<a href="https://kyzylorda-news.kz/">Kyzylorda-news.kz.</a> Қызылорда облысының әкімі Қуанышбек Ысқақов Қайсар футбол командасының жаңа құрамымен танысты.
Жаңа маусымға «қайсарлықтардың» құрамына 11 футболшы қосылған. Олар: Елдос Ахметов, Қуаныш Қалмұратов, Бағдат Қайыров, Ризван Аблитаров, Алфин Фортес, Режиналдо, Александр Колев, Могамед Парагульгов, Иван Пешич, Элгуджа Лобжанидзе.
Кездесу барысында команданың капитаны Асхат Тағыберген клубтың маусымға дайындығы туралы айтып, қолдау білдірген аймақ басшысы мен жанкүйерлеріне алғысын білдірді.
<blockquote>
 «Қайсар» футбол командасы өткен жылы жоғары жетістіктерге жетті. Биылғы маусымдада сол жетістіктерді қайталауға тырысамыз. Ол үшін барлық жағдай жасалуда. Түркияда дайындық жүргіздік. Жақсы футболшылар қатарымызға қосылды. Жігіттермен бірге жоғары мақсаттарға жетуге жұмыс жасаймыз. 8-наурызда «Ертіске» қарсы ойында жеңіске жетіп, өзіңіз бастаған жанкүйерлерімізді қуантуға әзірміз», – деді команда капитаны.
</blockquote>
«Қайсар» командасы тарихта 20 жылдан кейін Қазақстан кубогының иегері атанып, тұңғыш рет Еуропа лигасына жолдама алды.
Облыс әкімі аяқдоп шеберлерімен кездесу барысында Қуанышбек Ысқақов жаңа маусымнан, жаңа жетістіктер күтетінін айтты.
<blockquote>
 «Биылғы маусымда «Қайсардың» намысын қорғайтын футболшыларға үлкен жауапкершілік артылады. Жыл өткен сайын нәтиже жақсарып келеді. Осы жылғы чемпионатта да жеңіске қол жеткізсек деген мақсатымыз бар. Бастысы – қорғаныста сауатты, шабуылда ширақ қимылдасақ, техникалық жағынан түсіністік, бір-біріне деген сенім жоғары болуы керек. Оның үстіне, «Қайсардың» жанашыр жанкүйерлері жетерлік. Олардың шынайы қолдауы командаға айрықша жігер сыйлары анық», – деді аймақ басшысы.
</blockquote>
Кездесу соңында облыс әкімі Қуанышбек Досмайылұлына «Қайсар» командасының 12 нөмірлі жейдесі табысталды.
Айта кетейік, дала қасқырлары 8-ші наурызда Ғ.Мұратбаев атындағы орталық стадионда «Ертіс» командасымен кездеседі.
<img src="https://kyzylorda-news.kz/wp-content/uploads/2020/03/02-9.jpg" alt="" />
<img src="https://kyzylorda-news.kz/wp-content/uploads/2020/03/04-2.jpg" alt="" />
<img src="https://kyzylorda-news.kz/wp-content/uploads/2020/03/01-9.jpg" alt="" />

Аймақ басшысы «Қайсар» футбол клубының жаңа құрамымен кездесті (ФОТО)

<a href="https://kyzylorda-news.kz/">Kyzylorda-news.kz.</a> Қызылорда облыстық дене шынықтыру және спорт басқармасының бұрынғы басшысы Олжас Азатұлы Әкімов ҚР Мәдениет жән спорт министрінің кеңесшісі қызметіне тағайындалды.
Олжас Азатұлы 1980 жылы Қызылорда облысы Төретам кентінде дүниеге келген. Ресей Халықаралық олимпиада университетін “Спорт менеджменті” мамандығы бойынша тәмамдаған.
Сондай-ақ Қожа Ахмет Яссауи атындағы Халықаралық қазақ-түрік университетінен заңгер мамандығын, “Болашақ” университетін “Дене шынықтыру және спорт” мамандығы бойынша және ҚР Президенті жанындағы Мемлекеттік басқару академиясын бітірген.
Кикбоксинг бойынша ҚР еңбек сіңірген жаттықтырушысы, ҚР спортының құрметті қызметкері, Халықаралық дәрежедегі төреші. Ол 2019 жылы “Ерен еңбегі үшін” мемлекеттік наградасымен марапатталды.
1998-2000 жылдары ҚР Қарулы Күштері қатарында қызмет етті. 2000-2003 жылдар аралығында Байқоңыр қаласындағы №56 орта мектебінде дене шынықтыру мұғалімі, бокстан жаттықтырушы, 2003 жылдан бастап ҚР Қаржы министрлігі Кедендік бақылау комитетінің бас маманы болып қызмет атқарды.
2008-20012 жылдары “Инфрқұрылыс” ЖШҚ бас директорының жалпы мәселелер жөніндегі орынбасары лауазымында болды. Байқоңыр кешеніндегі ҚР Президентінің арнайы өкілдігінің штаттан тыс кеңесшісі, 2013 жылы Астана қаласы әкімдігінің “Астана “Регби клубы” директоры қызметін атқарды.
2013-2014 жылдары Астана қаласы әкімдігінің “Жігер” спорт клубының директоры, мұнан соң ҚР Мәдениет және спорт министрлігінің штаттық ұлттық командалар және спорт резерві дирекциясының бас жаттықтырушысы болып жұмыс істеді.
2017 жылдың 1 сәуірінен бастап ҚР Мәдениет және спорт министрлігінің штаттық ұлттық командалар және спорт резерві дирекциясында әмбебап жекпе-жек бойынша аға жаттықтырушы қызметін атқарды.
2017 жылдың тамыз айынан бастап 2020 жылға дейін Қызылорда облысының дене шынықтыру және спорт басқармасын басқарды.
Бүгінгі таңда Олжас Азатұлы Болгариядағы Васил Левский атындағы Ұлттық спорт академиясында докторлық дәреже бойынша білім алып жатыр.

Олжас Әкімов Мәдениет және спорт министрінің кеңесшісі қызметіне тағайындалды

<a href="https://kyzylorda-news.kz/">Kyzylorda-news.kz.</a> Бүгін облыс әкімі Қуанышбек Ысқақовтың төрағалығымен инвестор тарту және инвестициялық ахуалды жақсарту жөніндегі өңірлік Кеңес отырысы өтті. Күн тәртібінде ҚР Премьер-Министрі мен облыс әкімі арасындағы инвестиция көрсеткішіне қатысты меморандумның орындалу барысы қаралды.
2016 жылдан бастап жұмыс жасап келе жатқан Кеңестің негізгі мақсаты – инвестициялық жобалардың шешілмеген мәселелерін қарап, тиімді шешім қабылдау және инвестициялық ахуалды жақсарту.
Аймақ басшысы өткен жылы атқарылған жұмыстарға тоқталып, жетістіктерді атап өтті.
<blockquote>
 «Өткен жылы Кеңестің 4 отырысы өткізіліп, онда 6 инвестициялық жобаның жүзеге асырылу барысы, «Байқоңыр» еркін экономикалық аймағын құру мәселесі қаралып, инвестиция тарту мен инвесторларды сүйемелдеуге жауапты ұйым анықталды. 2019 жылдың қорытындысымен негізгі капиталға салынған инвестиция 400 млрд.теңге құрап, 2018 жылмен салыстырғанда көрсеткіш 17,4% артты. Нәтижесінде, біздің облыс республика бойынша алғашқы төрттікке енді. Бұл біздің бірлесіп атқарған жұмысымыздың нәтижесі. Биылғы жылы да осы қарқынды төмендетпеуіміз қажет», – деді облыс әкімі Қуанышбек Ысқақов.
</blockquote>
2019 жылы игерілген 400 млрд.теңгенің 88,6 млрд.теңгесі (22,1%) республикалық бюджеттен қаржыландырылды. Атап айтқанда «Ақсуат», «Сексеуіл» газ компрессорлық станциялары және «Сарыарқа» газ құбыры секілді бір реттік ірі жобаларға республикалық бюджеттен қаржы бөлініп, жұмысын бастады. Қалған 311,4 млрд.теңге облыстың өз күшімен тартқан қаражаты болып табылады.
Сонымен қатар, Кеңес отырысында Қызылорда қаласы мен аудан әкімдерінің биылғы жылға инвестиция тарту бойынша жоспарлары мен меморандумға қол қойған жобалардың іске асыру бағытында атқарған жұмыстары тыңдалып, облыстық индустриялық-инновациялық даму басқармасының басшысы Ринат Сұлтангереев инвестиция тарту бойынша атқарылуы тиіс жұмыстар туралы баяндады.
<blockquote>
 Жиын соңында Қуанышбек Досмайылұлы облыстық басқармалар мен қала, аудан әкімдіктеріне биылғы жылы игерілетін инвестиция көлеміне меже бекітіп, инвестиция тарту жұмыстарын қамтамасыз етуді тапсырды.«ҚР Тұңғыш Президенті-Елбасы Н.Ә. Назарбаев алдағы 5 жыл ішінде еліміздің жалпы ішкі өнімдегі инвестицияның үлесін 2024 жылдың соңында 30 пайызға дейін арттыруды тапсырды. Осыған орай, бүкіл республика бойынша инвестиция көрсеткіші жоғары межемен бекітілді. Біздің облыс ҚР Премьер-Министрімен қол қойылған меморандумға сәйкес биылғы жылы – 481 млрд.теңге инвестиция тартуы қажет» – деді аймақ басшысы Қуанышбек Ысқақов.
</blockquote>
<img src="https://kyzylorda-news.kz/wp-content/uploads/2020/03/02-6.jpg" alt="" />
<img src="https://kyzylorda-news.kz/wp-content/uploads/2020/03/03-3.jpg" alt="" />
<img src="https://kyzylorda-news.kz/wp-content/uploads/2020/03/04.jpg" alt="" />

Қызылордада инвестор тарту және инвестициялық ахуалды жақсарту жөніндегі өңірлік кеңес отырысы өтті

<a href="https://kyzylorda-news.kz/">Kyzylorda-news.kz.</a> Бүгінгі күні Қызылорда облысында коронавирус тіркелген жоқ. Бұл туралы &nbsp;Қызылорда облысының тауарлар мен көрсетілетін қызметтердің сапасы мен қауіпсіздігін бақылау департаменті хабарлады.
<blockquote>
 «Шетелдерден келген азаматтарды бақылаудан өткізу, індеттің алдын алу мақсатында үлкен сақтық шаралары елдің барлық өңірлерінде жүргізіліп жатыр. Әлемдегі дамыған елдерде короновирус инфекциясы белең алып, әлеуметтік-экономикалық жағынан зардабын тигізіп отыр. Осы індеттің алдын алу мақсатында, егерде эпидемиологиялық жағдай тұрақсыз елдерден келген облыс тұрғындары мен қызмет бабымен азаматтар келген жағдайда 14 күнге оқшаулау (аурудың жасырын кезеңі болып есептелетін) мақсатында Қызылорда облыстық балалар мен жасөспірімдерге арналған туберкулезге қарсы санаторияның 100 төсек орын дайындау жұмыстары жүргізілуде», – делінген хабарламада. &nbsp;
</blockquote>
Департамент мамандары мәлімдегендей, облыстық балалар мен жасөспірімдерге арналған туберкулезге қарсы санаториядағы балалар талапқа сай жабдықталған «Арнаулы әлеуметтік қызметтер көрсету балалар орталығы» ғимаратына көшірілетін болады.
<blockquote>
 «Бұл дайындық жұмыстары ауруды болдырмау, сырттан тасымалданбау мақсатында ұйымдастырылып жатқан шаралардың бірі екендігіне түсінікпен қарауларыңызды сұраймыз. Осыған орай, тұрғындар арасында жұқпалы ауру туралы нақтыланбаған мәліметтерді таратпауға және бұл бойынша ақпараттарды ресми ақпарат көздерінен ғана алуға шақырамыз», – дейді департамент мамандары.
</blockquote>

Қызылордада коронавирус тіркелген жоқ

<a href="https://kyzylorda-news.kz/">Kyzylorda-news.kz.</a> Назарбаев Зияткерлік мектептерінің «Ұрпақтар сабақтастығы» жобасы аясында қызылордалық зияткерлер әжелерімен кездесу өткізіп, қазақтың қолөнер – ұлттық мұрасын насихаттауға бағытталған арнайы шеберлік сабақтарына қатысты.
Оқушылардың еңбек ардагерлері мен зейнет жастағы қоғам белсенділерімен кездесу шаралары мектепте үздіксіз ұйымдастырылып отырады. Бұл жолы тағылымы мол басқосуға зияткерлер өздерінің әжелерін шақырып, олар жас ұрпаққа өмірлік жолдарынан тәрбиелік мәні бар әңгімелер айтты. Әңгімелесу барысында қазақ әндерін шырқай отырып, екі буын өкілдері ұршық үйіру, текемет тоқу, киіз басу сияқты қазақ халқының ұлттық өнердің жанғыруына үн қосты.
<blockquote>
 «Ұршық үйіру ата-бабамыздан қалған ұлттық өнеріміз. Оны әжелеріміз аналарымызға, аналарымыз бізге, ал біз балаларымызға үйретуіміз – ұрпақтар сабақтастығы. Білгенімізді ұрпағымызға үйрету – біздің парызымыз», – деді қатысушы әжей Манат Оразбекова.
 «Бұл өте игі бастама. Заманауи технологиялар дамыған заманда ұлттық мұраны жастар арасында насихаттау өте маңызды. Бүгін ұлттық құндылықтар көрініс тапқан және тұрғындарының ауызбіршілігі жарасқан бір үлкен ауыл мерекесіне келгендей әсер алдым», – деді әжей Света Сабырбай.
</blockquote>
Шара барысында жас дарындылар әжелеріне ғаламтор жүйесін пайдалануды үйретті. Осы ретте, қатысушылар әлеуметтік желіде «Ұрпақтар сабақтастығы» атты жаңа топ құруды ұсынып, сол жерде нақыл сөздермен және тәрбиелік мәні бар әңгімелермен бөлісуді жоспарлайды.
<img src="https://kyzylorda-news.kz/wp-content/uploads/2020/03/02-4.jpg" alt="" />
<img src="https://kyzylorda-news.kz/wp-content/uploads/2020/03/03-1.jpg" alt="" />

Қызылордалық оқушылар қолөнер шеберлерінен сабақ алды

<a href="https://kyzylorda-news.kz/">Kyzylorda-news.kz.</a> Қызылорда қаласында жоғалған баланы полицейлер тауып, анасына&nbsp;аман-есен&nbsp;тапсырды. Кәмелетке толмаған бала кеше белгісіз бағытқа үйінен шығып, қайтып оралмаған.&nbsp;
<blockquote>
 «Жоғалған баланы іздеу үшін Қызылорда қалалық Полиция басқармасы Жергілікті полиция қызметі бөлімінің ювеналды полиция бөлімшесінің жеке құрамы жұмылдырылды. Полиция қызметкерлері барлық полиция учаскелеріне бағыт-бағдар беріп, адамдар көп жиналатын орындарды, шатырлар мен қараусыз қалған ғимараттарды тексерді. Полицейлермен жүргізілген іздестіру жұмыстары барысында жоғалған бала қала орталығынан табылып, аман-есен үйіне оралды. Бүгінгі таңда &nbsp;баланың анасымен профилактикалық жұмыстар жүргізілуде», – дейді облыстық Полиция департаментінің баспасөз қызметі.
</blockquote>

Қызылордада жоғалған бала табылды

<a href="https://kyzylorda-news.kz/">Kyzylorda-news.kz</a>. «Nur Otan» партиясы Қызылорда облыстық филиалы төрағасының бірінші орынбасары Ақмарал Әлназарова тұрғындарды қабылдап, олардың өтініш тілектерін тыңдады.
Қызылорда қаласына қарасты КОПЭС саяжайы тұрғындарының атынан келген азаматтар саяжайға баратын жол, ауыз су, сондай-ақ, көшелерді жарықтандыру мәселесін сөз етті. Әрине, бұл жұмыстар қыруар қаржы мен тиісті уақытты&nbsp;талап ететіндіктен партия өкілі алдымен арнайы комиссия құрып, жол құрылысына қатысты жоба-сметалық сарапатама жүргізіп, жоспарға енгізуге қолдау жасайтындығын жеткізді.
Сол секілді Тасбөгет кентінің тұрғыны Бауыржан Тайыровта кенттегі өзі тұрып жатқан көшенің жағдайын айтып, партия тарапынан асфальт салуға қолдау сұрады. Мәселе бойынша қабылдауға қатысып отырған кент әкімі Пахуадин Шамұратов жауап берді. Ол кентте ағымдағы жылы жол құрылысы жүргізілетін 3 көшенің қатарында бұл көшенің де бар екендігін жеткізіп, жыл соңына дейін жол мәселесі шешілетіндігін айтты.
Сондай-ақ қабылдауға келген диалезниктер қоғамының 5 өкілі бүгінгі таңда облыста бүйрегін ауыстырған 74 адамды емдейтін нефролог дәрігерлерінің жетіспеуі, олардың мүгедектікке шығуындағы кедергілер және өңірде нефрология орталығын ашу қажеттігі жайлы бірқатар мәселелерді көтерді.
Ақмарал Әлназарова бұл мәселелерді жан-жақты зерделеу үшін партияның облыстық филиалы жанындағы тиісті комиссияда қарап, кезең-кезеңімен шешілуіне ықпал жасалатындығын айтты. Қабылдауға баспана, жер, кәсіпкерлікке қатысты келген тұрғындарға заң аясында түсіндірме жұмыстары жүргізілді.
<img src="https://kyzylorda-news.kz/wp-content/uploads/2020/03/aqmaral-aelnazarova-turghyndardy-qabyldady-1.jpg" alt="" />

Ақмарал Әлназарова тұрғындарды қабылдады

<a href="https://kyzylorda-news.kz/">Kyzylorda-news.kz.</a>&nbsp;Шиелі ауданының тұрғыны Сандуғаш Үсенованың &nbsp;арманы алған білімін балаларға үйрету үшін білім беру орталығын ашу болатын. Сандуғаш ойын жүзеге асыру үшін аудандық кәсіпкерлер палатасы кеңесшілерімен ақылдаса келе «Жас кәсіпкер» жобасына қатысады. Жоба аясында шиелілік жас жұмыс үдерісін оңтайландыру, бизнесті жүргізудің тиімді тәсілдері сияқты маңызды әрі пайдалы ақпарат алады. Теориясы мен тәжірибесі үйлесім тапқан курстан соң жеке кәсібін ашуға кіріседі.
<blockquote>
 «Мемлекеттен берілген қайтарымсыз қаржының арқасында балаларға қажетті орталығымызға жаңадан құрал-жабдықтар алдық. Қазір бір топта алты баладан оқып жатыр. Шағын топпен жұмыс жасау тиімді. Сол үшін жұмысымыз нәтижелі болатынына сенемін. Қазіргі таңда оқу орталығымызда 100-ден астам оқушы білімін жетілдіруде. Орталықта балаларға роботехниканы, ментальды арифметиканы, орыс, ағылшын тілдерін, ата-аналардың сұранысы бойынша мектеп бағдарламасындағы үй тапсырмаларын орындау қызметтерін көрсетудеміз», – дейді жас кәсіпкер Сандуғаш Үсенова.
</blockquote>
Жас кәсіпкер ашқан «Дарын» балаларға білім беру орталығының жұмысына білікті жастарды тартқан Сандуғаш бүгінде 6 адамды жұмыспен қамтып отыр.
<blockquote>
 «Сауат ашу, көркем жазу пәндерінен сабақ беремін. Оқушыларымыз белсенді, оқуға, үйренуге деген ынталары жақсы. Қазір оқушыларымыздың жазу, сөйлеу мәдениеттеріне аса көңіл бөліп жатырмын», – дейді орталық қызметкері Ақтолқын Серікболқызы.
</blockquote>
Сандуғаш Үсенова Орталықта мүмкіндігі шектеулі балаларды тегін оқуға жағдай жасаған. Айына бір рет орталық ұстаздары ашық сабақтар өткізіп, апта сайын балалардың бос уақытын тиімді пайдалануға арналған шаралар ұйымдастырып тұрады.
Жас кәсіп иесі алдағы уақытта жоғары сынып оқушыларына арналған қызмет түрлерін енгізуді жоспарлауда. &nbsp;
<img src="https://kyzylorda-news.kz/wp-content/uploads/2020/03/kasipkerlik-palatasy-2.jpg" alt="" />

Қызылордалық жас кәсіпкер оқу орталығын ашты

<a href="https://kyzylorda-news.kz/">Kyzylorda-news.kz.</a> Көктемде тасжолдардың конструктивтік элементтерінің жүк көтеру мүмкіндігі төмендейтіндіктен жеке білігіне 8 тоннадан аса жүктеме түсіретін жүк көліктерінің қозғалысына шектеу енгізілді, деп хабарлайды ҚР ИИДМ баспасөз қызметі.
Өңірлердің табиғи-климаттық ерекшеліктеріне байланысты шектеу түрлі уақытта енгізіледі.
Атап айтқанда, 1 наурыз бен 1 сәуір аралығында Алматы, Атырау, Жамбыл, Қызылорда, Маңғыстау және Түркістан облыстарында және Қарағанды облысының Жезқазған өңірінің жолдарында жүк көліктерінің қозғалысына шектеу енгізіледі.
23 наурыз бен 1 мамыр аралығында Шығыс Қазақстан, Ақмола, Ақтөбе, Батыс Қазақстан, Қостанай, Павлодар, Солтүстік Қазақстан және Қарағанды облыстарының жолдары ауыр жүк тасығыш көліктердің қозғалысы үшін жабық болады.
Айта кету керек, көктемде қозғалысты уақытша шектеудің халықаралық келісімдерге сәйкес жүктер мен жолаушыларды халықаралық тасымалдауды жүзеге асыратын, төтенше жағдайлардың алдын алу және жою жөніндегі іс-шараларға қатысатын, зардап шеккендерге гуманитарлық көмек көрсететін, тамақ өнімдерін, жолаушылар мен қолжүгін, сондай-ақ дәрі-дәрмектер тасымалдайтын автокөлік құралдарына қатысы болмайды.

Қызылордада ауыр жүк тасығыш көліктер қозғалысы уақытша шектеледі

<a href="https://kyzylorda-news.kz/">Kyzylorda-news.kz.</a> Бұл туралы «Адал жол» жобасы аясында жүргізіліп жатқан жұмыстар бойынша өткен баспасөз мәслихатында арнайы мониторинг тобының жетекшісі Ләззат Бақтыбаева мәлімдеді.
&nbsp;Баспасөз мәслихатына департамент басшысының бірінші орынбасары Б. Ниязов, Көліктік бақылау инспекциясының орынбасары Г. Пірназарова және «Адал жол» жобасы аясында жұмыс жасайтын Арнайы мониторингтік топ мүшелері, «Номадас» ЖШС, «Марал-Нұр» ЖШС, ««Арлан Транс» ЖШС басшылығы мен жолаушылар көлігіне жауапты басқа да лауазымды тұлғалар қатысты.
Арнайы мониторинг тобының жетекшісі Ләззат Бақтыбаева &nbsp;алдағы уақытта жолаушылар пойызына жауапты тұлғаларды кемшіліктерді болдырмауға, нақты шаралар қабылдауға шақырды.
<blockquote>
 – «Адал жол» жобасы аясында құрылған топ мүшелерінің қатысуымен &nbsp;темір жол көліктеріне 8 рет рейдттік шаралар жүргізілді. Темір жол көлігіне билетсіз мінген 5 жолаушы анықталды. Жолсеріктерге қатысты көліктік бақылау инспекциясының қызметкерлерімен бірлесіп 8 әкімшілік құқық бұзушылық туралы хаттама рәсімделді. &nbsp;Әр-түрлі техникалық 15 кемшіліктер анықталып отыр», – дейді мониторинг топтың жетекшісі.
</blockquote>
Сонымен қатар, департамент басшысының бірінші орынбасары Бақытжан Ниязов жолаушылар тасымалымен айналысатын вагондардың тозығы жеткені, сервистік қызмет көрсету бойынша кемшіліктердің көп екендігіне атап өтті.
Көліктік бақылау инспекециясы басшысының орынбасары Г.Пірназарова, жолаушылар тасымалына байланысты ҚР Әкімшілік құқық бұзушылық туралы кодексіне енгізілген өзгерістердің маңыздылығын түсіндірді.
Брифинг соңында департаменттің бас маманы Н.Жакудаев Сыбайлас жемқорлыққа қарсы іс-қимыл агенттігінің 1424 Call-орталығы тәулік бойы жұмыс істейді, аталған нөмірге қоңырау шалу тегін және сыбайлас жемқорлық сипатындағы кез келген құқық бұзушылық бойынша түскен хабарламалар міндетті түрде қараладығын хабарлады.
<img src="https://kyzylorda-news.kz/wp-content/uploads/2020/03/qyzylordada-zholserikterding-quqyq-buzghany-anyqtaldy-1.jpg" alt="" />
<img src="https://kyzylorda-news.kz/wp-content/uploads/2020/03/qyzylordada-zholserikterding-quqyq-buzghany-anyqtaldy-2.jpg" alt="" />

Қызылордада жолсеріктердің құқық бұзғаны анықталды

<a href="https://kyzylorda-news.kz/">Kyzylorda-news.kz.</a> ҚР Мемлекеттік қызмет істері агенттігі саяси қызметшілер мен мемлекеттік органдардың бірінші басшыларының бағынышты қызметшілерінің жемқорлық қылмыстары үшін жауапкершілігі мәселелерін түсіндірді, деп хабарлайды <a href="https://lenta.inform.kz/kz/zhemkor-kyzmetkeri-ushin-kim-zhane-kanday-zhagdayda-otstavkaga-ketedi_a3621341">ҚазАқпарат</a>.
<blockquote>
 «Орталық мемлекеттік органның басшысы (министрлер, агенттіктердің төрағалары, Президентке тікелей бағынатын және есеп беретін мемлекеттік органдардың төрағалары) өзінің орынбасары, өзіне тікелей бағынышты мемлекеттік саяси қызметші, жауапты хатшы, аппарат басшысы не орталық мемлекеттік органның облыстық, республикалық маңызы бар қаланың немесе астананың аумақтық бөлімшесінің басшысы сыбайлас жемқорлық қылмыс жасаған кезде отставкаға береді», – деді ҚР МҚІА Мемлекеттік қызмет саласындағы бақылау департаментінің директоры Ерлан Сапаров.
</blockquote>
Оның айтуынша, орталық мемлекеттік орган басшыларының орынбасарлары өзі жетекшілік ететін ведомствоның, дербес құрылымдық бөлімшенің басшысы сыбайлас жемқорлық қылмыс жасаған кезде жұмыстан шығуға өтініш беретін болады.
Отставкаға кету туралы міндет өткен жылдың 10 желтоқсанынан кейін сыбайлас жемқорлық қылмыс жасаған қызметкерлердің басшыларына және саяси қызметкерлерге қолданылады. Мемлекеттік саяси қызметшілер, егер олар тағайындалған күннен бастап үш ай өткеннен кейін сыбайлас жемқорлық қылмыс жасалған жағдайда отставкаға кетеді.
Саяси қызметшілер соттың айыптау үкімі заңды күшіне енгеннен кейін немесе сот әлде қылмыстық қудалау органы қылмыстық істі Қазақстан Республикасы Қылмыстық іс жүргізу кодексінің 35-бабы бірінші бөлігінің 3), 4), 9), 10), 11) 12) және 12) тармақшаларының немесе 36-бабы негізінде қысқартқан соң 10 күнтізбелік күн ішінде отставкаға береді.
Басшылардың жауапкершілігін қарау кезінде көрсетілген шарттардан басқа, қол астындағыларға жасалған сыбайлас жемқорлық қылмысы мен басшының сыбайлас жемқорлық құқық бұзушылық жасаудың алдын алу жөніндегі лауазымдық міндеттерін орындамаудағы немесе тиісінше орындамаудағы кінәсі арасында байланыстың болуы да маңызды.

Жемқор қызметкері үшін кім және қандай жағдайда отставкаға кетеді?

<a href="https://kyzylorda-news.kz/">Kyzylorda-news.kz.</a> Короновирус инфекциясына байланысты елордалық ЖОО-лар қашықтан оқытуға көшіріле ме? Бұл сұраққа бүгін қала әкімдігінде өткен брифингте жауап берілді, деп хабарлайды <a href="https://lenta.inform.kz/kz/koronaviruska-baylanysty-zhoo-lar-distanciyalyk-okuga-koshirile-me_a3621319">ҚазАқпарат.</a>
<blockquote>
 «ҚР Денсаулық сақтау министрлігі күн сайын қазіргі жағдайға байланысты әлем бойынша мониторинг жүргізеді және ол туралы үкімет деңгейінде баяндалады. Басқа мемлекеттерден елімізге келіп жатқан адамдардан коронавирус анықталған жағдайда студенттердің оқуына қатысты қандайда бір өзгеріс болуы мүмкін. Бірақ дәл қазіргі уақытта бұған қатысты ешқандай шешім қабылданған жоқ және ешқандай құжатқа қол қойған жоқпыз», – дейді Нұр-Сұлтан қаласы Қоғамдық денсаулық сақтау басқармасының басшысы Сәуле Қисықова.
</blockquote>
Бұған дейін әлеуметтік желілерде, оның ішінде WhatsApp мессенджерінде әлемде коронавирус инфекциясының өршуіне байланысты жоғары оқу орнының студенттері сабақты қашықтан оқитыны туралы ақпарат тараған болатын.

Қазақстан және Қызылорда облысының жаңалықтары