<a href="https://kyzylorda-news.kz/">Kyzylorda-news.kz.</a> WhatsApp құрастырушылары чаттағы белгілі бір күні жіберілген хабарламаларды жылдам табуға мүмкіндік беретін жаңа қызметті сынақтан өткізуде.
Қазіргі уақытта мессенджерде хабарлама іздеу функциясы бар, дегенмен белгілі бір күні жіберілген немесе алынған хабарламаны табу қиынға соғады.
Ал жаңа қызмет қажетті хабарламаны жылдам табуға мүмкіндік бермек. Ол үшін чатта іздеу режиміндегі күнтізбе белгісін басу арқылы хабарламаның жіберілген немесе алынған күнін таңдау керек.
<a href="https://24.kz/kz/zha-aly-tar/bylu-manyzdy/item/402117-whatsapp-messendzherinde-zha-a-yzmet-t-ri-pajda-bolady">«Хабар 24»</a>

WhatsApp мессенджерінде жаңа қызмет түрі пайда болады

<a href="https://kyzylorda-news.kz/">Kyzylorda-news.kz.</a> Мыңдаған қазақстандық мектеп түлегі үлкен өмірге қадам басып жатыр және олар үшін алғашқы трамплин – мамандық таңдау, ҰБТ тапсыру және жоғары оқу орнына түсу. ҚР БҒМ Жоғары және жоғары оқу орнынан кейінгі білім департаментінің директоры Әділет Тойбаев таңдауды қалай жасау керек екенін, неден бастап, не нәрсеге дайын болу керегін айтты, деп хабарлайды <a href="https://www.inform.kz/kz/ubt-2020-talapkerge-arnalgan-nuskaulyk_a3661309">ҚазАқпарат</a>.
Ең алдымен, Ә. Тойбаев болашақ мамандықты таңдауға үлкен жауапкершілікпен қарауды, еңбек нарығында кәсіптің сұранысқа ие болуын ескере отырып, келешегін бағалауды ұсынды. Департамент директоры бұл процеске ата-аналары мен жақындарын да қатыстыруға, тіпті сынып жетекшісімен кеңесуге шақырды. Бала өзінің мүмкіндіктерін, мамандыққа бейімін, әлеуетін түсінуі қаншалықты маңызды екенін атап өтті.
<blockquote>
 «Әрине, өз бейіміңізді ескере отырып, болашағыңызды қалай елестететініңізді, алдағы жоспарларыңызды одан әрі қалай іске асыратыныңызды да есепке алған жөн. Егер сіз жаратылыстану ғылымдарына көбірек бейім болсаңыз, тиісті бағытты таңдауды ұсынамыз, гуманитарлық салада да осылай. Келесі қадам – мамандық сәйкес келетін бейінді пәндерді анықтау. Бейіндік пәндері бар білім бағдарламалары топтарының тізбесін Ұлттық тестілеу орталығының сайтынан табуға болады», – деп бөлісті Әділет Тойбаев.
</blockquote>
Оқуға түсуші Ұлттық бірыңғай тестілеу тапсырады. ҰБТ нәтижелерін ескере отырып, одан әрі білім беру грантын тағайындау бойынша конкурсқа құжаттар тапсыру кезеңі жүргізіледі. Бұл рәсім 13-20 шілде аралығында Электрондық үкімет порталы арқылы жүзеге асырылады.
<blockquote>
 «Егер талапкер кәмелетке толмаған болса және ЭЦҚ-сы болмаса, оны заңды өкілдің қатысуымен жасауға болады. Егер түсушінің ЭЦҚ-сы бар болса, ол құжаттарды өзі бере алады, бірақ бұны ата-анасының қатысуымен жасауды ұсынамын. Электрондық үкімет сайтында білім беру бағдарламаларының нақты топтарын, ЖОО-ны таңдауға және конкурсқа қатысуға өтініш жіберуге болады. Өтінішке білімі туралы құжатты, ҰБТ сертификатын, 086-У нысанындағы медициналық анықтаманы, жеке басын куәландыратын құжаттың көшірмесін қоса тіркеу қажет. Оқуға түсуші конкурс қорытындысы бойынша гранттың тағайындалған немесе тағайындалмағаны туралы жауапты порталда алады. Егер жауап оң болса, сіз грант туралы электрондық куәлік аласыз», – деді Жоғары және жоғары оқу орнынан кейінгі білім департаментінің директоры.
</blockquote>
Одан кейін порталдан грант жеңіп алған ЖОО-ға тіркелуге өтініш бересіз, осы жерде жатақханадан орын алуға да өтініш тапсырасыз.
<blockquote>
 «Мұнымен қабылдау рәсімі аяқталмайтынын айта кету керек. Талапкер белгіленген мерзімде ЖОО-ға келіп, білім беру қызметін көрсету туралы шарт жасасуы тиіс. Егер мұны жасамаса, онда тіркеу жүзеге асырылмайды және заңды күшіне енбейді», – деп түсіндірді Әділет Тойбаев.
</blockquote>

ҰБТ-2020: Талапкерге арналған нұсқаулық

<a href="https://kyzylorda-news.kz/">Kyzylorda-news.kz.</a> Мәжілісмен Бекболат Тілеухан ауруханада коронавируспен күресіп жатыр. Ол өзінің қазіргі жағдайы туралы айтып, шамасы&nbsp;жоқ екенін жеткізген, деп хабарлайды&nbsp;<a href="https://stan.kz/soylesuge-shamam-zhok-auirip-zhatirmin-koronavirus-zhyk-332749/">Stan.kz</a>.
Депутат 10 күн бұрын өзінің коронавирус індетін жұқтырғанын білген. Тест оң нәтиже көрсетіпті. Бастапқыда үй жағдайында ем алған Бекболат Тілеуханның жағдайы күрт нашарлап, ауруханаға жатқызылған. Бұл туралы депутат телефон арқылы айты берді.&nbsp;
<blockquote>
 «Шүкір. Жақсы.Сөйлесуге шамам жоқ, айналайын. Дәрігерлер жауап берсін. Бәрі жақсы. Рақмет, жаным. Ауырып жатырмын», – дейді Бекболат Тілеухан.
</blockquote>
Енді депутаттың жанында жүрген көмекшілері мен отбасы мүшелері жаппай тест тапсыруға көшкен. Қазірдің өзінде Тілеуханмен байланыста болған бес адамнан вирус анықталған көрінеді. Ал Мәжіліс үйіндегілер алаңдауға негіз жоқ деп отыр.&nbsp;
<blockquote>
 «Қазір Мәжіліс депутаты Бекболат Тілеуханнан коронавирустық инфекция анықталып, ол қажетті емдеу курсын қабылдауда. Мәжіліс депутаты осыған дейін қашықтан жұмыс істеу режимінде болған. Бүгінгі таңда депутаттық корпустан да, аппарат қызметкерлерінен де аталған ауру белгілері анықталған жоқ», – дейді мәжілістің баспасөз қызметі.
</blockquote>
Естеріңізге сала кетейік, осыған дейін Бекболат Тілеуханның коронавирус жұқтырғаны белгілі болған.

Бекболат Тілеухан: Сөйлесуге шамам жоқ, ауырып жатырмын

Kyzylorda-news.kz. Қызылордада өрт сөндірушілер 19 адамды құтқарып, 50 адамды қауіпсіз жерге көшірді. Бұл туралы облыстық ТЖД өрт сөндіру және авариялық-құтқару жұмыстары қызметінен хабарлады.
Оқыс оқиға кеше түнгі сағат 1-лер шамасында Қызылорда қаласының «Ақмешіт» шағын ауданындағы 5 қабатты үйде тіркелді.
<img src="https://kyzylorda-news.kz/wp-content/uploads/2020/06/ort1.jpg" alt="" />
ТЖД күшімен гидравликалық құралдарды пайдалана отырып, люкті кесу арқылы шатырдағы үй-жайға кіру жүзеге асырылды. Жалпы ауданы 195 шаршы метр болатын қоқыс, тұрмыстық қалдықтар, ескі матрацтар, пластикалық бос ыдыстар жанған.
Жоғарғы қабаттағы пәтерлерден сыйымдылығы тұрмыстық газ баллондары шығарылды. Баспалдақ арқылы 50 адам эвакуацияланды. Оның 20-сы – бала.
Өрт сөндіру автосатысы арқылы 19 адам құтқарылды, оның 13-і- бала. Өрт сөндірушілердің біріккен іс-қимылы нәтижесінде өрт сағат 3-ке таяу толық жойылды.
Өрттің шығу себебін мамандар электр қалқанындағы қысқа тұйықталудан деп болжап отыр. Тұрғын үй жарықтан ажыратылып, екінші подъездің тұрғындары туысқандарының үйіне орналасты.
Полиция қызметкерлері подъезге күзет ұйымдастырды. Зардап шеккендер мен құрбан болғандар жоқ. Өрт орнына облыстың ТЖ департаментінің 42 қызметкері мен 8 бірлік техника қатыстырылды.
<img src="https://kyzylorda-news.kz/wp-content/uploads/2020/06/ort2.jpg" alt="" />

Қызылордада 5 қабатты үй өртенді

<a href="https://kyzylorda-news.kz/">Kyzylorda-news.kz.</a> Қызылорда облысында коронавирус инфекциясымен тіркелген симптомды науқастар саны 491-ге жетті. Бұл туралы Өңірлік коммуникациялар қызметінің ақпараттық алаңында облыстық денсаулық сақтау басқармасының басшысы Жақсылық Абдусаметов мәлімдеді.
<blockquote>
 «Соңғы тәулікте 3 дерек тіркелді. Симптомды жаңа жағдайдың 2-еуі емхананың скринингінен, ал 1-еуі өз еркімен ақылы сынама тапсырып анықталған», – деді бас дәрігер.
</blockquote>
Сондай-ақ, вирус жұқтырғандармен&nbsp;байланыста болған- 5729 азамат анықталды. Оның ішінде, 3446-і тікелей қарым-қатынаста, 2283-і жанама байланыста болған. Мұнан өзге, індеттен айығып шыққандар саны 371-ға жетті. Соңғы тәулікте 25 науқас емделіп шықты.
Құрметті облыс тұрғындары, сақтық шараларын қатаң сақтап және бетперде киюді жалғастыра беруге шақырамыз.

COVID-19: Симптомды 3 жағдай анықталды

<a href="https://kyzylorda-news.kz/">Kyzylorda-news.kz.</a> Кейінгі уақытта видеоконференция форматының дамуына байланысты оның да өз этикеті қалыптасты. Бұл –&nbsp;классикалық этикет сияқты қарым-қатынас жасаудың маңызды бөлігі. Назарыңызға коммуникация маманы Юлия Андреева дайындаған видеоконференция ережесін ұсынамыз.
1. Техникалық баптаулар мен байланысты алдын ала тексеріп алыңыз
Бұл видеоконференция кезінде бәріне дайын болу үшін керек. Дәл байланыс кезінде баптау шұқып отырмас үшін, алдын ала жөндеп алу керек.
2. Ноутбук немесе смартфонның қуатын толтырып қойыңыз
Бұл байланыс күтпеген жерден үзіліп кетпеуі үшін керек.
3. Видеоконференцияға жұмсайтын уақытты ескертіңіз
Онлайн байланысқа шықпас бұрын қатысушыларға қанша уақыт берілгенін және видеоконференция қанша уақытқа созылатынын ескерткен жөн.&nbsp;
4. Видео немесе дыбысты жазып алып жатқаныңызды ескертіңіз
Видеоконференцияның видеоға немесе диктофонға жазбас бұрын, ол туралы және жазып алғандағы мақсатыңызды қатысушыларға ескерткен дұрыс. Себебі жазбаға қарсы қатысушылар болуы мүмкін.
5. Кешікпеңіз, кешіксеңіз, ескертіңіз
Өзіңізді күттіріп қоюдан аулақ болыңыз.&nbsp;Өзгенің уақытына құрметпен қарау керек.
6. Кездесу модераторын тағайындаңыз
Видеоконференцияда бір жүргізуші болуы керек. Ол конференция регламентін және өзге процесті қадағалап отырады.
7. Байланысқа шығатын орныңызды алдын ала дайындап алыңыз
Бұл да аса маңызды нәрсе, әйтпесе мына видеодағыдай жағдайға тап болуыңыз мүмкін
8. Сұрақ қойып, дұрыс тыңдай біліңіз
Дұрыс қойылған сұрақ пен тыңдай білу – конференцияның сәтті өтуіне кепіл.
9. Сабыр сақтаңыз
Егер байланыс кезінде қатысушылар бір-бірімен келіспей, қарама-қайшы пікір айтып жатса, модератор мен өзге қатысушылар оларды сабырға шақырып, конференциядан кейін сөйлесуін ескертуі керек.
10. Қорытынды жасаңыз
Егер видеоконференция ұйымдастырушысы немес модераторы болсаңыз, кездесу қорытындысын жасап, нақты дедлайн мен тапсырмаларды қайталап шығыңыз.
11. Барлығы бір-бірімен таныс болсын
Конференцияда бірін-бірі танымайтындар болуы мүмкін. Сондықтан әрқайсын таныстырып шығып, конференцияға қатысып жатқан мақсатын айтып беріңіз.
12. Сөйлемейтін сәттерде микрофонды өшіріңіз
Микрофон қосулы тұрғанда артық дыбыс сөйлеп отырған қатысушыларға кедергі болуы мүмкін. Сондықтан тек өзіңіз сөйлейтін кезде микрофон қосыңыз.
13. Регламент сақтаңыз
Сөзіңізді алдын ала ескертілген регламентке сай есептеңіз.
<a href="https://massaget.kz/layfstayl/zhadnama/62416/">Massaget.kz</a>

Видеоконференцияның қандай этикеті бар?

<a href="https://kyzylorda-news.kz/">Kyzylorda-news.kz.</a> 14 маусым – Халықаралық донор күні.
Айтулы күнге орай Қызылорда облысы бойынша Қылмыстық-атқару жүйесі департаментінің 30 қызметкері қан тапсырды.&nbsp;
Бұл қайырымдылық акциясын бастап келген департамент бастығының орынбасары,&nbsp; әділет полковнигі Мұрат Нәкенов болды.&nbsp;
Донор болып, мұқтаж жанның өмірін ұзартуды әділет полковнигі Мұрат Сабырұлы өзінің азаматтық парызы санайды.
Мекеме қызметкерлерінің бұл алғаш донор болуы емес. Бұған дейін де біршама қызметкер облыстық қан орталығын үнемі қан тапсырып, өзгеге өмір сыйлауда.
Атап айтар болсақ, жеке құрам бойынша аға инспекторы әділет майоры Айдос Алназаров 10 жыл ішінде жылына 6 рет 450 мл-нан&nbsp; қан тапсырып келеді. Сондай-ақ ЗК-169/1 мекемесінің кезекші қызметінің тергеу изоляторы бастығының кезекші көмекшісі, әділет майоры Мұсабек Қаратаев 2006 жылдан бері үздіксіз донор болып келеді.
Бүгінгі донор күніне байланысты акцияға қатысқан, ЗК-169/4 мекемесінің әділет капитаны АлмасТоғатайдың қан тобы дәл осы уақытта ауыр халде жатқан науқастың қан тобымен сәйкес келіп, аппарат арқылы тромбоцид клеткалары алынды. Дер кезінде зәру жанға өмір сыйлаған ҚАЖ қызметкерінің бұл амалы,&nbsp; ерлікке пара-пар іс-әрекет.&nbsp;
Сонымен қатар, ЗК-169/5 мекемесінің кадр саясаты тобының аға инспекторы, әділет майоры Алтынбек Гүлмираның ұйымдастыруымен мекеменің 15 жеке құрам және ерікті жалдамалы қызметкерлері де бұл іс-шараға белсенді түрде қатысты.
Қан тапсырып өзгеге өмір сыйлаған ҚАЖ қызметкерлері&nbsp; көпке үлгі боларлық сауапты іс жасады. Облыстық қан орталығының директоры Серік Қуандықұлы&nbsp; Қызылорда облысы бойынша ҚАЖ департаментінің бастығы, подполковнигі Шаймерден Есенкелдиевке және мекеме қызметкерлеріне ерекше алғысын білдірді.
<img src="https://kyzylorda-news.kz/wp-content/uploads/2020/06/kazh-1-1.jpeg" alt="" />
<img src="https://kyzylorda-news.kz/wp-content/uploads/2020/06/kazh-2-1.jpeg" alt="" />

Қызылордада ҚАЖ департаментінің 30 қызметкері донорлыққа қан тапсырды

Бүгін қазақстандық мәнерлеп сырғанаушы Денис Теннің туған күні.
Спортшы тірі болғанда 27 жасқа толар еді.&nbsp;Денис 1993 жылы Алматы қаласында өмірге келді. Ол – Корей империясы кезінде даңқты қолбасшы болған генерал Мин Гынхоның ұрпағы.
1998 жылы&nbsp;Германияда Қазақстанның мәдениеті күндері басталды.
2000 жылы&nbsp;Қызылорда облыстық мұрағаттар мен құжаттама бөлімі құрылды.
2001 жылы&nbsp;Алматыда I республикалық «Бөбек» шақырады» фестивалі өтті.
2009 жылы&nbsp;Дүниежүзілік банк пен ҚР Қаржы министрлігінің арасында «Батыс-Оңтүстік» автомобиль жолдарын дамыту жобасын іске асыру келісіміне қол қойылды.
2011 жылы&nbsp;«Бизнестің жол картасы – 2020» бағдарламасының «Іскерлік қарым-қатынастар» жобасы аясында шағын және орта бизнес кәсіпкерлерін оқыту басталды.
2016 жылы&nbsp;QazaqGeo қазақ ұлттық географиялық қоғамы «Ұлытау – Арал» ғылыми-зерттеу экспедициясын ұйымдастырды.
2017 жылы&nbsp;қазақстандық әнші Димаш Құдайберген «2017 MTV Global Chinese Music Awards» байқауының «Үздік шетелдік танымал әнші» аталымында жеңімпаз болды.
2019 жылы Қасым-Жомарт Тоқаев Шанхай Ынтымақтастық Ұйымының саммитіне қатысу үшін Бішкек қаласына&nbsp;барды.

13 маусым: Атаулы күндер мен оқиғалар

<a href="https://kyzylorda-news.kz/">Kyzylorda-news.kz</a> ақпараттық агенттігінің 13 маусымға арналған жұлдыз-жорамалы.
Тоқты
Күннің алғашқы жартысында өзге адамдардан ұсыныс түсуі мүмкін, алданып қалудан сақтаныңыз. Жақындарыңызбен жылы қарым-қатынас орнатыңыз. Қандай қиындыққа да мойымай еңбек етсеңіз, жемісін жейсіз.
Торпақ
Бүгін жолыңыз болады. Жұмыста да ісіңіз алға басып, көңілді кештерде жаңа таныстар табасыз. Бұл таныстықтардың кейін өз пайдасы бар. Бүгін қандайда бір қиындық орын алса, сіз бұл сәттерде де шешім таба аласыз.
Егіздер
Үмітіңіз ақталады. Өзіңіз қалаған салада жұмыс табасыз. Бұл жұмысты бар ынтаңызбен, қызығушылықпен атқарасыз. Сіз өте білікті мамансыз. Дей тұрғанмен, көмек көрсетушілердің кеудесінен итермеңіз.
Шаян
Жұмысыңыз алға баспай, мақсатыңызға жету қиындай түседі. «Көтере алмайтын қылышты беліңе байлама» деген мақал бүгін сізге арналғандай. Сондықтан тым ауыр, қиын тапсырмаларды орындаймын деп әуреленбеңіз.
Арыстан
Күніңіз жақсы өтеді. Көптен бері ойлап жүрген сүйікті ісіңізбен айналысасыз. Жаныңызға жайлылық сыйлайтын таныстықтар орын алады. Жаныңыздағы адамдарға өзіңіз туралы жағымды пікір қалыптастырасыз.
Бикеш
Тыныш күн. Ешқандай мәселе орын алмайды. Күнделікті шаруаңызбен айналысып, берілген тапсырмаларды орындап, үйге қажетті заттар сатып адуға қолайлы күн.
Таразы
Мазасыз күн. Белсенділігіңіз бен көңіл-күйіңізді сақтап тұру қиынға соғады. Кейбір сөздерді жүрегіңізге жақын қабылдап, ренжіп қалуыңыз да мүмкін. Сондықтан бүгін ешкіммен жақын араласпағаныңыз жөн.
Сарышаян
Бүгінгі күніңіз ерекше өтеді. Отбасыңызға көп көңіл бөліңіз. Өмірлік серігіңізбен ашық әңгімелесіңіз. Егер материалдық жағдайыңыз тым нашар болса, оны жақсартудың амалдарын қарастырғаныңыз жөн.
Мерген
Ойламаған жерден сыйақы аласыз. Аптаны қорытындылап, жақсы жетістікке жетесіз. Материалдық жағдайыңыз, сіздің қалай жұмыс жасайтыныңызға байланысты екенін естен шығармаңыз. Уақытыңызды тиімді пайдаланып үйреніңіз.
Тауешкі
Өзіңізге ұнайтын затты сатып алу үшін көбірек шығын шығарасыз. Жаңаша бастама ұсынғандар болса, одан бас тартпаңыз. Қандай қиындық болса да тығырықтан шығар жол табыңыз. Бүгін жолға шығуды жоспарламаңыз.
Суқұйғыш
Егер жақсы дайындалсаңыз, қолға алған əрбір ісіңіз сəтімен болады. Сақтық пен ұстамдылықты ұмыт қалдырмаңыз. Шектен тыс құштарлыққа бой алдырудан аулақ болыңыз. Кешке жақсы тынығуға тырысыңыз.
Балықтар
Жеке өмірде де, жұмыста да жолыңыз болып, көп жетістікке жетесіз. Бірақ отбасыңызға көп көңіл бөлуді ұмытпаңыз. Олардың материалдық жағдайын жақсартуға тырысыңыз.

Жұлдыздар не дейді?

<a href="https://kyzylorda-news.kz/">Kyzylorda-news.kz.</a>&nbsp;Қазақстанда енді некені тіркеуге QR-код арқылы өтініш беруге болады. Бұл туралы цифрлық даму, инновациялар және аэроғарыш өнеркәсібі министрі Асқар Жұмағалиев халыққа есеп беру кездесуінде мәлімдеді.
Айтуынша, қазір техник мамандар QR-код көмегімен алуға болатын қызметтерді осы айда іске қосу үшін жұмыс істеп жатыр.
Бұл қызметтердің қатарында:
<ul>
<li>некені тіркеу;</li>
<li>баланың туғанын тіркеу;</li>
<li>баланы балабақша кезегіне қою;</li>
<li>заңды тұлғаны ашу;</li>
<li>салық есептілігін (250 форма) қабылдау бар.</li>
</ul>
<blockquote>
 “Осы қызметтерді компьютерде алған кезде, электронды сандық қолтаңбамен қол қою орнына, QR-кодты сканерлеп, eGov Mobile мобильді қосымшасы арқылы қызметті алуға сұрау жіберу жеткілікті. Электронды сандық қолтаңбаны қолдану үшін компьютерге қосымша бағдарлама орнатудың да қажеті жоқ”, – деді Жұмағалиев.
</blockquote>
eGov.kz порталында осы қызметтерді алған кезде, азамат “QR-code арқылы қол қою” функциясын таңдайды.
Осыдан кейін eGovMobile қосымшасының көмегімен мониторда пайда болған кодты сканерлейді.
Кейбір қызметтер үшін QR-код арқылы қол қою мүмкіндігі осы айдың соңына дейін жүзеге асады.
Болашақта бұл қызметтер тізімі кеңейе түспек.
eGov mobile қосымшасын App Store және PlayMarket платформаларынан жүктеуге болады.

Енді қазақстандықтар QR-код көмегімен үйлене алады

<a href="https://kyzylorda-news.kz/">Kyzylorda-news.kz.</a>&nbsp;Қазақстан аумағы арқылы өтетін транзиттік жүк көліктері навигациялық пломбалар арқылы қадағаланып отырады. Парламент сенаты тиісті заңды қабылдады.
Сенатта мәжіліс мақұлдаған “Автомобиль көлігі туралы” заңға халықаралық автомобиль тасымалдарын қадағалап отыру мәселелері бойынша түзетулер енгізу туралы заң жобасы қаралды.
Заң жобасына мәжілістің бір топ депутаты бастамашы болған.
Мәжілісмен Павел Казанцевтің айтуынша, құжатқа “халықаралық тасымалдарды қадағалап отырудың ақпараттық жүйесі”, “электронды сәйкестендіргіштер (навигациялық пломбалар)” ұғымдары енгізілді.
<blockquote>
 “Заң жобасында ел аумағына кірген транзиттік жүк көліктерін навигациялық пломба арқылы қадағалап отыру ұсынылады”, – деді депутат.
</blockquote>
Навигациялық пломбаларды пайдалану тәртібін бюджетке салық және басқа да төлемдердің түсуін қамтамасыз ету саласында басшылықты жүзеге асыратын өкілетті орган бекітеді.
Казанцев бұл норма халықаралық автокөлік тасымалдарына қатысты мемлекеттік бақылауды жетілдіруге септігін тигізетінін атап өтті. Оның сөзінше, заң жобасының қабылдануы бюджетке қосымша түсімді қамтамасыз етеді.
Құжатта навигациялық пломбаларды қасақана бүлдіргені немесе жойғаны үшін әкімшілік жауапкершілік қарастырылған.
Сонымен қатар, үкіметке халықаралық тасымалдарды қадағалап отыру жүйесінің ұлттық операторын айқындау құзыреттілігі беріледі.
Сенат депутаттары заңды бірауыздан қабылдады.
Бұған дейін мәжілісте қаржы вице-министрі Қанат Баеділов көлікке пломба ілу небәрі бір минут уақыт алатынын айтқан еді. Яғни, навигациялық пломбаларды көлікке ілу шекарада кептеліске әкеп соқпайды.

Қазақстан транзиттік жүк көліктерін қадағалап отыратын болды

<a href="https://kyzylorda-news.kz/">Kyzylorda-news.kz.</a>&nbsp;Биылғы 15 қазанда ҚР Парламенті Сенатының 17 депутатының өкілеттік мерзімі аяқталады.
ҚР Орталық сайлау комиссиясы ұсынған деректерге сәйкес, депутаттық өкілеттігі аяқталатын сенаторлар мыналар: Рашит Әкімов (Ақмола облысынан), Марат Тағымов (Ақтөбе облысынан), Аңсар Мұсаханов (Алматы облысынан), Сәрсенбай Еңсегенов (Атырау облысынан), Сергей Плотников (Шығыс Қазақстан облысынан), Мұратбай Жолдасбаев (Жамбыл облысынан), Ерболат Мұқаев (Батыс Қазақстан облысынан), Сергей Ершов (Қарағанды облысынан), Серік Бектұрғанов (Қостанай облысынан), Бекмырза Еламанов (Қызылорда облысынан), Михаил Бортников (Маңғыстау облысынан), Манап Көбенов (Павлодар облысынан), Ольга Перепечина (Солтүстік Қазақстан облысынан), Әли Бектаев (Түркістан облысынан), Серік Жақсыбеков (Нұр-Сұлтан қаласынан), Төлеубек Мұқашев (Алматы қаласынан) және Айгүл Қапбаров (Шымкент қаласынан).
Айта кетейік, бүгін Мемлекет басшысы Қасым-Жомарт Тоқаевтың Парламент Сенаты депутаттарының сайлауын 2020 жылғы 12 тамызға тағайындау туралы&nbsp;<a href="https://kyzylorda-news.kz/kogam/senat-sajlawy-12-tamyzda-oetedi-66813/">қаулысы шықты</a>.

Қазақстан және Қызылорда облысының жаңалықтары