<a href="https://kyzylorda-news.kz/">Kyzylorda-news.kz</a>. Қарулы Күштерде үш жарым мыңнан астам жауынгерартиллеристердің қатысуымен мамандық бойынша даярлау басталды. Сабақты өткізу кезінде қару-жарақтың жаңа түрлерін қолдануға баса назар аударылады.
Артиллерия – соғыс құдайы. Бұған қазіргі қарулы қақтығыстарда оны қолдану дәлел бола алады. Қазіргі заманғы ұрыс жағдайында іс-қимыл жасау үшін жаппай атыс құралдары жаңа технологиялармен күшейтілуде.
Бүгінгі таңда Қазақстан Қарулы Күштерінің артиллерия бөлімшелері заманауи барлау құралдарымен, барлау, батареяға қарсы күрес құралдарымен және атысты басқару кешендерімен жарақтандырылды. Олар қаруды қолдану тиімділігін арттыруға мүмкіндік береді. Әскерлерде «Атлас», «Skylark-1leх» ҰҰА оптикалық-электронды барлау құралдары, «Платформа» радиолокациялық станциялары бар. Олардың мақсаты – жаудың маңызды нысандарын уақтылы анықтау.
Автоматтандырылған деректер беру жүйесі арқылы артиллериялық барлау құралдарын, артиллериялық зеңбіректермен біріктіру барлаудың атыс тізбегін құрайды.
Бұл ретте жердегі бақылауды жүзеге асыратын, қарсыластың атыс позицияларының мәліметтерін анықтайтын, оларды автоматты режимде басқару пунктіне беретін, содан кейін нысананы артиллериялық зеңбіректер дереу көзін жоятын «Платформа» РЛС батареяға қарсы ұрыс құралы ерекшеленеді.
Өндірушінің ресми өкілінің айтуынша, «Платформа» адамнан 10 шақырым қашықтықтағы көлік ұшағына дейін 50 шақырым қашықтықтағы кез-келген нысанды анықтай алады. Сондай-ақ, ол 3,5-тен 15 шақырымға дейінгі қашықтықта атыс батареяларының, реактивті снарядтардың және ұшқышсыз ұшу құралдарының атыс ұстанымдарын анықтай алады.
«Платформа» РЛС артиллериялық бөлімшелер іс-қимылының жоғары тиімділігін қамтамасыз ететін «Айбалта-2019», «Шығыс-2019» және «Алдаспан-2020» ауқымды оқу-жаттығуларында және дивизиялық тактикалық оқу-жаттығуларда сәтті қолданылды.
Алдағы уақытта алыс қашықтықты анықтайтын жердегі радиолокациялық барлау кешенін сатып алу жоспарланып отыр. Сонымен қатар, жуырда қару-жарақ құрамындағы қаруды басқару кешендері жаңартылатын болады. Бүгіннің өзінде оларды жетілдіру үшін ғылыми-зерттеу мен құрастыру тәжірибе жұмыстары жүргізілуде.
<img src="https://kyzylorda-news.kz/wp-content/uploads/2020/12/1-1-scaled.jpg" alt="" />
<img src="https://kyzylorda-news.kz/wp-content/uploads/2020/12/2-1.jpg" alt="" />
<img src="https://kyzylorda-news.kz/wp-content/uploads/2020/12/4-scaled.jpg" alt="" />

Артиллерия: Жердегі барлаудың жаңа мүмкіндіктері

<a href="https://kyzylorda-news.kz/">Kyzylorda-news.kz</a>. Бұқаралық ақпарат құралдарында фото және бейнематериалдарды пайдалану үшін сайлау учаскесіндегі адамнан келісім талап етілмейді. Бұл туралы Орталық сайлау комиссиясының отырысында комиссия мүшесі Серік Сыдықов айтып өтті, деп хабарлайды <a href="https://lenta.inform.kz/kz/osk-bak-ta-foto-zhane-beynematerialdardy-paydalanu-ushin-saylau-uchaskesindegi-adamnan-kelisim-talap-etilmeydi_a3728631">ҚазАқпарат</a>.
Серік Сыдықовтың айтуынша, сайлау уақытында жұмыс жүргізу үшін бұқаралық ақпарат құралдарының өкілдеріне жеке куәлігі мен редакцияның тапсырмасы ғана керек. «БАҚ туралы» заңның 14-бабының 1-1-тармағына сәйкес бұқаралық ақпарат құралдарына материалдарды дайындау, жариялау, қайта шығару және тарату кезінде мынадай жағдайларда бейнеленетін адамның келісімі талап етілмейді:
– егер осы адам ойын-сауық мәдени-бұқаралық, мәдениет саласында әлеуметтік маңызы бар, спорттық-бұқаралық іс-шараларға, бейбіт жиналыстарға және өзге де жария іс-шараларға қатысса немесе араласса;
– егер таратылатын ақпаратта адамның бейнесі және осы адамның қызметтік және жария қызметіне байланысты мәліметтер қамтылса, оны адамның өзі, оның заңды өкілі немесе уәкілетті адам қолжетімділігі шектелмеген көздерде жарияласа.

ОСК: БАҚ-та фото және бейнематериалдарды пайдалану үшін сайлау учаскесіндегі адамнан келісім талап етілмейді

<a href="https://kyzylorda-news.kz/">Kyzylorda-news.kz</a>. Бүгін Мемлекет басшысы Қасым-Жомарт Тоқаевтың қатысуымен онлайн режимінде «Алтын сапа» сыйлығын табыстау салтанаты өтті. Әр облыстың аймақ басшылары шараға вкс режимінде қатысты. Президент жиында «Алтын сапа» сыйлығын табыс ету отандық кәсіпкерліктің дамуына елеулі үлес қосқан бизнес сектордың орны ынталандыру әрі қолдаудың жолы екенін атап өтіп, үздіктерді құттықтады.
Жиында іріктеу сынынан өткен кәсіпорындар «Өндірістік мақсаттағы үздік кәсіпорын», «Халыққа арналған тауар шығаратын үздік кәсіпорын», «Қызмет көрсететін үздік кәсіпорын», «Ауылшаруашылық өнімдерін шығарушы үздік кәсіпорын» номинацияларын иеленді. Сондай-ақ, «Ұлы дала елі», «Іскер», «Бизнес кемелділік» аталымында үздіктер анықталды.
Президенттің «Алтын сапа» сыйлығында Сыр елінің екі кәсіпорны арнайы номинация иеленді. «Іскер» аталымы «Абай Дәулет» ЖШС-іне бұйырды. Қазақстан кәсіпкерлерінің құқықтарын қорғау жөніндегі уәкіл Рустам Жүрсінов кәсіпорын басшысы Мұрат Сәрсенбаевқа арнайы марапатты табыстап, құрмет көрсетті.
Айта кету керек, «Абай Дәулет» ЖШС 2016 жылдан бері Қызылорда облысының аумағында өнім өндіру бағытында қызмет етіп келеді. Серіктестік күріш өсіру, бау-бақша өсіру және қой өсірумен айналысады. Өндіріс жанынан жаңа күріш ақтау зауыты ашылған. 80 адамды тұрақты жұмыспен қамтитын әлеуетті зауыт күріш жармасы нарығының ұлғаюына зор үлес қосуда. Кәсіпорын басшысы Мұрат Сәрсенбаев «Жомарт жүрек» азаматы атанып, «Жыл меценаты» номинациясымен марапатталған.
Салтанатты жиында өнімнің сапасы мен қызмет көрсету саласындағы жетістіктері үшін берілетін ТМД сыйлығы Қызылорда облысына бұйырды. «Азық-түлік тауарлар және ауылшаруашылық өнімдер өндірісі» атылымы «Абзал және К» толық серіктестігі лайық деп табылды. Жүлдені Сауда және интеграция министрі Бақыт Сұлтанов табыстады.
«Абзал және К» компаниясы жылына таза ақталған 25 мың тонна күріш өндіреді. Оның 50 пайыздан астамы Ресей, Украина, Тәжікстан, Өзбекстан, Моңғолия елдеріне экспортқа шығарылады. Компания күріш өндірушілердің үздік үштігінің қатарында. Мұнан өзге бизнестің әлеуметтік жауапкершілігі аясында компания биылдың өзінде 54 жаңа жұмыс орнын ашып, жалпы 400-ден астам адамды жұмыспен қамтып отыр.
Облыс әкімі Гүлшара Әбдіқалықова үздіктер қатарынан көрінген Сыр елінің кәсіпкерлерін жеңісімен құттықтап, сәттілік тіледі. Еске сала кетейік, Президенттің «Алтын сапа» сыйлығы 2016 жылдан бері үздіктерге табысталып келеді. Осы кезге дейін байқауға республикадан 2200 астам кәсіпорын қатысқан.
<img src="https://kyzylorda-news.kz/wp-content/uploads/2020/12/130856950_2964656930304023_2813572381770519833_o.jpg" alt="" />

«Алтын сапа» сыйлығында Сыр елінің екі кәсіпорны арнайы номинация иеленді

**<a href="https://kyzylorda-news.kz/">Kyzylorda-news.kz</a>. Қазақстанда 2021 жылғы 1 қаңтардан бастап мемлекеттік ұйымдардың 38,5 мыңнан астам әлеуметтік қызметкерінің жалақысы өседі, *деп хабарлайды ҚР Еңбек және халықты әлеуметтік қорғау министрлігінің баспасөз қызметі.***
Бұл мақсатқа республикалық бюджеттен алдағы үш жылға шамамен 95 млрд теңге бөлінеді.
Жалақыны көтеру өз қызметін стационарлық (қарттар мен мүгедектерге арналған үйлер) және жартылай стационарлық үлгідегі медициналық-әлеуметтік мекемелерде (бұдан әрі – МӘМ) (күндіз болу бөлімшелері, оңалту орталықтары), уақытша болу мекемелерінде (белгілі бір тұрғылықты жері жоқ адамдарға, тұрмыстық зорлық – зомбылық құрбандарына арналған оңалту орталықтары) жүзеге асыратын негізгі персонал (әлеуметтік қызметкерлер) мен басшы құрамға, сондай-ақ үйде қызмет көрсететін әлеуметтік қызметкерлерге қатысты болады.
Нәтижесінде 2021 жылғы 1 қаңтардан бастап лауазымдық жалақыны ұлғайту жолымен әлеуметтік қызметкерлер үшін жалақы 1,5 есеге, 2022 жылғы 1 қаңтардан бастап ағымдағы мәннен 1,75 есеге, ал 2023 жылы 2 есеге өседі.
Сонымен қатар, МӘМ әкімшілік және көмекші қызметкерлерінің жалақысын лауазымдық жалақыға қосымша ақыны 30-дан 40% – ға дейін арттыру арқылы көтеру жоспарлануда.
Қызмет көрсетілетін контингенттің ерекшелігін ескере отырып (жалғызілікті қарттар, мүгедек адамдар, оның ішінде ересектер мен психоневрологиялық аурулары бар, тірек-қимыл аппараты бұзылған балалар) әлеуметтік қызметкерлерден жоғары психоэмоционалдық дайындық, күтім және үздіксіз бақылау, оңалту рәсімдерін жүргізу талап етіледі.
<blockquote>
 «Бұл жыл барлығына қиын болды. Біздің әлеуметтік қызметкерлер мекемелерде іс жүзінде тұрды, ерекше контингентпен жұмыс жасады. Біз олардың еңбегін бағалаймыз және олардың маңыздылығын түсінеміз. Бұл шара әлеуметтік салаға мамандарды тартуға, қызметкерлердің тапшылығын азайтуға және кадрлық жағдайды тұрақтандыруға мүмкіндік береді деп үміттенеміз», – деп атап өтті ҚР Еңбек және халықты әлеуметтік қорғау министрі Біржан Нұрымбетов.
</blockquote>

1 қаңтардан бастап әлеуметтік қызметкерлердің жалақысы өседі

<a href="https://kyzylorda-news.kz/">Kyzylorda-news.kz</a>. Қызылорда қаласына жұмыс сапарымен Корея Республикасының Алматы қаласындағы Бас консулы Ким Хынг Су, сондай-ақ делегация құрамында Кореяның вице-консулы Хван Гю Тэ келді. Консул Кореяның Халық Қаһарманы Хон Бом До мемориалдық кешеніне барып, Хон Бом До мен Ге Бон У ескерткіштеріне гүл шоқтарын қойып, тағзым етті.
Биыл корей халқының даңқты батыры Хом Бом Додың туғанына 152 жыл толды. Өз елінің нағыз патриоты, аты аңызға айналған тарихи тұлға, ол құрған әскерлер жапон басқыншыларына қарсы соғысып, кейінірек Ресейдің Қиыр Шығысында Кеңес өкіметін орнатуға қатысты.
1937 жылы Хон Бом До корей этносының басқа өкілдерімен бірге Қиыр Шығыстан Қызылордаға жер аударылды. 1943 жылы қайтыс болып, Қызылордаға жерленді. Қазіргі уақытта қалада «Хон Бом До» мемориалдық кешені, батыр атындағы қор және көше бар.
Сондай-ақ, Корея консулы Ким Хынг Су ағымдағы айда 5 жасқа толатын Қызылорда Достық үйінде болып, облыстық Қазақстан халқы Ассамблеясы тарихындағы маңызды оқиғаларды бейнелейтін фотогалереямен танысты.
Консул «Қазақстан корейлері қауымдастығы» облыстық қоғамдық бірлестігінің кабинетінде болып, оның төрағасы Елена Ким корей этносының фотосуреттерін, тұрмыстық заттарын және корей тіліндегі кітаптарын көрсетті.
Сондай-ақ, Корея консулының сапар бағдарламасында Ә.Тәжібаев атындағы облыстық кітапханада «Хангыль Хаккё» орталығының корей тілі оқытушылары мен Қорқыт ата атындағы Қызылорда университетінің ректоры Бейбіткүл Кәрімовамен кездесу жоспарланған.
<img src="https://kyzylorda-news.kz/wp-content/uploads/2020/12/mw6a2792-scaled.jpg" alt="" />
<img src="https://kyzylorda-news.kz/wp-content/uploads/2020/12/mw6a2832-scaled.jpg" alt="" />
<img src="https://kyzylorda-news.kz/wp-content/uploads/2020/12/mw6a2788-scaled.jpg" alt="" />
<img src="https://kyzylorda-news.kz/wp-content/uploads/2020/12/mw6a2812-1-scaled.jpg" alt="" />

Корея консулы жұмыс сапарымен Қызылордаға келді

<a href="https://kyzylorda-news.kz/">Kyzylorda-news.kz</a>. Байқоңырдағы ресейлік мектептердің сабақ кестесіне “Қазақ тілі мен әдебиеті” және “Қазақстан тарихын” кіргізу үшін Ресей рұқсатын алу керек, деп хабарлайды&nbsp;<a href="https://newsroom.kz/">Newsroom.</a>
<blockquote>
 “Байқоңырдағы жеті мектепте сабақ бағдарламасы Ресейдің білім беру стандартына сай жүргізіледі. Аталған оқу орындарында қазақстандық оқушылар да білім алуда.
 Олар ертеңін осы елмен байланыстырады. Сондықтан да Қазақстанның тарихымен танысу, мемлекеттік тілді меңгеру, әдеби мұраларын білу оқушылар үшін аса маңызды міндет. “Қазақ тілі” мен “Қазақстан тарихын” осындағы оқу бағдарламасына енгізу үшін Ресейдің Ағарту министрлігінен рұқсат алу қажет”, – деді Асқар Мәмин.
</blockquote>
Оның атап өткеніндей аталған мәселе білім саласындағы әріптестік туралы Үкіметаралық комиссияның күн тәртібіне енген.
<blockquote>
 “Жиын өткен айдың 10-і күні өтті. Алайда бұл мәселені талқылаудың орайы келмеді. Байқоңыр қаласы бойынша Үкіметаралық комиссиясының алдағы отырысында бөлек талқылаймыз деп шештік”, – дейді премьер.
</blockquote>
Оның айтуынша Байқоңырдағы жеті мектептің біреуін Ресей қарамағынан алып Қазақстан меншігіне беру мәселесі де комиссияның алдағы отырысында егжей-тегжейлі талқыланады.
<blockquote>
 “Мәселені шешу жолдарын үнемі іздестіру үстіндеміз. Ел азаматтарын Қазақстанның білім беру стандартына сай оқыту үшін былтыр Байқоңырдағы №275 мектептің жанынан жалпы саны 80 оқушыны қамтитын 1-4 бастауыш сыныптары ашылды. Бұдан бөлек 20-дан аса тәрбиеленушісі бар орыс тілінде білім беретін мектепке дейінгі ұйымдар құрылды.
 Осы жылы Қызылорда облысының әкімдігі дәл осы №275 мектептің жанынан 5-11 сыныпта оқитын қазақстандық оқушыларға арнап сыныптар ашты. Оқыту процессі біздің елдің білім стандартына сай орыс тілінде өтеді”, – деді Мәмин.
</blockquote>
Айта кетсек бұдан бұрын Байқоңырға барған сенатор Мұрат Бақтиярұлы аймақтағы қазақтілді аудиторияның шағымын Үкіметке жеткізген. Сенатор Байқоңырдағы мектептердің бірін Қазақстанның қарамағына беру туралы мәселе көтерген.
<blockquote>
 “Осындағы Қазақстан азаматтары біздің елдің оқу бағдарламасы негізінде білім алуы тиіс. Мектеп қана емес, балабақша мәселесі де күйіп тұр. Баласын қазақ балабақшасына бергісі келетін азаматтардың арыз-талабын ескеру қажет”, – деген еді Мұрат Бақтиярұлы.
</blockquote>
Сенатор өз сауалында бірнеше деректі алға тарқан.
Мысалы, қазақ тілінде білім беретін Байқоңыр қаласындағы 5 мектепте бүгінгі күні 5 236, ал ресейлік 7 мектепте 4049 бала білім алады. Оның 1 508-і, яғни 37%-ы Қазақстан азаматтарының балалары. Байқоңырда қазір Ресей Федерациясына қарасты 7 мектеп бар. Депутат олардың сыйымдылығы толық қамтылмаған дейді.
Мұрат Бақтиярұлының айтуынша, қала тұрғындарымен кездесу барысында орыс тілінде оқытатын қазақстандық мектепке сұраныстың жоғары екенін ескере отырып, осы 7 мектептің бірін мемлекет меншігіне өткізуді сұрап отыр екен.⠀
Одан бөлек, Байқоңырдың орталық аудандарында Ресей Федерациясының меншігіндегі, сыйымдылығы толық пайдаланылмай тұрған 13 балабақша бар. Сенатор халықтың бірнеше балабақшаны Қазақстан юрисдикциясына өткізу талабы орынды деп санайды.
Сенатор сауалына іле-шала жауап берген Мәмин Ресейдің бұған рұқсат беруі мүмкін екенін, Байқоңырдағы ғимараттың бірінен алда-жалда қазақ балабақшасы ашылып қаларын айтқан.
<blockquote>
 “Аймақта қазақтілді 3 балабақша бар. Әзір Ресейге тиесілі №21 орыс балабақшасын Қармақшы ауданының қарамағына беру мәселесін талқылаудамыз. Ресей бұл ғимаратты босатса, 280 орындық қазақ балабақшасы ашылып қалады”, – деген еді Асқар Мәмин.
</blockquote>
Қазіргі таңда Байқоңырда 16 балабақша бар. Оның үшеуі қазақтілді және Қазақстанның оқу стандартына сай тәлім-тәрбие береді.
<blockquote>
 “Бұларда жалпы саны 2885 бала бар. Оның 2425-і Ресейдің, ал 460-сы Қазақстанның оқу бағдарламасы негізінде білім алуда”, – дейді премьер.
</blockquote>

Байқоңыр: «Қазақ тілін» оқыту үшін Ресейден рұқсат алу қажет

<a href="https://kyzylorda-news.kz/">Kyzylorda-news.kz</a>. Медицина ғылымдарының докторы, профессор, жоғары санатты онколог, Қазақстан онкологтары қауымдастығының мүшесі Райымқұл Қарақұлов онкологиялық ауруға шалдыққандар үшін коронавирус қаншалықты қауіпті екенін айтты, деп хабарлайды <a href="https://lenta.inform.kz/kz/katerli-isigi-bar-naukastar-ushin-koronavirus-kanshalykty-kauipti_a3729025">ҚазАқпарат.</a>
<blockquote>
 «Қатерлі ісікке шалдыққан науқастар коронавирус жұқтырса бұл үлкен проблема. Мұндай пациенттерді емдеу өте қиын. Ең алдымен, қандағы вирусты жою керек, содан кейін қатерлі ісікке қарсы терапия жүргізу қажет. Екі әдіс те адам ағзасына агрессивті. Қазір коронавируспен ауыратын онкологиялық науқастарды қалай емдеу керектігі туралы көптеген зерттеулер бар. Біз емдеу жұмыстарын жүргіземіз. Ең бастысы – профилактикалық режимді сақтау қажет. Атап айтар болсам, қолды жиі жуып, маска тағып жүру керек. Ал медициналық персоналдың міндетті түрде қорғаныш киімін қолданғаны абзал», – деді профессор.
</blockquote>
Сонымен қатар, ол коронавирус инфекциясы онкологиясы бар науқастардың өміріне қауіп төндіретінін атап өтті.
<blockquote>
 «КВИ қатерлігі ісігі бар адамдар үшін қауіпті. Бұл әрине көптеген факторларға байланысты. Мұнда аурудың сатысы мен науқастың жасы да үлкен рөл атқарады. Егер метастаза болмаса, коронавирусты емдеу де жеңіл. Коронавирус инфекциясы аурудың төртінші сатысында пайда болатын жағдайлар да бар. Бұл қиын. Дегенмен емдеп жазуға тырысамыз», – деп толықтырды онколог.
</blockquote>
Бұған дейін, «Қазақ онкология және радиология ғылыми-зерттеу институты» АҚ басқарма төрайымы, ҚР Ұлттық ғылым академиясының академигі, медицина ғылымдарының докторы Диляра Қайдарова коронавирустың қатерлі ісікке шалдыққан науқастарға&nbsp;<a href="https://www.inform.kz/kz/koronavirus-katerli-isikke-shaldykkan-adamdarga-kalay-aser-etedi_a3728896">қалай әсер ететінін</a>&nbsp;айтқан болатын.

Қатерлі ісігі бар науқастар үшін коронавирус қаншалықты қауіпті?

<a href="https://kyzylorda-news.kz/">Kyzylorda-news.kz</a>. Жаңақорған ауданындағы «Премиум Класс-Строй» ЖШС-нің әк зауыты 2018 жылы іске қосылды. Зауытта күніне 100 тонна әк шығарылса, ал жылына 70 мың тонна өндіріледі.
Бүгінде «Бизнестің жол картасы-2025» бағдарламасы аясында инфрақұрылым жүргізу үшін жоба-сметалық құжаты дайындалуда. Яғни, зауыттың жұмысын одан әрі дамыту мақсатында темір жол тұйығын тарту мен электр энергиясын жеткізу керек. Жоба мақұлданса өндіріс көлемі ұлғайып, қосымша 20 жұмыс орны ашылады.

Жаңақорғанда жылына 70 мың тонна әк өндіріледі

<a href="https://kyzylorda-news.kz/">Kyzylorda-news.kz</a>. Күйші-композитор, ақын-жырау, Қазақстанның еңбек сіңірген қайраткері Мұрат Сыдықовтың 80 жасқа толуына орай «Домбыра жүрек жырлайды» атты республикалық онлайн күйшілер конкурсы өткізілген болатын. Бұл сайысқа Қазақстанның әр аймағынан 26 талапкер қатысып өнер көрсетті.
Арал аудандық мәдениет үйінде аталған конкурсты қорытындылауға және жеңімпаздарды марапаттауға арналған мерекелік кеш өтті.
Жиынға облыстық мәдениет архивтер және құжаттама басқармасының басшысы Мира Рақымжанқызы қатысып, өнер иесінің өмір жолы мен шығармашылығына кеңінен тоқталды.
Басқарма басшысы өз сөзінде Мұрат Сыдықовтың өнерде биікке көтерілуіне жары әрі ақылман кеңесшісі Базар Қостаеваның да зор үлесі бар екендігін айтып, бақытын өнерден тапқан жандарды мерейтойымен құттықтады. Облыс әкімі мен басқарманың арнайы құттықтауын және Қазақстанның салалық мәдениет, спорт, туризм және ақпарат қызметкерлерінің кәсіптік одағының «Еңбек Даңқы» төс белгісін табыстап, сый-сияпат көрсетті.
Мерекелік кеште «Домбыра жүрек жырлайды» республикалық онлайн күйшілер конкурсының ауданнан қатысқан жүлдегерлеріне арнайы марапаттар табысталды.
Жиында танымал өнер тұлғасының «Балықшы қыз», «Шаттанамын», «Махамбеттің толғауы», «Мұраттың төкпесі» сынды әндері мен күйлері жеке орындаушылардың және Қазанғап атындағы ұлт-аспаптар оркестрінің сүйемелдеуімен нақышына келтіріле орындалды.
<img src="https://kyzylorda-news.kz/wp-content/uploads/2020/12/130965757_2858723207789380_5104476469492364831_o.jpg" alt="" />
<img src="https://kyzylorda-news.kz/wp-content/uploads/2020/12/130935288_2858723161122718_3431759262581180875_o.jpg" alt="" />
<img src="https://kyzylorda-news.kz/wp-content/uploads/2020/12/130973333_2858723144456053_8608208379771560336_o.jpg" alt="" />
<img src="https://kyzylorda-news.kz/wp-content/uploads/2020/12/130552944_2858723117789389_3837397174328223358_o.jpg" alt="" />

Қазақстанның еңбек сіңірген қайраткері Мұрат Сыдықов 80 жасқа толды

<a href="https://kyzylorda-news.kz/">Kyzylorda-news.kz</a>. Қызылордадағы сауда орталықтары мен кинотеатрлар жексенбі және мереке күндері де жұмыс істейді, деп хабарлайды <a href="https://24.kz/kz/zha-aly-tar/o-i-a/item/441801-yzylordada-y-sauda-ortaly-tary-mereke-k-nderi-zh-mys-istejtin-boldy">«Хабар 24»</a>.
Облыстың бас мемлекеттік санитариялық дәрігерінің қаулысына сәйкес кәсіпкерлік нысандардың қызмет көрсету кестесіне өзгеріс енгізілді. Ойын-сауық орталықтары, сауда-саттық желілері, азық-түлік емес және жабық базарларға бұған дейін тұрғындар таңғы 10:00-ден кешкі 22:00-ге дейін бара алатын еді. Енді олардың тұтынушыны қабылдау уақыты 1 сағатқа ұзарды. Бұл өзгерістердің кинотеатрлар мен қоғамдық тамақтану нысандарына да қатысы бар. Аталған нысандардың барлығына жексенбі және мереке күндері сағат 10:00-ден 17:00-ге дейін жұмыс істеуіне рұқсат берілді.
<blockquote>
 “Сауда орындарында бір келушіге 4 шаршы метр есебімен болуы керек. Ғимараттың толтырылуы 30%-тен аспау керек және де осы сауда ойын-сауық орталықтарында орналасқан фудкорттар тағамдарды жеткізу қағидаты бойынша жұмыс жасайды. Балалардың ойын алаңдары, аттракциондардың жұмыс жасауына рұқсат жоқ”, – облыс бойынша санитарлық-эпидемиологиялық бақылау департаментінің баспасөз-хатшысы Айман Жанахаева.
</blockquote>

Қызылордадағы сауда орталықтары мереке күндері жұмыс істейтін болды

<a href="https://kyzylorda-news.kz/">Kyzylorda-news.kz</a>. Қазақстанда өткен тәулікте 836 адамда коронавирус індеті ПТР арқылы расталды, деп хабарлайды coronavirus2020.kz.
Аймақтар бойынша:
Нұр-Сұлтан қаласы – 118
Алматы қаласы – 75
Шымкент қаласы – 7
Ақмола облысы – 67
Ақтөбе облысы – 9
Алматы облысы – 45
Атырау облысы – 40
Шығыс Қазақстан облысы – 129
Жамбыл облысы – 24
Батыс Қазақстан облысы – 40
Қарағанды облысы – 29
Қостанай облысы – 72
Қызылорда облысы – 4
Маңғыстау облысы – 9
Павлодар облысы – 90
Солтүстік Қазақстан облысы – 72
Түркістан облысы – 6
Жалпы ел бойынша ауырғандар саны 139995.

Қызылордада өткен тәулікте 4 коронавирус анықталды

<a href="https://kyzylorda-news.kz/">Kyzylorda-news.kz</a>. Қазақстанның 7 облысында дауылды ескерту жарияланды.
Қызылорда облысының кей жерлерінде тұман күтіледі.
Сондай-ақ Ақмола, Түркістін, Батыс Қазақстан, Қарағанды және Жамбыл облыстарында тұман күтіледі.

Қазақстан және Қызылорда облысының жаңалықтары