<a href="https://kyzylorda-news.kz/">Kyzylorda-news.kz</a>. Бүгін Қызылорда облысында ІІ оқу тоқсаны басталды.
Республикалық бас санитарлық дәрігердің 2020 жылғы 2 қараша №62 қаулысына сәйкес бала саны 300-ден аспайтын мектептерде дәстүрлі түрде оқу процесі жүргізіледі. Қызылорда облысында мұндай мектептердің саны 121-ді құрап отыр. Яғни, 19 мыңнан аса бала барлық санитарлық нормаларды сақтай отырып, мектептерде оқиды.
Ата-аналардың өтініші негізінде 1-5 сынып оқушылары үшін 2733 кезекші топ ашылып, 39483 оқушы дәстүрлі форматта білім алады.
Ал, 6-11 сыныптың оқушылары үшін ІІ оқу тоқсаны қашықтан оқыту форматында жалғасады. Оқушылар «Білім ленд» оқу платформасы арқылы ұстаздармен кері байланысады.
Қашықтан оқитын оқушылар үшін электронды техникалар толық алынды. Үкімет резерві қорынан бөлінген қаржыға 22800 электронды құрылғылар жеткізілді. Құрылғысы жоқ 39 мың балаға бірінші кезекте компьютерлер таратылды.

Қызылордада 19 мыңнан астам бала мектепке барып оқиды

<a href="https://kyzylorda-news.kz/">Kyzylorda-news.kz</a>. Биыл Қызылордада Кәсіпкерлер палатасының кеңесшілері әзірлеген құны 2,5 млрд теңгені құрайтын 188 жоба қаржыландырылды.
Бұл туралы Кәсіпкерлер палатасының директоры Ғалымбек Жақсылықов облыс әкімі Гүлшара Әбдіқалықованың «Бизнеске арналған Үкімет» жұмысымен танысуы барысында айтты.
Айта кету керек, Қызылорда қаласы, Қорқыт ата 123 мекен-жайында орналасқан «Бизнеске арналған Үкімет» ғимаратында Кәсіпкерлер палатасы, облыстық кәсіпкерлік және туризм басқармасы, «Қызылорда» Өңірлік инвестициялық орталығы, инвесторлар орталығы орналасқан.
Қызылорда облысында 1 қазандағы статистикалық ақпарат бойынша 47&nbsp;447 шағын және орта кәсіпкерлік субъектісі жұмыс жасауда. Өткен жылмен салыстырғанда өсім – 5,4 пайыз. Өңір кәсіпкерлері бүгінде 92470 адамды жұмыспен қамтып отыр.
«Пандемия салдары аймақта өндірілген өнімдердің көлемі төмендеуіне алып келді. Осы жылдың 6 айында шағын және орта кәсіпкерлікте 144,5 млрд.теңгенің өнімі өндірілді. Бұл өткен жылмен салыстырғанда 16,7 пайызға аз. Төтенше жағдай, карантин кезеңдерінде Кәсіпкерлер палатасы жұмысын тоқтатқан емес. Бизнес өкілдеріне жан-жақты көмек көрсетті. Елімізде төтенше жағдай енгізілген кезеңнің алғашқы күндерінде Палата мамандары блок-посттарда тұрып кәсіпкерлердің кедергісіз жұмыс жасауын ұйымдастыру мақсатында ручной режимде жұмыс жасады. Көрші Түркістан облысы көкөністерді шығаруға шектеу жасағанда мәселені облыс әкімдігіне жеткізіп, азық-түліктің кедергісіз өңірге кіруіне жағдай жасады», – деді кездесуде Палата басшысы.
Ғалымбек Жақсылықов, Еуразиялық экономикалық комиссия күрішті өзге елдерге тыйым салу тетіктерін қарастырып жатқан шақта Қызылорда облысы кәсіпкерлер палатасының мамандары күрішшілермен бірге дабыл қағып, мәселені дер кезінде Үкіметке жеткізгендігін, осылайша қызылордалық кәсіпкерлер күрішті кедергісіз экспортқа шығару мүмкіндігіне ие болғандығын айтты. Нәтижесінде осы жылдың 9 айында облыстан жалпы құны 19 млн. долларды немесе 8,2 млрд.теңгені құрайтын 74,8 мың тонна күріш экспортталған.
Палата директоры өңірде сертификат алушы отандық тауарөндірушілер санының артқандығын да атап өтті. 10 айдың қорытындысы бойынша қызылордалық кәсіпкерлер экспортқа 1120 сертификат алған. Өткен жылмен салыстырғанда өсім 47 пайыз. 90 СТ-KZ сертификат берілген. Өсім 41 пайыз.
Елдегі шектеу шараларына қарамастан Палата мамандары кәсіпкерлерге көрсетілетін қызметтерді тоқтатқан емес. Бұрын қызметтер офлайн көрсетілсе, жағдайды ескере келе онлайн қызметтерге де басымдық берілуде.
«Бастау» (2181) және «Бизнес мектеп» (561) жобасы бойынша облыс бойынша 2742 азамат кәсіпкерлік негіздеріне оқытылды. Оқыған азаматтардың 98 пайызы біліктілігін онлайн жетілдірді.
Кәсіпкерлер палатасының кеңесшілері 10 айда 3324 кәсіпкерлік субъектісіне 6063 кеңес беріп, 1335 кәсіпкердің бухгалтерлік есептерін тапсырды, электронды кілтін алып берді, мемлекеттік сатып алуға қатысуына жағдай жасады.
Палата кеңесшілері биылғы жылы кәсіпкерлерге 487 бизнес жоспар әзірлеп берді. Соның ішінде жалпы құны 2,5 млрд.теңгені құрайтын 188 жоба қаржыландырылды. 56 жоба мақұлданды.
Биыл «Бастау» жобасын оқыған азаматтардың 42 пайызының жобасы, нақтырақ айтқанда жалпы құны 515,9 млн.теңгені құрайтын 914 жоба қаржыландырылды. Басым бөлігі «Еңбек» бағдарламасы аясында қайтарымсыз қаржы – грант иегері. «Қарапайым заттар экономикасы» бағдарламасы бойынша облыстың жобалық кеңсесінде құны 16,5 млрд.теңгені құрайтын 160 жоба бар. Бүгінде 9 млрд.теңгені құрайтын 110 жоба мақұлданды.&nbsp;
<img src="https://kyzylorda-news.kz/wp-content/uploads/2020/11/bek_3318-scaled.jpg" alt="" />
<img src="https://kyzylorda-news.kz/wp-content/uploads/2020/11/bek_3350-scaled.jpg" alt="" />

Қызылордада 188 жоба қаржыландырылды

<a href="https://kyzylorda-news.kz/">Kyzylorda-news.kz</a>. Қармақшы ауданында «Ақжар-Көмекбаев» тас жолының бойында автокөліктің жүк салғышынан 2 дана полиэтилен пакетке оралған есірткі заты алынды.
Сараптама қорытындысы бойынша 1 кг жуық «кептірілген марихуана» екендігі анықталған.&nbsp;&nbsp; &nbsp;&nbsp;
<blockquote>
 «Бүгінгі күні күдікті Қармақшы ауданы Полиция бөлімінің уақытша ұстау абақтысына қамаққа алынып, Қазақстан Республикасы Қылмыстық кодексінің 296-бабы 3-бөлігімен (Есірткі, психотроптық заттармен, сол тектестермен өткізу мақсатынсыз заңсыз жұмыс істеу) сотқа дейінгі тергеп-тексеру амалдары жүргізілуде», – делінген полиция департаментінің хабарламасында.
</blockquote>

Қармақшыда есірткі тасымалдаушылар қолға түсті

<a href="https://kyzylorda-news.kz/">Kyzylorda-news.kz</a>.&nbsp;Қазалы ауданында 15 қараша күні сағат 11-32 минутта №9 өрт сөндіру бөлімнің байланыс бекетіне аудан орталығындағы «Ару-Илия» базары өртеніп жатқандығы туралы хабар түсті.
Оқиға орнына бөлімнің 2 өрт сөндіру автокөлігі және 15 жеке құрамы жетті. Нәтижесінде өрт 11 сағат 58 минутта толығымен сөндірілді. Қаза болғандар мен зардап шеккендер жоқ.
Қазалы ауданының Төтенше жағдайлар бөлімі зерделеу жұмыстарын жүргізу барысында «Ару-Илия» сауда базарының бірінші қабатында орналасқан ет дүкенінің 3х3 көлемді төбесі өртенгені анықталды.
Өрттің шығу себебі электр сымдарының қысқаша тұйықталуынан орын алған деген болжам бар. Қазіргі таңда тілсіз жаудан келген шығынның көлемі анықталуда.
<img src="https://kyzylorda-news.kz/wp-content/uploads/2020/11/125548414_2914185262135735_5623324174447580449_o.jpg" alt="" />
<img src="https://kyzylorda-news.kz/wp-content/uploads/2020/11/125530924_2914185372135724_7881536649018865292_o.jpg" alt="" />

Қазалыда базар өртенді

&nbsp;<a href="https://kyzylorda-news.kz/">Kyzylorda-news.kz</a>. Қазақстанда өткен тәулікте 301 адам коронавирустан жазылып шықты.
Аймақтар бойынша
Нұр-Сұлтан қаласы –&nbsp;56 
Ақмола облысы –&nbsp;10 
Шығыс Қазақстан облысы –&nbsp;163 
Батыс Қазақстан облысы –&nbsp;3 
Қарағанды облысы –&nbsp;13 
Қостанай облысы –&nbsp;13 
Қызылорда облысы –&nbsp;10 
Павлодар облысы –&nbsp;33
Қазақстан бойынша жазылғандар саны –&nbsp;109944.

Қызылордада өткен тәулікте 10 адам коронавирустан жазылып шықты

<a href="https://kyzylorda-news.kz/">Kyzylorda-news.kz</a>. 16 қарашада ел аумағының басым бөлігінің ауа-райына республиканың солтүстік-шығыс аудандарында орналасқан циклон әсерін тигізеді. Соған байланысты оңтүстік-шығыс өңірлерде қар жауады.
Тек оңтүстік-батыс пен батыста күн ашық. Республиканың кей жерлерінде жаяу бұрқасын, тұман, көктайғақ болады, желдің күшеюі ықтимал, деп хабарлайды Қазгидромет.
Қызылорда облысының кей жерлерінде қар жауып, көктайғақ болуы мүмкін.

Қызылордада қар жауып, көктайғақ болады

Kyzylorda-news.kz. Қазақстандықтардың желтоқсан мен қаңтар айларында неше күн демалатыны белгілі болды деп хабарлайды KAZ.NUR.KZ порталы.
Ел тұрғындары желтоқсан айында мереке мен демалыс күндерінің барлығын қосқанда 11 күн демалмақ.
1 желтоқсан – Тұңғыш Президент күніне орай қазақстандықтар аптаның сейсенбісінде демалады.
16-17 желтоқсан күндері тұрғындар Тәуелсіздік күнін атап өтеді. Биыл бұл екі күндік ресми демалысқа тағы екі күн қосылып отыр. Ережеге сай 20 желтоқсан жексенбі 18 желтоқсан жұма күнге ауыстырлады. Осылайша ел тұрғындары 16-19 желтоқсан аралығында төрт күн демалады. Сәйкесінше 20 желтоқсан жұмыс күні болып саналады.
31 желтоқсан ресми емес демалыс күні болып саналады. Жаңа жылдық мерекелер 1 қаңтардан (жұма) басталып 5 қаңтарға дейін жалғасады. Яғни, қазақстандықтар биыл да төрт күн қатарынан демалады.
7 қаңтар – Рождество мерекесіне орай тағы бір күн демалыс беріледі.

Қазақстандықтар желтоқсан мен қаңтар айларында неше күн демалады?

Kyzylorda-news.kz. Қызылорда облысының әкімі Гүлшара Әбдіқалықова Ұлттық валюта – Теңге күнімен және Қазақстан Республикасы қаржы органдары қызметкерлерінің кәсіби мерекесімен құттықтады.
ҚҰРМЕТТІ ҚАРЖЫГЕРЛЕР!
Сіздерді Ұлттық валютамыз – Теңге күнімен және Қазақстан Республикасы қаржы органдары қызметкерлерінің кәсіби мерекесімен шын жүректен құттықтаймын! 
1993 жылы Елбасымыз Нұрсұлтан Әбішұлы Назарбаевтың Жарлығымен Ұлттық валюта – Теңге айналымға енді. Бұл күн Қазақстан тарихындағы атаулы күндердің біріне, ал, Теңге – біздің ел Тәуелсіздігі мен мемлекеттілігінің басты белгісіне айналды. 
Ел экономикасын дамыту туралы сөз қозғағанда оның күретамыры – жүз жылға жуық тарихы бар қаржы жүйесін айналып өту әсте мүмкін емес. Себебі, қаржыгерлердің қатысуынсыз бірде-бір саланың толыққанды қызметін көзге елестете алмаймыз. 
Осы жылдар ішінде Сыр өңіріндегі қаржыгерлік мектебі де қалыптасып, өсіп-өркендеді. Камал Шөкенов, Бименді Баймаханов, Құттықожа Ыдырысов есімдері бүгінгі күні өңірдің қаржы тарихына алтын әріппен жазылып қалса, Қалқазбек Әжібеков, Сейітсұлтан Әйімбетов, Дайрабай Ысқақов, Мырзахмет Ауанов, Болатбек Жасақбаев, Майдан Мәселеева, Райхан Искаковалар қоғамдық деңгейде белсенді үлес қосуда. 
Қымбатты қаржыгерлер, Сіздерді кәсіби мерекелеріңіз – Қаржыгер және Ұлттық валютамыз – Теңге күнімен тағы да құттықтай отырып, ел мүддесі жолындағы еңбектеріңізге табыс тілеймін! 
Тәуелсіз Қазақстанымыздың және Сыр өңірі экономикасының қаржылай ахуалын нығайту жолындағы істеріңіз берекелі болсын! 
Сіздерге мықты денсаулық, отбастарыңызға амандық тілеймін! 
Сыр өңірінің қаржы қазаны ортаймасын, еліміздің ырыс-құты арта берсін, несібеміз мол болсын!

Гүлшара Әбдіқалықова Ұлттық валюта күнімен құттықтады

<a href="https://kyzylorda-news.kz/">Kyzylorda-news.kz</a>. Елімізде соңғы кездері жиілеп кеткен тұрмыстық зорлық-зомбылықтың зардабын тартқан үлкен-кіші, бала-шағаны көргенде, естігенде жүрегің қарс айрылып, ұйқымыздан шошып оянатын жағдайға жеттік. Әкенің отбасы алдындағы жауапкершілігі, үйінің береке-бірлігін келтіріп отыратын ана махаббаты азайған, әке мен шеше бір-бірін мүйіздеп, бір-бірінен кінә іздеп жүргенде балаларымыз қараусыз қалып жатқаны елдігіміздің іргесін сөгуге апаратынына аса мән бермейтініміз қынжылтады, жүрекке қаяу түсіреді.
«Тұрмыстық зорлық-зомбылық профилактикасы туралы» заңнаманың ­4-бабында оның түрлері нақты айтылып, көрсетілгенімен, оны елеп-екшеп жатқан ешкім жоқ. Әйтпесе «Күш көрсету зорлық-зомбылығы – дене күшін қолданып, денені ауыртып денсаулыққа қасақана зиян келтіру. Психологиялық зорлық-зомбылық – адамның психикасына қа­сақана әсер ету, оны қорқыту, қорлау, бопсалау немесе өміріне, денсаулыққа қауіп төндіретін құқық бұзушылықтарды, сондай-ақ психикалық, дене және жеке басы дамуының бұзылуына әкелетін әрекеттерді жасауға мәжбүрлеу (еріксіз көндіру) арқылы ар-намысы мен ­абыройын кемсіту» деп, соқырға таяқ ұстатқандай айқын жазылған.
«Қазақстан Республикасындағы Баланың құқықтары туралы» Заңда да баланың заңды өкілі ата-ана екені, ата-ана баласының білім алуына, тәрбие беруіне, оның құқықтары мен мүдделерін қорғауға, қамқорлық жасауға міндетті екені тайға таңба басқандай көрсетілген. Ал күнделікті өмірде заңнан мүлдем хабары жоқ, тіпті кейде өзін-өзі қорғай алмайтын замандас­тарымызды кездестіретініміз де жасырын емес.
Мамандардың айтуынша, бүкіл әлемді жайлаған коронавирус індетіне байланыс­ты жарияланған карантин уақытында елімізде отбасындағы жанжал, ажырасу мәселелері күрт өскен. Статистикалық деректерге жүгінсек, биыл сегіз айдың ішінде 130 мыңға жуық шағым түсіп, оның ішінде 2,5 мың шағым бойынша қылмыстық іс қозғалған. Ал қолданбалы экономиканы зерттеу орталығының (АЕRС) сарапшылары жүргізген 2017 жылғы зерттеуге зер салсақ, еліміздегі қылмыстың 38%-ы әйел-аналарға қатысты екен.
Парламент Мәжілісінің жалпы отыры­сында «Отбасылық-тұрмыстық зорлық-зомбылыққа қарсы іс-қимыл туралы» Заң жобасы қаралған тұста ҚР Парламенті Мәжілісінің депутаты Ирина Ун­жакова: «Біз құқық бұзушының отбасындағы зорлық-зомбылық әрекет­тері салдарынан жауапкершіліктен жалтар­мас үшін тұрмыстық зорлық-зомбылық құрбаны алдында татуласу прак­тикасын өзгертуді ұсынамыз. Тәжірибе көрсеткендей, зардап шеккендер агрессордың қысымымен және қауіп-қатерімен татуласуға келіседі. Сондай-ақ егер отбасындағы зорлық-зомбылықтың куәгерлері кәмелетке толмаған балалар болса, отбасылық агрессорларға жазаны қатай­туды ұсы­намыз. Қазақстан Республикасы Білім және ғылым министрлігінің зерттеу нәти­желері қазақстандық балалар­дың 57%-ы өздерін үйде қауіпсіз сезінбейтіндігін көрсетіп отыр» деген дерек келтірді.
Не істемек керек? Иә, елімізде әйел-аналарға арналған дағдарыс орталықтары бар. Дегенмен, бұл уақытша ­баспана балапанын бауырына басқан қыз-келіншектерге қаншалықты жәрдемдеседі? Қиналғанда қол ұшын созады дегеннің өзінде, «Торғай екеш торғай да, балапанын қорғайды» демекші, отбасындағы негізгі құндылықтарға, әке мейірімін, құшағын аңсаған сәбидің жанына желеу бола ала ма? Әке мен шеше біте қайнасып, бір отбасының ұйтқысы болған жағдайда ғана ұлттың өзегіне құрт түспей, бүтін бала тәрбиеленіп шығатынын естен шығармайықшы. Ойланайық ағайын, баланың бақытты шағын ұрламайық!
Бағдагүл Балаубаева 
<a href="http://anatili.kazgazeta.kz/news/58618">«Ana tili»</a>

Баланың бақытты шағын ұрламайық!

<a href="https://kyzylorda-news.kz/">Kyzylorda-news.kz</a>. Бүкіл балалық шақтың ең қиын кезі – сәби өмірінің алғашқы жылы. Өмірінің алғашқы айында сәби өмірдің мүлдем жаңа жағдайларына бейімделеді.
Алғашқы айларда бала тез өседі. Салмағы үш еседен асып, бойының ұзындығы жарты еседен асуы мүмкін. Бір жасқа дейінгі баланы күту мен асырау – аса жауапты іс. Өйткені сәби өте әлсіз, шала болады да, сырттан келген аурудан қорғана алмайды, дімкәс, аурушаң келеді.
Перзентханадан ананы шығарып алмас бұрын пәтер мен үйді мұқият тазалаған жөн. Бүкіл төсек-орынды қағып-сілкіп тазалау қажет. Мүмкіндік болса, сәбиге жеке бөлме немесе пәтердің ең жарық бір бұрышын берген дұрыс. Сәбидің өз төсегі болуы тиіс. Оны жарық жерге қойған жөн, бірақ терезеге немесе үйді жылытатын пешке (аспап) тақап қоюға болмайды.
Сәби арбасын (колясканы) төсек ретінде пайдалануға болмайды, өйткені онымен бірге көшеден шаң келеді.
Жас нәрестеге жастықтың қажеті жоқ. Сәбиге тегіс жерге жатқан қолайлы.
Сәбидің киім-кешегі мұқият жуылып, арнаулы шкаф немесе жеке үстелде тұрғаны жөн.
Бір жасқа толғанша сәбиді күн сайын шомылдырған жөн. Ал қиын болған жағдайда, алты айдан кейін күн ара шомылдыруға болады. Шомылдырғанда бөлменің жылылығы 18-20 градустан аспайтын болсын. Ал жуындыратын судың жылылығы 37 градус шамасында болғаны абзал. Сәбиді аптасына кем дегенде 2-3 рет сабынмен шомылдыру қажет. Шомылдырып болғаннан кейін баланы емізіп, ұйықтату қажет.
Сәбидің басында қайызғақ сияқты ақшыл құрғақ қабық пайда болғанда оған қайнатылған өсімдік майы жағылады. Бұл қабық шомылдырған кезде өзінен-өзі кетіп қалады.
Бала өмірге аман-сау келеді. Демек, оның бұдан былайғы дамуы қоршаған ортаға, яғни, дұрыс тамақтандырып, дұрыс күтіп-тәрбиелеуге байланысты.
Бөбек үшін ең жақсы тамақ – ананың сүті. Ананың сүтінде бойға оңай сіңетін қажетті қорек нәрселердің бәрі бар. Сонымен бірге оның құрамында баланы жұқпалы аурулардан қорғайтын, ас қорытатын ферменттер мен жұқпалы аурудың жабысуына жол бермейтін денешіктер болады. Ананың лактациялық қабілеті (сүт шығаруы) ішетін тамағына, режімге, жұмыс мөлшері мен көңіл-күйіне байланысты. Бала емізетін ананың режімді мұқият сақтап, дер кезінде ұйықтап, тамақ ішіп, бала асырап, оны қадағалай білуі қажет. Анаға тәулігіне кем дегенде 7-8 сағат ұйқы керек.
Бала емізетін әйел тәулігіне 1-1,5 литр сүт шығарады. Сондықтан ол сұйық тамақты көбірек ішеді, бірақ сұйық тамақтың жалпы көлемі 2 литрден аспауы тиіс.
Алғашқы аптада сәбидің еметін сүтінің құрамы құбылмалы келеді. Алғашқы 1-2 күнде ақуызы мен тұзы, майы мол уыз тәрізді қою сары сүт бөлінеді. Уыз – колориясы күшті тағам. Құрамы сәби ағзасының құрамына жақын болғандықтан, сәби оны тез игереді. 4-5 күннен кейін уыздың сипаты біртіндеп өзгереді. Екінші аптадан бастап емшек сүті өзінің тұрақты қалпына ие болады.
Емшек сүтінің тапшылығы, яғни, гипогалактия, сәбиді дұрыс асырауға бөгет жасайды. Сүт тапшылығы баланы дұрыс емізбеуден пайда болады. Ананың абыржуы, көңіл-күйінің бұзылуы, режімді дұрыс сақтамауы емшек бездеріндегі сүтті азайтуға әкеліп соқтырады. Мұндайда ана баланы бұрынғыша жүйелі түрде емізе берсе, сүт өнімі қалпына келеді.
Сәби емшекті нашар соратын болса не сүтті тауыса алмаса, оны сауып, сүтті қасықпен ішкізген жөн.
Сәби емшекті әбден тойғанша, яғни, орта есеппен 15-20 минут бойы емеді. Баланы тойғанша емізген жөн, бірақ 20 минуттан артық емізуге болмайды.
Алғашқы бір айда сәбиді тәулігіне 3-3,5 сағат, түнде 6-6,5 сағат сайын 6-7 рет емізген жөн. 4-5 айға дейінгі балалар тәулігіне негізінен 6 рет, 5 айдан бастап 1 жасқа дейін әрбір 4 сағат сайын 5 рет тамақтанады.
Ғ.Ахметованың “Балаларымыздың денсаулығы” кітабынан.

Бір жасқа дейінгі сәбиді күту мен асырау

Kyzylorda-news.kz. Сыр өңіріне жұмыс сапарымен ҚР Индустрия және инфрақұрылымдық даму министрі Бейбіт Атамқұлов келді.
Алдымен министр мен облыс әкімі Гүлшара Әбдіқалықова Шиелі ауданындағы «Гежуба Шиелі Цемент Компаниясы» ЖШС цемент зауытына барды.
Цемент өнімдерін өндіретін зауыт 2018 жылдың желтоқсанында пайдалануға берілген, қуаттылығы жылына 1 млн. тонна. Кәсіпорын 250 адамды жұмыспен қамтып отыр. Жалпы ауданы 520 мың.кв.метрді құрайды. Зауыт өткен жылы 6,1 млрд. теңгеге 380 мың тонна өнім шығарып, оның 40,6 мың тоннасы Өзбекстанға экспортталды. Ал, биылғы жылдың 10 айында 350 мың тонна өнім өндіріп, 41 мың тоннасын аталған көрші елге экспорттаған.
Сонымен қатар Индустрия және инфрақұрылымдық даму министрі Б. Атамқұлов пен облыс әкімі Г.Әбдіқалықоваға «Балауса фирмасы» ЖШС-нің «Бала-Сауысқандық» кен орнындағы қара тақтатастарды автоклавты қайта өңдеу» жобасын іске асыру барысы таныстырылды.
Жеке кәсіпорын 2016 жылдан бастап аммоний метаванадатын өндіріп, Ресей, Ұлыбіритания секілді шет елдерге экспорттайды. Қуаттылығы жылына 1 млн. тонна кен өндіру және өндеу. 161 адамды жұмыспен қамтып отыр. Электр қуатын арттыру үшін қуаты сағатына 3 МВт электр беретін желі салынуда.
Мұнан соң, министрдің жұмыс сапары Жаңақорған ауданындағы «Шалқия Цинк LTD» АҚ кен орнында жалғасты. 
Кәсіпорын қорғасын – мырыш кенін өндірумен айналысады. 2025 жылға дейін 4 млн.тонна өнім өндіреді деп жоспарлануда. Кәсіпорынның жалпы ауданы-22,5 шаршы км. құрайды. 617 тұрғын жұмыспен қамтылған.
«ШалкияЦинкЛТД» АҚ директорлар кеңесінің шешімімен 2020 жылғы 13 мамырда жобаны жоспарлау-жобалау-құрылыс арқылы кезең-кезеңімен іске асыруды көздейтін жобаны іске асырудың жаңа стратегиясы бекітілді. 
Сонымен қатар, Б. Атамқұлов пен Г.Әбдіқалықова Қызылорда қаласында орналасқан «OrdaGlass LTD» ЖШС шыны зауытының іске қосылатын 4 кешенінің құрылыс барысымен танысты.
Зауыттың құрылысы 2015 жылы басталған. Өндіріс тәулігіне 600 тонна немесе жылына 197,1 мың тонна табақ шыны өнімін шығарады деп жоспарлануда. Жалпы ауданы 500 мың.кв. метрді құрайды. Қазіргі уақытта шыны зауытының құрылыс жұмыстары 69,7% орындалды.
Монтажтехнологиялық жабдық – 33,8%. Негізгі жұмыс балқыту ваннасы мен күйдіру пешін орнатумен байланысты. 
Сондай-ақ, индустрия және инфрақұрылымдық даму министрі стент арқылы «Арал Сода» ЖШС-нің қуаттылығы жылына 300 мың тонна құрайтын кальцийлендірілген сода зауыт құрылысының» жобасын іске асыру барысымен танысты.
Жұмыс сапары соңында министр мен аймақ басшысы облыс орталығының сол жағалауында орналасқан жаңа көпірге және «Рухани жаңғыру» орталығына барды. Орталықта жаңа қаланы игеру жобасы, «Нұрлы жер», бағдарламаларының орындалуы, «Жұмыспен қамту жол картасы», «Ауыл ел бесігі», «Өңірлерді дамыту», «Нұрлы жол» мемлекеттік бағдарламалары аясында жол көлік инфрақұрылымын дамыту бойынша атқарылып жатқан және орталықтандырылған жылу жүйелерінің жұмыстарымен танысты.
Сырдария өзенінің сол жағалауындағы аумақта жаңа қала бұл – 1532 га аумақ. Оның ішінде 537 га тұрғын үй құрлысына арналған. Жалпы 3 млн.шаршы метрден астам тұрғын үй болады деп жоспарлануда. Оның ішінде 1 млн.шаршы метр тұрғын үй 2025 жылға дейін пайдалануға беріледі. Нәтижесінде 50 мыңға жуық адам жаңа пәтерлермен қамтамасыз етіледі. Жоба толық іске асырлыған жағдайда 155 мыңнан астам қала тұрғыны үй-жаймен қамтамасыз етіледі. Сонымен қатар, жоба бойынша 16 жаңа мектеп, 12 балабақша, 4 денсаулық сақтау мекемесі, сондай-ақ спорттық және әлеуметтік-мәдени ғимараттар салу жоспарланды.
«Нұрлы жер» мемлекеттік бағдарламасы аясында тұрғын үй құрылысы мен инженерлік-коммуникациялық инфрақұрылым желілерін дамытуға мемлекеттік бюджеттен қаржы бөлінген. 
Сатып алу құқығынсыз жалға берілетін тұрғын үйлердің құрлысына бөлінген қаржыға 815 пәтерді құрайтын 20 тұрғын үйдің құрлысы жүргізілуде. Оның ішінде, Қызылорда қаласында 725 пәтерді құрайтын 15 тұрғын үй, Шиелі ауданында 90 пәтерді құрайтын 5 үй. Кредиттік тұрғын үйлер бойынша барлығы 755 пәтерді құрайтын 68, жеке коммерциялық құрылыс салушылар есебінен барлығы 376 пәтерді құрайтын 10 тұрғын үйдің құрылысы жүргізілуде. 
Б. Атамқұлов көтерілген мәселелер бойынша индустрия және инфрақұрылымдық даму министрлігі тарапынан қолдау көрсетілетінін айтты.
<img src="https://kyzylorda-news.kz/wp-content/uploads/2020/11/fb_img_1605384600382.jpg" alt="" />
<img src="https://kyzylorda-news.kz/wp-content/uploads/2020/11/fb_img_1605384592669.jpg" alt="" />
<img src="https://kyzylorda-news.kz/wp-content/uploads/2020/11/fb_img_1605384575832-1.jpg" alt="" />

Қызылордаға ҚР Индустрия және инфрақұрылымдық даму министрі Бейбіт Атамқұлов келді

Kyzylorda-news.kz. 15 қарашада ел аумағының басым бөлігінің ауа-райына солтүстік өңірлерден басталатын циклон әсер ететін болады. Соның әсерінен қар жауады.
Кей жерлерде бұрқасын, желдің күшеюі, тұман, көктайғақ күтіледі, деп хабарлайды Қазгидромет.
Қызылорда облысының кей жерлерінде, көктайғақ болуы мүмкін.

Қазақстан және Қызылорда облысының жаңалықтары