<a href="https://kyzylorda-news.kz/">Kyzylorda-news.kz.</a> Қызылорда қаласының әкімі Нұрлыбек Нәлібаев қалаға қарасты Ақжара ауылдық округінің «Мағжан и К» ЖШС егіс алқабында алғашқы дән сеуіп, диханшыларға сәттілік тілеп, күріш егу науқанын бастады.
Көктемгі егіс науқанының жүргізілу барысы туралы қалалық ауылшаруашылық бөлімінің басшысы Даулетбек Әбдірасулов қала бойынша көктемде ерте егілетін бидай, арпа, жоңышқа, т.б. егілгендігін, сонымен бірге егіске қажетті тыңайтқыштардың, жанар-жағар маймен қамтамасыз етілуі, көктемгі дала жұмыстарының қажетті техникалары егін егу жұмыстарына толық дайын екенін жеткізді.
<blockquote>
 «Абзал и К» толық серіктестігінің директоры Мағжан Ералиев көктемгі егін науқанының жұмыстары талапқа сай жүргізіліп жатқанын, жылдық өнім 60-65 центнер/га, яғни жалпы ауданы 748 га болатын, оның ішінде 120 га бидай, 158 га ескі жоңышқа егілсе, 470 га алқабына күріш егілетіндігін жеткізді.
 «Өткен аптада облыс әкімі Гүлшара Наушақызы Сырдария ауданының егіс алқабында алғашқы дән сеуіп, жаппай күріш егу науқанын бастаған болатын. Биылғы жылдан бастап күріш дақылы егісін тұрақтандырып, басқа да дақылдардың көлемін ұлғайтуымыз қажет деген», – шаһар басшысы Нұрлыбек Нәлібаев бірқатар мәселелерді қазірден бастап шешу керектігін сала мамандарына ескертті.
</blockquote>
Бірінші кезекте, жұмыстың агротехникалық талаптарға сай жүргізілуін, Үкімет тарапынан беріліп жатқан жеңілдіктерді тиімді пайдалану қажеттігін жеткізе отырып, диқандармен пікірлесті. Қазіргі уақытта Сырдария өзеніндегі жағдай тұрақты. Дегенмен, биылғы жылы су қоймаларында жиналған су көлемін ұдайы бақылауда ұстау керектігін айтты.
Алғашқы күріш егу науқанында еңбек ардагері Серік Сейтназаров шаруаларға ақ батасын берді.
<blockquote>
 Жалпы биыл, көктемгі дала жұмыстарына дайындық жұмыстары белгіленген жоспарға сәйкес жүргізілуде. Қала бойынша 7395 гектар жерге ауыл шаруашылық дақылдарын орналастыру межеленген.
 Қазіргі таңда төтенше жағдайға қарамастан шаруашылықтар бойынша ерте көктемде егілетін жаздық бидай 292 га, жаздық арпа 20 га, сұлы 5 га, мақсары 40 га, жаңа жоңышқалар 356 га мен сорга 80 га дақылы егілді. Барлығы: 793 гектар құрап отыр. Кестеге сәйкес негізгі күріш 3033 га дақылын егу жұмыстарын 27 сәуірден бастап, 30 мамырға дейін аяқтау жоспарлануда. Сонымен қатар, 600 гектар картоп, 1086 гектар көкөніс, 877 гектар бақша дақылдары егіледі. Егін егу науқанына қажетті барлығы 705 тонна дизель отыны бағасы литрі 162 теңге Үкіметтің қолдауымен ауылшаруашылық тауарын өндірушілеріне арзандатылған бағада жеткізілуде. Наурыз айына бөлінген 185 тонна жеңілдетілген дизель отыны ауыл шаруашылығы құрылымдарына толығымен жеткізілді. Бүгінгі күнге дейін су шаруашылығы нысандарын дайындау, су жүйелерін тазарту жұмыстары толығымен 100 пайызға орындалды.
</blockquote>
<img src="https://kyzylorda-news.kz/wp-content/uploads/2020/04/02-39.jpg" alt="" />
<img src="https://kyzylorda-news.kz/wp-content/uploads/2020/04/03-38.jpg" alt="" />
<img src="https://kyzylorda-news.kz/wp-content/uploads/2020/04/04-24.jpg" alt="" />
<img src="https://kyzylorda-news.kz/wp-content/uploads/2020/04/05-13.jpg" alt="" />
<img src="https://kyzylorda-news.kz/wp-content/uploads/2020/04/06-12.jpg" alt="" />

Қала әкімі диханшыларға сәттілік тіледі (ФОТО)

<a href="https://kyzylorda-news.kz/">Kyzylorda-news.kz.</a> Мемлекет басшысы Қасым-Жомарт Тоқаевтың бүгінгі мәлімдемесі көптің көкейіндегі сауалдарға жауап берді. Қазіргідей күрделі кезең ешкімге де оңай соғып тұрған жоқ.
Соған қарамастан елімізде халықтың жағдайы үшін барлық шаралар қабылданып, оң шешімдер жүзеге асуда. Президент өз мәлімдемесінде мұндай шаралардың әлі де жалғасын табатынын айтты.
Мәселен, осы уақытқа дейін 4 миллион 250 мың азаматқа қаржылай көмек көрсетілсе, 570 мыңнан астам адамға азық-түлік таратылған. Сәуір-мамыр айларында 1,6 миллионнан астам адамға коммуналдық төлем үшін көмек көрсетілетіндігін жеткізді. Сондай-ақ, індетпен күрестің алдыңғы шебінде жүрген дәрігерлерге қаржылай қолдаудың көрсетілуі, 11,5 мың шағын және орта бизнес өкілі несиелерін кейін төлеуге мүмкіндік алуы, 700 мыңнан астам компания мен жеке кәсіпкерге салықтық жеңілдіктердің жасалуы елге көрсетілген үлкен қолдау.
Себебі, қазіргі күні барлық салада жұмыс тоқтап тұр. Қалыпты жағдайға көше бастағанда, қаржылық дағдарысқа байланысты оларда жұмысшы санының қысқару жағдайы орын алуы мүмкін. Алайда, мемлекет осы мәселенің алдын-алуға бар күш жігерін салып жатыр. Бұл – халықтың алдағы күнге деген сенімін тудыруда.
Ендігі жерде бізде еліміздің аяққа тұрып кетуі үшін бар күш жігерімізді салып, қолдау көрсетуіміз керек. Біздің қолдау – карантин шараларын сақтау. Мұны халық түсіністікпен қабылдайды деп білемін. Бұл ретте біз халықпен біргеміз.
Елена КИМ,
Қызылорда облыстық «Қазақстан кәрістер ассоциациясы» қоғамдық бірлестігінің жетекшісі.

Елена Ким: Президент мәлімдемесі – ертеңгі күнге деген сенімге жетелейді

<a href="https://kyzylorda-news.kz/">Kyzylorda-news.kz.</a> Қызылорда облысы әкімдігінің интернет-алаңы – жаңа «Сыр бірлігі» өңірлік Қазақстан халқы ассамблеясының жобасымен толықты. YouTube арнасындағы жаңа медиялық өнімнің негізгі миссиясы – өңір тұрғындары арасында бірлік, келісім және бейбітшілік идеясын нығайту.
«Жасампаз 25 жыл» бөлімінде Елбасы Н.Ә.Назарбаевтың бастамасымен құрылған Қазақстан халқы Ассамблеясы туралы, фестивальдер, мәдени күндер, онлайн-концерттер, ұлттық тұрмыстың виртуалды көріністерінен және т.б. материалдар қамтылған.
«Татулық тұғыры» бөлімінде аймағымызды мекендейтін түрлі этнос өкілдерінің дәстүрлері мен әдет-ғұрыптары, асханасы және олардың көрікті мейрамдары «Масленица», «Сабантуй», «Сольналь», «Остерн», «Песах» және тағы басқалары туралы білесіздер.
Облыстық ассамблеяның танымал өкілдерінің, белгілі жерлестеріміздің және табысты азаматтарымыздың халқымыздың тарихы, патриотизм, жетістікке жетудің жолдары туралы баяндары «Сырлы сұхбат» айдарында көрермендерге ұсынылады.
«Таным сағаты» мәдени-танымдық бөлім. Егерде қазақ халқының философиясын танып, тілін үйренемін, Абайдың шығармашылығын оқып, репрессия мен депортация тарихын білемін немесе бірлік пен келісім құндылықтары туралы онлайн-лекция тыңдаймын десең осы бөлімнен табасыз.
Қайырымды істер мен Қазақстан халқы Ассамблеясы жанындағы волонтерлік орталығының жұмысымен танысып, еріктілер мен белсенді жастардың карантин жағдайында қызылордалықтарға қолдауын көргіңіз келсе «Біз біргеміз» бөлімінде бар.
YouTube-арнасындағы «Сыр бірлігі» каналында Қызылорда облыстық Қазақстан халқы ассамблеясының жасампаздыққа толы жылдарындағы ең айшықты және игілікті жұмыстары көрініс табады.
«Сыр бірлігі» – өңір тұрғындарын бірлік пен ынтымаққа және татулыққа шақырады.
Каналға жазылу үшін төмендегі <a href="https://www.youtube.com/channel/UCFHpeCq0oaZwPrScWCb2uMQ">сілтемені</a>&nbsp;басыңыз.

Қызылордалықтардың бірлігі туралы жаңа YouTube-канал ашылды

<a href="https://kyzylorda-news.kz/">Kyzylorda-news.kz.</a> Бүгін баршамыз бұқаралық ақпарат құралдары арқылы мемлекет басшысы Қасым-Жомарт Тоқаевтың Қазақстан халқына жасаған мәлімдемесімен таныстық.
Ел Президенті өз мәлімдемесінде 16 наурыздан бері жарияланған төтенше жағдайдың жұртшылыққа оңай тимегендігін, ел экономикасына да кері әсер етіп, көп азаматтардың табыссыз қалғандығын, бірақ, ұлтымыздың амандығы, ұрпағымыздың болашағы үшін бұл шешімнің дұрыс болғандығын, оған Дүниежүзілік денсаулық сақтау ұйымының да оң баға бергендігін атап өтті.
Мемлекет басшысының мәлімдемесіндегі басты мәселе – елдегі бүгінгі ахуалға байланысты мемлекеттік комиссияның ұсыныстарын негізге алып, төтенше жағдай режимін биылғы 11 мамырға дейін ұзарту туралы Жарлық шығару жөнінде шешім қабылдағандығы және осы мерзімнен кейін карантин талаптарының жеңілдейтіндігі болды.
Сонымен қатар, бірқатар өңірлерде вирустың таралу қаупінің сейілмей отырғандығын, азаматтарымыздың денсаулығын сақтап, өмірін қорғап қалу, халықтың табысын сақтау, мұқтаж жандарға әлеуметтік көмек беру үшін де арнайы қабылданып жатқан шаралардың одан әрі жалғаса беретіндігін баса айтты.
Қазіргідей күрделі кезеңде мемлекет ешкімді де қиындықта қалдырмайтындығын, елімізде азық-түлік тапшылығының жоқ екендігін, алда тағы да 1,1 миллионнан аса адам азық-түлікпен қамтылатындығын, 1,6 миллионнан астам адамға коммуналдық төлем үшін көмек көрсетілетіндігін, шағын және орта бизнеске, ауыл шаруашылығы саласына үлкен қолдау болып жатқанын, жалпы азаматтар мен бизнесті қолдау үшін 6 триллион теңгеге жуық қаржы бөлінгендігін назарға алған.
Президент өз мәлімдемесінде баса айтқандай, карантин талаптарының жеңілдеуі, ол бұрынғы күнделікті қалыпты өмірге қайта оралу емес. Адамдар көптеп шоғырланатын орындар әлде де өз жұмыстарын тоқтата тұрады. Барлық білім мекемелеріндегі қашықтықтан оқыту жалғаса береді. Өйткені карантин режимі бұзылса, аурулар саны күрт көбейіп, жаңа ошақтар пайда болуы мүмкін.
Құрметті ағайындар! Келеңсіз күндердің көбі кетіп, азы қалды. Халқымызда «Барына қанағат, жоғына сабыр» деген де жақсы сөз бар. Олай болса, бүгінімізге шүкіршілік жасап, сабыр сақтап, егер алда тек жақсы күндер болып, қалыпты өмірге тезірек оралуды ойласақ, карантин талаптарын қатаң сақтап, үйде болайық!
Барынша төзімділік пен сабырлылық танытайық!
Амандықта болайық!
Бахытжан САЙЛЫБАЕВ,
Қызылорда облыстық қоғамдық кеңес төрағасы,
М.Мәметова атындағы Қызылорда педагогикалық жоғары колледжі директоры

Бахытжан Сайлыбаев: Ешкім мемлекеттің қамқорлығынан шет қалмайды

<a href="https://kyzylorda-news.kz/">Kyzylorda-news.kz</a>. Мемлекет басшысы Қасым-Жомарт Кемелұлы Тоқаев еліміздегі қазіргі ахуалға байланысты және Мемлекеттік комиссияның ұсыныстарын негізге алып, Төтенше жағдай режимін биылғы 11 мамырға дейін ұзарту туралы Жарлық шығару жөнінде шешім қабылдады.
Бұл мәселеге бей-жай қарауға болмайтынын қазіргі қалыптасқан жағдай осыны дәлелдеуде. Осыған байланысты жергілікті жерлерде нақтылы іс шаралар жүзеге асырылуда, бүкіл бұқаралық ақпарат құралдары күнделікті мәліметтерменен қалың жұртшылықты хабардар етуде.
Бүгін Президент мәлімдемесінде “Алдағы мамыр айындағы мерекелерді де үйде атап өтуге тура келеді. Бірақ, Жеңіс күнінде Ұлы Отан соғысы ардагерлерінің бірде-біреуі елеусіз қалмайды. Бәріне лайықты құрмет көрсетіледі”, – деді. Бұл замандастарымыз үшін қуанышты жағдай.
Қауіпті індетке қарсы тұру – тек қана мемлекеттік органдардың жұмысы ғана емес, әрбір Қазақстан азаматының, тірі пенденің төл міндеті болуы тиіс.
Өмір сүрудің аксиомасы өзіңді-өзің сақтандыр, өзгеге жанашырлық сөзіңді жеткіз, атқарылып жатқан жұмыстарға қолдау көрсет. 
Төтенше жағдай кезінде қабылданған шешімдердің әрбір пунктінің орындалуына азаматтық борыштарынды орындаңдар!
Бұл істе ардагерлер қауымдастығының, ардагерлердің атқарар жұмыстары жеткілікті-ақ. Болашақ ұрпағымыздың денсаулықтарының зардап шекпеуіне өмірлік тәжірибелеріңізді айтыңыздар!
Халқымыздың басынан өткізген қиын қыстау кездегі зұлмат замандардан қалай аман-есен шыққанымызды, ұлт болып қалай ұйысқанымызды үнемі нақты мысалдармен жеткізе беріңіздер! Күні кешегі тәуелсіздігіміздің алмағайып кезеңінде болған қиыншылықтарды еске түсіріңіздер.
Халқымыздың санасында сақталған мына сөз «мың өліп, мың тірілген қазақ» деп тегін айтылмаса керек.
Билік басындағы азаматтарға қамқор көңілдеріңізді білдіре отырып, әрбір жасалынып жатқан іс әрекеттеріне қолдау көрсетейік, ардагерлер демекпіз. Біздер, барлық уақытта қиын қыстау шақта халық пен билік біргеміз!
Қазақ елінің болашағы үшін белсенді қызмет жасай берейік, ағайын! 
Көктемнің шуақты күнінің әрбір мезгілін тиімді пайдаланып, үй жайымыздағы ағаш егу, гүл отырғызу, көкөніс егу жұмыстарын шарбақтан шықпай-ақ атқара беруге болады, жастарға үлгі көрсетейік, абзал Ардагерлер!
Серік ДҮЙСЕНБАЕВ,
Қызылорда облыстық ардагерлер кеңесінің төрағасы

Серік Дүйсенбаев: Қауіпті індетке қарсы тұру – әрбір Қазақстан азаматының міндеті болуы тиіс

<a href="https://kyzylorda-news.kz/">Kyzylorda-news.kz</a>. Қызылорда облысында коронавирустық инфекциядан жазылған науқастардың саны 108 адамға жетті. Індеттен айыққандардың қатарына соңғы қосылған науқастар – Қазалы, Сырдария және Шиелі ауданының тұрғындары.
27 сәуір 12:50-дегі&nbsp;ақпарат бойынша Қызылорда облысында тағы 9 адам қауіпті індеттен жазылып шыққан. Оның ішінде, Қазалыда – 1, Сырдария – 6, Шиеліде – 2 науқас қауіпті індеттен айыққан.
Осылайша коронавирустық инфекциядан жазылғандар саны өңірде 108 адамға жетіп отыр.
Аталған науқастардан 2 реттен сынама тест алынып, бәрі теріс мәнді нәтиже көрсеткен.
Олар алдағы 14 күнде дәрігерлердің бақылауында болады.

Қызылордада 108 науқас қауіпті індеттен жазылып шықты

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысында коронавирустық инфекция жұқтырған тағы 3 науқас тіркелді.
27 сәуір 13:30-дағы&nbsp;мәлімет бойынша қауіпті індетке шалдыққан 3 науқастың екеуі – Қызылорда қаласынан, біреуі – Қазалы ауданынан.
Айта кетейік, осымен облыс бойынша коронавирустық инфекция жұқтырған науқастардың жалпы саны 182 адамға жетті.

Қызылорда облысында қауіпті індет жұқтырғандар саны 182 болды

<a href="https://kyzylorda-news.kz/">Kyzylorda-news.kz.</a> Әлемді жаулаған пандемия адамзат өміріне қауіп төндіріп қана қоймай, сан жылдан бергі өмірімізде басшылыққа алып келе жатырған құндылықтар-ымызды да өзгертті.
Бұл індеттің елді де, жерді де, мемлекетті де таңдамайтынын білдік. Қазір жер бетінде оның қолы жетпеген ел қалмады десекте болады. Барлық мемлекеттер экономикалық қиындықтарға тап болып, барлығы дерлік қиын қыстау кезеңді бастан кешіп жатыр. Зиялы қауым өкілдерінің пікірі бойынша бұл індет пен дағдарыс болашақта ғаламдық өркениетті өзгерістерге түрткі болады деп болжауда. Адамзат үлкен өзгерістер алдында тұр! Шындығында да адам санасы жақсы жаққа қарай өзгере бастағаны байқалады. Қылмыстың азайғаны, табиғаттың қалпына келе бастағаны жайлы жарыса жазуда. Алматылықтар қаласының ауасының тазарғанын айтып қуану үстінде. Кей жерлерде құстар келмей кеткен көлдерге құстардың қайта оралуында жақсылыққа жоруда!
&nbsp;Осындай қиын қыстау кезеңде мемлекет тарапынан Қазақстан халқы қамқорлыққа бөленуде. Үкімет тарапынан пандемия кесірінен уақытша табыс көзінен айрылғандар 42500 тенге, әлеуметтік әлсіз топтарға Нұротаннан 50000 тенге берілуімен қатар коммуналдық өтемдерге де 15000 тенге берілуде. Мыңдаған маскалар таратылып, барған жерде қолдарыңызға зарарсыздандырғыш құйып күтіп алуда.
Тәртіп сақшылары адамдардың сыртқа шығып ауру жұқтырмауын темір тәртіппен тік тұрып қадағалап тәулік бойы қызмет етуде. Бәрі де адам үшін!
Бизнес өкілдері өз шамаларына қарай қаражатымен бөлісіп көмек қолын созуда.Осы шаралардың бәрі адамдарды риза етіп, олардың уақытша қиындықты жеңіп, болашаққа сенімін арттырып, қалыпты өмір сүрулеріне мүмкіндік беруде. Көптеген адамдар ешкімге айтпай – ақ, өз еріктерімен мұқтаж жандарға азық түлік әперіп жәрдемдерін беріп жатырғандығында көріп отырмыз. Басқа түскен ортақ нәубет адамдарды жақындастырды. Осының бәрі адам жанын толғандырып олардың ризашылық сезімдерін тудыруда. Ең басты байлық – рухани байлық екенін мойындатып отыр.
Қазіргі қалыптасқан жағдайда осы індет адамдарды дәрігер мен ұстаздың еңбегін бағалауға үйретіп отыр. Мектептерде сабақтар өз ретімен өтілуде.Оған мұғалімдермен қатар ата аналарда қатысып көмектесуде. Адамдар өз үйінде, бала шағасының қасында жұмысында жасап, балаларына, үйдегі қарт ксілерге қарап қамқоршы да болып отыр.
Бәрінен бұрын Гиппократ антына адал ақ халатты дәрігерлеріміз өздерінің ауру жұқтырып жатырғандықтарына қарамастан, күні түні үйлеріне бармай науқастардың жанында, барынша адал қызметтерін орындауда.
Осындай халде көңіл құлазыған шақта халқымызға жасалып жатырған қамқорлық елдің еңсесін көтеріп, рухын асқақтатуда!
Елдік пен бірлікті дәріптейтін, ұлтты бірігуге шақыратын үндеулерде айтылуда. Біздің халық бұған дейінде талай тар жол, тайғақ кешуден аман шыққан шыныққан халықпыз. Сол сияқты бұл қиындықтан да бірлігіміздің арқасында сүрінбей өтетіндігімізге халық сенімді. Ең бастысы, осынау қиын қыстау сәтте халқымыз бір адамдай жұмыла түсуде. Осы бірлігіміз арқасында басымызға түскен қиындықты да жеңетініміз сөзсіз.
Осы аталған жолдардан басқа адамдардың адамгершілігі, өзгеге қамқорлық таныту қабілетініңде, мейірім мен махаббатты, ізгілік пен сыйластықтың, жана­шырлықтың қадірініңде рөлінің зор екендігін мойындамасқа болмас!
Біздер Қорқыт Ата университетінің профессор оқытушылары қазіргі жағдай талабы бойынша үйде отырып жұмыс істеудеміз. Университетіміз тап болып отырған қиындық жағдайдан аман есен шығу үшін және осы жағдайда білім алушыларды олардың алуына тиісті біліммен қаруландыру үшін бір адамдай жұмылып барлық жолдарды қарастыруда. Ол үшін қашықтан оқыту технологиясының қыр сырын зерттеп, түйгендерімізді білім беруде пайдаланудамыз, яғни бір сөзбен айтқанда кәсіби жетілумен айналысудың ма­ңыз­дылығын сезінудеміз. Біз күтпеген індеттен түйгеніміз де үйренеріміз де жетерлік. Карантин өміріміздің қайсы бір саласы болмасын біздің беріктігімізді саралайтын емтиханға айналып отыр.
Өтілуге тиісті жоспарланған іс-шаралар өз ретімен жүргізілуде. 23 сәуірге жоспарланған студенттердің ғылыми–тәжірибелік конференциясы өткізілуде. Алда жауапты кезең – жазғы сессия күтіп тұр. Осындай маңызды кезең алдында 24 сәуір күні университет ректоры Бейбіткүл Сәрсемханқызы Каримова студенттерді толғандырып жүрген сұрақтарға жауап беріп, талап тілектерін тыңдау мақсатында онлайн кездесу жоспарланып отыр. Сәуірдің 24-29 аралығында барлық пәндерден мектеп оқушылары үшін олимпиада өткізу жоспарланып отыр. Олимпиада жеңімпаздарына ректор грантын жеңіп алып унверситетіміздің студентіне айналу мүмкіндігі беріліп отыр.
Карантинмен біз өз қызметіміздегі кемшілігімізді ақтай алмайтындығымызды өткір сезіне отырып, алдағы уақытта өзіміздің технологиялық дамуымызға мән беріп сол бағытта жұмыс істеу керектігіне көз жеткізіп отырмыз. Осы бағытта бұрын игермеген дағдыларды игеріп бірсыпыра жұмыстарды бастап та кеттік.
Дәл осы кездегі басымызға түскен қиындық, қазақтың Абайының көрегендікпен айтып кеткен «бес нәрседен қашық бол, бес нәрсеге асық бол» ұстанымы, яғни «талап, еңбек, терең ой, қанағат және рақым қой» деген сияқты қасиеттерді бойымызға сіңіре білудің қажеттігін бізге терең ұғындырды десек болады. Дәл қазір санамыз сілкініп, қоғам бұлқынып жатыр, яғни өзгеріс үстіндеміз. Өзгерісіміз үшін біз осы індетке борыштармыз. Одан әлі де талай сабақтар аларымыз сөзсіз. Өзімізді өзгерте отырып өмірімізді дұрыс арнаға саламыз. Лайым да солай болсын!
Қиындықтарға көнеміз,
Ажырамасын іргеміз!
Бірлікпен бәрін жеңеміз!
Біз Сіздермен біргеміз!
Күлбарам СӘДУАҚАСҚЫЗЫ,
педагогика ғылымдарының кандидаты, профессор

Күлбарам Сәдуақасқызы: «Бірлігіміздің арқасында ғана басымызға түскен қиындықты жеңетініміз сөзсіз»

<a href="https://kyzylorda-news.kz/">Kyzylorda-news.kz.</a> E-hr жүйесі еңбек шартын жасау кезінде еңбек кітапшаларынан және қағаз құжаттардан бас тартуға мүмкіндік береді, деп хабарлайды <a href="https://lenta.inform.kz/kz/budan-bylay-zhumyska-ornalasatyn-kezde-kuzhat-zhinau-kazhet-emes_a3643071">ҚазАқпарат.</a>
Еңбек шарттарын есепке алудың бірыңғай жүйесі (E-hr) кәсіпорындардың кадрлық бөлімдерінде қызметкерлерді ресімдеу уақытын қысқартуға көмектеседі. «Еңбек ресурстарын дамыту орталығы» АҚ жұмысқа орналасу кезінде қажетті қағаз құжаттарды қажет етпейтін&nbsp;E-hr жүйесін&nbsp;енгізді. Енді кадр қызметі барлық қажетті құжаттарды (&nbsp;жеке куәлік деректері, білімі, тұратын жері, денсаулық, соттылығының бар-жоғы&nbsp;) дербес және электронды түрде ала алады.
<blockquote>
 «E-hr жүйесі азаматтардың еңбек өтілі бойынша деректердің сақталуын және нақты дерек қорын қалыптастырады. Жұмыс берушімен қызметкер арасындағы келісім-шарттың ашық болуын, құжаттарды қолдан жасау қаупін жояды. Бастысы жұмысқа орналасуды жеделдетеді. Сондай-ақ, еңбек шартын жасау кезінде еңбек кітапшаларынан және қағаз құжаттардан бас тартуға мүмкіндік береді», – деді «ЕРДО» АҚ Деректерді талдау және өңдеу департаментінің директоры Бахтияр Жазықбаев.
</blockquote>
Кәсіпорындарға жаңа сервисті пайдалану үшін бар болғаны E-hr жүйесіне тіркелу қажет. Жаңа жұмысшының «жеке ісіне» құжаттар жинау үшін оның келісімін алып, жүйеге сұрау салу керек. Әрі қарай бағдарлама барлығын өзі автоматты түрде жасайды.
Қазіргі уақытта E-hr ҚР Білім және ғылым министрлігінің ақпараттық жүйелерімен, сондай-ақ ҚР Әділет министрлігінің жеке тұлғалардың мемлекеттік базасымен интеграция жасалған. 2020 жылдың соңына дейін ҚР Денсаулық сақтау министрлігінің және ҚР Бас прокуратурасының Құқықтық статистика және арнайы есепке алу жөніндегі комитетінің ақпараттық жүйесімен біріктіру жоспарлануда.
Естеріңізге салсақ, E-hr жүйесі 2018 жылдан бастап пилоттық режимде жұмыс істейді. Қазіргі уақытта жүйеге ерікті негізде 28 мыңнан астам қазақстандық компания қосылды. Бүгінде E-hr-да 1,3 млн электрондық еңбек шарты тіркелген. 2020 жылдың бірінші жартысында жүйеге тағы 25 мыңға жуық жұмыс берушіні қосу жоспарланып отыр.

Бұдан былай жұмысқа орналасатын кезде құжат жинау қажет емес

Елде қалыптасқан жағдайға байланысты Республика басшылығы – Қасым – Жомарт Кемелұлы Тоқаев тарапынан жедел түрде атқарылған жұмыстарға оң бағасын бере отырып, билік пен халық арасындағы тікелей байланыстың орнатылуы көптеген мәселелердің бет-пердесін ашты, нақты жағдайларға байланысты тиісті шешімдер қабылдауды қажет етті.
Боямасыз өмір шындығына қарай батыл қадамдар жасалынуда. Халықтың үніне әрдайым құлақ асу, уақыт талабына сәйкес шұғыл шешім қабылдау, жергілікті мемлекеттік құрылым өкілдері мен тұрғындар ұсыныстарына ден қою, қарапайым халықтың белсенді іс – әрекеттерін қалыптастыруға Президент тарапынан қолдау көрсетілуі көпшілік қауымның көңілінен шығып отырғанын жасыра алмаймыз. Адам денсаулығын сақтаудан артық қазіргі таңда қандай міндет бар.
Төтенше жағдай кезіндегі қойылып отырған талап та осы мақсаттан туындап отыр емес пе. Тұрғындардың әлеуметтік – тұрмыстық жағдайында күйзеліске ұшырау жағдайына жол бермеу мақсатында көп балалы аналарға, мүгедек жандарға, соғыс және тыл ардагерлеріне, карантин кезінде жұмысын тоқтатқан кіші кәсіпкерлерге, тұрмысы төмен жанұяларға бұрын – соңды болмаған көмектердің көрсетілуі, төтенше жағдай кезіндегі мемлекеттік органдардың үйлесімді жұмыс ұйымдастырып, қай кезде де халық пікірімен санасып, ортақ пікірге келе білуі, барлық адамдарға бірдей елімізде заң үстемдігін орнату жолындағы әрбір азаматтың, әрбір мемлекеттік қызметтің ортақ міндеті екенін дәлелдегендей болды.
Айтылған сөзбен, уәденің орындалуы нақты істермен жалғасын тапқанда ғана бірлік ұғымының шынайы бейнесін елестеткендей болары сөзсіз.
Сыр бойының ардагерлер қауымдастығы бір – бірінің ынтымағын, сыйластығын қалыптастыра беру, ата – бабалар дәстүріне сай киелі қазақ жерінің тұтастығын сақтау, тілін ардақтау, оны қастерлеу жолындағы сабақтастығын саналы түрде жалғастыра беру біздердің үлкендік парызымыз, әрі қазіргі қазақ қоғамының сұранысы екені даусыз мәселе. Біз әрқашан Ел президентімен біргеміз! 
Сайлаубай ӘБІШЕВ,
Қызылорда қалалық ардагерлер кеңесінің төрағасы,
“Nur Otan” партиясы қалалық филиалы саяси кеңесінің мүшесі

Сайлаубай Әбішев: Кемел саясат ел бірлігін сақтайды

<a href="https://kyzylorda-news.kz/">Kyzylorda-news.kz</a>. Қызылордада жақын танысының сеніміне кіріп, оның төлқұжат нөмірі мен банк картасын пайдалану арқылы алаяқтық жасаған 26 жастағы азаматша сот алдына келді.
Ол жақын танысының үйіне келеді. Сол үйде танысының төлқұжат деректерін жасырын түрде ұялы телефон суретіне түсіріп алады. Бұдан кейін ол күйеуі қызына ақша аударатынын айтып, банк картасын сұрап алады. Алған құжаттары арқылы түрлі микрокредит ұйымдарынан несие алып, танысына қомақты көлемде шығын келтіреді.
Бүгінгі таңда оның үстінен ҚР Қылмыстық кодекінің 190 бабының 4 бөлімімен қылмыстық іс тергеліп бітті.&nbsp; Қазір сотта қаралуда.
<blockquote>
 «Қазір интернет арқылы алаяқтық жасау көбейіп барады. Биылғы жылдың алғашқы тоқсанында оған қатысты 162 қылмыстық оқиға орын алған. Сондықтан азаматтардан сақ болуын сұраймыз», – деп мәлім етті Қызылорда облыстық полиция департаментінің баспасөз қызметі.
</blockquote>

Қызылордада 26 жастағы әйел жақын танысының атынан бірнеше мәрте несие алған

<a href="https://kyzylorda-news.kz/">Kyzylorda-news.kz.</a> Бұған дейін ел арасында Қазақстанда төтенше жағдай режимін 15 мамырға дейін созылады деген сөз желдей есті. Сарапшылардың да болжамы осыған сай болды.
Жалпы қазіргі таңда ел ішіндегі ахуалға орай төтенше жағдай режимін біршама ұзартқаны дұрыс шешім. Мен Президент Қасым-Жомарт Тоқаевтың бұл шешімін жақсы жаңалық ретінде қабылдадым.
Себебі індеттің әлі де қауіпті екені белгілі. «Сақтықта қорлық жоқ» демекші, барлығымыз үйде отырып қорғанғанымыз жөн.
Сонымен қатар, Мемлекет басшысы мектеп оқушыларының сабақ кестесі қашықтықтан жалғасатынын айтты. Расымен де, біз бірінші кезекте балалардың жағдайын, олардың денсаулығына баса назар аударуымыз қажет. Сонда ғана бұл кеселдің алдын алып, оның одан әрі белең алуына тосқауыл бола аламыз.
Егер біз сақтық шараларын қатаң сақтап, төтенше жағдай режимін ұстанатын болсақ, дертті толықтай жеңіп, барлық қиындықты артта қалдыратын боламыз. Сонда ғана бұрынғыдай жайма-шуақ күнге қайта оралып, әлі-ақ жақындарымызбен қауышамыз.
Нұрсәуле МҰСАЕВА,
Қызылорда облыстық Тілдерді дамыту орталығының директоры

Қазақстан және Қызылорда облысының жаңалықтары