<a href="https://kyzylorda-news.kz/">Kyzylorda-news.kz</a> Қызылорда медициналық жоғары колледжінде «Денсаулық сақтау жүйесіндегі жас мамандар: медициналық колледждердің халықаралық диалогы» атты халықаралық ғылыми-тәжірибелік конференциясы өттi.Конференция барысында студенттер мен оқытушылар озық тәжірибелерімен, инновациялық идеялары және ғылыми зерттеу нәтижелерімен бөлісумен қатар, халықаралық серіктестікті нығайтуға ықпал етті.Сондай-ақ, конференция барысында денсаулық сақтау жүйесіндегі өзекті мәселелер талқыланып, жас мамандардың кәсіби құзыреттілігін арттыру, студенттердің ғылыми-практикалық әлеуетін дамыту және халықаралық ынтымақтастықты кеңейту бағытында мазмұнды пікір алмасу алаңы қалыптасты.Айта кетейік, конференция болашақ медицина мамандарының кәсіби және ғылыми әлеуетін біріктіру арқылы халықаралық ынтымақтастықты нығайту, медициналық білім берудегі инновациялық идеялар мен цифрлық технологияларды ілгерілету, сондай-ақ қоғам игілігі үшін мейірімділік пен жауапкершілік құндылықтарын дәріптеу мақсатында ұйымдастырылуда.Сонымен қатар, конференция барысында болашақ медицина мамандарына бірқатар мәліметтер беріліп, конференция аяғында сұрақ-жауап айдары ұйымдастырылды. Жас мамандар көкейлерінде жүрген сұрақтарына жауап алып, өздеріне қызықты мағлұматтар алды. Медицина саласының өзектілігі жөнінде ұйымдастырылған бұл конференция алдағы уақытта да жалғасын табатын болады.

Қызылордалық студенттер ғылыми-тәжірибелік конференциясына қатысты

<a href="https://kyzylorda-news.kz/">Kyzylorda-news.kz</a> Қазақстанның кең байтақ даласы – ежелден жануарлар дүниесінің алтын бесігі. Бұған Қостанай, Ақмола және Солтүстік Қазақстан өңірлерінен табылған мамонт сүйектері, сондай-ақ тарих қойнауында қалған жабайы жылқы, Каспий жолбарысы мен Тұран гепарды туралы деректер айқын дәлел. Алайда уақыт өте келе антропогендік қысым мен шектен тыс аңшылық талай түрді жер бетінен жойды. Бұл – биоалуантүрлілікті сақтау мәселесін кейінге қалдыруға болмайтынын көрсететін маңызды дабыл.Биоалуандықтың тарихи негізіСтатистикаға сүйенсек, ел аумағында 13 мыңнан астам өсімдік пен 80 мыңнан астам жануар түрі тіршілік етеді. Соның ішінде өсімдіктердің шамамен 14%-ы эндемик, яғни тек осы өңірге ғана тән. Мұндай алуан түрліліктің негізінде ел географиясының бірегейлігі жатыр.Қазақстан аумағы шөлдер мен шөлейттерден бастап кең далаларға, ну ормандарға, сулы-батпақты алқаптар мен биік таулы жоталарға дейін созылған табиғи мозаика іспеттес. Территорияның шамамен 60%-ын шөл және шөлейт аймақтар алып жатса, аридті ландшафттардың өзі ел аумағының 75%-дан астамын қамтып, жалпы биоалуантүрліліктің 40%-дан астамын сақтап отыр.Экологиялық сын-қатерлер және жойылып бара жатқан түрлерАлайда табиғи байлыққа қарамастан, бүгінде Қазақстанда шөлейттену мен климаттың өзгеруі үдерістері айқын сезілуде. Климаттық өзгерістер, ең алдымен, су ресурстарының азаюына әсер етіп отыр. Бұл әсіресе Арал теңізі мен Сырдария бассейндерінде анық байқалады және елдің оңтүстік пен батыс өңірлерінде шөлейттену қарқынын күшейте түсуде.Сонымен қатар қалалар мен ауылдардағы қоршаған ортаның ластануы да жағдайды күрделендіре түседі. Ауыр металдар мен өндірістік қалдықтардан туындайтын өнеркәсіптік ластану экожүйеге айтарлықтай зиян келтіріп, табиғи тепе-теңдікті бұзуда. Соның салдарынан сирек әрі эндемик жануарлар түрлерінің, соның ішінде қар барысы, қарақұйрық және киік сияқты аңдардың саны азайып барады. Браконьерлік пен тіршілік ету ортасының тарылуы бұл түрлерді жойылып кету шегіне жақындатуда.Бағалаулар бойынша, 670-тен астам жануар мен өсімдік түрі жойылып кету қаупінде немесе ерекше қорғауды қажет етеді. Ұлттық Қызыл кітапқа 220-225 жануар түрі енгізілген, ал соңғы жаңартуларға сәйкес бұл тізім 217 түрге дейін нақтыланған.Олардың қатарында қар барысы, Пржевальский жылқысы, Тұран жолбарысы, дала антилопалары мен жыртқыш құстар бар. Әсіресе ірі тұяқты жануарлардың – қарақұйрық, құлан секілді түрлердің популяциясы соңғы онжылдықтарда қабылданған шараларға қарамастан төмендеу үрдісін көрсетуде. Ал Арал теңізінің тартылуы теңіз алабұғасын қоса алғанда 24 балық түрінің толық жойылуына әкелді.Дегенмен, жағдай толықтай үмітсіз емес. Жүргізіліп жатқан қорғау шараларының нәтижесінде кейбір түрлердің саны қайта қалпына келіп, табиғи тепе-теңдікті сақтауға мүмкіндік беріп отыр.Экотуризм – табиғатты қорғаудың тиімді тетігіОсындай күрделі экологиялық жағдай аясында табиғи экожүйелерді сақтаудың нақты тетіктері айқындала бастады. Қазақстан – Орталық Азиядағы табиғи әртүрлілігі жоғары мемлекеттердің бірі. Елдегі осы байлықтың айқын көріністерінің бірі – Көкшетау өңірі.Мәселен, Бурабай мемлекеттік табиғи паркінің аумағында 754 өсімдік түрі және 469 жануар түрі тіркелген. Олардың ішінде 220 құс түрі, 48 сүтқоректі бар, соның 16-сы Қызыл кітапқа енгізілген.Мұнда соңғы жылдары табиғатты қорғау мен экономиканы ұштастыратын жаңа бағыттар дамып келеді. Марал шаруашылығы тек ауыл шаруашылығы саласы ретінде емес, экотуризмнің бір бөлігіне айнала бастады. Ақмола облысындағы агро-туристік кешендердің бірінде шамамен 300 марал өсіріледі. Мұнда келушілерге марал өнімдері ұсынылып, емдік панта ванналары арқылы қызмет көрсетіледі.Алайда бұл салада да өзекті мәселелер жоқ емес. Маралдың сирек түрлерінің бірі – жолақты марал Қазақстанның Қызыл кітабына енгізілген. Браконьерлік қысым мен мүйізіне деген жоғары сұраныс оның табиғи популяциясына кері әсер еткен. Қазіргі таңда елімізде шамамен 10 мыңға жуық марал бар.Осыған байланысты марал шаруашылықтары да біртіндеп өнім сатудан гөрі экотуризмге негізделген табыс моделіне көшіп келеді. Бұл бір жағынан табиғатты сақтауға мүмкіндік берсе, екінші жағынан өңірлік экономиканы дамытуға ықпал етеді.<blockquote>– Қорғалатын табиғи аумақтарға келушілер саны соңғы жылдары артып отыр. Мысалы, жазда «Алтын дала» резерватына бардым. Ондағы табиғи орта ерекше әсер қалдырады. Миграциялық кезеңдерде киіктердің қозғалысын бақылауға мүмкіндік бар. Бұл аймақты дала сафариі бағытында дамытуға болады, – дейді эколог Зүлфия Сүлейменова.</blockquote>Мемлекеттік саясат және биоалуантүрлілікті сақтау стратегиясыОсы үрдістермен қатар елімізде ерекше экожүйелерді сақтауға бағытталған жүйелі жұмыстар да қарқын алып келеді. Соның айқын мысалы – Қорғалжын мемлекеттік табиғи қорығы. Оның аумағы 543 171 гектарды құрайды. Мұнда 346 құс түрі, 443 өсімдік түрі, 46 сүтқоректі тіркелген. Қорық «Құс базары» ретінде танымал, ал оның символдарының бірі – қоқиқаздар.<blockquote>– Қоқиқаздар жұптарын ұзақ уақытқа таңдайды, көбіне 1-2 жұмыртқа басады. Ұя басу процесіне аталығы мен аналығы кезектесіп қатысады. Балапандар дүниеге келген соң бірнеше күн ішінде арнайы топқа біріктіріледі. Оларды ондаған ересек құстар қорғайды, – дейді Қорғалжын қорығы визит орталығының маманы Ақбота Наурызбаева.</blockquote>Жалпы, Қазақстан аумағында 500-ден астам құс түрі кездеседі, олардың 56-сы Қызыл кітапқа енгізілген. Алайда мамандар шамамен 60 түрдің жойылу қаупінде екенін атап өтеді. Ал ақбөкендер саны соңғы жылдары айтарлықтай өсіп, шамамен 4 миллионға жетті. Дегенмен бұл өсім де экожүйелік тепе-теңдікке қатысты жаңа ғылыми сұрақтарды алға тартып отыр.<blockquote>– Популяцияны табиғи деңгейде ұстап тұру үшін экожүйелік тепе-теңдікті сақтау қажет. Бұл бағытта жыртқыш түрлердің рөлін қайта қарастыру маңызды, – дейді эколог Зүлфия Сүлейменова.</blockquote>Қазақстанда омыртқалы жануарлардың 835 түрі тіркелген, олардың 227-сі сирек саналады.<blockquote>– Арқардың бірнеше түрі тек еліміздің аумағында таралған. Олардың популяциясы шектеулі. Негізгі қауіп – бақылаудың жеткіліксіздігі мен мекен ету ортасының қысқаруы, – дейді биология ғылымдарының кандидаты Жасхайыр Қарағойшин.</blockquote>Осыған байланысты биоалуантүрлілікті сақтау мәселесі мемлекеттік деңгейде ерекше назарға алынып отыр. Президент Қасым-Жомарт Тоқаев бұл бағытта арнайы қор құру бастамасын көтерген. Сондай-ақ Каспий аймағын зерттеу және итбалықтарды қорғау бойынша ғылыми институттар құрылып, резерваттар жасақталған.Сонымен қатар реинтродукция жобалары да жүзеге асуда. Торғай даласына керқұландардың қайта әкелінуі және Іле-Балқаш өңіріне Амур жолбарысын енгізу жұмыстары – соның нақты дәлелі.Осы бастамалардың барлығы жүйелі саясатпен бекітіліп отыр. Үкімет биологиялық әртүрлілікті сақтау және оны орнықты пайдалану жөніндегі Тұжырымдаманы қабылдады. Ол – табиғатты қорғау, экожүйелерді қалпына келтіру және биоалуантүрлілікті ұтымды пайдалану саласындағы мемлекеттік саясаттың негізгі стратегиялық негізі.Тұжырымдама Қазақстанның 1994 жылы ратификациялаған Биологиялық әртүрлілік туралы конвенция аясындағы міндеттемелерін орындауға бағытталған. Сонымен қатар ол 2050 жылға қарай табиғатпен үйлесімді тепе-теңдікке қол жеткізуді көздейтін Куньмин-Монреаль жаһандық биоалуантүрлілік бағдарламасының мақсаттарын іске асыруға негіз болады.Қазақстан биоалуантүрлілікті сақтау қауымдастығының мәлімдеуінше, мәселе &nbsp;ортақ жауапкершілікті талап етеді.<blockquote>– Құжатты қабылдау мемлекеттік органдардың, ғылыми қауымдастық пен қоғамдық ұйымдардың бірлескен еңбегінің нәтижесі болды. Дайындау барысында халықаралық тәсілдер мен ұсыныстар ескеріліп, ұлттық басымдықтар айқындалды, – деді қауымдастық директоры Вера Воронова.</blockquote>Тұжырымдама 8 негізгі бағыт пен 13 мақсатты индикаторды қамтиды.Бірінші бағыт – экологиялық желіні дамыту және ерекше қорғалатын табиғи аумақтар жүйесін кеңейту. Бұл – табиғатты сақтаудың ең тиімді әрі әлемдік тәжірибеде кең қолданылатын тәсілдердің бірі. 2035 жылға қарай қорғалатын аумақтардың көлемін 31 млн гектардан 33,2 млн гектарға дейін ұлғайту көзделіп отыр.Екінші бағыт – орман ресурстарын қорғау мен қалпына келтіруді күшейту, орнықты орман шаруашылығын дамыту. Орманмен қамтылған аумақты қазіргі 13,9 млн гектардан 14,7 млн гектарға жеткізу жоспарланған.Сондай-ақ ағаш ресурстарын тиімді пайдалану көзделіп, 2035 жылға қарай ағаш өңдеу өнімдерінің өндірісін бес есеге арттыру жоспарланып отыр.Үшінші бағыт – жануарлар дүниесін мониторингтеу, қорғау және тұрақты пайдалану жүйесін жетілдіру. Қызыл кітапқа енгізілген түрлерді сақтау және аңшылық мақсаттағы жабайы жануарларды тұрақты басқару шаралары қарастырылған.Төртінші бағыт – ихтиофауна мен табиғи балық ресурстарын қорғау.&nbsp;Салада тәуекелдерді терең зерттеу мен мониторингті күшейту қажет. Бесінші және алтыншы бағыттар өсімдіктер әлемін сақтау және жайылымдардың тозу мәселесін шешуге арналған. Бұл ретте ғылыми негізделген тәсілдер, мониторинг және инвентаризация жұмыстары басты орын алады.Қалған екі бағыт биоалуантүрлілік туралы деректерді жинау, жүйелеу және индикаторлар жүйесін қалыптастыру арқылы ұзақ мерзімді стратегия құруға бағытталған.Биология ғылымдарының кандидаты Александр Бербердің пікірінше, мұндай құжат мемлекеттік органдарды, халықаралық және үкіметтік емес ұйымдарды, сондай-ақ жеке секторды бір мақсатқа жұмылдырып, тек сирек түрлерді ғана емес, жалпы экожүйені қорғауға мүмкіндік береді.Жалпы алғанда, Қазақстандағы биоалуантүрлілікті қорғау саясаты көпқырлы әрі кешенді сипатқа ие. Қорықтар мен ғылыми зерттеулерден бастап мемлекеттік тұжырымдамалар мен халықаралық ынтымақтастыққа дейінгі шаралар табиғатты сақтаудың тұтас жүйесін қалыптастырып отыр. Бұл – тек бүгінгі экологиялық мәселелерге жауап қана емес, болашақ ұрпақ үшін табиғи байлықты сақтап қалуға бағытталған стратегиялық ұстаным.Мөлдір СабыржанДереккөз Freepik

Қазақстан биоалуандылықты қалай сақтап отыр?

<a href="https://kyzylorda-news.kz/">Kyzylorda-news.kz</a>&nbsp;«Сыр жұлдыздары» шығармашылық академиясында «Денсаулық сақтау жүйесіндегі жас мамандар: медициналық колледждердің халықаралық диалогы» атты халықаралық ғылыми-тәжірибелік конференцияның жалғасы ретінде студенттер арасында секциялық семинар-тренинг ұйымдастырылды.Семинар-тренингте студенттер «Көшбасшылық», «Еріктілер», «Болашақта сапалы медициналық көмектің негізі ретінде студенттік ғылым мен практикалық даярлық» бағыты мен «Қазақстанның цифрлық медицинасы»: Ақпараттық жүйелер мен АИ-шешімдердің интеграциясы» бағыты бойынша тәжірибе алмасты.Айта кетейік, конференция болашақ медицина мамандарының кәсіби және ғылыми әлеуетін біріктіру арқылы халықаралық ынтымақтастықты нығайту, медициналық білім берудегі инновациялық идеялар мен цифрлық технологияларды ілгерілету, сондай-ақ қоғам игілігі үшін мейірімділік пен жауапкершілік құндылықтарын дәріптеу мақсатында ұйымдастырылуда.Студенттерде семинар-тренинг барысында белсенділік танытып, өздерінің қабілеттерін шыңдап, дамытуды үйренді. Цифрлық Қазақстан дәуірінде ақпараттық жүйелердің маңыздылығын, қоғам үшін пайдасы бар екендігінен хабардар болып, жасанды интеллект бағыты бойынша тәжірибелерін бөлісті. Алдағы уақытта да болашақ маман иелері арасында мұндай семинар-тренингтер ұйымдастырылып, жаңаша бағыттағы тәжірибелер қарастырылатын болады. &nbsp;<img src="https://knadmin.beoblood.kz/uploads/Whats_App_Image_2026_04_24_at_06_12_06_ac6d7b36a6.jpeg" alt="Семинар-тренинг.jpeg">

Студенттер арасында секциялық семинар-тренинг ұйымдастырылды

<a href="https://kyzylorda-news.kz/">Kyzylorda-news.kz</a>&nbsp;«TURǴYNDAR AMANATY» партиялық жобасы аясында Қазақстан Республикасы Парламенті Мәжілісінің депутаты Екатерина Смышляеваның қатысуымен ZOOM платформасы арқылы арнайы жиын өтті.Жиынға «AMANAT» партиясы Қызылорда облыстық филиалының төрағасы Жандос Базартай, партияның облыстық филиалының атқарушы хатшы Ләйлә Төрешова, сондай-ақ жауапты сала басшылары қатысты. Кездесу барысында көппәтерлі тұрғын үйлерді басқару жүйесінде ашықтықты, есептілікті және тиімділікті арттыру, тұрғындардың сенімін нығайту, сондай-ақ қызмет көрсетуші кооперативтер мен мүлік иелерінің бірлестіктері жұмысының сапасын жақсарту секілді тұрғын үй қатынастары саласындағы өзекті түйткілдер көтеріліп, оларды шешу жолдары талқыланды.Орталықпен өткен жиыннан кейін партия филиалының төрағасы өңірдегі мүлік иелері бірлестіктері мен пәтер иелері кооперативтерінің өкілдерімен кездесіп, «TURǴYNDAR AMANATY» жобасы аясында жүзеге асырылатын негізгі міндеттерге тоқталып өтті. Оның айтуынша, ең алдымен ОСИ мен КСК төрағаларына арналған «OSI-SKILLS» форматындағы оқыту семинарлары ұйымдастырылады. Бұл қаржылық сауаттылықты арттыруға, тиімді коммуникация қалыптастыруға және заң талаптарын сақтау бойынша жүйелі білім беруге мүмкіндік береді.Бұдан бөлек, «Таза Қазақстан» акциясы аясында аулаларды абаттандыру жұмыстары ұйымдастырылып, бейсенбілік және сенбіліктер тұрақты түрде өткізілетін болады. «Халық қатысатын бюджет» бағдарламасын іске асыру жанданып, тұрғындарға оның шарттары түсіндіріліп, жобаларды әзірлеуге әдістемелік қолдау көрсетіледі. Сондай-ақ «Үздік тазалаушы», «Үздік аула», «Үздік ОСИ, КСК төрағасы» секілді байқаулар өткізу жоспарланып отыр.Сондай-ақ партияның облыстық филиалының төрағасы тұрғындар тарапынан түсетін барлық ұсыныс-пікірлер мен сұрақтар назардан тыс қалмайтынын атап өтті.&nbsp;<blockquote>«Бұл бағытта мәслихат депутаттарының әлеуеті кеңінен қолданылады. Яғни, маслихаттардағы партияның депутаттық фракциясының мүшелері көшпелі кездесулер өткізіп, тұрғындар алдында есеп береді. ОСИ мен КСК төрағаларының ұсыныстары жергілікті атқарушы органдарға жеткізіліп, тұрақты қабылдаулар ұйымдастырылады»,- деді ол.&nbsp;</blockquote>Атап өтейік, жоба пилоттық болғандықтан, алдағы уақытта толықтырылып, заман талабына сай жаңартылып отырады.

«Turǵyndar amanaty» партиялық жобасының мақсат міндеті таныстырлды

<a href="https://kyzylorda-news.kz/">Kyzylorda-news.kz</a>&nbsp;Жаңақорған ауданы әкімдігінің мәжіліс залында аудан әкімінің орынбасары Бақтияр Мадиярұлы Ахметовтың төрағалығымен мәжіліс өтті.Мәжіліске аудан прокуроры Бахытхан Бөлеулиев, тиісті сала басшылары, кент, ауылдық округ әкімдері және шаруа қожалықтарының жетекшілері қатысып, күн тәртібіндегі өзекті мәселелер кеңінен талқыланды.Мәжіліс барысында 2026 жылғы вегетациялық кезеңге дайындық барысы, сондай-ақ егіс алқаптарына су жеткізу қызметінің тарифіне қатысты түсіндірме жұмыстары қаралды.Жиында аудан әкімінің орынбасары соңғы жылдары өңірде вегетациялық кезеңнің күрделі жағдайда өтіп жатқанын, соған қарамастан Мемлекет басшысы мен Үкіметтің, облыс әкімі Нұрлыбек Машбекұлының қолдауының арқасында салада жүйелі жұмыстар жүргізіліп жатқанын айтты.Мәжіліс барысында облыстық ауыл шаруашылығы және жер қатынастары басқармасы басшысының орынбасары Рысбек Шайхиев өңірдегі егіс науқанының ұйымдастырылуы мен мемлекеттік қолдау шаралары туралы баяндады.Сондай-ақ, су ресурстарын пайдалануды реттеу және қорғау жөніндегі «Арал – Сырдария» бассейндік инспекциясының басшысы Зейнолла Қазтоғанов су ресурстарын тиімді бөлу, лимиттерді сақтау және заң талаптарын қатаң ұстану қажеттігін атап өтті.Ал «Қазсушар» РМК Қызылорда филиалы директорының міндетін атқарушы Нәжмадин Шамұратов су жеткізу қызметінің тарифтері, су беру кестесі және шаруалармен өзара іс-қимыл мәселелері бойынша түсіндірме жұмыстарын жүргізді.Мәжіліс соңында аудан әкімінің орынбасары жауапты сала басшылары мен ауыл әкімдеріне нақты тапсырмалар беріп, вегетациялық кезеңді сапалы өткізу, су ресурстарын тиімді әрі үнемді пайдалану, сондай-ақ диқандармен тығыз байланыста жұмыс жүргізу қажеттігін қатаң тапсырды.Сонымен қатар, барлық шаруашылық құрылымдарын жаңа технологияларды енгізуге, суды үнемдеу тәсілдерін кеңінен қолдануға шақырып, атқарылатын жұмыстардың нәтижесі ел ырысы мен аудан экономикасының дамуына тікелей әсер ететінін ерекше атап өтті.<img src="https://knadmin.beoblood.kz/uploads/Zha_a_or_an_egin_nau_any_zhiyn_2_8c5cd89071.jpg" alt="Жаңақорған егін науқаны жиын 2.jpg">

Егін науқанына дайындық мәселелері талқыланды

<a href="https://kyzylorda-news.kz/">Kyzylorda-news.kz</a>&nbsp;Қазалы ауданының әкімі Алмасбек Есмаханов Қазалы қаласындағы «Шағала» балаларды сауықтыру демалыс орталығына арнайы барып, лагердің қазіргі жай-күйімен және жазғы тынығу маусымына дайындық жұмыстарымен танысты.Аудан басшысы орталық аумағында орналасқан бассейн, жатын орындар, балаларға арналған сахна және асхананы аралап көрді.&nbsp;Биылғы жылы лагерь жұмысына, ондағы жүргізілетін ағымдағы жөндеу жұмыстарына қаржы бөлініп, тиісті жұмыстар атқарылуда. Тынығушылардың қауіпсіздігін қамтамасыз ету мақсатында орталық аумағына стандартқа сай 32 бейнебақылау камерасы мен 1 турникет орнатылып, қосымша 2 сыртқы әжетхана салу жұмыстары жүргізілуде. Сондай-ақ, лагерь аумағында көркейту-көгалдандыру және санитарлық тазалық жұмыстары жүйелі түрде ұйымдастырылуда.Аудан әкімі аталған жұмыстармен танысып, аудандық білім бөлімінің басшысы мен орталық директорына жазғы маусым басталғанға дейін ағымдағы жөндеу және барлық дайындық жұмыстарын толық сапалы етіп аяқтауды тапсырды.Айта кетейік, биыл демалыс лагері дәстүрлі түрде 7 ауысыммен жұмыс істейді. Әр ауысымда 125 оқушыдан қабылданып, жалпы саны 875-ке жуық бала жазғы тынығумен қамтылады деп жоспарлануда. Балаларды қабылдау 1 маусымда басталады.

 «Шағала» балаларды сауықтыру демалыс орталығының жұмысымен танысты

<a href="https://kyzylorda-news.kz/">Kyzylorda-news.kz</a> «Құзыреттілік орталығында» облыс әкімі Нұрлыбек Нәлібаев, ҚР Орталық сайлау комиссиясының төрағасы Нұрлан Әбдіровтің қатысуымен «Жастар және сайлау» атты республикалық форум өтті. Оған Астана, Алматы, Шымкент қалалары мен барлық өңірдің аумақтық сайлау комиссияларының төрағалары, Жас сайлаушылар клубының белсенді мүшелері келді.Аймақ басшысы мемлекетіміздің келешек тағдырын айқындаған референдумда сайлау комиссиялары маңызды рөл атқарғанын ерекше атап өтті.<blockquote>«Мемлекет басшымыз Қасым-Жомарт Кемелұлы &nbsp;«Біз Халық Конституциясын келешек ұрпақ алдындағы жауапкершілігімізді терең сезіне отырып қабылдадық. Ата заң – қуатты, күшті, бәсекеге қабілетті Қазақстанның жаңа Жарғысы. Жаңа Конституция – көне заманнан бері бабаларымызға бағдар болған дала заңдарының бүгінгі жалғасы, ұрпақтар арасындағы сабақтастық көрінісі» деген болатын. Жаңа Ата Заңымыз тәуелсіздігімізді, аумақтық тұтастығымызды сақтайды. Азаматтарымыздың құқықтары мен бостандықтарын қорғайды. Елімізді тың жетістіктер мен табыстарға бастайды. Біртұтас Қазақстан халқының барлық мақсат-мүддесі ескерілген халықтық Конституция еліміздің тыныштығы мен тұрақтылығын қамтамасыз етеді. Президентіміз Ғылым қызметкерлеріне арналған салтанатты шарада жаңа Конституция күшіне енген соң бір палаталы Құрылтай сайлауы биыл тамыз айында өтетінін айтты. Бұл сайлауда да Сыр жұртшылығы ауызбірліктің үлгісін көрсетіп, жоғары нәтижелерге қол жеткізеді деп сенеміз», – деді Нұрлыбек Машбекұлы.</blockquote>Өңірде сайлау органдары мен сайлау жүйесіне ерекше мән беріліп келеді. Аймақтар арасында алғашқы болып аумақтық сайлау комиссиясы жаңа үлгіде жабдықталған дербес ғимаратқа көшті. Қызылорда қаласы мен барлық аудандағы сайлау комиссияларына да ғимараттар беріліп, материалдық-техникалық базасы жаңартылды. Дауыс беру учаскелерінде сайлаушыларға, әсіресе мүгедектігі бар азаматтарға қолайлы жағдай жасалған.Президент, Мәжіліс депутаттарының сайлаулары мен жалпыхалықтық референдумдарға қатысу көрсеткіші бойынша Қызылорда облысы республикада алдыңғы қатардан көрінді.Жиында Нұрлан Мәжитұлы сөз сөйлеп, республикалық референдумды жоғары деңгейде өткізуге атсалысқан азаматтар Қазақстан Республикасы Президентінің Алғысымен, Орталық сайлау комиссиясының ведомстволық медалімен, Құрмет грамотасымен және Алғыс хатымен марапатталды.<img src="https://knadmin.beoblood.kz/uploads/Respublikaly_forum_6_bbe56971f4.jpg" alt="Республикалық форум 6.jpg">