<a href="https://kyzylorda-news.kz/">Kyzylorda-news.kz</a> Қасым-Жомарт Тоқаев көлік-логистика саласы тоғыз жолдың торабында тұрған Қазақстанның өсіп-өркендеуіне серпін беретін маңызды бағыт екеніне тоқталып, бүгін еліміз үшін стратегиялық мәні айрықша ауқымды жобалардың құрылысы басталатынын мәлімдеді.<blockquote>– «Жол – тіршіліктің күретамыры». Мемлекет осы саланы дамытуға әрдайым баса назар аударады. Біздің мақсатымыз – Қазақстанды Еуразиядағы негізгі транзит хабы ретінде дамыту. Мен мұны үнемі айтып жүрмін. Баршаңызға белгілі, еліміз Еуропа мен Азияны жалғайтын негізгі көпір саналады. Батыс пен Шығыс арасында құрлықпен тасымалданатын жүктің басым бөлігі Қазақстан арқылы өтеді. Сондықтан озық және заманауи көлік жүйесін қалыптастыру – алдымызда тұрған стратегиялық міндет. Жалпы, елімізде бұл бағытта көптеген шаруа атқарылып жатыр. Былтыр «Достық – Мойынты» темір жолының екінші желісі іске қосылды. Соның арқасында жүк тасымалы көлемі 5 есе артты. Сондай-ақ Алматы бекетін айналып өтетін теміржол желісі жұмыс істей бастады, нәтижесінде жүк жеткізу мерзімі айтарлықтай қысқарды. Ең бастысы, осындай ауқымды жобаларды өз мамандарымыз жүзеге асырып жатыр, – деді Мемлекет басшысы.&nbsp;</blockquote>Сурет: Ақорда

Президент автокөлік жолдары құрылысының басталуына арналған телекөпірде сөз сөйледі

<a href="https://kyzylorda-news.kz/">Kyzylorda-news.kz</a> Қалалық мәдени-демалыс паркінде «Отбасы құндылықтары – ұлт болашағы» атты ашық аспан астындағы тағылымды мәдени іс-шара өтті.&nbsp;Шаңырақ берекесін арттырып, ұлттық тәрбие мен дәстүрді дәріптеуге бағытталған рухани кешке ҚР Ұлттық ұланының 5547 әскери бөлімінің жеке құрамы мен жас сарбаздары арнайы қатысып, патриоттық рух танытты.<img src="https://knadmin.beoblood.kz/uploads/Whats_App_Image_2026_08_03_at_11_40_12_cd8e4925ef.jpeg" alt="Рухани мәдени іс-шара.jpeg">Кеш барысында елге белгілі зиялы қауым өкілдері, теолог-дінтанушы Б. Оспанов, «Құрмет» орденінің иегері, ақын М.Байдәулетов, үш дүркін «Алтын домбыра» иегері М. Ниязов және ҚР Мәдениет саласының үздігі, жырау М. Сүгірбай сөз сөйлеп, отбасы институтын нығайту, әке мәртебесі мен ана қадірі төңірегінде терең ой қозғады. Шара аясында әуезді әндер шырқалып, термелер мен жүрекке жетер жырлар орындалды.Отан алдындағы борышын өтеп жүрген 5547 әскери бөлімінің жас сарбаздары үшін бұл кеш ұлттық құндылықтарды бойға сіңіріп, рухани азық алатын тағылымды кездесуге айналды. Кеш соңы ел ағасы Келдібай Бектұрғановтың арнайы берген ақ батасымен қорытындыланды.<img src="https://knadmin.beoblood.kz/uploads/Whats_App_Image_2026_08_03_at_11_40_12_1_52452f4606.jpeg" alt="Рухани мәдени іс-шара.jpeg">

Қызылордада «Отбасы құндылықтары – ұлт болашағы» атты рухани-мәдени іс-шара өтті

<a href="https://kyzylorda-news.kz/">Kyzylorda-news.kz</a> «Заң мен тәртіп» қағидатын іске асыру аясында Қызылорда облысында учаскелік полиция инспекторлары алкогольдік ішімдіктерді заңсыз сату фактілерінің алдын алу, сондай-ақ қоғамдық орындарда мас күйде жасалатын құқық бұзушылықтар мен қылмыстардың жолын кесу бағытында күнделікті профилактикалық жұмыстар жүргізуде.Жыл басынан бері алкоголь өнімдерін өткізу талаптарын бұзған 181 азық-түлік дүкенінің сатушысына қатысты Қазақстан Республикасы Әкімшілік құқық бұзушылық туралы кодексінің 200-бабы бойынша әкімшілік хаттамалар толтырылып, сот қаулысымен 10 айлық есептік көрсеткіш (АЕК) мөлшерінде айыппұл салынды.Еске сала кетсек, ҚР ӘҚБтК-нің 200-бабына сәйкес мейрамханаларда, барларда, дәмханаларда және заңда көзделген өзге де орындарды қоспағанда, алкоголь өнімдерін бөлшек сауда арқылы:<ul><li style="text-align:justify;">сағат 23:00-ден келесі күнгі 08:00-ге дейін сатуға;</li><li style="text-align:justify;">құрамындағы этил спиртінің көлемдік үлесі 30 пайыздан асатын алкоголь өнімдерін сағат 21:00-ден келесі күнгі 12:00-ге дейін сатуға тыйым салынады.</li></ul><img src="https://knadmin.beoblood.kz/uploads/Whats_App_Image_2026_08_03_at_10_07_50_a155f0f4f5.jpeg" alt="Түнгі уақытта алкоголь өнімдерін сатқан 181 дүкен иесі әкімшілік жауапкершілікке тартылды.jpeg">Сонымен қатар, лицензиясы бар сауда орындарында 21 жасқа толмаған азаматтарға алкоголь өнімін сату дерегі бойынша 30 әкімшілік хаттама рәсімделді.Ал лицензиясы жоқ дүкендердің 21 жасқа толмағандарға алкоголь өнімін сатуы бойынша ҚР ӘҚБтК-нің 463-бабымен 7 әкімшілік хаттама толтырылды.Бұдан бөлек, ҚР ӘҚБтК-нің 440-бабының 2-бөлігі бойынша (кәмелетке толмағандардың қоғамдық орында масаң күйде жүруі немесе алкоголь өнімін тұтынуы) олардың ата-аналарына қатысты 27 әкімшілік хаттама рәсімделді.Құрметті кәсіпкерлер мен тұрғындар!Алкоголь өнімдерін заңнамада белгіленген уақыттан тыс сатуға жол берілмейді. Заң талаптарын сақтау – қоғамдық тәртіп пен азаматтардың қауіпсіздігін қамтамасыз етудің маңызды шарты. Заң талаптарын бұзу фактілері анықталған жағдайда кінәлі тұлғалар Қазақстан Республикасының қолданыстағы заңнамасына сәйкес әкімшілік жауапкершілікке тартылады.

Түнгі уақытта алкоголь өнімдерін сатқан 181 дүкен иесі әкімшілік жауапкершілікке тартылды

<a href="https://kyzylorda-news.kz/">Kyzylorda-news.kz</a> ҚР Премьер-министрінің бірінші орынбасары Нұрлыбек Нәлібаев Қызылорда қаласындағы медициналық нысандардың құрылыс барысымен танысты.Мемлекет басшысы қаламызда өткен Ұлттық құрылтайдың бесінші отырысында:"Қазір Қызылорда облысында, әсіресе, әлеуметтік салада жақсы жаңалық көп. Үш жылда осы аймақта 34 білім беру, 45 мәдениет және спорт нысаны салынды. Бұған қоса, 40 медицина нысаны ашылды. Менің тапсырмаммен Қызылордада 300 орынға арналған көпбейінді аурухананың құрылысы басталды. Көп ұзамай 500 орындық емхана және 200 орындық перзентхана салынады" деп атап өткен болатын.&nbsp;Нұрлыбек Машбекұлы Титов шағын ауданында салынып жатқан, бір ауысымда 400 келушіні қабылдайтын №5 қалалық емхананың құрылыс алаңына барды.Бүгінде аумағы 9 мың шаршы метрлік медициналық нысанның үшінші қабатының монолитті бағандары бетондалуда. Бірінші қабаттың аралық қабырғалары қаланып, ішкі инженерлік желілер тартылып жатыр. Жертөле қабатының аралық қабырғаларын қаланып біткен.&nbsp;Үкімет басшысының бірінші орынбасары Сырдария өзенінің сол жағалауындағы бір ауысымда 500 адам қабылдайтын емхана құрылысымен де танысты. Қазіргі уақытта нысанның іргетасы қалануда. Көпсалалы орталықта амбулаториялық-емханалық, диагностикалық және күндізгі стационарлық қызмет көрсетіледі. Мұнда жалпы және акушерлік-гинекологиялық тіркеу, педиатрия, мамандандырылған және шұғыл медициналық көмек, профилактика және мектеп медицинасы бөлімдері орналасады. Сондай-ақ, 50 төсектік күндізгі стационар, орталық стерилизация бөлімі, дәрілік қамтамасыз ету қызметі, оқу кабинеттері, 50 орындық аудитория және 200 орындық конференц-зал қарастырылған.Сол жағалаудағы 300 төсектік көпбейінді аурухана - бір ауысымда 100 адамды қабылдайтын емханасы бар медициналық кешен. Онда емхана, пансионат, операция, реанимация, химиотерапия және радиотерапия бөлімдері, физиотерапия, қабылдау және әкімшілік блоктары болады. Қазіргі уақытта абаттандыру және ішкі-сыртқы әрлеу жұмыстары жүргізілуде.Бұған дейін бетондалып, аралық қабырғалары қаланып және сырланып біткен, еденнің тегістегіш қабаты құйылған. Осы кезде керамикалық плитка төселіп, сыртқы қасбетке линеарлы панель орнатылып жатыр.<img src="https://knadmin.beoblood.kz/uploads/primeminister_kz2_fbc0fae0ee.jpg" alt="primeminister.kz2.jpg">

Медициналық нысандар құрылысы қарқынды жүргізілуде

<a href="https://kyzylorda-news.kz/">Kyzylorda-news.kz</a> ҚР Премьер-министрінің бірінші орынбасары Нұрлыбек Нәлібаев Қызылорда облысына жұмыс сапарында Мемлекет басшысының қолдауымен ашылған Ботаникалық бақ пен «Ai-Kerim» оқу-сауықтыру орталығына барды. Еске салсақ, Президент саябағы аумағындағы бұл нысандар аймақты Нұрлыбек Машбекұлы басқарған &nbsp;кезде салынған. Құрылысына 4,9 млрд теңге бөлінген Ботаникалық бақ жобасының бас мердігері - «Alem Qurylys AQ» ЖШС.&nbsp;Экологиялық мәдениет пен туризмді дамытуға бағытталған заманауи көпфункционалды кешенде бірнеше мемлекеттен арнайы әкелінген экзотикалық және тропикалық өсімдіктер бар. Атап айтқанда, Қытай, Оңтүстік Африка, Жапония, Оңтүстік және Орталық Америка, Австралия, Мадагаскар сияқты елдерде өсетін 92 түрлі 3300-ден астам өсімдік егілген. Жасыл желекке қолайлы жағдай жасау үшін микроклиматты автоматты басқарудың, суару және су дайындаудың заманауи инженерлік жүйелерімен жабдықталған.<img src="https://knadmin.beoblood.kz/uploads/primeminister_kz3_d4b19def44.jpg" alt="primeminister.kz3.jpg">Аймақта Президент қолдауымен халық игілігіне табысталған тағы бір нысан – жыл бойы қызмет көрсететін «AI-KERIM» оқу-сауықтыру орталығы. Құрылысына 10 млрд теңге бөлінген 300 орындық тынығу лагерінің материалдық-техникалық базасы әлемдік озық стандарттарға толық сәйкес келеді. &nbsp;Орталық аумағында әкімшілік ғимарат, ауқымды іс-шараларға арналған ивент-аймақ, 4 жайлы жатақхана және қонақүй үлгісіндегі ғимарат бар.Сонымен қатар балалар демалысын тиімді ұйымдастыру мақсатында барлық қажетті инфрақұрылым мен заманауи жабдықтар орнатылып, демалыс аймақтары жасақталған. Аумағы толық абаттандырылып, көгалдандырылған.&nbsp;Нұрлыбек Нәлібаев бастаған делегация спорт залын, бассейнді, кітапхананы, инклюзия, робототехника, 3D графика, ғарыш инженериясы, өнер, ғарыш және радио байланыс, астрономия, әуе және ұшқыш, биология кабинеттерін, лагерь ауласындағы амфитеатр, киіз үй және жатақхананы аралады.

Ботаникалық бақ пен оқу-сауықтыру орталығы келушілерге сапалы қызмет көрсетуде

<a href="https://kyzylorda-news.kz/">Kyzylorda-news.kz</a> ҚР Премьер-министрінің бірінші орынбасары Нұрлыбек Нәлібаев Президент саябағы аумағында салынып жатқан еліміздегі үшінші Президенттік кітапхана мен драма театр құрылысын көріп шықты.&nbsp;Еске салсақ, Мемлекет басшысы Ұлттық құрылтайдың бесінші отырысында Қызылорда қаласында тәулік бойы жұмыс істейтін кітапхана мен жаңа драма театр салуды тапсырған болатын.&nbsp;Осы тапсырмаға сәйкес сәуір айында екі нысанның іргетасы қаланды. Кітапхана құрылысына инвестор қаражаты есебінен 20 млрд теңге бөлінген. Жалпы аумағы 13 мың шаршы метр ғимаратта электронды оқу, конференция залдары, архив, баспахана, бағдарламалау және жасанды интеллектіні дамыту медиазертханасы, подкаст студиясы, оқырмандарға қызмет көрсету бөлімдері болады. Мұнда бір миллионнан астам кітап қорын сақтауға мүмкіндік бар. Жаңа нысан өңірдегі кітапхана инфрақұрылымын дамытып, ақпараттық-мәдени ортаны нығайтады.<img src="https://knadmin.beoblood.kz/uploads/Stroitelstvo_Prezidentskoj_biblioteki_i_dramteatra_nahoditsya_na_osobom_kontrole_Pravitelstva1_0d17b861d0.jpg" alt="Строительство Президентской библиотеки и драмтеатра находится на особом контроле Правительства1.jpg">Ал жаңа драма театрдың &nbsp;жалпы аумағы 4 мың шаршы метрден асады, 520 көрерменге арналған. Онда репетициялық залдар, студия және шығармашылық кеңістіктер, әкімшілік кабинеттер орналасады. Сондай-ақ, заманауи сахналық техника, қуатты дыбыс жүйесі және соңғы үлгідегі жабдықтар түрлі жанрдағы қойылымдарды жоғары деңгейде сахналауға мүмкіндік береді.Екі нысанның құрылыс барысымен танысқан Премьер-министрдің бірінші орынбасары жауапты сала басшыларына ғимараттардың сапалы әрі заманауи үлгіге сай болуын жіті қадағалауды тапсырды.&nbsp;Сырдария өзені жағалауындағы қорғаныс бөгетінің құрылысы да қарқын алған. Ұзындығы 3 шақырым аумақтың екі шақырымына геобекіткіш тор төселіп, таспен толтырылады. Қалған бөлігінде еңісті қалыптастыру жұмыстары жүргізілуде. Сонымен қатар, жағалауды шайылудан қорғайтын арнайы тірек құрылымдары орнатылуда. Тұрғындарға қауіпсіз әрі қолайлы болу &nbsp;үшін жаяу жүргіншілер жолы мен веложолақ салынады. Бүгінде жұмыстың 50 пайызы аяқталған.Бұдан кейін Нұрлыбек Машбекұлына алдағы уақытта өңірде жүзеге асатын жаңа инвестициялық жобалар таныстырылды. Олар - сол жағалауда салынатын &nbsp;тұрғын үй кешені, желдету және ауа баптау қондырғыларын құрастыру, санитарлық-техникалық бұйымдар құрастыру және өндіру жобалары, &nbsp;томат пастасы мен көкөніс пюресі өндірісі, сұйытылған табиғи газ өндіру, екі қорғасын-мырыш тау-кен байыту зауыты, көпфункционалды сауда-ойын-сауық кешені.&nbsp;<img src="https://knadmin.beoblood.kz/uploads/Stroitelstvo_Prezidentskoj_biblioteki_i_dramteatra_nahoditsya_na_osobom_kontrole_Pravitelstva2_dabf6a6c40.jpg" alt="Строительство Президентской библиотеки и драмтеатра находится на особом контроле Правительства2.jpg">

Қызылордада жаңа президенттік кітапхана мен драма театр салынуда

<a href="https://kyzylorda-news.kz/">Kyzylorda-news.kz</a> ҚР Премьер-министрінің бірінші орынбасары &nbsp;Нұрлыбек Нәлібаев Үкімет басшысының тапсырмасымен Қызылорда облысына &nbsp;жұмыс сапармен келді. Алдымен Президент саябағы аумағында бой көтерген тоғыз қабатты 15 тұрғын үйдің құрылыс барысымен танысты.&nbsp;Жалпы құны 22 млрд теңге болатын жоба республикалық бюджет есебінен қаржыландырылған. Бас мердігер «Мелиоратор» серіктестігі 8,2 гектар аумаққа заманауи үлгідегі 15 тұрғын үй кешенін салды. Жоба бойынша 945 пәтер пайдалануға беріледі. Оның 135-і бір бөлмелі, 540-ы екі бөлмелі және 270-і үш бөлмелі. Кешен қазан айында табысталады.<img src="https://knadmin.beoblood.kz/uploads/Pervyj_zamestitel_Premer_ministra_RK_oznakomilsya_s_hodom_stroitelstva_krupnyh_obektov_v_Kyzylorde_f28ecd58e0.jpg" alt="Первый заместитель Премьер-министра РК ознакомился с ходом строительства крупных объектов в Кызылорде.jpg">Бұдан кейін Нұрлыбек Машбекұлы облыс орталығында &nbsp;20 млрд. 61 млн теңгеге салынып жатқан &nbsp;«Қызылорда Арена» көпфункционалды спорт кешенінің құрылысын көрді. Жалпы аумағы 26 мың шаршы метр болатын кешен құрылысы 2025 жылы шілдеде басталған болатын. Мұнда 50 метрлік жүзу бассейні, халықаралық додаларды өткізуге арналған 2500 орындық зал, форумдар мен түрлі жиындарға арналған 300 орындық конференция залы қарастырылған.Қазір мұнда әрлеу, металл конструкцияларын орнату, терезелер мен витраждарды монтаждау, инженерлік және электр желілерін жүргізу, сондай-ақ аумақты абаттандыру жұмыстары қарқын алған.&nbsp;Ғимараттың қасбеті заманауи сәулет үлгісімен безендіріліп, витражы берік шынымен қапталады. Кешен пайдалануға берілгеннен кейін оқу-жаттығу жиындарын өткізуге толық бейімделеді. Нысанды биыл пайдалануға беру жоспарланған.Құрылыс барысымен танысқан Премьер-министрдің бірінші орынбасары жауапты сала мамандарына барлық жұмысты сапалы атқарып, белгіленген мерзімде аяқтауды, &nbsp;құрылыс сапасын тұрақты бақылауда ұстауды тапсырды.<img src="https://knadmin.beoblood.kz/uploads/Pervyj_zamestitel_Premer_ministra_RK_oznakomilsya_s_hodom_stroitelstva_krupnyh_obektov_v_Kyzylorde2_89f6f43491.jpg" alt="Первый заместитель Премьер-министра РК ознакомился с ходом строительства крупных объектов в Кызылорде2.jpg">

ҚР Премьер-министрінің бірінші орынбасары Нұрлыбек Нәлібаев Қызылордаға жұмыс сапарымен келді

<a href="https://kyzylorda-news.kz/">Kyzylorda-news.kz</a> «Заң мен Тәртіп» қағидаты аясында Қызылорда облысы Полиция департаментінде ҚР ІІМ чемпионатына жолдама беретін қоян-қолтық ұрыстан департамент қызметкерлері арасындағы іріктеу турнирінің салтанатты ашылу рәсімі өтті. Жарысқа облыстық департаменттің құрылымдық бөлімшелері мен аумақтық полиция бөлімдерінің қызметкерлері қатысуда.Турнирдің ашылу салтанатына Қызылорда облысы Полиция департаменті бастығының орынбасары полиция полковнигі Омаров Оралбек Тәубақабылұлы, ІІО ардагерлер кеңесінің төрағасы, отставкадағы полиция полковнигі Шаймағамбетов Әмірбек Бердібекұлы, сондай-ақ спорт саласының ардагерлері мен құрметті қонақтар қатысты. Жарыстың бас төрешісі – Қызылорда облысы жекпе-жек федерациясының президенті Дәулетов Дәуірбек Замирбекұлы. Төрешілер алқасының құрамында еліміздің чемпиондары мен халықаралық дәрежедегі спорт шеберлері қызмет атқаруда.Іс-шара барысында сөз сөйлеген полиция полковнигі Омаров Оралбек Тәубақабылұлы мұндай жарыстар қызметкерлердің жауынгерлік және дене даярлығын шыңдап, кәсіби шеберлігін арттыруда маңызды рөл атқаратынын атап өтті. Өз кезегінде ІІО ардагерлер кеңесінің төрағасы Шаймағамбетов Әмірбек Бердібекұлы қатысушыларға сәттілік тілеп, әділ әрі тартысты бәсеке болуына сенім білдірді.Турнир қорытындысы бойынша жеңімпаздар мен жүлдегерлер дипломдармен және медальдармен марапатталды. Атап айтқанда, 57 келі салмақ дәрежесінде Ғазиз Руслан Рустамұлы, 62 келіде Смағұл Ербол, 67 келіде Шанжархан Рамазан, 73 келіде Нұрланов Нұрислам, 80 келіде Сәдуақасов Ернар Сабырбекұлы, 88 келіде Мәлік Бекжан Бегалыұлы, 97 келіде Әбдіхай Заманбек және 97 келіден жоғары салмақ дәрежесінде Тынысбек Қуаныш Сәбитбекұлы І орын иеленіп, ҚР ІІМ чемпионатына жолдама алды.Айта кетейік турнир қорытындысы бойынша үздік нәтиже көрсеткен спортшылар Қызылорда облысы Полиция департаментінің құрама командасы сапында ҚР ІІМ чемпионатында облыс намысын қорғайтын болады.&nbsp;

Қызылордада қоян-қолтық ұрыстан ҚР ІІМ чемпионатына іріктеу турнирі өтті

Kurs.kz мәліметінше, қазіргі уақытта елорданың ақша айырбастау пункттерінде:<ul><li>доллар 469,01 теңгеден сатып алынады, 475,99 теңгеден сатылады;</li><li>еуро: сатып алу — 537,00 теңге, сату — 547,00 теңге;</li><li>рубль: сатып алу — 5,60 теңге, сату — 5,80 теңге;</li><li>юань 68,76 теңгеден сатып алынады, 73,30 теңгеден сатылады.</li></ul>Алматының ақша айырбастау пункттерінде:<ul><li>доллар: сатып алу — 472,36 теңге, сату — 474,57 теңге;</li><li>еуро: сатып алу — 542,54 теңге, сату — 547,99 теңге;</li><li>рубль 5,62 — 5,76 теңге аралығында саудаланады.</li><li>юань 68,44 — 70,99 теңге аралығында саудаланып жатыр.</li></ul>Сурет: freepik.com

Доллардың бүгінгі бағамы қандай?

Румынияның Бухарест қаласында өткен Халықаралық лингвистика олимпиадасында (IOL 2026) Оралдағы Назарбаев Зияткерлік мектебінің оқушысы Шыңғыс Қарасаев қола медаль иеленді. Ал Павлодардағы NIS оқушысы Аслан Ажибаев Құрмет грамотасымен марапатталды.Биылғы халықаралық білім додасына әлемнің 40-тан астам елінен 220-дан аса оқушы қатысты. Қатысушылар лингвистикалық заңдылықтарды анықтауға бағытталған күрделі тапсырмаларды орындап, логикалық және аналитикалық ойлау қабілеттерін сынға салды.Айта кетейік, беделді халықаралық лингвистика олимпиадасы (IOL) 2003 жылдан бері жыл сайын өткізіліп келеді. Оның басты ерекшелігі – олимпиада тапсырмаларын орындау үшін белгілі бір шет тілін алдын ала білу талап етілмейді. Қатысушылар берілген тілдік деректерді талдап, олардың құрылымы мен заңдылықтарын логикалық және аналитикалық ойлау арқылы анықтайды.<img src="https://knadmin.beoblood.kz/uploads/FB_IMG_1785659852227_0f0fbad9c0.jpg" alt="FB_IMG_1785659852227.jpg">

NIS оқушысы халықаралық лингвистика олимпиадасында қола медаль иеленді

«Заң мен тәртіп» қағидаты аясында балалардың терезеден құлауының алдын алу бойынша профилактикалық іс-шара өтті.Іс-шара барысында көпқабатты тұрғын үйлердің тұрғындарымен түсіндіру жұмыстары жүргізіліп, балалар қауіпсіздігін қамтамасыз ету жолдары кеңінен насихатталды. Сондай-ақ, қауіптің алдын алу мақсатында тұрғын үйлердің терезелеріне арнайы қорғаныс бекіткіштері орнатылды.Талдаулар көрсеткендей, балалардың терезеден құлауы тұрмыстық жағдайда жиі кездесетін жарақаттану себептерінің бірі болып қалып отыр. Әсіресе жаз мезгілінде терезелердің жиі ашық болуы қайғылы оқиғалардың туындау қаупін арттырады. Ең жоғары қауіп тобына 2–5 жас аралығындағы балалар жатады. Бұл жастағы балалар ашық терезенің және маса торының қауіпсіз еместігін толық бағалай алмайды.Жыл басынан бері еліміз бойынша балалардың терезеден құлауының 169 дерегі тіркеліп, оның 14-і қайғылы жағдаймен аяқталған. Мұндай оқиғалардың негізгі себептері – балаларды қараусыз қалдыру, терезелерге еркін қолжетімділік және қауіпсіздік талаптарының сақталмауы.Профилактикалық іс-шара барысында ата-аналарға балаларды ешқашан қараусыз қалдырмау, жиһаздарды терезе маңына орналастырмау, терезелерге арнайы қорғаныс құрылғыларын орнату және маса торына сүйенудің қауіпті екені түсіндірілді.Қызылорда облысы Полиция департаменті мен облыстық Төтенше жағдайлар департаменті ата-аналарды балалардың өмірі мен денсаулығына жауапкершілікпен қарап, қауіпсіздік талаптарын қатаң сақтауға шақырады.<img src="https://knadmin.beoblood.kz/uploads/IMG_20260801_WA_0005_6b8a7c7bd1.jpg" alt="IMG-20260801-WA0005.jpg">

«Заң мен тәртіп» қағидаты аясында профилактикалық іс-шара өтті

Қармақшы ауданы әкімінің тапсырмасына сәйкес дәстүрлі түрде ұйымдастырылатын «Ел іші – өнер кеніші» мәдени шарасы алғаш рет Төретам кентінде өтті.Тағылымды шарада аудан әкімінің орынбасары Диас Асылбекұлы құттықтау сөз сөйлеп:<blockquote>– Бүгінгі кештің маңызы ерекше. Өйткені ауданымызда дәстүрге айналған бұл мәдени жоба алғаш рет қасиетті Төретам кентінде ұйымдастырылып отыр. Осы уақытқа дейін Жосалы кентінің орталық алаңында өткізіліп келген игі бастаманың Төретам төрінде жалғасуы – мәдениетіміздің өрісін кеңейтіп, елді мекендердегі рухани өмірді жандандыруға бағытталған маңызды қадам, – деп атап өтті.</blockquote>Кеш барысында аудан өнерпаздары ән мен жырдан, күй мен биден шашу шашып, көрермендерге көтеріңкі көңіл күй сыйлады. Ұлттық нақыштағы көрмелер, өнер көрсетілімдері мен әсерлі музыкалық туындылар көпшіліктің ыстық ықыласына бөленіп, мәдени кештің мазмұнын айшықтай түсті.Ашық аспан астында өткен тағылымды шараға Төретам кентінің тұрғындары мен қонақтары белсене қатысып, жергілікті өнерпаздардың өнеріне зор қошемет көрсетті.Алғаш рет Төретам кентінде ұйымдастырылған «Ел іші – өнер кеніші» мәдени жобасы тұрғындарға ерекше әсер сыйлап, ел бірлігі мен ұлттық өнерді ұлықтайтын игі бастама ретінде жоғары бағаланды.<img src="https://knadmin.beoblood.kz/uploads/FB_IMG_1785646824639_a9d8b77c14.jpg" alt="FB_IMG_1785646824639.jpg">

Қазақстан және Қызылорда облысының жаңалықтары: Қоғам