<a href="https://kyzylorda-news.kz/">Kyzylorda-news.kz.</a>&nbsp;Көкіректегі үміт отын алаулатып, қатарынан кем қалдырмай, алға сүйрейтін, алға сүйрегенде де алысқа жетелейтін адамның жүрегіндегі жігер-ау, сірә! Тіршіліктің түйінін уысынан шығармай, алдынан сара жолды ашатын да осы жігер. Иә, осындай жігітке тән жігерлілікті Ақжан Оразмаханның өн бойынан кезіктіруге болады.Істің көзін тауып, шаруасын оңқай асықтай үйіріп отырған кәсіпкердің қарақан басының қамын ғана ойламай, қалың ормандай шиеліліктердің әлеуметтік-тұрмыстық жайы мен денсаулығына көңіл аударып, қолынан келгенінше көмек көрсетуі азаматтық. Кейіпкеріміз осыдан 8 жыл бұрын Шанхайдан алғаш болып дәріхана ашып, кәсібін бастайды.Жол түсіп менде «Ақжан» дәріханасына бас сұқтым. Мұнтаздай тап-таза бөлме, жинақы сөрелер, реттілікпен орналастырылған дәрі-дәрмектер бір-бірімен үйлесіп-ақ тұр. Қала берді мұнда келушілерге толық жағдай жасалған. Арнайы ине егу бөлмесі де бар. Сәлемімді қабыл алған Ақжан келген мақсатымды білген сәтте бірден ағынан жарылды. Әңгіменің ауанынан байқағаным, жас кәсіпкердің дәріхана ашамын деген арман-мақсаты бала күнгі арманы. Нәтижесінде отбасымен бірге дәріхана ашты. Бүгінде кәсібін дөңгелетіп, 3 адамды жұмыспен қамтып отыр. Ақжанның негізгі мамандығы да – фармацевт.<blockquote>«Аудан тұрғындары ризашылықтарын білдіріп, алғаусыз алғыстарын айтуда. Әр келген тұтынушыға қажет болған дәріні тауып беруге тырысамыз. Жоқ болып қалған жағдайда дереу тапсырыс беріп, алдырамыз. Дәрілер келісімшарт арқылы еліміздің Қызылорда мен Шымкент қалаларынан жеткізіледі», – дейді Ақжан Оразмахан.</blockquote>Жас кәсіп иесінің ендігі мақсаты – дәрі-дәрмек түрін молайтып, кезек күттірмейтін күндізгі стационар ашу. Халыққа қолдан келгенше қалтқысыз қызмет етуге әзір. «Батаменен ел көгерер» деген тәмсілді ұстанған ол адамнан алған алғыс, кәсіптің берекесін артырарына бек сенімді.

Шиелілік кәсіпкер күндізгі стационар ашуды көздейді 

<a href="https://kyzylorda-news.kz/ru">Kyzylorda-news.kz.</a> Сіз білесіз бе, қан тапсыру арқылы бір мезетте үш адамның өмірін құтқарып қала аласыз. Одан бөлек, былайғы өмірде қан тобыңызды білмей жүрсеңіз, қан тапсырған соң қан тобыңыз тұрмақ, оның құрамын, денсаулығыңыздың жай-күйін, барлығын білесіз. Сондай-ақ, талай аурудың алдын алатын пайдасы тағы бар. Халық бұл процестің пайдасын жақсы меңгерген. Жыл басынан бергі үш айда 3 276 адам жүгінсе, оның 2 618-і қан тапсырған. Уақыт өте келе қан тапсырудың пайдалы екенін ұғынып, алғашқы қадам жасағандары да бар. Биылғы келушілердің ішінде 603 қан тапсырушы бірінші рет келгендердің қатарында. Қан орталығындағы қайнаған қызу тіршіліктің арасында халыққа қызмет етіп жүрген донорлықты ұйымдастыру жөніндегі дәрігер Фариза Сейітхановамен пікірлесіп, қан тапсыру жайына қанықтық.Елімізде жылына 200 мыңнан астам донор болады екен. Медицина мамандарының айтуынша, донорлық қан құю акушерлік сала, онкогемотология, хирургия, травмотология бағыттарында кең қолданысқа ие. Қазақстан бойынша 300-ден астам дәрігер, 700 медбике, стационарларда 500-ден астам дәрігер жұмыла жұдырық болып еңбек етеді. Жыл сайын Қазақстанда 200 мың литр қан жиналып, өңделеді. Мұның барлығы халықтың денінің саулығына жасалып жатқан жағдайлардың бір парасы ғана. Бүгінде қан орталығы мамандары аталған саладағы қордың жинақталуына еңбектеніп келеді. Жылына бірнеше мәрте дәстүрлі түрде қан тапсыратын да адамдар жетерлік. Негізінен араға 2-3 ай салып, келетін донорлар да көптеп кездесетін көрінеді.<blockquote>– Донорлар қан тапсырудың адам ағзасына қаншалықты пайдалы екенін жақсы біледі. Бізге келушілердің арасында қан қысымы бар кісілер бар. Олар тұрақты түрде қан тапсырып, қан қысымын түсіреді. Бірақ тұрақты дәрі ішпеу керек. Қанайналым жақсарады. Тапсырған қанның орны толуы үшін адам ағзасындағы барлық клеткалар оянып, соған белсенді жұмыс істейді. Эритроцит, троамбоцит тәрізді клеткалар оянған соң ағзада жаңа қан түзіледі. Оның он түрлі пайдасы бар. Тері жаңарады, семіздіктің алдын алады. Ер кісілерде ұйқы ашылады. Ал көп жағдайда әйел адамдар етеккір тоқтағаннан бастап келеді. Жақында бір кісі келіп, өзі қан тапсыруды бастады. Айтуынша, оның әкесі бала күнінен қан тапсырып келіпті. Инфаркт алғанда сол қан тапсырғанның арқасында тамырларда қан жүрер жолдары таза, бітелмей сол дертті жеңген екен. Міне, қан тапсырғанның пайдасын айқындайтын бұлтартпас дәлел осы емес пе? – дейді Фариза Қалдыбекқызы.</blockquote>Бүгінде сирек кездесетін қан топтарына теріс мәнді І, ІІ, ІІІ, ІҮ топтап жатады. Ал осы қан тобы қажет болған жағдайда дереу қордан қарайды, болмаса базадағы донорлардың ішінен тауып, шақырып жатады. Мұның барлығы адам өміріне араша болған ақ халаттылардың кәсіби шеберлігі мен ұйымдастырушылық қабілеті зор ықпал етсе керек-ті. Тіпті, аудандардан да шұғыл алдыратын кездер болады. Білікті маман мұндай шақтардың қайсы бірінде де ақ халаттылардың өз қызметін дер кезінде мүдірмей атқарып жатқанын жеткізді. Айтпақшы, қазір де бала көтере алмай жүргендер мен баланың қыз немесе ұл болуын қалайтындар да қан тапсыру арқылы ойдағы армандарына қол жеткізіп жүр деседі.<blockquote>– Бізде бұл бағытта бірнеше жағдайлар бар. Қан тапсырған соң организмі жаңарып, талай жылдан бері күткен жүктілікке қол жеткізгендер де бар. Жолдасының кеңесімен келіп, қан тапсыратындар да кездеседі. Мысалы, отбасында бірыңғай қыз немесе бірыңғай ұл балалар өмірге келсе, ер азаматы қан тапсыруға келіп, ағзасын жаңартып кетеді. Әрине, ол жалғыз біздің ғана пайымымыз емес, сала дәрігерлерінің де кеңесі болса керек. ЭКО арқылы бала көтеруге ниеттенгендер де алдымен қан тапсырып жатыр. Ал қан тапсырғаннан кейін күтімді де ұмытпау керек. Тамақтану жағы жақсы болған жөн. Витаминдер, пайдалы тағамдар жеген абзал. Сонда екі айдың ішінде адамның бойындағы қан айналымы да, қан құрамы да қалыпқа келеді, – дейді Фариза Қалдыбекқызы.</blockquote>Ал тұрғындардың талап-тілегі қандай? Шағым жоқ па?&nbsp;<blockquote>«Мен 20 жылдан бері тұрақты қан тапсырып келе¬мін. Алғаш тапсырған уақыттарда жас хирург болдым. Түнгі кезекшілікте тұрамыз. Қаншама науқас келіп жатады. Қан жетіспей жатқанда, қан тапсырып бастадық. Оның үстіне сенің тамшыдай қаның қанша адамның өміріне сеп болады. Біреуге көмегің тисе, бақытты боласың ғой. Одан бөлек, өзіңнің денсаулығыңа да қаншама пайдасы бар. Бұл адамгершілік жағынан да, шариғат тұрғысынан да ізгілікті іс деп есептеймін», – дейді тұрақты қан тапсырушы, қала тұрғыны Бекет Мантаев.</blockquote>Қарлығаш Тулеуованың айтуынша, &nbsp;тұрақты түрде қан тапсыру денсаулығына түбегейлі әсер етіп, қан қысымының жоғарылауын тоқтатқан.<blockquote>«Жасым 40-қа келгенше ауырып көрмедім. Қырықтан аса бере көзім қарауытып, қан қысымым көтерілетінді шығарды. Содан бір кісі қан тапсырып көрсең қайтеді деді. Әдейілеп барып тапсырдым. Бірінші барғанымда қанымды бір бөлімше жүріп әрең алды. Қою екен. Содан қан алып жатқан дәрігер «Сіздің қаныңыз сирек кездесетін топтан. Сіз екі ай сайын келіп тұрыңыз» деді. Осы тапсырған соң көзімнің қарауытқаны да, қан қысымымның көтерілгені де қойды. Жүрек соғысы қалыпты болды. Келесі барғанда бұрынғыдай емес, оңай алынды. Қазір тұрақты тапсырып жүрмін. Денсаулығым да жақсарды. Айналамдағы жақындарыма да қан тапсырып, донор болудың пайдасын айтып жүрмін», – дейді ол.</blockquote>Айта кетейік, бүгінде қан орталығына күнделікті 30-40 адам келіп, қан тапсырады. Мұның өзі халықтың донорлыққа деген көзқарасының жоғары екендігін көрсетеді.

Қызылордада «Құрметті донорлар» тұрады

<a href="https://kyzylorda-news.kz/">Kyzylorda-news.kz.</a>&nbsp; Медбикенің жұмысына ең қажет нәрсе – өз ісіне және науқастарға жауапкершілікпен қарау. Жалпы, мейірбике науқасқа ең жақын әрі қамқоршы адам. Сол себепті мейірбикенің өз мамандығына деген сүйіспеншілігі, алдына келген науқасқа жанашырлық танытуы бәрінен маңызды. Бүгінде заман ағымына сай орта буын медицина қызметкерлеріне қойылатын талап деңгейі де жоғарылады. Қазіргі заманауи медбике жоғары білікті, терең білімді болуы қажет. Мейірбикенің әр күні науқастардың жағдайын жасап, бәйек болумен өтеді. Міне, осы жолда аянбай еңбек етіп келе жатқан жанның бірі – Абай ауылдық емханасының аға мейіргері Күләш Мамбеталиева.Күләш Қожаққызы Мамбеталиева 1962 жылы Арал қаласында дүниеге келген. Әкесі Ибашев Қожақ Ұлы Отан соғысының ардагері, темір жол саласында қызмет істеген, ал анасы Жамал он қолынан өнері тамған шебер болған. Ата-ана тәлім-тәрбиесін алған, жастайынан ажалға араша тұратын ақ халатты абзал жан болуды армандаған жас қыз асқақ арманымен, таудай талабымен 1983 жылы Ақтөбе медицина училищесін акушер мамандығы бойынша бітіреді. Алғашқы еңбек жолын Арал аудандық емханасында мейіргер болып бастаған. Жас маман еңбекке етене араласып, көпшілікпен тез тіл табысып кетеді. Сонау 1999 жылдан бастап Абай ауылдық емханасында аға мейіргер болып абыройлы еңбек етіп келеді. Биыл жоғары санатты мейіргер Күләш Қожаққызының медицина саласында еңбек еткеніне 40 жыл болып отыр. Осыншама жыл бойы емханада медбике қызметін атқарып келе жатқан ол өз жұмысына аса жауапкершілікпен қарайды. Ол үшін алдымен науқастың көңіл-күйі маңызды. Дәрігер нұсқауы бойынша науқастарға ем жасайтын маман уақытпен санаспай, жүрек қалауымен таңдаған кәсібін ұзақ жылдардан бері абыроймен атқарып келеді.<blockquote>Қызығы мен қиындығы мол мамандығым өзіме ұнайды, талай жақсы адамдармен әріптес атанып, жұмыстас болдым. Аталған салада кез келген адам жұмыс істей алмайды. Ең бастысы, өз ісіңді жақсы көріп қана қоймай, төзімді болуың да керек. Еңбек жолымда әртүрлі қызықтар да, қиындықтар да кездесті. Қызметте жүрген әр минут, әр сағат, әр күндер мен үшін өте сәтті де бақытты өтуде десем артық айтқаным емес. Емханаға алғаш келгенде аға мейіргер Оспанова Күлпараз апам қабылдап медицина саласының қыр-сырымен таныстырды. Одан кейінгі ұстазым әрі басшым болған Нұрхожаев Асылхан ағай. Ол кезде мен жаңадан аға мейіргер болып тағайындалдым. Сол кезде аға дәрігер Асылхан ағай құжаттармен жұмыс істеу, емханада қандай шаруа болмасын соны игеріп кетуге көп көмегін берді. Осы саланы барынша меңгеруге көмек көрсетіп, бағыт-бағдар берген ұстаздарыма алғысым шексіз,– дейді абзал жан.</blockquote>«Жақсының жақсылығын айт, нұры тасысын» дейді халқымыз. Бүгінде ақ халатты абзал жан медицина саласында ұзақ жылдар еңбек етіп, тұрғындар денсаулығының «сақшысы» атанып жүрген жандардың бірі. Емханадағы орта және төменгі буындағы қызметкерлердің жұмысына жауап беріп, олардың ем-шараларды мезгілімен, белгіленген мөлшерде берілуін, қатаң еңбек тәртібінің сақталуын қадағалау, әрине тиянақтылықты талап етеді. Осы тұрғыда:<blockquote>&nbsp;Ем-шара кабинетіндегі мейірбике міндеттерінің мүлтіксіз орындалуын, еңбекті ұйымдастыруды жақсартуға арналған шаралар, құжаттаманы жүргізу, ем тағайындау парағымен жұмыс жасау, дәрігерлік тағайындауларды сұрыптау, дәрі-дәрмектерді есепке алу және жұмсау туралы есеп жүргізуді жүзеге асыру жауапкершілігінің жүгі қашанда ауыр. Сондықтан жанына шипа іздеп келген жандардың аурудан емделіп шығуы жолында білім, біліктілігіміз бен күшімізді аянбаймыз. Қазіргі таңда Абай ауылдық емханасы 19700 тұрғынға қызмет көрсетуде. Мейіргерлердің барлығы бірінші және жоғарғы санатты. Емхана меңгерушісі Аманболат Егізбайұлы Исаевтың басшылығымен 12 аймаққа 12 дәрігер аянбай қызмет көрсетеді. Бүгінгі таңда емханадағы әрбір жанның денсаулығын жіті қадағалап, қажет жағдайда кеңесімізді беріп отырамыз. Әрине жұмыс болғасын қиындығы мен қызығы қатар жүретіні белгілі. Қолымыздан келгенше халықтың көңілінен шығуға тырысамыз, – дейді аға мейіргер Күләш Қожаққызы.</blockquote>Қызметінде жемісті еңбек етіп, адамгершілігі мол азаматша болып қалыптасқан Күләш Сейтжан атты азаматпен жарасым тауып, отбасын құрған. Олар шаттығы шалқыған шаңырақта ұланақтай екі ұл, қызанақтай екі қыз тәрбиеледі.<blockquote>&nbsp;Жолдасым Сейтжан «Арал» корпоративтік қорының диспетчері болып жұмыс атқарып, қазіргі таңда зейнетке шықты. Балаларымыздың тәрбиесіне өте жауапкершілікпен қарадық. Жолдасым екеуміз балаларымызды қатарынан кем қылмай өсірдік, жоғары оқу орнында оқыттық. Бүгінде соның нәтижесін көріп отырмыз. Үлкен ұлым Руслан отбасылы, Талдықорған қаласында авиациялық әскери базада ПНК топ бастығы, майор шенінде, келіншегі Әйгерім – мұғалім. Жасқайрат балам ол да отбасын құрған, Қазалы қаласында вокзал бастығы қызметінде, келіншегі Сандуғаш – кәсіпкер. Қызым Ақмарал Байтұрсынов емханасында оператор болып қызмет атқарады, жолдасы Нұрбек әскери бөлімде қызметте. Кіші қызым Ақерке – қаржыгер, «Халық банкте» кеңесші, жолдасы Айболат мұнай саласында жұмыс атқарады. Қазіргі таңда ата-аналық бақытқа бөленіп, 13 немеренің ата-әжесі атанып отырмыз. Тоқсан бес жасқа келіп дүниеден озған енем Қаламқас анамның ақ батасымен көгеріп, өркен жайдық,– дейді мейірімді ана ағынан жарыла.</blockquote>Ұжымда беделді, отбасында мейірімді Күләш Қожаққызының еңбегі де басшылық тарапынан әрдайым жоғары бағаланып отырады. Медицина саласын өркендетуге үлес қосқан білікті маманның ұзақ жылғы еңбегі еленіп, аудандық, облыстық денсаулық саласының, сондай-ақ аудан әкімінің Алғыс хаттары және бағалы сыйлықтарымен марапатталды. Адал еңбектің өтеуі осы болар.«Медицина кәсібі – адамгершіліктің асылы» деп бекер айтылмаған. Біз де жүрегі жомарт, көңілі дария, елге сөзімен де, ісімен де шипа бола білген Күләш Қожаққызының алдағы уақытта да абыройы асқақтап, мерейі үстем болуына тілектеспіз.

Медицина саласының дамуын үлес қосқан абзал жан

<a href="https://kyzylorda-news.kz/">Kyzylorda-news.kz.</a>&nbsp;Әлемнің қай елін алсаңыз да қыз баласын сұлулықтың символына балап жатады. Тіпті «Сұлулық әлемді құтқарады» деген сөздің өзі әйелдерге әжептәуір жүк болып тұр. Табиғатынан тартымды қыз-келіншектер мұндай сөздерді естісе, бойын түзеп, маңғазданып қалатыны өтірік емес. Ал кереметтей келбеті жоқ арулар көштен қалмайын деп түр-әлпеті мен дене пішіміне әртүрлі өзгерістер жасап әлек. «Сұлулық құрбандықты талап етеді» дегенді басқаша түсінген кейбір бұрымдылар бет-әлпетін өзгерту үшін қаражатын құрбан етіп жатады.Табиғат бермегенді ақшаға жасатып алып, өзгеріп шыға келгенде қайран қалмау мүмкін емес. Біздің елімізде де жасанды сұлулыққа қол жеткізу қиын емес. Тіпті қазір көшеде қасы мен ернін, қабағы мен мұрнын жасатып алған қызды көрсе ешкім таң қалмайды. Керісінше жыл өткен сайын жасөспірімдер де көңілі толмайтын жерін өзгертуге құштар болып отырады. Соның нәтижесінде алдымыздан сұлу қыз шықса, табиғи ма әлде жасанды жапсырма ма деп бажайлап қарайтын халге жеттік. Бірақ қазіргі кезде қасты қайта өсіру, ерінді үлкейту, қабақты көтеру, мұрынды кішірейту сынды оталарға көпшіліктің көзі үйреніп кеткені сонша, ешкім таң қалмайтын да, қорықпайтын да болған. Оның орнында сатып алатын сұлулықтың қазіргі шыңында арықтататын дәрілер көш бастап тұр. Атына қызыққан қауым препараттың қайдан келгеніне, құрамында қандай заттар барына да мән беріп жатқаны шамалы. Тек арықтатып, денедегі артық салмақтан оңай құтылудың жолын іздейді. Бірақ медицина мамандарының айтуынша, осы арықтататын препараттар денедегі майды сылып тастайтын - отадан да қауіпті дейді. Олай болса саудасы қызып, жарнамасы жер жаһанды жайлап тұрған аздыратын дәрілердің адам ағзасына қаншалықты зиян екенін талқылап көрелік.&nbsp;Жаһандану заманында жарнаманың алатын орны ерекше. Арықтататын дәрілерді алып, денсаулығына зиян келтіріп жатқандар да осындай жарнаманың құрбанына айналғандар. Тауар сатушылар саудасын жүргізу үшін оқырманы көп блогерге ақылы жарнама жасатады. Әрине, қомақты қаржы алған соң блогер де өтірікті шындай, шындықты Құдай ұрғандай айтып, барынша тауарды өткізуге тырысады. Бірақ оның зиян не пайдалы екенін тексеріп жатқан ешкім жоқ. Ең бастысы арықтатады деп сенеді халық. Бірақ 4-5 жылда елімізге келетін мұндай өнімдердің 70 проценті жалған сертификатталған, ал басқа мемлекеттерде арықтататын препараттарды сатуға тіптен тыйым салынған. Өкініштісі бізде бұл өнімдер ашықтан-ашық сатыла береді. Тіпті екінің бірі көтерме бағада сатып алып, саудагер болып алған. Ал сол өнімнен адам өміріне қауіп төніп, я болмаса денсаулығына зиян келсе ешкім жауап берген емес, бермейді де. Осындай кері әсерін білетін дәрігерлер мен жаттықтырушылар және диетолог мамандар «Арықтатын дәрі ішпеңіздер» деп дабыл қағуда.<blockquote>«Арықтауға арналған препараттар қазіргі таңда сауда нарығында өте көп. Олардың барлығы БАД, яғни биологиялық белсенді қоспалар. Бірақ оның ішінде пайдалысы да, зияндысы да көп. Мысалы, көбі сұрайды «арықтататын дәрілерді ішуге бола ма?» деп. Мұндай кезде үзілді-кесілді жоқ деп айтамын. Себебі ол адамның метаболизмін бұзуы мүмкін. Ағзаға кедергі келтіреді немесе асқазаныңызда ойық жара, қабыну, өт жолдарыңызда тас, тұз болатын болса оларды асқындырып жіберуі ықтмал. Өйткені, осындай арықтататын дәрілердің барлығы өт жолын айдау, я болмаса үлкен дәретке жиі шығару арқылы іске асады. Ол ағзаға керекті аминқышқылдарын, дәрумендерді жуып-шайып жібереді. Сонымен қатар асқазан-ішек жолдарының бүрлерін бұзады. Ең дұрысы, арнайы денсаулыққа қажет дәрумендер ішіп, дұрыс тамақтанып, спортпен шұғылдану керек. Өйткені сіз бірден арықтап кетсеңіз тері салбырайды, бұлшықет босаңсиды. Бәрібір оларды қалпына келтіру үшін спорт керек. Сондықтан әу бастан жаманға жүгірмей, спортпен айналысып арықтау қажет», – дейді гинеколог, нутрициолог Гүлназ Сәбитова.&nbsp;</blockquote>Тек бұл ғана емес, тик-ток, инстаграм сынды әлеуметтік желіде де диетологтар арықтауға арналған дәрінің зиянын айтып, көрсетіп видео жүктеуде. Соның бірі – диетолог Гүлмира Қобландиева. Ол дұрыс тамақтану арқылы салмақ тастауға 1000-нан астам қыздарға көмектескен. Өзі арнайы ас мәзірін беріп, марафонға қатысушы қыздарды күнделікті қадағалап отырады. Қосымша дене жаттығуының да түр-түрін ұсынады. Диеотолог Гүлмира Қобландиева да «Молекула», «Кайен», «Фатзорб» сынды препараттардың пайдасынан зияны көп дейді.&nbsp;<blockquote>«Аздыратын неше түрлі дәрілерді қолданатын адамдар соңында өкінішті жағдайға тап болып жатыр. Соның бірі жақында ғана орын алды. Қазір менің марафоныма қатысып, денсаулығын қалыпқа келтіріп жатыр. Ол аздыратын дәрі ішіп, бауырына зақым келтірген. Бетінің барлығын дақ басып, сәл тамақ ішсе алқынып, өзін жағымсыз сезінеді. Ондай өнімдерді сатушылар түпнұсқа немесе сертификаты бар деп сендіреді. Бірақ адам өміріне қауіпсіз екеніне кепіл бола алмайды. Мысалы бір адам соны ішіп, о дүниелік болып кетсе де ешкім жауап бермейді. Сондықтан жарнамадан жалт-жұлт етіп көрінген әр тауарға еліктей беруге болмайды. Шын мәнінде бірден арықтау мүмкін емес. Тіпті дұрыс тамақтануда да бірден салмақ тастау – зиян. Біртіндеп, жаймендеп артық салмақтан арылу керек. Асқазанға күш түсіруге болмайды», – деп ағынан жарылды диеотолог.&nbsp;</blockquote>Тарих қойнауын ақтаратын болсақ, арықтауға арналған дәрілер сонау 1800 жылдары қолданысқа енген. Ал артық майды кетіретін жақпа майлар 1930 жылы Францияда жасалған. Құрамында хлор мен бром бар радиоактивті бұл майлардың адам баласына тигізген пайдасы зор болғанымен, денені қызартып, түрлі ауруларға алып келген. Кейіннен Германия мемлекеті де сұлулықтың жолында түрлі қадамдар жасаған. Сылқымдар жүзі нұрланып, әдемі болу үшін, күшәләны «мыщьяк» да ішкен. Бірақ бұл да бір есірткінің түрі болғандықтан, оны мүлде қою мүмкін емес. Германия елінің сұлулары осы күшәләні ішіп, айтарлықтай арықтаған. Алайда мұны қолданғандардың дені 35 пен 40 жас аралығына дейін ғана өмір сүрген. Себебі күшәләның құрамындағы заттар ерте өлімнің ¬басты себебіне айналған.Елімізде соңғы жылдары арықтауға арналған дәрілерден бөлек, түрлі кофелер сатылымға енген. Олар адам салмағын тұрақты етіп, арықтатады мыс. Керек десеңіз, денсаулығыңызға пайдасы бар дейді сатушылар. Бірақ бұл жай ғана сауданың көзі секілді. Себебі тұтынушылардың көбі шынайы пікір қалдырып, шағымданған. Кейбіреулері аты жер жаратын аздыратын өнімді ішіп, дене қысымы көтерілген, жүрек қағысы жиілеп, түнде ұйқысыздыққа тап болған. Ал бәзбіреулерінің аяқ-қолы ұйып, көз алдына неше түрлі бейнелер елестейтін болған. Бұл дәрілердің осындай кері әсерін айта берсек таусылмайды. Бірақ қайтсем де, артық салмақ тастаймын деушілер мұндай дәрінің зиянын көргісі де, тыңдағысы да келмейді.&nbsp;«Сұлу сұлу емес, сүйген сұлу» демекші, жер бетіндегі адам баласының барлығы өз бетінше әдемі. Бірінің көзі ерекше болса, енді бірі қайталанбас бет пішінімен есте қалады, кейбіреулердің шашы, басқаларының қасы деген сияқты әрқайсысының өзіндік көз тартар келбеті бар. Әлемде «Сұлулық деген осындай болу керек» деген қағида я болмаса ереже жоқ. Сол сияқты «Сен арық болмасаң әдемі емессің, яки артық салмақ болса жетістікке жете алмайсың» деген шектеулер де болмау керек. Шын мәнінде, ондай шектеулердің барлығы – біздің миымызда. Егер расымен артық салмақтан арылып, азуға талпыныс жасайтын болсаңыз, дұрыс тамақтану мен салауатты өмір салтын серік ету керек. Арнайы диеотологтардан кеңес алып, күнделікті дәруменге бай тамақты тұтынып, дене қозғалысын арттырса кез келген адам артық салмақтан дұрыс және тез құтылады. Ең бастысы арықтаудың оңай жолына жүгіріп, азып емес, тозып кетпейік.

Гүлназ Сәбитова: Салауатты өмір салтын серік ету керек 

<a href="https://kyzylorda-news.kz/">Kyzylorda-news.kz.</a>&nbsp; Сырдария ауданындағы А.Тоқмағамбетов ауылында тұрғындар тарапынан фельдшерлік-акушерлік пуктіне күрделі жөндеу жұмыстары жүргізілсе деген талап-тілегінің негізінде биыл қажетті қаржы бөлінді. Осы күні мердігер мекеме «АХАТ – ГС» ЖШС күрделі жөндеу жұмыстарын бастап кетті.Тозығы жеткен фельдшерлік акушерлік пункті күрделі жөндеуден өткізу жұмысы осы жылдың аяғында аяқталып, пайдалануға берілмек. Осы орайда ауыл халқына медициналық қызмет көрсетіп келе жатқан дәрігерлік амбулаторияның бас дәрігері Гүлжан Орысбайқызы:<blockquote>&nbsp;Ауыл дәрігері ретінде 27 жылдан бері қызмет етіп келемін. Соңғы 21 жылдан бері Асқар ауылында жалпы тәжірибелік дәрігермін. Негізнен осы ғимаратта ауылдың 1415 тұрғынына медициналық көмек көрсетеміз. Ауылдағы бір ғана дәрігер болған соң кейде тәулік бойы жұмыс істеуге тура келеді. Медбикелермен бірге ауыл тұрғындарының денсаулығын қадағалап, қызметімізді аса жауапкершілікпен атқарып келеміз. Сондықтан көнерген ғимараттың жағдайында сапалы медициналық қызмет көрсету қиынның қиыны. Дегенмен бұл мәселе де оң шешімін тауып, биыл күрделі жөндеу басталды. Мердігер мекеме басшылығының айтуынша жыл соңына дейін жұмысы аяқталады, – дейді бас дәрігер.</blockquote>Ауылдағы басталған күрделі жөндеу жұмыстарының барысы жайын көзімен көріп, білу үшін жақында аудандық мәслихат депутаты Еркебұлан Жақып арнайы барып, жұмысымен танысты. Мердігер мекеменің өкілі атқарылатын жұмыстың жәй-жапсарымен таныстырып, құрылыстың уақытылы, әрі сапалы жүргізілетінін айтты. Өз кезегінде халық қалаулысы ел игілігіне жасалып жатқан жұмыста ешқандай ақау немесе кемшіліктің болмауы тиіс екенін ескертті. &nbsp;

Асқар Тоқмағамбетов ауылындағы дәрігерлік амбулаторияға күрделі жөндеу жүргізілуде

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысы денсаулық сақтау басқармасының басшысы Олжас Искаков жұмыс сапарымен Қазалы ауданында болды.&nbsp;Аймақтың бас дәрігері аудан әкімінің орынбасары Дәурен Тілеумбетовпен бірге ең алдымен Бозкөл ауылдық округіне барып, жаңадан бой көтеретін амбулаторияның орнын көрді. Сондай-ақ, Қазалы қаласындағы «Шипагер» дәрігерлік амбулаториясының жұмысымен танысты.&nbsp;Мұнан соң «Жетес би» дәрігерлік амбулатория ғимаратының күрделі жөндеу жұмыстарын көрген Олжас Ермекұлы аудандық емхананың жұмысына да қанығып, ақ халатты абзал жандармен кездесті.&nbsp;Өңірдің бас дәрігері бұдан бөлек аудандық көп бейінді орталық аурухана, орталық жедел жәрдем көмек көрсету стансасы және теміржол ауруханасына да аялдады. Сонымен қатар облыстық денсаулық сақтау басқармасының басшысы Олжас Искаков пен аудан әкімінің орынбасары Дәурен Тілеумбетов тұрғындарды жеке мәселелері бойынша қабылдап, талап-тілектерін тыңдады.&nbsp;Айта кетейік, өңірдің бас дәрігерінің ауданға сапары барысында Қазалы ауданаралық ауруханасының бас дәрігері Бақыткүл Әлішева да бірге жүрді.Аудандағы медицина саласының хал-ахуалымен танысқан аймақтың бас дәрігері әріптестерінің жұмысына сәттілік тіледі.

Аймақтың бас дәрігері Қазалы ауданына іссапармен келді

Медициналық-әлеуметтік сараптаманың өзекті мәселелесі

<a href="https://kyzylorda-news.kz/">Kyzylorda-news.kz.</a>&nbsp;Онкологиялық ауруларды жаңаша тәсілдермен емдеп, радиацияны медицинаның игілігіне пайдаланып жүрген жас физик. Шетелде білімі мен біліктілігін шыңдап, Ресейдің белгілі ядролық физигі, құрметіне химиялық элементтер кестесінен аты аталған әйгілі ғалым Юрий Оганесяннан тәлім алған маман. Бүгінде томотерапия бөлімінде қызмет етіп, ондағы күрделі математикалық есептеуден тұратын жұмыспен айналысып, өз кезегінде физиканың медицинаға беретін әлеуетін арттырып, адамзат пайдасы үшін адал еңбек етуді мақсат тұтатын жас ісмер, тарихы терең Қазалының тумасы Ернар Орда жайлы әңгіме өрбітпекпіз.– Ернар Мақсұтұлы, ең алдымен өзіңіз жайлы әңгіме өрбітсек…– Отбасында анам, екі әпкем, бір қарындасым және келіншегім екеуіміз тұрамыз. Марқұм әкем Мақсут Ерімбетов деген кісі. Ол өз заманында ауданға танымал тұлға, интеллекті жоғары, өте сауатты әрі бала тәрбиесінде ұстанымы мен бағыт-бағдар бере білді. Сегізінші сыныпта облыстық дарынды балалар мектеп-интернатына оқуға аттандым. Отбасында жалғыз ұл болдым. Әкем қимастығына қарамастан сонда білім нәрін сусындауға жіберген. Әрине, оның барлығы менің болашағым үшін жасалған әкемнің батыл қадамы деп білемін. Марқұм әжем оған «жалғыз ұлды неге жібересің» деп ұрысып та алатын. Сөйтіп, мектепті тәмамдап, жоғары оқу орнына тапсырдым. Студенттік өмірді сүріп жүріп, Ресейге әлемдік үздік зерттеу орталықтарының бірі болып саналатын «Біріккен ядролық зерртеулер институтына» оқуға тапсырып, Дубна қаласында білім алдым. Сол жақтан көп бағдарламалар жайлы біліп АҚШ-қа да барып қайтуды көздедім. Айта кетейін, отбасымызда шетелде дәріс алған жалғыз мен емес. 2007 жылы әпкем де АҚШ-қа барып, сонда мол тәжірибе жинап келген.Мектеп қабырғасынан физика саласына, яғни ядролық физика бағытына барғым келді. Онда мені еліткені шексіз энергия және оны алудың жолдары сутегі энергиясы. Сол уақытта бала қиялым болды. Осы энергияға қол жеткізсем, термоядролық синтезді жасай алсам деген. Әрине оның барлығы фундаменталды ғылым, бірақ солардың барлығын қорыта келе, оның практикалық қолдану жөнін, басқа да қырларын уйренуге тырыстым. Ал соның бірі – медициналық физика болып табылады. Діттегеніме жетіп, бүгінде сол салада қызмет етіп келемін.Қазіргі таңда Нұр-Сұлтан қаласында орналасқан «ҮМІТ» халықаралық онкологиялық томотерапия орталығында жұмыс істеймін. Алғашында магистратураны тәмамдаған соң, сан түрлі іріктеуден өтіп, орталыққа жұмысқа тұрдым. Жалпы ядро мен медициналық физика аз ғана ұқсастығы болғанымен, екі түрлі сала. Сондықтан білімімді жетілдіру үшін халықаралық екінші тәжірибем ретінде Индия елінің Дели қаласында орналасқан «Меданта» халықаралық клиникасында екі апта тәлім алдым. Онан соң, тиісті аппаратпен жұмыс жасау үшін, екінші мәрте АҚШ-қа томотерапия құрылғысын өндіруші «Аккюрей» компаниясының зауытына барып, құрылғының жасалу жолымен танысып қайттым. Білімнің ешқашан шегіне жету мүмкін емес. Сол себепті әлі күнге дейін, жер жаһанның түкпір-түкпіріне барып, арнайы курстар мен ғылыми конференцияларға қатысып, тәжірибе алмасып, маңызды ақпаратты түйіп келеміз. Жуырда ғана Венгрия астанасы Будапешт қаласында болған, ауқымды конференцияда да болдым.Бүгінде онкологиялық ауруға шалдыққан жандарды емдеуге дәрігерлер доза тағайындаса, мен сол дозаның жеткізу жолдарымен айналысамын. Негізі дәрігер науқасқа доза тағайындау барысында кішкене ғана мөлшерде артық немесе кем болса, ол науқастың өміріне қауіп төндіреді. Сондай олқылықтың алдын-алу мақсатында физиктер, яғни біз жеткізу ісімен айналысамыз. Олар күрделі математикалық есептеу жолдары мен томотерапия аппараты арқылы жүзеге асырылады. Сол арқылы тиісті дозаны жеткіземіз десек те болады.– Шетелде дәріс алу барысында болған қызықты да қиын сәтіңізді бөліссеңіз…– Онда ең бірінші өзге елден келген азаматтар үшін қиыны, әрине ол – тіл. Мен де тіл білу мәселесімен бетпе-бет келдім. Қазақта «адам баласы үш күннен соң тозаққа да үйренісіп кетеді» деген сөз бар ғой. Расымен, кейін келе сол елдің тыныс-тіршілігі мен ағымына ілестік. Мені бір таңғалдырғаны американдықтардың менталитеті мен қарым-қатынасы. Олар еркін, әрі ессіз десек болады. Яғни, алдына қандай мақсат қойса, оған жету жолында бәрін құрбан етуге дайын.Ал қызықты сәтімді айтар болсам, сонда жұмыс жасап жүріп, жалға пәтер алғанбыз. Сөйтіп, бір аптадан соң, пәтерімізді өрт шалды. Тілсіз жаумен арпалысамын деп жүріп, қолымды күйдіріп алдым. Тиісінше жедел-жәрдем шақырып, мені ауруханаға алып бара жатқанда, ауруды сезбес үшін морфин салған. Оның әсерінен діттеген жерге жеткенге дейін неше түрліні айтыппын. Жеткен соң, бір күндік ем-домын алып, ауруханадан шықтым. Осы орайда айта кететіні, АҚШ-тың ең үлкен бір олқылығы десем де болады. Ондағы медициналық көмек пен ауруханада ем алу ақысы өте қымбат. Мен ауруханадан шыққаннан кейін, бір күндік емге арнайы түбіртек келді. Оның ішінде емделу ақысы жазылған екен. Сондағы бір күн ем мен морфиннің құны 10 мың АҚШ доллары болып шықты. Алайда мен онда студент болып барғаннан кейін, жеңілдікпен 700-800 долларға арзандады. Ол да сол уақыттағы нарықпен аз ақша емес еді. Қуанышқа орай сонда мекендеген қазақ бауырларымыз көмек етіп, емнің тиісті соммасын төлеп тастадық. Жалпы қазақтың бауырластығы бір төбе. Сол сәтте қол ұшын созған жандарға алғысым шексіз. Сөйтіп, АҚШ-тағы 4 ай уақытым қызықты сәттерге толы өтті. Елге оралғаннан кейін, мен тек қалта жайынан ғана емес, рухтық, мотивациялық жағынан да байып келдім десем болады. Жас буынға айтарым, шетелге бару мүмкіндігі туса қалыс қалмаңыздар. Ол жақта сіз бен біздің үйренеріміз көп.– Ернардың осындай дәрежеге жетуіне кім немесе не себеп болды?– Кейбір қазақ отбасында, бала мен әке арасындағы қарым-қатынас өте суық деп айтсақ қателеспейміз. Ал, менде бәрі керісінше. Уақытында әкеммен етене араласып, кез келген мәселені ашық түрде талқылай беретінбіз. Яғни, ол менің өмірімдегі ең алғашқы да, адал да досым болды десем артық айтқандық емес. Жалпы әкелік міндеті ретінде, қайсы біріміздің болмасын, жоғары дәрежелі білім алып, жақсы маман атануымыз жолында аянбай тер төкті. Әлі күнге дейін есімде, алғашқы сұрағыңызда айтқандай 2007 жылы әпкемнің АҚШ-қа барып, ел мен жерді көріп, сондағы ілім-білімді бойына сіңіру үшін несие алып, барлық мүмкіндікті жасаған. Сол жылдары әпкем аудан бойынша ең алғашқылардың бірі болып сапарлап қайтқан. Ол кезде әлеуметтік желі дамымаған. Әжем қаршадай қыздың шетелге жалғыз кеткенін құптамай, оны үнемі сұрап отыратын. Қуанышымызға орай Қазалы қаласында тұратын әкемнің досының үйінде мейл поштасы арқылы хат жолдап, келген хатты қағазға басып алатын мүмкіндік болды. Шетелден хат келісімен оны шығарып, ең бірінші әжеме оқытатынбыз. Сол кісінің көңілі орнығып, жаны тынышталсын деп. Кейін келе мағанда шетелге сапарлаудың сәті түскен. Менің өмірімдегі тағы бір өзіндік ойып тұрып орны бар бір кісі ол марқұм Абдулла Сапар деген ұстазым болды. Ол кісі менен бір ерекшелікті байқады ма, әйтеуір өзіне жақын тартты. Ағалық ақылын, ұстаздық тәлімін берді. Түрлі олимпиадаларға қатыстырып, географиялық бағытқа зейінімді ашқан бірден бір жан болатын.– Жалпы елде көптеген жас буын мұхит асып, жер жаһанды көруді армандайды. Сол арманға жетіп, қажетті білімді бойға сіңіріп жатады. Бірақ, батыстың сұлулығына тамсанып, сонда біржола қалуды мақсат ететіндерге не айтасыз?– Әрине, батыстың сұлулығы елітері сөзсіз. Осы орайда жас буынның мұхит асуды армандауы дұрыс және оны іске асыруға тырысқаны да дұрыс. Елде болашақ және стипендиялық бағдарламалар өте көп. Оны ізденген жан табады.Діттегеніне жеткен соң, еліп, қалып қоятындары бар келісемін. Бірақ сол үшін бізде өкініш болмауы керек. Себебі ол адам ертелі-кеш туған жерді сағынып болса да келеді. Біз қазақ болып туғаннан кейін, ел, жер, ағайын-туыспен қарым-қатынасты ешқашан үзбегенбіз және үзбеймізде.– Егер сізге тұтастай бір елдің оқу жүйесін ауыстыру, яғни өзгерту мүмкіндігі туса, не істер едіңіз?– Әлемге әйгілі ойшыл, пәлсапашы, математик Әбу Насыр әл Фараби айтып кеткен ғой «Тәрбиесіз берілген білім, адамзаттың қас-жауы» деп. Бұған мысал Ресей ғалымы Сахаровтың ойлап тапқан сутегі бомбасы. Ол өзінің көптеген жылдар бойы ізденіп тапқан туындысын, яғни сутегі бомбасының әлемге әкелген зардабына куә болғанда, қыруар сызбасы мен жобаларын жойып тастағысы келді. Алайда, ол үшін өте кеш болды. Бұл жерде не айтқым келді. Тәрибесіз, негізсіз білімнің екі ұшы болады. Біреуі пайдасы болса, екіншісі зияны. Жалпы сутегі энергиясы дегеніміз ол сутегін энергия. Өйткені бұл өте арзан деңгейдегі энергия. Бірақ оның технологиясы өте күрделі және қиын.Негізі бізге ең алдымен керегі менталитет, көзқарас, сауаттану мен интелектуал жетіспейді деп ойлаймын. Жалпы алғанда біз де әлі де қараңғылық бар. Ал, кереметтей оқу системасын ойлап табу мүмкін емес. Яғни кез келген мемлекеттің өзіндік білім-ғылымды дамыту системасы бар. Оның әрқайсысының орны ерек және әрқайсысының өзіндік нәтижесі бар. Сондықтан өзгеріс заман ағымына байланысты жайлап, тамырын жаймаса, оны аяқ асты ешкім өзгерте алмайды.– Уақыт бөліп, әңгімелескеніңіз үшін алғысымыз шексіз.

Ернар Мақсұтұлы, медициналық физик: Маған жүктелген міндет қателікті кешірмейді

Айгүл Үсейінқызы: Ұлттың сапасын көтереміз десек, тәрбиенің негізін дұрыс қалау керек

<a href="https://kyzylorda-news.kz/">Kyzylorda-news.kz.</a>&nbsp; Әлеуметтік медициналық сақтандыру қорының сарапшылары тегін медициналық көмектің кепілдік берілген көлемі және міндетті әлеуметтік медициналық сақтандыру аясында жеткізушілер көрсеткен қызметтердің сапасы мен көлеміне тұрақты түрде мониторинг жүргізеді.&nbsp;Әлеуметтік медициналық сақтандыру қорының Қызылорда облысы бойынша филиалының директоры Бақыт Исмаханбетов хабарлағандай, 2023 жылдың 1 тоқсанда мониторинг нәтижелері бойынша сарапшылар 37 мыңнан астам ақауларды анықтады. Оның ішінде 15 млн теңгеге 3 501 көрсетілмеген қызмет көрсетілді деп жазылған. Салыстырар болсақ, 2022 жылдың 1 тоқсанында 6,5 мың ақау анықталды.&nbsp; Медициналық көмек түрлеріне жіктеп айтсақ, 8 медициналық мекмелер бойынша жалған жазбалардың барлығы жан басына шаққандағы кешенді нормативтен тыс консультациялық-диагностикалық қызметтерге тиесілі (100%). Оның 7-і (87,5%) – мемлекеттік, 1-і (12,5%) – жекеменшік.«Құқық бұзған» денсаулық сақтау субъектілеріне қатысты айыппұл санкциялары қолданылды.Көрсетілетін қызметтердің қолжетімділігі мен сапасы тұрғысынан медициналық ұйымдардың міндеттемелері шарттық қатынастардың маңызды бөлігі болып саналады және Қор олардың орындалуын талап етуге құқылы.&nbsp;Сондай-ақ Қор жеткізушілері тегін медициналық көмектің кепілдік берілген көлемі және міндетті әлеуметтік медициналық сақтандыру пакеттері аясында көрсетілген медициналық қызметтерге ақы төлеу аталған қызметтердің сапасы мен көлеміне мониторинг жүргізілгеннен кейін ғана жүзеге асырылатынын атап өткен жөн. Яғни, медициналық көмек көрсетудің стандарттары мен ережелерін, сондай-ақ клиникалық хаттамалардың ұсынымдарын сақтай отырып, құжатпен расталған ақылы қызметтер ғана төленеді.Егер пациент жалған жазбаны өздігінен анықтаса, бұл туралы медициналық сақтандыру қорына хабарлауы қажет. Қордың fms.kz ресми сайтына, Qoldau 24/7 мобильді қосымшасы арқылы немесе 1414 телефонына хабарласып, шағым немесе өтініш қалдыруға болады.<figure class="image"><img src="https://knadmin.beoblood.kz/uploads/Pripiski_kaz_5b90dcc13f.jpg" alt="Приписки каз.jpg"></figure>

МӘМС: Қызылордалық сарапшылар 3 мыңнан астам көрсетілмеген медициналық қызметті анықтады

<a href="https://kyzylorda-news.kz/">Kyzylorda-news.kz.</a>&nbsp; Бүгінде облыстық жедел медициналық жәрдем орталығының құрамында 4 қалалық, 9 аудандық бөлімше мен оперативті бөлім және медициналық авиация бөлімшесі қызмет етеді. Сәйкесінше, жедел жәрдем орталығында жалпы саны 50 шақырыс тобы, 18 дәрігерлік топ, 10 желілік дәрігерлік бригадасы сондай-ақ, 32 фельдшерлік топ қамтылған. Өңірде соңғы 5 ай көлемінде 103 қызметіне түскен шақыртулар саны былтырғы жылмен салыстырғанда 0,1 пайызға өсіп, 191 584 қоңырауды құрады. Бұл туралы Қызылорда облысының Өңірлік коммуникациялар қызметінің ақпарат алаңында өткен брифингте облыстық денсаулық сақтау басқармасы басшысының орынбасары Жангелді Шайымбетов хабарлады.&nbsp;<blockquote>«Қазіргі таңда облыстық жедел жәрдем орталығы медициналық құрал-жабдықтармен және санитарлық автокөліктермен толықтай жабдықталған. Жедел жәрдем көмегіне жүгіну үшін азаматтар 103 байланыс нөміріне немесе мобильдік қосымшаларды пайдалана отырып тиісті мекенжайға шақырта алады. Орталық шақырту алған сәттен бастап жедел іріктеу жүргізіп, науқастың ауру белгілеріне қарай дәрігер мамандарды дереу жібереді. Ал ауылдық елді мекендерде жедел жәрдем шақырту қажеттілігі туындаса оны аудандық кіші жедел жәрдем станциясы ұйымдастыруы керек. Яғни, олар жақын жердегі медициналық ұйымдардың мамандары мен санитариялық автокөліктерді уақытында шақырған жерге жеткізуі тиіс. Жалпы жедел жәрдем орталығы шақыртуды қабылдаған сәттен бастап науқасқа 10-60 минут аралығында жетуі тиіс», – деді басқарма басшысының орынбасары Жангелді Мырзагелдіұлы.&nbsp;</blockquote>2016 жылдан бері жедел жәрдем қызметін оңтайландыру мақсатында пилоттық жоба сәтті жүзеге асып келеді.&nbsp;<blockquote>«Біздің орталықта жалпы саны мыңға жуық медицина саласының маманы жұмыс істейді. Осы жылдың 5 айында жедел жәрдем қызметіне жүгінгендер саны 1,0 пайызға өскен. Дегенмен, медициналық авиация көмегіне жүгінушілер саны 14,8 пайызға азайып отыр. Бүгінде жедел медициналық жәрдем қызметі облыс халқына сапалы медициналық көмек көрсету үшін озық тәжірибелерді ұтымды пайдаланып келеді», – деді облыстық медициналық жедел жәрдем стансасы бас дәрігерінің медицина ісі жөніндегі орынбасары Ғалия Нұрсейітова.</blockquote>&nbsp;&nbsp;

Жедел жәрдем қызметі оңтайландырылып келеді

<a href="https://kyzylorda-news.kz/">Kyzylorda-news.kz.</a> «Денсаулықтың қадірін ауырғанда білерсің» деп бекер айтпаған. Расында, қай адамға да денінің саулығынан артық бақыт пен байлық, қазына мен құндылық жоқ. Ал, «басың ауырып, балтырың сыздаған» сәтте ақ халатты абзал жандардың алар орны ерекше екенін түсінесің.&nbsp;Өз мамандығы бойынша жүйелі жұмыс істеп, шеберлігі шыңдалған, халыққа қалтқысыз қызметімен, адамгершілігі, асқақ парасатымен танылған, ел сенімін ақтай білген ардагер дәрігер – Рыскүл Нұрманқызы Исаева жұртшылық ерекше құрметтейді.Рыскүл Нұрманқызы 10 жылдық мектепті үздік бітірген соң, Алматы мемлекеттік медициналық институтының «Емдеу ісі» факультетіне оқуға түседі. Алғашқы еңбек жолын 1971 жылы Қызылорда облыстық туберкулезге қарсы диспансеріне дәрігер-фтизиатр мамандығы бойынша жұмысқа қабылданған. Ұжымда біліктілігімен, іскерлігімен көзге түсіп, 1977 жылы осы ұжымның бас дәрігерінің емдеу ісі жөніндегі орынбасары, 1985 жылы №2 өкпе-терапия бөлімінің меңгерушісі, 2005 жылы орталықтандырылған дәрігерлік бақылау комиссиясының төрайымы, 2007 жылы облыстық клиникалық үйлестіруші, 2014 жылы қалалық туберкулезге қарсы диспансерінің аймақтық фтизиатры болып жұмыс жасайды.&nbsp;Өзі таңдаған сүйікті мамандығы бойынша бір ұжымда 47 жыл тұрғындар денсаулығын сақтауда тынбай еңбек еткен ардагер дәрігердің облыстың медицина саласын дамытуға, оның ішінде қауіпті де, қатерлі ауру – туберкулезден қорғауға өзінің &nbsp;саналы ғұмырын арнаған.&nbsp; Осы еңбек жолында Рыскүл Нұрманқызы қаншама қиындықтан өтті, науқастар үшін қаншама күндерін ұйқысыз өткізді. Соның нәтижесінде мыңдаған науқастың алғысына бөленді. Туберкулезбен ауырып келген әрбір науқаспен сөйлесу, ортақ тіл табысу, оны емдеу, жылы сөзбен сүйеу болу оңай емес. Науқастарды емдей отырып, өз өмірін қатерге тігіп, осынша жыл халыққа қызмет еткен дәрігер-фтизиатрдың жұмысын нағыз ерлікке теңеседе болады.Дәрігерлікке тән жоғары жауапкершілік пен терең білімді, үздіксіз ізденісті қажет деп білген , соның арқасында зор абыройға ие болған Рыскүл Нұрманқызы әрқашан үлкен құрметке лайықты жан.&nbsp;Денсаулық саласында атқарған еңбектері жеміссіз емес. Ол «Денсаулық сақтау ісінің үздігі» белгісімен және облыстық денсаулық сақтау басқармасының алғыс хаттарымен марапатталды. Отбасында 1 ұл, 2қыз өсіріп, тәрбиелеген аяулы ана. Еңбекпен шыңдалған ардагер дәрігер Рыскүл Нұрманқызы қазіргі таңда зейнеткерлікте.

Қазақстан және Қызылорда облысының жаңалықтары: Денсаулық