<a href="https://kyzylorda-news.kz/">Kyzylorda-news.kz.</a> Көпбейінді облыстық ауруханасында облыстық денсаулық сақтау басқармасының ұйымдастыруымен 12-13-14-ші сәуір аралығында білікті дәрігерлердің қатысуымен шеберлік сағаты өткізілді.Шеберлік сағатында Астана қаласынан арнайы шақырылған Н.Д.Батпенов атындағы ғылыми орталығының, артроскопия және спорттық жарақат бөлім меңгерушісі, жоғары санатты травматолог ортопед Балбосынов Бағдат Ерсаинұлы екі тізе буына күрделі ота жасады.Артроскопия - бұл аз инвазивті хирургиялық процедура, яғни ол бейне бақылауда (артроскоп) шағын кесулермен және арнайы құралдармен орындалады, яғни аз тыртықтармен және операциядан кейінгі қарапайым процедуралармен буындардың ішкі бөлігін бақылауға және емдеуге мүмкіндік береді. Бұл әдіс алдымен тізе, содан кейін иық, тобық және шынтақ үшін жасалған.Атроскопия - кең таралған әдіс. Көптеген ортопедиялық процедуралар артроскопиялық әдіспен орындалады. Ең жиі орындалатын артроскопиялар тізе, иық және тобық болып табылады.Тізе артроскопиясы жыртылған менискаларды емдеу алдыңғы крест тәрізді байламдардың үзілуі мен шеміршек трансплантаты жағдайларында жасалады.Зақымдалған буын шеміршектерін толтыру, кернелген байламдарды созу, буында айналатын бос бөліктерді алып тастау (сүйек сынықтары және т.б.) тізедегі синовиальды тінмен байланысты ауруларды анықтау және емдеуде артроскопиялық әдіспен өте жақсы нәтижелер алынады.

Қызылордада күрделі ота жасаудан шеберлік сағаты ұйымдастырылды

<a href="https://kyzylorda-news.kz/ru/">Kyzylorda-news.kz</a>. Айналаны ақпарат қоршаған қоғамда бәрін үздіксіз қабылдай беретін көзге де жүктеме көбейді. Әсіресе онлайн оқу басталғалы бері оқушылардың бар уақыты компьютер мен мобильді құрылғының алдында өтіп жатыр. Жыл өткен сайын жанар өткірлігі кемитінін ескерсек, нұрдың ұясы саналатын көзді сыртқы факторлар әсерінен қалай қорғаған дұрыс? Осы сұрақ төңірегіндегі маңызды тақырыпты сала мамандарымен бірге талқыладық. Минус рефракция 40 жасқа дейін өсуі мүмкін.Әдетте ата-аналар балада кездесетін көз ауруына ұялы телефон мен оқулықты себеп етіп, салдарын ұзақ уақытқа дейін түсінбей жүреді. Алайда мамандар көз ауруына мұнан өзге де бірнеше фактор әсер ететінін айтады. Мысалы, тұқым қуалаушылық, түрлі жарақат және соматикалық аурулардың салдарынан болатын көз аурулары, қант диабетінен кейінгі асқынулар, диабеттік ретинопатия, диабеттік ангиопатия да баланың көру қабілетін нашарлатады.<blockquote>‒ Бас ішілік қысымның жоғарылауынан пайда болатын асқыну, гипертензионды типтегі ангиопатия, көру жүйкесінің ісінуі көз түбіндегі өзгерістерге әкеледі. Бас ауруының көзге қалай әсер ететінін осыдан-ақ байқауға болады. Сонымен қатар зоб тәрізді эндокринді аурудың асқынуы, бүйрек аурулары да көзге кері ықпал етеді. Ал колобома, катаракта, микрофтальм балада туа бітті пайда болады. Шала туған нәрестелерде туа бітті миопия, гиперметропия, аралас астигматизм, глаукома жиі кездеседі. Көздің алыстан көрмеуі медицинада миопия деп аталады және бұл балалар арасында өте жиі кездеседі. Миопия балаға ата-анасынан тұқым қуалаушылық жолмен беріледі немесе баланың көзі соған бейім болып туылады. Уақыт өте келе көзге дұрыс күтім жасалмаса миопия дамиды және баланың жасы өскен сайын артып отырады. Мұндай минус рефракция 40 жасқа дейін өсуі мүмкін. Сондай-ақ көздің алыстан көрмеуі баланың иммундық жүйесіне және соматикалық денсаулық жағдайына да тікелей байланысты болады, ‒ дейді облыстық балалар ауруханасының дәрігері Айжан Бақбергенова.</blockquote>Маманның айтуынша, бала дүниеге келген сәттен бастап 5-7 жасқа дейін +1,0, +2,0 диоптрии қалыпты болады. Кейін ол рефракция қалыпты сау адамның көз рефракциясына айналады немесе миопияға ұласады. Кейде гиперметропияға ауысуы не болмаса аралас +, ‒ рефракция бірге жүруі де мүмкін екен.‒ Өкінішке қарай, ата-аналар баласының көзі көрмейтінін немесе нашар көретінін кеш біліп жатады. Бала көзінің нашар көретінін айта алмайды, болмаса бір көзі нашар көрсе де, екінші көзі жақсы көрген соң мән бермей жүре береді. Мұның бәрі баланы балабақшаға немесе мектепке дайындау кезінде медициналық тексеру кезінде анықталады. Оны ата-анасы да сол кезде біліп жатады.Көздің алыстан немесе жақыннан көрмеуін көзілдіріксіз емдеу мүмкін деп айта алмаймын. Кейде көзәйнекті киіп жүрсе де, баланың жасы өскен сайын көз өлшемі мен рефракциясы ұлғаюы мүмкін. Мұндай жағдайда көзілдірікті үнемі тағу қажет. Себебі балаларға рефракциялық операция тек 18-20 жастан кейін жасалады. Сол үшін көзге арналған дәрумендерді жиі қолданып, көз күтіміне арналған жаттығулар жасаған дұрыс. Баланың телефон, планшет сынды техникаларды пайдалану уақытын қадағалап, 40 минут сайын жаттығу жасауды әдетке айналдыру керек, ‒ дейді офтальмолог маман.Айта кетейік, маманмен тілдесу барысында қала бойынша балалардың көз дәрігері саусақпен санарлық екенін байқадық. Бұл жайында Айжан Жұпарқызынан сұрағанымызда, себебін офтальмолог дәрігер болу өте қиын және жауапкершілігі жоғары мамандық деп түсіндірді.Лазерлік операция 21 жастан бастап жасалады.№3 қалалық емхананың офтальмолог дәрігері Мәлике-Маран Исламбекқызының айтуынша, айналадағы ақпараттың 90 пайызы көз арқылы қабылданатын болған соң, көз бұлшықеттеріне көп күш түседі. Ағзадағы басқа бұлшықеттермен салыстырғанда бұл салмақ бірнеше есе көп, сондықтан көз ауруларына осы фактор едәуір әсер етеді. Ұзақ уақыт компьютер алдында жұмыс жасау, телефонға қарау көздің шаршауына себеп болатыны белгілі. Әсіресе ұзақ уақыт компьютер алдында жұмыс атқаратын адамдардың көзді сирек жұматыны анықталған. Бұл жағдай жас қабығының қызметін нашарлатып, қасаң қабықтың құрғауына әкеледі. Осыдан соң көз қызарып, жасаурап ауыра бастайды. Кеңседегі қызметкерлер үшін таныс әрі қалыпты осы жағдай бас ауруына да себеп болады екен. Сол үшін көз дәрігері қызмет барысында бөлменің жарық болуына мән беру керегін айтады.<blockquote>‒ Кейбір адамдарда бас ауруымен бірге көз ауруы қатар жүруі мүмкін. Мұндай жағдайда сабыр сақтап, қорықпаған абзал. Себебі бас терісінің сезімталдығын қамтамасыз ететін үшкіл жүйке жоғары қабақтығы жас безін, қасаң қабақты, көздің шырышты қабатын, мұрын, маңдай қуысын және мидың кейбір қабығының сезімталдығына жауап береді. Осы үшкіл жүйке зақымдалған кезде мигрень, шүйде жүйкесінің неврологиясы, трохлеит, көз алмасының ауруы пайда болады. Сондықтан бас ауруы кезінде офтальматологтың пікірімен қоса невропотологтың кеңесіне де жүгінген дұрыс.Көз үшін қант диабеті, артериалды гипертензия ауруы аса қауіпті есептеледі. Негізі кез келген ауру көзге офтальмологиялық әсер береді. Тіпті суық тиюдің өзі көзге айтарлықтай зиян тигізеді. Тісте ұзақ уақыт қалыптасқан инфекция да көзге кері ықпал етуі мүмкін. Сондықтан стомотологқа да жиі қаралған жөн. Сондай-ақ күйзеліс, жүйкенің жұқаруы барлық ағзаға, соның ішінде көзге де кері әсер етеді. Мұндай сәтте көз алды тұманданып, жиі жыпылықтайды, тез шаршайды, көзге ұсақ дүние түскен тәрізді сезім пайда болады.Тұқымқуалаушылық факторы да көзге елеулі ықпал етеді. Ата-әжесіндегі немесе ата-анасындағы көз ауруы балаға да берілуі мүмкін. Сондықтан миопия, глоукома, жақыннан көрмеушілік, астигматизм, кератоеонус, әртүрлі жүйелік және синдромды аурулардың тұқым қуалау факторын анықтау үшін жылына екі рет дәрігерге қаралу қажет. Әсіресе қырық жастан асқан соң көзішілік қысымды, тор қабатын жиі тексерткен дұрыс. Өте жоғары температура, ылғалды немесе құрғақ булау процесі де көздің қан айналымын өзгертіп, көз тамырларын кеңейтіп, қызартады. Сондықтан ыстық суға түсу глоукома, артер кинербензиясы бар адамдар үшін өте қауіпті, ‒ дейді М.Исламбекқызы.</blockquote>Көз жанарын сақтау үшін компьютер экранынан 50-70 см арақашықтықты сақтап, жұмыс арасында көз жаттығуларын жасау қажет екенін көпшілік білгенмен, қаперге алмайтыны рас. Соның салдарынан көру қабілеті уақыт өткен сайын нашарлай түседі. Қазір бұл қиындықтан құтылу үшін көзге лазерлік коррекция жасатуға сұраныс артып келеді. Бұл технология елімізде алғаш рет 2005 жылы енгізілген.<blockquote>‒ Лазерлік коррекция ‒ алыстан көрмеушілік, астигматизм, жақыннан көрмеушілік кезінде жасалатын қауіпсіз ем түрі. Оны жасау кезінде қасаң қабықтың формасы өзгереді. Қасаң қабық көздегі қантамыры жоқ жарық сәулесінің 80 пайызын өткізетін физиологиялық ағза болып табылады. Науқас операция алдында міндетті түрде толық тексеруден өтеді.Лазерлік операциядан кейін көз толыққанды көру үшін минус рефракцияның өспеуіне сенімді болу керек. Ол үшін үнемі дәрігер қадағалау қажет. Айта кетейін, жасөсіпірімдерге және аяғы ауыр әйелдерге лазерлік коррекция жасалмайды. Көз өлшемі жиі өзгеретіндіктен, лазерлік операция тек 21 жастан асқан адамдарға қолданылады, ‒ дейді офтальмолог маман.</blockquote>P.S. Атақты психолог Луиза Хей көз ауруының себебін келесідей түсіндіреді: егер ересек адамның көзі нашар көрсе, оның санасында бала күннен әлденені көруге деген қорқыныш қалыптасқан. Сондай-ақ психологияда адамның жиі қолданатын сөздері оның ішкі ағзасындағы аурудан хабар беретін көрінеді. Айталық, «көруге қорқынышты, көзге түрткісіз қараңғы» деген тіркесті көп қолданатын адамда көз ауру болуы ғажап емес дейді психолог мамандар. Осыдан қарап-ақ көз ауруының себебін жан-жақты қарастырған дұрыс тәрізді…&nbsp;

Қызылордалық дәрігер көз ауруының себебін түсіндірді

<a href="https://kyzylorda-news.kz/">Kyzylorda-news.kz.</a> Барлық кезде де ұлт саулығы, адам денсаулығы мемлекеттің басты құндылығы әрі байлығы болып есептеледі.Кез-келген қызмет саласында жұмыс істейтін адамдар үшін олардың денсаулық деңгейін бақылап отыру маңызды. Кәсіпорындардың әкімшілігі меншік түріне қарамастан өз кәсіпорнындағы жұмысшылар арасындағы аурушаңдықкөрсеткіштерін зерделеп отыруы қажет.Әрбір жұмысшы мерзімді медициналық тексеруден өтіп отыруы тиіс және оның нәтижелері бекітілген медициналық үлгіде тіркеледі.Медициналық тексерудің 3 түрі бар. Біріншісі жұмысқа немесе оқуға түсу кезінде алдын ала медициналық тексеру. Екіншісі халықтың декреттелген топтары үшін ағымды медициналық тексеру. Сонымен қатар зиянды еңбек жағдайларында жұмыс істейтін адамдар үшін ағымды медициналық тексеру. Міне, осы медициналық тексерулерден уақытылы өтудің маңыздылығы туралы Қызылорда облыстық санитариялық-эпидемиологиялық бақылау департаменті басшысының орынбасары Әлия Әбдіқайымова айтып берді.<blockquote>«Алдын ала медициналық қарап-тексеру, яғни жұмысқа немесе оқуға түсу кезінде және ағымды медициналық қарап-тексеруге қойылатын талаптар 2020 жылы қабылданған «Міндетті медициналық қарап-тексеруге жататын адамдардың нысаналы топтарын, сондай-ақ оларды жүргізу қағидалары мен кезеңділігін, зертханалық және функционалдық зерттеулердің көлемін, медициналық қарсы көрсеткіштерді, зиянды және (немесе) қауіпті өндірістік тізбелерді бекіту туралы» бұйрығында көрсетілген. &nbsp;Сонымен қатар міндетті медициналық тексеруге жататын адамдардың нысаналы топтары, зертханалық және функционалдық зерттеулердің көлемі және жұмыстың зиянды факторларын ескере отырып, олардың кезеңділігі көрсетілген, - дейді департамент басшысының орынбасары.</blockquote>Қызылорда облысында халыққа қызмет көрсететін 415 коммуналдық нысан (сұлулық салондары, қонақ үйлер, моншалар, сауналар, спорт объектілері және басқалар) бар. Бұл кәсіпорындардың қызметкерлері бірқатар инфекциялық ауруларды (туберкулез, тері-дерматологиялық, трихофитоз, себорея, гепатит және басқалар) жұқтырып алуы және инфекция тасымалдаушы болуы мүмкін. Сондықтан облыс тұрғындары арасында жұқпалы аурулардың таралуын болдырмау және ауруды уақытылы анықтау мақсатында мерзімді және профилактикалық медициналық тексерулерден өту қажетті бойынша түсіндірме, санитариялық ағарту жұмыстары жүргізіледі.&nbsp;Ағымдағы жыл басынан бері облыс көлемінде коммуналдық нысандармен байланысты жұқпалы аурулар тіркелген жоқ. Әрбір адам өз денсаулығына жауапты болуы керек және ауруды ерте кезеңде анықтап, уақытылы емдеуді бастау үшін уақтылы медициналық тексеруден өтуі керек.

Медициналық қарап-тексеруден уақытылы өту маңызды

<a href="https://kyzylorda-news.kz/">Kyzylorda-news.kz.</a>&nbsp; Адам жанының арашашысы дәрігер еңбегі туралы айта бастасақ, көкейімізге осы мамандықтың нағыз майталмандары оралады. Ақ халатты абзал жандардың халық денсаулығы, қоғам игілігі жолында атқарып жүрген істеріне тәнті боламыз. Халық алғысына бөленіп жүрген абзал жандар қалада да, ауылда да көп.Ақбасты ауылдық медпунктінің меңгерушісі Ғазиза Ақназарова туралы да қай жерде болмасын жылы лебізді есітіп отырамыз. Аралдағы №15 мектептің түлегі мамандық таңдау, кім болып еңбекке араласамын дегенде ойланбастан жүрек қалауымен дәрігерлікті таңдады, Ақтөбе медицина институтына құжаттарын тапсырды. Оқушылық күндердің оралмас кей сәттерінің кейде ойға оралатыны бар. Әкесі Кемаладин қой кеңшарында малшы еді. Жазғы каникулда қолтығынан кітабы түспей жүріп қой қайыратыны есінде қалыпты. Мал баққан адамның қандай қиыншылықты бастан кешетінін көріп өсті. Қазір балаларына өзінің көзбен көріп, көңілмен сезгендерін үлгі етіп, жалқаулыққа берілмей, еңбекке шыңдалғанын қалап, ақылын айтып отырады. Ақтөбедегі медициналық институтынан дәрігер терапевт мамандығын алып шыққан Ғ.Ақназарова Арал қаласындағы жедел жәрдем бөлімшесінде ұзақ жылдар емдеуші дәрігер болып істеді. Үнемі ауысыммен жұмыс істеп, күн демей, түн демей науқас жандарға алғашқы көмек көрсету оның үйреншікті дағдысына айналды. Қаланың қай түкпірінен болмасын келген шақыруға жылдам жетумен бірге, бар мүмкіндігінше ауруханаға тез жеткізу жүргізушімен бірге мұның да міндеті саналатын. Талай жаны қысылып тұрғандарға көмек қолын созып, дәрігерлік кеңесін берді. Осы жедел жәрдем бөлімшесінде жүріп те елдің алғысына бөленді.2001 жылы Ғ.Ақназарова өзі сұранып, шалғайдағы Ақбасты ауылына келді. Кейбіреулер қаладағы қызметін тастап, ауылға аттанғанына таңданысты. Оның мұнда келгендігі бірінші мақсаты – дәрі-дәрмегі жетіспей жататын ауыл адамдарына дәрігерлік парызын орындап, өз тәжірибесі мен білігін сырқат жандардың жандарына жалау болып, қол ұшын беру болса, екіншіден, балаларының қазақы орта тәрбиесін көргенін қалады. Мұнда келгеннен кейін-ақ оның аты жан-жаққа танылып, сонау Шалқар ауданынан, Бозойдан, малшы ауылдардан іздеп келушілер көбейді. Басқа жерден келсе де жақсы лебізін айтып, Гиппократ антына адалдығын танытуды міндеті санады. Осындайда өзі бұрыннан байқап жүретін қолының биоэнергетикалық күш-қуатының құдіретін сезіне бастады. Кейде жұмыстас әріптестерінің де басы ауырып, балтыры сыздаса Ғазизаға ұстатып көретіні бар. Көрінгендердің барлығы көңіл-күйлерінің жақсарып, сырқыраған аяқтары, белдерінің сауығып кеткендеріне алғыстарын білдіріп жатады. Ал дәрігер үшін науқас жандардың риясыз ризашылығына бөленгені – үлкен абырой ғой.Өткен жылы қолындағы биоөрісті Алматыға «Халық емшісі» емдеу орталығына барып, тексертіп көрген. Мұның бойындағы биоэнергетикалық өрісті тексергендер таңданысып қалды. Қолындағы биоөрістің өте күшті екендігін айтқан емдеу орталығындағылар мұнымен жете танысып, хабарласып тұруы керегін мықтап тапсырды.Ол өз тәжірибесінің, білімінің алдамайтынына сенеді. Бірде жүрегі ауыратын келіншекті тексере отырып, жүрегінен өзгеше дыбыс естігендей болды. Жүрекпен ойнауға болмайды. Аяғы ауыр келіншекті дереу астаналық клиникаларға жіберді. Білікті мамандардың бақылауында болған әлгі келіншек баласын аман-есен дүниеге әкелді. Ал мұндай жайлардан кейін жоғарыдағылар да Ғ.Ақназарованың білігіне шек келтірмейді. Олар да ауыл дәрігеріне ризашылықтарын білдіріп жатады. Оның күнделікті жұмысынан мұндай мысалдарды көптеп келтіруге болады.Кешегі пандемия өршіген кезде негізгі күш емдеу мекемелеріне түскені белгілі. Ауылдағы медпунктті де індет кезінде науқастар басып тастады. Шағын ұжымдағы медбикелер Ұ.Тоқмырзаева, К.Өтепова, Т.Өтепова меңгерушімен бірге сырқаттанғандарға ем жасап, тыным таппады. Өкпе қабынуы індетімен күресуде ұжым басшысы әр науқасты жіті бақылап, емнің дұрыс жүруіне көңіл бөліп отырды. Осылардың тынымсыз еңбегі арқасында коронавирус індеті Ақбастыда басқа жерлерге қарағанда жайылып кетпей, құрықталды. Мұнда да Ғ.Ақназарованың кей науқастардың қасынан ұзамай, өзінің қатаң бақылауына алғанын атап айтуымыз керек.Көптің алғысына бөленген Ғ.Ақназарова марапаттардан да кенде емес. Жыл сайын республикалық, облыстық дейгейде түрлі марапаттарға ие болып келеді. Бұл да ол бағындырған биіктердің лайықты бағасы болса керек.Ғ.Ақназарова жанұясында аяулы әже атанып, балалары мен немерелерінің қызығын көріп отыр. Гүлмирасы – тұрмыста, балалы-шағалы, Шайхы, Шыңғыс, Дінмұхаммеді ауылда өз еңбегімен несібесін тауып жүр. Келіні Дидар ауыл әкімшілігінде бас маман болып істейді. Кіші келіні Орынкүл – психолог маман. Шамрадин, Нұрадин, Нұрхан, Өзге, Заңғар,Ахмед атты немерелерін көргенде, жұмыстан шаршап келгенін бірден ұмытып кетеді.

Алғыс алған абзал жан

<a href="https://kyzylorda-news.kz/">Kyzylorda-news.kz.</a> Қазалы ауданының әкімі Мұхтар Оразбаев Жетес би дәрігерлік-амбулатория ғимаратына (көне емхана) арнайы барып, күрделі жөндеу жұмыстарымен танысты.&nbsp;Наурыз айында басталған құрылыс жұмыстары 6 ай көлемінде толық ақталады деп жоспарланып отыр. Бұл жайында жөндеу жұмыстарына жауапты Руслан Серікұлы баяндап берді.&nbsp;<blockquote>«Өткен айдан бастап қызу жұмыстарға кірісіп кеттік. Атап айтсақ, кәріз, жылу, су, жарық желілері жөндеу көреді. Сондай-ақ, есіктері мен төбе шатыры ауысып, ғимарат сырты сұйық травертинмен қапталады. Одан бөлек, сыртқы абаттандыру жұмыстары жүріп, көлік тұрағы асфальтталады. Қазіргі таңда мұнда барлығы 30 адам жұмыспен қамтылып отыр», – дейді Руслан Серікұлы.</blockquote>Аудан әкімі Мұхтар Әуесұлы жауапты қызметкерлерге күрделі жөндеудің уақытылы әрі сапалы болуын тапсырды. Сонымен қатар Қазалы ауданаралық ауруханасының бас дәрігері Бақыткүл Әлішева да құрылысқа қатысты өз ойымен бөлісті.Айта кетейік, мердігер мекеме «СК МАҚСАТ LTD» ЖШС атқарып жатқан ғимараттың жөндеу жұмыстарына республикалық бюджеттен 176,2 миллион қаржы қаралған.&nbsp;<img src="https://knadmin.beoblood.kz/uploads/336366825_587135236690708_6815168085628379555_n_b6b6464639.jpg" alt="336366825_587135236690708_6815168085628379555_n.jpg"><img src="https://knadmin.beoblood.kz/uploads/336752657_749613703430961_3669857828518255696_n_389ce4c3f7.jpg" alt="336752657_749613703430961_3669857828518255696_n.jpg">

Қазалы: Емхана ғимаратын жөндеу жұмыстары жүйелі жүріп жатыр

<a href="https://kyzylorda-news.kz/">Kyzylorda-news.kz.</a> Қызылорда облысының психикалық денсаулық орталығына қарасты психиатриялық стационар ғимараты өткен ғасырдың 70-жылдары пайдалануға берілген. Сол уақыттан бері нысан әбден тозығы жеткен болатын. Шатыры мен кәріз жүйелері ескірген ғимарат науқастардың сапалы медициналық көмек алуына қолайсыздық тудыратын. Енді міне, бұл мәселе өз шешімін тапты.&nbsp;Қызылорда облысы әкімдігі мен облыстық денсаулық сақтау басқармасының қолдауымен, ғимараттың күрделі жөндеу жұмыстарына тиісті қаражат бөлінді. Бұл жұмыстың атқарылуына орталық басшылығы зор үлесін қосты. Табандылық танытып, құзырлы мекемелерге проблеманың өзектілігін жеткізе білді.Бүгінде күрделі жөндеу жұмыстары басталды. Құрылыс кезінде орталықтың шатыры, есік-терезелері, кәріз жүйелері, ғимараттың іші мен сырты және т.б. жаңартылатын болады. Заман талабына сай құрал-жабдықтар алынып, егу бөлмелері қайта жасақталады. Сонымен қатар, қосалқы ғимараттар да күрделі жөндеуден өтпек. Орталық айналасындағы қоршаулар ауыстырылып, аула ішін көгалдандыруға көңіл бөлінеді.<blockquote>«Жасыратыны жоқ, бұл күні орталық қызметкерлері ұзақ күтті. Қазір құрылысшылардың ыңғайлы жұмыс жасауына қолдау көрсетіп жатырмыз. Ұйымдастыру шараларын өзімнің қатаң қадағалауымда. Әрбір атқарылған жұмыстың сапасы тікелей бақылауымызда болады. Қазір науқастарды жедел жағдайда қабылдап жатырмыз. Науқастардың қолайлығы үшін тиісті жұмыстар атқарылуда», – деді орталық директоры Әділбай Медетбаев.</blockquote>

Қызылордадағы психикалық денсаулық орталығы күрделі жөндеуден өтеді

<a href="https://kyzylorda-news.kz/">Kyzylorda-news.kz.</a> Пандемия басталғаннан бері Қызылорда облысы бойынша коронавирус инфекциясының 26019 жағдайы тіркелді. Оның ішінде 17 079 жағдай ауру симптомдарымен болса, 8940 дерегі клиникалық белгілерінсіз анықталды. Облыстағы коронавирус инфекциясының бүгінгі эпидемиологиялық ахуалы тұрақты деп бағаланады.&nbsp;2023 жыл басынан бері 70 адам коронавирус індетіне шалдыққан, &nbsp;оның ішінде 27 жағдай 14 жасқа дейінгі балалар арасында анықталды. Ағымдағы жылдың сәуір айының 11 күнінде 7 жағдай есепке алынды. 2023 жылдың ай көрсеткіштері бойынша аурушаңдық динамикасында төмендеу тенденциясы байқалады, қаңтарда-34, ақпанда-14, наурызда-15 дерек есепке алынды.&nbsp;Инфекциядан қорғанудың тиімді жолы – COVID-19-ға қарсы вакцинацияның аяқталған курсы және ревакцинация. Облыс бойынша вирусқа қарсы вакцинаның бірінші компонентімен тиісті контингенттің 94,2%, екіншікомпонентімен 93,2% егілген. Сонымен қатар 275852 тұрғын ревакцинациядан өткен болса, қайта ревакцинация жасатқандар саны – 77880 адам. Бүгінгі күні облыс емханаларында коронавирус инфекциясына қарсы екпе жалғасуда. Иммундау жүргізу үшін Sinopharm вакцинасының 1700 дозасы және ревакцинациялау үшін Pfizer вакцинасының 21000 дозасы бар.&nbsp;<blockquote>«Вакцинациялауға қосымша жеке бас гигиенасын сақтауды, қолды сабындап жууды, антисептик қолдануды ұмытпау керек, адам көп жиналатын орындарға баруды мүмкіндігінше шектеген артық болмайды, қоғамдық көлікке мінгенде, халық көп болатын орындарда маска киюге кеңес береміз. Бұл сақтық шаралары ауа тамшылары арқылы таралатын инфекциялық аурулардан қорғайды. Әсіресе, бүгінгідей қызылша ауруының эпидахуалы тұрақсыз кезінде екпе жасатумен бірге осы шараларды қосымша орындау аса маңызды», − Қызылорда облысының санитариялық-эпидемиологиялық бақылау департаменті басшысының орынбасары Әлия Әбдіқайымова.</blockquote>

Қызылордада жыл басынан бері 70 адам коронавирус инфекциясын жұқтырған

<a href="https://kyzylorda-news.kz/">Kyzylorda-news.kz.</a>&nbsp; Әлеуметтік медициналық сақтандыру қорының сарапшылары тегін медициналық көмектің кепілдік берілген көлемі және міндетті әлеуметтік медициналық сақтандыру аясында жеткізушілер көрсеткен қызметтердің сапасы мен көлеміне тұрақты түрде мониторинг жүргізеді.&nbsp;Әлеуметтік медициналық сақтандыру қорының Қызылорда облысы бойынша филиалының директоры Бақыт Исмаханбетов хабарлағандай, 2022 жылғы мониторинг нәтижелері бойынша сарапшылар 95 мыңнан астам ақауларды анықтады. Салыстырар болсақ, 2021 жылы бұл көрсеткіш 67 мыңды құраған еді. Оның ішінде 26 млн теңгеге 5 073 көрсетілмеген қызмет көрсетілді деп жазылған.&nbsp;Медициналық көмек түрлеріне жіктеп айтсақ, 10 медициналық мекмелер бойынша жалған жазбалардың барлығы жан басына шаққандағы кешенді нормативтен тыс консультациялық-диагностикалық қызметтерге тиесілі (100%). Оның 8-і (80%) – мемлекеттік, 2-і (20%) – жекеменшік.«Құқық бұзған» денсаулық сақтау субъектілеріне қатысты айыппұл санкциялары қолданылды. Көрсетілетін қызметтердің қолжетімділігі мен сапасы тұрғысынан медициналық ұйымдардың міндеттемелері шарттық қатынастардың маңызды бөлігі болып саналады және Қор олардың орындалуын талап етуге құқылы.&nbsp;Сондай-ақ Қор жеткізушілері тегін медициналық көмектің кепілдік берілген көлемі және міндетті әлеуметтік медициналық сақтандыру пакеттері аясында көрсетілген медициналық қызметтерге ақы төлеу аталған қызметтердің сапасы мен көлеміне мониторинг жүргізілгеннен кейін ғана жүзеге асырылатынын атап өткен жөн. Яғни, медициналық көмек көрсетудің стандарттары мен ережелерін, сондай-ақ клиникалық хаттамалардың ұсынымдарын сақтай отырып, құжатпен расталған ақылы қызметтер ғана төленеді.Егер пациент жалған жазбаны өздігінен анықтаса, бұл туралы медициналық сақтандыру қорына хабарлауы қажет. Қордың fms.kz ресми сайтына, Qoldau 24/7 мобильді қосымшасы арқылы немесе 1406 телефонына хабарласып, шағым немесе өтініш қалдыруға болады.<figure class="image"><img src="https://knadmin.beoblood.kz/uploads/6_c59a1a097e.jpg" alt="6.jpg"></figure>&nbsp;

МӘМС: Қызылордалық сарапшылар 5 мыңнан астам жалған мәліметті анықтады

<a href="https://kyzylorda-news.kz/">Kyzylorda-news.kz.</a>&nbsp; РФ заңнамасының нормалары бойынша зейнетақы алатын Байқоңыр қаласының, Төретам және Ақай кенттерінің 4 мыңнан астам тұрғыны биыл МӘМС жүйесі ҚР азаматтарының жеңілдікті санаттары қатарына қосылады. Бұл туралы Қызылорда облысы бойынша Әлеуметтік медициналық сақтандыру қоры филиалының жоғарыда аталған елді мекендердің тұрғындарымен кездесуі барысында хабарланды.Талқылауға ҚР Президентінің «Байқоңыр» кешеніндегі арнайы өкілінің міндетін атқарушы Жан Шайхысламов, «Әлеуметтік медициналық сақтандыру қоры» КЕАҚ Қызылорда облысы бойынша филиалының директоры Бақыт Исмаханбетов, облыстық денсаулық сақтау басқармасы басшысының орынбасары Жангелді Шаймбетов, Байқоңыр қаласындағы көпсалалы аурухананың бас дәрігері Талғат Байтилеуов қатысты.Байқоңыр қаласында және Төретам, Ақай елді мекендерінде 40 мыңға жуық адам тұрады, олардың 13 мыңға жуығы МӘМС жүйесінде сақтандырылмаған. Бұл аталған елді мекендер халқының 32% - дан астамы. Көбінесе 12 айға төлемдері жоқ азаматтар, жұмысшылар, жеке кәсіпкерлер.ҚР Президентінің «Байқоңыр» кешеніндегі арнайы өкілінің м.а. Жан Шайхысламовтың ақпараты бойынша, Байқоңыр қаласында, Төретам және Ақай кенттерінде 4 351 тұрғын Ресей заңнамасы бойынша зейнетақы алады. ҚР азаматтарының бұл санаты тегін медициналық көмектің кепілдік берілген көлемі шеңберінде медициналық көмек алады және Ресей Федерациясының медициналық ұйымдарында шұғыл көмек алады. Қазір бұл азаматтардың мәліметтері ҚР Еңбек министрлігінің ақпараттық жүйесінде болмағандықтан, МӘМС аясында медициналық қызметтерге қол жеткізе алмай отыр.&nbsp;Спикер атап өткендей, қазіргі уақытта ҚР Денсаулық сақтау министрлігі шешім жолдарын қарастырып, тиісті жұмыстар жүргізуде. Бұл мәселе ҚР Президентінің «Байқоңыр» кешеніндегі арнайы өкілі Қайрат Нұртайдың бақылауында.Сондай-ақ, тұрғындардың бірі сұрақ қойды: жалақы айдың соңында есептелсе, неге МӘМС мәртебесі айдың басында «сақтандырылмаған» болады?ӘМСҚ облыстық филиалының директоры Бақыт Исмаханбетовтың айтуынша, «МӘМС туралы» Заңның 30-бабына сәйкес, жұмыскерлердің, оның ішінде мемлекеттік, азаматтық қызметшілердің, АҚС шарттары бойынша кіріс алатын жеке тұлғалардың аударымдары мен жарналарын есептеуді және аударуды жұмыс беруші ай сайын жүзеге асырады. Сонымен қатар, аталған Заңның 5-бабының 2-тармағына сәйкес, БЖТ төлеушілерден басқа барлық санаттағы төлеушілердің сақтандыру мәртебесі МӘМС-ға соңғы төлем төленгеннен кейін 3 ай ішінде сақталады. Бірақ осы кезеңде қарыз жинақталады, оны болашақта «сақтандырылған» мәртебесін сақтау үшін өтеу керек. Тиісінше, қызметкердің МӘМС-ға төленбеген кезеңдері бар. Осыған байланысты, дербес төлеуші ретінде ай сайын 3 500 теңге төлеу қажет.Кездесу соңында МӘМС-ғы мәртебені fms.kz ресми сайтында, Qoldau 24/7 мобильді қосымшасы және Telegramдағы SaqtandyryBot немесе 1406 байланыс орталығына хабарласу арқылы тексеруге болатыны айтылды. Сондай-ақ, egov.kz ҚР электрондық үкіметінің сайтында "Денсаулық сақтау" бөлімінде медициналық сақтандыру жүйесіндегі өз мәртебеңізді тексеріп, жүргізілген төлемдер туралы "Медициналық қызметтер туралы және МӘМС-ке аударылған сомалар туралы ақпарат" мемлекеттік қызметі арқылы білуге болады. &nbsp;<figure class="image"><img src="https://knadmin.beoblood.kz/uploads/bajkonyr_6_fcaa85dfa3.jpeg" alt="байконыр 6.jpeg"></figure>&nbsp;<figure class="image"><img src="https://knadmin.beoblood.kz/uploads/bajkonyr_3_d46681adb1.jpeg" alt="байконыр 3.jpeg"></figure>&nbsp;

Байқоңыр зейнеткерлері МӘМС жүйесінің жеңілдетілген санаттарының қатарына енгізіледі

<a href="https://kyzylorda-news.kz/">Kyzylorda-news.kz.</a>&nbsp; Ұлы ақын Абай атамыз: «Сен де бір кірпіш дүниеге, кетігін тап та бар қалан» демекші, өз кәсібін таңдап, сала бойынша өз орнын табу бүгінгі жастардың жеткен басты мұраты десек артық болмас. Ғылым мен техниканың қарқынды дамуымен қатар, кей мамандық қолданыстан шығып жатса, енді бірі қажеттіліктен пайда болып жатыр. Осындай қажеттіліктен туындаған кәсіптің бірі – адам денсаулығына пайдасы мол массаж түрлері болып отыр.Ауданда осы сала бойынша өзінің жеке кәсібін ашып отырған ақ халатты абзал жанның бірі – Гауһар Зарлық. Өзінің “GAUKHAR” массаж орталығын ашып, көптеген аурудың емі, сондай-ақ шаршаудың алдын алу үшін массаж түрлерін де қарастырған. Қазіргі бастың қысуы мен көз айналасындағы қан айналым жүйесінің дұрыс болуына, бас массажы да бар. Сонымен бірге аяқ-буыны ауыратын егде жастағы кісілердің емі ретінде, аяқ массажы да назарға алынған. Бет терісін күтуде әжімнің алдын алу, бет терісін тазалап, тегістеу құрылғысымен де қамтамасыз етілген. Сонымен бірге мүмкіндігі шектеулі балаларға немесе әлеуметтік жағдайы төмен отбасыларға жеңілдіктер қарастырылған. Жасап жүрген жұмысын Гаухардың өзі кеңінен әңгімелеп берді:<blockquote>Жалпы өзім медицина маманымын. Ауданда медициналық массаж орталығы қарастырылмаған, сондай-ақ ауыл тұрғындары қалаға барып ем алып жүргенін студент кезімде көретінмін. Міне, сол уақытта ойға алған кәсібімді 2021 жылы ашудың сәті түсіп, ауыл игілігі үшін осы кәсіпті ашуға бел буған болатынмын. Негізінен 2019 жылдан бастап қызығушылығым артып, алдыма мақсат қойдым. Енді, міне, осы мақсатыма жету жолында білім алып, кәсіпкерлікті қолдау аясындағы бағдарлама арқылы өз кәсібімді ашып отырмын. Сонымен қатар «Бизнестің жол картасы - 2025» бағдарламасы аясында қайтарымсыз грант жобасын қорғап, 3 млн теңге грант иегері атандым. Бүгінгі күні адам денсаулығындағы ауытқуларды түрлі массаж арқылы емдеймін. Орталықта бір адам жұмыспен қамтылған. Алдағы уақытта осы кәсібімді әрі қарай дамытып, білікті маман иелерін жұмыспен қамту ойда бар. Биоэнергомассажер “FOHOW” бұл барлық дене бұлшық еттерін босатып, ішкі организмге дейін әсер ететін аппарат түрі.Yamaguchi аяқ буындарын жақсартатын аппарат түрі, сонымен қатар Yamaguchi көзге арналған массаж аппараты көздегі қысымдарды және желке тұстағы ауырсынуларды жоюға пайдасы зор. “Fohow” компаниясының жоғарғы сападағы майларын &nbsp;пайдаланып отырмыз. Көбіне демалыс күндері орталыққа келіп ем алушылар саны артып келеді. Осылайша жалпы саны 43 адамға көмек көрсетілді,– дейді.</blockquote>&nbsp; &nbsp; &nbsp; &nbsp; Міне, елімізде алдына үлкен мақсат қойып, кәсіп ашамын деген азаматтар үшін көптеген мүмкіндік қарастырылған. Түрлі бағдарламалар арқылы кәсіпкерлерді қолдау аясында өз кәсібін ашып, берекетін көріп отырған адамдар да жетерлік. Ең бастысы, адамның ерінбей еңбек етуі. Сол кезде ғана адамзат баласы өз мақсатына жетері анық.

Аралда медициналық массаж орталығы ашылды

<a href="https://kyzylorda-news.kz/">Kyzylorda-news.kz.</a> Сырт қарағанға медбике қызметі шалт қимылды және қателікті кешірмейтін қызмет ретінде көрінеді. Шын мәнінде медбике науқастың денсаулығына дәрігерден кем жауап бермейді. Дәрігер науқасты тексеріп, тағайындауын жазып берген соң, әрі қарай бар жұмысты медбике орындайды. Адам жанына араша түсіп, қызметте аса мұқият болып, науқастың халін бақылап қарайтын медбикенің жұмысы ерлікпен пара пар.&nbsp;Осындай жауапкершілігі жоға¬ры қызметті абы¬роймен атқарып жүрген мамандардың бірі – Гүлжайна Ерманова Сырдария аудандық емханада хирургия бөлмесінің медбикесі болып жұмыс атқарады. Жалпы өтілі 17 жыл құрайтын медбике емханада соңғы 7 жылдан бері абыройлы қызмет етіп келеді. Гүлжайнаның ең ізгі мамандықты таңдауына оның осы мамандығына деген сүйіспеншілігі мен ата-анасынан алған тәрбиесі себеп болды.Қармақшы ауданының тумасы 1980 жылы Ақжар ауылында дүниеге келді. Ата-анасы қарапайым жұмыстың көрігін қыздырып, бауырынан өрбіген 10 ұл-қызына жақсы тәрбие берген жандар. Үлкен отбасында сегізінші перзент болып өскен Гүлжайна Ермұратқызы екі әпкесіне еліктеп, мектеп бітірген соң медбике болуды армандады.Ауылдағы орта мектепті бітірген соң 2002 жылы Қызылорда қаласындағы медициналық колледжге оқуға түсіп, емдеу ісі мамандығы бойынша оқу орнын бітіріп шықты. Ең алғашқы еңбек жолын 2006 жылы Сырдария аудандық ауруханада бастаған жас маман аурухананың жан сақтау бөлімшесінде тәжірибеден өтті. Осы бір ай уақыт аралығында медбике қызметінің қиындығына төзіп, аса жауапкершілікті талап ететін мамандық иесі болғанына еш өкінбеді. Оның себебін ақ халатты абзал жан ең әуелі мамандығын жүрек қалауымен таңдағанымен және адамдарға көмек қолын созып, дертіне дауа табатын дәрігердің сенімді серігі бола білгенімен түсіндіреді.Иә, шын мәнінде жаны жабырқаған жандардан алғыс алу, оларға жылы сөз айту, науқастармен көбірек бірге болу жақсы медбикелердің ғана қолынан келеді. Ерік-жігері мықты, қиындыққа шыдамды, мінезге бай адам ғана медбике бола алады. Осындай жауапкершілігі мол қызметтің басы қасында жүру тек жүрегі жұмсақ жандарға ғана тән қасиет. Аудандық аурухананың терапия бөлімшесінде 10 жыл бойы медбикелік қызметін абыроймен атқарған Гүлжайна талай күндер мен түндерді кірпік қақпай өткізгенін ұмытпайды. Әсіресе, егде жастағы қарттардың жанында болып, сырқатының жеңілдеуіне, оны жеңуге жәрдемдесу шыдамдылық пен төзімділікті қажет ететінін талай басынан өткерген. Бөлімшедегі дәрігерлер А.Жакупова мен Ф.Әбдібекованың науқасқа берген ем-домын мезгілінде науқасқа егу, тағайындауын бұлжытпай орындау оның күнделікті атқарған міндеті.<blockquote>Күнделікті жұмысқа келгенде науқастармен жақсы қарым-қатынас жасап, дәрігерлердің нұсқаулығын орындауға, науқастарға ем-дом арқылы дертіне шипа болуға асығамын. Осындай жауапкершілігі мол қызметте әріптестерім Зина Кенжебекова, Райса Анасовадан көп тәжірибе жинадым. Менің ойымша медбике мамандығы ең ізгі, инабатты, алғысқа толы мамандық. Кәсіби маман атану үшін үздіксіз оқып, біліктілік санаттарынан өтіп келемін. Медбикеге тән қасиет деп ең алдымен мейірімді болу, өзі ауырып тұрған адамға жылы сөз сөйлеп, жұбату секілді қасиеттерді айтар едім. Міне, осындай қасиеттің арқасында өз міндетіңді абыроймен атқарасың. Бала кезімізде ата-анам «қыз бала қатты сөйлемеу керек, бауырмал, мейірімді болу адамгершілік қасиетіңнің айнасы» деп айтушы еді. Отбасымызда екі әпкем медицина саласында қызмет етеді. Өзім де осы саланы таңдап, 17 жылдан бері науқастардың сауығып кетуіне күш салып келемін, – дейді жоғарғы санатты дәрежеге жеткен медбике Гүлжайна Ерманова.</blockquote>«Адамның жақсылығын айт нұры тасысын» демекші, Гүлжайнамен біраз жыл көрші болып, талай мәрте ем-дом алғаным рас. Бір аулада бір медбике болғаны қандай жақсы. Мезгілсіз уақытта бір жерің ауырса, дереу ине шаншитын медбике іздейміз. Сондайда тәуліктің кез келген уақытында көмегін аямауға даяр тұратын медбикенің шапағатын талай адамдар көріп, алғысын жаудырғанын көзіміз көрді. Бүгінде емхананың хирургия бөлмесінде медбике болып қызмет ететін Гүлжайна күнделікті дәрігердің қабылдауына келетін адамдарға көмек қолын созып, тиісті ем-шарасын жасайды. Жараны, күйікті байлап, тану, тазалап жуу секілді жауапты жұмысты аса ыждағаттылықпен атқарады. Травматология бөлмесінде де медбикеге көмектесіп, ине салу секілді өзіне жүктелген қызметті мінсіз атқарады.<blockquote>&nbsp;Әріптесім Гүлжайнаны алғашқы жұмысқа келген уақыттан бері білемін. Оның жұмысына жауапкершілікпен қарайтынын, қиындыққа төзімділігі туралы жақсы пікір айтып, кейінгі жас мамандарға үлгі етемін. Кейде ауруханада бөлімшеде аяғыңнан тік тұрып, науқастардың жанынан бір елі шықпайтын кездер болады. Әрбір өзгерісті мұқият бақылап, оны дәрігерге дер кезінде айту науқастың сауығып кетуіне көмектеседі. Осындайда білікті, өз ісінің мықты маманы бола білген Гүлжайнаны нағыз денсаулық жанашыры дер едім. Қазір де емханада бірге қызмет жасаймыз. Білгенін үйретуден жалықпайтын ақ халатты абзал жан жүктелген міндетіне өте сергек, әрі жауапкершілікпен қарайды, – дейді емхананың бас медбикесі Райса Анасова.</blockquote>Жүктелген міндетін абыроймен атқарып келе жатқан медбике Гүлжайна Ерманова денсаулық сақтау басқармасы басшысының, сала кәсіподағының, аудандық аурухана бас дәрігерінің Құрмет грамотасымен, бірнеше мәрте Алғыс хатымен марапатталды.Гүлжайна мықты медбике болумен қатар өмірлік серігі Қайрат Әмзеевпен бірге құтты шаңырақ иесі. Олар бауырларына жақсы аға мен жеңге. Жеңгесінің ізгі жолымен қайынсіңлісі Айсәуле дәрігерлікті таңдап, қазір аудандық емханада жалпы тәжірибелі дәрігер қызметінде. Қайрат пен Гүлжайна Инабат есімді қыз бала тәрбиелеп отырған бақытты жандар. &nbsp;

Гүлжайна Ерманова: Медбике мамандығы ең ізгі, инабатты, алғысқа толы мамандық

<a href="https://kyzylorda-news.kz/">Kyzylorda-news.kz.</a> Денсаулық сақтау министрі Ажар Ғиният Қазақстанда елде қызылша дертінің көбейіп жатқанын айтты.<blockquote>"Қазір балалар арасында қызылша ауруы тарап жатыр. Инфекция ауа арқылы тарайды. Ауруды жұқтырудың алғашқы деректері шетелден (Түркия, Ресей Федерациясы) келгендер мен туристерден анықталды. Осылайша, балалар ауруды жұқтырып, ауыра бастады. Көбіне екпе алмаған балалар ауырды. Оларда ауруға қарсы иммунитет болмаған", - деді Денсаулық сақтау министрі Ажар Ғиният.&nbsp;</blockquote>Сонымен қатар, министр эпидемия басталмағанын, мектептерде карантиннің енгізілуін күтудің қажеті жоқ екенін атап өтті.<blockquote>"Қазақстан бойынша ауру жұқтырудың 100 дерегі тіркелді. Әзірше, эпидемия басталған жоқ", - деді Ажар Ғиният.</blockquote>

Қазақстан және Қызылорда облысының жаңалықтары: Денсаулық