<a href="https://kyzylorda-news.kz/?doing_wp_cron=1608783104.5910580158233642578125">Kyzylorda-news.kz.</a> Жыл басынан тұрмыстық зорлық-зомбылық жасаған 615 тұлғаға әкімшілік жауапкершілік қарастырылса, 2472 азаматтарға қатысты қорғау нұсқамалары шығарылып жұбайымен қарым-қатынасқа шектеулер қойылды.
Жалпы әйелдерге қарсы жасалған қылмыстардың басым бөлігі отбасы тұрмыстық жағдайда орын алған, өткен жылмен салыстырғанда 27 пайызға төмендеген.
Бұл қылмыстардың алдын алу мақсатында «Зорлық-зомбылықсыз қоғам», «Зорлық-зомбылыққа жол жоқ», «Зорлық-зомбылықсыз 16 күн» «Тұрмыс» жедел профилактикалық шаралары өткізіліп, шараға полиция қызметкерлерімен бірлесіп үкіметтік емес ұйымдар, волонтерлар және қоғамдық қор мүшелері жұмылдырылды.Балаларын тәрбиелеу және оқыту жөніндегі міндеттерін тиісті деңгейде орындамаған 74 ата-ана әкімшілік жауапкершілікке тартылды.
<blockquote>
 “Кәмелетке толмағандар арасында қылмыс пен құқық бұзушылықтың алдын алу мақсатында оқушылар, ата-аналар мен ұстаздар қауымының қатысумен онлайн түрде, яғни «ZOOM» байланысы арқылы дәрістер өткізілуде. Дәрістерге жалпы 900-ден астам тыңдаушылар қатысты”, – деді Қызылорда ОПД Жергілікті полиция қызметінің бастығы Бауыржан Ибраев.
</blockquote>
Кәмелетке толмағандар мен жастарға қарсы және олармен жасалатын қылмыстық құқық бұзушылықтардың алдын алу мақсатында «Жасөспірім», «Балалар түнгі қалада», «Ата-ана – Жасөспірім – Көше», «Тұрмыс», «Квадрат», «Учаске» профилактикалық іс-шаралары өткізілді.

Қызылордада әйелдерге қарсы жасалатын қылмыстар 27 пайызға азайды

<a href="https://kyzylorda-news.kz/?doing_wp_cron=1608783104.5910580158233642578125">Kyzylorda-news.kz.</a>&nbsp;Бүгін облыс әкімі Гүлшара Әбдіқалықова Сырдария ауданының әкімі Талғат Дүйсебаевты қабылдады.
Аймақ басшысы ауданның әлеуметтік-экономикалық дамуына қатысты негізгі көрсеткіштерді саралады. Өз кезегінде аудан әкімі Талғат Тұрсынұлы облыс әкіміне ауданның 11 ай ішіндегі қорытындысын баяндап, 2021 жылға жоспарымен бөлісті.
Аудан басшысы экономиканың негізгі саласы – өнеркәсіп өндірісіне тоқталып, биылғы жылдың қаңтар-қараша айында ауданның өнеркәсіп орындары қолданыстағы бағамен 3463,0 млн теңгенің өнім өндіргенін жеткізді. Бұл өткен жылдың осы деңгейіне қарағанда 54,8 пайызға ұлғайып отыр. Оның ішінде өңдеу өнеркәсібі 2891,0 млн теңгені құрады.
Сырдария ауданында ауыл, орман және балық шаруашылығының жалпы өнімі көлемі 2020 жылдың 11 айында 15827,0 млн теңгені құрап, 2019 жылмен салыстырғанда 1,7 пайызға артқан. Есепті мерзімде ет өндірісі 0,6 %, сүт өндірісі 0,8 %, жұмыртқа 1,6 % өсіп отыр. 
Пандемияға қарамастан ауданда құрылыс жұмыстары қарқын алып, кәсіпкерлік субъектілерінің саны 2291-ге жетіп, өткен жылдың осы кезеңімен салыстырғанда 8,7 пайызға өскен.
Қызылорда облысының әкімі Гүлшара Әбдіқалықова Сырдария ауданында атқарылған ауқымды жұмыстарды саралай келе, аудан әкіміне ауданның әлеуметтік-экономикалық даму қарқынын түсірмеуге, бюджеттің толық игерілуіне және қоғамдық-саяси ахуалды тұрақты сақтауға қатысты бірқатар тапсырма берді.

Сырдария ауданында кәсіпкерлік нысандар көбейді

<a href="https://kyzylorda-news.kz/?doing_wp_cron=1608783104.5910580158233642578125">Kyzylorda-news.kz.</a> 2021 жылдың қаңтарынан барлық педагогтің жалақысы тағы 25 пайызға өседі. Бұл туралы білім және ғылым министрі Асхат Аймағамбетов мәлімдеді, деп хабарлайды <a href="https://sputnik.kz/society/20201224/15832657/ministr-mugalimder-zhalaqy.html">Sputnik Қазақстан.</a>
<blockquote>
 “Биыл президент біздің алдымызға мұғалімдердің жалақысын 25 пайызға өсіру міндетін қойған еді. Біз тапсырманы орындадық. Келесі жылы қаңтар айынан бастап барлық педагогтің жалақысы тағы 25 процентке көбейеді”, – деді Аймағамбетов орталық коммуникациялар қызметінде өткен баспасөз мәслихатында.
</blockquote>
Ол тек мектеп мұғалімдерінің емес, балабақша, колледж, қосымша білім беру жүйесінің педагогтерінің айлығы көтерілетінін атап өтті.
Оқи отырыңыз: Қазақстанның үздік мұғалімдеріне 2,7 млн теңге табысталды
Бұдан бөлек, министр білім жүйесінде басқа да қосымша ақылар барын еске салды.
Мәселен, біліктілік санатына қарай мұғалім өз жалақысының 30-50 процентіне дейін қосымша ақы алады. Егер ол шебер болса, ай сайын еңбекақысының 50 пайызына дейін үстемеақы беріледі.
Сондай-ақ, пәнді ағылшын тілінде беру, сынып жетекшілігі, дәптер тексергені үшін қосымша ақылар қарастырылған.

Білім министрі қаңтардан бастап мұғалімдердің жалақысы қаншаға өсетінін айтты

<a href="https://kyzylorda-news.kz/?doing_wp_cron=1608783104.5910580158233642578125">Kyzylorda-news.kz.</a> Бүгін облыс әкімі Гүлшара Әбдіқалықова Жаңақорған ауданы әкімі Руслан Рүстемовтің жыл көлемінде атқарған жұмыстарының есебін тыңдады.
2020 жылы ауданның бюджеті 126,6 пайызға артып, ауылшаруашылығы тауарларын өндіру есепті кезеңмен салыстырғанда 102,5 процентке өскен.
Жаңақорған ауданында өнідірілетін құрылыс заттары республиканың басқа облыстарына да жеткізілуде. Ағымдағы жылы 73,5 млрд теңгеге өнім өндірілді.
Бюджет қаржысы есебінен 8,3 млрд теңгеге әлеуметтік нысандардың құрлысы жүргізіліп, күрделі жөндеуден өткізілді, сондай-ақ ауданішілік жолдарды жөндеу мен аяқсу арнасын тазалау ұйымдастырылды. Оның ішінде Жаңақорған кентінде 600 және 300 орындық екі мектеп 2021 жылы жаңа оқу жылына пайдалануға беріледі деп жоспарлануда.
Мемлекеттік-жекешілік әріптестік аясында 9 спорт нысанының құрылысы аяқталды. Ал, 6 нысан 2021 жылы пайдалануға беріледі деп күтілуде.
Ауданда кәсіпкерлік, индустриялық-инновациялық жаңа жобалар жүзеге асуда. 10 Мвт энергия қуатын күн сәулесінен өндіретін құрылғы пайдалануға беріледі деп жоспарлануда. Жоба құны 3,8 млрд теңге құрайды. Одан бөлек, 2021 жылы 3,3 млрд теңгеге құс етін өндіретін фабрика салынады деп күтілуде.
Облыс әкімі 2021 жылдың міндеттері мен мақсаттары бағытында нақты тапсырмалар берді. Оның ішінде облыстық бюджет қаржысына Ақүйік ауылдық округіндегі 90 орындық бала бақша құрылысы мен аталған елді мекенге газ желісін тарту мәселесін атап өтті. Сондай-ақ, ауылшаруашылық дақылдарын әртараптандыру, шағын және орта бизнесті дамыту, жұмыссыздық мәселесін шешуге басымдық беру қажет екенін айтты.

Аймақ басшысы Жаңақорған ауданы әкімінің есебін тыңдады

<a href="https://kyzylorda-news.kz/?doing_wp_cron=1608783104.5910580158233642578125">Kyzylorda-news.kz.</a> ҚР Білім және ғылым министрі Асхат Аймағамбетов келесі жылы оқу бағдарламасына енетін «Әліппенің» қандай қаріпте жарық көретінін айтып берді, деп хабарлайды <a href="https://lenta.inform.kz/kz/alippe-kirill-karpinde-shygady-bilim-ministri_a3733769">ҚазАқпарат.</a>
<blockquote>
 «Біздің алдымызда тұрған мақсат – осы «Әліппемізді» ертерек оқу бағдарламасына кіргізу. Латын әліпбиі бойынша тиісті шешім қабылданды, бұл шешім бойынша латын әліпбиіне көшу жұмыстары кезең-кезеңімен өтетін болады. Ал бізге келесі жылдан бастап, «Әліппемен» оқи бастау керек. Сондықтан, келесі жылы қабылданып, енгізілетін «Әліппе» кирилл қарпінде болады. Одан кейін мектептерде кезең-кезеңімен латын әліпбиіне көшу жұмысы басталғанда, әрине «Әліппені» де латын қарпіне көшіреміз. Бұл жалпы қиын шаруа емес. Ең бастысы – бағдарлама және оқулықтардың мазмұны. Бұл мәселелер қазіргі уақытта шешіліп қойған», – деп жауап берді Білім министрі тілші сұрағына.
</blockquote>
Айта кетейік, биыл тамыз айында ҚР Білім және ғылым министрі Асхат Аймағамбетов мектеп бағдарламасына сәйкес, 1-сыныптарға 1-2 тоқсан «Әліппе», 3-4 тоқсан&nbsp;<a href="https://www.inform.kz/kz/okushylar-alippeni-kay-kezden-bastap-okidy_a3685957">«Ана тілі»</a>&nbsp;енгізілетінін айтқан еді.
«Әліппені» енгізу&nbsp;<a href="https://www.inform.kz/kz/2021-zhyly-alippe-engiziledi-bilim-ministrligi_a3713547">2021-2022 оқу жылына</a>&nbsp;жоспарланып отыр.

«Әліппе» кирилл қарпінде шығады – Білім министрі

<a href="https://kyzylorda-news.kz/?doing_wp_cron=1608783104.5910580158233642578125">Kyzylorda-news.kz.</a> Бүгін облыс әкімі Гүлшара Әбдіқалықова Шиелі ауданының әкімі Қамбарбек Мүбараковты қабылдады.
Кездесуде Қамбарбек Мүбараков аудандағы мемлекеттік бағдарламалардың орындалу барысын баяндап, макроэкономикалық көрсеткіштеріне тоқталды.
Шиелі ауданында ағымдағы жылы өнеркәсіп орындары арқылы 33,8 млрд теңгенің өнімі өндірілсе, оның ішінде өңдеу өнеркәсібі өнімінің көлемі 13,5 млрд теңгені құрап, өткен жылдың осы кезеңімен салыстырғанда 167,1 пайызға артқан.
Биыл ауданда тіркелген шағын және орта кәсіпкерліктің саны 5 180 субъектіге жетіп, өткен жылға қарағанда 108,9 пайызға артқан. Кәсіпкерлік саласы бойынша барлық мемлекеттік бағдарламалар аясында 747 жоба қаржыландырылып, жоспар 106,1 пайызға орындалған.
Ауыл шаруашылығы бойынша аудандағы құрылымдар 30 млрд 653 млн.теңгенің өнімін өндірген.
«Нұрлы жер» бағдарламасы аясында Шиелі кентінде үш қабатты 18 пәтерлі 5 тұрғын үйдің және бір қабатты 25 тұрғын үйдің құрылыс жұмыстары жүргізілуде. Жақын арада үш қабатты 18 пәтерлі 1 тұрғын үйді пәтер иелеріне табыстау жоспарлануда.
«Өңірлерді дамытудың 2020» мемлекеттік бағдарламасы аясында Тартоғай және Сұлутөбе елді мекендерінің ауыз сумен қамту жүйелерінің және бас су қоймасының құрылыстары жүргізілген. 
Жақын күндері Жаңатұрмыс ауылдық округі бойынша 205 тұрғын үй табиғи газға қосу жоспарланған.
«Самара-Шымкент-Майлытоғай» автомобиль жолы орташа жөндеуден өткізілген. «Жиделіарық елді мекеніне кіре беріс» автомобиль жолына орташа жөндеу, «Самара-Шымкент» автомобиль жолының ауданға қатысты 6,5 шақырымын қайта құрылымдау жұмыстары жүруде.
«Жұмыспен қамтудың жол картасы» бағдарламасы аясында және аудан бюджетінен Шиелі кенті бойынша ұзындығы 23,5 шақырым 68 көшеге және 11 елді мекенде ұзындығы 23 шақырым 27 көшеге күрделі, орташа және жай жөндеу жұмыстары жүргізілді.
Елдегі эпидемиологиялық ахуалға байланысты қашықтықтан оқитын оқушылар үшін электронды техникалар алынып, үкімет резерві қорынан бөлінген қаржыға 730 планшет, 290 компьютер жеткізіліп, құрылғысы жоқ балаларға таратылған.
Кездесу соңында өңір басшысы Гүлшара Әбдіқалықова Шиелі ауданы әкімі Қамбарбек Мүбараковқа ауданның экономикалық көрсеткішін арттыру бағытында бірқатар тапсырма беріп, эпидемиологиялық ахуалды ұдайы назарда ұстау қажеттігін жеткізді.

Гүлшара Әбдіқалықова Шиелі ауданының әкімін қабылдады

<a href="https://kyzylorda-news.kz/?doing_wp_cron=1608783104.5910580158233642578125">Kyzylorda-news.kz.</a> Бүгін облыс әкімі Гүлшара Әбдіқалықова Жалағаш ауданының әкімі Асылбек Шәменовты қабылдап, ауданның биылғы 11 ай ішіндегі әлеуметтік-экономикалық дамуының негізгі көрсеткіштері туралы есебін тыңдады.
Жалағаш ауданында 2020 жылдың 1 желтоқсанына жоспарланған макро-экономикалық көрсеткіштері бойынша жалпы өсім қалыптасқан. Аудан әкімінің айтуынша, өнеркәсіп өнімдерін өндіру 130,5 пайызға өсіп, 9,2 млрд теңгенің өнімдері өндірілген. Бұл көрсеткіш былтырғы жылдың осы кезеңімен салыстырғанда 2 есеге өсті. Негізгі қорға тартылған инвестицияның бағалау көлемі 15 млрд 612 млн теңгені құрап, өткен жылға қарағанда 110,5 пайызға артса, құрылыс жұмыстарының көлемі 2,5 есеге ұлғайған. Сонымен қатар биыл жалпы құны 4 млрд 897 млн теңгеге 174 жоба қаржыландырылды.
Сондай-ақ Асылбек Шәменов аймақ басшысы Гүлшара Әбдіқалықоваға есепті мерзімге 21 млрд 541 млн теңгенің ауыл шаруашылығы өнімдері өндірілгені жөнінде ақпарат берді. Қамбаға 149 472 тонна күріш жиналып, жақсы көрсеткішке қол жеткізілген. 
Аудан әкімі өңір басшысына Жұмыспен қамтудың жол картасының іске асырылу барысы туралы да айтты. Аталған бағдарлама аясында инфрақұрылымдық жобаларды жүзеге асыру үшін 1,8 млрд теңге тартылып, 700-ге жуық жұмыс орны ашылған.
Кездесу соңында аймақ басшысы Жалағаш ауданының әкіміне бөлшек сауда көлемі көрсеткішін жақсарту, шағын және орта бизнеске қолдау көрсету, экономикалық жобаларды әртараптандыру бағытында бірқатар тапсырма берді. Сонымен қатар, облыс әкімі аудандағы эпидемиологиялық ахуалды қатаң бақылауда ұстауды қатаң тапсырды.

Жалағашта 11 айда 21 миллиард теңгеден астам ауыл шаруашылығы өнімдері өндірілді

<a href="https://kyzylorda-news.kz/?doing_wp_cron=1608783104.5910580158233642578125">Kyzylorda-news.kz.</a> Облыс бойынша балық шаруашылығына маңызы бар Кіші Арал теңізі мен 207 көл тізімге алынған. Ал 24 көл резервте тұр. Бүгінде өңірде 18 балық түрі аулануда.
Облыста жылдық қуаттылығы 12,5 мың тонна болатын 9 балық өңдеу зауыты жұмыс жасауда. 4 зауытта Еуропалық сапа стандартына сәйкестігін растайтын «Еврокод» саны бар. Ағымдағы жылдың 11 айында облыста 7 909 тонна балық ауланды. Бұл көрсеткіш өткен жылдың осы кезеңімен салыстырғанда 18 пайызға көбейген. Жыл басынан 4008,5 тонна балық өнімдері 9 елге экспортталып, өткен жылмен салыстырғанда 6 пайызға өсті.
<blockquote>
 “Балық өнімдері Ресей, Германия, Польша, Грузия, Литва, Қытай, Нидерланды, Чехия, Беларусь елдеріне нарыққа шығарылуда. Негізгі экспортқа шығарылып жатқан балық түрілері тыран, торта, алабұға, шортан, аралас балық, көксерке. Олардан көксеркенің жон еті, тыранның қанаттары, балық фаршы, балық сүбесі, қатырылған балық және балық ұны өнімдері экспортталуда”, – деді облыстық табиғи ресурстар мен табиғат пайдалануды реттеу басқармасының басшысы Бауыржан Шәменов.
</blockquote>

Қызылордада 8 мың тоннаға жуық балық ауланды

<a href="https://kyzylorda-news.kz/?doing_wp_cron=1608783104.5910580158233642578125">Kyzylorda-news.kz.</a> Бүгін Қызылорда облысының әкімі Гүлшара Әбдіқалықова орынбасары Бақыт Жахановты қабылдап, өңірдегі әлеуметтік-экономикалық даму көрсеткіштерді саралады.
Кездесу барысында Бақыт Жаханов әлеуметтік бағыттағы негізгі индикаторлардың орындалу бойынша есеп берді. Сондай-ақ, алдағы 2021 жылға арналған әлеуметтік басым бағыттағы жоспарларды тарқатып өтті.
Жыл ішінде негізгі әлеуметтік саланың бірі білім беру бағытында мемлекеттік бағдарламалардағы көрсеткіштер толық орындалған. Айталық, 1-6 жастағы балаларды балабақшамен қамту жоспары 81 пайызды құрауы керек болса, 11 айдағы нәтиже 84,9%-ға жеткен. Ал, 3-6 жастағы балаларды қамту 100 пайыз орындалған. Биылғы жылы 70 орынға арналған 3 мектепке дейінгі білім беру ұйымы ашылды. Ал, 2021 жылға қарай 1500 орынды құрайтын 18 жеке балабақша, 610 орындық 34 қосымша топ ашу межесі тұр.
Биыл өңірдегі 3 апатты мектепті жою бағытында жаңа 140 орындық бір мектеп пайдалануға беріліп, 600 орындық мектеп құрылысы іске асуда. Жеке-мектептердің үлесі артып, аймақта 500 орындық жаңа «Зерде» мектебі ашылды. Сонымен бірге 2021 жылы Арал ауданы, Сексеуіл кентінде 300 орындық, Жаңақорған ауданы, Майбекет мөлтек ауданында 300 орындық мектеп ел игілігіне беріледі. Мұнан бөлек, келесі жылы Арал қаласындағы №71 мектептің құрылысы басталады. Ал, Қызылорда қаласынан «Бәйтерек» мөлтек ауданынан 600 орындық, жеке инвестор есебінен Саяхат мөлтек ауданынан 300 орындық мектеп құрылысы іске асуда.
Арнайы Жол картасы арқылы өңірде бір жыл ішінде 48 балабақша мен 43 мектепте инклюзивті кабинеттер ашылған. Сондай-ақ, биылғы жылы 4067 мектеп бітірушілердің 3470-і жұмысқа қабылданып, көрсеткіш 85,3 пайызға жеткен.
Денсаулық сақтау саласында да негізгі көрсеткіштерді орындау межесі 4 индикатор бойынша қорытындыланды. Аймақтық даму жоспарында өмір сүрудің орташа күтілетін ұзақтығы, ана, сәби және жалпы өлім-жітім көрсеткіштері талқыланды. Денсаулық сақтау саласын дамытудың 2020-2025 жылдарға арналған мемлекеттік бағдарламаның 15 көрсеткіші денсаулық сақтау саласына қатысты. Өңірде дәрігерлердің орташа айлық жалақысының көрсеткіші индикаторға сәйкес жүргізілген. 12 нысаналы индикаторға қол жеткізіліп, 2 индикаторға қол жеткізілмеді. Одан бөлек, 2020 жылдың 11 айымен медициналық ұйымдардың медициналық техникамен жарақтандыру көрсеткіші жыл қорытындысымен орындалады. Мұнан бөлек, 5 жасқа дейінгі балалар өлімінің коэффиценті 11,1 және неонатальды өлім көрсеткіші 6,9 межесін көрсетіп отыр. Бүгінгі күні аймақта ана мен бала бөлімі деңгейі бойынша нақты индикаторларда көзделген жұмыстар іске асырылуда.
Аймақта халықты жұмыспен қамтудың белсенді шаралары нәтижесінде бүгінгі күні 20 мыңға жуық жаңа жұмыс орындары ашылып, оның 14 мыңы тұрақты жұмыс көзін құрап отыр. Сонымен бірге «Еңбек» бағдарламасына 35 мыңнан астам азамат тартылған. Ал, дағдарысқа қарсы шара ретіндегі қабылданған 2020-2021 жылдарға арналған «Жұмыспен қамту Жол картасы» аясында 291 жоба іске асырылып, 9944 адам еңбекпен қамтылған. Бағдарлама аяқталғаннан кейін жаңа нысандардың құрылысы арқылы 452 тұрақты жұмыс орындары ашу көзделіп отыр. Өтпелі қиындықтарға қарамастан өңірдегі жұмыссыздық деңгейі 4,9 пайыз деңгейінде сақталып тұр.
Өңірде жұмыс берушілердің сұранысына сәйкес қысқа мерзімді оқыту бойынша 1036 жұмыссыз азамат жолданса, «Бастау-бизнес» жобасы шеңберінде «Кәсіпкерлік негіздеріне оқыту» курсын 2181 азамат аяқтап, 823 адам шағын несие алды. Ал, 4692 адам жаңа бизнес идеяларды іске асыруға қажетті мемлекеттік грант алып, өз кәсібін ашты.
Қызылорда аймағында мүгедек адамдардың құқығын қорғау мен өмір сүру сапасын жақсартуға арналған 2025 жылға дейінгі 10 бағыт, 66 іс-шараны қамтитын «Жол картасы» қабылданды. Бұл ретте бөлінген қаражат нәтижесінде облыс бойынша жеке оңалту бағдарламасының орындалуы 83,6 пайызға жетіп, Қызылорда облысы республика бойынша 6-орынға шықты.
Еңбек заңдылығын сақтау бойынша тиісті тексеріс жұмыстары да қорытындылануда. Бүгінгі күні еңбек заңнамасындағы заң бұзушылықтар бойынша жұмыс жүргізіліп, межеленген міндеттер іске асуда. 2020 жылғы 11 айда ықпал ету шаралары нәтижесінде 18 кәсіпорынның 4634 жұмыскерлеріне 616,7 млн теңге жалақы қарызы төленді.
2019 жылғы кезеңді салыстырғанда ағымдағы жылғы 11 айда жазатайым оқиғалар саны 34%-ға, зардап шеккен адамдар саны 16%-ға, қаза болған адамдар саны 61% -ға азайған.
Кездесу соңында облыс әкімі Гүлшара Әбдіқалықова негізгі тірек салаларды дамыту бағытындағы жұмыстарды жалғастыруды және 2021 жылы іске асатын жобаларды қарқынды түрде жүргізіп, халықты жұмыспен қамтуда белсенді шараларды жүргізуді тапсырды.

Гүлшара Әбдіқалықова әлеуметтік салаларда атқарылған жұмыстарды саралады

<a href="https://kyzylorda-news.kz/?doing_wp_cron=1608783104.5910580158233642578125">Kyzylorda-news.kz.</a> Бүгін Кеңес одағының батыры, жазушы, Екінші дүниежүзілік соғыстың даңқты жауынгері, әскери қолбасшы Бауыржан Момышұлының туғанына 110 жыл толды.
Ол 1910 жылдың 24 желтоқсанында Жамбыл облысы Жуалы ауданының Мыңбұлақ ауылында дүниеге келген. Бала Бауыржан үш жасында анасынан айырылып, әжесінің тәрбиесін көріп өседі. Ал 19 жасында тоғыз жылдық мектепті бітірген. Еңбек жолын мұғалімдіктен бастаған ол аудандық атқару комитетінде де бірнеше қызмет атқарған. 1932 жылы әскерге шақырылып, Орта Азия әскери округі 3-ші Түркістан атқыштар дивизиясының 14-ші тау атқыштар полкына курсант ретінде қабылданады. Сондай-ақ Бауыржан Момышұлы полк мектебін, артиллериялық әскери училищені бітіріп, офицер атанады. Осылайша, ол Отан алдындағы борышын өтеп, запасқа шығарылады.
1936 жылдың наурызында Қызыл әскер қатарына екінші рет шақырылып, Қиыр Шығыс армиясында әскери борышын өтеді. 1940 жылдың ақпанында Бауыржан Момышұлы Киев Арнайы әскери округіне ауыстырылды. Ал 1941 жылғы қаңтарда Алматыдағы Орта Азия әскери округіне ауыстырылып, Қазақ КСР республикалық әскери комиссариатының әскерден тыс дайындық аға нұсқаушысы болып тағайындалды. Ұлы Отан соғысы басталғаннан кейін округте генерал-майор И.В.Панфиловтың қолбасшылығымен 316-шы атқыштар дивизиясы жасақталғанда, маусым айының соңында аға лейтенант Б.Момышұлы 1073-ші Талғар атқыштар полкының батальон командирі болды. Тамыз айының соңында дивизиямен майданға аттанған. Мәскеу үшін шайқаста аға лейтенант Бауыржан Момышұлы 27 шайқасқа қатысқан. Жеке құрамның табандылығы мен жаппай ерлігі үшін КСРО Қорғаныс халық комиссарының 1941 жылғы 8 қарашадағы бұйрығымен дивизияға гвардиялық атақ беріліп, 8-ші гвардиялық атқыштар дивизиясы атауына ие болады, ал Бауыржан Момышұлы құрамында шайқасқан 1073-ші атқыштар полкы 19-шы гвардиялық атқыштар полкы атанады.
1941 жылдың 16-18 қарашасы аралығында Мәскеуге жасаған вермахтың екінші ірі шабуылында Бауыржан Момышұлының батальоны дивизиядан оқшау Волоколамск тасжолында ерлікпен шайқасады. Батальон командирінің шебер басшылығы немістерді аталған қорғаныс шебінде үш күн ұстауға және батальонды қоршаудан соғысқа жарамды етіп шығаруға мүмкіндік береді. Ол 1941 жылы Мәскеу түбінде маневрлі қорғаныс жағдайында барлығы 27 шайқас өткізген. Осы ұрыстарда Бауыржан Момышұлы екі рет жараланған, соған қарамастан соңына дейін майдан алаңын тастағысы келмейді. Ол «Қызыл Ту» орденімен және «Мәскеуді қорғағаны үшін» медалімен марапатталды. Капитан Бауыржан Момышұлы Мәскеу түбіндегі шайқаста көрсеткен батылдығы мен ерлігі үшін 1942 жылы Кеңес Одағының Батыры атағына ұсынылады, алайда бұл атақ оған берілмейді.
1941 жылдың соңында Момышұлы капитан, кейін майор атағын алды. Одан соң 1942 жылдың қазан айында подполковник, ал сегіз айдан кейін полковник атағына ие болды.
Шайқастардың бірінде алған жарақаттары сыр беріп, 1943 жылдың қарашасында Бауыржан Момышұлы госпитальге жатқызылады. Ем алып болған соң оған демалыс беріліп, ал 1944 жылдың мамырында оқуға жіберіледі. 1944 жылдың желтоқсанында ол К.Е.Ворошилов атындағы Жоғары Әскери академия жанындағы офицерлік құрамды жетілдіру курсын тәмамдайды. 1945 жылдың қаңтарында Б.Момышұлы дивизия командирі лауазымын атқарумен 1-ші Балтық жағалауы майданы 6-шы гвардиялық армиясының 9-шы гвардиялық атқыштар дивизиясы командирінің орынбасары болып тағайындалады. 1945 жылдың ақпан-наурызында оның дивизияны ұтымды басқаруы нәтижесінде Приекуле станциясының солтүстік-батыс жағындағы жау қорғанысының үш белдеуін бұзып өтеді. Дивизия шабуылының нәтижесінде 15 елдімекен азат етіліп, жауға орасан зор зиян келтіреді.
1948 жылдың соңында полковник Момышұлы Құрлық әскерлері Бас қолбасшысының қарамағына қабылданып, Шығыс Сібір әскери округі 49-шы дербес атқыштар бригадасы командирінің орынбасары болады.
Ол 1950 жылы Калининдегі В.М.Молотов атындағы Тыл және жабдықтау Әскери академиясының жалпы тактика және шұғыл ұрыс өнері кафедрасының аға оқытушысы қызметін атқарады. 1955 жылы сырқатына байланысты Кеңес Әскері қатарынан отставкаға шығады. Ол Алматыға оралғаннан кейін өмірін жазушылыққа арнайды. Баспасөздерде мақалалар жариялап, очерктер жаза бастайды. Ол «Офицер күнделігі», «Бір түннің тарихы», «Москва үшін шайқас» әңгімелер жинағы, «Генерал Панфилов» өмірбаяндық хикаяты, «Біздің семья» әңгімелер жинағын жазған. Сондай-ақ КСРО Жазушылар Одағының мүшесі болды.
Бауыржан Момышұлы 1982 жылы 10 маусымда Алматыда дүниеден өтті.
1990 жылы Бауыржан Момышұлына Кеңес Одағының Батыры атағын беру туралы Жарлыққа қол қойылды. Одан соң «Халық қаһарманы» атағы берілді,&nbsp;2000 жылы Бауыржан Момышұлы «Ғасыр адамы» деп танылды.
<a href="https://24.kz/kz/zha-aly-tar/m-denie/item/444475-bauyrzhan-momysh-lyny-tu-anyna-110-zhyl">24 kz</a>

Бауыржан Момышұлының туғанына 110 жыл

<a href="https://kyzylorda-news.kz/?doing_wp_cron=1608783104.5910580158233642578125">Kyzylorda-news.kz.</a> Облыста карантин басталғалы талапты бұзған 912 дерек тіркелді. Оның 543-і той жасау фактісі. Бұл туралы өңірлік коммуникациялар қызметінің ақпарат алаңында өткен брифингте ОПД Жергілікті полиция қызметінің бастығы Бауыржан Ибраев мәлімдеді.
Өңірде арнайы құрылған 24 мобильді топ жұмыс жасауда. Коронавирус инфекциясының таралуына жол бермеу жөніндегі ведомствоаралық комиссия отырысының шешіміне сәйкес, 2020 жылғы 25 желтоқсаннан бастап 2021 жылғы 5 қаңтарға дейін ойын-сауық, спорттық және басқа да бұқаралық іс-шараларды, оның ішінде жаңа жылдық ертеңгіліктер мен корпоративтерді өткізуге тыйым салынды.
Айта кетейік, облыста соңғы 10 күнде 40-тан астам адам коронавирус инфекциясын жұқтырған.

Қызылордада карантин талабын бұзған 912 дерек анықталды

<a href="https://kyzylorda-news.kz/?doing_wp_cron=1608783104.5910580158233642578125">Kyzylorda-news.kz.</a>&nbsp; «Атамекен» ҰКП қызмет етуіне әлі де тыйым салынған кәсіпкерлік субъектілеріне кезең-кезеңмен жұмыс істеуге рұқсат беруге шақырады. Үкіметте егер барлық санитарлық нормалар мен цифрлық мониторинг талаптарын қатаң сақталса, ҰКП ұсынысын қарауға дайын.
«Атамекен» бастамасы бойынша 9 ай бойынша жұмыс істеуіне тыйым салынған салалардың бизнесмендері өз проблемаларын ҚР Премьер-министрінің орынбасары және Коронавирустық инфекцияның пайда болуы мен таралуына жол бермеу жөніндегі ведомствоаралық комиссияның төрағасы Ералы Тоғжановқа тікелей қойды. Онлайн кездесуге ҰКП Басқарма мүшелері, кәсіпкерлер, Нұр-Сұлтан, Алматы, Шымкент, Түркістан қалаларының әкім орынбасарлары, сондай-ақ денсаулық сақтау, ішкі істер, цифрлық даму министрліктері басшылығының өкілдері қатысты.
Караоке мен компьютерлік клубтар, бильярд, боулинг, балаларға арналған ойын-сауық орталықтары, фудкорттар және банкет залдарының иелері олардың қызметіне қатаң тыйым салу көлеңкелі нарыққа жол ашатынын бірнеше рет айтқан болатын. Нәтижесінде мониторингтік топтар санитарлық нормаларсыз өткен бұқаралық іс-шараларды тіркейді.
«Атамекен» ҚР ҰКП Басқарма төрағасы Абылай Мырзахметов кәсіпкерлер санитарлық дәрігердің позициясын және коронавирус таралуы қаупін түсінетінін атап өтті.
<blockquote>
 «Бірақ біз тыйым салып, осы салалар жұмыс істемейді деуімізге қарамастан адамдар осы нысандарға баруын тоқтатпады. Нәтиже ретінде біз нақты ситуацияны көрмей отырмыз, кәсіпкерлер көлеңкеде жұмыс істеп жатыр, сыбайлас&nbsp; жемқорлыққа жағдай жасалуда. Сондықтан бізге бизнес нысандарын аса мұқияттылықпен, кезең-кезеңмен ашуды бастауымыз керек. Алматы кәсіпкерлері өз базалары негізінде пилоттық жоба өткізуді ұсынды», – деді Ұлттық палатаның басқарма төрағасы.
</blockquote>
Абылай Мырзахметов пандемия басталғаннан бері «Атамекен» және мемлекет арасында құрылымды диалог орнап, соның нәтижесінде бизнестің 90%-ы шектеумен болса да жұмыс істеп жатқанын атап өтті.
Алайда кәсіпкерліктің 13 мың субъектісіне әлі де тыйым салынған. 1-14 желтоқсан аралығында ҰКП ел ауқымында 42 мың кәсіпкер арасында сауалнама жүргізді, олардың 90%-ы – шағын кәсіпкерліктің өкілдері. Респонденттердің тең жартысы компанияларында қаржы тұрақтылығы нашарлағанын, кіріс жоғалғанын (43%), сұраныс төмендегенін (26%), жалдау құнын төлей алмау (27%), коммуналдық қызметтерді төлей алмау (15%), салық төлей алмау (15%), қызметкерлерге еңбекақы төлеу және қызмет жүргізуге қаражат жетіспеуін (13%) атаған. Әр үшінші респондент үшін жұмыс уақытын жұмыс күндері және демалыс күндері шектеу бизнесті жүргізуде негізгі кедергі саналады. Сауалнамаға қатысқандардың 10%-ы жақын арада кәсіпті жабуға жәжбүр болатынын белгілеген.
<blockquote>
 «Ведомствоаралық комиссия шеңберінде ауқымды жұмыс жүргізілді: іс жүзінде санитарлық талаптарды ескере отырып, кәсіпкерлік қызметпен айналысуға&nbsp; 40-тан астам алгоритм жасалды, мониторингтік топтар тексеруінде жаңа тәсілдер жасалды, санитарлық-эпидемиологиялық жағдайдың (қызыл, сары, жасыл) аумағына байланысты кәсіпкерлік қызметті шектеу бойынша «ойын ережелері» әзірленді. Қызмет етуіне әлі рұқсат етілмеген бизнес салаларына да оңтайлы шешім табуға болады деген сенімдеміз», – деді «Атамекен» ҚР ҰКП Басқарма төрағасының орынбасары Юлия Якупбаева.
</blockquote>
Спикер кәсіпкерлер өз қаржы ағынын, кіріс-шығысын&nbsp; мереке алдындағы қосымша тапсырыс пен түсімдерді ескере отырып есептейтінін атап өтті. Осы себепті бизнес жұмысқа тезірек кірісу үшін санитарлық нормаларды сақтау бойынша қосымша міндеттемелер алуға дайын.
Happylon балалар ойын-сауық паркі желісінің басқарушысы Ләззат Тұрсынбаева болса,&nbsp; СОО-ның балалар аймағында&nbsp; қауіпсіздік қамтамасыз етіп, тіпті шағын 40-минуттық ертеңгілік өткізе алатындарын жеткізді.
<blockquote>
 «Сауда орталықтарында заманауи желдету жүйесі орнатылған, балалар ойын алаңдары 4 шаршы метрден жоғары болып келеді. Оған қоса, төбесі де биік, 10 метрден асады. Мәселен, біздің ойын алаңымыздың биіктігі –&nbsp; 17 метр. Мұндай жағдайда ауа жақсы алмасады,&nbsp; біз бір уақытта сағатына 100 балаға қызмет көрсете аламыз, ал&nbsp; әр 30 минут сайын тазалау жұмыстарын жүргіземіз», –&nbsp; деді кәсіпкер.
</blockquote>
«Вlack star burger» өңірлік директоры Александр Рассказов сауда және ойын-сауық орталығында фудкорттарға жұмыс істеуге болатынын айтты, өйткені мейрамханаларға қарағанда қоғамдық тамақтану орындарында мерекелер жүргізілмейді, ал қонақтың нысанға келу уақыты 20-25 минутты ғана құрайды. Өз кезегінде кәсіпкерлер арнайы белгілерді, әр үстелге дезинфекциялық құралдарды қойып, қонаққа қызмет көрсететін даяшыларды белгілеп, адам ағынын қатаң бақылауға дайын.
Мейрамхана кәсібімен айналысушылардың табысы пандемия&nbsp; кезінде 40%-ға кеміген, енді кәсіпкерлер жеткізушілер, коммуналдық қызмет алдындағы міндетін өтей алмай отыр, сондықтан нысандардың жұмыс уақытын түнгі бірге дейін ұзартуды сұрайды. Банкет залының иелері жоспарланған іс-шараларды СЭҚ қызметкерлеріне алдын ала хабарлауға дайын. Бұл инспектордың өзі мерекеге келіп, талаптар мен қаулының орындалуын тексереуге мүмкіндік береді.
Шығынға батып, көлеңкеге кеткен тағы бір сала – компьютер клубтары. CYBERDOM тең құрылтайшының бірі Максим Исаевтың айтуынша, Нұр-Сұлтанда 120 клубтан 40 клуб жабылып қалған, қалған 80%-ы көлеңкеде жұмыс істеп жатыр.
<blockquote>
 «Бизнесімізде орын саны нақты, біз адам ағынын бақылай аламыз, кәсіпкерлер келушілерге маскалар, дезинфекциялық құралдар мен қолғаптарды тегін таратуға дайын.&nbsp; Әр келушіден кейін жуып-тазалу жүргізіледі», – деді Максим Исаев.
</blockquote>
Жұмысқа кезең-кезеңмен рұқсат беруді бильярд иелері сұрап отыр. Салалық қауымдастық басшысының пікірінше, олар ойын-сауық нысандарына қателікпен жатқызған, өйткені бильярд спорт нысандарына жатады. Нысандар санитарлық нормаларға сәйкес келеді, олар жұмыс бастап, бизнесті сақтап қалу үшін дәрігерлердің барлық талаптарын орындауға дайын.
ҚР Премьер-Министрінің орынбасары Ералы Тоғжанов бас санитарлық дәрігер Ерлан Қиясовқа караоке, фуд-корттар, боулингтер, асханалар, банкет залдары, балалардың ойын-сауық орталықтарына ашылуына санитарлық талаптар бойынша бизнестің бастамаларын қарастыруды тапсырды. Алайда, Ералы Тоғжанов вирустың қайта өршуіне жол бермеу үшін жұмысты мұқият жасау керек екеніне назар аудартты. Ведомствоаралық комиссияның келесі отырысында мейрамханалар, кафелер мен асханалардың жұмыс істеу уақытын қайта қарау туралы ұсыныстар қаралатын болады.
Сондай-ақ, Ералы Тоғжанов өзі-өзі басқару мүмкіндігімен цифрлық мониторингті қолдану мен бейнекамера орнату&nbsp; арқылы санитарлық талаптардың сақталуын қадағалайтын&nbsp; пилоттық жоба идеясын қолдады. Бұл жоба&nbsp; жаңа жылдық мерекелерден кейін іске асырылуы мүмкін.
<img src="https://kyzylorda-news.kz/wp-content/uploads/2020/12/foto-1.jpg" alt="" />

Қазақстан және Қызылорда облысының жаңалықтары