<a href="https://kyzylorda-news.kz/">Kyzylorda-news.kz</a>. Бүгін аудан әкімі Мұрат Ергешбаев Жалаңтөс батыр ауылында ұйымдастырылған «Дала күні» шарасына қатысты. Онда аудан басшысы алқапқа алғашқы дән сеуіп, жаппай күріш егу науқанын бастады.
<blockquote>
 &nbsp;«Көктемнің әр күні жылға азық» дегендей, қазір жұмыстың нағыз қызған шағы. Күн жылынып, жер арқасы жібіген шақ шаруа адамының да білек сыбана қарбалас тірлікке кірісетін кезі. Сәл кешіксе болғаны, еңбегі еш кететінін қаперге ұстайтын шаруалар тамшылата тер төгіп, егіс алқаптарында таң сәреден, кеш батқанша еңбек етуде. «Не ексең, соны орарсың» деп тегін айтылмаған, көктемгі тынымсыз еңбектің өтемін күзде, жиын-терім кезінде көретініміз анық», – деді аудан әкімі Мұрат Нәлқожаұлы.
</blockquote>
«Дала күнін» өткізген диқандарға «Ақмаржан Қазалы» ЖШС директоры Төремұрат Тәжімұратов бата беріп, егіннің бітік шығып, күзде қырманның астыққа толуын тіледі.
Алғашқы дән себу рәсімінде аудандық ауыл шаруашылығы бөлімінің басшысы Нұрлан Аманбай аудандағы егіс көлемі және дайындық барысы туралы қысқаша айтып берді.
Бөлім басшысының айтуынша биыл ауданда17 685 гектар жерге ауылшаруашылығы дақылдарын орналастыру жоспарлануда. Оның ішінде негізгі дақыл – күріштің көлемі 6637 гектар. Одан бөлек, 125 гектар майлы дақылдар, 2250 гектар картоп, көкөніс, бақша дақылдары да егіледі.
Көктемгі дала жұмыстарының уақытылы басталып, сапалы жүргізілуі үшін қажетті шаралар қабылданған. Аудан дикандары минералды тыңайтқыш және тұқыммен қамтамасыз етілуде.Бүгінгі таңда 462 тонна арзандатылған дизель отыны жеткізілді.

Қазалыда алғашқы дән себілді

<a href="https://kyzylorda-news.kz/">Kyzylorda-news.kz</a>. Жаңақорған ауданында коронавирус инфекциясына қарсы вакцина салдырғандардың саны 1405-ке жетті. Екі күн бұрын ауданға “Спутник V” вакцинасының 3000 дозасы жеткізілді. Бұл туралы Өңірлік коммуникациялар қызметі алаңында өткен онлайн брифингте Жаңақорған ауданының Бас мемлекеттік санитариялық дәрігері Шынар Айдарова мәлімдеді.
Ахуал ауданда күрделі. Сәуір айының өзінде індет жұқтырғандар саны 130-ға жетті. Сырқаттанушылық көрсеткіші 21 пайызға өсті.
<blockquote>
 «Пандемия басталғалы бері ауырғандардың басым бөлігі ересектер болса, сәуір айында 18-29 жастағы азаматтар індет жұқтыруда. Сіздерден карантин шараларын сақтауды сұраймыз. Бетперде тағып, қолыңызды мұқият және үнемі жуу, әлеуметтік арақашықтықты сақтау қажет. Қорғаныс құралдары инфекцияның таралуын азайтуға көмектесетінін түсінген абзал. Түрлі мерекелер мен той-томалақтарды өткізуді де тоқтата тұруымыз қажет»,-деді ауданның Бас мемлекеттік санитариялық дәрігері Шынар Қожанқызы.
</blockquote>
Сондай-ақ, ауданда карантин талабын бұзған 23 жағдай тіркеліп, барлығына айыппұл салынды.

Жаңақорғанға «Спутник V» вакцинасының 3000 дозасы жеткізілді

<a href="https://kyzylorda-news.kz/">Kyzylorda-news.kz</a>.&nbsp;Сыбайлас жемқорлыққа қарсы іс-қимыл агенттігі 2017 жылдан бері жемқорлық фактілері 10,6% төмендегенін мәлім етті. Бұл туралы құзырлы органның&nbsp;2020 жылы атқарылған істер туралы&nbsp;ұлттық баяндамасында <a href="https://www.gov.kz/memleket/entities/anticorruption/documents/details/152774?lang=kk">хабарланған</a>.
«Жүйелі алдын алу жұмысының нәтижесінде, құқық қорғау органдары тіркеген сыбайлас жемқорлық фактілерінің саны 2,4%, 2017 жылмен салыстырғанда – 10,6% төмендеді.
Жемқорлық қылмыстары тіркелген ведомстволар:
–&nbsp;Сыбайлас жемқорлыққа қарсы қызметте: 2019 жылы – 1717 факті, 2020 жылы – 1632 факті, динамика -5%;
–&nbsp;Ішкі істер министрлігінде: 2019 жылы – 269, 2020 жылы – 342, динамика +27%;
–&nbsp;Ұлттық қауіпсіздік комитетінде: 2019 жылы – 128, 2020 жылы – 89, динамика -30%;
–&nbsp;Прокуратура органдарында: 2019 жылы – 65, 2020 жылы – 78, динамика +20%.
–&nbsp;Экономикалық тергеу қызметінде: 2019 – 21, 2020 жылы – 21, динамика 0%.
Ең көп таралған сыбайлас жемқорлық қылмыстар:
–&nbsp;Пара алу: 2019 жылы – 649 факті, 2020 жылы– 568, динамика -12,5%;
–&nbsp;Пара беру: 2019 жылы – 440, 2020 жылы – 624, динамика +41,8%;
–&nbsp;Алаяқтық: 2019 жылы – 327, 2020 жылы – 316, динамика -3,3%
–&nbsp;Сеніп тапсырылған бөтен мүлікті иемденіп алу немесе ысырап ету: 2019 жылы – 243, 2020 жылы – 268, динамика +10,3%:
–&nbsp;Лауазымдық өкілеттіктерін теріс пайдалану: 2019 жылы – 283; 2020 жылы – 193, динамика -31,8%
Мәлім етілгендей, былтыр сыбайлас жемқорлық қылмысы үшін&nbsp;1021 адам сотталды.
«2020 жылы сыбайлас жемқорлық қылмыс жасағаны үшін 1021 адам сотталды. Соның ішінде Сыбайлас жемқорлыққа қарсы қызмет тіркеген фактілер бойынша 722 адам жаза арқалады. Олардың арасында 144 басшы (1 облыс әкімі, 4 облыс әкімдерінің орынбасары, министрліктің 2 жауапты хатшысы, 2 комитет төрағасы, 1 елші, 5 судья, 10 аудандық және қалалық әкім) бар», – деп жазылған ұлттық баяндамада.
Құжаттағы деректерге сүйенсек, сыбайлас жемқорлықпен күрес кезінде 25 аса ауыр және 1368 ауыр қылмыстың, 112 жүйелі сыбайлас жемқорлық фактілерінің жолы кесілген.
«Агенттік жемқорлық әрекеттің салдарынан келген&nbsp;60,1 млрд теңге залалдың 50,7 млрд теңгесін өндірді.&nbsp;Бұл 2019 жылдың көрсеткішінен екі есе жоғары (22,7 млрд. теңге). Пара алу және жымқыру фактілері бойынша еселік айыппұл сомасы 2,8 млрд теңгені құрады. Келтірілген залалды қамтамасыз ету үшін, күдіктілердің мүлкіне 1,2 млрд теңге сомасында тыйым салынды», – делінген баяндамада.

Қазақстанда жемқорлық көп салалар аталды

<a href="https://kyzylorda-news.kz/">Kyzylorda-news.kz</a>.&nbsp;Қармақшы аудандық «Жастар ресурстық орталығы» қызметкерлерінің ұйымдастыруымен карантиндік санитарлық талаптарды қатаң сақтай отырып, Жосалы кентіндегі «Жастар саябағына» ағаш көшеттері отырғызылды. Ағаш көшеттерін отырғызуға аудандық пробация қызметінің есебінде тұрған жастар мен ерікті жастар тартылды.
Аудандық пробация қызметінің бастығы Е.Әбілдаевтың айтуынша пробация есебіндегі сотталғандар игі істерге белсене қатысады екен. Алдағы уақытта да сотталғандар тарапынан жас ағаш көшеттерін отырғызу жұмыстары жалғасатынын және баптап күтімге алуды жоспарлап отырғандығын айтты.
<blockquote>
 «Бір тал кессең, он тал ек демекші бұл&nbsp; игі бастамаға біз де өз үлесімді қоссақ деп ойлап, көшет отырғызуға келдік. Отырғызылған әрбір тал күтімі жақсы болса, күні ертең жапырағы дараққа айналып, жазда сая, қыста қамсау болады.&nbsp; Сондықтан да отырғызылған ағаш көшеттерін көздің қарашығындай сақтап, баптап-күту біздің міндетіміз. Ауданымыздың гүлденіп, көркеюі үшін қолымыздан келгенше көмек қолын созамыз»,- деді есептегі тұрғын.
</blockquote>

Пробация есебіндегі тұрғындар ағаш көшеттерін отырғызды

<a href="https://kyzylorda-news.kz/">Kyzylorda-news.kz</a>. Қазақстан Тәуелсіздігінің 30 жылдығы аясында 29 сәуір – 1 мамыр аралығында Қызылорда қаласы “Мұз айдыны” спорт кешенінде мəнерлеп сырғанаудан Əлем чемпионатының күміс жүлдегері Элизабет Тұрсынбаеваның жүлдесіне арналған республикалық турнир өтеді.
Ел мақтанышының жүлдесіне арналған биылғы жарыс бесінші мәрте ұйымдастырылуда.
Республикалық турнирге Нұр-Сұлтан, Алматы, Шымкент қалаларынан және облыс орталықтарынан 10 команда қатысады.
Дүбірлі сайыста 5-18 жас аралығындағы спортшылар қысқа жəне еркін бағдарламаларда өнер көрсетеді.
Турнирдің құрметті қонағы ретінде ҚР еңбек сіңірген спорт шебері Элизабет Тұрсынбаева қатысады. 
Бас төрешілік қызметті халықаралық дәрежедегі төреші Айгүл Қуанышева (Алматы қаласы) атқарады. 
Айта кетейік, жарыс карантин талаптарын сақтай отырып, көрермендерсіз өткізіледі.

Қызылордада Элизабет Тұрсынбаеваның жүлдесіне арналған республикалық турнир өтеді

<a href="https://kyzylorda-news.kz/">Kyzylorda-news.kz</a>. Сот үкімімен белгіленген мәжбүрлі еңбекті орындамаған азамат бас бостандығынан айырылып қамауға алынды.
Қармақшы&nbsp;аудандық пробация қызметінің есебіндегі сотталған ҚР ҚК-нің 106-бабы 1-бөлігімен кінәлі деп танылып, сот үкімімен оған 3 жыл 6 айға бас бостандығынан шектеу жазасы тағайындалған. Жаза өтеуінің бүкіл мерзімі ішінде жыл сайын 100 сағаттан аспайтын мәжбүрлі еңбек тағайындалып, пробациялық бақылау белгіленген.
Мәжбүрлі еңбекті атқару үшін азаматқа Жосалы кенті әкімінің өкімі шығарылып, оған өкім таныстырылған. Сотталған азамат 2020 жылы 100 сағаттық мәжбүрлі еңбекті орындағанымен, 2021 жылы мәжбүрлі еңбекті орындаудан бас тартқан. Пробация қызметі сот үкімімен белгіленген мәжбүрлі еңбекті атқаруын тексеру барысында кінәлінің мәжбүрлі еңбекке мүлдем шықпағандығы анықталып, ол жөнінде түсінік алынып, ескерту берілді.&nbsp; Берілген ескертуге де құлақ аспаған азаматтың жазасын бас бостандығынан айыру жазасына ауыстыру үшін пробация қызметкерлері сотқа ұсыныс жолдады.
Қармақшы аудандық сотының қаулысымен аталған азаматтың жазасының өтелмеген бөлігі 1 жыл 11 ай&nbsp; мерзімі бас бостандығынан айыру жазасына ауыстырылып, сот залынан қамауға алынды. Қаулы заңды күшіне енген жоқ.
Айта кетейік, мәжбүрлі еңбекке тарту Қазақстан Республикасының Қылмыстық кодексінің 44-бабы 1-бөлігінде көрсетілгендей бас бостандығынан шектеу жазасы тағайындалған сотталғандарға қолданылады. Мәжбүрлі еңбекті жергілікті атқарушы органдар қоғамдық орындарда ұйымдастырады және күніне төрт сағаттан асырылмай өтеледі.

Қызылордада мәжбүрлі еңбекті орындамаған азамат сотталды

<a href="https://kyzylorda-news.kz/">Kyzylorda-news.kz</a>. Қазақстандықтар мамыр айында 13 күн демалады.
Мамыр айындағы күнтізбеде 3 мемлекеттік мереке күн бар, атап айтсақ 1 мамыр – Қазақстан халқының бірлігі күні, 7 мамыр – Отан қорғаушы күні, 9 мамыр – Жеңіс күні.
Биыл мемлекеттік мереке саналатын 1 мамыр сенбіге дәл келіп отыр. «Қазақстан Республикасындағы мерекелер туралы» Заңға сәйкес, демалыс және мереке күндері сәйкес келген жағдайда мерекеден кейінгі жұмыс күні демалыс болып есептеледі. Демек, қазақстандықтар сенбі, жексенбі, дүйсенбі – 3 күн қатарынан демалады.
Сонымен қатар, 9 мамыр жексенбі демалыс күнге келіп тұр. Сондықтан қазақстандықтар 7, 8, 9, 10 мамыр күндері тағы демалатын болады.

Қазақстандықтар мамыр айында қанша күн демалады?

<a href="https://kyzylorda-news.kz/">Kyzylorda-news.kz</a>. Қызылордада 5 жасар бала жоғалып кетті. Бахыт Алтайыр Мақсатұлы 27 сәуір күні ойнап кетіп, үйге қайтып оралмаған.
Іздестіру жұмыстарына Қызылорда облысы Полиция департаментінің, Қызылорда қалалық Полиция басқармасының жеке құрамы, Төтенше жағдайлар департаменті, еріктілер және жергілікті тұрғындар жұмылдырылды. Іздеу шаралары аясында әлеуметтік желілер және бұқаралық ақпарат құралдары арқылы тұрғындар ақпараттандырылды.
Полиция қызметкерлерінің күшімен қаланың көпқабатты үй шатырлары, өжірелері және ауладағы люктары, саяжайлардағы тастанды үйлер, құрылысы бітпеген ғимараттар, жертөлелер, қалың жоталар, бейіттер, Сырдария өзенінің жағалауы тексерілуде. Сонымен қатар, баланың фотосуреті көрсетіліп, сұрастыру жұмыстары жүргізілуде.
Кәмелет жасына толмаған бала туралы қандай да бір ақпарат немесе жүрген жері туралы мәлімет білген жағдайда төменде көрсетілген телефон нөмірлеріне хабар берулеріңізді сұраймыз.
Тел: 8(7242)-29-75-20 немесе 102.
<img src="https://kyzylorda-news.kz/wp-content/uploads/2021/04/sajtqa-2-1-1-1024x768-1.jpg" alt="" />
<img src="https://kyzylorda-news.kz/wp-content/uploads/2021/04/sajtqa-2-2-1024x576-1.jpg" alt="" />

Қызылордада бес жасар бала іздестірілуде

<a href="https://kyzylorda-news.kz/">Kyzylorda-news.kz</a>. Қызылорда облысында 640 мыңнан астам адам МӘМС жүйесіне тіркелген.
Жүйе іске қосылған 2017 жылдың 1 шілдесінен бері облыс тұрғындары қорға 17,3 млрд теңге аударған. Оның 13,2 млрд теңгесі жұмыс берушілердің аударымдары болса, қалған 4,1 млрд теңгесі жеке кәсіпкерлер мен азаматтық-құқықтық келісімшарт негізінде еңбек ететін тұлғаларға тиесілі.
Жинақталған қаржы сенімгерлік басқару туралы келісім бекітілген Ұлттық банкте сақталады және МӘМС пакеті шеңберіндегі қызметтер ақысын төлеуге жұмсалуда. 2021 жылға Әлеуметтік медициналық сақтандыру қорының филиалымен 59 медициналық қызмет көрсетушілермен келісім – шарт жасалды, оның ішінде – 29 мемлекеттік медициналық ұйым, 30 – жеке меншік.
<blockquote>
 «Медициналық сақтандыруға ай сайын төлеу арқылы сіз міндетті медициналық сақтандыру жүйесі шеңберінде өзіңізге қажет қызметтердің барлық түрлерін дәрігердің жолдамасы арқылы ала аласыз. Егер медициналық қызметтердің нақты бағасымен салыстыратын болсақ, бүгінгі күні дәрігердің алғашқы қабылдауы 2-3 мың теңге тұрады, қымбат зертханалық қызметтер шамамен 5 мың теңге, МРТ орташа есеппен 18 мың теңге, КТ – 13 мың теңге, ал МӘМС жүйесінде сақтандырылған азаматтар үшін барлық медициналық қызметтері қолжетімді», – деді «Әлеуметтік медициналық сақтандыру қоры» КЕАҚ облыс бойынша филиалының директоры Бақыт Исмаханбетов.
</blockquote>

Қызылордада 640 мыңнан астам адам МӘМС жүйесіне тіркелді

<a href="https://kyzylorda-news.kz/">Kyzylorda-news.kz</a>. Мәжіліс депутаттары әлеуметтік кәсіпкерлерге салық жеңілдіктерін қарастыруды ұсынды, деп хабарлайды&nbsp;<a href="https://stan.kz/">Stan.kz</a>.
Депутат Екатерина Смышляева заң жобасының басты мақсаты әлеуметтік кәсіпкерлікті қолдау жөніндегі мемлекеттік шараларды шоғырландыру екенін атап өтті.
<blockquote>
 “Атап айтқанда, депутаттар әлеуметтік кәсіпкерлерге салық салынатын табысты салық салуға байланысты кірістерді екі есеге азайту, халықтың әлеуметтік осал санаттарын оқыту, біліктілігін арттыру немесе қайта даярлауға кеткен шығындарды екі есе азайту бөлігінде салықтық жеңілдіктер беруді ұсынды.&nbsp;Бұл&nbsp;нормаларды енгізу арқылы біз&nbsp;кәсіпкерлік субъектілерінің тізімін кеңейтеміз”, – деді Екатерина Смышляева мәжіліс отырысында.
</blockquote>
Бұл қызметкерлердің біліктілігін арттыру мақсатында жасалуы керек екенін айтты депутат.&nbsp;
<blockquote>
 “Кәсіптік оқытуды ұйымдастыруға кететін шығындар үшін жұмыс берушілерге салықтық жеңілдіктер ұсыну олардың жұмыспен қамту мәселелерін шешуге және осы топтағы жұмысшылардың құзыреттілігін арттыру процесінде жеке инвестицияларды тартуға қатысуына ықпал етеді, бұл бүгінде негізінен бюджет қаражаты есебінен қаржыландырылады”, – деп толықтырды депутат.
</blockquote>
Сондай-ақ, депутаттар бірінші оқылымда әлеуметтік кәсіпкерлікті дамыту бойынша түзетулер жобасын мақұлдады. Депутат Смышляеваның айтуынша, жүзге жуық әлеуметтік субъектілерге салық салу жеңілдетілген.
Мәжіліс “Салық және бюджетке төленетін басқа да міндетті төлемдер туралы” кодекске өзгерістер мен толықтырулар жобасын бірінші оқылымда мақұлдады.
Заң жобасы қызметі қоғамның әлеуметтік мәселелерін шешуге бағытталған кәсіпкерлік субъектілеріне анықтама береді.&nbsp;Негізгі заң жобасы үш кодекс пен екі заңға өзгерістер мен толықтырулар енгізуді көздейді.

Қазақстанда әлеуметтік кәсіпкерлерге салықты жеңілдету ұсынылды

<a href="https://kyzylorda-news.kz/">Kyzylorda-news.kz</a>. Ведомствоаралық жұмыс тобының құрамы жаңа мүшелермен толықты.
<blockquote>
 «Бүгінде мемлекеттік көрсетілетін қызметтер сапасына бақылау жүргізуде азаматтық қоғамның белсенділігі артуда. Қазір департамент жанындағы ведомствоаралық жұмыс тобының құрамын азаматтық қоғам белсенділерімен толықтырылуда. Әлеуметтік желіге хабарлама жарияладық. Әр ауданнан бір азамат іріктеп алдық. Оның ішінде мәслихат депутаттары, БАҚ және үкіметтік емес ұйым өкілдері бар», – деді облыс бойынша Мемлекеттік қызмет істері департаменті басшысының орынбасары Берікбол Байхожаев.
</blockquote>
Айта кетейік, ведомствоаралық жұмыс тобы мемлекеттік көрсетілетін қызметтер сапасына қоғамдық бақылау мен қабылдау өткізеді. Ағымдағы жылдың 1 тоқсанында 8 мемлекеттік мекемеде қоғамдық мониторинг жүргізіліп, анықталған кемшіліктерді жою жөнінде 7 ұсыным енгізілді.
Жалпы облыста 357 мемлекеттік орган бар. Ал аймақтағы мемлекеттік қызметшілердің штат саны 3 667 бірлікті құрайды. Жыл басынан бері 2 131 552 қызмет көрсетілген.

Қызылорда: Ведомствоаралық жұмыс тобының құрамы толықтырылды

<a href="https://kyzylorda-news.kz/">Kyzylorda-news.kz</a>. Қазақстанда өткен тәулікте 2499 адам коронавирус індетінен емделіп шықты, деп хабарлайды&nbsp;<a href="https://www.coronavirus2020.kz/kz">coronavirus2020.kz.</a>
**Өңірлер бойынша: 
**Нұр-Сұлтан қаласы – 214, 
Алматы қаласы – 760, 
Шымкент қаласы – 40, 
Ақмола облысы – 107, 
Ақтөбе облысы – 247, 
Алматы облысы – 164, 
Атырау облысы – 104, 
Шығыс Қазақстан облысы – 60, 
Жамбыл облысы – 182, 
Батыс Қазақстан облысы – 50, 
Қарағанды облысы – 202, 
Қостанай облысы – 132, 
Қызылорда облысы – 13, 
Маңғыстау облысы – 87, 
Павлодар облысы – 65, 
Солтүстік Қазақстан облысы – 43, 
Түркістан облысы – 29.
Жалпы пандемия басталғалы коронавирус жұқтырғандар саны – 314 082. Оның ішінде жазылғандар саны – 268 439.

Қазақстан және Қызылорда облысының жаңалықтары