<a href="https://kyzylorda-news.kz/">Kyzylorda-news.kz</a>&nbsp; Аймақ экономикасын дамытудың ұтымды жолы кәсіпкерліктің ілгерілеуін ұдайы назарда ұстап, саланың серпін алуына барлық жағдай жасау. Бұл тұста мемлекет кәсіп ашамын деген жандарға түрлі бағдарламалар арқылы барынша қолдау көрсетуде.Мәселен Сыр өңірінде жеке кәсібін ашып, ерекше өнімдерді шығарып жүрген азаматтар қатары айтарлықтай артып келеді.&nbsp;Әсіресе, 2021-2025 жылдарға арналған кәсіпкерлікті дамыту жөніндегі ұлттық жобасы кәсіп бастауға ниеті бар талай жанға мүмкіндік сыйлап, салаға даңғыл жол ашты. Олардың қатарында Қызылорда қаласының тұрғыны Нұрбол Маделханов та бар. Ол аталған жоба шеңберінде 2022 жылы 5 млн теңге көлемінде қайтарымсыз грант алып, гофрленген тақта өндірісін қолға алған. Бүгінде кәсіпкер өндіріс орнында 2 адамды тұрақты жұмыспен қамтып, тақтаның екі түрін жасап шығаруда. Жергілікті өнімге тұрғындар тарапынан сұраныс та жақсы екендігін жасырмады.&nbsp;Кәсіпкер жұмысын жүйелеп алған соң тағы да жаңа құрылғылар сатып алып, жұмысшылар санын арттыруды жоспарлауда.&nbsp; &nbsp; Бір айта кетерлігі, бүгінде жобасын жүзеге асырамын деген жандарға мемлекет пайыздық үстемақысы төмен несие ұсыну арқылы қаржы мәселесін шешуге де жағдай жасап қойған. Үлкен қолдаудың шарапатын көргендер өз ісің жүргізуде.Фото: Қызылорда облысының Өңірлік коммуникациялар қызметі

Кәсіпкерлікке бағытталған жобалар жемісін беруде 

<a href="https://kyzylorda-news.kz/">Kyzylorda-news.kz</a>&nbsp; &nbsp;Қолөнер – қолданбалы өнер. Дәстүрлі тұтыну және сәндік бұйымдарын жасайтын ұсақ өндіріс. Қолөнершілер негізінен табиғи шикізаттарды пайдаланып, қарапайым еңбек құралдарының көмегімен көркем композицияның шешімімен тұрмысқа қажетті мүліктер, музыкалық аспаптар, қару-жарақ, құрал-саймандар жасайды.&nbsp; Әрбір қолөнер туындысы өз заманының материалдық мәдениетінің үлгісі және халық талғамының, әлеуметтік қоғамдық жағдайының, діни сенімінің, салт-дәстүрінің нақтылы көрінісі.&nbsp; Шыны керек, соңғы уақытта эностильге мойын бұра бастадық. Ұл-қыздарымыз халқымыздың қайталанбас ұлттық киімдері мен бұйымдарын күнделікті өмірде тұтынуға көшті. Ұлттық нақыштағы киім үлгілері мен әшекейлер заманауи дизайнда көрініс тауып, сән әлемінде ғана емес, тіпті тұрмыста да трендке айналды. Сәнгерлер мен шеберлер осы трендті қазіргі сәтпен сабақтастырып, одан табыс тауып жүр. Солардың бірі қазалылық – Нұрбану Сағырбек.&nbsp; Он саусағынан өнер тамған талантты жан табандылығының арқасында, қазіргі таңда, трендке айналған қазақы бұйымдарды, яғни, қыз-келіншектерге арналға әшекейлерді дайындап, сатуда. Қазірдің өзінде тұрақты тұтынушыларын тауып үлгерген оның бұйымдары, бүгінгі заманға лайық етіп жасалғандығымен ерекше. Осы ретте, қазақи стильде әшекей бұйымдар дайындап жүрген жанға арнайы жолығып, жасап жүрген жұмысымен танысып қайтуды жөн көрдік.&nbsp; Шеберханадағы тірлік күндегіше тынымсыз жүріп жатыр. Нұрбану әдеттегідей қыз-келіншектерге арналған тағы бір жаңа бұйымды әзірлеп әлек. Жанына жақындағанымызды байқаған ол: "соңғы штрихтар" деп бізге сәл күте тұрыңыз деген сыңай танытты. Біз қолындағы әсемдікке анадайдан көз тастап, тамашалап тұрдық. Әдеттегі ісін сөреге қойған ол жанымызға келіп, жасаған жұмыстарын таныстырып, бұл кәсіпке қалай бет бұрғандығын әңгімелеп берді.&nbsp; – Жалпы, менің бұл кәсіпке келуім тегін емес. Кішкентайымнан қолөнерге қатты қызықтым. Оның үстіне, анам да қолы алтын, шебер кісі. Анам іс тігіп, тоқыма тоқитын. Оның бойындағы асыл қасиет менің де бойымнан табылды. Ал, қазір әшекейлер мен бұйымдарды кәсіпке айналдырған болсам, кішкентайымнан тігінге икемім болғандығынан шығар. Жалпы, мен жасап жүрген қай ісімді де тігіншілікпен ұштастырамын. Егер тігінді білмесем, бұл кәсіпке бет бұрмас та едім, – дейді қолөнер шебері.&nbsp; Нұрбану, әрбір әшекейді заманауи үлгімен ұштастырып жасауға тырысады. Себебі, тапсырыс берушілер жасалған бұйымдардың қайталанбас ерекше әрі күнделікті өмірде тағып жүруге ыңғайлы болуын сұрайтын көрінеді. Тұрақты тұтынушыларының ұсыныстарын ескеріп, соларға лайық қызмет көрсетуді басты ұстанымы санайтын Нұрбану этностильдегі киім, тақия, шекелік, шашбау, сырға, білезік, сақина сынды заттарды қолдан жасап, оны жергілікті тұрғындарға ғана емес, сырт қаладан тапсырыс берген сатып алушыларға жөнелтіп жүр.&nbsp; – Расын айту керек, бұрын көбі ұлттық болмысымызға сай келетін қазақы киімдер мен бұйымдарды тек той-томалақта не мерекеде ғана тұтынатын. Ал, қазір қазақша стиль трендке айналды. Жұртшылықтың, әсіресе, жастардың да талғамы заманауи заттардан қазақи дүниелерге ауысып жатыр. Өйткені, қазіргі буын индивидуал әрі эксклюзив заттарға құмар. Сондықтан, мен де сол талғамға сай болу үшін трендтен қалмай, төл өнерімізді төрге сүйреп жүрген жайым бар, – дейді Нұрбану Сағырбекқызы.&nbsp; Төл өнерді түлетіп жүрген кейіпкеріміз бұл кәсіпті алғашында желі арқылы бастаған. Кейін жұмыстарын желіде ғана жарнамалап қоймай, кәдуілгі дүкен сөрелеріне қойып, кәсібін кеңейтуді жөн көріпті.&nbsp; – Студент кезімде тасбих, білезікті қолдан жасап сататын Жадыра деген апайдың қасында көмекші болдым. Жанында жүріп, біраз дүниені жасап үйрендім. Қызығушылығым кейін кәсіпке ұласып, 2019 жылы тәуекелге бел буып,осы істі бастап кеттім. Қазір, шүкір, тынымсыз еңбегімнің арқасында табыс тауып, тірлігімді тіктеп келемін, – дейді ол.&nbsp; Қазақ халқының ұлттық киімдері мен бұйымдары мәдениетіміз бен салт-дәстүріміздің айқын көрінісі. Оның заманауи сән нарығына сай түрленіп, жаңашыл көрініске ие болып жатқандығы көпті қуантады. Әрине, олардың осылай қайта жаңғырып жатқандығы оған жан бітіріп жатқан қолөнер шеберлерінің арқасы. Өз кәсібі арқылы ұлт мәдениетіне өзіндік үн қосып жүрген қазалылық қолөнер шебері Нұрбану Сағырбекқызының да еңбегі ерен десек жарасатындай. Өйткені, ол болмашы әрекеттер арқылы қазақилықты әрдайым трендке айналдыруды көздеді. Біз де сол секілді мүмкіндіктерге ұмтылып, ұлттық мүддеге қарай жұмылсақ, қазақи құндылықтарға деген қоғамдық көзқарастың тұғырын биіктетіп қоймай, табысқа да кенелген болар едік.

Нұрбану Сағырбек: Тігін – тұнып тұрған математика

<a href="https://kyzylorda-news.kz/">Kyzylorda-news.kz</a>&nbsp; Биылғы жылдан бастап ауыл шаруашылығы саласына несие беретін қаржы ұйымдары несие беру талаптарын өзгертіп, кәсіпкерлерден «Мемлекеттік экологиялық сараптама қорытындысын/Экологиялық рұқсат/Декларация» жүргізуді талап етуде. Осы уақытқа дейін өңір кәсіпкерлері бұндай мәселемен бетпе-бет келмеген. Осы себепті, мал шаруашылығымен айналысатын кәсіпкерлер өз шағымдарымен өңірлік кәсіпкерлер палатасына жүгінді.Осыған орай, өткен аптада Қызылорда облысы кәсіпкерлер палатасының алаңында өткен АӨК Кеңес отырысы аясында облыстық табиғи ресурстар және табиғат пайдалануды реттеу басқармасының өкілдері Кеңес мүшелері мен кәсіпкерлерге Мемлекеттік экологиялық сараптама жүргізу тәртібі туралы түсіндірме жұмыстарын жүргізді. Жиынға сонымен бірге қаржы институттарының өкілдері қатысты.Облыстық табиғи ресурстар және табиғат пайдалануды реттеу Басқарманың «Экологиялық реттеу» бөлімінің экологы Айгерім Нәрікбайқызы Мемлекеттік экологиялық сараптама жүргізу талаптарындағы өзгерістер жайында айтып өтті.<blockquote>«Соңғы кездері облыстың мал шаруашылығымен айналысатын кәсіпкерлік субъектілері қаржы институттарына жүгінген жағдайда, ҚР экологиялық кодексінің талаптарына сәйкес:</blockquote><blockquote>- 150 бастан бастап және одан көп ірі қара мал өсіру жөніндегі;</blockquote><blockquote>- 500 бастан бастап және одан көп ауыл шаруашылығы құсын өсіру жөніндегі;</blockquote><blockquote>- 150 бастан бастап және одан көп жылқы өсіру жөніндегі;</blockquote><blockquote>- 150 бастан бастап және одан көп түйе өсіру жөніндегі;</blockquote><blockquote>-600 бастан бастап және одан көп қой мен ешкі өсіру жөніндегі мал шаруашылықтары үшін «Мемлекеттік экологиялық сараптама қорытындысын/Экологиялық рұқсат/Декларация» жүргізу талап етілуде. - деді Айгерім Нәрікбайқызы.</blockquote>Сонымен қатар, жиын барысында «Сырдария -1» несие серіктестігінің төрағасы Алмат Абдуллаев несие алу барысындағы кедергілер туралы баяндап берсе, «Аграрлық несие корпорациясы» АҚ Қызылорда облыстық филиалы директорының орынбасары Қуаныш Садақбаев несие алу барысындағы Корпорация талаптары туралы қысқаша ақпарат берді.Кеңес қорытындысымен отырысқа қатысушылар тарапынан ұсыныстар мен пікірлер берілді. Осы орайда, «Аграрлық несие корпорациясы» АҚ несиелендіру бағдарламаларының шарттарынан «Мемлекеттік экологиялық сараптама қорытындысын/Экологиялық рұқсат/Декларация» талаптарын алып тастауды ұсынды. Палата өз кезегінде көтерілген мәселені жоғарыға жолдап, оң шешімін күтуде.

Мемлекеттік экологиялық сараптама талаптары өзгерді

<a href="https://kyzylorda-news.kz/">Kyzylorda-news.kz</a> Ұлттық қолөнер бағзы заманнан бері қалыптасып келеді. Халықтың тұрмыс-тіршілігіне байланысты қолөнердің сан алуан түрі бар десек, соңғы жылдары күнделікті тұрмыстық заттардан бастап, қыздардың әшекей бұйымдары, киім–кешек, ыдыс-аяқ, тіпті, жолдорбаларына дейін ұлттық нақыштағы бояуға қанық.Қызылордалық Амира Исабаева – ұлттық нақышта заманауи жолдорба мен қол сөмкелерін тігіп, көпшілікке ұсынып жүрген қолөнерші. Қолөнер саласына келгеніне көп уақыт бола қоймаса да, жастар мен тұрғындардың талғамына сай дүниелері қазір трендте.<blockquote>– Адамға адам себепші. Қолыма ине-жіп ұстап көрмеген адамның бірі мен едім. Белгілі бір себептерге байланысты алдыңғы жұмысымнан өз еркіммен бір күнде шығып кетіп, жұмыс іздестіріп жүргенмін. Інім ол кезде авточехол тігумен айналысатын. Бір күні өзі үлгермей жатқан кезде маған өтініш айтып, «жайнамаз тігу сенің қолыңнан келеді» деп сеніп тапсырды. Осылайша тігін тігіп үйреніп, тәжірибе жинақтай бастадым. Ата-анам да, бауырларым да қолдау көрсетті. Содан кейін іштей сенімділік пен тігін өнеріне деген құштарлық пайда болды. Кейіннен неге өз қалауыма сай басқа нәрселер тігіп көрмеске деп Астана қаласындағы Дамуспренттен жаңа әдіс-тәсілдерді үйреніп қайттым. Онда 1,5 айдай оқыдым. Келген соң түрлі идеяларымды іске асыра бастадым.</blockquote><blockquote>Өзіме ұнайтын трансформер, яғни, ұзартылып-қысқартылатын жол сөмкелеріне қызылордалықтардың көзқарасы басқаша болды. Алайда осы бағытта жұмысымды жалғастыра бердім. Шамамен 3 айдан соң қаладағы асабалар, өнер адамдары тапсырыс бере бастады. Негізінен Ақтау, Атырау қаласының тұрғындары жиі тапсырыс беріп, алдырып жатады. Тігуге қажетті заттарын, эко тері мен теріні алмастырушы материалдарды Алматы қаласынан алдырамын. Өйткені аймақ тұрғындарының қаржылық мүмкіндігіне байланысты эко теріден дайындалған өнімдер сұранысқа ие. Таза табиғи теріден жасауға болар еді, алайда оны сатып алуға халықтың қалтасы көтермейді. Соны ескере отырып, матасын да, сапасын да, бағасын да халықтың сұранысына сай етіп ұсынудамыз, – дейді Амира Қасқырбайқызы.</blockquote>Қолөнершінің ассортиментінде жолдорба, иықдорба, ноутбук салуға арналған, спорттық сөмкелер, сонымен қатар ұлттық нақыштағы үйге киюге арналған аяқкиімдер мен машинада отырғанда белге қоятын жастықшалар, трансформер жамылғыштар бар. Амираның қолынан шыққан дүниелердің ерекшелігі – ұлттық нақыш пен заманауи стильдің тоғысуында. Әрі түрлі жағдайға сай сөмкелер ұзартып, қысқартуға ыңғайлы. Тек қана жастар емес, жалпы әртүрлі жастағы адамдарға жақсы таңдау.<blockquote>– Алда жоспарым көп. Бұйырса, осы жазда Астана қаласындағы ұлттық қолөнер бұйымдары көрмесіне қатысу ниетім бар. Мұндай республикалық көрмеге бірінші рет қатысқалы тұрмын. Әрі алдағы уақытта облыс бойынша да &nbsp;қолөнер бұйымдарына арналған көрмелер жиі ұйымдастырылып тұрса, тәжірибе алмасып, өзімізден шыққан өнімдерді өзіміз танысақ, қолдасақ дегім келеді, – дейді кәсіпкер. &nbsp;</blockquote>

Қызылордалық қолөнер шеберінің бұйымдары сұранысқа ие 

<a href="https://kyzylorda-news.kz/">Kyzylorda-news.kz</a> Қызылорда қаласында құрттың ерекше түрі шығады. «Qurtella» атауымен танымал болған бұл өнімнің 6 түрі бар.&nbsp; Түрлі дәмнен жасалатын өзгеше өнім – елімізде қайталанбаған кәсіп түрі. Бұл бизнесте 13 жасынан бері жүрген кәсіпкер алдағы уақытта жаңа атаумен басқа да тауар өндіруді жоспарлап отыр. Нұрсұлтан Қалмағамбеттің айтуынша, «Qurtella» басқа қалаларда да танылып үлгерген.<blockquote>– Жалпы, кәсіп саласында 13 жасымнан бері жүрмін. Ең алғашында балмұздақ сатып, кейіннен сөйлейтін ойыншық түрлерін де осы қалаға алып келгендердің алғашқысы мен болдым. Осы «Qurtella» құрттарын шығарғаныма әзірге 1 жыл бола қойған жоқ. Өткен жылдың қараша айында алғашқы өнімді шығарып, сатылымға қойдық. Ал осы идеяның басталғанына жылдан асып кетті. Құрт сатудың берекелі кәсіп түрі екенін біліп, көңілім осы салаға ауды. Мақсатым құртты қазаққа насихаттау болды. Бірақ, ойымда оны өзгеше етіп жасау болғандықтан, идеямды жетілдіріп жүрдім. Ешкім сенбейтін шығар, мен бұл кәсіпті 15 000 теңгемен бастағанмын. Осылай-осылай жайлап табысқа жетіп жатырмыз, – деді Н.Қалмағамбет.</blockquote>Нұрсұлтанның өнімі шаһардағы дүкен сөрелеріне жайғастырылған. Кәсіпкер құрттарды ерекше қаптамаға салып, өзге қалаларға да жіберіп жатыр. Тіпті, бұл тойбастар ретінде қонақтарға ұсынылып, жұртшылықтың таңдауына ие болып келеді. Атап айтсақ, Маңғыстау, Шымкент, Алматы, Өскемен қалаларының тұрғындары осы құрттың тұрақты сатып алушысына айналған. Кәсіпкердің айтуынша, өкінішке қарай, өз өңірімізде дәл мұндай сұраныс жоқ. Бренд трендке айналады, ал трендтің танылып, таралуына уақыт кетеді. Нұрсұлтан алдағы уақытта тек аймақты ғана емес, өзге қалаларды да түгелдей дерлік құртпен қамтамасыз еткісі келеді.<blockquote>– Өзбекстан Қазақстан үшін жылына 50 млн тонна құрт өндіреді. Бұл деген масқара ғой. Өзім ұлтшыл адаммын. «Басқа істейді, қазақтар істей алмай ма сонда?» деймін. Еріншекпіз дейін десем, еріншек те емеспіз, қолымыздан бәрі келеді. Аз-аздан деп жүре береміз-ау, бірақ үлкен өндіріске араласып, еліміздің ішкі нарығын өзіміз қамтамасыз ететін уақыт келді ғой. Ал ол үшін мемлекеттен қолдау керек. Алдағы уақытта сол мемлекет тарапынан жасалатын гранттық қолдауларға өтінім беріп көру ойда бар. Қалғанын уақытысында көрерміз, – деді ол.</blockquote>Қазірде «Qurtella»-ның жеке дүкені, цехы бар. Жалпы алғанда 5 адамды жұмыспен қамтып отырған кәсіпкер күніне 500 қамтама құрт өндіріп, айына кемі 3000 қаптамадағы құрт сатылатынын айтты. Тіпті, бағасы да қолжетімді. Ішінде 11 дана құрты бар қаптама 390 теңге, ал вакумдегі шағын түрі 190 теңгені құрайды екен. Бұны болашағы бар бизнестің алғашқы баспалдағы деуге болады.&nbsp; Себебі, жеке әлеуметтік желілерді де ашып, онда жаңа бренд қалыптастырып үлгерген жастар құрт сатудың жаңаша құпиясын мықтап меңгеріп келеді. Кәсіпкер құртпен бірге женттің де түр-түрін жасап, сатып жүр. Ол арнайы тапсырыспен дайындалады екен. Құрттардың сақталу мерзімі 3-4 айды құраса, жент оған қарағанда жарамдылық мерзімі төмен. «Бірақ, ендігі жерде женттің құрамын өзгертіп, оны да ұзақ уақыт бойы сақталуға қауқарлы етіп жасаймыз» дейді кәсіпкер.Тағы бір айта кететін дүние – құрттар салынған қаптама сыртында «Қазақстанда жасалған» белгішесі қойылған. Елімізде өндірілетін өнімнің тұтынушысы болу арқылы қолдау көрсету – баршамыздың азаматтық міндетіміз. Кәсіп иесінен «осындай жетістікке жетіп, кедергілерден қорықпай өту үшін жастарға қандай кеңес, мотивация бересіз?» деген кезде, өзі де мотивация қажет етіп жүргенін айтып күлдірді. Бірақ, атақты американдық кинодағы «чтобы победить, нужна настойчивость и дисциплина» деген сөз күш беріп, мақсатының нықталуына септігін тигізгенін айтты. Расында, жеңіске жету үшін табандылық және тәртіп қажет.Нұрсұлтанның ендігі мақсаты – нағыз таза, қоспасыз құрт өндіріп, тапшылықты жою. Балмұздақ бизнесін де жаңаша бағытта дамытқысы келеді. Кәсіпке ынтасы бар, ұлтжанды, қарапайым кәсіпкерлердің артып келе жатқанына қуанып, бір серпілдік. Ұлттық өнімді насихаттау дейтін дүниені жолға қою керек-ақ. Бұл орындалса, өз байлығымызды өзіміз пайдаланушы едік. &nbsp;Көз көріп жүрген дүниелерге үміт зор, бірақ қаражат қысып, тықыр таянбаса болды. Ол үшін мемлекет те қолдау білдіреді деген үміттеміз.

Қызылордада «Qurtella» құрттары шығады

<a href="https://kyzylorda-news.kz/">Kyzylorda-news.kz</a>&nbsp; Қазір көп жүргізуші шетелдің осыдан бірнеше жыл бұрын шыққан көлігін мінуге ынтық. Неге десеңіз, олардың жылы төмен болғанымен сүйегі мықты, жүріске шыдамды дегенді алға тартады. Алайда уақыт өте олардың шанақ бөлшектерінің түпнұсқасы бүгінде тікелей зауыттан шықпайды. Тапқанның өзінде біреудің бөлшектелген машинасынан қып-қызыл ақшаға сатып алып, көлігіңізге келістіресіз. Енді бұл мәселенің де күрмеуі шешіліп келеді. Қармақшылық Мұхамедәли Қалбаев ауданда көліктің бамперін жасап шығаруда.Бүгінде &nbsp;ауыл еңбеккерлерінің өмір сүру сапасын жақсартып, табысын арттыруды көздеген «Ауыл аманаты» жобасы өз тиімділігін көрсетіп, халық арасында зор сұранысқа ие болуда. Жобаның жүзеге асып жатқанына жылдың жүзі болды. Аталмыш жоба ауылдағы ағайынның тұрмыс-тіршілігін түзеуге бағытталған. &nbsp;«Ауыл аманаты» жобасының басты мақсаты – ауылды жерлердегі халықтың табысын арттыру. Бүгінде мемлекет тарапынан берілетін қайтарымсыз грант пен аз пайыздық несие арқылы аудан көлемінде біршама кәсіпкер көкжиегін кеңейтіп, шаруасын ширатып отыр. Айталық, өткен жылы аудан бойынша 45 адам осы бағдарлама негізінде несие алды. Әлемдегі инфляцияны ескеретін болсақ, 2,5 пайыздық несие – өте тиімді. Ауылда қандай да бір өндіріс ашып, оны дамыту үшін аталған жоба – үлкен мүмкіндік болмақ.&nbsp;Кәсіпкердің шағын цехын Жосалы кентіндегі теміржолдың арғы бетіндегі орналасқан. Цехқа айналған ескі үйдің ішінде у-шу қызу тіршілік. Ауласында жиналған түрлі маркалы көліктің бамперіне қарап мұнда жұмыстың тынымсыз жүріп жатқанына қанықтық. Өкінішке қарай кәсіпкердің ауылда болмауына байланысты оның туған інісі Нұржан Қажымұханұлымен кәсіп жайында тілдестік.<blockquote>– Кәсіптің бұл түрін ағам Алматыға барып оқып, үйреніп келді. Ол жақта пластик бұйымдар өндіретін үлкен цех бар. Сонда біршама уақыт жұмыс істеп, қыр-сырын меңгеріп, өзіміздің ауданда жұмысты ұзатпай бастады. Ағамнан мен үйреніп, қазір тапсырыстың түр-түрін қабылдап жатырмыз. Бізге көбіне немістің «Аudi», «BMW» «Mercedes» маркалы көліктеріне бампер жасатады. Өйткені бұл көліктер бөлшегінің түп нұсқасы таптыра бермейді. Тапқанның өзінде сатушы тұтынушыға қымбатқа сатады. Сондықтан қол жетімді бағаға бізге келіп жасатады. Цехта арнайы бампердің матрицасы станокта дайындалады. Матрица дегеніміз – кәдімгі қалып. Сонда көлік бөлшегі өндіріледі, – дейді Нұржан Қажымұханұлы.</blockquote>Мұхамедәли бизнес бастауға «Ауыл аманаты» бағдарламасымен үлкен көлемде несие алған. Мемлекеттік бағдарламаның көмегімен енді сұранысқа ие бірнеше көлікті бөлшекпен қамту жоспарында бар. Тек тынбай еңбек ету керек. Бүгінде оның кәсібінен құлағдар болғандар сырттан да келіп тапсырыс беруде.Нұржан жасаған жұмысының нәтижесін көрсету үшін дайын болған мерседес көлігінің бамперін және оның шикізат құрамымен таныстырды.<blockquote>– Жалпы бампер жасауға қажетті шикізаттар – эпоксидті шайыр, шыны талшық, щетка, полистирол, полиуретанды көбік және донорлық бампер. Бұл заттар негізі Ресей мен Қытайдан келеді. Бір бамперді дайындау үшін екі сағат уақыт жұмсалады. Әрі қарай кепкеннен кейін артық жерлерін кесу секілді майда қол жұмыстары басталады. Бұл жасалған бампердің сапасы базарда тұрған пластикалық бамперден екі есеге мықты. Бір адамның салмағын көтереді. Әрі орташа соққыларға төтеп бере алады. Бұл шикізаттардан жалғыз бампер емес, балаларға арнап бассейін, автобокс, қайық, тағы басқа көп нәрсе жасауға болады. Егер тапсырыс болса, дайындап береміз, – дейді кәсіпкердің інісі.</blockquote>Цехта басқа да көліктерге арналған матрица баршылық. Қажет десеңіз сіз қалаған заманауи сәнді түрлері де жасалады. Тек ойыңыздағыдай көрсетіп берсеңіз болды. Бағасы да қолжетімді. Кәсіпкердің бұл жұмысына ерлер жағы қатты қуанғаны белгілі. Себебі көлігінің шанағына қажетті бөлшекті таба алмай жүрген жүргізушілер қаншама?! Базарға барсаңыз бір бампердің бағасы қалтаны қағып түсіреді. Ең бастысы, кәсіпке қай кезде де қолдау керек. Расымен сұраныс бар жерде өнімнің сапасы да артатыны сөзсіз.

«Ауыл аманаты» бағдарламасымен қармақшылық жігіт сұранысқа ие кәсіпті қолға алды 

<a href="https://kyzylorda-news.kz/">Kyzylorda-news.kz</a> Облыстың кәсіпкерлік және өнеркәсіп саласында көңіл көншітерлік көрсеткіштер аз емес. Мемлекеттік қолдаудың арқасында ісі өрге басып, өңірдің экономикалық жағдайын жақсартуға бір кісідей үлес қосып жатқандардың қарасы көбеюде.Өндіріс жақсарса, өмір де жақсарадыЖалпы былтыр өңірде кәсіпкерлердің саны 12,6 пайызға артқан. Мемлекеттік қаржылай қолдаудың көмегімен облыста бірнеше шағын өндіріс пен қызмет көрсету орындары ашылды. Аймақта кәсіпкерлік бойынша жұмыспен қамтылғандар саны 124 376 адамға жетіп, экономикалық жағынан белсенді азаматтардың 35,8 пайызын құрады. Сондықтан кәсіпкерлікті бір істі бастаған адамның ғана емес, халықтың қамын күйттеуге бағытталған негізгі сала ретінде қарастырсақ болады.&nbsp;Өндіріс жағынан кәсіпкерлер қалыс қалып жатқан жоқ. Өткен жылы алғашқы 6 айдың өзінде шағын және орта кәсіпкерлік саласында 300,6 млрд теңгенің өнімі өндірілген. Бұған қоса 42 млрд теңгеге 3,5 мыңнан аса жоба қаржыландырылған. Ал өңдеу өнеркәсібіне бағытталған инвестициялық жобалар пулына 1,1 трлн теңгені құрайтын 45 жоба енгізіліп отыр.Жасыратыны жоқ, облыс көп уақыттан бері мұнай өндірісіне арқа сүйеп келген болатын. Алайда кейінгі жылдары бұл өндіріс біршама қысқарды. Есесіне жаңа бағыттарға жол ашылды. 2023 жылы жалпы құны 7,6 млрд теңгені құрайтын 310 жұмыс орны ашылатын 6 жобаны іске қосу жоспарланған. Оның 4,3 млрд теңгеге бағаланған 2 жобасы іске қосылып үлгерді. Бұдан бөлек, 3,5 млрд теңгені құрайтын темірбетон бұйымдарын шығаратын зауыт өнім шығаруды бастады. Зауыттың қуаттылығы күніне 200 текше метр темірбетон бұйымдарын шығаруға қауқарлы. Былтыр іске қосылған шыны зауыты қазір үздіксіз өнім шығарып келеді. Зауыт іске қосылғаннан бері 167 мың тонна өнім берген.Инвестиция – игілік көзіКез келген аймақтың экономикалық дамуына инвестицияның ықпалы зор. Бұл тұрғыда облыс оқ бойы озық. Былтыр өңірге 386,4 млрд теңге инвестиция тартылған. Бұл өткен жылмен салыстырғанда 95,5 млрд теңгеге, яғни 27,7 пайызға артық. Жалпы биыл облысқа 424,2 млрд теңге инвестиция тарту индикаторы бекітілген. Инвесторлар мен демеушілер есебінен жүзеге асырылатын жобалардан 45 млрд теңгедей қосымша резерв тартылды. Соның арқасында алдағы уақытта 472 млрд теңге инвестиция тарту жоспарлануда.Енді неміс тарапымен бірлескен жоба аясында фиброцемент, газобетон және құрғақ құрылыс материалдарын өндіретін парк құру жоспарлануда. Жоба арқылы өңірге 150 млн АҚШ доллары болатын инвестиция тарту және 500-ге жуық жұмыс орнын ашу көзделген. Бұның бәрі өз кезегінде аймақ инфрақұрылымының дамып, халықтың әлеуметтік-экономикалық жағдайының жақсаруына әсер етпек.&nbsp;

Қызылордада кәсіпкерлік әлеуеті артып келеді

&nbsp;<a href="https://kyzylorda-news.kz/">Kyzylorda-news.kz</a> Түбі бір түркінің ортақ тұлғасы Қорқыт бабаның мәңгілік мекені, адамзат алғаш аспанға аттанған Байқоңыр ғарыш айлағы орналасқан Қармақшыдағы оң өзгерістер халықтың көңілін өсіріп отыр. Бүгінде Қызылдың қиянынан космосқа құлаш ұрған жұлдызды қала Байқоңырға дейінгі аралықтағы барлық ауылдарда қызу тіршілік жүргізіліп жатқандығына көпшілік куә. Қатарға қосылған құбырлар, қайта жанданған көшелер, бөбек толы балабақша, құшақ ашқан тұрғын үй, жаңа амбулаториялар, спорт кешендері ауданның бүгінгі күнінің көрікті көрінісіне айналуда.Қазақстан Республикасының Ұлттық қорынан, республикалық, облыстық бюджеттен бөлек, жұртшылықтың көңілінен шыққан, әлеуметтік саланың шырайын кіргізген «Ауыл - Ел бесігі» жобасы аясында атқарылған жұмыстар өз алдына бір төбе дерлік. Ақай ауылындағы дене шынықтыру-сауықтыру кешенінің құрылысы осының дәлелі. Ақай ауылына газ құбыры желілерін салуға ҚР Ұлттық Қорынан, республикалық бюджеттен Төретам кентіндегі газ құбырларын салу жұмыстарының қаржысы шешілген. Ақай ауылдық округінің Астана көшесінен №1-ТВ техникалық су ұңғымасын бұрғылау, Ақай ауылындағы Құдайбергенов, Қазыбек Би, Баймаханов, Төретам кентіндегі Байсейітов көшесі мен №269 мектептің №22-ТВ, №23-ТВ техникалық су ұңғымасын бұрғылау жұмыстарына қаржы облыстық бюджеттен бөлінді. Ал Аудандық бюджеттен Ақай ауылдық округіне балалар ойын және спорттық тренажер ойын алаңын орнатуға, 5 көшеге орташа жөндеу жұмыстарын жүргізуге, ауылдағы Майлин, Әуезов көшелерін жарықтандыруға, Төретам-Ақай айналма жолын күрделі жөндеуге, Төретам кентіндегі Байсейітов, Байтұрсынов, Момышұлы көшелерін ағымдағы жөндеу, Мұратбаев тұйығы, Амангелді тұйығы, Мамыр көшелерінің орташа жөндеу жұмыстарына, кенттегі Мұсабаев, Мәметова, Құлтасов көшелерін жарықтандыруға қаржы қарастырылды.Төртінші деңгейлі бюджет есебінен елді мекендерді көгалдандыру, Ақай ауылдық округіндегі Жанқожа батыр, Астана, Бейбітшілік, К.Күншығаров, Б.Майлин, М.Әуезов көшелеріне техникалық паспорт жасатуға сондай-ақ, балалар ойын және спорттық тренажер алаңына, аяқ су жүргізуге арналған ұңғыма жұмыстарына, Дүр Оңғар, Бәйтерек көшелеріне жарық шамдары орнатуға, бейнебақылау камераларына жөндеу жұмыстары және техникалық қызмет көрсетуіне, Астана көшесінен орнатылған су ұңғымасын электр желісімен қамтамасыз ету жұмыстарына, Төретам кенті бойынша ұңғыма құдықтарын электрмен жабдықтау жұмыстары үшін қаражат бөлінді.<blockquote>– Кәсіпкерлік саласын дамыту жұмыс орындарын ашып, бюджеттік қаржыны толықтырудың тұрақты көзі болып қана қоймай, экономикамыздың одан әрі өсуінің нақты факторына, сонымен қатар халықты жұмыспен қамтудың және әл-ауқатын жақсартудың негізіне айналып отыр. Кәсіпкерлікті жанжақты қолдау, бизнеске жол ашу бүгінгі күннің басты талаптарының бірі болып отырғаны белгілі. Жаппай кәсіпкерлікті дамытудың және жұмыспен қамтуды қамтамасыз ету бағытында тұрғындармен тұрақты түсіндірме жұмыстары жүргізіліп тұрады. Ауыл бойынша тіркелген кәсіпкерлерлік субъектілер санына келсек, жеке кәсіпкер – 429 болса, Жұмыс жасап тұрған субъектілер саны – 393. Жыл басынан бері 103 азамат жеке кәсіпкер болып тіркелген. 2023 жылы «Ұлттық жоба» бағдарламасы аясында мал шаруашылығын дамытуға – 5 жоба, қызмет көрсету саласына – 1 жоба, Өндірістік бағытқа – 5 жоба, барлығы 11 жоба 1 380 мың теңгеден 15 180 мың теңгенің қайтарымсыз грантын жеңіп алып, жұмыстарын жүргізуде. Басқа бағдарламалар аясында 6 азамат 148 600 мың теңге несие алып, қазіргі таңда кәсіптерін жүргізуде. «Жастар» бағдарламасымен 2 жас 5 млн. теңге алып, жұмыстарын бастауда. «Ауыл аманаты» бағдарламасы бойынша 4 азамат 18300 мың теңге несие алып жұмыстарын жүргізуде. &nbsp;Сондай-ақ «Бастау бизнес» бойынша 7 адам мал шаруашылығына және қақпа жасау, кондитер өнімдерін шығару үшін қайтарымсыз грант жеңіп алды. «Аграрлық несие корпорациясынан» 1 азамат жылқы шаруашылығына 4 млн теңге алса, Аймақтық инвестициялық орталығынан 1 азамат жылқы шаруашылығына 3 млн теңге несие алды. Бүгінде ауылдық округте 26 дүкен, 2 наубайхана, 1 кондитер цехы, 4 тойхана, 2 кафе, 3 тіс емханасы, 5 шаштараз, 4 көлікке қызмет көрсету, 2 көлік жуу, 3 шағын тігін цехы, 3 ағаш шеберханасы, 3 шағын пластик цехы, 2 құс фермасы, 4 монша, 3 тамақтану орны жұмыс істеп тұр, – дейді ауылдық округ әкімі Эльмира Қазиева.</blockquote>Ауылдық округтегі құрылыс жөндеу және абаттандыру жұмыстарына келсек, санитарлық-тазалық айлығы аясында ауылымызды тазартуға және көркейтуге байланысты ауыл іші 8 аймаққа бөлініп, әр аймаққа жауапты етіп әкім аппаратының қызметкерлері, мен мекеме басшысылары (келісімі бойынша) бекітілді. Былтыр жоспарланған 2 388 мың теңге мемлекеттік сатып алу заңдылықтарына сәйкес жеке кәсіпкер «Исабаева» жеңімпаз болып танылып, ауыл сыртында заңсыз жиналған күл-қоқыстар шығарылды. Сонымен қатар елді мекенді абаттандыру мен көгалдандыру жұмыстарына «Атамұра-Жүсіп» ЖШС келісім шарт жасалып, канал мен су құбырларының көру құдықтары тазартылып, аптасына 4 рет, 250 үй мен №99 орта мектеп және «Достық» саябағына су айдалды. Сондай-ақ – Ауылдық округте атқарылып жатқан жұмыстар жетерлік. Соның ішнде ауыл паспортын, кіре берістегі «I Love Akai» және «Достық» саябағындағы кіші архитектуралық нысандарын күтіп ұстауға және, ауылда орналасқан аялдамаларды ағымдағы жөндеу жұмыстары жүргізілді. Ауылдық округінде орналасқан 17 бейнебақылау камераларына жөндеу жұмыстары және техникалық қызмет көрсетілді. Мұнан бөлек тұрғындардың автомобиль жолдарында қауіпсіздігін сақтау мақсатында ауыл ішілік асфальтталған көшелерге жолақ сызу және жолаушы жолақтарын сызумен қатар оқушылар макеті орналастырылды, – дейді ауылдық округ әкімі.&nbsp;Аудан әкімінің және аудандық депутаттардың қолдауымен аудандық бюджет есебінен ауылдағы М.Жұмабаев, Шәмшат жырау, Достық, Дүр Оңғар, Бәйтерек, Қызылорда, Қармақшы, Байқоңыр, Рүстембек жырау, Астана көшелеріне жарықтандыру үшін қаржы бөлініп, қолданыстағы бағаналарға жарық шамдары орнатылды.&nbsp;Ақай ауылында барлығы 39 көше бар. Ұзындығы 31,42 шақырым. Оның 41% асфальттанған, 99,9% жарықтанған. Оның ішінде: 36 – жарықтанған. 16 – асфальттанған, 21 – топырақты, 1 – қиыршық тасты, 1 – плита төселген.«Ауыл ел бесігі» бағдарламасы аясында Қазыбек би, Құдайбердиев, Баймаханов көшелеріне орташа жөндеу жұмыстарына қаржы бөлініп, жөндеу жұмыстары жүргізілді. Сондай-ақ, «Балалар ойын және спорттық тренажер алаңының» құрылысы салынды. Крайний әуежайына баратын жолдың сол жақ бетін аяқ сумен қамтамасыз ету мақсатында бір ұңғыма қойылып, жарықпен қамтамасыз етіліп, айналасы қоршалды. &nbsp;Ақай ауылдық округіндегі Жанқожа батыр, Астана, Бейбітшілік, К.Күншығаров, Б.Майлин, М.Әуезов көшелеріне техникалық паспорт жасатуға сондай-ақ, балалар ойын және спорттық тренажер алаңына, аяқ су жүргізуге арналған ұңғымаға жеке меншік құқығын беретін акт (көк қағаз) дайындауға қаражат бөлініп құжаттандырылды.Ауыл әкімінің 2023 жылдың 1 наурызында №67 шешімімен «Кар-Тел» ЖШС-не 5 жыл мерзімге уақытша өтеулі жер пайдалану (жалдау) құқығы табысталды. Қазіргі таңда мұнарасын қою жұмыстары жүргізілуде.Биылғы жылға жоспарланған біршама жобалар да бар. Аудандық бюджеттен М.Әуезов, Б.Майлин көшелерін жарықтандыруға жоба-сметалық құжат жасау үшін қаржы бөлініп, жоба сметалық құжатары әзірленіп, сарптаманың оң қорытындысы алынды. Сонымен қатар ауылдағы көшелерге орташа жөндеу жұмыстарын жүргізу мақсатында 5 көшеге жоба-сметалық құжат әзірлеуге қаражат бөлініп, қазіргі таңда жоба әзірленіп жұмысын бастайды.Мәдениет және спорт салаларына келсек, есепті кезең ішінде 42 мәдени іс-шара өткізілді. 6 үйірме, 1 үгіт бригада жұмыс жасайды. Ән, би, көркем сөз, драма, қуыршақ, мәдениет үгіт бригадасы барлығына 117 мүше тартылған. Спорт және дене шынықтыру. №16 балалар – жасөспірімдер спорт мектебінде 42 бала самбодан дәріс алуда.Ауылдық округте жұмыссыздықты азайту бағытында бірқатар жұмыстар жүргізілді. Оның ішінде жастар практикасына 10 азамат, әлеуметтк жұмыс орындарына 8 азамат, қайтарымсыз 11 адам, алғашқы жұмыс орнына 3 адам, ұрпақтар келісім шартына 1 адам, күміс жас жобасы бойынша 2 адам. Жалпы жыл көлемінде 126 адам жұмыс орнына орналасқан.

Қармақшы: Ақай ауылында былтыр 11 тұрғын қайтарымсыз грант алды

<a href="https://kyzylorda-news.kz/">Kyzylorda-news.kz</a> &nbsp;Бәсекелестік үстемдік етіп тұрған шақта бизнестің кез келген саласы сұраныста. Жастар, соның ішінде студенттер мүмкіндікті тиімді пайдаланып, бизнеске кеңінен жол ашуда.&nbsp;Бұл өз кезегінде кәсіпкерлік рухты қалыптастыруда. Сондай-ақ жеке кәсіп менеджмент, коммуникация және шығармашылық әлеуетті дамытуға көмектеседі.<h2 style="text-align:justify;">Оқу ошағындағы «Bambi» кафетериі</h2><blockquote>– Жасым 23те, архитектура мамандығының студентімін. Бизнес саласында жүргеніме 2 жылдан асты. Бұған дейін әртүрлі кәсіп көздерінің басы-қасында болып, біршама тәжірибе жинадым. Десе де барлығы тұрақсыз, арнайы межелеген уақытқа дейін ғана пайда әкеліп отырды. Осы кезге дейінгі тәжірибемді жинақтап, өз бағымды сынайтын сәттің туғанын түсіндім. Өз кәсібімді қолға алу үшін көп дүниеден бас тартып, тәуекелге бел будым. Бұл бизнесті жүргізуде ешқандай мемлекеттік грант немесе кәсіпкерлік несиенің көмегіне жүгінбедім. Алайда маған қолдау білдіруші отбасым, достарым мен жақындарым мотивация болды.Қазіргі кезде басқарып отырған бизнесім – шағын кофейня. Өзім оқитын университет қабырғасынан кофе, шай, шоколадтағы жемістер, алуан түрлі сусындар дайындайтын «Bambi» кафетериін аштым. Жастар ортасы болғандықтан қызығушылық танытатындар көп. Сабақ пен бизнесті қатар алып жүру мәселе туғызуы мүмкін, алайда кез келген проблеманың өз шешімі, қайыры болады. Шектеулердің сызып қойған шекарасын бұзу мол тәжірибе, пайдалы білім болатынына сенемін, – дейді студент кәсіпкер Нұрдәулет Амангелді.</blockquote><h2 style="text-align:justify;">«Zukhra brand» және «U</h2><blockquote>– Бұл салаға 16 жасымнан бастап білек сыбана кірістім. Біреу үшін ересек бойжеткен қыздың жасы болса, сол сәттегі бала мен үшін ең салмақты және батыл қадамдардың бірі болды. Мектепте оқып жүріп «Сыбаға» базарынан әйелдер киімін сататын дүкен аштым. Ал бүгінде кәсібім дөңгелеп тұр. «Zukhra brand» аталатын дүкеннің жұмысын үйлестіру анам екеумізде. Қазір 3-курс студентімін. Бойымды қайсарлық биледі ме, білмеймін. Әйтеуір өзімді бизнестің бейтаныс саласында сынап көруге шешім қабылдадым. Жуырда қасиетті Рамазан айында «Umma coffee» атты кофехана желісінің тұсауын кестім. Қолдау білдіріп келушілердің саны толассыз. Мұны мен берекелі бизнестің бастауы деп санадым.Бизнес жүргізу жас талғамайды. Жас болсаң да қорқынышқа бой бермей, өзіңе сенім артып, атқарғалы тұрған жұмысыңа жауапкершілік таныту қажет. Бұл кәсіптерді бастау үшін ешқандай банк есігін торуылдап, қарызға батуға беттемедім. Жас бизнес өкілдеріне де мұндай тәуекелге бел бумауын сұрар едім. Себебі өмір тосын сыйларға толы, әліптің артын бағуымыз қажет. Мен үшін оқу мен бизнесті қатар алып жүру қиындық тудырмайды. Өйткені мамандығым тамақтану саласымен ұштасып жатыр. Сондай-ақ бұл салада машықтанып, мол тәжірибе жинау – өмірлік азық болмақ. Бизнес арқылы қандай салада жұмыс істесем де қоғамға пайдалы болуды борышым деп есептеймін, – дейді кәсіпкер Қарақат Нұрбол.</blockquote><h2 style="text-align:justify;">Ai_Luv дүкені жұптар жүрегінде</h2><blockquote>– Мен жастайымнан ораторлық қасиетке ие болдым, сондықтан еліміздегі пікірсайыс турнирлеріне жиі қатысып, көбінде жеңіске қол жеткіздім. Осы талантымды жоғары бағалағандар курс ашып, сабақ өткізуімді сұрады. Мұны мүмкіндік деп қабылдаған мен өз қабілетімді пайдама жаратамын деп ниеттендім. Сол уақыттан бастап, сұранысқа ие инфобизнеспен, яғни онлайн форматта білім берумен, ораторлық қабілеттерді дамытумен айналысуды қолға алдым. Бұл менің бизнеске басқан алғашқы адымым.Сондай-ақ әлеуметтік желіде «Ai_Luv» атты онлайн дүкен аштым. Дүкенде жұптарға арналған «хит» өнімдер сатылады. Атап айтсақ, гипстен жасалған мүсіндер, картинаға сурет салу, романтикалық туындыларды жасау – жас жұптар арасында танымалдылыққа ие. Кәсібім оңға басып, қолдаушылардың саны көп болды. Жалпы бизнес бастауға ниеттенген адамның жүрегінде түгі және қайтпас қайраты болуы тиіс. Өз қабілеттерін оңтайлы жүзеге асыра білген адам несібесіз қалмайтынын, еңбектің түбі тек жеңіске әкелетінін түсінсе екен деймін, – дейді студент, жас бизнесвумен Айжан Орынбасар.</blockquote>&nbsp;Фото: imghub.ru

Студенттер табысты кәсібі жайында айтты

<a href="https://kyzylorda-news.kz/">Kyzylorda-news.kz</a> &nbsp;Жас келсе іске. Жастар – қоғам өзгерістеріне тез әрекет етуге қабілетті халықтың ең икемді мобильді тобы. Бүгінде жастар санатындағы азаматтар еліміздің 60 пайызын құрайды. 35 жасқа дейінгі азаматтар, жас отбасылар, жас кәсіпкерлер мемлекеттік тапсырмаларды жүзеге асыруда маңызды ресурс.Қазіргі таңда республика бойынша экономикалық белсенді халық 9 миллионға жетіп отыр. Оның 6,8 миллионы жалдамалы қызметкерлер болса, 2,1 миллионы өзін-өзі жұмыспен қамтушылар. Яғни жеке кәсіпкер, құрылтайшы, АҚ қатысушылары, түрлі жеке серіктестік, тәуелсіз жұмысшылар, өндірістік кооператив мүшелері дәл осы екінші категорияға жатады.Елімізде шағын және орта бизнестің дамуы, әсіресе, жастар кәсіпкерлігіне қолдау көрсету жылдан жылға қарқын алып келеді. Статистикаға сүйенсек, жас кәсіпкерлердің басым көпшілігі орналасқан аймақтар: Алматыда 16,7% құраса, Астанада 11,4% тұрады. 30 жасқа дейінгі кәсіп иелерінің 10%-дан астамы Түркістан облысына тиесілі.Аталмыш бағыт аймағымызда да назардан тыс қалып жатқан жоқ. Мәселен, облысымызда 2023 жылы шағын және орта кәсіпкерлік бойынша 71 147 субъекті тіркелген болса, оның 43,3 пайызын жас кәсіпкерлер құраған. Яғни, аймақта кәсіптің көзін тауып, тіршілігін табысты дөңгелетіп отырған 30 835 жас бар.Облыстық кәсіпкерлер палатасының мәліметінше, 2023 жылы аймақта шағын және орта кәсіпкерліктің 4716 жобасына 68 млрд теңге сомасында қаржылай қолдау көрсетілген. Атап айтар болсақ, «Кәсіпкерлікті дамытудың ұлттық жобасы» аясында жалпы несие портфелі 31 млрд теңгені құрайтын 837 жоба субсидияланған. Оның ішінде, жалпы несие портфелі 6,1 млрд теңгені құрайтын 235 жоба жас кәсіпкерлердің үлесінде. «Қызылорда» өңірлік инвестициялық орталығы микроқаржы ұйымы арқылы 372 жоба 3 млрд теңгеге қаржыландырылса, оның 12,7 пайызын жас кәсіпкерлер құрайды. Яғни, жас кәсіпкерлердің 52 жобасына 382,4 млн теңге көлемінде қаражат бөлінген. Ал аграрлық несие корпорациясы арқылы жастардың 492 жобасы 2,3 млрд теңгеге қаржыландырылған.Шағын және орта бизнес кез келген мемлекеттің экономикасында маңызды рөл атқарады. Өз кәсібін ашу дағдылары мен мүмкіндіктерін меңгере отырып, жастар ең алдымен өзін жұмыспен қамтамасыз етеді. Бұл еңбек нарығының басқа қатысушылары үшін де жұмыс орындарын құруға тікелей әсер етеді.Жаңа бизнес-идеяларды іске асыруға 2023 жылы аймағымызда 400 АЕК, яғни 5 млн теңгені құрайтын мемлекеттік гранттар 1547 жобаға 2,2 млрд теңге сомасында табысталып, оның ішінде жас кәсіпкерлердің үлесі 38,6 % яғни 857,6 млн теңгеге 597 жобаны құраған.Шағын және орта бизнесті қолдау және дамыту бағытындағы шаралар биыл да іске асырылуда. Қазірдің өзінде кәсіпкерлікті қаржылай қолдауға бюджеттен 19 млрд теңге қаржы бөлініп отыр. Оның ішінде банк несиелерінің пайыздық мөлшерлемелерін субсидиялауға және ішінара кепілдік беруге 2 млрд теңге, жастардың кәсіпкерлік бастамасына 2,5 пайызбен несие беруге 2 млрд теңге, «Ауыл аманаты» аясында 5,7 млрд теңге, жұмыссыз азаматтардың кәсіпкерлік бастамасына қайтарымсыз гранттар беруге 2,3 млрд теңге қарастырылған.Бұл мемлекеттік қолдау шараларын алуға аймақ кәсіпкерлерінің, оның ішінде жастардың мүмкіндіктері бар.Жастар кәсіпкерлігін қолдау – тың идеялардың, инновациялардың, жұмыс орындарын құрудың және азаматтардың өмір сүру сапасын жақсартудың қозғаушы күші. Мұндай шаралар жастар арасында кәсіпкерлік белсенділікті арттыруға септігін тигізіп, елдің экономикалық өсуі мен өркендеуіне ықпал етеді.<h2 style="text-align:justify;">Жас кәсіпкер нені білуі тиіс?</h2>Шағын және орта бизнестің, әсіресе жастар кәсіпкерлігінің дамуына кедергі келтіретін бірнеше мәселе бар. Банктер мен инвесторлар көбінесе жас кәсіпкерлерді тәуекелі жоғары қарыз алушы ретінде қарастырады, бұл несие мен инвестиция алуды қиындатады. Дегенмен қазіргі таңда кәсіп ашуды көздегендер мемлекет тарапынан өз деңгейінде қолдау тауып отыр деуге толық дәлеліміз бар. Қажетті қаражатқа қол жеткізу жыл санап жеңілдеп келе жатқаны көңіл қуантарлық жайт.Екіншіден, күрделі бюрократиялық процедура мен жоғары әкімшілік жүктеме жас кәсіпкерлерге әжептеуір қиындық туғызады. Бизнесті бастау және жүргізу уақыт пен ресурсты, сондай-ақ жиі тексерулер мен көптеген ережелерді талап етеді.Үшіншіден, кәсіби білім мен дағдының жоқтығы тағы бір мәселе. Жас кәсіпкерлерде көбінесе бизнесті жүргізу, маркетинг, қаржы немесе заң аспектілері туралы жеткілікті білім жоқтың қасы. Осының салдарынан кәсібін жаңадан бастаған жас кәсіпкер өз саласындағы сарапшылармен бәсеке кезінде үлкен кедергілерге ұшырайды.Сондықтан жас кәсіпкерлерге бизнесті жүргізудің түрлі аспектілері бойынша кеңес беретін мамандандырылған бизнес-инкубаторлар мен стартап орталықтарына жүгінген абзалырақ. Бизнесті жүргізу, нарықты зерделеу және бизнес жоспарын әзірлеу бойынша білімін мейлінше толықтыру қажет. Бұл кез келген жас кәсіпкердің кәсіби деңгейі мен бәсекеге қабілеттілігін арттыруға ықпал етеді.&nbsp;Фото: topsov.com

Аймақта 30 835 жас кәсіпкер бар

<a href="https://kyzylorda-news.kz/">Kyzylorda-news.kz</a>&nbsp;Бүгінде Қармашы ауданында кәсіпкерлікке бет бұрған тұрғындарға қайтарымсыз грант негізіндегі қаржылар, жеңілдетілген несиелер бөлу жұмыстары қарқынды жүргізіліп келеді. Осылайша адалдық пен ерінбей еңбек етуді мақсат еткендер шағын кәсіптен-ақ көктеп, көгеріп отыр. Соның бірі Төретам кентінің тұрғыны – Бибігүл Жылкелдиева. Ол бүгінде шағын наубайхана ашып, нан өнімдерін жергілікті халыққа ұсынуда.&nbsp;«Жас келсе, іске» демекші, ерінбеген адам табыстың көзін табады. Бибігүл бойындағы жастық жалынын жұмысқа, кәсіпке қарай арнағанды жөн көреді.Бала күнінен анасының тәтті тоқашына үйреніп өскен оған бұл іс еш қиындық туғызбай, керісінше одан әрі дамытуды ойлайды. Өткен жылы бизнес-идеялар негізіндегі мемлекеттік «Ұлттық жоба» шеңберінде грантқа қатысып, қайтарымсыз қаражат алады. Алған қаражатына қажетті құрал-жабдықтарын алып, вокзал маңындағы шағын дүңгіршек пен жанындағы 2 бөлмелі жерді наубайхана қылады. Содан бері шағын кәсібін дөңгелетіп, кент тұрғындарын тәтті нанмен қуантып отыр.<blockquote>– Өзім біраз уақыт жұмыссыз отырдым. Үйде қарап отырмай кондитерлік өнімді өздігімнен үйрендім, қыздарыма да үйреттім. Сол уақыттан бері түрлі тәттілерді пісіріп, тапсырыс қабылдап жүрдім. Былтыр Бибігүлім «Кәсіп бастайық, тәуекел етейік» деген тілегіне ата-ана ретінде қолдау көрсетіп, қызымыздың бастамасына қуана келістік. Жолдасым Серікбай қазірде зейнеткер. Осы нан өнімдеріне қажетті заттарды алып көмектеседі. Өзім 4 баланың анасымын. Ұлым Талғат Байқоңыр қаласында жұмыс істейді. Индирам биыл Астанадағы ЕҰУ оқуға түсті. Кенже қызымыз Іңкәр 2 сыныпта оқиды, – дейді анасы Марзия апай.&nbsp;</blockquote>Қазір қалада болсын, ауылда болсын, азық-түлік дүкендері мен &nbsp;сауда орындарының ішінде сұранысқа ие тауарлардың бірінші тізімін күнделікті тұтынатын нан және нан өнімдері құрайды. Ал сапасы жоғары нан-тоқашқа тұтынушылар тарапынан сұраныс күннен-күнге артып келеді. Себебі таңертеңгілік күйбің тіршілікпен таңғы ас ішіп үлгермегендер осындай тәтті нанмен жүрек жалғап алады.<blockquote>– &nbsp;Мемлекет басшысы әрдайым өзін-өзі жұмыспен қамтығандарды тіркеу үдерісін мейлінше жеңілдетіп, оларға мемлекет алдындағы міндеттерін адал атқару тиімді болатындай жағдай туғызу қажет деген ойға басымдық береді. Сол себепті де түрлі бағдарлама қолға алынып, қарапайым жанның кәсіпкер атануына, ал кәсіпкердің өз ісін одан әрі үлкейтуіне жағдай жасалуда. Сондықтан халық қолда бар мүмкіндіктен айырылып қалмай, қажетіне жарата білсе деймін. Осы жерді алар кезде біздің алдымыздағы кісілердің біраз заттары болды. Қолданылған пештері бар-ды. Бірақ жаңа кәсіпті жаңа заттармен бастағанды дұрыс көрдім. Пештерді арнайы Алматыдан алдырдық. Тек қана нан өнімдерін дайындап қоймай, жартылай фабрикатталған заттарға да тапсырыс қабылдаймыз. Сонымен қатар, пирожки, бәліш, қалаш, жұмсақ көп рогалики, бал тортын әзірлейміз. Фаст-фудтың ішінен бургер, ход-дог, донер, пицца секілді түрлерін дайындап сатамыз. Орталық жер болғандықтан адамның қарасы үзілмейді. Мұнымен қоса дүкендерге де өткіземіз. Аллаға шүкір, ақырындап алға жылжып келеміз. Келешекте осы кәсібімізді кеңейту жоспарда бар, – дейді кәсіп иесі. &nbsp;</blockquote>Наубайхана өнімдері тұтынушы тарапынан жоғары бағалануда. Тұрақты тапсырыс беретін тұрғындармен қоса сұраныс саны күннен-күнге көбеюде. Ең бастысы, дайындалған өнім сөреде тұрып қалмайды. Ал баға – қолжетімді, сапа – көңілге қонымды. Кәсіп қылған адам қашанда жетістікке, мақсатына жетеді. Оны көзімізбен көріп келеміз. Ебін тауып әрекет етсеңіз, кәсіпті дөңгелетіп әкетуге болады. Әркім тек өзіне ыңғайлы, бейіміне қарай еңбек етсе болғаны.

Қайтарымсыз грант алған кәсіпкер шағын наубайхана ашты 

<a href="https://kyzylorda-news.kz/">Kyzylorda-news.kz</a> Қызылордалық Бекзат Жақып – қолөнер, ұсталық пен зергерлікті атадан балаға мирас етіп келе жатқан кәсіпкер. «Әулетімізде бұл өнер төртінші ұрпақ ретінде маған жалғасқан. Өтеу, Жақып, Нақып деген аталарымыз қолөнерлікті кәсіп еткен. Әкемнің есімі – Әліп. Ұсталықты да, зергерлікті де бала кезімде әкемнен үйренгем.&nbsp; Кеңес үкіметі кезінде ұлттық дүниелердің бәрі жатық боп кетті. Зергерлер сол кезеңде халық жауына айналды. Бабаларымның тығылып, ешкімге көрсетпей жүрген өнері маған қанмен дарыған екен» дейді зергер. Айта кетейік, ассортиментте белдік, зергерлік бұйымдар, саз балшықтан жасалған дүниелер бар. Ұлттық бұйымдарды жасауға арналған күмісті жан жақтан, соның ішінде банктерден немесе Астана қаласынан арнайы ресми дүкенінен сатып алады екен. Ұстаның ұсталық пен зергерлік жұмыстарының басы қасында болатын қолғанаты, көмекшісі – ұлы. Өзінің айтуынша, әкесінің жанында жүріп қолөнерге қолы біраз жаттығып қалғанымен, студент болғандықтан шеберханада отыруға қолы бос бола бермейді. &nbsp; – &nbsp;Тұрақты тұтынушыларым көбеюде. Бұрынғымен салыстырғанда қазір тапсырыс берушілер мен қызығушылар саны артқан. Тіпті қазақстандықтар ғана емес, басқа жақтан да тапсырыс беріп жатады. Мәселен, қамшыны көбіне әйел адамдар сатып алады және тапсырыс береді. Жалпы оны үйіне іліп қою үшін алып, киелі зат ретінде қарайды. Қамшының бөліктерінің бәрі табиғи өнімдерден жасалады. Үшқоңыр ауылының тобылғысы мен бұқаның қайысынан құрастырамын. Ал зергерлік бұйымдарға қажет күмісті жан жақтан алдырамын. Сазсырнайдың сазы – өзіміздікі. Керамика, яғни, қыш материалымен бұйым жасайтындар топырағын Өзбекстаннан, Алматыдан алдыратын. Мен Сыр елінің балшығын пайдаланудамын. Сазсырнайды, үскірікті көбіне кішкентай балаларына ойыншық ретінде тапсырыс береді. Мысалы, үскірікпен ойнауға, әуен шығаруға жоғары музыкалық қабілеттің қажеті жоқ. Телефонға үңіліп, дүкеннің пластмасса ойыншықтарына таңданбайтын балаларға ойын ретінде де, зейіні мен музыкалық қабілетін дамыту үшін де үскірік таптырмас құрал болмақ. Әсіресе, соңғы кезде үскірікке тапсырыс беретіндер қатары артуда. Балам дамысын деген жас атааналар жақсы таңдау деп ойлаймын, – дейді ұста. Қолөнерші кәсіпкердің ұсталық пен зергерлікпен айналысып жүргеніме биыл отыз үш жыл толыпты. Жан-жақтағы қолөнер саласының жаңалықтарына құлақ түріп, түрлі қалаға, әр қилы көрмелерге барып, халықаралық. республикалық көрмеден ұлттық бұйымдары орын алатын ол жыл өткен сайын тұтынушының талғамы нені талап ететінін, қандай зат сұраныста екенін біліп жүретінін айтады. Тіпті қолөнер бұйымдарын жасауға тың идея, жаңа өзгерістер де осындай қолөнершілердің басы қосылатын көрмелерден кейін туындайды екен.&nbsp; «Адамда арман азайған ба? Жасымыз келген сайын ата-бабамнан мұра боп қалған қолөнерді өзім де ұрпағыма, жастарға дарытып, шәкірт тәрбиелегім келеді. Қолөнер, осы ұлы өнер үзілмесе екен деймін. Әкеден балаға қалатын байлық пен мұра – ақша емес, өнер мен тәрбие болуы керек» дейді ол.

Қазақстан және Қызылорда облысының жаңалықтары: Кәсіпкерлік