<a href="https://kyzylorda-news.kz/">Kyzylorda-news.kz.</a> Аудан өнерпаздары Астанада «Жырдың елі» атанған Сыр елінің атын асқақтатты. Жақында еліміздің бас қаласында өткен І халықаралық «Жас талант» өнер байқауынан үш бірдей бас жүлдені жеңіп алған жерлестеріміз аудан ғана емес, облыс мерейін үстем етті.Барлығы екі жүзден аса талант қатысқан халықаралық байқау бас қаладағы Бейбітшілік және келісім сарайында өтті. Жас таланттардың бағын сынап, өнерін өрге жүздірген байқауды «Қазақ академия» өнер орталығы өткізген. Өнер бәйгесі өнердің барлық жанры бойынша ұйымдастырылған. Яғни қатысушылар аспапта ойнау, көркемсөз, хореография, вокал, театр салалары бойынша бақ сынаған. Біздің өнерпаздар дүбірлі додаға вокал номинациясы бойынша қатысып, Астана төрін әсем әуенмен әуелеткен.Осы сайыста Сырдария аудандық мәдениет үйі жанындағы мәдени-демалыс кешенінің көркемдік жетекшісі, «Дала дидары» халықтық үгіт бригадасының, аудандық халық театрының, «Оңаша» әзіл-сықақ отауының, «Ритм» вокалды-аспапты ансамблінің солисті, жас әнші Динара Жакешова 18-25 жас аралығындағы өнерпаздар қатарынан үздік шығып, бас жүлдені қанжығаға байлады. Жас әнші әрі кішкентай өнерпаздардың жетекшісі Динара жергілікті композитор Рамазан Таймановтың «Қазақ қызы» әнін орындап, тыңдарманның жүрегіне жол тапты. Бұған дейін талай сайыста топ жарып, Сыр елін әсем әнмен көмкеріп жүрген күміс көмей, жезтаңдай өнерпазымыз бүгінде шәкірт тәрбиелеу ісін қолға алған. «Ұстаздан шәкірт озар» демекші, осы сайысқа Динараның қос шәкірті де қатысып, екеуі бірдей бас жүлдені иеленген.Айзере Тасболат пен Ақерке Азатқызы – ән өнеріне кішкентайынан бейімделген өнерпаздар. Ұстаздары Динара Жакешовамен талантын шыңдап, бұған дейін де талай сайыстарда озық шыққан қос бүлдіршіннің бағы тағы жанды. Байқауда Айзере «Туған жер» әнін орындаса, Ақерке «Крылатые качели» әнін нақышына келтіре әуелетті. Олар халықаралық байқауға 10-13 жас аралығындағы өнерпаздар арасынан қатысып қос бірдей бас жүлдеге қол жеткізген. Кішкентай әншілердің даусына, орындау шеберлігіне тәнті болған қазылар алқасы Сыр елінен келген қос өнерпазды бөліп-жармай, екеуін де бас марапатқа лайық деп тапқан.Биыл бірінші рет өткізілген халықаралық «Жас талант» байқауына Құрмет орденінің иегері, Қазақстанның жарық жұлдызы, әнші Өмірқұл Айниязов, Құрманғазы атындағы ҚҰК ұстазы Қаламқас Қадырбаева, сондай-ақ өнер майталмандары әділ төрелік етті.Сайыс нәтижесі бойынша үш бірдей бас жүлдені қоржынға салған таланттарға арнайы диплом, кубок пен мойындарына жарқыраған естелік-медаль тағылды. Сонымен қатар кішкентай өнерпаздарды бастап барған Динара Жакешоваға «Үздік ұстаз» номинациясы беріліп, арнайы «Алғыс хатпен» марапатталды.Ән өнерінде өзіндік ізін қалыптастырып, үлкен сахналарда Сыр елінің намысын қорғап, атын асқақтатып жүрген өнер иелерін кезекті жеңістерімен құттықтай отырып, бағындырар белестерінің әлі де алда екенін нық сеніммен айта аламыз. &nbsp;

Сырдариялық өнерпаздар елорда төрінде топ жарды

<a href="https://kyzylorda-news.kz/">Kyzylorda-news.kz.</a> Ауыл – берекенің құтты ордасы. Бұрындары қаланың мүмкіндігі көпті қызықтырғаны жасырын емес. Ал қазір ауылдан береке тапқысы келетіндер қатары артқан. Ел Президенті Қасым-Жомарт Кемелұлы биылғы жылы халыққа арнаған Жолдауында ауылдың әлеуетін толық пайдалануды, кәсіпкерлік пен ауыл шаруашылық саласын дамытуды ерекше атап көрсеткен болатын. Бұл ретте Арал ауданына қарасты Жетес би ауылының тұрғыны Ербол Жолмырзаев мал басын көбейтіп, өз кәсібін дамытып отырған жандардың бірі. &nbsp;Балықшы отбасында өмірге келсе де, Ербол ырыс-несібенің бәрі малда екендігін ерте ұқты. Содан да болар, жастайынан мал бағуға құмартып өсті. Өзге бауырларына ұқсап білім алып, мамандық алуды ойлап жатпаған Ербол орта білімді аяқтаған соң, бірден мал бағу ісіне дендеп кірісті.<blockquote>&nbsp;Әкем балықшы еді. Бізді көлден маржан сүзіп, нәпақа тауып, адам етіп өсірді. Бірақ мен балық аулауға аса қызыққаным жоқ. Бала күнімнен үйдегі азын-аулақ малдың бабын жасау маған жүктелді. Өзімнің де көксегенім сол еді. Содан мал шаруашылығына жақын болып өстім. Әкеден туған 8 ағайындымыз. Менен өзгесінің бәрі жоғары оқу орнында оқып, мамандық алды. Қазір мемлекеттік мекемелерде абыройлы жұмыс істеп жатыр. Мен 2013 жылдан бастап кәсіпкер болып тіркелдім. Ірі қара сиыр малын өсіруді қолға алдым. Өзімнің 15 бас сиырым болған. Соған асыл тұқымды қазақтың ақ бас бұқасын сатып алып, мал басын ірілеттім, – деген Ербол шаруашылықты қалай бастағаны туралы айтып берді.</blockquote>Бұдан бөлек малдың азығын да өзі дайындайды. Шөп шабуды қосалқы кәсібіне айналдырған ол өзін ғана емес, өзгелерді де мал азығымен қамтамасыз етіп отыр.<blockquote>&nbsp;Қазір кәсіп ашам дегенге үкіметтің қолдауы көп. Мен де сол қолдаулардың арқасында өз шаруашылығымды дамытып отырмын. Бұдан бөлек шөп шабу ісіне де дендеп кірістім. Биылдың өзінде 7 мың бау шөп шаптым. Өзімнен артылғанды сұраушыларға қолайлы бағада сатып отырмын, – дейді.</blockquote>Әрине қазір Ербол ағаның жұмысы ауқымды. Жұмысшы да қажет. Тұрақты жұмысшы болмаса да, ауылдағы жастарды маусымдық жұмысқа алып отыр. Одан бөлек, ұлым да қолғанатым болуға жарап қалды дейді.<blockquote>Қазақ халқы "мал баққандікі" деп бекер айтпаса керек. Біреулер үшін бұл оңай болып көрінуі мүмкін. Бірақ шындығында әр істің өзіне жетерлік қиындығы бар. Малдың бабын тауып, шын ниетіңмен қарасаң ғана беркесін береді. Ал олай болмаса, бар ісің кері кетеді. Бұл – менің ғана емес, отбасымның ризық-несібесі. Өзім мамандық алмаған соң, балаларымның нәпақасын осылай тауып отырмын, – дейді ол.</blockquote>Ербол ағаның алға қойған мақсаттары да көп. Ол осы шаруашылығын одан әрі дамытып, асыл тұқымды сиыр басын молайтуды жоспарлап отыр. Тірліктің көзін тапқан жанның қазіргі тіршілігі көпке үлгі боларлық. Жұбайы Әсем екеуі алты баланы өмірге әкелген үлгілі отбасы.

Мал шаруашылығын дамытуға үлес қосқан кәсіпкер

<a href="https://kyzylorda-news.kz/">Kyzylorda-news.kz.</a> Бүгінде кім-кімнің де қолынан келетін кәсіппен айналысуына мол мүмкіндік бар. Үкімет тарапынан түрлі бағдарлама бойынша қолдау мен көмек те мол. Арнайы курстарды оқу арқылы бизнестің қыр-сырын білуге болады. Осындай мүмкіндікті пайдалана білген жандардың бірі – Зинат Яумадин.Зинаттың мамандығы – фельдшер. Он саусағынан өнері тамған анасының қасында кішкене кезінен тігін тігіп, құрақ құрап үйренген қыз өсе келе, өзінше іздене жүріп, қолөнер бұйымдарының түр-түрін тігуге құмартты. Қазалының қызы Қосжар елді мекеніне келін болып түскеннен кейін ауыл тұрғындарының қажетін өтеу мақсатында тігін машинасын сатып алып, қолөнерін дамытуды ойлады. Оңтайлы жолын сұрастыра келе, ауыл әкімдігінен «Нәтижелі жұмыспен қамтуды және жаппай кәсіпкерлікті дамытудың «Еңбек» мемлекеттік бағдарламасы арқылы қайтарымсыз несиеге қол жеткізуге болатынын білді. Сөйтіп, «Атамекен» кәсіпкерлік палатасында «Бастау-Бизнес» курсында кәсіпкерлік бойынша білім алып, нәтижесінде бизнес жоспарын қорғап, қайтарымсыз несиеге қол жеткізді.<blockquote>Мұндай мүмкіндік маған үлкен күш берді. Алдымен тігін машинасын сатып алдым. Одан кейін ине-жіптен бастап барлық керек-жарақтар мен маталардың түр-түрін таңдап алуға қол жеткіздім. Қазір ақпараттық техниканың заманы ғой. Әлеуметтік желі арқылы қолөнер бұйымдарын, атап айтқанда, көрпе-жастықтан бастап, сәнді әшекейлер, тойға қажетті жабдықтар мен қоржын-қалталар, сондай-ақ қазақы ою-өрнектермен көмкерілген сөмкелер тігіп, арнайы парақшамда көрсеткенде, тапсырыс берушілер қатары көбейді. Тіккен киімдерім мен қолымнын шыққан қолөнер бұйымдарының сұранысқа ие болуының басты себебі, барлығында ұлттық ою-өрнек элементтерінің қолданылуы.Бүгінде еліміздің барлық қалаларынан тапсырыс алып, қалаған бұйымдарын тігудемін. Керек материалдардың барлығын Ташкент қаласынан арнайы алдырамын. Ұлтымыздың қолөнері ауыз толтырып айтарлықтай бай. Оның қаншама түрі сақталған. Оюмен хат жазған халықпыз ғой. Сондықтан кәсібімді ары қарай дамытсам деген жоспарым бар, – дейді Зинат Дүкенбайқызы.</blockquote>Ісмер келіншек ауыл мектебінде қолөнер үйірмесін ашып, шәкірттерді бірнеше ай бойы тігін өнеріне баулығанын айтады. Алған тапсырыстарына байланысты қасына бір-екі тігінші алғысы келгенімен, талаптанған жанды таба алмаған.Иә, «Өнерлінің қолы көпке ортақ» дегендей, шағын ғана Қосжар ауылының өнерлі келіні Зинаттың қолынан шыққан бұйымдар еліміздің аймақтарына тарауда. Алдағы уақытта арнайы тігін шеберханасын ашып, Аралға келген қонақтарға ұлттық нақышта безендірілген қолөнер бұйымдарын ұсынсақ, қандай қеремет болар еді.

Мемлекет қолдауымен зергерлік бұйымдар кәсібін бастаған

&nbsp;<a href="https://kyzylorda-news.kz/">Kyzylorda-news.kz.</a> Қызылорда облысының әкімі Нұрлыбек Нәлібаев Арал ауданына жұмыс сапары кезінде теміржол көпірінің іргетасын қалау рәсіміне қатысты.Аймақ басшысы аралдық ағайынның ұзақ жылдан бері қордаланған басты мәселесінің бірінің оң шешілгені үлкен жетістік әрі зор қуаныш екенін атап өтіп, аудан тұрғындарын құттықтады.<blockquote>«Мемлекет басшысы Қасым-Жомарт Кемелұлы: «Аса маңызды мәселелердің бірі – ауылды кешенді түрде дамыту. Ауылдарға нақты қолдау көрсетіп, заманауи инфрақұрылымды дамытуымыз керек» – деген болатын. Президентіміз бен Үкіметтің Сыр өңірін ерекше қолдауының арқасында аймағымызда ауқымды жобалар жүзеге асуда. Ерекше атап өтуіміз қажет, 2023 жылға облыс бюджеті 520,7 млрд. теңге болып бекітілген еді. Сәуір айындағы нақтылаудан кейін оның көлемі 593 млрд. теңгеге ұлғайды. Бұл 2022 жылғы бюджет көлемімен салыстырғанда 230 млрд. теңгеге немесе 1,7 есеге артық. Оның ішінде Арал ауданының бюджеті 18,4 млрд. теңгеге жетті. Бұл ауқымды қаражат ең өзекті деген мәселелерді шешуге, облыс тұрғындарының өмір сүру сапасын арттыруға жұмсалады», – деді Нұрлыбек Машбекұлы.</blockquote>Арал ауданының құрметті азаматы Кішкене Айбосынов та жерлестерін көпір құрылысының басталуымен құттықтады.Айта кетейік, қазір бұл тұстағы теміржолдан пойыз өткенде өткел жабылып, көлік кептелісі бірнеше шақырымға созылады. Арал қаласын бөліп жатқан теміржолдың бергі бетінде 17 мың, арғы бетінде 20 мыңдай халық қоныстанған. Жалғыз өткел осы болғандықтан, кейде жедел жәрдем мен өрт сөндіру техникалары да межелі жеріне уақытылы жете алмайды. Енді тарихи шаһар тұрғындарының сұранысы қанағаттандырылып, көлік қатынасы жеңілдемек. Нысанға республикалық және жергілікті бюджеттен қаржы бөлінді. Мердігер мекеме «РИТМ» жауапкершілігі шектеулі серіктестігі құрылыс жұмыстарын екі жыл ішінде аяқтауды жоспарлауда. Құны 3,1 млрд. теңге болатын көпірдің ұзындығы 940 метрді құрайды. Аспалы көпірдің екі жағынан қосымша жаяу жүргіншілер жолы мен түнгі жарық шамдары орнатылады. Жақын жерде орналасқан тұрғындарға келеңсіздік тудырмас үшін дыбыс басқыш құрал-жабдықтарымен қамтылады.<figure class="image"><img src="https://knadmin.beoblood.kz/uploads/347266980_1273353756885060_8923480197279993577_n_710c189f38.jpg" alt="347266980_1273353756885060_8923480197279993577_n.jpg"></figure>&nbsp;<figure class="image"><img src="https://knadmin.beoblood.kz/uploads/347229270_1077762566515697_9016413456969340887_n_9ba048d901.jpg" alt="347229270_1077762566515697_9016413456969340887_n.jpg"></figure>&nbsp;<figure class="image"><img src="https://knadmin.beoblood.kz/uploads/347223078_221319417369614_6140847799860450389_n_4b1f4beb16.jpg" alt="347223078_221319417369614_6140847799860450389_n.jpg"></figure>&nbsp;<figure class="image"><img src="https://knadmin.beoblood.kz/uploads/346886929_243234714921187_8715914738345178745_n_7c812478ff.jpg" alt="346886929_243234714921187_8715914738345178745_n.jpg"></figure>

Арал ауданында теміржол көпірінің іргетасы қаланды

<a href="https://kyzylorda-news.kz/">Kyzylorda-news.kz.</a> Мемлекет тарапынан білім беру саласын дамыту бағытында нақты қолдаулар көрсетілуде. Соның негізінде мұғалімдердің кәсіби біліктілігі артып, шығармашыл ұстаздардың саны артуда. Қаламыздағы №2 Абай атындағы дарынды балаларға арналған мектептің көркем еңбек пәні мұғалімі Айдана Өмірзақова – оқушыларға білім берумен қатар, шығармашылық жұмыстармен де айналысатын жоғары білікті маман.Ол бала күнінен сурет салуға бейім болып өседі. №235 Қ.Қаракөзов атындағы орта мектебінде білім алып ол болашақта суретші болуды армандайтын. Бала күнгі арманына қол жеткізу үшін 2008 жылы М.Мәметова атындағы Қызылорда педагогикалық колледжіне құжат тапсырады. Мұнда бейнелеу өнері және сызу мамандығы бойынша Ұлжан Қалиева, Кенже Бабасова, Индира Шәмшатова секілді білікті оқытушылардан білім алып, кейін Қорқыт ата атындағы университетте оқуын жалғастырады. Жоғары оқу орнын қызыл дипломға тәмамдаған Айдана Болатқызы еңбек жолын Абай атындағы дарынды балаларға арналған мектепте бастаған.<blockquote>«Мұғалімдік қызметке кіріскен күнім әлі көз алдымда. Жұмысымды ерекше тебіреніспен, жүрексініп бастадым. Уақыт өте келе білікті басшы Жанат Сәдуақасова басқаратын бірлігі бекем педагогикалық ұжымға сіңісіп кеттім. Қазір мектепсіз, оқушыларсыз бір күнімді де елестете алмаймын. «Ұстаз бақыты – шыңға шыққан шәкірті» демекші, халықаралық, республикалық сурет салу, сызу байқауларында топ жарған оқушыларым көп. Олар ата-аналарының ғана емес, мектебіміздің де мақтанышы», – дейді Айдана Өмірзақова бізбен әңгімелесу барысында.</blockquote>Ізденісті серік еткен білімді ұстаз бейнелеу өнері бойынша тың тәсілдерді меңгеруді жолға қойған. Ол оқушыларға үйрете жүріп өзінің де кәсіби біліктілігін жетілдіріп келеді. Өзі де түрлі шығармашылық байқауларға қатысып, бақ сынап жүр. Сол еңбегі еленіп, 2019 жылы республикалық деңгейдегі жас мамандар байқауында «Үздік жас маман» төсбелгісімен марапатталған. Сонымен қатар облыстық білім басқармасының, қалалық білім бөлімінің бірнеше рет Құрмет Грамотасы мен Алғыс хатын иеленген. Түрлі қоғамдық ұйымдар мен білім беру орталықтарынан алған марапаттары да бір төбе. Бұл марапаттар жас маман үшін жетістіктердің бастауы екені анық.<blockquote>«Әр жетістікке жеткен сайын маған білім берген ұстаздарымның еңбегін жоғары бағалаймын. Университет қабырғасында өз ісінің шебері атанған Айдана Әләйдарова мен Тұрсынбек Омаровтан білім алдым. Бізге сурет өнерінің қыр-сырын, әр бояудың өзіндік орны, қолданылатын реті бар екенін үйретті. Қазір білімімізді оқушыларға үйретіп, бағыт-бағдар беріп келеміз. Мектебімізде шығармашылыққа бейім, өнерге икемді оқушыларға барлық жағдай жасалған. Басшымыз Жанат Мылтықбайқызы педагогтердің кәсіби шеберлігін арттыруға ерекше мән береді және оқушыларды ынталандыру шараларын ұйымдастыруға көңіл бөліп, қолдау көрсетіп келеді», – дейді жас маман.</blockquote>Халық даналығында «Ұстазы жақсының – ұстамы жақсы» деп бекер айтылмаған. Айдана Өмірзақованың шәкірттері де ұстазы секілді белсенді. Олар әр оқу жылында жақсы жетістіктерге қол жеткізіп келеді. Облыстық білім басқармасының қолдауымен өткізілген «Суретшілер салтанаты», «Қызықты сызу әлемі», «Менің қалам – Қызылорда», «Рухани жаңғыру – ұлтты ұлықтаудың ұлы жолы», «Түстер әлемі» атты облыстық, қалалық байқауларда топ жарған өнерлі оқушылардың қарасы қалың. Ең маңыздысы, ұстаз әр оқушыға ерекше көңіл бөліп, бос уақытының бәрін шәкірттерінің талабын шыңдауға арнап келеді.<blockquote>«Ел ертеңі – озат оқушылар. Біз бүгінде жас ұрпаққа сапалы білім, саналы тәрбие беру арқылы болашақтың негізін мықтап қалап жатырмыз. Сондықтан өз мамандығымды мақтаныш етемін. Мерей Оңдалы, Аминат Жомарт, Мадилана Егенбергенова, Ақбота Сәрсеналиева секілді болашағынан көп үміт күттіретін оқушыларым көп. Оқушыларымның ата-аналарына алғысымды айтқым келеді. Сіздердің қолдауларыңыз білімнің биік шыңын бағындыруымызға жол ашып, жаңа серпіліс сыйлайды деп сенемін», – дейді Айдана Өмірзақова.</blockquote>Ұзақ жылдар білім беру саласында жемісті еңбек еткен анасы Ботагөз Дабылованың жолын қуған жетістігі көп шығармашыл ұстаздың ізденісі мен белсенділігін үйінің төрінде, сынып бөлмесінде ілініп тұрған Алғыс хаттар мен сертификаттардан аңғаруға болады. А.Болатқызының «Заманауи білім беру тенденциялары, педагогикалық шеберлік» тақырыбындағы зерттеу жұмысы &nbsp;мұғалімдерінің тәжірибелік жинақ кітабында енген. Болашақта оқушыларының туындыларынан көрме ұйымдастыруды жоспарлап жүр.&nbsp;

Шығармашыл ұстаздардың саны артуда

<a href="https://kyzylorda-news.kz/">Kyzylorda-news.kz.</a>&nbsp; Сырдария аудандық мәдениет үйінде рухани әңгімелерге шөлдеген аудан жұртшылығы әсерлі кештің куәсі болды. Сыр өңірінің аудандарын «Қоңыр әңгіме» рухани кешімен аралап жүрген жазушы, ақын, киносценарист Ұларбек Нұрғалымұлы көпшіліктің жүрегінен орын алды.Нағыз қазақы сөз өнерінің айшықты көрінісін дәріптейтін кешті айтыскер ақын, «Сырдария ауданының Құрметті азаматы» Нұрмат Мансұров жүргізді. Рухани кешке аудан зиялылары қатысып, жазушыға зор құрмет көрсетті. Ақынның өлеңдері Сыр мақамы бойынша айтылып, көрерменнің ыстық ықыласына бөленді. Өз кезегінде жазушы, ақын, киносценарист Ұларбек Нұрғалымұлы «Қоңыр әңгіме» рухани кешінің маңыздылығына тоқталып, шығарма¬шылығымен таныстырды. Кеш барысында қазақтың тұлпары, өз анасы жөнінде жазылған өлеңдерін кеш иесі оқып берді.<blockquote>Біз бүгін тағылымы мол, танымы бөлек кешті тамашалай алдық. Ұларбектің шығармалары көркемдік жағынан, мазмұндылығынан сөз құдіретін сезіндіріп тұрады. Әрбір әңгімесінің астарында өмірдің шындығын байқайсыз. Оның жазған дүниелері адамға ерекше толғаныс сыйлайды. Қазақтың қарымды қаламгерлерінің қатарынан орын алған жазушыға шығармашылық табыс тілеймін, – деді аудандық мәслихат депутаты Алмас Есназар.</blockquote>Негізінен, қаламы қарымды жазушы Ұларбек Нұрғалымұлы Т.Жүргенов атындағы Қазақ Ұлттық Өнер академиясын «кинотеледраматургия» маман-дығы бойынша бітірген. Аталған мамандық негізінде Астана қаласындағы Қазақ Ұлттық Өнер университетінде оқып, «Өнертану» магистрі дәрежесін алған. Оның мақалалары мен әңгімелері оқылымы көп шығармалар қата-рында. 2007 жылы Алматыдағы «Үш қиян» басапасынан «Керағыс» жыр жинағы жарық көрсе, 2014 жылы ҚР мәдениет және спорт министрлігінің «Әдебиеттің маңызды түрлерін басып шығару» бағдарламасы бойынша «Болмыс» әдеби сын, сарап кітабы көпшілікке ұсынылған. Сонымен бірге қаламгердің жақында шыққан «Дайағашшы» кітабы оқырман қауымның жоғарғы сұранысына ие. Кеш соңында аудандық ардагерлер кеңесінің төрағасының орынбасары Мектепхан Елеусінов жазушыға аудан халқының атынан шығармашылық табыс тілеп, ақ батасын берді. Сонымен бірге Ұларбек Нұрғалымұлы «Дайағашшы» кітабына қолтаңба жазып, бірнеше оқырманға естелікке берді.&nbsp;

Танымал жазушы Сырдарияда кешін өткізді

Жаны жайсаң Жамалхан

<a href="https://kyzylorda-news.kz/">Kyzylorda-news.kz.</a> Қызылордалықтар қоғамдық көліктердің жүріс-тұрысын «2GIS» мобильді қосымшасы арқылы бақылай алады.&nbsp;Онда жолаушы баратын жерге қай автобус өтіп бара жатқандығын және жақын аялдамаға автобус қанша уақыттан кейін келетіндігін де көре алады. Бұл мүмкіндіктердің барлығы жолаушыларға жақын арада қолжетімді болады. Бүгінде қосымшаны орнатудың соңғы сатылары жүргізілуде.Еске салсақ, бүгінде мекеменің барлық автобустарына “автоинформатор” орнатылып, пилоттық режимде автоматты аялдамалар қызметі жұмыс жасауда.Автобустарға арналған “автоинформатор” арқылы жолаушыларға автоматты түрде аялдама атауларын, жолаушыларға қалта ұрлығынан сақ болуын, жол жүру билетін талап ету қажеттігін хабарланып отырылады. Арнайы навигация жүйесі ескертулерді толығымен автоматтандыруға мүмкіндік береді, яғни жүргізуші көлік жүргізу барысында алаңдамайтын болады,&nbsp;– деді "Автобус паркі" Қызылорда" ЖШС директорының орынбасары Әмірбек Шаймағамбетов.Бұл автоматтандырылған қосымша арқылы тек аялдамалар туралы ақпарат ғана емес, сонымен қатар жүргізушілер мен жолаушылар сақтауы және ұстануы тиіс ережелер, қоғамдық көліктерде ақы төлеу түрлері мен жол жүру бағасы да жолаушылар назарына ұсынылып отырады.<blockquote>«Біздің басты міндетіміз&nbsp;– жолаушыларға сапалы қызмет көрсету! Технологиялардың дамыған кезеңінде біз де уақытпен бірге ілесуге тырысып, жаңа дүниелерді енгізу арқылы қызметтерімізді жаңғыртудамыз. Жол жүру ақысын төлу тетіктерін дамытып, тұрғындар ыңғайына оңтайландыру үшін жұмыс жасауда. Бүгінгі таңда қоғамдық көліктерде электронды форматта жол жүру ақысының 8 түрі қолданылады. Ересектерге арналған қолма-қол жол ақысы - 90 теңге болса, онлайн түрде 85 теңгеге төлеуге болады. Ал оқушылар 40 теңге төлейді»,&nbsp;– деп ерекшеліктерді атап өтті “Автобус паркі" Қызылорда” ЖШС директоры Мақсат Жүсіп.</blockquote>Айта кетейік, бүгінде мекеме №1, 3, 11, 12, 14, 15, 17, 18, 19, 20, 22, 25, 28, 29, 30, 31 қала ішілік бағыттары және "Ягодка", "ПМК - 29" бен "Қараөзек"саяжайлары бойынша жолаушылар тасымалдарын жүзеге асырады.&nbsp;

Қызылордалықтар «2GIS» қосымшасы арқылы автобустарды бақылай алады

<a href="https://kyzylorda-news.kz/">Kyzylorda-news.kz.</a> №270 Ғ.Мұхамеджанов атындағы орта мектебінің педагог-дефектологы Нұрсәуле Әуезханова ерекше баланы дамытуға күш жұмсап, олардың болашағына сенім білдірейік дейді.Ерекше бала – болашақ дана. Ерекше білім беруді қажет ететін балалар қазіргі қоғамның ерекше бір бөлшегі. Біздің мақсатымыз – ерекше балаларды дамыту, қолдау көрсету, ата-анамен бірлесіп дұрыс бағыт-бағдар беру. Ерекше бала кім, қандай? Атақты суретші Леонардо Да Винчиді білетін боларсыздар. Диагнозы – ДЦП. Қазіргі ерекше бала деп отырғанымыз дәл осы тұлғаға тікелей қатысты. Міне, осындай солақай суретші әлемге танымал Мона Лиза суретінің авторы. Дүние жүзінде осындай диагнозы бар әйгілі тұлғалар жетерлік. Соның бір-екеуіне тоқталсақ: Моцарт, ­Эйнштейн, Мария Кюриді атап айтуға болады.Ал ерекше балалардан осындай тұлғалар шығару үшін не істеуіміз керек? Ол үшін алдымен ата-анадан үлкен көмек, қолдау, балаға деген сенім керек. Ерекше баланың ерекше дарынын ашу үшін жағдай жасап, қоғамнан шектемеу қажет. Әр баланың қалауы бар, құқығы бар. Дефектолог маман ретінде ерекше балаларға ең алдымен мейірім, махаббат керек екенін баса айтқанды жөн көремін. Себебі ерекше балалар өзіне деген ыстық ықыласты сезіне алса оның даму дағдысы өзгере бастайды.Сонымен қатар танымдық және сөйлеу іс-әрекетінің дамуына жеткізетін әдістерінің бірі – ойын. Ойын баланың өзінің қарым-қатынасқа деген қажеттігін, сезімдерін, ойларын және эмоцияларын сыртқа шығаруын қамтиды. Ойынды дұрыс ұйымдастыру арқылы баланың сөздік қоры дамиды, басқа балалармен қарым-қатынаста өзін еркін сезінуі және қоршаған ортаға байланысты білімдерін кеңейтеді. Бала белгілі әлеуметтік ортада өсіп, айналасындағы заттар мен құбылыстарды танып біледі, олармен тікелей қарым-қатынаста әсерленіп, бойындағы табиғи қасиеттерін жетілдіріп, ақыл-ой сезімін таным әрекетімен байланыстырады. Сезімнің бұл түрі балалардың оқып білім алуын, дүниетанымын, көзқарасын қалыптастырады, ізденімпаздық әрекетін тудырады.Ең бастысы ерекше балалардың ата-аналары уақыт оздырмай, арнайы мамандарға жедел жүгінгені жөн. Жергілікті дәрігерден алған жолдамамен арнайы кеңес беру орталықтарына кезекке жазылып, мамандардың қолдауымен, сабыр мен төзіммен баланы түзету-дамытудың жолдарын қарастыру керек. Сондай-ақ баланы табиғи ортада, мәселен, тауға, көл жағасына, тіпті ауылдағы туыстарына апарып, демалдырса, бала үшін әрі тәрбие, әрі демалыс болар еді. Ата-аналардың уақыт тауып, балаларымен бір мезгіл сөйлесіп, ойын, арманын біліп, серуендеп, бірге сабақ қарағаны абзал. Неге қызығатыны, не ойлайтыны – бәрі маңызды. Уәде берсеңіз, оны орындаңыз. Жоғарыда атап өткендей балаңызды күнделікті құшақтап, мейіріміңізді көрсетіп, көңіл бөліп отырыңыз. Ең бастысы, бала ең жақын адамдарының жылуын, қамқорлығын сезінуі тиіс.

Нұрсәуле Әуезханова: Ерекше баланы дамытып, болашақ дана деп қарайық

<a href="https://kyzylorda-news.kz/">Kyzylorda-news.kz.</a>&nbsp; Бұл туралы Үкімет отырысында ҚР Ұлттық экономика министрі Әлібек Қуантыров мәлімдеді.ҚР Премьер-Министрі Әлихан Смайыловтың төрағалығымен өткен Үкімет отырысында 2023 жылғы қаңтар-сәуір айындағы әлеуметтік-экономикалық даму және республикалық бюджеттің атқарылу қорытындылары қаралды.Үкімет басшысы есепті мерзімде барлық макрокөрсеткіштер бойынша өсім тіркелген өңірлерді атап өтіп, оның ішінде Қызылорда облысында оң динамика қалыптасқанын айтты.<blockquote>«Төрт айдың қорытындысы бойынша Абай, Жетісу, Ұлытау, Ақмола, Батыс Қазақстан, Қостанай, Қызылорда, Павлодар, Оңтүстік Қазақстан облысы мен Астана қаласында барлық макрокөрсеткіштердің өсімі тіркеліп отыр», – деді Әлихан Асханұлы.</blockquote>Ұлттық экономика министрі өз баяндамасында экономиканың барлық салаларында оң өзгерістер болғанын атап өтіп, әсіресе құрылыс жұмыстары мен инвестиция тарту бойынша өсім қалыптасқанын айтты.<blockquote>«Экономиканың барлық салаларында оң динамика байқалуда, оның ішінде құрылыс, сауда, ақпарат және байланыс салаларында ең жоғары өсім тіркелді. Өңірлер арасында Түркістан, Маңғыстау, Қызылорда және Батыс Қазақстан облыстарында жоғары көрсеткіш қалыптасты», – деді министр.</blockquote>Айта кетейік, 2023 жылдың алғашқы 4 айында негізгі капиталға салынған инвестициялар мен құрылыс жұмыстарының көлемі бойынша Қызылорда облысы жоғары өсу қарқынын көрсетуде.Үкімет отырысынан кейін облыс әкімінің бірінші орынбасары Серік Қожаниязов жиын өткізіп, Премьер-Министр қойған міндеттер бойынша бірқатар тапсырма берді. Қазіргі таңда аймақ даму көрсеткіштері бойынша ілгерілеу орын алғанымен, әрі қарай қарқынды жұмыс жүргізу қажеттігін атап өтті.<figure class="image"><img src="https://knadmin.beoblood.kz/uploads/346973860_986872678995606_7403755473044071822_n_c6d7501acb.jpg" alt="346973860_986872678995606_7403755473044071822_n.jpg"></figure>&nbsp;<figure class="image"><img src="https://knadmin.beoblood.kz/uploads/347016283_270707702048175_7344673995778901243_n_d319530b1c.jpg" alt="347016283_270707702048175_7344673995778901243_n.jpg"></figure>

Қызылорда облысында 4 ай ішінде әлеуметтік-экономикалық дамуда оң динамика қалыптасты

<a href="https://kyzylorda-news.kz/">Kyzylorda-news.kz.</a> Мал төлдеу науқаны көктем мезгілімен қатар келетіні &nbsp;бесенеден белгілі. Бұл – сіреу боп қатқан мұздар еріп, қыстың қыраулы кезі кетіп, жер бетіне жайдарлы көктемнің жайма шуақ нұры шашылып барша тірішілік оянар кез. Иә, төрт-түліктің қазақ үшін маңызы зор. Себебі қазақ жаздың аптап ыстығы мен қыстың қытымыр аязына қарамастан, өзінен бұрын малдың жайын көбірек ойлап, мал басын көбейту жолында тынымсыз еңбектенеді. Осы тұста біз де Шиелі аудандық ветеринария бөлімінің бүгінгі жұмысының жай-жапсарын жазуға бекіндік.Саладағы сандар сөйлесінҚазіргі таңда аудан бойынша төрт-түліктен өсім байқалады. Биыл ауыл шаруашылығы жануарларын бірдейлендіру дерекқор жүйесінде мүйізді ірі қара жалпы саны – 93467, уақ мал – 139483, жылқы – 25442, түйе – 1683 бас төрт-түлік малдары тіркелген. Оның ішінде жыл басынан бүгінгі күнге дейін 16081 мүйізді ірі қара, 668 жылқы, 204-түйе, 18046 уақ мал төлдері бірдейлендірілді. Яғни, аталған төрт-түлік төлі сырғаланып, таңбаланып, дерекқор жүйесіне есепке алынып та үлгерген.Мал кеселі – салғырттықты кешірмейдіҚазақ үшін мал-жанның амандығынан асқан бақыт жоқ. «Пәленшенің үйінің сиырынан әлгіндей ауру анықталыпты» десе, кәдімгідей үрейіміз ұшатыны сөзсіз. Өйткені баяғыдан келе жатқан ата кәсіптің құтын, берекетін бірінші орынға қоямыз. Ол заңды да. Осындай түйіткілді тақырыпты шешу үшін биыл да жылдағы дәстүр бойынша республикалық бюджеттен аудандық ветеринария бөліміне төрт-түлікке арнайы вакцина бөлініпті. Яғни, аудан көлемі бойынша 13 түрлі аурудың алдын алу жұмыстары бойынша тиісті жұмыстар жүргізілген. Биылғы жылы аусыл, сібір жарасы, құтыру, эхинококкоз, эуберкулин, нодулярлы дерматит, құс тұмауы сынды ауру түрлеріне қарсы вакцинациялау жұмыстары іске асты. Сондай-ақ 2023 жылға облыстық қазынадан эпизотиялық 6 ауруға ветеринариялық препараттар бөлінді. Атап айтар болсақ, сақау, бауыр құрт, қатпа, тейлериоз, ¬гастрофилез сынды ауру түрлері арнайы препаратталаған. Осы атқарылып жатқан ветеринариялық іс-шаралардың барлығы тегін жүргізілуде. Диагностикалық зерттеулер бойынша, мүйізді ірі қара &nbsp;– 34308 бас, уақ мал – 38107 бас, түйе – 400 бастан қан сары суылары өткізілген. Нәтижесінде, 4 бас мүйізді ірі қара малына бруцеллезге зерттеу жұмыстары жүргізіліп, оң нәтиже берді. Олар арнайы санитариялық талаптарға сай сойылған. Қазіргі таңда ауданда эпизотиялық ахуал тұрақты.Дәрі-дәрмектің сапасы қандай?Иә, малдың амандығы – басты орында. Ал оларға егілетін дәрі-дәрмектің сапасының дұрыс болуы – өте маңызды. Ел арасында малға егілетін препараттар мен вакциналардың сапасына сын көзбен қарайтындар жоқ емес. Бір сөзбен айтқанда алып-қашпа әңгімелер көп.Аудан халқы да ара-тұра төрт-түлікке егілетін дәрі-дәрмектің сапасыздығын айтып даурығады. Осы мәселенің бір жауабын алу үшін біз аудандық ветеринариялық бөлімі басшысының орынбасары Ербол Бекайдаровқа өз сауалымызды жолдаған едік.&nbsp;Ауданда малға егілетін дәрілердің сапасын сөз қылатындар жоқ емес. Біз аса қауіпті мал ауруларына вакцинациялауды тегін жасаймыз. Бұдан бөлек, 13 түрлі ауру түрлерінің алдын алу үшін арнайы екпе салу жұмыстарын жүргіземіз. Сондай-ақ дәрі-дәрмектердің сапасын жақсы деп айта аламыз. Өйткені, аталған екпелер арнайы тоңазытқышта сақталады. Дәрі-дәрмектер термочемоданмен тұрады, – дейді Ербол Бекайдаров.Ауру ошақтарыБарлық жұқпалы аурулардың белгілі бір жерде ошақтары болады. &nbsp;Ондай жерлерге жайылатын малдарға екпелер салынып, тиісті санитариялық жұмыстар жүргізілуі керек. Бүгінгі таңда аудан көлемінде Сібір жарасының бес ошағы бар. Атап айтар болсақ, Еңбекші, Ақмылтық, Дәуітбай, Иіркөл, Бәйтерек ауылдарында, сондай-ақ бір ауру ошағы кент ішінде анықталған. Сала мамандарының айтуы бойынша, аталған жерлердің барлығы нормативке сай, арнайы бетон қоршаумен қоршалған.&nbsp;Жалақы жағдайды оңтайландыра ма?Тақырыптың өзі айтып тұрғандай, мал шаруашылығы – расымен де маңызды сала. Ал аталған сала жаңашаланып, оңтайлансын десек, сол мекемеде тер төгіп жүрген қызметкерлерді де назардан тыс қалдырмау керек сыңайлы. Ол үшін бірінші кезекте – жұмыскерлердің жалақасын көтеру маңызды. Өкінішке қарай, осыған дейін ветеринария саласы қызметкерлерінің төменгі жалақыны місе тұтып келгендері жасырын емес. Бұдан былай сала мамандары бөркін аспанға лақтырып, қуана берсе болады. Себебі, жуырда ғана ҚР Ауыл шаруашылығы вице-министрі Рүстем Құрманов кезекті брифинг кезінде коммуналдық ветеринариялық кәсіпорындардың, сондай-ақ &nbsp;ветеринария мамандарының еңбекақысына 50 процент ресми мемлекеттік және коммуналдық мекемелердің базалық жалақысына 140 проценттік үстеме ақы енгізу жоспарланып отырғанын айтты. Яғни, жалақы 50 процентке жоғарылайды. Министрліктің айтуы бойынша, аталған жаңалық жуырда өз күшіне де енбек. Бұл хабардың біздің де көңілімізге қуаныш ұялатқанын жасырмаймыз. Бұның өзі еңбектің еленгені емес пе?

Шиелі ауданында мал басы көбейген

<a href="https://kyzylorda-news.kz/">Kyzylorda-news.kz.</a> Ауылдың баласынан көптеген дүние күтуге болады. Жетістік пен жаңалық, білек пен білімнің жарқын үлгісін көрсететін де солар. Сол азаматтар байрақ пен ардың беделін төмен түсірмеуге тырысады. Себебі олардың қайнаған қанында халқына деген шынайы сүйіспеншілік, таза патриоттық сезім бар. Сол үшін де біз олармен мақтануымыз керек. Мұндай мақтаныштарымыз әсіресе спорт саласында көптеп кездеседі. Бүгінгі біздің әңгімемізге арқау болатын кейіпкердің есім-сойы – Нұрлыбек Рысмағамбетов.«Arm Wrestling» атты спорт түрінен талай бәсекеде топ жарып жүрген тарланбоздың бүгінгі шыққан биігімен аудан мақтана аларлықтай жағдайда. Ол қандай спорт деп отырған боларсыз. «Arm Wrestling» атты спорт біздің тілмен айтқанда қол күрес. Жақсықылыш кентінде тұрмыс кешіп, сол ауылдың мектебінде қарапайым ұстаз болып еңбек ететін Нұрлыбектің бүгінде 100 келіге дейінгі салмақ дәрежесінде бірнеше мәрте Азия чемпионатының күміс және алтын жүлдегері екенін бірі білсе, бірі білмес. Халықаралық дәрежедегі спорт шеберлігі тағы бар.1967 жылы Жақсықылыш кентінде ауданға белгілі Өтеу Рысмағамбетов ағамыздың шаңырағында дүниеге келген кейіпкеріміз өзінен бөлек тоғыз бауырының жанында ойнап өскен. Әкесі Өтеу мен анасы Зияштың тәрбиесін алған ол сонау бала күнінде өзінің алдындағы Арғынбай есімді ағасын үлгі тұтқан. Айтуынша, ағасы Арғынбай да жас күнінде гір тасын көтеруде алдына жан салмайтын үздіктер қатарында болған. Тіпті, облыстық сайысқа қатысып, кіл шеберлердің арасынан гір тасын көтерудегі шеберліктен шашасына шаң жұқтырмаған.<blockquote>– Әлі есімде. Бала кезімізде аулада Арғынбай ағам салмағы зіл батпан болатын гір тасын допша үйіріп, төспен, аяқпен қағатын. Сондағы шеберлігіне таң қалып, мен де жастайымнан гір тасына құмар болдым. &nbsp;Талай көше балаларымен жүргенде өзіме ағамды үлгі етіп, соның ізін қудым. Соның пайдасы болса керек, жас күнімнен білектерім қатайып, қолыма қысқанды қабыстыратын ерекше күшке ие болдым. Осылай келе 1985 жылы Отан алдындағы әскери борышымды өтеуге Владивостокқа бардым. Теңіз әскері құрамында болып, 90 күндеп сүңгуір қайықпен Тынық мұхиты теңізінің астында болатынбыз. Ол жақта Александр Спиранский деген орыс офицері менің ерекше қабілетімді байқап, осы қол күрестің ерекше тәсілдеріне бейімдеді. Сол арқылы мен қол күрестен әскери достарымның арасында үздік болдым, – дейді халықаралық дәрежедегі спорт шебері Н.Рысмағамбетов.</blockquote>Спорттағы карьерасы осылай басталған Нұрлыбек елге келген соң, кенттегі «Аралтұз» комбинатына жұмысқа орналасады. Сол жақта жүріп те аудандық, облыстық сайыстарға қатысып, бапкері әрі құрдасы Жаңалық Тоқсанбаевпен бірге біршама жетістіктерге жеткен. Бұл жеңісті жетістіктердің жалғасы 2005 жылы ауылдағы №19 орта мектепке дене шынықтыру пәнінен мұғалім болып қызметке орналасқан соң да жалғасты. Спорттың бұл түрінен бөлек тоғызқұмалақ ойынына да құмарлығы ауған кейіпкеріміз мектеп оқушыларын озық ойға баулып, тоғызқұмалаққа бейімдеген. Қазірге дейін олардың арасынан 1 спорт шебері, 5 спорт шеберлігіне үміткер және 7 бірінші разряд шыққанын мақтанышпен айтуға болады.Негізінен қол күрес әлемдік деңгейде қолдауға ие болғанымен, елімізде кенжелеу дамыған. Десе де Қазақстан әлемдік көрсеткіш бойынша қол күрес спортынан 2 орында тұр. Бойды билеген бұл күшпен қатар, асқан ептілікті және шапшаңдықты қажет ететін бұл спорт түрі бүгінде Орталық Азияда еркін дамыған. Оған жыл сайын өтіп тұратын Азия чемпионаттары мен әлем біріншіліктері дәлел. Бүгінде Нұрлыбек Өтеуұлы сол Азия чемпионаттарына қатысып, бірнеше мәрте жүлдегер атанған. Айталық, 2017 жылдың маусым айында Қырғызстан елінде өткен Азия чемпионатында 100 келіге дейінгі салмақ дәрежесінде ІІ орын, 2018 жылдың сәуірінде Көкшетау қаласында өткен Азия чемпионатында жүлделі ІІ орын және 2019 жылы Қырғызстан елінде өткен Азия чемпионатында жүлделі І орынды қанжығасына байлаған. Осылайша сайдың тасындай іріктелген кіл мықтылар арасында топ жарған спорт шебері бірнеше мәрте әлемдік додаларға жолдама алған. Алайда ол жаққа барып-қайтуда қаражат жағы қолбайлау болып, бірнеше мүмкіндікті жіберіп алған.&nbsp;Бүгінде өзінен кейінгі ізбасар қалдыруды көздейтін Нұрлыбек ізін жалғаушы төрт ұлының ішінен Бақтиярын осы спортқа ыңғайлы көреді. Соны осы бастан баптап, спорттың осы түріне бейімдеуді көздейді.<blockquote>«Аллаға шүкір, ізімді жалғайтын төрт бірдей мұрагерім бар. Олардың екеуі үйленді. Жұбайым Роза екеуміз 1990 жылы шаңырақ көтердік. Тәрбиелеп отырған төрт ұлымыздың әр кәсіпке қабілеттері әрқалай. Бақтияр есімді балам биыл тоғызыншы сыныпқа көшті. Болашақ осы балам өзімнің ізімді жалғайтындай көрінеді. Қимылы да, қабілеті де ерекше көзге түседі. Кезінде өзім Орынбай, Қуаныш сынды ағайлардан дәріс алып, осы спортқа деген қызығушылығым арта түскен еді. Енді ізбасарларыма да бір биікке шығатындай үлгі болсам ба деймін», – деп өз ойын жеткізді әңгіме барысында Азия чемпионы.</blockquote>

Архив