<a href="https://kyzylorda-news.kz/">Kyzylorda-news.kz</a> Қызылорда облысының денсаулық сақтау басқармасының «Облыстық перинаталдық орталығы» шаруашылық жүргізу құқығындағы коммуналдық мемлекеттік кәсіпорны ана мен бала өміріндегі маңызды орталықтың бірі. Сонымен қатар облыстағы ІІІ деңгейлі медициналық көмек көрсететін мекеме. &nbsp;Аталған денсаулық мекемесі 2014 жылы «100 мектеп, 100 аурухана» бағдарлама аясында салынған болатын. 250 төсектік медицина мекемесі бүгінде заманауи медициналық құрылғылармен жабдықталған. &nbsp;Ана мен бала денсаулығын сақтауда бар мүмкіндік жасалған. Бүгінгі таңда жалпы облыс бойынша 18 мыңнан жоғары босанудың 60 процентін құрайтын, жылына 11000 мыңға жуық босану болатын ірі босандыратын медициналық ұйым.Республика көлемінде бала туу көрсеткіші бойынша Қызылорда облысы алдыңғы қатардағы өңірлер санатында. Ал ананың аман-есен босануы, баланың дені сау өмірге келуі үшін мекемеде мамандандырылған білікті дәрігерлер жұмыс атқаруда. Дәрігерлер, акушерлер мен мейірбикелердің қазіргі заман талабына сай кәсіби біліктіліктерін арттыру мақсатында еліміздің жетекші емдеу мекемелерімен қатар, алыс-жақын шет мемлекеттеріндегі медициналық орталықтарда жүйелі түрде тәжірибе алмасады. Облыс әкімдігінің, облыстық денсаулық сақтау басқармасының ықпалымен мамандардың біліктілігін арттыру жұмысы оң шешімін тапқан.Ана мен балаға көрсетілетін көмек сапасын жақсарту мақсатында орталықтағы дәрігерлерді қосымша мамандыққа оқыту арқылы невролог, кардиолог, офтальмолог мамандары даярланып, жұмыс жүргізуде. Осы мамандық бойынша қажетті аппараттар Холтер, СМАД, ЭЭГ, ЭКГ аппараттары сатып алынып, қолданысқа енгізілген. Сонымен қатара телемедицина арқылы республиканың орталықтармен байланыс жолға қойылған.Ана мен бала орталығы Орталық Қазақстан, Ресей, Германия, Жапония мемлекеттерінің үздік медициналық құрал-жабдықтарымен қамтамасыз етілген. Мекеменің қызмет көрсету бағыты – жүкті және босанған әйелдерге, ауыр патологиясы бар әйелдерге, жаңа туған нәрестелерге және гинекологиялык науқастарға мамандандырылған медициналық көмек көрсету болып табылады. Қазіргі таңда мұнда бірнеше бағытта медициналық қызмет көрсетіледі. Оның ішінде, акушерлік және гинекологиялық қызмет, анестезиологиялық – реанимациялық, неонатология, медициналық генетика, лабораториялық диагностика (клиникалык, бактериологиялық) қызмет, консультативті-диагностикалық бағытта УДЗ диагностика, рентгенологиялық диагностика көмегі көрсетіледі.Облыстық ана мен бала перинаталдық орталығында ота блогы, қабылдау бөлімі, жүктілер паталогиясы, І акушерлік бөлім, ІІ акушерлік бөлім, реанимация және қарқынды терапия бөлімі, неонаталды блок, гинекология бөлімі, клиникалық-диагностикалық зертхана, инфекциялық бақылау, дәріханасы бар госпиталды фармация, әкімшілік, жалпы аурухана бөлімі жұмыс істейді.Ана мен бала денсаулығын қорғау саласында сапалы және тиімді перинаталдық көмек көрсетуді мақсат еткен орталықта күн сайын жаңа өмірдің есігін қаққан сәбилер дүниеге келуде.&nbsp;

Қызылорда: Аналарға бақыт сыйлаған орталық

<a href="https://kyzylorda-news.kz/">Kyzylorda-news.kz</a> Әлемде әр минут сайын бір адам көз жанарынан айырылады екен. Мұның бәрі көз күтімімен айналыспау, көз ауруына салғырт қараудан туындайды. Сондықтан оның алдын-алу мақсатында сақтану жолдарын жасаған жөн дейді мамандар.Бүгінде көз жанарына қатысты сырқаттың бірнеше түрі кездеседі. Соның ішінде, ересектер арасында кеңінен таралған көз ауруы ол – катаракта, қазақшалағанда көзге ақ түсу деп аталады. Катаракта кезінде сәуленің көз бұршағына өтуі қиындап, көздің көру қабілеті төмендейді. Катаракта әртүрлі жағдайларға: қарттық, жарақаттану, түрлі аурудың асқынуы салдарынан, тағы басқа әсерге байланысты пайда болады. Аурудың туа және жүре пайда болатын жайттары бар.Бір ескере кететін жайт, линзаның де көзілдіріктің де емдік қасиеті жоқ. Қант диабеті, экзема, зат алмасудың бұзылуы, ұзаққа созылған көз аурулары көздің жарақаттануы жүре пайда болған катарактаға әкеледі. Ыстық температурада (балқыту пешінің жанында) ұзақ уақыт жұмыс істеу немесе көзге тиісті қорғаныш көзілдірік кимей иондандырғыш сәуленің әсерімен жұмыс істеу – катарактаның асқынуына себепші болады. Катарактаның бұл түрінің клиникалық белгісі: сырқат адамның көзінің алдында бір нәрсе тұрғандай әсер тудырады. Іштен туа біткен катаракта құрсақтағы ұрықтың дамуы кезінде дамиды. Бұған жүкті әйелдің жұқпалы аурулармен тұмау, қызамық, тағы басқа ауруы себепші бола алады. Бұл ауруды уақытылы емдемеген жағдайда ол ауру соқырлыққа алып келеді. Катаракта ауруының емі – ота жасау.Сонымен бірге адам бойында қабыну – белгілі бір аллергендердің ықпалына ағза реакциясының өзгерген аса сезімталдығы туындауы ғажап емес. Бұл біздің иммундық жүйеміздің толығымен зиянсыз заттардан өте қатты тітіркенетінін және ағзаға зиян келмейтін аллергендерден шамадан тыс қорғана бастайтынын білдіреді. Қабыну реакциясы көздің қышуы мен қызаруы және ісініп кетуі, сондай-ақ көз айналасының қышуы, жанарда «құмның» тұрғанын сезіну, жиі жас ағу мен жарықтан тітіркену сынды белгілермен анықталады. Сонымен бірге қастың қызаруы және ісінуі де қабынуды білдіреді.Жалпы аллерген ретінде бәрі әсер етуі мүмкін. Күн, мысық, өсімдіктердің тозаңдануы, сүйікті тағамның, үйдің шаңдауы, салқын, косметика, дәрі-дәрмек. Бұл тізімді аяғына дейін соза беруге болады. Аллергияның дамуы тәуекелдігінің маңызды факторы тұқым қуалаушылық. Егер ата-ананың біреуі аллергиямен ауыратын болса, онда бала аллергиясының даму сенімділігі 30-40% дейін жетеді. Егер ата-ананың екеуі де осы сырқатпен ауырса, тәуекелдік 70-75% құрайды.Аллергия кезінде жіберілетін басты қателік – өз бетінше ем жасау (кез келген тамшыны пайдалану, үй жағдайында шөп қайнатып емделу). Аллергия байқалған кезде бірден дәрігер көмегіне жүгініп, қабынудың неден шыққанын анықтау қажет. Кейін тиісті емін алып, дәрігер кеңесі бойынша дәрі-дәрмек қабылдауы қажет.<blockquote>– Тағы бір дерт – миопия немесе басқаша атауы алыстан көрмеушілік, сығырлық. Миопия кезінде адамның көз алдындағы бейне көздегі көз торында емес, оның алдында көрінеді. Сондықтан көз торы алдындағы бейне адамға бұлдырап көрінеді. Миопия – көз рефракциясы, көздің сәулені сындыру күші, клиникада көз көру фокусы, тор қабық алдына орналасады.</blockquote>Миопиялық ауру – алыстан көрмеушіліктің асқынған түрі, шыны тәрізді дене мен көз түбінің өзгеруімен қайталанбайтындығымен ұштасады. Миопия жасөспірімдер арасында жиі кездеседі. Оның пайда болу себептері: кемістік бөлмеде жарықтың жеткіліксіздігінен, затқа көзді тым тақап жұмыс істеуден, оқу, жазу, кейбір қолөнері кәсібімен шұғылдану және тағы басқалары. Алыстан көрмеушілік әдетте балалардың мектепте оқып жүрген кезінде басталып, кейіннен өрши түсуі мүмкін. Мұндайда көз тез талады. Ұзақ уақыт сабаққа дайындалғаннан кейін көзінің түбі сыздап ауырады. Көзі бұлдырайды. Затты айқын көру үшін оны амалсыз көзіне тақауға мәжбүр болады.Адамның алыстан көрмеуі, көздің бұлдырауы, көздің алыстағы тұрған заттан жақын тұрған затқа қарауда немесе керісінше қарауда ауыртпалығы, заттардың екі еселенуі, алыстағы заттар түсініксіз көрінуі, алыстағы заттарды көруі үшін адамның көзді сығырайтуы миопияны білдіреді.Мұндай жағдайлардың алдын алуда Қазалы теміржол ауруханасы жан-жақты жағдай жасауда. Жақында соңғы үлгідегі заманауи құрылғымен жабдықталды. Жаңа аппарат оптикалық когерентті томография – көз түбі потологияларын анықтауда офтальмологияда қолданылатын ең тиімді зерттеу әдісі.<blockquote>– Глаукома, көз нервісінің патологиясы, торлы қабықтың ауруларын, макулярлы дегенерация және диабеттік, посттромботикалық ретинопатия ауруларын диагностикалауда тиімді қолданылады. ОКТ жоғары дәлдік нәтиже береді. Бұл көз ауруларын анықтаудағы қателіктерді азайтуға мүмкіндік береді. Аталған жабдықка тексерілу үшін теміржол емханасының офтальмолог кабинетінде келіп тіркелсе болады, – дейді Қазалы теміржол ауруханасының офтальмолог дәрігері Берік Жадырасын.</blockquote>Жасқа байланысты макулярлы дегенерация – көздің артқы сегментінің созылмалы үдемелі ауруы, торлы қабықтың және хореоидтың орталық аймағында дегенеративті процестермен сипатталады. Жасқа байланысты макулярлы дегенерация ең көп таралған көз ауруларының бірі. Бұл 50 жастан асқан адамдарда қайтымсыз көру қабілетінің жоғалуының негізгі себептері саналады дегенді алға тартады көз дәрігері. Сондықтан аталған дерттерді дер кезінде анықтау үшін жаңа жабдыққа қол жеткізді.&nbsp;

Көздің көруін қалай жақсартуға болады?

<a href="https://kyzylorda-news.kz/">Kyzylorda-news.kz</a>&nbsp;&nbsp; Облыстық денсаулық сақтау басқармасымен биыл соңғы үш айда 1 169 816 &nbsp;қызмет көрсетілсе, оның &nbsp;482 307 қызметі электронды түрде көрсетілген. &nbsp;Бұл жалпы қызметтің 41 процентін құрайды.Оның ішінде «Дәрігердің қабылдауына жазылу» мемлекеттік көрсетілетін қызметі бойынша жалпы 674 618 &nbsp;қызмет көрсетілсе, оның 312 381 қызметі электронды түрде көрсетілген. Ал «Дәрігерді үйге шақыру» мемлекеттік көрсетілетін қызметі бойынша жалпы – 52 206 электронды қызмет көрсетілген.Жалпы облыстық денсаулық сақтау басқармапсы тарапынан көрсетілетін қызметтер бірнеше бағытта жүзеге асырылады. Мәселен, «Медициналық ұйымға бекіту» бағытында – 21 899 қызмет, электронды түрде - 18 001, «Алдын ала міндетті медициналық қарап-тексерулерден өткізу» - 8 829, «Медициналық-санитарлық алғашқы көмек көрсететін медициналық ұйымнан анықтама беру» - 19 615, «Еңбекке уақытша жарамсыздық парағын беру» -31 669,&nbsp;«Уақытша еңбекке жарамсыздық туралы анықтаманы беру» - 37 685, &nbsp;«Стационарлық науқастың медициналық картасынан үзінді көшірме беру» - 44 566, «Көлік құралын басқаруға рұқсат алу туралы анықтама беру» - 684, «Жедел медициналық көмекті шақырту» - 119 741, «Емдеуге жатқызу бюросы порталы арқылы пациенттерге тегін медициналық көмектің кепілдік берілген көлемі шеңберінде стационарға емделуге жатқызуға жіберу жолдамасын беру» - 17 803, «Азаматтардың жекелеген санаттарына дәрілік заттарды,бейімделген емдік өнімдерді,медициналық бұйымдарды беру» - 139 128, «Санаторийлік-курорттық емдеу қажеттілігі туралы қорытынды беру» - 640, «Психоневрологиялық ұйымнан анықтама беру» - 0, «Наркологиялық ұйымнан анықтама беру» -0, «Туберкулезге қарсы ұйымнан анықтама беру» - 0, «Қазақстан Республикасының азаматтарын бюджет қаражаты есебінен шетелге емделуге жіберу мүмкіндігіне құжаттарды қабылдау және қарастыру»-0, «Денсаулық сақтау саласы кадрларының біліктілігін арттыру және қайта даярлау туралы құжаттарды беру» – 136, «Транспланттау мақсатында ағзалардың (ағза бөлігінің) және (немесе) тіндердің (тін бөлігінің) қайтыс болғаннан кейінгі донорлығынан тірі кезінде бас тарту немесе келісім алуды тіркеу» бағытында – 597 азамат қызмет алған.Фото: ktk.kzА.Әлім

Қызылордада медициналық бағытта электронды қызмет алу артып келеді

<a href="https://kyzylorda-news.kz/">Kyzylorda-news.kz</a>&nbsp; Қызылорда қалалық орталықтандырылған кітапханалар жүйесіне қарасты №3 кітапханада «Жазғы кітапхана» бағдарламасы аясында «Дәрумендер – денсаулық кепілі» атты денсаулық сағаты өткізілді. Дұрыс тамақтану, зиянды әдеттердің алдын-алу – денсулық кепілі!Шара барысында кітапхана оқырмандарына адамзат денсаулығын сақтаудың басты шарты – дұрыс тамақтанудың маңыздылығы жайлы айтылды. Тамақтануға ерекше көңіл бөлген жөн. Тамақ құрамының құндылығы басты назарда болғаны дұрыс. Тиімді, дұрыс тамақтану денсаулықты сақтауға, ағзаның қалыпты өсуі мен дамуына, жұмыс қабілетінің жоғарылуына және ағзаның қалыпты өсуі мен дамуына, жұмыс қабілетінің жоғарылауына және ағзаның қоршаған ортаның әртүрлі жағымсыз әсеріне қарсылығын күшейтуге ықпалын тигізетіні жөнінде және сонымен қатар зиянды әдеттердің алдын-алу мәселесіде айтылды. Темекі тарту, алкогольдік ішімдік ішу, газдалған сусындарды тұтыну, фасфуд өнімдерін жеу және тағы басқа зиянды әдеттердің соңы айықпас ауруға шалдығуы мүмкін. Сондықтан бұл әдеттерден ерте жастан бас тартып, өз өміріңізді қолға алған жөн. Оның орнына спортпен шұғылданып, уақытты тиімді өткізген жөн. Салауатты өмір салты – денсаулық кепілі.Шарада «Салауатты өмір – бар байлықтың бастауы» атты кітап көрмесі жасалып оқырмандарға насихатталды.Коллаж: qazaly.kz

Кітапхана оқырмандарына салауатты өмір салты насихатталды

<a href="https://kyzylorda-news.kz/">Kyzylorda-news.kz</a> Жыл басынан бері Қызылорда облысы көлемінде көкжөтелге 75 күдікті &nbsp;жағдай анықталды, оның ішінде 28 дерек зертханалық жолмен нақтыланды, басым бөлігі Қызылорда қаласының үлесінде. Ауруға шалдығудың басым көпшілігі екпе алмаған 14 жасқа дейінгі балалар арасынан анықталды. Бұл туралы Қызылорда облысының санитариялық-эпидемиологиялық бақылау департаментінің басшысы Динара Жанабергенова мәлімдеді.&nbsp;Көкжөтел – бұл көбінесе балаларда байқалатын және белгілі бір клиникалық көрінісі мен белгілері бар инфекциялық ауру. Көкжөтелдің ерекшелігі – тыныс алу функциясының бұзылуы және аурудың дамуы кезінде тыныс алу жолдарының шырышты қабаттарының зақымдануы.Жиі асқынулар екі жасқа дейінгі балалар мен қарт адамдарға тән. Алайда, кез-келген жаста ауру әл-ауқатты едәуір нашарлатуы мүмкін, сондықтан көкжөтел белгілері мен инфекцияның алдын-алу әдістерін білу керек.Көкжөтелдің белгілері жоғарғы тыныс жолдарының бактериялық инфекциясына ұқсас:- дене қызуының +38°С-қа дейін көтерілуі, қалтырау;- әлсіздік, бұлшықеттердің ауырсынуы, бас ауруы;- мұрын жолдарынан ағу, мұрынның бітелуі, құрғақ жөтел, шырышты қабықтың ісінуі.Қоздырғыштың берілуі инфекция жұқтырған адаммен тығыз байланыста болған кезде ауа-тамшы жолымен жұғады. Ауру адам аурудың айқын сатысы басталғаннан кейін 30 күн ішінде алғашқы патологиялық көріністерден инфекцияны тарата алады.Балаларды көкжөтелден қорғаудың жалғыз сенімді және тиімді әдісі –вакцинация. Алғашқы вакцинация баланың 2, 3, 4 және 18 айлығындажүргізіледі. Әрі қарай егу 6, 16 жаста және әр 10 жылда ересектерде жүргізіледі. Бұл ретте дифтерияға, көкжөтелге және сіреспеге қарсы иммунитетті дамытуға мүмкіндік беретін аралас вакцина қолданылады.Қызылорда облысының санитариялық-эпидемиологиялық бақылау департаменті көкжөтелді жұқтырып алмас үшін балаларға уақытылы екпе алуға кеңес береді, сонымен қатар санитариялық-гигиеналық талаптарды жауапкершілікпен орындауды сұрайды. Аурудың белгілері байқалған кезде жедел медициналық көмкекке жүгінуді ұмытпаңыз.Фото: gov.kz

Қызылордада көкжөтелдің 28 дерегі анықталды

<a href="https://kyzylorda-news.kz/">Kyzylorda-news.kz</a>&nbsp; Адам өміріне араша түсетін дәрігерлердің науқас алдында жауапкершілігі зор.&nbsp;Себебі дәрігер адам анатомиясын өте терең білумен қатар, қаннан қорықпайтын, адам тағдырына немқұрайлы қарамайтын, күйзеліске төзімді, жүйкесі мықты жан болуы керек. Олар дертке шалдыққандарға бастапқы диагнозды қойып, тез жәрдем көрсетудің арқасында әл үстінде жатқан адамның өмірін сақтап қалады, денсаулығын қалыпқа келтіреді. Ауданда мұндай мақтауға тұрарлық медицина саласының мамандары баршылық. Солардың бірі – Қазалы теміржол ауруханасының қызметкерлері десек артық айтқанымыз емес.&nbsp;Бұл жерге қаншама жанына дауа іздеген сырқаттар келіп, жан-жақты шипа алуда. Өз кезегінде ризашылықтарын жеткізіп, алғаусыз алғысын жаудыруда. Сондай жанның қатарынан табылған аяулы ана Эльмира Ақниязова арнайы редакциямызға соғып, баласының дертін жазу үшін Ресей дәрігерлерінің еміне жүгінетінін тілге тиек етті. Бірақ бұл жолы теміржол ауруханасынан ем алуға бел буғанын жеткізді. Қабылдаған шешімі оң нәтиже бергені үшін дәрігерлер қауымына ризашылығын білдірді.<blockquote>&nbsp;– Мемлекеттің басты байлығы адам десек, әрбіріміздің аман-саулығымызды бақылайтын ол әрине, ақ халатты абзал жандар. Адам басы ауырып, балтыры сыздап, дертіне дауа іздегенде медицина қызметкерлеріне жүгінері анық. Қызығы мен қиындығы қатар өрілген маңызды мамандық иелері қай кезде де мадаққа лайық. Өзгенің өмірі үшін күресіп, адам денсаулығына қауіп төніп тұрғанда дер кезінде сейілте білген дәрігерлер қауымының ерен еңбегін, маңдай терін ескерусіз қалдыруға болмайды. Бір қызығы, адам жанының арашасы болатын ең күрделі саланың басым бөлігін ару-аналар құрайды. Бұл да бір қолымен бесікті, бір қолымен әлемді әлдилеген жандардың ерекшелігін көрсетсе керек. Қазан айында баламмен теміржол ауруханасының балалар бөліміне түстім. Сол кездегі байқағаным адамды дәрі емес аппақ көңіл, сыпайы қарым-қатынас та емдейді екен. Бөлімге кіргеннен балалар дәрігері, ана мен бала бөлім меңгерушісі Жаңагүл Елубаева бастаған ұжым мүшелерінің жылы байланыс орнатуы, олардың антқа берік, өз жұмысына адал екендігін байқатты, – дейді ақтарыла сөйлеген ана.&nbsp;</blockquote>Ана мен бала бөлімінің меңгерушісі болған Жаңагүл Елубаева жас болса да өз ісінің маманы. Бізбен әңгімесінде әрбір баламен ем-шара қалай жүргізілетіндігі жайлы ақпарат берді.&nbsp;<blockquote>– Балалар бөлімінде теміржол ауруханасының бас дәрігері Құбыл Ршымбетовтың бастамасымен диспансерлік есепте тұратын туа біткен ақауы бар балаларды қайта қалпына келтіру мақсатында екі орын бөлінген. Жалпы бұдан бөлек аталған бөлімде 12 кереует бар. Баланы қайта қалпына келтіру бөлімі қазалылықтар алысқа арбаланбасын деген оймен ашылған. Ақсай, Талсуат, Жаңақорған санаторийлеріне бейімделіп жасалған. Біз баласымен келген ата-анамен де жұмыс істейміз. Балалар жылына 2 рет емін алады. Мұнда дауна, дюшенрба, тіл мүкістігі бар және сал ауруына шалдыққандар жатады. Ауру тарихы талапқа сай жазылып, хаттамаға сәйкес ем беріледі. Кемінде 15 күн науқас жан-жақты қаралады. Бізбен бірге психолог, логопед қызмет көрсетеді. Монтисори психокоррекциондық жұмыс жасалады. ЛФК, массаж, электрофарез, емдік ванна, парафиндік пен дәрумендік және физиотерапия қызметтері бар. Невропатолог, окулист, хирург мамандарынан қажет жағдайда телемедицина арқылы облысқа шығып кеңес аламыз, – дейді Жаңагүл Елубаева.</blockquote>&nbsp;Эльмира Ақниязованың айтуынша, күні бойы науқастың жанынан табыла білетін, қажетті егу егіп, дәрісін ұсынатын мейірбике Перуза Әбдіғаппарова жайлы сөз басқа. Ол емшара уақытында әр баланың мінез-құлқына байланысты түрлі әдіс-тәсілдермен ортақ тіл табыса біліп, жүрегіне жол таба біледі. Жасалған ем-домының арқасында баласының жағдайы бірқалыпты. Перуза Сайфуллақызы ауруханаға табандай 37 жылын арнаған. Қазіргі мамандығын ол бала кезде анасы жиі ауыратындықтан ерекше қалап таңдаған.&nbsp;<blockquote>– Қарап отырсаң бір адамның ғұмырын теміржол ауруханасында өткіздім. Еш өкінбеймін. Науқастардың бар жағдайын жасаудан шаршамаймын. Осы кезге дейін мен қызмет атқармаған бөлім қалмапты. Әр саланың өзіндік ерекшелігі мен үйретері бар. Барлығында да хирургия, терапия және басқа да бөлімдерде болып мол тәжірибе жинадым. Осы ісіме қызыққан балаларым да медицина саласын таңдады. Қазір халыққа қалтқысыз қызметтерін көрсетуде, – дейді Перуза Әбдіғаппарова. Ал физиотерапия бөлімінің жауапты мейірбикесі Аманкүл Абжанова мен мейірбике Гүлнар Досмамбетова үнемі ізденісте жүретін, халыққа лайықты медициналық жәрдем көрсете білетін жандар. “Олардың бауыр етім баламның емі үшін қосқан үлестері зор. Массаж жасап, аппараттарды қойып денсаулығын түзеудің жолдарын жасады. Күніне 60-70 науқасты қабылдап, 3-4 процедура қатарынан жасаса да жылы шыраймен шығарып салады. Соның өзі де алған емің жақсы әсер етуіне бірден бір көмек. Қорытындылай келе, темір жол ауруханасының ұжымына шексіз алғысымды, риясыз ризашылығымды білдіремін”, – деп ағынан жарылды ақ жаулықты ана Эльмира Ақниязова.&nbsp;</blockquote>Медицина саласында өз орындарын ойып алған, емге зәру жандарға әрқашанда жылы сөздерімен көмек беретін ақхалаттыларды қалай мақтасақ та жарасады. Жас пен кәріге, жалпы адамзаттың бәріне көмек қолын созып, жанын қоярға жер таптырмай азаптаған ауруынан айықтыратын дәрігерлердің еңбегі жана берсін дейміз.

Жаңагүл Елубаева: Бала денсаулығы – ел байлығы 

<a href="https://kyzylorda-news.kz/">Kyzylorda-news.kz</a> Мидың, жұлынның қатерлі ісігін жою отасы Қызылорда облысында да сәтті жүзеге асырылуда. Оған белгілі нейрохирург, жоғары санатты дәрігер, ҚР денсаулық сақтау ісінің үздігі, облыстық көпбейінді аурухананың нейрохирургия бөлімінің меңгерушісі Шынжырбай Оразмаханұлы зор үлес қосып келеді. «Нейрохирургтар күрделі оталарды қалай жасап, әрбір пациенттің өмірі үшін қалай күресіп жүр?» деген сауалға дәрігермен сұхбат барысында жауап іздедік.- Нейрохирургиялық бөлімнің жұмыс күні қалай өтеді?- Біздің бөлім 25 орынға лайықталған. Жыл сайын мыңдаған адам емделеді. Оның шамамен 600-іне ота жасалады. Атап айтқанда, мидың, жұлынның қатерлі ісігін жою бойынша микрохирургиялық және тағы басқа хирургиялық араласулар. Күрделі ота жасау қажет болған жағдайда біздің мамандар аудандарға шығады. Егер пациент жол жүруге жараса, оны санавиациямен облыстық медициналық орталыққа алдырамыз. Биыл Қызылорда облысы бойынша нейрохирургиялық оталар жасау үшін міндетті әлеуметтік медициналық сақтандыру қорынан 178 млн. теңге бөлінді.Астанадағы Ұлттық нейрохирургия орталығымен, ҚР Президенті іс басқармасы Медициналық орталығы ауруханасымен, Қарағанды қаласындағы облыстық медицина орталығымен, Алматыдағы №7 қалалық клиникалық ауруханамен тығыз байланыстамыз. Абай Пірманұлы, Қанат Набдинов, Әнуар Қосбармақов секілді мамандарымыз аталған медициналық ұйымдарда біліктіліктерін жетілдіруде. Ондағы әріптестерімен бірге күрделі оталар жасауға қатысып жүр.- Ауыл тұрғындарына көбіне ота жергілікті ауруханаларда жасалатын шығар?- Әрине. Мысалы, Қазалы көпсалалы орталық аудандық ауруханасында аниограф аппараты бар. Мамандар соның көмегімен тамырдың патологиялық бөлігін анықтап, хирургиялық араласу мүмкіндігін және оның көлемін бағалай алады. Одан бөлек Арал, Қазалы, Қармақшы, Шиелі, Жаңақорған аудандық ауруханаларында компьютерлік томографтар бар. Егер бұрын сүйек-ми жарақатының диагностикасын рентген аппаратымен жүргізсе, қазіргі күні жүйке тіні құрылымындағы болар-болмас өзгерістің өзін компьютерлік томографтың көмегімен анықтауға болады.Жоғары технологиялы медициналық құрал-жабдықпен қамтамасыз ету міндетті әлеуметтік медициналық сақтандыру аясында қаржыландыру көлемінің өсуіне байланысты мүмкін болғанын айтуға тиіспіз.Автордың ескертпесі: 2019 жылы Қызылорда облысында медициналық көмекті қаржыландыру көлемі 45,9 млрд теңгені, 2024 жылы – 11,9 млрд теңгені құрады. Жалпы 2,5 есе өсті. Жоғары технологиялық медициналық көмекті қаржыландыру үш есеге, яғни 206,2 млн. теңгеден 675,3 млн. теңгеге дейін өсті.- Адамның миы – өте ғажайып жаратылыс. Онымен жұмыс істеу де оңай емес. Ота жасау кезінде не нәрсеге мән бересіз?- Нейрохирургия – медицинаның ең қиын бағыттарының бірі. Адамның миымен, жүйкесімен, жіңішке тамырларымен жұмыс істейсің. Бір-екі милиметрге қиыс кетсең, науқас сал болып қалуы мүмкін. Отаның сәтті шығуы үшін бар күшімізді саламыз. Пациент отадан кейін ойлай, сөйлей, жүре және өмірге қуана білуі керек.- Пациенттерде мидағы ісіктер қаншалықты жиі анықталады?- Жылына орта есеппен мидағы қатерлі ісікті алып тастау үшін 100-ге жуық ота жасаймыз. Жақында, мысалы, 38 жастағы әйелге осындай ем-шара жүргізілді. Өзі сүт бездерінің ісігімен диспансерлік есепте тұрады. Алғашында мидың қатерлі ісігінің белгілері байқалмаған. Басы қатты ауырғасын ғана облыстық ауруханаға жеткізілді. Отадан кейін пациенттің жағдайы тұрақтанды.- Израиль немесе Германияда осындай оталарды жасату үшін қаржы жинау науқаны туралы естігенде осыны өзімізде МӘМС аясында тегін жасауға болатыны туралы ой келмей ме?- МӘМС тұрғындар үшін тиімді. Неге? Мысалы, Израильде мидың қатерлі ісігін алып тастауға 30 мың доллар керек. Ал бұл ота Қазақстанда 5 млн. теңге тұрады. Израильде омыртқа жотасының ісігіне ота жасату күрделілігіне қарамастан 25-30 мың доллардан кем емес. Біздің елде – 2,5 млн. теңге. МӘМС аясында сақтандырылған пациенттерге мұндай ота, лабороториялық, диагностикалық зерттеу тегін жүргізіледі.- Инсульт жасарып барады, неге?- Бұрын инсультқа негізінен 60 жастан асқан кісілер ұшыраса, қазір 30-40 жас аралығындағы адамдардың өзін мазалайды. Ол көбіне тұқым қуалайды. Егер ата-анасының бірінде жоғары артериалды қан қысымы, қант диабеті болса, балаларында да осы жағдайлар қайталанады. Сондықтан тұрақты түрде скринингтен, профилактикалық тескерістен өтіп тұру керек.- Инсульттің алғашқы белгілері қандай?- Олар – бастың қатты ауыруы, құсу, көру қабілетінің, жүрістің нашарлауы, дененің бір жақ бөлігінің жансыздануы. «Алтын сағат» деген ұғым бар. Алғашқы белгілерін байқаған бойда жедел сапалы медициналық көмек көрсету қажет. Пациентті тромбоэкстрациядан (тамырдан тромбты механикалық үзу) немесе ангиографиядан өткізу керек. Бұл инсульттің асқынуына жол бермей, мүгедек болып қалу қаупін азайтады.Тағы айтатын нәрсе, пациенттің туыстары мен жақындарына кез келген жағдайға дайын болуды ескерту керек. Өйткені науқастың жанынан әрдайым сол кісілер табылатын болғасын аталған аурудың асқынбауына көмектесе алады.- Әңгімеңізге рахмет!&nbsp;

Қызылордада ең қымбат ота МӘМС аясында тегін жасалуда 

<a href="https://kyzylorda-news.kz/">Kyzylorda-news.kz</a>&nbsp;&nbsp; Дәрігер - жүректілікті, шыдамдылықты, тәуекелділікті, табандылықты талап ететін аса жауапты мамандық. Ал осындай қиындығы мен қызығы мол мамандықты ұрпағы жалғап, әулетімен жауапкершілік міндетін арқалау абыройлы іс. &nbsp;Біздің өңірдегі осындай өнегелі отбасының бірі қармақшылық – Әлиевтердің шаңырағы.&nbsp;Әулет тірегі Хамит Әлиев Алматы мемлекеттік медицина институтында &nbsp;«фтизиатр» мамандығы бойынша білім алса, жары Пәрида Сарыбаева «педиатр» саласын бітірген.Институт қабырғасында танысқан жастар бір мамандық, бір салада жүргеннен соң өмір жолдарын да бірге таңдауды жөн көріпті. 1992 жылы оқуды аяқтаған екі жас, үлкен өмірге аяқ басады. Оңтүстік Қазақстан облысындағы &nbsp;Келес ауданының &nbsp;тумасы Пәриданы мамандыққа, сүйген жарына деген махаббаты Сырдың келіні атандырған. Отыз жылға жуық уақыт аралығында түрлі қызметтік сатылардан өткен оларды бүгінде аудан тұрғындары жақсы таниды. Отағасы Хамит емханада фтизиатр болса, отанасы Пәрида бас дәрігердің ана мен бала мәселесі жөніндегі орынбасары.&nbsp;Кәсібіне мығым, ісіне адал, бақытты отбасының үш перзенті бар. Отбасының тұңғышы Ақтоты Ибадуллаева С.Асфендияров атындағы ұлттық медициналық университетті қызыл дипломмен аяқтап, 2018 жылдан бері аудандық емханада жалпы тәжірибелік дәрігер болып қызмет атқарады. Ал екінші перзенттері Асқар Ибадуллаев әл-Фараби атындағы Қазақ Ұлттық университетін тәмәмдап, бүгінде облыс әкімдігінде экономист. Кенжелері Нұрсауле Ибадулла биыл Әл-Фараби атындағы Қазақ Ұлттық университетін қызыл дипломмен аяқтап, ағылшын тілі маманы атануда. Перзенттінің барлығы Ү.Томанов атындағы &nbsp;№183 орта мектептің үздік оқушылары. Қызметпен қатар бала тәрбиесін қоса алып, саналы ұрпақ өсіруде де бұл отбасы көпке үлгі.&nbsp;<blockquote>– Дәрігер – &nbsp;жан-жақты әрі қызықты жұмыс. «Адам жанының арашашысы» атанып, бұл қызметті алып жүру де абыройлы іс. Жас мамандарға көп жылдан бері жинаған тәжірибемді үйретіп келемін. Заман талабына орай медициналық көмек көрсетудің сапасын арттыруға барынша үлесімді қосып жүрмін. Дәрігерге ең басты қажет нәрсе – ол жүректің мейірімділігі, – дейді дәрігерлер отбасының тірегі Хамит Әлиев.</blockquote>Дәрігерлер туралы түрлі пікірді қоғам арасынан құлағымыз шалатыны рас. Дегенмен індетпен күрескен &nbsp;соңғы жылдар адам өміріндегі дәрігердің орнын айқындап берді. Қажет кезде күн-түн демей, отбасынан жырақта жүріп, қызметіне деген адалдығын танытқан абзал жандар қандай құрметке де лайық.<blockquote>– Өзімнің осы мамандықты таңдауыма балаларға деген сүйіспеншілігім әсер етті. Себебі мен олардың дені сау болып өсулеріне өз үлесімді қосқым келді. Адам үнемі ізденісте, жан-жақты даму үстінде жүргенде ғана бірнәрсені толық меңгеруге ұмтылыс жасайды. «Болдым, толдым» деу жарты жолда қалып қоюмен тең. Біздің мамандығымыз біліктілікті әрдайым арттырып отыруды талап етеді. Алматы, Ақтөбе, Қызылорда қалаларында бірнеше рет білімімді жетілдірдім. Ол үшін ең бірінші ата-енеме, жолдасыма, &nbsp;емхана басшыларына алғысым шексіз. Өйткені мұндай білім жетілдіру курстары кәсіби мамандардың жұмысқа деген ынтасын одан әрі жоғарылатып, олардың заманауи әдістерді тәжірибе жүзінде қолдануына, жаңашылдыққа бетбұрыс жасауына үлкен мүмкіндік туғызады. Перзенттеріміздің арасында тұңғышымыз Ақтоты ізімізді қуып, дәрігер болды. Оған науқасты жылы қабылдап, ем-домын шын жүрекпен жасауды, өзгеге пайдалы болуды үнемі айтып отырамыз, – дейді отанасы.&nbsp;</blockquote>Ата-анадан алған тәлім, көрген өнеге Ақтоты Ибадуллаеваны осы салаға әкелді. Отбасындағы жылулық жұмыс орнында да жағымды атмосфера орнатса керек, ол жас маман болса да жұмысына тиянақты, көптің алғысын алып білікті маманға айналуда.&nbsp;Әрдайым үздіктер қатарынан табылатын бұл әулет мүшелерінің айтулы даталарға орай алған алғыс, Құрмет грамоталары да өте көп. Бұл да болса бірнеше жылғы адал еңбектің өтемі.&nbsp;Негізі мамандық игеру адамның ең басты құндылығы, болашақтың бағдары екені сөзсіз. Сол құндылықты ұрпақтан-ұрпаққа жеткізіп, сақтай алудың өзі – абырой. Ендігі кезекте тек ұрпақтар сабақтастығы жалғасқан жанұяның ұлтқа қызмет етуі әрі қарай да өз жалғасын тапса дейміз. &nbsp;

Қармақшыдағы дәрігерлер династиясы

<a href="https://kyzylorda-news.kz/">Kyzylorda-news.kz</a> Бас ауырып, балтыр сыздағанда жедел жәрдем қызметінің көмегіне жүгінеміз. Шақырту түсе салысымен олар көмекті қажет ететін мекен-жайдан табылуға асығады. Дер кезінде берілген көмектің арқасында үзілген үміт оянып, талай ғұмыр қайта жалғанды. Бұл саланың мамандары үшін әрбір секунд құнды. Адам өміріне араша түсіп, алғыс арқалаған сала мамандарының жұмысы жайында облыстық денсаулық сақтау басқармасы басшысының орынбасары Жаңыл Абубакирова мен облыстық жедел жәрдем стансасы бас дәрігерінің орынбасары Ғалия Нұрсейітова Өңірлік коммуникациялар қызметінің ақпарат алаңында баяндап берді.<blockquote>– Республика бойынша жедел медициналық жәрдем қызметі денсаулық сақтау министрлігінің 2020 жылғы 30 қарашадағы жедел медициналық жәрдем оның ішіндегі медициналық авиацияны тарта отырып көрсету қағидаларын бекіту туралы 225 бұйрығы негізінде жүзеге асырылады. Біздің облыста жедел жәрдем көмегі ұйымдастырылған. Қызылорда облысы бойынша 4 бекет бар. Аудан орталықтарында да 9 бөлімше бар. Біздегі Байқоңыр қаласының ерекшелігі, қаланың ішінде Ресей Федерациясының жедел жәрдем қызметі жұмыс жасайды да, біз қала сыртындағы ауылдық округтерге қызмет көрсетеміз. Жедел жәрдемді шақырған кезде шақыру себебіне қарай 4 категорияға бөлінеді. Оларды науқаспен сөйлесу барысында диспетчер анықтайды. Категория белгілі болған соң, жедел жәрдем бригадасы жіберіледі. Дертіне шипа іздеген жандарға жедел жәрдем қызметі қашанда жедел түрде қол ұшын созуға әзір,- деді Жаңыл Исақызы.</blockquote>Ақ халатты абзал жандар қашан да қызметіне адал. Күн-түн демей шақыру түссе көмектесуге әзір тұрады.&nbsp;<blockquote>– 2016 жылдан бастап жедел жәрдем қызметін оңтайландыру мақсатында пилоттық жоба жүзеге асырылған болатын. Сол кезден бүгінге дейін бұл жоба үздіксіз өз жұмысын атқарып келеді. Облыстық медициналық жедел жәрдем стансасы құрылымына 4 қалалық, 9 аудандық бөлімше, оперативті бөлім және медициналық авиация бөлімі кіреді. Қазіргі уақытта бұл стансаға 13 бөлімше және оперативті бөлімдер бар. Жалпы саны 50 шақырыс тобы бар. 18 дәрігерлік топ, оның ішінде 4 кардио бригада, 4 педиатриялық бригада, 10 желілік дәрігерлік бригада мен 32 фельдшерлік бригада қызмет көрсетеді. Ал, халықаралық курстар бойынша 63 дәрігер, 517 орта буынды мамандар оқытылған. Білікті дәрігерлер бүгінде арнайы көмек көрсетуге дайын,- деді Ғалия Талғатқызы.</blockquote>Фото:&nbsp;Қызылорда облысының Өңірлік коммуникациялар қызметі

Жәрдем беруге асыққан жедел қызмет

<a href="https://kyzylorda-news.kz/">Kyzylorda-news.kz</a>&nbsp; МӘМС жүйесіне қатысты оқырмандардың сұрақтарына жауап беруді жалғастырамыз. Әлеуметтік медициналық сақтандыру қорының Қызылорда облысы бойынша филиалының бас сарапшысы Айгүл Аханова түсініктеме берді.Егер жеке кәсіпкер жеңілдік санатына кіретін болса, МӘМС жарналарын төлеу қажет пе?Жеке кәсіпкер өзі немесе оның жалдамалы қызметкерлері келесі санаттарда болған жағдайда жарналар мен аударымдарды төлемейді: балалар (18 жасқа дейінгі); зейнетақы төлемдерін алушылар, оның ішінде Ұлы Отан соғысының қатысушылары мен мүгедектері; «Алтын алқа», «Күміс алқа» алқаларымен наградталған немесе бұрын «Батыр Ана» атағын алған, сондай-ақ I және II дәрежелі «Ана даңқы» ордендерімен марапатталған көп балалы аналар; мүгедектер; орта, техникалық және кәсіптік, орта білімнен кейінгі, жоғары білім беру, сондай-ақ жоғары оқу орнынан кейінгі білім беру ұйымдарында күндізгі оқу нысанында білім алатын адамдар.Егер пациент ауруханаға жатқызылған күні стационарға келе алмаса не істеу керек?Жоспарлы емдеуге жатқызудың белгіленген күні стационарға келмеген жағдайда пациент бұл туралы бастапқы медициналық-санитарлық көмек ұйымына немесе емдеуге жіберілген денсаулық сақтау ұйымына хабарлайды. Стационар ауруханаға жатқызуды екі күннен аспайтын мерзімге ауыстырады.Қандай жағдайларда пациент тіркелу үшін емхананы таңдауға құқылы?Жыл сайын елімізде 15 қыркүйектен 15 қарашаға дейін емхананы еркін таңдау науқаны өтеді.ҚР ДСМ 2020 жылғы 13 қарашадағы № ҚР ДСМ-194/2020 «Медициналық-санитариялық алғашқы көмек көрсететін денсаулық сақтау ұйымдарына жеке тұлғаларды бекіту ережесін бекіту туралы» бұйрығына сәйкес, БМСК ұйымын тіркеу науқанынан тыс бірнеше жағдайда ауыстыруға болады. Егер адам тұрақты немесе уақытша тұратын жерін, жұмыс немесе оқу орнын &nbsp;ауыстырған жағдайда, басқа елді мекенге көшкен болса немесе ол тұрған емхана қайта ұйымдастырылса, жойылса және басқа да жағдайларда емхананы ауыстыруға құқылы.Сонымен қатар, бұл рәсімді жылына бір рет еркін таңдау құқығымен жасауға болады.&nbsp;Емхана үйден 15-20 минут уақытта жаяу жететін жерде орналасқаны жөн.Медициналық көмек алу кезінде қосымша сұрақтар немесе мәселе туындаған жағдайда өз клиникасындағы Пациенттерді қолдау және ішкі сараптама қызметіне жүгіну қажет. Егер жағдайды сол жерде шешу мүмкін болмаса, Әлеуметтік медициналық сақтандыру қорының келесі байланыс арналарының біріне өтініш қалдыра алады: Qoldau 24/7 мобильді қосымшасы; fms.kz ресми сайты;&nbsp;Telegram-дағы @SaqtandyrýBot; 1414 байланыс орталығы.&nbsp;

Қандай жағдайларда пациент тіркелу үшін емхананы таңдауға құқылы?

Тұрғындардың санитариялық-эпидемиологиялық жағдайы тұрақты бақылауда

<a href="https://kyzylorda-news.kz/">Kyzylorda-news.kz</a> Дерті дендеп, дел-сал күйге түскен жан жедел жәрдемге хабарласары айқын. Ажал апанынан аман алып қалар ақ халатты жандар қас пен көз арасында құстай ұшып жетіп, дертке дәрмен табуы олар үшін айнымас қағида. Қоңырау шалып, көмек сұраған науқасқа алғашқы медициналық жәрдем көрсету мұндағы мамандар қызметінің басты міндеті. Осы орайда қазалылықтарды шұғыл және ауыр жағдайдан аман алып қалуға барын салып жүрген, меңгеруші Данияр Баекеев бастаған Қызылорда облыстық медициналық жедел жәрдем стансасының Қазалы жедел жәрдем құрылымдық бөлімі ұжымы жайлы сөз қозғамақпыз.Тарихы тереңде жатқан Қазалы аудандық жедел жәрдем стансасы сонау 1957 жылы құрылып, 2017 жылы Қызылорда облыстық медициналық жедел жәрдем стансасына қарап, тұрғындар игілігі үшін аянбай еңбек етіп келеді. Мұнда 82 адамнан тұратын ұжымда 2 дәрігер, 50 орта буын қызметкері, 24 жүргізуші және 8 техникалық қызметкер бар. Тағы да жоғары санатты – 20, І санатты – 10, ІІ санатты – 9 және маман сертификатын иемденген 12 қызметкер бар. Олар ауыспалы және көшпелі 5 бригада түрінде жұмыс жасайды. Діттеген жерге жеделдетіп жетуге, арнайы құрылғылармен жабдықталған 4 УАЗ және 2 JAC көлігі қызмет етеді. Олар басқа да кислород, ИВЛ, ЭКГ, отсос, дефибриллятор, небулайзер сынды қажетті аппараттармен жабдықталған. Бір ауысымда 10 фельдшер, 5 жүргізуші, 1 диспетчер бірлесе қызмет жасайды.Жедел жәрдем шақыру науқастың ауру халі және жеделдігі бойынша 4 санатқа топтастырылады, – дейді бөлім меңгерушісі Данияр Берікұлы.<blockquote>– Бірінші санатқа – науқастың жағдайы өмірге тікелей қауіп төндіргенде және дереу медициналық көмекке мұқтаж болған жағдайда. Ондай кезде бригаданың келу уақыты 10 минутқа дейін. Ал екінші санат – науқастың медициналық көмексіз өміріне қауіп төнуі ықтимал жағдайда бригаданың келу уақыты 15 минутқа дейін. Үшінші – медициналық көмексіз денсаулығына зиян келуі мүмкін жағдайда бригаданың келу уақыты 30 минутқа дейін. Және соңғы төртінші санатқа – науқас жанның өмірі мен денсаулығына тікелей қауіп төнбеген кезде, оның жағдайы өткір немесе созылмалы аурудың шиеленісуіне, ағзалары мен жүйелердің кенеттен және анық бұзылыстан туындаған кезде бригаданың келу уақыты 60 минутқа дейін. Сонымен қатар алғашқы 3 санатты жедел жәрдем стансасы, ал төртіншісіне – емханалардағы шұғыл медициналық бөлімдер деңгейінде көрсетілетін болады. Осылайша, емханалардағы жедел жәрдем орталықтары шақыруды тәулік бойы 24 сағат қабылдайды, – деді ол.</blockquote>Тұрғындар жедел жәрдем көлігін жүрек-қан тамыры аурулары, жол көлік апаты жағдайларында жиі шақырады екен. Себебі, көлік апаты мезгілге қарамастан көбейіп тұрғаны баршамызға мәлім. Ал, жүрек талмасы және басқа да түрлі аурудың қайта қоздырар кезі де, осы мезгілге сәйкес. Кезекті шақыртуға аттанған бөлім мүшелері осы күні тәулігіне жүзге жуық шақырту түсетінін айтты. Әр шақырту мұндағы маманға артылар жауапкершілік жүгін сездірмек.Байқағанымыздай, жедел жәрдем бөлімі жұмысының сапасына әрқайсысы – фельдшер, дәрігер, диспетчер, көлік жүргізушісінің өз үлесі бар. Бір-бірімен тығыз байланысты, іскерлік пен жылдам шешім қабылдауды, кәсібилік пен кешенді қызметті қажет ететін бөлімнің бір күндік жұмысы да оңай емес.Осы салада қызмет атқарып келе жатқан фельдшердің бірі – Гүлжан Файзуллаева. Ол мұндағы еңбек өтілін 2007 жылдан бастаған. Өз ісіне және антына адал Гүлжанға тұрғындар тарапынан алғыс айтушылар да көп. Бұл жерде қоңырауларды қабылдап, бригадаларды реттеп отыратын диспетчердің жұмысы аса маңызды. Келіп түскен қоңырауға науқастың қандай жағдай бойынша хабарласқаны назарға алынып, бригада жедел түрде аталған мекен-жайға қажетті аппараттарымен аттанады. Мәселен, реанимациялық жағдайдағы науқасқа дер кезінде оттегі беріп, мониторинг арқылы бағалаған соң, қимылға көшеді. Осы орайда, әрбір шалынған қоңырауды бригадаға жедел хабарлап отыру ісіне жауапты маман Жаңагүл Айдановна. Биыл оған жедел жәрдем қабырғасында еңбек етіп келе жатқанына қырық жылға жуықтады.Келесі кезекте шақырту түскен жерге уақытында жетуге көлік жүргізушісі Төрехан Жалғасбай жауапты. Ол жедел жәрдемге көлік жүргізушісі болып 1997 жылы орналасқан. Диспетчер хабарлаған әрбір көше мен үйді дереу тауып, уақытында жету асқан жауапкершілікті қажет етеді.Жоғарыда аталған мамандардың әрқайсысының бұл саладағы орны ерек. Бір салада сан жылдар бойы қалтқысыз қызмет еткен ұжымның ауызбіршілігі жарасқан. Күн-түн, аптап ыстық, ызғар суық демей, жедел жетіп, біліктілік пен тәжірибені ұштастыра дереу шешім қабылдау, жоғары сапалы кәсіби көмек көрсету кез келгеннің қолынан келе бермейді. Сондықтан, Қазалы жедел жәрдем құрылымдық бөлімі ұжымы өз ісіне әбден машықтанған, төзімі болаттай берік, мінезі мығым, қиыннан қисын тауып, құтқару ісінде тәуекелге бас тігер батыл жандар деп айтсақ артық болмас.

Қазақстан және Қызылорда облысының жаңалықтары: Денсаулық