<a href="https://kyzylorda-news.kz/">Kyzylorda-news.kz</a>. Қазақстанда 80 мыңға жуық адам жұмысынан айырылуына байланысты әлеуметтік төлем алады, деп хабарлайды&nbsp;<a href="https://stan.kz/">Stan.kz</a>.
Еңбек және халықты әлеуметтік қорғау министрлігінің&nbsp;мәліметінше, 1 тамыздағы жағдай бойынша мемлекеттік әлеуметтік сақтандыру қорынан жұмысынан айырылуына байланысты әлеуметтік төлем алушылардың саны 77,9 мың адамды құрады. Биыл 52 мың адамға төлем алғаш рет тағайындалды.
Қолданыстағы заңнамаға сәйкес, жұмыссыз қалған азаматтар міндетті әлеуметтік сақтандыру жүйесіне қатысу өтіліне және соңғы 24 айдағы табысына байланысты 1 айдан 6 айға дейін жұмысынан айырылуы бойынша әлеуметтік төлем алады. Төлем жоғалған кірістің 40%-іне дейінгі мөлшерде мемлекеттік әлеуметтік сақтандыру қоры қаражатынан төленеді.
Төлем тағайындалу үшін жұмыссыз қалған азамат:
<ul>
<li>eGov.kz порталында авторизациялану;</li>
<li>“Жұмысқа орналастыру және жұмыспен қамту” бөлімінде “Жұмыс іздеуші адамдарды тіркеу” қызметін таңдау;</li>
<li>&nbsp;онлайн-қызметке тапсырыс беріп, барлық жолдарды толтыру және оған электрондық цифрлық қолтаңбамен қол қойып, өтінімді жіберу қажет;</li>
<li>бір күн ішінде тұрғылықты жеріңіздегі халықты жұмыспен қамту орталығы бос жұмыс орындарын ұсынады;</li>
<li>егер жұмыс табылмаса, 3 жұмыс күні ішінде жұмыссыз мәртебесі беріледі. Ол қашықтан жүзеге асырылады (қажет болған жағдайда сізге халыққа қызмет көрсету орталығы қызметкері қосымша ақпарат жинау үшін хабарласады).</li>
</ul>
Бұл қызметті онлайн режимінде электрондық еңбек биржасы (enbek.kz) арқылы да алуға болады.
Жұмыссыз ретінде тіркелу туралы мәліметтер болған кезде министрліктің ақпараттық жүйесі төлемді тағайындау бойынша қызмет көрсетуге келісу үшін мобильді телефонға SMS-хабарлама жібереді. Келіскен жағдайда SMS-хабарламаға жауап беру қажет. Төлем автоматты түрде тағайындалады.
Мемлекеттік әлеуметтік сақтандыру қоры қаражаты есебінен жұмыссыз қалған жағдайда төленетін әлеуметтік төлем жұмыстан шығу себебіне қарамастан беріледі және жұмыс іздеу кезеңде қолдауға арналған.
Айта кетсек, министрлік еліміздің 40 қаласының тұрғындары үшін халықты жұмыспен қамту орталықтарының жұмысын қашықтан жүзеге асыру мақсатында электрондық еңбек биржасы қызметін іске қосты.
Пилоттық жоба жұмыссыздарды тіркеу рәсімін жеңілдету және жұмыспен қамтуды қолдау бойынша мемлекеттік қызметтерді, оның ішінде жұмысынан айрылу бойынша әлеуметтік төлемдерді алуды жеңілдету үшін іске қосылды.
Енді барлығын тек интернет, компьютер және электрондық цифрлық қолтаңба арқылы ғана жасауға болады.

Елімізде жұмыссыз қалған кезде берілетін әлеуметтік төлемді кім және қалай алады?

<a href="https://kyzylorda-news.kz/">Kyzylorda-news.kz</a>.&nbsp;Биыл алғаш рет еліміздің әрбір мұғалімі жылдың бас педагогикалық кеңесіне қосылуға мүмкіндік алып отыр. Бүгінде NIS-тің орталық кеңсесінде тікелей эфир арқылы ауқымды конференцияның пәндік сессиялары ел аумағына таралатын екі телестудия үздіксіз жұмыс істеуде. Мұғалім тәжірибесін әдістемелік қолдау – жаңа жағдайдағы білім беру туралы кәсіби ойталқының өзегі.
9-17 тамыз аралығында өтетін дәстүрлі тамыз конференциясы аясында қазақ және орыс тілдерінде 15 пән бойынша тақырыптық сессиялар, сондай-ақ кітапханашылар сессиясы жоспарланған. «Назарбаев Зияткерлік мектептері» ДББҰ, жетекші және пилоттық мектептердің педагогтері онлайн форматта вебинарлар, шеберлік сабақтар мен презентациялар өткізеді, халықаралық сарапшылардың эксперттік пікірлері ұсынылады, сондай-ақ Ы.Алтынсарин атындағы Ұлттық Білім академиясы жаңа оқу жылында оқу-тәрбие үдерісін ұйымдастыруға қатысты ұсыныстарын білдіреді. Қазіргі таңда педагогтер үшін ең өзекті басымдықтардың бірі – пән аясында функционалдық сауаттылықты қалыптастыру, сондай-ақ ағымдағы және қорытынды бағалаудың форматы мен мазмұны.
Онлайн-кеңестің алғашқы күні еліміздің әр өңірінен ондаған мың педагог жиналды. Пәндік сессиялар бастауыш сынып мұғалімдері мен «Жаратылыстану» пәніне арналды. Тікелей эфир ЭЫДҰ-ның «Білім беру 2030» компасын тамашалаудан басталып, мектеп табалдырығын енді ғана аттамақ Айзере Қайратбек пен Самина Сейтбекованың сұрақ-жауап сұхбатымен жалғасын тапты. Олар NIS телестудиясына өздерінің армандаған мектептері туралы ой бөлісу үшін келді. Бастауыш сынып мұғалімдеріне арналған пәндік сессиянының шымылдығын болашақ мектеп оқушылары түрді. Айзере мен Самина жаңа өмірге жетелеуші болашақ ұстаздарының қандай болатынын елестетіп, бала армандарымен бөлісті.
Сарапшылар жаңа оқу жылына арналған міндеттерді, ағымдық және қорытынды бағалаудың форматы мен мазмұнын, оқушылардың функционалдық сауаттылығын қалыптастыруды талдады, ал зияткерлік және жалпы білім беретін мектептердің мұғалімдері шеберлік сыныптарын дайындады. Спикерлер арасында Педагогикалық шеберлік орталығының өкілдері: бастауыш мектеп пәндері бойынша оқу бағдарламаларын жасаушы, мектепке дейінгі және бастауыш білім беру бөлімінің бастығы Қаламқас Байтенова, аға менеджерлер Наталья Орехова мен Гүлмира Жақыпова, сондай-ақ Ыбырай Алтынсарин атындағы Ұлттық білім академиясының ЖМБ және STEM-технологиялар пәндері зертханасының бас ғылыми қызметкері Орденбек Мазбаев, Павлодар қаласындағы NIS-тің өнер мұғалімі Динара Қабиева және басқалары болды.
Онлайн-конференцияға Алматы облысы Текелі қаласынан қосылған №8 орта мектептің бастауыш сынып мұғалімі Гүлнар Мұсабекова пәндік сессия барысында одан әрі жұмыс істеу үшін көптеген жаңа білім мен идеялардың тұсбағдарын тапқанын айтады.&nbsp;
<blockquote>
 «Карантиндік шектеулерден туындаған қиындықтарға қарамастан үлгерім деңгейін тиісті дәрежеде ұстап тұру&nbsp; мүмкіндігіне ие болдық . Бастауыш сынып мұғалімдеріне арналған конференция алдағы оқу жылында әдеттегі оқыту форматына оралуға дайындалуға өз септігін тигізері анық», – деп пікір білдірді Гүлнар Мұсабекова.
</blockquote>
Қаратал ауданы Қошқарбаев атындағы орта мектептің жаратылыстану пәні мұғалімі Алишер Советбаев NIS-ке конференцияның мазмұнды әдістемелік бөлімі үшін алғысын білдіріп, оқытудағы олқылықтардың орнын толтыру бойынша сарапшылар кеңесі барлық мүмкін қиындықтарды еңсеруге және оқу процесін қалыпты режимде сенімді түрде жалғастыруға көмектесетінін айтты.
Пәндік сессиялардың екінші күнінің басты назарында – музыка, көркем еңбек және дене шынықтыру мұғалімдері болды.
Сарапшылар музыкалық, цифрлық және ақпараттық сауаттылықтың бірегей қосындысы туралы ой қозғап, сауаттылықты дұрыс дамыта отырып, музыканы тыңдау және орындау ұлттық және әлемдік мәдениеттің құндылығын түсінуге көмектеседі деген қорытындыға келді. Көркем еңбек сабақтарында әдемілік пен нәзіктік сезімі қалыптасады. Өнер саласындағы сарапшылардың пікірінше, балалардың шығармашылық қабілеттерін дамыту мұғалімнің шығармашылығына тікелей байланысты.
Шеберлік сабақтары барысында NIS-тің&nbsp; пән мұғалімдері – Әлия Кайдарова, Альмира Даниярова, Гаухар Қайырбаева және Сәуле Ахметқалиева, сондай-ақ жалпы білім беретін мектептердің педагогтері Юлия Березко, Зейнолла Хасенов және Мұхаметқан Ахметжанов өз білімдерімен бөлісті.
Шымкенттегі физика-математика бағытындағы NIS-тің дене шынықтыру пәнінің мұғалімі, &nbsp;«Үздік педагог – 2019» республикалық байқауының жеңімпазы Ербол Тілеулов шеберлік сабағы &nbsp;барысында дене шынықтыру сабақтарында функционалдық сауаттылықты дамытуға болатынын және қажет екенін көрсетті.
<blockquote>
 «Өз денеңмен үйлесімді өмір сүру – дені сау адамның салауатты өмірінің міндетті компоненті. Бұл қағиданы қозғалыс белсенділігі, салауатты өмір салты және қозғалыс дағдылары арқылы сыни ойлауды дамытуға негізделген оқу бағдарламасының басты бағыты айқындай түседі», – дейді Ербол Эрнстович.
</blockquote>
Сегіз мыңнан астам дене шынықтыру мұғалімдері жаңа оқу жылында өз сабақтарында осы құралдарды қалай қолдану керектігі туралы көрнекі түсінік алды.
Ел педагогтеріне арналған тамыз конференциясының үшінші күнінің фокусын – филологтарға арналған пәндік сессиялар құрады.
Жиырма мыңнан астам пән мұғалімдері педагогикалық қоғамдастық үшін өзекті тақырыптарды талқылап, сарапшы әріптестерінің шеберлік сабақтарына қатысу үшін қазақ, орыс және ағылшын тілдерінен онлайн конференцияға қосылды.
Филологтар оқушылардың оқу сауаттылығын дамыту жоспарларын талдады, өйткені әртүрлі мәтіндерді түсініп оқып, қойылған міндеттерді шешу үшін ақпаратты пайдалану қабілеті 21 ғасырдағы адамның маңызды құзыреттерінің бірі болып табылады. Қазіргі адамдардың тағы бір маңызды шеберлігі – үлкен көлемде ақпаратпен жұмыс істеу.
<blockquote>
 «Мен оқушылардың сауаттылығын дамыту әдістері туралы сұрақтарға жауап алдым. Мәтінмен жұмыс істеу үшін берілген тапсырмалар мен авторлардың ұсыныстары пайдалы болды. Айта кету керек, ақпарат пен қаралған материалдар маған өз көзқарастарымды тағы бір рет қайта қарап, ішкі дүрбелеңнен арылуға, өзімді сенімді сезінуге, функционалдық сауаттылық туралы үзік білімді жүйеге келтіруге және өз тәжірибемді одан әрі жетілдірудің жолын көруге мүмкіндік берді», – деп өз әсерімен бөлісті Қарағанды облысы Қарқаралы ауданы №2 орта мектептің орыс тілі мен әдебиеті пәнінің мұғалімі Арай Тобықова.
</blockquote>
Келесі кезекте онлайн-конференцияның тікелей эфиріндегі сессиялар математика, информатика, физика, химия, биология,&nbsp;география, Қазақстан тарихы, Дүниежүзі тарихы пәндерінің мұғалімдеріне арналмақ. Ауқымды педкеңес кітапханашыларға арналған секциямен қорытындыланатын болады.
Айта кету керек, жылдың басты педагогикалық жиыны оқу үдерісінде оқушылардың бойында функционалдық сауаттылықты қалыптастыру жолдарын, мектеп қауымдастығындағы оқушылардың қауіпсіздігі мен әл-ауқаты мәселелерін, ағымдағы және қорытынды бағалаудың форматы мен мазмұнын, ковидтен кейінгі кезеңдегі оқу үдерісінің ерекшеліктерін, білім беру саласын цифрландырудың маңызын, білім берудегі жасанды интеллектінің мүмкіндіктері, жаңа оқу жылында оқу-тәрбие үдерісін ұйымдастырудың ерекшеліктерін кәсіби ойталқы өзегіне айналдырды.
<blockquote>
 «Биылғы тамыз кеңесі ерекше форматта өтуде. Ең бастысы жаңа оқу жылының ерекшеліктері мен әр ұстаздың көкейінде жүрген сұрақтарға жауап алынды. Оқушылардың қабілеттеріне қарай жүргізілетін жұмыстарға жекелей тоқтала отырып, практикалық түрде көрсетілді. Конференция барысында ой бөліскен әр маман өз іс-тәжірибесін үлкен дайындықпен жинақтай келіп, әр ұстаздың жүрегіне жол таба білді деп ойлаймын», – дейді Әлкей Марғұлан атындағы №40 мектеп-лицейі директорының оқу-тәрбие ісі жөніндегі орынбасары Жұмагүл Есіл.
</blockquote>
Еске сала кетейік, еліміздің ұстаздар қауымы асыға күткен дәстүрлі тамыз кеңесінің секциялық отырыстары NISTamyzConf2021 Youtube арнасында қазақ және орыс тілдерінде күнделікті таралуда. Сонымен қатар, «Назарбаев Зияткерлік мектептері» ДББҰ ресми интернет ресурстарында конференцияға еліміздің түкпір-түкпірінен қосылған педагогтердің бейне пікірлері мен кері байланыстары жариялануда.
<img src="https://kyzylorda-news.kz/wp-content/uploads/2021/08/333.jpg" alt="" />
<img src="https://kyzylorda-news.kz/wp-content/uploads/2021/08/555-1.jpg" alt="" />

Тамыз кеңесі: NIS-тің тікелей эфирінде – мұғалімдерді әдістемелік қолдау

<a href="https://kyzylorda-news.kz/">Kyzylorda-news.kz</a>. Жергілікті атқарушы органдардың мәліметінше, облыста 167 мониторинг тобы жұмыс істейді. Бір жарым айда InfoKazakhstan.kz сайтында 155 рейд тіркелген. Бұл туралы Қызылорда облысы кәсіпкерлер палатасының баспасөз қызметі хабарлады.
<blockquote>
 «Қазір санитарлық шаралар күшейтілген соң, көптеген кәсіпкерлік субъектінің қызметіне шектеу сақталып отыр. Дегенмен, Ashyq жобасы арқылы кейбір қызмет түрін ашу, жұмыс уақытын ұзарту мәселесі шешіліп жатыр. Кәсіпкерлердің ұсынысы негізінде Үкімет тарапынан қажетті шаралар қабылданды. Соның бірі – мониторинг тобы рейдтерінің алдын ала InfoKazakhstan.kz сайтында тіркелуі. Бұл сыбайлас жемқорлық тәуекелдерінің алдын алып, бизнес өкілдерінің ақпаратқа қолжетімділігін арттыратыны сөзсіз. Ендігі жерде кәсіпкерлерді де санитарлық талаптарды қатаң сақтауға шақырамыз. Бұл&nbsp; бірінші кезекте, азаматтардың денсаулығы үшін маңызды», – деді облыстық кәсіпкерлер палатасының директоры Ғалымбек Жақсылықов.
</blockquote>
Айта кетейік, ведомствоаралық комиссияның 2021 жылғы 1 шілдедегі хаттамасына сәйкес, мониторинг тобының тексеру алгоритміне өзгеріс енгізілді. Нәтижесінде мониторинг топтар рейдтерді InfoKazakhstan.kz сайтында тіркелгеннен кейін жүргізетін болды. Сондай-ақ кәсіпкерлер мониторинг тобы рейдінің тіркелген-тіркелмегенін алдын ала тексеріп, кестесін біле алады.
Қазір Қызылорда қаласы мен аудандарда рейдтерді тіркеуді ұйымдастыратын арнайы мамандар бекітілген.
Мониторинг тобы рейдтерінің заңдылығына қатысты мәселе туындаған жағдайда мына мамандарға хабарласуға болады:
– Тілеужан Ғалымжан Бауыржанұлы, Құқықтық статитика және арнайы есепке алу жөніндегі комитетінің Қызылорда облысы бойынша басқармасының аға прокуроры, тел.: 8 /7242/ 27-64-09;
– Жақсылықов Руслан Әділбекұлы, облыстық прокуратураның аға прокуроры, 8&nbsp;702&nbsp;018 96 00;
– Қаюпова Аида Жарасқызы, облыстық кәсіпкерлер палатасы Кәсіпкерлердің қүқықтарын қорғау және әкімшілік кедергілерді азайту бөлімінің бастығы, 8 /7242/ 40-09-81, 8&nbsp;777&nbsp;456 30 90.

Қызылордада мониторинг топтар шілде айынан бастап 155 рейд жүргізді

<a href="https://kyzylorda-news.kz/">Kyzylorda-news.kz</a>. Қызылорда облысында міндетті әлеуметтік медициналық сақтандыру жүйесінде сақтандырылмаған 145 мыңнан астам азамат бар. Олардың көпшілігі облыс орталығы, Байқоңыр қаласы, Қазалы және Жаңақорған аудандардың Бірыңғай жиынтық төлемді төлеушілер мен жалдамалы қызметкерлері. «Nur Otan» партиясы облыстық филиалы жанындағы «Ұлт денсаулығы мәселелері» жөніндегі аймақтық қоғамдық кеңесінің отырысы барысында МӘМС жүйесінде азаматтарды өзектендіру мәселелері көтерілді.
Әлеуметтік медициналық сақтандыру қорының Қызылорда облысы бойынша филиалының директоры Бақыт Исмаханбетовтың айтуынша, кәзіргі танда аймақ тұрғындарының 81,8% МӘМС жүйесінде сақтандырылған, ал 2020 жылы облыс халқының 87%-ын медициналық сақтандырумен қамту міндеті қойылған.
Сонымен қатар, медициналық ұйымдардың жұмысына шағымдар көбейді. Басым үлесі медициналық көмек көрсету сапасыздығы, медициналық көмек көрсетуден бас тарту. 2021 жылдың 6 айында қызылордалықтардан 78 шағым түскен. Мониторингтік тексерулер барысында медициналық ұйымдарға 973 898 теңге көлемінде айыппұл салынды.
Отырыс барысында тиісті ведомстволардың алдына халық арасында ақпараттық-түсіндіру жұмыстарын күшейту, қызметкерлердің, жеке кәсіпкерлердің МӘМС үшін тұрақты төлемдерін қамтамасыз ету, медициналық қызметтердің сапасын арттыру және т. б. міндеттер қойылды.
Медициналық көмек көрсетуден бас тартқан жағдайда, медициналық қызмет сапасыз болған жағдайда, пациент байланыс орталығына 1406 нөмірі бойынша немесе Qoldau-24/7 мобильді қосымшасы арқылы шағымдана алады.
<img src="https://kyzylorda-news.kz/wp-content/uploads/2021/08/nwr-otan-.jpeg" alt="" />
<img src="https://kyzylorda-news.kz/wp-content/uploads/2021/08/nwr-otan-1-1.jpeg" alt="" />

МӘМС: Қызылордада 145 мыңнан астам адам сақтандырылмаған

<a href="https://kyzylorda-news.kz/">Kyzylorda-news.kz</a>. Мемлекет басшысы салтанатты жиындағы сөзінде, «бұл – Қазақстанның корей жұртына деген шынайы ықыласы мен зор құрметінің белгісі» деп атап өтті, деп хабарлайды Ақорданың баспасөз қызметі.
<blockquote>
 «Мұндай іс-шаралардың тарихи мән-маңызы айрықша. Қазақтар да, корейлер де Тәуелсіздіктің қадір-қасиетін жақсы түсінеді. Хон Бом До – Кореяның азаттығы үшін күрескен бірегей тұлға. Нағыз батыр, шынайы отансүйгіш. Генерал тағдырдың жазуымен өмірінің соңғы жылдарын қазақ жерінде өткізді. Содан бері қанша жыл өтсе де атажұртында батырдың ерлігі ұмытылған жоқ. Оны біздің халқымыз да жақсы біледі. Қызылорда қаласында Хон Бом Доның құрметіне мемориал тұрғызылған. 2018 жылы батырдың туғанына 150 жыл толды. Қазақстан халқы Ассамблеясы осыған орай арнайы конференция өткізді. Генералдың есімі қазақ елінің жадында сақталады. Оның мемориалы мемлекет қамқорлығында болады», – деді Қазақстан Президенті.
</blockquote>
Қасым-Жомарт Тоқаев кезінде корей ұлтының көптеген өкілі Қазақстанға еріксіз қоныс аударғанын, олардың арасында Ге Бон У, Цай Ден Хак, Ким Ман Сам сияқты танымал тұлғалар барын атап өтті.
<blockquote>
 «Жер аударылған корейлерді халқымыз бауырына басып, паналатты. Олар қазақ елінде өсіп-өніп, нағыз отандастарымызға айналды. Біздің елде әр этностың өз тамырынан ажырамай, тілі мен ділін сақтауына барлық жағдай жасалған. Корей диаспорасы да осы игілікті көріп отыр. Елімізде Қазақстан корейлерінің қауымдастығы бар. Корей мәдени орталықтары мен Корей театры жұмыс істейді. Сондай-ақ, корей тілінде газет шығады. Корей бауырларымыз көптеген салада табысты еңбек етуде. Олардың ел экономикасын өркендетуге қосып жатқан үлесі зор. Қазақстанда тұратын корейлер екі елдің қарым-қатынасын дамытуға да белсенді атсалысып жүр. Біздің ынтымақтастығымыз болашақта осындай достық рухта нығая береді деп сенемін», – деді Қасым-Жомарт Тоқаев.
</blockquote>
Қасым-Жомарт Тоқаев Корея Республикасының Президенті Мун Чже Инге Корей халқының ұлттық батыры Хон Бом Доның қабірінен алынған топырақты табыстады. Корея Республикасының Президенті Мун Чже Ин Қасым-Жомарт Тоқаевқа зор ризашылығын білдіріп, ұлт батыры Хон Бом Доға ең жоғары мемлекеттік награда берілгенін хабарлады.

Президент Кореяның ұлттық батыры Хон Бом Доның құрметіне орай өткен рәсімге қатысты

<a href="https://kyzylorda-news.kz/">Kyzylorda-news.kz</a>. Шиелі ауданында биыл 6 ай ішінде 107 қылмыс тіркелген. Бұл көрсеткіш өткен жылмен салыстырғанда 14,4 пайызға төмендеген. Бұл туралы Шиелі ауданының әкімі Нариман Мақұлбеков хабарлады.
Атап айтар болсақ, бөтен мүлік ұрлығы 26,6 пайызға, мал ұрлығы 53,1 пайызға, пәтер ұрлығы 12,5 пайызға, есірткі қылмыстары 76,2 пайызға төмендесе, алаяқтық 50 пайызға, бұзақылық 20 пайызға азайған. Сонымен қатар ауданда жарты жыл ішінде тонау қылмысы тіркелмеген. Сондай-ақ биыл бір қарақшылық қылмысы тіркелген.
<blockquote>
 «Биыл алғашқы жартыжылдықта 13 жол көлік оқиғасы орын алып, жол апаттарынан 24 азамат әртүрлі дене жарақаттарын алса, 1 азамат қайтыс болды. Қауіпсіздік шараларын қамтамасыз ету мақсатында бүгінде Шиелі кентінде 26 бейнебақылау камералары жұмыс жасап тұр», – дейді Нариман Мақұлбеков.
</blockquote>

Шиеліде қылмыс саны 14,4 пайызға азайған

<a href="https://kyzylorda-news.kz/">Kyzylorda-news.kz</a>. Қызылорда қаласындағы «Білім-инновация» мектеп-лицейінде «Сыр дарыны» білімділер академиясының жаңа маусымының ашылу салтанаты онлайн форматта өтті.
«Zoom» платформасы арқылы ашылу салтанатына қатысқан облыстық білім басқармасының басшысы Ақзира Қасымова бұл академия білім бәсекелерінде өңіріміздің абыройын асқақтатын дарынды балаларды даярлайтын ұстаханаға айналатынына сенім білдірді.
<blockquote>
 «Академия құрамына енген жас дарынды оқушыларымызға алдағы білім бәсекелерінде биік белестерді бағындыруды тілеймін. Зияткерлік жарыстарда көшбасшылық орынға ие болуы үшін біз барлық жағдайды жасауды жалғастыра беретін боламыз», – деді Ақзира Бақтыбайқызы.
</blockquote>
Айта кетейік, «Сыр дарыны» білімділер академиясының негізгі мақсаты – бастауыштан бастап, жоғарғы сыныпқа дейінгі оқушыларды түрлі деңгейдегі олимпиадалар мен конкурстарға дарынды оқушыларды белсенді қатысуын арттыру, жоғары нәтиже көрсетуге жұмыс жасау болып табылады.
Білімділер академиясының жұмысы бүгіннен бастап физика, химия, математика, информатика, биология пәндері бойынша оқыту курстарын бастады.
Академия құрамына облыс бойынша 100 оқушы түрлі білім сынақтары арқылы іріктеуден өткізіліп, таңдалған. Сонымен қатар, 16-21 тамыз аралығында өтетін оқыту курстарына белсенді қатысқан оқушылар апта соңында марапатталатын болады.
<img src="https://kyzylorda-news.kz/wp-content/uploads/2021/08/syr-daryny.jpg" alt="" />

«Сыр дарыны» білімділер академиясы жұмысын бастады

<a href="https://kyzylorda-news.kz/">Kyzylorda-news.kz</a>. Қызылорда облысының әкімі Гүлшара Әбдіқалықова жер қатынастары саласында атқарылған жұмыстарды саралау үшін облыстық жер қатынастары басқармасының басшысы Медет Усаиннің есебін тыңдады.
Басқарма басшысы өз кезегінде жер учаскелерін цифрландыру, кәсіпкерлік мақсатта жерлерді айналымға алу, жайылымдық жерлерді көбейту бағытында орындалған жұмыстарды тілге тиек етті.
Қазірде Қызылорда облысының Өңірлік геоақпараттық жүйесін құру бағытында Қызылорда қаласы мен оған іргелес кент, ауылдық округтерінің жер учаскелерін жердің цифрлық картасымен сәйкестендіру аясында түгендеу жұмыстары жүргізілуде.
Қазіргі таңда аймақтың бірыңғай картографиясы әзірленді. Яғни <a href="https://orda.geoportal.kz/?fbclid=IwAR3SZlFBinAHpoaSnarWngtblJixmkT6j36HLFzkNtNOJVqiGWQkDQF0GTY">https://orda.geoportal.kz</a> мекенжайы бойынша тұрғындар қолжетімді ақпаратты ала алады. Сондай-ақ, ағымдағы жылы облыс бойынша 60 мың гектар жерлерді қосымша ауыл шаруашылығы айналымына алу жоспарланды. Бүгінге күні жалпы көлемі 17,5 мың гектар болатын 54 жер учаскесі айналымға алынды, жыл соңына дейін қалған 42,5 мың гектар жерлерді табыстау арқылы жоспар орындалады деп күтілуде. Мұнан бөлек, облыс бойынша тұрғындардың мал жаюына қажетті жайылымдар мәселесін шешу мақсатында арнайы жұмыс топтары құрылып, жайылымдық алқаптарға толық талдау жұмыстары жүргізілді. Жайылым жермен қамту мәселесін шешу мақсатында орман қоры жерлеріндегі елді мекен жайылымына қажетті көлемдерді орман қоры жерлері санатынан шығару жөнінде және қала, кенттерде ұсталатын мал басын шектеу жөнінде нормативтік-құқықтық актілер қабылдау туралы ұсыныстар берілді.
Медет Усаин кәсіпкерлік мақсатта жерлерді айналымға алу бағытындағы негізгі жұмыстар барысына да тоқталды. Бұл ретте жыл басынан бері Қызылорда облысы бойынша 20 аукцион өткізіліп, көлемі 78,2 гектар 215 жер учаскесі сауда-саттықпен табысталған. Сонымен бірге биыл жер учаскесін алуға кезекте тұрған азаматтарға 1249 жер учаскесі табыстау жоспарланған, бүгінде оның 663 табысталды, ал ІІ жарты жылдықта 586 жер учаскесі табысталмақ. Сондай-ақ, жаңадан “Бәйтерек-2” тұрғын ауданынан 1200 учаске табыстау көзделген. Аталған жерлер ҚР Жер заңнамасына сәйкес инженерлік инфрақұрылыммен толық қамтамасыз етілгеннен кейін кезектілікке сәйкес табысталатын болады.
Жерлерді зерттеу-іздестіру бағытында да кешенді жұмыс бар. Облыста 2018-2020 жылдары 2,3 млн гектар жерге топырақ зерттеу, балл бонитетін анықтау және 1,0 млн га жерге геоботаникалық зерттеулер жүргізілді.
Негізгі басымдықтарды бағдарлаған облыс әкімі басқарма басшысына тиісті жұмыстарды әрі қарай уақытылы және сапалы жүргізуді тапсырды.
<img src="https://kyzylorda-news.kz/wp-content/uploads/2021/08/medet.jpg" alt="" />

Қызылордада жер учаскелері цифрландыруға көшеді

<a href="https://kyzylorda-news.kz/">Kyzylorda-news.kz</a>. Қазақстанда өткен тәулікте 5848 адам коронавирустан жазылды, деп хабарлайды&nbsp;<a href="https://www.coronavirus2020.kz/kz/kazakstanda-otken-taulikte-5848-adam-koronavirus-indetinen-emdelip-shykty_a3824715">coronavirus2020.kz</a>.
Аймақтар бойынша:
Нұр-Сұлтан қаласы – 320,
Алматы қаласы – 1285,
Шымкент қаласы – 453,
Ақмола облысы – 259,
Ақтөбе облысы – 612,
Алматы облысы – 245,
Атырау облысы – 111,
Шығыс Қазақстан облысы – 62,
Жамбыл облысы – 50,
Батыс Қазақстан облысы – 77,
Қарағанды облысы – 926,
Қостанай облысы – 378,
Қызылорда облысы – 308,
Маңғыстау облысы – 144,
Павлодар облысы – 397,
Солтүстік Қазақстан облысы – 100,
Түркістан облысы – 121.
Қазақстан бойынша жазылғандар саны – 577882.

Қызылордада бір күнде 308 адам коронавирустан жазылды

<a href="https://kyzylorda-news.kz/">Kyzylorda-news.kz</a>. Қазақстанда өткен тәулікте 6869 адамнан ПТР арқылы коронавирус анықталды, деп хабарлайды <a href="https://www.coronavirus2020.kz/kz/kazakstandagy-koronavirus-boyynsha-16-tamyz-23-59-dagy-epidemiologiyalyk-zhagday_a3824713">coronavirus2020.kz</a>.
Аймақтар бойынша:
Нұр-Сұлтан қаласы – 632,
Алматы қаласы – 1517,
Шымкент қаласы – 450,
Ақмола облысы – 285,
Ақтөбе облысы – 300,
Алматы облысы – 383,
Атырау облысы – 562,
Шығыс Қазақстан облысы – 256,
Жамбыл облысы – 171
Батыс Қазақстан облысы – 65,
Қарағанды облысы – 1101,
Қостанай облысы – 273,
Қызылорда облысы – 148,
Маңғыстау облысы – 152,
Павлодар облысы – 330,
Солтүстік Қазақстан облысы – 161,
Түркістан облысы – 83.
Жалпы ел бойынша ауырғандар саны 701345.

Covid-19: Қызылордада 148 адамнан анықталды

<a href="https://kyzylorda-news.kz/">Kyzylorda-news.kz</a>.&nbsp;17 тамыз күні ел аумағының басым бөлігінде күн ашық, тек шығыста ауа ағындарының әсерінен найзағай жарқылдап, жаңбыр жауады, деп хабарлайды Қазгидромет.
Республика бойынша кей жерлерде жел күшейеді, оңтүстік-шығыста бұршақ, шаңды дауыл күтіледі, солтүстік пен шығыста түнгі және таңғы сағаттарда тұман түсуі ықтимал.
Күндіз Шығыс Қазақстан облысының шығысында найзағай жарқылдайды, кей жерлерінде жел 15-20 м/с күшейеді, түнде және таңертең тұман түседі.
Күндіз Павлодар облысының батысы, оңтүстік-батысында желдің жылдамдығы 18 м/с жетеді.
Жамбыл облысының таулы аудандарында түнде найзағай, бұршақ, кей жерлерінде шаңды дауыл күтіледі, жел 15-20 м/с күшейеді.
Алматы облысының таулы аудандарында найзағай жарқылдайды.
Түркістан облысы, күндіз Қызылорда облысының кей жерлерінде жел 15-20 м/с күшейеді. Күндіз Қарағанды облысының солтүстігінде найзағай күтіледі. Түнде және таңертең Солтүстік Қазақстан облысының кей жерлерінде тұман түсуі ықтимал.
Күндіз Атырау облысында өте қатты ыстық сақталады, Батыс Қазақстан, Ақтөбе облыстарының басым бөлігінде, Маңғыстау, Қостанай облыстарының оңтүстігінде аптап ыстық болады.
Қызылорда, Түркістан, Маңғыстау, Атырау, Жамбыл, Ақтөбе, Батыс Қазақстан, Алматы облыстарының басым бөлігінде, Қарағанды облысының кей жерлерінде, Қостанай, Шығыс Қазақстан облыстарының оңтүстігінде, Ақмола облысының жекелеген аудандарында өрт қаупі сақталады.

Сейсенбіге арналған ауа райы болжамы

Kyzylorda-news.kz. Белгілі журналист, спорт комментаторы Амангелді Сейітхан қайтыс болды, деп хабарлайды ҚазАқпарат.
Қаралы хабарды әріптесі Жандос Айтбай растады.
<blockquote>
 «Ол кісі ауруханада көп жатқан жоқ. Кеше жансақтау бөліміне түсті. Бүгін айырылып қалдық. Соңғы күнге дейін жасырып, жаны қиналып жатса да ешкімге білдірмеді»,- деді журналист Жандос Айтбай.
</blockquote>
Алматы облысындағы «Хабар» агенттігінің меншікті тілшісі Ардақ Айбарұлы Facebook-тегі парақшасында белгілі журналистің коронавируспен ауырғанын жазды.
<blockquote>
 «Бұл ажал дегенге шара бар ма? Белгілі спорт комментаторы Амангелді Сейітхан ағамыздан айырылып қалдық. Мына аты жаман індет ешкімді аямады-ау. Не дерімді білмей отырмын. Дүние – жалған деген осы. Отбасы, туған-туыс, дос-бауырларына қайғыра көңіл айтамын. Иманды болыңыз, жездеке», – деп жазды ол.
</blockquote>
Амангелді Муатқанұлы 1969 жылы 11 мамыр күні ШҚО Мақаншы ауданында дүниеге келген. 1991-1994 жылдары «Спорт» газетінде істеп, 1994 жылы «Қазақстан» телерадиокорпорациясында «Тұғыр» атты бағдарлама ашып, жүргізушісі болды. Осы орайда ол арнадағы спорт бөліміндегі бас редактордың орынбасары қызметін де қатар атқарды. Осындан соң «Құмсағат» бағдарламасының спорттық ақпараттар бойынша продюсері атанды.
Ал 1997 жылы «Хабар» арнасына ауысып, осы күнге дейін аталған агенттікте жұмыс істеп келді.
Футболдан 1998 жылы Франциядағы Әлем чемпионатында қазақ тілінде комментатор болды. Одан кейін 1999 жылы Бангкоктегі Азия ойындарын, 2000 жылы Сиднейдегі Олимпия ойындарын, 2002 жылғы Солт-Лейк-Ситидегі ақ Олимпиаданы «Хабар» арнасының эфирінде қазақша сөйлетті.
Амангелді Сейітхан 2000 жылы еліміздегі спорт журналистеріне берілетін Сейдахмет Бердіқұлов атындағы сыйлықтың лауреаты.
Спорт шарасын «жеңісті күндерде жолыққанша» деп аяқтайтынымен көрермендер ықыласына бөленген еді.

Қазақстан және Қызылорда облысының жаңалықтары