<a href="https://kyzylorda-news.kz/">Kyzylorda-news.kz.</a> Соңғы 3 жылда Қызылорда облысындағы темір жолдардың бойында 25 адам мерт болған. Ортасынан шойын жол кесіп өтетін Арал қаласында арнайы өткел мәселесі өзекті боп тұр. Пойыз келген уақытта көлік кептелісі 3 шақырымға созылады. Жедел жәрдем мен өрт сөндіру қызметі де өте алмай ұзақ тұрады, деп хабарлайды <a href="https://24.kz/kz/zha-aly-tar/o-am/item/375462-aral-a-pojyz-kelgende-zhal-yz-tkelge-k-ni-ara-an-khaly-ta-zhantalas-bastalady">«Хабар 24»</a>.
Темір жолдың бергі бетіне 22, ал арғы жағына 20 мыңдай халық қоныстанған. Жергілікті жұрттың әрі-бері қатынайтын жалғыз өткелі осы. Аурухана, перзентхана мен өрт сөндіру бекетінің мамандары шақыртуларға дер кезінде жетуге көпір немесе өзге өткелдің жоқтығы қолбайлау болып тұрғанын айтады.
<blockquote>
 «Көпір керек бізге, шақыртуға кешігіп қаламыз. Өткелден 2 пойыз өтіп жатса біраз тұрып қаламыз», – дейді жедел жәрдем қызметінің маманы Ринат Базаров.
 «Жыл сайын автокөлік көбейіп келе жатыр. Арал қаласындағы өткелде көп машина жиналып қалады. Өрт оқиғасы кезінде өте алмай қалу ықтималдығы жоғары. Бірақ қазіргі таңға дейін ешқандай ондай дерек болған жоқ. Өткел жабылатын кезде алдын ала хабарланып, арғы бетке 1 машина шығарып жұмыс істейміз. Бірақ негізі кедергі бар. Үстінен өтетін көпір болса жұмысымыз жеңілдер еді», – дейді Арал аудандық ТЖБ басшысы Мұрат Жиенбаев.
</blockquote>
10 жылдан бері дүркін-дүркін көтерілген мәселені жергілікті билік саралап, сараптап көріпті. Алайда аспалы көпір салуға аудан тіпті облыс бюджетінің шамасы жетпейтін көрінеді.
<blockquote>
 «Техника экономикалық негіздеме құжаттарын жасауға аудандық бюджеттен 9,8 млн тг қаржы бөлдік. Наурыз айының аяғында экспертиза қорытындысы шығады деп жоспарлап отырмыз. Жоба-сметалық құжаттарын жасау 55-60 млн теңге көлемінде шығуы мүмкін. Оны облыстық бюджеттен қаржыландыру қажет. Ал құрылыс жұмыстарының құны шыққаннан кейін республикалық бюджетке ұсынатын боламыз. Республикадан қаржыландыру керек», – дейді Арал ауданының әкімі Мұхтар Оразбаев.
</blockquote>
Жалғыз өткелдің ашылып-жабылуын аңдыған аралдық ағайын жоғарыдан келетін пәрмен тағы 10 жылға созылып кетпесе деген тілек білдіреді.

Аралға пойыз келгенде жалғыз өткелге күні қараған халықта жанталас басталады

<a href="https://kyzylorda-news.kz/">Kyzylorda-news.kz.</a> Білім және ғылым министрі Асхат Аймағамбетов Қазақстандағы жоғары оқу орындары оқытушыларының жалақысы көтерілетінін айтты, деп хабарлайды <a href="https://www.inform.kz/kz/kazakstanda-zhogary-oku-oryndary-okytushylarynyn-zhalakysy-osedi_a3616628">ҚазАқпарат</a>.
Асхат Аймағамбетов БҒМ-де өткен аппараттық кеңесте жоғары оқу орындары оқытушыларының жалақысының төмендігін айтты. Және білім гранттары құнының артуы нәтижесінде профессорлық-оқытушылық құрамының еңбекақысының артатыны туралы мәлімдеді.
<blockquote>
 «ЖОО оқытушыларының жалақысы төмен. Сондықтан, Мемлекет басшысы алға қойған міндеттерге сәйкес 2020-2025 жылдарға арналған білім мен ғылымды дамытудың мемлекеттік бағдарламасы шеңберінде мемлекеттік гранттардың құны осы жылдың қыркүйегінен бастап ұлғайтылатын болады. Бұл қандай нәтиже береді? Ол оқытушылардың жалақысын көтеруге мүмкіндік беретін болады», – деді Министр.
</blockquote>
Асхат Аймағамбетов университет басшыларына әртүрлі форумдар мен тиімсіз іс-шараларға жұмсалатын шығындарды азайтуды тапсырды. Сондай-ақ, жалақы мәселесі бойынша тиісті жұмыстарды жүргізу керектігін айтты.
Министр ҚР БҒМ Жоғары және жоғары оқу орнынан кейінгі білім департаменті директорына университет басшыларының штаты мен оқытушылардың жалақы мәселесін қайта қарауды тапсырды.
Жоғары оқу орындарының басшылары да тиісті тапсырмаларды алды.
<blockquote>
 «Мемлекеттік университеттер тиімсіз шығындарды қайта қарауы тиіс. Әртүрлі тиімсіз форумдарды, шараларды қысқарту керек. Президент қаңтар айында Үкіметтің кеңейтілген отырысында осындай тапсырма берген болатын. Ол тек министрліктің аппаратына қатысты емес, квазимемлекеттік мекемелерге де қатысты мәселе», – деді Асхат Қанатұлы.
</blockquote>
Естеріңізге сала кетейік, бұған дейін ҚР БҒМ жоғары оқу орындарының профессорлық-оқытушылық құрамының жалақысын арттыру туралы тапсырмасы аясында оқу жылының басынан бастап білім және ғылым министрлігіне қарасты 25 ЖОО-да жалақы 20-дан 50%-ға дейін арттырылды.

Қазақстанда жоғары оқу орындары оқытушыларының жалақысы өседі

<a href="https://kyzylorda-news.kz/">Kyzylorda-news.kz</a> ақпараттық агенттігінде ұлы ақын, данышпан Абай Құнанбаевтың 175 жылдығына орай “АБАЙ-175” арнайы айдары іске қосылды. Ұлы ақынға қатысты барлық материалдар, мақалалар осы айдарда жарияланатын болады.
Ал, бүгіннен бастап Абайдың қара сөздерінің аудионұсқасын ұсынамыз.
Оқыған: Фариза ОМАРОВА
БІРІНШІ СӨЗ
Бұл жасқа келгенше жақсы өткіздік пе, жаман өткіздік пе, әйтеуір бірталай өмірімізді өткіздік: алыстық, жұлыстық, айтыстық, тартыстық – әурешілікті көре-көре келдік.&nbsp;Енді жер ортасы жасқа келдік: қажыдық, жалықтық; қылып жүрген ісіміздің баянсызын, байлаусызын көрдік, бәрі қоршылық екенін білдік. Ал, енді қалған өмірімізді қайтіп, не қылып өткіземіз? Соны таба алмай өзім де қайранмын.
Ел бағу? Жоқ, елге бағым жоқ. Бағусыз дертке ұшырайын деген кісі бақпаса, не албыртқан, көңілі басылмаған жастар бағамын демесе, бізді құдай сақтасын!
Мал бағу? Жоқ, баға алмаймын. Балалар өздеріне керегінше өздері бағар. Енді қартайғанда қызығын өзің түгел көре алмайтұғын, ұры, залым, тілемсектердің азығын бағып беремін деп, қалған аз ғана өмірімді қор қылар жайым жоқ.
Ғылым бағу? Жоқ, ғылым бағарға да ғылым сөзін сөйлесер адам жоқ. Білгеніңді кімге үйретерсің, білмегеніңді кімнен сұрарсың? Елсіз-күнсізде кездемені жайып салып, қолына кезін алып отырғанның не пайдасы бар? Мұңдасып шер тарқатысар кісі болмаған соң, ғылым өзі – бір тез қартайтатұғын күйік.
Софылық қылып, дін бағу? Жоқ, ол да болмайды, оған да тыныштық керек. Не көңілде, не көрген күніңде бір тыныштық жоқ, осы елге, осы жерде не қылған софылық?
Балаларды бағу? Жоқ, баға алмаймын. Бағар едім, қалайша бағудың мәнісін де білмеймін, не болсын деп бағам, қай елге қосайын, қай харекетке қосайын? Балаларымның өзіне ілгері өмірінің, білімінің пайдасын тыныштықпенен керерлік орын тапқаным жоқ, қайда бар, не қыл дерімді біле алмай отырмын, не бол деп бағам? Оны да ермек қыла алмадым.
Ақыры ойладым: осы ойыма келген нәрселерді қағазға жаза берейін, ақ қағаз бен қара сияны ермек қылайын, кімде-кім ішінен керекті сөз тапса, жазып алсын, я оқысын, керегі жоқ десе, өз сөзім өзімдікі дедім де, ақыры осыған байладым, енді мұнан басқа ешбір жұмысым жоқ.
1890

Абай Құнанбайұлының қара сөздері (АУДИО)

<a href="https://kyzylorda-news.kz/">Kyzylorda-news.kz.</a> Қызылорда қаласындағы «Евразия» мәдени спорт кешенінде халық балуаны Қажымұқан Мұңайтпасұлын еске алуға арналған қазақ күресінен республикалық турнир өтті.
Жылдағы дәстүрге сәйкес, қазақ күресінен 2000-2002 жылдары туылған жастар арасындағы республикалық ашық турнир 8 мәрте ұйымдастырылуда.
Жарыс додасының ашылу рәсіміне арнайы қатысқан Қызылорда қаласының әкімі Нұрлыбек Нәлібаевжас балуандарға сәттілік тіледі.
<blockquote>
 «Жыл сайын Сыр өңірінің бас қаласы – Қызылорда қаласында қазақтың қанына сіңген қайсар қасиетінің, биік рух пен намыстың күшін ортаға салып, боз кілемде белдесу үшін еліміздің барлық аймақтарынан,көршілес Өзбекстан, Қырғызстан мемлекеттерінен жас палуандарымыз бас қосып, ұлттық спортымызды баршаға паш етеді. Алдағы уақытта да жас спортшыларымыз талай табыстарға қол жеткізіп, халықаралық ареналарда еліміздің абыройын асқақтатып, байрағымызды көкке желбірете берулеріне тілектеспін»,- деді қала әкімі.
</blockquote>
Сонымен қатар, турнирге арнайы келген ҚР спорт қайраткері, спорт ардагері Тоқташ Алдоңғаров және Самбодан КСРО-ның еңбек сіңірген жаттықтырушысы, қазақ күресінен ҚР еңбегі сіңген жаттықтырушысы Мұрат Жақып турнирге қатысушы балуандарға сәттілік тілей отырып, қолдау көрсетіп, турнирді 8-ші рет өткізіп отырған қала әкімдігіне зор алғысын білдірді.
Додада Өзбекстан мен Қырғызстаннан және еліміздің барлық аймақтарынан 17 команда, 220 спортшы бақ сынасты.
Жарыс барысында 9 салмақ дәрежесі бойынша жүлделер сарапқа салынып, жеңімпаздар мен жүлдегерлер осы жарысқа арнайылап жасалған медальдармен және қаржылай сыйақылармен марапатталды.
<img src="https://kyzylorda-news.kz/wp-content/uploads/2020/02/20kazkures2.jpg" alt="" />
<img src="https://kyzylorda-news.kz/wp-content/uploads/2020/02/20kazkures3.jpg" alt="" />
<img src="https://kyzylorda-news.kz/wp-content/uploads/2020/02/20kazkures4.jpg" alt="" />
<img src="https://kyzylorda-news.kz/wp-content/uploads/2020/02/20kazkures5.jpg" alt="" />
<img src="https://kyzylorda-news.kz/wp-content/uploads/2020/02/20kazkures6.jpg" alt="" />
<img src="https://kyzylorda-news.kz/wp-content/uploads/2020/02/20kazkures7.jpg" alt="" />

Қызылордада қазақ күресінен турнир өтті

<a href="https://kyzylorda-news.kz/">Kyzylorda-news.kz.</a> 20 ақпан күні республиканың солтүстік, орталық және шығысында құбылмалы күн райы сақталып, жекелеген жерлерде қар жауады. Қазақстанның қалған бөлігінде жауын-шашынсыз ауа райы күтіледі. Кей жерлерде тұман күтіледі, солтүстікте, орталықта және шығыста бұрқасын көтеріліп, жел күшейеді, деп хабарлайды «Қазгидромет».
Қазгидромет РМК мәліметінше, Солтүстік Қазақстан облысында кей жерлерде бұрқасын болады, желдің екпіні 15-20, кей жерлерде 23-28 м/с жетуі ықтимал.
Қостанай облысының кей жерлерінде бұрқасын, тұман, көктайғақ күтіледі, желдің күші 15-20, түнде 23-28 м/с артады.
Ақмола облысының кей жерлерінде жаяу бұрқасын болжанады, желдің жылдамдығы 15-20, кей жерлерде 23-28 м/с күшейеді.
Павлодар облысының кей жерлерінде бұрқасын, көктайғақ болады, желдің екпіні 15-20 м/с, түнде 23-28 м/с артуы мүмкін.
Шығыс Қазақстан облысының кей жерлерінде бұрқасын, тұман болады, желдің күші 15-20 м/с құрайды. Қарағанды облысының кей жерлерінде тұман күтіледі, түнде жел 18 м/с бұрқасынмен бірге күшейеді.
Батыс Қазақстан, түнде және таңертең Алматы облыстарының кей жерлерінде тұман, көктайғақ болжанады.
Маңғыстау, Атырау, Қызылорда, Түркістан облыстарының кей жерлерінде тұман күтіледі. Жамбыл облысының кей жерлерінде тұман күтіледі, желдің жылдамдығы – 15-20 м/с.

20 ақпан күнгі ауа райы болжамы

<a href="https://kyzylorda-news.kz/">Kyzylorda-news.kz</a> ақпараттық агенттігінің 20 ақпанға арналған жұлдыз-жорамалы.
Тоқты
Жақындарыңызбен әңгіме-дүкен құратын күн. Іскерлік кездесулер ұйымдастыруға да қолайлы. Бұрын қарым-қатынасыңыз ажырап кеткен жандармен қайта тіл табысасыз. Кикілжіңдер жойылып, барлығы орнына келеді.
Торпақ
Алдағы уақытта өміріңіздің бір бөлшегіне айналатын жанмен таныс боласыз. Бұл кездесу сізге қуаныш сыйлайтын болады. Ішкі түйсігіңіз кіммен дос болуды, кімнен бойды аулақ ұстау қажет екенін ескертеді.
Егіздер
Асығуға тура келеді. Маңызды жұмыстарда тез шешім қабылдауыңыз қажет. Барлық шаруаны назарда ұстау қажет. Ұсақ-түйекке де мән бергеніңіз жөн. Сондай-ақ бүгін қызықты жаңалық естисіз.
Шаян
Барлығы керемет. Жұмыс жасауға керемет күн. Қиын жұмыстың өзін оңай орындап тастайсыз. Қолға алған жобаларды орындауға, былтыр қолға алған шаруаны аяқтауға қолайлы күн.
Арыстан
Жемісті күн. Өзіңіздің барлығ жұмысты игеруге күш-қуатыңыз жететінін сезінесіз. Айналаңыздағы жандар алған бетіңізден қайтпайтыныңызды біліп, сіздің жолыңызға тосқауыл болмайды.
Бикеш
Жұмыс жасауға құлшынысыңыз артады. Маңдай терді төкпей, іс өнбесін жақсы білесіз. Сондықтан қызықты ұсыныстар бойынша жұмыс жасауды қолға аласыз, оған бар күш-жігеріңізді саласыз.
Таразы
Қобалжулысыз. Себебі барлық шаруаны асығыс орындайсыз. Жұмысты асықпай жасағыңыз-ақ келеді. Бірақ уақыт аз. Түстен кейін жұмыстағы және жеке өміріңіздегі мәселелерді ретке келтіресіз.
Сарышаян
Сәтті күн. Бүгін жағымсыз оқиғалар орын алмайды. Маңызды сұрақтарға жауап тауып, қиын жұмыстарды орындай аласыз. Жалпы, бүгін жолыңыз болады. Жақын адамдарыңызбен де жақсы қарым-қатынас орнатасыз.
Мерген
Ешқайда асықпаңыз. Барлығының өз уақыты бар. Осыны естен шығармаңыз. Орын алып жатқан оқиғаларды өзгертемін деп әуреге түспеңіз. Барлығын уақыт еншісіне салып, әліптің артын бағыңыз.
Тауешкі
Жұмысқа қатысты шаруаларды реттеуге қолайлы күн. Жаңа тапсырмалар беріледі. Олардың барлығына қызығушылық танытасыз. Сонымен қатар бүгін бойдағы талантыңызды сыртқа шығарып, жұртты таңқалдырасыз.
Суқұйғыш
Табысқа жетуге мүмкіндік туып тұр. Ол үшін тез шешім қабылдағаныңыз жөн. Бүгін өз ойы, өз-өзіне сенімі жоқ адамдардың да жолы болады. Жауапкершілік жүгін мойнына арқалай алатын жандар бүгін жетістікке жете алады.
Балықтар
Соңғы уақытта сізді сергелдеңге салған мәселенің шешімін табуға болады. Барлық мәселенің ақ-қарасы анықталғаннан кейін қай бағытта жұмыс жасау керектігін ұғасыз. Осыдан кейін қорқынышыңыз жойылады.

Жұлдыздар не дейді?

<a href="https://kyzylorda-news.kz/">Kyzylorda-news.kz.</a> Әнші фонограммамен ән айтатын болса, ол туралы алдын ала билет сатылмай тұрып, жарнама берер кезде ескертуі қажет, деп хабарлайды&nbsp;<a href="https://stan.kz/fonogramma-327458/">Stan.kz</a>.&nbsp;
Бұл туралы мәдениет және өнер департаментінің директоры Күміс Сейітова мәлімдеді.&nbsp;&nbsp;
<blockquote>
 «Бүгін ҚР мәдениет және спорт министрлігінің басшылығымен төрт орталық ашылды. Олар мұражай, кітапхана, театр және концерт салаларына арналды. Бұл орталықтардың жұмысын министрлікке қарасты мәдениет және өнер департаменті өз қадағалауына алады. Қазіргі таңда Қазақстанның&nbsp;концерттік-гастрольдік бағыты бір қалыпты емес деп айтсақ болады. Бір уақытта бір аймақтағы концерттік ұйымдар іс-шаралар ұйымдастырып жатады. Бұл дұрыс емес. Біз олардың жұмыстарын ретке келтіреміз», – деді Күміс Сейітова.&nbsp;
</blockquote>
Бұған қоса ол жаңа орталықтардың қандай мәселелерге көңіл бөлетіндігін айтып кетті.&nbsp;
<blockquote>
 «Қазір біз еліміздің мәдениет туралы заңына өзгертулер енгізудеміз. Бірнеше сұрақтарды талқыға салдық. Біріншіден, егер орныдаушы фонограммамен ән салатын болса, ол бұл жайлы алдын ала ескертуі міндетті. Яғни билеттер мен жарнама берілмей тұрып ұйымдастырушы тарап пен министрлік бұл туралы хабардар болуы керек. Қалған жайттар заң өз күшіне енгеннен кейін айтылады. Екіншіден, әншінің концерт кезінде жағдайы дұрыс болуы шарт. Үшіншіден, өнерпаздың әндеріндегі дөрекі сөздерге тыйым салынады. Бұл заңды құрастырғанда қоғамның пікірлері де ескеріледі», – деп қосты шенеунік.&nbsp;
</blockquote>
Бұған дейін қазақстандық әншілерді көрермендерге фонограмма&nbsp;<a href="https://stan.kz/koncertke-deyin-kazakstandik-anshilerdi-korermenderge-f-323118/">қолданатынын ескертуге міндеттейтіндігі жайлы айтылған</a>&nbsp;еді.

Мәдениет министрлігі: Әнші фонограмма жайлы алдын ала ескертуі керек

<a href="https://kyzylorda-news.kz/">Kyzylorda-news.kz.</a> Қорқыт ата атындағы Қызылорда мемлекеттік университетінің оқу-әдістемелік жұмыстар жөніндегі проректоры лауазымына Абайбек Талғатұлы Жүнісов тағайындалды.
Абайбек Талғатұлы өзінің еңбек жолын 1995 – 2000 жылдар аралығында Қорқыт Ата атындағы Қызылорда мемлекетткі университетінде оқытушы қызметінен бастады. 2000-2002 жылдары «Мелиорация және гидроэкология» кафедрасы аға оқытушы. 2002-2003 жылдары оқу-әдістемелік бөлімінің бас әдіскері.
2003-2004 жылдары. оқу процесін ұйымдастыру бөлімінің меңгерушісі, 2004 – 2005 жылы Қорқыт Ата атындағы Қызылорда мемлекеттік университеті ректоры кеңесшісі. 2005-2007 жылдар аралығы оқу – әдістемелік басқарма басшысы. 2007-2008 жылы Қорқыт Ата атындағы Қызылорда мемлекеттік университеті оқу-әдістемелік жұмыстар жөніндегі проректоры қызметін атқарды.
2008-2010 жылдары Болашақ университетінің ректоры. 2010-2011 оқу жылы Қорқыт Ата атындағы Қызылорда мемлекеттік университеті оқу-әдістемелік жұмыстар жөніндегі проректоры. 2011-2018 оқу ісі жөніндегі проректор-бірінші проректоры, 2019 жылдан бастап осы уақыт аралығына дейін Қызылорда облыстық сайлау комиссиясының төрағасы лауазымын абыроймен атқарып келді.
<img src="https://kyzylorda-news.kz/wp-content/uploads/2020/02/19abaibek2.jpg" alt="" />

Қызылордадағы мемлекеттік университеттің проректоры тағайындалды

<a href="https://kyzylorda-news.kz/">Kyzylorda-news.kz.</a> Бүгін Қызылорда облысының әкімі Қуанышбек Ысқақовтың қатысуымен актив отырысы өтті. Жиында Қызылорда облысының дене шынықтыру және спорт басқармасының басшысы лауазымында қызмет атқарып келген Әкімов Олжас Азатұлы басқа лауазымға ауысуына байланысты қызметінен босату жөнінде шешім қабылданғанын айтты.
Олжас Азатұлы өңірде 2017 жылдан бастап жұмыс істеп келді. Қызмет атқарған жылдары аймақта спорт саласының дамуына елеулі үлес қосты. Қазіргі таңда дене шынықтыру және спортпен жүйелі түрде шұғылданушылар қатары 30,2 пайызға көтеріліп, олардың нақты саны 243 мың адамға жеткен. Жыл сайын 1500 астам бұқаралық спорттық шаралар өткізіліп, оған 500 мыңға жуық адам қатыстырылған. Бір ғана «Алтын белбеу» турнирі 8 мыңнан астам спортшының басын біріктірген.
Аймақ басшысы өткен жылы облыс спортшылары халықаралық жарыстарда табысты өнер көрсеткенін айтты.
<blockquote>
 «Атап айтқанда, Жапонияның Сайтама қаласында мәнерлеп сырғанаудан Элизабет Тұрсынбаева Әлем чемпионатының күміс жүлдесін иеленіп, төрт айналым элемент секірген әйелдер арасында тұңғыш рет тарихқа енді. Сондай-ақ, Нұр-Сұлтан қаласында еркін күрестен өткен Әлем чемпионатында Дәулет Ниязбеков күміс жүлдені иеленіп, 2020 жылы Токиодағы Олимпиада ойындарына жолдама алды. Басты жаңалық – «Қайсар» футбол командасының Қазақстан кубогы ойындарында жеңімпаз атануы болды. Команда 20 жыл уақыттан кейін екінші рет финалға шықты. Алдағы меже – Еуропа лигасында лайықты өнер көрсету. Атқарылған жұмыстардың нәтижесінде Қазақстан Ұлттық олимпиадалық комитеттің ұйымдастыруымен «Алтын Самғау – 2019» Ұлттық спорттық жүлдесі байқауы бойынша 2019 жылы республикада Қызылорда облысы «Үздік спорттық өңір» номинациясының жеңімпазы атанды. Спорт нысандарының материалды-техникалық базасының нығаюына ерекше көңіл бөлінді. Осы оң жетістіктер Олжас Азатұлы басқарған басқарма ұжымының бірлескен, жүйелі және тиімді жұмысының нәтижесі деп білеміз», – деді Қуанышбек Ысқақов.
</blockquote>
Сондай-ақ, Олжас Азатұлы мінсіз мемлекеттік қызметі үшін Мемлекет басшысының Жарлығымен өткен жылы “Ерен еңбегі үшін” медалімен марапатталды.Ал, бүгін аймақ басшысы Сыр өңірінің әлеуметтік-экономикалық дамуына қосқан ерекше үлесі үшін облыстың ең жоғарғы наградасы Қызылорда облысының Құрмет грамотасын табыстады.

Олжас Акимов жаңа қызметке ауысты

<a href="https://kyzylorda-news.kz/">Kyzylorda-news.kz.</a>Бала босанып, ана атану – әйел өміріндегі ең жауапты шақ. Бұл кезеңде аналарға барынша қолдау көрсетіп, бала күтімімен айналасуына арнайы демалыс берілуі қажет, деп жазады <a href="https://informburo.kz/kaz/dekrettk-demalys-pen-tlemder-alay-esepteled-.html?utm_source=fb&utm_medium=cpc&utm_campaign=February_KZ_dekret&fbclid=IwAR3xmF22q_xD1tUFm28lBjFBSlxyP5YPFlNNdAMjgscxBP8a67W-NC9g_Mg">Informburo</a>.
Қазақстанда жүктілікке және босануға байланысты демалыс беру тәртібі&nbsp;Еңбек кодексімен&nbsp;реттеледі.
Кодекстің 99-бабында жазылғандай, жүкті әйелдерге, бала босанған әйелдерге және жаңа туған баланы асырап алған әйелдерге (еркектерге) баланың туылуына байланысты келесі демалыс түрлері беріледі:
<ul>
<li>Жүктілікке және босануға байланысты демалыс;</li>
<li>Жаңа туған баланы (балаларды) асырап алған жұмыскерлерге демалыс;</li>
<li>Бала үш жасқа толғанға дейін оның күтіміне байланысты жалақы сақталмайтын демалыс.</li>
</ul>
Жұмыс беруші қызметкерді қай уақытта декреттік демалысқа жібереді?
Қызметтегі жүкті әйел декреттік демалысқа шығуы үшін оған уақытша еңбекке жарамсыздық парағы беріледі. Бұл парақ тек демалысқа шығу үшін ғана емес, бала босануына байланысты жәрдемақылар алу үшін де қажет.
Уақытша еңбекке жарамсыздық парағы&nbsp;– еңбекке уақытша жарамсыздықты куәландыратын және жұмыстан уақытша босатуға және еңбекке уақытша жарамсыздығы бойынша жәрдемақы алуға құқығын растайтын құжат.
Еңбекке уақытша қабілетсіздік парағын жүкті әйел тіркелген және тұрақты қаралып жүрген акушер-гинеколог дәрігер береді. Демалыс мерзімі: босануға дейін күнтізбелік 70 күн және босанғаннан кейін күнтізбелік 56 күн (қиын босанған немесе екі немесе одан көп бала туған жағдайда – 70 күн). Ал ядролық сынақтардың әсеріне ұшыраған аумақтарда тұратын әйелдерге берілетін демалыс 170 күнге дейін ұзаруы мүмкін. Бұл санатқа жататын әйелдер қиын босанған немесе екі немесе одан көп бала туған жағдайда тағы 14 күн демалыс қосылады.
Жұмыс беруші аталған медициналық құжатта көрсетілген күннен бастап, жүкті қызметкерді жұмыстан босатуы керек.
Көп ретте декреттік демалысқа бала анасы шығатын болғанымен, бұл мүмкіндікті әкелер де пайдалана алады. Бірақ, біреуі ғана: баланың не анасы, не әкесі. Әкелердің декрет демалысына шығу тәртібі туралы informburo.kz бұған дейін де жазған болатын, ол туралы&nbsp;<a href="https://informburo.kz/kaz/keler-de-dekretke-shya-alady-azastanda-soy-bes-zhylda-40-mynan-astam-ke-dekretke-shyan.html">осы жерден</a>&nbsp;оқи аласыздар.
Жүктілік және босануға байланысты әлеуметтік төлемдер
Жұмыс істейтін әйелдер үш түрлі жәрдемақы ала алады. Олар:
<ol>
<li>Баланың тууына байланысты бір жолғы мемлекеттік жәрдемақы;</li>
<li>Жүктілігі және босануы бойынша табысынан айырылуына байланысты әлеуметтік төлем;</li>
<li>Баланың бір жасқа толғанға дейінгі күтімі бойынша әлеуметік жәрдемақы.</li>
</ol>
Бір жолғы мемлекеттік жәрдемақы&nbsp;көлемі айлық есептік көрсеткішке қарай өзгеріп отырады. 2019 жылғы жәрдемақы мөлшері төмендегіше:
<ul>
<li>Бірінші, екінші, үшінші балаға – 95 950 теңге;</li>
<li>Төртінші және одан көп балаға – 159 075 теңге;</li>
<li>Жұмыс істейтін әйелдер демалысқа шығарда берілетін әлеуметтік төлем&nbsp;түрі соңғы 12 айдағы орташа айлық табыс мөлшерін еңбекке жарамсыздық күндерінің коэффициентіне көбейту арқылы анықталады:</li>
</ul>
Әлеуметтік төлем = ОАТ*ЕЖК
Бұл жерде:
ОАТ&nbsp;– жүктілік және босану бойынша еңбек демалысына дейінгі соңғы 12 ай ішіндегі орташа айлық табыс;
ЕЖК&nbsp;– еңбекке жарамсыздық күндерінің коэффициенті, ол жүктілік және босану бойынша еңбекке уақытша жарамсыздық парағында көрсетілген күндер санын 30-ға бөлу арқылы анықталады.
Формула қарапайым ғана. Енді оны мысалмен берейік. Айталық, қалыпты босанған жағдайда жалпы ұзақтығы 126 күнді құрайтын декреттік демалыс беріледі. Сәйкесінше, еңбекке жарамсыздық күндерінің коэффициенті 4,2-ні құрайды: 126 күн/30. Декреттік демалысқа шығатын әйелдің орташа айлық табысы 100 мың теңге болған жағдайда жүктілік және босану бойынша әлеуметтік төлемнің мөлшері 420 000 теңгені (жоғарыдағы формулаға сәйкес, 100 000*4,2) құрайды. Осылайша, ешбір маманның көмегінсіз әлеуметтік төлем мөлшерін өзіңіз-ақ есептеп алуыңызға болады.
Егер декреттік демалыста болған уақыт ішінде екінші балаға жүкті болған жағдайда, қызметкер бала күтіміне байланысты тағы да демалыс сұрап, өтініш жазады. Сол арқылы бұйрық шығарылады. Жұмыс орнын сақтау үшін, жұмыс берушіге қызметкер өзінің жүктілігін растайтын тиісті құжаттарды беруі тиіс. Айта кетейік, декреттегі аналар демалыс уақытында жұмыстан айрылып қаламын деп уайымдамаса болады. Өйткені бұл Еңбек кодексінің&nbsp;54-бабымен&nbsp;реттелген:
Жұмыс берушіге жүктілік туралы анықтаманы ұсынған жүктi әйелдермен, үш жасқа дейiнгi балалары бар әйелдермен, он төрт жасқа дейінгі баланы (он сегіз жасқа дейінгі мүгедек баланы) тәрбиелеп отырған жалғызілікті аналармен, аталған балалар санатын анасыз тәрбиелеп отырған өзге де адамдармен жұмыс берушінің бастамасымен еңбек шартын бұзуға жол берілмейді.
Декреттік демалыстың бүкіл кезеңі еңбек өтіліне қосылады. Екінші декреттік демалыстан шыққан қызметкер жыл сайынғы ақылы еңбек демалысын алу құқығына ие.
Жұмыс істейтін әйелдерге берілетін жәрдемақылардың үшінші түрі – жоғарыда атап өткеніміздей,&nbsp;баланың бір жасқа толғанға дейінгі күтімі үшін берілетін әлеуметік жәрдемақы.
Бұл жәрдемақы түрі төмендегіше есептеледі:
Соңғы екі жыл ішіндегі жалпы табысының көлемін 24 айға бөліп, содан кейін 0,4-ке көбейту керек. Одан 10 пайыз зейнетақы жарнасын алынады.
Мысалы, әйел босанғанға дейін бір жарым жыл жұмыс істейді. Бір жыл бойы жалақысы 180 мың, қалған алты айда 200 мыңға өсті делік. Енді осының барлығын есептеп көрейік: 180*12+200*6=3 360 000. Бұл сіздің соңғы екі жылдағы жалпы табысыңыз. Алынған соманы 24 айға бөлеміз: 3 360 000/24= 140 000 теңге. Бұл – табыстың орташа айлық мөлшері. Баланың бір жасқа толғанға дейінгі күтімі бойынша жәрдемақы мөлшерін есептеу үшін осы көрсеткішті 0,4-ке көбейтіп, 10% зейнетақы жарналарын шегеру керек, яғни: 140 000*0,4 = 56 000 теңге, 10% шегергенде босанған әйел ай сайын 50 400 теңге көлемінде алады.
Бұл ретте, бала бір жасқа толғанға дейін оның күтіміне байланысты табысынан айырылған жағдайда төленетін әлеуметтік төлемнің ең жоғары мөлшері 7 еселенген ЕТЖ (2019 жылы ЕТЖ – 42 500 теңге) мөлшерінің қырық пайызынан аспауға, ал әлеуметтік төлемнің ең төмен мөлшері бала бір жасқа толғанға дейін оның күтіміне байланысты берілетін ай сайынғы мемлекеттік жәрдемақы мөлшерінен кем болмауға тиіс.

Декреттік демалыс пен төлемдер қалай есептеледі?

<a href="https://kyzylorda-news.kz/">Kyzylorda-news.kz.</a> Индустрия және инфрақұрылымдық даму министрлігі Алматы түбінде апатқа ұшыраған ұшақтың қалай құлағанын көрсетті, деп хабарлайды&nbsp;<a href="https://sputniknews.kz/incidents/20200219/12884614/Almaty-apat-video.html">Sputnik Қазақстан</a>.
ИИДМ авиациялық оқиғаларды тергеу басқармасының өкілдері Алматы түбінде ұшақтың құлаған сәтін визуализациялады.
Бір жарым минуттық роликте әуе кемесінің қандай биіктікке көтерілгені, жылдамдығы, қисайған сәті мен қозғалтқыш жұмысының параметрлері көрсетілген.
Мемлекетаралық авиация комитетінің бас директоры Виктор Сороченконың айтуынша, Fokker 100 ұшағы 6 метрге дейін көтеріліп, содан кейін төмен ылдилаған.
<img src="https://kyzylorda-news.kz/wp-content/uploads/2020/02/19ushakapaty2.jpg" alt="" />
Визуализация мемлекетаралық авиация комитеті техникалық зертханасының базасында жасалды. Соронченконың айтуынша, мұндай оқиғалар авиация практикасында бұған дейін де болған.
<blockquote>
 «Бұл апаттың 2007 жылы Францияда болған әуе апатымен ұқсастығы көп. Мемлекетаралық авиация комитетінің мамандары апатқа жан-жақты талдау жүргізді. Франция органдары осы ұшақ апатына қатысты мәліметтер мен ұшу параметрлерін бізге тапсырды», – деді ол.
</blockquote>

Алматыдағы ұшақ апаты қалай болды? (ВИДЕО)

<a href="https://kyzylorda-news.kz/">Kyzylorda-news.kz.</a> Бүгінде құжаттың заңды маңыздылығын растау үшін оған апостиль қою қажет. Сот құжаттарында апостильдің болуы оның Гаага конвенциясына қатысушы елдердің ресми мекемелерінде жарамдылығын растайды.
Сот органдарынан шығатын ресми құжаттарға апостильді ҚР Жоғарғы сотының аппараты, облыстардағы, Нұр-Сұлтан, Алматы және Шымкент қалаларындағы аймақтық органдар қоя алады.
Заңды және жеке тұлғалар бұл қызметті алу үшін <a href="http://egov.kz/">egov.kz</a> порталын қолдана алады:
-Порталда авторизациядан өтіп, қызметке онлайн тапсырыс беріңіз
-Электронды өтінішті толтырыңыз
-Әр апостильденетін құжатқа 0,5 АЕК көлемінде баж төлеңіз
-Апостильденуі қажет құжаттың скан-көшірмесін жүктеңіз
-ЭЦҚ-мен қол қойғаннан кейін жауап бір күн ішінде келеді
-Жеке кабинетіңізге оң жауап келген жағдайда, сот органдарына апостильді бірден қойғызуға жүгіне аласыз.
<img src="https://kyzylorda-news.kz/wp-content/uploads/2020/02/19sonkaz1.jpg" alt="" />

Қазақстан және Қызылорда облысының жаңалықтары