<a href="https://kyzylorda-news.kz/">Kyzylorda-news.kz.</a>&nbsp; 2-5 сәуір аралығында Қызылорда қаласында велоспорттан ҚР еңбек сіңірген жаттықтырушысы, ҚР спорт шебері Жетес Сүлейменовтің жүлдесіне арналған республикалық көпкүндік жарыс өтті.
Биылғы жылы алғашқы мәрте ұйымдастырылған жарысқа Нұр-Сұлтан, Алматы, Шымкент қалаларынан және еліміздің он облысынан 15-16 жас аралығында 130 велошабандоз төрт кезең бойынша қатысты.
Төрт кезеңнің қорытындысы бойынша ұлдар арасында батысқазақстандық велошабандоздар Вадим Белугин алтын медаль алса, Жалғас Әбубәкір күміс, Нұр-Сұлтан қаласының спортшысы Вячеслав Сичкарев қола жүлделерді иеленді.
Қыздар арасында Нұр-Сұлтан қаласының спортшылары Елизавета Склярованың мерейі үстем болса, Кристина Габайдулинаға екінші, қызылордалық Аружан Тоқбаеваға үшінші орындар бұйырды.
Жалпы командалық есепте ұлдар арасында:
<ol>
<li>Батыс Қазақстан облысы</li>
<li>Нұр-Сұлтан қаласы</li>
<li>Солтүстік Қазақстан облысы 
Қыздар арасында:</li>
<li>Нұр-Сұлтан қаласы</li>
<li>Қызылорда облысы</li>
<li>Алматы облысы, Талдықорған қаласы 
“Ең жас велошабандоз” – Аружан Тоқбаева (Қызылорда); 
“Жеңіске деген жігері үшін” – Ердәулет Егізбай (Қызылорда); 
“Белсенді велошабандоз” – Данил Зинкевич (СҚО). 
Жеңімпаздар мен жүлдегерлер диплом, медаль, кубок, естелік сыйлықтар және ақшалай сертификаттармен марапатталды. Айта кетейік, 7-11 сәуір аралығында Қызылорда қаласында велоспорттан жастар арасында Қазақстан Республикасының чемпионаты өтеді.</li>
</ol>

Қызылордада велоспорттан республикалық турнирдің жеңімпаздары анықталды

<a href="https://kyzylorda-news.kz/">Kyzylorda-news.kz.</a> Қызылордада 2,5 миллионнан астам қаржыны жымқырған алаяқ әйел ұсталды.
2021 жылдың 3 сәуір күні Қызылорда қалалық Полиция басқармасына қаланың үш тұрғыны хабарласып, ақшасын қайтару бойынша арыз түсірген болатын.
Белгілі болғандай, өткен жылдың желтоқсан айында белгісіз біреу үш азаматшаны алдау арқылы несие алдыртып 2&nbsp;500&nbsp;000 теңге көлемінде материалдық шығын келтірген. Көп ұзамай жәбірленушілер алаяқтан ақшасын қайтаруды талап етеді. Бірақ,&nbsp;ақшаны алдау жолымен иемденген алаяқ қаражатты қайтаруға асықпады.
Жедел-іздестіру шараларының нәтижесінде Қызылорда қаласының 1987 жылғы қала&nbsp;тұрғыны ұсталып,&nbsp;ол өз кінәсін толықтай мойындады. Алаяқтың өзге де қылмыстарға қатыстылығы анықталуда.
Қазіргі таңда күдіктіге қатысты Қазақстан Республикасының Қылмыстық Кодексінің 190-бабы 3-бөлігі 4-тармағы&nbsp; (Алаяқтық, бірнеше рет жасалған алаяқтық) бойынша сотқа дейінгі тергеп-тексеру амадары жүргізілуде. Күдікті уақытша ұстау изоляторына қамаққа алынды.

Қызылордада 3 адамға 2,5 млн теңге несие алдырған әйел ұсталды

<a href="https://kyzylorda-news.kz/">Kyzylorda-news.kz.</a> Бүгін аудан әкімі Мұрат Ергешбаевтың төрағалығымен жұқпалы індеттің алдын алу мақсатындағы жедел штаб отырысы өтті.
Жедел штаб отырысын ашқан аудан басшысы Мұрат Ергешбаев біздің өңірде эпидемиологиялық ахуалдың күрделеніп кеткенін тілге тиек етті.
<blockquote>
 «Барлық жердегі жағдайды өздеріңіз көріп-біліп отырсыздар. Жағдай мәз емес. Күні кеше Қазалы қаласындағы «Өрімтал» балабақшасынан 9 бірдей науқас шықты. Бұл әрине өте қиын жағдай. Сондықтан барлық қауіпсіздік шараларын күшейтуіміз қажет», – деді Мұрат Нәлқожаұлы.
</blockquote>
Мұнан соң аудандық санитарлық-эпидемиологиялық бақылау басқармасының басшысы Гүлсім Имандосова, аудандық полиция бөлімі бастығының орынбасары Еркебұлан Жүрсінбаев аудандағы эпидемиологиялық ахуал және атқарылып жатқан жұмыстар туралы баяндады.
Ал, Қазалы ауданаралық ауруханасының бас дәрігері Бақытгүл Әлішева 3 науқастың жағдайы ауыр екенін білдірді. Осыған орай ауруханада инфекциялық постқа қосымша 2 реанимациялық пост ашылғанын жеткізді.
Басқосуда аудан әкімі Мұрат Ергешбаев дереу арада Қазалы қаласындағы ауру анықталған ошақтар мен 2 балабақша, 3 мектеп, 1 колледж және қала әкімі аппаратының ғимаратынадезинфекция жұмыстарын жүргізуді тапсырды. Сондай-ақ, жалпы аудандағы білім беру ұйымдарын, оның ішінде қаладағы мектептерді бірінші кезекте онлайн оқуға көшіріп, балабақшаларды эпидемиологиялық ахуал тұрақталғанша уақытша жабуды аудандық білім бөлімінің басшысы Әділхан Жөлекешовке тапсырды.
<blockquote>
 «Жұқпалы індеттің алдын алу мақсатында базарлар мен дүкендерде, қоғамдық тамақтану және мейрамханаларда сақтық шараларын қатаң сақталуын қадағалауымыз қажет. Ол үшін мониторингтік топтар белсенді жұмыс істеуі тиіс. Қазіргі таңда қоғамдық көлік жүргізушілерінің көбісі маска тақпайды. Олай болмайды. Себебі облыс бойынша біздің ауданда тіркелген науқастар саны көп болып тұр. Осыны халыққа түсіндіруіміз қажет», – деп аудан әкімі Мұрат Ергешбаев жедел штаб отырысын қорытындылады.
</blockquote>
<img src="https://kyzylorda-news.kz/wp-content/uploads/2021/04/dsc_2982-scaled.jpg" alt="" />
<img src="https://kyzylorda-news.kz/wp-content/uploads/2021/04/dsc_2988-scaled.jpg" alt="" />

Қазалыда эпидемиологиялық ахуал күрделі

<a href="https://kyzylorda-news.kz/">Kyzylorda-news.kz.</a> Бүгін ҚР Индустрия және инфрақұрылымдық даму министрлігі ҚР Цифрлық даму министрлігімен, «Қазақстанның авиациялық әкімшілігі» АҚ, Нұр-Сұлтан және Алматы қалаларының әуежайларымен бірлесіп, Air Astana әуе компаниясының Нұр-Сұлтан-Алматы және Алматы-Нұр-Сұлтан бағыттарындағы рейстерінде цифрлық құжаттарды пайдалану жөніндегі пилоттық жобаны іске қосты, деп хабарлайды ҚР ИИДМ баспасөз қызметі.
Бүгіннен бастап электрондық жеке куәлікті EGOV mobile қосымшасы арқылы көрсетілген әуежайларда тіркеу, тексеру және отырғызу пункттерінде қолдануға болады.
Дегенмен жолаушыларда жеке куәліктерінің түпнұсқасы да болғаны жөн. Өйткені пилоттық жоба кезінде цифрлық құжаттар жолаушының мәртебесін тексерудің балама нұсқасы болады.
EgovMobile-дағы «цифрлық құжаттар» қызметімен генерацияланған QR-code есептеу бойынша Е-document бағдарламалық қамтамасыз ету жүйесі Нұрсұлтан Назарбаев халықаралық әуежайымен бірлесіп әзірленді.
Жоба Мемлекет басшысының жеке куәліктер, дипломдар мен құқықтарды электрондық түрде беру жөніндегі процестерді цифрландыру және мемлекеттік органдардың жұмысына енгізу жөніндегі тапсырмасын орындау мақсатында енгізілді.

Қазақстандықтар ұшаққа қағаз құжаттарсыз отырғызылатын болды

<a href="https://kyzylorda-news.kz/">Kyzylorda-news.kz.</a>&nbsp; Футболдан Премьер-лига командалары арасындағы Қазақстан біріншілігінің 3 турында «Қайсар» сырт алаңда «Тұранмен» кездесті.
Түркістан қаласындағы стадионда өткен ойында командалар бір-бірімен тайталасқа түсті. Ойын соңына таблодағы есеп өзгеріссіз тұрған еді.
Тоқсан минут түгесілген тұста алаң иелері сапынан Темірлан Әміров мергендік танытты. Арада екі минут өткенде қызылордалық жартылай қорғаушы Арман Кеңесов «Тұран» қақпашысы А. Пасеченконы қапы қалдырып, таразы басын теңестіріп кетті. Осылайша кездесу барысында 1:1 есебі тіркелді.
Қызылордалық клуб жаңа маусымдағы алғашқы ұпайына қол жеткізді. Енді «Қайсар» 9 сәуірде өз алаңында Ақтаудың «Каспийін» қабылдайды.

9 сәуірде «Қайсар» өз алаңында Ақтаудың командасын қабылдайды

<a href="https://kyzylorda-news.kz/">Kyzylorda-news.kz.</a>&nbsp; 6-8 сәуірде Қазақстанның кейбір өңірлеріне жазғы жылу келеді, басқаларында салқын ауа райы мен жауын-шашын сақталады. Бұл туралы&nbsp;“Қазгидромет” синоптиктерінің мәлім етті.
Солтүстік Қазақстанда циклонның әсерінен тұрақсыз ауа райы сақталады. Кей жерлерде көктайғақ, найзағай және бұршақ күтіледі.
Еліміздің оңтүстігінде жауын-шашынсыз жылы ауа райы қалыптасады.
Синоптиктердің болжамынша, оңтүстік-батыста шаңды дауыл күтіледі, бірақ күн&nbsp;жылы болады.
Қазақстан бойынша кей жерлерде тұман түсіп, жел күшейеді.

Қазақстанның кейбір өңірлеріне жазғы жылу келеді

<a href="https://kyzylorda-news.kz/">Kyzylorda-news.kz.</a> Білім және ғылым министрлігі мемлекеттік гранттар конкурсына қатысуға мүмкіндік беретін ҰБТ-тың шекті ұпайы қандай мамандық бойынша өзгергенін жариялады, деп хабарлайды&nbsp;<a href="https://sputnik.kz/">Sputnik Қазақстан</a>. &nbsp;
Жоғары және жоғары оқу орнынан кейінгі білім департаментінің директоры Әділет Тойбаевтың айтуынша, биыл педагогикалық мамандықтар бойынша ғана шекті ұпай көтерілді. Басқа ешқандай өзгеріс жоқ. &nbsp;
<blockquote>
 “Шекті балдар қатты өзгерген жоқ. Біз педагогикалық мамандықтар бойынша ғана шекті ұпайды көтеріп отырмыз, кем дегенде 75 балл жинау керек. Бұл шешімнің негізгі мақсаты – болашақ педагог мамандардың сапасын арттыру. Басқа бағыттарда ешқандай өзгеріс жоқ”, – деді Тойбаев орталық коммуникациялар қызметінде өткен онлайн брифингте.
</blockquote>
Оның айтуынша, бүгінде шекті ұпай саны – 50. Ал ұлттық университеттерде – 65 балл. Сосын ветеринария бағыты бойынша шекті ұпай 60 балға дейін көтерілген болатын. &nbsp;
<blockquote>
 “Бұдан бөлек, денсаулық сақтау саласы бойынша кем дегенде 65 ұпай жинау керек. Әзірге ең жоғары шекті балл педагогикалық мамандықтарға белгіленіп отыр”, – деп атап өтті Тойбаев.
</blockquote>
Айта кетейік, биыл ҰБТ электронды форматта өтеді. Мерзімі – үш ай (сәуір, мамыр мен маусым). Мектеп түлектері тест тапсыру уақыты мен орнын өздері таңдайды. Ал тест нәтижесі жұмыс күнінің соңында емес, тест аяқталған бойда жарияланады. &nbsp;Апелляцияны 30 минуттың ішінде беруге болады. Биылғы ҰБТ-ны екі рет тапсыруға мүмкіндік беріліп отыр.&nbsp; &nbsp;
Пәндердің саны бұрынғыдай қалады. Олар – үш міндетті және екі таңдау бойынша бейіндік пән. Тестілеу тапсырмаларының саны да өзгермейді – 120 тапсырма. Ал ең жоғарғы балл – 140. ҰБТ-ны тапсыруға төрт сағат беріледі.

ҰБТ: Мұғалім мамандығын таңдаған талапкерлердің шекті ұпайы жоғары болады

<a href="https://kyzylorda-news.kz/">Kyzylorda-news.kz.</a> Аймаққа республикалық бюджет есебінен алты мыңнан астам ветеринариялық препарат кезең-кезеңімен әкелінуде. Бүгінде 4 мыңға жуық дозасы келді. Қазір эпизоотиялық ауруларға қарсы екпе егу жұмыстары жүргізілуде.
Бұл туралы Өңірлік коммуникациялар қызметінің ақпарат алаңында өткен брифингте облыстық ветеринария басқармасының басшысы Ерсұлтан Апетов мәлімдеді. 
Өткен жылы тіркелген жоғары патогенді құс тұмауы ауруының алдын-алуға қажетті ветеринариялық дәрі-дәрмектер де бөлініп отыр.
<blockquote>
 «Былтыр еліміздің кейбір аймақтарында жоғары патогенді құс тұмауы ауруы тіркелуіне байланысты іс-шаралар жоспары бекітіліп, соған сәйкес облыста да жұмыстар атқарылуда. Қазіргі таңда, 67,5 мың үй құсына екпе егу жұмыстары жүргізілді. Бұған қоса, биыл бруцеллез ауруына қарсы 125,5 мың бас мүйізді ірі қара, 77,4 мың бас уақ мал диагностикалық тексеруден өтті. Нәтижесінде 9 бас МІҚ, 20 бас уақ малдан ауру анықталды. Барлығы ветеринариялық-санитариялық талаптарға сәйкес сойылды. Айта кететін жайт, бруцеллез аурына шалдығып, сойылған малдың иелеріне өтемақы төленеді», – деді Ерсұлтан Амантайұлы.
</blockquote>
Брифингте басқарма басшысы ауыл шаруашылығы жануарларын бірдейлендіруге қажетті жұмыстардың жүргізіліп жатқанына да тоқталды. Қазіргі таңда, дерекқор жүйесіне 362,9 мың бас МІҚ, 723,4 мың бас уақ мал, 170,1 мың бас жылқы, 51,9 мың бас түйе, 1,4 мың бас шошқа, 832 бас тақтұяқты тіркелген.
Айта кетейік, әртүрлі жұқпалы және паразитарлық аурулардың алдын алу мақсатында 6714 бас қаңғыбас ит пен жабайы мысықтар ауланып жойылды. Облыста эпизоотиялық ахуал тұрақты.

Қызылордада эпизоотиялық ауруларға қарсы екпе егу жұмыстары жүргізілуде

<a href="https://kyzylorda-news.kz/">Kyzylorda-news.kz.</a> Тестілеу нәтижелері ҰБТ аяқталғаннан кейін бірден қолжетімді болады. Бұл туралы ҚР БҒМ жоғары және жоғары оқу орнынан кейінгі білім департаментінің директоры Әділет Тойбаев айтты, деп хабарлайды ҚазАқпарат.
«Тағы бір артықшылығына тоқталсақ, тест нәтижесі жұмыс күнінің соңында емес, тестілеу нақты аяқталғаннан кейін бірден сол жерде қолжетімді болады. ҰБТ нәтижелерімен келіспеген жағдайда талапкер апелляцияға сол күні, яғни 30 минут ішінде өтініш беруге құқылы», – деді Ә. Тойбаев Орталық коммуникациялар қызметінде.
Білім министрлігінің мәліметінше, электронды ҰБТ нәтижелерін өңдеу барысында парақтағы ішінара боялған жауаптардың есептелмей қалуы сияқты техникалық қателердің болуы мүмкін емес. Тестілеудің бұл форматында оқушылар жауап парағын толтыруға уақыт жұмсамай, бұл уақытты тест тапсырмаларын орындауға пайдалана алады. Компьютерлік тестілеудің тағы бір артықшылығы – ҰБТ нәтижелерін тестілеу аяқталғаннан кейін бірден білуге болады. Тестілеу қорытындысы бойынша жиналған ұпай саны экранға шығарылады. Сондай-ақ ҰБТ қатысушысы қандай сұрақтарға қате жауап бергенін бірден көре алады.
Таратылған мәліметке қарағанда, тестілеуге 4 сағат (240 минут) беріледі. ҰБТ нәтижесі бойынша талапкерлер ең жоғары 140 балл жинай алады.

ҰБТ: Тест нәтижесі бірден шығарылады

<a href="https://kyzylorda-news.kz/">Kyzylorda-news.kz.</a>&nbsp; Ауыр атлетикадан жекелеген жаттығулар бойынша 17 жасқа дейінгі жасөспірім ұлдар мен қыздар арасында Қазақстан Республикасының чемпионаты “ZOOM” бағдарламасы бойынша онлайн жүйеде өтті.
Ел чемпионатына Алматы, Шымкент (Нұр-Сұлтан қаласынан басқа) қалаларынан жəне барлық облыстардан 400 спортшы 20 салмақ дəрежесінде шеберлік байқасты.
Жарыс нəтижесінде облыс құрамасы 6 алтын, 5 күміс, 3 қола медальмен жалпыкомандалық есепте бірінші орынды иеленді. 
Екінші орынды – Қарағанды, үшінші орынды – Алматы облысының командалары еншіледі.
Жекелей есепте Алтынай Тәңірбергенова (55 келі), Таисия Алексеева (59 келі), Әлфараби Жауынтаев (61 келі), Нұрай Құрманбай (64 келі), Омар Файзыбаев (102 келі), Дәуірбек Аймырза (+102 келі) Қазақстан жеңімпазы атанды.
Салтанат Қыпшақбай (45 келі), Нұрасыл Орнықбай (61 келі), Ерасыл Сәулебеков (67 келі), Сара Бегмат (76 келі), Икрам Жылқайдаров (89 келі) күміс жүлделерге ие болды.
Қайсар Пернебек (49 келі), Аянат Жұмағали (59 келі), Нұрай Балжігіт (81 келі) қола жүлделерді иеленді.
Айта кетейік, Алтынай Тәңірбергенова “Қазақстан Республикасының халықаралық дәрежедегі спорт шебері” нормативін орындаса, Аянат Жұмағали, Салтанат Қыпшақбай, Нұрасыл Орнықбай, Таисия Алексеева, Рүстем Ербосынов, Нұрдос Сабыр “Қазақстан Республикасының спорт шебері” атағына қол жеткізді.

Қызылордалық зілтеміршілер Қазақстан жеңімпазы атанды

<a href="https://kyzylorda-news.kz/">Kyzylorda-news.kz.</a> Жазушы Қабдеш Жұмаділов 85 жасқа қараған шағында дүниеден өтті. Қаралы хабарды&nbsp;Қазақстан жазушылар одағы төрағасының бірінші орынбасары Ақберен Елгезек растады.
Жазушы Қабдеш Жұмаділов 1936 жылы 24-сәуірде Қытайдың Шыңжаң өлкесі, Тарбағатай аймағы, Шәуешек ауданында дүниеге келген.
Қабдеш 1949-жылы Шәуешектегі жеті жылдық қазақ мектебіне оқуға түседі. 1952-1956 жылдар аралығында алдымен Шәуешек гимназиясында, одан соң 1956 жылы Қытай үкіметінің жолдамасымен Қазақ Мемлекеттік университетінің физика факультетіне оқуға қабылданады. Алайда, 1958 жылы Қытай үкіметі оны кері шақыртып сол кездегі Қытайдағы саяси науқандарға байланысты жазушыға “ұлтшыл” деп айып тағады. Жұмаділов осылайша жастайынан саяси қуғын-сүргінге ұшырайды. Бірақ 1962 жылы Шыңжаңнан ауған қазақ жастарымен бірге Қазақстанға оралады.
Боданға шыққан жас талант Қазақ Мемлекеттік университетіндегі оқуын қайта жалғастырып, оны 1965 жылы тәмамдайды. Еңбек жолы 1965 – 67 жылдары «Қазақ әдебиеті» газетінде басталады. Одан соң 1967 – 76 жылдары «Жазушы» баспасында, кейін 1976 – 81 жылдар аралығында Қазақстанның «Баспа, полиграфия және кітап саудасы істері» жөніндегі мемлекет комитетінде қызметте болады. Ал, 1981 жылдан бастап жеке шығармашылық жұмыстарымен айналыса бастайды.
Оның алғашқы өлеңдері 1954 жылдан бастап жергілікті баспасөз бетінде жарық көрген. “Жамал” атты тырнақалды әңгімесі 1956 жылы Үрімжідегі «Шұғыла» журналында жарияланды. Содан бері Жұмаділовтың шығаршылығы тарихи роман, повесть, әңгімелермен толығып, қазақ әдебиетінің мұрасын байытып келеді. Атап айтқанда, оның «Жас дәурен» атты өлеңдер жинағы, «Қаздар қайтып барады», «Сары жайлау», «Шарайна», «Сәйгүліктер» атты әңгіме, повесть жинақтары, «Көкейкесті», «Соңғы көш» «Бақыт жолында», «Атамекен» тағы басқа еңбектері оқырман жылы қабылдаған туындылар деуге болады.
Жазушы Тағдыр романы үшін Қазақстан Республикасының Абай атындағы Мемлекеттік сыйлығына ие болды. Ал, 1998-жылдың 23-інші қазанында Президент Нұрсұлтан Назарбаевтың жарлығымен Қабдеш Жұмаділовке «Қазақстанның халық жазушысы» құрметті атағы берілді.
Қабдеш Жұмаділовтің көптеген шығармалары шетел тілдеріне аударылып, орыс, украин, беларусь, өзбек, ұйғыр, қырғыз тілдерінде жарық көрген.

Қазақстанның халық жазушысы Қабдеш Жұмаділов өмірден өтті

<a href="https://kyzylorda-news.kz/">Kyzylorda-news.kz.</a>&nbsp; Ресей Федерациясының жалдау шартындағы Байқоңыр қаласының прокуроры Нұржан Рахметов өз қалауымен қызметінен кетті.
Ол бұл туралы өзінің&nbsp;<a href="https://www.facebook.com/permalink.php?story_fbid=1348727515513281&id=100011281350801">Facebook</a>&nbsp;парақшасында хабарлады.
<blockquote>
 “Құрметті достар, әріптестер және туыстар! Мен Байқоңыр қаласының прокуроры қызметінен ғана емес, жалпы прокуратура жүйесінен кеткенімді хабарлаймын!”, – деп жазды ол.
 “Бұл менің саналы қадамым. Мен ұзақ уақыт ойланып, осындай шешім қабылдадым. Бұл мен үшін қиын болды. Дегенмен, алға жылжудың уақыты келді. Өзімді мүлдем жаңа нәрседе сынап көрейін деп өз таңдауымды жасадым”, – деді экс-прокурор.
</blockquote>
Байқоңыр прокуроры болып жұмыс істеген екі жыл ішінде құрмет пен сенімділікті сезіне білген жергілікті тұрғындар Рахметовке жүздеген пікір жазып, оған сәттілік тіледі.
2017 жылдан бастап бас прокуратураның байланыс тобы бас прокурорының аға көмекшісі қызметін атқарды.
Нұржан Рахметов Байқоңыр қаласының прокуроры қызметіне 2019 жылдың мамырында тағайындалды.
<img src="https://kyzylorda-news.kz/wp-content/uploads/2021/04/107894120_1154533184932716_3287438018287811450_n.jpg" alt="" />

Қазақстан және Қызылорда облысының жаңалықтары