<a href="https://kyzylorda-news.kz/date/2020/10/21/?doing_wp_cron=1603264016.4575080871582031250000">Kyzylorda-news.kz.</a> Бүгін Қазалы ауданының әкімі Мұрат Ергешбаевтың қатысуымен Тәжік-Ауған шекарасындағы әскери қақтығыстарға қатысқан ардагерлерді құрметтеу мақсатында салтанатты жиын өтті.
Жиынға облыстық Тәжік-Ауған шекарасының жауынгерлік қимылдарына және әскери қақтығыстарға қатысушылар Одағының төрағасы М.Орынбайұлы, аудандық Қорғаныс бөлімінің бастығы Қ.Ысқақов, аудан әкімінің орынбасары Ә.Әбиев, аудандық жұмыспен қамту, әлеуметтік бағдарламалар және азаматтық хал актілерін тіркеу бөлімінің басшысы С.Бабанаев, аудандық Әйелдер кеңесінің төрайымы Р.Асанова, ержүрек жауынгерлердің аналары мен жұбайлары қатысты.
<blockquote>
 «Арада 25 жыл өтсе де, тәжік-ауған шекарасында орын алған соғыстың халық жүрегіне салған жарасы, қайғы-қасіреті елдің санасынан өшпек емес. Сол қантөгісте ерлікпен антқа адалдықтарын дәлелдеген алдаспан намысты Қазалының жаужүрек жігіттерінің батырға лайық орны бар. Олар біздің мәңгілік жадымызда. Сіздер Ұлы Отан соғысы ардагерлерінің лайықты ізбасарлары ретінде жастарға патриоттық тәрбие беруге үлкен үлес қосып келесіздер. Сондықтан да, барша халқымыз жат жерде намысты ту етіп ұстап, ерліктің үлгісін көрсеткен ардагерлерге әрқашанда тағзым етеді. Елдікті құрметтеу, батырлықты дәріптеу, боздақтар рухын еске алу әрдайым азаматтық міндетіміз болып қала береді», – деді аудан әкімі.
</blockquote>
Жиын барысында аудан әкімі М.Ергешбаев қазалылық ардагерлерді «Алаш батыры», «Қазақ батыры» төсбелгілерімен марапаттады. Сонымен бірге, осындай ерліктің нышаны бола білген батырларды тәрбиелеп, өсірген аналарға және олардың жұбайларына да құрмет көрсетіліп, «Ана жүрегі» төсбелгісі табысталды.
Айта кетейік, 2020 жылғы 6 мамырда қабылданған «Ардагерлер туралы» Заңға және Тәжікстан-Ауғанстан шекарасында Тәуелсіз Мемлекеттер Достастығының шекарасын қорғауды күшейту жөніндегі мемлекетаралық шарттар мен келісімдерге сәйкес, міндеттерін мүлтіксіз орындаған Қазақстан Республикасының әскери қызметшілері барлық жеңілдіктері сақтала отырып, ардагерлер санатына енгізілген болатын.
<img src="https://kyzylorda-news.kz/wp-content/uploads/2020/10/122449576_2889418104612451_1428026665900174352_o.jpg" alt="" />
<img src="https://kyzylorda-news.kz/wp-content/uploads/2020/10/122257886_2889418224612439_858083928344647800_o.jpg" alt="" />
<img src="https://kyzylorda-news.kz/wp-content/uploads/2020/10/122096314_2889418357945759_8420098549024267019_o.jpg" alt="" />
<img src="https://kyzylorda-news.kz/wp-content/uploads/2020/10/122288605_2889418231279105_2299990001961370829_o.jpg" alt="" />

Қазалыда Тәжік-Ауған шекарасында соғысқа қатысқан ардагерлерге құрмет көрсетілді

<a href="https://kyzylorda-news.kz/date/2020/10/21/?doing_wp_cron=1603264016.4575080871582031250000">Kyzylorda-news.kz</a>. Қазақстан Республикасының Мемлекеттік қызмет істері агенттігінің бұйрығымен Рафхат Бисенов Агенттіктің Қызылорда облысы бойынша департаментінің басшысы, Әдеп жөніндегі кеңесінің төрағасы лауазымына тағайындалды.
Бисенов Рафхат Төлеуғалиұлы бұған дейін Агенттіктің Ақтөбе облысы бойынша департаменті басшысының орынбасары қызметін атқарған. 
Р. Бисенов 1983 жылы Батыс Қазақстан облысы, Ақжайық ауданы, Қурайлысай ауылында дүниеге келген.
2003 жылы Қ.Жұбанов атындағы Ақтөбе мемлекеттік университетінің «Қазақстан тарихы» мамандығын, 2014 жылы Қазақ-Орыс халықаралық университетін «Құқықтану» мамандығы бойынша тәмамдаған.
Мемлекеттік қызметтегі жалпы еңбек өтілі – 15 жылдан астам, оның ішінде мемлекеттік қызмет істері агенттігі саласында – 9 жылға жуық. 
Еңбек жолын 2003 жылы Ақтөбе қаласындағы №51 гимназияда тарих пәнінің мұғалімі ретінде бастаған. 2005 жылы мемлекеттік қызмет саласындағы алғашқы лауазымы – Ақтөбе қалалық мәдениет және тілдерді дамыту бөлімінің жетекші маманы қызметіне келген. 2006-2007 жылдары аталған бөлімде бас маман, 2007-2012 жылдары Ақтөбе қаласы әкімі аппаратында ұйымдастыру және кадрлармен жұмыс бөлімінің бас маманы қызметтерін атқарған.
2012-2014 жылдары ҚР Мемлекеттік қызмет істері агенттігінің Ақтөбе облысы бойынша департаментінің бас маманы, консультант-инспекторы, одан кейінгі жылдары департаментте бөлім басшысы, басқарма басшысы болған. Меритократия қағидатына сәйкес департаменттегі барлық қызмет сатысынан өткен Рафхат Бисенов 2016 жылдан бастап осы кезге дейін аталған департамент басшысының орынбасары лауазымында қызмет атқарып келген. 
Отбасылы, 3 бала тәрбиелеуде.
<img src="https://kyzylorda-news.kz/wp-content/uploads/2020/10/122244019_3234372506688493_2341309296534181331_o.jpg" alt="" />

Қызмет істері агенттігі: Қызылордада департаменттің жаңа басшысы тағайындалды

<a href="https://kyzylorda-news.kz/date/2020/10/21/?doing_wp_cron=1603264016.4575080871582031250000">Kyzylorda-news.kz.</a> Қазақстан Республикасы Орталық сайлау комиссиясының отырысында Қазақстан халқы Ассамблеясы сайлайтын Мәжіліс депутаттарының кезекті сайлауын әзірлеу мен өткізу жөніндегі негізгі іс-шараларды Ортсайлауком мүшесі Ерлан Дауылбаев баяндады.
Ерлан Дауылбаев Қазақстан халқы Ассамблеясы сайлайтын Мәжіліс депутаттарының сайлауын әзірлеу мен өткізуді қамтамасыз ету Орталық сайлау комиссиясына және Республикалық маңызы бар қалалық комиссияға жүктелетінін айтты.
Қазақстан халқы Ассамблеясы сайлайтын Мәжіліс депутаттығына оның аумағында соңғы 10 жыл тұрақты тұрып жатқан, жиырма бес жасқа толған, бәсең сайлау құқығына ие, өтелмеген немесе алынбаған соттылығы жоқ, сондай-ақ сыбайлас жемқорлық қылмыс және сыбайлас жемқорлық құқық бұзушылық жасағаны үшін соттылығы жоқ Қазақстан Республикасының азаматы кандидат бола алады.
Қазақстан халқы Ассамблеясы сайлайтын Парламент Мәжілісінің депутаттығына кандидаттар ұсыну құқығы Ассамблея Кеңесіне тиесілі.
Кандидаттарды ұсыну бір ай бұрын – ағымдағы жылғы 11 желтоқсанда басталады және сайлауға жиырма күн қалғанда – ағымдағы жылғы 22 желтоқсанда жергілікті уақытпен сағат он сегізде аяқталады.
Кандидаттарды тіркеу, егер сайлауды тағайындау кезінде өзгеше белгіленбесе, жиырма күн – ағымдағы жылғы 22 желтоқсанда басталады және сайлауға он бес күн қалғанда – ағымдағы жылғы 27 желтоқсанда жергілікті уақытпен сағат он сегізде аяқталады.
Сайлау алдындағы үгіт кандидаттарды тіркеу мерзімі аяқталған сәттен басталады, яғни 27 желтоқсанда сағат 18.00–ден басталады және сайлау болатын күннің алдындағы күні – 2021 жылғы 10 қаңтарда жергілікті уақыт бойынша нөл сағатта аяқталады.
Қазақстан халқы Ассамблеясы сайлайтын Парламент Мәжілісі депутаттарының сайлауы Қазақстан халқы Ассамблеясының сессиясында өткізіледі.

Қазақстан халқы Ассамблеясы сайлайтын Мәжіліс депутаттығына кім кандидат бола алады?

*<a href="https://kyzylorda-news.kz/date/2020/10/21/?doing_wp_cron=1603264016.4575080871582031250000">Kyzylorda-news.kz.</a> «Қазақстан Республикасы мәслихаттары депутаттарының кезекті сайлауын тағайындау туралы» үшінші мәселе бойынша Ортсайлауком Төрағасының орынбасары Константин Петров баяндама жасады.*
Ол “Қазақстан Республикасындағы сайлау туралы” Қазақстан Республикасының Конституциялық заңында Орталық сайлау комиссиясының мәслихаттардың кезекті сайлауын тағайындау өкілеттігі көзделгенін хабарлады.
<blockquote>
 «Барлық деңгейдегі мәслихаттар депутаттарының кезекті сайлауы бір мезгілде өткізіледі және мерзімі жағынан Президентті, Парламент Сенаты депутаттарын сайлаумен тұспа-тұс келмеуге тиіс. Мәслихаттар депутаттарын сайлауды Қазақстан Республикасы Парламенті Мәжілісі депутаттарын сайлаумен бір мезгілде өткізу бойынша шектеулер жоқ. Осыған байланысты мәслихаттар депутаттарының кезекті сайлауын 2021 жылғы 10 қаңтарға тағайындау ұсынылды», – деді Константин Петров.
</blockquote>
Төраға орынбасары Мәжіліс депутаттары мен мәслихат депутаттарын сайлауды бірге өткізу қолданыстағы заңнамаға қайшы келмейтінін және қазіргі жағдайда объективті негізделген шешім болып табылатынын атап өтті. Біріктірілген науқан – бұл бюджетті үнемдеу және пандемия жағдайында негізделген әлеуметтік байланыстарды азайту.
Сонымен қатар Константин Петров жекелеген сайлау рәсімдерінің: Парламент Мәжілісі мен мәслихаттар депутаттарын сайлау кезінде ұсыну, тіркеу және сайлау алдындағы үгіт мерзімдеріне тоқталып, партиялық тізімдерді ұсыну мен тіркеу мерзімдерін тиісінше 6 күнге қысқарту туралы ұсыныс енгізді. Мәселен, партиялық тізімдер бойынша сайланатын Парламент Мәжілісінің және мәслихаттардың депутаттарын сайлау бойынша партиялық тізімдерді тіркеу мерзімінің аяқталуы бойынша бірыңғай тәсілдер үгітті бір мезгілде бастауға және мәслихаттар депутаттарын сайлау кезінде үгіт кезеңін ұлғайтуға мүмкіндік береді.
Сондай-ақ, К.Петров Орталық сайлау комиссиясы өз құзыретіне сәйкес, әкімшілік-аумақтық бірлік халқының санына сәйкес 2020 жылғы 11 қыркүйектегі №21/323 қаулысымен олардан сайланатын мәслихаттар депутаттарының саны анықталғанын хабарлады.
Барлығы алдағы науқанда 216 мәслихаттың 3276 депутаты сайлануға тиіс. Облыстардың, Нұрсұлтан, Алматы және Шымкент қалалары мәслихаттарының 589 депутаты, облыстық маңызы бар қалалардың 36 мәслихатында 596 депутат, аудандардың 163 мәслихатында 2091 депутат.
<a href="https://kyzylorda-news.kz/kogam/qazaqstan-respwblikasy-ortalyq-sajlaw-komissijasynyng-otyrysy-oetti-84310/">Айта кетейік</a>, бұған дейін Қазақстан Республикасы Орталық сайлау комиссиясының отырысы өткенін хабарлаған болатынбыз.

Алдағы науқанда қанша депутат сайлануы тиіс?

<a href="https://kyzylorda-news.kz/date/2020/10/21/?doing_wp_cron=1603264016.4575080871582031250000">Kyzylorda-news.kz.</a> Оқу жылы басталғаннан бері оқушылар арасында коронавирустың 250 жағдайы тіркелді. Бұл туралы денсаулық сақтау вице-министрі Ажар Ғиният ОКҚ брифингінде айтты.
<blockquote>
 «Оның ішінде кезекші сыныптарда оқитын балалар арасында 105 жағдай тіркелді, 1426 қарым-қатынаста болған адам бар. Олардың ішінде 19 оң жағдай анықталды. Қашықтан білім алатын балалар арасында 145 жағдай тіркелді. Байланыста болған 348 адам бар. Олардың арасында 22 оң жағдай анықталды», – деді Ажар Ғиният.
</blockquote>
<a href="https://24.kz/kz/zha-aly-tar/o-am/item/431021-o-u-zhyly-bastal-aly-ansha-o-ushy-koronavirus-zh-tyrdy">Хабар 24</a>

Оқу жылы басталғалы қанша оқушы коронавирус жұқтырды?

<a href="https://kyzylorda-news.kz/date/2020/10/21/?doing_wp_cron=1603264016.4575080871582031250000">Kyzylorda-news.kz.</a> Орталық сайлау комиссиясы төрағасының орынбасары Константин Петров партиялық тізімдер бойынша сайланатын Мәжіліс депутаттарының кезекті сайлауына дайындық және оны өткізу жөніндегі негізгі іс-шараларды баяндады.
Ол Орталық сайлау комиссиясы белгіленген өкілеттіктерге сәйкес Қазақстан Республикасы Президенті мен Парламенті Мәжілісі депутаттарының сайлауын дайындау мен өткізуді ұйымдастыратынын хабарлады.
Осыған байланысты, қолданыстағы заңнама нормалары негізінде партиялық тізімдер бойынша сайланатын Қазақстан Республикасы Парламенті Мәжілісі депутаттарының сайлауын әзірлеу мен өткізу жөніндегі негізгі іс-шаралардың күнтізбелік жоспары бекітілді.
Парламент Мәжілісінің депутаттығына оның аумағында соңғы 10 жылда тұрақты тұрып жатқан, 25 жасқа толған және бәсең сайлау құқығына ие Қазақстан Республикасының азаматы кандидат бола алады.
Қазақстан Республикасы Парламентінің депутаттығына, оның ішінде партиялық тізімдер бойынша кандидат бола алмайды:
1) заңда белгіленген тәртіппен өтелмеген немесе алынбаған соттылығы бар адам;
2) сот заңда белгіленген тәртіппен сыбайлас жемқорлық қылмыс және сыбайлас жемқорлық құқық бұзушылық жасауда кінәсін мойындаған адамды білдіреді.
Партиялық тізімдер бойынша сайланатын Мәжіліс депутаттығына кандидаттар ұсыну құқығы белгіленген тәртіппен тіркелген саяси партияларға тиесілі.
Саяси партия партиялық тізімдерді бекіту кезінде оған енгізілген адамдардың жалпы санының кемінде отыз проценті мөлшерінде әйелдер мен жиырма тоғыз жасқа толмаған адамдарды қамтиды.
Бекітілген жоспарға сәйкес кандидаттарды ұсыну кезеңі дауыс беру күнінен екі ай бұрын басталады және дауыс беру күнінен қырық күн бұрын жергілікті уақытпен сағат он сегізде аяқталады. Яғни, ағымдағы жылғы 10 қарашадан бастап 30 қараша күнгі сағат 18-00-ге дейін.
Партиялық тізімдерді тіркеу сайлаудан екі ай бұрын басталады және сайлауға бір ай қалғанда жергілікті уақытпен сағат он сегізде аяқталады, яғни 2020 жылғы 10 қарашадан 10 желтоқсан күнгі 18-00 сағатқа дейін.
КЗ-ның 27-бабының 2-тармағына сәйкес сайлау алдындағы үгіт партиялық тізімдерді тіркеу мерзімі аяқталған кезден басталады және сайлау болатын күннің алдындағы күнгі жергілікті уақыт бойынша нөл сағатта аяқталады.
Осылайша, партиялық тізімдер бойынша сайланатын Парламент Мәжілісі депутаттарының кезекті сайлауының жалпы ұзақтығы тағайындалған күннен бастап дауыс беру күніне дейін 82 күнді құрайды.

Мәжіліс депутаттығына кімдер кандидат бола алмайды?

<a href="https://kyzylorda-news.kz/date/2020/10/21/?doing_wp_cron=1603264016.4575080871582031250000">Kyzylorda-news.kz</a>. Орталық сайлау комиссиясының хатшысы Сәбила Мұстафина Мәжіліс пен мәслихаттар сайлауын өткізуге қанша қаржы бөлінетінін айтты, деп хабарлайды ҚазАқпарат.
Оның сөзіне қарағанда, екі науқан да тұрақты және конституциялық мерзімдерге сәйкес келеді. ОСК олардың жоспарлы сипатын ескере отырып, 2020 жылғы республикалық бюджетті нақтылау аясында сайлауды өткізуге арналған шығыстардың болжамды сметасын әзірлеп, Үкіметке ұсынды.
<blockquote>
 «2020 жылға арналған шығыстардың болжамды сметасы 10,8 млрд теңгені құрады. Бұл шығыстардың негізгі үлесі 10 061 сайлау комиссиясының 70681 мүшесінің еңбекақысына тиесілі, яғни бұл сома 7,3 млрд теңге немесе 68 пайызы. Қалған 3,5 млрд теңге немесе 32 пайызы сайлау комиссияларының ұйымдастыру шығыстарына жоспарланған. Осы орайда бюллетеньдерді, полиграфиялық және басқа да өнімдерді дайындау, сайлау процесінің жариялылығы мен ашықтығын қамтамасыз ету мақсатында сайлау науқанын ақпараттық сүйемелдеу, сайлау комиссиялары үшін қажетті материалдық-техникалық жағдайлар жасау ескерілген», – деді С. Мұстафина.
</blockquote>
Оның айтуынша, пандемия жағдайында барлық карантиндік шараларды сақтай отырып, науқан жүргізіледі. Сондықтан сайлау комиссияларының мүшелерін жеке қорғаныш құралдарымен қамтамасыз етуге 341,4 млн теңге сомасында шығындар көзделген.
<blockquote>
 «2016 жылғы Парламент Мәжілісінің өткен сайлау науқандарымен және 2019 жылғы президенттік сайлаумен салыстырғанда алдағы науқанға арналған шығыстар өсті. Бірінші кезекте, шығыстар көлемінің артуы сайлау комиссиялары мүшелерінің еңбегіне ақы төлеу жөніндегі шығыстардың ұлғаюына әсер еткен жалақының ең төменгі мөлшерінің артуымен байланысты. Екіншіден, халықтың табиғи өсуіне байланысты жаңадан құрылған 86 сайлау учаскесіне, жаңа учаскелік сайлау комиссияларының құрамында 600-ден астам мүшеге жұмсалатын шығындар ұлғайды. Үшіншіден, тауарлар, жұмыстар мен қызметтер бағасының инфляциясы, сондай-ақ пандемия жағдайында сайлау өткізуге байланысты міндетті шығыстар өсудің объективті факторлары болып отыр», – деді ол.
</blockquote>
Сонымен қатар С. Мұстафина науқан екі бюджеттік жыл аясында өтетінін атап өтті.
2021 жылға арналған шығыстар «2021-2023 жылдарға арналған республикалық бюджет туралы» заң жобасында 4,5 млрд теңге сомасында көзделген және бұл соманың барлығы дерлік сайлау комиссиялары мүшелерінің еңбегіне ақы төлеуге жұмсалады.
<blockquote>
 «Осылайша, тұтастай алғанда, ҚР Парламенті Мәжілісі мен мәслихаттары депутаттарының Біріккен сайлау науқанына шығыстардың болжамды сметасы 15,3 млрд теңгені құрайды. Бұл бюджет қаражатын тиімді пайдалану жөніндегі ұтымды шешім болып саналады», – деді ОСК хатшысы.
</blockquote>

Мәжіліс пен мәслихаттар сайлауын өткізуге қанша қаржы бөлінеді

<a href="https://kyzylorda-news.kz/date/2020/10/20/">Kyzylorda-news.kz</a>. Өңірде коронавирус инфекциясымен 3249 адам тіркелді. Анықталған науқастардың эпидемиологиялық ортасы есепке алынып, күнделікті саралануда. Бұл туралы Өңірлік коммуникациялар қызметінің ақпарат алаңында өткен брифингте облыс әкімінің орынбасары Наурызбай Байқадамов мәлімдеді.
<blockquote>
 Аймақта эпид ахуалдың тұрақты болуына тиісті жұмыстар жүргізілуде. Халықты дәрі-дәрмекпен қамтуға екі айлық қор және 210 инфекциялық төсек орын бар. Сондай-ақ, 200 төсекке арналған модульдік аурухана құрылысы жүруде. Бұған қоса, облысымызда 244 ИВЛ аппараттары жұмыс жасауда. Қосымша тағы 7 құрылғы келеді. Бүгінде өңіріміздегі медициналық ұйымдарға гуманитарлық көмек арқылы 658 оттегі концентраторы жеткізілді. Сонымен қатар, облыста 518 оттегімен қамтамасыз етілген төсек орын дайын, – деді Наурызбай Сейтқалиұлы.
</blockquote>
Дәрігерлердің жетіспеушілігін болдырмау мақсатында басқа профильдегі мамандарға арнайы семинарлар өткізілді.
<blockquote>
 Коронавирус инфекциясына қарсы күресте мамандар тапшылығын жою мақсатында аймағымыз 84 жас маманмен толықты. Олар қажеттілігіне қарай қалалық мекемелерге жолданды, – деді облыстық денсаулық сақтау басқармасы басшысының орынбасары Олжас Ысқақов.
</blockquote>
Брифингте Наурызбай Байқадамов індетпен күресте өзін-өзі қорғау инстинкті қалыптаспай нәтиже толыққанды болмайтынын айтты.
<blockquote>
 Ауырған адамға дәрі де, ақша да, лауазым да, атақ та ара түсе алмай қалған жағдайды бастан өткердік қой. “Індетпен күрес бәрі де жеңіс үшін” деп бірігіп күресетін майдан алаңы. Мені мемлекет немесе біреу қорғасын дегенмен ештеңе шықпайды. Жағдай әлі де күрделі болғанымен біздің жүйелі бақылауымызда. Жұмыс үзіліссіз жалғаса беретін болады. Күшейтілген карантин жеңілдетілгенімен қатаң талаптарды барынша ұстайтын боламыз, – деді облыс әкімінің орынбасары.
</blockquote>

Наурызбай Байқадамов: Ауырған адамға ақша да, атақ та көмектесе алмаған жағдайды бастан өткердік

<a href="https://kyzylorda-news.kz/date/2020/10/21/?doing_wp_cron=1603264016.4575080871582031250000">Kyzylorda-news.kz.</a> 21 қазанда Қазақстан Республикасы Орталық сайлау комиссиясының отырысы өтті. Отырысқа саяси партиялардың өкілдері, Қазақстан халқы Ассамблеясы төрағасының орынбасары Жансейіт Түймебаев, БКБ режимінде облыстардың, Нұр-Cұлтан, Алматы және Шымкент қалаларының аумақтық сайлау комиссиялары, онлайн режимінде бұқаралық ақпарат құралдарының өкілдері қатысты.
&nbsp;Жиынды ашқан Қазақстан Республикасы Орталық сайлау комиссиясының төрағасы Берік Имашев Қазақстан Республикасы Президентінің Жарлығына сәйкес бүгінгі күннен бастап Мәжіліс депутаттарын сайлау бойынша сайлау науқаны басталдығы туралы айтты.
Берік Имашев 2016 жылғы 20 наурызда сайланған Мәжіліс депутаттарының конституциялық өкілеттік мерзімі 2021 жылғы наурызда аяқталатынын атап өтті.
<blockquote>
 «Сайлау заңнамасына сәйкес Мәжіліс депутаттарының кезекті сайлауын Президент кемінде бес ай бұрын тағайындайды және ол Мәжіліс депутаттарының өкілеттік мерзімі аяқталғанға дейін кемінде 2 ай бұрын өткізіледі. Осылайша, Парламент Мәжілісінің депутаттарын сайлау науқаны көрсетілген конституциялық мерзімдерге сәйкес қатаң түрде тағайындалды және кезекті болып табылады», – дейді комиссия төрағасы.
</blockquote>
Сонымен қатар ол жоғары өкілді органды сайлау – елдегі ең маңызды қоғамдық-саяси оқиғалардың бірі екенін атап өтті.

Қазақстан Республикасы Орталық сайлау комиссиясының отырысы өтті

Kyzylorda-news.kz. Бүгін облыс әкімі Гүлшара Әбдіқалықова Қазақстанның еңбек сіңірген қайраткері, «Құрмет» орденінің иегері, «Ерен еңбегі үшін» медалінің иегері, Қызылорда облысының «Құрметті азаматы» Хұсейін Әмір-Темірді қабылдап, мерейтой иесіне құрметін жеткізді. Жүздесуде аймақ басшысы мәдениет саласының майталман маманы Хұсейін Жүсіпұлының мерейлі 80 жасқа толуымен құттықтап, Сыр руханиятының дамуындағы өлшеусіз еңбегін атап өтті.
<blockquote>
 “Облысымыздың мәдени-рухани дамуына өз үлесіңізді қосып, театр өнерін көтеруге ықпал етіп, ел құрметіне бөленіп қызмет етудесіз. Сіздердің тәжірибеңіз бен ақыл-кеңестеріңіз қазіргі жастар үшін аса қажет. Қызылорда облыстық театр ұжымы өзіңіздің жетекшілігіңізбен республикалық фестивальдардан өзге Қазан қаласы мен Түркияның Конья қаласында және Ұлыбританияда, Шотландияда өткен халықаралық театрлар фестиваліне қатысып, жүлделі орындарды иеленді. Ұлттық мәдениет пен өнерді қалыптастырудағы, дамыту мен насихаттауда театрдың «Академиялық» мәртебені иеленуі Хұсейін ағамыздың шығармашылық еңбегінің жемісі”,-деді облыс әкімі Гүлшара Әбдіқалықова.
</blockquote>
Тәуелсіз Қазақстанның театр саласының дамуына сүбелі үлес қосқан Хұсейін Әмір-Темір 1965 жылы Құрманғазы атындағы мемлекеттік өнер институтын «Актер» мамандығы бойынша, 1972 жылы Мәскеу қаласындағы Луначарский атындағы театр өнері институтының жоғарғы режиссeрлар курсын бітірген. Өз шығармашылық еңбек жолында Қызылорда, Талдықорған, Алматы, Шымкент, Орал театрларында жұмыс істеп, 200-ден аса спектакльді сахналады.
2015 жылы Қазақстанның Ұлыбританиядағы күндері аясында Лондон халқына Д.Исабековтың «Ескі үйдегі екі кездесу» драмасын ұсынып, 2018 жылы Шотландияда өткен «Фриндж» халықаралық өнер фестивалінде Хұсейн Әмір-Темір сахналаған «Ақбаян» спектаклімен қатысты. Ал, 2019 жылы Өзбекстан Республикасындағы Қызылорда облысының күндері аясында Р.Отарбаевтың «Нарком Жүргенов» драмасы Өзбекстан Республикасы, Ташкент қаласының көрермендеріне ұсынылды.
Кездесу барысында облыс әкімі Гүлшара Әбдіқалықова театр саласының белді өкіліне құрмет көрсетіп, ілтипат танытып, Қызылорда облысының ең жоғарғы марапаты «Құрмет» грамотасын табыстап, иығына шапан жапты.
Театр қайраткерінің құрметіне арналған кездесуде Қазақстан Жазушылар Одағының мүшесі Сайлаубай Жұбатырұлы Хұсейін Әмір-Темірдің өнер әлеміндегі қолтаңбасын сөз етті. Кездесу соңында Хұсейін Әмір-Темір облыс әкіміне алғысын білдіріп, шығармашылық туындылары жинақталған бірнеше кітаптарын сыйға тартты.
<img src="https://kyzylorda-news.kz/wp-content/uploads/2020/10/122167753_2833617626741288_4032088723749350753_o.jpg" alt="" />
<img src="https://kyzylorda-news.kz/wp-content/uploads/2020/10/122336287_2833617830074601_7883148314611507963_o.jpg" alt="" />

Гүлшара Әбдіқалықова Қазақстанның еңбек сіңірген қайраткері Хұсейін Әмір-Темірді мерейтойымен құттықтады

<a href="https://kyzylorda-news.kz/date/2020/10/21/">Kyzylorda-news.kz</a>. Саясаттанушы Данияр Әшімбаев Парламентке өту мүмкіндігі мол үш партияны атады, деп хабарлайды <a href="https://lenta.inform.kz/kz/sayasattanushy-parlamentke-otu-mumkindigi-mol-ush-partiyany-atady_a3708935">ҚазАқпарат.</a>
<blockquote>
 Біріншіден, сайлау өз уақытында өтеді – 6-шы Мәжілістің құзыреті келесі жылдың наурыз айында аяқталады да, Парламенттің төменгі палатасының жұмысы жалғаса береді. Бұған дейін сайлаудың өтетіні жайлы желтоқсанның соңына қарай белгілі болатыны туралы болжамдар айтылып еді. Алайда олай болмай шықты. Айтпақшы Қазақстан тарихында жоспарлы сайлаудан қарағанда мерзімінен бұрын өтетін сайлаулар көп болыпты. Жалпы Президент сайлауының да мерзімінен бұрын өтуінің де ешқандай «трагедиясы» жоқ. Мерзім бұл ретте көп ұзақ болған емес, әлемдік тәжірибеге сай билік сайлау үшін ең ыңғайлы уақытты таңдап отырды», – деп жазады саясаттанушы Facebook&nbsp;<a href="https://web.facebook.com/100000403918733/posts/3600574283299333/?extid=0&d=n&_rdc=1&_rdr">парақшасында</a>&nbsp;.
</blockquote>
Данияр Әшімбаевтың айтуынша 7-ші Мәжіліске үш парламенттік партияның, атап айтқанда «Nur Otan», «Ақ жол» және ҚХКП-ның ену мүмкіндігі жоғары.
<blockquote>
 «Неліктен бұлай ойлайтынымды түсіндірейін. «Nur Otan» партиясы – қанша айтқанмен орталық әрі Назарбаевтың партиясы, тұрақтылық пен келісім бағдары. Қазіргі жағдайда көрші мемлекеттердегі жағдайды есепке ала отырып, бұл құндылықтардың біздің қоғамға керектігін түйсінесің. Праймериз бойынша кампания «Nur Otan» партиясы кандидаттық корпусты жаңартып, дебаттардың тәжірибесіне ие болып, ашық кампанияға дайын екенін айғақтап берді. «Ақ жол» мен ҚХКП да кейінгі жылдары белсенділіктерін арттыра түсті. Электоратпен жұмыс жүргізіп, барлық алаңда өздерін таныта білді. Қалған партиялар туралы айтар болсақ, олар көзге көрінбеді де. Сол себепті сайлау 2020 жылдың желтоқсан пен 2021 жылдың қаңтар айларында өтеді. Бәрінде де дайындалып аларлық уақыт болды. Жаңа партияларды тіркеуді жеңілдететін нормалар қабылданды. Парламенттік оппозиция мәртебесі туралы заңға өзгерістерді енгізілді», – дейді ол.
</blockquote>
Саясаттанушы сонымен қатар жастар мен әйелдерге квота беру, партиялық тізім бойынша мәслихат сайлауын өткізу шаруалары күрделі еместігін жеткізді.
Еске сала кетсек бүгін Мемлекет басшысы Қасым-Жомарт Тоқаев ҚР Парламенті Мәжілісі және мәслихат депутаттары сайлауын тағайындау туралы үндеу жариялаған болатын.
<blockquote>
 «Бүгін мен Парламент Мәжілісі депутаттарының сайлауын тағайындау туралы Жарлыққа қол қойдым. Орталық сайлау комиссиясының қаулысымен барлық деңгейдегі мәслихат депутаттарының сайлауы тағайындалады. Алдағы сайлау конституциялық мерзімге сәйкес, 2021 жылдың 10 қаңтарында өтеді. Барлық саяси партиялардың бұл сайлау науқанына қатысуға дайындалуына, сайлау алдындағы платформасын әзірлеуіне, партиялық инфрақұрылымдарды жетілдіруіне уақыты жеткілікті болды», – деді Президент үндеуінде.
</blockquote>

Саясаттанушы Парламентке өту мүмкіндігі мол үш партияны атады

<a href="https://kyzylorda-news.kz/date/2020/10/20/">Kyzylorda-news.kz</a>. Қазіргі таңда Қызылорда қаласында тұрғын үй коммуналдық шаруашылықты жаңғыртудың бағдарламасына сәйкес 32 көпқабатты тұрғын үйге &nbsp;күрделі жөндеу жұмыстары жүргізіліп жатыр.
<blockquote>
 «Қала әкімінің басты тапсырмасы – сапаға мән беру. Әрі жұмыстарды уақытылы жүргізу. Тұрғын үйлерді күрделі жөндеуден өткізуші мердігер мекемелер берілген тапсырманы сапалы орындауда. Тұрғындарға қолайлы орта қалыптастыру мақсатында кей мекемелер жоба құжаттарында қаралмаған жұмыстарды өз жауапкершіліктеріне алған. Мәселен, көпқабатты тұрғын үй аулаларына орындықтар орнатып, ауланы қоршау жұмыстарын жүргізуде», – деді қалалық тұрғын үй-коммуналдық шаруашылығы, жолаушылар көлігі, автомобиль жолдары және тұрғын үй инспекциясы бөлімінің басшысы Б.Далабаев.
</blockquote>
Қолға алынған кешенді бағдарламаның міндеті &nbsp;жылумен, электрмен, сумен қамтамасыз етуші жүйелерді жаңғырту. Сонымен бірге жөндеу жұмыстары сыртқы қасбетін әрлеу, сырлау, шатыр жабынын жөндеу, подъезд іші жұмыстары, пластикті терезелер, домофонды есіктер орнату сынды жұмыстарды да қамтиды.
Тұрғындар жарты ғасырдан соң жөндеуден өткен үйлердің қазіргі жағдайын айтып, &nbsp;қуаныштарын жеткізді.
Жалпы Қызылорда қаласында 815 көпқабатты үй бар. Оның ішінде 426 көпқабатты тұрғын үй жөндеуді қажет етеді.&nbsp; «Тұрғын үй-коммуналдық шаруашылығын жаңғыртудың&nbsp; 2011-2020 жылдарға арналған» бағдарламасы аясында қаладағы&nbsp; 134 көппәтерлі тұрғын үйге күрделі жөндеу жұмыстары жүргізілген. Бұдан бөлек 26 үйді жаңғыртудан өткізуге бюджеттік өтінім ұсынылған.
<img src="https://kyzylorda-news.kz/wp-content/uploads/2020/10/122093091_2687504571516284_8340593636371963901_o.jpg" alt="" />
<img src="https://kyzylorda-news.kz/wp-content/uploads/2020/10/122246294_2687504638182944_4187409337438671050_o.jpg" alt="" />
<img src="https://kyzylorda-news.kz/wp-content/uploads/2020/10/122035764_2687504744849600_2012510874052943729_o.jpg" alt="" />
<img src="https://kyzylorda-news.kz/wp-content/uploads/2020/10/122245711_2687504511516290_2070529243923578165_o.jpg" alt="" />

Қазақстан және Қызылорда облысының жаңалықтары