<a href="https://kyzylorda-news.kz/">Kyzylorda-news.kz</a> &nbsp;Қорқыт ата атындағы Қызылорда университетінде «Kyzylorda Hub» бизнес инкубаторы жұмысын жалғастыруда. Орталық студенттердің кәсіпкерлік жобаларын үйлестіріп, дамытуға көмек беріп келеді. Қазір мұнда білім алушылар өз жобасын дамыту үстінде. Орталықтың көмегімен студенттік жобаларға миллиондаған инвестиция да құйылған.&nbsp;Осы орайда Қорқыт Ата атындағы Қызылорда университеті кәсіпкерлік орталығының жетекшісі Жанарыс Тубекбаев жас кәсіпкерлерге арналған бірнеше сауалдарға жауап берген еді.–&nbsp;Жанарыс Алтынбекұлы, стартап жобалардың басы-қасында жүргеніңізге біраз уақыт болды. Бүгінде кәсіп бастасам, идеямды игілікке айналдырсам деген жастардың қатары артты ма?<blockquote>– Кәсіпкерлік саласына келгеніме 5 жылдан асты. Бұл салаға қызығушылық мектеп қабырғасынан басталды. Сол кезден бастап кәсіпкерлікті меңгеріп, қазіргі таңда медиа және білім саласында кәсіп жүргізудемін. Сонымен қатар жастарға кәсіпкерлік әліппесін үйретіп келемін. «Білімді болу үшін оқу керек.&nbsp;Бай болуға кәсіп керек» деп Абай атамыз айтпақшы, әрбір адам жұмысымен қатар кәсіпті серік етуі маңызды. Жаһандану заманында жанама табыстың болғаны да жақсы. Бұған қоса негізгі мамандыққа сай бизнес ашуға болады, яғни мұғалім болса қосымша мектеп ашуға, ал дәрігер болса болашақта жеке клиниканың іргетасын қалап, бизнесті өрбітуге болады. Жастарға осыны жиі айтамын. Себебі бизнес ашу маңызды. Неге? Өйткені, бизнестегі алғашқы қадамдар тәжірибе жинақтауға мүмкіндік береді. Ол қалай? Көптеген студентер оқу аяқталғанша тұрақты жұмысқа тұра алмайды, бұған себеп дипломның жоқтығы. Ал егер өз саласы бойынша шағын кәсіп ашса, ол жас маман үшін үлкен сабақ болмақ. Оған қоса жастық шақтағы қаржылай қателіктер жаңа мүмкіндікке жол ашып, ысылуға мүмкіндік сыйлайды. Әлем бойынша табысты кәсіп ашқан адамдардың орташа жасы – 34-35. Бұл – дәл осы жасқа жеткен кәсіпкерлер жастық шақтағы олқылықты ескеріп, бизнесте бағытын тапты деген сөз. Қазір біздегі қарқын жаман емес, талапты, талантты жастардың аяқалысы қуантарлық деп айта аламын.</blockquote>–&nbsp;Қандай бизнес салалары қазір сұраныста және нәтижелісі қайсы?<blockquote>– Сұранысқа ие бизнес салалары – өндіріс, инновациялық технологиялар, IT және медиа жобалар. Табысты бизнес жобалар деп білім, медицина, балаларға арналған қызмет түрлері, өндірістік нысандар, жеңіл өнеркәсіп, IT технологияларды айтар едім.</blockquote>– Өткен жылы іске қосылған инкубациялық бағдарламалар туралы айтсаңыз…<blockquote>– Осы уақытқа дейін сұранысқа ие болған бағдарламалардың бірі – «KBH startup». Былтыр «Startup Joly» инкубациялық бағдарламасы жұмысын бастады. Мақсаты – инновациялық стартаптар мен кәсіпкерлік бастамаларды қажетті ресурстармен, біліммен және қолдаумен қамтамасыз ету, кәсіпкерліктің әртүрлі аспектілері, соның ішінде идея, маркетинг, сату, қаржы және құқықтық мәселелер бойынша дағдыларды арттыру, инновация, технология және кәсіпкерлік саласындағы халықаралық аренада аймақ пен елдің бәсекеге қабілеттілік деңгейін арттыру. Жобаның ұзақтығы – 6 апта. Жастарды 5 апта ішінде семинар-тренингтерге қатысып, практикалық тәжірибе алуға бағыттаймыз, қалған 1 аптада жоба дайындалып, Demo Day кезеңіне шығады. Demo day – инвесторлар және де басқа қызығушылығы бар ұйымдардың жобаны қарап, іріктеуден өтуі. Өткен жылы осы бағдарлама 2 мәрте ұйымдастырылды. Жалпы жүлде қоры &nbsp;2 млн теңгені құрады.</blockquote>– Сұхбатыңызға рақмет!&nbsp;Фото: Қорқыт ата университетінің медиа орталығы

Өңірдегі талапты, талантты жастардың аяқалысы қуантады

<a href="https://kyzylorda-news.kz/">Kyzylorda-news.kz</a> &nbsp;Қазақ пен қолөнер егіз ұғым. Тамыры тереңге жайылған ұлттық құндылықтарымызды қолөнермен біріктіріп, оны өзгеге үйрету шын мықтының ғана қолынан келеді. Туындыларымен таңғажайып дүниелерді жасайтын қолөнер шеберінің бірі – Бақытгүл Сатыбалдиева 14 жылдың ішінде 200-ге жуық шәкіртке бар білгенін үйретіп, өнерге баулыған. Кәсібінен нәсібін тауып жүрген шебер бүгін Өңірлік коммуникациялар қызметінің ақпарат алаңында қонақ болып, БАҚ өкілдеріне өз қолынан шыққан керемет туындыларын көрсетті.<blockquote>– Қолөнер – қазақтың төл өнері десем артық айтқандық емес. Себебі, біздің аналарымыз сонау ғасырдан бері бұл істі жанына серік етіп, күнделікті тұрмыста қолданатын болған. Мен де бала кезімнен түрлі қолөнер бұйымдарын жасап көріп, ерекше қызығып өстім. Бойжеткен шағымда кесте тігуді меңгердім. Уақыт өте келе сол қасиеттерімді дамытып, бүгінде киізден киім тігіп, оны бастырып, өрнектеу арқылы қабырғаға ілетін түрлі картиналар жасаймын. Осы қолөнер бұйымдарын жасаумен айналысып келе жатқаныма бүгінде 14 жылдан асыпты. Осы уақыт аралығында 200-ге жуық шәкірт тәрбиелеп, бар білгенімді үйретудемін. Уақыт өткен сайын қолөнер бұйымдарын жасаудың сан түрлі әдісі шығуда. Оның барлығын лезде меңгеріп алуға ең бірінші уақыт одан кейін ұқыптылық қажет. Мен қолөнердің бұйымдарын жасаудағы ең сүйікті жұмысым – киізбен және кестемен өрнектеу. Осы екі өнерімді терең дамыту үшін барымды салудамын Жалпы 2020 жылдан бастап өзімнің «Art dizain» деп аталатын курсымды ашып, қыз-келіншектерге қолөнер бұйымдарын жасаудан сабақ өткіземін. Қыз-келіншектердің осы іске қызығушылығынан шабыт аламын. Олардың қолынан шыққан туындыларын барынша елге көрсетуге тырысамыз. Бұрын аналарымыз киіз басу ісіне аса ден қойып, күнделікті тұрмыс-тіршілігі үшін көп пайдаланған ғой. Ал, қазір бұл үрдіс бәсеңдеп қалды. Яғни, киізді, киізден жасалған бұйымдарды қолданатындар саны азайды. Мен керісінше, осы киізден киіп тігіп, түрлі қабырғаға ілетін ұлттық нақыштағы суреттерді басып, дайындаймын. Одан бөлек, бас киімдерді қазіргі сән үлгісіне сай тоқимын. Алдағы уақытта ерекше қолөнер бұйымдарын жасауды мақсат етудемін, - деді Бақытгүл Өтеубайқызы.</blockquote>Фото: Қызылорда облысының Өңірлік коммуникациялар қызметі

Қызылордалық қолөнер шебері 200-ге жуық шәкірт тәрбиелеген

<a href="https://kyzylorda-news.kz/">Kyzylorda-news.kz</a>&nbsp; Нәтижелі жұмыспен қамтуды және жаппай кәсіпкерлікті дамытуға арналған мемлекеттік бағдарламалар халықты еңбекке шақыруға, оларға кәсіп ашып беруге, әлеуметтік аз қамтылған отбасыларды қолдауға бағытталғаны белгілі. Бүгінде ауданда аталған бағдарламалардың &nbsp;ұсынған мүмкіндіктерін тиімді пайдаланып, өз кәсібін бастағандардың қатары көбеюде. Сондай-ақ қайтарымсыз гранттардың жемісін көріп жүргендер де арамызда жетерлік. Мемлекет ұсынған мүмкіндікті құр жібермей, қайтарымсыз грантқа қол жеткізген кәсіпкердің бірі – ІІІ интернационалдық Әсем Нұрмаханова.&nbsp;Қыз баласы жастайынан тамақ пісіруге, киім тігуге икемді келеді емес пе? Кейіпкеріміз Әсем де бала күнінен тәттілер әзірлеуге қызығыпты. Балалық шақтан бастау алған қызығушылық бүгінде кәсібіне айналып, оның жемісін көруде. Алғашында өз қаражатымен тапсырыс қабылдауды бастаған ол, сұраныс арта бастаған соң кәсіпкер атануға бел байлайды. Ауылдағы кәсіпкерлік ісі бойынша маманға жүгініп, кеңес алады. Маманның нұсқауымен «Бастау бизнес» жобасы аясында кәсіпкерлік білімін жетілдіреді. Бизнес жоспарын да ойдағыдай қорғап, 2020 жылдың соңында қайтарымсыз грант иеленеді. Берілген грант қаржысына торт пісіруге арналған пеш пен кәсіби миксер сатып алып, кәсібін дөңгелете береді. Әсемнің торт дайындап, көптің көңілінен шығып жүргеніне қазір төрт жылдай уақыт болған. Алғашында үйден басталған кәсіп, қазір жұмысын шағын цехта жалғауда. Қосымша бір адамды жұмыспен қамтып отыр.<blockquote>– Торт пісіру ісіне қатты қызықтым. Тәттілерді өз қалауымша сәндеп, дәмін келтіріп отбасымды қуантқым келді. Торт пісіру ісіне бар жан-дүниеммен кірісемін. Балалық қызығушылықпен бойыма сіңген қасиет бүгінде өмірімнің мәніне, тірлігімнің көзіне айналып отыр. Қазір де әрбір тәттіні ерекше махаббатпен дайындаймын. Заманауи торттардың барлық түрін, тұтынушының талғамына қарай жасап беремін. Көршілес ауылдардан да тұрақты тұтынушыларым бар. Тапсырыстан бөлек, ауылдың дүкендеріне де өз өнімдерімді қолжетімді бағада қойып жүрмін, – дейді кәсіпкер.&nbsp;</blockquote>Ойлап қарасақ, асты дәмді ету кез келгеннің қолындағы іс емес. Сондықтан да тағамы тәтті асханалар мен өнімі ерекше дүкендерді тұрғындар бекер іздемесе керек. Кез келген өнім дайындайтын орынның мол табыс табуы сондағы аспаздың ерекше ептілігіне тікелей байланысты. Осы ретте Әсемнің тәттілеріне күмән келтіруге болмайды. Оның қолынан шыққан самса, чебуреки, тәтті пирогтар бүгінде үлкен сұранысқа ие. Дүкенге келушілердің де, той-жиынға арнайы тапсырыс берушілердің де қатары көп. Осындай дәмді тағамдар жасайтын кәсіпкер күнделікті табысына көңілі толатынын айтады.<blockquote>– Жеке кәсіп ашып, көпшілікке тәтті тағамдар түрін ұсынып, олардан алғыс алып отырғаныма қуаныштымын. Әлі де алға қойған мақсатым көп. Жеке кәсібімді жылдар өте ұлғайтқым келеді. Санаулы тағам түрлерімен шектеліп қалмай, олардың санын арттыру да жоспарда бар. Тәтті пісіруге ешқашан ерінген емеспін. Керісінше бұл іс мені шабыттандырады. Өзімнің сүйікті ісіммен асханада таңнан кешке дейін жүре беруге дайынмын. Тек тапсырыс берушілер мен дүкен тұтынушыларының көңілінен шығуды ойлаймын, – дейді ол.&nbsp;</blockquote>Бүгінде туған күндердің тортсыз өтпейтіні белгілі. Сондықтан да тортқа деген сұраныс көп. Егер өнім көңілден шықса, тұтынушының қайта тапсырыс беретіні анық.&nbsp;<blockquote>– Қашанда дастарханымның сәні болатын торттарымды Әсемге тапсырамын. Себебі әрдайым балғын, дәмі тіл үйірердей, әрі жұмсақ болады. Құрамы да сапалы заттардан жасалады. Үнемі жұмысына жауапкершілікпен қарайды. Айтқан уақытымда дайын тұрады. Әр тортты ерекше дизайнмен дайындап береді. Мұндай өнерді бағаламауға болмайды. Ісіне береке тілеймін, – дейді ауыл тұрғыны Рима Тұрманова.</blockquote>Адам өзіне ұнайтын іспен айналысқанда ғана, еңбегінің жемісін көреді. Ал өзің қалаған іспен айналысуға бүгінде мемлекеттен берілер көмек көбеюде. Бұл кәсіп бастауға ниетті жандар үшін қуантарлық жайт. Мемлекет ұсынған 555 мың қаржымен бастау алған кәсіп, қазір өркен жайған. Күнделікті табысын ыждаһатпен орынды жұмсай білген жан цехын жаңа дүниелермен толтырған. Бұл ретте қаржылық сауат пен таза маңдай терді айта кеткен жөн. Төрт жылғы табанды еңбектің нәтижесі – тұтынушы көңілінен шығатын жұмысы жүйелі цех. Бұл ретте кейіпкеріміз мемлекеттен көмек алғаннан кейін де, тынымсыз еңбектену керектігін айтады. Иә, көмекті алу бір бөлек, оны әрі қарай жалғастыру бөлек дүние.<blockquote>– Жастар жас шыбық секілді, қалай майыстырсаң сонда майысады. Дегенмен, адамның өзінің алдына қойған айқын мақсаты, өзіндік пікірі болуы керек. Сол мақсатқа жету үшін аянбай еңбек еткен дұрыс деп ойлаймын. Сонда ғана жақсы жетістіктерге жете аласыз, – дейді Әсем Нұрмаханова.&nbsp; Кәсіпкердің алдағы уақытта осы ісін жандандырып, ары қарай үлкен жобаға айналдыру жоспарында бар. Ендеше, жалынды жастың тілегінің орындалуына біз де тілекшіміз. Алдына үлкен мақсат қойған жан сол жолдан таймаса, биіктерге жетері хақ.</blockquote>&nbsp;

Мемлекеттен қайтарымсыз қаржы алған қармақшылық тәтті өнім бизнесімен айналысуда 

<a href="https://kyzylorda-news.kz/">Kyzylorda-news.kz</a> &nbsp; Мемлекеттік бюджетке заңды және жеке тұлғалардан белгілі бір мөлшерде түсетін міндетті төлемдер бар. Жалпақ тілмен айтқанда салық деген ұғым бар. Оның экономикалық мәні халық табысының белгілі бір мөлшерін мемлекет үлесіне жинақтау.2023 жылдың 20 наурызында бөлшек сауда салығының мерзімі шектеусіз және арнайы салық режимін қолдана алатын қызмет түрлерінің тізбесі кеңейтілген болатын. Осыған байланысты Салық кодексінің 696-3 бабы, 5 тармағын негізге ала отырып, аймақ кәсіпкерлерінің бизнесін қолдау және салық ауыртпалығын жеңілдету мақсатында бөлшек салық мөлшерлемесін облыс көлемінде 50%-ға, яғни 4 пайыздан 2 пайызға төмендету мүмкіндігі қарастылған еді.Осы ретте «Қазалы ауданы бойынша бөлшек салықтық арнаулы салық режимін қолдану кезінде мөлшерлеме мөлшерін төмендету туралы» Қазалы ауданы мәслихатының 2023 жылғы 30 маусымдағы №52 шешімімен бекітіліп, нормативтік құқықтық актілерді мемлекеттік тіркеудің тізіміне №8437-11 енгізілді.Ауданымызда осы жеңілдікті пайдаланып отырған 14-тен астам кәсіпкер бар. Солардың бірі қазалылық 2001 жылдан бері жеке кәсіппен айналысып жүрген «Азиза М» ЖШС-нің директоры Махантаева Аққағаздан жеңілдікті қашаннан бері қолданып жүргендігі туралы сұрап көрген едік.– Мен жалпы 1993 жылдан бастап кәсіпкермін. 2001 жылға дейін кішігірім әр түрлі кәсіптермен айналысып жүрдім. Осы ізденісімнің арқасында көп жетістіктерге жеттім деп айтсам артық етпейді. Білім алу, іздену өмір бойына жасалыну керек әрекеттер деп білемін. Міне осы жеңілдікті алғашқылардың бірі болып пайдалануым да осы үздіксіз ізденісімнің арқасы деп ойлаймын. Салықты 2 пайызбен төлеуге мүмкіндігім барда не үшін 3 пайыз төлеп жүрмін деп осы ақпараттарды естіген бойда, 2023 жылдың қараша айының бірінен бастап осы мүмкіндікті пайдаланып отырмын. Осы орайда кәсіпкерлікті қолдау мақсатында жұмыстанып жүрген барша азаматтарға алғыс білдіремін,– дейді кәсіпкер.&nbsp;Қазалы ауданы бойынша шағын және орта кәсіпкерлікті дамыту саласындағы атқарылған жұмыстарға тоқталып өтсек.Бүгінгі таңда, ішкі нарықта азық-түлік қауіпсіздігін қамтамасыз ету Мемлекет Басшысы қойған басты міндеті болып табылады.Бұл ретте Қазақстан Республикасының Сауда және интеграция министрлігі "Сапалы өнім" жобасының тұжырымдамасын әзірледі.Жобаның міндетіне тұтынушыларды қорғау жөніндегі үкіметтік емес секторды, жергілікті атқарушы және өкілді органдардың, сондай-ақ, кәсіпкерлік қоғамдастықтың өкілдерін ішкі нарықта отандық өндірушілер мен тұтынушыларды қауіпті және сапасыз өнімдерден қорғауды қамтамасыз ету жөніндегі жалпыұлттық мүдделерді іске асыру, сондай-ақ, адал бәсекелестікті дамытуға жағдай жасау болып табылады.Сонымен қатар, «Сапалы өнім» жобасын республика бойынша одан әрі кеңінен іске асыру мақсатында «Сапалы өнім» қоғамдық қоры ашылып, жұмысын бастауда. Аталған қордың негізгі қызметіне ішкі нарықта отандық өндірушілер мен тұтынушыларды қауіпті және сапасыз өнімдерден қорғауды қамтамасыз ету жөніндегі жалпыұлттық мүдделерді іске асыру, сондай-ақ адал бәсекелестікті дамытуға жағдай жасау болып табылады.Статистикалық мәліметтерге сәйкес, 2024 жылдың 1 наурызына тіркелген шағын және орта кәсіпкерлік (бұдан әрі – ШОК) субъектілерінің саны 5 786 бірлікті құрады. Оның ішінде: 292 заңды тұлға, 4132 жеке кәсіпкер, 1362 шаруа қожалығы болып табылады.Жұмыс жасап тұрған ШОК субъектілерінің саны 5611 бірлікті құрады. Белсенділік көрсеткіші 97,0 пайыз.2024 жылдың 1 наурызына ШОК субъектілерінің салық түсімі – 144,8 млн.тг. құрап отыр.«Бизнеске арналған үкімет» КММ-сі арқылы аудан кәсіпкерлеріне 2024 жылдың 2 айында 341 қызмет көрсетілген.Өнеркәсіп өнімі 3 800 миллион теңге болып, өткен жылдың тиісті кезеңімен салыстырғанда нақты көлемінің индексі 100,3%- ды құрады.Өңдеу өнеркәсібінде 3 239 миллион теңгенің өнімі өндіріліп, өткен жылдың тиісті кезеңімен салыстырғанда нақты көлемінің индексі 100,2%-ды құрады.Бөлшек сауда көлемі 1 868,0 миллион теңге болып, өткен жылдың тиісті кезеңіне нақты көлемінің индексі 106,3 %-ды құрады.2023 жылғы 1 қазандағы жағдай бойынша шағын кәсіпкерлік субъектілерінің өнім шығарылымы 16 909 миллион теңге, өткен жылдың тиісті кезеңіне 102,8%-ды құраса, жұмыспен қамтылғандар саны 10 265 бірлік, өткен жылдың тиісті кезеңіне 105,7%.Кәсіпкерлікті қаржылай қолдауға қатысты да тың ақпаратты бөлісуді жөн санадық. Мәселен, Қазалы ауданы кәсіпкерлеріне сауда айналымын және өндіріс түрлерін ашу мен дамыту мақсатында қаржы ұйымдары тарапынан 35 жобаға жалпы көлемі 262,0 миллион теңге болатын несие қаражаты берілген.Анықтамалық: екінші деңгейлі банк арқылы (бағдарламадан тыс – 25 жоба 103,2 млн.теңге, бағдарлама арқылы – 5 жоба 124,8 млн.тг.) 30 жоба 228,0 млн.теңге;Бірыңғай кешенді бағдарламасына орай, «Бизнестің жол картасы 2025» бизнесті қолдау мен дамытудың мемлекеттік бағдарламасы бойынша ауданымыздағы 6 жобаға құны 124,8 млн.теңге несие қаражаты берілген.«Іскер», «Агробизнес» бағдарламасы аясында ауданымызда құны 34,0 млн.теңгені құрайтын 4 жоба қаржыландырылды.Атап айтқанда, «Қызылорда» Өңірлік инвестициялық орталығы «Іскер» бағдарламасымен құны 14,0 млн.тг., 3 жоба (1-мал шаруашылығы, 1-дүкен, 1-жүк тасымалы); «Сырдария-1» Кредиттік Серіктестігі «Агробизнес» бағдарламасымен құны 20,0 млн.тг. 1 жоба (мал шаруашылығы). Сондай-ақ, мемлекеттік бағдарламадан тыс, яғни екінші деңгейлі банктің ішкі жобалары бойынша 25 кәсіпкер құны 103,2 млн.теңге болатын несие қаражатына қол жеткізген.Шағын индустриялық аймақҚазалы ауданы, Әйтеке би кентіндегі Қ.Пірімов көшесінің солтүстік-батыс бағытында Шағын индустриялық аймақтағы жер көлемі 10,01 гектар.Оның ішінде, шағын индустриялық аймақта орналасатын жобалар көлемі 8,74 гектар (табысталғаны 7,94 гектар, табысталатыны 0,8 гектар), инженерлік инфрақұрылым жүйесінің жер көлемі 1,27 гектар.Шағын индустриялық аймақта орналасатын жобалардың жер көлемі 8,74 гектар (17.01.2024ж. Әйтеке би кенті әкімінің №29 шешімі).Шағын индустриялық аймақта құны 497 млн.теңгені құрайтын 15 жоба бастамашыларына көлемі 7,94 гектар жер учаскесі табысталған.Оның ішінде, жеке меншікке табысталғаны 11 учаске, уақытша жер пайдалану құқығымен берілгені 4 учаске (мерзімдері ұзартылған немесе жеке меншікке аударады).Өнеркәсіптік-инновациялық жобаларИндустрияландыру бағдарламасының І бесжылдығы аясында 2010-2011 жылдары 2 жоба іске қосылып, өнім шығарып тұр.«Рза» АҚ-ның «660 басқа арналған ірі қара өсіру кешені және сүт өндеу зауыты» жобасы;«СПК Қызылорда Балық» ЖШС-нің «Балық өңдеу зауытының құрылысын іске асыру» жобасы.Бағдарламаның ІІІ бесжылдығы аясында 2 жоба облыстың кәсіпкерлігін қолдау картасына енгізілді.«РЗА» АҚ-ның «1200 басқа арналған ірі қараны өсіру кешенінің және сүт өңдеу зауытының ІІ кезеңін іске асыру» жобасы;Жеке кәсіпкер Т.Игликовтің «Балық қалдықтарынан балық ұнын өндіру» жобасы енгізілді. Мемлекеттік қолдау шарасы ретінде «Бизнестің жол картасы-2025» бағдарламасы аясында инженерлік инфрақұрылым (электр, газ, су желілері) жеткізу шешімі қабылданған.Жалпы Индустрияландыру бағдарламасының үш бесжылдығы аясында (2010-2025ж.ж.) Картаға 4 жоба енгізілген, оның 3-уі іске қосылып, 1-уі кезең-кезеңмен жүзеге асырылатын болады.Жалпыұлттық бірыңғай жобалар пулы2023 жылы Жалпыұлттық бірыңғай жобалар пулы аясында іске қосылуы жоспарланған жобалар тізіміне Қазалы ауданынан «Жанкент Агро» ЖШС-нің құны 501 млн. теңге «Күріш өңдеу зауыты» жобасы енгізілген болатын (қуаттылығы - &nbsp;жылына 5000 тонна, жұмыс орны - 10).Жобаның қаржыландыру көзі: 69,1%-ы өз қаражаты (345,8 млн.тг), 30,9 %-ы (155,2 млн.тг) «Аграрлық несие корпорациясы» АҚ арқылы.Серіктестік зауытқа қажетті құрал-жабдықтар алу мақсатында 2023 жылдың шілде айында «Аграрлық несие корпорациясы» АҚ-на құны 155,2 млн.теңге құрайтын жобасы бойынша өтінімін тапсырып, 2023 жылдың желтоқсан айында зауытқа Қытай Халық Республикасынан жеткізілген қажетті құрал-жабдықтары монтаждалып, іске қосылғаннан кейін &nbsp;жобаның 100 пайызы (2024 жылдың ақпан айында толық төленді) қаржыландырылды.Жоба бастамашысы зауытты 2024 жылдың 20-шы ақпанында іске қосты.Бөлшек салықтың арнаулы салық режимі2023 жылы Салық кодексінің 696-3 бабы, 5-тармағын негізге ала отырып Қазалы ауданы мәслихатының 2023 жылғы 30 маусымдағы №52 шешімімен бөлшек салық мөлшерлемесін 50%-ға, яғни 4%-дан 2%-ға дейін төмендетілді.Арнаулы салық режиміне ауыстыру туралы аудан кәсіпкерлерін ақпараттандыру үшін әлеуметтік желілер арқылы посттар жариялануда. Одан басқа, а.ж. 3 сәуірінен бастап ауылдық округ тұрғындары мен кәсіпкерлеріне түсіндірме жұмыстарын жүргізу кезінде аталған арнаулы салық режимі туралы да аудандық кәсіпкерлер палатасының тарапынан ақпараттандыру жұмыстары жүргізілуде.Қазіргі таңда, Қазалы ауданында мемлекеттік кірістер басқармасының мәліметі бойынша бөлшек салықтың арнаулы салық режимін қолданатын 19 субъекті тіркелген.2024 жылы 23 адамды жұмыспен қамтитын 3 кәсіпкерлік нысан пайдалануға берілді.1. Жеке кәсіпкер Ж.Кеулімжаевтың «Ақниет» балабақшасы &nbsp;– 20 адам; Әйтеке би кенті;2. Жеке кәсіпкер Д.Ыбырайдың кәсіпкерлік нысаны «Bella» сауда орнына жалға берілді - 2 адам; Әйтеке би кенті;3. Жеке кәсіпкер Г.Аймишевтің &nbsp;«Ризық» кондитерлік цехы – 1 адам; Әйтеке би кенті.

 Салықты уақытылы төлеу екі тарапқа да маңызды 

<a href="https://kyzylorda-news.kz/">Kyzylorda-news.kz</a>&nbsp; Мемлекет тарапынан шағын кәсіпті дамытуға жасалған қолдау – мүмкіндік көзі. Әсіресе, азаматтарға кәсіптік бағдар беру, құқықтық көмек көрсету, қаржылай демеу саланың алға жылжуына ықпал етуде. Сырбойылықтар арасында жыл сайын жеңілдетілген несие алып, бағдарлама игілігін көргендер саны басым. Олар экономиканың түрлі бағытын өрістету арқылы берілген мүмкіндікті толық пайдаланып келеді. Бүгінгі кейіпкеріміз Ақбала Шүйіншәлі де қолдауды сәтті пайдаланып, табысқа жеткен кәсіпкер қатарында.Кәсіпкерлікке икемі бар адамдарға өзіне деген сенімін күшейтіп, ойындағы жоспарын жүйелі жүзеге асыру үшін қаржы керегі түсінікті. Ал көп кәсіпкер нарықтағы қаржы ұйымдарының талап үдесінен шыға алмай, бизнесін дамыту мүмкіндігінен қағылып келеді. Оның үстіне несиенің пайыздық үстемесі қарызды жабуға қолбайлау екені анық. Міне, осы кедергілерден айналып өтудің бір тәсілі – жеңілдетілген несие бағдарламасы. Кейіпкеріміз де осы жолды таңдап, «Ауыл аманаты» жобасы аясында жеңілдетілген несие алған. Қолға түскен қаржыға жаңа кәсіп бастап, пластик бөтелке әзірлеу ісіне ден қойды.Оның сөзінше, мұндай бизнеспен айналысуға нарық талабы түрткі болған. Қазір Арал мен Қазалы аудандарындағы кәсіпкерлер құйылмалы сусындарға құтыны өзге өңірден немесе облыс орталығынан тасымалдайды. Бұл уақыттан ұтылу әрі шығын көлемін ұлғайтады. Сондықтан тиімді шешім ретінде Қазалы ауданынан пластик бөтелке шығаруды қолға алған.<blockquote>Аудан мен көршілес Арал қаласында құйылмалы сусын кәсібі кең тараған. Бәрі дерлік қажетті пластик бөтелкені шалғайдағы Қызылорда қаласы, тіпті Алматыдан алдырады. Ал мұндай құтыны Қазалыдан шығарсақ, шығын азайып, аз уақытта керекті өнімді алуға болады.Осы мақсатта «Ауыл аманаты» жобасы арқылы 6 млн 900 мың теңге жеңілдетілген несие алдым. Бұл қаржыға Ақтөбеден пластик бөтелке құятын құрылғы сатып әкелдім. Ресейлік «Техноиндустрия» компаниясының өнімін өңірімізге әкеліп, жуырда іске қостық, – дейді кәсіпкер.</blockquote>А.Шүйіншәлі 10 жылдан астам кәсіпкерлікпен айналысып келеді. Жеке аралас дүкені халыққа қызмет көрсетіп тұр. Онда құйылмалы сусын сататындықтан, сырттан пластикалық ыдысқа тапсырыс беретін. Әр данасы 65 теңгеден болғандықтан, қалтаға ауыр тиеді. Сондықтан ізденіп, өзі осы дүниелерді шығаруды ойлады.Ақбала жаңадан алған құрылғының жұмыс механизмін бөлісіп, өнімділік көрсеткішін айтып берді. Оның сөзінше, цех алдағы құйылмалы сусын науқаны кезінде қос ауданды керекті пластик ыдыспен қамтуға толық қауқарлы.<blockquote>Негізі 0,5 пен 5 литр аралығындағы пластик бөтелкелер. Алғашында 1,5-2 литрлігінен 500 данасы шығарылды. Жалпы бұл құрылғы 1 сағатта 500-600 данасын өндіреді. Бір күнде 3000-ға дейін басып шығара алады. Бөтелкелерге арналған қақпақ пен шикізатты Алматыдан тапсырыспен алдырамын, – дейді ол.</blockquote>Қазір іскер кәсіпкер 2 адамды жұмыспен қамтып отыр. Кәсібін кеңейтуді де ойлайды. Жаңа идеялары көп еңбекқор жан алдағы уақытта дәмхана мен өзге де өндіріс орнын ашуға құштар екенін жасырмады.Мемлекет халықты кәсіпкерлікке тартып, қоғам үшін пайдалы істің көбеюіне мақсатты түрде мүмкіндік беруде. Ақбаланың бизнеске бет бұрып, тың өндірістің тұтқасын ұстауына да жарқын жоба сеп болғаны анық. Ендігі мақсат – қолдаудан нәтиже шығарып, табыс көлемін ұлғайту. Бұл орайда кейіпкеріміздің әлеуеті мен арманы жағымды жаңалыққа бастарына сенім мол. &nbsp;

Мемлекеттік қолдауды сәтті пайдаланған табысты кәсіпкер

<a href="https://kyzylorda-news.kz/">Kyzylorda-news.kz</a> Бүгінде балалар киімі өте көп. Десе де оның ішінде сапалысын таңдап алуда ата-аналар қиналып жатады. Қала тұрғыны Перизат Ашықбаеваның төрт баласының да аллергиясы бар. Балаларына денеге ыңғайлы үй киімдерін бұрын сырттан тапсырыспен алдыратын. Енді көпбалалы ана мұндай киімдерді өз тігіп сатуға қол жеткізді. Ол жаңа бизнес идеяларды жүзеге асыруға арналған мемлекеттік грант иеленіп, «Құлыншақ» атауымен балалар киімін шығаруда.Үйде бала күтімімен отырған жас ана осы уақытқа дейін де тігіншілікпен айналысқан. Бірақ арнайы тігін машиналары мен құрал-жабдықтары, сапалы мата мен жіп болмаған соң тапсырыс алмайтын. Қайтарымсыз грант арқылы өзінің идеясын іске асырғанына қуанышты.<blockquote>Қазір байқасаңыздар, балаларға арналған сапалы киімдердің көбі Түркия елінен келеді. Оның бағасы да қымбат. Көп ата-ананың қалтасы көтере бермейді. Бір жағы балаларымның киімге аллергиясы бар-тұғын. Мен секілді аналардың мәселесін шешу үшін осы идеяны жүзеге асырып, үй және спорттық киімдерді шығаруды қолға алдық. Матасы мен жібінің өзін Түркияның ең мықты деген зауыттарына тапсырыс беріп, алдырып жатырмыз. Бояуы шықпайтын сапалы матадан тігілгендіктен, денеге де ыңғайлы. Жатарда киетін киімдер 4-6 мың теңге аралығында болса, спорттық киімдер 6-8 мың теңгеден. Бұл киімдерге «Құлыншақ» деген атау бердік. Оның заттаңбасын алматылық дизайнерлер жасады, – дейді Перизат.</blockquote>Тігіншінің айтуынша, балаларға арналған киімді таңдағанда, матаның сапасына және оның құрамына назар аудару керек. Мақта, зығыр, жүн және жібек денсаулыққа ең қауіпсіз болып саналады. Табиғи материалдардан жасалған киімдер терлетпейді. Денеге ыңғайлы, жұмсақ. Әзірге ол өзімен бірге тағы бір адамды жұмыспен қамтып отыр.&nbsp; &nbsp;

Мемлекеттен грант алған кәсіпкер «Құлыншақ» атауымен балалар киімін шығаруда

Қойнауы құтқа толы Қазалы ауданындағы Майдакөл ауылдық округіне қарасты Бекарыстан би ауылы береке мен табыстың бастауы саналады. Бұл Қазалы ауданындағы ең алғаш құрылған ауыл. Қанатының астынан Үрмәш Түктібаев, Майдакөл, Ажар, Жаңақұрылыс, Жалпақ сияқты іргелі бес ауылдың еншісін беріп, бөлек шығарған қасиетті қарашаңырақ. Көзкөргендер Бекарыстан би ауылын қарашаңырақ деп айтатыны да сондықтан.Майдакөл ауылдық округі биыл бір ғасырлық ғұмырын атап өтпек. Сырдария өзенінің сол жағалауындағы (күн-батыс беті) орналасқан «Ақжона» жерінің маңынан алты шаруашылық серіктестіктері – Шәуілдір, Қараарық, Ақжона, Палуан, Үлгі бол, Жаңа еңбек, оның ішінде: Ақжона қазіргі Бекарыстан би ауылы құрылған. Олар үш шаруашылық – Октябрь, Қараарық, Жаңатұрмыс артеліне, кейін екі колхозға – Октябрь, Жаңатұрмыс біріктірілген. Сонау қиын-қыстау кезеңде «Октябрь» колхозы 100-130 отбасынан құрылған елді мекен болды.&nbsp;Осылайша Октябрь колхозы, Карл Маркс атындағы күріш совхозы болған ауыл егемендікке қол жеткізген уақытта Қазақстан Республикасы Үкіметінің қаулысымен «Бекарыстан би» ауылы болып қайта құрылды.&nbsp;Абдрахман Мәлік, Жаңабергенова Лиза, Ұзақ&nbsp; Оралбаев, Дәуірхан Айдаров «Еңбек Қызыл Ту»,&nbsp; Елеу Көшербаев «Ленин», Ешниязов Жетес «Халықтар Достығы» Жанкеев Қуанышбай, Ұзақ Оралбай, Нармағамбетов Сақыбай, Байзақ Жібекәлі, Дәуірхан Айдаров «Құрмет белгісі» ордендерімен марапатталған.&nbsp;Бүгінде Бекарыстан би аулында 2865 адам тұрады. Ауыл қазынасының кірістері де жаман емес. Мәселен, жылдық жоспары 5617 мың теңге болса, нақты 7699,8 мың теңгенің түсімі түсіп, жылдық жоспар артығымен орындалды.Әлеуметтік қолдау, жұмыспен қамту шаралары ұдайы назарда ұсталады. Бұл ретте аз қамтамасыз етілген 3 отбасына атаулы әлеуметтік көмек төленді. Округ бойынша 22 адам тұрақты жұмысқа, маусымдық жұмысқа 12 адам, 31 адам ақылы қоғамдық жұмысқа, 11 адам жастар тәжірибесіне, 1 адам «Алғашқы жұмыс орны» жобасымен, 11 адам әлеуметтік жұмысқа жіберілді.&nbsp;Білім – шыңға жетелер шамшырағың&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;Кеңес Одағының Батыры Үрмәш Түктібаев атындағы №24 мектепте 488 оқушы білім алуда. Қасиетті білім ордасында 90 педагогикалық қызметкер бар. Оның ішінде педагог-зерттеуші - 12, педагог - сарапшы - 41, педагог - модератор - 10, І-санатты - 4, ІІ-санатты - 8 мұғалім жұмыс істейді.2022-2023 оқу жылында 11 сыныпты 28 оқушы бітірді. 2 оқушы "Алтын белгі" иеленді. 28 оқушының 23-і ҰБТ-ге қатысып, 17 оқушы жоғары оқу орнына оқуға түсті. 11 оқушы арнаулы оқу орнына оқуға жолдама алды.Жыл басында бекітілген жоспарға сәйкес, 52 мәдени-көпшілік шаралар өткізіліп, 7353 көрермен қамтылды. Жыл көлемінде ұлттық спорт түрлерінен, волейбол, футбол, түрлерінен жарыстар өткізілді.Қуанышты жағдай, Қазалы аудандық Llf әуесқой футбол лигасында ауыл жастарынан құралған "Бекарыстан би" шағын футбол құрамасы 14 команда бақ сынаған додада екінші орында аяқтады. Мектеп ауласындағы ауыл азаматтарының демеушілігімен салынған спорт алаңына ағымдағы жөндеу жұмыстары жүргізілді. Қоршауы 2 метрге биіктетілді.2024 жылға Бекарыстан би ауылынан спорт кешенінің құрылысын бастауға 50,0 миллион теңге бөлінді. Округ бойынша 135 жеке кәсіпкер тіркелген, оның ішінде 10 заңды тұлға, 24 шаруа қожалық, 101 жеке кәсіпкер бар. Жаңадан 47 кәсіпкерлік субъектісі ретінде тіркелді.Кәсіп берекенің бастауыБылтыр жеке кәсіпкер Ертай Тоқболатов "Сыр Сұлтан" шағын маркетінің құрылысын салып пайдалануға берді. Сонымен қатар, Болатбек Айжігіт "Кілем және көлік жуу" орталығын салып, жұмысын бастады. Сонымен бірге,&nbsp; мемлекеттік бағдарламалар арқылы құны 69,6 миллион теңге болатын 15 жоба қаржыландырылды.&nbsp;"Ауыл аманаты" жобасы арқылы 6 адам 27,6 миллион теңге; "Бизнестің жол картасы –2025" арқылы 2 адам&nbsp; 4,7 миллион теңге; Атамекен арқылы 1 адам 2,7 миллион теңге; «Сырдария-1» жауапкершілігі шектеулі серіктестігі арқылы 3 адам, 16,9 миллион теңге.«Кең дала» жауапкершілігі шектеулі серіктестігі арқылы 1 адам, 15 миллион теңге; Грант (400 айлық есептік көрсеткіш) 2 адам, 2,7 миллион теңге.Кәсіпкерлік саласындағы өткен жылдың басты жаңалығы – "Ауыл аманаты" жобасының жүзеге асып, 2,5 пайызбен халыққа несие беруді бастады. Бұл жобамен 6 тұрғын несие алып, кәсібін бастады.Округ бойынша 2593 бас мүйізді ірі қара, 3513 бас жылқы, 74 бас түйе, 5055 бас уақ мал есепке алынды. Халық иелігіндегі барлық мал басы бірдейлендіріліп, компьютерлік базаға енгізілген.&nbsp;Егін шаруашылығында "РЗА Агро" жауапкершілігі шектеулі серіктестігі 750 гектар жерге күріш, 150 гектар жерге жаңа жоңышқа екті. 100 гектар көне жоңышқа күтімге алынған. Ауыл тұрғындары 60 гектар жерге бақша дақылдарын екті.Инфрақұрылым игілігі – халыққаӨткен жылы аудандық бюджеттен М.Күзембаев, М.Ізмағамбетова, Жетес Ешниязов көшелері толықтай, Ғ.Мұратбаев, Қ.Мәкенов көшелерінің қалған бөлігінің электр желілерін қайта жаңғырту мен жарықтандыру және 4 жаңадан трансформатор қондырғысын орнатуға жоба-сметалық құжаттамасы әзірленіп, сараптамадан өткізілді.2024 жылға Ақтан батыр, Жанқожа батыр, Бекарыстан би, Майдакөл, Ү.Түктібаев ауылдарына магистральды газ құбырын жүргізуге республикалық бюджеттен қаржы бөлінді.Былтыр ауылға кіре-беріске ауылдың бас қақпасы жасалды. Аркамен ауылға дейінгі аралыққа түнгі жарықтандыру жұмысы жүргізілді.&nbsp;Көркейту-көгалдандыру және абаттандыру, санитарлық тазалық жіті назарда. Ауылдық округте санитарлық тазарту жұмыстары жүйелі түрде жүргізіліп келеді. 27 дана қоқыс жәшігіне жиналған тұрмыстық қатты қалдықтар арнайы орынға шығарылуда. Ағымдағы жылы 3 дана қоқыс жәшігі жаңадан алынды. Апта сайын жиналған қоқыстар тиісті орынға шығарылуда.Округ көлеміндегі 15,7 гектар жерге егілген көлеңкелі ағаш күтімге алынған. Аяқ су арықтары тазартылды. Жаңақұрылыс ауылына шығар жол жиегіне 400 метр жерге жасыл белдеу орналастырылды.&nbsp;Тапсырмалар мен міндеттерАуылдағы №24 мектептің құрылысын салуға жұмыс жүргізу; Ауыл орталығындағы "Тәуелсіздік" алаңын абаттандырып, көркейту-көгалдандыру жұмыстарын тұрақты жүргізу; Жетес Ешниязов, М.Күзембаев, Е.Тілеубаев көшелеріне орташа жөндеу жұмыстарын жүргізу; Мемлекеттік бағдарламалар шеңберінде мал тұқымын асылдандыруға, мал басын көбейтуге қол жеткізу; Егін шаруашылығын дамыту, оның ішінде бақша егуге тұрғындарға қолайлы жағдай жасауды қолға алмақ. Сонымен қатар, шағын және орта кәсіпкерлікті дамыту арқылы бюджеттің кіріс бөлігін ұлғайту, жаңа жұмыс орындарын ашуды көздеп отыр. Ауылдық округте салық салу базасын ұлғайту бағытында жұмыстар да алдағы уақытта ұйымдастырылады.

Қазалы: Кәсіпкерлер мемлекеттік бағдарламаның игілігін көруде

<a href="https://kyzylorda-news.kz/">Kyzylorda-news.kz</a> «Адамның сүйеніші – отбасы» деп жатамыз. Соған сай, отбасынан бақыт тауып қана қоймай, кәсіп ашып, дамып та жатқан жайымыз бар. Оған көптеп аргумент келтіруге болады. Жұмысым жоқ екен деп қарап отырмай, отбасында балаларының несібесіне «қазан аузы жоғары» деп тәуекел етіп кәсіп бастаған жанның бірі – Қармақшы ауданы, ІІІ Интернационал ауылының тұрғыны, «Күміс алқа» иегері Самал Қожаева.&nbsp;«Көз қорқақ, қол батыр» деген осы. Күні кеше бастаған секілді еді, жыл өтпестен-ақ кәсібінің нәсібін көре бастаған көпбалалы ананың сол кездегі қабылдаған шешімінің дұрыстығына өзі ғана емес, сонымен қатар оған тілеулес болған жандардың да қуанышы іспетті. Себебі отбасында балалары көмекшісі болса, жан жары үнемі қолдап, жәрдемін аямайды.Самал Сабытбекқызы өткен жылы мемлекет тарапынан кәсіп ашушыларға қолдау ретінде ұсынылып жатқан «Ұлттық жобаға» қатысып, бизнес жобасын сәтті қорғап шыққан. Қазір мал шаруашылығын дамытумен бірге, құс шаруашылығын ілгерілету де маңызды саналады. Құс еті мен жұмыртқасының дәруменге бай және табиғи өнім екенін ескерсек, &nbsp;оған тұтынушы тарапынан сұрыныстың ешқашан жоғалмайтыны анық. &nbsp; Міне осындай қажеттілікті ескерген кәсіпкер мемлекеттен берілетін қайтарымсыз қаржыға ие болып, грант жеңімпазы атанған.&nbsp;<img src="https://knadmin.beoblood.kz/uploads/cfe693aa_06e3_4a66_b173_b1f77f067424_0b613accc9.jpg" alt="cfe693aa-06e3-4a66-b173-b1f77f067424.jpg"><blockquote>– 2-3 жылдай «Достық» балабақшасында тәрбиешінің көмекшісі болып еңбек еттім. Тұрмыс жағдайына байланысты ол жақтан жұмыстан шығып, бала тәрбиесімен айналыстым. Үй шаруасында болдым. Біреуден-біреу естіп, былтыр қайтарымсыз грантқа құжат тапсырып, &nbsp;жеңімпаз атандым. Қолға алған кәсібім – құс шаруашылығы, оның ішінде қаз өсіруді таңдадым. 1 млн 380 мың теңгеге кәсіпке қажетті балапан шығаратын инкубатор құрылғысын, мұздатқыш және 300 қаз сатып алынды. Жалпы ауылда қаз асырап жатқандар бар. Бірақ көп емес. Қаздарды балапан, үлкен күйінде де сатып алдық. "Линда", "Томбов", "Халмогор" сорттары өсімтал келеді дегесін осы түрлеріне маңыз бердік. Олардың сорттары әртүрлі болғанымен құстар бір-бірімен сыйыса береді. Түске дейін бір мезгіл кепеде ұстаймыз, сонда жұрытқалайды, жем жейді. Түскен кейін есіктің алдына шығарып, жайып аламыз. Қаз – судың құсы болған соң шомылғанды, көкке жайылғанды жақсы көреді. Суға түсетінін орын белгілеп қойғанбыз. Жеміне келсем, асбұршақ араласқан бидай береміз. Дәрумендерін де қадағалап тұрамыз. Жазды күндері жоңышқаға жайылады. Көбіне-көп бұлардың қорегі шөп болып келеді. Мал секілді жайылады ғой. Қуараған шөптердің тамырымен де қоректенеді. Қазды біз ет бағытында да, жұмыртқа бағытында да пайдаланып отырмыз. Инкубатор аппаратынан балапандарды көбейтіп, ет бағытын ұстансақ, &nbsp;күтіп-баптағанымыздан жұмыртқаны да жақсы беріп отыр. Пайдасы бар. Жұмыртқаның бір данасын 250 теңгеге сатудамын. Күндігіне 14-17 данаға дейін жұмыртқалайды. Тұрақты тұтынушыларымыз қалыптасқан. Қаздарды семіртіп, қыста бірқатарын сойып саттық. 4-5 келі аралығында салмақ тартып, ет берді, – дейді кәсіпкер еңбегінің жемісіне марқая. &nbsp;</blockquote>"Кәсіпті жеке істегеннен гөрі, отбасымен істеген әрине, әлдеқайда тиімді" дейді көпбалалы ана бізбен әңгімелескенде. Ол ойы орынды да сияқты. Көп болып, жабылып істеген шаруаның күшке де, уақытқа да салмақ түсірмейтіні онсыз да белгілі ғой. Бүгінде Мұхтаровтар жанұясында өсіп келе жатқан балалардың алды студенттер болса, одан кейінгілері мектеп оқушылары. Кішкентайлары 2 жасқа толмақ. Отағасы Дархан Мұхтаровтың жеке шаруа қожалығы бар. Еңбекпен өсіп-өніп отырған ауыл азаматы бақша егуді кәнігі кәсібіне айналдырған. &nbsp; &nbsp;&nbsp;– Кәсіп десе, қорқа соғатын едік. Тәуекел етсең, істеуге болады екен. Алда жоспарымыз көп. Бұйырса кәсібімізді кеңейтіп, әлде де құстардың санын көбейтсек пе дейміз. Көктем басталғалы инкубаторда балапан шығаруды қолға алғанбыз, – дейді «Күміс алқа» иегері.&nbsp; &nbsp;Фото: pixabay.com

Қармақшылық кәсіпкер қаз өсірумен айналысуда

<a href="https://kyzylorda-news.kz/">Kyzylorda-news.kz</a>&nbsp;&nbsp; Жалағаш ауданынба қап шығаратын зауыт іске қосылды.&nbsp;Ашылғанына көп болмаса да зауыт өніміне сұраныс бүгінде жоғары. Отандық өнімнің әлеуетін арттырғысы келетін кәсіп иелерінің басты мақсаты – сырттан келетін тауарларды ығыстырып, өнімнің қолданыс аясын кеңейту.Аталмыш зауытты жергілікті кәсіпкер Рүстем Құдабай «Ауыл аманаты» жоба аясында жүзеге асыруда. Бұл кәсіпті бастау үшін алдымен «Құдабай» ауыл шаруашылығы өндірістік кооперативін құрып, өндіріс саласымен жеңілдетілген 2.5 пайызбен несие алып, бүгінде табысты жұмыс атқаруда. Бұл туралы&nbsp;«Байқоңыр» әлеуметтік-кәсіпкерлік корпорациясының баспасөз қызметі хабарлады.Қазіргі таңда зауыт негізгі ауыл шаруашылығы өндірушілердің сұранысына сәйкес әр түрлі пішінде қаптарын дайындауда.&nbsp;Өндіріс&nbsp;ошағы күніне 10 мың қап тоқуға әлеуеті жетеді. Аталған цех арқылы Рүстем бүгінде 4 адамды тұрақты жұмыспен қамтып отыр.Полимер шикізатынан жасалатын полипропилендік қапты даяулау 5 сатыдан тұрады.Алдымен полимер шикізатынан жіп иіріледі. Дайын жіптен қап тоқылады. Одан әрі қапты өлшеміне қарай кесу,&nbsp;тігу, тапсырыс берушінің логотипімен басып шығару жұмыстары жүргізіледі. Барлық жұмыс тапсырыс берушінің қалауы бойынша жасалады.Фото: Байқоңыр ӘКК

Жалағаш ауданында қап шығаратын зауыт іске қосылды

&nbsp;<a href="https://kyzylorda-news.kz/">Kyzylorda-news.kz</a>&nbsp; &nbsp; Қазалы ауданындағы Қ.Пірімов ауылының тұрғыны Ләззат Бекназар асыл тұқымды швейцариялық заанен ешкісін өсіруде. Өзгелерден ең алдымен сүттілігімен ерекшеленетін ешкіні алуға мемлекеттік бағдарламаның септігі тиген. Ләззат Қуанбекқызы 2019 жылы «Бизнестің жол картасы – 2020» бизнесті қолдау мен дамытудың мемлекеттік бағдарламасы аясында мемлекеттік грантқа қол жеткізіп, осы кәсібін бастап кеткен. – Өзім ауылдық жерде тұрғандықтан жас кезімнен малдың жайын жақсы білемін. Сондықтан да, асыл тұқымды ешкі өсіруге ерекше қызығушылық таныттым. Өйткені, Швейцарияның Заанен өлкесінен тараған заанен тұқымдас ешкі ең алдымен, сүттілігімен ерекшеленеді. Ал, ешкі сүтінің адам ағзасына тигізер пайдасы мен емдік қасиеті мол екені көпке мәлім. Тәулігіне 3,5-4 литрге дейін өнім беретін ешкінің сүті де қымбат, – дейді ауыл тұрғыны Ләззат Бекназар. Бүгінде Ләззат Бекназар грант арқылы қол жеткізген 700 мың теңгеге асыл тұқымды заанен ешкісінің 4 төлін алған. Жоба бойынша алынған малға қол жеткізген соң кәсіпкерге жем-шөп алу үшін қосымша 75 мың теңге қаржы берілген. Мұның өзі кәсібін енді бастаған жан үшін таптырмас көмек. Қазіргі таңда сатып алған асыл тұқымды ешкілер төлдеп, мал басы біршама көбейген. Яғни, 30 басқа дейін жеткен.&nbsp; – Басында кәсіпті қолға ламас бұрын интернет арқылы осы ешкі тұқымын бақылап, зерттедім. Өте қызығушылығым артты. Себебі, өзімнің ата-анам ес білгелі мал асырап, баптайды. Сыртта төрт түліктің басын көбейтуде. Мен сіңіліммен бірге 6-сынаптан бастап, он сиырды сауып, оны пісіріп, айран ұйыта беретінмін. Сосын оны күбіде пісіп, құрт қайнатуды және май алуды білетінмін. Сондықтан да маған малдың жайы, оны күтіп-баптау қиынға соқпайды. Негізгі жұмысыммен қатар, үйдегі шаруаны бітіріп, осы ешкілерім мен сиырларымды сауып, айран ұйытып, құрт жасап, сатуға қоямын. Мал басы көбейіп, жем-шөбінің қымбаттауына байланысты жиырмадан аса басын сатып жібердім.&nbsp; Қазір қорамда 5-6 басы ғана бар. Бұл заанен тұқымы сүтті және егізден, үшемнен бес айда төлдейді. Жылына екі рет буаз болады. Жақында Қызылордада ұйымдастырылған &nbsp;«Әйелдер форумына» қатысып келдім. Негізінен, мұндай басқосулардың пайдасы мол. Себебі, тәжірибемен алмасамыз. Білмегенімізді толықтырып, білгенімізбен бөлісеміз. Соның нәтижесінде шиелілік кәсіпкер келіншекпен таныстым. Ол нубиский ешкі өсіруді қолға алған. Бұл тұқымның төлдері сүтті заанен түрінен де иол береді. Бірақ бұл ешкілер суыққа шыдамсыз екенін білдім. Сондықтан осы тұқымның текесін алуды жоспарлап отырмын. Қолымдағы зааненмен будандастыруды көздеудемін, – дейді Ләззат Бекназар. &nbsp; Ләззат Қуанбекқызының айтуынша, заанен ешкісін ұстағаннан бері оның өнімдерін сатқаннан бөлек, өзі де отбасымен бірге қолданады. Сүтін таңнан ішіп алғанда кешке дейін тоқтықта жүресің. Құрты дәмді, әрі майлы, кеуіп тұрмайды. Ал нубилық ешкі сүтінің дәмі заанендікінен де ерекшеленеді екен. Оның сүтінің дәмі тіптен тіл үйіреді дегенді алға тартты. Жалпы, осы ешкілерді ұстағалы қан қысымы көтерілуін доғарған. Асқазан, ішек жолдары жақсарған. Ағзаның зат алмасуы жақсарып, күш-қуаты жоғарылаған. Бұған қоса, иммунитет көтерілген. Сондықтан бұл төлдің сүті жоғары бағаланады. Сонымен қатар, ауылдан тыс, Қазалы қаласынан және Әйтеке би кентінен тапсырыстар түсіп, тұрақты тұтынушылары көбейген. Алдағы уақытта қолға алған кәсібін дөңгелетіп әкету үшін өз қаржысының есебінен тағы да нубилық ешкі тұқымын да алуды көздеп отыр. – Заанен ешкісінің сүті мың да бір ауруға ем екен. Ерекше химиялық құрамына сай ешкі сүтін пайдалы тағам өнімдеріне жатқызуға болады. Ешкі сүті халықтың тұтынатын өнімі ретінде әртүрлі жастағы адам арасында пайдаланылуымен қатар, әртүрлі аурулардың алдын алу үшін де тиімді. Ешкі сүтіндегі май түйіршіктері сиыр сүтіне қарағанда сіңімді, сондықтан да, адам ағзасына түскен ешкі сүті тез қорытылып, сіңетіндіктен, әлсіреген ағзаға өте пайдалы. Сонымен қоса, ешкі сүтінің құрамында калийдің мөлшері өте мол. Сүт құрамындағы бұл элемент әлсіреген ағзадағы жүрек қантамыр жүйесі жұмысына өте қажет. Қатерлі ісік дертіне, сондай-ақ, аллергияның кезкелген түріне пайдалы. Яғни, сапалы және мол мөлшерде ешкі сүтін өндіру үшін азықтандыру технологиясын жетілдіру қажет.&nbsp; Кейбір зерттеушілердің пайымдауынша, ешкілердің сүт өнімділігіне, сүттің құрамы мен қасиеттеріне генетикалық және әртүрлі паратиптік фактор әсер ететіндігін анықтады. Атап айтқанда, жануарлардың жасы мен физиологиялық жағдайы, лактация кезеңі, жыл мезгілі, күтіп-бағу параметрлері, азықтандыру деңгейі мен пайдалылығы, сауу технологиясы және тағы басқа факторлардың әсер ететіндігі анықталған. Ешкілердің сүт өнімділігіне азықтандыру сапасы мен деңгейі, әсіресе, азық құрамындағы ақуыз деңгейі өте әсер етеді. Алайда, азық ақуызы ең қымбат құрамдас бөлігі болып табылғандықтан, қол жетімді азық қорын іздеу және азықты тиімді пайдалану өзекті мәселе болып табылады. Сондықтан, шаруашылықтағы ешкі басын көбейтіп, сүт өнімділігін арттыру үшін оларды дұрыс азықтандырудың маңызы зор. Тек, дұрыс азықтандырылған жағдайда ғана малдардың, оның ішінде, ешкі малының денсаулығы сақталып, жоғарғы өнімділігін көрсете алады. Сол себепті, бұл істі қолға алмас бұрын әбден зерттедім. Сол кезде адам сенгісіз оқиғаларға өз көзіммен куә болдым. Талай жыл ауырып жүрген жандар ешкі сүтін ішкен соң дертінен айығып, аяққа тұрып кеткен. Сондықтан да, бұл жануардың өнімі қымбат тұрады. Өзім қорада азын-аулақ мал ұстап, сиыр сауып отырмын. Оның сүтінен бастап, құрт-майға дейін базарға өткіземін, – деп Ләззат Бекназар алдағы жоспарымен де бөлісті. Еңбекқор кәсіпкер Қазалы ауданындағы Қ.Піріміов ауылында орналасқан Қ.Күлетов атындағы №92 орта мектепте тарих пәнінен сабақ береді. Көпбалалы отбасы қатарындағы ана құтты шаңырағында бес баланы тәрбиелеуде. Мал шаруашылығынан бөлек, жеке азық-түлік дүкені де жұмыс істеп тұр. Қолынан тоқыма тоқу, жүн түту мен оны иіру, тігін тігу келеді. Көпбаланың мәліметінше, ол әрбір ешкісіне арнайылап есім қойған. Әрқайсысын өз есімімен атап шақырады.<img src="https://knadmin.beoblood.kz/uploads/33f29897_9b87_4b05_91b7_48154940f53d_7a69bd9730.jpg" alt="33f29897-9b87-4b05-91b7-48154940f53d.jpg"><img src="https://knadmin.beoblood.kz/uploads/9386e57a_a3f2_4ae1_a648_97c97bc7d852_6f4acda7e1.jpg" alt="9386e57a-a3f2-4ae1-a648-97c97bc7d852.jpg">

Ләззат Бекназар: Заанен ешкісін өсірудің бабы бөлек

<a href="https://kyzylorda-news.kz/">Kyzylorda-news.kz</a>&nbsp; Аймақ экономикасын дамытудың ұтымды жолы кәсіпкерліктің ілгерілеуін ұдайы назарда ұстап, саланың серпін алуына барлық жағдай жасау. Бұл тұста мемлекет кәсіп ашамын деген жандарға түрлі бағдарламалар арқылы барынша қолдау көрсетуде.Мәселен Сыр өңірінде жеке кәсібін ашып, ерекше өнімдерді шығарып жүрген азаматтар қатары айтарлықтай артып келеді.&nbsp;Әсіресе, 2021-2025 жылдарға арналған кәсіпкерлікті дамыту жөніндегі ұлттық жобасы кәсіп бастауға ниеті бар талай жанға мүмкіндік сыйлап, салаға даңғыл жол ашты. Олардың қатарында Қызылорда қаласының тұрғыны Нұрбол Маделханов та бар. Ол аталған жоба шеңберінде 2022 жылы 5 млн теңге көлемінде қайтарымсыз грант алып, гофрленген тақта өндірісін қолға алған. Бүгінде кәсіпкер өндіріс орнында 2 адамды тұрақты жұмыспен қамтып, тақтаның екі түрін жасап шығаруда. Жергілікті өнімге тұрғындар тарапынан сұраныс та жақсы екендігін жасырмады.&nbsp;Кәсіпкер жұмысын жүйелеп алған соң тағы да жаңа құрылғылар сатып алып, жұмысшылар санын арттыруды жоспарлауда.&nbsp; &nbsp; Бір айта кетерлігі, бүгінде жобасын жүзеге асырамын деген жандарға мемлекет пайыздық үстемақысы төмен несие ұсыну арқылы қаржы мәселесін шешуге де жағдай жасап қойған. Үлкен қолдаудың шарапатын көргендер өз ісің жүргізуде.Фото: Қызылорда облысының Өңірлік коммуникациялар қызметі

Кәсіпкерлікке бағытталған жобалар жемісін беруде 

<a href="https://kyzylorda-news.kz/">Kyzylorda-news.kz</a>&nbsp; &nbsp;Қолөнер – қолданбалы өнер. Дәстүрлі тұтыну және сәндік бұйымдарын жасайтын ұсақ өндіріс. Қолөнершілер негізінен табиғи шикізаттарды пайдаланып, қарапайым еңбек құралдарының көмегімен көркем композицияның шешімімен тұрмысқа қажетті мүліктер, музыкалық аспаптар, қару-жарақ, құрал-саймандар жасайды.&nbsp; Әрбір қолөнер туындысы өз заманының материалдық мәдениетінің үлгісі және халық талғамының, әлеуметтік қоғамдық жағдайының, діни сенімінің, салт-дәстүрінің нақтылы көрінісі.&nbsp; Шыны керек, соңғы уақытта эностильге мойын бұра бастадық. Ұл-қыздарымыз халқымыздың қайталанбас ұлттық киімдері мен бұйымдарын күнделікті өмірде тұтынуға көшті. Ұлттық нақыштағы киім үлгілері мен әшекейлер заманауи дизайнда көрініс тауып, сән әлемінде ғана емес, тіпті тұрмыста да трендке айналды. Сәнгерлер мен шеберлер осы трендті қазіргі сәтпен сабақтастырып, одан табыс тауып жүр. Солардың бірі қазалылық – Нұрбану Сағырбек.&nbsp; Он саусағынан өнер тамған талантты жан табандылығының арқасында, қазіргі таңда, трендке айналған қазақы бұйымдарды, яғни, қыз-келіншектерге арналға әшекейлерді дайындап, сатуда. Қазірдің өзінде тұрақты тұтынушыларын тауып үлгерген оның бұйымдары, бүгінгі заманға лайық етіп жасалғандығымен ерекше. Осы ретте, қазақи стильде әшекей бұйымдар дайындап жүрген жанға арнайы жолығып, жасап жүрген жұмысымен танысып қайтуды жөн көрдік.&nbsp; Шеберханадағы тірлік күндегіше тынымсыз жүріп жатыр. Нұрбану әдеттегідей қыз-келіншектерге арналған тағы бір жаңа бұйымды әзірлеп әлек. Жанына жақындағанымызды байқаған ол: "соңғы штрихтар" деп бізге сәл күте тұрыңыз деген сыңай танытты. Біз қолындағы әсемдікке анадайдан көз тастап, тамашалап тұрдық. Әдеттегі ісін сөреге қойған ол жанымызға келіп, жасаған жұмыстарын таныстырып, бұл кәсіпке қалай бет бұрғандығын әңгімелеп берді.&nbsp; – Жалпы, менің бұл кәсіпке келуім тегін емес. Кішкентайымнан қолөнерге қатты қызықтым. Оның үстіне, анам да қолы алтын, шебер кісі. Анам іс тігіп, тоқыма тоқитын. Оның бойындағы асыл қасиет менің де бойымнан табылды. Ал, қазір әшекейлер мен бұйымдарды кәсіпке айналдырған болсам, кішкентайымнан тігінге икемім болғандығынан шығар. Жалпы, мен жасап жүрген қай ісімді де тігіншілікпен ұштастырамын. Егер тігінді білмесем, бұл кәсіпке бет бұрмас та едім, – дейді қолөнер шебері.&nbsp; Нұрбану, әрбір әшекейді заманауи үлгімен ұштастырып жасауға тырысады. Себебі, тапсырыс берушілер жасалған бұйымдардың қайталанбас ерекше әрі күнделікті өмірде тағып жүруге ыңғайлы болуын сұрайтын көрінеді. Тұрақты тұтынушыларының ұсыныстарын ескеріп, соларға лайық қызмет көрсетуді басты ұстанымы санайтын Нұрбану этностильдегі киім, тақия, шекелік, шашбау, сырға, білезік, сақина сынды заттарды қолдан жасап, оны жергілікті тұрғындарға ғана емес, сырт қаладан тапсырыс берген сатып алушыларға жөнелтіп жүр.&nbsp; – Расын айту керек, бұрын көбі ұлттық болмысымызға сай келетін қазақы киімдер мен бұйымдарды тек той-томалақта не мерекеде ғана тұтынатын. Ал, қазір қазақша стиль трендке айналды. Жұртшылықтың, әсіресе, жастардың да талғамы заманауи заттардан қазақи дүниелерге ауысып жатыр. Өйткені, қазіргі буын индивидуал әрі эксклюзив заттарға құмар. Сондықтан, мен де сол талғамға сай болу үшін трендтен қалмай, төл өнерімізді төрге сүйреп жүрген жайым бар, – дейді Нұрбану Сағырбекқызы.&nbsp; Төл өнерді түлетіп жүрген кейіпкеріміз бұл кәсіпті алғашында желі арқылы бастаған. Кейін жұмыстарын желіде ғана жарнамалап қоймай, кәдуілгі дүкен сөрелеріне қойып, кәсібін кеңейтуді жөн көріпті.&nbsp; – Студент кезімде тасбих, білезікті қолдан жасап сататын Жадыра деген апайдың қасында көмекші болдым. Жанында жүріп, біраз дүниені жасап үйрендім. Қызығушылығым кейін кәсіпке ұласып, 2019 жылы тәуекелге бел буып,осы істі бастап кеттім. Қазір, шүкір, тынымсыз еңбегімнің арқасында табыс тауып, тірлігімді тіктеп келемін, – дейді ол.&nbsp; Қазақ халқының ұлттық киімдері мен бұйымдары мәдениетіміз бен салт-дәстүріміздің айқын көрінісі. Оның заманауи сән нарығына сай түрленіп, жаңашыл көрініске ие болып жатқандығы көпті қуантады. Әрине, олардың осылай қайта жаңғырып жатқандығы оған жан бітіріп жатқан қолөнер шеберлерінің арқасы. Өз кәсібі арқылы ұлт мәдениетіне өзіндік үн қосып жүрген қазалылық қолөнер шебері Нұрбану Сағырбекқызының да еңбегі ерен десек жарасатындай. Өйткені, ол болмашы әрекеттер арқылы қазақилықты әрдайым трендке айналдыруды көздеді. Біз де сол секілді мүмкіндіктерге ұмтылып, ұлттық мүддеге қарай жұмылсақ, қазақи құндылықтарға деген қоғамдық көзқарастың тұғырын биіктетіп қоймай, табысқа да кенелген болар едік.

Қазақстан және Қызылорда облысының жаңалықтары: Кәсіпкерлік