<a href="https://kyzylorda-news.kz/">Kyzylorda-news.kz</a> Бүгін – Сыр өңіріндегі ғана емес, ел өміріндегі айтулы күн! Өйткені экономиканың күретамыры саналатын отандық жол инфрақұрылымын жетілдіру тарихының жаңа парағы ашылды! Халық көптен күткен, көлік жүргізушілері мен жолаушылардың арманына айналған «Қызылорда-Жезқазған» жолы пайдалануға берілді.Салтанатты рәсімге облыс әкімі Нұрлыбек Нәлібаев, «Қазавтожол» ҰК» АҚ басқарма төрағасы Дархан Иманашев, құқық қорғау органдарының бірінші басшылары, облыстық мәслихат хатшысы Мұрат Тілеумбетов, депутаттар және ардагерлер қатысты.Аймақ басшысы бұл жолдың өңір экономикасына, өндірістің өркендеуіне, тұрғындардың әл-ауқатының артуына тигізетін оң ықпалы мен ерекше маңызын атап өтті.<blockquote>«Бүгін – аймағымыз үшін тарихи күн! «Қызылорда-Жезқазған» автомобиль жолының ашылу рәсімінде бас қостық. Халқымыз ұзақ жылдан бері армандап келген автожолды салуға қолдау көрсеткен Мемлекет басшымыз Қасым-Жомарт Кемелұлына барша Сыр жұртшылығының атынан зор ризашылығымызды, шынайы алғысымызды білдіреміз.Республикалық маңызы бар автомобиль жолы туралы мәселе Тәуелсіздік алған кезеңнен бері бірнеше мәрте көтерілді. Ауа райының қолайсыздығына қарамастан, тұрғындарымыз қара жолмен Елордаға, Ұлытау, Қарағанды облыстарына қатынады. Астанаға 2 мың шақырымнан астам жол жүріп, Балқаш арқылы да барды.Енді міне, Президентіміздің ерекше қолдауының арқасында қанша жылдан бері халқымыз көтерген өзекті мәселе өз шешімін тапты. Облыс аумағындағы 216 шақырым жол толық қайта жаңғыртудан өтіп, тиісті жұмыстар аяқталды. Жобаны жүзеге асыруға 84 млрд. теңге бөлінді.Бұрынғы өткен бабалардан қалған «Бақ, қайда барасың, ынтымағы жарасқан елге барамын», – деген жақсы сөз бар. Әрдайым бірлігіміз бекем, ынтымағымыз ырысты болсын! Жүргізушілер мен жолаушыларға әрдайым ақ жол, сәт сапар тілейміз! Жаңа жол берекенің бастауы болғай», – деді Нұрлыбек Машбекұлы.</blockquote>Рәсімде ауқымды жобаның жүзеге асуына үлес қосқан құрылысшылар мен инженерлерге, жол саласының мамандарына облыс әкімінің Алғыс хаты табысталды. «Қазавтожол» ҰК» АҚ басқарма төрағасы Дархан Иманашев, облыстық ардагерлер кеңесінің төрағасы Серік Дүйсенбаев құттықтау сөз сөйледі.Негізі «Қызылорда-Жезқазған» жолының ашылуы келесі жылға жоспарланған болатын. Халықтың сұранысы ескеріліп, мерзімінен бұрын пайдалануға берілді.<img src="https://knadmin.beoblood.kz/uploads/588310925_2461691284226369_5897200104540059547_n_16d35524f7.jpg" alt="588310925_2461691284226369_5897200104540059547_n.jpg"><img src="https://knadmin.beoblood.kz/uploads/590425837_2461691577559673_2693692616413657905_n_d4c9225201.jpg" alt="590425837_2461691577559673_2693692616413657905_n.jpg">Бұрын сапарға шыққандар екі аралықта 20 сағат жол жүретін. Енді жаңа жолға түскен жолаушылар 16 сағатта діттеген жеріне барады. Жол тегіс, сапасы жоғары, қауіпсіздік, жайлылық ескерілген.Ұлытау облысының аумағында басталған құрылыс жұмыстары аяқталып, жаңа жол пайдалануға берілгенде Астанаға бағыт алған көлік 12 сағатта жететін болады.Бүгінде «Қызылорда-Жезқазған» жолын «Батыс Еуропа-Батыс Қытай» автодәлізіне қосатын 25 шақырымдық айналма жол салатын мердігер мекеме анықталуда. Жақын күндері құрылысы басталады. Жоба құны – 46 млрд. 3 млн. теңге.<img src="https://knadmin.beoblood.kz/uploads/586964906_2461691604226337_7306959996438302161_n_ccf1f94fb7.jpg" alt="586964906_2461691604226337_7306959996438302161_n.jpg">Республикалық маңызы бар жол көлік қатынасын едәуір жеңілдетіп, жүк тасымалының тиімділігін арттырады. Жол бойында заманауи сервистік қызмет көрсететін пункттер бой көтеріп, шағын және орта бизнес жанданады. Аймақтар арасындағы әлеуметтік-экономикалық интеграция нығая түседі.Фото: Қызылорда облысы әкімінің баспасөз қызметі

«Қызылорда- Жезқазған» жолы пайдалануға берілді

<a href="https://kyzylorda-news.kz/">Kyzylorda-news.kz</a> Қазақстан өңірдегі ең мықты іргелі өзгерістерді көрсетіп, 2026 жылы кредиттік рейтингтің көтерілуіне дайын екендігін дәлелдеді. Бұл жағдай жаһандық портфельдік инвесторлар үшін бірегей мүмкіндік ашып отыр, деп хабарлайды <a href="https://kaz.zakon.kz/">Zakon.kz.</a>Frontier Markets көшбасшысыBank of America (BofA) жаңа шолуын жариялап, Қазақстанды 2026 жылға арналған “фронтирлік экономикалар” арасындағы ең тартымды инвестициялық бағыттардың бірі деп атады.Алдымен “фронтирлік нарықтар” (Frontier Markets) дегеннің мәнін түсіндіріп өтсек. Бұл – экономикалық дамудың ертерек кезеңіндегі елдер. Олар ірі дамушы нарықтарға (Қытай, Бразилия, Үндістан сияқты Emerging Markets) қарағанда төмен капитализациямен, төмен өтімділікпен және жоғары тәуекелмен сипатталады. Алайда тез өсім есебінен жоғары табыс ұсына алады. Мұндай нарықтар қатарына Кувейт, Аргентина, Вьетнам, Нигерия, Пәкістан және Қазақстан кіреді.BofA сарапшыларының пікірінше, Қазақстанда қазір инвесторлардың қызығушылығын арттыратын сирек кездесетін қолайлы факторлар жиынтығы қалыптасқан. Бұған дейін инвесторларды жұмсақ бюджет саясаты алаңдататын, алайда бүгінгі жағдайда бұл бағытта түбегейлі өзгерістер байқалады.Үш негізгі табыс факторыЭкономист Елдар Шамсутдиновтың айтуынша, Bank of America аналитиктері Қазақстанды суверенді қарызға инвестициялау мен carry trade стратегиясы үшін ең үздік идеялардың қатарына шығаратын үш басты себепті атап көрсетеді:<ol><li>Фискалдық консолидация (бюджетті тәртіпке келтіру). 2026–2028 жылдары үкімет “фискалдық қайта құруды” жүзеге асырады деп күтіледі. Бұл бюджет саясатының қатаюы мен жаңа салықтық шешімдерді қамтиды. Осы өзгерістер елдің кредиттік рейтингін көтеруге негіз қалайды.</li><li>Инфляцияның құрылымдық баяулауы. Экономиканың “суынуына” байланысты баға өсімі одан әрі төмендейді деген болжам бар.</li><li>Теңгедегі мемлекеттік бағалы қағаздар нарығының өсуі. KZT-құралдардың көлемі мен белсенділігі артып келеді.</li></ol>Бұл инвесторлар үшін нені білдіреді?BofA сарапшылары нарық бұл оң өзгерістерді әлі толық ескермегенін атап өтеді. Соның нәтижесінде:<ul><li>Қазақстанның суверенді облигациялары (KAZAK EXD) нарықтық құнынан төмен бағалануда.</li><li>Теңге және қысқа мерзімді мемлекеттік облигациялар фронтирлік нарықтар арасындағы ең үздік инвестициялық идея деп аталды.</li><li>2026 жылдың екінші тоқсанында базалық мөлшерлеменің елеулі төмендеуі және инфляцияның баяулауы carry trade үшін қолайлы жағдай жасайды.</li></ul>Анықтама: Carry Trade – инвестор төмен мөлшерлемелі валютамен (мысалы, иена немесе еуро) қарыз алып, жоғары пайыздық мөлшерлемелі елдің активтеріне (бұл жағдайда Қазақстан облигациялары немесе депозиттері) инвестициялайтын стратегия. Пайда мөлшерлемелердің айырмасынан қалыптасады және жоғары мөлшерлемелі ел валютасы (теңге) нығайса, табыс одан әрі артады. Тәуекелі жоғары, бірақ табысы да жоғары болуы мүмкін стратегия.Қазақстан мен Өзбекстан: айырмашылық неде?Аналитиктер Өзбекстанның да әлеуетін атап өтеді: елдегі жекешелендіру және алтын қорының артуы қаржылық көрсеткіштерді жақсартып отыр. Алайда Елдар Шамсутдиновтың айтуынша, Қазақстанның артықшылығы – “үй тапсырмасын” орындап, кредиттік рейтингті жақсартуға формалды түрде толық дайын болуы.“Сонымен қатар, BofA 2026 жылы 3 млрд доллар көлемінде жаңа қарыз алу болжамын келтіреді, бірақ фискалдық көрсеткіштердің жақсаруын ескере отырып, бұл тәуекелді басқарылатын деңгейде деп бағалайды”, – дейді ол.Осылайша, әлемдік ірі инвесторлар үшін қорытынды айқын: Қазақстан 2026 жылға недооцененный ел ретінде кіріп, өңірдегі ең күшті фундаменталды өзгерісті көрсетіп отыр және кредиттік профилін жақсарту ықтималдығы жоғары. Bank of America стратегтері Қазақстанды реформалар мен жоғары табыстылықтың сирек үйлескен нүктесі ретінде бағалайды.Айта кетейік, Қазақстан экономикасы әлемдегі ең сенімді өсім қарқынының бірін көрсетуде. 2025 жылдың он айының қорытындысы бойынша елдің ЖІӨ-сі 6,4%-ға артты. Ал ЭЫДҰ болжамы бойынша, биылғы жылы жаһандық ЖІӨ өсімі бар болғаны 3,2%-ды құрайды.Ranking.kz мамандарының пайымынша, мұндай нәтиже ішкі сұраныстың кеңеюі, инвестициялық белсенділіктің артуы және негізгі салалардың қалпына келуі есебінен қалыптасуда. Қызмет көрсету, сауда, өнеркәсіп және агроөнеркәсіп кешені секілді экономиканың барлық дерлік секторында оң динамика байқалып отыр.ЖІӨ өсіміне ең үлкен үлесті өнеркәсіп (7,3%) қосты, ол жалпы өсімнің 30%-дан астамын қамтамасыз етті. Сауда және көлік салаларымен бірге бұл сектор ЖІӨ өсімінің 70%-дан астамын қалыптастырды.

Bank of America: Қазақстан 2026 жылдың "ең үздік инвестициялық бағытына" айналды

<a href="https://kyzylorda-news.kz/">Kyzylorda-news.kz</a>&nbsp; Сырдария ауданына қарасты Асқар Тоқмағанбетов ауылында және Тереңөзек кентінде мобильді қабылдау өтті.Іс-шараға «AMANAT» партиясы Қызылорда облыстық филиалының төрағасы Жандос Базартай, облыстық мәслихаттағы «AMANAT» партиясы фракциясының жетекшісі Жорабек Нұрымбетов, партияның Сырдария аудандық филиалының төрағасы Ержан Әжікенов, облыстық мәслихат депутаты, партиялық бақылау комиссиясының төрағасы Жұмабек Ембергенов,аудан әкімінің орынбасары Роллан Еспенбетов және тиісті басқарма басшыларының орынбасарлары мен бөлім басшылары қатысты.<blockquote>«AMANAT» партиясының Сайлауалды бағдарламасы, жоспары, жобалары халықтың ұсыныс-тілегінің негізінде әзірленген. Мобильді қабылдаудың да басты мақсаты – тұрғындардың өзекті мәселелерін шешу және елді мекендердегі тұрғындардың өзекті мәселелеріне құлақ түріп, тиісті деңгейде шешілуіне атсалысу, бағыт-бағдар мен кеңес беру.Мемлекет басшысы да азаматтарға арнап көшпелі қабылдауды жиі өткізіп, шалғай ауылдардың тұрғындарымен кездесу керектігін айтқан болатын. Қабылдауда ауданға қатысты айтылатын мәселелердің барлығы зерделеніп, зерттеліп, нақты жұмыстар атқарылатын болады», – деді қабылдауға келген жергілікті халықпен тілдесу барысында партияның облыстық филиалының төрағасы Жандос Базартай.</blockquote>Мобильді топ елді мекендердегі халықты толғандырған сауалдарын тыңдап, оларға Мемлекет басшысының халыққа Жолдауы аясында атқарылатын жұмыстар, түрлі заңнамаларға енгізіліп жатқан өзгерістер мен бағдарламалар төңірегінде кеңінен ақпарат берді.<img src="https://knadmin.beoblood.kz/uploads/Mobildi_abyldau_Syrdariyaly_tardy_tinish_tilekteri_ty_daldy_1_4c5e04040b.jpg" alt="Мобильді қабылдау Сырдариялықтардың өтініш-тілектері тыңдалды 1.jpg">Жалпы Сырдария ауданында ұйымдастырылған мобильді қабылдауға 40-қа жуық тұрғын келді. Тұрғындар әсіресе газдандыру, жол жөндеу, ойын алаңын салу, аяқ су мәселесін шешу, жарықтандыру, әлеуметтік нысандарды күрделі жөндеуден өткізу мәселелері мен «Ауыл аманаты» жобасы бойынша өтініш тілектерін білдірді. Әр мәселе бойынша топ мүшелері тарапынан нақты жауап беріліп, хаттамаланды.Қабылдау барысында тұрғындар тек жеке бастың емес, жалпы елдік проблемаларды көтерді.Мобильді топ өкілдері қабылдауда көтерілген әрбір мәселені назарға алып, тиісті жұмыстар атқарылатынын және мәселе шешімін тапқанша «AMANAT» партиясының бақылауында болатындығын жеткізді.

Мобильді қабылдау: Сырдариялықтардың өтініш-тілектері тыңдалды

<a href="https://kyzylorda-news.kz/">Kyzylorda-news.kz</a> &nbsp;Қазақстан халқы Ассамблеясының 30 жылдық мерейтойы аясында Қызылорда қаласында облыстық Ассамблея жанындағы Журналистер клубының жылдық жұмысын қорытындылайтын «Бізді біріктірген шаңырақ» медиа-фест – 2025 салтанатты түрде өтті. Бұл күні өңірлік медианың ең белсенді өкілдері бас қосып, бір жыл бойы бірлік пен татулық, қоғамдық келісім құндылықтарын насихаттаудағы ортақ еңбегін саралады.Жиында облыстық қоғамдық даму басқармасының басшысы Руслан Каюпов сөз сөйлеп, журналистердің қоғамдағы рөлі мен ақпараттық кеңістіктегі ықпалын ерекше атап өтті. Оның айтуынша, 2015 жылдан бері жұмыс істеп келе жатқан Журналистер мен сарапшылар клубы этножурналистика бағытын дамыту арқылы аймақтағы этносаралық татулық идеясын жүйелі насихаттап, шығармашылық пен қоғамдық жауапкершілік тоғысатын алаңға айналған.<img src="https://knadmin.beoblood.kz/uploads/586718443_4251786128473868_5087237899856468372_n_9d785685c9.jpg" alt="586718443_4251786128473868_5087237899856468372_n.jpg">Биыл клуб құрамындағы 20-дан астам кәсіби журналист пен сарапшы 4000-нан астам материал жариялап, 2860-қа жуық жазбаны әлеуметтік желілерде таратқан. Бұл – медиа саласының қарқынды еңбегін көрсететін, қоғамдағы бірлік саясатын нығайтуға қосылған маңызды үлес. Мерейтойлық жылда жүзеге асқан «Екі жұлдыз» ән байқауы, «Қуатты қаламгер» тимбилдингі, сондай-ақ журналистер арасындағы «Достық Live» футбол турнирі – шығармашылық ынтымақтастықтың, кәсіби байланыстың және достықтың жаңа деңгейге көтерілгенін дәлелдеді. Әсіресе «Екі жұлдыз» жобасының республикалық деңгейде өткізуге ұсынылуы – өңір журналистерінің жаңа қырын ашқан ерекше бастама ретінде бағаланды.<img src="https://knadmin.beoblood.kz/uploads/587319450_4251785355140612_3086251392840992564_n_a81c3950a8.jpg" alt="587319450_4251785355140612_3086251392840992564_n.jpg">Медиа-фест барысында клубтың белсенді 20 мүшесіне арнайы марапаттар табысталды. Әр қатысушыға диплом, естелік статуэтка, бағалы сыйлық пен ҚР Мәдениет және ақпарат министрлігі әзірлеген «Этносаясат глоссарий-тезаурусы» жинағы берілді. Бұл марапаттар журналистің еңбегіне құрмет қана емес, ақпараттық саладағы кәсіби дамуына бағытталған қолдау екенін айқындады. Шара концерттік бағдарламамен жалғасын тауып, «Туған ел», «Назқоңыр», «Бақыт құшағында» сынды көркем туындылар кештің әсерін арттыра түсті.<img src="https://knadmin.beoblood.kz/uploads/586804215_4251785978473883_8610461146926297259_n_f686877f1b.jpg" alt="586804215_4251785978473883_8610461146926297259_n.jpg">Жиын барысында өңірдің маңызды жаңалықтарының бірі ретінде жаңа Достық үйінің жуырда ел игілігіне берілетіні айтылды. Бұл этносаралық келісім мен мәдени байланыстарды нығайтатын тағы бір маңызды қадам болмақ. Кеш соңында қатысушылар естелік суретке түсіп, алдағы жылға да ортақ мақсат – татулық пен бірлік идеясын кеңінен насихаттауға ниеттес екенін жеткізді.

Қызылордада «Бізді біріктірген шаңырақ» медиа-фесті өтті

<a href="https://kyzylorda-news.kz/">Kyzylorda-news.kz</a> Қасым-Жомарт Тоқаев Геннадий Головкинді World Boxing халықаралық федерациясының президенті болып сайлануымен құттықтады. Бұл шешімді даңқты спортшының әлемдік боксты дамытуға қосқан үлесінің, кәсібилігі мен мінсіз абырой-беделінің мойындалғаны деп бағалады.<blockquote>– Сіз әлемдік спорттың дамуына зор үлес қостыңыз. Қазақ бокс мектебінің бай дәстүрін лайықты деңгейде танытып, дүние жүзінің елімізді бокс державасы ретінде мойындауына ықпал еттіңіз. Өмір жолыңыз көптеген жарқын жеңіске толы. Оған күш-қуат, рух, табандылық, ішкі тәртіп секілді қасиеттеріңіз арқылы жеттіңіз. Бұл елімізде ғана емес, шет мемлекеттердегі миллиондаған жастың жігерін жаниды. Есіміңіз әлемдік бокс тарихына алтын әріппен жазылғанына еш күмән жоқ, – деді Президент.&nbsp;</blockquote>Мемлекет басшысы танымал спортшының Ұлттық олимпиада комитетіндегі қызметіне жоғары баға берді.<blockquote>– Сіздің басқару саласындағы жетістіктеріңізді айрықша атап өткім келеді. Спорттағы еңбегіңізді ескере отырып, Сізді Ұлттық олимпиада комитеті президенттігіне үміткер ретінде ұсындым. Ұлттық спорт федерацияларының барлығымен байланыс орнатып, аз уақытта көп іс тындырғаныңыз үшін ризашылығымызды білдіреміз. Халықаралық Олимпиада комитетімен ынтымақтастықты жолға қойдыңыз, – деді Мемлекет басшысы.</blockquote>Қасым-Жомарт Тоқаев Геннадий Головкинге World Boxing халықаралық федерациясының президенті ретінде көптеген мәселенің шешімін табуы қажет екенін айтты.<blockquote>– Бүгінде спорттық мансабыңыздағы жаңа кезеңге аяқ бастыңыз. World Boxing федерациясының президенті болып сайландыңыз. Жұмыс енді ғана басталды. Алдыңызда атқаратын қыруар шаруа тұр. Сондай-ақ Сіздің жаһандық деңгейдегі спорттық құрылымды басқарып отырған алғашқы қазақстандық екеніңізді айта кету керек. Кәсіби біліктілігіңіз ұйымды жаңа белеске көтеріп, бокс көкжиегін кеңейтетініне сенімдімін, – деді Президент.</blockquote>Мемлекет басшысы отандық спортты дамытуға сіңірген елеулі еңбегі үшін Геннадий Головкинді І дәрежелі «Барыс» орденімен марапаттады.Геннадий Головкин еңбегін жоғары бағалағаны, сенім артып, қолдау көрсеткені үшін Президент Қасым-Жомарт Тоқаевқа алғыс айтты. Сондай-ақ боксты одан әрі дамытуға, осы спорт түрінің еліміздегі және халықаралық деңгейдегі беделін нығайтуға дайын екенін жеткізді.

Геннадий Головкин І дәрежелі «Барыс» орденімен марапатталды

<a href="https://kyzylorda-news.kz/">Kyzylorda-news.kz</a>&nbsp;Аймақ басшысы &nbsp;Нұрлыбек Нәлібаевтың қатысуымен өткен облыстық прокуратураның алқа отырысында жер заңнамасының сақталуына жүргізілген тексеру қорытындысы талқыланды. Оған барлық құқық қорғау органдарының бірінші басшылары және мүдделі мемлекеттік органдардың жетекшілері қатысты.&nbsp;Жиында жеке тұрғын үй құрылысына жер бөлу кезектілігін реттеу, Бас жоспар талаптарының сақталуын қамтамасыз ету, заңсыз иеленген жерлерді түгендеу, су қорғау аймақтары мен белдеулері туралы мәліметтерді кадастр жүйесіне енгізу, ауыл шаруашылығы дақылдарының ротациясын сақтау мәселелері жан-жақты талқыланды.Сонымен қатар, отырыста &nbsp;облыс әкімінің орынбасары Мейрамбек Шермағанбет, облыс прокурорының орынбасары Нұрболат Дүйсенбаев, облыстық жер ресурстарын бақылау инспекциясының басшысы Марат Көшеков баяндама жасады.Қорытындысында саладағы құқықбұзушылықтың алдын алу мақсатында бірлескен іс-шаралар жоспарын бекіту туралы шешім қабылданды.<img src="https://knadmin.beoblood.kz/uploads/Obsuzhdeny_rezultaty_proverki_1_1428250897.jpg" alt="Обсуждены результаты проверки 1.jpg">

Тексеру қорытындысы талқыланды

<a href="https://kyzylorda-news.kz/">Kyzylorda-news.kz</a> &nbsp;Қызылорда қаласындағы Достық үйінде Қазақстан халқы Ассамблеясы жанындағы облыстық Аналар кеңесінің 2025 жылғы қорытынды отырысы өтті. Шараға «Қоғамдық келісім» КММ директоры Бақытжан Камалов, Әйелдер істері және отбасылық-демографиялық саясат жөніндегі комиссия хатшысы Қаламқас Каримова, облыстық неміс орталығының төрағасы Ирина Шек, облыстық және аудандық Аналар кеңестерінің төрағалары мен мүшелері, сондай-ақ арнайы шақырылған қонақтар қатысты. Жиынды Аналар кеңесінің төрағасы Айгүл Мұсабаева жүргізді.Модератор қатысушыларға жылы лебізін білдіріп, Сыр өңірінде аналар институтын дамытуға үлес қосып жүрген барлық аналарға алғысын жеткізді. Биыл облыс бойынша Аналар кеңестері құрамында 143 мүше жұмыс істегені атап өтілді.Мемлекет басшысы Қасым-Жомарт Тоқаевтың «Бірлік пен келісім жолындағы 30 жыл» атты ХХХІV сессиясында айтқан Қазақстан халқы Ассамблеясының ел бірлігін нығайтудағы рөлі туралы сөзіне тоқталған модератор, осы бағыттағы жұмыстарды ілгерілетуде Аналар кеңесінің орны ерекше екенін атап өтті.2025 жылы Аналар кеңесі отбасылық құндылықтарды нығайту, ұлттық тәрбиені дәріптеу бағытында жүйелі жұмыстар жүргізді. Кеңес жоғары және арнаулы оқу орындарымен, сондай-ақ «Дағдарыс», «Тұрмыстық зорлық-зомбылық құрбандарына арнаулы әлеуметтік қызметтер көрсету», «Отбасы қолдау» орталықтарымен бірлескен жобаларды іске асырды.Аудан, қала деңгейінде «Салауатты сана», «Мәдениетті ана – мәдениетті ұлт», «Сарбаздар анасы» республикалық және жергілікті жобалары жүзеге асты. Сонымен қатар облыстық Аналар кеңесінің ұйымдастыруымен Республикалық Аналар кеңесі төрағасының орынбасары Баян Ахатайдың қатысуымен кеңестің кезекті отырысы және «Адал еңбек – нәзік жандар» тақырыбындағы дөңгелек үстел өткізілді.«Айналайын» жобасы аясында №31 «Алтын кілт» балабақшасында «Әжемнің сөзі – ақылдың көзі» атты танымдық шара өтті. Сондай-ақ Халықаралық отбасы күні мен Ассамблеяның 30 жылдығына орай «Ұлттық құндылық – отбасы тірегі» салтанатты іс-шарасы және «Ақ орамал» акциясы ұйымдастырылды.Осы жылы Ауғанстаннан әскер шығарылғанына 36 жыл толуына орай «Патриот болу парызың» форсайт алаңы, «Бірлігіміз – әралуандықта» жобасы аясында «Әжемнің ертегісі» облыстық фестивалі өтті. Фестивальге өңір аудандары мен Қызылорда, Байқоңыр қалаларынан әжелер мен немерелер қатысып, арнайы номинациялармен марапатталды.Байқоңыр қаласында «Аялы әже», Арал ауданында «Әже – ұлт ұйытқысы, тәрбие бесігі» атты форумдар ұйымдастырылды.Жаңақорған аудандық Аналар кеңесінің төрағасы Құралай Мақұлбекқызы Қарағанды қаласында өткен «Нашақорлық – тұрақтылыққа төнген қатер» атты республикалық семинарға қатысып келді. Жалағаш аудандық «Ұлағатты аналар» ансамблі Алматыда өткен «Өнерлі елдің өресі биік» республикалық байқауында және Байқоңырдағы VIII «Халық достығы» халықаралық фестивалінде бас жүлде иеленді.Жыл көлемінде қала және аудандарда 100-ден астам іс-шара ұйымдастырылып, 4 мыңға жуық адам қамтылды.Жиын барысында Қазалы аудандық Аналар кеңесінің мүшесі, М.Горький атындағы №16 мектеп-лицейдің психологы Әлия Тілеуқабылова және Байқоңыр қалалық Аналар кеңесінің мүшесі, №25 «Бөбекжай» балабақшасының тәрбиешісі Жазира Садыкова өздерінің жыл бойғы атқарылған жұмыстары туралы баяндама жасады.Отырыс соңында Аналар кеңесінің жыл үздіктері марапатталып, қатысушыларға алғыс білдірілді.

Қызылорда облысында Аналар кеңесінің қорытынды отырысы өтті

<a href="https://kyzylorda-news.kz/">Kyzylorda-news.kz</a>&nbsp; Бүгін Орталық Азияның Еуразия қорының қолдауымен «Өмірлік мақсат» бағдарламасы аясында «Қызылорда өңіріндегі мүгедектігі бар әйелдер мен ерекше баласы бар аналардың қауіпсіз, қолжетімді үйге қол жеткізуін қолдау» жобасы бойынша ақпараттық-кеңес беру шарасы ұйымдастырылды.Жиынға «Отбасы банк» қызметкері Бисен Арман Берікболұлы, Қызылорда қалалық жұмыспен қамту және әлеуметтік бағдарламалар бөлімінің мүгедектігі бар балаларға үйде әлеуметтік қызмет көрсету бөлімінің басшысы Жәнібекова Лаура Серікқызы, «Отбасын қолдау орталығының» әлеуметтік жұмыс маманы Қорғанова Гүлбахор Қорғанқызы, жоба психологі Дарібаева Сәндігүл, жоба заңгері Исаева Жанат және мүмкіндігі шектеулі әйелдер мен ерекше баласы бар аналар қатысты.Шара барысында кәсіби мамандар қатысушыларға тұрғын үй кезегіне тұрудың тәртібі, талаптары мен құқықтық негіздері жөнінде жан-жақты ақпарат берді. Сонымен қатар мүгедектігі бар жандар мен ерекше баласы бар аналарға арналған мемлекеттік әлеуметтік бағдарламалар мен оларды қолдау тетіктері және жеңілдіктер таныстырылды.Жобаның негізгі мақсаты – мақсатты топ өкілдерінің құқықтық сауаттылығын арттыру, мемлекеттік қолдау құралдары туралы хабардарлығын күшейту және олардың қауіпсіз әрі қолжетімді тұрғын үйге қол жеткізу мүмкіндіктерін кеңейту.Іс-шара соңында қатысушылар тақырыпқа сай сұрақтарын қойып, мамандармен пікір алмасып, жеке жағдайларына қатысты нақты кеңестер алды. Сонымен қатар, кездесуде жоба бенецифиарларының әрқайсысының кейстерінде кездесетін мәселелер бойынша жинақталған мағлұматтар мен жағдайлар мемлекеттік билік өкілдеріне шешім шығаруға жолданатын болады.Жоба Орталық Азияның Еуразия Қоры (ФЕЦА), Citi қорының қолдауымен жүзеге асырылуда.«Omirlik Maqsat» бағдарламасы әлеуметтік осал топтарға қолдау көрсетіп, ҮЕҰ арқылы көмек ұсынады, мүгедектігі бар әйелдерге оқыту және жұмыспен қамту мүмкіндіктерін береді, сондай-ақ құқықтық және психологиялық қолдау көрсетіп, баспанаға қолжеткізуді кеңейту үшін заңнамалық өзгерістерді ілгерілетеді.

«Өмірлік мақсат» бағдарламасы аясында тұрғын үйге қатысты ақпараттық кездесу өтті

Қасым-Жомарт ТОҚАЕВ:<blockquote>– Құрметті Президент Сердар Гурбангулыевич, Қазақстан Республикасына мемлекеттік сапармен қош келдіңіз! Еліміз Түрікменстанды стратегиялық серіктес, бауырлас мемлекет, ең жақын шекаралас көрші санайды. Бізді ғасырлардан жалғасып келе жатқан достық, ортақ тарих, тіл мен мәдениет біріктіреді. Мемлекеттеріміз арасындағы сауда-саттық, экономикалық ықпалдастықтың басқа да түрлері және мәдени-гуманитарлық байланыстар қарқынды дамып келеді. Екі ел серіктестігінің ауқымы мен сапасына көңіліміз толады деп айтуға негіз бар. Бұл ынтымақтастық стратегиялық сипатқа ие. Дегенмен алға қадам басу қажет. Күн тәртібінде өте маңызды мәселелер тұр. Бүгін олардың шешімін бірлесіп табамыз деп ойлаймын, – деді Қазақстан Президенті.</blockquote>Сердар БЕРДІМҰХАМЕДОВ:<blockquote>– Құрметті Қасым-Жомарт Кемелұлы, ең алдымен, Қазақстан Республикасына мемлекеттік сапармен келуге шақырғаныңызға ризашылық білдіремін. Қазақ жерінде көрсеткен қонақжайлығыңыз бен сый-құрметіңіз үшін Өзімнің және делегация атынан алғыс айтамын. Сондай-ақ Сізге түрікмен халқының Ұлт көшбасшысы, құрметті Гурбангулы Мяликгулыевич Бердімұхамедовтің сәлемі мен ізгі тілегін жеткізуге рұқсат етіңіз. Бүгінде Түрікменстан мен Қазақстанның қарым-қатынасы достық, бауырластық және тату көршілік қағидаттары негізінде дамып келеді. Өзара ықпалдастығымыз саяси-дипломатиялық, сауда-экономикалық және мәдени-гуманитарлық салаларды қамтиды, – деді Түрікменстан Президенті.</blockquote>

Мемлекет басшысы Түрікменстан Президентімен келіссөз жүргізді

<a href="https://kyzylorda-news.kz/">Kyzylorda-news.kz</a> Келесі жылдан бастап елімізде салық салу жүйесін түбегейлі реформалауды көздейтін жаңа Салық кодексі күшіне енеді. Яғни, 1 қаңтардан бастап кәсіпкерлер үшін бизнес жүргізудің жаңа ережелері енгізіледі. Осыған байланысты «AMANAT» партиясы оңайлатылған декларация негізінде арнайы төлем мөлшерін төмендету туралы бастама көтерген еді. Бұл бастама кәсіпкерлердің мүддесін қорғауға бағытталған және әр өңірдегі мәслихат шешіміне сәйкес жүзеге асады.Осы бастаманың жалғасы ретінде Қазалы аудандық мәслихатының кезектен тыс 45-інші сессиясы өтті. Сессияға аудан әкімі Алмасбек Есмаханов, аудандық мәслихат төрағасы Ғазиз Әліш, «AMANAT» партиясы фракциясының мүшелері, депутаттар, қала, кент, ауылдық округ әкімдері, дербес бөлімдер басшылары және жеке кәсіпкерлер қатысты. Күн тәртібінде бірнеше маңызды мәселе қаралды, соның ішінде Қазалы ауданы бойынша оңайлатылған декларация негізінде арнаулы салық режимін қолдану кезінде салық мөлшерлемесін төмендету мәселесі де қаралды.Аудан әкімі Алмасбек Әбілқасымұлы бұл шешімнің жалпы экономикалық белсенділікті арттыруға тікелей ықпал ететінін атап өтті. Аудан бойынша оңайлатылған декларация негізінде арнаулы салық режимін қолдану кезінде салық мөлшерлемесін 4 пайыздан 2 пайызға дейін төмендету шешімі шағын және орта бизнесті қолдауға бағытталған маңызды әрі уақытылы қадам болып табылады.Жеке кәсіпкерлер аудандағы салық мөлшерлемесінің төмендетілуін алдағы жұмыстарына үлкен көмек деп бағалап, алғыстарын білдірді. Сессия соңында депутаттардың дауыс беру нәтижесі бойынша тиісті шешім қабылданды. Осылайша, «AMANAT» партиясының шағын және орта бизнесті қолдау мақсатындағы бастамасы Қазалы ауданында толықтай қолдау тапты.<img src="https://knadmin.beoblood.kz/uploads/azaly_k_sipkerlikti_oldau_2_0d739276fa.jpg" alt="Қазалы кәсіпкерлікті қолдау 2.jpg">

Қазалыда кәсіпкерлерді қолдау мақсатында салық мөлшерлемесі төмендетілді

<a href="https://kyzylorda-news.kz/">Kyzylorda-news.kz</a> Алматы облысында алаяқтар осыдан 1,5 жыл бұрын қайтыс болған Диас Мұсаның еміне деп елден ақша жинаған. Марқұмның жақындары бұл сұмдықты күні кеше білген. Олар кінәлілер жазасыз қала ма деп алаңдайды. Бұл туралы <a href="https://stan.kz/alayaktar-15-zhil-byrin-kaytis-bolgan-balanin-emi-ushin-426674/">Stan.kz</a> ақпарат агенттігі 31-арнасының “Информбюро” бағдарламасына сілтеме жасап хабарлайды.&nbsp;Оңласын Асылбаеваның ұлы Диас Мұса – 7 баланың кенжесі. Ол осыдан 1,5 жыл бұрын ұзаққа созылған дерттен қайтыс болған. Алайда қара жамылған отбасы әлдекімдердің көз жұмған баласының атынан қор ашып, әлі күнге дейін ақша жинап келгенін білген.<blockquote>“Өлген баламның атынан ақша жинап отыр. Бір күн бұрын балам түсіме кірді. Балам мұңлы, жылап жатыр. Маған ренжіп жатыр. Ертеңінде ана видео келіп тұр. Сонда менің баламның жаны тынышталмай жатыр. Ал қайдағы біреулер қор ашып, менің баламның жанын қинап жатыр. Не үшін жинайды, не үшін баламды шырқыратады”, – дейді жаны қиналған ана.</blockquote>Баласын аман алып қалу үшін ата-анасы екі жыл бұрын расында да елден екі рет көмек сұрап, 70 мың доллар жинаған. Алайда 2024 жылы жинақ толық тоқтатылған. Бірақ жақында таныстары хабарласып, желіде ұлының атынан ақша жиналып жатқанын айтқан. Марқұмның ата-анасы бірден полицияға арыз түсіріпті. Оңласынның айтуынша, құқық қорғаушылар алаяқтардың кім екенін анықтағанымен, әлі ұсталмаған.<blockquote>“Аталған факті бойынша полиция қызметкерлері оқиғаның барлық мән-жайларын толық, жан-жақты және объективті зерттеу мақсатында процессуалдық тексеру жүргізуде. Аталған жұмыстардың нәтижесі бойынша іске қатысты қолданыстағы заңнама аясында шешім қабылданады”, – дейді Алматы облысы полиция департаментінің бөлім басшысы Ернар Сайділдин.</blockquote>Оңласын Асылбаева баласының қазасына диагноздың дұрыс қойылмауы себеп болды деп есептейді. Айтуынша, дәрігерлер қате диагнозбен бірнеше рет ота жасап, ұлының әлсіреген ағзасын одан сайын титықтатқан. Шетелге апарғанымда, жергілікті мамандар тым кеш келгенімізді айтты дейді. Сонда жасалған соңғы отадан кейін Диас комаға түсіп, қайта оянбаған.Фото: Видеодан скрин

Алаяқтар 1,5 жыл бұрын қайтыс болған баланың емі үшін жұрттан ақша жинап келген

<a href="https://kyzylorda-news.kz/">Kyzylorda-news.kz</a> Белгілі психолог, қоғам белсендісі Құралай Серікқызы продюсер, әнші Мөлдір Мұқанованың “Шай в большом городе” киносын сынағандарға тредс әлеуметтік желісінде жауап берді.<blockquote>– Мөлдірдің киносынан шықтым. Сынап жатқандарға айтарым Индияның басы қылтылдаған Анандиін, дыш-дыш етіп ұрғанда өтірік құлап жататын кадрларды көргенде неге осылай сынамадыңдар?! Қай қазақ болмасын тыпырлап шамасы жеткенше еңбектеніп жатқанын көру маған мақтаныш. Қолынан түк келмейтін, бітірген дымы жоқ, сыншы “диванбатырлар” отанымды жемей, 3000 теңгеге зарламай, барып қолдаңдар Мөлдірді, – деп жазды ол.</blockquote>Психологтың бұл жазбасына әлеуметтік желі қолданушыларының пікірі екіге бөлінді. Бірі Құрлай ханымның айтқаны дұрыс десе енді бірі бұрыс деп санады.<blockquote>– Қасиетті, киелі Отан сөзін мына “психолог” қай жерге апарып тастады? Ұнамаған киносын көргісі келмейтін көзі ашық қауымды неге “диванбатырларға” теңейді бұл? Дікеңдеп сөйлейтіндей халыққа не өткізіп қойғаны бар?– Киноға қолдау көрсету деген қалай? Ұнамасада бару керек пе сонда? Онда киноның ешқандай құндылығы болмайды ғой.– Өткір тілім бар екен деп оңды-солды сөйлей беруге болмайды. Қасиетті ұғымның қадірін кетірмеңдер.– Нағыз королевалар ғана бір- бірінің тәжін дұрыстайды деуші ма еді? Жаса қазақ қыздары.– Шетелдің мән-мағынасы жоқ атыс-шабыс, ұру, тонау сияқты толып жатқан миға қонымсыз кинолары толып жүр. Оларға үн қатпай, қазақтың бір анасы талпынған екен деп үнсіз қолдамай шабуылдап жатқандар өздері отырған бұтақты кесіп жатырмыз деп ойламайтын сияқты.– Біраз әйелдердің ойындағы жазба деп ойлаймын. Көп әйелдерге осындай батылдық жетіспейді. Қазаққа қазақ ғана жау. Жан-жақтан төпей бермей қолдау көрсететін уақыт келді, – деді желі қолданушылары.</blockquote>Фото: instagram.com/quralai_hanum

Қазақстан және Қызылорда облысының жаңалықтары: Қоғам