<a href="https://kyzylorda-news.kz/">Kyzylorda-news.kz.</a> Маусым айының әр үшінші жексенбісі – медицина саласының қызметкерлері күні екені мәлім. Жыл сайын өз деңгейінде тойланатын бұл айтулы дата шиелілік ақ халаттылар үшін де мереке. Өйткені бұл күн – жан саулығын қорғай білетін дәрігер еңбеңінің еленетін күні. Иә, дәрігерлік – аса жауапты, әрі қиын мамандық. Сондықтан да бұл іске екінің бірінің ебі келе бермейді. Майталман маман болу үшін – темірдей төзім мен мықтылық керек. Өкінішке қарай, біздің арамызда темірдей төзімді тал бойына тұрақ етіп, тіпті салқын қандылықты жанына серік еткен ақ халаттылар көп-ақ. Аладайда «Дәрігер – сөзбен емдейді» деген тәмсілді негізге алар болсақ, ақ халатты абзал жандарға ең әуелі мейірбандық пен қарапайымдылықтың, дертке жылы сөз арқылы дауа таба білудің аса қажет екенін ұғынған болар едік. Арамызда да науқасты бірінші дәрі-дәрмек арқылы емес, жылы сөзімен емдей білетіндер баршылық. Солардың бірі – еңбекшілік Ернұр Өмірзақ.Дәрігерлік сала – тек іспен ғана емес, сөзбен де терең тамырлас. Жоғарыда айтқанымыздай, «Дәрігер – жартылай сөзбен емдесе, жартылай іспен емдейтіні» &nbsp;даусыз. Ал көне Иран даналығында «Дәрігердің үш қаруы бар: сөз, шөп және пышақ» деп айтылады. Мұндағы сөздің бірінші орынға қойылуы жай емес. Демек, «дәрігердің науқас психикасына, оның ойына, көңіл күйіне, ерік-жігеріне ықпал етуі – ең басты қаруы» екені анық. Қай кезеңде де ақ халаттылар бұл қағидатты санаға сақтап, науқастармен тиісті дәрежеде сөйлесіп, қарым-қатынас құра білген. Бірақ қазір бәрін олай деп айта алмаймыз. Көптеген науқастардың өзі медицина қызметкерлерінің салыңқы қабағы мен тұнжыр, немқұрайлы көзқарасынан дертіне дерт қосып, көңілі жараланып жататынын айтады. Ал біз Ернұр Жандарбекұлын көргенде мейірім иесінің нақ өзі екенін аңғарамыз. Еңбекші ауылының тұрғындары да Ернұрды өз саласының нағыз маманы екенін айтады. Тіпті, ол елден алғыс алып қана қоймай, мейірімді жүзімен кез келген науқасты аурудан айықтыратын көрінеді. Ендеше, біз де жүрегінде жылулығы, көзінде нұры бар өз мамандығын өзідей сүйетін Ернұрды мақаламызға арқау етпекпіз.Ернұр Өмірзақ – Еңбекші ауылының епті азаматы. Олай деуімізге себеп көп. 2002 жылы дүние дидарына келген ол бала күнінен ақ халатты абзал жан болуды арман еткен. Мектепте оқып жүрген күннің өзінде оның медицина саласына деген махаббаты оянып, 9 сыныпты тәмамдаған соң 2018 жылы Түркістан жоғары медицина колледжіне «Емдеу ісі» мамандығына оқуға түседі. Аталған оқу орнында жүріп ол мақтаулы жанға айналып үлгереді. 2022 жылы төрт жылдық оқуын аяқтаған Ернұр туған жеріне келіп еңбек етуді мақсат тұтқан.&nbsp;Мақсатына бір қадам табан тіреген ол 2023 жылдың ақпан айынан бастап «Жастар тәжірибесі» арқылы Еңбекші ауылына жұмысқа орналасады. Өз саласына білек сыбана кіріскен жігіт сол уақыттан бері ауыл халқының саулығы үшін қалтқысыз қызмет етіп келеді. Алты ай уақыт бойы абыройлы қызмет етіп, «Жастар тәжірибесінен» өткен жас маман жуырда ғана сол ауылдағы медицина орталығына штаттық негізде тұрақты жұмысқа орналасқан.&nbsp;Қазіргі таңда Ернұр Жандарбекұлы аймақтық мейіргер қызметін ойдағыдай атқаруда. Және өзіне берілген тапсырмаларға жауапкершілікпен қарап, көше тұрғындарының саулығын бақылап, қан-қысымын өлшеп тұрады. Ауыл халқы да Ернұрдың атқарған жұмысына, тынымды тірлігіне дән риза. Ендеше, біз де оның алдағы жоспарлары мен жұмыстарына сәттілік тілейміз!

Еңбекшілік дәрігер өз ісінің маманы

<a href="https://kyzylorda-news.kz/">Kyzylorda-news.kz.</a> «Біздің бақытымыздың оннан тоғызы денсаулығымызға байланысты» демекші, жанын қоярға жер таппай қиналғанда өміріне араша болып, саулығы сыр бергенде емдеп-жазып жатса, науқас үшін бір ғанибет емес пе? Адам өмірі қиындығы мен қызығы қатар жүретін ақ халатты абзал жандармен тікелей байланысты. Әу баста өмірге Алланың қалауымен келсек, ең бірінші бізді құшағына алып, қамқорлық танытатын дәрігерлер қауымы. Ауру алқымнан алып, дерт дендегенде әр адам ақ халат киген алтын қолды қауымнан көмек күтеді. Тырп етпестен төсек тартып жатқан жандардың жебеушісі де осы мамандар. Яғни дәрігерлерге артылар жүк те жауапкершілік те ауыр. Алайда олардың ешқайсысы ел басына күн туғанда жұмысын тастап, қара бастың қамын ойлап, тасаға тығылып қалмайды. Алмағайып заманда да, төтенше жағдай да, зілзала мен тасқында да дәрігерлер адам жанының арашасы болуға әзір. Бұл сөзімізге қай уақытта да көмек сұрап барғанда бетімізді қайтармай қызмет көрсететін дәрігерлердің еңбегі дәлел.Медицина қызметкерлерінің жұмысы таңғы 8-ден бастап қыз-қыз қайнайтынын білеміз. Білсек те жұмыс барысымен аурухана табалдырығын таңғы тоғызда аттауға тура келді. Осы уақытқа дейін дәрігердің алдына шипа іздеп баратын едім, енді міне, олардың жұмысымен жіті танысуға келдім. Бұл жолғы бағытым – «Болашақ» дәрігерлік-амбулаториялық емханасы. Емханаға кіргеннен бастап тазалыққа мән беретінін білеміз. Тазалықты қатаң талап ететін орында қылаудың ізі де байқалмайды. Ал әр аймаққа арналған кабинетте анализ тапсыру, балаларды тексеру, емделушілердің арыз-шағымын тыңдау секілді жұмыстар қызу жүргізілуде. Бізді аталған емхананың бөлім меңгерушісі Қарлығаш Назарова қарсы алды. Жоғары санатты дәрігермен тілдесе отырып, «Болашақ» емханасында 5 дәрігер, 21 мейірбике бар екенін білдік. Бес дәрігер бес аймаққа бөлініп, әр көшенің тұрғындарына уақытылы тексеріс жүргізіп отырады. Ал өздері шағымдарымен келген науқасты ауруханаға дейін жеткізбей, керекті ем-домын жасап, шығарып салады.Сөз барысында Қарлығаш Назарова аймақтық дәрігерлер мен медбикелердің барлығы өз ісіне жауапты, тиянақты екенін айта кетті. Әсіресе аймақтық медбикелердің жұмысына ерекше тоқталды.<blockquote>«Дәрігер – зілі ауыр мамандық. Бұл салада жауапкершілік, ұқыптылық пен білімділік бірінші орында тұрады. Ел аузында «СВА» атанып кеткен емханадағы қызметкерлердің әрқайсысы өз ісіне жауапты деп айта аламын. Әсіресе, аймақтық медбикелер күннің ыстығы мен суығына қарамастан, қыстың күндері кеш қарайып қалса да үй-үйді аралап, аяғы ауыр келіншектерге, жаңа туған сәбилерге немесе егде жастағы кісілердің үйіне барып бақылап тұрады. Егер науқастың жағдайы мүшкіл болса, қасына дәрігер де еріп барып, бірге емдейді», – дейді бөлім меңгерушісі.</blockquote>Бөлім меңгерушіден мағлұмат алып болған соң, әрмен қарай Қарлығаш Назарованың ізіне ілестік. Бағытымыз – ІІ санатты дәрігер Ғазиза Мамышевамен танысу. Себебі осы уақытқа дейін редакциямызға Ғ.Мамышеваға алғыс айтып, газет оқырманы келген болатын. Елдің ризашылығына бөленіп, жұмысын жауапты атқарып жүрген маманды біз де көргіміз келді.Ғазиза Төрехановна – бала кезінен медицина мамандығына қызығып, ақ халат киюді армандаған. Содан кейін бойжеткеннің ұшқыр арманы қияға қонып, 2008 жылы Астана медициналық университетіне оқуға түскен. Бұлтарысы мен қалтарысы көп мамандықты игеру барысында Ғазиза ұқыптылық, тазалық, тәртіп сынды қасиеттерге аса мән беріп, Гиппократ антын алғаш рет қабылдаған.<blockquote>«Дәрігер мамандығында ең қиыны – ар азабы. Өздеріңіз білетіндей, біз жұмысқа тұрмас бұрын ант қабылдаймыз. Осы ант бізді өмір бойы адал жұмыс істеуге итермелейді. Әрі қазақ халқында «Уәде – Құдай сөзі» деген бар. Сол үшін барынша тырысып жүрміз. Көптің алдында жүзім жарық, беделім биік болып жүргенге не жетсін? Бұрын ақ халатты абзал жан болуды армандасам, қазір сол ақ халатқа дақ жұқтырмауды мақсат тұттым. Біздің жұмыстың астарында еліміздің алғысы мен ақжарма тілегі жатыр», – дейді Ғазиза Мамышева.</blockquote>Медицина – сан түрлі сынақтармен сыналатын сала. Бұл мамандықты меңгерген жандарға мүлт кетуге болмайды. Дәрігер өз ісіне қаншалықты жауапты әрі сенімді болса, соншалықты адамды ажал аузынан алып қалуға мүмкіндік бар. Сондықтан дәрігер болғысы келетін жандар бұл қызметке сатылап көтеріледі. Ғазиза да солай. Ол 2015 жылы оқуды аяқтаған соң, Бестам ауылдық округінде және Тартоғай, Сұлутөбе ауылдарының дәрігері болған. 2017 жылдың ақпан айынан бастап «Болашақ» емханасында қызмет атқаруда.<blockquote>«Бұл мамандыққа түсуімді ең бірінші ата-анам қалап еді. Қазіргі таңда ол кісілердің тілегіне құлақ асып, мамандық таңдауда қателеспегенімді түсіндім. Ал еңбек өтілімді ең бірінші ауылдан бастағаным – бөлек әңгіме. Өйткені ол жақта үлкен кісілер бізге сеніммен қарайды. Ал ауданда талап жоғары. Мұнда халық саны көп болғандықтан ба келушілердің арасында әртүрлі адамдар болады. Кейбіреулері біздің жұмысымызға түсіністікпен қараса, енді біреулері тым жоғары нәрсені талап етеді. Арасында сөзбен сұлқ түсіріп, сілкіп-сілкіп алатындары да &nbsp;табылады. Біраз біз барлығына түсіндірме жұмыстарын жүргізіп, әрқашан көмек беруге дайынбыз», – дейді Ғазиза дәрігер сөз тізбегін әрмен қарай жалғап.</blockquote>Иә, дәрігермен сұхбаттасу барысында жұмысының қауырт екеніне көзіміз жетті. Өйткені бөлменің есігі бір емес, бірнеше рет қағылып, дәрігер де қайта-қайта сыртқа шығып, емделушілердің қабылдаумен әлек болды. Сол арада түсінгеніміз ақ халаттылар үшін әр минут маңызды екен. Олар тығыз әрі шапшаң қызмет атқаруда. Бір сәтте бірнеше адаммен сөйлесіп, анализдер тізімін беріп, алғашқы көмек көрсетуде. Тіпті аяғы аяғына жұқпай, әрлі-берлі жүгіріп жүрген медбикелер де көп. Бір сөзбен айтқанда, емханадағы жұмыс медицина мамандарына бір сәт демалуға мұрша бермейді екен.Ғазиза Төреханқызы өзінің дәрігерлік жолын және жұмыс барысын таныстыру барысында 38 жыл еңбек өтілі бар Адаскүл Натбаева туралы тілге тиек етті. Өзінің қасындағы сенімді серіктесіне айналған медбикенің ерен еңбегі туралы бізбен бөлісті. Қазіргі таңда барлық салада жастардың көп екенін білеміз. «Болашақ» емханасында да жас мамандар жетерлік. Соларға үлгі болып, жол көрсетіп келе жатқан – осы Адаскүл Орынбасаровна екен. 38 жыл өмірін медицинаға арнаған маманмен жүздесуді жөн көрдік.Алғашқы сәттен-ақ жақсы әсер қалдыратын Адаскүл Натбаеваны жылы жүзді, мейірімді медбике десем артық айтқаным болмас. «Біздің міндетіміз – халықтың денсаулығын сақтау. Сол міндетті абыроймен алып шығуға тырысамыз» дейтін мейірімді медбикенің зейнеттік демалысқа шығатын уақыты да алыс емес. Бірақ сонда да алдына келген емделушіні күні кеше жұмысқа түскендей бар ынта-шынтасымен қарап, ем-шарасын жасауда.<blockquote>«Әулетімізде қыз апаларымыз медициналық колледжде оқыған. Бала кезден соларға еліктеп, 1983 жылы Түркістан облысына оқуға тапсырдым. Алғашқы еңбек жолым 1985 жылы Шымкент өңірінде басталды. Хирургия бөлімінде үш жыл еңбек етіп, тағдырдың қалауымен Шиелі ауданына тұрмысқа шығып, 1988 жылдан бері балаларға кеңес беру орталығында еңбек еттім. «Болашақ» емханасына 1999 жылы табан тіредім. Сол сәттен бері осындамын. 30 жылдан асқан еңбек өтілімнің арқасында мені көпшілік жақсы таниды. Аймақ аяжаны болып баланы да, жасты да, кәріні де қарап, олардың денсаулығының жақсы ¬болуына атсалысамыз. Өзіміз де кейде ауырып, мазамыз болмай тұрса да, ең бірінші келіп отырған науқасты қарауға тырысамыз. Мемлекеттің басты байлығы – адам емес пе? Сондықтан біреудің басы ауырып, балтыры сыздағанын қаламаймыз», – дейді көпті көрген медбике.</blockquote>Дәрігер Ғазиза Мамышева және медбике Адаскүл Орынбасаровна туралы тұрғындардың пікірі оң екенін білеміз. Сол сияқты ұжымдастары да қос маманды мақтап, әрқашан жақсы қарым-қатынаста жүргенін айтады. Ғ.Төреханқызы халықпен тіл табысып, дер кезінде нәтижелі ем ұсынып көзге түссе, А.Орынбасарова көп жылдық тәжірибесімен, көпті білгендігімен ұжымдастарына үлгі.Адам жанының арашасы болып жүрген жандардың орнына өзіңізді бір сәт қойып көріңізші? Әр емделушіні сағат сайын бақылап, әртүрлі диагнозбен жұмыс істеп, көңілін аулауға, ине салып тыныштандыруға, ауруханадан құлан таза айығып кетуіне атсалыса аласыз ба? Сырт көзге қарағанда бір сарында көрінетін дәрігерлердің жұмысын атқаруға сабырыңыз бен батылыңыз жете ме? Бұл сауалдардың жауабын білу үшін бір сәт дәрігерлердің тіршілігімен тыныстап көрген дұрыс шығар. Сол сәтте дәрігердің жұмысы жанқиярлық еңбек екенін ұғынармыз, бәлкім?!

Қарлығаш Назарова: Емханадағы қызметкерлердің әрқайсысы өз ісіне жауапты

<a href="https://kyzylorda-news.kz/">Kyzylorda-news.kz.</a> ... «Дәрігер, жанымда сіз болыңызшы...» «Сіздің жылы сөзіңіздің өзі бізге қуат береді», «Қызымның есімін сіздің құрметіңізге Сәуле қойдым»... Иә, бұл – қазақ «бір аяғы көрде, бір аяғы жерде» дейтін жүкті аналардың сәбиін аман-есен бауырына басқан соң, дәрігерге деген риясыз ризалығы. Шыны керек, Сәуле Сәменқызының атына мыңдаған ана күн сайын алғыс айтады десек, артық айтқандық емес. &nbsp;Әрине, дәрігердің бәрі де өз ісіне жауапты. Алайда мамандығының қасиетін бойына сіңірген, аялы алақаны шипалы, жылы сөзі де қиналғанға күш беретін нағыз дәрігерлер санаулы ғана. Оларды «Құдай өзі дәрігер етіп жаратқан» деп жатады. Иә, Сәуле Сәменқызы табиғатынан дәрігер болып жаралғандай. Бүгінде облыстық перинаталдық орталықтың аты аталса, Сәуле Сәменқызының есімі қоса айтылады. Бір орталықтың бар жауапкершілігін көтеруге тырысқан, ана мен балаға қуаныш сыйлау үшін жан-тәнімен қызмет етіп келе жатқан, әрбір келушіні жақынындай көріп, елпілдей қарсы алатын Сәуле Сәменқызына арқа сүйеп келетін аналар аз емес. Көптің алғысына бөленген, қолы жеңіл дәрігерге елдің алғысы шексіз. Тіпті «сіз зейнетке шығып кетпей тұрып, тағы да босанып алсам деп жүрмін» деп жүктілігін жоспарлап жүргендер де кездеседі. Мұның бәрі дәрігерге деген &nbsp;алғаусыз сенім. Қай мамандық иесі болсын, нағыз маман атанып, халықтың алғысына бөлену кез келгенге бұйыра бермейтін бақыт. Бүгін біз мақаламызға арқау еткен кейіпкер – облыстық перинаталдық орталығы бас дәрігерінің пациенттерді қолдау және ішкі бақылау жөніндегі орынбасары, жоғары санатты акушер-гинеколог дәрігер Сәуле Сәменқызы алғыс арқалаған ақ халатты абзал жан. Ол мұндай дәрежеге қалай жетті? Барлық ананың сүйікті дәрігеріне айналудың қандай құпиясы бар?... Кішкентай Сәуленің анасы үнемі қолы тимей зыр жүгіріп жүретін-ді. Үстінде ақ халаты, қашан көрсең де жұмысқа асығып кетіп барады.Мұндайда бүлдіршін қыз анасына: «Қайда барасыз?» деп сұрақ қойып үлгереді. Ылғи да бір жауап: «Адамдарға көмектесуге бара жатырмын». Бала Сәуле үшін осы жауаптың өзі қызық. Анасы құдды ертегідегі сиқыршы немесе құтқарушы періште сияқты. Әрдайым қиналған адамдарға көмектеседі, оларды құтқарып қалады. Ол анасын құтқарушы деп білді. Бала қиялындағы бейне тіпті бөлек. «Менің анам болмаса, адамдарға кім көмектесе алар еді. Оның аппақ халаты да ерекше». Кейін есейе келе анасының ауылдағы перзентханада жұмыс істейтінін түсінді. Ауылдың 10 төсектік босану бөлімінде міндет бөлісетін шама жоқ. Мұнда осы ауылға жақын 5 елді мекеннің әйелдері келіп босанады. Мұндайда дәрігерге де, медбикеге де, тіпті кіші медицина қызметкеріне де қарап тұратын шама жоқ. Дәрігерге қолғабыс етіп, жүкті әйелдің жағдайын жасап, зыр жүгіріп жүргені. Күн-түн деп уақытпен санаспайды да. Әрдайым адамдарға көмектесуге бара жатқан анасының осы бір бейнесі кішкентай қыздың жүрегіне «мен де сондай болсам ғой» деген ізгілік сәулесін ұялатты.<blockquote>«Қазақта «қыз анаға қарап бой түзейді» дейді ғой. Менің дәрігер болуыма анам ықпал етті. Бала күнімде анам үстіне ақ халатын іліп алып, жұмысқа асығып кетіп бара жатқаны көз алдымда қалып қойды. Әрдайым адамдарға көмектесу үшін жүгіріп жүретін, уақытпен санаспайтын, үстіндегі аппақ халаты өзіне әдемі жарасатын анамды көріп өскен мен әлемде ақ халат кигендерден артық ең қасиетті мамандық жоқ деп өстім. Тіпті дәрігерден басқа мамандық туралы ойламадым да. Осы мамандықты таңдауыма анамның ақ халатына сүйсінуім және «мен де адамдарға көмектесе алсам ғой» деген арман жетелеп әкелді. Анам ұзақ жылдар бойы ауылдың перзентханасында жұмыс істеді», – дейді дәрігер Сәуле Сәменқызы.</blockquote>Бала күнгі арман есейе келе мақсатқа жету жолындағы ізденіске алып келді. Оқысам, үйренсем, білсем деп өскен бойжеткеннің бар арманы – ақ халат киген дәрігер болу еді. &nbsp;Ең алдымен медициналық училищеге оқуға түскен ол диплом алған соң, жас маман ретінде 1982 жылы еңбек жолын туған жерден бастады. Сырдария ауданының, Шаған ауылындағы 10 төсектік перзентханада акушер болып бір жылдан аса уақыт жұмыс істеп, жоғары білім алуды ойлады. Арман қуып, жоғары оқу орнына түсіп, 1990 жылы дәрігер ретінде еңбек жолын жалғастырды. Сол жылдан бері Сәуле Сәменқызы өзі қалаған мамандықтың отына күйіп, суығына тоңып келеді. Акушер-гинеколог дәрігер ретінде әрбір жүкті әйелдің денсаулығы, дүниеге дені сау бала әкелу, ананың өмірі, әрбір сәбидің жарық дүниеге аман-есен келіп, анасымен қауышуы оның қызметі ғана емес, тілегіне айналды. Перзентханаға келген әрбір жүкті әйелдің жағдайын жасап, жылы сөзбен дем беру, қиналған анаға дәрігер ретінде қолұшын беріп, шипалы алақанымен бар мейірімін төгуден шаршаған жоқ. Тіпті күн сайынғы оқиғалар, әрбір кезекшілік – жас дәрігер үшін үлкен тәжірибе. Әрбір сәтті көңілге тоқып, қолы қалт етсе зерттеуден, ізденуден жалықпаған маман уақытпен санаспай еңбек ете берді. Ең басты мақсатым – әр анаға қуаныш сыйлау, ана мен баланың бақытты сәтіне куә болу деген ұстаныммен еңбек еткен жас дәрігер кейін ана мен бала десе, өз есімі қоса аталатынын, есімін ел танитын дәрігер болатынын сол кезде білмеген де болар. Перзентханаға айы-күні жетіп, толғатып келген немесе өлім мен өмір ортасында, жағдайы ауыр жүкті әйелді аман алып қалу үшін олармен бірге қиналып, бірге қуанатын дәрігердің әр күні қызық пен шыжыққа толы сәттермен өтіп жатты.<blockquote>«Менің мамандығым қызығынан гөрі қиындығы мол дер едім. Себебі екі адамның өміріне жауап беру – үлкен жауапкершілік. Әрбір босанған анамен бірге қиналып, бірге толғатып, әрбір сәбиді анасымен аман-есен қауыштыру бақытына куә болу оңай жұмыс емес. Әрбір әйелдің денсаулығына алаңдап, түн ұйқың төрт бөлінетін сәттер де болады. Сырт көзге сыр бермесек те, әрбір анамен бірге қуанып, бірге қиналуды бастан өткереміз», – дейді ақ халатты абзал жан.</blockquote>Бала кезден ақ халаттың қасиетін сезініп, «құтқарушы» болуды армандаған ол кейін есейе келе де осы қағиданы өмірлік ұстанымы етті. Дәрігер ретінде ғана емес, адам ретінде де адамдарға жақсылық жасау арқылы жаны жадырайтын Сәуле Сәменқызы мықты дәрігер ғана емес, жақсы адам деген атқа лайық болуды ойлады.<blockquote>«Айналама жақсылық жасау – өмірлік ұстанымым. Жақсылық жасаған сайын жолың ашыла түседі дегенді бала кезден құлағымызға құйып өстік. Мамандығым да айналаңа қуаныш сыйлау ғой. Әрдайым адамдардың көңіліне қараймын, ешкімді ренжіткім кел-мейді, өзгені қуантуға септігім тисе, мен үшін ең үлкен бақыт сол», – дейді кейіпкеріміз.</blockquote>Дәрігердің әрбір күні түрлі оқиғаға толы. Кейде қуанатын, кейде қынжылатын сәттер де болады. Тіпті әрбір сәт қанша жыл өтсе де ұмытылмай, құдды бір кино лентасындай кейде тізбектеліп, көз алдыңа келе қалатыны бар.<blockquote>«Бұдан 10-15 жыл бұрынғы бір оқиға әлі де есімнен кетпейді. Бір жүкті әйел толғатып келді. Денсаулығында босануға қарсы көрсеткіштері болса да тәуекел етіп тұр. Онымен бірге біз де тәуекелге бел будық. Ол кезде кесарь тілігі 1000-ның бірінде ғана болатын еді. Сол әйел үшінші кезекшілігімде барып, аман-есен босанды. Жұмысқа келген сайын соның жанына жүгіріп барамын, тіпті аты-жөнін қағазға жазып, терезеге іліп қойғанмын. Сол бір өмір мен өлімнің арасындағы сәт әлі есімнен кетпейді, тіпті сол әйелдің аты-жөні де қанша жыл өтсе де ойымда жатталып қалған. Әрине, сол жылдардағы медицина мен бүгінгі жағдайды салыстыруға келмейді. Уақыт озған сайын медицинаның жетістіктері аз емес, жаңа технологиялар еніп, алға қарай даму үстінде. Дегенмен қай кезде де ана мен бала жайына, екі адамның өміріне алаңдайсың», – дейді дәрігер.</blockquote>Айта кетелік, жұмыс барысында талай оқиға болатыны сөзсіз. «Дүниеге сәби аман-есен келгенше әйелмен бірге «бір өліп, бір тірілетін» дәрігердің тебіренісін өзінен басқа кім түсінер? Әрбір анамен бірге қуанып, бірге жылағандай күй кешіп, білімі мен біліктілігінің арқасында талай анаға қуаныш сыйлаған акушер-гинеколог дәрігер Сәуле Сәменқызын анасындай жақсы көріп кеткен жас аналар аз емес. Бұл сөзімізге дәрігердің мыңдаған сәбиге кіндік шеше болып, тіпті қыз дүниеге келсе, есімін дәрігердің құрметіне Сәуле деп қоятындар да аз емес. Кейін көшеде кездесіп қалса, «Сәулеңіз қазір мектепте үздік оқушы» немесе «сіз сияқты мықты дәрігер болам дейді», «сізге ұқсайтын сияқты» деген жылы лебіздерді жиі естиді. Дәрігерге бұдан артық қандай құрмет болсын?!Алғашқы жұмыс күнінен бастап ана мен балаға қызмет етіп келе жатқан дәрігер білім мен ізденістің арқасында әрбір жүкті әйелдің жағдайын жүзіне қарап-ақ білетін білікті маманға айналды. Диплом алған сәттен бастап ана мен баланың ортасында қызмет етіп келе жатқан ол осы саланың жілігін шағып, майын ішкен маман десек артық айтқандық емес. Әріптестерінің өзі «Сәуле Сәменқызы қандай уәж айтар екен?» деп ақыл-кеңесін тыңдаудан жалықпайды. Білікті дәрігер де ешқашан «өзім білемге» салған емес. Қашан көрсең де құрақ ұшып, үлкенге, кішіге де, әрбір емделушіге де елжірей қарап, бәрін де тыңдауға дайын. Жоғарыда айтып өткеніміздей, Ақтөбе медициналық институтын бітірген ол еңбек жолын облыстық перзентханада 1990 жылы ординатор ретінде бастады. 2000 жылдан бастап обсервация бөлімінің меңгерушісі, 2005 жылдан босану бөлімінің меңгерушісі, 2013 жылдан ІІ акушерлік бөлім меңгерушісі қызметін атқарды. Бүгінде облыстық перинаталдық орталық бас дәрігерінің пациенттерді қолдау және ішкі бақылау жөніндегі орынбасары қызметін атқарып келе жатқан ол тәжірибелі, білікті дәрігер ретінде құрметке ие. Алайда ол қай кезде де ізденуден жалыққан емес. Оның жұмыс барысындағы бір талабы – әрдайым іздену, оқу, білім алу. Өзі де кейінгі буынға бұл талапты орындауда үлгі болып келеді. Мәселен, білім жетілдіру мақсатында Сәуле Сәменқызы бірнеше шетелде болып, тәжірибе алмасты. Атап айтқанда, Литваның ғылыми денсаулық университеті, «Денсаулық сақтау менеджменті» бойынша қайта даярлаудан өтті. Денсаулық сақтау менеджменті саласы бойынша &nbsp;Польша еліндегі қоғамдық денсаулық мектебінде тәжірибе алмасты. Бір сөзбен айтқанда, 35 жыл бойы ана мен балаға қамқорлық жасау қызметінде ізденуден жалықпаған, білімі мен білігін ана мен баланың қуануына жұмсаған қажырлы еңбегі елеусіз қалған жоқ. Атап айтқанда, дәрігердің денсаулық саласына қосқан үлесі үшін әр жылдары ҚР Денсаулық сақтау министрлігінің «Кәсіби саладағы ерен еңбегі үшін», «Денсаулық сақтау ісінің үздігі», «Халық алғысы», «Жыл үздігі» медальдарын кеудесіне тақты. Мұнан бөлек, халық берген «Сәуле Жақанова – мықты дәрігер» деген бәрінен де жоғары марапаты бар. Сәуле Сәменқызы бүгінде алпыстың асуына абыроймен жеткен білікті дәрігер. Отбасында немерелерінің сүйікті әжесі, құрметке бөленген дәрігер, жас мамандарға үлгі болар ұстаз.

Сәуле Сәменқызы: Дәрігерден басқа мамандық туралы ойламадым

<a href="https://kyzylorda-news.kz/">Kyzylorda-news.kz.</a> Елімізде маусымның әр үшінші жексенбісі – медицина қызметкерлерінің күні. Адамзат тарихындағы ұлы мамандықтардың бірі – дәрігерлік. Кеселмен күресіп, жанға шипа табатын ақ халаттылар тек мереке қарсаңында ғана емес, күнделікті өмірде де құрметке лайық. Әрине, ауруынан құлан таза айығып, денсаулықтың қадірін түсінетін әр адам өз бетінше дәрігерлерге алғыс айтып жатады. Жыл сайын мемлекет те медицина қызметкерлерін ескерусіз қалдырмай, мерекені атап өтеді.«Дені сау адам – қоғам байлығы» деген халқымызда дана сөз бар. Сол байлығымызды сақтауға, сапасы мен санын арттыруға, халқымыздың дені сау, ойы сергек болып қалыптасуына дәрігерлердің үлесі көп. Бүгінде Шиелі ауданындағы ақ халаттылар ауырып ем іздеген әр адамға ем-дом көрсетіп, аяғынан тік тұрып кетуіне қолдан келген көмегін жасап келеді. Аудан көлемінде 1 аудандық аурухана, 2 ауылдық аурухана, 1 аудандық емхана, 1 Көкшоқы, 1 жалпы тәжірибелік бөлім, 19 дәрігерлік амбулатория, 13 медициналық бекет, 3 фельдршерлік-акушерлік бекет қызмет көрсетеді. Осылардың қай-қайсысында болсын адам саны үзілген емес. Таңның атысы, күннің батысы медицина қызметкерлері басы ауырып, балтыры сыздағандарға көмек қолын созуға дайын. &nbsp;Осыған байланысты жыл сайын аудандық аурухананың да ахуалы жақсарып келеді. Себебі адам жанын емдеуде қателесуге, мүлт кетуге болмайды. Ал аурудың атын нақты анықтап, дұрыс диагноз қою үшін ең біріншіден соңғы технологиялар болуы керек. &nbsp;Өткен жылы ауруханаға қажетті 157 218 000 теңгеге құрал-жабдықтар алынғаны мәлім. Осының нәтижесінде биылдан бастап компьютерлік-томография аппараты іске қосылып, Шиелі халқына тексеру-диагностикадан өту оңайға соқты. Ал 2023 жылға құрал-жабдықтармен қамтамасыз ету пайызын одан әрі көтеріп, халыққа жоғары технологиялық аппараттарды қолжетімді ету мақсатында жалпы соммасы 1 873 971 теңге болатын медициналық құралдар алу көзделіп отыр екен.&nbsp;Аудан орталығынан орын алып, 2019 жылы пайдалануға берілген аурухана да халық игілігіне жарап отыр. Жаңа құралдармен жабдықталып, жаңа бөлімдермен толыққан аурухана мен емхана пайдалануға берілгенде көпшіліктің қуанышында шек болмаған. Әрине, таза, жаңа жерде жұмыс істейміз деп медицина қызметкерлері де қуанғаны өтірік емес. Сондай-ақ Бала би, Досбол би, Бұланбай бауы елді мекендеріндегі тұрғындардың да қуанатын күні жақын. Себебі, «Ауылдық денсаулық сақтауды жаңғырту» пилоттық Ұлттық жобасына сәйкес аудан көлеміндегі жоғарыда аталған үш ауылға жаңа ғимарат осы жылдың аяғына дейін беріледі. Ал &nbsp;Тәжібаев, Алмалы, Ортақшыл, Тартоғай, Бестам елді мекендеріндегі дәрігерлік-амбулаторияның құрылысы 2024 жылға жоспарланып отыр. Сонымен қатар «Гежуба Шиелі Цемент Компаниясы» ЖШС-нің демеушілігі есебінен Ш.Қодаманов елді мекеніндегі дәрігерлік амбулаториясына 1 дана жедел жәрдем көлігі сыйға тартылмақ.&nbsp;«Ауырып жазылған жан – олжа, жоғалып табылған мал – олжа» демекші адам үшін ең бас¬ты орында тұратын &nbsp;– денсаулық. Осы «олжаны» сіз бен бізге сыйлайтын, оны ауырлықтан шығарып алып беретін аудан дәрігерлері мен медбикелері. Қазіргі таңда аудан көлемінде 195 дәрігер, 889 орта буынды медицина қызметкерлері өзгенің жанын аман сақтау үшін өз жанын отқа да, суға да салып еңбек етуде. Жауапкершілік жүгі ауыр маман иелерінің жұмысын сәл де болсын жеңілдету мақсатында және аурухананы көпбейінді ауруханаға айналдыру үдерісіне байланысты алдағы уақытта тағы да жаңа аппараттар алу ілкімді істердің тізімінде тұр. Ол аппараттардың атын атап айтар болсақ, магнитті-резонансты томограф, ангиограф, эксперт классты УДЗ аппараты, Фиброгастроскоп, Фибробронхоскоп, Неонатологиялық жинақ алынатын болады. ХХІ ғасыр талабына сай тұрғындар да алдағы уақытта соңғы нұсқадағы аппараттармен тексеруден өтіп, денсаулығын дендеген дерттен жылдам әрі оңай құтылады деген ойдамыз.&nbsp;Дәрігерлер – бүгінгі күннің батырлары. Олар күннің қандай мезгілі болса да, қандай мерзімі болса да алдына келген адамды емдемей қайтарып жібермейді. Тіпті түнгі ауысымға қалып, жедел түрде көмекке зәру тұрғынды да қабылдап алып қалатына көзіміз куә. Сол себепті ақ халат пен ақ пейіл, адал жүрек иелеріне қандай алғыс айтсақ та артық емес.

Шиеліде биыл компьютерлік-томография аппараты іске қосылды

<a href="https://kyzylorda-news.kz/">Kyzylorda-news.kz.</a>&nbsp; Өмір болған соң адам оқыс жағдайға кезігіп жатады. Соның салдарынан зардап шегіп, денсаулығына зиян келуі мүмкін. Осындай қиын сәтте оның қасынан алғашқы тез арада көмек көрсететін жедел жәрдем қызметкерлері табылады. Оның ішінде адам өмірі қыл үстінде тұрған шақта біліктіліктері дәрігерлермен тең дәрежедегі фельдшерлер жедел шешім қабылдайды. Олардың қатарында аудан халқына алғашқы көмек көрсетіп жүрген Данияр Алпамысов та бар.&nbsp;Тәжірибелі маманның медициналық саладағы еңбек өтілі биыл 9 жылды қамтиды. Ол осы салада еңбек етуді бала кезден армандаған еді. Даниярдың әкесі Алпамыс пен анасы Сағынған түрлі салада қажырлы еңбек етіп, бүгінде бейнеттерінің зейнетін көріп отырған жандар. Олар &nbsp;Даниярдың бұл ойын құптап, ақ жол тіледі.Данияр Алпамысұлы Алпамысов 1992 жылы 3 шілдеде Арал ауданында дүниеге келген. Қаладағы №14 орта мектепті 2010 жылы бітіргеннен кейін Ақтөбе қаласындағы М.Мәметова атындағы медициналық колледжіне оқуға түсіп, аталған оқу орнын 2013 жылы "емдеу ісі" мамандығы бойынша тәмамдайды. Сөйтіп жас маманның еңбек жолы 2014 жылы аудандық аурухананың хирургия бөлімшесінде мейіргер болудан басталады. 2016 жылдың сәуір айында КДП ерлер қарау кабинетіне ауысып, фельдшер мамандығы бойынша еңбек етеді. Осында жүріп медицина қызметкерлерінің түрлі қиын жағдайларға дайын болу керектігін, адам жанына араша болуда ептілік, біліктілік қажет екенін көріп, сала мамандарынан тәжірибе жинақтаған жас маман бүгінде «Байтұрсынов» ауылдық емханасы жанынан ашылған жедел жәрдем бөлімшесінде фельдшер болып адал қызмет атқаруда.&nbsp;<blockquote>– Біздің басты міндетіміз – алғашқы медициналық көмек көрсету. Әрбір күніміз адам жанына араша болумен өтеді. Басы ауырып, балтыры сыздаған, түрлі жағдайда ауырған науқастар алдымен жедел жәр¬дем қызметіне жүгінетіні белгілі. Содан біз қызметімізге кі¬рі¬сіп, алғашқы көмек көрсетуге барамыз. Қатты ауырып жатқан науқастармен бетпе-бет келеміз. Сондай әрбір секунд санаулы болған шақта жедел қимылдап, науқасқа тиісті дәрілерді саламыз, жағдайын қалыпқа келтіреміз. Осыдан соң аудандық ауруханаға жет¬кіземіз, – дейді Данияр Алпамысұлы.</blockquote>Фельдшер Данияр қызмет барысында науқастармен қарым-қатынаста қиындықтар көп кездесетінін, десе де он шақты жыл уақыт ішінде тәжірибелі мамандардан көп нәрсені үйреніп, талай қиындықты еңсергенін айтады.<blockquote>Медициналық көмек көрсету барысында жүрек-қан тамырлары, қан қысымы, қант диабеті сынды аурулар жиі кездеседі. Кей кездері ауырып, ес-түссіз жатқан науқастарға барамыз, ондай кезде алдымен науқас жанның есін жиюға әрекет етеміз. Денсаулығы жақсара бастағаннан кейін ғана жедел жәрдем көлігімен ауруханаға жеткіземіз. Сондай-ақ жол-көлік оқиғалары кезінде жол апаты салдарынан адамдар түрлі жарақаттар алып жатады. Ол кезде де шалт қимылдап, алғашқы көмек көрсетеміз, – дейді тәжірибелі маман. Аға мейіргері болған Эльмира Төлегенқызы әріптесі жайында: «Данияр тапсырмаларды уақытылы орындайды, жауапкершілігі мол, кәсіби біліктілігін үнемі жетілдіріп отырады. Пациенттерге жаны ашып, мейіріммен қарайды, үнемі күліп жүреді. Жылы жүзді, жай сөйлеп, жақсы түсіндіреді», – дейді.</blockquote><blockquote>– 2018 жылы аурухана жанынан ашылған жедел жәрдем бөлімшесінде 12 фельдшер, 5 диспетчер, 5 жүргізуші еңбек етеді. Фельдшерлер төртінші категория бойынша жұмыс жасайды. Жағдайы ауыр науқасты аман алып қалу үшін медицина мамандары жауапкершілікті айқын сезінген. Қай уақытта кәсіби біліктілігін жетілдіріп отыратын сала мамандарының әр күні қиындыққа толы. Әсіресе жаз маусымында созылмалы дерті бар науқастар дәрігерге бірнеше рет жүгінеді. Сондай шақта жедел жәрдем қызметкерлері көмегін көр¬сетеді. Олардың қатарында Даниярды ерекше атап өтуге болады. Ол қоғамдық жұмыстарға да белсене араласады. Оның еңбегі салалық басшылық тарапынан ескеріліп, аудандық аурухананың және медицина қызметкерлерінің кәсіподақ ұйымының мадақтамасымен, Алғыс хаттарымен марапатталған, – дейді жедел жәрдем бөлімшесінің қызметі турасында аға мейіргер Ботагөз Қарабекова.</blockquote><blockquote> Денсаулығымыз сыр беріп, жанымыз қиналғанда жедел жәрдем көмегіне жүгінеміз. Кейде бір күннің өзінде бірнеше мәрте шақырамыз. Сондай шақта жедел жәрдем қызметкерлері көмегін көр¬сетеді. Жедел жәрдемнің фельдшерлері көбісі ер балалар. Тез келеді, қолдары жеңіл тамырға тез түседі. Кеңестерін тыңдаймыз орындаймыз. Жеңілдеп жақсы болып қаламыз. Олардың қатарында Даниярды ерекше атап өтуге болады. Жас ұлғайған сайын аурушаң болады екенсің. Бір күні басым қатты ауырып, қан қысымым көтерілді. Сол бойда дереу жедел жәрдем көмегін шақырдым. Данияр келіп, өз қызметін сапалы атқарды. Қан қысымым қалыпқа келгенше жанымда болып, дәрі-дәрмегін берді. Аз ғана уақыттың ішінде білікті маманның арқасында жағдайым жақсарып, көңілім жайлана түсті. Осындай халыққа медициналық қызмет көрсетіп жүрген тәжірибелі мамандарға медицина қызметкерлері күні қарсаңында шынайы алғысымды білдіремін. Тек мен ғана емес, басқа да аудан тұрғындары фельдшердің көме¬гімен ауруынан айыққанына сенімім кәміл, – дейді қала тұрғыны Бибиажар Бақтыбаева.</blockquote>Сырқаттанған адамның дер кезінде жанынан табылатын жедел жәрдем бөлім¬¬шесінің мамандары барлық мақтауға лайық. Қаншама халыққа қыз¬мет ететін бөлімшенің фельдшерлері табандылық пен қырағылықты жанына серік еткен жандар. Сондай жанның бірі Данияр Алпамысұлы да медицина саласындағы рәтті жұмысының жауапкершілігі мол екенін біле¬ді. Соған сай еңбек етіп, бүгінде көпшіліктің алғысына бөленіп келеді.Біз де осындай ақ халатты абзал жандарды төл мерекесімен құттықтап, еңбектеріне табыс, отбастарына амандық тілейміз.

Ел алғысына бөленген жас маман    

<a href="https://kyzylorda-news.kz/">Kyzylorda-news.kz.</a> Кез келген мемлекеттің алғашқы орында алаңдататын мәселесі халықтың денсаулығы екендігі баршамызға мәлім. Мемлекеттің басты капиталына баланатын адам өмірінің қауіпсіздігі, саулығы қай елде болса да бірінші кезекте тұрады. Мемлекет басшысы Қасым-Жомарт Тоқаевтың «Денсаулық сақтау бағытындағы жұмыстарды жалғастыра беру керек. Азаматтардың денсаулығын сақтау мәселесі менің жіті бақылауымда» деген сөзі мәселенің қаншалықты маңызды екенін айқын көрсетіп отыр.«Мемлекеттік саясаттың басты бағыттарының біріне айналған медицина саласының аудандағы бүгінгі ахуалы қалай? Емхана халыққа қай деңгейде қызмет көрсетіп келеді?» деген сауалдарға жауап алу үшін Арал аудандық емханасының меңгерушісі, Қазақстан Республикасы Денсаулық сақтау ісінің үздігі, жоғарғы санатты дәрігер ұйымдастырушы Шарапат Медетовпен кездесіп, әңгімелесіп қайттық.<blockquote>– «Арал аудандық көп бейінді орталық аурухана» ШЖҚ КМК-ге қарасты аудандық емхана 2007 жылы жаңадан пайдалануға берілді. Мұнда тұрғындарға медициналық көмектің 24 түрі бойынша мамандандырылған көмек көрсетеді. Қазіргі таңда емханада 37 дәрігер, 77 орта буынды, 10 өзге, 17 кіші буынды қызметкер өздерінің саласы бойынша сапалы қызмет атқарып келеді. 2022 жылдың қорытындысы бойынша аудандық емханаға 117 578 тұрғын дәрігерлер қабылдауында болып, медициналық тексерулерден өткен, – деген Ш.Медетов одан әрі материалдық-техникалық базаның қамтылуына тоқталды.</blockquote>Соңғы 2-3 жыл көлемінде емхананың базасы айтарлықтай жаңартылып, бүгінгі уақыт талабына сай жетілдірілген. Емхана бойынша қолданыстағы кольпоскоп, ультра дыбыстық зерттеу аппараты, жылжымалы маммограф, флюорография, стоматологиялық қондырғылар, зертханалық анализатор және биылғы жылы көз кабинетіне жаңадан алынған құрылғылар – компьютерлік периметр, авторефрактометр, офтальмоскоп көмегімен тұрғындарға көмек көрсетіледі. Сонымен қатар аудиометриялық кабинет, 4 дачикті УДЗ аппараты тұрғындардың игілігіне пайдаланылуда.Емхана қызметкерлері қашанда заман талабына сай үнемі іздену, қызметтік істе адал әрі мұқият болу тәртібін қатаң ұстайды. Себебі әр диагноздың артында адам өмірі, оның ертеңі жатыр. Мекеменің алдында тұрған міндеттердің бірі – скринигтік тексерулер жүргізу арқылы ауруларды ерте сатысында анықтап, сауықтыру. Осы мақсатта жыл сайын жоспарлы түрде кешенді жұмыстар атқарылып келеді.Мекеменің нәтижелі жұмыс жасауына барынша жағдай жасалғандығы туралы, қажетті жабдықтармен қамтамасыз етілгендігін айтып өттік. Сонымен қатар 2011 жылдан бастап құрамында УДЗ дәрігері, хирург, окулист, гинеколог, стоматолог, өзге де жоғарғы санатты дәрігер мамандар бар және УДЗ, ЭКГ, лабораториялық тексеру аппараттары бар жылжымалы медициналық кешен аудан халқына қызмет көрсетіп келеді. Бұл да елді мекен тұрғындарының денсаулық көрсеткішін жақсыртуға таптырмас мүмкіндік сыйлап отыр. Біз осы арқылы Мемлекет басшысының тапсырмаларының бірі шалғай жатқан ауылдарда медициналық қызметтің қолжетімділігін қамтамасыз етіп келеміз. Әсіресе балалар мен жүкті әйелдерге, әлеуметтік жағынан аз қорғалған топтарға дәрігерлік қызмет көрсету айрықша назарға алынып отыр. Иә, жасалған жұмыс қашан да жақсы нәтижесімен қуантатыны белгілі емес пе?! Аудандағы ахуал да бүгінде емхана жұмысының қаншалықты жүйелі екенін көрсетіп отыр. Шарапат Алпысбайұлының айтуынша:<blockquote>– Аурудың жақсысы бола ма? Әрине, адамды әбігерге салып, тәнімен қатар жанын да сыздататын дерттің барынша алдын алуымыз қажет. «Ауырып ем іздегенше, ауырмайтын жол ізде» деп қазақ бекер айтпаған ғой. Міне, біз сол ауырмайтын жолды халыққа нұсқап келеміз. Мәселен 2008 жылдан бастап 9 түрлі ауруды ерте анықтау мақсатындағы скринингтік тексеру арқылы қауіпті әрі созылмалы дерттердің бетін қайтаруда көп жетістікке жеттік. Қаншама тексерілуші алғысын айтып жүр. Сол сырқаттардың қатарында ең қауіпті болып саналатын, әрі көп таралған қан айналымы жүйесі аурулары, қант диабеті, глаукома, сүт безі, жатыр мойыны, өңеш, асқазан ісігі сияқты бірнеше дерттің түрі бар, – дейді.</blockquote>Мұнан бөлек 2010 жылдан бастап қолға алынған республика аймағында енгізілген бірыңғай ұлттық денсаулық сақтау жүйесі бойынша жұмыс жасап, тұрғындардың жекелеген санатына тегін дәрі-дәрмек босатылып отыр. Бұл да ем алушылардың оң бағасын алып, көңілінен шығып отырған дүние.Сонымен қатар 2015 жылдың басынан бастап амбулаториялық-емханалық көмек бағдарламасы аясындағы науқастардың стационарды таңдау құқығымен портал бюросы арқылы республиканың кез келген ауруханасына жатуға да мүмкіндік бар. Стационарды алмастыратын көмек ретінде емханада 19 төсектік күндізгі бөлім де жұмыс жасап тұр.Осындай жүргізілген іс-шаралар жылдан жылға жақсарып келеді. Бұған дәлел ретінде көптеген көрсеткіштерді атап өтуге болады. Табиғи өсім жыл сайын жоғарылап, жалпы өлім-жітім, туберкулезбен ауыратындар саны азайып келеді.Иә, жұмыс тапсырма аясында көрінеді десек те, әрбір жетістіктің артында білікті мамандар мен жауапты азаматтардың таудай еңбегі жатыр. Әсіресе басы ауырып, балтыры сыздаған әрбір жанның дертіне дауа, жанына жылы сөзімен ем, аялы алақанымен жылу сыйлаған жандардың қызметтік шеберлігіне халық күмән келтірмейді. Дегенмен «жігітте де жігіт бар, азаматы бір бөлек, жүйрікте де жүйрік бар, қазанаты бір бөлек» дегендей халықтың аузынан түспейтін, өз ісінің нағыз майталмандарын ерекшелеп айтуға да болады. Шарапат Медетов:<blockquote>– Емхананың дәрігерлік құрамы өте мықты. Қайсысын алсақ та өзінің білімі мен білігін көрсетіп келеді. Бастысы халықтың игілігіне қызмет етіп жүр. Әр қызметкерім бір төбе. Әсіресе солардың қатарында жоғарғы санатты дәрігерлер Ақсалы Есеналиева, Гүлдәрі Мұстафаева, Айсәуле Пірманова, Дина Қожаниязова, Анар Сағындықова, Қуаныш Жанаева, Изатулла Ранов, Гүлзина Құрманбекова, Лайық Бижанова, Әмірхан Жүсіпов, Амантай Нұрпейісов, Балтабек Кемалов пен Нұрқасын Көбекбаевтарды халық іздеп келіп, алғысын жаудырып кетеді. Одан бөлек те орта буынды дәрігерлер мен медицина қызметкерлерінің қайсысын болса да мақтауға лайық, – деді.</blockquote>Иә, «медицина кәсібі – адамгершіліктің асылы» дегендей асыл қасиетімен барша аралдықтардың алғысына бөленген жауапты мамандық иелеріне еңбекте табыс, төзімділік пен күш-қайрат тілейміз.

Аралдағы заманауи қондырғылармен жабдықталған емхана халыққа лайықты қызмет көрсетіп жатыр 

<a href="https://kyzylorda-news.kz/">Kyzylorda-news.kz.</a> Дәрігер болу, оның ішінде балалар хирургі болу оңай емес.&nbsp;Мәселен, жаңа туған&nbsp; нәрестенің қандай да бір науқасы барын естіген бойда бірінші жаратқаннан, одан кейін&nbsp; дәрігерден үміт күтіп, жаутаңдайтынымыз рас. Себебі,&nbsp;бауыр еті – баласының аман-есен болуын тілемейтін ата-ана жоқ.&nbsp; Сол сәтте дәрігердің нақты диагноз қойып, дұрыс шешім қабылдауы сырқат жанның тағдырын шешіп жатады.Көпбейінді облыстық балалар ауруханасының хирургі Болат Махамбетияров&nbsp;– талай баланың сауығуына себепші болып жүрген жан. Ақтөбедегі М.Оспанов атындағы мемлекеттік медицина академиясының түлегі. Интернатураны академия базасында балалар хирургиясы кафедрасында өтті. Еңбек жолын 2009 жылы облыстық медицина орталығында балалар хирургі болып бастады. Балалар хирургі бола жүріп, жаңа туған нәрестелер арасында туабітті ақауы бар сәбилердің хирургиялық патологиясына көңіл қойып, осындай ақауларды анықтап, емдеумен айналыса бастайды.&nbsp; Санкт-Петербург қаласында неонатальды хирургия бойынша білімін екі рет жетілдірді. 2018 жылы Оңтүстік Кореяда «Северанс» клиникасында неонатальды хирургия бойынша туабіткен ақауларға жасалатын операциялардың ерекшеліктерін игеріп, ота жасау тәсілдерін жандандыра түседі. 2018 жылдан бері облыстық балалар ауруханасының І хирургия бөлімінің меңгерушісі қызметін атқаруда.Болат Үмбетиярұлы әлеуметтік желіде де белсенді. Қым-қуыт тіршілікке толы дәрігерлік қызметте жүргендіктен, оған көп адамның мойны жар бермесі анық. Ал Болат өзі жасаған қиын оталарды, түнгі кезекшілікте кездескен ерекше оқиғаларды, қызметте қолданған тың тәсілдерді желіде жариялап, дәрігерлік мамандықтың қыр-сырын, қиындығы мен қызығын көпшілікке жақын таныстыруды әдетке айналдырған. Кейінгі уақытта әріптестерінің жасаған күрделі оталары, аурухана базасында өткен шеберлік кластары туралы да жиі жариялап жүр. Хирургтің жазбаларынан медицина мамандарының күрделі де жауапкершілікке толы қызметіне қанығып, олардың ерлігіне бас иесің. Хирургтің жуырда жариялаған мына жазбасы көпшілікке ой салатын ерекше екен.&nbsp; Оқи отырып, дәрігер мамандығына, маман иелеріне деген құрметің одан сайын арта түсері анық.<blockquote>«Армысыздар, Қазақ елі!Жалған!Бауыржан Момышұлы атамыз «Қазаққа көшпенді, жалқау деп орынсыз тағылған екі жалған кінә бар. Екеуі де жалған. «Қазақ ешуақытта көшпенді болған емес, қазақ – отырықшы. Ол сығандар секілді бір елден екінші елге көшіп жүрген жоқ қой. Өз жерінде малдың ыңғайына қарай жаз жайлауына, қыс қыстауына қоныс аударғанды сендер көшпенді деп оттап жүрсіңдер. Бұл – тарих кешірмейтін қателік. Екінші, қазақ жалқау болса, мал баға ма? Мал – оның өмір сүрудегі ең негізгі көзі. Ол ғасырлар бойы өзін ғана емес, көрші елдердің халқын да етпен қамтамасыз етіп келді. Малдың бабын табу, жаздық, күздік жайлауын, қыстауын таңдау, қай жерге қалай жаю, жейтін шөбін анықтау, ауырған малды емдеп жазу, айсыз, қараңғы түнде жұлдыздарға қарап сапар шегу, қыран құс, тұлпар баптау, ауа райын болжау, сырқатты емдеу, көкпар тарту, бәйге күрес, асық, ақсүйек, тағы басқа ойындарды ойлап табу дегенің – білген адамға жатқан ғылым. Оны игеру үшін ақыл, тәжірибе, өте еңбекқор жандардың толассыз ізденісі керек» деп екеуін де жоққа шығарған екен.&nbsp;Біздің де жас мамандарымыз операция үстінде күлімдеп тұрғанымен, бұл – жалған. Үш сағат туа біткен ерін, таңдай жырығына операция жасап және ақыры қалай болар екен деп мазалап тұрған ой адамды өз еркімен күлдіре алмайды. Күліп тұрған жүздері ғана, дәрігерлердің күлімдеп жүргендері көбінесе жалған. Күнделікті түсіп жатқан науқастар, жасалып жатқан күнделікті және күрделі оталар, ауыр жағдайлар, біреуінің жағдайы тұрақтанып жатқанда, тағы түсетін науқастар дәрігерді шынайы күлімдете алмайды. Екінші жалған – бұндай күрделі оталарды тек көпжылдық тәжірибесі бар мамандар жасайды және бізде емес деген. Қандай қиындықтарға кездессе де мойымай, жаңа тәсілдер енгізіп, ауыр науқастарға күрделі операциялар жасап жүрген біздің жас мамандарымыз – бет-жақ хирургтары (ЧЛХ) Қонысбай Нұртілеу Нұрланұлы және Әнуәрбеков Маханбет Ердейбайұлы. Жас мамандарымызға мақсаттарына жетіп, биік белестерді бағындырып, халықтың алғысына бөленіп жүруіне тілектеспіз!»</blockquote>Болаттың мұндай жазбалары өте көп және оқыған адамға әр жазбасы тың ақпарат беріп, мазмұнды ой салады.<blockquote>– Ата-анам: «Адамның қолынан келмейтін іс болмайды, адамның істегенін адам істейді. Тәуекел түбі – жел қайық, өтесің де кетесің» дегенді жиі айтып отыратын. Осы сөздерді өмірлік ұстанымым ретінде пайдаланамын. Қиналған кезде әрдайым есіме түсіп, қайта жігерленемін.&nbsp; Жалпы хирургиядан бөлек, неонатальды хирургияға қызығушылығым артып, жаңа туған нәрестелердің туабітті ақауларымен айналыса бастадым. Нәрестенің дене бітімі қандай нәзік болса, ішкі ағзалары да сондай. Уақытынан бұрын, аз салмақпен, ақаумен туса жағдай қиындай түседі. Операция жасаған науқастарымның ішінде ең аз салмақтысы – 600 грамм. Ең қиыны 1500 грам салмақтағы өңеш атрезиясымен туған нәрестеге операция жасау болды. Осылайша күнделікті жұмыс барысында түрлі салмақтағы нәрестелерді, түрлі ақауларды көре береміз. Бір күнде ақаумен туған бірнеше балаға ота жасаған кездер де болды. Операция жасамасақ қайғылы жағдай орын алады, жасасақ үміт оянады. Үмітіміз ақталған сайын жұмысқа деген ынта-жігеріміз де арта түседі. Медицина – командалық жұмыс. Аурухананы біртұтас команда десек, науқастың амандығы осы команданың тұтастығына байланысты. Жалғыз мен емес, барлық әріптестерім жұмыс барысында осындай қиындықтарға тап болады. Біздің жұмысымызды қарапайым жұрт біле бермейді. Сол себепті әлеуметтік желілерге атқарған жұмысымыз туралы жазбалар жүктеп отыруды ойладым. Ол да қосымша жұмыс, бірақ қажет. Сондықтан уақытымды тиімді пайдалануға тырысып, үлгергенімше әлеуметтік желіге жариялап отырамын, – дейді дәрігер.</blockquote>

Бала денсаулығы бәрінен қымбат

<a href="https://kyzylorda-news.kz/">Kyzylorda-news.kz.</a>&nbsp; Дертіне шипа іздеген науқастың сауығып кетуіне алдымен дәрігер жауапты болса, одан кем қарамайтын денсаулық сақшысы – медбике. Бүгінгі кейіпкеріміз – аудандық аурухананың хирургия бөлімшесінде еңбек жолын медбикеліктен бастап, табан аудармай 41 жыл жемісті еңбек етіп келе жатқан медбике &nbsp;Күлжақан Шәкірқызы Саймова.&nbsp; &nbsp; &nbsp; &nbsp; Күлжақан Шәкірқызы 1962 жылы 25 қаңтарда Арал қаласында дүниеге келді. Анасы үй шаруасында, әкесі теміржолшы болды. Отбасында 7 бала тәрбиеленді. Күлжақан 1969 жылы №213 мектепке қабылданып, осы мектептен &nbsp;сегізжылдықты бітіріп, 9-10 сыныпты №13 мектептен &nbsp;тәмамдады. Сөйтіп, 1979 жылы онжылдықты бітірген соң киелі Түркістан қаласындағы медициналық училищесіне оқуға түсті. Мамандық таңдауда қателеспеген алғыр қыз медициналық училищені 1981 жылы "қызыл" дипломмен бітіреді. Сол жылы жас мейірбике 19 жасында Арал аудандық ауруханасының хирургия бөлімшесіне өз мамандығы бойынша қызметке орналасады. Сөйтіп ата-анасынан өнегелі тәлім-тәрбие алған қаршадай қыз болашағын медицина саласымен байланыстырды. Оның &nbsp;қызметтегі алғашқы ұстазы, бүгінде зейнеткер Клара Доштаевадан үйренгені көп."Отан отбасынан басталады" деп бекер айтпаған. Әрбір адамзаттың — алтын ұясы десе алдымен отбасы ойымызға орала кетеді. Бала отбасында әкеден ақыл, анадан мейірім алады. Күлжақанды тағдыр еркелете қоймады. Медучилищеде оқып жүргенде анасы өмірден өтіп, қиындық туындаған сәтте мойымады. Ізінен ерген бауырларын ешкімнен кем қылмай оқытып-тоқытты, қатарға қосты. Аллаға шүкір, бүгінде барлығы да отбасылы, балалы-шағалы.<blockquote>Ақ халатты жандардың сенімді серігіне айналған мейірбикелердің жұмысы қашанда үлкен жауапкершілікті қажет етеді. Дәрігер емінің нәтиже беруі де ең алдымен медбикенің ұқыптылығына байланысты. Әр медицина қызметкері өз білімі мен біліктілігін үнемі жетілдіріп, медицина саласындағы жаңалықтарды оқып-біліп отыруы тиіс. Дәрігер науқасты тексеріп, тағайындауын бергеннен кейінгі бар жұмысты медбике атқарады. Адамның жаны өмір мен өлімнің арасында тұрғанда әр секунд қымбат. Әрбір өзгерісті қалт жібермей қадағалап, оны дәрігерге жеткізу – медбикенің міндеті. Сонымен қатар егуін жасап, дәрі-дәрмегін уақытылы беріп, төсек-орын, ас-ауқатын, жалпы хал-жағдайын қадағалап, науқасқа қарайтын медбикелердің еңбегі өлшеусіз. Осындай жауапкершілігі мол жұмысқа өзіммен қатар келіп, &nbsp;адал еңбек еткен, бүгінде зейнеткер Тәжігүл Дүйсенбаева, Марал Әбілдаева, Гүлнар Бимағанбетова сынды құрбыларым және аға медбике Шолпан Ахметова мен егу бөлмесінің аяжаны Ләззат Піренова және де басқа әріптестерімнің &nbsp;еңбектеріне табыс, отбастарына амандық тілеймін,– дейді ақ халатты абзал жан Күлжақан Шәкірқызы.</blockquote>Медбике Күлжақан осы күнге дейін қаншама жас буынның тәжірибесін толықтырды, білікті медбике етіп шығарды. Қазіргі таңда хирургия бөлімшесіндегі медбикелер Күлжақанның ізін жалғастырып келе жатқан Ақтоты Шынбергенова мен Назым Айсауытова, Динара Бимағанбетова мен Жазира Қанатова өз ісінің мықты мамандары. Үзілгелі тұрған үмітті қайта жалғайтын, тіпті кейде ажалдан арашалап, екінші өмір сыйлайтын ақ халаттылар қандай құрметке де лайық. Уақытпен санаспай тәулік бойы науқастың жанында қалатын медбикенің қызметі адалдық пен жауапкершіліктен жаратылғанына еріксіз бас иесің, құрмет тұтасың, мақтан етесің.Абзал жанның ұзақ жылғы қызметі аудандық, облыстық сала басшылығы тарапынан лайықты бағаланып, түрлі мақтау-марапатқа да ие болды. Жақында медицина қызметкерлері күні қарсаңында кезекші мейірбике Күлжақан Саймова хирургия бөлімшесіндегі 41 жыл азаматтардың денсаулығын сақтау ісіне қосқан үлесі мен мінсіз, адал қызметі үшін Қазақстан Республикасы Денсаулық сақтау министрлігінің Алғыс хатымен &nbsp;марапатталды. Еңбектің өтеуі деген осы болар.<blockquote>Күлжақанмен қызметке де бірге келдік. Оның мамандығына деген сүйіспеншілігі, адалдығына тәнтімін. Қызметіне жауапкершілікпен қарайды. Қазір қай салада болмасын талап күшейтілді. Білікті маман бөлімшедегі әріптестерімен тығыз байланыс орнатып, науқастарды күтіп-баптауды үйретуге де уақыт табады. Қолы қалт етсе, жастарға білгенін үйретіп, тәжірибесімен бөлісу, кәсіби деңгейін көтеруден жалыққан емес. Замандасым Күлжақан ұдайы алдыңғы шепте жүріп, науқастардың тез сауығып кетуіне атсалысып келеді, – деп жылы лебізін білдірді Алима Жандеуова.</blockquote>Өзінен кейінгі жас мамандарға білгенін үйретіп, кәсіби біліктілігін арттырып келе жатқан өз ісінің майталманы Күлжақан Шәкірқызы– отбасында сүйікті жар, аяулы ана, мейірімді әже. Жолдасы Әмірхан кеме құрастыру зауытында токарь болып еңбек етті. Қазір жеке кәсібімен айналысады. Жан жары Әмірханмен бірге төрт қыз, бір ер баланы дүниеге әкеліп, өсіріп-тәрбиеледі. Бүгінде ата-ана бақытына бөленген Әмірхан мен Күлжақан ұлын ұяға, қыздарын қияға қондырып, немере сүйіп отырған жандар. Балаларының барлығы да жоғары білімді мамандар. Бақытын отбасынан, сүйікті мамандығынан тапқан Күлжақан Шәкірқызының ендігі арманы – жолдасымен тең отырып, бейнетінің зейнетін көріп, балалары мен немерелерінің сүйіспеншілігіне бөленіп, олардың жақсылығын көру.Ақ халатты абзал жандар үшін ең бастысы – халықтың алғысына бөлену. Өйткені ол – марапаттың төресі. Еңбекқор әрі ізденгіш, абырой-беделі артқан қадірлі маман, аяулы ана, мейірбан әже Күлжақанның бақыты да, мұраты да – осы.

Мерейі үстем медбике 

<a href="https://kyzylorda-news.kz/">Kyzylorda-news.kz.</a>&nbsp; Облыс орталығындағы жоғары мамандандырылған көмек көрсететін бірден-бір медициналық ұйым – көпбейінді облыстық аурухана. Медицина қызметкері мерекесі қарсаңында аурухананың бас дәрігері, облыстық мәслихат депутаты Нұридин Әмитовпен сұхбаттасудың сәті түскен еді.–&nbsp; &nbsp; Нұридин Егенбердіұлы, алдымен кәсіби мерекелеріңіз құтты болсын.– &nbsp; &nbsp;Рақмет.– Кейінгі уақытта портал қызметіне қатысты көпшілік арасында екіұдай пікір бар. «Портал шыққалы ауруханаға жату қиындап кетті» деген айтылады. Шынында солай ма?– Біздің аурухана 525 орындық тәуліктік стационарға арналған. Сонымен қатар 30 ақылы және 115 күндізгі стационар бар. Бүгінде 525 орындық тәуліктік стационарда &nbsp;600-ге жуық науқас ем алып жатыр. 70-80 науқас артық. &nbsp;Науқас артық болған сайын біздің де жүктемеміз артады, яғни, &nbsp;шығынымыз еселене түседі. Ол жерге қосымша төсек-орын қоямыз, қызметкерлеріміздің де жүктемесі артады деген сөз. Ал науқастардың артуы негізінен шұғыл түрде түсушілердің көбеюіне байланысты болып отыр. 80 пайызы жедел көрсетіліммен жеткізілуде. Портал арқылы келетіндер ол – жоспарлы түрде жататын науқастар, яғни, &nbsp;созылмалы ауруы бар кісілер. Порталға емхана салады. Арнайы программа арқылы жүзеге асырылады. Аурудың жағдайына қарай және ауруханадағы төсек-орын айналымына байланысты жүйе өзі есептеп шығарады. Біз тек стационарға жатуға көрсетілім бар ма, жоқ па соны айтамыз. Қалғанының бәрі автоматты түрде есептеледі, шешіледі. Біз оған араласа алмаймыз. Ал ол есебін шығарамын дегенше жедел науқастар келіп қалады. Осылайша күтіп қалатын жағдайлар болады. Бірақ менде өзімнің квотам бар. Ол көпбалалы аналарға, ардагерлерге, мүгедектерге беріледі. Сол арқылы да жатқызылады. Ол да шектеулі. Көпшіліктің жату қиын деп ренжитіні осыдан деп ойлаймын. &nbsp;Тағы бір айта кетерлігі, проктология, урология, нейрохирургия, кардиология, кардиохирургия, аллергология сынды бөлімшелер облыс бойынша бізде ғана бар. Сондықтан портал бойынша реніш туындап жатады. Сосын тағы бір нәрсе, негізінен науқас ауруханаға медициналық көрсеткіш бойынша жатқызылады. Бірақ бізде әлі күнге дейін «жатып алайыншы» деп келетіндер көп. Олай болмайды десек, «мені жатқызбай жатыр» деп шағымданады. Аурудың көрсеткішіне қарай тәуліктік стационардан басқа күндізгі бөлімдер бар, оның өзі аудандық деңгейдегі, облыстық деңгейдегі болып бөлінеді. Тіпті емхана дәрігерлерімен байланыса отырып, үйден ем алуға болатынын айтсақ, &nbsp;түсінбейтіндер көп.&nbsp;– Қандай жаңалықтарыңызды &nbsp;бөлісер едіңіз?– Ауруханада 2009 жылдан бері кардиология орталығы бар. Оның құрамында кардиохирургия бөлімшесі жұмыс істейді. Сонымен қатар аритмология, эндоваскулярлы бөлімше, кардиореанимация бар. Кардиохирургия бойынша жүрекке ашық ота жасаудың жаңадан бірнеше тәсілдері енгізілді. Әсіресе, жүректің жекелеген ақаулары бойынша ота түрлері жасалып жатыр. Мәселен, кардиологияның аритмология деген бағыты бар. Ол – жүрек ырғағының бұзылуы. Қазір көп адамда кездесетін сырқат түрі. Соны емдеудің тың тәсілдерін қолданып жатырмыз. Екі жылдай болды бастағанымызға. Арнайы құрылғысын да алдық. Нейрохирургия бойынша да бірқатар жаңа заманауи әдіс-тәсілдерді енгіздік. Бас миының аневризмасы, мальформациясы кезінде ашық ота түрінде жасауды біздің мамандар меңгеріп алды. Сондай-ақ, бел омыртқаларының зақымдануында құрсаулаудың жаңа түрлері енгізілді. Грыжаға ота жасауда кіші инвазивті тәсілдер қолданылуда. Урология бойынша да көптеген жаңалық бар. Соның бірі – лапароскопия арқылы қуықтан шығатын несепағар жолының реконструктивті оталары. Бұрын оны мамандар ашық түрде жасайтын, қазір жаңа әдіс бойынша жабық түрде жасалады. &nbsp;Сонымен бірге екі жылдай болды бүйректі лапароскопиялық әдіспен алып тастауды меңгердік.Жалпы ауруханада инсульттік, офтальмохирургия, реабилитациялық және хирургиялық бейіндер, терапиялық бейіндер орталықтары бар. Хирургиялық бейіндер орталығына хирургия, проктология, урология, ортопедия, травматология, тағы басқалар кіреді. Ал терапиялық бейіндерге неврология, пульмонология секілді бірнеше бөлімшелер қарайды.– Емдеу орнының материалдық-техникалық базасы қандай?– Аурухананың құрал-жабдықтармен жабдықталуы &nbsp;93-94 пайызды құрайды. Бірақ жыл өткен сайын материалдық-техникалық база тозады. Физикалық тозғаннан бөлек, моральды тұрғыдан да ескіреді. Медицина күн өткен сайын жаңарып жатыр. Жылдан жылға жаңа емдеу-тәсілдері, соған сәйкес заманауи техникалар, аппараттар да жасап шығарылуда. Сондықтан жаңа құрал-жабдықтарға деген қажеттілік туындай береді. Қазір бізге ауыр техникадан қажеті – МРТ аппараты. Биыл келеді деген, күтіп отырмыз. Екі ангиограф, екі КТ аппараты жұмыс істеп тұр. Ангиограф арқылы қаншама &nbsp;коронаграфия жасалуда. Жылына 2 мыңға жуық коронаграфия жасалады. Пандемияның кезінде пайдасы көп болды. Белгіленген екі аймаққа қойдық та науқастың анализі дайын болғанша қызметімізді жасай бердік. Ангиограф арқылы тек жүрек ауруын емдеп жатқан жоқпыз, бас ми қан айналысының патологияларын анықтап, анықталған жағдайда эндоваскулярлы тәсілмен ем жүргізіп жатырмыз. Сонымен бірге перифериялық қан тамырларының қан айналысын анықтаймыз. Мысалы, аяқтың, қолдың тамырларын тексеріп, тромб болған жағдайда оны алып тастаймыз. Жатыр миомалары, бауыр гемангиомасы кезінде де осы құрылғының көмегіне сүйенеміз.– Кадр мәселесіне тоқталсақ, маман тапшылығы бар ма? Медицина қызметкерлерінің біліктілігін арттыруда қандай жұмыстар жасалып жатыр?– &nbsp; &nbsp;Бізде маман тапшылығы деген мәселе жоқ. Мамандарды тұрақтандыруда 50 пәтерлік қызметтік үйіміз бар. Қазір медицина қызметкерлерінің айлығы көтерілді. Екі-үш жылдың ішінде бірқатар реаниматолог-анестезиологтарды жұмысқа алдық. Ал біліктілігін арттыру бойынша жұмыс жолға қойылған. Бес жылда бір рет мамандардымызды оқытуға міндеттіміз. Қажеттілік болғанда оған қарамай &nbsp;жібереміз. Пандемияның кезінде &nbsp;онлайн курстар өтті. Қанша маманды өзімізге шақырып, шеберлік кластар өткіздік. Жыл басынан бері 5 шеберлік класы өтті. Аритмология, кардиохирургия, нейрохирургия бойынша Астана, Алматы қаласынан мамандар келіп, біздің жігіттерге үйретті. Өзіміздің елден бөлек шетелге барып оқыту да жүйелі түрде жалғасып келеді. Денсаулық сақтау басқармасының жоспарында бар. 2019 жылы Кореяның Сеул қаласындағы ауруханаға біздің 12 дәрігеріміз барып, оқып келді. Биылдың өзінде мамандарды Израильге 5-6 бағыт бойынша жіберу жоспарланған, дайындық жүруде.– &nbsp; &nbsp;Өзіңіз айтып өткендей, емдеу, алдын алу мекемелерінің материалдық-техникалық базасы жақсы, медицина қызметкерлерінің білім-білігін жетілдіруде жүйелі жұмыс бар, еңбекақылары көбеюде. Соған қарамастан елімізде медициналық қызметке, дәрігерлерге деген тұрғындардың сыны, арыз-шағымы азаяр емес. Себебі неде деп ойлайсыз?– Оның әртүрлі себептері бар. Мысалы, жоғарыда айтқанымдай, біздің тұрғындардың арыздары «ауруханаға жатқызбай жатыр» дегеннен басталады. Тәуліктік стационарда жатып ем алуға медициналық көрсеткіші келе ме, жоқ па шаруасы жоқ «мені жатқыз» деп келеді. Міне, түсініспеушілік осыдан басталады. Қай жерге барсақ та порталға деген өкпе-реніш. Портал деген әлемде солай, оны біз өзгерте алмаймыз. Арыз-шағымның тағы бір кең тараған түрі бар ол – &nbsp;деонтологияға байланысты. Дәрігер мен науқастың немесе науқастың туысқанының арасындағы қарым-қатынасы. Дұрыс сөйлеспеді, қолын сілтеп кетті, дауыс көтерді деп жатады. Бірін бірі дұрыс түсінбей қала ма, жеткілікті түрде түсіндірмей ме білмедім. Үшінші бір себебі – көрсетілген ем-домның сапасына көңіл толмаушылық. Дәрігердің білімі, білігі жетпей қалуы мүмкін. Болмаса қанша тәжірибелі, білікті маман болса да кейде ойламаған жерден қате кетіп жатады. Мұны медицинада, оның ішінде хирургияда «ятрогения» деп айтады. Операция үстінде жақсылық жасаймын деп отырып, абайсызда басқа жерге тиіп кетеді. Ол бізде ғана емес, әлемде кездесетін жағдай. Меніңше, көп жағдайда дәрігер мен науқас арасында түсіністік, байланыс керек. Бізде сол жетіспейді. Дәрігер науқасты тыңдай білсе, жылы сөзін аямаса, біздегі арыз-шағымның 60 пайызы азаяр еді деп ойлаймын. Осыдан отыз жыл бұрынғы медицинамен қазіргіні салыстыруға болмайды. Қазіргі біздің медицина әлдеқайда дамып кетті. Ол кездегі жұмыс пен қазіргіні салыстыруға әсте келмейді. Қазір жаңа технологиялар, заманауи әдіс-тәсілдер жыл сайын енгізіліп жатыр. Мысалы, осыдан отыз жыл бұрын Қызылордада ашық жүрекке операция жасау дегенді ойлап па едік? Жоқ. Ондай миымызға да кірмейтін. Облыс орталығын былай қойғанда, ауданда жасалып жатыр. Мәселен, Қазалыда осындай оталар жасалады. Салыстырмалы түрде қарасақ, &nbsp;отыз жылда елімізде медицина алға шығып кетті. Жоғары технологияларды енгізу, күрделі операциялар жасаудан отандық медицина озып тұр. Оны мойындауымыз керек. Арыз-шағым көп дейміз, әрине, қоғам, сала дамыған сайын адамдардың талабы да өседі. Қазір Астана, Алматы қалаларындағы ғылыми орталықтарда ағза алмастыру, яғни, жүрек, бауыр, бүйрек ауыстыру оталары жасалуда. Тек донор жеткіліксіз. Буын ауыстырудан да кенде емеспіз. Біздің травматология бөлімінде жылына 300-ге жуық буын ауыстыру операциясы жасалады. Бұрын солардың бәрі жүре алмай, ерте мүгедек атанатын. Қазір операциядан кейін жүру былай тұрсын, жүгіріп кетеді. Операциядан кейін дұрыс болмай қалу жағдайы жүзден бір-екеу шығар. Онда да науқастың ағзасына байланысты болып жатады. Қазір әлеуметтік желі деген жақсы болды, анық-қанығын білер-білместен жариялап жібереді, оның ақыр аяғы белгілі.– Депутат ретінде өзіңіз көтерген, ықпал еткен мәселелер туралы айтып берсеңіз…– Депутат ретінде белгілі бір мәселені көтеріп, оны өзім ғана жүзеге асырдым деп айта алмаймын. Олай айтсам ұят болар. Мәселе бір адаммен шешілмейді ғой, басқармалар бар, ауыл, аудан, облыс әкімі бар, ауылдардың белсенді азаматтары болады солармен біргіп атқарылып жатқан шаруалар. Ауылдық жерлерде, атап айтқанда, Өзгент, Жаңарық, Бірлік елді мекенінде жаңадан дәрігерлік амбулатория салынып, тұрғындар игілігін көруде. Біршама ауылдарда &nbsp;клубтар салынып, күрделі жөндеуден өткізілді. Спорт кешендері салынып, іске қосылды. Жолдар жөнделіп, көпірлер, мектептер салынуда. Сондай шаруалардың ортасында себепші болып жүрміз. Әлгінде айтылғандай, қоғам алға жылжыған сайын жаңашылдық келеді. Бұл кімді де болса ширатып, әсіресе атқарушы органдар мен халық арасындағы дәнекерлік міндетін күшейте түсуде. Сол жолда еңбек ету, елдің мұң-мұқтажын жеткізу, әрине, біз үшін үлкен сын, жауапкершілік болып қала береді. &nbsp;

Нұридин Әмитов: Халықтың сенімі үлкен жауапкершілік жүктейді

<a href="https://kyzylorda-news.kz/">Kyzylorda-news.kz.</a> «Өркениет» медицина колледжі ұзақ жылдар бойы қалыптасып, дамып, облысымыздың медициналық мекемелеріне өз ісіне адал, іскер мамандар даярлап келеді. Оқу орны заман талабына жауап бере алатын жастарды тәрбиелеп, тәжірибесін жетілдіруде.Оқу базасы заманауи құрал-жабдықтармен толыққанды қамтамасыз етілген. Жиырма жылдық тарихы бар колледжді осы уақыт аралығында 3000-ға жуық түлек бітіріп, еліміздің түкпір-түкпірінде абыройлы қызмет атқарып жүр.Оқытушылар мен студенттер түрлі деңгейдегі жарыстарға қатысып, жүлделі орындар иеленіп жүргенін де айта кету керек.&nbsp;<blockquote>– Түлектеріміз ұшқан ұясымен тығыз қарым-қатынаста. Студенттермен жиі кездесіп маман тәрбиелеу ісіне өлшеусіз үлес қосып келеді. Жалпы колледж екі мамандық бойынша орта буын медицина қызметкерлерін дайындайды. Атап айтар болсақ, «Фельдшер» және «Жалпы практика негіздері» мамандығы. Негізі жеке оқу орнын тек табыс көзі деп қарастыруға болмайды. Мұндағы жүйе, жұмыс күрделі, 83 адамды жұмыспен қамтып отырмыз, 678 студент білім алуда, – дейді «Өркениет» медицина колледжінің директоры Анар Жайпанова. Колледж ұстаздары осы кезге дейін он бес оқу құралын дайындап, жариялады. Биыл «Жалпы патология» және «Паллиативті көмек және онкология» атты екі оқу құралын шығару жоспарда бар. «Адам өмірінің арашашыларын дайындау салғырттықты көтермейді. Сапалы білім беру – басты мақсат», – дейді оқытушылар.</blockquote>&nbsp;Бүгінде оқу процесінің 65 пайызы практика жүзінде өтеді, яғни, білім беру процесінің дені емдеу мекемелерінде жүреді. Ол үшін 19 денсаулық сақтау мекемесімен келісім-шарт жасалған. Себебі, болашақ маман теориялық ғана &nbsp;емес, шынайы жағдайда кәдеге асатын практикаға да қол жеткізуі шарт. Сондықтан, өндірістік, клиникалық іс-тәжірибелер қатаң бақылауда.Әрбір шәкірттің алаңсыз білім алуы үшін барлық жағдай қарастырылған. Қажеттілігіне қарай студенттер жатақханаға орналастырылады. Бітірген түлектердің 70-80 пайызы тұрақты жұмысқа орналасады. Бұл – заман талабына сай маман даярлаудың жарқын жолы.<figure class="image"><img src="https://knadmin.beoblood.kz/uploads/3a0b9eb3_bbb4_4eaf_a8dc_53c8dd7dc379_43738edcb8.jpg" alt="3a0b9eb3-bbb4-4eaf-a8dc-53c8dd7dc379.jpg"></figure>&nbsp;&nbsp;

Жиырма жылдық тарихы бар білім ордасы

<a href="https://kyzylorda-news.kz/">Kyzylorda-news.kz.</a> Бүгін Қызылорда қаласындағы жаңа мөлтек ауданда заманауи технологиялармен жабдықталған «NAZDARMED» отбасылық және интегративті медициналық клиникасы ашылды.Салтанатты шараға Қызылорда қаласы әкімінің орынбасары Жанмұрат Сейілов қатысты.<blockquote>«Медициналық қызметтердің сапасы мен қолжетімділігін қамтамасыз ету Мемлекет басшысы алдымызға қойған басты міндеттердің бірі. Біз шаһардың барлық тұрғындарына сапалы медициналық қызмет көрсетуді мақсат еткен мұндай ауқымды жобаларды қолдауға әрқашан дайынбыз», - деген Жанмұрат Сейілов клиника ұжымының жұмысына табыс тіледі.</blockquote>32 маман жұмыспен қамтылып, қызылордалықтарға қолжетімді медициналық қызмет ұсынатын емдеу нысаны жобасын клиника басшылығы «Даму» қорының қолдауымен Қазақстан Халық Банкінен 71 млн тг, екінші деңгейлі банктерден 42 млн теңге несие алу арқылы жүзеге асырып отыр.Соңғы үлгідегі құрылғылармен жарақтанып, білікті мамандардың басын қосқан емдеу нысаны қызылордалықтарға күндізгі стационар және диагностикалық кеңестер қызметін ұсынатын болады.Емдеу орталығының директоры медицина саласына 35 жылға жуық еңбегін сіңірген облысымызға белгілі акушер-гинеколог дәрігер Жұмашева Гүлнар Хамзақызы.Гүлнар Хамзақызы аймағымызда 130 мың бала, 8000 ауыр жағдайдағы ананың өмірін сақтауға үлес қосқан білікті маман. Тіпті елімізді індет шарпыған сәтте де ковидпен ауырған 30 ананың өмірін сақтап қалған. Осындай басшысы бар, дәрігері бар емдеу орталығының жоғары деңгейде халыққа медициналық қызмет көрсететіне күмән жоқ.

Қызылорда қаласында жаңа отбасылық клиника ашылды

<a href="https://kyzylorda-news.kz/">Kyzylorda-news.kz.</a> Денсаулық сақтау саласы үшін халыққа сапалы медициналық қызмет көрсету – басты міндет. Бұл тұрғыда облысымызда атқарылып жатқан жұмыстар да жетерлік. Мәселен, алдағы екі жылда аймақта 27 денсаулық сақтау нысаны бой көтереді. Бүгінде шаһардың сол жағалауында заманауи &nbsp;облыстық қан орталығының, 100 келушіге арналған емханасы бар 300 төсектік көпбейінді аурухананың құрылысы қарқынды жүріп жатыр. Бұл туралы Өңірлік коммуникациялар қызметінің ақпараттық алаңында өткен баспасөз конференциясында облыстық денсаулық сақтау басқармасының басшысы Олжас Искаков мәлімдеді.<blockquote>-Саланы қаржыландыру жыл сайын артып келеді. Осы жылы сала бюджеті- 104,1 млрд. теңгені құрады. Осыған сәйкес аймақтың медициналық мекемелерін заманауи техникамен қамтамасыз етуге 3,4 млрд теңге бөлініп отыр. Өткен жылы жабдықталу 83,5 пайызды құрап, медициналық мекемелерге 20 санитарлық автокөлік беріліп, шалғай елді мекендердегі тұрғындарға қызмет көрсету үшін 5 жылжымалы кешен ұйымдастырылды. Бүгінде аймағымыздың 18 стационарлық және 26 амбулаториялық медицина ұйымдарында екі жарым мыңнан аса дәрігер, он мыңға жуық орта буын маман &nbsp;адамның денсаулығы мен өмірін сақтау жолында адал еңбек етуде. Аймақтағы жеткен жетістікте алтын жүректі дәрігерлердің &nbsp;әрқайсының маңдай тері, ерен еңбегі, жоғары жауапкершілігі жатыр. Әлемде қанша мамандық болса, олардың әрбірінің адам үшін маңызы зор. Әйтсе де, адам жанының арашасы болған ақ халатты абзал жандардың орны ерекше екені белгілі.Осы орайда, медицина қызметкерлерінің күні қарсаңында ардақты әріптестерімді келе жатқан кәсіби мерекелерімен шын жүректен құттықтаймын,-деді Олжас Ермекұлы.</blockquote>Айта кетейік, биыл «Ауылда денсаулық сақтауды жаңғырту» жобасы бойынша елді мекендерде 15 дәрігерлік амбулатория, 1 МП пайдалануға беріледі. Ал қалған 11-і 2024 жылы іске қосылмақ.

Қазақстан және Қызылорда облысының жаңалықтары: Денсаулық