<a href="https://kyzylorda-news.kz/">Kyzylorda-news.kz</a> Жалағаш ауданына қарасты Аққыр ауылында мемлекет тарапынан берілетін қолдауды тиімді пайдаланып, аядай ғана ауылда кәсіпкерлікке бет бұрған жастар аз емес. Сөзімізге шалғай ауылда тұрып, кәсібін ашқанына көп болмаса да, тұрақты тұтынушылар жинап үлгерген Нағима Жақсымова дәлел. Кейіпкеріміз – Аққыр ауылының тумасы. Әріптестеріммен елді мекендерге жасаған сапарымызда Нағиманың сұлулық салонына табан тіреп, шағын кәсіптің тыныс-тіршілігімен таныстық.Бала күнінен әдемілікке жаны құмар Нағима қолы қалт етсе, айнаның алдында шашын түрлі тәсілде түйіп, бетін әрлеуге қызыққан. Ол сұлулық салонындағы ең алғашқы қадамын үйінде туған-туыс, достарының шашын қиып, сәндеуден бастаған. Оның жасаған жұмысына көңілі толып, той-томалаққа барар кезде үйіне іздеп келетін тұтынушылар қатары көбейген соң, қолынан келетін іспен айналысуды жөн көрген, кейіпкеріміздің шағын кәсіптң негізін қалауына да басты себеп осы екен.Арнайы қаладағы білікті мамандардан білім алып, біліктілігін арттырған ол жыл басында «Бастау бизнес» бағдарламасы аясында 1 млн 470 мың теңге қайтарымсыз грант ұтып алыпты. Кейіпкеріміздің ақшаны басқа мақсатқа жұмсамай, түгелімен кәсібіне салып, қажетті құрал-жабдықтарын сатып алғаны көрініп-ақ тұр.&nbsp;Шағын ғимаратта отырса да бірнеше қызмет түрін біріктірген Нағима шаш қиып, оны сәндеумен қатар тұтынушыларының қалауы бойынша бояп береді. Мұнан бөлек нәзікжандылардың бәтін әрлеп, алдағы уақытта ел сұранысымен соңғы үлгідегі педикюрдің де түр-түрін жасауды қолға алмақ.&nbsp;<blockquote>– Салонда әзірге мен ғана жұмыс жасаймын. Кәсібім ауылда болғандықтан тұтынушылар кенттегідей күнде бола бермейді. Яғни той-томалақ, туған күн кештерінде келетіндер көп. Одан бөлек ер балалардың да шашын аламын. Қазіргі жастардың талғамы ерекше. Олардың талғамына сай жасап беру үшін әлі де білімімді &nbsp;жетілдіріп отырамын, – дейді кейіпкеріміз.&nbsp;</blockquote>Иә, ауылдан шаштараздың ашылғаны тұрғындарды қуантпай қоймасы анық. Бұл кәсіп нәзікжандылар үшін де, ер балалар үшін де тиімді. Себебі олар енді аудан орталығына сабылмай, ауылда қолжетімді&nbsp;бағада шағын кәсіптің игілігін көріп отыр.&nbsp;<blockquote>– Мен үшін бүгін маңызды күн. Аудан орталығына тойға барамын. Сондықтан Нағима тәтеге шашымды сәндетіп, макияж жасатқалы отырмын. Тұрақты тұтынушысы болғандықтан маған қандай шаш үлгісі жарасатынын, бетімді қалай әрлесе әдемі болатынын өте жақсы біледі. Ол ең алдымен сапаға жұмыс жасайды, – дейді ауыл тұрғыны Ақнұр Мұхтарқызы.</blockquote>Иә, сұлулық салонында жұмыс жасау оңай емес. Әр нәзікжандының талғамы әртүрлі болғандықтан кейде олардың талғамынан шығу қиын. Әйтсе де алдына келген арудың ризашылығын алуды көздеген кейіпкеріміз ең алдымен тұтынушымен жақсы тіл табысып, сапалы қызметін ұсынады.&nbsp;<blockquote>– Алға қойған жоспарларым жоқ емес. Өзіңіз байқағандай, әлі күнге са-лонымның аты жоқ. Ауыл тұрғындарының айтуымен қазір «Нағиманың салоны» деп аталып жүр. Ең үлкен арманым – осы салонымның тынысын кеңейтіп, үлкен кәсібімді анамның «Әлия» есімімен ашу. Одан бөлек сән әлемінде жұмыс жасауға икемі бар, ауылдағы жас қыз-келіншектерді тұрақты жұмыспен қамтып, өзгеге де пайдамды тигізгім келеді, – дейді жас кәсіпкер.&nbsp;</blockquote>Иә, мемлекет тарапынан кәсіп ашамын деген жастарға қашан да қолдау бар. Табыс тайқазаныңызды тасыту үшін алға қойған мақсатыңыз бен ынтаңыз болса жеткілікті, шалғай ауылда тұрғаныңыз еш кедергі емес. Бүгінгі сапарымызда кейіпкеріміздің кәсібінен түйгеніміз осы.&nbsp;Ақтоты ЕРЖАНҚЫЗЫ

Қайтарымсыз грант алып, кәсібін дөңгелеткен

&nbsp;<a href="https://kyzylorda-news.kz/">Kyzylorda-news.kz</a>&nbsp; Ауыл – береке-бірліктің ордасы. Мұнда кәсіппен айналысамын деушілерге қолайлы жағдай жасалған. Яғни кәсіптің қай түрін қолға аламын десеңіз де, мемлекет тарапынан берілетін қаржылай қолдау бар. Жалағаш ауданына қарасты шалғай ауыл Аққырда тұрса да ата кәсіпті жалғастырып, мал басын көбейтіп, кәсібін дамытып отырған жанның бірі – аққырлық Нұрбол Тайымбетов.&nbsp;Бала күнінен ата кәсіпке бейім болған кейіпкеріміз былтыр «Бизнес Бастау» бағдарламасы аясында 1 млн 255 мың теңге қайтарымсыз грант жеңіп алып, өз кәсібін бастаған.&nbsp; Алғашында Нұрболдың төрт түліктің ішінде таңдауы жылқыға түскен. Қазргі таңда жылқыларын үй ауласында бағып, бордақылау ісімен айналысады. Ет бағытында ауылды өз өнімімен қамтамасыз ету мақсатында қораға 5 бас жылқы байлаған кейіпкеріміздің қазір 3 бас жылқысы, мен 1 өгізі бар. Алайда аққырлық Нұрбол мұнымен шектеліп қалмақ емес. Ол жыл соңына дейін тағы 3 бас жылқы әкелуді көздеп отыр.&nbsp;<blockquote>– Жылқы – атам қазақ баққан мал, оны барлық қазақ бағуы тиіс. Мен осы атакәсіп арқылы отбасымды асырап, табыс тауып отырмын. Бұл жылқыларды бордақылап, ауыл тұрғындарына келісі 2300 теңгеден өткіземін. Ауыл тұрғындарынан артылған жағдайда ғана көршілес ауылдар мен Қызылорда қаласындағы тұтынушыларымды етпен қамтамасыз етемін, – дейді Нұрбол Досболұлы.&nbsp;</blockquote>Тынымсыз тірлігі жемісін берген&nbsp; кейіпкеріміз тек мал бордақылаумен ғана шектелмейді. Ол ала жаздай жылқы сауып, саумал сатады. Айтуынша, күніне 7-8 тұтынушы келеді. Оның ішінде ауыл тұрғындарынан бөлек көршілес ауылдардан да келетін ағайындар бар.&nbsp;Иә, тірліктің көзін тауып, төрт түліктен табыс тауып отырған бұл отбасы атакәсіпті өрістетуді бір жолға қойған. Яғни олар сиыр сүтінен құрт жасап, арнайы тапсырыс та қабылдайды.&nbsp;«Мал баққанға бітеді» демекші, жыл басынан бері 12 мал бордақылап сатқан ол алдағы уақытта кәсібінің көкжиегін кеңейтуді көздеп отыр. Осы ретте кейіпкеріміз алдағы уақытта ет бағытындағы асыл тұқымды ірі қара әкелмек.&nbsp;<blockquote>– Жалпы бордақылауда малды сапалы ет пен майды көп алу үшін сояр алдында жемге байлап, қолдан семіртеді. Бордақылау мерзімінің ұзақтығы түліктің түріне, малдың жасына, бастапқы салмағы мен қоңына байланысты. Мысалы, қоңы орташаларын 35-45 күн, қоңы төмендерін 50-60 күн бордақылайды. Бұл кезде жылқы тәулігіне орташа есеппен 1-1,5 келі салмақ қосады. Дені сау мал тез қоң алып семіреді. Сондықтан бордақылауға қойылған мал бақылауда болуы қажет, – дейді кәсіпкер.</blockquote>Атакәсіпті жанына арқау еткен бұл отбасының мақсаты айқын. Мемлекет тарапынан берілетін қолдау арқылы «екі қолға бір күрек» тауып, кәсібін жүргізуде. «Мал бордақылау кәсібі ауылдағы ағайынға таптырмас тірлік» деген Нұрболдың жүйелі жоспары кезең-кезеңімен орындалып жатқандай. Әрине, ол үшін маңдай термен адал еңбек еткені көрініп-ақ тұр.&nbsp;<blockquote>– Ауылда мал шаруашылығымен айналысу өте қолайлы. Бүгінде кәсіп бастаймын деген жастарға мемлекет тарапынан берілетін қолдау да жеткілікті. Ол үшін қолдан келетін іспен шұғылдануға бейім болу қажет. Ауылда мал бордақылаумен айналысатындар баршылық. Барлығы сапаға жұмыс істейтін азаматтар, – дейді ауыл әкімі Жаңабек Матаев.</blockquote>Кейіпкеріміз тұтынушылар тарапынан әсіресе жылқы етіне сұраныс жоғары екенін айтады. Көбіне той-томалақта тұтынушы таңдауы жылқы етіне түседі екен.&nbsp;<blockquote>– Жылқыны ата-бабамыз «жесең – ет, ішсең – қымыз, мінсең – көлік» деп жан-жақты бағалаған. Расында дәруменнің бәрі жылқының бойында. Оның емі талай ауруға ем. Жылқы еті иммунитетті көтеретін күшке ие. Жылқыларды құнарлы ас-сумен қамтамасыз етіп, тек дәмді емес, денсаулыққа пайдалы өніммен де халықты қуантып жүрміз, – дейді іскер азамат.&nbsp;</blockquote>«Еңбек еткенге бақыт басын иеді» демекші, бүгінде Аққырда кәсіпке бет бұрғандар қатары көп. Бүгінгі сапарымызда заман талабына сай кәсіпке бейімделген іскер азаматтардың тіршілігін көріп, көңіліміз марқайды.&nbsp;Ақтоты ЕРЖАНҚЫЗЫ

Жалағашта бизнес бастау жобасының нәтижесі көп

<a href="https://kyzylorda-news.kz/">Kyzylorda-news.kz</a> Жыл басынан бері «Даму» қоры арқылы Қызылорда облысының шағын және орта кәсіпорындары 1 508 жоба қолдау тапты. Оның ішінде субсидиялау бағыты бойынша 852 жоба, кепілдік беру бағыты бойынша 582 жоба, жеңілдікпен несиелеуде 74 жоба қаржыландырылды.<blockquote>– «Даму» Қоры субсидиялау, кепілдік беру және жеңілдікті қаржыландыру құралдары арқылы шағын және орта кәсіпкерлікке қолдау көрсетеді. Субсидия құралының шарты бойынша кәсіпкерлердің несие мөлшерлемесінің бір бөлігін мемлекет «Даму» Қоры арқылы өтеп береді. Нәтижесінде қарыз жүгі жеңілдеп, ай сайынғы төлемдер азаяды. Бұл «Даму» Қоры жүзеге асырып жатқан субсидия құралының тиімді екенін көрсетеді. Кәсіпкерлер несиенің төлемінен үнемдеген қаражатын кәсіпорынның дамуына жұмсай алады. Кепілдік құралы несие алу үшін банктер талап ететін кепіл болмаған кезде бизнесті ашуға немесе дамытуға мүмкіндік береді. Қызылорда облысында 2010-2023 жылдар аралығында мемлекеттен қолдау алған кәсіпкерлер 4 мыңнан астам жаңа жұмыс орнын ашты, ал бюджетке түскен салық 136 млрд.теңгені құрады», - деп атап өтті «Даму» Қорының Қызылорда облысы бойынша филиалы директорының орынбасары Руслан Сламхан.</blockquote><img src="https://knadmin.beoblood.kz/uploads/Memleketten_oldau_al_an_k_sipkerler_4_my_nan_astam_zh_mys_ornyn_ashty_1_8131cd4732.jpg" alt="Мемлекеттен қолдау алған кәсіпкерлер 4 мыңнан астам жұмыс орнын ашты 1.jpg"><img src="https://knadmin.beoblood.kz/uploads/Memleketten_oldau_al_an_k_sipkerler_4_my_nan_astam_zh_mys_ornyn_ashty_2_28ad1cdd7d.jpg" alt="Мемлекеттен қолдау алған кәсіпкерлер 4 мыңнан астам жұмыс орнын ашты 2.jpg"><img src="https://knadmin.beoblood.kz/uploads/Memleketten_oldau_al_an_k_sipkerler_4_my_nan_astam_zh_mys_ornyn_ashty_3_3a2fa335bb.jpg" alt="Мемлекеттен қолдау алған кәсіпкерлер 4 мыңнан астам жұмыс орнын ашты 3.jpg">

Мемлекеттен қолдау алған кәсіпкерлер 4 мыңнан астам жұмыс орнын ашты

<a href="https://kyzylorda-news.kz/">Kyzylorda-news.kz</a> Бүгінде «Ауылда істейтін жұмыс жоқ, не ашатын кәсіп түрі жоқ» деп қалаға қарай қашатын жастарымыз көп-ақ. Дегенмен бұл пікірмен келіспей, аядай ғана ауылда мал бағып, тіршілігін дөңгелетіп, жастарға үлгі болып отырған жандар жетерлік. Солардың бірі – Рахима Жақсымова. 25 жылдан бері ата кәсіпті үзбей, төрт түліктің төресін бағып, төл сусыннан табыс тауып отырған Ойнаровтар шаңырағына Жалағаш ауданына қарасты Аққыр елді мекеніне жасаған сапарымызда аялдадық.&nbsp;Амандық саулық сұрасып, келген жөнімізді айтып тұрғанда қора жақтан енесіне боздаған ботаның дауысы естілді. «Түйе сауатын уақыт болды дер кезінде келдіңдер» деп қолына шелегін алған Рахима апа немерелерін ертіп, қораға қарай бет алды. Бізде түйені қалай сауатынын көргіміз келіп, артынан ере кеттік. Халыққа ұлттық сусынды ұсынып жүрген кейіпкеріміз шаруаға ширақ жан екенін бірден аңғартты. Қораға кіргеннен түйеге қарай ботасын жіберген кейіпкеріміз түйенің артқы аяғын байлап, сүтін сызылдатып сауған күйі әңгімесін бастады.<blockquote>– Иә, мал шаруашылығы қазақтың қанында бар, жанымызға жақын кәсіп түрі ғой. Жалпы түйенің пайдасы өте көп. Бір ғана сусыны мың түрлі ауруға ем. Аудан орталығынан алыс орналасқан ауылда тұрсақ та шұбатты сату жағынан еш қиындық жоқ. Көршілес ауылдардан, аудан тұрғындарынан да жиі тапсырыс түседі. Одан бөлек, шұбатым облысқа дейін барып, әсіресе биыл Алматы, Ақтөбе қалаларына арнайы тапсырыспен бірнеше рет жібердім. Кейде ауыл тұрғындарынан артылмай қалады. Тұтынушылар көбіне той-томалақтарға, емге алдын-ала тапсырыс беріп қояды, – дейді Рахима Тәуекелқызы.&nbsp;</blockquote>Оның айтуынша, түйенің басқа малдардан ерекшелігі, асып бара жатқан бейнетінің жоқтығында. Жолдасы мен баласы түйелердің жем-шөбін беріп, қарайласса, өзі шұбат сатып, қосымша табыс тауып отыр. Атасы негізін қалап кеткен кәсіпті бүгінде жолдасы жалғап отырғанын айтқан кейіпкеріміз, келекшекте ұлының мемлекеттен қолдау берілсе, кәсіптерінің көкжиегін кеңейтсем деген үлкен жоспары барымен бөлісті. Келініне түйе сауып, шұбат ашытудың қыр-сырын үйретіп, шаруаға баулудан жалықпаған Рахима апа, кәсібін жүргізуде жалғыз емес, ол үнемі қолғабыс етер отбасының барымен мақтанады.Қазір ғана 2 түйені сауып болған кейіпкеріміздің айтуынша, бұдан бөлек олардың өрісте жайылып жүрген сегіз түйелері бар. 2 түйені үш мезгіл сауып, одан күніге 10 литрдей өнім алып отырған ол, 10 түйені сауғанда тәулігіне 40 литрден жоғары өнім алатынын айтады. Бүгінде ол шұбаттан бөлек, қолдан құрт жасап та сатады. Айтуынша, табиғи таза өнім болғандықтан арнайылап алдын ала тапсырыс беріп қоюшылары көп.<blockquote>– Ертеректе шұбатты торсықта немесе ағаш күбіде ашытқан. Шұбатқа арналған торсықты түйе мойнағынан жасайды. Шұбат ашығаннан кейін оны адамға ұсынар алдында шайқап, көпіршігін жақсылап араластырып береді. Бұл түлік суды аз ішетіндіктен сүті майлы болып келеді. Шұбаттың құрамында май, әртүрлі витаминдер өте көп. Сондықтан оны халық көбіне емдік мақсатта ішеді. Жасы ұлғайған қарттар, қандай да бір сырқат түрімен ауырған науқастар шұбатты ішкеннен кейін ұйқысы жақсарып, сергіп, ақырындап науқасынан айығады, – дейді кейіпкеріміз.&nbsp;</blockquote>Айта кетейік, Рахима апа өнімдерін сатып қана қоймай, дертіне шипа іздеген науқастарды тегін шұбатпен қамтамасыз етіп, алғысына бөленіп жүрген мейірімді жан.«Арнайылап ауылға ат басын бұрып келген екенсіңдер, үйге кіріндер» деп төрін ұсынған Рахима апаның шұбатынан дәм тату бізге де бұйырды.Иә, кейіпкеріміздің шұбаты жұрт мақтағандай-ақ ерекше, қою екен.&nbsp;Төрт түліктен табыс тауып отырған Ойнаровтар отбасы бүгінде істің қиюын келтіріп жүргеніне сүйсініп, кәсіптеріне береке тілеп қоштасқалы тұрғанымызда, «үйіме құтты қонақ келіп қалды, 5 литр шұбат бар ма?» деп ентігін баса алмай асығып келген ауыл тұрғынымен кездесіп қалдық.&nbsp;Рахима апа тұтынушы сұраған шұбатын дайындап бергенше ауыл тұрғынын әңгімеге тарттық.&nbsp;<blockquote>– Өздеріңіз білетіндей, шұбат бойға қуат, дертке дауа. Мен Рахиманың тұрақты тұтынушыларының бірімін. Өзімнің және отбасымның саулығы үшін, жиі шұбат алып тұрамын. Рахиманың шұбатының дәмі тіл үйіреді. Шөлімізді басып қана қоймай, біраз ауруға ем ретінде де қолданамыз. Ал қазір үйіме алыстан жақын туыстарым келіп қалды. Қаланың тұрғындарына ауылдың табиғи өнімінен дәм таттырайын деген оймен осында жүгіріп келдім. Үйімізге қандай қонақ келсе де, дастарханымызда міндетті түрде Рахиманың&nbsp;шұбаты тұрады, – дейді ауыл тұрғыны Қамар Тоқсанова.</blockquote>Ата кәсіпті алға қарай жылжытып, түйе байлап, шұбат баптаған бұл отбасының күнделікті тіршілігі осындай. Ауыл тұрғындарының бірі дертіне шипа тауып, алғысын жаудырса, енді бірі қаладан келген қонаққа ауыл өнімін мақтанышпен ұсынып, бір марқайып қалады. Бүгін сапарымызда&nbsp;ауылдың табиғи өнімінің дәмін татып, ауыл тұрғындарының кәсіп тынысымен танысып қайттық.&nbsp;Ақтоты ЕРЖАНҚЫЗЫ

Рахима Жақсымова: Түйе баққанның табысы мол

<a href="https://kyzylorda-news.kz/ru">Kyzylorda-news.kz</a>&nbsp; Бұл туралы Орталық коммуникациялар қызметінің брифингінде жасаған баяндамасында Қызылорда облысының әкімі Нұрлыбек Нәлібаев айтты.Ауылдардың мамандануын ескере келе, несие қаржысы 4 бағытқа (ауыл шаруашылығы өнімдерін өңдеу, егіншілік, мал шаруашылығы және түрлі жобаларға) бағытталып, 2023 жылы 3 млрд. теңгеге 406 жоба іске қосылып, 713 жұмыс орны ашылды.«Биыл 4 млрд. 596 млн. теңгеге 575 жобаны жүзеге асырып 610 жаңа жұмыс орнын ашу жұмыстары жүргізілуде. Бүгінгі күні 1 млрд. теңгеге 150 жоба қаржыландырылды», - деді Н.Нәлібаев.Сырдария ауданының «Бесарық» ауылындағы «Абай Дәулет» ЖШС құрған өндірістік алаңда тұрғындардың 13 бизнес-бастамасы іске асырылуда. Мұнда жартылай фабрикат, пластикалық ыдыстар, ағаш бұйымдар, тоқыма, сабын, кондитерлік өнімдер өндіретін цехтар ашылды. Озық тәжірибені кеңінен тарату үшін облыстың әр ауданындағы 3-4 ауылда осындай бизнес-инкубаторлар ашу жұмыстары жүргізілуде.«Kaz Fries» зауытының қуаты сағатына 150 келіге дейін қуырылған картоп таяқшаларын өндіруге жетеді, дайын өнім мұздатылып, ішкі нарықта сатылады. Өсімдік, құс, мал шаруашылықтарымен, құрылыс тауарларын шығарумен айналысатын көпсалалы компанияның өндірістік қуатын одан әрі кеңейту жоспары бар. Дәл осындай жобаны облыстың барлық аудандарында жүргізу көзделуде.

«Ауыл аманаты»: биыл Қызылорда облысында 575 жоба жүзеге асырылды

<a href="https://kyzylorda-news.kz/">Kyzylorda-news.kz</a> Қазалы ауданына қарасты Бозкөл – ауылына кемі бір сағатта зыр етіп жетуге болады. Баяғыдай емес, тақтайдай тегіс жол сапарлатқандарды шаршатпайды. Әңгіме үстінде қалай тез жеткеніңізді де байқамай қаласыз. Бұнымен аудандағы жұмыс сапасының жүйелі атқарылып жатқандығы байқалады. Тек екі ортаны бөліп тұрған дария үстіне көпір салудың қажеттігі жолаушылардың шымбайына батып тұр.Бүгінде Бозкөлде 1000-ға жуық адам тұрады. Оның 500-ге жуығы жұмыспен қамтылса, 52-сі жеке кәсібін дөңгелентіп отыр. Ауылда 175 үй бар. Бозкөлдіктер өте еңбекқор, ісіне адал жандар қатарынан. Әрқайсысы өз тірлігін шыр айналдыруда. Әрбір әулет ата-кәсіптен қол үзбей табиғи өнімді дастарқан мәзірінен үзбейді. Солардың ішінде төрт түлікті түлетіп, түйе сауып отырған Берік Досжановты айрықша айтуға болады. Ол өз қаражатына осыдан 15 жыл бұрын түйе алып, осы күні 12 басқа жеткізді. Оны сауып, шұбатын ішіп, құрт пен майын асқатық қылады. Мейман болып келгендерге ағарғанды ұсынудан ләззат алады. Қонақ келсе, қозы сойып, қазан қайнатады. Содан да болар Құдай бұл шаңыраққа береке мен ризықты ерекше үйіп-төгіп береді. Қорада сиыр мен жылқы, қой да, ешкі де бар. Оның жем-шөбін таситын Зил жүк көлігі жүріп тұр. Бұл жүк көлігімен ауылға көмір мен құм және қажетті құрылыс өнімдерін тапсырыспен жеткізеді.Бұдан бөлек арнайы тегістейтін, тазалайтын, қазатын тракторға қол жеткізген. Мұнымен Бозкөл тұрғындарының біраз шаруасын атқарады. Ал ауыл халқы болса, оған ақ батасын беріп, алғаусыз алғысын жаудырады. Жаңбырменен жер көгеріп, батаменен ел көгеретіндей, Берік жан жары Венера Жайылғановамен жиырма жыл отасып, 6 баланы тәрбиелеп отыр. Венера да өз ісін жүргізіп жүр. Күніге 50 нан пісіріп, тапсырысқа булочка, самса, пицца, беляши, пирожки сынды түрлі дастарқанға қоятын өнімдерін ұсынады.&nbsp; Биыл алтынқұрсақты ана қайтарымсыз грантқа қол жеткізді. 1400000 теңге алып, қажетті құрал-жабдығын толықтыруды жоспарлауда. Алдағы уақытта ауласында цех тұрғызып, қызмет аясын және азық өнімін көбейтуді көздеуде. Бозкөлден тыс, Кәукей, Лақалы және жақын ауылдардан тұрақты тұтынушылары баршылық. Нанға деген сұраныс үзілмейді. Қайта таусылып қалса да іздеушілер хабарласып тұрады.&nbsp;Венераның бос уақыты жоқ. Жатарда қамыр илеп әзірлесе, таң атпай тұрып соны пісіреді. Арасында отбасы мүшелеріне ас-ауқатын әзірлейді. Кешке түйе, сиыр ­сауады.&nbsp;<blockquote>– Қазір кәсіппен шұғылданамын деушілерге мүмкіндік мол. Тек ықылас пен талпыныс болса жеткілікті. Қалғаны тәжірибемен келеді. Нан пісіруді анамнан үйрендім. Бала кезде тапаға нан салып, шоққа көміп дайындайтынбыз. ­Ауылдастар наның дәмді, сыры неде деп сұрап жатады. Еш құпиясы жоқ. Кәдімгі су мен тұзға илеймін. Илеуінде ғана ерекшелік болмаса, себебі қамырдың әбден иін қандыруға тырысамын. Әркез ісімді жақсы көңіл-күймен атқарамын. Өйткені сенің жақсы ойыңнан асың да ерекше дәммен әзірленеді. Сыры тек осы ғана деп ойлаймын. Аулаға өзімізге қажетті қияр, қызанақ сынды жазғы көкөністерді еккенбіз. Балаларды да еңбекке баулимыз. Әулетімізде ешқайсымыздың бос уақытымыз болмайды. Барынша тиімді өткізуге атсалысамыз. Соның нәтижесінде табыс та табамыз. Құр жатсаң ешкім қаражатынан әкеп бермейтінін жақсы түйсінеміз. Балаларды масылдықтан қашық болуға бейімдеп келеміз. Баланы аясаң аяма деген қағиданы жалпы бозкөлдіктер болып қатаң ұстанамыз. Оларды еңбекке баулуға тәрбиелейміз, – дейді көпбалалы кәсіпкер ана.</blockquote>Қазір берекелі шаңырақта Бекжан, Мағжан, Ерасыл, Айша және Мұсахан мен Исахан есімді егіз балалар өсіп келеді. Олар ата-анасына қолғабыс көрсетіп, отбасылық кәсіпте көмектесуге әзір. Айнұр ҚАЗМАҒАМБЕТОВА

Қазалы: отбасылық бизнесті өркендеткен

<a href="https://kyzylorda-news.kz/">Kyzylorda-news.kz</a> &nbsp;Заман талабына сай, халықтың сұранысына қарай кәсіп ашу бүгінде жақсы жолға қойылған. &nbsp;Ең бастысы ниет пен іскерлікке, қаржыға байланысты. Қандай да болсын кәсіпті қолға алып, дамытамын деген адамға мемлекет тарапынан көптеген көмек көрсетілуде. Қазақтың ұлы ақыны Абай Құнанбайұлы «Неге арналсаң, соны істе» деп бекер айтпаса керек-ті.Сырдария ауданына қарасты берекелі Бесарықта жұмыстың көзін тауып, жеке кәсіппен айналысып жатқан кәсіпкер жетерлік. Сондай жанның бірі де бірегейі – Гүлзира Рсым. Бүгінде ерекше кәсіп иесі бір рет пайдаланатын жұмыс қолғабын шығаруды бастады. Кәсіпкер «Қызылорда» өңірлік инвестициялық орталығы» микроқаржылық ұйымы» ЖШС-нің ауыл­шаруашылық өнімдерін өңдеуді дамытуға арналған пилоттық жоба арқылы қаржылық қолдау тапқан.<blockquote>– Негізі бұл кәсіпті бастауды жолдасым екеуі­міз біраздан бері ойланып жүр едік. «Көз – қорқақ, қол – батыр» демекші, ойлана келе тұрмысқа қажетті бір рет қолданатын қолғап шығармаққа бекіндік. Өйткені қазіргі таңда қалада көпқабатты үйлер салынып, құрылыс жұмыстары қарқынды жүргізілуде. Сондай-ақ ауыл тұрғындары да шаруа­шылыққа көптеп қажет етеді, әрі қолданады деп ойлаймыз. Осылайша құжаттарды реттеп 6 млн теңге несие алдым. Кәсіпті бастағанымызға бір айдай уақыт болды, – дейді кәсіпкер Гүлзира Ерназарқызы.</blockquote>Өз кәсібін бастаған ерлі-зайыптылар 2,5 мил­лион­ға «JOMDA» қолғап тоқитын екі тігін машинасын алса, 1 миллион теңгеге жұмсақ жібек жіп, резинка алған. Қолғапқа қажетті заттарды Қытай мемлекетінен тапсырыспен алдыруда. Тігін машинасы сағатына 10 жұп қолғап шығарса, екі тігін машинасы 20 жұп, бір күнде 230-250 жұп, аптасына 1500 қолғап шығаруға болады екен.<blockquote>– Қолғап таза мақтадан тігілген соң қолды терле­тіп, аллергия тудырмайды. Бір рет қолдануға арналғандықтан, бағасы да арзан. Бір жұбы – 80 теңге. Ал базарда мұндай қолғаптың бағасы ең төменінің өзі 100-110 теңгені құрайды. Бұл қолғап құрылыста, шаруашылық жұмысын жасағанда қолды сүйелденуден, жарақаттан сақтайды. Қазір өнімді өткізудің жолын қарастырып жатырмыз және алға қойған жоспарымыз да көп. Егер жасап жатқан кәсібіміз дөңгеленіп кетсе, дәнекерлеу, балқыту секілді құрылыс жұмысына киетін, мал терісінен тігілген қолғап шығару да ойда бар. Сондай-ақ арнайы жұмыс киімін тігу жоспары­мызда бар, – дейді кәсіпкерге қолдау білдіріп жүрген жұбайы Самат Ақпамбетов.</blockquote>Кәсіп нан сұрамайды, өзі тамақтандырады. Жұмысын жақын арада бастағанына қарамастан бүгінде тұрақты тұтынушылары да бар. Сонымен қатар кәсіпкер облыстағы құрылыс фирмаларымен келісім жасауда. Ал қолғапты сатып алып пайдаланған ауылдастары өз ризашылықтарын білдіруде.Шаруасын жүргізіп, бір-біріне қолдау білдіріп отырған жұбайлар ауыл балаларын біліммен сусындатып жүрген ұлағатты ұстаздар. Білімнің қарашаңырағы №147 орта мектептің білікті мамандары Гүлзира Рсым мен Самат Ақпамбетов бүгінде 5 бала тәрбиелеп отырған үлгілі отбасы. Үлкені ата-анасының жолын қуып ағылшын-қытай мұғалімі мамандығында оқып жатса, үшеуі оқушы, кенжесі балабақшаға барады.Кәсібін бастауға мемлекет тарапынан қолдау тауып, оны іске асырған берекелі шаңырақтың отағасы мен отанасының алға қойған жоспары анық, мақсаты айқын.Таңшолпан ШАНЖАРХАНОВА

Ерекше кәсіп иесі

<a href="https://kyzylorda-news.kz/">Kyzylorda-news.kz</a> Жаңақорған ауданында арнайы сала мамандарының қатысуымен &nbsp;кәсіпкерлікті қодау мақсатында арнайы басқосу өтіп, осы тұрғыда бірқатар ақпараттар берілді. Жалпы Жаңақорғанда шағын кәсіпкерлікке мемлекеттік қолдау тетіктерінің саны артпаса кеміген емес. Мамандар жеңілдетілген пайыздық несие, қайтарымсыз қаржы және субсидия биыл да жалғасын табады дейді. Елдегі төтенше жағдайға байланысты сәл кешеуілдеген бағдарламалар араға көп уақыт салмай қайта жанданбақ.Мемлекеттік жобаларды жүзеге асыруда облыс бойынша Жаңақорған ауданы алдыңғы қатарда. Яғни несие алу мен грантқа ие болуда аймақта көш бастап тұрмыз. Әрине қуанатын жағдай, бірақ келелі іске көлеңке түсіріп тұрған кемшіліктер де жоқ емес. Аз пайызбен несие және грант алғандар қатарында мақсатсыз қаржы жұмсағандар анықталып, сотпен өндірілуге шешім шыққан деректер де бар. Мұндай жағдайларды аймақ басшысы да тікелей назарында ұстап келеді.Басқосуда Қызылорда облысы кәсіпкерлер палатасы және өңірлік кеңес мүшелері аудандағы бизнес өкілдеріне түсіндірме жұмыстарын жүргізіп, ұсыныстарын тыңдады. Аудан әкімінің орынбасары Бектас Нұрдиновтің қатысуымен өткен жиында облыстық кәсіпкерлер палатасының директоры Пірмұхаммед Сыздықов модераторлық етті.Жиынға қатысушылар алдымен жергілікті кәсіпкерлердің қолынан шыққан бұйымдарынан жасақталған көрмені тамшалады. Онда тігін және қолдан тоқылған тұрмыстық бұйымдардан бөлек бисер және сәндік әшекейлер мен қолдан пісірілген дәмге толы дастархан мәзірі, құрылысқа қажетті жабдықтардан құралған бұйым өзіндік сән-салтанатымен көз тартты. Басқосуда сөз алған Бектас Балғабайұлы жиынның мән-мақсатын түсіндірді. Өз кезегінде палата директоры аймақта кәсіпкерлік саласында нәтижелі жұмыс бар екенін атап өтті.<blockquote>– Сыр өңірі соңғы жылдары кәсіпкерлік саласында жақсы нәтиже көрсетуде. Отандық өнім өндіруде бәсіміз артып, шағын кәсіптің шырайы кіріп келеді. Бұл нәтижеге қол жеткізуде мемлекеттен көрсетілетін қолдауды тиімді ұйымдастырып отырған кәсіпкерлер палатасын іске ынталы азаматтардың ортақ шаңырағы деуге болады. Кәсіпкерлермен тығыз қарым-қатынас орнатып, консультативті кеңес, бағыт-бағдар беруге тырысамыз. Бүгінде өңірлік кеңестің құрамында жиырмаға жуық маман бар. Қолымызға келіп түскен жобаларды жан-жақты сараптап, болашағы бар бизнестің түріне барынша қолдау көрсетеміз. Екіншіден, олардың құқығын қорғауға мүдделіміз. Сайып келгенде, жергілікті өнім көлемін көбейтіп, экспортқа кең жол ашуға тиіспіз, – дейді палата директоры.</blockquote>Ол одан әрі экспортқа жол тартқан бренд тауарлар жөнінде тоқталды. Осы орайда Жаңақорғанда өндіріліп өңіріміздің дүкендері сөрелеріне жайғасқан кір сабын, әжетхана қағазы, гипс өнімдеріне жоғары бағасын берді. Аграрлы саланың ауқымы кең, мал өнімдері мен егіндік дақылдардың шет ел асып жатқанына қуанамыз. Енді үлкен сұранысты ұлғайту мақсатында шағын кәсіпті кеңейту аса маңызды. Бұл іске демеу болатын бағдарламалар жөнінде «Қазпошта» АҚ Қызылорда облыстық филиалы директорының орынбасары Айзат Ізтілеуова баяндады. Бұл бағытта негізінен онлайн платформасы аса маңызды, яғни онлайн дүкендерде электронды сауда қызып тұр. Түрлі мекемелер, тіпті брендтегі компаниялар тауарларын пошта қызметі арқылы алуға толық мүмкіндік бар. Тасымалдау құны да қолжетімді.– Онлайн сауда тек өңіраралық қана емес, әлемдік нарықта да ыңғайлы екенін көрсетті. Осыған орай Астана қаласында үлкен логистикалық хаб ашылды. Бұл бастамасы, тағы үш-төрт аймақтан ашу жоспарда бар. Біздің тарапымыздан саудагерлерге де, тұтынушыларға да тиімді бағдарламалар, жаңа жобалар енгізілуде. Соның бірі – маркетплейс қосымшасы. Бұл арқылы сатушы да, сатып алушы да қосымша қаражат жұмсап шығындалмайды. Түйіндей айтқанда, электронды саудаға қазір алтын көпір дерліктей деңгейде қызмет жасап отырмыз, – деген «Қазпошта» АҚ Қызылорда облыстық филиалы директорының орынбасары Айзат Өмірзаққызының айтуынша, тұтынушыға тауар ұнамай қалған жағдайда кері қайтару қызметін үйлестіруді де мекеме өз жауапкершілігіне алып отыр екен.Облыстық кәсіпкерлік және өнеркәсіп басқармасының кәсіпкерлікті дамыту және қолдау бөлімінің бас маманы Алуа Есіркеп әлеуметтік кәсіпкерлік санаттар бойынша түсінік берді. Бұл тақырыпта әлеуметтік деңгейге көбірек мән беріледі. «Әлеуметтік кәсіпкерлік санат төрт топқа бөлінеді. Бірінші кезекте мүмкіндігі шектеулі азаматтарға қолдау білдіруге бағытталған. Осал топтарға жататын тұлғаларды жұмыспен қамту, олар өндіретін өнімге қолдау көрсету, демеу болу, олардың жеке бастарына жәрдемші болу және психикалық-педагогикалық қолдау көрсетуге бағытталған. Осы санаттар ішінде алғашқысы сәл жеңілірек. Өйткені жарымжан жандар, көпбалалы аналар, тұрғылықты жері жоқ немесе пробациядағы азаматтарды жұмысқа орналастыру өзге санаттарға қарағанда жылдам жүзеге асады. Қалай дегенде де кәсіпкер төрт санаттың біреуі бойынша өтінім білдіруі керек. Егер комис¬сия мақұлдаса онда кәсіпкер қажетті қолдауын ала алады» дейді жауапты маман. Иә, бұл кәсіп бастауға ынталылар үшін табыс көзі, қарапайым халық үшін жұмыссыздықты шешудің тетігі болмақ.«Ауыл аманаты» кімдерге тиімді?Келесі кезекте ауылшаруашылығы кооперациясы және экспорт бөлімінің басшысы Гүлмира Исабергенова «Ауыл аманаты» жобасы аясында ақпаратқа қанықтырды. Қазіргі кәсіп бастаушылар мен шағын ісін ілгерілетушілерге бұл бағдарламаның берері көп. Аталмыш бағдарлама арқылы қызылордалықтар былтыр 3 млрд теңгеге қол жеткізіп, 700-ден аса жұмыс орны ашылған. Берілген рұқсат бойынша 406 жоба қаржыландырылыпты. Оның ішінде басым бөлігі мал шаруашылығына бағытталған. 216 жоба агроөнім өңдеу, егіншілік, ауылшаруашылығы техникасын алу және мал шаруашылығына бағытталған. Сондай-ақ, ауыл шаруашылығы өндірістік кооперативтер жал¬пы 716 млн теңге несиеге ие болған екен. 51 өндірістік кооператив құрылып, соның 31-і ғана төмендетілген пайыздық несие алыпты. Ал, биылғы меже қандай?<blockquote>– Биыл Сыр өңіріне 4 млрд 596 млн несие беру көзделіп отыр. Бұл қаржыға 575 жоба мақұлданады. Оның ішінде ауылдарға басымдық беріледі. Былтыр 106 жоба елді мекен кәсіпкерлерне берілсе, биыл олардың саны 146-ға жетті. 600-ден аса жұмыс орны құрылып, шағын кәсіпкерлікке үлкен қолдау болады деген үміттеміз, – деді Гүлмира Рахымжанқызы.</blockquote>Жауапты маман аудандардағы мәліметті салыстырып берді. Биыл қорғалатын жобалардың көбі Жаңақорған мен Шиелі ауданына тиесілі екен. Қос ауданға бөлінгелі тұрған қаржы көлемі 1,5 млрд теңгеге жуық. Жобаның саны 200-ден асады. Осы орайда аудандағы жауапты өкілдер, сала мамандары қорғалуға ұсынылатын 305 жобаның құжаты дайын екенін айтты. Жалпы «Ауыл аманаты» бағдарламасы өте тиімді жоба. Жобаға байланысты аймақ басшысы да қатаң талабын қойған болатын. Әсіресе, мал басын көбейтуге байланысты қатаң тексеруді талап етті. Оның себебі де жоқ емес, несие болсын, қайтарымсыз қаржы болсын мал басын көбейтуге берілген ақша өзге мақсатқа бұрылып кетпеуі керек. Ауданға берілетін 100 жобаның тең жартысынан көбі мал бағытына ойысуы мүмкін. Аграрлы салаға бет бұрсақ ұтылмаймыз.Қызылорда облысы бойынша мемлекеттік кірістер департаментінің түсіндіру жұмыстары мен байланыс орталығы басқармасының басшысы Гүлсара Қарымсақова салық жүйесі бойынша ережелерге тоқталды. «Даму» кәсіпкерлікті дамыту қоры АҚ бағдарламаларды жылжыту бойынша бас менеджері Салтанат Абдуллаева «Бірыңғай кешенді бағдарлама» бағытында субсидия, шағын несие мен әлеуметтік кәсіпкерлікке қолдау туралы жан-жақты түсіндірді.Аграрлы сала қолдау күтеді«Аграрлық несие копорациясы» АҚ Қызылорда филиалының несиелендіру бөлімінің бас маманы Айбек Дүйсенов өнімдік бағдарламаларға тоқталды. Өнімдік бағдарламалар ішінде 4 бағыт қарастырылған. «Кең дала», «Агробизнес», «Іскер» және «Жастарды микроқаржыландыру».<blockquote>– «Кең дала» қолдау қоры көктемгі дала жұмысы мен егін жинау науқанына арналған. «Агробизнес» жобасы аграрлы саланың барлық бағытына, атап айтқанда құрал-жабдық сатып алуға, айналым қаражатын толтыру мен құрылыс монтаждауға беріледі. «Іскер» қаржылай қоры Еңбек және жұмыспен қамту бағдарламасының 2021-2025 жылдарға арналған жол картасы аясында өнім өндіруге қолдау білдіреді. Жастарды қаржыландыру бағытына 21-мен 34 жас аралығындағы барлық кәсіп иелері тартылады, тек бағыты айқын, құжаты түгел болуы керек, – деді Айбек Малкайдарұлы.</blockquote>Бұл бағдарлама ауылшаруашылығы саласына арналған барлық кәсіп түрлерін қамтиды. Бұл бағытта жаңақорғандықтардың талапты бастамалары көңіл қуантады. Жиын соңында аудандық полиция бөлімінің көші-қон қызмет тобының инспекторы Бақтияр Нұрманов қысқаша түсіндірме жасады.Кәсіпкерлік саласындағы мемлекеттің қолдауы осылай көрініс тапты. Басты міндеті – отандық өнімнің көлемін арттырып, әлеуметтік мәселенің оң шешілуін толық қанағаттандырып, жұмыссыздықты азайту. Кәсіп бастауға ынталы және мемлекеттік бағдарламаны жіті меңгергісі келетін тұлғалар «Атамекен» ұлттық кәсіпкер¬лер палатасы директоры Асылжан Жолдасбаевқа жолығуына болады.&nbsp;Әлібек ЖАРЫҚБАЕВ &nbsp;

Кәсіпкерлікке қолдау қашан да бар 

<a href="https://kyzylorda-news.kz/">Kyzylorda-news.kz</a> Бұрын жергілікті жұрт ауылдық жерде кәсіп ашқаннан жалақыға жұмыс істегенді құп көретін. Қазір ше, бүгінде қоғамның көзқарасы мүлде басқа, қаланың қазағы да, ауылдың қазағы да кәсіп ашып, табысын еселеуге талпынып келеді. Бұл түсінік қай жағынан қарасақ та тиімді, ауылда айлыққа жұмыс әкімдік, мектеп пен мәдениет үйінде ғана бар, мұнан кейін ауылдық емхана тағы бар. Ал шаруашылықтар күрішін жинап алғаннан кейін еңбек адамдары 4-5 ай тағы бос жатады. Мұндай маусымдық жұмыстар бірлі-жарым табылар, оның өзі санаулы. Ал қалған жұрт қайтпек керек? Міне, осынша сауалдың түйінін тарқатуда аталған саланың серпін алуы ерекше маңызға ие.Қазір бұрынғыдай емес, ауылдық жерде де кез келген өнімге сұраныс бар. «Ауылда бәрі бар» дейміз, бұл сөзге таласымыз жоқ. Шынында ауылда бәрі бар, бірақ сол баршылықты тұтынуға дейінгі өңдеу жұмысы ақсап тұр. Бір жағынан қалалық өмірге бет бұрып, қорада мал ұстап, бос жатқан жерге бақша салуға да басымыз ауыратыны тағы бар. Ал бұл – кәсіп бастап осындай шаруаларды ширатамын дегендерге таптырмас мүмкіндік.Жалағаш ауданына қарасты Есет батыр ауылында бұрыннан кәсіпкерлік саласы ілгерілеп келеді. Бірақ бір сарында, яғни кәсіп ашқан іскер азаматтардың дені күріш егеді, мал бордақылайтын. Табысын тек бір саладан тауып отыр. Бірақ соңғы жылдары Аламесекте сала айтарлықтай түрленген. Бұған дейін ауылда шаштараз ісін қолға алған кәсіпкердің жұмысын жазғанбыз. Кеше Айзат Сағызбаева ауылда бөдене өсіріп, құс шаруашылығын қолға алды. Енді бұл елді мекенде тағы бір шағын цех ашылды дегенді естіп, ауылға ат басын бұрдық.Назкен Сұлтанова бұған дейін де Есет батырда наубайхана ашуды жоспарлаған. Бұл ой ауыл тұрғынына жайдан-жай келмейтіні тағы да түсінікті. Үй шаруасына мығым батыр ана бұған дейін ауылда қарабайыр бір тапалық пешпен-ақ өз өнімін тұтынушыларға ұсынып келген. Уақыт өте сұраныс артып, ақыр соңында олардың басым бөлігінен бас тартуға тура келді. Олай болмағанда ше, бір тапалық пешпен тұтас ауыл тұрғынын өніммен қамтамасыз ету қанша ұйқтасаңыз да түсіңізге кірмейді.&nbsp;Жалпы қай істі де үйлестіру нәзік-жандылардан артылған ба, кейін Назкен Қойшыбайқызы бұл тығырықтан шығудың да амалын тауыпты. Рас, құрал-сайманың, қажетті аппараттарың сай болса, бір емес, бірнеше ауылға өз өніміңді сатуға болады. Ал мұндай мүмкіндік тек қалтасы көтеретін азаматтарда ғана болатыны тағы да түсінікті. Не керек, бұл мәселені шешіп, өз ісін өрістетуде Назкен Сұлтанова мемлекеттік бағдарламаның көмегіне жүгінген.&nbsp;Құдайдың қарасқаны дейміз бе, абырой болғанда ауыл тұрғынының жарқын жобасы қаржылай қолдау тапқан. Яғни алты баланың анасы 1 млн 476 мың теңге мемлекеттен грант алыпты. Кеше алтынқұрсақты ананың шағын цехында болып, кәсіпорынның жұмысымен таныстық. Ол мемлекет қолдауын мақсатты жұмсамаса, наубайхана ісі дәл бұлай ширамас еді. ауыл тұрғынының талабына риза болдық. Алдына мақсат қойды және сол мақсатқа жету жолында қаншама еңбектенді, бүгінде соның жемісін көріп отыр.&nbsp;<blockquote>– Ауыл да қазір қала сияқты, кез келген өнімге сұраныс бар. Осы мүмкіндікке қол жеткізу үшін алдымен іздену керек, содан кейін еңбек тағы керек. Бұл менің өмір тәжірибемде түйгенім десем де болады. Мен бұл наубайхананы ашпай тұрып тұтынушы жинағанмын. Кейін олардың қатары көбейгесін осындай кәсіп қылып отырмын. Қажетті аппараттар құны 2 млн теңгені құрайды. Мұндай қаражат ауылдағы ағайынның барлығында бола бермейді. Ал мемлекеттің гранты осындайда таптырмас мүмкіндік екен. Шыны керек, жобам жинақы әрі үлкен ізденіспен жасалды. Бізде баяғыдан қалған «Қайтарымсыз қаражат қайдан болсын?» деген таптаурын түсінік бар ғой. Сол сияқты мен де жобамның қаржылай қолдау табатынына қатты сенгенім жоқ. Абырой болғанда қайтарымсыз қаражат алдым, арты осындай үлкен іске айналып отыр, – дейді Назкен Қойшыбайқызы.&nbsp;</blockquote>Кейіпкеріміз тиісті қаражатты тойға шашып, мақсатсыз игерген жоқ. Керісінше ауылдағы ағайынның той-томалағы мен құдайы астарына жайылған дастарқанның берекесі Назкеннің өнімімен артып тұр. Ол шағын цехқа қажетті заманауи аппараттарды арнайы Алматыдан алдырған. Нан көметін үлкен пеш, қамыр илейтін, арнайы құрылғы, бәрі-бәрі бар. Тіпті әр қаліпке салынатын қамырға дейін таразыға тартылады.&nbsp;Кәсіпкер келіншек күніне екі мезгіл өнім шығарады. Түске дейін 50, түстен кейін 50 тандыр нан пісіреді екен. Негізі қыруар өнім ысырап болмас үшін ауылдағы дүкендермен жұмыс жасаған дұрыс қой. Бірақ Назкеннің нанын тұтынушылар үйден-ақ таласып алып кетеді екен.&nbsp;<blockquote>– Қазір тек тандыр нан пісіріп отырмын. Мұнан бөлек күніне 20-30 бөлке нан шығарамын. Қазір бөлке нанның қаліпі санаулы, сондықтан тапсырыс беріп қойдым. Алдағы айда қаліптер келеді, сол кезде өнім көлемін ұлғайтамын, – дейді ол.</blockquote>Назкен жай күндері 100-130 нан өтетінін айтады, ал той-томалақ, құдайы астарда арнайы тапсырыс та түседі екен. Батыр ана бүгінде үй жанынан ашқан шағын цехпен соның барлығын қамтамасыз етіп отыр.&nbsp;Аламасектегі ағайын бүгінде үй жанынан ашылған аядай цехты «Назкеннің наубайханасы» деп атап кеткен. Алты бала тәрбиелеп өсірген батыр ана тұтынушыларын тәтті тоқашпен қамтамасыз етіп, үй шаруасын да ширатып отыр.&nbsp; &nbsp;&nbsp;Кенжетай ҚАЙРАҚБАЕВ

Жалағаштық Назкен қайтарымсыз грантпен наубайхана ашты

<a href="https://kyzylorda-news.kz/">Kyzylorda-news.kz</a> «Ауыл аманаты» – ауыл тұрғындарының табысын арттыруға бағытталған бірегей жоба. Бұл мемлекеттік қолдауды шаруалар түрлі мақсатта пайдаланып жатыр. Аймақта аталған бағдарлама мен агроөнеркәсіп кешеніндегі ірі инвестициялық жобаларды жеңілдікпен несиелендіру жалғасын тапты. Бүгінгі күні «Ауыл аманаты» жобасы аясында 61 жоба несиелендірілді. Осы және өзге де кәсіпкерлікті дамыту бағытында атқарылып жатқан жұмыстар Өңірлік коммуникациялар қызметінің ақпарат алаңында баяндалды.Облыстық кәсіпкерлік және өнеркәсіп басқармасының басшысы Бекболат Шәріпбековтің айтуынша өңдеу өнеркәсібінің өсу қарқыны бойынша Қызылорда облысы өңірлер арасында бірінші орында.<blockquote>– Аймақта индустрияландыру шараларының нәтижесінде өнеркәсіптің өңдеу саласы қарқынды дамуда. Мұнай өндіру көлемінің төмендеуіне қарамастан, өнеркәсіп өндірісінің көлемі – 2%, өңдеу өнеркәсібі – 28%, сауда – 6,0%, негізгі капиталға тартылған инвестиция – 25,1% артты, – деді басқарма басшысы.</blockquote>«Қызылорда» өңірлік инвестициялық орталығы арқылы 79 жоба, «Аграрлық несие корпорациясы» арқылы 452 жоба несиелендірілді. Облыс аумағында 53 жаңа өндіріске қолдау көрсетілген.<blockquote>– Өздеріңізге мәлім, бизнес-идеяларды іске асыру үшін мемлекет тарапынан қайтарымсыз гранттар беру қарастырылған. Биылғы жылы 5 млн теңгеге дейінгі гранттар әлеуметтік кәсіпкерлік субъектілері мен «Бір ауыл бір өнім» жеңімпаздарына арналды. Конкурстық іріктеуге 33 өтінім жіберілді. Бүгінгі күні конкурстық іріктеу өтуде. Бұдан өзге, бизнес-идеяларды іске асыруға арналған мемлекеттік гранттар биыл 1558 жобаға берілді, – деді Бекболат Жүнісәліұлы.</blockquote>

Қызылорда облысы өңдеу өнеркәсібінің өсу қарқыны бойынша бірінші орында

<a href="https://kyzylorda-news.kz/">Kyzylorda-news.kz</a> Елімізде азаматтардың өз ісін ашуы және дамытуы үшін жағдай жасауға барынша ден қойылған. Әркімнің өз-өзін жұмыспен қамтып қана қоймай, &nbsp;жанұясына шарапаты тиетіндей жобалардың жүзеге асырылуына мемлекет тарапынан мүмкіндік мол. Бұл үшін қолдау да ауыз толтырып айтарлықтай болып жатыр. Үкіметтен &nbsp;берілетін қаржы мақсатты жұмсалып жатыр. Яғни субсидияланатын жұмыс орындарын ұйымдастыру арқылы кәсіпкерлер жұмысын жандандыру және олардың қажеттіліктеріне қарай дағдыларды дамыту бүгінде толыққанды екшеліп біткен. Сондықтан 2021 жылдан бастап өміршең жоба дүниеге келді. Оның мақсаты – кәсіпкерлерге әкімшілік жүктемені төмендету, субъектілер үшін қаржыландырудың қолжетімділігін арттыру. Ең бастысы қазіргі заманғы сауда форматтарын, оның ішінде өндірушіден тұтынушыға дейінгі толық циклді инфрақұрылымды қалыптастыру. Еліміздегі көпке көмек болып отырған мемлекеттік бағдарламалардың бірі – әлеуметтік осал топтарға арналған Ұлттық жобасы. Бірнеше жыл бұрын жұмысын бастаған жобаның шарапаты мен игілігін көріп отырғандардың арасында ІІІ Интернационал ауылының тұрғыны Сабина Исламқызы да бар.&nbsp;Ол – Тараздың тумасы. 2010 жылы ауыл азаматы, жас жігіт Нариман Набиевпен танысып, шаңырақ көтерген. Кешегі бозбала мен бойжеткен бүгінде 4 баланың ата-анасы. Берекелі отбасының иелері. Жары Қызылорда қаласында ауыр жүк көлігін жүргізіп, еңбек етіп жүр.Ауылға атбасын бұрғандағы себебіміз де кәсіп иесімен жүздесу болатын. Ол да жатырқамай қарсы алып, бағдарламаға риза екенін жеткізді. &nbsp;&nbsp;<blockquote>– Аталған жобаның бар екенін таныстарымнан естідім. Қайтарымсыз гранттың әлеуметтік топқа жататын, оның ішінде көпбалалы аналарға қатысу мүмкіншілігі берілгенін білдім. Ести сала ауылдың әкімшілігінің маманы Бауыржан ағайға жолығып, құжаттарды рәсімдеуді бастап кеттім. Бизнес жобамды арнайы құрылған комиссияда қорғап, мемлекеттен бөлінетін қомақты қаражатқа ие болдым. &nbsp;Оған 4 мүйізді ірі қара сатып алдық. Қазір екі бұзаулы сиыр сауылып тұр да, екеуін сыртқа қосып қойдық. Олар да бұзаулауға жақын. Бірер аптада ауылға әкелсек пе деп отырмыз, – дейді жас ана. &nbsp;</blockquote>Кәсіпкердің аз уақыт ішінде тұрақты сүт сатып алушыларды қалыптастырған. Бағасы да көкейге қонымды.&nbsp;<blockquote>– Шүкір деп айтайын, сүтіміз балалардың ас-қатығымен қоса, нәпақа табуға да жақсы жәрдем болып жатыр. Керегіңе қолқабыс болып тұр. Ертең бұйырса, сырттағы сиырлар келгенде қатық ұйытып, құрт-май жасаймын. Мемлекеттік бағдарлама – көпбалалы аналарға өте табылған идея десем, қате емес. Өйткені үйден ұзамай-ақ кәсібіңізді дөңгелетіп, пайдаңызды таба аласыз. Табиғи өнімге қашан да сұраныс жоғары болған. Бұл жағынан келгенде тоқайрап қаламын деген күмән жоқ. Мен секілді жас көпбалалы аналар кішкентайларынан ұзап шыға алмайды. Олардың сабағын оқытып, уақытында тамағын беріп дегендей. Қосымша қаржы отбасымызға оңтайлы көмек болып тұрғаны қуантады. Алда жоспарсыз емеспіз. Сүттің ақшасын жинап, тағы да сиыр малын сатып алып, басын көбейткіміз келеді. Малдың күтіміне көбінесе өзім қараймын. «Сиырдың сүті тілінде» дегендей, бірінші кезекте оның жайы болу керек. Жеген азығына мән береміз. Шөпті ауылдан арзандау алсақ, жемін сатып алып отырмыз. Осындай бағдарламаны халыққа ұсынып отырған мемлекетімізге мың да бір рақмет айтамын. Енді кәсіптің ізінен қалмай, әрі қарай дамытуға еңбектенеміз, – дейді Сабина Набиева бізбен әңгімесінде. &nbsp; &nbsp; &nbsp; &nbsp;</blockquote>Сәрсенкүл РАЙЫМБАЕВА

Ұлттық жобаның шарапаты

<a href="https://kyzylorda-news.kz/">Kyzylorda-news.kz</a> Кейде адамның ойлағаны бола бере ме дейміз. Бірақ талпынған қашан да өз мақсатына жеткен. Оған дәлел – түрлі ұлт пен ұлыс өкілінің басын біріктірген ІІІ Интернационал ауылдық округінің тұрғыны Банура Юсупова.&nbsp;Ол сонау жылдары Қарақалпақ елінен туған елін, жерін аңсап келген қандасымыз. Тарихи Отанына оралған қаракөзіміз бүгінгі күні өмірлік серігі Нұрасыл Жәлекеновпен бірге 4 бала тәрбиелеп отырған бақытты жандар.&nbsp;– Жолдасым ауылдың электригі болып істейді. Көпбалалы ата-анамыз. Үлкеніміз студент, одан кейінгілері мектепте білім алса, &nbsp;кішкентайымыз 2 жастан асты. Мамандығым заңгер болғанымен, ол салада жұмыс істегенім жоқ. Десе де, қол қусырып бос та отырмадым. Шаруашылық қоймасында қол жұмыстарын атқардым. Бір сөзбен айтқанда, еңбек етуден, әрекет қылудан қалыс қалған емеспін, – дейді өзін таныстырған кәсіпкер емен-жарқын кейіпте.&nbsp;«Дәулетті болғың келсе, кәсіппен айналыс» дегенді ертеден-ақ ата-бабамыз ұрпағына айтып кеткен ғой. Банура да жұмыссыз жүрген ауылдастарының кәсіп бастап, одан нәпақасын айырып жүргендерін сырттай бақылайтын. Өзіне бір күні «кәсіп бастап көрсек, қалай болар екен?» деген ой түсіпті. &nbsp; &nbsp;– Айналамдағы жұмыссыз адамдардың мемлекеттің қамқорлығы – қайтарымсыз грант алып, кәсіп бастағандарын көріп менің де қызығушылығым оянды. «Адамның істегенін адам істейді» деуші еді. Ойлана келе ауыл әкімшілігіне тартып отырып, кәсіпкерлік саласы бойынша жауапты маманға жолығып, ақыл-кеңес сұрадым. Олар да менің талабымды қолдап, мақсатыма қанат бітірді. Отбасында жолдасым да идеямды қолдады.&nbsp;Жалпы мен грантқа екі мәрте қатысқанмын. Алғашында дайындығым аз болды ма, сүріндім. Сонда да болса, алған бетімнен қайтпай, құжаттарымды қайтадан тапсырып, екіншісінде жобамды ойдағыдай қорғап шықтым. Комиссияның сұрақтарына жауап бердім. Кәсіптен пайда табу есептілігін, басқа да кіріс, шығыс секілді сандарын сөйлеттім. Жеңімпаз болғанымның арқасында 1 млн 400 мыңның үстінде қаражатқа қол жеткізіп, оған тамызда 37 бас қой-қошқар, ешкі алып, бордақылауды жұмыстарын бастап кеттік. Көбінесе еркек мал алдық, себебі олар бордақыға тез көнеді. Орта есеппен 3 айдың көлемінде семіртіп, сатуға шығарсақ па деген жоспарымыз бар. Мал күйлі болу үшін құнарлы азықтандыру қажет. Тартылған бидай, жем-шөбін уақытылы беріп, жағдайын жасаудамыз. Ара-кідік жоңышқаға қоямыз, – дейді ол қорадағы қоңы жарап қалған қошқарларын нұсқап. Жаңа жыл қарсаңында алғашқыларын сатуға шығаруға ниетті екенін де айтып қалды сөз арасында. &nbsp; &nbsp;Кәсіпкер айтулы бағдарламаға көпбалалы ана статусымен қатысқан. Сондай-ақ ол бизнес жобасын жазу барысында біраз ізденгенін де жасырмады.&nbsp;<blockquote>– Иә, бизнес жобаны жасамас бұрын біраз іздендім. Ғаламторды ақтардым. Көптеген мәліметке қанық болдым. Қой шаруашылығы, оның ішінде бордақылауды таңдаған себебіміз – елді мекенде тұрған соң ауылдың ау-жайына лайықты деп осы бизнес түріне көңілім кетті. Ұсақ малды қорада қарайсың. Бабы да аса қиын емес. Жолдасым екеуміз ақылдаса келе, осы кәсіпке тоқталдық. Ауыл әкімшілігі мен оның білікті мамандарына аналық алғысымды айтқым келеді. Құжат жағына көмектесіп, сүйемелдеді. Кәсіби деңгейде жұмыс істеді. Бұл жұмыссыз отырған, әсіресе көпбалалы аналарға мемлекет тұрғысынан көрсетілген үлкен көмек әрі демеу деп санаймын, – дейді Ұлттық бағдарламаның игілігін көруші Банура Раджапқызы.&nbsp;</blockquote>&nbsp;Сәрсенкүл РАЙЫМБАЕВА

Қазақстан және Қызылорда облысының жаңалықтары: Кәсіпкерлік