<a href="https://kyzylorda-news.kz/">Kyzylorda-news.kz.</a> ҚР БҒМ Ұлттық тестілеу орталығы ҰБТ-ға дайындалу үшін тегін сынақ тестілеуін іске қосты. Тестілеуден орталықтың сайтынан https://prob-ent.testcenter.kz/ сілтемесі арқылы онлайн режимінде өтуге болады.
Ол үшін тестіленуші алдымен ЖСН енгізіп, бейіндік пәндер комбинациясын таңдап, сынаққа қатыса алады. Сынақ тестілеуі талапкерлерге тестілеуге дайындығын жақсартуға және қандай тақырыптарды тереңірек зерделеу керегін түсінуге көмектесу үшін жасалған.
<blockquote>
 «Министрлік тек тестілеу кезінде ғана емес, оның басталуына дейін де қолайлы жағдай жасау үшін тұрақты жұмыс жүргізіп келеді. Сондықтан талапкерлерге ыңғайлы болу мақсатында біз ҰБТ-ға дайындалу үшін онлайн сынақ тестілеуді іске қостық. Бұл жүйе барлық талапкерге тегін негізде қолжетімді. Сынақ тестілеуінен өту кезінде талапкер тест тапсырмаларымен танысуға және таңдалған пәндер бойынша өзінің білім деңгейін тексеруге мүмкіндігі бар. Сондай-ақ биыл ерекше қажеттіліктері бар балаларға арнайы жағдай жасалып отыр. Оларға ҰБТ тапсыру кезінде қосымша 40 минут қосылды. Одан бөлек, биыл ерекше білім беруді қажет ететін балалар үшін алғаш рет суретсіз, сызбасыз және диаграммасыз тапсырмалар әзірленді», – деп айтты ҚР БҒМ Ұлттық тестілеу орталығының директоры Руслан Емелбаев.
</blockquote>
Биылғы ҰБТ-ның тағы бір жаңалығы және балалардың өз білімін шыңдауына үлкен мүмкіндік – әр пәнге жеке тақырыптық талдау жүргізу. Сондай-ақ ҰТО ҰБТ-ға дайындық бойынша тегін онлайн сабақтардың санын көбейтті. Сонымен қатар былтырдан бастап талапкерлерге калькулятор, Менделеев кестесін және тұздың ерігіштік кестесін пайдалануға рұқсат етілді.
Онлайн сынақ тестілеуі Ұлттық біліктілік тестілеуін тапсыратын педагогтер үшін де қолжетімді. Сынақ тестілеу технологиясы негізгі тестілеуге сәйкес келеді, яғни педагогтер 2 блок бойынша тест тапсырады. Оның көмегімен мұғалімдер өздерінің біліктілік деңгейлерін тексеріп, негізгі біліктілік сынағына дайындала алады. Мұғалімдер ҰТО сайтында https://prob-nqt.testcenter.kz/ сілтемесі арқылы сынақтан өте алады.
<a href="https://24.kz/kz/zha-aly-tar/bilim-zh-ne-ylym/item/539884-r-b-m-tegin-bt-syna-testileuin-iske-osty">Хабар 24</a>

ҚР Білім және ғылым министрлігі тегін ҰБТ сынақ тестілеуін іске қосты

<a href="https://kyzylorda-news.kz/">Kyzylorda-news.kz.</a> Қазақстандық оқушылар 26 мамырдан бастап, 17&nbsp;маусымға дейін жазғы мектепте оқиды. Бірақ мұндай шешімге кейбір ата-аналар әзірден қарсылық білдіріп жатыр. Әсіресе ыстық өңірлерде балаларды салқындатқышы жоқ, қапырық сыныптарда отырғызу дұрыс емес деп санайды. Оның үстіне 20 күндік жазғы мектеп білім деңгейі төмендеген оқушылардың мәселесін шешпейтінін айтты, деп хабарлайды&nbsp;<a href="https://stan.kz/">Stan.kz.</a>
Мәселен, Ақтөбе облысындағы 400-ден аса мектептің тек тоқсанында ғана кондиционер орнатылған екен. Оның өзінде сыныптарда емес. Соған қарамастан, мамандар жазғы мектеп үшін кабинеттерге кондиционер орнатуға міндетті емеспіз деп отыр.&nbsp;
«Жазғы мектеп оқушылардың білімін жетілдіруге тамаша мүмкіндік» деген мамандардың пікіріне кейбір ата-аналар қарсы. Олар балаларымыздың жыл бойы оқығаны жеткілікті, енді үш ай демалғаны абзал дейді. Оның үстіне күннің ыстығында сыныпта ауа болмайды, өйткені мектептер салқындатқышпен жабдықталмағанын алға тартты.
Алайда мамандар жазғы мектепте оқу дәстүрлі форматтан өзгеше болатынын айтады. Яғни икемді оқу кестесін қолданбақшы. Оқушыларға баға қойылмайды, үй тапсырмасы берілмейді. Алайда жазғы сабақ үшін барлық мектепті салқындатқыш техникалармен қамту міндетті емес екен.
<blockquote>
 «Оқу кабинеттерінде кондиционердің болуы санитарлық талаптарға сәйкес келмейді. Сыныпты желдету, сосын бір сыныпта барлық 30 баланың бірдей отыруы міндетті емес. Ол жерде икемді оқу графигі болғаннан кейін сыныпты екіге бөлу арқылы оқиды. Яғни балаларға түрлі жағдай қарастырылады», –&nbsp;&nbsp;деді Ақтөбе облыстық білім басқармасы басшысының орынбасары Нұргүл Бертілеуова.&nbsp;
</blockquote>
Ал Білім және ғылым министрлігі жазғы мектеп оқушыларға міндеттелмейтінін, соңғы шешімді ата-аналар өздері қабылдайтынын жеткізді. Бірақ біз кеңес береміз деп отыр. Сөздерінше, басқа елдерде оқушылардың сабақ үлгерімін шешу үшін оқу жылы ұзартылған.&nbsp;
<blockquote>
 «Біз оқу жылын ұзартпай, жазғы мектеп ұйымдастырдық. Барлық оқушыларға жазғы мектептен қалмауға кеңес беріп отырмыз. Жазғы мектеп біліміңізді шыңдап, олқылықтын орнын толықтыруға да мүмкіндік береді. Әрине, әртүрлі жағдайлар болуы мүмкін. Біреуі ауырып қалады, біреуі жазғы лагерьге барады және басқа да жағдайлар болады. Мұндай жағдайда жазғы мектепке қатысты соңғы шешімді ата-ана мен мектеп оқушылары өздері қабылдайды», – деп мәлімдеді Білім және Ғылым министрлігі Мектепке дейінгі және орта білім беру комитетінің төрағасы Гүлмира Кәрімова.&nbsp;
</blockquote>
Жазғы мектепке 9 бен 11-ші сыныптың оқушылары қатыспайды. Олар емтихан тапсырады. Ал мұғалімдер 56 күндік демалысқа тек жазғы мектептен кейін ғана шыға алады.

Жазғы мектеп: Соңғы шешімді ата-ана мен оқушы қабылдайды

<a href="https://kyzylorda-news.kz/">Kyzylorda-news.kz.</a>&nbsp;Бүгін Қазақстанның барлық өңірінде жалпы білім беретін пәндер бойынша республикалық олимпиаданың қорытынды кезеңі басталды.
Офлайн форматта «USTUDY» тестілеу орталығы базасында өтіп жатқан білім бәйгесінің ІІ кезеңіне облыстық білім басқармасының басшысы Ақзира Қасымова келіп, оқушыларға сәттілік тіледі.
<blockquote>
 «Биылғы олимпиада «Бір қатысушы, бір компьютер, бір камера» форматы бойынша жүргізілуде. Ашықтықты бақылау үшін мүдделі емес үшінші тұлғалар – «Әділдік жолы» республикалық қоғамдық бірлестігінен, «Адалдық алаңы» мүшелері мен «Дарын» республикалық орталығының жауапты қызметкерлері қатысуда. Айта кетейін, өткен жылы олимпиадаға 56 оқушы қатысып, 26 оқушы жүлделі орынға ие болған болатын. Биыл да осы көрсеткішіміз жоғары болады деген сенімдемін. Оқушыларға сәттілік тілеймін», – деді Ақзира Бақтыбайқызы.
</blockquote>
Білім сынағына облыс көлемінде жалпы 14 пән бойынша 83 оқушы және Назарбаев Зияткерлік мектебінен 2 оқушы қатысуда. Ал тестілеудің алғашқы күніндегі жаратылыстану-математикалық бағытындағы ІІ кезеңге 22 оқушы бақ сынауда.
Айта кетейік, білім бәсекесі 18-23 сәуір аралығында өтеді. Олимпиаданың өткізілу барысы тікелей эфир арқылы YouTube желісінен қадағаланып, Syr-daryny.kz сайтында жариялануда.

Ақзира Қасымова олимпиадаға қатысушы оқушыларға сәттілік тіледі

Kyzylorda-news.kz. Бүгін жалпы білім беретін пәндер бойынша республикалық олимпиаданың облыстық кезеңі аяқталып, жеңімпаздар мен жүлдегерлерді марапаттау шарасы өтті.
Салтанатты шараға облыстық білім басқармасының басшысы Ақзира Қасымова, «Өрлеу» біліктілікті арттыру ұлттық орталығының облыс бойынша педагогикалық қызметкерлердің біліктілігін арттыру институты директорының орынбасары Сакен Серікбаев, Қорқыт ата атындағы Қызылорда университетінің басқарма мүшесі- академиялық мәселелер жөніндегі проректор Дана Абдрашева мен «Әділдік жолы» республикалық қоғамдық бірлестігінің Қызылорда облыстық филиалы басшысы Ляззат Бақтыбаева қатысып, үздіктерді марапаттады.
<blockquote>
 Бүгінгі жеңімпаздар – ертеңгі облыс үміттері. Сіздерге артылар жүктің жауапкершілігін сезініп, алға қарай қадам басуда аймақ сенімін ақтайды деп ойлаймын. Алдағы қорытынды кезеңге сәттілік тілей отыра, оқудағы бастамаларыңыз оңынан болып, алар асуларыңыз мол болсын!, – деді Ақзира Бақтыбайқызы.
</blockquote>
Облыстық кезең жаратылыстану-математика және қоғамдық-гуманитарлық бағыттағы 14 пән бойынша ұйымдастырылып, 389 оқушы білімдерін сынады. Үздік деп танылған 181 оқушы бүгінгі шарада облыстық білім басқармасының І, ІІ, ІІІ дәрежелі дипломдарымен марапатталды. Сонымен, 22 оқушы І орын – Алтын медаль иегерлері атанса, 50 оқушы ІІ орын – Күміс медальді иеленді, ал ІІІ орын – Қола медальді 89 оқушы иеленсе, 40 оқушыға арнайы алғыс хат табысталды. Сонымен қатар олимпиаданың Алтын медаль иегері атанған 11 сынып оқушыларына Қорқыт ата атындағы Қызылорда университетінің 11 білім гранты ұсынылды.
Білім бәсекесіндегі үздік командалар марапатталып, арнайы номинация иегерлері де анықталды. Олардың қатарында І дәрежелі «Ең үздік олимпиадалық команда – 2022» – №9 дарынды балаларға арналған облыстық «Білім-инновация» лицей-интернаты мен Қызылорда қаласы, ІІ дәрежелі «Ең үздік олимпиадалық команда – 2022» – №10 дарынды балаларға арналған облыстық «Білім-инновация» лицей-интернаты, ІІІ дәрежелі «Ең үздік олимпиадалық команда – 2022» – Еркін Әуелбеков атындағы №4 облыстық дарынды балаларға арналған мектеп- интернаты мен Қармақшы ауданы лайық деп танылды.
Ал, «Ең үздік қала мектебі – 2022» номинациясын – Абай атындағы үш тілде оқытылатын дарынды балаларға арналған мамандандырылған сыныптары бар мектебі мен Байқоңыр қаласындағы №277 мектеп – лицейі иеленсе, Қазалы ауданындағы №249 мектеп-лицейі «Ең үздік ауыл мектебі – 2022» атанды. Сондай-ақ, «Олимпиада жұлдызы – 2022» номинациясын №9 дарынды балаларға арналған облыстық «Білім-инновация» лицей-интернатының 11 сынып оқушысы Шахафиддин Нұрдаулет иеленсе, «Ең жас олимпиада қатысушысы» номинациясымен №9 дарынды балаларға арналған облыстық «Білім-инновация» лицей-интернатының 7 сынып оқушысы Мамадахунов Мансур марапатталды.

Қызылордада олимпиада жеңімпаздары марапатталды

<a href="https://kyzylorda-news.kz/">Kyzylorda-news.kz.</a> Облыстағы «Дарын» қосымша білім беру орталығының үздіктері халықаралық деңгейдегі жарыстарда жүлделі орындардан көрінуде. Аталған білім беру орталығында соңғы он жылда 500-ден астам оқушы жеңімпаз атанған.
«Жылдан жылға пәндік олимпиадалар мен ғылыми жобалардың маңызы артып келеді. Бүгінде оқушыларымыз халықаралық, республикалық дәрежедегі білім додаларында бақ сынауда. Биыл халықаралық «Жібек жолы», «Азия-Тынық мұхиты» олимпиадасында 1 оқушымыз күміс медаль, 7 оқушы қола медаль иегері атанды. Жас өрендерді ғылым жолына бағыттайтын республикалық ғылыми-жобаларда 7 оқушы жүлделі орындарды иеленіп, 3 оқушымыз Қорқыт ата атындағы ҚУ білім грантын ұтып алды. Сонымен қатар облыс әкімдігінің қолдауымен дарынды балаларға арналған «Сыр дарыны» білімділер академиясының жұмысы жандануда. Жалпы білім беру ұйымдарында 8-9 сыныптың 100 оқушысы бірнеше пәндер бойынша оқыту курстарының бірінші кезеңінен өтіп жатыр», – деді «Дарын» қосымша білім беру орталығының директоры Айжан Қиянбекова.
Айта кетейік, талантты балаларды және жастарды қолдау мақсатында «Ел үміті» бастамасы облыста кеңінен жүргізілуде.

Айжан Қиянбекова: Дарынды оқушыларға арналған олимпиадалар ұйымдастырылып жатыр

<a href="https://kyzylorda-news.kz/">Kyzylorda-news.kz.</a>&nbsp;&nbsp; Қорқыт ата атындағы Қызылорда университеті ғалымдарының&nbsp; ғылыми зерттеу жұмыстары өндіріске енгізілді. Аймақтағы ірі компаниялардың өндірістік проблемаларын &nbsp;шешуге бағытталған зерттеулер бойынша нақты нәтиже бар.
12 сәуір – Ғылым саласы қызметкерлерінің күні қарсаңында &nbsp;университеттің Басқарма Төрағасы – Ректоры Бейбіткүл Кәрімова ғалымдардың зерттеу жұмыстары мен қолдау шаралары туралы Өңірлік коммуникациялар қызметінде өткен брифингте хабарлады. &nbsp;
Ғылымды республикалық бюджеттен қаржыландыру соңғы екі жылда 2 есеге өсті. Егер бұрын гранттық қаржыландыру конкурсы 3 жылда 1 рет өткізілсе, 2021 жылы 6 конкурс ұйымдастырылған. Бұл өз кезегінде университет ғылыми жобаларын қаржыландыру деңгейінің елеулі түрде&nbsp; өсуіне әкелді. Айталық, ҚР БҒМ Ғылым Комитетінің гранттық қаржыландыруы негізінде 2021 жылы 11 жоба орындалды. Бұл 2020 жылмен салыстырғанда 20%-ға&nbsp; артық.
Одан бөлек облыстық бюджеттен бөлінген қаражат негізінде жыл сайын&nbsp; археологиялық қазба жұмыстары жүргізілуде.
<blockquote>
 – Өткен жылы Германияның DFG гуманитарлық зерттеу қоры және Тюбинген университетімен бірлескен «Ұлы Жібек жолының солтүстік аймағындағы көшпенділер мемлекетінің қалыптасуы және урбанизациялануы: Ерте орта ғасырлардағы Жанкент қаласы (Арал теңізі аймағы, Қазақстан)» атты үш жылдық жобаны қорытындыладық. Нәтижесінде екі бірдей археологымыз биыл Тюбинген университетінде докторлық диссертацияларын қорғайды.
 Еуроодақтың гранттық «Көкжиек-2020» зерттеулер және инновациялар бағдарламасы бойынша «Инновациялық судаерігіш фитоматериалдар – Альцгеймер және Паркинсон ауруларының алдын алу үшін ингибиторлар» атты 2021-2025 жылдарға есептелген жоба (жалпы құны 64,4 млн теңге) жалғасуда. Оған алыс және жақын шетелдердің жетекші жоғары оқу орындары мен ғылыми орталықтарының ғалымдары тартылған, – деді Бейбіткүл Сәрсемханқызы.
</blockquote>
&nbsp;&nbsp;&nbsp;Университетте жас ғалымдардың ізденістеріне де қолдау қарқынды.&nbsp; Өткен жылы университеттің жас ғалымдарына арнайы 4 грант (10 млн теңге) тағайындалды. Биыл осы гранттар игерілген соң, жас ғалымдардың ғылыми зерттеулеріне арналған жаңа конкурс жарияланбақ.
2021 жылдың қорытындысы бойынша 8 оқытушы PһD докторлық диссертацияларын&nbsp; қорғады.
Брифингте Бейбіткүл Сәрсемханқызы университеттің бизнес өкілдерімен ынтымақтастығын дамыту басты назарда екенін атап өтті.
<blockquote>
 – Ғалымдарымыздың өңірдегі ірі компаниялардың өндірістік проблемаларын шешуге бағытталған ғылыми-зерттеу және тәжірибелік конструкторлық жұмыстары (НИОКР) ерекше маңызға ие. Осындай жобаларды қаржыландыруға&nbsp; «ПетроҚазақстан Құмкөл Ресорсиз» АҚ 10,0 млн теңге, «ҚОР» Мұнай компаниясы» АҚ&nbsp; 0,675 млн теңге бөлді. Жақын күндері ғалымдарымыздың жобаларын «ҚуатАмлонМұнай» БК» ЖШС, «Торғай Петролеум» АҚ компанияларына да таныстырмақпыз.
 Ғалымдарымыз әзірлеген «Күріш сабанынан целлюлоза алу технологиясын оңтайландыру» және «Антисептикалық өнімдер өндіру»&nbsp; жобаларын «НеоХимТех» ЖК, ал «Бақша дақылдарынан эксперименттік үлгілерді алу» жобасын «ЖасаАгро» ЖК&nbsp;&nbsp; коммерцияландырды.&nbsp; &nbsp;&nbsp;&nbsp;&nbsp;&nbsp;&nbsp;&nbsp;&nbsp;
 Университет «Ғылым қоры» АҚ–мен де инновациялық жобаларды коммерцияландыру бойынша тығыз әріптестік байланыс орнатқан. Инженерлік бейіндегі зертхана базасында ауыл шаруашылығы қалдықтарынан жасалатын тыңайтқыш-биочар өндірудің технологиясын коммерцияландыру үшін аймақтағы ірі компаниялармен жүйелі жұмыс жүргізудеміз, – деді Бейбіткүл Кәрімова.
</blockquote>
Ел Президентінің Қазақстан халқына «Жаңа жағдайдағы Қазақстан: іс-қимыл кезеңі» атты Жолдауында әлемнің ғылыми орталықтарында жыл сайын 500 ғалымды тағылымдамадан өткізу міндеті қойылғаны белгілі.
Университеттің 7 ғалымы қаңтар айында үш кезеңнен тұратын қатаң іріктеуден сәтті өтіп, АҚШ, Германия, Ресей Федерациясы, Белоруссия елдерінде 12 ай бойы тағылымдамадан өту мүмкіндігін жеңіп алды. Олардың ішінен 5 ғалымымыз бүгінде шетелдік ғылыми орталықтарда кәсіби құзыреттілігін&nbsp; дамытуда.

Бейбіткүл Кәрімова: Ғалымдардың жобалары ел игілігіне қызмет етеді

<h4 id="kyzylordanewskzhttpskyzylordanewskz"><a href="https://kyzylorda-news.kz/">Kyzylorda-news.kz.</a> БҒМ құжат айналымының цифрлық жүйеге толық көшіру бағытында жұмыс істеп жатыр.</h4>
Жоғары және жоғары оқу орнынан кейінгі білім департамент директоры Әділет Тойбаев ЖОО оқытушыларынан талап етілетін құжаттар тізімі қысқарғанын хабарлады.
Енді оқытушылардан келесі құжаттар талап етілмейді:
<ol>
<li>Оқытушылардың әрбір айға арналған оқу жұмыс уақытын есепке алу ведомосі (сағатпен және (немесе) кредитпен);</li>
<li>Оқытушылардың жыл ішіндегі оқу уақытын есепке алу ведомосі (сағатпен және (немесе) кредитпен);</li>
<li>Емтихан ведомосі (білім алушыларды аралық аттестаттау үшін);</li>
<li>Білім алушыларды қорытынды аттестаттаудан өткізу жөніндегі комиссия отырысының хаттамалары. Білім алушыларды қорытынды аттестаттау жөніндегі комиссия отырысының қорытынды аттестаттау емтихандарын тапсыру туралы хаттамасы</li>
<li>Білім алушыларға біліктілік беру туралы қорытынды аттестаттауды өткізу жөніндегі комиссия отырысының хаттамасы (жиынтық);</li>
<li>Білім алушыларды қорытынды аттестаттау жөніндегі комиссияның білім алушылардың бітіру жұмысын қарау бойынша (дипломдық жоба (жұмыс) отырысының хаттамасы;</li>
<li>Емтихан ведомосі;</li>
<li>Кафедраның жұмыс жоспары;</li>
<li>Сынақ кітапшалары;</li>
<li>Оқу үлгерімінің журналы.</li>
</ol>
Департамент жоғары оқу орындарына министрлік тарапынан күші жойылған есептіліктің жеке қағаз түрлерін жасамауды, жоспарлау мен құжат айналымының цифрлық жүйесіне толық көшуді жүзеге асыруды ұсынды.
<blockquote>
 “Алайда, кейбір жоғары оқу орындарында әлі күнге дейін профессор-оқытушылар құрамынан артық есептілік құжаттары талап етілетіні туралы ақпарат түсіп жатыр. Мысалы, студенттер үлгерімінің қағаз журналы, профессор-оқытушылар құрамының атқарған жұмыстары туралы апта сайынғы, ай сайынғы есептер”, – деп жазды Әділет Тойбаев.
</blockquote>
<a href="https://informburo.kz/kaz/newskaz/zhoo-okhytushylarynan-talap-etilmejtin-esepter-tizimi-zhariyalandy">Informburo</a>

ЖОО оқытушыларынан талап етілмейтін құжаттар тізімі жарияланды

<a href="https://kyzylorda-news.kz/">Kyzylorda-news.kz.</a> Ғылым саласын республикалық бюджеттен қаржыландыру соңғы екі жылда 2 есеге өсті. Былтыр 6 гранттық қаржыландыру конкурсы ұйымдастырылған. Одан бөлек облыстық бюджеттің есебінен жыл сайын археологиялық қазба жұмыстары жүргізілуде. Бұл туралы Қорқыт ата атындағы Қызылорда университетінің басқарма төрағасы ректор Бейбіткүл Кәрімова мәлімдеді.
<blockquote>
 «Былтыр Германияның DFG гуманитарлық зерттеу қоры және Тюбинген университетімен бірлескен «Ұлы Жібек жолының солтүстік аймағындағы көшпенділер мемлекетінің қалыптасуы және урбанизациялануы: Ерте орта ғасырлардағы Жанкент қаласы (Арал теңізі аймағы, Қазақстан)» атты үш жылдық жобаны қорытындыладық. Нәтижесінде екі бірдей археологымыз биыл Тюбинген университетінде докторлық диссертация қорғайды. Оқу орнымызда жас ғалымдардың ізденістеріне де қолдау қарқынды жүргізілуде. Өткен жылы университеттің жас ғалымдарына арнайы 10 млн теңгені құрайтын 4 грант тағайындалды. Биыл осы гранттар игерілген соң, жас ғалымдардың ғылыми зерттеулеріне арналған жаңа конкурс жарияланады. Сонымен қатар былтыр сегіз жас ғалым PhD докторлық диссертациясын қорғады. Студенттердің ғылыми жұмыстарына арналған түрлі деңгейдегі конкурс нәтижелері бойынша жалпы 85 студент жүлделі орынды иеленді», – деді Бейбіткүл Сәрсемханқызы.
</blockquote>

Бейбіткүл Кәрімова: Университеттің жас ғалымдарына арналған гранттар тағайындалды

<a href="https://kyzylorda-news.kz/">Kyzylorda-news.kz.</a>&nbsp; Қорқыт ата атындағы Қызылорда университеті мектеп бітіруші оқушылар арасында «Startup Talapker» атты стартап жобалар байқауын ұйымдастырмақ. Бұл туралы университеттің баспасөз қызметі хабарлады.
Байқау Қызылорда облысындағы мектеп түлектерін кәсіпкерлікке баулу, инновациялық стартап жобаларды қолдау мақсатында өткізіледі.
Сайысқа өңірді дамытуға үлес қосатын, инновациялық әдістер мен технологиялар қолданылатын стартап жобалар қатыстырылады. Жобалардың шектелген бағыты жоқ. Сондай-ақ, әлеуметтік жобалар байқауға қатыстырылмайды.
<blockquote>
 «Startup Talapker» байқауы облыс бойынша алғаш рет ұйымдастырылуда. Байқауғаоблыстағы барлық аудан мен қала (Қызылорда, Байқоңыр) мектептерінің 11(12) – сынып оқушылары қатыса алады. Сайысқа қатысу үшін 11 (12) – сыныптың екі немесе үш оқушысы топқа бірігіп, тек бір жобаны ұсына алады. Бір мектептің атынан қатысатын топтардың саны шектеусіз, – деді университеттегі «Business Start» жастар кәсіпкерлігі орталығының басшысы Жанарыс Тубекбаев.
</blockquote>
Байқау 15 сәуір мен 15 мамыр аралығында өткізіледі. Байқауға қатысушылар 15 сәуірге дейін https://www.startuptalap.kz/ сайтында тіркеліп, толық ақпаратпен таныса алады.
Айта кету керек, сайыс 3 кезеңнен тұрады. Онлайн форматты өтетін өтінім қабылдау кезеңінде қатысушылар сайт арқылы тіркеледі. Мұнан кейін онлайн форматта жартылай финалға қатысып, іріктеуден өткен жобалар ЗУМ-сессия арқылы қорғалады. Ал, үшінші кезеңде қатысушылар жобасын Қорқыт ата атындағы Қызылорда университетінің Студенттер сарайында қорғайды.
Байқауда І орын иеленген топ мүшелеріне Қорқыт ата атындағы Қызылорда университетінде білім алуға 100 пайыз жеңілдік беріледі. Ал, ІІ орын иеленген топ мүшелеріне осы университетте білім алуға 50 пайыз жеңілдік, ІІІ орын иеленген топ мүшелеріне осы университетте білім алуға 25 пайыз жеңілдік беріледі.
Байқаудың серіктестері – Қызылорда облысының білім басқармасы, «Syr Jastary» облыстық жастар орталығы, «Ybyrai» қоғамдық қоры және «Syr Umiti» қоғамдық қоры.
<img src="https://kyzylorda-news.kz/wp-content/uploads/2022/04/biznes-bastap-2-1.png" alt="" />

Мектеп бітіруші түлектер арасында стартап жобалар байқауы өтеді

<a href="https://kyzylorda-news.kz/">Kyzylorda-news.kz.</a> ҚР Мәдениет және спорт министрі Дәурен Абаев тегін мәдени үйірмелер бойынша туындаған проблема туралы пікір білдірді, деп хабарлайды <a href="https://lenta.inform.kz/kz/kazakstanda-tegin-uyirmelerdi-karzhylandyru-kolemi-artady_a3919190">ҚазАқпарат</a>.
<blockquote>
 «Бұл мәселе жұмыс істеп тұр. Тек 2-3 облыста ғана өтінімдердің көп келуінен проблема туындады. Үйірмеге қатысқысы келетіндердің саны жоспардағыдан көп болып шыққан. Бұл жерде мәселені шешудің бір жолы ғана бар. Біз қаржыландыру көлемін ұлғайтамыз. Бағдарлама әрі қарай жұмыс істей береді», – деді ведомство басшысы.
</blockquote>
Оның мәліметі бойынша, аталған үйірмелерге бөлінуі тиіс қаражаттың нақты көлемі мен мерзімін жергілікті әкімдіктер есептеп, анықтайды.
<blockquote>
 «Мәселе қаржыда емес, тегін үйірме қызметін ұсынудың шарттарын реттеуге келіп тіреліп тұр. Үкімет отырысында айтқанымдай, құжатта бар, нақты өмірде жоқ жандар пайда болып жатыр. Сондықтан бұл мәселені жуық арада шешуіміз керек. Бүгінге дейін бұл бағдарламаның мүмкіндігін 500 мың бала пайдаланып үлгерген. Меніңше, бұл тамаша көрсеткіш. Яғни, тегін үйірмелер жабылмайды», – деді Дәурен Абаев.
</blockquote>

Қазақстанда тегін үйірмелерді қаржыландыру көлемі артады

<a href="https://kyzylorda-news.kz/">Kyzylorda-news.kz.</a>&nbsp;Қызылорда қаласындағы Назарбаев Зияткерлік мектебінің оқушысы Айшани Даттатрея Дубайда өткен халықаралық музыка және би байқау-фестивалінде бірінші орынды жеңіп алды. Өңірлік коммуникациялар қызметінің ақпарат алаңында БАҚ өкілдеріне конкурс барысын баяндады.
<blockquote>
 «Музыка әлеміне қызығушылығым 5 жасымнан басталды. Содан бері алты тілде ән орындаймын. Дубайда өткен байқау 9 бен 15 жас аралығындағы жасөсірімдер арасында өтті. Мен қазақ халқының әндерін орындағанды ұнатамын. Сол арқылы өзіме шабыт сыйлаймын. Осы орайда ұстаздарыма және барша қолдау білдірген жандарға алғысым шексіз», – деді Айшани Даттатрея.
</blockquote>

НЗМ: Қызылордалық оқушы Дубайдан жеңіспен оралды

<a href="https://kyzylorda-news.kz/">Kyzylorda-news.kz.</a> Білім және ғылым вице-министрі Қуаныш Ерғалиев мемлекеттік білім беру гранттары бойынша ауыл квотасының 35 пайызға көбейтілетінін&nbsp;мәлімдеді.
<blockquote>
 “Биыл біз ауыл квотасын 35 пайызға дейін арттырамыз. Осылайша квота тағы 5 процентке өседі. Үкіметке тиісті ұсыныс енгізілді”, – деді Ерғалиев мәжілісте өткен үкімет сағатында.
</blockquote>
Вице-министрдің айтуынша, бүгінде ауыл шаруашылығы мамандықтары бойынша ауыл квотасы көп жағдайда игерілмей жатады. Оны жыл сайынғы статистика да растап отыр. Себебі мектеп түлектері ондай мамандықтарға құжат тапсырмайды.
<blockquote>
 “Гранттар жетіспей жатқан жоқ, мемлекеттік тапсырыс жетеді. Мәселе мынада, жастар ауылдағы мамандықтарға бармайды. Себебі жалақысы аз, мәртебесі төмен, әлеуметтік пакеті де мардымсыз. Бұл – кешенді проблема. Мысалы, былтыр 21 процент грант игерілмей қалды”, – деп атап өтті Ерғалиев.
</blockquote>
Ал мәжіліс депутаты Павел Казанцевтың ойынша, бүгінде қала балалары ауыл квотасын өз пайдасына іске асырып жатады.
<blockquote>
 “Әріптестерімнің айтуына қарағанда, сол 30 пайыздық квотаға қала балалары да кіріп кетеді. Оқу соңында ауылға үш айға барады да, квотасын алғаннан кейін кетіп қалады, ветеринарияда қалмайды”, – деді спикердің орынбасары.
</blockquote>
Айта кетсек, ауыл квотасының нақты мамандықтары бар. Оны үкімет елдің әлеуметтік-экономикалық дамуына қарай анықтайды. Ал конкурс кезінде гранттардың 30 пайызы тек ауыл балаларына ғана бөлінеді. Биылдан бастап оның көлемі 35 пайызға дейін артады.
<a href="https://stan.kz/">Stan.kz</a>

Қазақстан және Қызылорда облысының жаңалықтары: Білім