«Невада-Семей» халықаралық антиядролық қозғалыс күні1989 жылдың ақпанындағы екі жарылыстан кейін (12 және 17 ақпан) Қазақстан Жазушылар одағына мыңға жуық жастар жиналды. Митингте алғашқы антиядролық қозғалыс құрылды. Оған тарихтағы ең үлкен ядролық қару сынағы өткен екі қаланың атауы берілді.
1992 жылы&nbsp;ҚР Байланыс министрлігіне қарасты «Қазтелеком» кәсіпорыны Алматыда халықаралық спутниктік байланыс жүйесін орнататын Аустралияның «ОТС» фирмасымен келісімшартқа отырды. Қазақстан Аустралия арқылы бүкіл әлеммен байланысу мүмкіндігіне ие болды.
2002 жылы&nbsp;Алматыда Орталық Азия мемлекеттерінің басшылары Орталық Азия ынтымақтастық ұйымын құру туралы келісімге қол қойды.
2013 жылы&nbsp;ҚР Президенті Н.Назарбаев Кишинев қаласында Қазақстан Республикасының бас консулдығын ашу туралы Жарлыққа қол қойды.

28 ақпан: Атаулы күндер мен оқиғалар

<a href="https://kyzylorda-news.kz/">Kyzylorda-news.kz</a> ақпараттық агенттігінің 28 ақпанға арналған жұлдыз-жорамалы.
Тоқты
Құмар ойындарынан алшақ болыңыз, өйткені жолыңыз болмауы мүмкін. Жақын адамдарыңызға көбірек жылы шырай танытып, әңгіме-дүкен құрыңыз.
Торпақ
Үйде жөндеу жұмыстарын уақытша тоқтата тұрғаныңыз жөн. Құрал-жабдықтарға аса сақтықпен қараңыз, әйтпесе түрлі «тосын сый» орын алуы мүмкін.
Егіздер
Үйіңіздегі қарым-қатынаста қиындықтар тууы мүмкін, сол үшін сабыр сақтаңыз. Әр сөзіңізге абай болып, байыппен жауап беріңіз.
Шаян
Сіз араласып жүрген адамыңызбен қатынасыңыздың жойылу қаупі бар. Есесіне жұмысты немесе бизнесті жаңа адаммен сөзсіз бастауға болады.
Арыстан
Сізге өзіңізге қарама-қарсы жыныстағы адам назар аударады. Шашыңыздың түсін басқаша бояп, киім үлгіңізді өзгертуіңіз мүмкін.
Бикеш
Бұл күні аздап қаржылай қиындықтар туады. Керек емес заттарға шығынданудан сақтанғаныңыз абзал. Ақшаңызды қолайлы жеріңізде ұстауға тырысыңыз, әйтпесе оңай жоғалтып алуыңыз мүмкін.
Таразы
Жолдарыңыз бен әріптестіріңіз тындырған тірліктеріңізге қатты қуанады. Сіз жаныңыздағы жандардың қолдауын сезінбей жүрсіз, бірақ қолдау мен демеу көп.
Сарышаян
Махаббат қызығына бөлену үшін ең оңтайлы күннің бірі. Сүйіктіңізбен уақытты көп өткізгеніңіз абзал.
Мерген
Туысқандарыңыздың біреуіне сіздің көмегіңіз керек болады. Қолыңыздан келгенше аянып қалмай, көмек көрсетіңіз.
Тауешкі
Ерлі-зайыпты жандарға бүгін қолайлы күн. Жарыңызбен бірге үйдің көп тірлігін тындыра аласыз.
Суқұйғыш
Егер де ата-анаңызбен арада кикілжің туса, татуласуға өзіңіз бірінші қадам жасаңыз. Олар сізді міндетті түрде кешіреді.
Балықтар
Жүйкеңізді тоздырмағаныңыз абзал, көп ұзамай бәрі өз орнына келеді. Ал әзірше сүйікті кино немесе сериалыңызды көріңіз.

Жұлдыздар не дейді?

<a href="https://kyzylorda-news.kz/">Kyzylorda-news.kz.</a> Қызылорда облысындағы «Петро Қазақстан Құмкөл Ресорсиз» АҚ-ның кен орындарында 2019-2020 жылдардағы күзгі-қысқы кезеңі апатсыз режимде өтуде.
2020 жылғы 27 ақпандағы шұғыл ақпаратқа сәйкес:
– «Құмкөл» кен орнының газтурбиналық электр станциясында №2,4,5 ГТУ газтурбиналық қондырғылары жұмыс істеуде, №1 ГТУ резервте, №3 ГТУ жоспарлы жөндеуде, электр энергиясының сағаттық орташа тәуліктік өндірілуі 43,0 МВт құрайды және «Құмкөл» кен орнында электр энергиясының қажеттілігін 73%-ға жабады;
– «Арысқұм» кен орнының газ-поршенді электр станциясында №1,2,3,4 ГПУ қуаттылығы әрқайсысы 3,0 МВт болатын барлық газ-поршенді қондырғылары жұмыс істеуде, электр энергиясын өндіру 6,3 МВт құрайды және «Арысқұм» кен орнында электр энергиясының қажеттілігін 100%-ға жабады;&nbsp;
– «Майбұлақ» кен орнының газ-поршенді электр станциясында қуаты 1,0 МВт болатын №1 ГПУ газ-поршенді қондырғысы жұмыс істеуде, №2 ГТУ резервте, электр энергиясын өндіру 0,09 МВт құрайды, «Майбұлақ» кен орнындағы дизельді электр станцияларымен бірлесіп, электр энергиясын қажеттілікті 100%-ға&nbsp; жабады;
– «Оңтүстік-Шығыс Қызылмия» кен орнының газ-поршенді электр станциясында №1,2,3,4&nbsp; ГПУ газ-поршенді қондырғылары жұмысында электр энергиясын өндіру 0,74 МВт құрайды және кен орнындағы дизельді электр станцияларымен бірлесе отырып электр энергиясын қажеттілікті 100%-ға жабады.
Электр станциялары белгіленген режимде тұрақты және сенімді жұмыс істеуде.
Атомдық және энергетикалық қадағалау мен бақылау комитетінің Қызылорда облысы бойынша аумақтық департаменті

«Петро Қазақстан Құмкөл Ресорсиз» кен орындарындағы электр станцияларының жұмысы тұрақты

<a href="https://kyzylorda-news.kz/">Kyzylorda-news.kz.</a> ҚР Білім және ғылым министрі Асхат Аймағамбетов мұғалімдердің жалақысын кешіктіргендерді тәртіптік жауапкершілікке тартуды тапсырды. Бұл туралы министрліктің аппараттық кеңесінде айтылды, деп хабарлайды <a href="https://www.inform.kz/kz/ministr-mugalimderdin-zhalakysyn-keshiktirgenderdi-zhauapkershilikke-tartudy-tapsyrdy_a3618838?fbclid=IwAR1kQFyBJsl3j7UPCCcni-UrRj09ar4ILi-ckRopEbvcm5pXAOXeR5UkZjM">ҚазАқпарат</a>.
Министрдің айтуынша, кей өңірлерде педагогтер өз жалақыларын толық әрі уақытылы ала алмай отыр. Осыған орай, ведомства басшысының тапсырмасына сәйкес, апта соңына дейін барлық аймақтарда қызметтік тексеріс жүргізіліп, тиісті шаралар қолданылады.
<blockquote>
 «Жалақы төлеуде не себепті кешіктірулер тіркеліп жатыр? Министрліктің комитеттері әр өңірде тексеріс жүргізуі тиіс. Мән-жайды анықтап, жауаптыларды тәртіптік жауапкершілікке тарту керек. Мәселені бақылауда ұстаңыз», – деді Асхат Аймағамбетов вице-министр Бибігүл Асыловаға қарата айтқан сөзінде.
</blockquote>
Айта кетсек, жалақыны есептейтін онлайн-калькулятор іске қосылғалы бір ай ішінде мектепке дейінгі және орта білім беру мекемелерінің өкілдері шамамен 1 500 000 рет жалақыларын өздігінен есептеп, тиісті қаражатын анықтаған.

Министр мұғалімдердің жалақысын кешіктіргендерді жауапкершілікке тартуды тапсырды

<a href="https://kyzylorda-news.kz/">Kyzylorda-news.kz.</a> Сауд Арабиясы умра қажылығына келетіндерді елге кіргізуге уақытша шектеу қойды, деп хабарлайды <a href="https://24.kz/kz/zha-aly-tar/lemde/item/377135-saud-arabiyasyna-azhyly-a-baru-to-tatyldy">«Хабар 24»</a>.
Корольдік мұндай шешімді коронавирустың таралуына байланысты жасап отыр. Енді бейсенбіден бастап аталған кеселдің таралу қаупі жоғары елдердің визасын алған азаматтар ел аумағына кіре алмайды. Бұған қоса елге кіру бекеттерінде денсаулық сақтау органдары барлық шетелдіктердің Сауд Арабиясына келмес бұрын қандай елдерде болғанын тексереді.
Айта кетейік, жыл сайын миллиондаған адам умра қажылығына бару үшін Сауд Арабиясына барады.

Сауд Арабиясына қажылыққа бару тоқтатылды

<a href="https://kyzylorda-news.kz/">Kyzylorda-news.kz.</a> Әлеуметтанушы Айсұлу Молдабек қаржы алаяқтарынан сақтануға қажет пайдалы кеңестер берді, деп жазады <a href="https://informburo.kz/pikir/aisulu-moldabek/arzhy-piramidasyny-belgler-anday-zhne-oan-alay-aldanbaua-bolady.html">informburo</a>.
Ішкі істер министрлігінің&nbsp;ресми мәліметтеріне&nbsp;сәйкес, “Гарант24 Ломбард” ұйымына адамдардың салған ақшасының көлемі&nbsp;5 млрд теңгеден&nbsp;асып жығылады. Жалған ұйым&nbsp;42 мыңнан астам&nbsp;адаммен шарт жасаған. Осыған орай, Қылмыстық кодекстің алаяқтық және қаржы пирамидасына қатысты 190 және 217-баптары бойынша&nbsp;22 қылмыстық іс&nbsp;қозғалды.
Шыны керек, бұл Қазақстандағы бірінші қаржылық алаяқтық оқиғасы емес. Ірілі-ұсақты қаржы пирамидалары жыл сайын халықты алдап, ақшасынан айырып жатыр. Өкініштісі, бұдан сабақ алып отырған адам аз.
Келер жылы да жаңа “пирамидалар” пайда болып, олардан халқымыз тағы зардап шегіп жатса, таң қалуға болмайды. Өйткені, қаржылық сауаты төмен адамдар көп. Бұған “Қазақстан” арнасының “Ниет” бағдарламасының тікелей эфиріне (25.02.2020) қоңырау шалушылардың әңгімесін тыңдағанда, тағы бір көз жеткіздім.
Осыған орай,&nbsp;“Ел тұрғындары неге тез байып кетуге құмар?”&nbsp;және&nbsp;“Жалған қаржылық ұйымдарға алданбау үшін ақша салымы туралы ұсыныс түскенде, неге көңіл аудару керек?”&nbsp;деген екі сұраққа жауап берейік.
Бүгінде қаржы салу туралы таныс, туыстарынан немесе жеке қоңырау шалу арқылы ұсыныс алмаған адам жоқ шығар. Мұндайда бірден бас тартатындар бар. Дегенмен, қызығып, кірісі қанша екенін сұрайтындар да жеткілікті. Өкініштісі, компанияның қаржылық жағдайы, қызметі, табыс көзінен гөрі адамдарды қаржы салу жолдары, одан қандай табыс табатыны және табыс тапқан адамдар туралы ақпарат көбірек қызықтырады. Адамдарға ұсыныс жасаушының қоғамдағы бедел-абыройы мен танымалдылығы да ерекше ықпал етеді. Сөйтіп, өз ақылынан гөрі өзгенің ақылына жүгініп жатады. Бұл дұрыс емес!
Әрбір адам өз ақылына сеніп, қаржы пирамидаларының келесі белгілерін үнемі есте ұстағаны жөн:
<ul>
<li>Қатысушыларға аз уақыт ішінде немесе жүйелі түрде түсіп отыратын ақылға қонымсыз&nbsp;көп мөлшердегі кірісті&nbsp;уәде етеді. Мысалы, “салған ақшаңды екі есе етіп қайтарасың”, “айына 30-40-50 пайыз кіріс кіреді” сынды жалған уәделер;</li>
<li>Алғашқы жарна ретінде&nbsp;мол қаражатты&nbsp;сұрайды (кейде аз болуы да мүмкін). Ақша салу барысында нақты өнім, тауар болмайды немесе ұсынылып отырған тауар бағасы оның өзіндік құнынан бірнеше есе қымбат болады;</li>
<li>Негізгі түсім жаңа&nbsp;салымшылардың салған ақшасынан&nbsp;түседі және төлемдер де&nbsp;адам тартуына қарай&nbsp;төленеді;</li>
<li>Ұйымның&nbsp;нақты қызметі түсініксіз, бірақ, қаржы, инвестиция саласымен байланысты болады. Көп ретте қызметін “Алтынға, қаржылық қорға ақша саламыз” деп түсіндіреді.</li>
<li>Жарнама тым белсенді&nbsp;жасалады, үгіт-насихат үшін маркетингтік көптеген тәсілдер қолданылады;</li>
<li>Төмен пайызбен кредит, қарыз&nbsp;береді немесе&nbsp;жоғары пайызбен депозит&nbsp;ашуға мүмкіндік береді. “Банктегі кредитіңіздің 30-40 пайызын ұйымға құйсаңыз, қалған бөлігін жауып береміз” деген секілді ұсыныстар да айтылады;</li>
<li>Ұйым атауында, символикасы мен жарнамасында нарықта бар танымал банктер, микроқаржылық ұйымдар, ломбардтармен&nbsp;ұқсастық&nbsp;болады;</li>
<li>Ұйым&nbsp;сайты кәсіби емес, жарнамалық мақсаттағы арзанқол деңгейде болады. Сайтта жарғылық құжаттар, басшылық туралы ақпарат толық берілмейді.</li>
</ul>
Осылайша, тек қаражат салу арқылы ашық не желілік маркетингтің атын жамылған “пирамида-ұйымдар” салымшыларды барынша көбірек тартады да, ең жоғарысында тұрғандар кірісі еселеп өсіп, кейін жаңа салымшылар саны азайғанда пирамида құлайды. Табысқа жетпеген, бірақ, қаражат салған пирамиданың ортасы мен төменгі қабаттарындағы салымшылар пайдасыз қалады.
Осы тұста шынайы желілік марктетинг жаңа клиенттерге байланбайтынын айтып өткен жөн. Оларда ұйым табысының&nbsp;95 пайызы жеке клиенттерден, тек 5 пайызы ғана әріптестік орнату&nbsp;арқылы түсіп отырады. Яғни, ұсынылған тауардың нарықта өз бренді, тұтынушылары болады.
Ал&nbsp;“Қаржылық пирамида ұйымдар салымшыларын қалай арбайды және адамдар оларға қалай алданады?”&nbsp;деген сұраққа келсек, келесі ортақ белгілерді байқауға болады:
<ul>
<li>Ресми органнан алған құжатпен сендіреді.&nbsp;Жауапкершілігі шектеулі серіктестік (ЖШС) ретінде заңды тіркелген ұйымының құжатын көрсетеді. Бұл құжат, әдетте, ұйым кеңсесінде ілулі тұрады. Алайда, елімізде заңды тұлғаны тіркеудің&nbsp;<a href="http://www.egov.kz/">www.egov.kz</a>&nbsp;сайты арқылы 5-10 минутта жүзеге асатынын көпшілік азаматтар білмейді. Білсе де, оған негізгі құжат ретінде сенеді;</li>
<li>Салымнан&nbsp;мол табыс тапқан, шетелге саяхаттаған, қымбат көлік не өзге бұйымдарға қол жеткізген&nbsp;жандардың нақты мысалымен иландырады. Адамдар бейсаналы түрде олардың орнына өзін қойып көріп, көңілі ауады. Психологиялық, материалдық тұрғыда байланады. Өзгенің сынын қабылдамай, керісінше, басқаларды үгіттей бастайды;</li>
<li>Адамдардың әлсіз тұстарын дөп басады.&nbsp;Материалдық еркіндік, сұлулық, салмақ тастау, кәсіп ашу, өзіңді жетілдіру, өзіңе сенімді күшейту және осы секілді басқа да бүгінгі заманғы трендтегі құндылықтарды ұсынады. Осылайша, салымшылардың басын айналдырып, қосымша кеңес, тренингтер жүргізеді. Әлеуметтік желі арқылы жарнама жасайды;</li>
<li>Ең қымбат капитал – сенімді қолданады.&nbsp;Насихатшылар бейтаныс адамдарды тартпайды, өз ортасынан жаңа мүшелер іздейді. Адамдардың туыстығын, беделін, достығын, сезімін ортаға салады.</li>
</ul>
Бұл амал-тәсілдер адамның ақылын бейсаналы түрде байлайды. Сондықтан, бірінші ақылды жетекке алып, келесі дүниелерге назар аударған жөн:
<ul>
<li>Ұйымның заңды тіркелгендігі туралы құжаттағы қызмет түрі мен жасап отырған жұмысының бағыты сәйкес келуі тиіс. Егер қаржылық операциялар көрсетілсе, онда&nbsp;мемлекеттік лицензиясы&nbsp;болуы керек;</li>
<li>Ұйымның айлық, жылдық табысы, салығы, қызметкерлеріне төлеген жалақы, әлеуметтік, зейнетақы, сақтандыру төлемдері көрсетілген, салық басқармасына тапсырылған&nbsp;есебін, “қабылданды” деген құжатын немесе “салықтар мен төлемдер бойынша ешқандай қарызы жоқ” деген анықтаманы сұрау қажет. Егер ондай құжаттарда аз қаражат көрсетілсе немесе “нөлмен” жабылса, онда бұл ұйым табыстың көп бөлігін заңсыз жолмен тауып отыр деген сөз. Салымшылар есебінен салынған ақшаның ешқандай жолмен рәсімделмейтінін, есепке кірмейтінін көрсетеді;</li>
<li>Банктегі депозиттердің сақтандырылуы сияқты салынған қаржаттарды кепілдендіретін қордың болуы міндетті және ол келісім шартта көрсетілуі қажет;</li>
<li>Ұйым туралы ғаламтордан пікірлер іздеп көру қажет және мамандардың пікіріне жүгіну керек;</li>
<li>Ұйымның табысы салымшылардан не нарықта қалыптасқан тауар мен қызмет түрінен түсетінін ажырату қажет.</li>
</ul>
Қаржылық пирамидалардың Қазақстанда өркен жаюына елімізде қаржылық институттар мен құралдардың қажетті деңгейде жетілмеуі және халықтың қаржылық сауатының төмендігі себеп. Алданған адамдардың қаржылық пирамидаларға салған қаражатының көлеміне қарасақ, оларда артық ақша барын аңғаруға болады. Олар қаражатын инвестициялауға дайын. Бірақ,&nbsp;адал инвестициялық ұйымдар мен нақты өндірістік жобалар&nbsp;жоқ.
Елімізде ішкі инвесторлар әлеуетін пайдалану тәжірибесі мүлде дамымаған. Ол түгілі, бар, жиналған ақшаны (мысалы, зейнетақы қорындағы) игерудің, тиімді басқарудың өзі мұң болып отырғанда, халықтық IPO туралы айтудың өзі артық сияқты. Айналып келгенде, бұл мәселе қаржылық институттардың жұмысының әлсіздігі және тиімсіздігінен туындап отыр.
Екінші жағынан, азаматтарымыз&nbsp;қарапайым экономика заңдылықтарын білмейді: шығын мен кірістің ара қатыныасын ажырата алмайды, ауадан ақша жасауға болатынына сенеді. Халықтың қаржылық және құқықтық сауаты мен мәдениетінің тым төмен болуы да әсер етіп отыр. Бұл туралы президент Қасым-Жомарт Тоқаев та&nbsp;өз сөзінде&nbsp;айтып өтті.

Қаржы пирамидасының белгілері қандай және оған қалай алданбауға болады?

<a href="https://kyzylorda-news.kz/">Kyzylorda-news.kz.</a> ҚР Премьер-Министрі Асқар Мамин Атырау облысына жұмыс сапары аясында елімізде балық шаруашылығы саласын дамыту мәселелері жөнінде кеңес өткізді, деп хабарлайды&nbsp;<a href="https://primeminister.kz/kz/news/premer-ministr-rk-a-mamin-provel-soveshchanie-po-voprosam-razvitiya-rybnogo-hozyaystva-strany">Үкіметтің баспасөз қызметі</a>.
ҚР балық шаруашылығын дамытудың жай-күйі мен перспективалары туралы Экология, геология және табиғи ресурстар министрі М. Мырзағалиев пен «Балық шаруашылығы қауымдастығы – BD» ЗТБ атқарушы директоры Н. Жұмағалиұлы, өңірлердегі балық шаруашылығының проблемалық мәселелері туралы Атырау, Шығыс Қазақстан, Қызылорда, Түркістан облыстарының балық бизнесінің өкілдері, ҚР-да балық шаруашылығын дамыту туралы ресейлік профессор А. Литвиненко мен ҚР Парламенті Сенатының депутаты С. Еңсегенов баяндады.
Қазақстанның балық және балық өнімдері нарығының жалпы көлемі шамамен 66 мың тоннаны құрайды. Оның 45 мың тоннасы балық аулау кәсібіне, 7,4 мың тоннасы балық шаруашылығына тиесілі. Сонымен қатар 30 мың тоннасы экспортқа шығарылса, 43,5 мың тонна өнім импортталады.
Орта мерзімді перспективада отандық нарық көлемін 120 мың тоннаға дейін ұлғайту әлеуеті бар. Бұл алабалық пен Атлант ақсеркесін өсуінің арқасында импорт көлемін төмендетуге мүмкіндік береді. Сонымен қоса, әлемдік нарықтарға, атап айтқанда, Қытайға, Ресейге және Еуропаға экспорт көлемін арттырады.
Қазақстанда кәсіпшілік балық аулаумен балық шаруашылығының 1 мыңнан астам субъектісі айналысады. Оларға 1646 балық шаруашылығы су айдындары мен олардың учаскелері бекітілген. Аталған салада 11 мың адам жұмыс істейді.
Балық аулау негізінен Каспий және Арал теңіздерінде, Балқаш және Зайсан көлдерінде, Бұқтырма, Қапшағай және Шардара су қоймаларында, Алакөл көлдер жүйесінде, Жайық және Қиғаш өзендерінде қолға алынған. Негізгі кәсіптік өңірлер — Атырау – 13,1 мың тонна (29,2%), Шығыс Қазақстан – 8,2 мың тонна (18,3%), Қызылорда – 7,4 мың тонна (16,4%), Алматы – 6,6 мың тонна (14,6%), Маңғыстау – 2,3 мың тонна (5,2%) және Түркістан облыстары – 2 мың тонна (4,5%).
Қазақстанда балық шаруашылығы қарқынды дамуда — соңғы 7 жылда өсірілген балық көлемі 9 есе 800 тоннадан 7 мың тоннаға дейін артты. Елімізде балық өсірумен 180 балық шаруашылығы айналысады, оларда 1 мыңнан аса адам жұмыспен қамтылған.
Үкімет басшысы елімізде балық шаруашылығын дамыту үшін жүйелі шаралары қабылдау қажеттігін атап өтіп, биыл 1 сәуірге қарай ҚР Балық шаруашылығын дамыту тұжырымдамасының жобасын дайындауды тапсырды.
<blockquote>
 «Өзендердің суы қорғалатын аймақтарында жұмыс істеуге балық шаруашылықтарына тыйым салуды алып тастау, сондай-ақ балық шаруашылығы субъектілерінің су ресурстарын пайдаланғаны үшін жасайтын төлемдерін қысқартып, тек нақты су шығындары үшін төлемдерді қалдыру мәселесін қарастыру қажет. Төлем мөлшерлемесін азайтуды қоса алғанда, балық ресурстарын пайдаланғаны үшін төлем жасау тетігін жетілдіру керек», — деді А. Мамин.
</blockquote>
Премьер-Министр балық өнімдерін бақылау ақпараттық жүйесін әзірлеуді және енгізуді тапсырды.
<blockquote>
 «Бір ай ішінде Каспий теңізінде және Жайық өзенінде балық аулау мерзімдерін ұзарту, сондай-ақ түнгі уақытта балық аулауға рұқсат ету бойынша ұсыныстарды әзірлеу қажет. Балық шаруашылығы субъектілерін мемлекеттік қолдау шараларын арттыру және балық шаруашылығын экономиканың басымдықты салаларының қатарына жатқызу керек», — деді А. Мамин.
</blockquote>
Үкімет басшысы балық шаруашылығы мелиорациясын тұрақты жүргізу мақсатында су түбін тереңдету техникасын сатып алу мәселесін қарастыруды, сондай-ақ балық өсіру зауыттары мен балық шаруашылығының аумақтық инспекцияларын материалдық-техникалық жарақтандыруды қаржыландыру туралы ұсыныстар әзірлеуді тапсырды.
Жұмыс сапары аясында А. Мамин Атырау бекіре балық өсіру зауытына, «Амангелді атындағы» ЖШС, «Caspian Royal Fish» кәсіпорындарына барды, сондай-ақ ҚР балық шаруашылығы саласындағы жетістіктер көрмесін аралап көрді.
<img src="https://kyzylorda-news.kz/wp-content/uploads/2020/02/27balykshar2.jpg" alt="" />
<img src="https://kyzylorda-news.kz/wp-content/uploads/2020/02/27balykshar3.jpg" alt="" />

Қызылорда облысында жылына 7,4 мың тонна балық өндіріледі

<a href="https://kyzylorda-news.kz/">Kyzylorda-news.kz.</a> Ақтау қаласында өткен грэпплингтен және грэпплинг гиден жасөспірімдер арасындағы Қазақстан Республикасының чемпионатында аралдық қос спортшы олжалы оралды.
№19 Арал ауданының олимпиадалық резервтің мамандандырылған балалар-жасөспірімдер мектебінің спортшылары Ернұр Әбжамиев 32 кг салмақ дәрежесі бойынша грэпплингтен І орын, грэпплинг гиден ІІ орын иеленді. Ал, Мұхаммедали Марат&nbsp; 60 кг салмақ дәрежесі бойынша грэпплинг гиден чемпионаттың қола жүлдегері атанды.
Айта кету керек, қазіргі таңда Ернұр Арал қаласындағы №262 мектеп-гимназиясының 7-сынып, ал, Мұхаммедали №83 орта мектебінің 6-сынып оқушылары. Жеңімпаздардың жаттықтырушысы – Фараби Сауытбаев.
<img src="https://kyzylorda-news.kz/wp-content/uploads/2020/02/27aralsportshy2.jpg" alt="" />

Аралдық жас спортшылар ел чемпионатында олжалы оралды

<a href="https://kyzylorda-news.kz/">Kyzylorda-news.kz.</a> Қызылорда облысында ұлы ақын Абай Құнанбайұлының 175 жылдық мерейтойына арналған «Абай жолымен» атты республикалық ақындар айтысы өтіп жатыр. Сөз аламанын «Nur Otan» партиясының қолдауымен Қызылорда облысының әкімдігі ұйымдастырды.
Айтыстың ашылу салтанатына қатысқан «Nur Otan» партиясы Төрағасының бірінші орынбасары Бауыржан Байбек қазақтың төл өнеріне биыл ерекше қолдау болатынын айтты.
<blockquote>
 – Баршаңызға белгілі мен осы аптаның басынан бастап Шымкент қаласы мен Түркістан облысында болып халықпен кездестім. Бүгін Қызылорда облысына табан тіреп, Жаңақорған, Шиелі аудандарының тұрғындарымен пікірлесіп, ұсыныс-тілектері мен мәселелерін тыңдап, оның шешу жолдарын талқыладық. Бүгінгі сапарымның ерекшелігі – сіздермен бірге республикалық айтысқа қатысып, ақындардың өнерін тамашалауға келіп отырмын. Елбасы, «Nur Otan» партиясының көшбасшысы Нұрсұлтан Назарбаевтың тапсырмасы бойынша партия халқымыздың төл өнері – айтысты қолдап, дамытуды қолға алды. Былтыр біздің партияның қолдауымен 9 республикалық айтыс өтті. Биыл елімізде түрлі деңгейдегі 77 айтыс өтеді. «Nur Otan» партиясы барлық өңірдегі халықпен кездесуінде олардың пікіріне құлақ асып, оң шешімін табылуы үшін жұмыс жасап келеді. Сондай кездесулерде айтыстан бөлек, көркем әдебиеттің дамуына қолдау көрсетсе деп жатыр. Осы ұсыныс бойынша мүшәйра өткізуді ақылдасып жатырмыз. Халықтық партия ретінде ұлттық спорт түрлерінің дамуына атсалысып келеміз, – деді Бауыржан Байбек айтыстың ашылу салтанатында.
</blockquote>
Оның айтуынша, халықтың мұң-мұқтажын билікке айтыскерлер жақсы жеткізе біледі. Сондықтан, еліміздің әр өңірінде ақындар додасын жиілету қолға алыныпты.
<blockquote>
 – Әрине, біздің ұлттық мәдениетімізде айтыстың орны қашан да биік. Айтыс арқылы біз көптеген мәселелерді естиміз. Партияның мүшелері, депутаттар айтыс ақындары айтқан көптеген мәселелерге құлақ асып, оларды шешуге тырысамыз. Тәуелсіздік алған жылдардан бері елімізде қандай экономикалық қиын жағдайлар болса да, мәдениетке, оның ішінде, айтысқа қолдау көрсетілмей қалған емес. Елбасымыздың «Мәдени мұра», «Рухани жаңғыру», «Ұлы даланың жеті қыры» бағдарламаларының арқасында көптеген игі жұмыстар атқарылды, – деді «Nur Otan» партиясы Төрағасының бірінші орынбасары.
</blockquote>
Бүгінде ұлы Абайдың 175 жылдығына орай республиканың түкпір-түкпірінде түрлі іс-шаралар легі ұйымдастырылып келеді. Сыр елі де бұл тойдан тыс қалып жатқан жоқ.
<blockquote>
 – Елбасымыз «Алаштың анасы» деп бағалаған Сыр елінде ұлы ақынымыз Абай Құнанбайұлының 175 жылдық мерейтойына арналған шаралар легі жыл басынан басталды. Хакім Абайды ұлықтауға арналған шаралар Н. Бекежанов атындағы қазақ музыкалық академиялық драма театры сахналаған «Абай» қойылымынан бастау алды. Қала мен аудандарда да түрлі деңгейдегі мәдени-танымдық іс-шаралар өткізіліп келеді. Біздің Қызылорда облысы – қазақтың мәдениетінің нағыз қайнаған қара қазаны. Біздің өңірден талай өнер майталмандары шыққан. Сондықтан да, ұлы Абайды дәріптеуге арналған, Нұр-Сұлтан қаласында басталған айтыстың Сыр елінде жалғасуы заңдылық. Айтыс – барлық өнердің ұлысы. Ол тек өнер ғана емес, үлкен идеологиялық құрал. Сондықтан да, бүгін керемет сөз сайысы болады деп сенемін, – деді Қызылорда облысының әкімі Қуанышбек Ысқақов.
</blockquote>
Сыр еліндегі республикалық айтысқа еліміздің түкпір-түкпірінен келген 12 ақын қатысуда. Абайды ұлықтауға арналған сөз аламанына айтыстың үш буын өкілдері шақырылған. Үлкен буыннан Айбек Қалиев (Арқалық), Серік Құсанбаев (Өскемен), Кенжебай Жүсіпов (Қызылорда) айтыстың аламанын қыздырса, орта буыннан Әсем Ережеқызы (Нұр-Сұлтан), Мұхтар Ниязов (Қызылорда), Аспанбек Шұғатаев (Баянауыл), Жансая Мусина (Орал), Мейірбек Сұлтанхан (Қызылорда), Аруна Керімбек (Ақтөбе) сөз барымтасында сынға түспек. Сондай-ақ, жас буыннан Сұлужан Таубалды (Алматы), Бексұлтан Орынбасаров (Қызылорда), Аян Ниязбек (Шымкент) үлкендермен қатар үзеңгі қағыстыруға талпынып отыр.
Ал, айтыста өнер көрсеткен ақындарды белгілі халық ақыны Әсия Беркенова төрағалық еткен әділқазылар алқасы анықтайды. Олардың қатарында дүлдүл жырау Алмас Алматов, белгілі ақындар Ғалымжан Жайлыбай, Жанарбек Әшімжан, Бауыржан Халиолла бар.
Айта кетейік, айтыс ақындары көрермендердің алдында жұпталып отырады. Бұл өз кезегінде ақындардың суырыпсалмалық қасиетін көрсетіп, шаппа-шап айтысты дамыта түспек.
Сөз барымтасын қызылордалық Кенжебай Жүсіпов пен шымкеттік Аян Ниязбек бастады.
<img src="https://kyzylorda-news.kz/wp-content/uploads/2020/02/whatsapp-image-2020-02-27-at-17.24.21.jpeg" alt="" />

Қызылордада «Абай жолымен» атты республикалық ақындар айтысы өтіп жатыр

<a href="https://kyzylorda-news.kz/">Kyzylorda-news.kz.</a> Бүгін Қармақшы ауданының әкімі Мұса Қалдарбековтың төрағалығымен көктемгі дала жұмыстарына дайындықты пысықтау мақсатында мәжіліс өтті.
Аудан әкімдігіндегі мәжіліске ауданымыздағы шаруашылық басшылары мен ауылдық округ әкімдері, мекеме, кәсіпорын басшылары қатысты.
Мәжіліс барысында аудандық ауыл шаруашылығы басшысы С. Жолмахановтың хабарламасы тыңдалды.
Былтырғы жылы ауданда негізгі дақыл күріш пен өзге де ауыл шаруашылығы дақылдарының өнімдері мерзімінде ұйымшылдықпен жиналғанын айтып өтіп, көктемгі дала жұмыстарына дайындық барысы жайлы баяндады. Сонымен бірге биыл егілетін егіс көлемі мен алдағы уақытта атқарылатын жоспарлары жайлы бөлісті.
Жиын барысында ірі шаруашылық басшылары өздерінің ұсыныстары мен сауалдарын қойды.
Аудан әкімі жиынды қорытындылай келе шаруашылық басшыларының сауалдары талданып, алдағы жұмыс барысында назарға алынатындығын жеткізді. Сонымен қатар ауданның экономикасын ілгерілететін кәсіпкерлік саласында жүзеге асырылатын&nbsp; жобаларға баса назар аудару керектігін және өнімдерді өңдеу бағытында шағын кәсіпорындар ашу жолдарын қарастыру қажеттілігін айтып өтті.
<img src="https://kyzylorda-news.kz/wp-content/uploads/2020/02/27karmakshy2.jpg" alt="" />

Қармақшыда көктемгі дала жұмыстарына дайындық пысықталды

<a href="https://kyzylorda-news.kz/">Kyzylorda-news.kz.</a> Жапондық дәрігерлер тазалыққа арналған антиспектиктердің коронавирустан қорғайтын күшті құрал еместігін айтты, деп хабарлайды&nbsp;<a href="https://stan.kz/news-327758/">Stan.kz</a>.
Қазіргі кезде жұқпалы індеттің таралуына байланысты аталған дезинфекциялаушы құралдар жаппай сатылып жүр екен. Десек те мамандар қолдарға арналған антисептиктерді шамадан тыс қолдану денсаулыққа кері әсерін тигізетіндігін айтты.&nbsp;
Мұның себебі тазалаушы құралдардың құрамында спирттің көп мөлшері болғандықтан деп түсіндірді жапондық сарапшылар. Антисептиктер терінің қорғаныштық қызметінен зиян келтіреді, соның салдарынан ағзаның вирусқа тап болуы екі есе жоғарылайды.&nbsp;
Сондай-ақ мамандар сабынмен қолды 30 секундтан көп уақыт жумауға кеңес берді. Бұған қоса қолды жуғаннан кейін оны мұқият сүртіп, кептірген жөн. Себебі ылғалды тері&nbsp;жұқпалы вирустарды жұқтыруға бейім келетіні айтылыпты.

Ғалымдар: Қолға арналған антисептиктер коронавирусты жұқтыру қаупін жоғарылатады

<a href="https://kyzylorda-news.kz/">Kyzylorda-news.kz.</a> «Nur Otan» партиясының хатшысы Арман Қырықбаев Қызылорда облысында жергілікті ардагерлер және қоғамдық кеңес мүшелері, әр түрлі сала көшбасылары, БАҚ өкілдері және блогерлермен кездесіп, пікірлесті.
Ә.Тәжібаев атындағы облыстық ғылыми-әмбебап кітапханасында өткен кездесуді партияның облыстық филиалы төрағасының бірінші орынбасары Ақмарал Әлназарова жүргізіп отырды. Еркін әрі ашық форматта өткен кездесуге, сондай-ақ, Қызылорда облысы әкімінің орынбасары Наурызбай Байқадамов қатысты.
<blockquote>
 – Елбасы, «Nur Otan» партиясының көшбасшысы Нұрсұлтан Әбішұлы «Алаштың анасы» деп бағалаған қасиетті Сыр өңіріне бұл менің алғашқы жұмыс сапарым. Осы уақытқа дейін түрлі лауазымдарда қызмет атқарсам да, Қызылорда облысына тұңғыш рет аяқ басып тұрмын. Түрлі даңқты тұлғалар шыққан осындай киелі елдегі сіздермен кездесуіміз жемісті боларына сенемін деген, – партия хатшысы Арман Оразбайұлы «Nur Otan» партиясының алға қойған мақсаттары мен елімізде жүзеге асырып жатқан саяси реформаларына, қолға алған жұмыстарына жан-жақты кеңінен тоқталып өтті.
 – «Nur Otan» партиясы өңірлерге шығып, жергілікті тұрғындармен кездесіп, олардың жағдайымен танысуды нақты қолға алуда. Партия төрағасының бірінші орынбасары Бауыржан Байбек бүгін жаңажан құрылған Түркістан облысында жүр. Оның алдында Атырау, Павлодар облыстарында болып, жергілікті халықпен жүздесіп, түйткілді мәселелермен танысты. Ертең Қызылорда облысының Жаңақорған, Шиелі аудандарында болып, тұрғындармен кездеспек. Осы аудандардағы бірнеше мәселелердің мән-жайына қанығып, олардың шешілуіне атсалысатын болады. Сондай-ақ, «Jas Otan» Жастар қанаты да өңір жастарымен кездесулер өткізіп, белсенділік танытуда. Жазға дейін барлық аймақтарды аралап, өзекті сұрақтарды көпшілікпен бірге зерделеу жоспарымызда. Мұндағы мақсат – халықпен етене араласу арқылы оларды мазалап отырған мәселелерді анықтап, партия бағдарламасында қамтып, шешімін табуға себепкер болу. Өздеріңізге белгілі, 2017 жылғы конституциялық реформа еліміздегі саяси партиялардың маңызын айтарлықтай арттырды. Мәселен, жергілікті өкілді органдарды пропорционалды жүйемен сайлау бізде 2018 жылдың өзінде-ақ енгізілді. Көп айтылып жүрген Грузияның өзінде халық бүгінде билігінен осыны талап етіп отыр. Бұл – партиялардың өңірлік деңгейдегі жауапкершілігін күшейтетуге бағытталған нақты қадам. Енді партиялар ауылды аймақтардың, шалғай елді мекендердің мәселелеріне қарай түбегейлі бет бұратын болады. Оны өз бағдарламасының өзегі етіп алады. Бұл қай жағынан алғанда да дұрыс. Мәслихаттардың сайлану ережесіне өзгерістің енгізілгеніне екі жылға таяғанын ескерсек, жергілікті мәселені шешпек түгілі кейбір аудан, қалада өз филиалын ашуды қажет деп таппайтын, алыстан орағатып, сынаумен шектелетін басқа партияларға да өңірлік жұмысын пысықтап алу үшін таптырмас мүмкіндік берілді деп айта аламыз. Ал, «Nur Otan» өңірлерге қарай бетбұрыс жасайтын бұл өзгеріске тастүйін дайын. Біз жергілікті жерлердегі ниеті адал, мұраты түзу барлық белсенді азаматтарды осы жұмыстарымызға атсалысуға шақырамыз, – деді ол.
</blockquote>
А. Қырықбаев партия қолға алған жобалар мен бағдарламаларды да кеңінен түсіндіріп, олардың маңыздылығына ерекше баса назар аударды. Мәселен, партияның «праймериз» жобасын қызылордалықтар да ерекше қабылдап, қолдайтындықтарын жеткізді.
<blockquote>
 – «Nur Otan» халықаралық тәжірибеге талдау жасай отырып, халықпен жұмыс істеудің жаңа тәсілдерін енгізуде. Соның бірі әрі бірегейі – ішкі партиялық сайлау, яғни праймериз. Бұл жаңалыққа көптеген саясаттанушы-сарапшылар қызығушылық танытып отыр. Бірақ қарапайым адам үшін праймериз деген не? Нақты айтсақ, партия өз қатарындағылар мен жақтастары арасында алдағы сайлауға үміткерлерді іріктеу үшін алдын ала ішкі таңдау өткізеді. Бір сөзбен айтқанда – сайлау алдындағы ішкі сайлау. Бұйыртса, көктемде кәдімгідей дода, дебат, үгіт-насихат жұмысы болады. Суырылып шыққан ең мықты, елге сөзі өтетін беделділер партия атынан үміткерлер тізіміне ілініп, үлкен сайлауға түседі, – А. Қырықбаев.
</blockquote>
Партия хатшысының айтуынша, праймериз – әлемде кең тараған саяси тәсіл. Әсіресе дамыған демократияларда саяси партиялар осылай алдын-ала ішкі «сайлау» өткізіп алуға тырысады. Ол бір жағынан партияның өз ішіндегі мықтыларын іріктеуге мүмкіндік берсе, екінші жағынан, партиямен мұраттас, елдің сөзін сөйлейтін басқа да азаматтарды қатарға тартудың құралы.
<blockquote>
 – Праймериз арқылы партияның кез келген мүшесі және партия қатарында болмаса да, елдік мүдде жолында онымен мұраттас барлық азаматтар, арнайы өтініш беріп, іріктеуге қатысуға, жеңсе тізімге енуге мүмкіндік алмақ. Қатысу тәртібінің жобасы қазір өңірдегі филиалдармен бірлесе пысықталуда. Ресми бекітілгеннен соң жарияланады. Бағымды сынаймын дегендерге жол ашық. Бұл – көкейдегі елге деген пайдалы ойларымды қалайша іске асырамын деп жүрген белсенді жандарға жақсы мүмкіндік. Өйткені, мұндай мүмкіндік ұсына алатын бірден-бір партия – ол «Nur Otan». Сын айтылуы керек, әрине. Дегенмен, тек сынап қана қоймай, мүмкіндікті пайдаланып, тізе қосып, елге қызмет етеік. Мәселен, өткен жылғы қарашада 14 өңірде пилоттық жоба ретінде праймериз өткізіліп, сол жерлердегі партияластардың 98%-ы қатысты. 1 орынға 4 адамнан келетін жақсы бәсеке болды, – деді партия хатшысы.
</blockquote>
Партия хатшысы Арман Қырықбаевпен Сыр еліндегі кездесуде қызылордалықтар өздерінің ұсыныс-пікірлерін айтып, бірнеше мәселелерді көтерді. Мәселен, «Невада-Семей» республикалық қозғалысының Қызылорда облыстық филиалының төрағасы Сәбит Әбіш қазір талқыланып жатқан ардагерлер туралы заң жобасында Ұлы Отан соғысы, тыл және ауған соғысы ардагерлерінің мәселесі ғана қаралып жатқанын айтып, аталған заңда елімізде болған түрлі апаттарда зардап шеккен ардагерлердің де статусы айқындалуына партия ықпал етсе деген өтінішін жеткізді.
<blockquote>
 – Қызылорда облысында бүгінгі таңда 80 қолөнер шебері бар. Осы кісілердің басын қосып облыста «Қолөнер орталығын» құрдым. Енді осы жұмысымызға қолдау көрсетіліп, орталық салынса, онда түрлі байқаулар мен фестивальдер ұйымдастырылса деген тілегіміз бар. Басқа облыстармен салыстырғанда біздің өңірде бұл өнердің дамуы төмен. Осыған қолдау көрсетсеңіз, – деді Қазақстан қолөнер шеберлерінің мүшесі Қарлығаш Ілиясова.
</blockquote>
Облыстық жемқорлыққа қарсы күрес кеңесінің мүшесі Серік Теңізбаев көлік құралдарына заңсыз салық салу мәселесін айтса, «Қызылорда облыстық мүгедектер қоғамы» қоғамдық бірлестігінің директоры Мұрат Жұмаділдаев «Nur Otan» партиясының «Кедергісіз келешек» жобасының өңірде орындалуы төмен деңгейде екендігіне шағымданды.
<blockquote>
 – Осы жобаның орындалуын орталық аппарат өз бақылауына алып, қажет болса, жобаға қолдау көрсетпей отырған басшыларға шара қолданса, – деді ол.
</blockquote>
Ал, Қызылорда қаласының құрметті азаматы, саяси ғылымдарының докторы Әбдіжәлел Бәкір мен облыстық «Қазақ тілі» қоғамының төрағасы Сәпен Аңсат партияның нақты іс-жоспарларына кіруі керек бірнеше мәселелерді көтеріп, өз ұсыныстарын ортаға салды.
Қалалық мәслихат депутаты, журналист Сәрсенкүл Бихожа жергілікті партия филиалдарының жанынан барлық өңірлерде халықтың көңіл-күйін зерттейтін орталықтар ашылуы керектігін айтты.
Ал, облыстық кәсіпкерлер құқығын қорғау кеңесінің төрағасы Болат Нұрходжаев ауылдық жерлердегі кәсіп ашу туралы заңның ірі қалалардағы сауда үйін ашумен бірдей екендігін, бірнеше қиындықтарын атап өтті. Белгілі қызылордалық дінтанушы Бақтияр Оспанов еліміздің киноиндустриясындағы бірқатар кемшіліктерді тілге тиек етті.
Қызылордалық ағайынның ұсыныс-пікірлері мен өтініштерін, көтерген мәселелерін жіті тыңдаған партия хатшысы Арман Қырықбаев олардың барлық сауалдарына жауап беріп, кездесуде айтылған мәселелерді партия бақылауына алатынын жеткізді. Ал, кездесуді қорытындылаған Қызылорда облысы әкімінің орынбасары Наурызбай Байқадамов Арман Оразбайұлына Сыр еліндегі осындай ашық форматтағы еркін жүздесуі үшін алғысын айтып, көтерілген бірнеше ұсыныс-пікірлердің облыс деңгейінде шешімін табатындығын атап өтті.
<img src="https://kyzylorda-news.kz/wp-content/uploads/2020/02/27arman4.jpg" alt="" />
<img src="https://kyzylorda-news.kz/wp-content/uploads/2020/02/27arman1.jpg" alt="" />
<img src="https://kyzylorda-news.kz/wp-content/uploads/2020/02/27arman3.jpg" alt="" />
<img src="https://kyzylorda-news.kz/wp-content/uploads/2020/02/27arman2.jpg" alt="" />
<img src="https://kyzylorda-news.kz/wp-content/uploads/2020/02/27arman6.jpg" alt="" />

Қазақстан және Қызылорда облысының жаңалықтары