<a href="https://kyzylorda-news.kz/">Kyzylorda-news.kz</a> &nbsp; Өткен жылы Қызылорда облысында мемлекеттік еңбек инспекторлары тарапынан 278 тексеру жүргізіліп, еңбек заңнамасын бұзудың 348 дерегі анықталды. Нәтижесінде 517 жұмыскердің бұзылған еңбек құқықтары қалпына келтіріліп, жалақы бойынша қалыптасқан берешектер толық өтелді. Бұл туралы Өңірлік коммуникациялар қызметінің ақпарат алаңында Мемлекеттік еңбек инспекциясы комитетінің Қызылорда облысы бойынша департаментінің басшысы Бектемір Жұмағұлов мәлімдеді.<img src="https://knadmin.beoblood.kz/uploads/irde_517_zh_myskerdi_y_y_alpyna_keltirildi_bd03dfbde8.jpg" alt="Өңірде 517 жұмыскердің құқығы қалпына келтірілді.jpg"><blockquote>– Өткен жылы облыстағы 3 кәсіпорында 5 жұмыскерге қатысты 2,8 млн теңге көлемінде жалақы берешегі анықталған болатын. Алайда қабылданған шаралар нәтижесінде аталған қарыз жыл ішінде толық өтелді. Қазіргі таңда облыс аумағында кәсіпорындарда ағымдағы немесе ұзақ мерзімді жалақы берешегі тіркелмеген. Сонымен қатар есепті кезеңде 8 кәсіпорында ұжымдық еңбек дауы туындау қаупі байқалып, жағдай бақылауға алынды. Наразылықтардың негізгі себептері жалақыны арттыру, еңбек жағдайларын жақсарту және зиянды еңбек жағдайларында еңбек ететін жұмыскерлерге кәсіптік зейнетақы жарналарының төленбеуіне байланысты болды. Құзырлы мемлекеттік органдармен бірлесіп қабылданған жедел әрекет ету шараларының нәтижесінде кәсіпорындардағы ахуал тұрақтандырылды. Еңбек ұжымдарымен кездесулер ұйымдастырылып, қолданыстағы еңбек заңнамасы аясында жан-жақты түсіндіру жұмыстары жүргізілді. Сондай-ақ, өткен жылы цифрландыруға және еңбек қатынастары саласындағы барлық процестердің ашықтығын арттыруға ерекше басымдық берілді. Осы бағытта облыстағы 382 кәсіпорынның штаттық кестелері еңбек шарттарын есепке алудың бірыңғай жүйесіне толық енгізілді. Қазіргі уақытта штаттық кестеге сәйкес қызметкерлерді тағайындау бойынша 382 мекеменің 371-і жүйеге енгізіліп, бұл көрсеткіш 97 пайызды құрап отыр. Бұдан бөлек, өткен жылы жоспарға сәйкес 785 кәсіпорынның ұжымдық шарттары цифрландырылып, жоспар 125,2 пайызға орындалды. Ал қаңтар айында қосымша 26 ұжымдық шарт енгізіліп, көрсеткіш 104 пайызға жетті, - деді Бектемір Ұлыбекұлы.</blockquote>Фото: Нұрболат Нұржаубай

Өңірде 517 жұмыскердің құқығы қалпына келтірілді

<a href="https://kyzylorda-news.kz/">Kyzylorda-news.kz</a> &nbsp;Қызылорда облысында инновациялық экожүйені дамыту бағытындағы жұмыстар жүйелі түрде жүзеге асырылып келеді. Бұл үдерістің негізгі драйвері - Kyzylorda Hub бизнес-инкубаторы. Хаб өз қызметін бастаған уақыттан бері аймақтағы технологиялық бастамаларды қолдап, жастар мен кәсіпкерлер үшін жаңа мүмкіндіктер алаңына айналды.Бүгінгі таңда Kyzylorda Hub аясында 389 іс-шара ұйымдастырылып, оған 14 мыңға жуық адам қатысқан. Оның ішінде жасанды интеллект бағытына ерекше мән беріліп, 93 арнайы іс-шара өткізіліп, 1 752 қатысушы қамтылған. Бұл туралы Kyzylorda Hub жетекшісі Жанарыс Түбекбаев мәлімдеді.<blockquote>- Алдағы кезеңде хаб қызметінің негізгі бағыты жасанды интеллект саласын дамытуға бағытталады. «AI-Movement» концепциясы аясында мемлекеттік мекемелер, әлеуметтік қызмет көрсету орталықтары мен кәсіпкерлерге арналған AI Bootcamp білім беру бағдарламалары ұйымдастырылады. Төрт күнге созылатын интенсивті оқу барысында қатысушылар генеративті жасанды интеллекттің негіздерін меңгеріп, өз қызметінің тиімділігін арттыруға мүмкіндік алады. Өңірлік стартаптарды дамыту мақсатында екі ірі бағдарлама іске қосылады. Оның бірі - Startup Joly преинкубация бағдарламасы. Бұл жоба технологиялық кәсіпкерлікке алғашқы қадам жасағысы келетін 16 жастан асқан барлық азаматтарға арналған. Бағдарлама идея сатысынан бастап MVP деңгейіне дейін жобаны дамытуға бағытталған. Ал Startup Orda инкубация бағдарламасы MVP кезеңіндегі жобаларды нарыққа шығарып, алғашқы сатылымға жеткізуді көздейді. Екі айға созылатын бағдарлама аясында қатысушылар 10 апта бойы семинарлардан өтіп, трекерлерден тегін консультациялық қолдау алады. Үздік жобалар республикалық венчурлық қорлар алдында инвестиция тарту мүмкіндігіне ие болады. Аталған бағдарлама Astana Hub халықаралық технопаркінің бастамасымен еліміздің барлық өңірлерінде жүзеге асырылады,- деді Жанарыс Алтынбекұлы.</blockquote>

Аймақта инновациялық бастамаларға басымдық берілмек

<a href="https://kyzylorda-news.kz/">Kyzylorda-news.kz</a> Қармақшы ауданы әкімдігінің мәжіліс залында аудан әкімінің орынбасары Диас Молдабаевтың төрағалығымен аудан әкімдігі жанындағы кәмелетке толмағандардың істері және олардың құқықтарын қорғау жөніндегі комиссияның кезекті отырысы өтті.Күн тәртібінде 5 мәселе қаралды. Алғашқы мәселе бойынша аудандық полиция бөлімінің қоғамдық қауіпсіздік бөлімшесінің басшысы Нұрболат Қасымханов 2025 жылдың 12 айында кәмелетке толмағандар арасында құқық бұзушылықтың алдын алу, жасөспірімдер арасындағы топтық төбелестер мен білім беру ұйымдарындағы ахуал жөнінде баяндама жасады.Екінші мәселе аясында аудандық аурухананың ана мен бала жөніндегі бас дәрігер орынбасары Парида Сарыбаева балаларды скринингтік тексерулермен қамту, кәмелетке толмағандар арасындағы суицид пен ерте жүктіліктің алдын алу бойынша жүргізіліп жатқан жұмыстарға тоқталды. Сонымен қатар аудандық білім бөлімінің басшысы Берік Жәнібеков білім беру ұйымдарындағы профилактикалық шаралар туралы ақпарат берді.Үшінші мәселе бойынша кәмелетке толмағандар арасындағы құқық бұзушылық, зорлық-зомбылық, буллинг пен кибербуллинг, суицидтік мінез-құлықтың жай-күйін зерделеу және әлеуметтік зерттеулер жүргізу мәселелері талқыланды. Бұл бағытта тиісті сала басшылары өз баяндамаларын ұсынды.Төртінші және бесінші мәселелер оқушылар мен отбасылардың жағдайына қатысты қаралды. Атап айтқанда №183 орта мектебінің директоры Гүлнара Әшірова құқық бұзушылыққа жол берген оқушылардың тәртібіне байланысты, сондай-ақ отбасының әлеуметтік жағдайы жөнінде баяндама жасады.Жиын барысында комиссия мүшелері көтерілген мәселелер бойынша пікірлерін білдіріп, ұсыныстарын айтты. Отырысты қорытындылаған Диас Молдабаев кәмелетке толмағандардың құқықтарын қорғау, құқық бұзушылықтың алдын алу бағытында жауапты мекемелерге нақты тапсырмалар жүктеді.Фото: Қармақшы ауданы әкімінің баспасөз қызметі

Жасөспірімдердің қауіпсіздігі күн тәртібінде

<a href="https://kyzylorda-news.kz/">Kyzylorda-news.kz</a> Қазақстан Республикасы Премьер-Министрінің кеңесшісі Ералы Тоғжанов ауданға жасаған жұмыс сапары барысында «Ауыл аманаты» жобасы аясында еңбек етіп жатқан бірқатар кәсіпкерлердің қызметімен танысты.Алдымен 2023 жылы «Ауыл аманаты» бағдарламасы бойынша 2,5 пайыздық несие алған ауыл шаруашылығы өндірістік кооперативінің мал сою пунктіне барып, атқарылып жатқан жұмыстарды көрді.Кооператив төрағасы Бауыржан Көлдеевтің айтуынша, аталған мал сою пункті тәулігіне 40 бас мал союға қауқарлы. Қазіргі таңда сұранысқа байланысты шаруалар мен жеке азаматтардың малы сойылып жатыр. Жобаны жүзеге асыру мақсатында өндірістік кооператив мүшелері 24 720 000 теңге көлемінде несие алып, нәтижесінде 4 адам тұрақты жұмыспен қамтылған.Ералы Лұқпанұлы кәсіпкермен кездесу барысында мал сою пунктінің негізгі қызметімен танысып, жобаны одан әрі жандандыру үшін жұмысты жетілдіріп, тұрғындарға сапалы қызмет көрсету қажеттігін атап өтті.Еліміз бойынша «Ауыл аманаты» жобасының жоғары деңгейде жүзеге асырылып жатқаны белгілі. Себебі бұл жоба арқылы көптеген азаматтар кәсіпкерлікке бет бұрып, жаңа мүмкіндіктерге қол жеткізуде.Қазіргі таңда жоба қатысушыларының 50 пайызы Арал қаласының тұрғындары болғандықтан, өткен жылы қала орталығында «Бизнес-инкубатор» шағын өндірістік орталығы ашылған болатын. Бүгінде бұл орталықта «Ауыл аманаты» жобасының игілігін көріп, кәсібін дөңгелетіп отырған кәсіпкерлер табысты жұмыс істеуде.Премьер-Министрдің кеңесшісі Ералы Лұқпанұлы аталған орталықтың жұмысымен танысып, кәсіпкерлермен тілдесті. Ол шығарылып жатқан өнімдердің қоғам үшін, аудан тұрғындары үшін маңызы зор екенін атап өтті. Әсіресе түйе мен ешкі сүтінен, сондай-ақ түрлі табиғи шөп қоспаларынан дайындалатын сабын өнімдерінің нарықтағы сұранысы жоғары болатынына ерекше тоқталды.Сапар барысында Ералы Тоғжанов елдің әлеуметтік ахуалын жақсартып, бәсекеге қабілеттілікті арттыруға бағытталған осындай игі жобалардың алдағы уақытта да кең көлемде жүзеге асырылуы қажеттігін айтты.Фото: Арал ауданы әкімінің баспасөз қызметі

Ералы Тоғжанов Арал ауданындағы «Ауыл аманаты» жобасының жүзеге асырылу барысымен танысты

<a href="https://kyzylorda-news.kz/">Kyzylorda-news.kz</a> Президент Қасым-Жомарт Тоқаев Конституциялық комиссия төрағасы – Конституциялық сот төрағасы Эльвира Әзімованы, Конституциялық комиссия төрағасының орынбасары – Мемлекеттік кеңесші Ерлан Қаринді және Конституциялық комиссия мүшесі – Президенттің құқықтық мәселелер жөніндегі көмекшісі Ержан Жиенбаевты қабылдады.Мемлекет басшысына Конституциялық комиссияның бұған дейін өткен отырыстарының нәтижесі туралы мәлімет берілді. Эльвира Әзімова Комиссия қызметінің ашықтығын қамтамасыз ету мақсатында барлық отырыс медиа кеңістікте, соның ішінде арнайы телеграмм арналары арқылы тікелей көрсетіліп жатқанын баяндады.Конституциялық комиссия төрағасы жарты жыл бойы Конституциялық реформаларды қоғамдық талқылау өткізілгенін айтты. Электронды платформаға азаматтардан, құқықтанушы ғалымдардан, сарапшылардан, заңгерлерден, саяси партиялардан, үкіметтік емес ұйымдардан, кәсіптік және бизнес қауымдастықтардан 2 мыңнан аса ұсыныс пен бастама келіп түскен.Осыған дейінгі отырыстарда Комиссия мүшелері Конституция преамбуласының түбегейлі жаңа редакциясын, бірқатар баптарды және бөлімдерді әзірлеп, қарастырды.Мемлекет басшысы алдағы Конституциялық реформа еліміздің дамуына тың серпін беретінін атап өтті. Ал Комиссия жұмысы Конституциялық реформаларды іске асыруда өте маңызды рөл атқаратынын жеткізді.Фото: Ақорда

Мемлекет басшысы Конституциялық комиссияның төрағасын қабылдады

<a href="https://kyzylorda-news.kz/">Kyzylorda-news.kz</a> Аймақ басшысы Нұрлыбек Нәлібаевтың тапсырмасына сәйкес, облыс әкімінің орынбасары Бахыт Жаханов, облыстық құрылыс, сәулет және қала құрылысы басқармасының басшысы Ерлан Төрәлиев «Қызылорда Арена» көпфункционалды спорт кешенінің құрылыс барысымен танысты. Аумағы 25 мың шаршы метр болатын нысан 3 және 4 қабатты блоктардан тұрады. Бас мердігер «ASPAN HOLDING», бас жобалаушы «Жоба», техникалық қадағалаушы «Строй-Проф» серіктестіктері.Кешен олимпиадалық стандарттарға сай келетін 50 метрлік бассейнмен, Азия, Әлем чемпионаттары сияқты ауқымды жарыстар өткізуге арналған 2500 орындық зал, олимпиадалық спорт түрлеріне арналған жаттығу залдарымен қамтылады. Құрылысы екінші жартыжылдықта аяқталады.Айта кетейік, 2022 жылдан бері өңірде 24 спорт нысаны салынса, «Ауыл – ел бесігі» бағдарламасы аясында елді мекендерде тағы 4 спорт кешені ел игілігіне табысталады.<img src="https://knadmin.beoblood.kz/uploads/yzylorda_arena_5_d3952d2d5a.jpg" alt="Қызылорда арена 5.jpg">Мемлекет басшысының аймақтарда спорт инфрақұрылымын, оның ішінде стадиондар мен спорт кешендерін салу туралы тапсырмасына сәйкес, 11 мың орындық жаңа стадион ашылды. УЕФА-ның IV санатты сертификатын алған жаңа нысанда ауқымды спорттық шараларды өткізуге барлық мүмкіндік жасалған.Ерлер мен әйелдерге арналған «Қызылорда бокс клубы», балалар мен жасөспірімдерге арналған «Сыр жұлдыздары» шығармашылық-инновациялық академиясы, «Самұрық Қазына Траст» қорымен бірлесіп «Теннис орталығы», &nbsp;«Қазақстан халқына» қорының қолдауымен Шиелі, Жалағаш аудандарында жаңа спорт кешендері ашылды. Қызылорда қаласында ерекше қажеттілігі бар жандарға арналған заманауи «Инклюзивті спорт орталығы» ел игілігіне табысталды.Қазақстан футбол федерациясының қолдауымен Қызылорда қаласындағы Ғ.Мұратбаев атындағы стадионның қосалқы алаңы мен Жалағаш ауданының орталық стадионы күрделі жөндеуден өтті. Жергілікті кәсіпкерлердің демеушілігімен 80 спорт-ойын алаңы орнатылған.<img src="https://knadmin.beoblood.kz/uploads/yzylorda_arena_6_e20f9c55e8.jpg" alt="Қызылорда арена 6.jpg">

Қызылордада көпфункционалды спорт кешенінің құрылысы қарқын алды

<a href="https://kyzylorda-news.kz/">Kyzylorda-news.kz</a> Қазалы аудан әкімі Алмасбек Есмахановтың төрағалығымен аппарат мәжілісі өтіп, ауданның әлеуметтік-экономикалық дамуына қатысты бірқатар маңызды мәселелер қаралды.Мәжілісте алдымен аудан басшысы туризмді дамыту – экономиканы әртараптандырудың, жаңа жұмыс орындарын ашудың және өңірдің әлеуетін арттырудың маңызды бағыты екенін атап өтті. Осы ретте аудан аумығындағы республикалық маңыздағы Жанкент археологиялық ескерткішінің туристік мүмкіндігін тиімді пайдалану, қажетті инженерлік инфрақұрылыммен қамтамасыз ету, туристік маршруттар бойындағы сервистік нысандардың жағдайын жақсарту, сондай-ақ «Батыс Еуропа – Батыс Қытай» халықаралық дәлізі бойындағы кешендердің стандартқа сай қызмет көрсетуі жөнінде нақты тапсырмалар берді. Сонымен қатар Жанкент қалашығының туристік әлеуетін кеңінен танытатын бірыңғай онлайн платформа әзірлеу қажеттігі де айтылды.Күн тәртібіндегі екінші мәселе – 2026-2030 жылдарға арналған «Қазақстан балалары» тұжырымдамасын іске асыру жайында болды. Аудан әкімі балалардың құқықтарын қорғау, қауіпсіздігін қамтамасыз ету, зорлық-зомбылықтың алдын алу, білім беру ұйымдарындағы қауіпсіздік талаптарының сақталуы &nbsp;сынды мәселелердің барлығы да ерекше бақылауда болуы тиіс екенін айтты. Бұл бағытта барлық тиісті органдарға ведомствоаралық бірлескен жұмыстарды күшейту тапсырылды.Мәжілісте 2025 жылдың қорытындысы бойынша ауданның макроэкономикалық көрсеткіштері де талқыланды. Өнеркәсіп, ауыл шаруашылығы, құрылыс, инвестиция тарту және тұрғын үй салаларында өсім қалыптасқаны айтылды. Дегенмен, кейбір ішкі салалардағы жоспарлардың орындалмауына байланысты аудан әкімі жауапты басшыларға ескерту жасап, ай сайынғы талдау жұмыстарын жүйелі жүргізу жөнінде нақты тапсырмалар берді.Сонымен қатар жылыту маусымының өту барысы, қатты отынмен қамтамасыз ету, көпқабатты тұрғын үйлердегі жылу мәселесі, әлеуметтік нысандардың қазандықтары, газға бейімдеу жұмыстары кеңінен қаралды. Аудан әкімі тұрғындардың өтініш-шағымдарына салғырт қарамауды, жылу беру мен көмір жеткізу мәселелерін толық шешуді қатаң тапсырды.Өрт қауіпсіздігі де назардан тыс қалған жоқ. Қыста өрттің алдын алу мақсатында түсіндірме жұмыстарын күшейту, әлеуметтік және тұрғын нысандарды қайта тексеру, ақпараттық жұмыстарды жандандыру жөнінде тапсырмалар берілді.Мәжіліс барысында тазалық, түнгі жарықшамдар, елді мекендердің көріктендірілуі мәселелері қозғалып, барлық мекемелер мен кәсіпкерлік нысандардың ауласы мен сыртқы келбетіне мән беру қажеттігі айтылды.Аппарат мәжілісінде берілген барлық тапсырмалардың орындалуы аудан әкімінің орынбасарлары мен жауапты сала басшыларына жүктеліп, аудан басшысы әрбір тапсырманың тиянақты орындалуы қатаң бақылауында болатынын жеткізді.

Мәжілісте туризмді дамыту мәселесі талқыланды

<a href="https://kyzylorda-news.kz/">Kyzylorda-news.kz</a> «AMANAT» партиясының «Ауыл аманаты» жобасы өз кәсібін дамытқысы келетін ауыл тұрғындарына мол мүмкіндік беруде. Жоба игілігін көріп отырған азаматтың бірі Арал ауданының тұрғыны Базаркүл Махамбетова. Ол жобасы аясында 7 миллион теңге көлемінде жеңілдетілген несие алып, Аудан орталығынан жартылай дайын өнімдер шығаратын шағын цех ашты.«Ауыл аманаты» жобасы аясында ашылған цехта бүгінде екі адам тұрақты жұмыспен қамтылған. Өндіріс орны заманауи талаптарға сай толық жабдықталған. Мұнда қамыр илейтін аппарат, өнімдерді қаптайтын арнайы құрылғы, пеш, нан өнімдерін пісіретін толқынды пеш, сондай-ақ өнімдерді сақтауға арналған тоңазытқыш орнатылған.<img src="https://knadmin.beoblood.kz/uploads/Zhartylaj_dajyn_nimder_3_e449ec10c7.jpg" alt="Жартылай дайын өнімдер 3.jpg"><blockquote>«Цехта дайындалатын жартылай дайын өнімдер санитарлық талаптарға сай әзірленіп, қапталып, Арал қаласындағы сауда орындары мен дүкендерге күнделікті жеткізілуде. Сұраныстың жоғары болуына байланысты тәулігіне 100-ге жуық өнім қапталып, сатылымға шығарылады»,- дейді Базаркүл Махамбетова.</blockquote>Партияның «Ауыл аманаты» жобасы – шағын кәсіпкерлікті дамыту арқылы ауылдағы ағайынның табысын арттыруға, халықты жұмыспен қамтуға бағытталған. Жаңа өндірістің іске қосылуы жергілікті нарықты сапалы әрі қолжетімді өніммен қамтамасыз етіп қана қоймай, өңір бюджетіне түсім әкеліп, «Ауыл аманаты» жобасының экономикаға тигізер пайдасын да айқын көрсетіп отыр.&nbsp;Атап өту керек, кәсіпкер алдағы уақытта өндіріс көлемін арттырып, өнім түрлерін көбейтуді жоспарлап отыр. Бұл өз кезегінде қосымша жұмыс орындарын ашуға және өңірдің әлеуметтік-экономикалық дамуына серпін берері сөзсіз.<img src="https://knadmin.beoblood.kz/uploads/Zhartylaj_dajyn_nimder_2_ac278956d6.jpg" alt="Жартылай дайын өнімдер 2.jpg">

«Ауыл аманаты»: жартылай дайын өнімдер шығаратын цех ашылды

<a href="https://kyzylorda-news.kz/">Kyzylorda-news.kz</a> Үкімет отырысында ҚР Премьер-министрі Олжас Бектенов балалар мен жасөспірімдерді дұрыс тамақтандыру мәселесін көтерді.Ақмарал Шәріпбайқызы, балалардың ішіп-жейтін тамағы – маңызды мәселе. Бізде өкінішке қарай, балалар мен жасөспірімдердің көбісі фастфудқа, энергетикалық сусындарға құмар. Тіпті кей кезде оған тәуелді болып қалады. Осы қауіпке бәріміз бүкіл ел болып, қоғам болып тойтарыс беруіміз керек. Бұл – өте қауіпті жағдай. Ұсыныстар енгізіңіздер, — деп атап өтті Олжас Бектенов.«Қазақстан балалары» тұжырымдамасы шеңберінде балалардың құқықтарын қорғау, қауіпсіздігі және әл-ауқаты саласындағы ведомствоаралық өзара іс-қимылды күшейту жөніндегі шаралар кешені көзделген. Биылғы 1 ақпанынан бастап барлық білім беру ұйымдарына «тосыннан кіріп келу» қағидаты бойынша ерекше бақылау мен қадағалау енгізіледі. Тексерулер балаларды сауықтыру, олардың қауіпсіздігі мен тамақтану сапасына қатысты болады.

«Балалар мен жасөспірімдер фастфуд пен энергетикалық сусындарға тәуелді»: Олжас Бектенов Денсаулық сақтау министрлігіне тапсырма берді

<a href="https://kyzylorda-news.kz/">Kyzylorda-news.kz</a> Бас прокуратураның Құқықтық статистика және арнайы есепке алу жөніндегі комитетінің Қылмыстық қатерлер мен қоғамдық қауіпсіздік тәуекелдерін болжау орталығы интернет-алаяқтықтың жаңа схемасы туралы ескертеді. Шетелдік дереккөздердің мәліметтері бойынша (https://vz.ru/news/2026/1/4/1385164.html, https://www.ixbt.com/live/offtopic/mvd-predupredilo-ovredonosnyh-zagruzkah-cherez-knizhnye-boty-v-telegram.html) алаяқтар тегін электрондық кітаптар ретінде Telegram-ға зиянды файлдарды таратады.Алдау схемасы өте қарапайым: Сіз Telegram-нан кітаптардың үлкен кітапханасына қолжетімділік туралы шектеусіз хабарлама аласыз. Қажетті басылым сұралғаннан кейін бот нақты сервиске имитиция жасай отырып, кітап сюжетінің қысқаша сипаттамасын жасайды, бірақ кітапты оқу немесе жүктеудің орнына Сізге «арнайы қосымша» деген атаумен вирустық файл жібереді. Файлды орнату өте ауыр салдарға әкеледі: парольдер мен ақшаларды ұрлау, хат алмасу және фотосуреттерге қол жеткізу, смартфонды қашықтан басқару және жеке деректерді жоғалту. Бейресми көздерден басқа қосымшаларды орнату жағымсыз салдарларға әкеп соғуы мүмкін. Кибергигиена ережелерін сақтау және жеке қырағылық осындай қауіп-қатерлерден қорғаудың негізгі шаралары болып қалуда.

Аяқталуы қауіпті «Тегін кітаптар»

<a href="https://kyzylorda-news.kz/">Kyzylorda-news.kz</a> Қазалы ауданының әкімі Алмасбек Есмаханов Әйтеке би кентіндегі №17 Қазалы ауданының олимпиадалық резервтің мамандандырылған балалар-жасөспірімдер мектебі мен бокс бөлімшесін, Қазалы спорт клубын және «Әмір арена» спорт кешендерін аралап, нысандардың қазіргі жай-күйімен және жұмыс барысымен танысты.Аралау барысында материалдық-техникалық база, ғимараттардың жай-күйі мен спорт нысандарын тиімді пайдалану мәселелері қаралды. Аудан басшысы бұқаралық спортты дамыту, жасөспірімдер мен жастарды спортқа кеңінен тарту – басты басымдықтардың бірі екенін атап өтті.Аудан әкімі аудандық дене тәрбиесі, спорт және туризм бөлімінің басшысы мен спорт мектептері мен кешендерінің директорларына бірқатар нақты тапсырмалар жүктеді. Атап айтқанда, спорт нысандарының санитарлық-тазалық жағдайын тұрақты бақылауда ұстау, жаттығу сапасын арттыру, спортшыларды даярлау жүйесін күшейту және алдағы жарыстарға дайындықты жоғары деңгейде ұйымдастыру қажеттігін қадап айтты.Сонымен қатар, спорт инфрақұрылымын тиімді пайдалану, бұқаралық спортты дамытуға бағытталған іс-шараларды жүйелі түрде өткізу тапсырылды. Аудан әкімі берілген тапсырмалардың орындалуы қатаң бақылауында болатынын жеткізді.Айта кетейік, бүгінде бұқаралық спортты дамыту мақсатында аймақ басшысының қолдауымен «Ауыл - ел бесігі» жобасы аясында Әйтеке би кенті мен Қожабақы ауылында 2 спорт кешенінің құрылысы қарқынды жүргізілуде. Ал, жуық арада ғана аудандағы 3 мыңға жуық халқы бар тіректі елді мекен – Бекарыстан би ауылында жаңа, заманауи спорт кешені пайдалануға берілді.

Қазалы: Аудан әкімі әйтеке би кентіндегі спорт мектептері мен кешендерін аралады

<a href="https://kyzylorda-news.kz/">Kyzylorda-news.kz</a> Ұлттық Құрылтай аясында өңірде өткен ауқымды іс-шараларды ұйымдастыруға атсалысқан кәсіпорындар мен жеке кәсіпкерлерді марапаттау шаралары өз жалғасын табуда.Осы орайда Қызылорда облысы әкімінің орынбасары Ардақ Темірханұлы Зебешев еліміздің тарихында алтын әріптермен жазылатын Ұлттық Құрылтайдың V отырысының өңірде жоғары деңгейде өтуіне айрықша үлес қосқан қонақ үй саласының өкілдерін қабылдады. Кездесу барысында олардың жауапкершілігі мен кәсібилігін атап өтіп, көрсетілген қызмет сапасы қонақтар мен делегация мүшелерінің оң бағасына ие болғанын жеткізді.Сондай-ақ бұл игі іс өңірдегі кәсіпкерлік субъектілерінің қоғамдық маңызды шараларға белсенді түрде атсалыса алатынын, бірлескен жұмыстың нәтижесі әрдайым жоғары болатынын атап өтті.Жиын соңында үлесті еңбегі үшін барлық қонақ үйлер ұжымына облыс әкімінің Алғыс хаты табысталды.<img src="https://knadmin.beoblood.kz/uploads/K_sipkerlik_zh_ne_nerk_sip_bas_armasy_2_8cc1d87588.jpg" alt="Кәсіпкерлік және өнеркәсіп басқармасы 2.jpg">

Қазақстан және Қызылорда облысының жаңалықтары