<a href="https://kyzylorda-news.kz/">Kyzylorda-news.kz</a>. Қызылорда облысы Полиция департаментінің Жаңақорған аудандық полиция бөліміне Қожакент ауылының тұрғыны белгісіз біреу үйінің терезесін сындырып кіріп, қонақ бөлмесінен қымбат теледидарын және жатын бөлмесінен нан пісіретін пешін ұрлап кеткені туралы арызданған.&nbsp;
Аудандық полиция қызметкерлерінің жүргізген&nbsp; жедел іздестіру нәтижесінде 23 жастағы бұрын сотты болған азамат анықталып, ұсталды. Ол уақытша ұстау изоляторына қамауға алынды. Күдіктіден айғақ заттар алынды. &nbsp;
Аталған дерек бойынша Қазақстан Республикасы Қылмыстық кодексінің 188-бабының 3-бөлігімен (тұрғын үй жайға заңсыз кірумен жасалған ұрлық) сотқа дейінгі тергеп-тексеру амалдары жүргізілуде.

Жаңақорғанда теледидар мен пеш ұрлаған тұрғын ұсталды

<a href="https://kyzylorda-news.kz/">Kyzylorda-news.kz</a>. Қызылорда облысының бас мемлекеттік санитариялық дәрігері Динара Жанабергенова №1 емханада коронавирус инфекциясына қарсы Ресейде өндірілген «Гам Ковид Вак» екпесін салдырды.
Алдымен емхана дәрігерімен денсаулық жағдайы тексеріліп, эпидемиологиялық анамнезі жинақталды. Аталған вакцина қабылдауға ешқандай қарсы көрсетілімдер болған жоқ.
Екпе салынғаннан кейін 30 минут дәрігер қадағалауында болу үшін медициналық бақылау аймағына жіберіп, вакцинадан кейінгі күтім мен сақтық шаралары туралы түсіндірме жүргізілді.
Айта кетейік, бүгінде аймаққа 1000 доза вакцина жеткізіліп, иммунобиологиялық препараттарды сақтау қоймасына әкелінді.

Қызылорда облысының бас мемлекеттік санитарлық дәрігері вакцина қабылдады

<a href="https://kyzylorda-news.kz/">Kyzylorda-news.kz</a>. Өңірде өткен жылы облыстық прокуратура 64 тексеріс жүргізіп, 204 заңбұзушылық анықтады. Нәтижесінде 195 мың адамның құқығы қорғалды. Ал 933 адам тәртіптік және әкімшілік жауапқа тартылды. Бұл туралы Өңірлік коммуникациялар қызметінің ақпарат алаңында өткен брифингте облыс прокурорының орынбасары Нұрлан Ерманов мәлімдеді.
Мемлекеттік бағдарлама арқылы жұмысқа жалған орналасудың 495 дерегі анықталып, 40 адам тәртіптік және әкімшілік жауаптылыққа тартылды. Нәтижесінде 101 адам жұмысқа тұрды.
<blockquote>
 “Өткен жылы сотқа прокурордың қатысуымен 823 азаматтық, 5367 әкімшілік іс қаралды. Мұнан өзге, прокурордың өтініш хатына сәйкес 97 жеке қаулы қабылданса, жауапты тұлғалардың тәртіптік жауапкершілігін шешу мақсатында 29 қадағалау актісі енгізіліп, 31 тұлға тәртіптік жауапкершілікке тартылды”, – деді Нұрлан Ермекбайұлы.
</blockquote>

Қызылордада 195 мың адамның құқығы қорғалды

<a href="https://kyzylorda-news.kz/">Kyzylorda-news.kz</a>. Бүгін Қызылорда облысының әкімі Гүлшара Әбдіқалықова қалалық №3 емханада «COVID-19» инфекциясына қарсы «Спутник V» ресейлік вакцинасын салдырды. Еліміз бойынша 1 ақпан күні ерікті түрде коронавирусқа қарсы вакциналау жұмыстары басталды.
<blockquote>
 “Мен бүгін ерікті түрде өзіме екпе ектірдім. Дәрігер мамандар екпеден кейін ине салынған орынға су тигізбеуге және егу орнын жылы ұстауға кеңес берді. Мамандар кеңесіне сәйкес әрекет ететін боламын. Мына әлемді жайлаған індеттің таралу қаупін тек екпе салдыру арқылы ғана төмендете аламыз! Сол себепті барша халықты коронавирустан қорғану үшін екпе салдыруға шақырамын, – деді облыс әкімі Гүлшара Әбдіқалықова.
</blockquote>
Егу жұмыстары I кезеңде медицина саласының қызметкерлеріне, оның ішінде қабылдау, жұқпалы аурулар бөлімінің, жансақтау және хирургиялық бөлім қызметкерлеріне жүргізілмек. ІІ кезеңде мұғалімдерге және жұқтыру қаупі неғұрлым жоғары болып саналатын жұмыс орындарының қызметкерлеріне салынатын болады.
Қызылорда облысының халқына алғашқы кезеңде 80 000 доза вакцина салынады деп күтілуде.
Айта кетейік, Бүгін өңірімізге «Спутник V» ресейлік вакцинасының 1000 дозасы жеткізілді. Қалғаны кезең-кезеңімен келетін болады. Бұл жұмыстарға алғашқыда №1, №3 және №6 қалалық емханалардан 3 егу кабинеттері дайындалды және екпе жұмыстарын жүргізуге облыс бойынша барлығы 133 мейірбике, 89 дублер тартылған.

Гүлшара Әбдіқалықова «COVID-19» инфекциясына қарсы екпе салдырды

<a href="https://kyzylorda-news.kz/">Kyzylorda-news.kz</a>. Нью-Йоркте қазақ радиосы іске қосылды. Нақты айтқанда, «Freedom FM» радиосы күнделікті 2 сағатты қазақ тіліндегі жаңалық пен музыкаға арнайды, деп хабарлайды <a href="https://lenta.inform.kz/kz/qazaq-time-almatylyk-zhigit-n-yu-yorkte-kazak-radiosyn-ashty_a3747365">ҚазАқпарат.</a>
Данияр Қожан – Алматының тумасы. Ол қаладағы Қазақ гуманитарлық заң университетін «құқықтану» мамандығы бойынша тәмамдаған.
Нью-Йоркте тұрып, жұмыс істеп жатқанына 3 жылдан асқан. Онда Данияр адвокаттың PR менеджері болып қызмет етеді.
Сондай-ақ, отандасымыз АҚШ-та қазақ мәдениетінің өркендеуіне үлес қосып жүр.
Нью-Йорктегі «Qazaq time» радиосы санаулы күн бұрын ғана алғаш эфирге шықты.
Қазақстанның Нью-Йорктегі бас консулы Алмат Айдарбеков, «Жұлдыз ФМ» радиосындағы әріптестер және Нью-Йорктегі қазақ полицейі Димаш Ниязов оның бағдарламасына қонақ болған.
<blockquote>
 «Қазіргі заманда радионың рөлі бұрынғыдай әлі де зор. Ол тыңдармандарын жоғалтқан жоқ және қарқынды дамушы БАҚ болып отыр. Америкада қазақ радиосы эфирін таратуды қолға алдым. Сырт жерде бізге Қазақстан жетіспейді. Осы орайда қазақ радиосын ашу таңдауын жасадым. Мен қазақ халқының үнін бүкіл АҚШ-қа жеткізгім келеді. Осылайша ана тіліміздің дамуына өз үлесімді қосқым келеді», – деді Данияр Қожан.
</blockquote>

Қазақ жігіті Нью-Йоркте қазақ радиосын ашты

<a href="https://kyzylorda-news.kz/">Kyzylorda-news.kz</a>. Бүгін облыс көлемінде «Covid-19» инфекциясына қарсы егу жұмыстары басталды.Облыстың бас дәрігері Пазилов Сабит Бексеитұлы алғашқылардың бірі болып №3 қалалық емханада «Covid-19» қарсы Ресейде өндірілген «Спутник V» екпесін салдырды.
Алдымен емхана дәрігерімен денсаулық жағдайы тексеріліп, эпидемиологиялық анамнезі жинақталды. Аталмыш вакцина қабылдауға ешқандай қарсы көрсетілімдер болмағандығы себепті екпе егілді.
Екпе салынғаннан кейін 30 минут дәрігер қадағалауында болу үшін медициналық бақылау аймағына жіберіп, мамандар вакцинадан кейінгі күтім мен сақтық шаралары туралы түсіндірме жүргізіп өтті.
Айта кетейік, Қызылорда облысының халқына 80 000 доза вакцина салынады деп күтілуде. Бүгінде аймаққа 1000 доза вакцина жеткізіліп, №1, 3 және 6 қалалық емханаларда екпе жұмыстары жүргізілуде.
Жалпы екпе жұмыстарын жүргізуге облыс бойынша барлығы 133 мейірбике тартылып отыр.

Қызылорда облысының бас дәрігері «Спутник V» вакцинасын салдырды

<a href="https://kyzylorda-news.kz/">Kyzylorda-news.kz</a>.&nbsp;Бүгін облыс әкімі Гүлшара Әбдіқалықова жұмыс сапарымен Сырдария ауданына барып, бірқатар әлеуметтік маңызы бар нысандарды аралады.
Алдымен аймақ басшысы Жетікөл ауылдық округіне ат басын бұрып, «Жұмыспен қамту жол картасы» шеңберінде жүзеге асқан тұрғын үйлерді сумен жабдықтау жүйесін қайта жаңғырту жұмыстарымен танысты. «Корпорация Әлем-Құрылыс» ЖШС-і қолға алған жобаның құны 144,5 млн.теңгені құрайды. Қайта жаңғырту және кеңейту жұмыстары арқылы 18 жұмыс орны ашылған. Ауыз су құбыры мұнарасында аудан әкімі Талғат Дүйсебаев Жетікөл елді мекенінің тұрғындары үшін маңызды тұрғын үйлерді сумен жабдықтау жұмыстарының орындалу барысын баяндады.
Мұнан кейін, облыс әкімі ауылдық округтегі №174 орта мектептің және «Балауса» шағын орталығының жұмысымен танысты. 320 орындық мектепте 158 оқушы білім алады. Оқу ордасы жанынан 25 орындық «Балауса» шағын орталығы ашылған. Бүгінгі күні мектепте 60 қызметкер, шағын орталықта 11 маман жұмыс атқарады. Гүлшара Әбдіқалықова шағын орталықтың жұмысын бағамдап, балалардың сақтығы мәселесіне жете мән беруді тапсырды.
Жұмыс сапары барысында облыс әкімі Тереңөзек кентіне барып, кенттегі газ құбырлары және кварталішілік газ құбырларының құрылысымен танысып, ауыл тұрғындарына көгілдір отын беру рәсіміне қатысты. Жалпы құны 2,4 млрд. теңгені құрайтын Тереңөзек кентіндегі кварталішілік газ құбырлары желісінің құрылысы 2019-2020 жылдары жүзеге асты. Облыс әкімі 11 мыңнан астам тұрғынды газбен қамтамасыз етуге мүмкіндік берген айтулы күнде сырдариялық тұрғындарға табыс тілеп, қуаныштарына ортақтасты.
<blockquote>
 “Кент орталығына қосылып жатқан, алау отынымыз, көгілдір газ әр отбасына өзінің жылылығымен келе берсін. Әлемді шарпыған дағдарысқа қарамастан әлеуметтік маңызы бар құрылыс, газдандыру секілді күрделі бастамаларды кейінге қалдырмай, іске асырып келеміз. Өткен жылы Арал ауданындағы Жақсықылыш, Қазалы ауданындағы Мұратбаев және Шиелі ауданындағы Байсын елді мекендері газге қосылды. Нәтижесінде қазіргі таңда облыс тұрғындарының 65 пайызы табиғи газға қол жеткізіп отыр.Аудан орталықтарын толық газдандырғаннан кейін облыстағы елді мекендерге көгілдір отын жеткізу жоспарымызда бар. Бұл – бір ауданның ғана емес, облыстың қуанышы. Әр отбасынан жылу кетпесін, Отанымыздың қуаты арта берсін,-деді облыс әкімі Гүлшара Әбдіқалықова.
</blockquote>
Елді-мекендерді газға қосу кезең-кезеңімен іске асады. Сырдария ауданында жоба бойынша бірінші кезекте Тереңөзек кентіне жақын орналасқан Қалжан ахун, Сәкен Сейфуллин, Асқар Тоқмағамбетов және Сырдария өзенінің оңтүстігіне газ құбырын өткізіп, Шаған елді мекені көгілдір отынға қосылады.
Айта кетейік, облыста Арал, Қазалы, Шиелі, Жаңақорған аудандарының орталықтары мен Байқоңыр қаласы көгілдір отынға қосылған. Қалған 3 аудан орталығы Жосалы, Жалағаш, Тереңөзек, сондай-ақ, Сексеуіл, Төретам, Ақай елді мекендерін газдандыру кезең-кезеңімен жүзеге асуда.
Кентті көгілдір отынға қосу рәсімінде аудандық ардагерлер кеңесінің төрағасы Қайролла Әбенұлы ел игілігіне бағытталған, әлеумет үшін өзекті мәселенің шешімін тапқанын тілге тиек етіп, ауыл тұрғындарын құттықтады.
Мұнан кейін аймақ басшысы Гүлшара Әбдіқалықова газ алауы жағылған Ғани Мұратбаев көшесіндегі №94 үйдің тұрғыны еңбек ардагері Қонысбек Әбсадықовтың үйіне барып, отбасының қуанышымен бөлісті.
Сырдария ауданындағы жұмыс сапарын қорытындылаған облыс әкімі аудан әкімі Талғат Дүйсебаевқа бірқатар маңызды тапсырмалар жүктеді. Коронавирустық инфекциядан сақтану бағытындағы сақтық шараларын сақтау және карантин талаптарын ескеруді тапсырды. Сондай-ақ, әлеуметтік-экономикалық табыс көзін құрайтын маңызды жобаларды іске асыруды қаперге салды.
<img src="https://kyzylorda-news.kz/wp-content/uploads/2021/02/145531074_3089660837803631_7576006920823915477_o.jpg" alt="" />
<img src="https://kyzylorda-news.kz/wp-content/uploads/2021/02/144803046_3089658941137154_2158747427886490869_o.jpg" alt="" />
<img src="https://kyzylorda-news.kz/wp-content/uploads/2021/02/144801247_3089659141137134_6114547432128050483_o.jpg" alt="" />
<img src="https://kyzylorda-news.kz/wp-content/uploads/2021/02/145092147_3089661417803573_4943279685175882001_o.jpg" alt="" />
<img src="https://kyzylorda-news.kz/wp-content/uploads/2021/02/144920071_3089661924470189_6498901193183124965_o.jpg" alt="" />
<img src="https://kyzylorda-news.kz/wp-content/uploads/2021/02/144858381_3089662411136807_8971989196603029636_o.jpg" alt="" />

Гүлшара Әбдіхалықова Сырдария ауданына жұмыс сапарымен барды

<a href="https://kyzylorda-news.kz/">Kyzylorda-news.kz</a>.&nbsp;«Жас геолог» корпоративті қоры мен Назарбаев Университеті бірлесіп өткізген IESO-2021 халықаралық олимпиадасының республикалық кезеңінде Сыр өңіріндегі Зияткерлік мектебінің 4 оқушысы 2 алтын, 1 күміс және 1 қола медалін иеленді.
Аталмыш білім додасының іріктеу кезеңіне 80-ге жуық жоғары сынып оқушылары қатысты. Еліміздің түкпір-түкпірінен жиналған дарындылар ағылшын тілінде геология, геофизика, метеорология, астрономия және мұхиттану пәндерінен бақ сынасты. Қызылордалық зияткерлер Жер туралы ғылымдары бойынша жақсы білім көрсеткіштерімен ерекшеленіп, нәтижесінде 11-сынып оқушылары Жангерей Зинелов пен Данагүл Келдібай олимпиада жеңімпазы атанды. Сондай-ақ, Арайлым Байкемел және Баянсұлу Төлебай жүлделі 2-ші және 3-ші орындарға ие болды.
<blockquote>
 “Үздіктердің қатарынан көріну үшін осы ғылымдар туралы жетік ізденіп, жеке зерттеу жүргіздім. Ғаламтор желісі мен энциклопедиялардан қосымша ақпарат алып, білімімді толықтырдым”, – дейді Жангерей Зинелов.
</blockquote>
Айта кету керек, жеңіс тұғырынан көрінген жас зияткерлер үстіміздегі жылдың тамыз айында Қазақстан құрамасында өзге елдердің жас геологтарымен сынға түспек. Биыл IESO-2021 олимпиадасы онлайн форматта Пекинде өткізу жоспарланған.
<blockquote>
 “Біздің оқушылар – бұл білім бәйгесінің жыл сайынғы қатысушылары. Осындай шаралар арқылы геологтардың жаңа буынын қалыптастыру қолға алынған және бұл олимпиада балалардың ой-өрісін кеңейтуге үлкен септігін тигізеді”, – дейді жеңімпаз оқушылардың жетекшісі, география пәнінің мұғалімі Мұхтар Әбілмаев.
</blockquote>
<img src="https://kyzylorda-news.kz/wp-content/uploads/2021/02/zh.jpg" alt="" />

IESO-2021: Қызылордадағы NIS оқушылары  халықаралық олимпиадаға жолдама алды

<a href="https://kyzylorda-news.kz/">Kyzylorda-news.kz</a>.&nbsp;Бүгін Қызылорда облысында COVID-19-ға қарсы вакцинация басталды. Облыс әкімінің орынбасары Серік Ахмет «Спутник V» вакцинасын аймақта бірінші болып салдырды.
Бүгін таңертең облысқа «Спутник V» вакцинасының 1 мың дозасы келді. Жалпы жыл ішінде 80 мың доза кезең кезеңімен әкелінеді. Бірінші кезекте ерікті түрде медицина қызметкерлеріне, педагогтерге, созылмалы аурулармен ауыратын топтағы адамдарға салынады. 18 жасқа дейінгі балалар және 65 жастан асқар қарияларға екпе салынбайды. Бүгінде облыс бойынша 14 егу кабинеті белгіленді. Бұдан бөлек, шалғай елді мекенде тұратын азаматтарға вакцина салу үшін 46 жылжымалы егу бригадасы ұйымдастырылды.
Қазір облыс «жасыл» аймақта. Эпидемиологиялық ахуал тұрақты. Күрделенген жағдайда 8 стационар, 61 алғашқы медициналық-санитарлық мекеме жұмылдырылатын болады. 54 фильтр кабинеті, қосымша 79 телефон шақырулар мен консультациялар үшін жұмыс істейді. Сондай-ақ, үй жағдайында қызмет көрсету үшін қосымша 81 автокөлік қарастырылған.
<img src="https://kyzylorda-news.kz/wp-content/uploads/2021/02/4-1.jpeg" alt="" />
<img src="https://kyzylorda-news.kz/wp-content/uploads/2021/02/2.jpeg" alt="" />

Қызылорда облысы әкімінің орынбасары «Спутник V» вакцинасын салдырды

Тақырыптың өзектілігі. Бронх демікпесінің қоғамға және әр науқасқа жоғары таралуы мен әлеуметтік-экономикалық әсері қауіп факторларының алдын алуды және уақтылы анықтауды, терапияның жеткіліктілігін, аурудың өршуінің алдын-алуды қажет етеді және бұл процесте мейірбикеге үлкен рөл жүктелген.
Бүгінгі таңда бронх демікпесі-адамның тыныс алу жүйесінің ең көп таралған ауруы. Дүниежүзілік денсаулық сақтау ұйымы демікпені созылмалы бронх ауруы ретінде анықтайды, ол мезгіл-мезгіл қайталанатын тұншығу және ысқырық тыныс алу шабуылдарымен сипатталады. Бүгінгі таңда бронх демікпесі-адамның тыныс алу жүйесінің ең көп таралған ауруы. Дүниежүзілік денсаулық сақтау ұйымы демікпені созылмалы бронх ауруы ретінде анықтайды, қайталанатын тұншығу шабуылдарымен сипатталады. Бронх демікпесі адамның өмір сүру сапасын төмендетіп қана қоймай, аурудың ауырлығына байланысты өмірге қауіп төндіретін асқынулар тудыруы мүмкін [13].
Соңғы жиырма онжылдықта бронх демікпесімен ауыру жиілеп кетті, ал қазіргі кезде әлемде Дүниежүзілік денсаулық сақтау ұйымының мәліметтері бойынша шамамен 235 миллион адам астмадан зардап шегеді. Уақыт өте келе демікпенің таралуы артып, 2025 жылға қарай бүкіл әлемде тағы 100 миллион адамда демікпе дамиды деп күтілуде [18]. Демікпемен байланысты өлімнің көпшілігі табысы төмен және орташа табысы төмен елдерде кездеседі. Сондай-ақ, ДДҰ-ның 2016 жылғы желтоқсанда шығарған соңғы бағалауы бойынша, 2015 жылы астма салдарынан 383 000 адам қайтыс болды. Өлімнің көп бөлігі қарт адамдар арасында болады [1].
АҚШ-та 25 миллионнан астам американдықтар бронх демікпесімен ауырады. Бұл ересектердің 7,7 пайызы және балалардың 8,4 пайызы. Демікпе барлық жастағы, жыныстық және нәсілдік топтарда өседі [3]. Демікпе ересек еркектерге қарағанда ересек әйелдерде жиі кездеседі. АҚШ-тағы африкалық американдықтар демікпеден басқа нәсілдерге немесе ұлттарға қарағанда жиі өледі.
Қауіпті факторлардың алдын алудың маңыздылығы, шиеленісті емдеу мен алдын алудың дұрыстығы жоғары таралуы мен әлеуметтік-экономикалық маңыздылығымен байланысты. Бұл жерде мейіргердің рөлі зор [29]. Осы сұрақтар көптеген зерттеушілерді қызықтырды, атап айтқанда Ю.Г. Короткова (2012) өзінің мақаласында БД емдеу мен алдын-алуда мейірбикенің рөлі өте зор дейді. Шындығында, дәрігерлерге қарағанда, мейірбикелер пациентпен байланыс орнатуды оңай және жылдамырақ етеді. Пациенттер мейірбикемен сөйлескен кезде айтарлықтай еркін сезінеді, олар денсаулығына байланысты мәселелерді сеніп тапсыра алады. Осы проблеманы түсіну және оның салдары бола отырып, мейірбике осындай науқастарды оқыту және оларға көмектесу үшін бірқатар жұмыстар жүргізе алады. Көрсетілетін көмектің мөлшері әртүрлі болуы мүмкін. Әр пациенттің жеке қоздырғыш факторларының жиынтығы бар, яғни триггерлер, осыған байланысты аурудың ағымын мұқият талдап, маңызды қоздырушы факторларды анықтап, оңалту кезеңіндегі алдын-алу шараларының тізімін жасау керек [30].
Демікпені емдеудегі барлық жетістіктерге қарамастан, ауру мен өлім өсуде. Мейіргер де, пациенттер де жеткіліксіз емдеуде және ауруды дұрыс басқармауда маңызды рөл атқарады. Бұл демікпені емдеуде алаңдаушылық тудырады. Егер пациентке ауру және оны емдеу туралы негізгі білім болмаса, қолда бар құралдарды тиімді пайдалану мүмкіндігі жоқ. Алайда медбикелер демікпенің алдын-алу немесе азайту жолында мүгедектік пен өлім-жітімді азайту үшін демікпенің алдын-алу және басқару стратегияларына назар аудара отырып, маңызды рөл атқарады. Осылайша, мейірбикелердің демікпелі пациенттерге күтім жасаудағы негізгі білімі мен тәжірибесін қамтамасыз ету және жетілдіру және науқастардың нәтижелерін жақсарту үшін мейірбикелік араласу бағдарламасына деген қажеттілік өте жоғары [19].
Зерттеу дизайны: Сапалық зерттеу, феноменальды; рандомизирленген мақсатты, популяцияға негізделген.
Зерттеу әдісінің мақсаты: Брох демікпесімен ауыратын пациенттерге жүргізілетін физиотерапиялық емдік шаралар жайындағы мейіргердің білім деңгейі. Мейіргерлер мен пациенттерге сауалнама жүргізу арқылы мейіргерлердің жұмысын бағалау. Бұл сұрақтарға жауап алуға және осы мәселе бойынша мейіргерлердің пікірін анықтау арқылы зерттеу міндеттеріне қол жеткізуге мүмкіндік береді.
Зерттеу объектісі: 2020 жылы желтоқсан айында Көп бейінді облыстық ауруханасында зерттеу жұмысы жүргізілді. Осы зерттеуді жүргізуде сауалнама алынды. Зерттеуге жалпы 10 мейіргер мен 10 пациент қатысты.
Зерттеу құралы: Сауалнама Пальмова Л.Ю., Ишмурзин Г.П., мен Подольская А.А «Бронх демікпесі бар науқастарды оқыту мен оңалтудағы стационар мейіргерінің рөлі» мақаласына сүйене отырып жасалынды. «Бронх демікпесі бар науқастарды оқыту мен оңалтудағы стационар мейіргерінің рөлі» тақырыбында зерттеу 2018 жылы жүргізіліп 30 пациент мен 30мейіргер қатысқан. Бұл зерттеу бронх демікпесі бар пациенттердің терапевтік практикадағы мейірбикелердің білім беру рөлімен қанағаттануын зерттеуге бағытталған. Осы зерттеудегі сауалнама сұрақтарының үлгісі менің зерттеуімде қолданылды.
Сауалнама барысында орталықтағы мейіргерлердің білім деңгейі қандай екені анықталды. Сауалнамада мейіргерлерге арналған 15 және пациенттерге арналған 15 сұрақтан тұрды. Сұрақтардың әрқайсысына бірнеше сәйкес жауаптар ұсынылды. Респонденттерге ыңғайлы болу және сауалнама нәтижелерін жақсарту үшін екі тілде – қазақ және орыс тілдерінде сауалнама дайындалды. Сауалнама жасырын түрде жүргізілді. Зерттеуге қатысушылардан зерттеуге рұқсат беруге жазбаша түрде келісім алынды.
Қорытынды: Сонымен, жұмыс барысында бронх демікпесінің теориялық аспектілері қарастырылды, сонымен қатар бронх демікпесі бар науқасты күту кезінде мейірбикенің қызметі зерттелді. Тақырыпты зерделеуді қорытындылай келе, зерттеу нәтижелерін қорытындылаймын:
1. Бронх демікпесі-созылмалы сипаттағы емделмейтін ауру. Бронх демікпесінің негізгі симптомы-жөтел, ентігу және тұншығу. Мұндай науқастарға жылына екі рет тексеру қажет, егер жағдайы нашарласа, ауруханаға жатқызу және ауруханада емдеу ұсынылады. Дәрі-дәрмекпен емдеу шабуылдарды тоқтатуға, ауруды бақылауға және науқастың әл-ауқатын жақсартуға бағытталған. Көптеген пациенттер шабуыл кезінде өзін қалай ұстау керектігін біледі. Бронх демікпесі кезінде мейірбикелік күтім науқастың асқыну кезеңінде қажет және белгілі бір жоспарға сәйкес жүзеге асырылады.
2. Бронх демікпесі бар науқасты күту кезінде маңызды орынды мейірбикелік персонал алады, оның міндеттері медициналық нұсқауларды уақтылы орындау, пациенттерге күтім жасау және тағы басқалар. Хендерсон моделіне сәйкес мейірбикелік процесті енгізу мейірбикенің іс-қимыл жоспарын, аурудың ерекшеліктерін ескере отырып, науқастың қажеттіліктерін қанағаттандыруға бағытталған стратегияны анықтайды. Мейірбикенің негізгі міндеттері-науқастарға күтім жасау және асқынулардың алдын алу.
3. Астма кезіндегі мейірбикелік процестің негізгі артықшылықтары-аурудың өршуі кезінде науқастың жағдайын тәулік бойы бақылау және осы кезеңде қауіпсіз және ең қолайлы жағдайларды қамтамасыз ету. Көмек көрсету жүреді есепке алу кезінде жеке тұлғалық қасиеттерін және физиологиялық ерекшеліктерін, науқас. Науқастың проблемалары қазіргі уақытта медбикенің алдында тұрған негізгі міндет ретінде әрекет етеді.
4. Шұғыл көмектен басқа, науқастар мен туыстарға емдеу барысында психологиялық қолдау көрсетіледі. Медициналық қызметкерлер пациентті моральдық және физикалық тұрғыдан одан әрі терапиядан өтуге Мұқият дайындайды. Айта кету керек, астмамен ауыратын адамның психофизикалық жағдайы маңызды емес. Шиеленістер мен ремиссиялардың саны, сондай-ақ аурудың ағымы осы факторға байланысты. Шығару алдында науқас медбикеден толық ұсыныстар жиынтығын алады, егер тыныс алу пайда болса, жағдайдан қалай шығу керек, қандай дәрі-дәрмектер болуы керек, медициналық тамақтануды қалай ұйымдастыру керек және күннің қандай режимін сақтау керек. Сонымен, қазіргі уақытта мейірбике дәрігердің басшылығымен жұмыс істейді және бұл тәсіл пациенттердің барлық қажеттіліктерін қамтамасыз ете алады. Алайда, бүгінгі күні мейірбикенің рөлі дәрігердің тағайындауларын техникалық орындаушыдан медициналық көмек көрсетудің жоғары деңгейін күту және қамтамасыз ету бойынша дәрігердің жоғары білікті көмекшісіне ауысады. Адамның өмірін ұзартуға және оның сапасын жақсартуға радикалды хирургиялық араласулар мен дәрі-дәрмектерді қолдану ғана емес, сонымен қатар кәсіби күтім, жайлы психологиялық жағдай жасау және пациентпен күнделікті тынымсыз жұмыс жасау мүмкіндігі бар. Тағайындауларды сапалы орындау Бөлімнің медициналық қызметкерлерінің нақты үйлестірілген жұмысы жағдайында ғана мүмкін болатындығын атап өткен жөн. Аурудың барысы, жағдайдың өзгеруі, дәрігердің тағайындауының орындалуы туралы барлық қажетті мәліметтерді медбике хабарлайды, оның жұмысы жақсы ойластырылған, нақты реттелген және басқа қызметкерлердің әрекеттерімен келісілген болуы керек. Құзыретті көзқарас және ауру туралы толық ақпаратқа ие болу мейірбикеге бірнеше маңызды міндеттерді орындауға мүмкіндік береді, олардың арасында пациенттердің психологиялық көңіл-күйі жоқ. Қорытындылай келе, бронх демікпесі бар пациенттерді басқару кезінде уақтылы және дұрыс көрсетілген Мейірбике ісі олардың жағдайын жақсартуға ықпал ететінін атап өтеміз. Осылайша, қойылған мақсаттар мен міндеттер толық көлемде орындалғанын қорытындылауға болады.
Пайдаланылған әдебиеттер тізімі
1. Интернет – сайт Всемирной организации здравоохранения. URL: http://www.who.int/ru/news-room/factsheets/detail/asthma(датаобращения 15.10.2018)
2. https://www.who.int/ru/news-room/fact-sheets/detail/asthma
3. CDC.gov. (2018). CDC – Asthma – Data and Surveillance – Asthma Surveillance Data. [online] Available at: http://www.cdc.gov/asthma/asthmadata.htm [Accessed 13 June 2019].
4. Zahran, H., БДiley, C., Damon, S., Garbe, P. and Breysse, P. (2018). Vital Signs: Asthma in Children — United States, 2001–2016. DOI: http://dx.doi.org/10.15585/mmwr.mm6705e1. [Accessed 16 Feb. 2018]
5. Gibson J, Loddenkemper R, Sibille Y, et al., eds. The European Lung White Book. Respiratory Health and Disease in Europe .Sheffield, European Respiratory Society, 2013 .
6.https://ec.europa.eu/eurostat/statistics-explained/index.php?title=Respiratory
_diseases_statistics&amp;oldid=497079
7. Aumann I, Prenzler A, Welte T, Gillissen A. [Epidemiology and costs of asthma in Germany – a systematic literature review]. Pneumologie. 2014 Aug;68(8):557–67. German. pmid: 25003905
8. To T, Stanojevic S, Moores G, Gershon AS, БДteman ED, Cruz AA, et al. GloБДl asthma prevalence in adults: findings from the cross-sectional world health survey. BMC Public Health. 2012 03 19;12(1):204. http://dx.doi.org/10.1186/1471-2458-12-204 pmid: 22429515
9. http://www.gloБДlasthmareport.org/management/india.php
Студент: Есекеева У.А., Ғылыми жетекші: Зейнебай Г.Е.
Көп бейінді облыстық ауруханасы
Қызылорда медициналық жоғары колледжі

Мейіргер ісі: Бронх демікпесіне жүргізілетін физиотерапиялық емдік шаралар

<a href="https://kyzylorda-news.kz/">Kyzylorda-news.kz</a>. Осы айдың ең басты жаңалығы – коронавирусқа қарсы жаппай вакцинациялау. Сондай-ақ бүгіннен бастап кейбір банкноттар жарамсыз болады
<h3 id="">Жаппай вакцинация</h3>
Бүгін, 1 ақпан Қазақстанда жаппай вакцинациялау басталды. Инфекцияны жұқтыру және тарату қаупі жоғары халықтың осал топтарына кезең-кезеңмен ресейлік “Спутник V” вакцинасы егіледі. Вакцинациялау ерікті түрде және тегін салынады.
Бірінші кезеңде:
<ul>
<li>Инфекциялық ауруханалар, жедел жәрдем, реанимация бөлімшелері, науқастарды қабылдау бөлмесі, алғашқы медициналық-санитарлық көмек қызметінің медицина қызметкерлері, санитарлық-эпидемиологиялық қызмет жұмысшылары;</li>
</ul>
екінші кезеңде:
<ul>
<li>жалпы білім беретін мектептер, жоғары оқу орындарының педагогтері, медициналық қызметтің жұмысшылары;</li>
</ul>
үшінші кезеңде:
<ul>
<li>мектеп-интернаттар, мектепке дейінгі мекемелердің педагогтері, созылмалы аурумен ауыратындар.</li>
</ul>
Айта кететін жәйт, “Спутник V” 18 жасқа дейінгі балаларға салынбайды. Яғни, екпе Қазақстанның кәмелет жасына толған азаматтарына ғана салынады.
Денсаулық сақтау министрлігі жыл соңына дейін 6 миллион қазақстандыққа вакцина салуды жоспарлап отыр.
<h3 id="-1">Кейбір банкноттар енді жарамсыз</h3>
1 ақпанда 2006 жылғы үлгідегі номиналы 2000, 5000, 10000 теңгелік банкноттарды қабылдау және айырбастау мерзімі аяқталады.
Жеке тұлғалар банкноттарды Ұлттық банктің филиалдарында ғана айырбастай алады.
1 ақпаннан кейін Ұлттық банк ескі банкноттарды қабылдауды және айырбастауды тоқтатады.
<h3 id="-2">Нұр-Сұлтаннан Талдықорғанға әуе рейстері ашылды</h3>
Qazaq Air әуе компаниясы 1 ақпаннан Нұр-Сұлтан – Талдықорған бағдары бойынша әуе рейстерін жандандырады.
Ақпан айында аптасына үш рет – дүйсенбі, сәрсенбі және жұма күндері ұшуға болады. Одан кейін рейстер күн сайын орындалады деп жоспарлануда. Билет құны 12 500 теңге және одан жоғары. 14 жасқа дейінгі балаларға 50% жеңілдік жасалады.
Дүйсенбі күнгі кесте:
<ul>
<li>Нұр-Сұлтан (11:40) – Талдықорған (13:00)</li>
<li>Талдықорған (14:00) – Нұр-Сұлтан (15:40)</li>
</ul>
Сәрсенбі күнгі кесте:
<ul>
<li>Нұр-Сұлтан (08:50) – Талдықорған (10:40)</li>
<li>Талдықорған (11:20) – Нұр-Сұлтан (13:10)</li>
</ul>
Жұма күнгі кесте:
<ul>
<li>Нұр-Сұлтан (12:00) – Талдықорған (13:50)</li>
<li>Талдықорған (14:40) – Нұр-Сұлтан (16:40).</li>
</ul>
<h3 id="-3">Кейбір сайттар істен шығуы мүмкін</h3>
1 ақпаннан бастап азаматтар Қазақстан аумағынан тыс серверлерде орналасқан, “.KZ” және .ҚАЗ” домендік атауы бар сайттарға кіре алмауы мүмкін.
Қолданыстағы заңнамаға сәйкес, егер сайт республика аумағынан тыс серверде орналасса, қазақстандық интернет кеңістігінде домендік атауды қолдану уақытша тоқтатылады.
Бұған дейін цифрлық даму министрлігі осы ережені бұзатын сайт иелеріне хабарлама жолдаған еді. Олар заңбұзушылықтарды 2020 жылдың 30 қарашасына дейін жоюы тиіс еді, алайда көптеген өтініштен кейін мерзім 1 ақпанға дейін ұзартылды.
<h3 id="-4">Екі өңір цифрлық хабар таратуға көшеді</h3>
1 ақпаннан бастап Алматы қаласы мен Солтүстік Қазақстан облысы цифрлық эфирлік телевидениеге толығымен көшеді.
Дәл осы күні Алматыда Көктөбе телемұнарасында цифрлық эфирлік телевидениеге көшу бойынша шара өтеді.
Цифрлық телевидениенің бейнесі мен дыбысы өте сапалы, каналдар мен бағдарламалар саны да артады. Ескі хабар тарату сигналы сыртқы әсерге, мәселен ауа райына өте тәуелді еді, қатты жел тұрғанда мүлде жоғалып кететін. Ал цифрлық хабар таратудың сигнал сапасы мен қорғаныш деңгейі жоғары, алыс қашықтан қабылдай береді.
Цифрлық эфирлік телевизиялық хабар тарату жобасы бүкіл елде 2022 жылға қарай аяқталады деп жоспарланған.
<h3 id="-5">Полиция халыққа жақындай түсті</h3>
Бірінші ақпаннан бастап Қазақстанда “102” мобильді қосымшасы іске қосылады. Сервистің басты міндеті – полицияны халыққа жақын және қолжетімді ету.
Енді әр қазақстандық смартфон арқылы қылмыс туралы хабарлай алады және оның ақпараты назардан тыс қалмайды.
Жүйе арқылы арыз беруге, аудио немесе видео қоңырау көмегімен оператормен байланысқа шығуға, қызмет алуға және оқиға орнына аттанған полицияның тұрған жерін бақылауға болады.
<a href="https://m.sputnik.kz/society/20210201/16176954/1-aqpan-ozgerister.html?fbclid=IwAR3TjPZooYPXXKj3WZ20e16cu4UYRqM7oOAlZuqNCeROyUFDZvYoIfolNw0">Sputnik.kz</a>

Бүгіннен бастап елде не өзгереді?

<a href="https://kyzylorda-news.kz/">Kyzylorda-news.kz</a>.&nbsp;Қазақстанда өткен тәулікте 854 адам коронавирус індетінен емделіп шықты.
Аймақтар бойынша
Нұр-Сұлтан қаласы – 123,
Алматы қаласы – 98,
Шымкент қаласы – 1,
Ақмола облысы – 137,
Алматы облысы – 152,
Атырау облысы – 75,
Шығыс Қазақстан облысы – 15,
Қарағанды облысы – 67,
Қостанай облысы – 6,
Қызылорда облысы – 10,
Павлодар облысы – 67,
Солтүстік Қазақстан облысы – 93,
Түркістан облысы – 10.
Қазақстан бойынша жазылғандар саны – 168768.

Қазақстан және Қызылорда облысының жаңалықтары