<a href="https://kyzylorda-news.kz/">Kyzylorda-news.kz.</a> Қызылорда қаласындағы Назарбаев Зияткерлік мектебінің тестілеу пунктінде кемінде 2 метр радиуста әлеуметтік қашықтықты ескере отырып 48 тест тапсыру аудиториялары дайындалды. Мектеп аумағында және ғимарат ішінде үміткерлердің қауіпсіз қозғалысы үшін еденде арнайы бөлу белгілері орнатылған.
Мектепке үміткерлер ата-аналарысыз кіреді. Кіре беріс аумағында топтасып, кептеліс тудырмау үшін мектеп территориясында төрт өткізу пункті жұмыс істейтін болады.
Үміткерлер ғимарат ішіне тек бетпердемен жіберіледі. Әр қатысушы аяқкиім табандарын және қолдарын дезинфекциялап, байланыссыз термометриядан өтуі керек. 
Тіркеу орнында үміткерлер масканы шешіп, оны арнайы қарастырылған контейнерге тастап, сәйкестендіруден өткен соң жаңа маска киіп, қолды антисептикпен қайта өндеуі тиіс.
Дәліздегі және аудитория кезекшілері үміткерді аудиторияға жеткізеді. Тестілеу бастамас бұрын емтихан тапсыру, жауап парақтарын толтыру және тапсырманы орындау ережелері бойынша нұсқаулық жүргізіледі.
Конкурстық іріктеуге қатысатын барлық жауапты мектеп қызметкерлері жеке қорғаныс құралдарымен қамтамасыз етіледі.
Мектеп ғимаратына антисептик сепкіштері қарастырылған. Сынақ басында және аяқталған соң бөлмелерді үнемі желдету, дезинфекциялық заттарды пайдалана отырып тазалау жұмыстары жүргізіліп, әр күннің соңында кварц жасалады.
Айта кету керек, термометрия нәтижесі бойынша жоғары дене температурасы анықталған үміткерлер алгоритмге сәйкес қосымша медициналық тексеруге жіберіліп, қажет болған жағдайда бөлек резервті аудиторияға тест тапсыруға орналастырылады.
Сондай-ақ, карантиндік шаралардың күшеюіне байланысты ата-аналарды түсіністікпен қарап, мектеп жанында жаппай кептеліс тудырмауға және әлеуметтік қашықтық пен бетперде режимін қатаң сақтауға шақырамыз. Балаларды мектепке алып келген соң, мүмкіндігінше үйге қайтуға кеңес береміз. Емтихан процесін ата-аналар YouTube арнасында онлайн режімінде көруге болатынын естеріңізге саламыз.
<img src="https://kyzylorda-news.kz/wp-content/uploads/2020/06/fb_img_1592555443935-1.jpg" alt="" />
<img src="https://kyzylorda-news.kz/wp-content/uploads/2020/06/fb_img_1592555446545-1.jpg" alt="" />
<img src="https://kyzylorda-news.kz/wp-content/uploads/2020/06/fb_img_1592555449195-1.jpg" alt="" />

Қызылордада Назарбаев зияткерлік мектебінде тест тапсыру аудиториялары дайындалды

<a href="https://kyzylorda-news.kz/">Kyzylorda-news.kz.</a> Қазақстан Республикасының Тұңғыш Президенті – Елбасы Нұрсұлтан Назарбаевтан сынама алу барысында коронавирус анықталуына байланысты Сыр елінің жұртшылығы зор алаңдаушылық білдіруде.
Тәуелсіз мемлекетіміздің негізін қалап, қазақ халқын дүние жүзіне танытқан әлемдік деңгейдегі көшбасшының дерттен айығып, тезірек сауығып кетуіне ниеттестік білдірген хаттар мен жеделхаттар легі елордаға үздіксіз жолдануда. Сыр бойының беделді азаматтары, соғыс және еңбек ардагерлері, спорт пен өнер тарландары, бизнес және жастар өкілдері Елбасыға ыстық ықыластарын арнап, мықты денсаулық тілеп, шынайы лебіздерін жеткізуде. 
Ұлы Отан соғысының ардагері, Қызылорда облысының Құрметті азаматы, ғасыр жасаған ақсақал Бөрібай Құлманов:«Сіз әлем елдерін жайлаған індеттің алдын алып, алғашқы болып жедел шешім шығарып, тиісті шаралардың қабылдануына зор ықпал еттіңіз. Өзіңіз Алаштың анасына балаған Сыр жұртшылығы пандемия кезінде Сіздің халыққа жасаған қамқорлығыңызбен жанашырлығыңызды ерекше сезінді» деп ризашылығын білдіреді.
Даңқты жырау, Қазақстанның еңбек сіңірген қайраткері Алмас Алматов «Бабам қазақ: «Ауырып тұрдың – аунап тұрдың» дегендей, дертке шипа тілеймін! Аты жаман науқас артта қалып, жақсы күнге жетіп, еліміздің бұдан әрі дамуын қара орман халқыңыздың Елбасымен бірге көруіне нәсіп етсін!» деп ағынан жарылып, тілек айтады. Қазақстанның Еңбек Ері Абзал Ералиев Сыр дихандарының атынан: «Бұл сынақты жеңіл еңсереді деп сенеміз және әрқашан деніңізге саулық тілейміз» деп шынайы ниеттестік танытса, мемлекет және қоғам қайраткері, ҚР ҰҒА академигі Бақберген Досманбетов: «Сіз салған сара жол арқылы халқымыз кез-келген қиындықты еңсеретініне сенімім мол!» жылы лебізін арнаған.
Мәнерлеп сырғанаудан әлем чемпионатының күміс жүлдегері, еліміздің еңбек сіңірген спорт шебері Элизабет Тұрсынбаева: «Бүгінгі күні әлемді шарпыған індеттің Өзіңізге де жеткені туралы хабар мені де бей-жай қалдырмады» деп жанашырлық білдіреді. Ал ауыр атлетикадан әлемнің төрт дүркін чемпионы Илья Ильин: «Өзіңізді арқаңызда Қазақстан өсіп-өркендеп келеді» ризашылығын аңғартса, Қазақстанның еңбек сіңірген өнер қайраткері, композитор Кеңес Дүйсекеев: «Ел үшін жасап жүрген ұлан-ғайыр еңбегіңізді, шекарамызды бекітудегі тынымсыз тірлігіңізді жоғары бағалайтын әр қазақ Сіздің сауығып шығуыңызға тілектес» деп ой толғайды. 
Сондай-ақ, Арал өңірінің балықшылары атынан Қазақстанның бұрынғы Балық шаруашылығы министрі, мемлекет қайраткері Құдайберген Саржанов,денсаулық сақтау саласының ардагері Тұрғанбай Маханов Тұңғыш Президентке жанашырлық танытып, тілектерін арнаған. Елімізге танымал өнер саңлақтары – әнші-композитор Жеңіс Сейдуллаұлы, айтыскер ақын, композитор Елена Әбдіқалықова, «Алтын домбыра» жүлдесін екі мәрте иеленген айтыскер ақын Мұхтар Ниязов руханият саласын үнемі қолдап келе жатқан Нұрсұлтан Назарбаевқа аман-саулық тілеген. Сонымен қатар, өңір құрылысшыларының атынан «Бақ-Береке» ЖШС директоры Қайрат Ерназаров, осыдан отыз төрт жыл бұрын Тұңғыш Президент Сыр еліне сапармен келген күні өмірге есік ашқан Нұрсұлтан Әбілдаев ақжарқын ой-пікірлерін арнаған. Елбасынан тезірек сауығып кетуіне «ПетроҚазақстан Құмкөл Ресорсиз» акционерлік қоғамы, Қорқыт Ата атындағы Қызылорда мемлекеттік университеті, Қазалы аудандық теміржол саласы ұжымдары да шын көңілден ниеттестік білдірген. 
«Ол – рухы мықты адам. Оның бүкіл өмірі күреске толы, сондықтан, бұл сынақты да жеңіл еңсереді деп сенемін» деп Мемлекет басшысы Қасым-Жомарт Кемелұлы Тоқаев айтқандай, Сыр елі үнемі сергектікті серік етіп келе жатқан Елбасының бұл сынақтан да аман-есен өтетіне еш күмәнданбайды. Бір кезде күллі қазақ жұртының астанасы болған өңірді «Сыр – Алаштың анасы»деп атаған Нұрсұлтан Әбішұлының денсаулығы мықты болуына халқымыз әрдайым тілектес.

Қызылордалықтар Елбасының саулығын тіледі

<a href="https://kyzylorda-news.kz/">Kyzylorda-news.kz.</a> Өткен жылдың қазан айында Жаңақорған ауданы, Бесарық ауылдық округіне қарасты «Пәзілбек Қажы» шаруа қожалығында Қаратау бөктерінде 80 гектар жерге күздік бидайдың “Казахстанская-10” сорты егілді. 18 маусым күні институт ғалымдары мен шаруашылықтың жасаған нәтижелі жұмыстарын көру үшін облыс шаруашылықтары арнайы келді. Сонымен бірге күздік бидайға орақ түсу рәсімін ресми тамашалады. Тың технологияның тегеуріні ынталыларды бір серпілтті.
Себуге дайындалған тұқым сауықтыру мақсатында Cабақтас, Аминопул препараттарымен өңделді және тұқым көпжылдық аквагель ылғал жинағыш, ылғал сақтағышымен бірге себілді.
Казахстанская-10 сорты – жұмсақ, күздік немесе жаздық бидай есебінде егуге болатын, орташа мерзімде піседі. Жатып төгіліп қалуға төзімді. 1000 дәннің массасы 33-43 г. Лютесценс бағалы бидай тобына жатады. Сорт ауруларға төзімді. 
Сонымен қатар тұздылыққа шыдамды. Биіктігі кем дегенде 75 см. Дәндегі ақуыздың мөлшері – 13%, әлеуетті өнімділігі – 28,0-80,0 ц/га. Алматы облысының суармалы жерінде гектарына 80 ц өнім берген. 
Күздік бидай жиналып болысымен екінші дақыл ретінде кәдімгі тары, қант құмайы немесе сүрлемдік жүгері дақылдары егіледі.
Жобаның экономикалық тиімділігі
Қалыптасқан технологиямен күздік бидайды өсіргенде гектарына 117 250 теңге қаржы жұмсалды, ал өнімділік 15,0 центнерді алу жоспарлануда. Ал аквагелді қолданғанда гектарына 130 137 теңге жаратылды, тиісінше өнім 25,0 центнер болса, қалыптасқан технология бойынша өсірген күздік бидай егісінен гектарына 12375 теңге шығын келсе, аквагель қолдану нәтижесінде 44 662 теңге таза пайда келу керек.
<img src="https://kyzylorda-news.kz/wp-content/uploads/2020/06/fb_img_1592557608732-1.jpg" alt="" />
<img src="https://kyzylorda-news.kz/wp-content/uploads/2020/06/fb_img_1592557612528-1.jpg" alt="" />

Қызылордада күздік бидайға орақ түсті

<a href="https://kyzylorda-news.kz/">Kyzylorda-news.kz.</a> ҚР Сыбайлас жемқорлыққа қарсы іс-қимыл агенттігінің 1-ші департаментінің аса маңызды істер жөніндегі тергеушісі Данияр Бекайдаров елімізде жемқорлықтың өршіп бара жатқанын мәлім етті, деп хабарлайды <a href="https://www.inform.kz/kz/kazakstanda-zhemkorlyk-faktileri-kobeyip-barady-agenttik_a3663750">ҚазАқпарат. 
</a>
«2017-2019 жылдары және 2020 жылдың алғашқы бес айында сыбайлас жемқорлыққа қарсы іс-қимыл агенттігінің қызметкерлері пара беруге қатысты мыңға тарта қылмысты тіркеді. Сонымен бірге кейінгі үш жылдағы динамика пара берушілерге қатысты фактілердің өскенін көрсетіп отыр. Мәселен бұл бағытта 2017 жылы 255, 2018 жылы 232, 2019 жылы 342 қылмыс анықталса, ал 2020 жылдың алғашқы бес айында 172 қылмыс тіркелген. Енді статистиканы салыстыра беріңіз: 2018 жылы пара берушілерге қатысты 232 қылмыс тіркелсе, бір жылдан кейін бұл қылмыс саны 342-ге дейін артқан», – деді Данияр Бекайдаров агенттіктің бүгінгі «Антикор LIVE» айдарында. 
Осы аралықта Қазақстанда пара бергені үшін 586 адам сотталыпты. Олардың 154-і бас бостандығынан айырылса, 377-і айыппұл арқалаған. Тағы 67 адамның бас бостандығы шектелген. 
<blockquote>
 _«Биыл пара үшін қылмыстық жауапкершілікке тартылған азаматтардың бестен бірі, яғни 20 пайызы мемлекеттік қызметкерлердің өзі. Олар сотталудан бөлек мемлекеттік қызметтен босатылған және мемлекеттік қызметте өмір бойы жұмыс істеу құқығынан айрылған азаматтар. Талдау жұмыстары көрсетіп отырғандай пара берушілердің көбі – жеке компаниялардың өкілдері. Олар лауазымды адамдарды сатып алу арқылы өз кәсібін жүргізгісі келеді, мемлекеттік сатып алу бойынша атқарылған жұмысқа қол қою үшін осындай іске барады», – деді ол. 
 _
</blockquote>
Данияр Бекайдаров сөзін нақты мысалдармен шегелей түсті. 
Оның айтуынша, Алматыда ЖШС өкілдерінің біріне қатысты қылмыстық іс қозғалған. Ол келісімге сәйкес соманың бес пайызын (33 млн теңге) Қарасай ауданы әкімінің орынбасарына берген. Ақшаны жалпы қамқорлық үшін ұсынған. 
<blockquote>
 «Осыған ұқсас қылмыс бойынша елордада «Ақжайық Электро» ЖШС директоры жазаланып, оған 71 040 000 теңге айыппұл салынды. Ол Алматы ауданы әкімінің бұрынғы орынбасарына (3 жылға бас бостандығынан айырылған) жалпы қамқорлығы мен орындалған жұмыс бойынша жұмыс актісіне қол қойып беруі үшін 5 млн теңге пара берген», – дейді Данияр Бекайдаров.
</blockquote>

Қазақстанда жемқорлық фактілері көбейіп барады

<a href="https://kyzylorda-news.kz/">Kyzylorda-news.kz.</a> Қызылорда облысында коронавирус инфекциясының таралуы күн сайын артып барады.
Соңғы күндері әр тәулікте тіркелген науқастардың саны 40-тан асуда. Ахуалдың күрделенуіне байланысты облыс прокурорының өкіміммен облыс әкімдігімен бірлесіп жергілікті атқарушы және уәкілетті органдардың басшыларынан тұратын өңірлік мониторингтік топ құрылды. Одан бөлек қала, аудан орталықтарында 32 мониторингтік топ жұмыс атқарып, күнделікті рейдтік іс-шаралар жүргізілуде.
Олардың міндеті карантин уақытында базарлар, қоғамдық тамақтану орындары, дүкендер және тағы да басқа қызмет көрсету орталықтарында санитарлық талаптардың сақталуына бақылау жүргізу. 18 маусым күні өңірлік мониторингтік топ жетекшісі облыс прокурорының орынбасары Д.Катаев, облыстың бас санитариялық бас дәрігері А.Әбдіқайымова және Қызылорда қаласы әкімінің орынбасары Б.НуриддиновҚызылорда қаласындағы «Отырар» сауда үйін аралап, сауда үйінің басшылығына сатушы қызметкерлермен бет пердесіз, қолғапсыз жұмыс істеп жатқаны, төменгі қабатта желдету жүйесінің жұмыс істемейтіні туралы ескертілді. Өз кезегінде «Отырар» сауда үйі басшылығы кемшіліктерді жоятынын, ол үшін 2 күнге сауда үйінің төменгі қабатын жабатынын жеткізді. Бүгінгі күнге дейін топтармен 7920 нысан тексерілді. Оның 4566-на ескерту парақтары берілді.
Бұл нысандарда ара қашықтық сақталмайды, қызметшілер бет пердесіз, қолғапсыз жұмыс істеп жатқаны анықталды. Мәселен, «Small» сауда үйінде 2 кассирдің қолғапсыз халыққа қызмет жасап тұрғаны анықталып, топпен тиісті құжаттар рәсімделіп, Әкімшілік құқық бұзушылық туралы кодексінің 462-бабының 3-бөлігімен негізінен қарау үшін сотқа жолданған. Жалпы 10 тұлғаға қатысты әкімшілік хаттама толтырылып, сотқа жолданды. Мониторингтік топтармен шектеу және қауіпсіздік шараларының сақталуына бағытталған рейдтік шаралар жалғаса береді.

Қызылордада коронавирусқа қарсы бақылау күшейтілді

<a href="https://kyzylorda-news.kz/">Kyzylorda-news.kz.</a> Қызылодада 12 маусымнан бастап жылу маусымына дайындық басталды. Жоспарға сәйкес, 1 қазанға дейін жұмыстар аяқталып, 15 қазанда жылу мауысымын іске қосу көзделуде.
Қазіргі таңда Қызылорда қаласына жылу тарататын 186 шақырымдық желілердің 42 пайызының тозығы жеткен. Осы орайда, «Жұмыспен қамтудың жол картасы» мемлкеттік бағдарлама аясында 7 нысан бойынша құбырлар ауыстырылады. Сондай-ақ, 200-ге жуық қызылордалық жұмыспен қамтылып отыр.

Қызылордада жылу маусымына дайындық жұмыстары жүргізілуде

<a href="https://kyzylorda-news.kz/">Kyzylorda-news.kz.</a> Бүгін Үкімет отырысында ҚР Премьер-Министрі Асқар Мамин 1 апта ішінде коронавирус инфекциясының таралуына қарсы күрес бойынша жаңа шараларды дайындауды тапсырды, деп хабарлайды <a href="https://www.inform.kz/kz/kazakstanda-bir-apta-ishinde-koronaviruska-karsy-zhana-sharalar-dayyndalady_a3663572">ҚазАқпарат.</a> 
<blockquote>
 «Өткен жылдың осындай кезеңімен салыстырғанда биыл жұқпалы аурулардың 57 түрі бойынша науқастану төмендеді. Оның ішінде, менингит – 3,5 есе, қызылша – 2,8 есе, сальмонеллез – 2,1 есе азайды. Бес айдың ішінде 1,4 млн адамға жұқпалы ауруларға қарсы профилактикалық екпе жасалды. Бұл егілуге тиіс адамдардың 92 пайызын құрайды», – деді ол. 
</blockquote>
Үкімет басшысының айтуынша, коронавирус инфекциясына қатысты жағдай күрделі күйінде қалып отыр. Соңғы екі аптада барлық дерлік өңірде науқастар саны көбейді. 
<blockquote>
 «Осыған орай, Мемлекет басшысының тапсырмасы бойынша, Ведомствоаралық комиссияның кешегі шешімімен алдағы демалыс күндері бірқатар ірі қалаларда және тұрғындарының саны 50 мыңнан асатын барлық өңірлердің елді мекендерінде қосымша шектеу шаралары енгізілді. Бұл шешім нақты орындалуы қажет. Әкімдіктер санитарлық нормалар мен қоғамдық жерлерде әлеуметтік арақашықтықтың қатаң сақталуына ерекше назар аударуы тиіс. Денсаулық сақтау министрлігіне әкімдіктермен бірлесіп, коронавирус инфекциясының таралуына қарсы күрес бойынша жаңа шаралар кешенін бір апта ішінде дайындауды тапсырамын. Әрбір өңірдегі жағдайды ескере отырып, іске асырылатын шараларды өзгерту бойынша жедел шаралар қабылдансын», – деді Асқар Мамин.
</blockquote>

Қазақстанда бір апта ішінде коронавирусқа қарсы жаңа шаралар дайындалады

<a href="https://kyzylorda-news.kz/">Kyzylorda-news.kz.</a> Байқоңыр қаласында коронавирустан алғаш адам өлімі тіркелді. 
«Ресейлік «Байқоңыр» ФМБА кешені аймақтық басқармасының мәліметі бойынша, 2020 жылғы 18 маусым сағат 16:00-дегі жағдай: Байқоңыр қаласында вирус жұқтырғандар саны – 56; ауруханадан шыққандар саны – 10; амбулаториялық емдеуге жіберілгендер саны – 7; қайтыс болғандар саны – 1″, – делінген COVID-19 таралуы туралы анықтамада. 
Қайтыс болған адамның ғарыш айлағында жұмыс істеген-істемегені туралы мәлімет жоқ. 
18 маусымдағы жағдай бойынша, Қазақстанда коронавирустан 105 адам қайтыс болған.

Байқоңырда коронавирустан бір адам көз жұмды

<a href="https://kyzylorda-news.kz/kogam/qyzylorda-oblysynda-taghy-bir-kuen-jelektrostancijacy-salynady-67957/">Kyzylorda-news.kz.</a> Өңірде «Жұмыспен қамту жол картасы» бағдарламасы аясында 9299 адамды жұмыспен қамту жоспарланды. Бұл туралы Өңірлік коммуникациялар қызметінің ақпараттық алаңында өткен брифингте облыстық жұмыспен қамтуды үйлестіру және әлеуметтік бағдарламалар басқармасының басшысы Талғат Дүйсебаев мәлімдеді.
<blockquote>
 «Халықты жұмыспен қамту мақсатында 2020 жылға арналған кешенді жоспар қабылданды. Жоспар аясында барлық мемлекеттік, салалық бағдарламалар аясында ашылатын жұмыс орындары, жұмыспен қамтудың белсенді шараларына тартылатындар және «Жұмыспен қамту Жол картасы» аясында ашылатын жұмыс орындары қамтылған. Яғни, биыл мемлекеттік бағдарлама аясында 276 жоба жүзеге асырылуда. Қазіргі таңда оның 248 жобасы бойынша 3536 адам жұмысқа қабылданып, оның 2676-сы жұмыспен қамту орталығы арқылы орналасты»,-деді Талғат Тұрсынұлы.
</blockquote>
Сондай-ақ, мемлекеттік және салалық бағдарламалар аясында&nbsp; жаңа жұмыс орындары мен бос жұмыс орындарына 26 523 адам жоспарланып,&nbsp; нақты 5 264 адам жұмыспен қамтылды.
Бағдарлама қатысу үшін алдын ала жұмыссыз тұлға ретінде жұмыспен қамту орталығына хабарласып, тіркелу қажет.

«Жұмыспен қамту жол картасы» аясында 276 жоба іске асырылады

<a href="https://kyzylorda-news.kz/">Kyzylorda-news.kz.</a> Қызылорда облысы күн белсенділігі бойынша республика көлемінде көшбасшы болып табылады. Табиғаттың ерекше сыйын ескере отырып, өңірде жаңартылатын электр энергиясының көздерін дамытуға үлкен көңіл бөлінуде. Облыстағы күн сәулесінің орташа жылдық ұзақтығы 3 мың сағаттан артық. Бұл күн электр станцияларын салу және дамыту үшін үлкен әлеует. 
Бүгінде Ұлыбритания, Франция және Болгариялық инвесторлардың қатысуымен облыста жалпы құны 47 млрд.теңгеніқұрайтын жаңартылатын энергия көздері бойынша 3 жоба жүзеге асырылуда. Олардың екеуіжұмысын өткен жылыбастады. 
Атап айтсақ, Жалағаш ауданындағы қуаты 28 МВт КЭС құрайтын күн электростанциясының құрылыс жұмыстарын «Total Eren» француз компаниясы жүргізсе, Шиелі ауданындағы станцияның құрылыс жұмыстары британдық «Baikonyr Solar» компания арқылы жүргізілді. Бұл күн электростанцияның қуаты – 50 МВт СЭС. 
Сонымен қатар, ағымдағы жылдың соңына дейін болгариялық «HydroEnergy» компаниясы жалпы құны 3,2 млрд. АҚШ долларын құрайтын күн электр станциясының құрылысын аяқтап, пайдалануға беруді жоспарлап отыр. Электр энергиясын өндірудің жылдық жоспарлы көлемі шамамен сағатына 19 млн. кВт* құрайтын болады.
Бұл жоба Жаңақорған ауданында жүзеге асырылуда. 
Мемлекетіміз шетелдік инвесторларға бірқатар жеңілдіктер ұсынып отыр, бұлкедендік баж салығынан босату, мемлекеттік заттай гранттар, салықтар бойынша преференциялар, инвестициялық субсидиялар беру. Ал облыс әкімдігі инвесторларға жан-жақты қолдау көрсетуге және ынтымақтастық құруға әрқашан дайын.
<a href="https://kaz.nur.kz/1861092-kyzylorda-oblysynda-tagy-bir-kn-elektrostanciacy-salynady.html">kaz.nur.kz</a>

Қызылорда облысында тағы бір күн электростанцияcы салынады

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Гүлшара Әбдіқалықова Қазалы ауданы, Ү.Түктібаев ауылының тұрғындары үшемнің ата-анасы атанған Қуаныш Алтынбаев пен Әйгерім Махамбетжанованы қуаныштарымен құттықтап, отбасына сый-сияпат тарту етті. 
Өңір басшысының сәлемдемесін Қазалы ауданының әкімі Мұрат Ергешбаев табыстады. Аудан басшысы сәбилердің дені сау, ғұмыры ұзақ болсын деген тілегін жеткізді. 
Үшемдердің әжесі Батыр ана Кәмпит Алтынбай облыс әкімі Гүлшара Әбдіхалықоваға алғысын жеткізді. 
Естеріңізге сала кетейік, елімізде «Егіздер ауылы» атымен танымал Ү.Түктібаев ауылында 23 егіз, 2 үшем дүниеге келген.

Гүлшара Әбдіхалықова үшемнің ата-анасын құттықтады

<a href="https://kyzylorda-news.kz/">Kyzylorda-news.kz</a>. 2020 жылдың 1 маусымынан бастап Армения Республикасынан әкелінген көліктерді тіркеу басталды. Бұл ретте Армениядан тек 2020 жылдың 1 ақпанына дейін әкелінген автомобильдер ғана тіркеуден өткізіледі.
Көліктерді есепке қою осы жылдың 1 маусымынан 1 қыркүйегіне дейін жүргізілуде. Тіркеуге тек басқару жүйесі сол жаққа орналасқан автокөліктер жатады. 
Аудандық полиция бөлімінің әкімшілік полиция бөлімшесінің бастығы, полиция майоры Сейілхан Кеукеновтың айтуы бойынша автокөлік иелері үш түрлі төлем жасау керек. Бұл тіркеу жарнасы – 695 теңге, тіркеу куәлігі үшін төлем – 3 473 теңге, нөмір үшін төлем – 7 778 теңге (барлығы 11 946 теңге). Сондай-ақ уақытша тіркеу үшін көлік иесінің жеке басын куәландыратын құжат, 0,25 АЕК мөлшерінде мемлекеттік бажды және мемлекеттік бажды төлегені туралы түбіртектер, көлік құралы және мемлекеттік тіркеу нөмір белгісін тіркеу туралы армян куәлігі және басқару құралы оңнан солға ауыстырылған жағдайда автомобильдің қауіпсіздік сертификаты (СБКТС) болуы тиіс. 
Мемлекеттік немесе орыс тілдерінен басқа тілде жасалған құжаттар аударылып, нотариустың немесе осындай әрекеттерді жасауға уәкілеттік берілген басқа адамның қолымен куәландырылуы керек. 
B әрпі бар 18-аймақтың сары нөмірлері армян автомобильдеріне беріледі. Құжатта уақытша тіркелген көлікке тіркеу куәлігін берген кезде «Арнайы таңбалар» бөлімінде «бұл басқа адамға тіркеуге жатпайды» деп жазылған. 
Қазіргі таңда аудан бойынша Армения Республикасынан әкелінген 7 автокөлік иесіне түсіндірме жұмыстары жүргізіліп, көліктерді есепке қою тәртібі түсіндірілсе, 1 тұрғын мамандандырылған халыққа қызмет көрсету орталығына қажетті құжаттарды ұсына отырып, мемлекеттік баж төлемдерін төлеу арқылы тіркеді.

Қазақстан және Қызылорда облысының жаңалықтары