Kyzylorda-news.kz. Бүгін облыс әкімі Гүлшара Әбдіқалықова облыстық кәсіпкерлер палатасының директоры Ғ.Жақсылықов, өңірдегі жеңіл өнеркәсіп қауымдастығының төрағасы, «DALATEX» ЖШС директоры Д.Әбізов және «Фирма «Best-Service LTD» ЖШС диреторы А.Махамбетовты қабылдады.
Кездесуде аймақтың кәсіпкерлік саласында атқарылған жұмыстар мен ауқымды жобалар талқыланды. Өңір басшысы экономикалық көрсеткіштерді тұрақты деңгейде ұстап тұру, өндірісті бәсеңдетпеу, жұмыссыздықты жою бағытындағы жұмыстарға тоқталды.
«Өңірдегі егістік жұмыстарына 10 750 тонна дизель отыны қажет болады. Жанармайды жеңілдетілген бағамен сатып алу мәселесі шешіледі.
<blockquote>
 “Жұмыспен қамтудың жол картасы” бағдарламасы аясында 36,9 млдр. теңге облысқа беріледі. Бұл қаржы құрылыс, тұрғын үй коммуналдық шаруашылығы, елді мекендерді абаттандыру және көлік инфрақұрылымын дамыту сынды бағыттарға жұмсалады. Бұған жеке кәсіпкерлер қатыса алады. Конкурсты жүргізу тәртібі жеңілдетіліп жатыр”, – деді облыс әкімі.
</blockquote>
Жиында облыс әкімі аймақ бойынша 308 шағын және орта бизнес субъектісіне қатысты төлемдерді кейінге қалдыру жөнінде шешім қабылданғанын жеткізді. Сондай-ақ, олардың мемлекет алдындағы салықтық міндеттемелеріне жеңілдік жасалғанын атап өтті.
<blockquote>
 “Сіздерге айтар өтінішім, осы жеңілдіктерді кәсіпкерлерге жеткізу. Бизнес өкілдеріне конкурсқа қатысу, несиеге қол жеткізу талаптарын түсіндірсеңіздер. Тағы бір маңызды мәселе, әрбір кәсіпкерлік субъектісі мүмкіндігіне қарай аз қамтылған отбасыларға көмектесуі керек. Одан бөлек, экономикамызды тұрақтандыру, өз деңгейінде ұстап тұруымыз қажет. Сондықтан сіздермен жұмыс істейтін боламыз”, – деді Гүлшара Әбдіқалықова.
</blockquote>
Жиында өңір кәсіпкерлері толғандырған мәселелерін көтерді. Карантин талаптарына байланысты қалаға кіріп-шығу жолдары кеңінен түсіндірілетіні айтылды. Қазіргі таңда облысқа арнайы экономикалық аймақтың қажеттігі де атап өтілді. Осы ретте, өңір басшысы жобаның тұжырымдамасын әзірлеп, нақты істерді қағазға түсіруді тапсырды. Ал қалыптасқан жағдайға байланысты кәсіпкерлерге азық-түлік бағасының тұрақтылығын сақтау қажеттігін атап өтті.

Гүлшара Әбдіқалықова бизнес қауымдастығының өкілдерімен кездесті

<a href="https://kyzylorda-news.kz/">Kyzylorda-news.kz.</a> Қазақстан Президенті әскери міндеттілерді арнаулы жиынға шақыру туралы жарлық шығарды.
Әскери міндеттілерді арнаулы жиындарға шақыру туралы
«Қазақстан Республикасының қорғанысы және Қарулы Күштері туралы» 2005 жылғы 7 қаңтардағы Қазақстан Республикасы Заңының 5-бабы 2-тармағының 11) тармақшасына сәйкес ҚАУЛЫ ЕТЕМІН:
1. Қазақстан Республикасы Қарулы Күштерінің аумақтық әскерлерін жасақтау үшін әскери міндеттілер арнаулы жиындарға шақырылсын.
2. Астананың, республикалық маңызы бар қалалардың және облыстардың жергілікті атқарушы органдары:
1) Қазақстан Республикасы Қарулы Күштерінің Бас штабымен келісу бойынша шақырылатын әскери міндеттілердің санын және арнаулы жиындарды өткізу мерзімдерін айқындай отырып, тиісті жергілікті әскери басқару органдары арқылы әскери міндеттілерді арнаулы жиындарға шақыруды жүргізуді ұйымдастырсын және қамтамасыз етсін;
2) осы Жарлықтан туындайтын өзге де шараларды қабылдасын.
3. Осы Жарлық алғашқы ресми жарияланған күнінен бастап қолданысқа енгізіледі.
Қазақстан Республикасының Президенті Қ.Тоқаев
Нұр-Сұлтан, Ақорда, 2020 жылғы 2 сәуір

Қазақстанда әскери міндеттілер арнаулы жиындарға шақырылатын болды

<a href="https://kyzylorda-news.kz/">Kyzylorda-news.kz.</a> Қаржы нарығын реттеу және дамыту агенттігі коллекторлық компанияларға кеткен кредиттер мәселесін түсіндірді, деп хабарлайды&nbsp;<a href="https://sputniknews.kz/economy/20200402/13519990/kollektor-kreditter.html">Sputnik Қазақстан.</a>
Агенттіктің басқарма төрағасының орынбасары Нұрлан Әбдірахмановтың айтуынша, коллекторлық компанияларға берілген кредиттер де кейінге шегеріледі. &nbsp;
<blockquote>
 «Иә, бүгінгі заңнама бойынша коллектор банктің заемдары мен микроқаржыландыру ұйымдарының кредиттерін өндіріп алуға құқылы. Ондайда қарыздың келісімшарты коллекторлық компанияларға беріледі. Алайда ондай кредиттер мерзімін тоқтату және шегеру бұйрығына кіреді. Сондықтан коллекторлар осыны ескеріп, тиісті талаптарды сақтауы қажет», – деді Әбдірахманов бүгінгі онлайн брифингте.
</blockquote>
Оның айтуынша, кредит төлемін кейінге шегеру шарты барлық заемға қатысты. Соның ішіде тұтынушылық, ипотекалық, кепілмен, кепілсіз және тағы басқа кредиттер бар. Ал үш айдан кейін қарыз алған адамдар артық ақша төлемеуі тиіс.
<blockquote>
 «Қазіргі кезде қаржы ұйымдарымен, ең алдымен, банктермен нақты механизмді пысықтап жатырмыз. Негізгі мақсат, біріншіден, тоқтатылған төлемдер артынан келісімшартта көрсетілген төлемдерден аспауы қажет. Сонда адамдар артық ақша төлемейді. Қазір осыны талқылап жатырмыз. Нәтижесін қосымша хабарлаймыз», – деп атап көрсетті Әбдірахманов.
</blockquote>

Төтенше жағдай: Коллекторға кеткен кредиттер үш айға шегеріле ме?

<a href="https://kyzylorda-news.kz/">Kyzylorda-news.kz.</a> Ғалымдар коронавирусқа төтеп бере алмайтын үй жануарын атады, деп хабарлайды&nbsp;<a href="https://stan.kz/koronaviruska-totep-bere-almaytin-uy-zhanuari-ataldi-329264/">Stan.kz</a>.
Коронавирус мысықтарға жұғып, тіпті оларды өлтіріп жіберетіні анықталды. Зерттеу қорытындысы&nbsp;bioRxiv порталында жарияланды.&nbsp;
Зерттеушілер адамдармен жиі байланыста болатын үй жануарларына тәжірибе жүргізіпті. Атап айтқанда, иттердің, тауықтар мен үйректердің, шошқа, мысық және т.б. жануарлардың коронавирусқа берікті анықталыпты.&nbsp;
Мысықтар мен күзендердің басқасына&nbsp;SARS-CoV-2 вирусы әсер етпейтіндігі анықталыпты. Күзендер вирусты таратушы болғанымен, олардың ағзаларында инфекция айтарлықтай өзгерістер тудырмаған. Ал мысықтарға бұл вирус өте қауіпті екендігі анықталыпты. Әсіресе, ауруға шалдыққан марғаулардың барлығы өліп кеткен.

Коронавирусқа төтеп бере алмайтын үй жануары аталды

<a href="https://kyzylorda-news.kz/">Kyzylorda-news.kz.</a> Елімізде коронавирустық инфекцияны жұқтырғандар арасында әкімдік қызметкерлері бар екендігі анықталды. Мәселен, Петропавлда жұмыспен қамту және әлеуметтік бағдарламалар бөлімінің 3 қызметкері коронавирус жұқтырған.
Өңірлік Денсаулық сақтау басқармасының мәліметінше, бастапқыда 31 наурызда бөлімнің бір қызметкерінен коронавирус анықталған. Кейін тағы екеуі жұқтырған.
<blockquote>
 «Пневмонияға шалдыққан әйел жұмыспен қамту бөлімінде жұмыс істейді. Оның екі әріптесі 49 және 45 жастағы әйелдер. Олар вирусты жұмыста жұқтырып алды деп болжап отырмыз», – деді СҚО Денсаулық сақтау басқармасының басшысы Тимур Сұлтанғазиев.
</blockquote>
«Пневмонияға шалдыққан әйел жұқпалы аурулар стационарына жатқызылды. Онымен байланыста болған 73 адам да оқшауланды. Барлығынан сараптама алынды», – деді ол.
Сондай-ақ, брифинг барысында жұмыспен қамту бөлімінің оқшауланып, қажетті дезинфекциялық жұмыстар жүргізілгені айтылды.
Айта кетейік, Қазақстан бойынша вирусты 402 адам жұқтырған.

Елімізде әкімдіктің үш қызметкері коронавирус жұқтырған

<a href="https://kyzylorda-news.kz/">Kyzylorda-news.kz.</a> Елдегі эпидемиологиялық жағдайды есепке ала отырып, 2020 жылдың 31 наурызынан бастап Қазақстан аймақтары арасында жолаушылар қатынасы толық тоқтатылды, деп хабарлайды «Жолаушылар тасымалы» АҚ баспасөз қызметі.
Барлық жолаушылар пойыздарының (соның ішінде жекеменшік тасымалдаушылар және басқа да теміржол әкімшіліктерінің) қозғалысы тоқтатылды. Қазіргі кезде пойыздар орналасқан орындарына қайтып жатыр. Соңғы пойыз бағыты 4 сәуірде тоқтайды.
<blockquote>
 «Жолаушылар тасымалы» АҚ төтенше жағдай кезінде сапарға шыға алмаған барлық жолаушылар билет сатып алуға жұмсаған ақшасын алдағы алты ай ішінде өздеріне ыңғайлы кез келген күні толық көлемде қайтарып ала алатынын айтады. Жүрмеген пойыз билетінің ақшасын сату сайттарында онлайн, «Жолаушылар тасымалы» АҚ билет кассаларында немесе жекеменшік кассалардан қайтарып алуға болады.
</blockquote>
12 наурыздан бері жолаушыларға 590 мыңға жуық билет қайтарылған. Карантин режимі аяқталған соң билет сату кассалары өз жұмысын қайта бастайды.
<blockquote>
 «Осыған байланысты, барлық жолаушылардан қоғамдық орындарда теміржол билеттерін қайтаруға байланысты шу шығармай, қауіпсіздік шараларын сақтауын сұраймыз» деп мәлім етті компаниядан.
</blockquote>

Қазақстан ішінде қатынайтын жолаушы пойыздары толық тоқтады

<a href="https://kyzylorda-news.kz/">Kyzylorda-news.kz.</a> Бүгін, 2 сәуірде облыс аумағында коронавирустық инфекцияны жұқтырудың 1 жағдайы тіркеліп, жалпы саны 26 адамға жеткен болатын. Аталған науқас туралы мән-жайды облыстық Тауарлар, қызметтердің сапасы мен қауіпсіздігін бақылау департаментінің баспасөз хатшысы Айман Жанахаева мәлімдеді.
<blockquote>
 «Науқас 1999 жылғы, Шиелі ауданының тұрғыны. Ол коронавирус жұқтырған Түркістан облысының тұрғынымен Петропавл-Қызылорда пойызында бір вагонда болған. Соған байланысты шұғыл карантиндік стационарға оқшауланып, &nbsp;зертханалық зерттеулерге сынамалар алынған. ПТР анализі оң нәтиже көрсеткеннен кейін Шиелі ауданаралық ауруханың жұқпалы аурулар бөліміне ауыстырылды», – деді ол. &nbsp;&nbsp;
</blockquote>
Аталған жағдай бүгінгі күнге дейінгі облыста тіркелген 25 науқаспен байланысы анықталмаған, сырттан тасымалданған жағдай болып табылады. Науқаспен тығыз қарым-қатынаста болған 3 адам анықталып, карантиндік стационарға жатқызылды.

Коронавирус: Қызылордалық тұрғын індетті пойызда жұқтырған

<a href="https://kyzylorda-news.kz/">Kyzylorda-news.kz</a>. Қазақстанда төтенше жағдай режимі енгізіліп, мемлекет ақшаға мұқтаж азаматтарға 42,5 мың теңге көлемінде қаржылай көмек көрсетуге уәде берген соң елімізде алаяқтықтың жаңа түрлері пайда бола бастады.
Бүгінде әлеуметтік желілерде көптеген хабарландыру пайда болды, онда қазақстандықтарға жеке мәліметтерді сұрату арқылы электронды цифрлық қолтаңбаны алуға көмектесу ұсынылады. Сондай-ақ кейбір «пысық» азаматтар бұл жағдайды пайдаланып, төтенше жағдай кезінде табысынан айырылғандардан ЖСН, ЭЦҚ, банк картасының нөмірін, тіпті оның пин-кодын сұрай отырып, әлеуметтік жәрдемақыны рәсімдеп беру қызметін көрсетуді ұсынып, өз пайдаларына жаратуда.
Азаматтарға арналған үкімет қазақстандықтарды мұндай қызметтерге жүгінбей, олардан бас тартуын сұрайды.
Аталған ведомствоның мәліметінше, азаматтар жеке мәліметтерін, соның ішінде ЭЦҚ-ны бөтен адамдарға беру арқылы өздері жеке деректері мен мүліктеріне қауіп төндіруде. Оның үстіне, аталған төлем азаматтардың шотынан өздерінің «қолғабыс етуімен» ұрлануы мүмкін.
Электрондық цифрлық қолтаңба мен оның құпиясөзін алған алаяқтар азаматтың egov.kz-тегі барлық жеке мәліметіне қол жеткізе алады. Оған қоса, олар жалған келісімдер жасасу үшін оның атына кәсіпкерлік ашып, баспанасына бейтаныс тұлғаларды тіркеп, тіптен көлігін өзге адамның атына шығара алады. Банк картасының ПИН-кодын &nbsp;алғаннан кейін алаяқтар ондағы барлық қаражатты шешіп алуы мүмкін.
<blockquote>
 «Азаматтарға арналған үкімет қазақстандықтардың онлайн түрдегі мемлекеттік қызметтердің барлық мәселесі бойынша, соның ішінде ЭЦҚ мен жаңа әлеуметтік төлем түрі бойынша ақысыз түрде және еш қауіпсіз 1414 бірыңғай байланыс орталығынан көмек ала алатындығын хабарлайды. Қоңырау шалу тегін. Қазіргі уақытта оның жұмысына халыққа қызмет көрсету орталықтарының 1800-ден астам қызметкері тартылған», – деп мәлімдеді ведомство.
</blockquote>
Сонымен қатар Facebook әлеуметтік желісінде құрылған «eGov помощь» тобында қарапайым желі қолданушылары, IT-мамандар және халыққа қызмет көрсету орталықтарының қызметкерлерінен тұратын бірқатар ерікті жиналды. Олардың барлығы &nbsp;egov.kz порталының белсенді қолданушылары, олар мемлекеттік қызметтерді үйден шықпай-ақ алады және елімізде орын алған қиын сәтте өзге азаматтарға электрондық үкімет порталын пайдалануды үйретуге дайын. Сондай-ақ еріктілер азаматтардан еш жеке деректерін талап етпейді, тек сұрақтарына жауап беріп, пайдалы кеңестер беру арқылы мемлекеттік қызметті алуға көмектеседі.
<blockquote>
 «Егер азамат ескертуімізге қарамастан, ақылы түрде күмәнді «көмекшілердің» қызметтерін пайдаланып үлгерсе және жеке мәліметтерін берсе, Азаматтарға арналған үкімет оларға ЭЦҚ-ның құпиясөзін pki.gov.kz-тегі жеке кабинеті арқылы өзгертуді немесе кілттердің күшін жоюды ұсынады», – дейді «Азаматтарға арналған үкіметтің» баспасөз қызметі.
</blockquote>

Еліміздегі төтенше жағдай кезінде алаяқтықтың жаңа түрі пайда болды

<a href="https://kyzylorda-news.kz/">Kyzylorda-news.kz.</a> 2020 жылға арналған бюджетті нақтылау барысында эпидемияға қарсы шараларға 125,2 миллиард теңге қарастырылды. Оның 8 миллиард теңгесі полицейлер мен әскери қызметшілердің сыйақысына жұмсалмақ. Бұл туралы қаржы министрінің бірінші орынбасары Берік Шолпанқұлов мәлімдеді.
<blockquote>
 «Ішкі істер органдарының қызметкерлері мен медицина қызметкерлеріне, Ұлттық гвардия мен Қарулы күштердің әскери қызметшілеріне 1 еңбекақы мөлшерінде сыйақы төлеуге 8 миллиард теңге бөлінді», – деді Шолпанқұлов онлайн брифингте.
</blockquote>
2020 жылға арналған бюджетті нақтылау аясында эпидемияға қарсы шараларға қосымша 125,2 миллиард теңге қарастырылмақ.
40,6 миллиард теңгесі карантиндік шараларға тартылған медицина қызметкерлерін ынталандыруға жұмсалады.
4 миллиард теңгесі ведомствоаралық ақпарат жүйелерінің қызметі мен байланыс қызметін қамтамасыз етуге бағытталады.
Ал 5,6 миллиард теңгесі сот медициналық сараптама қызметінің үздіксіз жұмысын қамтамасыз етуге бөлінеді.

Төтенше жағдай: Әскерилерге бір еңбекақы мөлшерінде сыйақы төленеді

<a href="https://kyzylorda-news.kz/">Kyzylorda-news.kz.</a> Қызылорда облысында коронавирус жұқтырған 26 науқаспен 643 адам байланыста болған. Бұл туралы облыстық Денсаулық сақтау басқармасының басшысы Жақсылық Абдусаметов Өңірлік коммуникациялар қызметінде өткен брифингте мәлімдеді.
<blockquote>
 “Қазіргі таңда Қызылорда облысында коронавирустық инфекцияны жұқтырған 26 науқас анықталды. Олармен байланыста болғандардың саны – 643. Жақын қарым-қатынаста болғандар саны – 231, потенциальды байланыста болғандар 412 адамды құрап отыр. Бүгінгі таңда осы байланыста болғандардан 13 адам правизорлық стационарға, 218 адам карантинге оқушауланды”, – деді Жақсылық Абдусаметов.
</blockquote>
Басқарма басшысының айтуынша, Қызылорда облысына қауіптілік деңгейі 1 (А) елдерінен барлығы 20 адам келген. Оның алтауы – стационарға, 14 – үй карантиніне жатқызылған.
Сондай-ақ, өңірге қауіптілік деңгейі 1 (Б) елдерінен барлығы 168 адам келген. Оның алтауы – стационарға оқшауланса, 158 – үй карантиніне алынған.
<blockquote>
 “Бүгінгі таңда облыста анықталған коронавирустық инфекцияның барлық ошақтары толық залалсыздандырылды. Қауіпті індет анықталған 26 науқастың жағдайы нашарлаусыз, қанағаттанарлық күйде”, – деді басқарма басшысы брифингте.
</blockquote>

Қызылорда облысында коронавирус жұқтырғандармен 643 адам байланыста болған

<a href="https://kyzylorda-news.kz/">Kyzylorda-news.kz.</a> Қытайдың зерттеушілері басқа елдерде коронавирусқа қарсы вакцина сынақтарын өткізуді жоспарлап отыр. Бұл шешімнің себебі – Қытайда жұқтырғандардың саны жеткіліксіз, деп хабарлайды South China Morning Post басылымы.
<blockquote>
 «Біз вирустың таралуын тез бақыладық, ал қазір науқастар жетіспейді», – дейді елдің жетекші вирусологтарының бірі Чен Лин.
</blockquote>
Алғашқы сынақтарға Уханьнан келген 108 ерікті қатысты. Алайда келесі вакциналарды тексеру үшін мыңдаған адамдар қажет болады, ал Қытайда қазіргі уақытта үш мыңнан астам адам жұқтырған. Зерттеу үшін мүмкін жерлер – Италия, Испания және Германия.
Қазіргі уақытта Америка Құрама Штаттарында ең көп жұқтырған, алайда, Шанхайдан келген сарапшы Тао Линнің пікірінше, мемлекеттер Пекинмен ынтымақтаспайды.
Чен Лин егер вакцина он мың науқасқа сыналып, тек 100-де иммунитет дамыған болса, бұл препараттың тиімділігі туралы қорытынды жасауға жеткіліксіз болады деп мәлімдеді.

Қытай науқастардың болмауына байланысты коронавирустық вакцинаны басқа елдерде сынақтан өткізбек

<a href="https://kyzylorda-news.kz/">Kyzylorda-news.kz.</a> Қазақстанда тағы 21 адам коронавирус жұқтырды, деп хабарлайды <a href="https://www.coronavirus2020.kz/kz/kazakstandagy-koronavirus-boyynsha-2-sauirdin-17-05-uakytyndagy-epidemiologiyalyk-zhagday_a3632887">coronavirus2020.kz</a>.
2 сәуір 17.05 уақытындағы эпидемиологиялық жағдай бойынша, елімізде коронавирус індетін жұқтырған тағы 21 адам тiркелдi.
Оның ішінде Солтүстік Қазақстан облысында – 2 адам, Алматы қаласында – 1 адам, Қызылорда облысында – 1 адам, Нұр-Сұлтан қаласында – 2 адам, Шымкент қаласында – 8 адам, Түркістан облысында – 6 адам, Ақтөбе облысында – 1 адам.
Осы сағатта Нұр-Сұлтан қаласы бойынша 193 адам, Алматы қаласында – 91 адам, Қарағанды облысында – 21 адам, Ақмола облысында – 19 адам, Атырау облысы – 18 адам, Жамбыл облысында -5 адам, Шымкент қаласында – 11 адам, Шығыс Қазақстан облысында – 2 адам, Алматы облысында – 9 адам, Ақтөбе облысында – 1 адам, Солтүстік Қазақстан облысында – 8 адам, Павлодар облысында – 1 адам, Маңғыстау облысында – 1 адам, Қызылорда облысында – 26 адам, Батыс Қазақстан облысында – 2 адам, Түркістан облысында – 11 адам, жалпы 423 науқас бар.

Қазақстан және Қызылорда облысының жаңалықтары