Kyzylorda-news.kz. Бүгін Қызылорда облысының әкімі Гүлшара Әбдіқалықова Кеңес Одағының батыры, Еңбек және соғыс ардагері Жәлел Қизатовтың 100 жылдығына орай ескерткіш бюстіне гүл шоғын қою рәсіміне қатысып, рухына тағзым етті.
Шараға мемлекет және қоғам қайраткері, академик Бақберген Досманбетов, Қазақ Білім академиясының академигі Бүркітбай Аяған мен Ж.Қизатовтың туыстары қатысты. Олар батырдың елі үшін атқарған еңбегін ерекше атап өтті. Өз кезегінде арда азаматтың ұлы Көмекбай Қизатов тұлғаны құрметтеп, игі шара өткізіп жатқан Сыр жұртшылығына алғысын жеткізді.
Жиында аймақ басшысы Кеңес Одағы батырының өмір жолы өскелең ұрпақ үшін үлгі-өнеге екенін атап өтті.
<blockquote>
 «Қоғам қайраткері, батыр, ұлтжанды тұлға Жәлел Қизатов есімі өзінің туған жерінде ғана емес, Сыр елінде де құрмет төрінде аталады. Қызылжардағы және Есіл ауданының орталығы Явленка ауылындағы көшелерге, өзі білім алған ауыл шаруашылығы техникумына батырдың есімі берілген. Туған ауылы Қарағайда бюсті орнатылып, мұражай бұрыштары жасалған. Туған жеріміздің дамуында өзіндік қолтаңбасы қалған батыр тұлғаға деген шынайы құрметіміз ретінде Қызылорда қаласының көшесі және №23 мектеп лицейіне батыр есімі беріліп, ескерткіш бюсті орнатылды. «Жақсының аты өшпейді» дегендей, тау тұлға азаматтарымыздың атын ардақтап, келер ұрпаққа үлгі етіп отыру мақсатынан жаңылмақ емеспіз. Елін шын сүйе білген өз ұлтының асыл перзенті, патриоты, ерліктің эталоны Жәлел Қизатовтың есімі мәңгі есте сақталады», – деді Гүлшара Әбдіқалықова.
</blockquote>
Жәлел Қизатов 1920 жылы 9 қазанда Солтүстік Қазақстан облысында дүниеге келген. Ұлы Отан соғысында от пен оқтың ортасынан аман-есен оралып, 1944 жылы Днепр өзені үшін болған шайқастағы асқан ерлігі үшін Кеңес Одағының Батыры атанып, бейбіт күнде елі үшін еңбек етті. Еңбек және соғыс ардагері 1968 жылы Сыр өңіріне келіп, халқының батырға деген құрметіне, ілтипатына бөленіп, тұрақтап қалды. Қызылорда облыстық астық өнімдері басқармасының бастығы, облыстық табиғатты қорғау қоғамы төралқасы төрағасының орынбасары, төрағасы қызметтерін атқарды. Облыс экономикасын дамытуға, әсіресе, ауыл шаруашылығы мен өңдеуші өнеркәсіп саласына елеулі үлес қосты.

Гүлшара Әбдіқалықова: Ерліктің эталоны Жәлел Қизатовтың есімі мәңгі есте сақталады

Kyzylorda-news.kz. Қызылорда облысының 35 жастағы тұрғыны «Атырау қаласындағы мұнай компаниясына туысқандарыңды жұмысқа орналастырып беремін» деген желеумен қала тұрғынынан алаяқтық жолмен 13 миллионнан астам ақшасын алдап алған.
Аталған дерек бойынша Қазақстан Республикасы Қылмыстық кодексінің 190-бабының 4-бөлігі бойынша (алаяқтық) сотқа дейінгі тергеп-тексеру жүргізілуде. Оқиғаның мән-жайы анықталуда.
Бүгінгі күнге алаяқтық қылмыстарының алдын алу, болдырмау бағытында тиісті іс-шаралар атқа¬рылуда. Полицейлер тарапынан облыс тұрғындарына түсіндіру жұмыстары жүргізіліп, алаяқтардың арбауына түсіп қалмау жайлы қандай сақтық шараларын сақтау керектігі түсіндірілуде. Осы мақсатта халыққа қызмет көрсету орындары мен базарларда, сауда орталықтарында плакаттар жапсырылып, жаднамалар таратылды.
Қызылорда облысының Полиция департаменті облыс тұрғындарына алаяқтардың құрбанына айналмас үшін қарапайым ғана ұқыптылықты ұстану, жоғары кепілдік кіріс уәделеріне сенбеу және ақша, бағалы заттар мен мүлікті күмәнді адамдарға немесе компанияларға тапсырмау керектігін ескертеді.

Қызылордада 13 млн теңгені алған алаяқ тұрғын ұсталды

<a href="https://kyzylorda-news.kz/">Kyzylorda-news.kz.</a> Сөзді және сөздердің жиынтығы – тілдің сөздік құрамын зерттейтін сала -лексикология, ал сөздіктерді түзудің теориясымен және практикасымен шұғылданатын тармақ – лексикография деп аталатыны мәлім.
Осы салалардың зерттеу нысандары мен әдістері әбден нақты анықталған болса да, зерттеу объектісіне қатысты болғандықтан, бірқатар жайттарды ескерген жөн.
Әрбір тілдің сөздік құрамындағы сөздер қаншама көп және алуан түрлі болғанымен, олар бір-бірімен байланысты, өзара шарттас элементтердің жүйесі ретінде өмір сүреді және дамиды.
Лексикология – лексикалық және семантикалық топтарын, осы топтардың арасындағы парадигмалық және синтагмалық қарым-қатынастарды, әрбір топтағы нақты бір лексикалық тілдік бірліктің басқа тілдік бірліктермен ара салмағын, соларға қандай қатысы бар екендігін, семантикалық қарама-қарсылықтарды (синонимдер мен антонимдер және сөздің көпмағыналылығы) қарастыратыны да белгілі.
Дегенмен лексикология саласының басты міндеттерінің бірі – тілдік бірлік ретіндегі сөздің мағынасын, сөз мағыналарының әртүрлі типтерін, сөз бен ұғым арасындағы қарым-қатынасты және байланысты зерделеу. Бұл мәселелер сөздің мағынасымен, сөздің тілден тыс құбылыстарды жеткізуге қабілеттілігін қарастыратын семасиология ғылыми тармағымен байланысты. Өйткені сөз тілден тысқары тұрған құбылысты, зат-бұйым, ұғым-түсінікті атай отырып, осы құбылыстар мен түсініктердің тілден тысқары тұрған ақиқат шындықпен қарым-қатынасын бейнелейді.
Лексикология саласы ішкі тармақтарға бөлінеді, соның бірі – жоғарыда аталған семасиология саласы болса, тағы бір ішкі тармағы ретінде неология саласын атауға болады. Соңғы жылдары неологиялық серпіліс әсіресе қоғамдық өмір мен тілдегі өзгерістерге тез әсер ететін публицистикада, бұқаралық ақпарат құралдарының тілінде және әдеби сында анық байқалады.
ХХ ғасырдың соңғы ширегін неологиялық серпіліс кезеңі деп атаушылар да кездеседі. Бұл жайдан жай емес. Тілдің жаңғыруы немесе тілдегі неология үдерісі – тіл жүйесінің жалпы даму компонентінің бірі. Ең алдымен неология саласының әлемдік лингвистикада зерттелуіне тоқталайық. Бұл мәселеге орыс ғалымдары ХХ ғасырдың екінші жартысында мән бере бастады. А.А. Брагинаның, Р.А. Будаговтың, Н.И. Фельдманның, В.Г. Гактың еңбектерінде негізгі мәселелер айтылды. Бұл зерттеулерден «сөздік құрамның баюы үздіксіз жүріп отырады; жаңа ұғымды білдіретін сөздер неологизмдер деп аталады; олар жалпы қолданысқа түсіп, тілде бекіп, неологизм сипатынан айрылады» деген дәстүрлі және кейінгі теориялық-практикалық пікірлерге тіреу болған анықтамаларды кездестіреміз.
Орыс тіл білімінде Ю.С. Сорокин мен Н.З. Котелованы орыс тіліндегі жаңа сөздердің неографиясын қалыптастырған ғалымдар деп есептеуге болады, олар И.А. Бодуэн де Куртенэ, А.А. Потебня, Л.В. Щерба, А.М. Селищев, сияқты лингвистердің көзқарастарын басшылыққа алып, жаңа сөздердің лексикографиялық реттелуінің негізін салды.
ХХ ғасырдың орта тұсынан бастап қазақ лингвистикасында ұлт тілінің салыстырмалы тарихи парадигмада зерттелуіне айрықша көңіл бөлінді, көне тарихи ескерткіштердің тілі, қазақ әдеби тілінің қалыптасуы, алғашқы баспасөз тілінің ерекшеліктері туралы іргелі зерттеулерде тілдің сөздік құрамындағы жаңалықтар, жаңа тілдік бірліктер туралы айтылып отырды. Өткен ғасырдың 70 жылдарынан бері қарай сөздіктердің түрлерінің (нормативті сөздіктер, фразеологиялық сөздік, синонимдер сөздігі, екітілді сөздіктер) жарық көруі қазақ тілінің сөздік құрамына енген жаңа сөздердің бірқатарының тіркелуіне жол ашты.
1966-1986 жылдар аралығында жүргізілген сөз мәдениетіне қатысты іс-шаралар да (сөз мәдениетіне, әдеби нормаға, емле мәселелеріне арналған ғылыми-практикалық конференциялар; баспа орындарында, редакцияларда, білім беру орындарында жүргізілген семинарлар; радио мен теледидардан ұйымдастырылған арнайы хабарлар; ғылыми-көпшілік мақалалар) қазақ тіліндегі жаңа сөздердің біршама сипаттарын нақтылай түсуге үлес қосты. Қазақ лингвистикасындағы жоғарыда аталған басқа ғылыми салалардың шеңберінде жаңа сөз мәселесі қалайша баяндалды деген мәселеге тоқталуға болады.
Қазақ әдеби тілінің тарихын зерттеген ғалым Р. Сыздықова 1917 жылға дейін жарық көрген екітілді сөздіктерде экономикаға, мәдениетке, сауда-саттыққа байланысты орыс тіліндегі ұғымдардың қазақша баламалары берілгенін айтып, төмендегі сөздерді көрсетеді: өсім (процент), қарыз (долг), кіреу (заклад), қарақша (медные деньги), қадақ (фунт), мысқал (золотник), саттық (продажный), қолсаудалы (покупка), ептестік (товарищество), көтерме (комиссионерство), бас сату (совсем продать), бас алу (совсем купить), қызыл үй (станция), от қайық (пароход). Осы еңбегінде ғалым мақаланың тақырыбына тікелей қатысты болмаса да, жаңа сөздердің фиксациясы, нормалануы жайында да пікір білдіреді.
Қазақ тіліндегі мерзімді баспасөз беттерінің тілдік-стильдік ерекшеліктері жөнінде теориялық түйіндер берген ғалым Б. Әбілқасымов алғашқы қазақ газеттеріне тән лексиканың сипаты жөнінде тұжырым жасайды: біріншіден, кірме сөздерді төрт тақырыптық топқа бөлуге болады, олар негізінен араб-парсы, орыс тілдерінен енген – экономикамен, әкімшілік басқарумен, заң және қоғамдық мәдениетпен байланысты терминдерді құраса, екіншіден, олардың көпшілігі тілге ауызекі сөйлеу арқылы ене отырып, газет беттерінде қазақ тілінің фонетикалық заңдылығына сәйкес өзгерістерге ұшырады, айталық, десатина (десятина), йорманка (ярмарка), копес (купец), рисле (рельс), анбар (амбар) және т.б. Дегенмен бұлардың дыбыстық жағынан бірнеше варианттары да болды, кейін келе олардың біреуі әдеби тілге енді: йармонка, жәрменке, йарманка, жәрмінке, йармінке, жәрменке.
1980 жылдар кезіндегі ғылыми пікір бойынша «лексикология – қазақ тіл білімінің жаңа саласы, оның зерттелмеген проблемалары көп; оның бір ішкі тармағы – лексиканың қат-қабаттары» дей келіп, зерттеуші А. Әбдірахманов «қазақ тіліндегі түркі тілдеріне ортақ сөздердің, басқа тілден ауысқан сөздердің… кәсіби не терминдік сөздер мен жаңа сөздердің зерттелмей келе жатқандығын» айтқан болатын. Сонымен қатар ол қазақ тіліне енген кірме сөздер тобының (араб-парсылық, орыс тілі сөздері) жақсы зерттелгенін көрсетеді. Ендеше, қазақ тіліндегі кірме сөздердің «тілдегі жаңалық» ретіндегі ену мерзімі, таралу кеңістігі, орнығу нормасы туралы тұжырымдар бар деуге болады. Қазақ тіліндегі жаңа сөздер мәселелері К. Ахановтың еңбектерінде айтылған.
Өткен ғасырдың 80 жылдарына дейін лексикография саласының дамуы мен қалыптасуы бойынша қорытулар жасалған еңбекте алдағы атқарылатын іс-шаралардың қатарында шет тілдері сөздігін, салалық сөздіктерді шығару, нормативті сөздіктерде берілетін сөздердің нормалануы аталған. 1980 жылдарға дейін қазақ әдеби тілінің лексикалық құрамының толығуында тілдің ішкі ресурстарынан гөрі орыс тілінен және орыс тілі арқылы басқа тілдерден енген сөздердің рөлі басым болғандығын көрсетеді.
Тілдің лексикалық құрамы әрдайым толығып отырады, сыртқы факторлардың әсері белгілі бір тілдің сөздік құрамын әрдайым қозғалысқа түсіріп отырады. Қазақ тілі сөздік құрамының диахронды-синхронды сипаттарына осындай жағдай тән, алайда алдыңғы кезеңдерде тілдің толығуы мен жетілуі арнайы қарастырылмай, жоғарыда айтқанымыздай, тіл ғылымының басқа мәселелеріне қатысты мәлімет түрінде көрініс тапқан.
Зерттеуші Р. Сыздық «сыртқы факторлардың ықпалымен сөздік қазынаның молығуының үш-төрт үлкен кезеңі болғанға ұқсайды, алғашқы кезең ХҮІІІ ғасыр болар» дей келіп, сол дәуірдегі қоғам өзгерістеріне қарай пайда болған жаңа сөздер ретінде, тарихи романдардың тіліне сүйене отырып, әскери терминдерді атайды (шыңдауыл, торуыл, күлдірмамай).
Жаңа сөздердің қосылуына келетін болсақ біздің ойымызша, ХХ, ғасырдың бас кезінде жаңа ұғымдар мен түсініктердің қазақша атауларын тілге әкелуде және қалыптастыруда жеке тілдік тұлғалардың (сол кезеңдегі қазақ зиялыларының – ғалымдардың, ақын-жазушылардың, білімдар адамдардың) рөлі үлкен. Сол тұста қазақ тіліне қосылған жаңа сөздердің нақты авторлары белгілі. Р. Сыздық қазақ ғалымдары Қ. Жәленовтің, А. Байтұрсынұлының, Х. Досмұхамедовтің, Қ. Кемеңгеровтің, Ж. Аймауытовтың, М. Жұмабаевтың, Ж. Күдериннің оқу-ағарту әдебиеттерін жасау арқылы гуманитарлық және жаратылыстану ғылымдары бойынша жаңа тілдік бірліктерді сөздік құрамға қосқанын атаған. Сонымен қатар 1926 жылы шыққан «Орысша-қазақша әскерлік атаулары» сөздігінің материалдары да әскери салаға да жаңа тілдік бірліктер қосылғанын көрсетеді. Мұндай құбылыс, яғни жаңа сөздің авторының белгілі болуы (мерзімді баспасөзде 1995 жылдардан бастап қолданысқа түскен «көзқаман» сөзінің авторы Р. Бердібаев екендігі туралы мәлімет берілген болатын) кейінгі кезеңдерде байқала бермейді, тілдің сөздік құрамындағы «жаңа» сипаты бар сөздердің қосылуы жазба тілге, ішінара ауызекі сөйлеу тіліне байланысты. Жазба тіл дегенде, әсіресе ғылым-білімнің терминологиясын қазақыландыру, заңнамалық құжаттарды, оқу-ағарту әдебиетін, көркем әдебиетті қазақ тіліне аударудың ықпалы зор болып отыр.
Қазақ тіліндегі жаңа сөздерді тіркеуге арналған тағы бір еңбек – «Қазақ лексикасындағы жаңа қолданыстар» атты жинақ. Бұл «сөздікке тілімізде соңғы 15-20 жыл ішінде пайда болып қолданыла бастаған жаңа тұлғалар мен тіркестер және мағынасы жаңғырған сөздер енгізілді. Сондықтан бұдан 20-25 жылдай бұрын еніп, қазіргі күнде едәуір тұрақталып қалған аялдама, балмұздақ, жемшөп сияқты кезінде жаңалық болған сөздер бұл сөздікте» қамтылмаған.
Соңғы басылымы 1992 жылы жарияланған «Жаңа атаулар» сөздігінің материалдарына қарағанда, қазақ әдеби тілінің сөздік құрамына жаңа сөздердің молырақ енген кезі өткен ғасырдың 70 жылдарының орта тұсынан басталған сияқты. Осы сөздікте «жаңа» деп белгіленген сөздің ең арғы датасы – 1970 жылға тиесілі.
Жоғарыда аталған 1990 және 1992 жылдары жарық көрген екі жинақ қазақ тіліндегі жаңа сөздерді тіркеу ісіндегі маңызды еңбектер болып табылады.
Қорыта келгенде, қазақ неологиясы мен неографиясының өзекті мәселелерін тілдің динамикалық сипатының шеңберінде зерттеу маңыздылығы туралы нақты нысан қарастырылуы керек.
Талғат Рамазанов,
Әл-Фараби атындағы Қазақ Ұлттық Университетінің «Филология және әлем тілдері» факультетінің аға оқытушысы.
Анелья Князбай,
Әл-Фараби атындағы Қазақ Ұлттық Университетінің «Филология және әлем тілдері» факультетінің 2 курс студенті.

Қазақ тілі:   Неология және неография

Kyzylorda-news.kz. Қашықтан оқытуға қажет электронды құрылғылар үшін республикалық бюджеттен қаржы бөлініп, Қызылорда облысына 22 мың компьютерлік техника алынады.
Қыркүйек айының алғашқы аптасында 1500 дана компьютерлік құрылғы жеткізілді. Бұл техникалар аз қамтылған, көп балалы отбасы балалары мен ерекше білім беруді қажет ететін оқушыларға таратылып берілуде.
Айта кетейік, бұл құрылғылар қайтарымды түрде, оқушыларға уақытша беріледі. Қашықтан оқыту аяқталған сәтте электронды техникалар мектеп балансына өтеді. Ал, өткен аптада тағы 5000 дана компьютерлік құрылғылар жеткізіліп, қазірде мектептерге таратылуда. Оның 700 данасы компьютер, 4300 данасы планшет. Қалған компьютерлік құрылғылар қазан айының аяғына дейін кезең-кезеңімен жеткізіледі.

Қызылорда облысына 5 мың электронды құрылғы келді

Kyzylorda-news.kz. Қызылорда қаласы әкімдігі жанынан құрылған мобильді топ мүшелері санитарлық талаптарды сақталуын қамтамасыз ету мақсатында бір қатар нысандарды аралады.
Топ өкілдері Ахмет Байтұрсынов көшесінде орналасқан “Кино тайм” орталығындағы карантин талаптарын сақтамағаны үшін кәсіп иесіне анықтама толтырылып құзырлы органдарға жолданды.
Бүгінде мониторингтік топ тарапынан рейд жұмыстары барысында 10 000-ға жуық нысан араланды. Санитарлық талаптарды сақтамаған жалпы 244 нысан бойынша анықтама қалалық тауарлар мен көрсетілетін қызметтердің сапасы мен қауіпсіздігін бақылау басқармасына жолданды. Жалпы құзырлы орган тарапынан карантин режимін сақтамаған 130 тұлғаға әкімшілік хаттама толтырылып, оның ішінде ҚР “Әкімшілік құқық бұзушылық туралы” Кодексінің 462 бабы, 3 тармағында 3 тұлғаға және осы кодекстің 425 бабы, 1 тармағымен 127 тұлғаға шара көрінді.
Өз кезегінде, бекітілген қаулы талаптары мониторингтік топ тарапынан күнделікті қадағаланып, бұл жұмыстар жүйелі түрде жүргізілмек.
<img src="https://kyzylorda-news.kz/wp-content/uploads/2020/10/fb_img_1602166589290.jpg" alt="" />
<img src="https://kyzylorda-news.kz/wp-content/uploads/2020/10/fb_img_1602166595712.jpg" alt="" />
<img src="https://kyzylorda-news.kz/wp-content/uploads/2020/10/fb_img_1602166598084.jpg" alt="" />

Қызылордада мониторингтік топ үздіксіз бақылау жүргізуде

Kyzylorda-news.kz. Қырғыз Республикасының өз-өзін Ішкі істер министрі етіп тағайындаған Курсан Асанов президент Сооронбай Жээнбековтің қазір қайда екенін білмейді. Президентті іздеуге Ішкі істер министрлігі емес, басқа құрылымдар жұмылдырылған, деп хабарлайды <a href="https://kaz.zakon.kz/5043154-sooranbay-zheenbekovty-barly-y-tappay.html">zakon.kz</a>.
<blockquote>
 Шынымды айтсам, мен қазір басқа мәселелермен айналысып жатырмын. Бішкекте жағдайды ретке келтіру керек. Көріп отырғаныңыздай, кешеден бастап біз ерікті халық жасақтарымен бірге қаладағы жағдайды бақылауға алып, жаппай бейберекетсіздіктің алдын алдық. Біз осы бағытта жұмыс жасай береміз. Басқа құрылымдар Жээнбеков пен басқаларды іздеуге кіріседі деп сенемін, – деді ол бүгін Бішкекте өткен брифингте.
</blockquote>
Қырғызстанның шекарашылары елден жоғары лауазымды шенеуніктерді шығармау туралы бұйрық алды. Сонымен қатар шекараны жабу туралы шешім қабылданды.
Естеріңізге сала кетейік, 6 қазанда Ішкі істер министрінің бұрынғы орынбасары Құрсан Асанов Қырғыз Республикасы ішкі істер министрлігі Бішкек қаласы комендантының міндетін атқарушы болғаны жарияланды. Ішкі істер министрі Қашқар Жунушалиев әлі отставкаға кеткен жоқ.

Жээнбеков жоғалып кетті

Kyzylorda-news.kz. Қызылордада биыл жылу беру жылдағыдан 5 күн ерте басталмақ. Бұл туралы қала әкімдігінің баспасөз орталығында өткен брифингте қала әкімінің орынбасары Елмұрат Рахматуллаев хабарлады.
<blockquote>
 «Жылу беру арнайы қағидаға сәйкес бес тәулік бойы сыртқы ауаның орташа температурасы +80С және одан төмен болған жағдайда басталу қажет. Осы кезге дейін бұл кезең тәжірибе көрсеткендей қазан айының 15-не тура келіп жүрді. Ағымдағы жылы сыртқы ауа температурасының күрт төмендеп кетуіне байланысты қала әкімінің 1 қазандағы шешімінің негізінде жылу қазан айының 10 күні түнгі 12:00-де беріледі», – деді Елмұрат Рахматуллаев.
</blockquote>
Жылу беру жұмыстарының жүргізілуі және көп қабатты тұрғын үйлер мен инженерлік жүйелердің дайындығы туралы мәлімдеген қалалық тұрғын үй коммуналдық шаруашылық жолаушылар көлігі, автомобиль жолдары және тұрғын үй инспекциясы бөлімінің басшысы Біржан Далабаев барлық нысандар жылу маусымына қосылуға толығымен дайын екенін жеткізді.
Бөлім басшысы үйішілік жылыту жүйесінде авариялық жағдай туындаған жағдайда “109” номеріне немесе өз аумағы бойынша басқару орындарына (ПИК) хабарласу қажет, ал элеватор торабына дейін жылу трассаларында ақаулар пайда болған жағдайда «Қызылорда жылу электр орталығы» диспетчерлік қызметінің 250045, 87768692053 байланыс телефондарына хабарласуға болатынын айтты. Сонымен бірге Біржан Далабайұлы 2020-2021 жылдарға арналған жылу беру маусымы кезеңінде Қызылорда қаласына қажет етілетін қатты отын көлемі шамамен 37800 тоннаны құрайтынын және көмір қорының тұрғындарды қамтуға толық жеткілікті екенін де атап өтті. Өз кезегінде Қызылорда жылу электрорталығының директоры Наурыз Сатханов жылу орталықтарының дайындығы туралы хабарлама жасап, жылу беру маусымына дайындық жұмыстары бекітіліген кестеге сәйкес жүргізіліп, уақытылы аяқталғанын баяндады.
Ағымдағы жылға жылу беру маусымына дайындық жұмыстарын жүргізуге «Жұмыспен қамту жол картасы», «Нұрлы жер» бағдарламалары және обыстық, жергілікті бюджеттен қаржы қаралып, бөлінген қаржыға сай дайындық жұмыстары жоспарланып, бүгінгі күнге 100 пайызға орындалған.
Айта кетейік, облыс орталығында барлығы 815 көп қабатты тұрғын үй бар, оның 757 орталықтандырылған жылу жүйесіне қосылған, 58 үй жеке жылу көздерімен жылытылады.

Қызылордада жылу беру жоспардан ерте басталады

Kyzylorda-news.kz. Қызылорда облысында «Учаске» жедел профилактикалық іс-шарасы өткізілуде.
Басты мақсат – әкімшілік аймақта қылмыс пен құқық бұзушылықты болдырмау, заңсыз қаруларды анықтау, көші-қондылыққа бақылау жасау, тұрғындар жайлы ақпарат жинақтау.
Бүгінгі күнге дейін 17 мыңға жуық үй жайлар тексерілді. Аймақта қаруы 8796 адам тіркелген. Полиция қызметкерлері 1101-нің мекен-жайына барып, қаруды сақтау, алып жүру және тіркеу ережелерін түсіндірді.
<blockquote>
 «Облыста 258 учаскелік полиция инспекторы бар. Халық саны мен аумақтың көлеміне байланысты әлі де 145 учаскелік полиция инспекторлары мен 128 көмекші қажет етеді. Электронды планшеттермен қамтылуы 55 пайызды құрап отыр. Яғни, 143 планшет бар. Ал портативтік бейнетіркегіштермен 44 пайызы жабдықталған», – деді ОПД Жергілікті полиция қызметінің бастығы Бауыржан Ибраев.
</blockquote>

Қызылорда: Учаскелік полиция инспекторының 55 пайызында планшет бар

Kyzylorda-news.kz. Бүгін Қызылорда облысының әкімі Гүлшара Әбдіқалықова «Оңтүстік» өңірлік қолбасшылығы әскерлерінің қолбасшысы, генерал-майор Қайдар Қарақұловпен кездесті.
Кездесуде «Оңтүстік» өңірлік қолбасшылығы сарбаздарының әлеуеті талқыланды. Сондай-ақ, аймақ басшысына генерал-майор қолбасшылықта атқарылып жатқан жұмыстар жайлы баяндады. Облыс әкімі пандемия кезінде коронавирусқа қарсы күресте әскерилердің қосқан үлесін ерекше атап өтті. Қызылорда гарнизонына қарасты 66597 әскери бөлімі наурыз-маусым айлары аралығында облыс көлемінде әкімдіктер, құқық қорғау органдарымен бірлесіп дизенфекция жұмыстарын жүргізді. Сонымен қатар қала, аудан және ауыларалық блокбекеттерде күні-түні қызмет көрсетті. Бұл шараларға бөлім тарапынан әскери қызмкеткерлермен қатар қажетті техникалар тартылған. Гүлшара Әбдіқалықова алдағы уақытта да бірлесе атқарылатын жұмыстарды одан әрі жалғастыру керектігін айтты.
Айта кету керек, «Оңтүстік» өңірлік қолбасшылығы 2000 жылы құрылған. Бұл Қазақстан Республикасы қарулы күштеріндегі ең ірі құрама болып саналады. Қызылорда, Жамбыл облыстары мен Шымкентте орналасқан әскери бөлімдер мен құрамалардан тұрады.
Басты міндеті – Қазақстанның оңтүстік шептерінің қауіпсіздігін қамтамасыз ету. Ал, Қызылорда гарнизонына қарасты 66597 әскери бөлімі 2015 жылдың сәуір айында құрылған. Сол уақыттан бері өңірде ұйымдастырылған әскери дайындық, оқу-жаттығу және практикалық шараларға ат салысып келеді.
<img src="https://kyzylorda-news.kz/wp-content/uploads/2020/10/fb_img_1602150046657.jpg" alt="" />

Гүлшара Әбдіқалықова «Оңтүстік» өңірлік қолбасшылығы әскерлерінің қолбасшысымен кездесті

Kyzylorda-news.kz. Биыл Қызылорда қаласындағы ЗК-169/5 мекемесінде жазасын өтеп жүрген 62 сотталушы диплом алды.
Оның 23-і ағаш ұстасы, 22-і тігінші, 17-і газэлектрдәнекерлеуші кәсібін меңгерген. Үлгірімі жақсыларға ай сайын 28 мың 323 теңге көлемінде шәкіртақы төленді.
Мамандықтары бойынша диплом алған азаматтар жаза мерзімін өтегенше түзету мекемесіне жұмысқа орналасып, қылмыспен келтірген шығындарды өтеуге мүмкіндіктері бар. Осы түзету мекемесінде жеті жылда газэлектрдәнекерлеуші, тігінші, ағаш ұстасы мамандықтары бойынша 300-ден астам жазасын өтеуші диплом алған.

Қызылордада жазасын өтеуші 62 азамат диплом алды

Kyzylorda-news.kz. Қармақшы аудандық ардагерлер үйінің мәжіліс залында Қоғамдық келісім кеңесінің кезекті отырысы өтті. Кеңес отырысына Қызылорда облыстық «Қоғамдық келісім» КММ аға сарапшысы Бауыржан Үсенбаев, аудандық кеңес мүшелері және тақырыптар бойынша әр саланың жауапты өкілдері қатысты.
Отырыста пандемия кезіндегі атқарылған шаралар мен дер кезінде көрсетілген медициналық көмектер, заң және тәртіп бұзушылықтар, тауарлар мен дәрі-дәрмектерге баға нарығын қадағалау секілді өзекті мәселелер талқыға салынды.
Кеңестің күн тәртібіндегі бірінші мәселе бойынша аудандық аурухананың бас дәрігірінің орынбасары А.Жаналиев хабарлама жасап, Пандемия уақытында, дер кезінде көрсетілген көмектермен атқарылған шаралар және алдағы уақытта төтенше жағдай орын алған жағдайда дайындық жұмыстары бойынша жұмыстарды баяндады.
Күн тәртібіндегі екінші мәселе бойынша аудандық полиция бөлімінің бастығының бірінші орынбасары полиция подполковнигі Б.Ақтаев хабарлама жасады. Үшінші мәселе бойынша аудандық кәсіпкерлік бөлімінің маманы Б.Құндақбаев хабарлама жасады.
Баяндамашылар аудан бойынша пандемия кезіндегі халықтың ахуалдық жай-күйі туралы талдау жасап, атқарылып жатырған жұмыстарға тоқталды, сонымен қатар кеңес отырысында кеңес мүшелерінің сұрақтарына жауап берілді.
Айта кету керек, Қармақшы ауданы бойынша Қазақстан халқы Ассамблеясының Қоғамдық келісім кеңесі жасақталған. Кеңес құрамына жергілікті мекеме басшылары, арадегерлер кеңесінің мүшелері тартылған.
Жиынды қорытындылаған Қызылорда облыстық «Қоғамдық келісім» КММ аға сарапшысы Бауыржан Серікұлы айтылған кемшіліктер мен сын-ескертпелерді хаттамаға енгізіп, оң нәтижелі жұмыстарды атқаруды тиісті сала басшыларына тапсырды.

Қармақшыда қоғамдық келісім кеңесінің отырысы өтті

Kyzylorda-news.kz. Өткен тәулікте COVID-19 белгілері бар пневмонияның 266 жағдай тіркелді, 1 жағдай өліммен аяқталды.
Бір тәулік ішінде 9 адам жазылып шыққан.
2020 жылдың 1 тамызынан бастап: науқастар саны – 34 143, өлім жағдайлары – 362, барлығы 27 572 адам сауығып шықты.

Қазақстан және Қызылорда облысының жаңалықтары