<a href="https://kyzylorda-news.kz/">Kyzylorda-news.kz.</a> Қазақстан мен Қазақ хандығының тарихында 9 астананың болғанын біліп пе едіңіздер?
Олардың кейбіреулері бірнеше жылдың ішінде ғана астана болып табылған, ал&nbsp;басқалар ғасырлар бойы астана мәртебесіне ие&nbsp;болып тұрған. Әр&nbsp;қаланың өз&nbsp;міндеті болған, олардың әрқайсысы қазақстандық мемлекеттіліктің тарихындағы өз&nbsp;дәуірін бейнелеген еді.&nbsp;
Созақ. Ежелгі Созақ қаласы Қазақстан хандығының алғашқы астанасы болған (1465–1469). Ол&nbsp;Жәнібек пен Керей&nbsp;— Қазақ хандығының негізін қалаған хандардың ордасы болып табылған. Бірақ та&nbsp;Әбілқайыр ханның өлімінен кейін даладағы билік үшін күрес қайта басталды. Астана осы қаладан көшірілген. Кейбір деректер бойынша, XVI ғасырда Шығай хан билегенде, Созақ қаласы Қазақ хандығының астанасы болып қайта аталған. Осы кездегі хандықтың ордасы ретінде Сығанақ қаласы болып саналған. Қазіргі кезде Созақ&nbsp;— Оңтүстік Қазақстан облысындағы шағын ауыл. Оның ортасында ортағасырлық бекіністердің қалдықтары сақталған.
Сығанақ.&nbsp;Сығанақ қаласының Қазақ хандығының астанасы қай кезде болғанын айту қиын болады, өйткені бұл туралы нақты деректер жоқ. Бәлкім, XV&nbsp;ғасырдың 70-ші жылдарынан XVII ғасырға дейін ол&nbsp;қала астана болған. Оның қалдықтары Сұнақата ауылынан солтүстікке қарай екі шақырым жерде орналасқан. Аталмыш ауыл Қызылорда&nbsp;— Шымкет тас жолында орналасқан. Қаланың атауы жазба деректерден және XIV ғасырда мұнда шығарылатын монеталардан белгілі болды. Сығанақ қаласы алғашқыда&nbsp;X ғасырдың деректерінде кездеседі, ал&nbsp;XI ғасырда Махмұд Қашқари оны оғыздардың қаласы деп атаған. Бір кезде ол&nbsp;керуендердің жолындағы сауда мен қолөнер орталығы болған. Қазіргі кезде шаһардың жанында құрғақ дала, мұнда сексеуіл, тікенекті бұталар өседі. Қыш тақталары мен күйдірілген кірпіштердің қалдықтары бар биік емес дөңдер ежелгі сәулеттік құрылыстардың дәлелі болып табылады. Сығанақ маңайында осындай құрылыстар аз&nbsp;емес болған деп көрінеді.
Түркістан. Түркістан қаласы (Яссы) түркі тілдес халықтардың рухани мен саяси орталығы ретінде белгілі болып, XVI ғасырдың аяғынан бастап XVII ғасырдың 30-ші жылдарына дейін Қазақ хандығының астанасы болған. Орта Сырдария Қазақстан хандығына кіргеннен кейін Яссы қаласы қазақ хандығының резиденциясына айналып кеткен, осы кезде ол&nbsp;ірі сауда мен қолөнер орталығы болып саналған. Қазақ хандары жас мемлекеттің құрамында болған көшпелі тайпаларды нығайту үшін осы қаланың геосаяси мен рухани маңыздылығын түсінген еді. Қазіргі таңда осы қалаға Қазақстанның, Орта Азия мен басқа елдердің мұсылмандары қажылық жасау үшін барады. Қажыға барушылардың сөзіне қарағанда, Қожа Ахмет Ясауи кесенесіне жасаған үш&nbsp;сапар ұмраға&nbsp;— кіші қажылыққа теңестіріледі.
Ташкент. Қытайдан Еуропаға апаратын Ұлы Жібек Жолындағы ежелгі қалалардың бірі болған. Б. з.&nbsp;д. II&nbsp;ғасырда қалалық қоныс ретінде Ташкент туралы алғашқы мәліметтер шығыс дереккөздерде пайда болған. Қазақтар Ташкенті 1586 жылы жаулап алған, ал&nbsp;1630 жылы осы қала Қазақ хандығының астанасы болып бекітілген. Шамамен жүз жыл бойы Қазақ хандығының ордасы болған. Есім хан Ташкент басшылығын жойып, Ферғана қаласын жаулап алғанда, бейбітшілік үшін Самарқанд, Бұқара қалаларынан бас тартады. Ташкент астана мәртибесіне ие&nbsp;болғанда, мұнда жыл сайынғы Мәслихат (заң шығаратын ең&nbsp;жоғары өкімет билігі ) жиналысы өткен. Бірақ та&nbsp;Ақтабан шұбырынды жылдарында (1723-1727) жоңғарлар қытайлықтармен бірлесіп, қазақтарға қарсы соғысып жүрген, осы кезде қазақтар Ташкент қаласынан айырып қалған.
Семей. Семей қаласы&nbsp;— Алаш автономиясының астанасы (1917-1920&nbsp;годы). Семей қаласының тарихы 1718 жылы басталған. Ол Петр I дәуірінде салынған. Осы кездегі шығыс жерлерді қорғау мен Иртыш маңындағы бекіністерді салу туралы Петр I&nbsp;Жарлығы шыққан. Одан кейін Семей бекінісі өзінің әскери-стратегиялық нысан ретіндегі қызметінен айырмай, сауда орталығына-да айналып кетті. Сауда орталығы ретінде ол&nbsp;Ресей мен Қазақстанды, Ресей мен Орта Азияны, Батыс Қытайды байланыстырды. XIX ғ. мен&nbsp;XX ғасырдың басында осы қалаға Ресейдің зиялы қауым өкілдері жер аударылып жіберілген. Сол себептен&nbsp;де, Алаш автономиясының Орынбордағы жалпықырғыздық съезінде Семей қаласы астана ретінде таңдалған.
Орынбор. Орынбор қаласының негізі 1743 жылдың 19&nbsp;сәуірінде қаланған. Алғашқы бекініс 1735 жылдың 31&nbsp;тамызында қазіргі Орсктің орнында салынған, осылай, қаланың атауы да&nbsp;пайда болды — Орынбор (Орь өзенің бойында орналасқан бекініс). 1920 жылдың 26&nbsp;тамызында Бүкілресейлік Орталық Атқару Комитеті мен РКФСР Халық Комиссарлары Кеңесінің Қырғыз (Қазақ) АССР-ін кұру туралы Декреті шықты. Орталығы Орынбор қаласы болып белгіленді. Бірақ та&nbsp;1925 жылы Қазақстан астанасы Сырдария өзенінің бойында орналасқан Ақмешіт қаласына көшірілген. Сондықтан да&nbsp;оның атауы Қызылорда (Қызыл астана) деп өзгертілген. Орынбор мен Орынбор облысы дербес губерния ретінде РСФСР құрамына кірді.
Қызылорда. Ақмешіт бекінісін 1820 жылы Қоқан ханы Омархан салғызған.. Бастапқыда ол&nbsp;қазақ даласындағы Қоқан хандығының форпосты ретінде болған.&nbsp;1853 жылдың 28&nbsp;шілдесінде оны В.&nbsp;А.&nbsp;Перовский басқаруымен орыс әскерлері жаулап алып, Форт-Перовский деп өз&nbsp;атауын берген. Осы кезде бекіністі Якуп бектің басқаруымен қоқандықтар қорғаған.&nbsp;1917 жылдың 30&nbsp;қазанында қалада Кеңес өкіметі орнады. Ал&nbsp;1922 жылы қалаға оның бұрыңғы атауы Ақмешіт қайта берілген болатын.&nbsp;1925 жылы астана Орынбор қаласынан осы қалаға көшірілді, сол себептен де&nbsp;қалаға Қызылорда деп атау берілген. 1925-1927 жылдары РСФСР құрамында болған Қазақ автономиялық республикасының астанасы Қызылорда болған.
Алматы. Алматы қаласы 1929-1998&nbsp;жж. Қазақстан астанасы болған. X-XIV&nbsp;ғғ. қазіргі Алматының орнында ортағасырлық Алмату қонысы болған. Кейін 1854 жылы орыс казактары Верный фортын салынған. XIX ғасырда әскери бекіністі салу мақсатында мұнда казактар келген. Өңірдің сұлулығы мен қолайлы климаты оларды таңқалдырды.&nbsp;1855 жылы Орталық Ресейден Верный қаласына алғашқы қоныстанушылар көшіп келген. Осы кезде Алаутау ауылдық округінің әкімшілік орталығы көшірілді.&nbsp;1927 жылы құжаттар бойынша қала автономияның астанасы болып тағайындалды, ал&nbsp;шын мәнінде тек 1929 жылы астана қызметін атқара бастады. Осы кезден бері ауқымды құрылыстар жүргізіле бастайды. Қазіргі күнге дейін де&nbsp;қала Қазақстандағы ірі қалалардың бірі мен елдің мәдени орталығы болып табылады.&nbsp;
Астана. Ақмола қаласының шексіз далаларында әртүрлі өркениеттер мен мәдениеттер тоғысқан. 1997 жылы саяси, экономикалық, халықаралық жағдайларға байланысты Республиканың астанасы қазақ даласының орталығына — Ақмола қаласына (қазіргі кезде&nbsp;— Астана) көшірілген. Өзінің қиын экономикалық жағдайына қарамастан, жас Қазақстан осындай шешім қабылдады.
2019 жылы Астана қаласының атауы ҚР Тұңғыш Президенті – Елбасы Нұрсұлтан Назарбаевтың құрметіне Нұр-Сұлтан болып өзгертілді.
<a href="https://e-history.kz/kz/publications/view/998">E-history.kz</a>

Қазақстанның астанасы болған тоғыз қала туралы білесіз бе?

1925 жылы Қазақстан астанасы Орынбордан Қызылордаға көшірілді.
1931 жылы ақиық ақын, аудармашы, драматург, Қазақстанның Мемлекеттік сыйлығының лауреаты, «Ғасыр ақыны» атағының иегері МАҚАТАЕВ Мұқағали дүниеге келді.
1935 жылы Қазақ АССР Орталық Атқару комитеті төралқасы Республиканың негізгі ұлтының атауын орыс тілінде «казахи», ал республика атауын «Казахстан» деп жазу жөнінде қаулы етті. Мұнан бұрын «казаки», «Казакстан» деп жазылатын. 1985 жылы Қазақстан жазушылар одағы Мұқағали Мақатаев атындағы сыйлықты бекітті.
1938 жылы Қызылорда облыстық тұтынушылар қоғамы құрылды.
1983 жылы Қызылорда облысы Жосалы кентіндегі Сарыөзек көшесіне халық ақыны Тұрмағамбет Ізтілеуовтің есімі берілді.
1994 жылы Қызылорда қаласындағы Пионерская көшесіне Тоғанас батырдың есімі берілді.
2000 жылы Мұқағали Мақатаевтың «Аманат» таңдаулы өлеңдер жинағы Қазақстан Республикасының мемлекеттік сыйлықтың иегері атанды.
2011 жылы Қызылорда көшелерінің біріне қоғам қайраткері Қозытай Әбуовтың есімі берілді.
2015 жылы ҚР Тұңғыш Президенті–Елбасы&nbsp; Нұрсұлтан Назарбаев жастардың мемлекет және қоғам өміріне белсенді қатысуын, олардың әлеуметтік инфрақұрылымға қолжетімділігін қамтамасыз етуге, жастар саясатын іске асыруда мемлекеттік органдардың жауапкершілігін арттыруға бағытталған «Мемлекеттік жастар саясаты туралы» Қазақстан Республикасының Заңына қол қойды.
2016 жылы ҚР Тұңғыш Президенті–Елбасы&nbsp; Нұрсұлтан Назарбаев «Сотталған тұлғаларды қайтару туралы Қазақстан Республикасы мен Үндістан Республикасы арасындағы келісімді ратификациялау туралы» ҚР Заңына қол қойды.

9 ақпан: Атаулы күндер мен оқиғалар

<a href="https://kyzylorda-news.kz/">Kyzylorda-news.kz</a> ақпараттық агенттігінің 9 ақпанға арналған жұлдыз-жорамалы.
Тоқты
Көлік алуға, жағымды жаңалық жасау немесе белсенділік танытатын күн. Белсенділігіңіздің арқасында аяқталмаған біраз шаруаны тындырасыз.
Торпақ
Өз көзқарасыңызды, өзгелер туралы пікіріңізді өзгертпеңіз. Жақын адамыңызбен қарым-қатынасыңыз алшақтап, түсініспеушіліктер орын алуы мүмкін.
Егіздер
Тағдырға қарсы келемін деп әуре болмаңыз. Бүгін жолыңыз болмағанымен, келер күні барлығы сәтімен болар.
Шаян
Бүгін сіздің жұмысыңыз жемісті болмақ. Өзіңізге деген сенімділігіңіз артады. Көңіліңізде ешқандай алаңдаушылық немесе қорқыныш жоқ.
Арыстан
Өте керемет күн. Сауда жасауға да қолайлы. Демалыс күніңізді жақсы өткізесіз. Бұл күні көбісі сізге қызыға қарайды.
Бикеш
Ойламаған жерден мол табысқа ие боласыз. Жылжымайтын мүлік немесе көлік аламын деп жүрсеңіз бүгін сол ойыңызды жүзеге асырыңыз.
Таразы
Сізді бүгін тосынсыйлар мен сый-сияпаттар күтіп тұр. Есесіне өзіңіз де мол қаражатты жұмсап жібересіз.
Сарышаян
Серіктестермен қарым-қатынаста абай болыңыз. Туындаған мәселелердің барлығын тез арада шешіп отырыңыз.
Мерген
Сырт келбетіңізге мән беріңіз. Мақсатқа жету үшін біраз қадамдарға барасыз. Бірақ ойларыңызбен, жоспарларыңызды құпияда ұстаңыз.
Тауешкі
Айналаңыздағылардың барлығы бірдей сіздің талғамыңызбен жүруі міндетті емес. Өзгелердің таңдауына түсіністікпен қараңыз.
Суқұйғыш
Жетістікке жетуге деген талпынысыңыз оң нәтижесін береді. Мықты маман ретінде сұранысқа ие боласыз.
Балықтар
Істеріңіздің барлығы алға басады. Бұл қарсыластарыңыздың қызғанышын тудыратыны анық.

Жұлдыздар не дейді?

<a href="https://kyzylorda-news.kz/">Kyzylorda-news.kz.</a> Қызылорда облыстық мекемелер үйінде облыс әкімінің орынбасары, әйелдер істері және отбасылық демографиялық саясат жөніндегі комиссия төрағасы Наурызбай Байқадамовтың төрағалығымен облыстық әйелдер кеңесінің отырысы өтті.
Кеңес отырысында қаралған негізгі мәселе – облыстық әйелдер кеңесінің төрайымын қайта сайлау.
Осыған дейін бұл қоғамдық ұйымның басшысы болған Нұрсәуле Мусаева облыстық Қазақстан халқы ассамблеясы жанындағы Аналар кеңесінің төрайымы ретінде жұмыс атқара беретін болды. Ол – Қазақстан халқы Ассамблеясының мүшесі.
Облыстық әйелдер істері және отбасылық демографиялық саясат жөніндегі комиссия төрағасының орынбасары Ақмарал Әлназарова Нұрсәуле Дүйсембайқызына облыс көлемінде отбасы мәртебесін арттыруға және отбасылық дәстүрлер мен құндылықтарды халық арасында кеңінен насихаттап, отбасы-демографиялық саясаттың жүзеге асуына қосқан қажырлы еңбегі үшін облыс әкімінің Алғыс хатын табыстап, облыстық ҚХА жанындағы Аналар кеңесіндегі жұмысына жеміс тіледі.
Облыстық әйелдер кеңесінің төрайымына облыстық мәслихаттың депутаты, көп жылдар облыстық кәсіподақ комитетінің төрайымы болған, білім саласы ұстаздарының кәсіподақ комитетін басқарған Райкүл Байназарова сайланды
Айта кетейік, Райкүл Мансұрқызы 1957 жылы Қызылорда облысы, Жалағаш ауданында дүниеге келген. Білімі жоғары, Қызылорда педагогикалық институтын, Алматы Заң академиясын бітірген. Математика пәнінің мұғалімі, заңгер.
Студент кезінде облыстық комсомол комитетінің бюро шешімімен 3&nbsp;жыл студенттер құрылыс отрядтарының облыстық штабында комиссар қызметін атқарған.
Институт бітіргеннен кейін 1983 ж. дейін Н.Гоголь атындағы Қызылорда педагогикалық институтында студенттер кәсіподақ ұйымының төрайымы болып қызмет жасады.
ОЛ 1983-1987 жылдары – ағарту, жоғарғы білім және ғылым қызметкерлері кәсіподағының облыстық комитетінің хатшысы болып сайланған.
1987 жылдан осы кезге дейін – білім және ғылым қызметкерлері кәсіподағының облыстық комитетінің төрағасы болып қызмет жасап келді.
Облыстық маслихаттың ІІ (1999 жыл), ІІІ (2003 жыл), V (2012 жыл), VІ (2016 жыл) шақырылымының депутаты болып сайланған.
Отырыста қоғам қайраткері Д.&nbsp;Ақмағанбетова, облыстық ардагерлер кеңесі төрағасының орынбасары К.&nbsp;Ермағамбетова өз пікірлерімен бөлісті.
Облыс әкімінің орынбасары Н.Байқадамов Райкүл Мансұрқызын құттықтап, жұмысына сәттілік тіледі.
<img src="https://kyzylorda-news.kz/wp-content/uploads/2020/02/aielder-kenesi-3.jpeg" alt="" />
<img src="https://kyzylorda-news.kz/wp-content/uploads/2020/02/aielder-kenesi-4.jpeg" alt="" />
<img src="https://kyzylorda-news.kz/wp-content/uploads/2020/02/aielder-kenesi-1.jpeg" alt="" />

Қызылорда облыстық әйелдер кеңесінің төрайымы сайланды (ФОТО)

<a href="https://kyzylorda-news.kz/">Kyzylorda-news.kz.</a> ҚР Президентінің тапсырмасы бойынша ҚР Премьер-Министрінің орынбасары Бердібек Сапарбаев бастаған Қордай ауданындағы оқиға салдарын жою жөніндегі Үкімет комиссиясы Жамбыл облысына барды. Бұл туралы Үкіметтің <a href="https://primeminister.kz/kz/news/pravitelstvennaya-komissiya-pribyla-v-kordayskiy-rayon">баспасөз қызметі</a> хабарлады.
Қордай ауылында вице-премьер аруханаға барды, топтасқан төбелес кезінде зардап шеккен тұрғындармен сөйлесті. Медициналық мекемелерге 12 адам жатқызылды, 20 адам бақылауда және емханадан шығаруға әзірленуде.
5 пациент санитариялық авиация желісі бойынша Алматы қаласына, 1 пациент Тараз қаласына ауыстырылды. Барлығына қажетті медициналық көмек толық көлемде көрсетіліп жатыр. Медициналық көмекке барлығы 127 адам жүгінді, оның ішінде 84 адам тексеруден соң үйлеріне жіберілді.
Аудан ақсақалдарымен әңгімелесу кезінде Бердібек Сапарбаев болған кикілжіңнің негізгі себептері туралы сұрады.
«Себебі – тұрмыстық кикілжің. Қазір жағдай тұрақталды. Барлығы заң бойынша, құқықтық сала аясында болуын сұраймын», – деді Сортөбе ауылының тұрғыны Арли Мусаров.
Вице-премьер ауданда тұрақтылықты қамтамасыз ету үшін Мемлекет басшысының тапсырмасы бойынша Үкімет комиссиясы арнайы келгенін атап айтты.
«Біз сіздерден, қоғамда беделі бар ақсақалдардан тұрғындарға біздің жағдайды объективті тұрғыда анықтау үшін келгенімізді түсіндірулеріңізді өтінеміз. Барлық зардап шеккендерге қажетті медициналық және басқа да көмек көрсетіліп жатыр. Қазір басты мәселе – өңірдегі тұрақтылықты қамтамасыз ету», – деді Сапарбаев.
Қордай ауданында Үкімет комиссиясы Қордай, Масанчи, Ауқатты, Сортөбе елді мекендеріндегі қазіргі жағдаймен танысып, жергілікті тұрғындармен, оқиға кезінде қаза тапқандардың отбасыларымен бірқатар кездесу өткізеді, зардап шеккендерге барады, тұрғын үйлерді, әлеуметтік және коммерциялық нысандарды аралап көреді.
Сонымен қатар жергілікті жерде әлеуметтік-экономикалық және гуманитарлық сипаттағы мәселелерді шешу бойынша шұғыл шаралар қабылданады. Облыс әкімдігімен бірлесіп қаза тапқандарды жерлеуді ұйымдастыру, келтірілген залалды бағалау және зардап шеккен меншік нысандарын қалпына келтіру бойынша көмек көрсетіледі.
Еске сала кетейік, бұған дейін Жамбыл облысының Қордай ауданындағы Масанчи ауылының тұрғындары арасында&nbsp;<a href="https://kyzylorda-news.kz/oqigalar/qordajdaghy-zhanzhalda-8-adam-mert-bolyp-40-tan-astamy-zharaqattanghan-44000/">жаппай төбелес болып</a>, одан&nbsp;<a href="https://kyzylorda-news.kz/oqigalar/qordajdaghy-zhanzhalda-8-adam-mert-bolyp-40-tan-astamy-zharaqattanghan-44000/">8 адамның көз жұмғанын</a>, қазіргі таңда осы оқиғаға қатысты&nbsp;<a href="https://kyzylorda-news.kz/oqigalar/iim-qordajdaghy-oqigha-bojynsha-47-adam-ustaldy-44008/">47 адамның ұсталғанын</a>&nbsp;хабарлаған болатынбыз.
<img src="https://kyzylorda-news.kz/wp-content/uploads/2020/02/komissia-2.jpg" alt="" />
<img src="https://kyzylorda-news.kz/wp-content/uploads/2020/02/komissia-3.jpg" alt="" />
<img src="https://kyzylorda-news.kz/wp-content/uploads/2020/02/komissia-4.jpg" alt="" />

Үкімет комиссиясы Қордай ауданына келді (ФОТО)

<a href="https://kyzylorda-news.kz/">Kyzylorda-news.kz.</a> Аллергиялық реакцияларға бейім жоғары сезімтал тері қоршаған ортаның кез келген факторына әсер береді: жел, күн, суық, құрғақ ауа, үйкеліс, ағаштардың гүлдеуі және т.б. Тіпті, кей косметикалық құралдар аллергиялық реакция тудырып, дерматитке әкелуі мүмкін. Мұндай аллергияға бейім теріге қалай күтім жасау керек?
Терідегі аллергия – ағзаның нақты компонентке немесе факторға берген реакциясы. Ол қызыл дақ немесе бөртпе шығарып, қышуы немесе ісініп кетуі мүмкін. Бұл белгілер, әдетте, аллергенмен байланыстан соң 48 сағат ішінде көрінеді. Ал аллергияны туғызған затпен байланысты үзген кезде және кейде дәрі қолданған кезде аллергия кетуі керек. Мұндай жағымсыз жағдай орын алмас үшін төмендегі ережелерді сақтау ұсынылады:
– Аллергеннен аулақ болыңыз. Аллергияның қай өнімге немесе компонентке пайда болғанын дерматолог анықтайды. Аллергияны уақытында дәрігерге көрсету маңызды. Себебі аллергия ұлғайып кетсе, ол тыныс алуға кедергі жасап, адам өміріне қауіп төндіреді. Аллерген өте аз мөлшерде болса да, ол теріге реакция береді. Нақты өнімнің құрамын мұқият зерттеңіз, содан соң ғана қолданыңыз.
– Сезімтал теріге арналған қабынуға қарсы бағытталған өнімді таңдаңыз. Мысалы: аллергияға бейім бет терісіне арналған ылғалдандырғыш крем немесе тоник.
– Маусымаралық кезеңдерде абай болыңыз. Аллергияға бейім тері маусымдар ауысуына нашар бейімделеді, сондықтан оны күйзеліс кезеңіне алдын ала дайындаған жөн. Мысалы, жылытқыш құралдар қосылатын уақытта жылы (термальный) су және ылғалдандырушы кремдер алыңыз. Себебі сезімтал тері батареяларға бірден әсер береді. Ал көктемде ағаштар гүлдейтін жерлерден алшақ жүруге тырысыңыз.
– Салондық процедураларға әуес болмаңыз. Терісі аллергияға бейім адамдар салондық процедураларға сақтықпен қарау ұсынылады. Себебі қандай да бір процедурада сізге аллергия беретін зат болуы мүмкін. Сондықтан оған барарда дерматолог дәрігермен және процедураны жасайтын маманмен жақсылап сөйлесу керек. Оған қоса, терісі өте сезімтал адамдар пилинг секілді теріге агрессивті әсер ететін процедуралардан абай болу керек.
– Бет терісіне тәжірибе жасамаңыз. Үйден жасалатын түрлі маскалар мен пилингтерді ұмытыңыз. Кез келген тәжірибе теріні тітіркендіруі мүмкін.
– Зарарсыздандырылған косметика қолданыңыз. Егер теріңіз өте сезімтал болса, құрамында хош иістендіргіштер, консерванттар және эмульгаторлары жоқ зарарсыздандырылған косметика таңдаңыз.
<a href="https://massaget.kz/kyizdarga/krasota/60788/">Massaget.kz</a>

Аллергияға бейім теріге қалай күтім жасау керек?

<a href="https://kyzylorda-news.kz/">Kyzylorda-news.kz.</a> Қазақстан халқы Ассамблеясы Қордайдағы оқиғаға қатысты мәлімдеме жасады.
«Қордайдағы оқиға ел азаматтарының әрбірінің жүрегіне қанжардай қадалды. Оқиға кезінде азаматтарымыз көз жұмды. Қазақстан халқы Ассамблеясы көз жұмған азаматтардың туған-туыстары мен жақындарына қайғыра көңіл айта отырып, зардап шеккендердің тезірек сауығып кетуін тілейді. Мемлекет басшысы жанжалдың салдарын еңсеру бойынша нақты тапсырмаларды берді. Біз Қазақстан халқын осынау іске үн қосып, қолдау білдіруді сұраймыз», – делінген ҚХА мәлімдемесінде.
Ассамблея елдің барлық өңірінде этномәдени бірлестіктердің басын қосып түсіндіру жұмыстарын жүргізіліп жатқанын хабарлайды.
«Ассамблея мүшелері кез келген қылмыстың ұлттық сипаты болмайтыны, сондай-ақ кінәлілердің бәрі заңға сәйкес анықталып, жазалануы керектігі жайлы ортақ пікір білдіреді. Сондықтан, қазіргі кездегі ең маңызды міндет – арандатушылыққа бой алдырмай, жеке адамдардың жасаған әрекеттерін тұтас ұлттарға телуге жол бермеу. Ассамблея халықтың даналығына сенім білдіреді әрі біздің азаматтарымызды, әсіресе жастарды елдегі бейбітшілік пен келісімді бұзатын және өздеріне зиян келтіретін өрескел сөздер мен әрекеттерден аулақ болуға шақырады. Қазақстан халқы әрқашан бір-бірімен бауырластық қарым-қатынастың үлгісі болып қала беретініне сенімдіміз. Балаларымыздың ортақ болашағы үшін біз ұлтаралық араздықты қоздыруға жол бермеуіміз керек», – дейді ҚХА мәлімдемесінде.
Сонымен қатар ҚХА жалған мәліметке сенбей, қоғамдық тәртіп пен қауіпсіздікті қамтамасыз ететін органдарға көмек көрсетуге, елдегі тыныштық пен бейбітшілікті сақтауға шақырады.
Еске сала кетейік, бұған дейін Жамбыл облысының Қордай ауданындағы Масанчи ауылының тұрғындары арасында&nbsp;<a href="https://kyzylorda-news.kz/oqigalar/qordajdaghy-zhanzhalda-8-adam-mert-bolyp-40-tan-astamy-zharaqattanghan-44000/">жаппай төбелес болып</a>, одан <a href="https://kyzylorda-news.kz/oqigalar/qordajdaghy-zhanzhalda-8-adam-mert-bolyp-40-tan-astamy-zharaqattanghan-44000/">8 адамның көз жұмғанын</a>, қазіргі таңда осы оқиғаға қатысты <a href="https://kyzylorda-news.kz/oqigalar/iim-qordajdaghy-oqigha-bojynsha-47-adam-ustaldy-44008/">47 адамның ұсталғанын</a> хабарлаған болатынбыз.

Қазақстан халқы Ассамблеясы Қордайдағы оқиғаға қатысты мәлімдеме жасады

<a href="https://kyzylorda-news.kz/">Kyzylorda-news.kz</a>. Әлемде соңғы 4 айда азық-түлік бағасы біршама өскен, деп хабарлайды <a href="https://24.kz/kz/zha-aly-tar/lemde/item/372677-b-lemde-azy-t-lik-ba-asy-sti">«Хабар 24»</a>.
Бұл туралы БҰҰ-ның Азық-түлік және ауыл шаруашылық ұйымы хабарлады. Мәліметке қарағанда, биыл қаңтар айында бұл көрсеткіш былтырғы желтоқсан айымен салыстырғанда 0,7 пайызға көтерілген. Азық-түлік өнімдерінің ішінде ең көп қымбаттағаны өсімдік майы, қант және астық. Мысалы, өсімдік майы соңғы айда 7 пайызға артса, қант 5,5 процентке, ал астық 2,9 пайызға қымбаттаған.
Бұдан бөлек, сүт өнімдері 0,9 процентке, ал ет 4 пайызға өскен. Мамандар бұған мемлекеттер арасындағы сауда текетіресі, кей елдердегі экономикалық дағдарыс және Қытайдағы коронавирус сынды жағдайлар себеп дейді.

БҰҰ: Әлемде азық-түлік бағасы өсті

<a href="https://kyzylorda-news.kz/">Kyzylorda-news.kz.</a> Қызылорда облыстық Қазақстан Халқы Ассамблеясы төрағасының орынбасары, облыстық татар этномәдени бірлестігінің белсендісі Эльдар Гафуров Қордай ауданындағы жанжалға байланысты халықты тыныштықты сақтауға, жастарды арандатуларға ермеуге, тұрғындарды сабырға шақырды.
Кеше Жамбыл облысы Қордай ауданында орын алған оқыс оқиғаға ел алаңдап отыр. Жанжалға қатысты бүгін ҚР Президенті Қасым-Жомарт Тоқаев арнайы комиссия құрып, жауапты адамдарға жан-жақты тапсырма берді. Енді мемлекет басшысының тапсырмасына орай, тез арада нақты шаралар көріліп, мәселе шешіледі деп ойлаймын. Бұл келеңсіз жағдайды тез арада тоқтату қажет. Сонымен қатар жанжалдан туындаған залалды жою керек. Халықты сабырға шақырып, бірлігімізді нығайтуға қоғам болып атсалысайық.
Мемлекет басшысы бейбітшілік пен қоғамдық келісім біздің еліміздің іргетасы екенін нықтап айтты. Осы іргетасымызды біз бұзып алмауымыз керек. Осы оқиғаны бәзбіреулер өз мүддесіне қолдануға жол бермейміз деп үміттенемін.&nbsp;
Дәл қазіргі жағдайда ел болып сабыр сақтап, бұл оқиғаның жай-жапсарын анықтау басты міндет болып отыр. Сонымен қатар Қордай ауданындағы жапа шеккен адамдарға көмек қолын созу – біздің адамдық борышымыз. Себебі, кешеден бері қаншама өрт оқиғасы орын алды. Кәсіпкерлік нысандар қиратылды. Сондықтан шығындарды өтеуге көмек көрсетейік. Халықты үрейлендірмей, тыныштықты сақтай отырып, тұрғындарды сабырға шақырамын. Мен де өз атымнан әлдекімдердің теріс әрекетіне еріп, жалған ақпаратқа сенбеулеріңізді сұраймын.
Эльдар ГАФУРОВ,
Қызылорда облыстық Қазақстан Халқы Ассамблеясы төрағасының орынбасары,
облыстық татар этномәдени бірлестігінің белсендісі

Эльдар Гафуров: Бейбітшілік пен қоғамдық келісімге сызат түспеуі керек

<a href="https://kyzylorda-news.kz/">Kyzylorda-news.kz.</a> Boxingscene.com сайты соңғы онжылдықтағы мықты 20 боксшы рейтингінің бірінші бөлігін ұсынды. Оған орта салмақтағы қазақстандық боксшы Геннадий Головкин енді, деп хабарлайды <a href="https://www.inform.kz/kz/golovkin-songy-onzhyldyktagy-uzdik-boksshylardyn-bestigine-endi_a3611857">ҚазАқпарат</a>
GGG мексикалық боксшы Сауль «Канело» Альварес, америкалық Флойд Мэйвезер және тағы бір америкалық Теренс Кроуфордтан кейінгі төртінші орынға жайғасты.
«Қазақстандық боксшы ала алмаған орта салмақтағы екі марапат бар: WBO белбеуі мен желілік чемпион тәжі. Головкиннің біріншісін жеңіп алуға ешқашан мүмкіндігі болған жоқ. Көпшілік әлі күнге дейін Сауль Альвареспен бірінші айқаста екінші титулды Головкин алуы керек еді деп есептейді. Головкинге сыншылар қаншама жұлдызды қарсылас ұсынса да, ол ТОП-10-дағы боксшылармен айқасқысы келді. Марвин Хаглер мен Бернард Хопкинс те дәл осылай жасаған еді.
Головкин мықты беделге ие бола отырып, 18 нокаутпен декаданы бастады. Ақырында ол жалғыз санаттағы төрт басты титулдың үшеуін біріктірген әлем чемпионы атанып, оны өзінің «үйі» деп атады», – делінген материалда.

Головкин соңғы онжылдықтағы үздік боксшылардың бестігіне енді

<a href="https://kyzylorda-news.kz/">Kyzylorda-news.kz.</a> Мемлекет басшысы Қасым-Жомарт Тоқаевтың тапсырмасын орындау мақсатында ҚР Премьер-Министрі Асқар Маминнің өкімімен Жамбыл облысының Қордай ауданындағы оқиға салдарын жою жөніндегі Үкімет комиссиясы құрылды. Бұл туралы Үкіметтің <a href="https://primeminister.kz/kz/news/sozdana-pravitelstvennaya-komissiya-po-likvidacii-posledstviy-sobytiy-v-kordayskom-rayone-zhambylskoy-oblasti">баспасөз қызметі</a> хабарлады.
ҚР Премьер-Министрінің орынбасары Б. Сапарбаевтың төрағалығымен құрылған Комиссия құрамына Жамбыл облысының әкімі А. Мырзахметов, еңбек және халықты әлеуметтік қорғау министрі Б. Нұрымбетов, Қазақстан халқы Ассамблеясы төрағасының орынбасары Ж. Түймебаев, Парламент Мәжілісінің депутаты Ш. Хахазов және «Дүнген қазақстандық қоғамы» қоғамдық бірлестігінің төрағасы А. Воинце мен&nbsp;қаржы, индустрия және инфрақұрылымдық даму бірінші вице-министрлері, ақпарат және қоғамдық даму, ұлттық экономика, денсаулық сақтау, білім және ғылым вице-министрлері, ішкі істер, қорғаныс министрлерінің орынбасарлары, Бас прокурор мен Ұлттық қауіпсіздік комитеті төрағасының орынбасарлары кірді.
Комиссия алдында кикілжің себептерін анықтау, сондай-ақ әлеуметтік-экономикалық және гуманитарлық сипаттағы мәселелерді шұғыл шешуді қамтамасыз ету, келтірілген залалдың орнын толтыруды бағалау міндеттері қойылды.
Еске сала кетейік, бұған дейін Жамбыл облысының Қордай ауданындағы Масанчи ауылының тұрғындары арасында&nbsp;<a href="https://kyzylorda-news.kz/oqigalar/qordajdaghy-zhanzhalda-8-adam-mert-bolyp-40-tan-astamy-zharaqattanghan-44000/">жаппай төбелес болып</a>, одан <a href="https://kyzylorda-news.kz/oqigalar/qordajdaghy-zhanzhalda-8-adam-mert-bolyp-40-tan-astamy-zharaqattanghan-44000/">8 адамның көз жұмғанын</a>, қазіргі таңда осы оқиғаға қатысты <a href="https://kyzylorda-news.kz/oqigalar/iim-qordajdaghy-oqigha-bojynsha-47-adam-ustaldy-44008/">47 адамның ұсталғанын</a> хабарлаған болатынбыз.

Жамбыл облысының Қордай ауданындағы оқиға салдарын жою жөніндегі Үкімет комиссиясы құрылды

<a href="https://kyzylorda-news.kz/">Kyzylorda-news.kz.</a> Белгілі қызылордалық дінтанушы Бақтияр Оспанов Қордайдағы жанжалға байланысты халықты сабырға шақырды.
«Біз көбінесе ұлтқа бөлініп кетеміз. Дұрыс, негізгі құраушы ұлт – қазақ халқы. Оны мойындауымыз керек. Елбасымыз Нұрсұлтан Назарбаевтың бастамасымен арнайы мереке ретінде тойланып келе жатқан Алғыс айту күні біздің халықтың мерейін үстем етіп бергені жасырын емес. Сол мерейімізге дақ түсіріп алмауымыз қажет. Ел болғаннан кейін әртүрлі жағдай болады. Біздің бабаларымыз қаншама ғасыр бойы қиыншылықты басынан кешірді. Бабаларымыздың әр уақытта өзінің ұстамдылығымен, сабырлығымен, даналығымен, ауызбіршілікпен елді ұстап отырғанын ұмытпасақ деймін», – дейді Бақтияр Оспанов агенттік тілшісіне берген сұхбатында.
Дінтанушы тұрмыстық жанжалдан бүкіл облыс тұрғыны, ұлт пен ұлыс, тіпті, барлық халық зардап шекпеуі керектігін жеткізді.
«Ұлттың жаманы болмайды, адамның жаманы болады. Ойлап қарасақ, кейде мұндай жағдай ағайынның ішінде де болып жатады. Сол балалардың әкесі сексендегі ақсақалды соққыға жық деп айтпаған шығар. Ақылмен, сабырмен қарайтық болсақ, бұл тұрмыстық жанжалдан басталған қақтығыс. Біз оны қолдан ушықтырып отырмыз. Бір-екі адамның жамандығынан бүкіл ұлт пен ұлыс зардап шекпеуі керек. «Жоямыз, қырамыз» деп ұрандатқанымыз, үйлерін өртегеніміз – масқара жағдай. Сол өртенген үйде бесіктегі баласы жатпағанына кім кепіл? Ол үйлерде тоқсандағы аяққа тұра алмай жатқан анасы бар шығар. Осы жағын ойландық па? Бала-шағасын асырап, нан тауып отырған кәсібінде неміз бар? Мұндай масқара тірліктерге бармауымыз керек», – дейді Бақтияр Есенгелдіұлы.
Ол Қордай ауданында орын алған жағдайға кінәлі адамдар заңды түрде жазалануы тиістігін баса айтты.
«Біз қазіргі таңда халықты сабырға шақырып, заң аясында жұмыс жасауымыз қажет. Біздің елімізде заң өте қатал, соған бағынуымыз керек. Жалпы, жекелеген адамның өзара келіспеушілігі бұқаралық сипат алып кетпеуі керек деп ойлаймын. Өйткені,&nbsp;ардақты пайғамбарымыз Мұхаммед (оған Алланың салауаты мен сәлемі болсын) мұсылман үмбеті жақсы істер үшін ғана жиналатынын өсиет еткен. Пайғамбар жолын ұстанған мұсылман мұндай амалға әсте бармайтыны белгілі. Сабырға келейік, сабырға келулеріңіз жақсылыққа апарады. Байқамастан өзге бауырымызға қиянат жасап қоюдан сақ болғанымыз дұрыс», – деді дінтанушы Б. Оспанов.
Еске сала кетейік, бұған дейін Жамбыл облысының Қордай ауданындағы Масанчи ауылының тұрғындары арасында <a href="https://kyzylorda-news.kz/oqigalar/qordajdaghy-zhanzhalda-8-adam-mert-bolyp-40-tan-astamy-zharaqattanghan-44000/">жаппай төбелес болып</a>, одан <a href="https://kyzylorda-news.kz/oqigalar/qordajdaghy-zhanzhalda-8-adam-mert-bolyp-40-tan-astamy-zharaqattanghan-44000/">8 адамның қайтыс болғанын</a>, қазіргі таңда осы оқиғаға қатысты <a href="https://kyzylorda-news.kz/oqigalar/iim-qordajdaghy-oqigha-bojynsha-47-adam-ustaldy-44008/">47 адамның ұсталғанын</a> хабарлаған болатынбыз.

Қазақстан және Қызылорда облысының жаңалықтары