<a href="https://kyzylorda-news.kz/">Kyzylorda-news.kz.</a> Қызылорда облысында автокөліктің әдемі нөміріне деген сұраныс саябырламай тұр. Пандемияға байланысты бірқатар аймақтарда ақылы автонөмірлерден түсетін кіріс азайғанымен, Қызылорда өңірінде бұл көрсеткіште айтарлықтай айырмашылық жоқ.
Мәселен, соңғы екі жылда 800-ден астам қызылордалық осы тұрғыда 200 млн-ға тарта қаражат жұмсаған, соның ішінде 2019 жылы – 102 млн теңге, 2020 жылы – 96,5 млн теңге. Бұл туралы «Азаматтарға арналған үкімет» мемлекеттік корпорациясы Қызылорда облыстық филиалының басшылығы жыл қорытындысы бойынша өткізілген брифингте мәлімдеді.
Жалпы, 2020 жылы облыс бойынша Мамандандырылған ХҚО бағыты бойынша 90&nbsp;526 қызмет көрсетілді, соның ішінде 78&nbsp;411 көлік тіркеліп, 12&nbsp;115 жүргізуші куәлігі берілген. Бұл орайда қызметтердің 80 пайызы онлайн нұсқада рәсімделген.
Алдағы уақытта мемлекеттік қызметтерді&nbsp; онлайн алу үрдісі күшейе түседі деп күтілуде. Осы мақсатта түрлі қолайлы сервистер енгізіліп жатыр. Мәселен, жуырда Цифрлық даму, инновациялар және аэроғарыш өнеркәсібі министрлігінің бастамасымен автокөлікті Kaspi.kz қосымшасы арқылы тіркеу жобасы енгізілді.
<blockquote>
 «Бұл сервис мамандандырылған бөлімде адамдардың көптігінен туындайтын қарбаласты болдырмауға өз септігін тигізуде. Қызмет алушылар үшін де тиімді болғандықтан,&nbsp; онлайн қызметті белсенді түрде пайдалана бастады. Мәселен, аз ғана уақыттың ішінде 50-ден астам қызылордалық көліктерін осы қосымша арқылы онлайн тіркеп үлгерді. Және күн сайын бұл көрсеткіш өсе түсетіні сөзсіз», – деді филиал директоры Айдын Қайруллаев.
</blockquote>
Сондай-ақ, былтыр автокөліктің нөмірі мен техпаспортын үйге жеткізу қызметі іске қосылған болатын. Бүгінде 65 қызылордалыққа құжаттар тұрғылықты мекенжайы бойынша жеткізіліп берілді. Бұл қызметті пайдалану үшін жаңа автокөлік иесі онлайн сатып алу мәмілесінен кейін egov.kz порталындағы «Көлік және коммуникация» бөлімінде «МТНБ мен техпаспортты жеткізу» электронды қызметіне тапсырыс беруі тиіс.

Қызылордалықтар былтыр сәнді автонөмірлерге 100 млн теңгеге жуық қаржы жұмсаған

<a href="https://kyzylorda-news.kz/">Kyzylorda-news.kz.</a>&nbsp;Бүгін жылдағы дәстүрге сәйкес Жалағаш ауданының әкімі Асылбек Шаменов тұрғындар алдындағы есеп беру кездесулерін бастап кетті.
Биылғы жылы санитарлық талаптарды қатаң сақтауға байланысты есеп беру кездесулері онлайн форматта өткізілуде.Аудан басшысы алдымен «Zoom» бағдарламасы арқылы Аққыр, Жаңаталап, Мақпалкөл, Мәдениет, Мырзабай ахун, Бұқарбай батыр, Ақсу ауылдық округтерінің тұрғындарымен онлайн байланысқа шығып, өткен жылы атқарылған жұмыстары туралы баяндама жасап, алдағы жоспарларымен бөлісті.
<blockquote>
 «2020-2021 жылдарға арналған Жұмыспен қамтудың жол картасы» бағдарламасы аясында 14 жобаға 1 млрд. 541 млн. теңге, сондай-ақ, елімізде орын алған індетке байланысты әлеуметтік мәселелерді шешуге 1 млрд-қа жуық қаражат бөлінді.Нәтижесінде, қосымша бөлінген нысаналы трансферттер арқылы аудан бюджетінің көлемі 14,1 млрд. теңгеге жетті, – деген аудан басшысы бұдан бөлек, кәсіпкерлік, ауылшаруашылығы, жол жөндеу, құрылыс саласында көптеген жұмыс атқарылғанын тілге тиек етті.
</blockquote>
Айта кету керек, өткен жылы Аққыр бағытындағы автомобиль жолы бойында орналасқан жалпы құны 281 млн теңгені құрайтын «Оңтүстік коллектор» көпірін қайта жаңғырту жұмыстары аяқталып, пайдалануға берілді. Сонымен қатар, Аққыр ауылындағы №188 және Мақпалкөл ауылындағы №117 орта мектептерінің ғимараттарына күрделі жөндеу жұмыстары жүргізілді. Мәдениет, Жаңаталап елді мекендерінің электр жүйесі қайта жаңғыртудан өтіп, пайдалануға берілді. Мәдениет бағытындағы – 9,4 және Аламесек бағытындағы – 12,3 шақырым автомобиль жолдарына орташа жөндеу жұмыстары басталып, биылғы жылы аяқталатын болады.
Аудандық маңызы бар Бұқарбай батыр, Ақсу елді мекендеріне Жобалық құны 273,2 млн. теңгені құрайтын кіре-беріс 8,6 шақырым автомобиль жолын орташа жөндеу жұмыстары биылғы жылы жүргізілетін болады.
Кезек ұсыныс-пікірлерге берілгенде әр ауылдың тұрғындары өздерінің көкейіндегі сауалдарын қойып, ой-пікірлерімен бөлісті.
Аққыр ауылдық округінің ардагерлер кеңесінің төрағасы Шора Қалдыбеков «Оңтүстік коллектор» арнасындағы бұзылған бөгеттерді арнаға су түспей тұрып наурыз айында қалпына келтіру жұмыстарын жүргізсе деген ұсыныс тастаса, Жаңаталап ауылдық округінің ардагері Сайлау Қоспанов аяқ су тапшылығын болдырмау мәселесін қозғады. Мәдениет, Мырзабай ахун, Ақсу ауылының тұрғындары елді мекендегі ішкі көшелерге жөндеу қажет екендігін мәселе етіп көтерсе, Мақпалкөл, Бұқарбай батыр ауылының азаматтары электр желілеріне байланысты мәселе қозғады.
<img src="https://kyzylorda-news.kz/wp-content/uploads/2021/01/zh.jpg" alt="" />

Жалағашта не жаңалық?

<a href="https://kyzylorda-news.kz/">Kyzylorda-news.kz.</a>&nbsp;2021 жылдан бастап зейнетақы 7%-ке, жәрдемақы 5%-ке өсті. Осы &nbsp;өзгерістерге сәйкес Қызылорда облысы бойынша қаңтар айында 346&nbsp;697 төлем алушыларға 13&nbsp;млрд. теңге көлемінде зейнетақы мен жәрдемақы төленді. Бұл туралы өңірлік коммуникациялар қызметінің ақпарат алаңында «Азаматтарға арналған үкімет» мемлекеттік корпорациясы» КЕ АҚ Қызылорда облысы бойынша филиалының директоры Айдын Қайруллаев баяндады.
Соның ішінде 75 803 зейнет жасына жеткендер, 23 223 мүмкіндігі шектеулі жандар, 28 119 көпбалалы отбасылар болса, 16&nbsp;642 Алтын, күміс алқа иегерлері, 9 182 азамат арнайы жәрдемақы алған.
Жалпы, 2020 жылы облыс бойынша 373 481 төлем алушыға 154 млрд. теңге көлемінде зейнетақы мен жәрдемақы төлеу жұмыстары жүргізілді. Төтенше жағдай кезеңінде айлық табысынан айрылған 531&nbsp;645азаматқа42&nbsp;500 теңгеәлеуметтік төлемі аударылып, COVID-19 инфекциясын жұқтырып, вирустық пневониямен ауырған денсаулық сақтау ұйымдарының 551 қызметкеріне біржолғы жәрдемақы төленді.
Айта кетейік, 2020 жылы Қызылорда облысында әлеуметтік сала бойынша барлығы&nbsp; 81 683қызмет көрсетілді. Бұл тұрғыда 2019 жылмен салыстырсақ, онлайн форматта алынған қызметтер көлемі артқан. Мәселен, 2019 жылы Халыққа қызмет көрсету орталығына бармай-ақ, жеке кабинеттері арқылы онлайн түрде өтініш білдіргендер 15%–дықұраса, 2020 жылы онлайн өтініш жасағандар қатары 36%-ға артқан.
«Бұл дегеніміз жыл сайын әлеуметтік салаға қатысты қызметтерді азаматтар үйінде отырып-ақ, онлайн түрде және проактивті түрде рәсімдеуге машықтанып келеді. Оның үстіне әлемдік індетке қатысты төтенше жағдай да әсер етті. Бұл орайда, осынау қиын кезеңде мемлекеттік корпорацияның әлеуметтік қамсыздандыру саласының мамандары демалыссыз, тұрғындардың төлемдерін аударуда тынымсыз еңбек еткенін айтып кеткім келеді. Соның ішінде жәрдемақы және зейнетақы аударумен ғана емес, &nbsp;табысынан айрылған азаматтарға берілген 42 500 теңге әлеуметтік жәрдемақысын төлеумен де айналысты», – деді филиал директоры Айдын Қайруллаев.
Бүгінде мемлекеттік Реестр тізіліміндегі көрсетілетін қызметтердің 44-і әлеуметтік сала арқылы жүзеге асырылады. Оның ішінде 38 қызмет бүгінде электронды форматта көрсетілсе, 18-і проактивті, яғни азаматтардың қатысуынсыз автоматты түрде тағайындалған төлем немесе қызмет болып табылады.
Қазіргі таңда әлеуметтік салаға қатысты барлық қызметтерді проактивті форматқа көшіру жоспарлануда. Яғни, барлық қажетті құжаттар мен мәліметтер ақпараттық жүйелерден автоматты түрде алынады. Тек қызмет алушы СМС арқылы келісім берсе жеткілікті. Бұл орайда, 2020 жылы облыс көлемінде 6 105азаматқа проактивті форматта қызмет көрсетілді. 2019 жылмен салыстырғанда бұл көрсеткіш екі есеге ұлғайған.

Қаңтар айында қызылордалықтарға 13 млрд теңге зейнетақы мен жәрдемақы төленді

<a href="https://kyzylorda-news.kz/">Kyzylorda-news.kz.</a>&nbsp;Қызылорда облыстық филармонияның ұйымдастыруымен 2020 жылы барлығы 178 шара өткізілді. Бұл туралы Қызылорда облыстық мәдениет, архивтер және құжаттама басқармасының басшысы Мира Әбуова мәлімдеді.
Әлемде болып жатқан пандемияға орай, елімізде вирустың таралуына жол бермеу және алдын алу мақсатында 2020 жылдың наурыз айынан бастап халықтың көп шоғырлануы көзделген мәдени-бұқаралық іс-шараларды өткізуге шектеу қойылуына орай&nbsp;шаралар онлайн форматта өткізіліп, әлеуметтік желіде кеңінен насихатталды.
Өткен жылы елімізде тұңғыш рет ұйымдастырылған онлайн форматтағы«Сәлем, Елорда!» І республикалық өнер фестиваліне облыстық филармонияның өнер ұжымдары қатысты. Сонымен қатар аймақта тұңғыш рет Абай Құнанбайұлының 175 жылдық мерейтойына орай «Абай» операсы сахналанды. Тағы бір жағымды жаңалық облыста Қорқыт ата мұраларының ЮНЕСКО-ның материалдық емес мәдени мұралар тізіміне енгізілуіне орай филармония жанынан қобызшылар ансамблі құрылды.
Брифинг барысында былтыр облыстық филармония өнер ұжымдарының дайындық залына арналған қосымша 785,56 шаршы метр қосалқы ғимарат салынып, пайдалануға берілгені айтылды.
<blockquote>
 “Жаңа ғимаратта дайындық залы, тігін цехы, асхана және киім қоймасы орналасқан. Ғимарат кең ең бастысы жарық, әртістердің шығармашылықпен айналысуына қолайлы. Биыл карантиндік талаптарды сақтай отыра жаңа маусымды 11 қаңтарда басталды,- деді облыстық филармония директоры Талғат Мақашов.
</blockquote>
Сонымен қатар филармония жанындағы «Әдемі» балалар музыкалық театр-студиясы – Мәскеу қаласындағы «Шығармашыл жастарды қолдау жөніндегі іс-шараларды ұйымдастыру» әлеуметтік жобасына онлайн түрде, Г.Остердің «Мазасыз тиын» қойылымымен қатысты.
Классикалық орындаушы Сымбат Тасбергенова – КСРО халық артисі Н.Тілендиевтың 95 жылдығына арналған «Әлқисса» фестивалінің аясында өткен республикалық онлайн-конкурстан, «Ақмешіт» фольклорлық ансамблінің әртісі, домбырашы Алмаз Әлжанов – М.Сыдықовтың 80 жылдығына арналған «Домбыра –жүрек жырлайды» атты республикалық онлайн-күйшілер конкурсынан жүлделі орындарды иеленді.

Қызылордада филормония жанындағы қосымша ғимарат пайдалануға берілді

<a href="https://kyzylorda-news.kz/">Kyzylorda-news.kz.</a>&nbsp;Бүгін Арал ауданының әкімі Мұхтар Оразбаевтың халық алдындағы есепті кездесуі бастау алды. Бұл – жыл сайын дәстүрлі түрде өтетін маңызды жиын.
Биыл пандемия жағдайына байланысты және тұрғындардың қауіпсіздігін қамтамасыз ету мақсатында есепті кездесулер онлайн форматта өткізілуде.
Аудан әкімі алғашқы болып «Zoom» бағдарламасы арқылы Аққұм, Қарақұм, Жіңішкеқұм, Сазды, Мергенсай, Қосаман ауылдық округтерінің тұрғындарымен онлайн байланысқа шықты. Кездесу барысында өткен жылы атқарылған жұмыстарды баяндап, алдағы жоспарлармен бөлісті.
<blockquote>
 «Өткен жылы ауданда «Жұмыспен қамтудың 2020-2021 жылдарға арналған жол картасы» бағдарламасы шеңберінде 16 жоба іске асырылды. Бұдан бөлек, барлығы 3,1 млрд теңгеге құрылыс жұмыстары атқарылды. Оның ішінде Арал қаласынан 1 қабатты 4 пәтерлі 10 тұрғын үй, Арал қаласынан қатты тұрмыстық қалдықтарға арналған полигон, 250 орындық оқушылар үйінің құрылысы жүргізіліп, пайдалануға берілді. Сондай-ақ, Сексеуіл кентіндегі 300 орындық мектеп құрылысы қарқынды жүргізілуде. Мемлекеттік-жекешелік әріптестік аясында Шижаға елді мекенінен дәрігерлік амбулатория ғимараты салынып, тұрғындар игілігіне берілді. Арал қаласындағы 33 көшенің 25-не асфальт жабындысы, 8 көшеге қиыршық тас төселді. Шөміш, Қарашалаң елді мекендерімен Арал қаласындағы №1 мөлтек ауданы ауыз су жүйесіне қосылды. Жақсықылыш кентіне көгілдір отын жеткізілді», – деген аудан әкімі жыл көлеміндегі жүргізілген жұмыстарға кеңірек тоқталып өтті.
</blockquote>
Жыл бойы атқарылған жұмыстармен жан-жақты танысқан елді мекен тұрғындары жиында өздерін толғандырған ұсыныстарын жеткізді. Аққұм ауылдық округінің тұрғындары балабақша мен көгілдір отын мәселесін, Қарақұм мен Жіңішкеқұм ауылдық округінің тұрғындары жол құрылысының аяқталуын сұраса, Қосаман мен Мергенсай халқы жол және ауыз су мәселесінің шешілуін назарға алуды ұсынды. Сазды ауылдық округінің тұрғындары ауыл көшелерін толықтай жарықтандыру қажеттігін айтты.
Ауыл тұрғындары тарапынан туындаған сауалдарға тиісінше жауап берген аудан әкімі қозғалған мәселелер назарда болып, шешімін табуы үшін тиісті шаралар жүргізілетінін мәлімдеді.
<img src="https://kyzylorda-news.kz/wp-content/uploads/2021/01/144035465_2899638323697868_2955279564529542494_o.jpg" alt="" />
<img src="https://kyzylorda-news.kz/wp-content/uploads/2021/01/143860888_2899638223697878_7084255276371149785_o.jpg" alt="" />

Арал ауданында 16 жоба іске асырылды

<a href="https://kyzylorda-news.kz/">Kyzylorda-news.kz.</a>&nbsp; Қазақстан бойынша 30 қаңтар-1 ақпан аралығына арналған ауа райы болжамы жарияланды.
«Қазгидромет» РМК баспасөз қызметінің мәліметінше, атмосфералық фронттар республиканың солтүстік-батыс, батыс және оңтүстік аймақтарына әсер етеді.
Жаңбыр мен қар жауады. Көктайғақ болып, жел күшейеді.
Қазақстанның қалған аумағында жауын-шашын жаумайды, күн ашық.
Республика бойынша кей жерлерде тұман байқалады.

Демалыс күндеріне арналған ауа райы болжамы

<a href="https://kyzylorda-news.kz/">Kyzylorda-news.kz.</a>&nbsp;Елде салалық тілшілерді даярлау жобасы қолға алынды.
Оның аясында 8 ақпаннан бастап 50 тілші Асфендияров атындағы Қазақ ұлттық медицина университетінде медицина саласы бойынша біліктілігін арттырады. Діни сауаттылық турасында 50, экология тақырыбында 50 журналист қайта даярлықтан өтеді. Алдағы уақытта ауылшаруашылық, құқық, экономика және әлеуметтік еңбек салалары бойынша да тілшілерді оқыту жүзеге асырылмақ. Бұл әрине бірінші кезекте отандық контенттің сапасын көтеруге мүмкіндік береді. Атқарылған жұмыстың арқасында былтыр елде шетелдік ақпарат құралдарының үлесі 30 процентке қысқарды. Мемлекеттің бірыңғай ақпараттық саясатының механизімін заңды тұрғыдан қамту үшін БАҚ туралы заң да жаңармақ. Оның жобасы әзірленіп, қоғамның талқылауына салынады. Құжат 2022 жылы қабылданады деп жоспарланған.

БАҚ туралы жаңа заң әзірленеді

<a href="https://kyzylorda-news.kz/">Kyzylorda-news.kz.</a> Қызылорда қалалық Полиция басқармасына 73 жастағы зейнеткер арыз түсіріп, өзінің алданғаны туралы баяндады.
Арызда ағымдағы жылдың 13 қаңтарында 250 000 теңге тұратын құндыз тонын алдап алғанын көрсеткен.
Тәртіп сақшыларының жедел-іздестіру шараларының нәтижесінде 37 жастағы бұрын сотты болған Қызылорда облысының тұрғыны анықталып, ұсталды.
Аталған дерек бойынша Қазақстан Республикасы Қылмыстық кодексінің 190 бабының 1 бөлігі бойынша (алаяқтық, яғни бөтеннің мүлкін жымқыру немесе алдау немесе сенімді теріс пайдалану жолымен бөтен мүлiкке құқықты иемдену) сотқа дейінгі тергеп-тексеру амалдары жүргізілуде.

Қызылордада алаяқ зейнеткердің құндыз тонын алып кеткен

<a href="https://kyzylorda-news.kz/">Kyzylorda-news.kz.</a> Қызылордада қылмысқа күдікті ретінде ұсталғандар уақытша ұстау абақтысында емін-еркін, өзіне жайлы камераны өзі таңдап жүре беретін сияқты. Әлеуметтік желіде пара алды деп күдікке ілінген полиция басқармасы басшысының орынбасары өзіне отыратын камераны шыр айналып іздеп жүр деген бейнежазба тарады, деп хабарлайды&nbsp;<a href="https://www.youtube.com/watch?v=neNA5yvPE7A&list=PLn2OyECVOtB8WO3S0upqr5HGY4yl3UILe&index=11">“Информбюро”</a>.
Желіде тараған жазбада екі азамат уақытша ұстау изоляторының дәлізінде әр камераның есігін бір ашып жүр. Құдды бір ыңғайлы камераны күдіктінің өзі таңдап жүргендей.
Бұл көріністегі полицейдің қасындағы жан жақында ғана пара алды деп күдікке ілінген ішкі істер басқармасы басшысының орынбасары делінген ақпарат желіде тарады.
Бірақ полиция департаменті шендінің күдікті ретінде ұсталғанын растағанымен, видеодағы азаматтың кім екені әлі белгісіз екенін айтады. Қазіргі кезде осыған қатысты тексеру жұмыстары жүргізіліп жатыр.

Қызылорда: Бұрынғы полиция қызметкері түрмеден өзіне жайлы камера іздеп жүр (ВИДЕО)

<a href="https://kyzylorda-news.kz/">Kyzylorda-news.kz</a>. «Қызылорда-Құмкөл» тас жолындағы «Мерси КЗ» ЖШС-не тиесілі контейнерлер өртеніп кетті.
Оқиға орнына №5 өрт сөндіру бөлімі жедел жетіп, барлау жұмыстарын жүргізген. Нәтижесінде контейнер ішінен 3 жұмысшыны алып шыққан. &nbsp; Өрт салдарынан 50, 24 және 29 жастағы азаматтар жарақаттанған. Олардың жағдайлары ауыр.
<blockquote>
 «Күйік шалған азаматтар облыстық медициналық орталығының жансақтау бөлімінде дәрігерлердің бақылауында. Өрт&nbsp; сағат 12-ден 20 минут кеткенде толық сөндірілді. Жалын 60 шаршы метр аумақты шарпыған. Қазіргі таңда арнайы өрт зерттеу сараптамасы тағайындалды. Өрттің шығу себебі мен шығыны анықталуда. &nbsp;Өртті сөндiруге 7&nbsp; өрт сөндiрушi 2 арнайы техникамен жұмылдырылды», – делінген ТЖ департаментінің таратқан хабарламасында. &nbsp;
</blockquote>
<img src="https://kyzylorda-news.kz/wp-content/uploads/2021/01/6cc59e1c-1574-4a97-98aa-11d23157519a.jpeg" alt="" />
<img src="https://kyzylorda-news.kz/wp-content/uploads/2021/01/7154e8b9-3d2a-4beb-9ab1-55677cf7987a.jpeg" alt="" />
<img src="https://kyzylorda-news.kz/wp-content/uploads/2021/01/ac216025-cbed-4a13-9744-e3199e036e99.jpeg" alt="" />

Қызылордада контейнерлер өртеніп, 3 адамды күйік шалды

<a href="https://kyzylorda-news.kz/">Kyzylorda-news.kz.</a> Сыр елінде экономикаға табыс алып келетін шағын өндіріс орындары Кәсіпкерлікті қолдау картасына енуде. Өңірде өткен жылы Индустрияландыру бағдарламасының ІІІ бесжылдығы басталған. Осы кезге дейін І және ІІ бесжылдық аясында құны 150 млрд.теңгені құрайтын 26 жоба жүзеге асқан. Нәтижесінде 1,7 мың қызылордалық жұмыс көзін тапты.
Өндіріс орындарын көбейту бағытында 2020 жылы құны 68,1 млрд.теңгені құрайтын 20 жоба Өңірлік кәсіпкерлікті қолдау картасына қосылған. Ал, биыл 19 жаңа жоба картаға енеді. Оның 5-уі Қызылорда қаласынан, әр ауданнан 2 жобадан еніп отыр. Құрылыс индустриясы бойынша шағын арматура зауыты, асфальтбетон зауытын салу, шыны талшықты және композитті материалдар өндіру, құрғақ қоспаларын өндіру зауыты мен Жаңақорған ауданынан керамзит және керамзит блоктарын өндіру қолға алынады.
Ал, тау-кен және металлургия өнеркәсібі саласында өңірде полиметалл кендерін қайта өндейтін тау-кен комбинаты, кварц құмын байыту комбинатының І кезеңі іске асады. Ауыл шаруашылығы бағытында 11 жоба арқылы 873 жұмыс орны ашылмақ.
Айта кетейік, аймақта бір жыл ішінде іске қосылған жобалар нәтижесінде 34,9 млрд.теңгенің өнімі өндірілген.

Қызылордада индустриялық 19 жаңа жоба кәсіпкерлікті қолдау картасына енді

<a href="https://kyzylorda-news.kz/">Kyzylorda-news.kz</a>.&nbsp; Қазақстандықтар жұмыс берушінің қанша жалақы, табыс салығы, зейнетақы жарналары және әлеуметтік аударымдарын есептегенін тексере алады, деп хабарлайды <a href="https://lenta.inform.kz/kz/kazakstandyktar-zhalakysynyn-kansha-payyzy-salyk-pen-zeynetakyga-ustalatynyn-teksere-alady_a3746689">ҚазАқпарат</a>.
Мемлекеттік кірістер комитеті «e-Salyq Azamat» («App Store» және»Play Market») мобилді қосымшасындағы «қызметкердің еңбегіне ақы төлеу» сервисін іске қосты.
Ол қызметкерге есептелген жеке табыс салығының, зейнетақы жарналарының, міндетті әлеуметтік аударымдардың және медициналық сақтандыруға әлеуметтік аударымдардың сомаларын қарауына мүмкіндік береді.
Сервис 2020 жылдың 1 тоқсанынан бастап салық кезеңдері бойынша қолжетімді.
Деректерге қолжеткізу үшін электрондық цифрлық қолтаңба арқылы немесе SMS пароль арқылы сәйкестендіруден өту қажет. SMS мобилді азаматтар базасында (ХҚКО) тіркелген ұялы телефон нөміріне түседі.
Деректерді қарау үшін «Салық әмияны»,&nbsp;«Қызметкердің еңбегіне ақы төлеу»&nbsp;бөлігіне өтіп, жыл мен кезеңді таңдау қажет.
Бастапқы кезеңде мына жеке тұлғалар аталған деректерді қарай алады:
– жұмыс берушілер бюджетпен есеп айырысу кезінде жалпыға бірдей белгіленген режимді қолданса;
– немесе жұмыс берушілер оңайлатылған декларация негізінде арнайы салық режимін қолданса.
Мәліметтер болмаса немесе деректер сәйкес келмесе, салық есептілігін түзету үшін жұмыс берушіге жүгіну қажет.
МКК «E-Salyq Azamat» тегін мобилді қосымшасын «App Store» немесе «Play Market» – тен жүктеуге болатынын еске салады.

Қазақстан және Қызылорда облысының жаңалықтары