<a href="https://kyzylorda-news.kz/date/2020/09/07/">Kyzylorda-news.kz.</a> Артық салмағы бар ер адамдар ең жақсы әке болады, деп хабарлайды <a href="https://sputniknews.kz/society/20200906/14895274/er-adam-ake-zertteu.html">Sputnik</a>.
АҚШ-тың Оңтүстік Миссисипи университетінің ғалымдары 800-ге жуық адамның қатысуымен зерттеу жүргізді. Оларға түрлі салмақтағы ер адамдардың суреті көрсетіліп, жағымды және жағымсыз қасиеттерін атау ұсынылды.
Қатысушылар ер адамның оң қасиетіне балаға үй жұмысын істеуге көмектесу, үйретіп, қауіп төнген жағдайда қорғай алуын жатқызды.
Ал тез ашулану, дөрекі болу сынды тұстары жағымсыз екенін атап өтті.
Зерттеуге сәйкес, артық салмағы бар адамдар мейірімді және адал екені анықталды. Ал дене бітіміне көңіл бөлетін ер адамдарда жағымсыз қасиет көп болып шықты. Олар отбасына емес, өзіне көп көңіл бөледі.
Алайда тым артық салмақ жинаған ер адамдарға да аса сенім білдірілмей отыр. Олар жауапсыз екені алға тартылды. Соның салдарынан жақсы әке бола алмайды деген болжам жасалды.

Қандай ер адамдар ең жақсы әке болады?

<a href="https://kyzylorda-news.kz/">Kyzylorda-news.kz.</a> Мемлекеттік көрсетілетін қызметтер саласындағы заңнама бұзушылықтарының алдын алу мақсатында аумақтық департаменттерге онлайн семинар өткізілді.
ҚР Мемлекеттік қызмет істері агенттігінің Қызылорда облыстық департаменті ұйымдастырған семинарда қызмет көрсету барысында орын алатын кемшіліктер айтылып, заң нормалары түсіндірілді.
<blockquote>
 «Қазіргі таңда, мемлекеттік қызметтерді сапалы көрсету мемлекеттік органдар қызметінің тиімділігін бағалауға тікелей әсер етумен қатар, қызмет алушылар алдында мемлекеттік биліктің оң имиджін қалыптастыратын бірден-бір басымды бағыт болып табылады», – деді департамент басшысының орынбасары Берікбол Байхожаев.
</blockquote>
Семинарда ағымдағы жылдың 8 айында бақылау шараларының нәтижесімен анықталған заңбұзушылықтар талқыланды. Мемлекеттік көрсетілетін қызметтер саласындағы заңнаманың сақталуы бойынша 4 профилактикалық бақылау, 7 жоспардан тыс тексеру жұмыстары жүргізіліп, аумақтық департаменттерде 23 заңбұзушылық анықталған. Оның ішінде, стандартта көзделмеген құжаттарды талап ету – 14, толық емес құжаттар бола тұра қызмет көрсету – 1, қызмет көрсету мерзімдерін бұзу – 5, негізсіз бас тарту – 1, өзге де бұзушылықтар – 2.
<blockquote>
 «Қызмет көрсетуші мекемелерді электрондық қызметтердің үлесін арттыру, көрсетілетін қызметтердің жоғары сапасы мен қолжетімділігін қамтамасыз етуде бірлесіп жұмыс жасауға шақырамыз. Жыл басынан бері «Digital agent» мобильді қосымшасы арқылы қызмет көрсету сапасына 173 баға беру түсті. Оның ішінде 23 теріс бағалау болған. Барлық аумақтық департаменттерді, «Азаматтарға арналған үкімет» мемлекеттік корпорациясының облыстық филиалын қызмет алушылардан түскен теріс бағаларға (шағымдарға) уақтылы жауапты орналастыруды сұраймыз», – деді департаменттің бас маманы Нұржан Сүлейменов.
</blockquote>
Сонымен қатар, семинарда ҚР Сыбайлас жемқорлыққа қарсы іс-қимыл агенттігінің облыстық департаментінің жанындағы Ақпараттық-ағартушылық штабының мүшесі, заң ғылымдарының кандидаты Ықылас Дулатов сыбайлас жемқорлық тәуекелдері және оның алдын алу туралы баяндама жасады. Аумақтық департамент қызметкерлеріне әкімшілік сыбайлас жемқорлық құқық бұзушылықтары үшін жауаптылық пен жаза түрлері түсіндірілді.
Семинарда қызмет көрсету барысында кездесетін түйткілді мәселелер де талқыланып, қатысушылармен пікір алмасылды.

Қызылорда: «Digital agent» арқылы 173 қызмет сапасына баға берілген

<a href="https://kyzylorda-news.kz/date/2020/09/07/">Kyzylorda-news.kz.</a> Қазақстанда коронавирус инфекциясын жұқтырғандардың саны 106 361 адамға жетті, деп хабарлады ведомствоаралық комиссия.
Қазақстанда өткен тәулікте 60 адамның індетке шалдыққаны белгілі болды.
99 654 адам сауығып шықты (өткен тәулікте 131 науқас).
Өңірлер бойынша мәлімет:
<ul>
<li>Нұр-Сұлтан қаласы –&nbsp;4,</li>
<li>Алматы қаласы –&nbsp;4,</li>
<li>Ақмола облысы –&nbsp;3,</li>
<li>Алматы облысы –&nbsp;3,</li>
<li>Атырау облысы –&nbsp;6,</li>
<li>Шығыс Қазақстан облысы –&nbsp;15,</li>
<li>Жамбыл облысы –&nbsp;1,</li>
<li>Батыс Қазақстан облысы –&nbsp;8,</li>
<li>Қарағанды облысы –&nbsp;5,</li>
<li>Қостанай облысы –&nbsp;3,</li>
<li>Павлодар облысы –&nbsp;4,</li>
<li>Солтүстік Қазақстан облысы –&nbsp;4.</li>
</ul>

Қызылордада өткен тәулікте коронавирус індеті тіркелген жоқ

&nbsp;<a href="https://kyzylorda-news.kz/">Kyzylorda-news.kz.</a> Дүйсенбі күні елімізде тұман түсіп, жаңбыр жауады, күн күркіреп, найзағай жарқылдайды, жел күшейеді, деп хабарлайды Қазгидромет.
Синоптиктердің болжауынша, 7 қыркүйекте Қазақстанның басым бөлігінде солтүстік және оңтүстік циклондар әсер етеді. Сондықтан кей жерлерде найзағай жарқылдап, жаңбыр жауады. Тек еліміздің оңтүстігі мен батысында күн райы ашық болады. Сондай-ақ кей жерлерде тұман түсіп, жел күшейеді, батыста күшті желмен шаңды дауыл соғады.

Дүйсенбіге арналған ауа райы болжамы

<a href="https://kyzylorda-news.kz/">Kyzylorda-news.kz.</a> «Жолаушылар тасымалы» АҚ пойыз билеттерін және оның ақшасын қайтару бойынша сұрақтарға жедел жауап беретін WhatsApp номерін іске қосты, деп хабарлайды&nbsp;<a href="https://www.inform.kz/kz/poyyz-biletin-kaytaru-boyynsha-whatsapp-nomirine-zhuginuge-bolady_a3690604">ҚазАқпарат.</a>
Ақшаны қайтарып алу билетті сатып алу әдісіне қарай қолма-қол ақшамен және қолма-қол ақшасыз іске асырылады:
– стансадан пойыз жөнелтілгенге дейін 1 сағаттан кешіктірмей билетті қайтарған жағдайда қаражат 5 жұмыс күні ішінде төлеушінің картасына түседі;
– стансадан пойыз жөнелтілгенге дейін 1 сағаттан аз уақыт қалғанда билетті қайтарған жағдайда қаражат жолаушының өтініші негізінде 30 күнтізбелік күн ішінде жолаушының картасына түседі.
Билет құнын қайтара алмаған жолаушылар&nbsp;WhatsApp +7-707-270-36-64&nbsp;нөміріне хабарласа алады.
<blockquote>
 «Сұрау салуды жіберген кезде жол жүру құжатының (билеттің) нөмірін көрсету керек немесе билет кассасына жүгінген кезде жол жүру құжатының (билеттің) фотосуретін және жол жүру құжатын (билетін) қайтару туралы түбіртекті жіберу қажет», – делінген ақпаратта.
</blockquote>
Айта кетейік, ережеге сәйкес билетті қайтарған кезде:
– пойыз жөнелтілгенге дейін 24 сағаттан кешіктірілмесе – билеттің толық құны қайтарылады;
– 24 сағаттан кешіктіріліп, бірақ пойыз жөнелтілгенге дейін кемінде 6 сағат бұрын өткізілсе – билет құны және плацкарт құнының 50% қайтарылады;
– пойыз жөнелтілгенге дейін кемінде 6 сағат бұрын және жөнелтілгеннен кейін 1 сағаттан артық емес уақытта қайтарылса – билеттің құны қайтарылады, бұл ретте плацкарттың толық құны ұсталады.
Пойыз жөнелтілгеннен кейін 1 сағаттан соң билетті қайта өткізуге болмайды және оның ақшасы қайтарылмайды.
<blockquote>
 «Ал жолаушылар пойызының қатынауы тоқтаған жағдайда жолаушылар жол жүру құжаттарын (билеттерін) қайтаруды ресімдеп, ақшалай қаражаттарын толық көлемде қайтарып ала алады. Жолаушылар жол жүру құжаттарын сатып алған жерде қайтару қажет», – деп нақтылады «Жолаушылар тасымалы» АҚ-дан.
</blockquote>

Енді пойыз билетінің ақшасын қайтару WhatsApp арқылы жүзеге асады

<a href="https://kyzylorda-news.kz/">Kyzylorda-news.kz.</a> Неке – қайық, өмір – теңіз. Қайығыңызды өмірдің дүлей теңізі шыр көбелек айналдырып алып кете ме, тасқа соғып, күйрете ме, әлде теңіздің тынық кездерін тамашалап, дауыл соққанда иық тіресіп, ескекті бірге есіп жүріп, көздеген жағалауыңызға жетесіз бе?
Әлбетте, қайықтың тағдыры ерлік-зайыптылардың қолында. Жұбайылардың біріне-бірі деген сыйластығы арта түсу үшін не істеу керек?
Төмендегі кеңестерге ден қойып, отбасыңызға әдет етіп қалыптастырыңыз.
<ol>
<li>Жәрдем. Жұбайының көмегіне көбінесе келіншектер мұқтаж. Оған бірнеше себеп бар: ер адам күні бойы үйден тыс жұмыс істеп шаршайды, оған әйелінің үйдегі күйбең тірлігі көрінбейді. Қоғамда да әйелдің үй ішіндегі жұмысы төмен бағаланады, тіпті еңбек деп саналмайды. Шын мәнінде, бұл шаршататын, кейде мезі қылатын бір сарынды еңбек. Еңбегінің көрінбейтіні әйелді одан сайын қажыта түседі. Сондықтан осы мәселені талқылап, ерлік-зайыптылар өзара шешуі тиіс. Оның жолдары көп: ер адам күніне бір сағат немесе аптасына екі-үш сағат балаға қарайды, ал келіншегі сол кезде тынығады немесе өзіне қажет шаруаларын істейді, не болмаса, дүкеннен тамақ алуды күйеуі өзі мойнына алады, тағы басқа амалдарды ойластырып, қолдануға болады.</li>
<li>Алғыс. Жұбайлар бір-бірінің көмегін, еңбегін, қамқорлығын елеусіз қалдырмай, әрдайым ризашылық білдіріп, сол көмектің қаншалықты құнды екенін айтып отырса, өзінің де, жұбайының да мейірін асырып отырар еді. Балаға да жақсы өнеге. Ата-анасының өзара сыйластығы баланың өзіне-өзі деген сенімін нығайтады.</li>
<li>Қолдау. Жұбайыңыздың бастамасын, ой-пікірін жер қылмай, көңіл қойып тыңдап, қолдау көрсетіп отырыңыз. Анық көрініп тұрған қателігі болса, намысына тимей, жұмсақ сөзбен жеткізіп көріңіз. Келіспесе, өз дегеніңізге көндіруге тырыспаңыз. Жұбайыңыз – ересек, ақылды адам емес пе? Тіпті қателессе де, не қылар? Егер мәселенің ұшы сізге де тиетін болса, біржола шешім қабылдауды кейінге қалдыра тұруын сұраңыз. Қолайлы сәт туғанда, қайта оралып, ақылға салыңыз.</li>
<li>Адамға жеке кеңістік қажет, соны ұмытпаңыз. Кейде адам жалғыздықты, тыныштықты қажет етеді. Кейде үйден тыс, құрбы-құрдаспен бірге болғымыз келеді. Әйел адам кейде құрбыларымен серуендесе, ер адам балық аулап келсе, бірінен-бірі тынығып, қайта қауышатын болса, қарым-қатынасы нығая түседі. Еркектің етегіне жармасудың да, әйелді де үйде қамап ұстаудың да ешкімге пайдасы жоқ.</li>
</ol>
<a href="https://massaget.kz/jigitterge/psihologiya/61087/">Massaget</a>

Жұбайлардың сыйластығын арттыру үшін не істеу керек?

Kyzylorda-news.kz. Белгілі қазақстандық астролог Ирина Әбдірайымова күздің бірінші айына болжам жасады, деп хабарлайды&nbsp;<a href="https://sputniknews.kz/">Sputnik</a>&nbsp;Қазақстан.
Халықтың ашу-ызасын туғызатын өзгерістер
Астролог Ирина Әбдірайымова айдың басында көптеген елдің заңнамасы өзгеретінін айтты. Бірақ, жаңа нормалар адамдардың көңілінен шықпайды, керісінше, ашуын тудыруы мүмкін.
<blockquote>
 “Қыркүйек айының басында көптеген елдің басшылары заңдарға өзгерістер мен толықтырулар енгізіп, халықтың қытығына тиеді. Өзгерістер сайлау заңнамасына да қатысты болуы мүмкін. Былайша айтқанда, президенттер&nbsp;қыркүйектің бірінші жартысында тым белсенді жұмыс істейді”, – деді қазақстандық маман.
</blockquote>
Оның болжамынша, елдердің экономикалық жағдайы жақсармайды. Құрылыс, металлургия, көлік салаларында біраз компания қиын жағдайға тап болады.
<blockquote>
 “Айдың басында бір-бірімен қырғи-қабақ болып жүрген тараптар татуласады, келісімге келеді. Сол себепті осы кезеңде митингтер мен наразылықтар азаюы мүмкін. Өкінішке қарай, бұл ұзаққа созылмайды. Қыркүйектің соңына қарай, әсіресе, қазанда адамдар бас көтеріп, оларды тоқтату қиынға соғады. Мемлекеттер арасында да, елдердің өз ішінде де әскери қақтығыстар күшейеді”, – деді Әбдірайымова.
</blockquote>
Астрологтың айтуынша, қыркүйектің екінші жартысынан бастап адамдар елдер арасында дипломатиялық деңгейдегі және олигархтар арасындағы дау-жанжалдарға куә болады.
Бұдан бөлек, шенеуніктердің көбі абақтыға қамалып, үйқамаққа алынуы мүмкін.
Суицид көбейеді
Әбдірайымова осы айда Жер планетасы Сатурн – квадрат – Лилит аспектісінің ықпалына түсетінін атап өтті. Ондаған адамның өмірін жалмайтын табиғи апаттар, лаңкестік әрекеттер, теміржол апаттары болуы мүмкін.
Таяу Шығыста әскери іс-қимыл айдың соңына қарай күшейеді деп болжануда. Сонымен қатар, маман суицид көбейетінін айтты.
<blockquote>
 “Айдың 17-20 аралығында туған адамдардың көңілі жабырқап, күйзеліске түсіп, үрей мен пессимизмге бой алдырады. Өмірде күтпеген қиын жағдайлармен бетпе-бет келуі мүмкін. Бірақ, бұл уақытша сынақ екенін естен шығармаған абзал. 20 қыркүйектен кейін сіздің жағдайыңыз жақсарып, өміріңіз өз арнасына түседі”, – деді астролог.
</blockquote>
Маманнан кеңес
Ирина Әбдірайымова қыркүйек ақыл-ой жұмысына өте қолайлы ай екенін айтып, осы уақытты тиімді пайдалануға кеңес берді.
<blockquote>
 “Ақпарат оңай сіңіріледі. Адам жылдам ойлап, лезде шешім қабылдап, еңбегі жемісті болады. Бірақ, айдың екінші жартысынан бастап Жер ғарыш энергиясының ықпалына түседі. Соның әсерінен көбі дау-жанжалға бейім тұрады”, – деді ол.
</blockquote>
Айтуынша, 16 қыркүйектен бастап бизнес серіктестермен келісімге келу қиындайды. Себебі, әркім өз пікірін дұрыс санап, бір-бірінің сөзіне құлақ аспайды. Алайда, олар өз күші мен мүмкіндіктерін асыра бағалап, үлкен шығынға батуы мүмкін, деп болжады қазақстандық астролог.
<blockquote>
 “Бұл кезеңде басталған түсініспеушіліктер 20 қыркүйекке қарай ашық тартысқа ұласуы мүмкін. Ал 23 қыркүйекке қарай қарым-қатынас үзіліп, қол көтеру, ұрып-соғумен аяқталуы ғажап емес”, – деді Әбдірайымова.
</blockquote>
Маман жүргізушілерге 20-25 қыркүйек аралығында абай болуға кеңес берді. Себебі, бұл кезеңде жол апаты жиілейді.
11-12 қыркүйек күндері айдың 12-сі мен 14-і туған Балық, Бикеш, Мерген және Егіздер алаяқтарға алданып немесе өзін-өзі алдауы мүмкін.
Бұдан бөлек, астролог ғашықтар үшін қыркүйектің қандай күндері қолайсыз екенін айтты.
1, 2, 3 қыркүйек – сүйіктісінен көңілі қалу, күмән, қызғаныш уақыты. &nbsp;4 қыркүйек – өкпе-реніш, қыңырлық.
<blockquote>
 “Сол себепті бұл күндері жақын адамыңызға көбірек көңіл бөліп, ренжімеуге тырысыңыз. Егер сүйіктіңізбен татуласпасаңыз, араңыз суып кетуі мүмкін”, – деп ескертті Әбдірайымова. 
</blockquote>

Қыркүйекте қазақстандықтарды не күтіп тұр?

<a href="https://kyzylorda-news.kz/">Kyzylorda-news.kz.</a> Ұлттық тестілеу орталығының директоры Дидар Смағұлов әлеуметтік желідегі парақшасында қосымша гранттар тағайындалатынын мәлімдеді.
Оның айтуынша, орталық 15 қазанға дейін тағы 4000-нан астам отбасыны қуантпақ.
<blockquote>
 “Оларға үкімет қаулысы шыққаннан кейін қосымша гранттар тағайындалады. Педагогикалық ғылымдар, АКТ, инженерлік, өңдеу мен құрылыс салалары, ауыл шаруашылығы және биоресурстар мамандықтары қамтылады!”, – деп&nbsp;<a href="https://www.facebook.com/photo?fbid=3173065446075486&set=a.494896537225737">жазды</a>&nbsp;Смағұлов.
</blockquote>

Қазақстанда 4 мыңнан астам қосымша грант тағайындалады

<a href="https://kyzylorda-news.kz/">Kyzylorda-news.kz.</a> Қызылорда қаласының әкімі Нұрлыбек Нәлібаевтың төрағалығымен қалалық идеологиялық актив отырысы өтті.
Актив отырысына облыс әкімінің орынбасары Н.Байқадамов, қаланың дербес бөлім басшылары, қалалық мәслихат депутаттары мен аймағымыздың зиялы қауым және бұқаралық ақпарат құралдарының өкілдері қатысты.
Идеологиялық активке қатысушылар Мемлекет басшысы Қасым-Жомарт Кемелұлы Тоқаевтың 2020 жылғы 1 қыркүйектегі «ЖАҢА ЖАҒДАЙДАҒЫ ҚАЗАҚСТАН: ІС-ҚИМЫЛ КЕЗЕҢІ» атты Қазақстан халқына Жолдауын кеңінен тарқатып, Жолдау жүктеген міндеттерді жүзеге асыру бағытын саралады.
Активте қала әкімі «Мемлекет басшысы Қазақстан халқына арнаған бұл Жолдауында қоғамдағы тұрақтылық пен сенім, ел экономикасының қарқынын одан әрі күшейтуге, халықтың тұрмысын жақсартуға негіз болатын, межеленген мақсаттарды жүзеге асыру үшін біздің алдымызға нақты 11 міндеттерді айқындап берді. Он бір тараудан тұратын осы міндеттер, еліміздің бұған дейінгі жетістіктері мен табыстарын еселейтін, қажеттіліктер мен сұраныстарды қанағаттандыратын негізгі бағдарламалық құжат» – деп, баса айтып, Ел Президентінің Ұлттық сипаттағы Жолдауының басым бағыттарын айқындап, ел дамуындағы ықпалымен маңыздылығын атап өтті.
Мұнан бөлек шаһар басшысы қаланың қарқынды дамуы туралы баяндама жасап, жыл басынан жүзеге асырылған ауқымды жобалар мен алдағы жоспарларға да қысқаша тоқталды.
Сонымен қатар басқосуда облыс әкімінің орынбасары Н.Байқадамов, облыстық кәсіпкерлер палатасы директорының орынбасары П.Сыздықов, С.Толыбеков атындағы №3 ақпараттық технология мектеп-лицейінің директоры Л.Әбенова, Ы.Жақаев атындағы «Қазақ күріш ғылыми зерттеу институты» ЖШС директоры, Б.Дүйсенбеков, облыстық денсаулық сақтау басқармасының басшысы С.Пазылов, облыстық «Рухани жаңғыру» орталығының директоры У.Ибраев сөз алып, Жолдаудың әр саланы дамытуға жасайтын ықпалын атап өтіп, ауқымды істерді бірлесе атқаруға үндеді.
<img src="https://kyzylorda-news.kz/wp-content/uploads/2020/09/118922658_2649165018683573_4847980997484864975_o.jpg" alt="" />
<img src="https://kyzylorda-news.kz/wp-content/uploads/2020/09/118771666_2649211102012298_7260089939788496110_n.jpg" alt="" />

Қызылордада Жолдау жүктеген міндеттер талқыланды

<a href="https://kyzylorda-news.kz/">Kyzylorda-news.kz.</a> Бүгін қала әкімі Нұрлыбек Нәлібаев шаһар іргесіндегі бау-бақша өнімдерін егумен айналысатын мекеме жұмысымен танысты.
«Іскер-М» ЖШС алғаш рет 2016 жылы Бірқазан елді-мекенінде голландиялық бақша өнімдерінің тұқымдарын Сыр өңіріне жерсіндіруді қолға алған. 16 гектар аумаққа 16 түрлі дақыл егіп, оның ішінен өнімділігі жоғары сұрыптарын таңдаған.
Биыл бұл бастамасын пилоттық жоба негізінде қала маңынан 1 гектарға жуық жер алып, қайта жандандырып отыр.&nbsp;Голландияның «Rijk Zwaan» компаниясымен бірлескен жоба бойынша 7 түрлі өнім егілген. Олар голландиялық тәтті жүгері, асқабақ пен қарбыз және қауынның Пиель де Сапо, Галия, Панталупа, Амморелло түрлері.
<blockquote>
 «Бұл өнімдер жоғары шыдамдылығы мен және дәмімен ерекшеленеді. Нарықта сұранысы жоғары дақылдарға тапсырыс берушілер дайын. Экспортқа шығаруды да жоспарлап отырмыз» – дейді, мекеме менеджері Арыстанбек Шайменов.
</blockquote>
️Егіс алқабы тамшылатып суару жүйесі арқылы жұмыс істейді. Соңғы үлгідегі заманауи құралдармен жабдықталған бақшаны қашықтықтан басқару арқылы да суаруға болады.
Бақша аумағын аралап, өнім түрлерімен танысқан шаһар басшысы жергілікті өнімнің сапасына аса жоғары баға беріп, бау-бақша алқабының көлемін ұлғайтуды баса айтты. Өз кезегінде несібесін еңбекпен еселеп, ырзықты жерден терген егіншілер егіс көлемін ұлғайту мақсатында Бірқазан елді-мекенінен қосымша жерді жалға алуды заң аясында шешіп беруін сұрады. Қала әкімі мәселенің 2 апта ішінде шешілетінін айтып, сала басшыларына бағбандарға берілетін жерге инфрақұрылым тарту мен субсидия бөлу мәселесін де қарауды тапсырды.
<img src="https://kyzylorda-news.kz/wp-content/uploads/2020/09/118851085_2649910128609062_1081039449869020783_o.jpg" alt="" />
<img src="https://kyzylorda-news.kz/wp-content/uploads/2020/09/118941804_2649933925273349_1587208326960205503_n.jpg" alt="" />

Қызылордада бақша дақылдарын өсірушілер көбейіп келеді

<a href="https://kyzylorda-news.kz/">Kyzylorda-news.kz.</a> Жаңа оқу жылында Сыр еліндегі 58 мектеп жан басына қаржыландыру тәртібі бойынша жұмысты бастап кетті. Яғни әрбір мектепке бала санына қаржы бөлінеді. Бұл туралы Қызылорда облыстық білім басқармасының басшысы Ақзира Қасымова мәлімдеді.
<blockquote>
 “1 қыркүйектен бастап, Арал ауданынан – 9 мектеп, Қазалыдан – 3, Байқоңыр қаласынан – 5, Қызылорда қаласынан – 41, барлығы 58 қалалық мектептер жан басына шаққандағы қаржыландыруға көшуде. Бұл қаржыландырудың жаңа талабы мектеп арасында өзара бәсекелестік туындатып, материалдық базаны нығайтуға жұмсалатын қаржыны, бала санына сәйкес біркелкі бөлінуіне ықпал жасайтын болады”,-деді Ақзира Қасымова.
</blockquote>
Бала санына қарай қаржы бөліну тетігі директорлардың жұмысын жаңа деңгейге шығарады. Бұл ретте мектеп басшысы жаңа білім беру мазмұнын дамытудың жолдарына қарай жұмысты үйлестіріп, оқушылардың жетістігі мен мұғалімдерді қолдау бағытын күшейтеді.
Айта кетейік, жаңа оқу жылында балаларға патриоттық тәрбие беруде «Құңдылықтарға негізделген білім беру» жобасы енгізіліледі. Сонымен бірге 53 мектепке факультатив негізінде домбыры сағаттары бөлінеді.

Қызылордада 58 мектеп жан басына қаржыландыру тәртібіне өтті

<a href="https://kyzylorda-news.kz/">Kyzylorda-news.kz.</a> Жексенбі елімізде тұман түсіп, жаңбыр жауады, күн күркіреп, найзағай жарқылдайды, жел күшейеді, деп хабарлайды Қазгидромет.
Синоптиктердің болжауынша, 6 қыркүйекте Қазақстанның басым бөлігіне солтүстік және оңтүстік антициклон әсер етеді, осыған байланысты оңтүстікте күн күркіреп, найзағай жарқылдайды, кей жерлерде жаңбыр жауады. Тек еліміздің батысында күн райы ашық болады. Еліміздің кей жерлерінде тұман түсіп, жел күшейеді, батыста шаңды дауыл соғады.
Қызылорда облысының кей жерлерінде жел 15-20 м/с күшейеді. Кей жерлерінде төтенше өрт қауіпі сақталады.

Қазақстан және Қызылорда облысының жаңалықтары