<a href="https://kyzylorda-news.kz/">Kyzylorda-news.kz</a>. Қызылорда облысында коронавирустық инфекцияны жұқтырған науқастар саны 143 адамға жетті, деп хабарлайды&nbsp;<a href="https://www.coronavirus2020.kz/kz/kazakstandagy-koronavirus-boyynsha-17-sauir-10-05-tegi-epidemiologiyalyk-zhagday_a3639214">www.coronavirus2020.kz.</a>
17 сәуір сағат 10:05-тегі&nbsp;мәлімет бойынша елімізде коронавирус індетін жұқтырған тағы 68 жағдай тіркелді. Атап айтқанда, Нұр-Сұлтан қаласы – 2, Алматы қаласы – 44, Шымкент қаласы – 1, Түркістан облысы – 2, Қызылорда облысы – 9, Атырау облысы – 1, Батыс Қазақстан облысы – 4, Павлодар облысы – 2, Қарағанды облысы – 3.
Қазақстан бойынша барлығы 1470 жағдай.

Қызылорда облысында қауіпті індет жұқтырғандар саны 143 болды

<a href="https://kyzylorda-news.kz/">Kyzylorda-news.kz</a>. 17 сәуірде жұма күні Қазақстанда күн райы ашық, тек еліміздің батысы мен солтүстік-батысында жауын жауады, деп хабарлайды Қазгидромет.
<blockquote>
 «Орталығы Қарағанды облысында орналасқан антициклон жотасының әсерінен республиканың басым бөлігінде жауын-шашынсыз ауа райы күтіледі. Тек еліміздің батысы мен солтүстік-батысына Финляндия аймағынан циклонның жырасы жылжиды, соған байланысты кей жерлерде жаңбыр жауады. Кей жердерде тұман, желдің күшеюі, батыста шаңды дауылмен, бұршақ күтіледі», делінген ауа райы болжамында.
</blockquote>
Күндіз Қызылорда облысының кей жерлерінде жел 15-20 м/с жетеді.

Ауа райы: Жұма күні Қызылорда облысында жел күшейеді

Қазақстан Республикасының өртке қарсы қызмет күні
1918 жылы сәуірдің 17-де кеңестік республикаларда «Өртпен күресудің мемлекеттік шараларын ұйымдастыру туралы» декретке қол қойылды. Бұл күн Қазақстан Республикасында және бұрынғы КСРО республикаларында өртке қарсы қызметтің ұйымдастырылған күні ретінде атап өту қабылданған. Бүгінгі таңда елімізде аталмыш қызметтің құрамында 13 мыңға жуық адам қызмет етеді. Өрт бөлімшелері 3 мыңға жуық негізгі және арнайы өрт машиналарымен және басқа да өрт сөндіретін құрал-жабдықтармен жарақтанған.
1968 жылы&nbsp;«Жануарлар әлемінде» телебағдарламасы алғаш рет эфирге шықты. Аталмыш бағдарламаның негізін қалаушы және тұңғыш жүргізушісі кинорежиссер, КСРО-ның халық әртісі Згуриди Александр Михайлович болды.
1995 жылы&nbsp;Қазақстан Республикасының «Лицензиялау туралы» Заңы қабылданды.
2009 жылы&nbsp;Астанада Қаржы министрлігінің Кедендік бақылау комитеті және «ТеңізШевройл» ЖШС Қазақстанда кедендік рәсімдеудің ілкі жобасын іске асыру бойынша меморандум қабылдады.
2013 жылы&nbsp;Нью-Йоркте Қазақстан Республикасы мен Суринам Республикасы тұрақты өкілдерінің деңгейіндегі бірлескен коммюникеге қол қою арқылы екі ел арасында дипломатиялық қарым-қатынастар орнатылды. Қазақстандық тараптан құжатқа ҚР БҰҰ жанындағы тұрақты өкілі, Елші Б.Әйтімова, Суринам тарапынан бұл елдің БҰҰ жанындағы тұрақты өкілі Хенри Мак Дональд қол қойды.
2014 жылы&nbsp;Мемлекет басшысы Алматы қаласының шекараларын өзгерту туралы Жарлыққа қол қойды. Енді оның құрамына Алматы облысының жалпы ауданы 23200 гектар жері, соның ішінде Іле ауданы (604,6 га), Қарасай ауданы (16069,7 га) және Талғар ауданы (6525,7 га) кірді.

17 сәуір: Атаулы күндер мен оқиғалар

<a href="https://kyzylorda-news.kz/">Kyzylorda-news.kz</a> ақпарат агенттігінің 17 сәуірге арналған жұлдыз-жорамалы.
Тоқты
Көп жұмыс істеуге қолайлы күн. Өз кәсібіңізде жетістікке жетемін деу қиын. Дегенмен біраз шаруаны тындырып тастарыңыз анық. Материалдық жағдайыңыз жақсарады. Бірақ шығындалып қалудан аулақ болыңыз.
Торпақ
Көп іс тындырғыңыз келеді. Алайда барлығы сіз ойлағандай болмайды. Әлдекімнен көмек сұрауға ұялмаңыз. Ескі таныстарыңыздың қолдауына ие боласыз. Кейбір таныстарыңыз сіз ойлағаннан да көп көмегін тигізетін болады.
Егіздер
Бүгінгі күн өте ауыр, бірақ жемісті болады. Бүгін бар дарыныңызды көрсететін күн. Әсіресе кәсіби салада. Маңызды келісім шарттар жасап, жаңа қызметкер іздеу үшін қолайлы күн. Алаяқтардан сақтаныңыз.
Шаян
Бүгін түсініспеушілік туындаған қарым-қатынастарға көңіл бөлген дұрыс. Жағдай өздігінен дұрысталып, татуласамын деп үміттенбеңіз. Одан да бәрін талқылап, мәселенің басын ашып алған дұрыс.
Арыстан
Бүгін келісім шарт жасау, басшылықпен сөйлесу, сезім білдіру сынды маңызды мәселелерде қайсарлық танытқан жөн. Негізі барлық мәселелерде тез, әрі нақты шешім қабылдай біліңіз.
Бикеш
Кез келген жағдайда өз дегеніңізден қайтпайтын боласыз. Қателескеніңіз анық көрініп тұрса да, өзіңіздікін дәлелдеуге тырысасыз. Қателескеніңді мойындай білу де өнер екенін ұмытпаңыз.
Таразы
Бүгін барлық мәселелерді жылдам, қисынды және нақты орындайсыз. Күш-жігеріңіз мол болады, алайда жұмыста кідірудің қажеті жоқ. Алдағы демалыстарға дайындалыңыз.
Сарышаян
Бүгін жақсы нәтижелерге қол жеткізу үшін барыңызды саласыз. Адамдармен, ақпаратпен жақсы жұмыс істейсіз. Бұл ынтаңызды басшылық байқап, мақтауын аямайды, бірақ үйдегі жанұяңызды да ұмытпаған жөн.
Мерген
Бүгін бірден барлық нәрсеге қол жеткізгіңіз келеді. Ол үшін жылдам, әрі әсерлі жұмыс істейсіз. Қалағаныңызды іске асыруыңызға болады. Бірақ айналадағы адамдардың көңіл-күйіне де қарап қойған абзал.
Тауешкі
Бүгін жолға немесе саяхатқа шықсаңыз міндетті түрде жолыңыз болады. Кез келген жұмыс үшін жақсы марапатталасыз. Айтқандарыңыздың бәрін адамдар бұлжытпай орындайтын болады.
Суқұйғыш
Бүгінгі күн оқиғаларға толы және жауапты болады. Білмейтін мәселелердің өзін бірден түсінесіз. Көпшілік алдында сөз сөйлеп, қоғамдық шараға қатыссаңыз дұрыс болады.
Балықтар
Бүгін көкейіңіздегі мәселелерді басшылықпен талқыламаңыз. Жалақыңызды көтеруді сұрап, қандай да бір ынта танытудың қажеті жоқ. Басшылықтың көзіне түспей, аз сөйлеп, көп тыңдаған дұрыс.

Жұлдыздар не дейді?

<a href="https://kyzylorda-news.kz/">Kyzylorda-news.kz.</a> Коронавирус дертімен ауыратын науқастарда өкпенің көлемі кішірейіп, мидың қызметі нашарлайды. Бұл туралы Джордж Мейсон университетінің (АҚШ) жүйелік биология мектебінің профессоры Анча Баранова айтты, деп хабарлайды&nbsp;<a href="https://ria.ru/20200416/1570110074.html">РИА Новости</a>.
<blockquote>
 «Аталған дерттің ауыр түрін бастан өткерген жастар бұдан былай марафонға қатыса алмай, ал қарт адамдар баспалдаққа көтерілген кезде тыныс алудан зардап шегеді. Әрине, осы санаттағылардың бәрі емес», – дейді Баранова.
</blockquote>
Сонымен қатар, профессордың айтуынша, коронавируспен ауыр сырқаттанған науқастарда неврологиялық белгілер пайда болады. Егде жастағы адамдарда сана-сезім шатасуы мен бағыттан ауытқушылық белгілері жиі кездеседі.
<blockquote>
 «Вирустың нейроқабыну жүргізу мүмкіндігі күмән тудырмайды. Оның қанша уақытқа созылатыны және қашан аяқталатыны да қазірше белгісіз. Өйткені, науқастар ауруханадан жазылып шықаннан кейін де, шаршау мен көз алдының тұманданатынын айтуда», – деді Анча Баранова.
</blockquote>
Демек, адам сауығып, қалпына келгеннен кейін де аурудың салдары қанша уақытқа созылатыны әлі белгісіз.

Ғалым коронавирустан айыққан адам қандай қиындыққа тап болатынын айтып берді

<a href="https://kyzylorda-news.kz/">Kyzylorda-news.kz.</a> Аймақта 2020 жылы егілетін ауыл шаруашылығы дақылдарының сызбасы аудандар және Қызылорда қаласы бойынша бекітілген. Бекітілген сызбаға сәйкес, үстіміздегі жылы облыс бойынша 183,1 мың гектарға егiс егу межеленіп отыр. Бұл туралы облыстық ауыл шаруашылығы басқармасы мәлімдеді.
Басқарманың мәліметінше, облыс бойынша егілетін 183,1 мың гектардың ішінде дәндi дақылдар 97,8 мың, майлы дақылдар 6,0 мың, мал азықтық дақылдар 61,6 мың, картоп, көкөнiс, бақша 17,7 мың гектарды құрайды. Негізгі дақыл күрiштің көлемі 88,2 мың гектар.
Облыста егіс көлемдерін әртараптандыру бағытында биылғы жылы соя дақылын 290 гектарға, қант құмайын 200 гектарға ұлғайтуды және 164 гектар жерге жеміс-жидек, жүзім отырғызу межеленіп отыр.
Сонымен қатар, су үнемдеу технологиясын қолдану арқылы барлығы 200 гектар жерге ауыл шаруашылығы дақылдарын орналастыру жоспарлануда. Оның 80 гектары бүгінгі таңда егіліп отыр.
Бүгінде егістікке қажетті минералдық тыңайтқыштар мен тұқымдық материалдар толық қамтамасыз етілді. Сондай-ақ, ауыл шаруашылығы техникалары толықтай дайындалып, егіс егу науқанына қатысуда.
Облысқа 2020 жылдың көктемгі егіс және дала жұмыстарын жүргізуге 14 мың тонна арзандатылған дизель отыны бөлінген. Бекітілген операторлар арқылы наурыз айына бөлінген 3250 тонна дизель отыны облысқа жеткізіліп, шаруашылықтарға толығымен таратылды. Бүгінгі күні сәуір айына бөлінген 4615 тонна дизель отынына келісім-шарт жасалып, қаржысы аударылған. Оның ішінде, 2432 тонна дизель отыны облысқа жеткізіліп, оның 1770 тоннасы шаруашылықтарға таратылды.
Мемлекет басшысы Қасым-Жомарт Тоқаевтың дизель отынының бағасын арзандату бойынша берген тапсырмасына сәйкес, бүгінде арзандатылған дизель отынының бағасы әр литрге 162 теңгені құрап отыр.
Басқарма мәліметінше, соңғы жылдары мемлекет тарапынан көрсетіліп келе жатқан қолдаулардың арқасында облыстың машина-трактор паркі тұрақты жаңарып келеді.
Жалпы соңғы 5 жылда 25,5 млрд. теңгеге 1049 дана жаңадан ауыл шаруашылығы техникалары сатып алынып машина-трактор паркі 23,7%-ға жаңарды. Атап айтқанда, «ҚазАгроҚаржы» АҚ-ы арқылы 22,2 млрд. теңгеге 649 дана және өз қаражаты есебінен 3,3 млрд. теңгеге 400 дана алынған.
Биылғы жылы да облыстың шаруашылық құрылымдары «ҚазАгроҚаржы» АҚ-ның Қызылорда филиалы арқылы 5,0 млрд теңгеге ауыл шаруашылығы техникаларын сатып алуды жоспарлап, бүгінгі күнге 1,3 млрд теңгеге 20 дана ауыл шаруашылығы техникалары сатып алынды.
Биылғы жылға бекітілген ауыл шаруашылығы дақылдарын орналастыру сызбасына сәйкес тұрақты суаруға 4,2 млрд. текше метр су қажет көрінеді.
15 сәуірдегі мәлімет бойынша Шардара су қоймасына жоғарыдан секундына 533 текше метр су түсуде. Қоймадағы су көлемі 5,1 млрд. текше метрді құрап, төменге секундына 400 текше метр, ал Көксарай су реттегішінде 1,9 млрд. текше метр су көлемі жиналып, төменге секундына 200 текше метр су тасталуда.
Бүгінгі күнге Шардара мен Көксарайды қосқанда 7,0 млрд. текше метр су бар, бұл өткен жылдың осы кезеңімен салыстырғанда 0,2млрд. текше метрге кем.
Көктемгі су алу жұмыстарына сәйкес, барлық аудандар мен Қызылорда қаласының су шаруашылығы нысандарын дайындау жұмыстары жоспарға сәйкес атқарылып, бүгінгі күнге облыс бойынша су алу каналдары арқылы барлығы секундына 162,0 текше метр су алынуда.
Сонымен қатар, 2020 жылдың егісі үшін шаруашылық құрылымдарына су жеткізіп беру қызметі үшін Су шаруашылығы мекемесімен келісім-шартқа отыру жұмыстары жүргізілуде.
Бүгінге облыс бойынша 986,8 млн текше метр су алуға 191 шаруашылықпен су жеткізіп беру қызметі үшін келісім-шарт жасалды.
Көктемгі дала жұмыстарын қаржыландыруға келсек, облыста 2020 жылы межеленген егіс көлемдеріне сәйкес, Қызылорда қаласы мен аудандар әкімдіктерінің мәліметтері бойынша көктемгі дала және егіс егу жұмыстарына қажетті қаржы көлемі 8&nbsp;581,6 млн. теңгені құрап отыр.
Осы қажет қаржыдан шаруашылықтардың өз қаржысы есебінен 2&nbsp;450,3 млн. теңге, инвесторлар тарапынан 3 656,7 млн. теңге, «Агрохолдинг Қызылорда» ЖШС арқылы 907,2 млн. теңге қаржыландыру жоспарланса, «Аграрлық несие корпорациясы» АҚ-нан 768,6 млн. теңге, басқа көздерден 798,8 млн.теңгені құрайды.
Бүгінгі күнге «Аграрлық несие корпорациясы» АҚ арқылы 21 шаруашылық құрылымы 349,4 млн теңгеге, «Агрохолдинг Қызылорда» ЖШС арқылы 36 шаруашылық құрылымы 489,6 млн теңгеге қаржыландырылып отыр.
Айта кетейік, қазір қала және барлық аудандар ерте егілетін дақылдарды егу жұмыстарына кірісті. Бүгінгі күнге егілген егіс көлемі 27,8 мың гектар, оның ішінде: жаздық бидай – 3,8 мың (100,5%), жаздық арпа – 0,6 мың (105,6%), мақсары – 5,0 мың (85,7%), жаңа жоңышқа – 18,6 мың (98,9%)гектарды құрайды. Негізгі дақыл – күріш егу жұмыстары сәуір айының 20–нан кейін басталады деп күтілуде.
Сонымен қатар, қала және аудандардан алынған мәліметтерге сәйкес, ауыл шаруашылығы құрылымдарындағы 41857 гектар ескі жоңышқа толығымен тырмаланып, 5894(14,0%) гектары суғарылса, 4142 гектар күздік бидай тырмаланып, толығымен үстеп қоректендірілген.

Көктемгі дала жұмыстары: Биыл Қызылорда облысында 183,1 мың гектар жерге егiн егіледі

<a href="https://kyzylorda-news.kz/">Kyzylorda-news.kz</a>. Онлайн баршаға оңтайлы жүйе. Бүгінде оның тиімділігі мәдениет саласында да байқалуда. Мұны облыстық мәдениет, архивтер және құжаттама басқармасының басшысы Мира Әбуова өңірлік коммуникациялар қызметінде өткен брифингте мәлімдеді. Басқарма басшысы карантин барлық жоспарды түбегейлі өзгерткенімен, оның адамдардың өнерге деген қызығушылығын бәсеңдетпегенін айтты.
<blockquote>
 – Төтенше жағдай жарияланғалы барлық шараларды онлайн форматқа көшірдік. Осыған дейін түрлі 1497 онлайн мәдени шара қолға алынды, нәтиже жаман емес. Оған 159 479 көрермен қамтылды, қаралым саны да жоғары. Арнайы медиа-жоспар әзірленді, тиісті жұмыстарды жалғастырудамыз. Бұл ретте әлеуметтік желінің пайдасы орасан. Біз барлық жобаларды, онлайн концерттер, қойылым, экскурсия, лекция, танымдық сағаттар мен виртуалды көрмелерді түрі желілерге орналастырудамыз. Әлеуметтік желілерге тіркелмеген тұрғындар бары да ескерілді. Басқарма Youtube бейнехостингінен «Сыр шаңырағы» каналын ашып, логотипін бекітті. Жоспарға сәйкес, күнделікті бейнематериалдар каналға енгізіліп отыр, – деді Мира Әбуова.
</blockquote>
Бұдан бөлек басқарма басшысы 13-ші сәуірден бастап Алтын Орданың 750 жылдығына орай «Алтын Орда мемлекеті – Ұлы дала өркениеті» атты облыстық онлайн жазба ақындар айтысы басталғанын және оның көптің қолдауына ие болғанын алға тартты.
Брифингте желіні әсем әуендерімен көмкеріп жүрген облыстық филармония әншілері мен жыршы-термешілердің, өнер ұжымдарының еңбегі шет қалмады. Осы шаралар легі сәуір-мамыр айларында Youtube видеохостингі мен әлеуметтік желілерде «Шәмші әндері Сыр елінде» атты әндер шеруімен, «Мәртебелі классика» лекция-концерттерімен және тағы басқа мәдени шаралармен жалғаспақ.
Ал, архив саласында жоспар бойынша бекітілген жұмыстар қашықтан жүзеге асып жатқан көрінеді.
<blockquote>
 «Архивтік анықтамаларға сұраныстар электронды үкімет порталы (e-gov.kz) арқылы келіп түсуде және олар дер кезінде орындалып отыр», – деді ол.
</blockquote>
<img src="https://kyzylorda-news.kz/wp-content/uploads/2020/04/abwova-kaz-ishine.jpeg" alt="" />

Төтенше жағдай: Қызылорда облысында 1497 онлайн мәдени шара қолға алынған

<a href="https://kyzylorda-news.kz/">Kyzylorda-news.kz.</a> Қазіргі таңда коронавирустық індетпен күреске жұмылдырылған мамандарымыз уақытпен санаспай жұмыс жасап жүргені белгілі. Сондай мамандардың қатарында Жаңақорған ауданаралық ауруханасының жоғары санатты дәрігер-эпидемиологы Асқан Отарбеков те бар.
Ол 29-шы наурыздан бастап үйіне қайтпаған. Отбасымен тек қолы қалт еткенде телефон арқылы ғана сөйлсетін көрінеді. Бірақ, дәрігер қызметін таңдағанына еш өкінбейтін көрінеді.
<blockquote>
 «Егер маған қайтадан мамандық таңдауға мүмкіндік берілсе, дәрігер мамандығын қайта таңдаған болар едім. Біздің қызметіміз адамның денсаулығына, тағдырына тікелей қатысты болғандықтан, міндетімізді асқан жауапкершілікпен, мінсіз атқаруға тырысамыз», – дейді ол.
</blockquote>
Ол облыс тұрғындары дәрігерлерге қолдау көрсетіп, карантин талаптарына жауапкершілікпен қараса дейді.
<blockquote>
 «Мен 29-шы наурыздан бері, яғни, ауданда алғашқы науқас анықталған күннен бастап үйіме қайтқаным жоқ. Отбасыммен жұмыс арасында ғана телефонмен байланысып, жағдайларын біліп тұрамын. Сәт сайын науқастың жағдайын бақылап, өзіме жүктелген міндеттемелерді атқарудамын. Менің бір ғана өтінішім бар. Қалыптасқан жағдайға байланысты енгізілген карантин шараларына барлық тұрғындар үлкен жауапкершілікпен қараса деймін», – дейді жаңақорғандық дәрігер Асқан Бердіұлы.
</blockquote>

Жаңақорғандық дәрігер: «20 күннен бері ауруханада түнеп жүргеніме өкінген емеспін»

<a href="https://kyzylorda-news.kz/">Kyzylorda-news.kz.</a> Қызылорда облысының Жалағаш ауданында полицейлерді балағаттаған тұрғын ұсталды.
Жалағаш ауданында облыс орталығының 28 жастағы тұрғыны полиция қызметкерлерінің заңды талаптарына бағынбай, оларға тіл тигізген. 14 сәуір сағат 22:30 шамасында Бұқарбай батыр ауылының тұсында орналасқан санитарлық бекетте «Toyota-camry»&nbsp;маркалы автокөлігінің жүргізушісіне полиция қызметкерлері Жалағаш кентіне кіруге рұқсат бермейді.
Осы сәтте көлік жүргізушісі полиция қызметкерлерін балағаттап, заңды талаптарына бағынбай, полицейлердің бірінің аяғын көлігімен басып өтіп, оқиға орнынан бой тасалаған.
Жалағаш ауданының полиция бөлімі қызметкерлерінің жедел әрекеттері нәтижесінде билік өкілін қорлаған азамат ұсталып, полиция бөліміне жеткізілді.
Бұл азаматқа қатысты карантин режимін бұзғаны үшін ҚР Әкімшілік құқық бұзушылық туралы кодексінің 476-бабына сәйкес (төтенше жағдай режимін бұзу) әкімшілік іс қозғалып, аудандық сотқа жолданды.
Жалағаш аудандық сотының қаулысымен құқық бұзушы екі тәулікке қамаққа алынды. Одан бөлек, билік өкілін қорлау дерегі бойынша ҚР Қылмыстық кодексінің 378-бабының 1-бөлігімен (билік өкілін қорлау) сотқа дейінгі тергеп – тексеру амалдары жүргізіліп жатыр.
Бүгінгі таңда күдіктіні қолхатпен босатқан.

Жалағашта полицейді балағаттаған тұрғын ұсталды

<a href="https://kyzylorda-news.kz/">Kyzylorda-news.kz</a>. Түркістан облысында кәмелетке толмаған қызды клиентке сатып жатқан жерінен Шымкент тұрғыны ұсталды, деп хабарлайды <a href="https://polisia.kz/kameletke-tolmaghan-qyzdy-satqan-kudikti-ustaldy/">polisia.kz</a>.
Әйел адам қыз баланы 1 миллион теңгеге бағалаған. Анықталғандай, жеңгетай оны интимдік қызмет үшін бұған дейін бірнеше рет жалға берген.
<blockquote>
 «13 сәуір күні Түркістан облыстық Полиция департаментінің криминалдық полиция басқармасына әйел адам кәмелетке толмаған қызды жыныстық қызмет көрсету үшін белгілі сомаға сататыны туралы хабарлама түсті. Аталған жайт ҚР Қылмыстық кодексінің 309-бабының 2-бөлігі (жезөкшелікпен айналысуға арналған притондар ұйымдастыру немесе ұстау және жеңгетайлық) бойынша сотқа дейінгі тергеп-тексерудің бірыңғай тізіліміне тіркелді.​​​​​​ Сол күні жедел-іздестіру іс-шарасы барысында, Түркістан облысы ПД КПБ және Сайрам аудандық полиция бөлімінің қызметкерлері Сайрам ауданы Ақсукент ауылындағы қонақүйлердің бірінен кәмелетке толмаған қызды сату кезінде Шымкент қаласының тұрғынын ұстады», – делінген мәліметте.
</blockquote>
Кәмелет жасына толмаған қыз бала да Шымкент қаласының тұрғыны, оқу орындарының бірінің студенті.
<blockquote>
 «Полиция қызметкерлері күдікті әйелден айғақзат ретінде миллион теңге ақшаны тәркілеп алды. ​​Тергеу барысында күдікті осы қызды жыныстық қызмет көрсету үшін бұған дейін бірнеше рет ұсынғаны анықтады. Жеңгетай келіссөздерді телефон арқылы жүргізіп, клиенттерге мессенджермен кәмелетке толмаған қыздың суретін көрсетіп отырған. Оны пәк, таза деп сылтауратып, клиенттерден ірі көлемде ақша сұрап, келісуден кейін кездесуді ұйымдастырып отырғаны белгілі болды», – деді полициядан.
</blockquote>
Аталған факті бойынша сотқа дейінгі тергеу амалдары жүргізіліп жатыр. Күдікті қамауға алынды. Түркістан облысының полицейлері істің толық мән-жайын және әйелдің басқа да осыған ұқсас қылмыстарға қатысы бар-жоғын анықтауда.

Елімізде әйел адам кәмелетке толмаған қызды 1 млн теңгеге сатқан

<a href="https://kyzylorda-news.kz/">Kyzylorda-news.kz</a>. ҚР мемлекеттік бас санитариялық дәрігері Айжан Есмағамбетованың қаулысына сәйкес,&nbsp;Қазақстанның барлық аймақтарында карантин&nbsp;шаралары күшейтілді.&nbsp;
Қазақстанның Бас санитариялық дәрігердің қаулысына сәйкес облыстардың әкімдері:&nbsp;
1) халықтың тыныс-тіршілігін қамтамасыз ету ұйымдарының қызметкерлерін, медициналық көрсетілімдер бойынша шығатын және кіретін адамдарды, сондай-ақ карантин енгізілген кезеңде стационарларда және карантиндік және провизорлық стационарларда бақылауда болған адамдардың шығуын қоспағанда, облыс орталықтарының, қалалардың, аудандардың, ауылдық елді мекендердің аумағынан шығуға және оған кіруге тыйым салуды;
2) авариялық-құтқару, жедел медициналық жәрдем қызметтерінің&nbsp; қолжетімділігін және үздіксіз жұмысын қамтамасыз етуді ескере отырып, карантиндік аймаққа кіру/шығу пункттерін айқындауды;
3)&nbsp;қала бойынша және аудандар, ауылдық елді мекендер арасында орамдар мен секторларға бөле отырып, блок-бекеттерді орната отырып, карантиндік аймақта жүріп-тұруды шектеуді;&nbsp;
4)&nbsp;Ішкі істер және Қорғаныс министрліктерінің қызметкерлерін тарта отырып, COVID-19-мен сырқаттанушылық тіркелген ауылдық елді мекендерді қоршауды;&nbsp;
5) әуежайдың, теміржол вокзалының, автовокзалдар мен автостанциялардың қызметін тоқтата тұруды, қалааралық, ауданаралық автобус қатынастарына, сондай-ақ жеке тасымалдауға тыйым салуды;
6) екінші деңгейдегі банктер, «Қазпочта» АҚ бөлімшелерінің, айырбастау пункттерінің қызметін онлайн жұмыс режиміне және «клиенттерге дейін жеткізу» принципі бойынша көшіру арқылы тоқтата тұруды;&nbsp;
7) меншік нысанына қарамастан мектепке дейінгі балалар мекемелерінің, қызмет көрсету саласы объектілерінің қызметін тоқтата тұруды;
8) жәрмеңкелердің, азық-түлік, азық-түлік емес тауарлар базарларының, автомобиль, киім-кешек, мал базарлары мен адамдар көп жиналатын басқа да объектілердің жұмысын тоқтата тұруды;&nbsp;
9) қоғамдық көліктің жұмысын тоқтата тұруды;
10) ауылдық елді мекендер ішінде тұрғындардың жүріп-тұруына тыйым салуды енгізуді;
11) Ішкі істер, Қорғаныс министрліктерінің күштерін тарта отырып, карантиндік аумақты патрульдеуді;&nbsp;
12) тыныс-тіршілікті қамтамасыз ететіндерді қоспағанда, барлық кәсіпорындардың/ұйымдардың қызметін тоқтата тұруды;
13) діни мақсаттағы объектілердің жұмысын тоқтата тұруды;
14) облыс орталықтарының, қалалардың, аудандардың, ауылдық елді мекендердің ішінде жеке көліктің қозғалысын шектеуді;
15) бір отбасы мүшелерін қоспағанда, көшелерде және өзге де қоғамдық орындарда үш адамнан артық топпен жиналуды шектеуді;
16) қажет болатын:&nbsp;
– азық-түлікті, бірінші кезекте қажетті дәрілік заттар мен медициналық бұйымдарды сатып алу;
– жұмысқа шығу жағдайларын қоспағанда, тұрғындардың тұрғын үйден шығуын шектеуді;&nbsp;
17) тұрғылықты жері бойынша отбасылық іс-шараларды өткізуге тыйым салуды;&nbsp;
18) 65 жастан асқан адамдарға және он сегіз жасқа толмаған адамдарға тұрғын үйден алып жүретін адамсыз шығуына тыйым салуды;&nbsp;
19) карантин режимін сақтамайтын адамдарды әкімшілік жауапкершілікке тартуды;&nbsp;
20) карантин кезеңінде халықтың тыныс-тіршілігін қамтамасыз ету объектілерінің тізбесі мен жұмыс режимін айқындауды;&nbsp;
21) қызметтік міндеттерін атқаруына байланысты облыс орталықтарының, қалалардың, аудандардың, ауылдық елді мекендердің аумағында жүріп-тұруға рұқсат етілген адамдардың тізбесін айқындауды;&nbsp;
22) COVID-19-ды жоққа шығармайтын клиникалық белгілері бар пациенттердің шұғыл көрсетілімдері бойынша емдеуге жатқызуға арналған көп бейінді стационарларды айқындауды тапсырды.
Еске салайық, кеше Денсаулық сақтау министрілігінің өкілдері еліміздегі коронавирус ахуалының&nbsp;<a href="https://kyzylorda-news.kz/covid-19-news/qr-dsm-koronavirws-indeti-qazaqstanda-sharyqtaw-shegine-zhetti-56747/">шарықтау шегі басталды</a> деп мәлімдеген&nbsp;болатын.

Қазақстанның барлық аймақтарында карантин шаралары күшейтілді

<a href="https://kyzylorda-news.kz/">Kyzylorda-news.kz</a>. Коронавирус инфекциясының таралуын тежеу үшін 16 сәуірден бастап Қазалы ауданында қатаң шаралар қолға алынады. 50 мыңға жуық халқы бар Әйтеке би кентінде көлік қозғалысы мен тұрғындардың жүруіне толық тыйым салынады. Қоғамдық көліктер де тоқтайды.
Осыған орай аудан орталығына аспалы көпір (Золотой мост), Қазалы қаласынан келетін жолдар, Әйтеке би кентінің шығыс бетіндегі теміржол өткелі мен перъезд жабылады.
Тұрғындардың қауіпсіздігін сақтау мақсатында аудан орталығындағы Әйтеке би көшесінің М.Шоқай мен Төле би көшелерінің аралығына да тосқауыл қойылады.
Бүгіннен бастап аудандық полиция қызметкерлері көшеде ешқандай себепсіз жүрген жаяу жүргіншілер мен автокөлік иелеріне әкімшілік хаттамалар толтырып, аудандық сотқа жолдайтын болады.
<blockquote>
 «Қауіпсіздік шараларының барлығы тұрғындардың денсаулығын сақтау, жұқпалы індеттің біздің ауданда таралуын болдырмау. Сондықтан барлық аудан тұрғындарын сабырлық сақтап, қатаң шараларға түсіністікпен қарауға шақырамыз. Айта кетейік, 14 сәуір күні Қызылорда облысының Бас мемлекеттік санитариялық дәрігерінің №9 қаулысы шыққан болатын. Қаулыға сәйкес Қызылорда қаласы мен аудандарда азаматтардың (оның ішінде жаяу тәртіппен) және көліктердің барлық түрлерінің (азық-түлік тауарларын, дәрілік заттарды, медициналық тауарларды тасымалдайтын көліктерді, өндірістік және ауыл шаруашылығы салаларында халықтың тұрмыс тіршілігін қамтамасыз ететін қызмет көрсетулерді, сонымен қатар жергілікті атқарушы органдармен бекітілген тізбені қоспағанда) кіруіне және шығуына тыйым салынды», – деп мәлімдеді біздің ақпарат агенттігіне Қазалы ауданы әкімінің баспасөз қызметінен.
</blockquote>

Қазақстан және Қызылорда облысының жаңалықтары