&nbsp;<a href="https://kyzylorda-news.kz/">Kyzylorda-news.kz</a>. Әли Мүсілімов атындағы №101 мектеп-лицейінің 10 сынып оқушысы Тағыберген Гүлназ Жалпы білім беретін пәндер бойынша Республикалық зерттеу жобалар конкурсының облыстық кезеңінен өтіп, конкурстың қорытынды кезеңі 2024 жылдың 26 ақпан-1 наурыз күндері өткізілген сайыста Республикалық кезеңінен 1ші орын иегері атанды.<blockquote>– Бұл тақырыпты биология пәні мұғалімі Жетекшім Мөлдір Жандосқызының кеңесімен бірге таңдадық. Жалпы қазіргі таңда қыз-келіншектер үй жағдайында косметикалық &nbsp;өнімдерді жасай бермейді, сондықтан күріш өзекті мәселе болғандықтан, күріш ұнтағынан, қайнатпасынан бірнеше бетке арналған маска, скраб, крем, шашқа спреи, тонер, сыворотка, энзимная пудра, сабын түрлерін жасауды ұйғардым. Күріштің құрамында шаштың, тырнақтың және терінің күйіне оң әсер ететін дәрумендер, аминқышқылдар мен микроэлементтер бар. Бұл экоөнімдердің ерекшелігі ол терінің кез - келген түріне сәйкес келеді. Күріш майы теріні ылғалдандыруға көмектеседі. Күріш қосылған маскалар мен скрабтар майлы теріге арналған тамаша косметикалық шешім болып табылады. Күріш ұнтағы терінің қызметін жақсартуға көмектеседі, тазарту үшін қолданылады. Бет терісін жақсартады, бетті ағартады. Қорытындылай келе, күріштің косметика саласында пайдалы жақтарын білдім. Күріштен жасалатын экоөнімдер барлық адамдардың бет терісіне өте пайдалы, ешқандай химикатсыз жасалатын бұл өнімдерді болашақта арнайы зауыттарда өңдіріп, ел игілігне қолдану керек деп ойлаймын.</blockquote><img src="https://knadmin.beoblood.kz/uploads/2d6b608b_a192_494f_950b_cd69595d4649_157fbb00b3.jpg" alt="2d6b608b-a192-494f-950b-cd69595d4649.jpg"><img src="https://knadmin.beoblood.kz/uploads/a364ec75_93ec_43cc_b0ae_76f05ab5601f_b51420c631.jpg" alt="a364ec75-93ec-43cc-b0ae-76f05ab5601f.jpg"><img src="https://knadmin.beoblood.kz/uploads/54bd62aa_2584_42bf_a4cb_87558b02acba_8fac94a449.jpg" alt="54bd62aa-2584-42bf-a4cb-87558b02acba.jpg"><img src="https://knadmin.beoblood.kz/uploads/3ab5a908_2734_41ab_a952_a3f44e747337_53323623d4.jpg" alt="3ab5a908-2734-41ab-a952-a3f44e747337.jpg">

Қызылордалық оқушы экоөнім жасап шығарды 

&nbsp;<a href="https://kyzylorda-news.kz/">Kyzylorda-news.kz</a>. Сыр өңірінің мәдениет тарихында айрықша орны, жарты ғасырға жуық тарихы бар руханият ошағы ретінде – Қызылорда облыстық мемлекеттік филармониясын айтуға болады.&nbsp; «Сыр елі – жыр елі» деп текке айтылмаса керек-ті. Аймақтағы киелі шаңырақ бастауын сонау әнші-композитор, ақын Нартайдың концерттік-эстрадалық бригадасынан алады. &nbsp;Елу жылға жуық мәдениет саласында еңбек еткен ұжым осы уақыт аралығында Сыр мәдениеті мен өнерінің өзіндік даму, өркендеу, шарықтау белестеріне айтулы үлес қосты. Бүгінге дейін «Сыр елі – жыр елі» деген киелі тіркестің жүгін сырбойылық әрбір өнерпаздың үлкен жауапкершілікпен арқалап келе жатқаны қуантады. Қызылорда облыстық филармонияның директоры Талғат Мақашовтың айтуынша, облыстық филармониясының іргетасы 1972 жылы 16 қарашада Қазақ ССР Мәдениет министрлігінің № 253 бұйрығымен құрылып, өз жұмысын 1973 жылдың қаңтарынан жүргізе бастады. 1972 жылдың аяғына дейін облыс аумағында өткізілетін концерттің барлығын Шымкент қаласындағы эстрадалық-концерттік бюросы ұйымдастырып отырды. Филармония сол кездегі тәртіп бойынша «Қазақконцерт» бірлестігіне тікелей бағынып, облыстық мәдениет басқармасы басшылық жасады. Алғашқы жылдарда сазгер Тәңірберген Қалауовтың басшылығымен «Сыр күмбезі» фольклорлық, «Ақтолқын» эстрадалық ансамблі жұмыс істеді. Ансамблдің құрамында белгілі жыршы-термеші Ақмырза Тұяқбаев, әнші Фатима Төлегенова өнер көрсетті. Эстрадалық ансамблге Қиынбай Сақтағанов жетекшілік етті. Ұзақ жылдар бойы филармонияның бас әкімшісі Сәнжан Асылбекова болды. 1976-1980 жылдар филармония ұжымы үшін жемісті болды. Дүйсенбі Дүйсенбаев басшылық еткен жылдарда жезтаңдай әнші Ұлшан Ахметованың басқаруындағы «Сыр маржаны», Сайлау Бердіқожаевтың жетекшілігіндегі «Сыр самалы» ансамблінің облыстың мәдени өмірінде ролі зор болды. Сол жылдарда Мұхит Әбдікәрімов, Тәжігүл Аманжолова, Күлән Қалымбетова, Сұлтан Нұрмаханов, Гүлжан Нұржанова, Шынберген Тілеулесов, Мәди Жасекенов сынды талантты өнерпаздардың басын қосқан ансамбльдің орындаған әсем әндері халықтың жүрегіне жол тауып, көңілінен шығып, ұзақ жыл шырқалып жүрді. Кеңес Асанбаев, Қырымбай Мұхамедияров, Бауыржан Шөкенов сынды басшылардың тұсында да филармония өз қызметін заман талабына сай атқарды. Сыр елі мәдениеті мен өнерін дамыту, халыққа рухани дем беру, өнер иесінің жаңа буынын тәрбиелеп, насихаттау, ескі ән мен әуенді шырқау арқылы аға буын өнер иелерінің шығармашылығын жаңғырту міндетін қалтқысыз орындады. Ұжымның 50 жылдағы жеткен табысы тәуелсіздікке қол жеткізген 32 жыл ішінде алған асуы, жеткен жетістігі ұшан теңіз, өз алдына бір тарих. – Қазір де ұжымның штаттық бірлігі бірнеше есеге артып, түрлі жанрдағы 8 өнер ұжымы шығармашылықпен жұмыс істеп, көрермендер әрбір жаңалығын сағына күтетін өнер ордасына айналды. Тұрмағамбет атындағы халық аспаптары оркестрі, «Сыр самалы» вокалды аспапты ансамблі, «Томирис» би, «Ақмешіт» фольклорлық ансамблдері, «Тұран» триосы, «Әдемі» балалар музыкалық театр студиясы, «Қорқыт сазы» қобызшылар ансамблі және облыстық филармония жанынан құрылған симфония оркестрі. Сонымен қатар, жыл сайын жеке орындаушылар мен жыршылардың қатарын талантты жастар толықтыруда. Қоғамдағы өзгеріске қарай филармонияның материалдық-техникалық базасы жылданжылға нығайып, заманауи техниканың озық үлгісімен жабдықталса, оркестр, ансамбль мүшелері мен жеке орындаушылар, бишілерге жаңа ұлттық, сахналық киім тіктіріліп берілуде. Жеке дыбыс жазу студиясы ашылып, әндердің музыкалық әрленуі мен шараның көркемделуі осы студия арқылы жасалады, – дейді филармония басшысы. Қазіргі таңда Сыр елі мәдениеті мен өнерін дамыту, халықты рухани азықтандыру, өнер иелерінің жаңа буынын насихаттау, көнекөз әндермен аға буын әртістердің шығармашылығын жаңғырту мақсатында филармонияда барлығы 276,5 штаттық бірлікте 280 адам қызмет атқаруда. Айта кетейік, 32 өнерпаз мемлекеттік наградамен марапатталған. Сыр бойы өнері мен мәдениетін алыс-жақын шетелдерге таныстыру, насихаттау бағытында филармония ұжымы Түркия, Өзбекстан, Әзербайжан, Лондон, Ресей, Татарстан, БоснияГерцеговина елдері мен АҚШ-тың Нью-Йорк, Вашингтон, Біріккен Араб Әмірлігінің ӘбуДаби, Түрікменстанның Ашхабад қалаларында өнер көрсетіп, еліміздің мәдени мәртебесін әлем сахналарында асқақтатып келеді. Сонымен қатар «Бейбітшілік және келісім» сарайында Астана қаласының 25 жылдығына арналған «Сұлу Сырдан – ару Астанаға» атты Қызылорда облысының өнер шеберлерінің гала-концерті жоғары дәрежеде өтті. Тағы бір жаңалық, облыс әкімі Нұрлыбек Нәлібаев биылдан бастап мәдениет саласындағы 10 маманның шетелдегі үздік өнер орталығында біліктілігін арттыруға қолдау білдіріп, филармония солистері Мақсат Мақұлбеков, Сымбат Тасбергенова және Мағжан Аманжолов Италия мемлекеті Анкона қаласындағы «Озимо» опера академиясына және филармония басшысының орынбасары Әзиза Іздіқұлованың басшылығымен облыстық филармонияның жарық жөніндегі суретшісі Жасұлан Бермағанбетов пен дыбыс операторы Айбек Қуатбаев Беларусь республикасының Витебск қаласындағы «Витебск» мәдениет орталығындағы шеберлік дәрісіне қатысып келгендігі филармонияның зор жетістігі деп санауға болады. Іссапар негізінде мәдениет пен өнер саласына бағытталған жұмыс пысықталып, тәжірибе алмасу мақсатында өнер фестивалі мен концертке жеке орындаушы мен шығармашылық ұжымды қатыстыру, шеберлік дәрісін өткізу бойынша «Витебск» мәдениет орталығы мен облыстық филармония арасындағы екіжақты меморандумға қол қойылған. Мамандар аталған меморандум екі өңір арасындағы әріптестік байланысты, шығармашылық ынтымақтастықты нығайтып, жаңа жобаны жүзеге асыруға жол ашады дейді. Қазіргі таңда филармонияда Сыр елі мәдениеті мен өнерін дамытуға сүбелі үлес қосқан бұлбұл әнші, ҚР еңбек сіңірген әртісі Күлән Қалымбетова, әнші, «Мәдениет қайраткері» төсбелгісінің иегері Үміт Медеуова, әнші-композитор Индира Елубаева, жыраулық өнер өкілдері «Ерен еңбегі үшін» медалінің иегері Руслан Ахметов, «Құрмет» ордені иегері Шолпан Бимбетова, «Мәдениет саласының үздігі» төсбелгісінің иегері Ақмарал Ноғайбаева және балетмейстер, хореограф, «Мәдениет саласының үздігі» төсбелгісінің иегері Гүлбану Мырзабаева, дирижер, «Құрмет» ордені иегері Кеулімжай Ботабаев, дирижер, маэстро, «Құрмет» ордені иегері, ҚР еңбек сіңірген қайраткері Мүсілім Әмзе сынды тағы да басқа өнер иелерінің елге елеулі қызмет етіп жүргенін мақтанышпен айтуға болады. – Өткен жыл филармония ұжымы үшін толағай табыс пен үлкен жетістік жылы болуымен есте қалған. Соның бірі аймақ басшысының тікелей қолдауымен 1000 келушіге арналған «Өнер» орталығының жаңа заманауи ғимараты бой көтеруі болды. Жақын арада өнер ордасының шымылдығы ашылып, көрермендермен жаңа ғимаратта қауышатын керемет тарихи сәт болғалы тұр, – дейді облыстық филармония басшысы Талғат Мақашов. Иә, осы уақытқа дейін өнер ордасы талай сын мен қиындықтан өткен, көптеген таланттың өнер жолында өсуіне, шығармашылығының шыңдалуына жол ашқан, толыққанды өнер ұжымы болып қалыптасқан шаңырақ. 50 жыл айтуға оңай болғанымен, сол жылдарға байыппен көз жіберсек бүгінгі жастарға әлі де айтылмаған сырлары, ашылмаған құпиялары, зерттелмеген тарихы мол киелі шаңырақ.

Сыр мәдениетінің қарашаңырағы

&nbsp;<a href="https://kyzylorda-news.kz/">Kyzylorda-news.kz</a>.&nbsp; Ұлағатты ұстаз Қалдыгүл Бодыбаева – бастауыш сынып мұғалімі. Ұстаз саналы ғұмырында шәкірттерге білім мен тәрбие беріп келеді. Жалпы еңбек өтілінің 30 жылын педагогикаға арнаған ардақты жан &nbsp;Сәкен Сейфуллин ауылындағы №137 орта мектепте қызмет етіп келеді.Жалпы білім мен тәрбие берудің негізі – бастауыш сыныпта қалыптасатыны жасырын емес. Әлемі бөлек мектепте бұғанағы қатаймаған балаға алғашқы ұстазы әріп танытып қана қоймай, оның бойындағы қарым-қабілетін ашып, болашағына бағыт беретін нағыз бағбанға айналатыны ақиқат. Сол себепті, &nbsp;білім ошағының табалдырығын аттаған балаға бастауыш сынып мұғалімі тіпті екінші анасына айналады. Демек, оқушыға алғашқы сатыда қалай білім мен тәрбие берілсе, оқушы одан арғы кезеңде өзін тұлға ретінде қалыптастыруға жәрдемдеседі.– Бастауыш сынып мұғалімі ретінде қызмет атқарып, жүздеген шәкіртті тәрбиелеп, өсірген едім. Жыл сайын осынау қиындығы мен қызығы қатар жүретін қызметте жүріп, ұстаз болу – үнемі өзіңді жетілдіру, іздену, білім алу деген екенін ұғына білдім. Өйткені қазіргі кезде ұстаздарға қойылатын талап пен жауапкершілік жүгі жеңіл емес. Оқушыға білім беруде тың әдістерді пайдалану ізденісті, шығармашылық қабілетті талап етеді. Әсіресе, оқытудың жаңа технологияларын тиімді пайдалану маңызға ие. Барлығын білгісі келіп, әрнәрсеге қызығушылық танытатын баланың білімге деген қызығушылығын арттыру мұғалімнің үнемі әдіс-тәсілдерді жаңартып отыруына байланысты. Жас жеткіншектерді түрлі байқауларға қатыстыру арқылы жұмысыңның нәтижесін көресіз, – дейді ұлағатты ұстаз Қалдыгүл Бодыбаева.Алдындағы оқушысының жаңаша бағытта ойлауына, айналаны танып-білуіне ықпал етіп, ұстаз атты ұлы есімді жоғары қоятын өз ісінің білгірі Қалдыгүл Кеңесбайқызы әрбір сабағын бір біріне ұқсатпай өткізу үшін ізденіп, жеке тұлғаның дамуына жол ашуға бағыт-бағдар беруді мақсат етеді. Жас шәкірттерін ең алдымен туған елін, жерін, Отанын сүюге, адамгершілікке, тазалыққа, адал¬дыққа баулуды өзіне парыз санап, ата-анасынан, ұстаздарынан алған адами қасиетімен үлгі болған жан.– Көпбалалы отбасында туып өскен жайымыз бар. Ата-анам қарапайым отбасынан шыққан азаматтар. Әкем Кеңесбай ауылда жұмысшы болса, анам Ұлжалғас менің институтты бітіргенімді де көрмей 55 жасқа қарағанда дүниеден өткен. Мектепте оқып жүргенімде алғашқы ұстазыма еліктеп ұстаз болуды армандаған едім. Ұстазым Тұрсынай Мырзағалиева өте керемет, байсалды, мейірімді &nbsp;жан болатын. Ақылшыма қарап, алдыма мақсат қойған едім. Яғни өмірлік ұстанымым бала жанының бағбаны болып, жүрегіне жол салу болды. Өмірдегі өкінішім, егіздің сыңары Рахаттан небәрі 33 жасында айырылып қалғанымыз. Өмір өз ағымымен өте беретіні ақиқат. Мамандық таңдауда еш қателеспедім. Қазір мұғалімдік жолмен абыроймен келемін. Қандай да бір жетістікке жетсем, ол ең алдымен ата-анамның берген батасы, ұстаздарымның берген білімінің жемісі деп білемін. Ал әке орнына әке, ана орнына ана болған аға-жеңгелерім Болат пен Зүбайраның, Марат пен Рабиғаның орны біз үшін бөлек. Оларға айтар алғысым шексіз. Қазір өзім де 3 ұл мен 1 қыздың анасымын. Бір келінім бар. Жалпы ана, ұстаз ретінде айтарым, өмір сүре білген адамға өмірдің өзі керемет тосын сыйға толы деп айтар едім. Сондықтан оқушыларымды үнемі тек алға қарай ұмтылуға тәрбиелеймін, – дейді Қалдыгүл Кеңесбайқызы.Педагог-зерттеуші санатындағы ұстаз отыз жыл бойы &nbsp;еңбек өтілінде көптеген жетістіктерге жете білген. Олардың қатарындағы соңғы бес жылдың ішіндегі жетістерінің өзі орасан зор. Атап айтар болсақ, облыстық білім басқармасының «Алғыс хатымен», Білім және ғылым қызметкерлері кәсіподағының облыстық комитетінің «Құрмет грамотасымен», ҚР БҒМ «Мектепке дейінгі балалық шақ» республикалық орталығының «Құрмет грамотасымен», аудандық білім бөлімі мен білім қызметкерлері кәсіподағының аудандық комитеті «Құрмет грамотасымен», «ПОНИ» халықаралық байқауының жеңімпаздары мен жүлдегерлерін дайындағаны үшін диплом, «Шамшырақ» республикалық зияткерлік олимпиадасында жүлдегер шәкірт дайындағаны үшін «Алғыс хатпен», «Рухани жаңғыру – табысты болашақ кепілі» облыстық семинарға белсене қатысқаны үшін «Алғыс хатпен», облыстық семинарда үздік сабақ көрсеткені үшін аудандық білім бөлімінің «Алғыс хатымен» марапатталды. Сонымен қатар «Бала дарын» жасөспірімдер байқауы жобасына дарынды шәкірт дайындағаны үшін диплом иеленсе, 2022 жылы мақаласы Қызылорда облысы педагогтарының үздік еңбектері жинағына енді. Екі мәрте «Алтын белгі» иегерінің алғашқы ұстазы атанып, мерей мәртебесі артты.Ұстаз үшін шәкірттерінің жетістігі мерейін тасытатын орасан зор нәтиже болып табылады. Осы ретте &nbsp;соңғы &nbsp;алты жыл ішінде оқушылары талай бәйгеден жеңімпаз атанғанын айту керек. Мәселен, «Зерде» конкурсының об¬лыстық кезеңінде 3 сынып оқушысы Кәусар Кенжебекқызы ІІІ орын, 2-4 сынып оқушылары арасында «Бастау» ХІІ республикалық математикалық турнирінде оқушысы Ернар Сайлау ІІ орын иеленді. Сондай-ақ, 2-7 сынып оқушыларының зерттеу жұмыстары мен шығармашылық жобаларының республикалық «Зерде» конкурсының аудандық кезеңінде математика сек¬циясы бойынша оқушылары А.Құдайберген мен А.Орысбаева ІІ орын алса, А.Сайлау 2-4 оқушылары арасындағы «Бастау» республикалық математикалық турнирінің І кезеңінде жүлделі І орын алды. Аруназ Сайлау осы турнирдің облыстық кезеңінде алғырлығы мен зеректілігі үшін «Алғыс хатпен» марапатталды.– Әріптесім Қалдыгүл Кеңесбайқызының әр сабағы оқушыларға білімді жүйелі жеткізуге, пікірталас жасауға жағдаят туғызудан тұрады. Өзінің жұмысында бала бойындағы ерекшеліктерді ескере отырып, олардың қызығушылығын оятып, өз бетінше жұмыс жасауға машықтандырады. Әріптесімді оқушыларын шығармашылыққа тәрбиелейтін ұшқыр ойлы мұғалім ретінде құрметтеймін. Әр сабағында инновациялық технологияларды тиімді пайдаланып, жаңалыққа толы қызықты, тартымды етіп өткізе білетін, үнемі ізденіс үстінде жүретін ұстаз. Осындай жұмыстарының нәтижесінде, шәкірттері ғылыми жобаларда, пәндік олимпиадаларда, шығармашылық жарыстарда жоғарғы көрсеткіштерді көр¬сетіп келеді. Жас ұстаздарға бағыт-бағдар беруге, жаңалықтарды ізденуге жалықпайды, – дейді әріптесі Марина Прмаханова.«Жас бала жаңа өркен жайған жасыл ағаш тәрізді» дейді дана халқымыз. Қазіргі кезде оқу мен тәрбие саласына қойылатын міндеттің қатарында – талабы таудай дарынды жеке тұлғаны тәрбиелеу тұр. Сондықтан да бастауыш мектепте оқушыға білім беріп қоймай, оны жалпы дамыту, ойын дұрыс әрі ашық жеткізе білуге қалыптастыру болып табылады .«Бұлақ көрсең, көзін аш» дегендей, ауыл мұғалімі Қалдыгүл Кеңесбайқызы шәкірттеріне өнеге тұтар ақылшысы, жол бастар жанашыры болып келеді. Осынау жауапты жұмыста іскерлік пен жаңа технологиямен жұмыс істеуге дағдыланған ұлағатты ұстаздың алдынан әлі талай білімді шәкірт шығары сөзсіз.&nbsp;&nbsp;

Қалдыгүл Бодыбаева: "Мұғалім бақыты – шәкірт құрметі"

<a href="https://kyzylorda-news.kz/">Kyzylorda-news.kz</a> Ауылдық жердегі мектеп оқушыларының дарыны мен қабілетін анықтап, академиялық қабілетті оқушыларды іріктеу мақсатында елімізде алғаш рет ауыл мектептерінің оқушыларына арналған республикалық пәндік олимпиада өткен болатын. Аталған білім бәйгесі қала мен ауыл мектептері арасындағы алшақтықты азайтуға арналған.&nbsp;«Дарын» республикалық ғылыми-практикалық орталығының директоры Ғаждембек Тұрсыновтың айтуынша, олимпиадаға ауыл мектептерінің 9-11 сынып оқушылары ғана қатыса алады. Мұндағы мақсат – еліміздің шалғай елді мекендеріндегі дарынды және талантты балалардың қабілетін анықтап дамыту және халықаралық олимпиадаларға қатысуға ынталандыру.&nbsp;Ол республикалық олимпиадада академиялық адалдықты қамту үшін тапсырма әр қатысушыға жеке электронды түрде жіберіліп, барлық кезеңінде оқушылардың аты-жөні көрінбегенін, оқушылар жалпы білім беретін пәндер бойынша олимпиадада 3 кезең бойынша сынға түскенін айтады. &nbsp;Пәндік олимпиада – ғылымның алғашқы баспалдағы, оқушы санасына алғашқы ізденістерін қалыптастырып, болашақ ғалымдарды баулитын, ғылымға еркін бойлайтын жастарды қалыптастыратын ең үлкен және ең тамаша бәсеке.&nbsp;Айта кетейік, республикалық пәндік олимпиаданың аудандық кезеңіне Жалағаштан 387 оқушы қатысуға өтініш білдіріп, оның 122-сі жеңімпаз атанған. Яғни 51 оқушы ІІІ орын, 38 оқушы ІІ орын иеленсе, 33 оқушы көш бастап, облыстық кезеңге жолдама алған. &nbsp;Еліміздің түкпір-түкпірінен 1 000-нан аса оқушы қатысқан олимпиадаға облыстан 34 оқушы, оның ішінде аудан абыройын арқалаған 6 оқушы сүрінбей өтіп, жалпы білім беретін пәндер бойынша Астана қаласында республикалық олимпиаданың үшінші кезеңіне қатысқан.Олимпиада жаратылыстану-математикалық және қоғамдық-гуманитарлық бағыттарында 13 пән бойынша өткен. Сондай-ақ олимпиада қағидалары ең беделді әлемдік IMO, &nbsp;IPHO, ICHO, IBO, IGEO, IOI, IOL олимпиадалардың ережелеріне сүйеніп жасалған. Жаратылыстану-математикалық бағыттың 6 пәні бойынша және қоғамдық-гуманитарлық бағыттың 7 пәні бойынша бекітілген бағдарламаға сәйкес өткізілген. Олимпиадалық пән ерекшеліктеріне сәйкес тапсырмаларды орындауға әртүрлі уақыт бөлінген. Мәселен, математикаға 4 сағат, информатикаға 4 сағат, физикаға 2 сағат 30 минут, химияға 2 сағат 30 минут, биологияға 2 сағат және географияға 1 сағат 30 минут қаралған.Республикалық олимпиаданың қорытындысымен ауданнан барған 6 оқушының 4-еуі І орын иеленсе, 1 оқушы ІІ орын және 1 оқушы ІІІ орын алған. Атап айтар болсақ, қоғам қайраткері Темірбек Жүргенов атындағы №123 мектеп-лицейдің 9 сынып оқушысы Өмірбек Айнабек математика пәні бойынша жүлделі І орын иеленген. Жетекшісі – Ғалымжан Нұрмахатов. Дәл осы білім ордасының бітіруші түлегі Асыл Жақсылық физика пәні бойынша І орын алған. Пән мұғалімі – Нұрбол Құдабаев. Әл-Фараби атындағы №201 мектеп-лицейдің 10 сынып оқушысы Нарқыз Төлепберген химия пәні бойынша І орын алған. Жетекшісі – Марал Ниетқұлова. Ал физика пәні бойынша І орын алған Азамат Тұрсынбек те аталған мектептің озат оқушысы. Жетекшісі – Айгүл Шілдебаева.&nbsp;Ақбота Ерғалиева жетекшілік жасаған Балқы Телғара информатика пәні бойынша ІІ орын иеленсе, Зейнолла Жарқынбаев атындағы №202 орта мектептің 10 сынып оқушысы Ақжан Әсетқызы биология пәні бойынша ІІІ орынға тұрақтаған. Жетекшісі – Ақжайық Төлеуова.&nbsp;<blockquote>– &nbsp;Жалпы олимпиадаға 2-3 сынып оқитын кезімнен қатыса бастадым. Ең алғаш 4 сынып оқитын кезде «Бастау» республикалық математикалық турнирдің аудандық кезеңінен ІІІ орын алдым. 7-8 сыныптарда республикалық юниор олимпиадаларына қатысып, ІІ, ІІІ орындар иелендім. «Кенгуру» олимпиадасына 9 сыныпта «биология» пәні бойынша қатысып, ІІ орын, республикалық пәндік олимпиадада ауданнан І орын, облыстан ІІІ орын алдым. Ал ауыл мектептеріндегі оқушыларға арналған республикалық олимпиаданың аудандық, облыстық кезеңінен І орын, ал республикалық кезеңінен ІІІ орын алдым. Осы олимпиадаларға қатысуымның арқасында «Қамбаш» оқу-сауықтыру орталығы, «Балдаурен» тынығу орталығына демалуға, бір жағынан олимпиадаға дайындықты жалғастыруға бардым.Дайындық барысында әлеуметтік желіден кітаптарды оқуды тиімді деп санап, жиі кітаптар оқимын.Дайындық жүргізу барысында алдымен ұстаздарыма және резерв дайындықтарына алғысымды айтамын, – дейді №202 орта мектептің 10 сынып оқушысы Ақжан Әсетқызы.</blockquote>Олимпиада қорытындысы бойынша қатысушылар ҚР Оқу-ағарту министрлігінің I, II, III дәрежелі дипломдарымен марапатталған. Сондай-ақ барлық қатысушыларға сертификаттар мен &nbsp;бағалы сыйлықтар табысталған.&nbsp;Айта кетейік, аталған олимпиадада 11 сынып оқитын жеңімпаздар еліміздің бірқатар ЖОО-ның ректорлық гранттарын да жеңіп алған. Мәселен, №123 мектеп-лицейінің бітіруші түлегі Асыл Жақсылық Қ.Жұбанов атындағы Ақтөбе өңірлік университетінің білім беру грантын жеңіп алса, Айнабек Өмірбек Алматы қаласындағы КеАҚ «республикалық физика-математикалық мектебінің» грант иегері атанған. «Ұстазы жақсының ұстанымы жақсы» демекші, білікті ұстаздан білім алып, аудан абыройын асқақтатқан жастарымыз болашақта ел игілігі жолында тынымсыз қызмет ететіні хақ.&nbsp;

Жалағаштық озат оқушылар олимпиада жеңімпазы атанды

&nbsp;<a href="https://kyzylorda-news.kz/">Kyzylorda-news.kz</a>.&nbsp; Жуырда тіл білімінің олжасына айналған Oxford Qazaq Dictionary сөздігі баспадан шықты. Тұңғыш рет жарық көрген еңбекте қазақ және ағылшын тіліне аударылған 60 мыңға жуық сөз қамтылған. Freedom Holding Corp. компаниясының қолдауымен басылып шыққан көлемді еңбектің қазіргі таралымы 10 мың дана. Басым бөлігі отандық ЖОО мен кітап дүкендеріне таратылуда. Қорқыт ата университетіне де апта басында 65 кітап жеткізіліп, тұсаукесер рәсімі өтті.Жиынға халықаралық «Қазақ тілі» қоғамының президенті Рауан Кенжеханұлы, облыстық қоғамдық даму басқармасының басшысы Алмасбек Есмаханов, Қорқыт ата атындағы Қызылорда университетінің ректоры Бейбіткүл Кәрімова қатысып, ғылыми еңбектің мән-маңызына тоқталды. Әсіресе, шараға қатысқан сала мамандары ауқымды сөздіктің артықшылығын айтып, пікір алмасуға мүмкіндік алды.&nbsp;Бұған дейін білетініміз, Oxford сөздігінің басылымын Президент Қасым-Жомарт Тоқаевтың тапсырмасымен халықаралық «Қазақ тілі» қоғамы дайындаған. Сондай-ақ сөздік көпшілік назарына ұсынылар алдында А.Байтұрсынұлы атындағы Тіл білімі институтында арнайы талқылаудан өткен. Жоба жетекшісі Рауан Кенжеханұлы сөздікті Oxford университеті баспасының тәжірибесін зерделей отырып шығарғанын атап өтті. Нақтырақ айтқанда, Oxford English Dictionary сөздігінің лексикалық реестрі, әдістемесі мен технологиясы негізге алынған екен.<blockquote>&nbsp;– Әлемдік ақпараттың 70 пайызы, халықаралық бизнестің 100 пайызы &nbsp;ағылшын тілінде жүргізілуде. Сондықтан ағылшын тіліндегі қажетті ұғым, термин, жаңа білімді ана тілімізге аударудың мәні ерек. Сөздік құрастыруда дүние жүзіндегі ең ілгері ұйым ретінде мойындалатын Oxford университеті баспасының ғасырлар бойы жинақталған тәжірибесі мен технологиясын назарға алдық. Кітаптың шығуына еліміздегі білікті тілшілер, одан өзге Oxford баспасында сөздік даярлайтын, ағылшын тілінің лексикасын білетін мамандар атсалысты. Екі тараптан түрлі ескерту мен пікірлер келіп отырды. Оларды қабылдап, кейде өз пікірімізді де алға тарттық. Төрт жыл бойы 50 адам осы жұмысты жетілдірді, – дейді Рауан Кенжеханұлы.</blockquote>&nbsp;Осы орайда ауқымды істің басы-қасында жүрген маман сөздікке қатысты бірнеше тың деректі мысалға келтірді. Соның бірі кітап &nbsp;атауына қатысты еді. Оның айтуынша, ел арасында сөздікті «Oxford» атауымен шығаруды сынағандар болған. Әсіресе, бұған дейін жарық көрген мәндес сөздіктер секілді «Қазақ-ағылшын сөздігі» деген нұсқада қалдыруды ұсынғандар көп болыпты. Алайда жоба жетекшілері Oxford университетінің ғаламдық тәжірибесін қолданудың маңызын түсініп, еңбекке институт ретінде үлес қосуын қалаған. Себебі аталған университет қолдау білдірген тілдердің ғылыми айналымы кеңіп, заманауи лингвистика әлеуетіне ілесетін үрдіс бар. Қазақ тілі сол қатарға қосылмақ.<blockquote>– Oxford University Press баспасының екі тілді Oxford Qazaq Dictionary сөздігін басып шығаруға ресми рұқсат беруі – тарихи сәт. Олай дейтініміз, университет баспасы ғаламдағы ең сенімді сөздік құрастырушы баспа ретінде танымал. Олар өздеріне және әріптестерінің жұмысына жоғары талап қояды. Сондықтан бізге өте ауқымды деңгейде жұмыс жүргізу қажет болды. Oxford English Dictionary сөздігін құрастыру әдістемесі мен технологиясы да негізге алынды. Сөздікті толықтай құрастырған соң оны сараптамаға жібердік. Себебі олардың рұқсатынсыз «Oxford» атауын сөздікке салу, пайдалану мүмкін емес еді, – дейді Р.Кенжеханұлы.</blockquote>&nbsp;Тағы бір ерекше өзгеріс – ел атауы. Халықаралық баспа ісі мен медиа кеңістікте Қазақстан атауын орыс тілінің фонетикалық ығына жығып беру тәсілі бар-тын, яғни, Қазақстанды «Kazakhstan» деп жазу қалыптасқан. Мұндай орынсыз ұғымды жоюдың алғашқы әдісі осы сөздікте қолданылған. Оған дәлел, мұнда қазақ сөзі төл дыбысымызға шақтап «Qazaq» деп жазылған. Кітап тұсаукесерінде Р.Кенжеханұлы өзге ұлттар «қ» дыбысына жуықтас дыбысты «q» белгісімен беретінін алға тартып, бұл қадамның қазақ тіл білімінің алға жылжуы деп бағалады.&nbsp;Сөздіктен кейін жүрген сең мұнымен шектелмейді. Аталған кітап негізінде қазақ тілі Оксфорд Жаһандық Тілдер (Oxford Global Languages) платформасына қосылды. Соның нәтижесінде қазақ тілі әлемнің іргелі 100 тілінің лексикалық қорымен өзара байланысып, ортақ ғаламдық тіл корпусына енуде.&nbsp;Бұдан бөлек жуырда Oxford университетінде қазақ тілі оқыталатыны туралы жағымды жаңалық тараған болатын. Отандық ғалымдар мен педагогтер әлемдік ЖОО-да қазақ тілінен сабақ бермек. Кітап тұсаукесерінде сөз алған &nbsp;Қызылорда университетінің ректоры Бейбіткүл Кәрімова жобаға сырбойылық ұстаздардың да үлес қосуына мүмкіндік қарастыралатынын атап өтті.<blockquote>&nbsp;– Oxford университетімен байланыстың тағы бір ұтымды тұсы – аталған оқу орнында қазақ тілін оқыту мүмкіндігі. Бұл – алғаш рет қазақ тілі әлемдік үздік университете оқытылады деген сөз. Қазір оқу процесіне А.Байтұрсынұлы атындағы Тіл білімі институты мен отандық ЖОО өкілдері тікелей атсалысуда. Осы орайда Қорқыт ата атындағы Қызылорда университеті оқытушыларының Еуропада қазақ тілінен сабақ беру мәселесін пысықтайтын боламыз, – деді ректор.</blockquote>&nbsp; Жалпы сөздік құрастыру аясында қазақ және ағылшын тілі лексикасындағы өзгерістер, әсіресе қазіргі мәдениет, ақпараттық технологиялар, медицина, экономика, қаржы және сауда салаларындағы жаңалықтар ескерілген. Ағылшын және қазақ тілдерінің грамматикасы мен дыбыстау, емле ережелері түсіндірілетін қысқаша нұсқаулықтар, қазақ тіліндегі іскерлік және электронды хат-хабар жазу үлгілері берілген. Бұл – тіл мамандары үшін таптырмайтын көмекші құрал.<blockquote>&nbsp;– Сөздіктен ірілі-ұсақты қате табылары белгілі. Алайда еңбек үнемі жетіліп, дамып отыруы тиіс. Көп қолданыстағы кітаптардың екінші, үшінші, тіпті жиырмасыншы басылымы шығып жатады. Бастама әрі қарай жалғасын тауып, келесі басылымдары әзірленеді деген ойдамыз. 10 мың дана – Қазақстан қоғамы үшін үлкен таралым. Кітап еліміздегі барлық ірі кітапханаға, оқу орындарындағы студенттер мен оқытушылардың жұмысына қажетті деңгейде жетеді, – дейді жоба жетекшісі.</blockquote>&nbsp;Жиын соңында облыстық қоғамдық даму басқармасының басшысы Алмасбек Есмаханов, халықаралық «Қазақ тілі» қоғамы облыстық филиалының төрағасы Сәдуақас Аңсат жобаға атсалысқан азаматтарға алғыс айтып, тіл мамандары сөздікке қатысты толымды пікір білдірді.&nbsp;

Оқырманға жаңа сөздік  жол тартты

<a href="https://kyzylorda-news.kz/">Kyzylorda-news.kz.</a>&nbsp; Кітапханаға оқушы кезімізде жиі бас сұғатынмын. Ол мектеп кітапханасы болсын, орталық кітапхана болсын, сабақтан қолым қалт еткенде жиі бас сұғатын орнымның бірі еді. Кітапхана ұйымдастарған іс-шаралардың да әрдайым басы-қасынан табылып, үнемі белсенділік танытушы едім. Сондағы мақсатым – ақылдың кілті болған кітап үйіне бір қадам жақын жүру. Кітапханаға арнайы барып, бірнеше әдеби-танымдық кітапты белгілі бір белгіленген мерзімге алып, олжалы қайтқандай үйге қуанып көңілді оралатынмын. Бір жағынан, кітапханадан том-том кітап алып оқу – әкемнен дарыған қасиет әрі отбасымның өнегелі тәрбиесі деп білемін.&nbsp; &nbsp; &nbsp; Сол уақыттарда маған бір ой келетін еді. «Мына кітапханашы апайлардікі, сірә неткен жақсы жұмыс. Кез келген кітап қолжетімді. Қалағаныңды ал да оқи бер. Тіпті бүкіл жұмыс уақытыңды кітап оқып өткізсең болады» деп таңданатынмын іштей. Бала көңіл анау темір жолдың арғы бетіндегі үйіме бірнеше кітапты арқалап қайтуды қиын көргені ме, әлде бірнеше кітап алғанымды місе тұтпай, көп кітаптың ортасында отырып, қалағанымды алып оқығым келе ме, әйтеуір осындай ой болатын. Бір жағынан, кітапханашының жұмысы – кітап оқу деп ойласам керек. &nbsp; &nbsp; Сол кездерден бері кітапхана мен кітапханашы апайларға өте жақынмын. Жақында №36 Ә.Тәжібаев атындағы мектеп-лицей жанындағы кітапхананың кітапханашысы Зәуре Үйсінбаевамен әңгіме-дүкен құрған болатынмын. Білімнің кені болған кітаптар үйінде, әдеттегідей, жүзі жылы, мейірімді апайлар жұмыс істейді. Менің бала күнгі түсінігімде солай қалыптасқан. Білікті кітапханашымен әңгімелесу барысында бұл ойымның дұрыстығына тағы бір мәрте көзім жете түскендей. Мектеп-лицей кітапханасына арнайы бас сұғып, жұмыс барысымен, кітап қорымен жақынырақ таныстым. &nbsp; &nbsp; Аз-кем таныстықтан соң Зәуре Маманқызы бізбен бұрыннан таныс кісідей ақтарылып сөйлесіп кетті. Журналист те, кітапханашы да «илегені бір терінің пұшпағы» демекші, екеуі де шығармашылықтың адамдары ғой. Содан болса керек, апаймен әңгімеміз тез жараса кетті. Мақала арқауы етіп өз өмірін айтудан бұрын кітапханамен таныстырып, жұмысын көрсеткен кітапханашының өз ісіне беріле кіріскен жан екенін аңғардық. &nbsp; &nbsp; – Жақында кітапханамыздағы кітап қоры 300-ге артты, – деп қуана дауыстады ол сүйіншілегендей. &nbsp; &nbsp; – «Оқуға құштар мектеп» жобасы аясында түрлі іс-шаралар өтіп жатыр. Оқушылармен бірлесе отыра,, мектепішілік байқаулар, танымдық кештер мен кездесулер ұйымдастырамыз. Әр баланың қабілеті әртүрлі ғой. Сол сияқты кітап оқуға, кітапхана жұмысына белсенділік танытатын оқушылар бар. Әрине оқушылардың барлығы дерлік кітапханаға бас сұғып, керек кітабын тауып, қажет ақпаратын алып жатады, – дейді Зәуре Үйсінбаева. &nbsp; &nbsp; Білікті маманның балаларға деген ықыласы да өте ерекше екен. Кітапханаға кірген оқушыны құшақ жайып қарсы алып, жылы лебізін білдіріп шығарып салып жатты. Біз сұхбат құрып отырған аз ғана уақыттың ішінде келген оқушылардың да кітапханашы апайға ерекше еркелеп, сыйластық көрсететінін байқадық. &nbsp; &nbsp; Зәуре Үйсінбаева – 1973 жылдың тумасы. Алғашқы еңбек жолы 1990 жылдан бастау алыпты. Алғашқыда түрлі салаларда еңбек етіп, тәжірибе жинақтап, жан-жақты ысылып, тәжірибе жинаған жас маманның 2012 жылдан бастап білім ордасындағы қызметі басталған. Алғашқыда зертханашы, тәрбиеші болып жұмыс жасай жүріп, балалармен жақсы қарым-қатынас орната білді. Жүзі жылы, жүрегі мейірімді адамға бала да үйір, жақын болады емес пе. «Адамның жақсысын бала біледі» деп айтады бұндайда. Ол – рас. Зәуре апай жаспен де, жасамыспен де тіл табыса алатын, үлкенге де, кішіге де сый-құрметін аямайтын жайдары жандардың бірі де бірегейі. Кітапханашы мамандығын игеріп, 2017 жылдан бастап мектеп кітапханасында аянбай еңбек етіп келеді. Бүгінде өз жұмысының қыры мен сырына әбден қаныққан ол әр жұмыстың қызық та, қиын да тұстары болатынын айтып өтті. &nbsp; &nbsp; – Балалармен жұмыс жасаған қызық қой. Баланың энергиясы кісіні шаршатпайды. Керісінше, күш-қуат береді адамға. «Бала тілі – бал» деген, кейде «өмірімізді ұзартып алатын» сәттер де кездесіп жатады. Өзім де кітап оқығанды ұнатамын. Кітап – ақы сұрамайтын ақыл кені. Нағыз шынайы дос бола алатын дүние. Негізінен өзім орыс сыныбында оқығанмын. Бірақ қазақ әдебиетіне, оның ішінде поэзия жанрына деген қызығушылығым басымырақ, – дейді кітапханашы. &nbsp; &nbsp; Журналист болған соң, әр түрлі саладағы адамдармен кездесіп, тілдесіп, сұхбат құрып жатамыз. Бір сұхбат барысында-ақ кісінің қандай екенін анық аңғаруға болады. «Бойыңызда қандай қасиеттеріңіз бар, айта өтсеңіз» деген сұрағымызға мақтанып ала жөнелмей, өзіне ұнамды қасиетін ашып айта қоймаған Зәуре апай туралы пікірді жанындағы әріптестерінен сұрастыруды жөн көрдік.&nbsp; &nbsp; &nbsp; – Зәурені 2012 жылдан бері қарай білемін. Ол кісі туралы айту керек болғанда, ең алдымен «қарапайымдылық» деген ассоциация ойыма орала қалды. Өте қарапайым әрі көпшіл жан. Қолы ашық. Сондай жарқын мінезінің арқасында көпке сыйлы болып жүрген жайы бар. Балалар да үйір өзіне. Кітапхана жұмысына араласа бастағанына жеті жыл уақыт болып қалған екен. Сол сәттен бері бірге жұмыс жасап келеміз. Бірге қаншама жұмыстар атқардық. Қызметте сенімді әріптес, өмірде әпкелі-сіңлілі құрбыға айналдық. Зәуре – өте еңбекқор жан. Әдемілікті жаны сүйеді. Әр іске жауапкершілікпен қарап, тыңғылықты атқарады. Ол өз ісінің нағыз маманы, өте ұқыпты, шыншыл, кішіпейіл, достарына адал жан деп ауыз толтырып айта аламын. Аялап өсірген қызы Бағжан өрісін кеңейтіп, анасына әже бақытын сыйлады. Бүгінде қос жиеннің қызығына тоймай, тілеулерін тілеп отырады. Адал еңбегі еленіп, аудандық білім бөлімінің «Құрмет грамотасына» ие болғанын, кітапханашылар күні қарсаңында арнайы марапатпен марапатталғанын да айта кету орынды, – дейді мектеп-лицей кітапханасының меңгерушісі Ләззат Ниязбекова. &nbsp;

Зәуре Үйсінбаева: Жақында кітапханамыздағы кітап қоры 300-ге артты

<a href="https://kyzylorda-news.kz/">Kyzylorda-news.kz</a>. Жедел жәрдеммен ауруханаға жеткізілген бала жансақтау бөліміне жатқазылған.Аталған жағдай бойынша Түркістан облысы полиция департаменті өз-өзіне қол жұмсауға дейін жеткізу фактісі бойынша қылмыстық іс қозғады,&nbsp;деп хабарлайды&nbsp;<a href="https://sn.kz/sn-akparat-agyny/110496-turkistan-oblysynda-okushy-kyz-3-kabattan-sekirip-ketti">Skifnews.kz</a>&nbsp;ақпарат порталы.<blockquote>«Жағдайы ауыр болатын. Бірден жансақтау бөліміне жатқыздық. Тексеру нәтижесінде бас ми&nbsp;жабық жарақаты, жамбас және омыртқаның жабық сынығы анықталды. Алғашқы көмек көрсетіп, емдедік. Қазір сынық-сырқат бөлімінде ем&nbsp;қабылдап жатыр»,&nbsp;— деді дәрігер-травматолог Абдусамат Утамуратов.</blockquote>Аталған жағдай бойынша Түркістан облысы полиция департаменті өз-өзіне қол жұмсауға дейін жеткізу фактісі бойынша қылмыстық іс қозғады.Болған оқиғаның бүкіл мән-жайы анықталып жатыр.<blockquote>«Сараптама тағайындалды. Тергеу барысы полиция департаменті басшылығының бақылауында» делінген Түркістан облысы полиция департаментінің баспасөз қызметі ұсынған ақпаратта.</blockquote>Фото: Нұрболат Нұржаубай

Түркістан облысында оқушы 3-қабаттан секіріп кетті

<a href="https://kyzylorda-news.kz/">Kyzylorda-news.kz.</a> Біз білім ордасының есігінен енгеніміз сол еді, оқушыларды марапаттау рәсімі де басталып жатыр екен. Айнала қоршалып тұрған оқушылардың ортасында облыстық олимпиададан жүлделі орын алып келген үздіктерді ұстаздар марапаттап жатыр. Соңында салада Жалағаш ауданының абыройын асқақтатып, аймақ намысын қорғап жүрген үздік оқушылармен сұхбаттасудың сәті түсті. &nbsp;Солардың бірі – Алина Цой. Ол – өзі кәріс ұлтынан болса да қазақ тілі мен әдебиетінен жарыстарға қатысып, топ жарып жүрген қазақ тілінің кішкентай жанашыры.&nbsp;<blockquote>– Біз басқа қалаларға жарысқа барғанда сөйлеу мәнерімізге қарап өзге ұлт өкілі деп айтпайды. Себебі расымен басқа қалалардағы өзге ұлт өкілдеріне қарағанда біз қазақша таза сөйлей аламыз. Бұл әрине тек қазақ тілі пәнінде емес, отбасымызда қазақша сөйлеп, достарымызбен қазақша араласатынымыздың &nbsp;арқасында. Жетекшім әр сабаққа тапсырма берерде міндетті түрде мақал-мәтел жазуды қоса береді. Сондай-ақ түрлі тақырыптағы эссе, шығарма жазу кезінде де мақал-мәтелдерді орнымен қолдандырады. Соның арқасында әр ізденісімде қазақ тілінің расында ерекше стильді өте көркем тіл екенін ұғына түсемін, – дейді кейіпкеріміз.</blockquote>Расымен Алинаның сөйлеуінен «таза қазақ қой» деп қаларсың. Өзге ұлт болса да жүрегіндегі Қазақстанға деген патриоттық сезімі тулаған. Оны «Тіл – тәуелсіздік тұғыры», &nbsp;«Шуақты мекен – Қазақстан», «Мәңгілік жаса, қыран елім Қазақстаным» атты республикалық байқаулардағы І дәрежелі дипломдарынан байқауға болады.&nbsp;Сондай-ақ кейіпкеріміз уақытын тиімді пайдаланатын әмбебап оқушылардың бірі екен. Олай дейтініміз бос уақыты бола қалса, сурет салумен, ән айтып, қолөнермен де айналысады. Бисермен, жіппен кесте тоқып, қазақы дәстүрлі қолөнерден де ада емес екенін көрсетті. Болашақта атақты дизайнер болғысы келетіні де осындай қызығушылықтан болар. Қазір мектеп кезден тәжірибе жинақтап, түрлі заттардан ойыншық жасап, мүсін жасаумен де айналысып жүр. Оның айтуынша, &nbsp;болашақта дизайн жасау маманы болғанда бұл жинаған тәжірибелерінің рөлі күшті болмақ.Жетекшісі Гүлсайран Кенжеқазықызы Алинаның қазақ тілге деген қызығушылығы мен қабілетінің арқасында 9 сыныптан бері түрлі жарыстарға қатысып жүргенін айтады. &nbsp;Қазіргі кезде әрбір оқушының қабілеті көз ілеспес жылдамдықпен дамуда. Мектептегі жаңа бағдарламалар күн сайын емес, ай сайын жаңаруда. Білімді бәрінен де биік қоятын ұлт қана табысқа жетеді. Білім алуда Гүлсайран апай айтпақшы, әр адамның бойындағы қабілеті маңызды. Себебі оқушының білім сапасы мен деңгейін анықтап, салыстырмалы &nbsp;мониторингтер жасауға көмектеседі.<blockquote>– Шәкірттерімнің әрқайсысы – мен үшін шоқтығы биік жұлдыз. Олардың талабы мен талантын ұштап, шыңға шығаруды басты мақсатым деп білемін. Мысалы, Алина мектептегі іс-шараларға белсене қатысады. Мектепішілік әдеби-мәдени шаралардың жоғары деңгейде өтуіне атсалысып жүр. Болашақта шәкіртімнің биік белесті бағындырып, жақсы жетістіктерге жететініне сенемін, – дейді жетекшісі Гүлсайран Кенжеқазықызы.</blockquote>Айта кетейік, Алина өлең оқуға да, ән айтуға да қабілетті. Мәселен, «Мәңгілік жаса, қыран елім Қазақстаным» атты оқушылар арасында мәнерлеп оқу байқауына қатысып, І дәрежелі дипломмен марапатталған. Кішкентайынан үлкен сахналарда ән айтып, жүлделі орындар да иеленген. Алинаның мектеп қабырғасында жүріп жеткен жетістігі көп. Болашақта армандаған мамандығын меңгеріп, елдің ертеңіне еңбек ететініне сенеміз.

Абыройы асқақ жалағаштық Алина

<a href="https://kyzylorda-news.kz/">Kyzylorda-news.kz.</a> Өткен жылы Елорда төрінде 11 жылдан бері дәстүрлі түрде өтіп келе жатқан білім беру саласының үздіктерін анықтайтын республикалық байқауда топ жарып, «Үздік Педагог - 2023» төсбелгісін алған, Арал қаласындағы №14 мектеп-лицейінің орыс тілі мен әдебиеті пәнінің мұғалімі Жанна Қонарованың тұлғалық келбетін таныту мақсатында сұхбат жүргізген болатынбыз.&nbsp;– Сіз тәжірибелі мұғалім екендігіңізді дәлелдеп жүрсіз. Салыстырмалы түрде қарастырып көрейікші, бұрынғы білім беру жүйесі мен қазіргі жүйеде қандай ерекшелік бар?– Менің мектепі өмірімнің бір бөлшегіне айналдырып, шәкірттердің туған баламдай білім көшіне бастап, жанашылық танытып, сол арқылы биік белестерді бағындырып келе жатқаныма да биыл 32 жыл болыпты. Былай қарап отырсақ бұл аз уақыт емес. Осы жылдар ішінде қаншама шәкірттің мерейі өскендігін көрдік. Оларға ақыл мен білімді қатар септік. Бұрын білім тек кітапта болды. Тақта мен бор, қолдан жасалған көрнекіліктермен оқушыны қызықтыруға тырыстық. Қазір жүйе толық цифрланған. Оқушы заман талабына сай білімін толықтыра алады. Мемлекет дамудың даңғыл жолына түсіп, жан-жақты өркениетті меңгеріп жатқан шақта білім беру жүйесі де толықтай жаңартылып, заман талабына сай жабдықталып келеді. Бұрын біз шәкірттерге тың дүние үйрету үшін көп ізденуші едік. Қазір оның бәрі цифрлық жүйе арқылы оңай қол жетімді болды. Мемлекет мұғалімге жақсы жеңілдіктер жасап жатыр. Жалақының еселеп өскені де білім берушілердің материалдық жағдайын жақсартып қана қоймай, мерейін де өсіре түсті. Қысқасын айсам үкімет мұғалімді өз «панасына» алды. &nbsp;– Сіз шәкірттерге қандай талап қоясыз?– Тәртіп, жауапкершілік, адалдық. Ұлт батыры Бауыржан Момышұлының мына бір сөзіне тоқтала кетпеуге болмас. «Тәрбиесіз берілген білім, адамзаттың хас жауы» дейді ғой. Расында, тәртіп болмаған жерде еңбек еш кетеді. Ең алдымен оқушыны дұрыс сөйлеу, өзін-өзі дұрыс ұстауға, мұғалімді, үлкенді сыйлауға үйрету керек. Ал жауапкершілік адамның қоғамдағы беделін бекіте түседі. Жауапкершілігі жоқ адамнан ештеңе шықпайды. Ондайларға үміт артудың өзі артық. Сондықтан оқушының бойына жауапкершілікті сезіну және соған селкеу түсірмеу керектігін сіңіру керек. Және адалдық. Бұл әр адамның бойында болу керек қасиет. Өмірдің өзі жақсы мен жаман, ақ пен қара секілді, адалдық пен арамдықтан тұрады. Адал шәкірт өсіру, тұлға &nbsp;қалыптастырудың тетігі деп ойлаймын. Және оқушының бойына тарыдай кезінен сіңіруге тырысамын. &nbsp;– Ылғи сіздің биік белестерді бағындырып жүргеніңіздің куәсі болып жатамыз. Бұл ізденімпаздықтан ба, әлде білім мен білігіңіздің нәтижесі ме?– Сіз санамалап отырған қасиеттердің бәрі ұштасқан кезде адамның жетістікке жетпеуі, биіктерді бағындырмауы мүмкін емес. Мен ойлаймын, мұғалім ол шәкіртке үлгі болуы керек. Оқушыдан білімді, жетістікті талап ету үшін, өзің де сол талапқа сай болуың қажет. Олай болмаған жағдайда қадірің қашып, беделің төменшіктей береді. Тек 45 минутты өткізіп шығу мұғалімнің мүсәпірлігі. Шәкірт тәрбиелеп отырған адам үнемі ізденісте болуы міндетті. Заман мен техника күн сайын қарыштап дамуда. Бұрынғы ескіліктің сарқыншағын сақтау арқылы ештеңеге қол жеткізе алмайсың. Терең білімді меңгеру керек. Ол, әрине, тәжірибемен келеді. Бүгін жұмысқа орналасқан маманнан үлкен жетістік күту де артық. Олар ізденіп, ысылуына мүмкіндік туғызу керек. Ал талай жыл осы салада нәпақа тауып отырған, бірақ бір де бір жеткен жетістігі жоқ әріптестерім де жоқ емес. Өзім алдыма мақсат қоямын. Және соған жету жолында өзімді дамытудан, білімімді жетілдіруден шаршамаймын. Іздеңімпаздық пен білімділіктің арқасында, мақсатыма қол жеткізіп келемін.&nbsp;– Сіз үшін мұғалім қандай болу керек?– Мұғалім алдымен өзінің мамандығын жақсы көру керек. Және &nbsp;балаларды &nbsp;тұлға ретіңде тану қажет. Адам өзінің сүйікті ісімен айналысқан кезде жан-тәнімен беріліп істейді. Ол өзінің өмірінің бір бөлшегіне айналып кеткенін де аңдамай қалады. Әсіресе мұғалім болуды таңдаған кезде басқадай мақсатпен емес, өзінің жан қалауымен келуі маңызды. Себебі біз болашақты жетілдірушіміз. Әрбір шәкірт ол болашақ бір-бір тұлға. Олардың шам-шырағы мектептен жағылып, өмір тетігі мектептен қалана бастайды. Сондықтан мамандығын сүйіп келген мұғалім білімді, жылдар өтке келе білікті ұстазға айналады. Бір сөзбен айтқанда мұғалім оқушының обалына қалмай, сауабын алуы керек.&nbsp;– Сіз қатал мұғалімсіз бе?– Жоқ, мен талапшылмын. Осы арқылы шәкіртті тани алуға болады. Мен өзім берген білімнің нәтижесін күтемін. Және оқушының жан-жақты ізденісте болғанын қалаймын. Қазір қаталдық танытып нәтижеге жету мүмкін емес. Себебі оқушы өз құқығын жақсы біледі. Өзіміз оқушы кезде ағай, апайлардың қас-қабағынан қорқушы едік. Тіпті таяқтап жатса да &nbsp;ата-анамызға бармайтын менің замандастарым шағымданған емес. Сонда мұғалім бізді ойлағандықтан сондай қадамға барғандығын кейін түсіндік қой. Қазір ол өткеннің еншісінде қалды. Оқушыға қаталдық таныту артық. Тек талап қою арқылы ғана бағамдауға болады.&nbsp;– Бүгінгі шәкірттердің ерекшелігі неде?– Бүгінгі шәкірттер ашық, өз көз қарасын білдіре алады. Және шыншыл. 32 жылда мыңдаған оқушы алдымнан өтті. Кейін өзіммен әріптес болып келгендері де бар. Тәуелсіздікпен бірге адамдардың ой өрісі, өмірге деген көзқарасы, психологиясы да дамыды. Қазіргі оқушы өзінің ойын ашық жеткізе алады. Өзіндік ұстанымы бар. Көзқарасын айқын білдіре алады. Бұл жақсы деп ойлаймын. Жастар жаңалыққа құмар. Мен өскелең ұрпақтың болашағынан көп үміт күтемін.&nbsp;– Ойыңыз бен тәжірибеңізді ортаға салып, сұхбат бергеніңіз үшін рахмет.

«Үздік Педагог - 2023» төсбелгісінің иегері  - Жанна Қонарова

&nbsp;<a href="https://kyzylorda-news.kz/">Kyzylorda-news.kz.</a>&nbsp; Бүгінде қол қусырып қарап отыратын заман емес. Бұрынғыдай емес мүмкіндік те көп. Тек әрекет етіп, еңбек етсеңіз болғаны. Асқақ арманға апарар жолда адаспайсыз. Әрине, арманның орындаларына сену де керек. Қазір қазақ жастарының әлемге қарай жол салатын кезі. Онысы орынды. «Ауылдан шықпағанның ақылы ауылдасынан аспайды» дегенді жиі естіп жатамыз. Рас, шетелге шығып, жаңа білім алып, көзқарасты жақсы жаққа өзгертуге болады.&nbsp;Жақында әлеуметтік желіде қармақшылықтарға тартымды видеоларымен танылып жүрген мобилограф Еркебұлан Әптаевтың шетелде жұмыс істеп жүргенін көзіміз шалады. Ондағы жұмысы мен қызықты оқиғаларын күн санап қарай бастадық. &nbsp;Жалынды жаспен әңгімескен сұхбатты төменнен оқи отырыңыздар.&nbsp;– Әңгімені әріден бастамай-ақ қазіргі айналысып жүрген ісіңнен бастасақ. Жалпы мобилографияға қалай келдің?– Менің қос бірдей жоғары дипломым бар. Екеуімен де біраз мекемеде жұмыс істеп көрдім. Несін жасырайын, бұл мамандықтардан табысым көп болмады. 2021 жылы туған ауылым Қуаңдариядағы ауылдық клуб үйінде еңбек жолымды бастадым. Сол уақытта ауылдық жерде тұрған соң ауылдың өмірін түсіріп жүрдім. Ең алғашқы әке-шешемнің киіз үй құрып жатқанын видеосын монтаждап салдым. Қолымда арзан телефон еді. Ол видео естелік ретінде әлі сақтаулы тұр. Содан бастап ауыл өмірі туралы видеолар шығара бастадым. Жасаған дүниелерім туған жерден жырақта жүрген ауыл түлектерінің ортасында тарай бастады. Әлгі тараған видеоларым маған мотивация болып, әрі қарай да осы ісімді жалғастыруға сеп болды. Ауылдың әйгілі «Ыстық бұлағы», өрістегі қойлар маған керемет локация болды. Солай ең бірінші мобилографияға қадамды ауылда жүріп бастап едім.&nbsp;– Сені оған дейін гитарашы ретінде танитын едік.– Иә, 2015 жылы Семей қаласында Шәкәрім университетінде студент болып оқып жүргенде гитара үйреніп, вокальды ансамбльдер аштым. Осылайша қайырымдылық концерттерін балалар, қарттар үйіне көп бердік. Сол уақытта Семейдің жергілікті арналарында тікелей эфирге шығып тұрдық. Оқуды аяқтап, ауылға келіп гитарамен көптеген тойда қызмет көрсеттім. Сонымен қатар екі жылдай Ш.Төлепова атындағы аудандық мәдениет үйінде аспаптарда сүйемелдеуші болып жұмыс істедім. Аспаптарға жақын болуыма әкем мен анамның септігі тиген шығар. Себебі олар да өнерден кенде емес.– Бұл сұрақ бәріне де қызық болар. Шетелге қалай шықтың?&nbsp;– Осыдан 3 ай бұрын жарнамадан Дубай қаласына мобилограф керек дегенді көріп қаламын. Соған ұсыныс тастап көрдім. Ол жауапсыз қалып, арада бір апта өткен соң өздері хабарласты. Бақылап қарасам Дубай қаласында тұратын өзіміздің қазақ кәсіпкерлері екен. Ең бірінші түсірген жұмыстарымды тексерді, тапсырма берді. Ол кезде дәл мен секілді Қазақстаннан 50-ден аса адам ұсыныс тастапты. Сонша адамның ішінен менің жұмысымды ұнатып, «біз сені қабылдаймыз» деп хабарласты. Ойламаған жерден жәй ғана көре салайын деген оймен басталған істе шешім қабылдау оңай болмады. Отбасым, әке-шешемнен жырақта қалай болады, сенуге болатын жандар ма деген сұрақ көп болды. Шақырушы жандар да соны түсініп, &nbsp;ойлануға біраз уақыт берді. Ақылдаса келе, тәуекел етіп, ақпан айының 1-і күнінен бастап осындамын. Міне, бүгін 1 ай болды, Дубай қаласында тұрып жатырмын. Елге қайтамын ба, әлде жұмысымды жалғастырамын ба әзірге белгісіз болып тұр. Бірақ елден жырақ өмір сүру үлкен мәселе. Ата-анам, жарым мен баламды сағынамын…– Қазір онда немен айналысудасың?– Мені жұмысқа алған қазақ кәсіпкер отбасының жеке мейрамханасы және тур агенттігі &nbsp;бар. Сол екі салада видеолар түсіріп беремін. Қаншама адам армандаған, қолы жеткен адам көптеген ақша жұмсап бір рет қана көріп кететін әлемнің алдыңғы қатарындағы үлкен қалада мен қазір тегін аралап, бір жағынан жұмыс жасап отбасымды асырап отырмын. Бұл бір Алланың қалауы, екінші отбасымның қолдауы және мобилографияның арқасы.&nbsp;– Қызықты оқиғаларыңмен бөлісе отырсаң…– Жұмысқа алған кәсіпкерлердің маған қойған талаптарынан бөлек, өздерінің тарапынан тегін жатын орын, 3 мезгіл тамағы, ұшақ билеті, виза, жүріп тұруымның барлығын қаржыландырады. Рестораны Шығыс асханасы негізінде жұмыс істейді. Мұнда лағманның 150 түрі дайындалады. Маған мәзірде көрсетілген кез-келген тамақты таңдап ішуге рұқсат берілген. Тамаққа келгенде көп таңдаймын, оның үстіне лағман жей алмаймын. Онда бізге белгілісі тек палау. Осында келгелі күнде палау жеймін. Жұмыс іститін ресторанда 30 шақты адам бар. Олар 4-5 түрлі ұлттан құралған. Даяшылар филиппин, ұйғыр, аспаздар пәкістандық, жүргізушілер қазақ, пәкістандықтар мен түріктер. Олар менің күнде палау жеп жүргенімді көріп «Mister Palau» деп атап кетті. Дәл осы сұхбатты сіздерге палау жеп отырып беріп отырмын.&nbsp;– Қазір барлығының әлемдік нарыққа шыққысы келеді. Жалпы сенің көзқарасың шетелге шыққанда қалай өзгерді, не көрдің, не түйдің?– Қазір шет елге шығу жастар арасында бір-бірімен жарыс, бақталас, яғни біздің тілімізде «тренд» болып кетті. Иә, шетелге шығып келген жандардан көп еститініміз сол «көзің ашылады», «ой өрісің кеңейеді», «жаңа ақпараттарға қанық боласың» деген секілді. Мен осы сөздерді Қазақстаннан ұшып Біріккен Араб Әмірлігінің астанасы – Абу Даби қаласына қонып, аэропортына кірген бойдан түсіне қойдым. Қысқа уақытта тұрғызылған бірнеше рекордтық үлкен зәулім ғимараттарды көріп, көп нәрсені түсінуге болады. Қазақстанда жүріп осы Дубайды тұрғызған патшаның сұхбатын көрдім, ол кісіге мына сұрақ қойылады. «Қайда асығып жатсыз, неге ең үлкен ғимараттар, неге қатты жылдамдықпен Дубайды дамытып жатсыз?» дегенде, патшаның айтқаны «Мен халқымды сүйемін, сол үшін 50 жылдан кейін 100 жылдан кейін көретін дамыған қаланы халқым қазір көруге лайықты, білім, медицина, жұмыс тапшылығы дегенге менің халқым ешқашан мұқтаж болмауы керек» деген. Осындай ғажайып дүниені неге аралап көрмеске?! Көргісі келеді, бірақ әртүрлі қорқыныштарға бой алдыруы мүмкін. Дей тұра, қорқынышты жиып, басқа елдің, ұлттың мәдениетін көруге кеңес беремін. &nbsp;Біріккен Араб Әмірлігіне келіп басқа да мемлекеттерге қызығушылығым арта түсті және алдағы уақытта мақсат етіп тізіммен баратын елдерді, қалаларды жазып қойдым. Бұл өмірімдегі алғашқы үлкен сапар мен үшін – үлкен тәжірибе, үлкен білім, үлкен көзқарас болып жатыр.– Қателеспесем, осыған дейін шағын кино түсірдің. Сол туралы кеңінен айта кетсең…– Иә, видео саласында 3 жыл жүріп көп ұсыныстар түсіп жатты. Соның ішінде тәжірибе болған ұсыныстардың бірі – қысқа метражды фильм түсіру. 2022 жылы аудандағы «Қазақстан Халық Банкі» АҚ Байқоңыр өңірлік филиалының аудандық бөлімшесінің басшысы Нұрбол Үсенов ағамыздан ұсыныс түсті. Ол фильм облыстық байқауға арналып, тек жабық көрсетілім бойынша түсірілген. &nbsp;Үш күн түсірілім жасадық және монтажына бір күн уақыт кетті. Сол байқауда мен түсірген фильм І орынды жеңіп алды. Өткен жылы &nbsp;«КМФ» микроқаржылық ұйымының Жосалы бөлімшесіненШынболат ағамыздан да ұсыныс түсті. Бұл кісілердікі де дәл солай облыстық конкурсқа арналған екен. Бұл жолы да облыстан бас жүлде иеленді. Бұл ағаларымыз да әлі күнге дейін көрген кезде алғысын жаудырып ризашылығын білдіріп жүреді.– Жарайсың! Уақыт бөліп сұхбат бергеніңе рақмет! Еңбегің жана берсін!

Мобилограф Еркебұлан Әптаев ауылда жүріп шетелге қалай шықты?

Баланың талантын ұштап, талабын шыңдау оңай емес, әрине. Ол үшін мамандыққа деген адалдық һәм еңбекқорлық қажет. Жалағаш ауданында кәсіби мамандығын сәт сайын дамытып, өз ісін абыроймен атқарып жүрген мұғалімдер аз емес. Солардың бірі – Ысқақова Әйгерім. Ол былтыр жыл қорытындысымен «Үздік педагог – 2023» республикалық байқауының облыстық кезеңінде үздік деп танылып, 1 035 000 теңге қаржылай сыйақыға ие болды.&nbsp;Қоғам қайраткері Темірбек Жүргенов атындағы №123 мектеп-лицейінің ағылшын тілі пән мұғалімі Әйгерім Жарқынбекқызы – оқушыларға сапалы білім, саналы тәрбие беру жолында тынымсыз еңбек етіп келе жатқан шығармашыл, ізденімпаз, тәлімгер ұстаз. Ол өзінің еңбекқорлығымен, адамгершілігімен, жақсы қарым-қабілетімен көзге түсіп келеді.&nbsp;<blockquote>– Әйгерім Жарқынбекқызының білім беру саласына қосқан үлесі зор, жеткен жетістіктері көп деп білемін. Себебі ол – тәжірибелі, кәсіби жетістігі көп маман. Соның нәтижесінде Әйгерім «Үздік педагог – 2023» республикалық байқауында үздіктер қатарынан көрініп, мектебіміздің ғана емес, ауданымыздың да абыройын асқақтатты. Әріптестері мен шәкірттерінің артқан сенімін ақтай алды. Ол – 18 жылдық еңбек өтілі бар білікті маман. Осы уақыт ішінде ұстаздық етуден жалықпай, әр сабағын қызықты етіп өткізу үшін жаңашылдық енгізіп жүретін Әйгерімнің өзгеріске жаны құмар. Ол үнемі ізденіс үстінде жүріп, білген-түйгенін әдістемелік оқу-құралдарына жинақтап, түрлі байқауларда жеңіске жетіп жүр. Әйгерім мектепішілік, аудандық, облыстық семинар, конференцияларға белсене қатысып қана қоймай, желілік қауымдастық аясында мұғалімдермен тәжірибе алмасу мақсатындағы жұмыстарға да ерекше атсалысатын білімді маман, – дейді №123 мектеп-лицейінің директоры Айнұр Мыханова.&nbsp;</blockquote>Айнұр Сәнибайқызының сөзінің жаны бар. Кейіпкеріміз бүгінге дейін талай білім бәйгесінде үнемі үздіктер қатарынан көрініп, оқ бойы озық шығып жүрген маман. Мәселен, ол облыстық «Көптілді ұстаз», «Ағылшын тілі пәнінің ең үздік мұғалімі», «Табысты мұғалім академиясы», «Үздік авторлық бағдарлама – 2021» байқауларынан жүлделі орындар иеленген.Республикалық «Қазақстан мұғалімі – 2020» ұлттық байқауында арнайы дипломмен марапатталған ол 2021 жылы дәл осы байқаудан 1 миллион теңге грант жеңіп алып, қаржысына мектептегі ағылшын тілі кабинетін жабдықтаған. Республикалық «Үздік авторлық бағдарлама – 2022» байқауынан ІІІ орын және «Қазақстан педагогтарының Алтын кітабы» байқауында І орын иеленген Әйгерім Жарқынбекқызының өмірбаяны, еңбек жолы, жетістіктері аталған кітапқа енген. Еңбегі еленген педагог 2021-2022 жылдары ҚР Білім және ғылым министрлігі мен облыстық білім басқармасы басшысының «Құрмет» грамотасымен және облыстық «Жыл таңдауы – 2022» жылды қорытындылау шарасында «Креативті ұстаз» номинациясымен марапатталған.Айта кетейік, Әйгерім Түркия, Торонто, Крым, Уфа қалаларының белді университеттері, халықаралық Білім және ғылым Академиясы ұйымдастырған халықаралық конференцияларда үздік баяндама жасап, алғыс хаттармен марапатталып жүр. Ол Л.Н.Гумилев атындағы Еуразия ұлттық университетінің докторанты атана отырып, өзекті тақырыптарда ғылыми бағыттағы мақалалар жазуға бетбұрыс жасаған. Мәселен, Коксон тізіміндегі «Хабаршы», «Наука и жизнь Казахстана» ғылыми журналдарына бірнеше өзекті мақалалары жарыққа шыққан. Шәкірттері республикалық «Тіл – тұнық ойдың кәусары» олимпиадасы мен жалпы білім беретін пәндер бойынша республикалық ғылыми &nbsp;жобалар байқауында жүлделі орындар иеленіп, халықаралық «British Bulldog», «Кенгуру-лингвист» сайысында да жыл сайын алғашқы үштікті түйіндеуде.&nbsp;<blockquote>– Үздік педагог байқауы 2012 жылдан бастап дәстүрге айналған. Былтыр жаз мезгілінде осы байқаудың ережесі туралы хат келді. Бұрынғы басшымыз Ләйлә Шөменова мен қазіргі мектеп-лицей директоры Айнұр Мыханова ұсынысы бойынша қатысуға ниет білдірдім. Соңғы 3 жылдағы өзімнің және оқушыларымның жетістіктерін жинақтап, ашық сабақ өткіздім. Терең білімі мен тынымсыз еңбегінің арқасында бірнеше әріптесім осы байқауда ерекше көзге түсті. Бұл байқаудағы жеңіс менің ғана емес, маған сенім білдіріп қолдаған іргелі білім ордамның жеңісі, жемісі деп білемін, – дейді кейіпкеріміз.</blockquote>Айта кетейік, еліміз бойынша өткізілген «Үздік педагог – 2023» республикалық байқауының қорытындысы бойынша мектепке дейінгі, орта, техникалық және кәсіптік білім беру ұйымдарының 64 педагогы өз мамандығы бойынша үздік атанды. Республикалық байқау жеңімпаздары «Үздік педагог» куәлігін, «Үздік педагог» төсбелгісін және 3 450 000 теңге көлемінде ақшалай сыйақыны иеленді. 2012 жылдан бастап өткізіліп келе жатқан «Үздік педагог» конкурсында бүгінге дейін 624 педагог үздік деп танылып, олардың әрқайсысына мемлекеттік қолдау ретінде 1000 айлық есептік көрсеткіш мөлшерінде сыйақы берілген. Биыл конкурсқа қатысу үшін барлығы 961 ұстаз өтініш қалдырған.&nbsp;

Үздік педагог атағын иеленген жалағаштық ұстаз Әйгерім Ысқақова

&nbsp;<a href="https://kyzylorda-news.kz/">Kyzylorda-news.kz</a>&nbsp; Қазалы ауданындағы Е.Бозғұлов атындағы №249 мектеп-лицейде аудандық білім бөлімінің ұйымдастыруымен «Жарқыра, жаса, жас маман» атты аудандық форум өтті. Жиынға білім беру ұйымдарынан 80 жас маман қатысқан шараның ашылу салтанатында аудандық білім бөлімінің әдіскері Гулнар Жамалбекқызы Дүзелбаева алғысөз сөйлеп, сәттілік тіледі.Форум бағдарламасы бойынша жас мамандар Жалғас Жансаяның ұйымдастыруымен «Бір үйдің баласындай...» тренингінде форумға қатысушы жас педагогтардың шығармашылық қабілеттерін шыңдау мақсатында топтық педагогикалық ойындар жүргізді. Ұстаздар алты &nbsp;бағытта ұйымдастырылған керемет іс- тәжірибелермен танысты. «Қолөнер – мол өнер» бағытында М.Горький атындағы №16 мектеп-лицейінің технология пәні мұғалімі Көпжасар Тілектес қыш құмыра бағытында жұмысымен таныстырды. Сондай-ақ, практика жүзінде саз балшықтан әртүрлі формада құмыралар жасады. Бұдан бөлек, М.Горький атындағы №16 мектеп-лицейдің ұйымдастырушы педагогі Смағұл Жұлдызай «Мандала» әдісін ұсынды. Мандала әдісі – сурет салу арқылы адамның ішкі жағдайын бағалауға арналған диогностикалық материал. Қатысушы жас ұстаздар баяу әуен арқылы өздерінің ішкі құпияларымен бірге көңіл сандығын аша білді. Жиын барысында Ғ.Мұратбаев атындағы №17 орта мектептің жас маманы Жақсылық Әсел "Мұғалімнің цифрлық зертханасы" (электронды портфолио, интернет ресурс жасау) тақырыбында жас мамандарға шебер сынып өткізді. Шебер сынып барысында Www.wix.com платформасында жасалған жұмыстарымен таныстырып, сайттың мүмкіндіктері және оны қалай пайдалану туралы көрсетті. Жас мамандар сол жерде өздеріне жеке электронды портфолио әзірлеп, практика жүзінде платформа жұмысымен танысты. Шебер сынып соңында пікірлер ортаға салынып, Padlet тақтасында кері байланыс жасады. М.Горький атындағы №16 мектеп-лицейдің жас маманы Марат Перизат "Дебат және ТЕD" тақырыбында жас мамандарға шебер сынып өткізді. Онда дүниежүзілік мектеп форматымен таныстырып, жас мамандарға берер мүмкіндіктерін атап көрсетті. Ұстаздар теориялық білімдерін, практика жүзінде толықтырып, шебер сынып соңында жас мамандар пікірлерін «ҰЛТТЫҚ ҚОРЖЫН»-ға салды. Форум барысында С.Сейфуллин атындағы №165 мектептің тарих пәнінің мұғалімі Нағашыбай Берік, №266 мектеп-лицейдің ағылшын тілі пәні мұғалімі Қазанбай Гаухар, №98 орта мектептің ағылшын тілі пәні мұғалімі Қымбат Толыбаева «Цифрлық әлем» тақырыбында сабақ үдерісінде қолдана алатын платформалық әдіс-тәсілдерді жасау жолдарын игерту мақсатында шеберлігімен бөлісті. Е.Бозғұлов атындағы №249 мектеп-лицейдің жас мамандары – Сараман Аслан «Әдістемелік құрал және авторлық бағдарламаны әзірлеу, Сараман Гүлдана «Оқушыларды зерттеушілік жұмыстарға бағыттаудағы педагогикалық қызмет» тақырыбында түсіндірме жұмыстар жүргізілді. Жұмыс барысында жас мамандар, әдістемелік құрал мен авторлық бағдарламаның айырмашылықтары мен олардың жасалу жолдары, ғылыми жобалардың жазылу стандарты мен оған қойылатын талаптар және жазылу барысында кететін қателіктер мен олардың жасалу жолдары туралы ақпарат ала отырып, осы бағытта бірлесе жұмыстар жасады. Сонымен қатар, Ы.Алтынсарин атындағы №204 орта мектептің арнайы маманы Толқынай Елубайқызы, №21 «Алпамыс» бөбекжәй-балабақшасының психологы Мейрамбек Меруерттің ұйымдастыруымен «Әлем сенімен керемет!» тақырыбында қатысушы жас мамандармен арт-коучинг психологиялық сағаты жүргізілді. Мұғалімдер түстер политрасын пайдалана отырып, саусақ арқылы әуен ырғағымен қиялынан туындаған бейнелерді ақ қағаз бетіне түсірді. Форум соңында жиынға қатысушы жас мамандар берері мол, іс-тәжірибелерімен бөліскен ұйымдастырушыларға ризашылықтарын білдірді. Шарада тәжірибесімен бөліскен жас мамандар аудандық білім бөлімінің Алғыс хатымен марапатталып, қатысушыларға сертификаттар табысталды. &nbsp;

Қазақстан және Қызылорда облысының жаңалықтары: Білім