Kyzylorda-news.kz. Байқоңырда карантиндік шектеу шаралары 18 қазанға дейін ұзартылды.
Жұлдызды қалашыққа туристердің келуіне тыйым салынған. Байқоңырлықтардың туыстары да өткізу бекетінен кіре алмайды. Алғашқы COVID-19 жұқтыру дерегі мамыр айында тіркелсе, қыркүйектің аяғында науқастар саны 1043-ке жетіп, 68 тұрғын қайтыс болды. Байқоңырдағы Қазақстанның жалғыз көпбейінді ауруханасында дәрігерлер жетіспейді. Ғарыш айлағындағы 30 мыңдай және Арал, Қазалы, Қармақшы аудандарының тұрғындарына қызмет көрсететін емдеу мекемесінде окулист, реаниматолог, инфекционист маман тапшы. Ресейге жалға берілген аумақта жұмыс істеуге жастарды ынталандыру үшін жергілікті билік бірқатар жеңілдік қарастырып отыр. Ең бастысы, Байқоңырға барғандар баспанамен қамтылады. Жалпы облыстың денсаулық сақтау ұйымдарына 137 салалық дәрігер жетіспейді. Маман тапшылығын жою мақсатында сырбойылық 100 түлек отандық медициналық университеттерде арнайы тапсырыспен оқытылып жатыр. Сондай-ақ 30 шақты студент резидентуралық білімін жетілдіру үстінде. Оқуын тәмамдаған жас мамандардың бір бөлігі Байқоңырдағы ауруханаға жолданады. Ал қазір медициналық нысан індеттің келесі толқынына дайындық мақсатында өкпені жасанды желдету аппараттары және 32 оттегі концентраторымен жабдықталып, дәрі-дәрмек қорын жасақтап қойды.
<blockquote>
 “Байқоңыр қаласынан 5 үй берілген. Сол 5 үйдің ішінен 12 пәтер денсаулық сақтау саласына беріліп, аса қажетті мамандарды сол пәтерлерге орналастырып жатырмыз. Көршілес аудандардан ынта білдірушілер бар. Осы биылдан бастап ауылдық елді мекендерге жолданғандарға қаржылай көмек жасау үшін 500 АЕК бөлу мәселесін жыл соңына дейін қарап жатырмыз. Облыс әкімдігінің қолдауын тапты”, – Қызылорда облыстық денсаулық сақтау басқармасы басшысының орынбасары Олжас Ысқақов.
</blockquote>
<a href="https://24.kz/kz/zha-aly-tar/o-am/item/427641-baj-o-yrda-meditsina-mamandary-tapshy">Хабар 24</a>

Байқоңырда медицина мамандары тапшы

Kyzylorda-news.kz. Пандемия кезеңінде ерекше еңбегімен көзге түскен еріктілерге Қызылорда облысы әкімінің орынбасары Серік Ахмет «Халық алғысы» медалін табыстады.
Сыр волонтерларының көмегімен өңірімізде сегіз мыңнан аса мұқтаж отбасыға әлеуметтік көмек көрсетіліп, көпбалалы, әлеуметтік жағынан аз қамтылған 4870 отбасының мектеп жасындағы балаларына қажетті оқу құралдары табыс етілді.
Құрбан айт кезінде «Ақмешіт-Сырдария» орталық мешітінің үйлестіруімен Қызылорда қаласында 3 830, аудандар бойынша 3 431 отбасыға қайырымдылық көмек көрсетілді. «Хикмет» қайырымдылық қорының демеушілігімен 1 000 отбасыға азық-түлік түріндегі көмек берілді. Бұл шараларға меценаттар, мешіт қызметкерлері мен автоволонтерлер жұмылдырылды.
<blockquote>
 «Халық, ел ішінде жүрген өз батырларын, қайсар азаматтарын білуі қажет. Жұқпалы індетке қарамастан елдің қамы, халықтың денсаулығы үшін күрескен волонтерлардың игі істерін біз жастарға кеңінен насихаттауға тиіспіз», – деді облыс әкімінің орынбасары Серік Ахмет.
</blockquote>
Мемлекет басшысының «ХАЛЫҚ АЛҒЫСЫ» медалімен суретші Аманкелді Кененбаев, спортшы Илья Ильин, артист Ұжым Баймаханов және волонтерлар Үйтолған Жәрекеева, София Әбдіразақова, Ерлан Мұсаев, Ольга Чебакова, Алмат Жүсіпбек, Жақсат Исаева, Талғат Меңдібаев марапатталды. Сондай-ақ, бірқатар қоғам белсенділеріне облыс әкімінің «Алғыс хаты» табысталды.
<img src="https://kyzylorda-news.kz/wp-content/uploads/2020/10/120904088_1133056760423168_6119267339539305459_n.jpg" alt="" />

Қызылордада еріктілердің еңбегі еленді

Kyzylorda-news.kz. ҚР Президентінің баспасөз хатшысы Берік Уәли “Facebook” парақшасында көршілес Қырғызстанда болып жатқан жағдайға байланысты пікір білдірді.
<blockquote>
 «Қырғызстанда болып жатқан оқиғалар – сол елдің ішкі мәселесі. Қазақстанда бауырлас Қырғызстанмен өзара дәстүрлі достық қатынастарды және стратегиялық серіктестікті нығайту аса маңызды деп санайды. Сонымен қатар көршілес елдегі ахуалды тұрақтандыру ісі Қырғызстанның Конституциясы мен заңдарына сәйкес жүзеге асырылады деп үміттенеді. Қырғыз халқы өз мемлекетінің ұзақ мерзімді мүддесі үшін күрделі жағдайдан шығудың тиімді жолын табады»,-деп жазды Берік Уәли.
</blockquote>

Берік Уәли: Қырғызстанда болып жатқан оқиғалар – сол елдің ішкі мәселесі

<a href="https://kyzylorda-news.kz/">Kyzylorda-news.kz.</a> Қызылорда облысы бойынша күзгі дала жұмыстары жоспарға сәйкес жүйелі жүргізілуде.
Облыс бойынша 184,2 мың гектарға ауыл шаруашылығы дақылдары егілді. Осы орайда Сыр елінің егінші-механизаторлары алтын дәннен тау тұрғызып, ел-халық несібесін молайтуға сүбелі үлестерін қосты. Оның ішінде күздік бидай 9,5 мың тонна өнім, жаздық бидайдан 4,6 мың тонна өнім, жаздық арпадан барлығы 270 тонна өнім және сұлыдан 4,7 тонна өнім алынды.
Сондай-ақ, картоптың әр гектарынан 147,1 центнерден, көкөністен 198,6 центнерден, бақшадан 231,6 центнерден өнім алынуда.
Өңірдің негізгі дақылы күрішке орақ салу жұмыстары 22 тамызда басталып, бүгінгі күнде 81,8 мың гектар күріш жиналды. Қазіргі таңда егін жинау жұмыстарын 15 қазаннан кешіктірілмей толық аяқтау көзделіп отыр.
Бүгінгі күнге барлығы 420,2 мың тонна астық жиналды. Сыр елінің ауыл шаруашылығы өнімдерін жинау науқаны аяқталуға жақын.

Қызылордада егін жинау науқаны аяқталуға жақын

Kyzylorda-news.kz. Шиелі ауданының әкімі Қамбарбек Мүбараков аудандағы күріш диірмендерін аралады.
Өңірдегі азық-түлік бағаларын тұрақтандыру мақсатындағы жұмыстарды жандандыру үшін қолға алынған, Шиелі кентіндегі ЖК “Досжан” күріш ақтау зауытына барып, өндірістің жұмысымен танысты. Тәулігіне 50 тоннадан астам өнім өндіретін зауыт 6 адамды тұрақты жұмыспен қамтып отыр.
«Досжан» күріш ақтау зауытында күріш жармасын өңдеумен қатар, оны сату да жолға қойылған. Өнімнің негізгі тұтынушылары облыс, аудан тұрғындары болғанымен, 2020 жылы Қырғыстан Республикасына 80 тонна ақкүріш экспортталған.
Қазіргі таңда жобаның аясын кеңейту мақсатында қаржы ұйымдарынан несие қаражатын алуға құжаттар жинақталып, жұмысшылардың да санын көбейту жоспарлануда.
Жалпы Шиелі ауданы бойынша 14 күріш ақтау диірмені қарқынды жұмыс жүргізуде.
<img src="https://kyzylorda-news.kz/wp-content/uploads/2020/10/120996296_929697610894032_5458518766428084508_n.jpg" alt="" />

Шиелідегі күріш диірмендерінің жұмысы жандануда

Kyzylorda-news.kz. Қазалы аудандық маслихаты аппаратының басшысы мемлекеттік қызметке кір келтіретін теріс қылықтарға жол бергені үшін тәртіптік жазаға тартылды.
Бұл туралы шешім Әдеп жөніндегі кеңестің кезекті отырысында қабылданды.
ҚР Сыбайлас жемқорлыққа қарсы іс-қимыл агенттігінің Қызылорда облысы бойынша департаментінің Батыс аймағы бойынша ауданаралық басқармасы ұсынған материал негізінде Қазалы аудандық маслихат аппаратының басшысына тәртіптік іс қозғалып, оның әрекетіне қатысты қызметтік тергеп-тексеру жүргізілген.
Қызметтік тергеп-тексеру барысында, маслихат аппаратының басшысы туыстарының материалдық мүдделерін қанағаттандыру мақсатында, өзінің тікелей лауазымдық өкілеттіктеріне жер мәселесі шешу құзыреттілігіне кірмесе де «Қызылорда газ» ЖШС директорына жер учаскесін сату үшін 2500000 теңге алып, жер учаскесінің құжаттарын ресімдеп беруге уәде бергендігі және ол бойынша қолхат жазғандығы анықталған.
Яғни, маслихат аппаратының басшысы лауазымдық өкілеттіліктерін жақын туыстарының материалдық мүдделерін қанағаттандыруға пайдаланып, өзінің іс-әрекетімен ҚР мемлекеттік қызметі туралы Заңының 50-бабының 1-тармағының 2-тармақшасында көзделген талаптарын бұзған.
Әдеп жөніндегі кеңес мүшелері тәртіптік істің материалдарын жан-жақты қарап, мемлекеттік қызметке кір келтіретін теріс қылықтарға жол бергені үшін көпшілік дауыспен Қазалы аудандық маслихаты аппаратының басшысына «қызметіне толық сәйкес еместігі туралы ескерту» тәртіптік жазасын қолдану туралы шешім етті.

Қызылордада мәслихат аппаратының басшысы тәртіптік жазаға тартылды

Kyzylorda-news.kz. Әдеп жөніндегі кеңестің көшпелі отырысында сыбайлас жемқорлық тәуекелдеріне жүргізілген сыртқы талдау қорытындысы қаралды. Аталған тақырыптағы мәселе Кеңес отырысында жыл басынан бері алғаш рет талқыланды.
Сыртқы талдауды ҚР Сыбайлас жемқорлыққа қарсы іс-қимыл агенттігінің Қызылорда облысы бойынша департаменті жүргізген. Сыртқы талдаумен Қызылорда облысы бойынша экология департаменті қызметінің 2018 және 2019 жылғы кезеңі қамтылып, сыбайлас жемқорлық тәуекелдеріне әкеліп соғатын бірқатар мән-жайлар анықталған.
Департамент өз қызметі барысында басшылыққа алатын «Қоршаған ортаны ластаудан келтірілген залалды экономикалық бағалау ережесі» мен «ҚР Экологиялық кодексі» арасында қарама-қайшылықтар белгілі болған. Бірыңғай практиканың болмауы және аталған заңнама нормаларын дұрыс қолданбау кәсіпкерлердің құқықтарына қысым жасауға және олардың қызметін дамытуда кедергілерге әкеп соғатыны жөнінде жоғары тұрған уәкілетті органға ұсыныс жолданған.
Талдау барысында, экология департаменті қызметінде ҚР Әкімшілік құқық бұзушылық туралы кодексінің 324, 334, 336 және 344 баптарында санкциялардың баламалы түрлерін қолдану, яғни «Ескерту немесе Айыппұл» салу құқығы берілгендігі және нормаларды әкімшілік құқық бұзушылықтар туралы істерді жүргізу кезінде лауазымды тұлғалардың өз қалауы бойынша пайдалану мүмкіндігі, яғни сыбайлас жемқорлық тәуекелдеріне жол ашу қаупі бар екендігі анықталған.
Айта кету керек, департамент қызметкерлері мен кәсіпкерлік субъектілері арасында тікелей байланысты болдырмау мақсатында І санаттағы объектілері бар субъектілер есептерін қоршаған ортаны қорғаудың бірыңғай ақпараттық жүйесі арқылы тапсыру жүзеге асырылуда.
Кеңес отырысы қорытындысымен Қызылорда облысы бойынша экология департаментіне сыбайлас жемқорлық тәуекелдеріне ішкі талдау жүргізетін жұмыс тобына ҮЕҰ өкілдерін қатыстыру, департамент қызметінің ашықтығын қамтамасыз ету бағытында БАҚ-да, әлеуметтік желілерде заң нормаларына енгізілген өзгерістер мен атқарылған жұмыстарды кеңінен насихаттау шараларын жүргізу ұсынылды.

Әдеп жөніндегі кеңесте Экология департаментіндегі сыбайлас жемқорлық тәуекелдері талқыланды

Kyzylorda-news.kz. Аризона университетінің ғалымдары SARS-CoV-2 вирусы ауырсынуды басатындығын анықтады.
Вирустың бұл қабілеті инфекцияны жұқтырған кейбір адамдар неліктен ауру симптомдарын сезбейтінін, бірақ патогенді тарата алатындығын түсіндіреді.
Анестезияға пайдалы болуы мүмкін вирустың күтпеген қасиеті Pain журналында жарияланған мақалада айтылған.
Зерттеушілердің пікірінше, ауырсынуды басатын әсер коронавирустың адам жасушаларына енуіне мүмкіндік беретін S-ақуызына байланысты. Сонымен қатар бұл қосылыс ауырсыну сезімін қалыптастырумен байланысты сигналдардың берілуін тежейді. Бұл S-ақуыздың ACE2 рецепторымен ғана емес, сонымен қатар нейрондардағы мембраналық ақуыз нейропилин-1-мен де байланысатындығынан болады. Нейропилин-1 қан тамырларының дамуында маңызды рөл атқаратын және қатерлі ісік және ревматоидты артрит сияқты аурулармен байланысты эндотелий өсу факторымен (VEGF-A) байланысты. Бұл жағдайда нейрондық гиперқозғыштық пайда болып, ауырсынуға әкеледі. S-ақуыздармен байланысуы да осындай әсерге ие.
Ғалымдар алдағы зерттеулерде нейропилин-1-ді опиоидты емес препараттар көмегімен ауырсынуды жеңілдету үшін қалай қолдануға болатындығын зерттемек.
<a href="https://24.kz/kz/zha-aly-tar/bylu-manyzdy/item/427593-koronavirusty-pajdaly-asieti-any-taldy">Хабар 24</a>

Коронавирустың пайдалы қасиеті анықталды

<a href="https://kyzylorda-news.kz/">Kyzylorda-news.kz.</a> Жыл ішінде интернет тарифі 2,6, ал ұялы байланыс қызметі 1,7 пайызға қымбаттады. Бірақ, абоненттер саны қысқарды, деп хабарлайды <a href="https://www.inform.kz/kz/kazakstanda-internet-pen-uyaly-baylanys-kyzmetterinin-tarifi-kymbattady_a3702722">ҚазАқпарат</a>.
Осы жылдың қыркүйек айының басында Қазақстанда 24,2 млн ұялы байланыс абоненті болды. Бұл өткен жылдың дәл осындай кезеңіндегі абоненттер санынан (25,9 млн абонент) 6,5 пайызға аз. Олардың 63,3 пайызы немесе 15,3 млн-ы интернетке қосылған. Тіркелген интернет абоненттер санының да қысқаруы байқалады. Бір жылда олардың саны 1,2 пайызға, 2,5 млн абонентке дейін азайды. Ұялы байланыс және тіркелген интернет абоненттері жалпы санының төмендеуіне қарамастан Қазақстанда байланыс қызметтерінің көлемі айтарлықтай ұлғайды. Мәселен, осы жылдың қаңтар-тамызында еліміздің телекоммуникациялық компанияларының байланыс қызметінен алған кірістері жыл ішінде 8,3 пайызға артып, 574,2 млрд теңгені құрады. Өткен жылы 519,9 млрд теңге болған еді. Кірістер өсімінің негізгі себептерінің бірі интернет-провайдерлер мен ұялы байланыс операторлары тарифінің көтерілуі болып отыр. Айталық, биыл тамызда 2019 жылдың тамызымен салыстырғанда интернет тарифі 2,6, ұялы байланыс қызметтері 1,7 пайызға қымбаттады.
Интернет ұсыну қызметі саласындағы телекоммуникациялық компаниялардың кірістері жыл ішінде 13,2 пайызға өсіп, 213,4 млрд теңгеге жетті. Бұл телеком нарығындағы қызметтердің жалпы көлемінің 37,2 пайызын құрайды. Дегенмен, ұялы байланыс қызметтері көлемі де өткен жылмен салыстырғанда 1,5 пайызға артып,151,7 млрд теңгеге жетіп отыр. Оның ішінде халыққа көрсетілетін ұялы байланыс қызметтері ақшаға шаққанда жыл ішінде бірден 5,1 пайызға көбейіп, 108,1 млрд теңгеге жетті.
Өңірлік шекте байланыс қызметтері көлемінің 80 пайызы Алматы мен Нұр-Сұлтан қаласына тиесілі болып тұр. ҚР ҰЭМ Статистика комитетінің мәліметінше, ұялы байланыс көлемі ұялы байланыс операторлары тіркелген мекенжайлар арасында бөлінген. Атап айтқанда, Алматыдағы байланыс қызметтерінің көлемі 336,6 млрд теңгені, ал Нұр-Сұлтанда 121 млрд теңгені құрайды. Сонымен қатар сектордағы қызмет көрсету көлемі бойынша ТОП-5 өңірге Қарағанды (13,8 млрд теңге), Шығыс Қазақстан (13,2 млрд) және Алматы (9,9 млрд) облыстары кіреді.

Қазақстанда интернет пен ұялы байланыс қызметтерінің тарифі қымбаттады

Kyzylorda-news.kz. ҚР Бас мемлекеттік санитар дәрігерінің ҚР мемлекеттік шекарасындағы өткізу пункттерінде коронавирустық инфекция ауруының алдын алу жөніндегі шараларды одан әрі күшейту туралы қаулысы шықты.
Қаулыға сәйкес, 6 қазаннан бастап жолаушылар тасымалындағы тәртіптер өзгеріп, карантиндік талаптар күшейтіледі. Жаңа қаулы тәртібі бойынша, Қазақстан Республикасының азаматтары болып табылмайтын адамдар Қазақстан Республикасының Мемлекеттік шекарасын кесіп өткен кезде кем дегенде 72 сағат бұрын алынған ПТР әдісімен COVID-19-ға тесттен өткені туралы анықтама болмаған жағдайда кіруге жіберілмейді.
Сондай-ақ, Қазақстан Республикасына шетелден авиарейстермен келетін барлық адамдар термометриядан, сауалнамадан өтеді және Қазақстан Республикасының мемлекеттік шекарасын кесіп өткен кезде кем дегенде 72 сағат бұрын алынған ПТР әдісімен COVID-19-ға тесттен өткені туралы анықтаманы ұсынады. &nbsp;
<a href="https://turkystan.kz/article/119838-6-azannan-bastap-karantin-sharalary-k-shejtiledi?utm_source=fb&utm_medium=post&utm_campaign=cpc&fbclid=IwAR2wpkw8bKclG3n3R0ECUrWFxeNLi5fwNkaSvK4u_RRYDgeNO-GeGXHsXkY">Turkystan.kz</a>

Бүгіннен бастап карантин күшейтіледі

Kyzylorda-news.kz. Жаңақорған ауданының әкімі Руслан Рүстемов Шалқия кентінде “Ауыл-ел бесігі” бағдарламасы аясында бой көтеріп жатқан 150 орындық клуб үйінің құрылысымен танысты.
Шалқия кентіндегі клуб үйінің құрылыс жұмыстары туралы «Bolashak INTERNATIONAL DEVELOPMENT” ЖШС өкілі айтып өтті.
<blockquote>
 “Клуб үйінің құрылысы биылғы жылдың маусым айында басталған болатын. Бүгінде ғимараттың бірінші қабатының кірпіші қалануда. Жоба бойынша 2021 жылдың мамыр айында тапсыру жоспарланған”, – деді Қайрат Манарбеков.
</blockquote>
Құрылыс нысанын аралаған аудан әкімі жұмыстар уақытылы жүргізіліп, сапалы болу керектігін ескертті. Сондай ақ, аудан әкімі Руслан Рүстемұлы “Шалқия Цинк ЛТД” АҚ демеушілігімен салынып жатқан кеншілер саябағы мен демалыс аллеясы жұмысымен танысты.
<blockquote>
 “Бүгінде жерін тегістеу жұмыстары басталды және жыл соңына дейін толық аяқталады деп күтілуде. Демалыс орнында тек саялы ағаштар ғана емес, Шалқия тұрғындары үшін түрлі спорттық ойын алаңдары салынатын болады”, – деді кент әкімі Әбдімаулен Кеңесұлы.
</blockquote>
Айта кетейік, биылғы жылдың 28 тамыз күні облыс әкімі Гүлшара Әбдіқалықова «Тау-Кен Самұрық» ҰТК» АҚ басқарма төрағасы Қанат Құдайберген және «Шалқия Цинк ЛТД» АҚ бас директоры Дамир Кәрімнің қатысуымен «Шалқия» кенішінде тау-кен байыту фабрикасын салу жөнінде үшжақты меморандумға қол қойылды. Осы жиында облыс әкімі Гүлшара Наушақызы осы меморандумға сәйкес «Тау-Кен Самұрық» акционерлік қоғамы Шалкия кенішінде бірнеше әлеуметтік нысандар құрылысын жүргізуді жоспарлап отырғанын, әсіресе Шалқия кентіне дейін ұзындығы 6 шақырым жол, Кеншілер саябағы мен аллея және контейнерлік қонақ үй салу арқылы Құттықожа бұлағының аумағын абаттандыру жұмыстарын жүргізуді жоспарланғаны жөнінде айтып өткен болатын.
Меморандум аясында «Тау-Кен Самұрық» акционерлік қоғамы Шалкия кенішінде бірнеше әлеуметтік нысандар құрылысын жүргізу жоспарлануда.
Шалқия кенті тұрғындарының ұзақ жылдар бойы шешімін таппай келген бірқатар түйіткілді мәселелері оң шешімін табуда. Осыған дейін клуб үйінің бөлек ғимараты жоқ, мектептің акт залын пайдаланып келді. 2020 жылдың қаңтар айында мектептің жылу қазандығы табиғи газға қосылды. Сондай ақ, “Ауыл-ел бесігі” бағдарламасы аясында мектепке күрделі жөндеу жүргізіліп, бүгінде ғимараттың ішкі жұмыстары толығымен аяқталды.
<img src="https://kyzylorda-news.kz/wp-content/uploads/2020/10/fb_img_1601953035388.jpg" alt="" />
<img src="https://kyzylorda-news.kz/wp-content/uploads/2020/10/fb_img_1601953045334.jpg" alt="" />

Шалқияда түйіткілді мәселелер оң шешімін табуда

Kyzylorda-news.kz. Қызылордада жүйке ауруымен есепте тұратын 32 жастағы тұрғын үш күннен кейін қаладан 60 шақырым қашықтықта жол бойынан табылды.
Жоғалып кеткен адам қала іргесіндегі Тасбөгет кентінде тұрады. Кенттің 53 жастағы тұрғыны ұлының үйден шығып, кері оралмағанын айтып Қызылорда қалалық полиция басқармасының Төсбөгет полиция бөліміне шағымданған. Айтуынша, баласы жүйке ауруымен есепте тұрады.
<blockquote>
 «Жоғалған адамның жағдайы ескерілді. Полиция бөлімінің жеке құрамы толықтай іздеу жұмысына тартылды. Мобильдік топтар құрылып, жақын аумақтар толықтай назарға алынды. Іздестіру жұмыстары үш күнге созылды. Хабар-ошарсыз кеткен азамат Сырдария ауданына қарасты Шаған ауылының тұсындағы тасжолдың бойынан табылды», – деп мәлім етті Қызылорда облыстық полиция департаментінің баспасөз қызметі.
</blockquote>
<a href="https://www.ktk.kz/kz/newsfeed/article/2020/10/06/160671/">Ktk.kz</a>

Қазақстан және Қызылорда облысының жаңалықтары