**<a href="https://kyzylorda-news.kz/">Kyzylorda-news.kz.</a> Ұлттық бірыңғай тестілеудің алғашқы күнінде 160 талапкер ереже бұзды, деп хабарлайды <a href="https://www.inform.kz/kz/ubt-nyn-algashky-kuni-160-adam-okuga-tusu-mumkindiginen-ayyryldy_a3664359">ҚазАқпарат.</a> 
**
ҚР Білім және ғылым министрлігінің мәліметінше, биыл ҰБТ тапсыруда бақылау күшейтілді. Әр аудитория видеокамералармен жабдықталған. 
<blockquote>
 «Қатысушылар металл іздегіштен өтпес бұрын ережелерді ұстану туралы міндеттемелермен танысып, тыйым салынған заттардың жоқтығы туралы құжатқа қол қояды. Тыйым салынған заттарды қолдануға жасалған кез келген әрекет тест нәтижелерін жарамсыз етеді, қатысушы аудиториядан шығарылады және осы жылы ҰБТ-ны қайта тапсыра алмайды. Алғашқы күні тыйым салынған заттарды алып өтуге тырысқан 73 және тест тапсыру барысында ҰБТ ережелерін бұзған 87 талапкер, яғни 160 адам тест тапсыру мүмкіндігінен айырылды. Олардың басым көпшілігі Түркістан облысы мен Шымкент қаласында тіркелген», – деп хабарлады ҚР БҒМ баспасөз қызметінен. 
</blockquote>
25 тамызға дейін әр аудиториядан алынған бейнежазбаны мамандар зерделейді. Егер бейнематериалдарды талдау кезінде ережелерді бұзу фактілері анықталса, талапкердің тест нәтижелері жойылады. Егер қатысушыға грант тағайындалған болса, ол қайтарылады. 
Айта кетейік, биыл 21 маусым мен 5 шілде аралығында еліміздің барлық өңірінде Ұлттық бірыңғай тестілеу өтеді. 
ҰБТ-ның бірінші күні 6 512 адам тестілеуден өтуді жоспарлаған. Бірақ 144 талапкер ҰБТ өткізу пунктеріне келмеді. 
Тестілеуге кіргізу барысында 2 талапкерде жоғары температура анықталды, олар ҰБТ-ны басқа күні, сауыққан соң тапсыра алады. Сәйкесінше бүгін 6 206 адам ҰБТ нәтижелерін алады. Қатысушыларға электронды сертификат беріледі.

ҰБТ-ның алғашқы күні: 160 адам оқуға түсу мүмкіндігінен айырылды

<a href="https://kyzylorda-news.kz/">Kyzylorda-news.kz.</a> Қазақстанның басым аумағында атмосфералық фронталды бөліктердің өтуімен 22 маусым күні құбылмалы күн райы сақталады, деп хабарлайды Қазгидромет. 
Жекелеген өңірлерде жаңбыр, найзағай күтіледі. Солтүстікте бұршақ жаууы ықтимал. Кей жерлерде желдің күшеюі сақталады. 
Солтүстік пен шығыста түнде және таңертең тұман болжанады. 
Солтүстік Қазақстан, Ақмола облыстарының кей жерлерінде найзағай, бұршақ, түнде және таңертең тұман күтіледі. 
Қостанай, Батыс Қазақстан, Атырау облыстарының кей жерлерінде найзағай, 15-20 м/с екпіндегі жел болжанады. 
Шығыс Қазақстан облысының кей жерлерін түнде және таңертең тұман басады. 
Жамбыл, күндіз Павлодар, Ақтөбе облыстарының кей жерлерінде жел 15-20 м/с күшейеді. 
Күндіз Атырау облысында қатты ыстық сақталады. Сондай-ақ қатты ыстық Жамбыл, Түркістан облыстарында күтіледі. 
Атырау, Қызылорда облыстарында, Ақтөбе, Қостанай, Ақмола, Қарағанды, Түркістан, Жамбыл, Алматы облыстарының басым бөлігінде, Батыс Қазақстан облысының оңтүстік-шығысында өте жоғары өрт қаупі сақталады.

Жаңбыр, бұршақ, найзағай: 22 маусым күнгі ауа райы болжамы

1948 жылы КСРО және ҚР суретшілер одағының мүшесі, Украина суретшілер одағының және Еуропалық өнер орталығының құрметті мүшесі Амангүл Иханова дүниеге келді.
Ол Қызылорда облысында туған. Н.В.Гоголь атындағы Алматы көрсемсурет училищесін, Абай атындағы Қазақ педагогикалық институтын бітірген. Теріден картина салудың жаңа әдісін патенттеген автор. Жұмыстары әртүрлі елдердің көптеген мұражайлары мен жеке коллекциясында, Ұлыбритания патшайымы Елизаветаның коллекциясында сақтаулы тұр, суретшінің ертеректегі шығармаларының бірі Нью-Йорк қаласындағы Орталық ғимараттың холлын безендіріп тұр. «Бәйтерек» жұмысы авторларының бірі. Еуропалық суретшілер одағы сыйлығының лауреаты, АҚШ Президенті Дж.Картердің, испан королі Хуан IV, Майндағы Франкфурт мэриясының, Ұлыбритания патшайымы Елизаветаның, БҰҰ-ның және т.б. Алғыс хаттарымен марапатталған. Қазақстанның еңбек сіңірген қайраткері.
1992 жылы Қазақстан мен Қытай арасында темір жол магистралі ашылып, «Жібек жолы» халықаралық жолаушылар пойызы Алматыдан Үрімжіге сапар шекті.
1993 жылы Қызылордада орысша-қазақша сөздік шығарылды. Онда дене шынықтыру және спорт саласындағы 2500 сөз бен термин болды.
2005 жылы Елбасы «Қазақстан Республикасының Үкiметi мен Жапония Үкiметi арасындағы Техникалық ынтымақтастық туралы келiсiмдi бекiту туралы» Заңға қол қойды.
2006 жылы Елбасы Нұрсұлтан Назарбаев «Қазақстан Республикасының кейбір заңнамалық актілеріне атқарушылық іс жүргізу мәселелері бойынша өзгерістер мен толықтырулар енгізу туралы» Заңға қол қойды. Заң атқарушылық іс жүргізуді жетілдіруге бағытталған.
2012 жылы Нұр-Сұлтан қаласының әкімдігі «Қазақтың 1000 күйі» жинағын шығарды.
2014 жылы Ұлы Жібек жолы ЮНЕСКО-ның Бүкіләлемдік мұрасы нысанына айналды.
Қазақстан, Қытай және Қырғызстан мемлекеттерінің Жібек жолын Бүкіләлемдік мұра тізіміне енгізу туралы бірлескен өтініші Дохада (Катар) өткен Біріккен Ұлттар Ұйымы комитетінің білім, ғылым және мәдениет мәселелері бойынша 38-інші сессиясында мақұлданды. Өтінішке Жібек жолында орналасқан 33 тарихи ескерткіш енгізілді, соның 22-сі Қытайда, 8-і Қазақстанда және үшеуі Қырғызстанда орналасқан.

22 маусым: Атаулы күндер мен оқиғалар

<a href="https://kyzylorda-news.kz/">Kyzylorda-news.kz</a> ақпараттық агенттігінің 22 маусымға арналған жұлдыз-жорамалы.
Тоқты 
Бүгін өміріңізді жаңа бағытқа бұрасыз. Өткенді артқа тастап, барлығын ұмытуға тырысасыз. Сізді көп өзгеріс күтіп тұр. Ең алдымен өзіңізге не қажет екенін айқындап алыңыз. Сонда ғана қайта қателікке бой алдырмайсыз.
Торпақ
Табысыңыз артады. Бірақ бұл айлық жалақыңызға еш қатысы жоқ. Яғни, сіз қосымша табыс табатын боласыз. Жол сапарға шығыңыз, сонда сіздің үй шаруасы мен жұмыстан шаршағаныңыз басылады.
Егіздер
Достарыңыздың арқасында үмітіңіз ақталады. Серіктестермен бірігіп жұмыс жасау өз пайдасын әкеледі. Өз күшіңізге сеніп, өзіңізді жоғары бағалаудан сақтаныңыз. Бұл мақсатқа жетуге кедергісін келтіруі мүмкін.
Шаян
Бұрын атқарған жұмыстарыңыздың жемісін көресіз. Үй салу немесе отбасын құруды жоспарласаңыз, барлығына мұқият болыңыз. Мақсатқа жетуге нық қадам бассаңыз, өзгелердің қызғанышын тудыратындай әрекет етпеңіз.
Арыстан
Кәсіби тұрғыда біліктілігіңіз артады. Жұмыста өз құзыретіңізді толық пайдаланасыз. Бүгін тіл табыса алмай жүрген адаммен ымыраға келесіз. Өзіңіз ақылға қонымды мінез-құлық танытсаңыз, жолыңыз әркез болады.
Бикеш
Жұмысыңыз бірқалыпты. Жақындарыңызбен қарым-қатынасыңыз жақсарады. Жоспарланған барлық істі атқаруға мүмкіндігіңіз артады. Әріптесіңізбен қарым-қатынасты бұзып алмаңыз.
Таразы
Өз ісіңізге мығымсыз. Сондықтан жұмыста қысқарып қаламын деген ойдан аулақ болыңыз. Егер басыңыз бос болса, екінші жартыңызды жолықтырасыз. Ал отбасылы болсаңыз бүгін өмірлік серігіңіз таңқалдыратын болады.
Сарышаян
Арманыңызға жетуге бірнеше ғана қадам қалды. Сәттілік серігіңізге айналғалы тұр. Сондықтан тез шешім қабылдағаныңыз жөн. Нағыз бақытты күндерге қарай жақындап келесіз.
Мерген
Болмашыға бола мазаңызды қашырғыңыз келмейді. Алайда барлығы сіз қалағандай болмайтыны анық. Көңіл-күйіңіздің жоқтығынан жаныңыздағыларды ренжітіп алмаңыз. Бүгін отбасыңыздың жанында болыңыз.
Тауешкі
Мақсатқа жетуге деген құлшынысыңыздың, еңбекқорлығыңыздың арқасында көп жетістікке жетесіз. Материалдық жағдайыңыз жақсарады. Сондықтан қайырымдылықпен айналысқаныңыз жөн.
Суқұйғыш
Мақсатқа жету оңай емес, бірақ табандылық танытар болсаңыз ойыңыздағы орындалады. Есіңізде болсын, бүгін тек өзіңіз сенетін адамдарға ғана сенім артыңыз. Әйтпесе, әлдекімдер алдап кетуі мүмкін.
Балықтар
Қосымша табыс тауып, материалдық жағдайыңызды жақсартасыз. Маңызды шаруаларға білек сыбана кірісіңіз. Тез шешім қабылдауға тырысыңыз. Бүгін сіз көп еңбектенуіңіз қажет.

Жұлдыздар не дейді?

<a href="https://kyzylorda-news.kz/">Kyzylorda-news.kz.</a> ҚР Денсаулық сақтау министрінің міндетін атқарушы Ләззат Ақтаева ҚР Президенті жанындағы Орталық коммуникациялар қызметі алаңында өткен онлайн брифинг кезінде стационарға кімдер, қандай жағдайда жатқызылатынын айтып берді.&nbsp;
<blockquote>
 «ПТР диагностика жасаған кезде пациенттер симптомсыз және симптомды болып екіге бөлінеді. Ешбір клиникалық өзгерістері байқалмаған, бірақ коронавирус нәтижесі оң болған пациенттер, вирустың жеңіл түрін жұқтырған науқастар амбулаториялық ем қабылдайды, яғни, бастапқы медициналық-санитариялық көмек (БМСК) дәрігерінің бақылауында болады. Жалпы, халық аурудың жеңіл түріне қандай жағдайларда жатқызуға болатынын түсінуі керек. Оның негізгі белгілері – тыныс алуда қиындықтың болмауы, температура мөлшері 38°C -тан төмен немесе мүлдем жоқ, жеңіл катаральды белгілердің (тамақтың қызаруы, қышуы, мұрынның бітелуі, жеңіл жөтел) байқалуы, жүрек қағысының минутына 60-80 рет соғуы», – деді ол.
</blockquote>
Ләззат Ақтаеваның айтуынша, пациентте интоксикация белгілері байқалса, оның жағдайы ауыр деп бағаланып, стационарға жатқызылады.
<blockquote>
 «Егер пациентте интоксикация белгілері байқалса, мысалы, бастың ауыруы, бұлшықеттердің ауыруы, температураның 38°C-тан жоғары болуы, тыныс алуда қиындық туындаса, ентігу байқалса, бұл коронавирус инфекциясының ауыр түрі жұқты деген сөз. Мұндай науқастар стационарлық емдеуге жатқызылуы тиіс», – деді Ақтаева.
</blockquote>
<a href="https://baq.kz/news/othernews/koronavirus-statsionarga-kimder-zhatqyzylady/?fbclid=IwAR0EliFvtUhexkF8W9NVjMe9DpvYDDgojUcEuvAwIPmICBHAVKgFMOAYZPQ">Baq.kz</a>

COVID-19: Стационарға кімдер, қандай жағдайда жатқызылады?

<a href="https://kyzylorda-news.kz/">Kyzylorda-news.kz.</a> Орта салмақтағы IBF және IBO нұсқалары бойынша әлем чемпионы Геннадий Головкин (40-1-1, 35 КО) The Lockdown Tapes эфирінде спорттағы сыбайлас жемқорлық туралы пікір білдірді, деп хабарлайды <a href="https://www.inform.kz/kz/golovkin-bokstagy-sybaylas-zhemkorlyk-turaly-aytty_a3664132">ҚазАқпарат</a>. 
<blockquote>
 «Жемқорлық, жемқорлық және тағы да жемқорлық. Мен бокстың болғанын қалаймын, спорт ең алдымен таза болуы керек. Иә, ауыр, мен тіпті өткенді қозғағым да келмейді. Тағдырыма Олимпиада чемпионы болмай-ақ, еңсемді түсірмей, спортшы болып қалғаныма, ішкі менімді жоғалтпағаным үшін алғыс айтамын», – деді Геннадий Головкин.
</blockquote>
Головкиннің сұхбаты Matchroom Boxing YouTube каналына салынған. Жүргізуші Крис Ллойд аудармашы арқылы GGG-ге Джонатон Бэнкспен бірге жаттығудан бастап, Биг Бэнкстегі лагерь, оның отбасылық өмірі және болашаққа арналған жоспарларына қатысты бірнеше сұрақ қойды. Бір ай бұрын Геннадий Головкин карантиннен кейін бірінші кезекте не істейтінін айтқан болатын. 
<blockquote>
 «Карантиннен кейін бірінші кезекте бокс залына барамын» – деп жазған еді Геннадий Головкин өзінің Instagram парақшасында.
</blockquote>
Кейіннен Головкиннің (40-1-1, 35 КО) сопромоутері Эдди Хирн қазақстандық боксшы келесі жекпе-жегін қашан өткізетінін хабарлаған еді.

Головкин бокстағы сыбайлас жемқорлық туралы айтты

<a href="https://kyzylorda-news.kz/">Kyzylorda-news.kz.</a> Кредит тарихы дегеніміз — банктен қаншалықты жиі қарыз алатыныңыз бен оны қаншалықты тәртіпке сай қайтаратыныңыз туралы толық ақпарат жиынтығы.
Банктерге «датым бар» деп ақша сұрай келгенде менеджер сіз туралы деректерді ақтарады. Содан кейін барып қарызға бере ме, бермей ме ойланады. Егер тарихыңыз нашар болса, бермейтінін айтып шығарып салады. Осы ретте кредит тарихына нұқсан келтіретін жайттарды тізіп шықтық.
1. Уақытында төленбесе
Мерзімінен асып кеткен төлемнің қайсысы болсын жақсы емес. Әсіресе, үш айдай уақыт бойы төлемеген болсаңыз немесе «айтқан тілді алмайды, ендігісін сот шешсін» деп банктің ызасына тисеңіз тіпті қиын. Кредит тарихын бірінші кезекте бұзатын себеп — осы. Тәртіпке бағынбайтын клиент ретінде бір көрінсеңіз, банктің ақша бермей қоюы әбден мүмкін. Өйткені қазір кредитті мақұлдап алып, кейін тағы соңынан соттасып жүруіміз мүмкін деп қабылдамай қоятын жағдайлар жиі кездеседі. Мұндайда не істеу керек? Бұл жерде енді бәрі ақ қағазға көк сыямен жазғандай айқын — уақытынан кешіктірмеу керек. Сондықтан алатын кезде қаншалық шамаңыз келетінін дұрыстап бағамдауыңыз керек.
2. Кредиттен басқа қарыздар болса
Кредит тарихына алған несие ғана кіреді деп ойласаңыз, қателесесіз. Мұнда төлемнің бәрі тіркеледі. Мәселен алимент, айыппұл сияқты ресми міндеттеменің бәрін қалай төлеп жүргеніңізді қарайды. Бұл жерде бастысы сотқа дейін бармаған болса болғаны.
3. Өтінімді көп берген жағдайда
Кредит тарихында көрініс табатын келесі мәлімет — берілген өтінімдер мен олардың ішінде мақұлданғандары мен берілмегендерінің саны. Банк соның статистикасын қарайды. Егер аз уақытта бірнеше өтінім тастаған болсаңыз, қаржыдан қатты қысылып тұр деп ойлайды. Сондықтан ештеңеге қарамай барлық банкке өтінім жіберіп жатыр деп ұғады. Сонымен қатар, мақұлданбаған кредиттердің көп болғаны да статистиканың нашарлауына әсер етеді. Өйткені басқа банктер сізге қарыз бермесе, бұл банк те ойланады. Мұндай жағдайда банкке өтінім бермес бұрын шарттарымен таныс болу керек. Бәрін жақсылап зерттеп алған соң барып, бірін таңдап, нақты соған барыңыз. Ол банк бермей қойса, зерттеу бойынша сізге ұнаған келесі мекемеден сұрап көресіз. Бірақ бірден бірнеше жерге барудың қажеті жоқ. Одан керісінше ұтылып қалуыңыз мүмкін. Ипотеканың жөні бұлардан сәл бөлек. Мұнда шарттарына қарай ыңғайлысын қарастыратын болғандықтан, бірнеше өтінім беруге болады. Әйтсе де, қай жағдайда болсын алдымен жақсылап ойланған жөн. Пайызы, шарты — бәрін түсініп алыңыз.
4. Жеке мәліметтерді жиі өзгерте берсе
Сіз жайлы ақпаратта қандай да бір өзгеріс бола қалса, ол кредит тарихына бірден түседі. Мысалы Алматыда тұрған адам Ақтөбеге көшіп кетуі мүмкін. Болмаса телефонын, тіпті тегін ауыстыруы да ғажап емес. Бірақ үш айда бір рет осылай өзгерте берсе, банк күдіктене бастайды. Дегенмен шынында да соңғы үш айда мекенжайын үш рет ауыстыратын кездер болады. Айталық, пәтеріңізді сатып жіберіп, туыстарыңыздың үйінде уақытша тұрдыңыз. Одан кейін жаңа қонысқа көшіп, тағы ауыстырдыңыз. Мұндайда менеджерге жақсылап түсіндіруге тырысыңыз.
5. Төлеп жатқан несие көп болса
Банк сіздің ай сайын қанша төлейтініңізге баса мән береді. Табысыңыз неғұрлым кредитке кететін болса, соғұрлым сізді «жақтырмауы» мүмкін. Айлығыңыздың 50 пайызынан астамы несие төлеуге кетсе, онда кредит бермей қоюы мүмкін. Мұндайда кредит тарихын түзеуден бұрын, қаржылық жағдайды дұрыстауға тырысу керек. Себебі жалақыңыз қарыз төлеуге кете берсе, үйдегі қаржылық ахуал «теңселген» күйде тұра береді.
6. Шағын несиеге құмар болса
Шамалы уақыттан кейін қайтарамын деген оймен шағын қаржы ұйымдарына жиі барғыштайтын болсаңыз, бұл да банкке ұнамауы мүмкін. Өйткені «бұл клиент бізден қарыз алмай, неге пайызы жоғары шағын қаржы ұйымдарына бара береді?» деп ойлайды. Кредиттің өзін өлім мен өмір мәселесі сияқты маңызды себеппен ғана алу керек дейміз. Ал шағын несиеге тіпті аса жақындамаған дұрыс.
7. Мерзімінен бұрын өтеп тастай берсе
Мүмкіндік болса мерзімінен бұрын өтеп тастаған дұрыс. Ондай жағдайда артық төлемейсіз, ай сайынғы төлем есіңізге түсіп, еңсеңізді батырмайды. Бірақ кредит тарихы тұрғысынан қарасақ, банкке сіздің бұл қылығыңызды құп көрмеуі ықтимал. Өйткені сізден пайда көруге мүмкіндік берместен жауып тастағансыз. Әйтсе де, кредит алғаннан бастап жапқанға дейін бәрібір бергеніңіз көбірек. Сондықтан кредит беру-бермеуге келгенде бұл жағына «қадалып» қалатын кезі кемде-кем. Бастысы бірнеше рет қатарынан мерзімінен бұрын төлеп тастасаңыз, ендігіде бермей қоюы мүмкін екенін ескеріңіз. Егер алда-жалда тағы алып қалуыңыз мүмкін болса, ірі көлемдегісін жауып тастап, ұсақ төлемді кесте бойынша төлей беріңіз. Өйткені аз соманың пайызы да аз.
8. Кредит тарихына мұқият болмаса
Кейде сіздің атыңыздан алаяқтар кредит рәсімдеуі мүмкін. Одан қалса, кредитор қателесіп, сіздің несиені жапқаныңызды көрсетпей қойса, қарыз боп шыға келесіз. Сонымен бірге кейде банктер мынадай қулыққа баруы мүмкін: сізге қарыз беру мақұлданса да, алмаймын деп кетіп қалсаңыз, «біз беруден бас тарттық» деп мәлімет жіберуі мүмкін. Сондықтан кредит тарихыңызды тексеріп тұрыңыз. Жылына 1-2 рет бас сұғып тұрған жөн. Бір жылда бір рет тексеру тегін, одан кейінгілеріне ақы төлейсіз. Бағасы — 400 теңге.
9. Несиеден ада болған да қиын
Негізі кредитсіз адам болсаңыз, керемет. Бірақ біз қозғап отырған тақырып — кредит тарихы тұрғысынан қарасақ, несиесі жоқ адам — банк үшін жұмбақ. Оның қалай төлейтінін, кім екені белгісіз. Сол үшін де кредит бере салуға батпауы мүмкін. Ипотека алғанда бұған аса қарамайды. Бастысы, төлем қабілетіңіз жетіп тұрса, жеткілікті. Әдетте, банк үшін сенімді адам болу үшін кішігірім тауар алудан бастаған жөн. Телефон сатып алып, кестеге сай, кешіктірмей төлеп жүрсеңіз, банк алдында беделіңіз болады. Немесе қазір банктерде кредит карталар бар. Сол арқылы төлем жасап, бөліп төлеуге болады. Ол да кредит тарихынан орын алады.

Мерзімінен бұрын өтеп тастай беретін адам жақсы ма, жаман ба?

<a href="http://kyzylorda-news.kz/">Kyzylorda-news.kz.</a> Қытайда AirPods құлаққаптары ер адамның құлағында жарылып кетті.
Чжэнчжоу қаласының 23 жастағы тұрғыны қайғылы жағдайға тап болды. Оқиға ол телефонмен құлаққап арқылы сөйлесіп тұрған кезде болған. Ер адам емдеу курсынан өтті. Дегенмен әлі де есту қабілеті нашарлағанына шағымдануда. Ақауы бар құлаққаптар Apple компаниясының өкілдеріне жіберілді.
<a href="https://24.kz/kz/zha-aly-tar/lemde/item/403522-ytajda-airpods-la-aby-adamny-la-ynda-zharylyp-ketti">24.kz</a>

AirPods құлаққабы адамның құлағында жарылып кетті

«Жыл 12 ай қар мен жаңбыр, жел мен боран өтінде»: Киелі киікті кірпік ілмей күзетіп жүрген қызылордалық инспекторлардың өмірі (ФОТО)

<a href="https://kyzylorda-news.kz/">Kyzylorda-news.kz.</a> Қызылорда облысында коронавирус инфекциясымен тіркелген симптомды науқастар саны – 558, ал симптомсыз- 231 азамат.
Аймақта індеттен айығып шыққандар саны 484-ке жетті. Бұл туралы Өңірлік коммуникациялар қызметінің ақпараттық алаңында облыстық денсаулық сақтау басқармасының басшысы Жақсылық Абдусаметов мәлімдеді.
<blockquote>
 «Симптомды жаңа жағдайдың 5-і скринингтен, екеуі қарым-қатынастан болса, симптомсыз коронавирус инфекциясының 16 дерегі анықталды. Оның 9-ы скринингтен, , 7-і індет жұқтырған науқаспен байланыста болғаннан анықталды»,- деді Жақсылық Әбілқасымұлы.
</blockquote>
Сондай-ақ, вирус жұқтырғандармен байланыста болған- 6112 азамат анықталды. Оның ішінде, 3732- тікелей қарым-қатынаста, 2389- жанама байланыста болған.
Құрметті облыс тұрғындары, карантиндік шараларды қатаң сақтап және бетперде киюді жалғастыра беруге шақырамыз.

COVID-19: Қызылордада науқастар саны 550-ден асты

<a href="https://kyzylorda-news.kz/">Kyzylorda-news.kz.</a> Алматыда Шиповаловтар отбасы бір күннен астам уақыт бойы әкесінің жерлеуіне рұқсат ала алмай жүр. &nbsp;Жедел жәрдем де, полиция да ПТР сынағының нәтижесі дайын болғанша денені тексеруге келуден бас тартты. Осы уақыт ішінде қайтыс болған 72 жастағы ер адам желдеткіші жоқ бөлмеде жатқан, деп хабарлайды <a href="https://stan.kz/kazakstanda-kaytis-bolgandardin-denesin-ptr-aniktamasiz-332980/">Stan.kz.</a> 
Анықталғандай, енді марқұмның туыстарынан міндетті түрде коронавирустың жоқтығы туралы анықтаманы талап етеді екен. Бұл құжатсыз адамды жерлеу мүмкін емес.
Ирина Шиповалова әкесінің жерлеуін ұйымдастыра алмай отыр. Ол үшін полициядан қайтыс болғаны туралы хаттама алу керек екен. Алайда полицейлер келуден тас тартқан. Өйткені енді марқұмға бірінші болып эпидемиологтар келу керек екен. Коронавирусты анықтайтын тест алу қажет, ал оның нәтижесі бірнеше күнде дайын болады. Күн ыстық болған соң денені мәйітханаға апаруды сұраған, бірақ қазір ол мүмкін емес.
<blockquote>
 “Мәйітханаға апаруға рұқсат бермеді, себебі коронавирус анықтайтын тест нәтижесі жоқ. Жерлеуге де рұқсат бермеді. Ауруханадан оның неден қайтыс болғаны туралы қорытындыны ала алмай отырмын, себебі полицияның хаттамасы жоқ. Бұл – сұмдық. Ол көгеріп кеткен, мәйіттің иісі шығады”, – деді Ирина Шиповалова.
</blockquote>
Біраздан соң мамандар келіп, коронавирусты анықтайтын тест алған, нәтижесі – теріс. Бірақ полиция сол күйі келмеген. 
“Бізге адамды дұрыс жерлеу үшін бір ғана қағаз керек”, – дейді марқұмның отбасы. 
Соңғы кездері осындай шағымдар көбейіп кеткен. Олар да марқұмды жерлей алмай жүргендерін айтқан. 
Ал Алматы қаласының полициясы коронавируспен қарсы күрес үшін бекітілген арнайы алгоритм бар екенін мәлімдеді. Егер адам қайтыс болса, маман сынама алу керек, нәтижесі шыққанша мәйітке жақындауға тыйым салынған. Алайда ПТР-тест нәтижесін анықтайтын орындардағы жүктемеге байланысты қорытынды ұзақ күтуге тура келеді. Осы уақыт ішінде марқұм өз үйінде жатады. 
<blockquote>
 “Коронавирусты анықтайтын лабораториядан қайтыс болған адамда Covid-19 жоқтығы туралы анықтама алған кезде ғана оқиға орнына аудандық полиция бөлімінің тергеу қызметінің қызметкерлері барады”, – деді Алматы қаласы полиция департаментінің ресми өкілі Салтанат Әзірбек. 
</blockquote>
Кейіннен Шиповаловтар отбасы полиция келіп, мәйітті ауруханаға апарып, содан соң жерлегенін хабарлады.

Қазақстанда қайтыс болғандардың денесін ПТР-анықтамасыз жерлемейді

<a href="http://kyzylorda-news.kz/">Kyzylorda-news.kz.</a> Коронавирус жұқтырған балаларда негізінен дене қызуы, диарея және құсу белгілері болады. Бұл туралы Батыс Қытайдың төрт ауруханасында жүргізілген зерттеуге сілтеме жасап PLoS Medicine басылымы жазады, деп хабарлайды <a href="https://24.kz/kz/zha-aly-tar/bylu-manyzdy/item/403412-balalarda-y-koronavirusty-negizgi-belgileri-andaj-bolady">«Хабар 24»</a>.
Коронавирус жұқтырған балаларда өкпенің асқынуы кейінірек пайда болады. 
Зерттеуге алынған коронавирус жұқтырған балалардың 76 пайызында дене қызуы байқалса, ересектердің 44 пайызында ғана дене қызуы болған. Сондай-ақ балалардың 62 пайызында қатты жөтел, 12 пайызында диарея мен құсу болған.
Ал неміс ғалымдары ата-аналарына қарағанда балалардың коронавирусты жұқтыру ықтималдығы аз екенін анықтаған.

Қазақстан және Қызылорда облысының жаңалықтары