Ұстаз – ұлық емес, ұлы қызмет. Қазіргі таңда Сырдария ауданына қарасты Шаған ауылындағы №37 мектеп-лицейдің мұғалімдерінің баптап қосқан әрбір жүйрігі іргелі алтын ұяның абыройын асқақтатып, білім мен ғылым бәйгесінде олжамен оралуда. Бүгінде білімнің биік шыңдарын бағындырып келе жатқан орыс тілі мен әдебиеті пәні мұғалімі Татьяна Казка мен озат оқушы Ескендір Жақсыбек биік белесті бағындыруда.«Ұстазы жақсының – ұстамы жақсы» де¬мекші, оқушының мықты болуы – мұғалімнің айтқан сөзінде ғана емес, көрсеткен үлгісінде.Негізінен, тәжірибелі ұстаздың шәкірттерімен бірге осыған дейін қол жеткізген жетістігі жетерлік. Мәселен, ұлағатты ұстаз жақында өткізілген білім бәсекесінде даралана білді.– Оқушының білім мен белсенділігін бір арнаға тоғыстырып, ұшар шыңға жетелеу қиын әрі қызықты жұмыс. Жауапкершілігі жоғары осынау жұмыстың нәтижесі бір жылда емес, қаншама уақыт ішінде белгілі болады. Сондай шәкірттерімнің бірі – Ескендір Жақсыбек. Өзінің оқуға, білімге құштарлығы, ізденісі арқылы көптеген олимпиадалардан жүлделі орындар алуда. Ескендір жалпы білім беретін пәндер бойынша республикалық ғылыми жобада орыс тілі пәнінен аудандық, облыстық кезеңнен І орын алып, республикаға жолдама алған болатын. «Молодежный сленг» атты орыс тілінде сөздік шығарып республика бойынша арнайы сертификатқа ие болды. Сонымен қатар пәндік және ауылдық олимпиаданың облыстық кезеңінде ІІ орын алды, – дейді Татьяна Казка.Расында, орасан жетістік ұстаздың бала қабілетін байқап, одан әрі жетілдірген еңселі еңбегінің арқасында жүзеге асуда.– Саналы ғұмырын ұстаздық қызметке арнап келе жатқан Татьяна Казка оқушының бойындағы ерекшеліктерді ескере отырып, олардың қызығушылықтарын оятып, өз бетінше жұмыс жасай білуге, дағдыланған маман. Қазіргі заман талабына сай жаңа технологиялық әдістерді енгізу және жетілдіру мақсатын өз тәжірибесінде жүзеге асырып келеді. Шәкірттері мектепшілік, аудандық, облыстық сайыста, олимпиадада жақсы нәтиже көрсетіп, табысқа жетуде. Мектептегі қоғамдық жұмысқа белсене араласатын мұғалімнің ұйымдастырушылық қабілеті жоғары. Ұстаздық қызметті бәрінен жоғары қоятын ардақты жанның білім беру саласындағы еңбегі елеусіз қалған емес. Марапаттарының ішінде Орта Азия мемлекеттерінің ғылыми-педагогикалық қауымдастығынан арнайы диплом, аудандық білім бөлімі мен кәсіподақ комитетінен «Құрмет грамотасы», облыстық білім бас¬қармасының басшысының «Құрмет гра¬мотасымен» марапатталған. Өзінің ақжарқын мінезімен дараланатын аяулы ұстаз әріпстестері мен шәкірттерінің арасында зор беделге ие, – дейді мектеп-лицей директоры Қалихан Омаров.Кез келген ұстаз үшін әрбір оқушының орны бөлек. Баланың өмірден өз жолын тапқанын, болашаққа нық сеніммен қадам басқанын қалайтын ардақты ұстаз шәкіртімен білім сынақтарында топ жара бермек.

Ұстаздан шәкірт озар

<a href="https://kyzylorda-news.kz/">Kyzylorda-news.kz</a> "Адамзаттың табиғатсыз күні жоқ, мұны айтуға табиғаттың тілі жоқ" деген мектеп оқулықтарында жиі кездесетін бұл тіркестің күн жылынып, жер жібігенде көбірек ойға оралатыны белгілі.&nbsp;Оның үстіне қазіргі таңда керемет нәтижеге жетелеп отырған «Жасыл мектеп» жобасы құтхана мектептегі экологиялық тіршіліктің күре тамырына қан жүгірткендей. Жуырда Жанқожа батыр атындағы №70 орта мектепте осыған байланысты «Экология және біз» атты аудандық семинар өтті.Ұлттық құндылықтар арқылы балаларға экологиялық мәдениетті дәріптеуді көздейтін жиынға Қазалы аудандық білім бөлімінің басшысы Әділхан Жөлекешов, мектеп басшылары мен ұстаздар қатысты. Олар ең алдымен, «Жасыл мемлекет жасыл мектептен басталады» деген кіріспе тақырыппен аулада атқарылған жұмыстармен танысты. Бұл сәтте мектеп жанынан құрылған «Бастау» домбырашылар оркестрі күй күмбірі арқылы меймандарға айрықша әсер сыйлап отырды. Оқушылар мен ұстаздардың қиял биігінде пайда болған қолөнер туындыларымен көпшілік танысып болған соң, қазақтың киелі шаңырағы астындағы басқосуға асықты.Онда оқушылар «Күріштің ғажайып сырларын» көпке мәлім етіп, «BIOSABIN-70» сабынын жасау жолдарын түсіндірді. Бұдан бөлек, ата-аналарды педагогикалық қолдау орталығының қарекеті көрсетіліп, «Экология әлеміндегі психология құпиялары» терапиялық жаттығулар, «Арал тағдыры» театрлық қойылымы көрермен назарына ұсынылды.

«Экология және біз» атты аудандық семинар өтті

&nbsp;<a href="https://kyzylorda-news.kz/">Kyzylorda-news.kz</a> Бүгінде Қызылорда қаласындағы көптеген білім ошақтары заманға сай білім беру үдесінен шығу жолында тынымсыз еңбек етуде. Сыр еліндегі осындай озық ізденісті кәдеге асыра білген білім ұясының бірі – Иван Панфилов атындағы №5 мектеп-лицейі.«Білекті бірді жығады, &nbsp;білімді мыңды жығады» &nbsp;деп дана халқымыз айтқандай, білім – жеңілмейтін қару, қараңғы түнде адастырмас жарық жұлдыз. Мемлекет басшысы Қасым-Жомарт Тоқаев &nbsp;«Лайықты азамат – өз білімін Отанымыздың игілігі үшін жұмсайтын адам. Алдымызда тұрған құбылмалы заманда жаста¬рымыз еңбекқор болмаса, ешқандай бәсекеге түсе алмайтынын терең түсінуі керек, жаңа ұрпақты еңбексүйгіштік идеялары мен құндылықтары негізінде тәрбиелеу керек» деген болатын.Шаһар орталығында орналасқан киелі шаңырақтың өңір тарихында алар орны ерекше. Осы аралықта берекелі білім ұясынан қаншама дарын түлеп ұшып, көптеген ілкімді жобалар жалғасын тапты.Мектеп-лицей 50 жылдың бедерінде зиялы қауымның табан тірер нысанына айналып, білім мен тәрбиені қатар ұштаған шәкірттер ұстаз абыройын асырғаны анық. №5 мектеп-лицей 2023-2024 оқу жылы қорытындысымен пәндік олимпиада нәтижесі бойынша қала мектептері арасында 2-орынға лайық деп танылып, зор жетістікке қол жеткізіп отыр.Бұл білім ордасы оқушылардың толық қалыптасуына жағдай жасайтын әлеуметтік орта қалыптастырып отырғанын мақтанышпен айтуға болады. «Үш-ақ нәрсе адамның қасиеті: ыстық қайрат, нұрлы ақыл, жылы жүрек»&nbsp;деп Абай атамыз айтқандай, жүректің жылуы, ар-намыс, қайрат-жігер деген сезімдері бар рухтың мекеніне айналған білім ордасынан білім мен тәрбие алып жатқан өскелең ұрпақ өмірден өз орындарын тауып, қоғамда белсенді еңбек етуде.<blockquote>– Бүгінде білім беру саласы жыл санап жаңарған мазмұн, жаңа технология көмегімен алға қадам жасауда. Талабы мен талғамы өскен қоғам мектеп қабырғасында баланың теориялық білімімен қатар, практикалық білігінің де қалыптасқанын көздейді. Оған қоса, оқулықтан ғана үйретіп, ауызша талдаумен шектелетін әдістеме заманауи білім беру ісінде ескіргені қашан. Осыған орай Қазақстан мектептерінде &nbsp;технологиялық игілік пен ғылыми жаңалықты алдымен мектеп оқушысына жәрдем есебінде пайдалануға күш салуда. IT құрылғылар, робот пен пәндік кабинетте жаңашылдық сезіліп, білімді жастың қатары өсіп отыр. Шаһар орталығында орналасқан киелі шаңырақтың өңір тарихында алар орны ерекше. Осы аралықта берекелі білім ұясынан қаншама дарын түлеп ұшып, көптеген ілкімді жобалар жалғасын тапты, – дейді мектеп директоры Рита Мұқашова.</blockquote>2022-2023 оқу жылында Роза Садық математика пәнінен&nbsp;«Зерде» жалпы білім беретін пәндер бойынша ғылыми жобаның республикалық кезеңінің Гран-при иегері атанды. Жетекшісі Ғабиден Қайдаулов, математика пәні мұғалімі. Арыслан Нұрланұлы география пәнінен «Дарын» жалпы білім беретін пәндер бойынша олимпиаданың республикалық кезеңінің 2-орын иегері атанды. Жетекшісі Күлзада Садыкова – география пәні мұғалімі. Ангелина Белоусова &nbsp;«Дарын» жалпы білім беретін пәндер бойынша ғылыми жобалар байқауының орыс тілі мен әдебиеті пәнінен республикалық кезеңінің 3-орын иегері. Жетекшісі Роза Күзембаева – орыс тілі пәні мұғалімі.Сонымен қатар ұлттық мектеп лигасы бес асық ойынынан&nbsp;облыстық іріктеу жарысында 7-8 мектеп оқушылары 2-орын иеленсе, 7 «б» сынып оқушысы Көркем Кемел «үздік ойыншы» номинациясымен марапатталса, «Алтын қазына» қолөнер шеберлері байқауының қалалық кезеңінде 2-орын иеленді. «Eco green Iab» жасыл бөлмесі биыл іске қосылды. Жоба аясында оқушылардың бас қосып, өздерін еркін, жайлы сезінуіне мүмкіндік жасау үшін арнайы кабинет жабдықталуда. Кабинетте жұмсақ пуффиктер, үстел, су диспенсері, тәттілер, бөлме гүлдері, буккросинг бұрышы, теледидар, караоке болады. Бөлмені жабдықтауда да жиһаздың түсінің, дизайнының оқушыға тек жағымды көңіл-күй сыйлауын психологтардың зерттеуіне сүйеніп ұйымдастырылуда.Білім мекемесінің ұстаздары да абырой төрінен көрінуде. Мектеп мұғалімі Ғабиден Қайдауылов Оқу-ағарту министрінің Құрмет грамотасын иеленсе, Роза Күзембаева «үздік педагог атанып, 875,100 теңгенің сертификатын алды. 2022-2023 оқу жылында И. Панфилов атындағы №5 мектеп-лицейінің орыс тілі мен әдебиеті пәні мұғалімі «Білім беру ісінің құрметті қызметкері» төсбелгісімен марапатталды.Мектеп басшысы мектеп ұжымының алға қойған мақсаттарымен де таныстырды.Жекелеген пәндерден балалардың қабілетін, бейімділігін айқындап, олимпиада резервін дарынды оқушылармен толықтыру, дарынды және ерекше қабілетті балалардың ізденуіне жағдай жасау сол арқылы білім сапасын арттыру. Дарынды оқушының ғылыми ізденіс жұмысымен көбірек айналысуына жетекшілік ету, жағдай жасау, жекелеген оқушылармен мемлекеттік стандарт деңгейінен жоғары деңгейдегі тапсырма мен материалды көбірек қамту арқылы қатысушы емес жеңімпаз санын арттыру. Әдістемелік пән бірлестіктегі барлық мұғалімдердің &nbsp;толық қамтылып, олимпиада, ғылыми жоба, байқауларға қатысуына ықпал ету, қолдау көрсету басты жоспарымыз, – деді мектеп директоры.

Жарты ғасыр абыройлы еңбек еткен білім ұясы

<a href="https://kyzylorda-news.kz/">Kyzylorda-news.kz</a> Мектептің табалдырығын имене аттаған жас жеткіншектің өмірінде бастауыш сынып мұғалімінің алатын орны ерекше. Сондай жанның бірі, бүгінде еңбек өтілінің 40 жылын педагогикаға арнаған аяулы ұстаз – Марина Жансейтова. Алғашқы ұстаз әріп танытып қана қоймай, баланың бойындағы қабілетін ашып, болашағына бағыт-бағдар беретін бағбанға айналады.Білім мен тәрбиенің негізі – бас­тауыш сыныпта қалыптасатыны анық.&nbsp;Талай шәкірттің өмірден өз орнын табуына аянбай еңбек еткен ардақты ұстаз әрбір шәкірттің жүрегінен ерекше орын алған жан.Ұстаз атты ұлы есімді жоғары қоятын білікті маман аудан орталығынан кейінгі ең үлкен елді мекен Шаған ауылындағы №37 мектеп-лицейдің бастауыш сынып мұғалімі. Ардақты ұстаз 1963 жылы Қызылорда қаласында дүниеге келіп, ауылда әжесінің тәрбиесінде болған. Ауылдағы мектептен білім алып, білімге құштар болған жан Қызылорда қаласындағы Н.Гоголь атындағы педагогикалық инс­титутта қазақ мектептеріндегі орыс тілі пәнінің мұғалімі мамандығын меңгеріп шығады. Институтты тәмәмдаған соң №37 мектеп-лицейде 1986 жылы алғашқы еңбек жолын бастайды.<blockquote>– Бала кезімнен ұстаз болуды армандайтынмын. «Арман – адамға қанат бітіреді» демекші, бүгінде сол арманның арқасында шәкірттерімнің «Алғашқы ұстазым» деген ұлы есімге ие болып келе жатырмын. Бала өмірінің алғашқы баспалдағын аттаған сәтте қалай білім мен тәрбие берілсе, одан арғы кезеңде өзін тұлға ретінде қалыптастырады. Дана халқымыздың «Жас бала жаңа өркен жайған жасыл ағаш тәрізді» демекші оқушыларға әркез барлық білгенімді үйретіп, күш-жігерімді жұмсауға тырысамын. Алғашқы тұрмыс құрған жылдары шәкірттеріме тыңғылықты көңіл бөле алмай қалдым деп қынжылатынмын. 40 жылдық еңбек жолында қиындығы мен қызығы қатар жүретін ұстаздық қызметте үнемі іздену, өзіңді жетілдіру, білім алу керектігін ұғындым, – дейді білікті ұстаз Марина Жансейтова.</blockquote>Қай кезде де әрбір сабағын бір біріне ұқсатпай өткізу үшін ізденіп, жеке тұлғаның дамуына жол ашуға бағыт-бағдар беруді мақсат еткен ұстаздың жеткен жетістіктері бір төбе. Атап айтар болсақ, «Білім шыңы» төсбелгісімен, Білім және ғылым қызметкерлері кәсіподағының облыстық комитетінің екі мәрте «Құрмет грамотасымен», аудандық білім бөлімінің «Дипломымен» марапатталды. Сонымен қатар бастауыш сыныптарға арналған олимпиадаға дарынды шәкірт дайындағаны үшін алғыс хат иеленсе, «Білім шыңы – білікті ұстаз еңбегі» атты кітапқа есімі енді.Ұстаздың еңбегінің жемісі – шәкірттерінің жеткен жетістігі. Осы орайда Марина Болатқызының оқушылары талай бәйгеден жеңімпаз атанып келе жатқанын айтқан орынды. Мәселен, «Ақбота», «Кенгуру» республикалық интеллектуалдық марафонында А.Берікқызы, Ә.Сәрсенбай мен А.Нұртасқызы ІІ орын, Т.Мұратов, С.Ринатұлы мен А.Әділ ІІІ орын, «Ұлы дала өнертапқыштыққа алғашқы қадам» ғылыми жобасында Ә.Ақан ІІІ орын, «Мың бала» республикалық олимпиадасының «Абай оқулары» конкурсынан А.Әділ бас жүлде, А.Орынбасар ІІІ орын, «Зерде» республикалық зерттеу жобалары аудандық кезең бойынша А.Нұртасқызы мен Ә.Сәрсенбай ІІІ орын алды. «Бозторғай» шығармашылығы байқауында Ә.Сәрсенбай І орын, О.Жаңабай ІІ орын иеленіп, Ташкентке жолдама алды.Бүгінде 7 мәрте бастауыштан түлек ұшырған, жүздеген оқушының жүрегінен орын алған ұлағатты ұстаз бір әулеттің отанасы, шаңырағының берекесі. Отағасы Жұмақожа Жансейтовпен 37 жыл өмірдің қиындығы мен қызықшылығын бірге көріп келе жатқан берекелі шаңырақ иелері. Аяулы ұстаз жұбайымен 3 ұл, 1 қыз тәрбиелеп өсірді, қазіргі таңда 2 немеренің сүйікті әжесі. Өсіп-өнген әулеттің балалары бүгінде өз алдына бір-бір саланың мамандары, кенже қызы студент.

Бала жанының бағбаны

<a href="https://kyzylorda-news.kz/">Kyzylorda-news.kz</a> Қызылорда қалалық орталықтандырылған кітапханалар жүйесіне қарасты №18 кітапхананың ұйымдастыруымен №271 мектеп оқушылары мен Жалаңтөс Баһадүр Сейітқұлұлы атындағы облыстық мамандандырылған мектеп-интернат-колледж оқушыларының қатысуымен әскери қайраткер, Кеңес Одағының батыры, Халық қаһарманы Сағадат Нұрмағамбетовтың туғанына 100 жылдығына орай "Өресі биік өр тұлға" атты елтану сағаты өткізілді.Шара барысында батырдың өмірбаяны мен ерліктері, қазақ халқына сіңірген еңбегі және жазып қалдырған естеліктері туралы жастарға мол ақпарат берілді. Жас оқырмандарымыз өз кезегінде Отан, туған ел, Жеңіс тақырыбында өлеңдер айтып, күй тартып елтану сағатын патриоттық көңіл-күйде өткізді.Әскери қайраткер, Кеңес Одағының батыры, Халық қаһарманы Сағадат Қожахметұлы Нұрмағанбетов 1924 жылы, 25 мамырда Ақмола облысы, Ақкөл ауданы, Еңбек ауылында дүниеге келген.Әке-шешесінен ерте айырылған бала Сағадаттың жетімдік тағдыры тым ерте басталады. Ата-ана орнын жалғыз арқа сүйер ағасы Сағит басты.Сағадат ағасы Сағитты ерекше жақсы көретін, аға сөзін байыппен тыңдайтын. Ағасы өте білімді болған.Оқуға ынталы кішкентай Сағадат, елді аштық жайлаған - 1933 жылы Алексеевка селосындағы орыс мектебіне барды. Білімді жақсы игерген зеректігінің арқасында Сағадат туған ауылына қызмет етіп, еңбекке ерте араласады. Далалық бригаданың есепшісі болды.1941 жылы Ұлы Отан соғысы басталғанда ағасы Сағит соғысқа аттанады. Ағасы соғыста қаза болып,1942 жылы өзі сұранып Сағадат та әскерге алынып, Ұлы Отан соғысына қатысқан.1945 жылы 27 ақпанда Кеңес Одағының батыры атағы берілді. Қаһарман қазақ ұлы Сағадат Нұрмағамбетов соғысты Берлинде аяқтап, жеңіспен оралды. Еліміз тәуелсіздік алған жылдары Қазақстан республикасының Қорғаныс министрі болып қызмет атқарды.2013 жылдың 24 қыркүйегінде 90 жасқа қараған шағында дүниеден озды. Отан үшін от кешкен өресі биік өр тұлға Сағадат Нұрмағамбетовтың жарқын бейнесі ел есінде мәңгі сақталады.Шараны ұйымдастырудағы басты мақсат – жастарды, оқушыларды отансүйгіштікке баулу, ұландарымызға үлгілі тарихи тұлғаларымызды насихаттау.

Қызылордада оқушыларға батыр ерлігі насихатталды

<a href="https://kyzylorda-news.kz/">Kyzylorda-news.kz</a> &nbsp; Білімнің қайнар көзі мектепте қалыптасатыны рас.&nbsp;Мектеп – білім бесігі. Білім ошақтарының білімді ұстаз­дарының талапты оқушылардың түлеп ұшуына сіңірген еңбегі ұшан теңіз.&nbsp;Осы ретте, білімнің қара шаңырағы, сан ғасырлық тарихы бар&nbsp;Сырдария ауданына қарасты&nbsp;Шаған ауылындағы №37 мектеп-лицейдің жыл көлемінде атқарылған жұмыстары, тыныс-тіршілігі мен жетістіктері туралы мектеп-лицейдің директоры Қалихан Омаровпен сұхбаттасқан болатынбыз.– Қалихан Бердіханұлы, сөздің ең ұлысы – тарих демекші, Сіз басқарып отырған білім ошағының тарихы тереңде жатқанын білеміз. Осы ретте, алғашқы сұрақты мектеп тарихына бағыттасақ.– Иә, сан ғасырлық тарихы бар мектеп – 1927 жылы «Жәдігер» 4 сыныпты бастауыш мектебі болып іргесі қаланды. Білім ордасы 1934-1935 оқу жылында жеті жылдық болып қайта құрылды. 1951 жылы Ермағанбет Жүсіпов басшылық етіп, осы кісінің кезінде мектеп үйі салынып «ВЛКСМ-ның XXX жылдығы» аты берілді. Кейіннен 2015 жылы А.Атақаев көшесінде орналасқан жаңа ғимараттың іргетасы қаланып, №37 мектеп-лицейі 3 қабатты типтік жобада, 900 орындық болып салынды. Білім мекемесіне қарасты Сырдария ауданы әкімдігінің 2016 жылғы 28 қарашадағы №371 қаулысына сәйкес, білім ошағына №37 мектеп-лицей мемлекеттік мекемесінің статусы берілді. Содан соң, Қызылорда облысы әкімдігінің 2021 жылы 5 қаңтардағы №176 қаулысына сәйкес, Қызылорда облысының білім басқармасының Сырдария ауданы бо­йынша білім бөлімінің «№37 мектеп-лицейі коммуналдық мемлекеттік мекемесі болып қайта аталды. Тоқсан жеті жыл ішінде Қазақ ССР халық ағарту ісінің үздігі, еңбек ардагері, ҚР Білім беру ісінің үздігі болған ұстаз ардагерлері шәкірттерге білім берді.– Білім ошағының бүгінгі тыныс-тіршілігі қалай?– Қазіргі таңда мектепте барлығы 975 оқушы бар. Оның ішінде 1-11 сыныптарда 892 және даярлық сыныпта 83 бала бар. Оқушылардың үлгерім сапасына келетін болсақ, оқу озаты – 211. 1-4 сыныптың оқушылары және әлеуметтік аз қамтылған отбасынан шыққан 450 бала бір мезгіл ыстық тамақпен қамтылған.Мектептің материалдық базасы жаңа модифи­кациялық биология, химия, физика кабинет­терімен жасақталған. Сонымен қатар тарих, орыс тілі мен әдебиеті, математика кабинеті, қазақ тілі және қазақ әдебиеті, ағылшын тілі, мультимедия кабинеті, робототехника, информатика, алғашқы әскери дайындық, бас­тауыш сынып оқу сыныптары пәндік оқу бағдарламасы бойынша жаңа технологиямен жабдықталып, практикалық оқу жүйелі түрде жүргізі­луде. Бала­ларға жан-жақты бі­лім беру үшін 5 зертхана жұмыс жасайды.Ер балаларға ар­налған оқу шеберханада станоктармен, ал қыз балаларға арналған шеберханада тігін машинасы, үтік үстелімен жабдықталған. Мектебіміз бойынша 17 спорттық үйірме бар. Жалпы, Шаған ауылдық өнер мектебі мен облыстық балалар мен жасөспірімдерге арнал­ған спорт мекте­біндегі үйірмелерге 543 оқушы қатысады.– Мұғалім қастерлі мамандық иесі екені сөзсіз. Сіз басқаратын мектеп мұғалімдерінің қандай жетістігі бар?Мектепте жалпы 162 мұғалім қызмет етеді. Педагог-зерттеуші – 21, педагог-сарапшы – 62, педагог-модератор – 53. Бүгінде ұжымда тәжірибесі толысқан мұғалімдермен қатар, жас ұстаздар білім береді. 10 пән бірлестігі құрылған. Пәндік апталықтар, семинарлар өткізу, мұғалімдердің тәжірибе алмасуы дәстүрлі түрде жүзеге асырылады. Ұжымның ауызбіршілігі, біліктілігі арқасында мектебіміз биіктерден көрініп келе жатыр. Бұл дегеніміз – білім мен тәрбиені бір арнаға тоғыстырып, оқушыларға сапалы білім беруде аянбай еңбек етіп келе жатқан ұстаздың жемісі. Мәселен, бастауыш сынып мұғалімі Роза Сейтасқарова «ҚР Білім беру ісінің құрметті қызметкері» төсбелгімен, физика пәнінің мұғалімі Ләйлә Мамрайемова ҚР Білім және ғылым министрлігінің «Құрмет грамотасымен» марапатталды. Ләйлә Мамрайе­мова­ның жетекшілік еткен оқушысы Нұр­болат Баянбайұлы ауыл балаларына арналған жалпы білім беретін пәндер бойынша олимпиадада физика пәнінен аудан­дық, облыстық кезеңдерден І орын алып, республикалық кезең қатысушысы болды. Сонымен қатар Роза Сейтасқарованың оқу­шысы Мұхаммед Қайратұлы «Алтын сақа» олим­пиадасының облыстық кезеңінен І орын алды.– Оқушылардың жеткен жетістігі және пәндік олимпиадаларға қатысу деңгейі қандай?– Оқушылардың жақсы нәтиже­сі көп. Жалпы білім беретін пәндер бойын­ша республикалық ғылыми жобалар конкурсы­ның математика бағытының облыс­тық кезеңі бойынша 10 сынып оқушысы Нұрдана Сейдалы ІІІ орын, орыс тілі мен әде­биеті бағытының облыстық кезеңінде 9 сынып оқушысы Ескендір Жақсыбек І орын алып келді. Ал, «Зерде» республикалық ғылыми жобалар конкурсының ағылшын тілі бағытының облыстық кезеңінен 7 сынып оқушысы Талшын Сәдуақасова ІІІ орынды иеленді. Сонымен қатар «Инофест – 2023» байқауында Алтыншаш Арыстанбек пен Инабат Аймағанбетова ІІ орын, «Хакатон – 2023» байқауында 6 сынып оқушысы Инабат Аймағанбетова мен 7 сынып оқушысы Ерсұлтан Жанболатұлы жүлделі ІІ орынға қол жеткізді. Биыл 66 оқушы 11 сыныпты бітіреді. Үш оқушымыз «Алтын белгіге», он екі оқушымыз «Үздік аттестатқа» үміткер. Оқушылар ақылы түрде қаңтар және наурыз айларында ҰБТ-ға қатысып, орташа балл 78 балл құрады.– Сұхбатыңызға рақмет.

Мектеп – білім айдынындағы үлкен кеме

<a href="https://kyzylorda-news.kz/">Kyzylorda-news.kz</a> Білім – шеті жоқ алып мұхит іспеттес. Ол жолда арманыңды адаспай анық табу тек білімге ден қойып, ізденістің ізіне түскен шын мықтылардың ғана қолынан келеді. Ал, қызылордалық өрендер осы тұста өздерінің нағыз білімді жастар екенін еліміздің түкпір-түкпірінде дәлелдеп жүр. Бүгін Өңірлік коммуникациялар қызметінің баспасөз алаңында республикалық «Intellecta» интеллектуалды ойынының жеңімпазы атанған «Білім Ыбырай» қоғамдық қорының студенттері қонақ болып, жарыстан алған әсерлері жайында сөз қозғады.<blockquote> – 27 сәуір күні Ақтөбе қаласында республикалық «Мұғалім» жобасының ұйымдастыруымен интеллектуалды сайыс өтті. Бұл сайыста аймақтық кезеңде жеңімпаз атанған Алматы, Семей, Қарағанды және Ақтөбе қаласының студенттерімен бақ сынастық. Нәтижесінде, бірінші орынды қанжығамызға байлап, жеңіспен оралдық. Сондай-ақ, біз тобымызға «Dariya» деген атау бердік. Бұл біздің барлық біліміміздің қосындысы дариядай мөлдір, терең болсын деген мағынада қойдық. Бұл жарыс біз үшін үлкен тәжірибе болды. Осы арқылы «Ыбырай» қоғамдық қорындағы өзге де студенттермен танысып, арамыздағы байланыс нығая түсті. Алдағы уақытта өтетін өзге де жарыстарға бұдан да жоғары деңгейде дайындалып, білім бәсекесінде биіктей түсеміз деген ниеттемін, - деді Қорқыт ата атындағы Қызылорда университетінің студенті, «Білім Ыбырай» қоғамдық қорының стипендиаты Шәміл Анарбай. – Жалпы, «Intellecta» интеллектуалды сайысы 4 кезең бойынша өтті. Алғашқы кезең «Isebreaking» деп аталады. Біз мұнда ғылым, кітап, тарих, дәстүр іино және музыка деген алты категория бойынша бақ сынадық. «Master mind» деген атау қойылған екінші кезеңде әр түрлі тақырыптағы 30 блиц-сұраққа 2 минут ішінде жауап берсек, «Expecto patronum» бөлімінде екі химиялық, физикалық эксперимент жасадық. Ал, соңғы кезең «Vabank» деп аталды. Бұл кезеңде де сұрақтарға мүдірмей жауап беріп, барлық кезең бойынша 4 850 ұпай жинап, жеңіске жеттік. Осылайша, біз болашақ мұғалімдер арасында өткізілген байқаудың алғашқы жеңімпаздары атандық, - деді Қорқыт ата атындағы Қызылорда университетінің студенті, «Білім Ыбырай» қоғамдық қорының стипендиаты Мадияр Дузумбайұлы.</blockquote><blockquote>– Жалпы, «Білім Ыбырай» қоғамдық қоры республикалық «Мұғалім» деген жоба аясында жүзеге асады. Яғни, бұл жобаның мақсаты – педагогикалық бағытта білім алатын студенттерге қосымша қолдау көрсетіп, мектеп бітіруші үздік түлектерді мұғалім болуға үйрету. Білімге құштар жастардың жолын ашып, оларға үздіксіз қолдау көрсетуде «Білім Ыбырай» қоғамдық қоры аянбай еңбек етіп келеді. Біз студенттерді «Кәсіби даму», «Тұлғалық даму», «Әлеуметтік даму» және «Тіл білімі» деп аталатын 4 бағыт бойынша дамытамыз. Қазіргі таңда қорымызда жалпы 108 студент бар. Олардың 70-ке жуығы 30 мың теңге көлемінде қосымша шәкіртақы алады. Ал, бұл интеллектуалды сайыс «Ыбырайлықтардың» алғашқы жеңісі емес. Біздің шәкірттеріміз қандай да бір жарыстарға қатысса да үнемі жеңіспен оралады,- деді «Білім Ыбырай» қоғамдық қорының координаторы, менторы Азамат Абимолда.</blockquote>

Білім бәсекесінде оза шапқан өрендер

<a href="https://kyzylorda-news.kz/">Kyzylorda-news.kz</a> &nbsp;«Еркін елдің ертеңі - кемел білім мен ана тілінде» тілдер бөлімінің апталығы аясында қала мектептері арасында «Дәстүрдің озығы бар, тозығы бар»&nbsp; тақырыбында дебат сайысы өтті. &nbsp;&nbsp;&nbsp; &nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;Пікірсайыс – жетістікке жетудің бірден бір құралы. Ойды жүйелеп, өткір сөйлеп қана қоймай, тыңдап, талдап, эмоцияны ақылға билету, мәселенің мәнін ашып, әр тарапты түсіну мүмкіндігін де береді. Сонымен қатар ол – тәртіп пен тәрбие. Бұл ойында пікір таластыра, сөз жарыстыра отырып, тәртіп сақтауды үйренеді. Дебатқа қадам басқан күннен бастап оқушылардың сөйлеу әдебі сыпайылық түріндегі «Сіз» сөзіне ауысып, айналасындағы адамдарға «ханым, мырза» –деп құрмет көрсетуге дағдылана бастады. Ойын барысында ойыңызды тура жеткізуге, нақтылыққа, жүйелілікке, айтылған қарсы пікірге қарамастан өз ойыңыздың дұрыстығын дәлелдеуге үйренесіз. Бойыңызда білімділік, батылдылық секілді қасиеттер мен көпшілік алдында әдепті сөйлеу дағдысы қалыптасады.Дебаттар логикалық және сыни тұрғыдан ойлауды, коммуникативті мәдениетті және халыққа сөйлеу дағдысын дамытады, өздігінен шешім қабылдауға дайындайды, қоғамның болашақ көшбасшылары ретінде тұлғаның қалыптасуына ықпал етеді. Дебат тәртіпке бағынады. Қарсыластың жеке басына тиісуге болмайды. Дебатта уақыт шектеулі. Сондықтан оны дұрыс жоспарлай білу керек. Қатысушы білімді, батыл және әдепті болуға тиіс. Ең бастысы, дебат ұрыс алаңы емес, нақты тақырып аясында арнайы ережелер негізінде ой жарыстыру.Қазіргі уақытта мектепішілік дебат қозғалысын дамыту — өзекті мәселе. Себебі оқушылардың бойында саяси мәдениетті, өз әрекеті үшін өзі және қоғам алдында жауапкершілікті, шығармашыл және сыни ойлау қабілетін қалыптастыру қажет.«Орда» колледжі ұйымдастырған оқушылар арасындағы сайысқа 6 фракция қатысып, тақырып бойынша сөз шеберлігі мен ой ұшқырлығын көрсетті. Сайыс қорытындысы бойынша: I орын – И.В.Панфилов атындағы №5 мектеп-лицей «Руханият» фракциясы, II орын – А.Байтұрсынов атындағы №211 орта мектебі “Ахмет жастары” фракциясы, III орын – Т.Жүргенов атындағы №136 мектеп-лицей «Жүргенов жастары» фракциясы жеңімпаз деп танылды. «Ең үздік спикер» номинациясымен Т.Жүргенов атындағы №136 мектеп-лицей оқушысы Жұмабек Асем марапатталды.&nbsp;Қорлан САРЫ

Оқушылар пікірсайыс турнирінде бақ сынады

<a href="https://kyzylorda-news.kz/">Kyzylorda-news.kz</a>&nbsp; Қызылорда қаласындағы М.Мәметова атындағы Қызылорда педагогикалық жоғары колледжінде «Scaffolding-Тәжірибеге бағытталған тәсілдер-кәсіби құзіретті маман даярлаудың негізі» тақырыбында ағылшын тілінің оқытушыларына арналған облыстық семинар өтті.Семинарға «Шетел тілі» бөлімінің оқытушысы, Қызылорда облысы ағылшын тілі мұғалімдері қауымдастығының вице-президенті Л.Драхметова, «Шетел тілі» бөлімінің оқытушысы, білім магистрі Р.Жолаушиева, Қызылорда облысы бойынша аймақтық TOEFL (ТОЕФЛ) орталығының жетекшісі, Қорқыт Ата атындағы Қызылорда университетінің халықаралық қатынастар бөлімінің топ жетекшісі, Қызылорда облысы ағылшын тілі мұғалімдері қауымдастығының президенті Т.Кеншінбай, "Назарбаев Зияткерлік мектептері" ДББҰ, Педагогикалық шеберлік орталығының Қызылорда қаласындағы филиалының аға менеджері, тренер Е.Оспанов, Қазанғап атындағы жоғары музыкалық колледжінің ағылшын тілі пәні оқытушысы А.Баймағанбетова, №23 Ж.Қизатов атындағы мектеп-лицейінің ағылшын тілі мұғалімі Б.Беккулиева, А.Түгелбаева және М.Мәметова атындағы Қызылорда педагогикалық жоғары колледжінің «Шетел тілі» бөлімінің оқытушылары және 3, 4-курс білім алушылары қатысты.Сондай-ақ, сала маманы ретінде қатысқан орталықтың ағылшын тілі оқытушысы Б.Байділдаева аударма саласындағы жаңа мүмкіндіктер мен мәселелер туралы ақпаратпен бөлісті.Семинар барысында өз тәжірибелерімен бөліскен мамандар қатысушылардың сұрақтарына жауап беріп, семинар соңы өзара қызу пікірталасқа ұласты.

Қызылорда: Ағылшын тілі мамандарына арналған семинар өтті

<a href="https://kyzylorda-news.kz/">Kyzylorda-news.kz</a> &nbsp;М.Мәметова атындағы Қызылорда жоғары педагогикалық колледжінде дәстүрлі түрде «Үздік топ жетекші –2024» байқауы өткізілді.&nbsp;Байқаудың басты мақсаты – топ жетекші қызметінің маңыздылығын айқындау, кәсіптік, техникалық бiлiм беру мазмұнында базалық құндылықтар: қазақстандық патриотизм және азаматтық жауапкершiлiк, құрмет, ынтымақтастық, еңбек және шығармашылдық, ашықтық, өмiр бойы бiлiм алуды қалыптастыру болып табылады.Аталған сайыстың алғашқы кезеңдері сәуір айынан басталып, қатысушылар топпен жұмыс (студент жетістігі мен сабаққа қатысуы, тәрбие сағаттар және топ студенттерімен атқарлыған жұмсытар) және ашық тәрбие сағат өткізу бойынша бәсекеге түсті.Топ жетекшілер байқауына әр бөлімнен бір топ жетекші қатысып, сәуір айынан бастап түрлі кезеңдер бойыншп бақ сынады. Атап өтсек, «Мектепке дейінгі тәрбие және оқыту» бөлімінің топ жетекшісі – Ғазиза Ділманова, «Бастауыш педагогикасы мен әдістемесі» бөлімінің топ жетекшісі – Әлібаева Мөлдір Әлібаева, «Филология» бөлімінің топ жетекшісі –Жәнібек Қонысов, «Физика, математика және ақпараттық жүйе» бөлімінің топ жетекшісі – Гүлмира Шапшанова, «Өнер» бөлімінің топ жетекшісі – Гүлжаухар Қойшагова, «Шетел тілі» бөлімінің топ жетекшісі – Сәуле Баймұрат, «Дене тәрбиесі және спорт» бөлімінің топ жетекшісі – Дулат Даутов.Топ жетекшілер байқауына директордың тәрбие ісі жөніндегі орынбасары, комиссия төрағасы Гүлдана Исаева, Ақпараттық талдау бөлімінің меңгерушісі Роза Шермаханова, кітапхана меңгерушісі, комиссия мүшесі Зульфия Пазылова және колледж әдіскері, комиссия мүшесі Гүлшара Башарова, кәсіподақ төрайымы, комиссия мүшесі Гүлсім Нұрадинова әділ қазылық етті.&nbsp;Интеллектуалды сайыс «Менің көңілді тобым» таныстыру кезеңі, «Ұшқыр ойдан белсенді әрекетке» педагогикалық жағдаяттарды шешу және лайфхак (өз өнерін үлгі етіп көрсету) кезеңдері бойынша өтті.&nbsp;Әділқазы алқаларының шешімімен байқаудың жеңімпаздары деп&nbsp; «Бастауыш педагогикасы мен әдістемесі» бөлімінің топ жетекшісі Мөлдір Әлібаева «Үздік топ жетекші» атанды. Сондай-ақ «Мектепке дейінгі тәрбие және оқыту» бөлімінің топ жетекшісі Ғазиза Ділманова "Шебер топ жетекші" номинациясы, «Физика, математика және ақпараттық жүйе» бөлімінің топ жетекшісі &nbsp;Гүлмира Шапшаңова "Өнерлі топ жетекші" номинациясы бойынша марапатталды.&nbsp;&nbsp;Қорлан САРЫ

Педагогикалық колледждің үздік топ жетекшісі анықталды

<a href="https://kyzylorda-news.kz/">Kyzylorda-news.kz</a> &nbsp;Анаға тағзым орталығының базасында жасанды интеллектті алғаш рет қазақша сөйлеткен қызылордалық оқушы Асылжан Абдуллаевпен кездесу өтті.&nbsp;Жиында жас технократ ақпараттық технологиялар саласындағы жетістіктері мен жобаларын таныстырды. Сонымен қатар, кездесу барысында IT&nbsp;саладағы алғашқы қадамы, алғашқы тәжірибесімен бөлісті. Қатысқан оқушылар үшін тың деректер мен&nbsp;мотивацияға толы жиын болды.Айта кетейік, Асылжан Абдуллаев «QazaqGPT» жобасын іске қосып, жасанды интеллектіні қазақша сөйлетті. Бұйрық берсең, сурет салады, дыбыстама жасайды. Бағдарламаға 300 мыңнан астам сөз бен 220 миллиардқа жуық ақпар енгізген. Бүгінде қолданушылар саны артуда. Бұдан бөлек, «KazHydroTech» жобасын қолға алуда. Бұл жоба аймақтағы су ресурстарын басқару мен ауыл шаруашылығының қауіпсіздігін қамтамасыз етуге бағытталған.<blockquote>– Жыл сайын су жетіспеушілігі Орта Азияда геосаяси және геоэкологиялық мәселелерді туындатады. Барлығы судың тапшылығына әкелетін үлкен нонсенс. Проблеманы шешу мақсатында Қорқыт ата атындағы Қызылорда университетінің базасында жаңа AI жасауға кірістік. ЖИ орнатылған датчиктер судың мөлшері мен құрамына қарай мониторинг жүргізу арқылы 92% суды үнемдейді, – деді Асылжан Абдуллаев.</blockquote>Жобада Израиль тәжірибесінен алынған тамшылатып суару әдісі қолданылады. Бұл тәсіл өсімдіктерді қажетті ылғалмен қамтамасыз ету арқылы суды пайдалануды оңтайландырады. Жасанды интеллект қосылған сенсорлар топырақ пен атмосфера жағдайын бақылайды, арнайы орнатылған параметрлерге сүйеніп жиналған деректер арқылы тиімді суару уақыты мен көлемі туралы шешім қабылдайды.Сонымен қатар технология тұрғысынан «KazHydroTech» жобасы ауыл шаруашылығының тұрақты дамуы мен қоршаған ортаны қорғауда маңызды қадам.Ал келесі жобасы бойынша медиа кеңістікте танымал. «Тарихнама» атты&nbsp; медиа алаңға бағытталған жобасы да сәтті жүзеге асуда.&nbsp;<blockquote>− Жастар тағылымға толы бірнеше томдық кітап, документалды фильм, жәдігерлерге толы музейді аралауға уақыт таппайды. Себебі қарбалас. Алайда Instagram, Telegram, TikTok секілді платформалар атағын жоғалтпақ емес. «Тарихнаманы» да осы әлеуметтік желілерді пайдалану арқылы жүзеге асырып, көптеген жастың қазақ тарихына қызығушылығын оята алдым. Оған дәлел, 1 жылда TikTok желісіндегі аккаунттағы контентті 50 млн-ға жуық көрермен тамашалады. Тарихқа қатысты құнды деректі қарауға ұмтылыс артып, 163 мың жазылушы жиналды.Қызығы, жоба тек Қазақстан емес, Орталық Азия, Еуропа және Батыс Еуропа мемлекеттерін қызықтыра алды. Сонымен қатар Түркия мемлекетінен бірлесіп жұмыс істеуге ұсыныс түсуде. Алдағы уақытта халықаралық деңгейде бейнеконтент жасау ойда бар. Бұл – жоба жеткен бірегей жетістік. Әрбір азамат тарихты білуге міндетті. Сол міндетімді мүдірмей атқарудамын деген үміттемін. оба ұтымды болу үшін зерттеу жұмысын жүргізіп отырдым. Яғни, «қандай мәлімет қызық, оны қалай ұсынуға болады?» және «қандай әлеуметтік желі ұтымды?» деп, сауалдарға жауап іздедім. Жүйелі нәтижеге жету үшін ғалымдар пікірін саралау да тиімді.Жалпы, ғалымдар қысқа ақпарат есте тез сақталады деген тоқтамға келген. Сонымен қатар, адамның жады сөзге қарағанда суреттегі ақпаратты жылдам есте сақтауға бейім. Сол себепті TikTok желісінде кез келген тарихи мәліметті арнайы оқиғаға қатысты суретпен тоғыстырып, қысқаша ақпарат беремін. Жобаның басты мақсаты да сапалы түрде аз уақытты қамтитын ақпарат көзін ұсыну екенін ескерсек, дұрыс жолдамыз деп ойлаймын. Тәжірибе мен кеңес алға жетелейді. «Тарихнама» жобасының жоспарын құру барысында әртүрлі ізденіске бардым.&nbsp;Дәстүрлі білім көзімен қатар заманауи ресурстарды да пайдалануға мүмкіндік туды. Яғни тарихи-ғылыми сайттарды қарап, электронды дереккөздерге түбегейлі зерттеу жұмысын жүргіздім. Сонымен қатар мектептен алған жүйелі білім пайдаға асты, − деді өнертапқыш.</blockquote>Келесі жобаларының бірі – «SAYGAQ AI». Бұл – жасанды интеллектінің көмегімен өрт сөндіруші роботтарды қашықтан басқаруға бейімделген стартап жоба. Мұны жасаған мектеп оқушылары Гафур Шайхы мен Асылжан Абдуллаев. Қазір жоба mvp сатысында. Яғни прототипі бар. Жобаны дамыту үшін оқушылар Idea Battle инкубациялық бағдарламасына қатысқан. Семинарлар арқылы білікті мамандардан тәжірибе жинап, финалға өткен. Олар тынымсыз еңбектің нәтижесінде стартап жобалар байқауында I орын иеленді. Стартаперлердің айтуынша, алдағы уақытта инкубациялық және акселерациялық жобаларға қатысуды жоспарлауда.«NeoNomad» командасымен бірге Түркістанда өткен «Recodetau» республикалық хакатонға қатысып, I орын иеленіп, Үндістан мемлекетінде 10 күндік тағылымдамадан өту мүмкіндігіне ие болды.ReDabyl – су тасқыны секілді табиғи апат кезінде жұмыс істеуге арналған мониторинг және алдын ала болжаудың кешенді жүйесі. Жобаның міндеті – сенсорлар өзен арналарының бойында орналасқан су деңгейін және қосымша параметрлерді үздіксіз бақылайды.<blockquote>– Су тасқыны шекті мәннен асқан жағдайда сенсорлар автоматты түрде жауапты органдарға дабыл қағып, ақпарат жібереді. Осылайша мамандандырылған ұжымды қажет нысанға жіберу арқылы жұмыс күшін азайтуға көмектеседі. Біздің зерттеуіміз бойынша, осы секілді цифрланған кешенді жүйе Қазақстан аумағында жоқ және ашық түрде ақпараттың базасы мен анализін бере алмайды. Ал біз пайдаланған сервер мен телефонға дабыл жіберу ашық түрде болады, – деді команда мүшесі.</blockquote>Сондай-ақ, Қорқыт ата атындағы Қызылорда университеті Kyzylorda Hub бизнес-инкубаторының ұйымдастыруымен өткен «Idea Battle» стартап жобалар байқауында жаңа жобасымен топ жарды.Байқаудың мақсаты − стартаптарды қолдау, ел ішінде стартап мәдениетін насихаттау және Қазақстан аймақтарындағы цифрландыруды дамытуда үздік IT идеяларды анықтау.Қатысуға облыс бойынша 43 жоба тіркелді. IT идеяларды жетілдіру үшін қатысушыларға «Стартап негіздері», «Lean Canvas», «Pitching» тақырыбында білікті мамандар шеберлік сабақтарын өтті.&nbsp;Бағдарлама аясында 13 жоба оффлайн, 8 жоба онлайн форматта іріктеу кезеңінде бақ сынады. Ал финалдық кезеңде қазылар алқасына 8 жоба таныстырылды. Нәтижесінде «SAIGAQ AI» жобасы жүлделі І орын иеленді. «Easier together» 2-орын, ал «Talk gloves» жобасы 3-орын иеленді. Жеңімпаздарға 500 000 мың теңге жүлде қоры үлестірілді.Байқау барысында «Grand Master» бағдарламалау мектебінің директоры Алмат Қуанышбаев, &nbsp;бизнес-тренер Наталья Мишукова мен Бағдат Қадыров төрелік етті.Жуырда мектеп оқушылары арасында өткен республикалық &nbsp;чемпионатта 16 жастағы Асылжан Қорқыт ата атындағы Қызылорда университетінің білім грантын иеленді.&nbsp;&nbsp;Қорлан САРЫ Фото:Өңірлік Коммуникациялар Қызметі

Жас технократ оқушылармен кездесті 

<a href="https://kyzylorda-news.kz/">Kyzylorda-news.kz</a> &nbsp;Жалпыұлттық социал-демократиялық партиясының Қызылорда облыстық филиалы мен «Студент» бастауыш партия ұйымы «Этика және жасанды интеллект» тақырыбында семинар-тренинг ұйымдастырды.&nbsp;Мақсаты – болашақ журналистердің қызығушылығы мен оқырман ретіндегі сауаттылығын арттыру, дамыту, мәдени және ақпараттық біліктілігін көтеру, сыни ойлау формасын қалыптастыру. Жас журналистердің тіл байлығын арттыру, өмірге көзқарасын қалыптастыруға, ой-өрісін кеңейтіп, көркем сөйлеуге, пікірін ортаға &nbsp;салып, дәл айтуға баулу. Бұқаралық ақпарат құралдары бойынша дайындау және кәсіби бағдарлық қажеттіліктерін жүзеге асыру.Жиынға &nbsp;журналистика мамандығының білім алушылары мен БАҚ саласында кәсіби біліктілігін арттыруға ұмтылатын жастар қатысты.&nbsp;<blockquote>− Бүгінде ақпараттық технологиялар саласындағы жасанды жүйеге енгізілген ақпаратқа сүйеніп, тапсырманы жылдам әрі оңай орындайтын жасанды интеллект сұранысқа ие. Іс-шара журналистика мамандығының студенттеріне бағытталған. Семинар барысында жасанды интеллекттің пайдасы мен зияны айтылды, − деді Жалпыұлттық социал-демократиялық партиясы Қызылорда облыстық филиалының маманы Айнұр Досжанова.&nbsp;</blockquote>Семинарда қызықты мәліметтермен қатар идеялар ортаға салынды. Қатысушылар түрлі ойындар ойнап, жасанды интеллектіні практика жүзінде қолданды. Сонымен қатар ақпараттық технологиялар саласы бойынша түсіндірме жұмыстары жүргізіліп, пайдалы кейстер айтылды. Шара соңында қатысушыларға кофе-брейк ұйымдастырылды.&nbsp;<blockquote>− «Этика және жасанды интеллект» тақырыбында өткен семинар-тренинг жоғары дәрежеде өтті. Ұйымдастырушыларға алғысым шексіз. Құнды әрі пайдалы мәліметтер айтылды. Теориямен қатар практикалық жұмыс жасалды, − деді Қорқыт ата атындағы журналистика мамандығының студенті Аружан Серікова.</blockquote> Қорлан САРЫ Фото: ЖСДП Қызылорда облыстық филиалы

Қазақстан және Қызылорда облысының жаңалықтары: Білім