<a href="https://kyzylorda-news.kz/">Kyzylorda-news.kz.</a> Өткен тәулікте Қызылорда облысында 9 адамнан коронавирус індеті анықталды. Тіркелген науқастардың 7-і Қызылорда қаласының, 1-уі Қазалы, 1-уі Сырдария ауданының тұрғындары.
Пандемия кезеңінен бері 3635 адам емделіп шыққан. 24 сағат ішінде зертханаға 1177 сынама тапсырылған. Оның 697-і тексерілген, 480-і бойынша жұмыс жасауда. 17765 қалдық тест қалып отыр. Бүгінгі күні өңірде инфекциялық стационарда 45 науқас, инфекциялық стационардың реанимация бөлімінде 4 науқас ем қабылдап жатыр.
Қазақстанда өткен бір тәулікте коронавирус ПТР-сынама арқылы 692 адамнан анықталды, деп хабарлайды &nbsp;<a href="https://www.coronavirus2020.kz/kz">coronavirus2020.kz</a>.
Өңірлер бойынша:
Нұр-Сұлтан қаласында -24536 (+60),
Алматы қаласында – 24470 (+111),
Шығыс Қазақстан облысында – 21692 (+82),
Атырау облысында – 16967 (+28),
Павлодар облысында – 17128 (+93),
Қарағанды облысында – 15133 (+35),
Ақмола облысында – 13242 (+65),
Батыс Қазақстан облысында – 12622 (+45),
Солтүстік Қазақстан облысында – 12138 (+40),
Қостанай облысында – 11985 (+67),
Алматы облысында – 10512 (+36),
Шымкент қаласында -6078 (+6),
Жамбыл облысында – 5865 (+10),
Түркістан облысында – 4252 (+5),
Маңғыстау облысында – 4202 (+0),
Ақтөбе облысында – 4191(+0),
Қызылорда облысында – 3796 (+9).
Жалпы, пандемия басталғалы Қазақстанда коронавирусқа шалдыққандар саны – 208 809.

Коронавирус: Өткен тәулікте 9 қызылордалықтан анықталды

<a href="https://kyzylorda-news.kz/">Kyzylorda-news.kz.</a> Сейсенбі күні Қазақстанда жел күшейіп, қар жауады, солтүстік өңірлерде боран соғады, деп хабарлайды Қазгидромет.
23 ақпанда атмосфералық ағындардың өтуіне байланысты еліміздің басым бөлігінде құбылмалы райы сақталады, кей жерлерде қар жауады, солтүстік-батыста және солтүстікте қалың қар жауады. Тек еліміздің оңтүстік-шығысында күн райы ашық болуы ықтимал. Кей жерлерде тұман түсіп, көктайғақ болады, бұрқасын соғады, жел күшейеді.
Қызылорда облысының кей жерлерінде жел жылдамдығы 15-20 м/с болады, күндіз жылдамдығы 15-20, екпіні 23-28 м/с күшейеді, кей жерлерде жаяу бұрқасын соғып, көктайғақ болуы мүмкін.

Сейсенбіге арналған ауа райы болжамы

Kyzylorda-news.kz. Жыл сайын қыс-көктем мезгілінде Сырдария өзенінде мұз қату және жүру кезеңдерінде елді мекендер, ауылшаруашылық жерлері мен шаруашылық нысандарына су басу қатері төнеді.
«2020-2021 жылдардағы қысқы-көктемгі кезеңде Сырдария өзеніндегі мол суды қауіпсіз өткізу бойынша дайындық жұмыстарын жүзеге асыру» іс-шара жоспары әзірленіп, бекітілді.
Іс-шара жоспарына сәйкес, су тасқынына қарсы іс-шараларды жүргізуге облыс бюджетінен 266,3 млн. теңге бөлінген. (Оның ішінде, 138,2 млн. теңге қорғаныс бөгеттерін жөндеу-қалпына келтіру жұмыстарына, 10,0 млн. теңге – мұз жару жұмыстарына, 4,8 млн. теңге қаптар сатып алуға және 113,3 млн. теңге – “Қазавиақұтқару”АҚ қызметтеріне).
Сонымен қатар, су тасқынына қарсы 68,6 тонна жанар жағар май, 154 590 дана қап және басқа да материалдық-техникалық құралдардың қоры қалыптастырылған. 
Биыл қыс мезгілінде өзен бетінде барлық аймақта қалындығы 10-55 см құрайтын мұз қатты. Қазіргі таңда ауа – райының жылуына байланысты, мұз Шиелі ауданы Қарғалы елді мекені тұсында жүруде.
Осыған орай, ағымдағы жылы 22 ақпанда облыс әкімі Г.Н.Әбдіқалықова мен облыстық жұмылдыру дайындығы басқармасының басшысы М. Усаин өзендегі су шаруашылығы жағдайына тікұшақ арқылы мониторинг жүргізді. 
Нәтижесінде, аймақ басшысы жауапты құзырлы мемлекеттік мекемелерге бірқатар тиісті тапсырмалар берді. Оның ішінде, қауіпті су басу аймақтарына қауіпсіздікті қамтамасыз ету мақсатында өзен бойына тәулік бойы кезекшілік ұйымдастыруды және қауіпті аймақтарға арнайы техникасы бар жауапты мекемелерді бекітуді тапсырды. 
Бүгінгі күні Сырдария өзеніндегі жағдай бірқалыпты, жүйелі бақылауға алынған.
<img src="https://kyzylorda-news.kz/wp-content/uploads/2021/02/fb_img_1614006987764.jpg" alt="" />

Гүлшара Әбдіқалықова Сырдария өзеніне әуеден мониторинг жүргізді

<a href="https://kyzylorda-news.kz/">Kyzylorda-news.kz.</a> Жеңіл атлетикадан Өскеменде өткен Қазақстан чемпионатында жаңа рекорд тіркелді, деп хабарлады <a href="https://24.kz/kz/zha-aly-tar/sport/item/457059-zhe-il-atletikadan-aza-stan-rekordy-zha-ardy">«Хабар 24»</a>.
Кедергілер арқылы жүгіру бойынша 60 м қашықтықта Давид Ефремов жаңа рекорд авторы атанды. Ол тиісті қашықтықты 7.65 секундта бағындырды.
Айта кетерлігі, бұған дейінгі рекорд та Давид Ефремовке тиісті болатын.

Жеңіл атлетикадан Қазақстан рекорды жаңарды

<a href="https://kyzylorda-news.kz/">Kyzylorda-news.kz.</a> Бүгін Қызылордада вакцинацияның екінші дозасын егу басталды. Ақпан айының басында өңірді «Спутник V» вакцинасының 1 мың дозасы әкелініп, осыншама адамға егілген болатын. Олардың 939-ы медицина қызметкерлері болса, 61-і басқа да ерікті түрде келген қала тұрғындары. Бүгін тағы 1 мың доза әкелінді. Араға үш апта салып, оларға екінші мәрте дозаны егу жұмыстары жүргізуде.
Сала мамандарының айтуынша, бұл жолғы екпе алдыңғы вакцинаның әсерін күшейтеді. Әрі ағзадағы қорғаныш қабілетін арттырады.
<blockquote>
 «Өзім ерікті түрде ақпанның бірінде алғашқылардың бірі болып екпені салдырдым. 21 күн уақыт өтсе де екпенің еш кері әсерін байқамадым. Сол себепті бүгін екпенің екінші кезеңінен өттім. Біз бүкіл елді дүрліктірген коронавирус инфекциясын тұрғындар сақтық шараларын толық жасағанда ғана жеңе аламыз. Ал екпенің бұл ретте пайдасы зор. Сондықтан қазір халық арасында вакцинацияның маңызы туралы түсіндіру жұмыстарын жүргізіп жатырмыз. Бұл жұмыстар алдағы уақытта да жалғаса бермек», – деді облыстық денсаулық сақтау басқармасының басшысы Сәбит Пазилов.
</blockquote>
Айта кетейік, «Спутник V» ресейлік вакцинасының екінші дозасы қалалық №1-ші, №3-ші және №6-шы емханаларда жүргізілетін болады.

Қызылордада вакцинацияның екінші дозасын егу басталды

<a href="https://kyzylorda-news.kz/">Kyzylorda-news.kz.</a> Бүгін пәндік олимпиаданың облыстық кезеңі басталды. Білім сынағы «Абай» атындағы дарынды балаларға арналған үш тілде оқытылатын мамандандырылған сыныптары бар мектеп базасында өтуде. Оған аудандық және қалалық кезеңде жеңімпаз атанған 299 оқушы қатысуда.
Бұл жолғы олимпиаданың артықшылығы сол облыстық кезең бұрынғыдай бір күнде ұйымдастырылмайды. Мұнда барлығы 6 аудитория қамтылған. Яғни бір күнде 54 бала сынақ тапсырады. Осылайша олимпиада 27 ақпанға дейін созылады.
<blockquote>
 «Олимпиада күніне екі пәннен өткізіледі. Ал оның тапсырмалары ro.daryn.kz сайтында орналастырылады. Яғни оқушы сайтқа кіріп, тапсырманы жүктеп алады. Барлық аудитория бейнебақылау жүйесіне қосылған. Бір аудиторияда екі бейнебақылау орнатылған. Яғни әрбір ата-ана олимпиада барысын бақылай алады. Біздің негізгі мақсат ашықтықты қамтамасыз етіп, осындай үлкен додалардың әділ өтуін қамтамасыз ету. Сонымен қатар, олимпиада барысында балалардың тыйым салынған гаджеттерді пайдалануына жол берілмейді. Конкурс ашық түрде іске асады. Қатысушылардың жұмыстары қазылар алқасына алдын ала шифрланған түрде беріледі. Яғни оқушылардың жұмыстары сканерленген түрде Google Disk жүйесінде уақытылы жүктеліп отырады. Олимпиада аяқталғаннан кейін бейнекамера орнатылған аудиторияда қатысушылардың жұмыстары екі сағат ішінде PDF форматында жүктеледі. Мінекей осы сынақтан сүрінбей өткен үздіктер республикалық пәндік олимпиадаға жолдама алады», – деді облыстық білім басқармасының басшысы Ақзира Қасымова.
</blockquote>
Айта кетейік, 8-12 ақпан аралығында пәндік олимпиаданың аудандық, қалалық кезеңі өткізілген болатын. Олимпиада жаратылыстану-математика, қоғамдық-гуманитарлық бағыттардағы 14 пән бойынша ұйымдастырылды. Олимпиадаға 7 аудан мен Қызылорда қаласынан 4819 оқушы қатысып, 1231 оқушы жүлделі орындарға ие болды. І орынды 196 бала, ІІ орынды 368 бала, ІІІ орынды 664 бала иеленді.

Биыл пәндік олимпиада жаңа форматта өтуде

<a href="https://kyzylorda-news.kz/">Kyzylorda-news.kz.</a>&nbsp; Жер реформасы жөніндегі заң жобасы маусымда Мәжіліс қарауына енгізіледі. Бұл жайында ҚР Премьер-Министрі Асқар Маминнің Мәжіліс депутаттарының сауалына берілген жауабында айтылған, деп хабарлайды <a href="https://lenta.inform.kz/kz/zher-reformasy-zhonindegi-zan-zhobasy-mausymda-mazhilis-karauyna-engiziledi_a3756187">ҚазАқпарат</a>.
<blockquote>
 «Өздеріңіз білетіндей, ағымдағы жылғы 31 желтоқсанда Жер кодексінің кейбір нормаларына енгізілген мораторийдің мерзімі аяқталады. Бұл ретте, мораторий енгізілген нормалардың одан әрі қолданысын айқындау мақсатында тиісті талдау жұмыстары жүргізілді. Нәтижесі бойынша осы мәселелерді реттеуге бағытталған тиісті заң жобасын жоспарлы түрде әзірлеу Қазақстан Республикасы Үкіметінің заң жобалау жұмыстарының 2021 жылға арналған жоспарына енгізілді», – деді Асқар Мамин.
</blockquote>
Оның атап өтуінше, қазіргі уақытта аталған заң жобасына енгізілетін нормаларды қалыптастыру мақсатында және Мемлекет басшысының тапсырмасына сәйкес жер реформасы жөнінде комиссияны құру, сондай-ақ, әзірленетін заң жобасының нормаларын қоғаммен талқылау шараларын жоспарлау жұмыстары жүргізіліп жатыр.
<blockquote>
 «Аталған заң жобасы аясында сіздердің шетелдік компаниялар мен азаматтарына жерді сатуға, сондай-ақ, Қазақстанмен шекаралас шет мемлекеттер мен олардың азаматтарына жерді жалға беруге тыйым салу туралы ұсыныстарыңыз жан-жақты қаралатын болады. Көрсетілген жоспар бойынша заң жобасын Парламент Мәжілісіне енгізу осы жылғы маусым айында жоспарланғанын хабарлаймыз»,- деді Үкімет басшысы.
</blockquote>

Жер реформасы жөніндегі заң жобасы маусымда Мәжіліс қарауына енгізіледі

<a href="https://kyzylorda-news.kz/">Kyzylorda-news.kz.</a>&nbsp; Ақпарат және қоғамдық даму министрлігінің «Стратегиялық сессияларын» іске асыру аясында Дін істері комитеті төрағасының орынбасары Бауыржан Бакиров Қызылорда облысының Дін істері басқармасының басшылығымен және «Дін проблемаларын зерттеу орталығымен» кезекті онлайн-кездесу өткізді.
Кездесуге комитет қызметкерлері, ҚМДБ филиалының басшылығы, ақпараттық-түсіндіру топтарының мүшелері, теологтар, дінтанушылар мен психологтар қатысты.
Жиынның негізгі мақсаты дін саласындағы өзекті мәселелер мен міндеттерді пысықтау және түсіндіру. Кездесуде Қазақстан Республикасының дін саласындағы 2021-2023 жылдарға арналған кешенді жоспарының негізгі бағыттары талқыланды.
Б.Бакиров оңалту және ақпараттық-түсіндіру жұмыстары бағыты бойынша азаматтарды қамту биылғы жылы бірлескен жұмыстың нәтижесі болуы тиіс екенін атап өтті.
Сонымен қатар, төраға орынбасары діни ахуалдың дамуын ескере отырып, өңірде нақты алдын алу жұмыстарын жүргізуге және өңірдегі діни бірлестіктер өкілдерімен сенімді қарым-қатынас орнатуға назар аударды.
Кездесу қорытындысы бойынша қатысушылар дін саласындағы мемлекеттік саясатты іске асыруды жетілдіру бойынша өз идеялары мен ұсыныстарын білдірді.

Қызылорда облысында ҚР АҚДМ стратегиялық сессиясы өтті

<a href="https://kyzylorda-news.kz/">Kyzylorda-news.kz.</a>&nbsp; Жерге көлемі футбол стадионына жуықтайтын астероид жақындап келеді.
Аспан денесі туралы НАСА JPL ғылыми-зерттеу орталығы хабарлады, деп жазды&nbsp;<a href="https://ria.ru/">РИА Новости</a>.
Мамандардың есебі бойынша, диаметрі 213 метрге жуықтайтын 2020 XU6 астероиді мен Жердің арасындағы қашықтық шамамен төрт миллион километр болады.
Дүйсенбі күні диматері 23 метр 2020 BV9 астероиді мен диаметрі 40 метр болатын 2021 CC5 астероиді де ғаламшар жанынан ұшады. Олардың Жерге жақындауы сәйкесінше 5,6 миллион шақырым және 6,9 миллион шақырым болмақ.
Сонымен қатар, жексенбі күні Жер жанынан диаметрлері 10 және 61 метр болатын 2021 DD1 мен 2021 DK1 астероидтері ұшқаны белгілі болды.

Жерге алып астероид жақындап келеді

<a href="https://kyzylorda-news.kz/">Kyzylorda-news.kz.</a> Өткен жылдың желтоқсан айында түнгі уақытта Қызылорда қаласы Махамбет ауылына қарасты кірпіш зауытынан 3 дана электрқозғалтқыш ұрланғандығы туралы арыз түскен.
Аталған дерек бойынша Қазақстан Республикасы Қылмыстық кодексінің 188-бабы 2-бөлігінің 1-тармағымен (ұрлық) тергеп-тексеру жұмыстары басталған.
Жедел іздестіру іс-шараларының нәтижесінде «ізі суымай» күдікті ретінде Қызылорда қаласының 1996 және 1997 жылғы тұрғындары анықталып, ұсталды. Олар жасаған қылмыстарын толығымен мойындады.
Бұдан бөлек, тергеу барысында күдіктілер аталған қылмыстан бөлек тағы қоймаға заңсыз кіру арқылы бөтеннің мүлкін жасырын жымқырып, ұрлық қылмыс жасағаны &nbsp;Қызылорда қалалық полиция басқармасының тергеушісі полиция аға лейтенанты Қайырбек Дауылбаевпен анықталып, аталған қылмыстық істер бір өндіріске біріктірілген.
Тергеу барысында күдіктілердің бірнеше рет жасаған ұрлық қылмыстық іс-әрекеттері толығымен өз дәлелін тауып, аталған іс айыптау актісімен сотқа жолданған.
Сотталушылар сот үкімімен Қазақстан Республикасы Қылмыстық кодексінің 188-бабы 3-бөлігінің 2,3-тармақтарымен кінәлі деп танылып, 3 жыл мерзімге бас бостандығынан шектеу жазасы тағайындалған.
Сот үкімі заңды күшіне енді.

Қызылордада зауыттан 3 дана электрқозғалтқыш ұрлағандар сотталды

<a href="https://kyzylorda-news.kz/">Kyzylorda-news.kz.</a>&nbsp;Қазақстан Ұлттық банкі 2021 жылдың 23 ақпанынан бастап «Республика игілігі» монеталар сериясынан «MEDEÝ» коллекциялық монеталары сатылымға шығатынын хабарлады.
Қалыптасқан эпидемиологиялық жағдай аясында халықтың қауіпсіздігін қамтамасыз ету мақсатында «MEDEÝ» коллекциялық монеталарды онлайн сату және жеткізу Ұлттық банктің интернет-дүкенінің жаңартылған платформасы арқылы жүзеге асырылады. Тапсырыстарды өңдеу белгілі бір уақытты қажет ететіндіктен, монеталарды сату бірнеше күнге бөлінеді.&nbsp;
«MEDEÝ» монетасы дизайнының тұжырымдамасы атақты бөгеттің және «жарылыстан туындаған» мұз айдынының пайда болу тарихын суреттейді.
Монета дизайнының графикалық тұжырымдамасы бүкіл әлемге әйгілі «Медеу» биік таулы мұз айдынын қоршаған Іле Алатауының жартасты тауларын аллегориялық қабылдау негізінде жасалған.
«MEDEÝ» монеталарының сипаттамасы:
Монеталар алтын жалатылған күмістен, массасы 24 грамм, диаметрі 37 мм, «proof» сапасымен, таралымы 3&nbsp;000 (үш мың) данада дайындалды. Монеталар коллекциялық құны бойынша сатуға арналған.
Монетаның аверсінде орталық бөлігінде «QAZAQSTAN RESPÝBLIKASY» жазбасының, монета номиналын және монета дайындалған металды, оның сынамасы мен массасын білдіретін жазбалардың қоршауында Қазақстан Республикасының Мемлекеттік Елтаңбасы бейнеленген.
Монетаның реверсінде ортасында жартасты таулар аясында биік таулы «Медеу» мұз айдынының бейнесі орналасқан. Монетаны айналдыра жалпақ жиекте мынадай бедерлі жазулар орналасқан: монетаның соғылған жылы, мұз айдынының ресми ашылған жылы, белгіленген әлемдік рекордтар саны, теңіз деңгейінен биіктігі және мұз айдынының және оның орналасқан жерінің мемлекеттік тілдегі, орыс және ағылшын тілдеріндегі атауы.
Номиналы 500 теңгелік коллекциялық монеталар төлемдердің барлық түрі бойынша Қазақстан Республикасының бүкіл аумағында олардың белгіленген құнымен қабылдануға, сондай-ақ банк шоттарына есепке алынуға және аударылуға міндетті, Қазақстан Республикасының барлық банктерінде шектеусіз ұсақталады және айырбасталады.
Күмістен жасалған монеталар кәдесыйлық орамда шығарылады және Қазақстан Республикасы Ұлттық банкінің мемлекеттік тілдегі, орыс және ағылшын тілдеріндегі нөмірлік сапа сертификатымен жабдықталған.
Коллекциялық монеталар Қазақстанның теңге сарайында дайындалды.

«MEDEÝ» коллекциялық монеталары сатылымға шығады

<a href="https://kyzylorda-news.kz/">Kyzylorda-news.kz.</a>&nbsp; Бүгін Қызылорда қаласында Батыс Қытай – Батыс Еуропа автодәлізінің бойынан жаңа&nbsp; жанар-жағар май құю кешені ашылды.
«Petro Retail» ЖШС-нің «Qazaq oil»кешені қала іргесіндегі Бірқазан елді-мекенінің тұсынан салынған. Жаңа бекеттің ашылуына қала әкімінің міндетін атқарушы Бектас Нұридинов қатысып, кешеннің жұмысына сәттілік тіледі.
<blockquote>
 &nbsp;«Жалпы кәсіпкерлікті дамытуға қала әкімдігі тарапынан үлкен қолдау көрсетіліп келеді. Бүгінгі кешеннің ашылуы салаға көрсетілген қолдаудың бір көрінісі. Кәсіпкерге қала әкімдігінің көрсеткен қолдауының арқасында кешен салуға жер бөлініп, қалаға қосымша инвестиция тартылды. Қазіргідей қиын кезеңге қарамай&nbsp; кәсіп ашып,&nbsp; тұрғындар жұмыспен қамтылып, қаламызда кәсіпкерлік нысандарының саны артып келеді» – деген, Бектас Балғабайұлы қала әкімдігі кәсіп бастауға ниетті азаматтарға қашан да қолдау білдіретіндігін айтты.
</blockquote>
Жаңа кешенде келушілер үшін бөлшек сауда пункті мен тамақтану орны қарастырылған. Бір тәулікте 700 көлікке дейін қызмет көрсетуге қауқарлы бекетте 23 адам жұмыспен қамтылған. Кешен «Petro Retail» ЖШС-нің 700 млн. теңге өз қаражаты есебінен бой көтерген.
&nbsp;«Qazaq oil» &nbsp;&nbsp;Қазақстандағы ең үлкен жанармай құю желісі деген «Petro Retail» ЖШС-нің өкілі Айдар Балғожаев республика бойынша 400-ге жуық&nbsp; «Qazaq oil» бекеті халыққа қызмет етсе, ағымдағы жылы Қызылорда облысының Арал, Қармақшы аудандарында және Қызылорда қаласында 4 нысан өз жұмысын бастағандығын жеткізді. Сонымен қатар жақын күндері 98 маркалы бензин отынын қала нарығында алғаш болып сатылымға шағырауды жоспарлап отырғандықтарын да атап өтті.
Айта кетейік, «ҚазАвтоЖол» АҚ-ның өңірлік филиалымен жергілікті атқарушы билік арасында «Батыс Еуропа-Батыс Қытай» халықаралық көлік дәлізінің бойында 41 жол бойы сервистік нысан салынатын жер белгіленген. Оның&nbsp; ішінде 10 жоба қала үлесінде болса, қазіргі таңда&nbsp;&nbsp;6 жоба іске қосылды. Бүгінгі өз жұмысын бастағалы тұрған «Qazaq oil» кешені жетінші жоба болып отыр.
<img src="https://kyzylorda-news.kz/wp-content/uploads/2021/02/02-1-scaled.jpg" alt="" />
<img src="https://kyzylorda-news.kz/wp-content/uploads/2021/02/05-1-scaled.jpg" alt="" />
<img src="https://kyzylorda-news.kz/wp-content/uploads/2021/02/06-scaled.jpg" alt="" />

Қазақстан және Қызылорда облысының жаңалықтары