкер келіншек Қарлы­ғаш Ділда­бекова тапсырыспен конди­терлік өнім­дер пісіріп жүр екен. Алдына келген тұтынушының тапсырысын орап, шыға­рып салғаннан кейін кейіп­кері­мізді әңгімеге тарттық.&nbsp;Айтуынша, ол – осы Жалағаштың қызы, 2010 жылы Байқоңырға тұр­мысқа шыққан. 2016 жылдан бас­тап жұмыссыз отыр­ғасын сол қалада хоббиін шағын кәсіпке айналдырады.&nbsp;<blockquote>– Ең алдымен үйде бос отқан соң күнде әртүрлі тәттілер пісіре бастадым. Дастарқаныма қойған тәттілерім­нің дә­мін туған-туыс, көр­шілерім көрген­нен кей­ін олар­да ұна­тып, той-томалағына тапсы­рыс бере бас­тады. Әрі қа­рай отбасым­­ның қолдауы­мен кәсібімнің көкжиегін кеңейт­тім. Тәтті­лер пісіру – кішкентайым­нан анамнан дарыған қасиет. Ешқандай курс оқыған жоқпын. Ұялы телефондағы ютуб желісі арқылы әр тәттінің жасалу жолын бірнеше рет қайталап көріп, әрі қарай қабілетіммен алып кеттім. Тұтынушылар көбейген сайын шабытым оянып, ерекше тәттілер жасауға тырыстым. Ешкімде жоқ ерекше дүниелер жасауға бала күнімнен әуеспін. Соның арқасында мастикамен жұмыс жасауды үйрендім. Байқоңыр қаласында ең бірінші мастикамен торт сәндеуді мен қолға алдым, – дейді Қарлығаш Ділдабекова.</blockquote>Бір қызығы, кейіпкеріміз 2020 жыл­дың басында Жалағашқа жақын туысының тойына келгенде елі­мізде эпи­демиологиялық ахуалға бай­ла­ныс­ты жаппай карантин режимі орна­тылып, осында қалуға тура кел­ген. Жол ашылып, бәрі қалыпқа қайта келгенше бос отырмайын деген ол ағайын-туыс, көршіден тапсырыс жинай бастайды. Сөйтіп осында үй салып, қазір біржола осында қоныс аударған.&nbsp;<blockquote>– 2020 жылы мемлекеттен қайта­рымсыз грант алып, шағын цехыма торт пісіруге қажетті пеш, миксер, тоңа­зытқыш алдым. Қазір той-томалақ, құдайы ас, мейрамдардың барлығында дастарқанға қойылатын тәттілерге тапсырыс қабылдаймын. Тапсырыстан бөлек мейрамдарда торт­тарды ау­дандағы бірнеше дүкен­дерге де өткіземін, – дейді кейіпкеріміз.&nbsp;</blockquote>Қарлығаштың қазір тұрақты тұты­нушылары жетерлік.&nbsp; Ауданнан бөлек оған ауылдардан да жиі тапсырыс түседі екен. Бастысы, халықта сұраныс, ал кәсіпкерде ынта-жігер бар. Ол алдағы уақытта кәсібін кеңейтіп, 5-6 адамды тұрақты жұмыспен қамту жоспарда барын жасырмайды.&nbsp;<blockquote>– Тәтті тортқа тапсырыс берген тұтынушыларым үшін әрине тіл үйірер дәмі мен сыртқы безендірілуі өте маңызды. Көптеген тұтынушыларым түрлі идеямен мені шабыттандырып, торттың ерекше әсемделуін сұрайды. Торттың сыртын көбіне мастикамен, бетін суретпен әсемдеймін. Бүгінге дейін бірде-бір тұтыну­шымнан пісір­ген тәттілерім туралы жаман пікір есті­медім. Кері­сінше бәрі қуанып, алғысын жаудырады, – дейді кәсіпкер.&nbsp;</blockquote>Жас кондитердің мерекелік торт­тары салмағы мен көлеміне қарай ба­ғаланады. Мәселен, мереке кезіндегі торттары 3 мың мен 4 мың теңге аралығында болса, бисквиттер 5 мың теңгеден бас­талады. Мастикамен әсемделген, безендіруі ерекше торттар 12-13 мың теңге аралығында. Мұнан бө­лек жастар тойына арналған 3 қа­батты торттар 35-40 мың теңге ара­лығында. Ол тұтынушының талға­мына қарай «Вупи-пай», «Қызыл барқыт», «Наполеон», «Сүтті қыз» сияқты торт­тардың түр-түрін пісіреді.&nbsp;<blockquote>– Мерекелерде, қарапайым күндері де түнімен ұйықтамай торт пісіретін кездерім көп. Мәселен, кеше 8 наурыз мерекесінде екі күнде бір өзім 70 торт пісірдім. Азаннан кешке дейін торттың бисвкиттерін пісіріп, түнімен кремдерін жағып, безендіремін. Одан кейін Ұлыстың ұлы күні Наурыз мерекесінде де 19-ынан бастап 70-ке жуық торт пісіріп саттым, – дейді ол.&nbsp;</blockquote>Иә, Қарлығаш – өз ісінің кәнігі маманы. Торт­тары өте дәмді, тәтті және ай­тылған уақытында дайындап береді. Тіпті кейде үйден тапсырыс берген тұтынуышларын да ренжітпейді. Ерекше ұнайтыны, торттың безендіруін қалай айтсаң, дәл солай жасап береді. Тұрғындардың әрбір мерекелік кеші мен туған күндері кейіпкеріміздің тәтті­ле­рінсіз өтпейді десек, артық болмас. Себебі ол аудандағы өнімі өтімді әрі сапалы кәсіпкерлердің бірі де бірегейі. Біз барған күні алғыс айтуға келген тұрақты тұтынушыларын да көзіміз шалды.&nbsp;Ол тұтынушылар тапсырысына қарай печенье, бәліш, самса, тәтті бөлкелердің сан түрін, тіпті түріктің пахлавасына дейін пісіреді. «Еңбек етсең ерінбей, тояды қарның тіленбей» демекші, алдына нақты бір мақсат қойып, соған бар ынтасымен ниет етіп кіріссе, бәрі өз ретімен боланы рас. Бұған бүгінгі кейіпкеріміздің кәсібі дәлел.&nbsp;Отбасындағы міндеттермен қатар тәтті пісіруге уақыт тауып, бизнесін жүргізіп отыр­ған жас кондитердің алға қойған мақ­саты айқын, қадамы нық. Кәсіптің көзін тауып, бере­келі тұрмыс кешіп отырған осындай іскер келіншектерді көргенде іштей қуа­насың. Себебі мұндай жас кәсіп­кер келіншектер – мемлекетіміздің өр­кен­деуінің кепілі. Ал Қарлығаш Ділда­бекова – кәсіпкер әйелден бөлек, асыл жар, бақытты ана екенін өз ісімен дәлелдеп жүрген бақытты жанның бірі.

Кәсібінен нәсіп тапқан 

<a href="https://kyzylorda-news.kz/">Kyzylorda-news.kz</a> «Таза Қазақстан» республикалық акциясы аясында Жалағаш ауданында өткен сенбі «Өнегелі ұрпақ» апталығы деп жарияланды. Апталық аясында аудан бойынша жаппай сенбілік ұйымдастырылып, көшелер мен саябақтар қоқыстан тазартылып, қураған талдар кесіліп, аяқ су жүретін арықтар қураған жапырақтардан тазартылды. Жиналған қоқыстарды шығаруға кент бойынша жауапты мердігердің, ауылдық округтер бойынша шаруа қожалықтардың техникалары жұмылдырылды.Аудан әкімі Ардақ Ибраимов сен­білік жұмыстарымен танысып, жал­пы халыққа тұрғын үй маңында көркейту-көгалдандыру, санитарлық тазалықты сақтау керектігін, туған жердің таза болуын тек сенбі күні ғана емес, үздіксіз бақылап, тазалық сақтаудағы мәдениеттілікті арттыру қажеттігін де атап өтті және көркейту-көгалдандыру жұмыстарына белсенді қатысқан азаматтарға алғыс айтты.<blockquote>– Апта сайын сенбілік жұмы­сына белсене атсалысамын. Аудан басшысының бастамасымен үздіксіз жүргізіліп жатқан сенбілік жұмысына кент тұрғындары тұрақты түрде ат салысып, кенттің көркеюіне өзін­дік үлесін қосуда. Сенбілікте мекеме қыз­меткерлерінен бөлек зейнет­кер қарт­тарымыз бен жасөс­пірім­дер де белсенділік танытуда. Тазалық жұмыстарында талдар әктеліп, саябақтардың іші мен мекемелердің айналасы қоқыстан арылды, – дейді кент тұрғыны Бота Нұрмаханова.&nbsp;</blockquote>Сенбілік барысында Жалағаш кентін­дегі орталық алаңда орналасқан Ұлы Отан соғысы ардагерлерінің ес­керткіші айналасында тазалық жұ­мыс­тары жалғасын тауып, оған аудан­дық ардагерлер кеңесі, ақсақалдар кеңе­сінің мүшелері белсене атсалысты.&nbsp;Көктем келгелі аудандағы меке­ме­лер жұмыс орнының маңайын, кент тұрғындары жаппай сенбілікке шығып, ауласын ретке келтіруде. Бірақ бұл тек мекеме мойнындағы іс емес. Сол себепті тұрғындар ауласын сенбілікке сілтемей, өздері тазартқаны жөн.Жалпы тазалық ортақ міндет екені айтпаса да түсінікті. Сондықтан мұндай шақта жұмыла іс қылған абзал. Кешегі сенбілікте аудан жұрты ауызбіршілік танытты. Әсіресе бізді соңғы уақытта ауылдық елді мекендерде де тұр­ғын­дардың мұндай жұмыстарда белсен­ділігі қуантады.

Тазалық жұмысында жалағаштықтар белсенді

<a href="https://kyzylorda-news.kz/">Kyzylorda-news.kz</a> Ел Президенті Қасым-Жомарт Кемелұлы Тоқаев Жолдауында кәсіпкерлік саласын дамыту мен бизнес идеяларды қолдау шаралары артып, мемлекет бизнеске көмек көрсету ісін жалғастыра беретінін айтқан болатын. “Үкіметке және "Атамекен" палатасына осы мәселе бойынша ұсыныс енгізіп, нақты іске көшуді тапсырамын. Жолдауда заңнамаға шағын кәсіпкерлік субъектілерін ірілендіруге ынталандыратын өзгерістер енгізуді тапсырдым. Салық шаралары, тексеруші органдардың тарапынан жүргізілетін тексерулерге белгілі бір иммунитет қалыптастыру, сондай-ақ мамандандырылған қолдау құралдары мен мемлекеттік тапсырыстарға қол жеткізу осы ынталандыру шараларының қатарына кіруге тиіс,”-деген болатын Қасым-Жомарт Тоқаев.&nbsp;Бұл бағытта Арал ауданында жүйелі жұмыстар жасалып келеді.&nbsp;Бүгінде жеке бизнесін ашқан жастар жетіп-артылады.&nbsp;Әсіресе шағын және орта бизнестен бақ іздейтіндер көп. Әлбетте, бұл жақсылықтың нышаны. Өйткені олар бизнеске үлес қосу арқылы елдің экономикасын демеп отыр. Дамыған елдерде экономиканың негізгі тірегі біздегідей шикізат емес, бизнес екенін ескерсек, жастардың бұл қадамы құптауға тұрарлық.Арал ауданында да осы бағытта жұмыс істеп, өз кәсібін дөңгелетіп отырған жастар жетерлік.&nbsp;Солардың бірі – қаламызға белгілі «Puro Gusto»тамақтану орталығыныңбасшысы, 2022 жылы «Үздік жас кәсіпкер» номинациясының иесі Бекзат Жанғазиев. Бүгін сол жас та болса өзіне қажетті,қызығушылығы бар кәсібін тауып, отбасына көмек қолын созған кәсіпкер туралы әңгіме тінін тарқатпақпыз.Жанғазиев Бекзат Мұратұлы 2001 жылы Арал қаласында қарапайым отбасында дүниеге келген Бекзаттың әкесі мемлекеттік қызметкер болып зейнетке шықса, анасы дәрігер болып жұмыс істейді.Қызығы Бекзат отбасында жеке кәсіппен айналысқан алғашқы жан.<blockquote>– «Кәсіпкер болу керек» деп бос сөзбен айта бергеннен адам кәсіпкер болып шықпайды.&nbsp;Ол жастайынан қай салаға икемді болса, соны дамыту керек деп ойлаймын. Уақыт өте келе бәрімізге бір саланы таңдауға тура келеді. Білімге, жаңашылдыққа ізденіс болумен қатар, өз-өзіңді дамытудан шаршамау керек. Кәсіпкер бір саланы өмір бойы алып жүрмеуі де мүмкін. Нарыққа қарай бейімделіп, жаңа жобаларға көңіл бөлетіндер жетерлік. Өзім де оқушы кезімнен кәсіп ашуды көп ойлайтынмын. Шыны керек қазір ешкімге тәуелді болмай, тұрақты табыс табу бәрінің арманы. Сол арман жетегінде ашылған кәсібім еді, – деп бастады Бекзат әңгімесін.</blockquote>Өзі қаладағы Н.Крупская атындағы №14 мектеп-лицейін 2018 жылы бітіріп, Алматы Технологиялық Университетін 2022 жылы «экономист»мамандығымен тәмамдаған.<blockquote>– Өз мамандығыммен жұмыс жасамаппын. Оның басты себебі студент кезімде басқа тамақтану жерлерінде жұмыс істеген болатынмын. Олардың ішкі жұмысын білгеннен кейін мектеп кезімнен бастау алған қызығушылығым артып, осы саланы тандадым. Оқу бітіріп, диплом алғаннан кейінгі басты жоспарым осы кәсіпті ашу болды. Сонымен алғашқыда ата-анамның, ағаларымның қолдауымен «Puro Gusto»-ны2022 жылы өз қаражатымызбен ашып бастағанбыз. Кейін 2023 жылы өз кәсібін ашуға ниетті немесе бұрынғы кәсібін кеңейтуге талпынысыбар жастарға арналған мемлекет тарапынан 2,5 пайыздық жеңілдікпен 5 млн. теңге көлемінде микрокредит алдым. Алынған қаражатқа тамақтану орталығын кеңейтіп, ас мәзіріне де бірнеше жаңа тағам түрлері қостық. Қазіргі таңда бірнеше жас буынды жұмыспен қамтып отырмын. Оның өзі мен үшін бір белес, – дейді жас кәсіпкер.</blockquote>Тамақтану орталығының атауы қазақ тілінде «жай ғана қалау» мағынасын береді.&nbsp;Мұнда ең негізгі акцент қойылған өнімдердің бірі кофе және тез дайын болатын фаст-фуд өнімдері. Айтқандай-ақ, бұл жерден кез келген талғамдағы түрлі кофе түрінің дәмін татуға болады. Іші жанға жайлы, жағымды атмосфера мен жылулық беретін орталықтан тұтынушылар да арылмайды.<blockquote>– «Puro Gusto»-ға ең алғаш ашылған сәтінен бастап тұрақты келемін.&nbsp;Кейде жұмыстан немесе оқудан шаршағанда демалып, ойыңды сергіту үшін таптырмас орын. Мұнда жағымды музыка тыңдап, кітап оқуға, тіпті кино көруге, кейде бітпей қалған қағаздарымды жазуға да болады. Бірнеше рет ата-анаммен, сіңіліммен де келгенмін. Оларға да ас мәзірі ұнады. Қазір кіммен жүрсем де, сыртқа қыдырып шыққан сайын осында келеміз. Ас мәзірінен басқа түрлі ойындар ұйымдастыратыны, қызмет көрсету сапасының жоғары деңгейі ұнайды, – деп пікір білдірді студент Диана.</blockquote>«Кәсібім – нәсібім» дегендей, несібесін кәсіпкерліктен тапқан жандардың бірі Бекзат алдағы уақытта үлкен жоспарлары барын айтып қалды. Осындай аудан экономикасының дамуына үлес қосып, жұмысын тұрақты табыс көзіне айналдырған кәсіпкер жастардың ісіне береке тілейміз.

Ел экономикасын дамытуға үлес қосқан жас кәсіпкер

<a href="https://kyzylorda-news.kz/">Kyzylorda-news.kz</a> «Отбасы» ұғымын адамзаттың алтын діңгегіне баласақ, артық айтқан болмас едік. Себебі оның ұрпаққа ықпалын ешбір күшпен салыстыруға келмес. Мейірім мен махаббаттың ұштасқан ордасына айналған бұл орта тәрбиенің бастауы, ұлттық құндылықтарды бойға сіңірудің алғашқы мектебі болуымен бағалы. Десе де, отбасылық жағдайлардың күрделеніп, шаңырақтың шайқалар сәттері болатыны рас. Бұл түсініспеушіліктердің салдары ажырасу факторларына әкеп соғуда.Жасыратыны жоқ, елімізде ажырасу дерегі жыл сайын артып келеді. Соңғы мәліметтерге сүйенсек, ағымдағы жылдың бірінші тоқсанында республика бойынша 26,7 мың неке тіркелсе, 8,8 мың ажырасу дерегі анықталған. Некенің күйреуіне әкелген бұл мәселенің себептері де көп. Бірақ «басты себеп не?» деген сауалға нақты жауап табу қиын.&nbsp;Ал Шиелі ауданындағы ахуалға келер болсақ, жыл басынан бері сот бөліміне барлығы 75 арыз келіп түскен. Бұған былтырдан қалған 23 арызды қоса есептесек, бүгінде барлығы 98 отбасының ажырасуға ниет білдіргенін байқаймыз. Расында, мемлекеттің іргетасы жанұядан басталары анық. Бұл – адам баласының тәрбиемен сусындап, өсіп-өніп, түлеп ұшатын алтын ұясы. Ал жақсы мен жаманның, арам мен адалдың аражігін ұқтырып, адалдық пен тектілік қасиеттерді ұрпақ санасында қалыптастыруға сеп болатын жандар, осы отбасының ұйытқысы – әке мен ана болса керек.&nbsp;Асыл дініміз тұрғысынан да отбасы мәселесіне көп көңіл бөлініп, қоғамның ең маңызды құрылымына бағаланған. Мұнда, ең алдымен, сыйластық пен сенім болуы шарт. Егер бұл қасиеттер ерлі-зайыпты жандардың тарапынан қатар болса, олардың бір-біріне деген қарым-қатынасы мен сезімі арта түспек. Сондықтан отбасылық өмір қуаныш әкелу үшін шынайы сүйіспеншілік, терең құрмет және береке-бірліктің болғаны аса маңызды.&nbsp;Әлемде жыл сайын атап өтілетін «Отбасы күні» мерекесі осындай жанұядан басталатын құндылық негіздерін айқындап, рухани болмысты жоғалтпауға үндейді. Шынында, сынақтарды сабырға жеңдіріп, өмір үйрететін сабақтардан сүрінбей өтуге әрекет қылсақ, көп нәрсе ұтар едік. Айтуға оңай, әрине. Ал аядай ғана ауданда жыл сайын 100-ден астам жанның дәм-тұзы жараспай, шаңырағы шайқалуына не себеп?

Шиеліде ажырасу мәселесі төмендеді ме?

<a href="https://kyzylorda-news.kz/">Kyzylorda-news.kz</a> Аудан әкімі Ардақ Ибраимов жұмыс сапарымен бірқатар ауылда болды. Мақсат – елді мекендердің тыныс-тіршілігімен танысып, жүргізіліп жатқан жұмыстардың жай-күйінен хабардар болу. Ол ең алдымен қоғам қайраткері Темірбек Жүргенов ауылына табан тіреп, елді мекеннің тұрғын үй секторының инженерлік-коммуникациялық инфрақұрылымының электрмен жабдықтау жұмыстарымен танысты.&nbsp;Бүгінде ауылда мердігер мекеме «Энергомера» ЖШС арқылы электр­мен жабдықтау жұмыстары басталған. Жобаның сметалық құны – 423, 871 млн теңге. Оның ішінде құрылыстың сметалық құны – 288, 542 млн теңгені құрайды, жабдықтар – 66, 405 млн теңге. Ал басқа жұмыстар мен шығындар 68, 923 млн теңгені құраған. Желінің ұзындығы ВЛЗ-10 кВ 7 729 м, КЛ-10 кВ 200 м, ВЛИ-0,4 кВ 20 271 метрді құрайды. Қазіргі таңда жоспарланған 314 тұрғын үй тұсына бағана орнату жұмыстары жүргізілуде. 6 айда Т.Жүргенов ауылының тұрғын үй секторларын электрмен жабдықтау жұмыстары толық аяқ­та­лады.&nbsp;Елді мекендегі электр же­лі­лерін қайта жаңғырту жұ­мыс­та­ры­мен танысқан аудан әкімі Ардақ Әбдіғап­парұлы әдеттегідей мерді­гер меке­менің назарына әуелі жобаның сапалы аяқталуы қажеттігін салды. Сондай-ақ сала бойынша жауапты бөлім басшыларына елді ме­кен­дегі көптен бері оң шешімін тап­қан, тұр­ғындар сұранысындағы жүйелі істің мер­зімінде, са­палы аяқ­тауын қадағалауды тапсырды.&nbsp;Мұнан кейін аудан басшысы&nbsp; ауыл арда­гер­лерімен пікір алмасып, ұсыныс­тарын тыңдады. Ауылда бастау ал­ған ауқымды жобаның іске асуы бары­сында тұрғындар пікірі маңызды екенін де тілге тиек етті.&nbsp;Облыс әкімінің тапсырмасына сәй­кес ауыспалы егісті сақтай оты­рып, әлеуметтік маңызы бар азық-түлік өнімдерін өндіруде ау­дан бойынша «Ер-Әлі» шаруа қо­жа­лығы көш бастап тұр. Сөзімізге дәлел ретінде айта кетейік, қыс бойы өткізілген жәрмеңкелерде аталған шаруашылық картоп, сәбіз және қызылша өнімдерін өндірушіден делдалсыз тұтынушыларға арзан ба­ғада ұсынды. Күрішпен кірісін еселеген Сыр өңірінде соңғы жылдары «Ер-Әлі» шаруа қожалығының алмаба­ғында өскен жемістер «Құрманбай ата алмасы» атауымен нарықта өз орнын қалыптастырып үлгерді.&nbsp;Іс-сапар барысында аудан әкімі Ардақ Ибраимов шаруашылық төра­ғасы Әліби Бекжановпен бірге қызу тірліктің куәсі болды.&nbsp;Аталған шаруашылық 2017 жыл­дан бастап алма өсіруді қолға алған. «Құрманбай ата» деп аталатын бақтың өнімі бүгінде облыс орталығы мен өзге аудандардағы сауда орталықтарының сөрелерінде сатылымда тұр.&nbsp;Былтыр барлығы 5 гектарға егілген 12 600 көшеттен 20 тонна алма жи­налған. Ал биыл шаруашылық төра­ғасының айтуынша, 30-40 тоннаға дейін өнім жинау жоспарда бар.&nbsp;Бақта алманың «Гала», «Голден», «Симиринко», «Фуджи» сорттары бар. Тіршілігі тындырымды кәсіп иесі, алмабақтың бағбаны былтыр 310 қаз балапандарын әкелген. 2023 жылы оң нәтижесін берген бұл бас­тама шаруашылықтың құс етін өнді­румен айналысуына сеп болған.&nbsp;Аудан әкімі өнімді істің бабын тапқан шаруашылықтың тұрғындарға ұсынған татымды өнімдері мен жаңа жұмыс орындары басқаға үлгі етіп көрсе­терлік іс екенін жеткізді.&nbsp;Жалпы бұдан бөлек Темірбек Жүр­генов ауылында 90-ға жуық кәсіпорын бар. Тіркелген кәсіпкерлік субьектісінің бүгінде 99 пайызы жұмыс жасап тұр. Бұрын елді мекенде тек егін мен мал шаруашлығында жергілікті тұрғындар кәсібін дөңгелентсе, бүгінде сала түрленген. Қай саланы алып қарасақ та өрлеу мен өсу бар. Ауылда 1 се­рік­тестік, 10 шаруақожалық егін ша­руа­шылығымен айналысады. Олар былтыр 4 021 гектар жерге егін еккен. Оның 1 896 гектарына Сырдың басты дақылын сепкен. Мұнан бөлек 1 135 гектарға ескі жоңышқа күтімге алы­нып, 492 гектарға жаңа жоңышқа егіл­ген. Нәтижесінде олар мол ас­тық­тан тау тұрғызып, жыл сайын ре­кордтық өнімге қол жеткізіп жүр.&nbsp;Аудан басшысы бүгінге дейін ауыл­дарға жасаған жұмыс сапарында әрбір жобаның сапасына мән беру қажеттігін қатаң ескертуден еш жалыққан емес. Бұған дейін Таң ауылдық окру­гіне барған ол ауыл­дың амбулаториясына жөндеу жұмыстарын жасауды, №118 орта мек­тептің абаттандыру жұмыс­та­рын, балалар ойын алаңы мен фут­бол алаңын сапалы жүзеге асыру қа­жеттігін жеткізген болатын. Осы ай­тылған тапсырмалардың орында­луымен танысу үшін ол арнайы Таң ауылдық округіне де табан тіреді.&nbsp;Ауылдық округте бастау алған жобалармен танысып шыққан аудан әкімі Ардақ Ибраимов жауапты сала басшыларына нәтижелі іс болу үшін қатаң бақылау қажеттігін жеткізіп, ел игілігі үшін салынып жатқан жо­баларды жоғары сапада жүзеге асыруды тапсырды.&nbsp;Сондай-ақ ауылдағы көркейту-көгал­дандыру жұмыстарын қарқынды жалғастырып, облыс әкімі Нұрлыбек Нәлібаевтың тапсырмасына сәйкес іске асырылып жатқан кәсіпкерлік мақ­саттағы бастамаларды тиянақты аяқ­тауды міндеттеді.Жалпы Таң ауылының даму дина­микасына келсек, тарқатып жазар дү­ние көп. Әсіресе мұндағы жарқын жобалардың жүзеге асуы жергілікті тұрғындардың тұрмыс сапасына оң әсерін тигізуде. Ауыл – тынымсыз тірлік жасап жатқан елді мекендердің бірі. Әсіресе ауылды көркейту, дамыту жо­лында жыл сайын жүйелі жұмыстар атқарылуда.&nbsp;Осылайша іргелес жатқан елді мекендердің тыныс-тіршілігімен таны­сып, тұрғындардың талап-тілегіне құ­лақ түрген аудан басшысының жұмыс са­пары ауыл ақсақалдарының бата­сымен қорытындыланды.&nbsp;

Жарқын жобалар ел игілі үшін жасалады

<a href="https://kyzylorda-news.kz/">Kyzylorda-news.kz.</a> Аналар күні елімізде мамыр айының екінші жексенбісінен бастап атап өтіледі. Бұл мереке ана болудың маңыздылығын, аналарды құрметтеуді және олардың қоғамдағы рөлін дәріптеуге арналған. Сондай-ақ осы бағытта Неке және отбасы институтын нығайтуға бағытталған бірқатар іс-шара жоспарланған.&nbsp;Мерекелік іс-шараны облыстық қоғамдық даму басқармасының басшысы А.Есмаханов облыс әкімі Н.Нәлібаевтың алтын құрсақты аналарды құттықтау лебізінен бастады.&nbsp;Аталған жиынға Қызылорда қаласынан және облыстың 7 ауданынан «Алтын алқа» және «Күміс алқа» иегерлері қатысты. Аналарға деген құрметтің, ілтипаттың, құттықтаудың шектеулі мерзімі жоқ.&nbsp;Іс-шара барысында Алтын құрсақты ана, 10 баладан, 31 немере, 26 шөбере сүйіп отырған батыр ана Есекеева Балай Нәбиқызы (82 жаста, сауыншы, ауылдық кеңес депутаты болған, қазіргі таңда Әжелер ансамблінің мүшесі, Сырдария ауданының тұрғыны) және «Алтын алқа» иегері, 7 бала, 25 немере, 3 шөбере сүйіп отырған Сыздықова Жақсыгүл Смайлқызы (72 жаста, білім саласының ардагері, Шиелі ауданының тұрғыны) сөз сөйлеп, барша аналарға мерекелік құттықтау лебіздерін жеткізді. Сондай-ақ, жас батыр ана, «Алтын алқа» иегері, 7 баланың анасы Нұрғалиева Майра Мирғалиқызы (34 жаста, «Айбибі» балабақшасының меңгерушісі, Қызылорда қаласының тұрғыны) қоғамдық өмірде аналық парыз бен кәсіпті бірге алып жүру дағдылары туралы тәжірибесімен бөлісті.&nbsp;Сонымен қатар, «Анаға тағзым» орталығының директоры Молжанова Алтынай Бекмағамбетқызы облыста аналарға қолдау көрсету мақсатында атқарылып жатқан жұмыстар туралы хабарлама жасады.&nbsp;Мерекелік іс-шараға қатысушыларға облыс әкімінің атынан бағалы сыйлықтар мен гүлшоқтары табысталды. Аталған шара концерттік бағдарламамен жалғасын тауып, қатысушылар естелік фотоға түсті.<img src="https://knadmin.beoblood.kz/uploads/4d18f6ba_d6ac_4aba_85c7_c7cdde670ea6_962927826a.jpg" alt="4d18f6ba-d6ac-4aba-85c7-c7cdde670ea6.jpg"><img src="https://knadmin.beoblood.kz/uploads/872d5cd7_b615_416a_a34d_3bc4bbcb6f3a_fce4817fd7.jpg" alt="872d5cd7-b615-416a-a34d-3bc4bbcb6f3a.jpg">

Елімізде алғаш рет "Аналар күні" мерекесі аталып өтті

<a href="https://kyzylorda-news.kz/">Kyzylorda-news.kz</a> Механизатор егінмен айналысатын ауылдық жерде ең қажетті мамандықтың бірі саналады. Шаруа қожалықтарындағы техниканы уақытында ретке келтіріп, жұмыс жасауы осы маманның қолында. Оның кәсібилігі барлық ауыл шаруашылығы жұмыстарына ықпал етеді. Бүгінгі мақаламызға арқау болған кейіпкеріміз – осындай жауапты мамандықтың иесі, еңбек адамы Серік Бәтиев.Қос трактор түтіні будақтап атыз­дағы топырақ­ты әрі-бері ау­дарып, жер жыр­туда. Екеуі­нің де қимылы шалт, ал­қаптың ана шетіне теңдей жетіп, жаңа телімге бір уақытта түседі. Кере­мет көріністі тамсана та­ма­шалаған біз не ке­рек, ауыр тех­­ни­каны тізгін­де­ген мамандар­мен сұх­­­­бат құруды жөн деп шеш­тік. Осы­­лай­ша көкке көтерілген шаңға қара­май, атызға бойлай кірдік. Сөй­тіп жылдамдығын бәсеңдеткен бір тракторды тоқтатып, механизаторды әңгі­меге тарттық.&nbsp;«Жастайымнан тракторға отыр­дым. Содан түрлі көліктерді, «К-700»-ді, бұрынғы комбайнның түр-түрін жүр­гіздім. Бүгінде заман ағымына сай қазіргі жетілген техникаларды да иге­ріп алдық. Олармен жұмыс істеу қо­лайлы, жұмысың да өнімді, істен жиі шықпайды», деп бастады әңгімесін майталман механизатор.Иә, жастайынан ауыр еңбектен қаш­пай, техниканың, оның ішінде ауыл шаруашылығына арналған кө­лік­­тердің қыр-сырын меңгерген аға­мыз 2001 жылы Жалағаш ауданындағы «Сәрке батыр» ЖШС-на механизатор болып жұмысқа орна­­ласқан. Сәкең содан бері осы ша­руа­шылықта адал жұмыс істеп келеді.&nbsp;Шаруа адамының айтуынша, жұ­мыс уақыты әрқилы. Таңсәріде үй­ден шығып, тас қараңғыда қайтқан кездері де болыпты. Көктемде егіс алқабындағы жұмыстарға қызу кірісіп, тұқым себеді. Ал күзбен қатар келетін орақ науқанында маңдай термен өсірген өнімдерін шашпай-төкпей жи­нап алу бөлек әңгіме. Қақаған қыста бүкіл техниканы келесі науқанға дайын­дайды. Осылай өмірдегі еңбек жолы бір мезгілден келесі мезгілге дейін тығыз сабақтасып келеді. Еңбекқор, ісіне адал кейіпкеріміз ешқашан жұ­мысқа жеңіл қарамаған.&nbsp;Қуантарлығы, механизатор тіз­­гін­деген жер жыртатын трактор за­­манауи үлгіде жарақталған.&nbsp;Жай тех­ника емес, заманауи тетіктерімен жаб­дықталған. Компьютерленген, на­ви­гаторы, салқындатқышы бар. Бір сөзбен айтқанда, өнімді жұмыс істеуге барлық жағдай жасалған. Соның арқасында Сәкең күніне 10 гектардай жер жыртып, жалпы көктемгі жұмысын бір айдың ішінде тәмамдайды.Асқан кәсібилігінің арқасында ең­бек адамы ауыл азаматтарының ілти­патына бөленіп, сый-құрметке ке­неліп жүр. Тіпті озат қызметі үшін ша­руашылық тарапынан түрлі ба­ға­лы сыйақылардың да иегері бол­ған. Бір сөзбен айтқанда, өзінің еңбек­сүй­гіштігінің, кәсібилігінің арқа­сында ортада қадірлі, ұжымда сыйлы.Айта кетейік, Сәкең еңбек ететін серіктестік биыл күріштен бөлек 80 гектар алқапқа бидай егіпті. Сондай-ақ 70 гектар мақсарысы тағы бар. Мұнан бөлек 233 гектар алқапқа жаңа жоңышқа егіп, 420 гектар ескі жоңыш­қаны күтімге алған.&nbsp;

Қазақстан және Қызылорда облысының жаңалықтары: Қоғам