<a href="https://kyzylorda-news.kz/">Kyzylorda-news.kz.</a> Облыстың бас мемлекеттік санитар дәрігері Әлия Әбдіқайымованың қаулысына сәйкес Қызылорда қаласындағы көліктер мен қоғамдық-көпшілік орындардың жұмысына шектеу қойылды. Бұл туралы облыстық тауарлар мен көрсетілетін қызметтердің сапасы мен қауіпсіздігін бақылау департаменті хабарлады.
Атап айтқанда, автовокзал мен бейберекет ашылған автотұрақтар арқылы облысаралық, қалааралық, ауданаралық автобус, шағын автобус, такси және тағы басқа көліктермен жолаушы тасымалдау бүгін, яғни 30 наурыз күнгі сағат 00.00 минуттан бастап арнайы ескертпеге дейін тоқтатылады.
Облыс орталығындағы саябақ, сауна, массаж, бильярд, компьютер, ойын бөлмелері, интернет-клуб, боулинг, букмекерлер, лото, спорт кешендері (үйірме, секциялар), футбол алаңдары, балаларды дамыту орталықтары және халық көп шоғырланған басқа да нысандардың жұмысына да шектеу қойылып отыр.
Сонымен қатар, автокөлік, киім-кешек, мал базарлары, тойхана, той салондары, банкет залдары мен үй жағдайында өткізілетін мерекелік, дәстүрлік (өзге ұлттардың ата-аналар күні, құран оқыту, тағы басқа) іс-шаралар уақытша өткізілмейді.

Қызылордада жолаушы тасымалы мен көпшілік орындардың жұмысы тоқтайды

<a href="https://kyzylorda-news.kz/">Kyzylorda-news.kz</a>. Елорда әкімдігі күшейтілген карантин режимі кезінде жұмысқа баратын азаматтардың өзімен бірге қандай құжат алып жүруі керек екенін айтты, деп хабарлайды <a href="https://lenta.inform.kz/kz/kusheytilgen-karantin-kezinde-adamdar-ozderimen-birge-kanday-kuzhat-alyp-zhurui-kerek_a3631040">ҚазАқпарат</a>.
Қалалық әкімдіктің баспасөз қызметі хабарлағандай, күшейтілген карантин режимінде жұмысқа баруы керек қызметшілер өздерімен бірге өзі жұмыс істейтін ұйымның мөрі басылған және басшысының қолы қойылған анықтаманы алып жүрсе жеткілікті.
Бұқаралық ақпарат құралдарының өкілдері де жұмыс орнынан алған анықтама мен қызметтік куәлікті өзімен бірге алып жүруі керек.
<blockquote>
 «Журналистер өзімен бірге жұмыс істейтін ұйымның мөрі қойылған анықтама мен қызметтік куәлік ұстап жүруі тиіс», – дейді әкімдіктің баспасөз қызметі.
</blockquote>

Күшейтілген карантин кезінде адамдар өздерімен бірге қандай құжат алып жүруі керек?

<a href="https://kyzylorda-news.kz/">Kyzylorda-news.kz.</a> Коронавирус індетін жұқтырған тағы 9 адам тiркелді. Алматы қаласында – 3 адам, Қызылорда облысында – 3 адам, Ақмола облысында – 3 адам, деп хабарлайды <a href="https://www.coronavirus2020.kz/kz/kazakstandagy-koronavirus-boyynsha-30-nauryz-sagat-11-10-zhagday_a3631053">www.coronavirus2020.kz.</a>
30 наурыз сағат 11:10-дағы мәлімет бойынша, Нұр-Сұлтан қаласы бойынша 167 адам, Алматы қаласында – 73 адам, Қарағанды облысында – 7, Ақмола облысында – 9 адам, Атырау облысы – 12 адам, Жамбыл облысында -3 адам, Шымкент қаласында – 2 адам, Шығыс Қазақстан облысында – 2 адам, Алматы облысында – 6 адам, Ақтөбе облысында – 2 адам, Солтүстік Қазақстан облысында – 1 адам, Павлодар облысында – 1 адам, Маңғыстау облысында – 1 адам, Қызылорда облысында – 5 адам, Батыс Қазақстан облысында – 2 адам, жалпы 293 науқас тіркелді.

Қызылорда облысында коронавирус жұқтырған тағы 3 адам анықталды

<a href="https://kyzylorda-news.kz/">Kyzylorda-news.kz.</a> Ағымдағы жылдың 25 наурызында ауласына той жасаған Әйтеке би кентінің тұрғыны Қазалы аудандық сотының шешімімен төтенше жағдай режимін бұзғаны үшін жазаланды.
Аталған азаматқа қатысты ҚР «Әкімшілік құқық бұзушылық туралы» Кодексінің 476-бабы бойынша іс қозғалып, 7 тәулікке әкімшілік қамаққа алу жазасы тағайындалды.
Сондай-ақ, 23 наурыз күні «Наурыз» мейрамханасында қыз ұзату тойын жасаған тұрғынға да әкімшілік хаттама толтырылып, аудандық сотқа жолданды.
Бүгін аудандық мобильдік топ мүшелері Әйтеке би кенті мен Қазалы қаласында той жасаған 2 тұрғынды анықтап, төтенше жағдай режимін бұзғаны үшін әкімшілік хаттамалар толтырылды.

Қазалыда ауласында той жасаған тұрғын 7 тәулікке қамалды

<a href="https://kyzylorda-news.kz/">Kyzylorda-news.kz</a>. Қазақстанда иммигранттардың елге кіру және шығу тәртібіне өзгерістер енгізілді, деп хабарлайды <a href="https://www.inform.kz/kz/kazakstanda-72-sagattyk-vizasyz-rezhim-1-shildege-deyin-toktatyldy_a3631028">ҚазАқпарат</a>.
Атап айтқанда «Көшіп келушілердің Қазақстанға келуінің және онда болуының, сондай-ақ олардың Қазақстан аумағынан кетуінің қағидаларының 26-1-тармағының қолданылуын тоқтата тұру туралы» Үкімет қаулысына өзгеріс енгізіліп отыр.
<blockquote>
 «ҚР Үкіметінің 2012 жылғы 21 қаңтардағы № 148 қаулысымен бекітілген көшіп келушілердің Қазақстан Республикасына келуінің және онда болуының, сондай-ақ олардың Қазақстан Республикасынан кетуінің қағидаларының 26-1-тармағының қолданылуын тоқтата тұру туралы» ҚР Үкіметінің 2020 жылғы 27 қаңтардағы № 10 қаулысына мынадай өзгеріс енгізілсін: Қазақстан Республикасына келудің, болудың және одан кетудің жетпіс екі сағаттық визасыз режімінің қолданылуы бөлігінде Қазақстан Республикасы Үкіметінің 2012 жылғы 21 қаңтардағы № 148 қаулысымен бекітілген көшіп келушілердің Қазақстан Республикасына келуінің және онда болуының, сондай-ақ олардың Қазақстан Республикасынан кетуінің қағидаларының 26-1-тармағының қолданылуы 2020 жылғы 1 шілдеге дейін тоқтатыла тұрсын», – деп жазылған Үкімет қаулысында.
</blockquote>
Осы қаулы қол қойылған күнінен бастап қолданысқа енгізіліп, ресми түрде жарияланды.

Қазақстанда 72 сағаттық визасыз режім 1 шілдеге дейін тоқтатылды

<a href="https://kyzylorda-news.kz/">Kyzylorda-news.kz.</a> Қызылорда облысы полиция департаментінің бастығы полиция полковнигі Бектөре Сұлтан облыс тұрғындары&nbsp; алдында есептік кездесу өткізді.
Елімізде коронавирус індетіне қарсы&nbsp; төтенше жағдай жариялануына байланысты есеп беру кездесуі әлеуметтік желі арқылы онлайн режимде өтті.
Бектөре Сұлтан тікелей эфирде тұрғындармен тілдесіп, олардың сұрақтары мен толғандырған мәселелері бойынша &nbsp;жауап берді.
Халық алдында есеп беру кездесуін Бектөре Жеңісбайұлы ашып,&nbsp; қылмыстық ахуал мен қылмыстық құқық бұзушылықтың алдын алу бағытындағы&nbsp; атқарылған жұмыс туралы айтып өтті. Онда облыс көлемінде қабылданған шаралар нәтижесінде&nbsp; 2019 жылдың нәтижесімен қылмыс саны төмендеп, қылмыстық ахуалдың тұрақты екендігін сөз етті.
Атап айтар болсақ, қоғамдық орындарда (-17%), көшелерде (-24%), топтасып (-28%), жасөспірімдермен (-28%) жасалған қылмыс саны азайды.
Есептік кездесу барысында Бектөре Сұлтан әлемді дүрліктірген коронавируске&nbsp;қарсы күрестің маңыздылығын айта отырып, тұрғындардан сақтану шараларын&nbsp; &nbsp;ұстануды, халық көп жиналатын орындарға бармау қажеттігін басып айтты. Әрбір азамат өз денсаулығына және айналасындағы адамдардың денсаулығына жауапкершілікті сезінсе екен деген ойын білдірді. Қазіргі таңда Қызылорда облысы полиция департаментінің&nbsp;жеке құрамы&nbsp;ерекше режимде қызмет атқарып жатыр. Күні–түні рейдтік жұмыстар жүргізіліп, төтенше&nbsp;жағдай&nbsp;кезінде іске асырылатын талаптардың&nbsp;сақталуын&nbsp;қатаң&nbsp;қадағалауда.&nbsp;
Сонымен қатар, департамент бастығы полиция жұмысын жаңғырту, жаңа сатыға көтеру, азаматтардың құқығын қорғайтын тәртіп сақшысының имиджін қалыптастыру, сонымен қатар, сандық технологияларды енгізу жұмыстары жөнінде айта келіп, тәртіп сақшылары мен халық арасындағы өзара іс-қимылды жандандыру полиция қызметінің ашықтығы мен тиімділігін арттыратынын алға&nbsp; тартты.
Бектөре Жеңісбайұлы азаматтардың сауалдарын, толғандырған мәселелерін мұқият зерделеп, түйткілді мәселелерін жақын арада шешуге тырысатынын &nbsp;жеткізді.
Бүгінгі онлайн режимде өткен есептік кездесу барысында тұрғындардың бірі белгілі бір аймақтарда жол белгілерін орнату, техникалық құрылғылар орнату, ішкі істер органдарына жұмысқа орналасу, Төтенше жағдай режимін &nbsp;бұзғаны үшін жауапкершілік туралы мәлімет алғысы келсе, енді бірі еліміз үшін осынау жауапты кезеңде күні-түні қызметте жүрген полиция қызметкерлеріне&nbsp; алғысын білдіріп, ел тыныштығын қорғау жолындағы қажырлы еңбектеріне&nbsp; сәттілік тіледі.
Тікелей эфир кезінде департаментке жалпы 100-ге жуық сұрақтар мен ұсыныстар келіп түсті.
<img src="https://kyzylorda-news.kz/wp-content/uploads/2020/03/01-71.jpg" alt="" />
<img src="https://kyzylorda-news.kz/wp-content/uploads/2020/03/02-53.jpg" alt="" />

Полиция департаментінің бастығы онлайн режимде облыс тұрғындарына есеп берді

<a href="https://kyzylorda-news.kz/">Kyzylorda-news.kz.</a> Қазгидромет бүгін Қызылорда облысында ауа райына байланысты ескерту жариялады.
30 наурызда Қызылорда облысының кей жерлерінде шаңды дауыл күтіледі. Шығыстан соққан жел 15-20 м/с, кей жерлерде 23 м/с соғады.

Ауа райы: Қызылорда облысында ескерту жарияланды

1992 жылы&nbsp;Қазақстан Республикасы мен Сингапур Республикасы арасында дипломатиялық қарым-қатынастар орнатылғаны туралы ноталар алмасу рәсімі болды.
1993 жылы&nbsp;Италияның «Экос» журналы Қазақстанға арналған санын шығарды. Басылым қазақ, орыс, итальян, ағылшын тілдерінде жарық көрді. Онда Қазақстан Президенті Н.Назарбаевтың сұхбаты берілген.
2001 жылы&nbsp;«Қазақстан Республикасы Президентінің «Болашақ» Халықаралық стипендиясы стипендиаттарының Қауымдастығы» құрылды. Қауымдастықтың негізгі міндеттерінің бірі – Әлеуметтік-экономикалық мәселелерді шешу үшін түлектердің күш-жігерін, зияткерлігін, шығармашылығын және іскерлік әлеуетін біріктіру, Қазақстан Республикасының экономикалық, әлуметтік және саяси прогресіне мүмкіндік беретін жасампаздық іс-шараларды өткізу.
«Болашақтықтардың» құқықтары мен қызығушылықтарын қорғауға, біртұтас шаңыраққа біріктіріп ұйымдастыруды Қауымдастық өзіне жауапкершілікке алды.
2010 жылы&nbsp;Ислам Конференциясы Ұйымының жанынан Қазақстанның Тұрақты өкілдігі ашылды.
2017 жылы&nbsp;Норвегия Корольдігінің Қазақстандағы құрметті консулдығының ашылу рәсімі болды.

30 наурыз: Ел тарихында орын алған оқиғалар

<a href="https://kyzylorda-news.kz/">Kyzylorda-news.kz</a> ақпараттық агенттігінің 30 наурызға арналған жұлдыз-жорамалы.
Тоқты
Күніңіз керемет өтеді. Жаңа жұмысыңыз өз жемісін береді. Табысты боласыз.
Торпақ
Алдамшы күн. Жоспарларыңыз 100 пайыз жүзеге аспайды. Дегенмен біршама ісіңіз аяқталады.
Егіздер
Шығармашылықпен айналысасыз. Кейде сол арқылы қаржы табуыңыз да мүмкін.
Шаян
Күтпеген жағдайлар орын алады. Барлық мәселені сабырлы қалпыңызбен қабылдайсыз.
Арыстан
Тым ақкөңіл болудың қажеті жоқ. Кей адамдар бұл жомарттығыңызды түсінбейді.
Бикеш
Батыл қадамға барасыз. Жаңашылдыққа қарай қадам басып, нақты шешім қабылдайсыз.
Таразы
Үй шаруасы әбден қажытады. Көп мәселені тез шеше алмайсыз. Соның өзі әбігерге түсіреді.
Сарышаян
Оң өзгерістер орын алады. Қызықты ұсыныстар түсіп, көп пайдаға кенелесіз. Ойланыңыз.
Мерген
Демалуға қолайлы күн. Мүмкін денеңізді шынықтырып, спортпен айналысасыз.
Тауешкі
Түске дейін тосын хабар аласыз. Бұл жаңалық сізді қуантары анық. Алайда жаңалық естірген адамды қыспаққа аласыз.
Суқұйғыш
Бүгін біраз нәрсе жоғалтасыз. Бұл заттай да болуы мүмкін. Тіпті жақындарыңызға деген сенімді де жоғалтасыз.
Балықтар
Өзіңізге ұнаған іспен айналысасыз. Қолыңыздан келмейтін іс жоқ, сондықтан ойланбастан жұмысқа кірісіңіз.

Жұлдыздар не дейді?

<a href="https://kyzylorda-news.kz/">Kyzylorda-news.kz.</a> Қазақстан ұлттық құрамасы мен&nbsp;«Қайрат» қақпашысы Игита «Әлемнің ең үздік қақпашысы» атағына ие болды, деп хабарлайды&nbsp;<a href="https://24.kz/kz/zha-aly-tar/sport/item/383663-igita-lemni-zdik-a-pashysy-atandy">Prosports.kz</a>.
Футзал әлеміндегі жеке марапаттар бойынша дауыс беру нәтижелері futsalplanet.com ресми сайтында жарияланды.
«Қайрат» ҚФ капитаны Игита әлемдегі ең үздік қақпашы ретінде үш рет танылғаннан кейін (2015, 2016, 2018) төртінші рет құрметті марапатқа бүгін ие болды.
Игита 693 ұпай жинады, испандық қақпашы Хуанходан 20 ұпайға озып кетті. Үшінші орын 655 ұпай жинаған «Спортинг» қақпашысы Гиттаға бұйырды.

Игита әлемнің үздік қақпашысы атанды

<a href="https://kyzylorda-news.kz/">Kyzylorda-news.kz.</a> Үндістанның Уттар-Прадеш штатында отбасы жаңа туған баласына&nbsp; ерекше есім берді. Олар қызына Корона&nbsp;деп ат қойды.
Таңдалған есім&nbsp;әлемде пандемиямен өршіп тұрған жаңа SARS-CoV-2 коронавирусымен тікелей байланысты екені жасырын емес.
Deccan Herald басылымы жазғандай, нәрестенің ағасы Нитеш Трипати таңдалған атқа ерекше мән беретінін айтты.
Трипати жаңа коронавирус, ол COVID-19-мен өте қауіпті инфекцияны тудырса да, адамдарға оң әсерін тигізді деп санайды. Бүкіл әлемдегі адамдарға ортақ ауру адамның өз&nbsp;денсаулығына мұқият қарауға&nbsp;және кейбір жаман әдеттерден арылтуға көмектесті дейді.
Қызды Корона&nbsp;деп атай отырып, ата-анасы оның ауруға қарсы күресте адамзаттың бірлігінің символы болуын қалайды. Қиындықты жеңген барлық жақсылықтардың бейнесі болса дейді.
Жаңа туған нәрестенің ағасы қазір ең бастысы дүрбелеңге салынбау және дәрігерлердің нұсқауын қатаң сақтау екенін атап өтті.
Корона&nbsp;Үндістанда коменданттық сағат енгізілуінен бірнеше сағат бұрын өмірге келгенін айта кету керек. Дәрігерлер баланы дереу тексеріп, оның да, анасының да ауруды жұқтырмағанына көз жеткізді. Қазір отбасы ауруханадан шыққаннан кейін екеуін де қабылдауға дайындалуда.
Үндістанда 2020 жылдың 26 ​​наурызында таңғы 10-да 606 адам жаңа коронавирусты жұқтырған. Олардың ішінде он адам қайтыс болып, 43-і ауруды жеңіп шықты.
<a href="https://stan.kz/ata-anasi-sabiinin-esimin-koronavirustin-kyrmetine-koyd-328835/">Stan.kz</a>

Сәбиін «Корона» деп атады

<a href="https://kyzylorda-news.kz/">Kyzylorda-news.kz.</a> Коронавирус адамзаттың күнделікті өмір салтын түбегейлі өзгертті. Пандемияға байланысты біраз елде карантин жарияланды. Адамдар үйден шықпай, қашықтан жұмыс істейтін болды. Ал төрт қабырғаға қамалып отыру оңай емес.&nbsp;Осы орайда коронавирустың қоғам санасына қалай әсер еткені және карантин кезінде уақытты қалай өткізу керек деген сауал туындайды. Бұл сауалдарға психолог Серікгүл Сәлі жауап береді.
<h3 id="">Бұрынғы жанталас тоқтады</h3>
Психолог маман коронавирустың таралуына байланысты көмекке жүгінетін адамдардың көбейгенін байқамапты. Дегенмен, өзінен кеңес сұрайтындар бұрынғыдай емес, әрбір тақырыпты терең қаузайтын болған. &nbsp;
<blockquote>
 «Мен кешеден бері әлеуметтік желіге шығып, халықтың сұрағына жауап беруді қолға алып жатырмын. Сонда байқағаным, адамдар терең ойланатын сұрақтарды көп жолдайтын болған. Бұрын өз тыңдарманыммен бұндай терең деңгейде сирек әңгімелесетінмін. Ал сұрақтардың деңгейі көтерілсе, адамның ой-санасы да өседі. Бұрынғы сұрақтың деңгейі өте төмен еді», – дейді Сәлі.
</blockquote>
Оның ойынша, қазіргі жағдайда адамдар терең ойлануға мүмкіндік алды. Себебі бұрынғы жанталас кілт тоқтады.&nbsp;
<blockquote>
 «Бұрын біз өмір үшін жанталасқан адам едік. Ойлануға уақыт болмады. «Қалың қалай?» деген сөздің өзін жүректен шығарып айтуға уақытымыз жетпеді. Анаған үлгеруім керек, мынаны алып қоюым керек. Әйтеуір, бітпейтін жанталас. Қазір ол жанталас тоқтады. Тыныштық кезеңі басталды. Содан халықтың сұрақтары да өзгерді, салмақты бола бастады. Бұрын бәрі асығып тұратын», – дейді психолог.
</blockquote>
<h3 id="-1">Не үшін жанталастық?</h3>
Серікгүл Сәлінің айтуынша, үйден шықпайтын халық абдырап қалды. Өйткені тыныштықты қалай қабылдауды білмейді. Содан отбасына қатысты сұрақтар жиі қойылады. Ал ата-аналар карантин кезінде үйге қамалып отырған балалар үшін қатты алаңдайды.
<blockquote>
 «Балалар таңнан кешке дейін компьютерде немесе «соткада»&nbsp; отырады, тағы не істеуге болатынын сұрайды. Сосын балалар шаршатты, күйеуі мен әйелі бір-бірін шаршатты. Осының бәріне үйде қалай төзіп отыруға болады? Қорқыныш-үрей төңірегіндегі сұрақтар аз емес. Қазіргі сәтті қалай пайдалану керек? Осындай сауалдар көп», – деп атап көрсетті Сәлі.
</blockquote>
Психолог қазіргі&nbsp; тыныштықты пайдаланып, адами қасиеттерді көтеруге, бір-бірімен қарым-қатынасты бекітуге, отбасын күшейтуге кеңес беріп отыр.
<blockquote>
 «Мысалы, Қытайда карантиннен кейін ажырасу көбейіп кетті. Неге? Себебі олар өз үйінен қашып, өмір сүрген. Бізде де ондай адамдар аз емес. Көп уақытын жұмыста өткізеді, одан кейін тағы шаруамен шапқылайды. Сөйтіп, өзі білмейтін отбасын құрып қойған, оны танымайды да. Ішіндегі адам нені қалайды? Жаны не нәрсеге жақын? Былайша айтқанда, байланыс үзіліп кеткен, адами қарым-қатынас жоқ. Міне, осыны ойланумыз керек. Соған уақыт беріліп отыр», – дейді Сәлі.
</blockquote>
Оның ойынша, қазіргі мүмкіндікті пайдаланып, отбасының жаңа бір формасын құру қажет. Себебі отбасы құндылықтары әбден ұмытылған.
<blockquote>
 «Үйіңде бала-шағаңмен, жан-жарыңмен, ата-анаңмен отырып, сырлас, рухани әңгіме айт. Осылайша, бөтен ешкімді кіргізбей, жеке отбасы жүйесін құру қажет, бұрынғы қателіктерді түзету керек. Бұған дейін не үшін арпалыстық? Не үшін жанталастық? Осыны ойланайық. Бұрын бұны тыңдайтын құлақ жоқ еді, қазір пайда болды. Пандемия бізді бір-бірімізді тыңдауға, бір-бірімізді құрметтеуге, бір-бірімізбен қарым-қатынас жасауға үйретеді. Ал ол далада емес, өз үйіңде басталуы керек», – деп түйіндеді психолог.
 <a href="https://sputniknews.kz/society/20200326/13387976/psikholog-karantin-kenes.html">Sputniknews.kz</a>
</blockquote>

Қазақстан және Қызылорда облысының жаңалықтары