<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a>&nbsp;Бүгін Қызылорда қаласының әкімі болып Қазантаев Ғанибек Қонысбекұлы тағайындалды.
Бүгін облыс әкімі Гүлшара Әбдіқалықова Қызылорда қаласы әкімдігінде өткен актив жиынында жаңа қала әкімін таныстырды. Қазақстан Республикасы Президенті Әкімшілігі мен Қызылорда қалалық мәслихатының келісімдері бойынша облыс әкімінің 2021 жылдың 8 сәуірдегі өкімімен Қызылорда қаласының әкімі лауазымына Қазантаев Ғанибек Қонысбекұлы тағайындалды.
Ғанибек Қазантаев 1960 жылы Қызылорда облысында туған. Жамбыл гидромелиоративтік-құрылыс институтын «инженер-құрылысшы» және Қорқыт ата атындағы Қызылорда мемлекеттік университетін «мұнай және газ кеніштерін игеру» мамандықтары бойынша бітірген.
Еңбек жолын 1980 жылы Жалағаш аудандық 9-шы жылжымалы механизацияланған колоннаның мастері ретінде бастаған. 1983-1992 жылдары Қызылорда облысындағы құрылыс ұйымдарында мастер, аға жұмыс өндіруші, өндіріс-техникалық бөлімінің бастығы, 3-ші ауданаралық мамандандырылған жылжымалы механизацияланған колоннаның бас инженері.
1992-2013 жылдары «Нефтегазстрой Кызылорда» корпорациясының президенті, «Ай-Дан» жауапкершілігі шектеулі серіктестігі бас директорының орынбасары, «ССК «Ақмешіт» акционерлік қоғамының президенті, «Ай-Дан Мұнай» жауапкершілігі шектеулі серіктестігінің атқарушы директоры, «Сырдариямұнай» акционерлік қоғамының бас директоры, «Транснефтьсервис» БК» жауапкершілігі шектеулі серіктестігінің бас директоры, «Kazpetrol Group» жауапкершілігі шектеулі серіктестігінің атқарушы директоры.
2013-2019 жылдары Сырдария ауданының әкімі қызметін атқарған.
2019 жылғы қыркүйек айынан бастап ҚР Энергетика министрлігінің Мұнай-газ кешеніндегі мемлекеттік инспекциясының оңтүстік өңіраралық басқармасының басшысы қызметін атқарып келді.
Облыс әкімі Гүлшара Әбдіқалықова жаңа басшының қызметіне сәттілік тіледі.
<img src="https://kyzylorda-news.kz/wp-content/uploads/2021/04/170687420_3265631236873256_5393487344523959747_n.jpg" alt="" />
<img src="https://kyzylorda-news.kz/wp-content/uploads/2021/04/170477889_3265657650203948_1024045528193236775_n.jpg" alt="" />

Қызылорда қаласының әкімі тағайындалды

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Қызылорда облысының тұрғындары Әлеуметтік медициналық сақтандыру қорына 17,3 млрд теңге аударды.
<blockquote>
 «Жүйе іске қосылған 2017 жылдың 1 шілдесінен 2021 жылдың 1 сәуіріне дейінгі аралықта Қызылорда облысының тұрғындары әлеуметтік медициналық сақтандыру қорына 17,3 млрд теңге аударды, оның 13,2 млрд теңгесі (76,3%) жұмыс берушілердің аударымдары болса, қалған 4,1 млрд теңге (23,7%) жеке кәсіпкерлер мен азаматтық-құқықтық келісімшарт негізінде еңбек ететін тұлғаларға тиесілі», – деп хабарлады «Әлеуметтік медициналық сақтандыру қоры» КЕАҚ Қызылорда облысы бойынша филиалының директоры Бақыт Исмаханбетов.
</blockquote>
Жарна төлеу жағынан Қызылорда қаласы, Шиелі мен Жанақорған аудандар көш бастап тұр.
Жинақталған қаржы сенімгерлік басқару туралы келісім бекітілген Ұлттық банкте сақталады және МӘМС пакеті шеңберіндегі қызметтер ақысын төлеуге жұмсалуда.

МӘМС: Қызылордалықтар 17,3 млрд теңге аударды

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Тәуелсіздіктің 30 жылдық мерейтойы аясында адамның ғарышқа алғашқы ұшуына 60 жыл толуына орай Қызылорда облыстық Қазақстан халқы Ассамблеясының жанындағы «Жаңғыру жолы» жастар қозғалысының ұйымдастыруымен, этномәдени бірлестік өнер ұжымдарының қатысуымен мерекелік концерт өтті.
Концертке қала тұрғындары, этномәдени бірлестіктің жетекшілері мен белсенділері, жастар қатысты.
Мерекелік концерт аясында ғарышты көрген тұңғыш адам – Юрий Гагарин, әлемдегі ғарышқа ұшқан жалғыз әйел – Валентина Терешкова туралы қызықты мағлұматтарға толы бейнесюжеттер көрсетілді. Одан бергі уақытта қаншама ғарышкер аспан әлеміне сапар шегіп, ғылыми зерттеулер жүргізді. Соның ішінде Қазақстанның үш азаматы Тоқтар Әубәкіров, Талғат Мұсабаев және Айдын Айымбетов туралы деректер айтылды.
«Ғарышқа сапар» мерекелік кешіндегі әсем ән, әдемі би көрерменге ерекше көңіл-күй сыйлады.
<img src="https://kyzylorda-news.kz/wp-content/uploads/2021/04/05-scaled.jpg" alt="" />

Қызылордада «Ғарышқа сапар» атты мерекелік концерт өтті

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Сенат депутаттары туристік қызмет мәселелері бойынша кейбір заңнамалық актілерге өзгерістер мен толықтырулар енгізу туралы заңды қабылдады, деп хабарлайды&nbsp;<a href="https://sputnik.kz/">Sputnik Қазақстан</a>.
Заң аясында ішкі туризмді дамытуға арналған бірқатар шараларды қолға алу жоспарланып отыр.
<blockquote>
 “Қазақстанның ішкі туризмін дамыту мақсатында туристік пакетте ата-анасымен бірге жүретін 15 жасқа дейінгі балаларға алынған әуе билет құнын өтеу нормасы да қарастырылған. Тағы бір жақсы норманы айтып кетейін, мысалы, қызметшілер туристік пакет аясында демалысқа шықса, жұмыс берушілер олардың шығынын өтейді. Бұл шаралар ішкі туризмді дамытуға мүмкіндік береді”, – деді Райымқұлова сенаттың жалпы отырысында.
</blockquote>
Бұдан бөлек, заң жобасына кәсіпкерлердің шығынын өтеуге арналған нормалар да енгізіліп отыр. Олар:&nbsp;
<ul>
<li>туристік нысандар мен жол бойындағы қызмет көрсету объектілерін салуға кәсіпкерлік субъектілері шығындарының бір бөлігін өтеу;</li>
<li>туристік мақсаттарға арналған көлік құралдары мен тау шаңғысы курорттарын дамытуға арналған жабдықтар алуға шығындардың бір бөлігін өтеу;</li>
<li>туристік пакет шеңберінде әрбір келген шетелдік турист үшін туроператорларды субсидиялау;</li>
<li>санитарлық-гигиеналық қондырғыларды күтуге арналған кәсіпкерлер шығындарын субсидиялау.</li>
</ul>
<blockquote>
 “Біздің есептеулеріміз бойынша бұл шараларды жүзеге асыру экономикаға бюджеттің қосымша кірісі түрінде 135 млрд теңгені тартуға, 170 мыңнан астам жұмыс орнын құруға және кем дегенде 1000 жобаны іске асыруға мүмкіндік береді”, – деп атап көрсетті Райымқұлова.
</blockquote>
Заң жобасында “басым туристік аумақ” деген ұғым бекітіледі. Бұл аумақтарда инвесторлар үшін ерекше жеңілдіктер жасалады. Шетелдіктерден туристік алым енгізіледі. Оның мөлшерін мәслихат, төлеу тәртібін үкімет бекітеді.
Сенат&nbsp;депутаттары&nbsp;заңды қабылдап, президентке қол қоюға жіберді.

Жұмыс берушілер қызметкер шығынын өтейді: сенат заңды президентке жіберді

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> 8 сәуірдегі жағдай бойынша Қазақстан аймақтарындағы эпидемиологиялық жағдайды бағалау матрицасы жарияланды.
«Қызыл аймақта» Нұр-Сұлтан қаласы, Алматы қаласы, Атырау, Ақтөбе, Ақмола, Алматы, Батыс Қазақстан және Қарағанды ​​облыстары тұр.
«Сары аймақта»: Шымкент қаласы, Қызылорда облысы және Павлодар облысы. Басқа өңірлер «жасыл аймақта».

Қызылорда облысы «сары» аймаққа кірді

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a>&nbsp; “Союз МС-18” ғарыш кемесін Халықаралық ғарыш станциясына ұшыру үшін “Союз-2.1а” зымыран тасығышы “Байқоңыр” ғарыш айлағына орнатылды, деп хабарлайды <a href="https://sputnik.kz/">Sputnik Қазақстан.</a>
Ұшыру алаңындағы дайындық жұмыстары қалай жүргізілгенін видеодан тамашалаңыз
“Союз МС-18” ғарыш кемесі тұңғыш ғарышкер Юрий Гагариннің есімімен аталады. Сондықтан батырдың суреті мен оның ғарышқа ұшуының 60 жылдығының ресми рәміздері зымыран тасығыштың сыртқы бөлігіне бейнеленген.
“Союз-2.1а” зымыран тасығышы мен “Союз МС-18” басқарылатын ғарыш кемесінің ұшырылуы 9 сәуірде Нұр-Сұлтан уақытымен сағат 13.42-ге жоспарланған.
Халықаралық ғарыш станциясына ұшатын 65-ші экспедиция құрамында Роскосмос ғарышкерлері Олег Новицкий мен Петр Дубров және NASA&nbsp;астронавты Марк Ванде Хай бар. Олар негізгі экипаж құрамында. Ал экспедицияның қосымша экипажының құрамында – Роскосмос ғарышкері Антон Шкаплеров пен Олег Артемьев және NASA астронавты Энн Макклейн болады.
“Байқоңыр” ғарыш айлағынан зымыран ұшыру сәтін тікелей эфирде тамашалауға болады. Тікелей эфир&nbsp;<a href="http://www.roscosmos.ru/30596/">roscosmos.ru</a>&nbsp;сайтында көрсетіледі.

Байқоңырда ғарыш кемесін ұшыруға дайындық қалай жүріп жатыр? (ВИДЕО)

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Жаңақорған ауданында қуаты 10 мегаваттық күн электр стансасының құрылысы аяқталды. Бұл туралы Энергетика министрлігінің баспасөз қызметі хабарлады.
Жобаны ресейлік «Хевел» компания­сының еншілес кәсіпорны «Хек-Кт» ЖШС іске асырды. Аталған станса күнді бақылау жүйесі бар жоғары тиімді күн модульдерімен қамтылған. Бұл жүйе фотоэлектрлік жүйе орналасуының статистикалық әдісімен са­лыстырғанда электр энергиясын өндіруді орта есеппен 20-25%-ға арттыруға мүмкіндік береді. КЭС құрылысы кезінде 100-ге жуық адам тартылып, 10 тұрақты жұмыс орны құрылды.
Былтыр «Хевел» компаниялар тобы Алматы облысында «Қапшағай» КЭС-ін (3 МВт) және «Сарыбұлақ» КЭС-ін (4,95 МВт) салған болатын. Аталған ұйым осы жылдың бірінші тоқсанында Шымкентте «Шымкент» КЭС-ін (20 МВт), Түркістан облысындағы «Кентау» КЭС-ін (50 МВт) және Қызылорда облысындағы «Жаңа­қорған» КЭС-ін (10 МВт) пайдалануға берді.
Инвестор сәуір айының соңына дейін Түр­кіс­тан облысында Шоқтас КЭС-ін (50 МВт) және Күшата КЭС-ін (10 МВт) пайда­ла­ну­ға беруді жоспарлап отыр. Бұл нысандарда негізгі жұмыстар аяқталып, іске қосу-жөндеу жұмыстары жүріп жатыр.
Осылайша, Қазақстанның оңтүстігінде «Хевел» компаниялар тобы жобаларының жиынтық қуаты 148 мегаватты құрайтын болады. 2020 жылғы қазандағы жағдай бойынша Қазақстандағы топ жобаларының жалпы көлемі 248 мегаватқа жетіп отыр.

Жаңақорғанда күн электр стансасының құрылысы аяқталды

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Қызылорда облысында мониторингтік топ жыл басынан бері 1904 нысанды тексерген. Нәтижесінде карантин талабын бұзған 137 дерек анықталып отыр. Бұл туралы Өңірлік коммуникациялар қызметінің ақпарат алаңында өткен брифингте облыстық санитариялық-эпидемиологиялық бақылау департаментінің басшысы Динара Жаңабергенова мәлімдеді.
Карантин ережелерінің бұзу дерегінің көпшілігі қоғамдық тамақтану орындарында тіркелді. Атап айтқанда, персонал келушілерге жеке қорғаныш құралдарынсыз қызмет көрсеткен, караокелер мен кальяндар жұмыс жасаған, ғимараттың толымдылығы 30 пайыздан аспауы қажет болса да, келушілердің санына шектеу қойылмаған, қызметіне тыйым салынса да компьютерлік клубтар жұмыс жасаған.
<blockquote>
 «Бүгінде 45 мониторингтік топ жұмыс істеуде. Топтың құрамына полиция департаментінің, жергілікті атқарушы органдардың, қоғам белсенділері мен еріктілер барлығы 128 маман жұмылдырылды. Қазіргі таңда, карантин талаптары еңбек ұжымдарының барлығында бірдей сақтала бермейді. Әсіресе 8 наурыз, 22 наурыз мерекелеріне орай өткізілген ұжымдық іс-шаралар кезінде карантин талаптарын сақтамаған бірқатар ұйымдар мен мемлекеттік қызметшілерге әкімшілік құқық бұзушылық кодексіне сәйкес айыппұлдар салынды», – деді Динара Олжабайқызы.
</blockquote>
Сондай-ақ, оқу жылының IV тоқсаны басталғалы бері 29 карантин талаптарын бұзушылық анықталған. Бұған қоса, халыққа бетпердесіз қызмет көрсеткендігі үшін медициналық және мемлекеттік ұйым қызметкерлеріне де әкімшілік айыппұлдар салынған.
<blockquote>
 Арнайы мониторингтік топтар карантин талаптарының сақталуын қадағалау үшін күн сайын тексеру жүргізуде. Мәселен облыс орталығының өзінде 1500-ден астам нысан мен тұрғын үй араланды. Оның ішінде, карантин талаптарын сақтамай той және басқа да рұқсат етілмеген мерекелік шаралар жасаған 83 жағдай анықталды. Және де 52 нысанға құзырлы орган арқылы әкімшілік шара көрілді. Талаптардың сақталуын қадағалау топтың жұмысы болғанымен де барлығын аралау мүмкін емес. Мониторингтік топтардың қызметі жазалау шараларынан тұрмайды. Түсіндіреміз, ескерту жасаймыз. Баршаңыздан карантин талаптарын сақтауды сұраймыз, – деді арнайы мониторингтік топтың жетекшісі Ләззат Бақтыбаева.
</blockquote>

Қызылордада карантин талабын бұзған 137 дерек тіркелді

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Қазақстанда өткен тәулікте 2586 адамда коронавирус індеті ПТР арқылы расталып ауырғаны белгілі болды, деп хабарлайды www.coronavirus2020.kz.
Аймақтар бойынша:
Нұр-Сұлтан қаласы – 578,
Алматы қаласы – 710,
Шымкент қаласы – 81,
Ақмола облысы – 98,
Ақтөбе облысы – 117,
Алматы облысы – 325,
Атырау облысы – 137,
Шығыс Қазақстан облысы – 55,
Жамбыл облысы – 39,
Батыс Қазақстан облысы – 125,
Қарағанды облысы – 160,
Қостанай облысы – 33,
Қызылорда облысы – 22,
Маңғыстау облысы – 43,
Павлодар облысы – 28,
Солтүстік Қазақстан облысы – 16,
Түркістан облысы – 19.
Жалпы ел бойынша ауырғандар саны 261503.

Қызылордада 22 адам коронавирус жұқтырды

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a>&nbsp; Синоптиктер 8 сәуір күні ел аумағында ауа райы қандай болатынын жариялады, деп хабарлайды «Қазгидромет».
ҚР басым бөлігінен атмосфералық фронттардың өтуіне байланысты тұрақсыз ауа райы сақталады.
Республикамыздың кей жерлерінде жауын-шашын жауады, тек оңтүстікте және оңтүстік-батыста және орталықта жауын-шашын жаумайды.
Кей жерлерде тұман түсіп, жел күшейеді, солтүстікте көктайғақ болады.
Солтүстік Қазақстан облысының кей жерлерінде тұман түседі, көктайғақ болады. Күндіз кей жерлерде жел екпіні – 15-20 м/с.
Ақмола, Жамбыл, Батыс Қазақстан, Қостанай, Павлодар, Қарағанды, түнде және таңертең Ақтөбе облысының кей жерлерінде тұман түседі.
Батыс Қазақстан, Қостанай, күндіз Жамбыл облысының кей жерлерінде жел қарқыны 15-20 м/с дейін күшейеді.

8 сәуірде күн райы қандай болады?

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a>&nbsp;Шекара асып шетелден білім алу әр адамның көкжиек танымын кеңейтіп, озық үлгідегі бағдарламалармен танысып, тұлғалық дамуына елеулі әсер етеді. Осы тұрғыдан сыртқы ақпаратты тез қабылдауға бейім жастар шетелге барып білім ізденуге, өзге мәдениетпен танысуға құштар болып тұрады.
Дегенмен, сырты жылтырақтың барлығы алтын бола бермейтіндігі секілді шетелден білім алудың соңы теріс көріністерге соқтыратыны да бар. Мұның нақты дәлелі тәуелсіздік жылдары қазақстандық азаматтар діни білімін жетілдірем деген ниетпен шетелдерге барып түрлі саяси, діни топтардың жетегіне еріп, рухани танымын мүлде басқа арнаға өзгертіп алды. Одан соң елге келіп, қазақ халқының тарихи сахнасында қалыптасқан мәдениеті мен дәстүріне керағар идеологияны қарқынды түрде насихаттап, өздеріне көптеген ел тұрғындарын ертіп те үлгерді.
Деструктивті көзқарастағы индивидтерді даярлайтын оқу орындардың білім беру жүйесінде әуелі ортақ құндылықтарды дәріптей отырып, ақырындап адам санасын еркін ойлаудан ажыратады. Нәтижесінде оқыту процесінен өткен азаматтар өздері «идеал» тұтатын ұстаздарының кез келген бұйрығын бұлжытпай орындайтын «солдатқа» айналып, сол жолда құрбан болуға дайын тұрады. Мұндай «солдатқа» айналған тұлғаларды саяси мақсатта ұйымдастырылған, діни терминдерді жалау еткен соғыс алаңдарына тарту оңай жүзеге асырылады.
Сондай-ақ, ораторлық қабілеттерін жетілдірген аталмыш «солдаттар» өз отандарына оралып, &nbsp;өзін ақиқаттың жаршысы ретінде таныта отырып діндарлар арасынан белгілі бір «тобырды» қалыптастырады. Бұл процес сыртқы ықпалды күштерге өз мақсат-мүдделерін іске асырып отыруға тиімді құбылыс болмақ.
Аталмыш сипаттағы діни ағымдар ислам әлемінде ғана емес, христиандық бағытта да кездесетінін естен шығармаған жөн. 
Сондықтан шетелдік оқу орындарынан білім алғысы келген азаматтар әуелі діни танымын отандық білім ордаларынан қалыптастырып алып, содан кейін ҚР Дін істері комитеті мақұлдаған шетелдік университтерге барып жалғастырғаны абзал.
Осыған қатысты ҚР Дін істері комитеті 2014 жылы «Шет елдерге оқуға кететін азаматтарға арналған дін мәселелері жөніндегі Жадынамасын» әзірледі.&nbsp; Шетелде діни білім алуға ниетті азаматтар осы құжатпен міндетті түрде танысуы керек. Себебі, бұл құжаттағы нұсқаулықтарды толық орындаған әрбір азамат әуелі өз жеке қауіпсіздігін сақтай алады және түрлі топтардың құрығына ілінбейді. 
Сондай-ақ, отандық оқу орындар Әл-Фараби атындағы Қазақ ұлттық университеті, Л.Гумилев атындағы Еуразия ұлттық университеті, 
«Нұр-Мүбарак» Египет Ислам мәдениеті университеті, Е.Бөкенов атындағы Қарағанды мемлекеттік университеті, Қ.А.Яссауи атындағы Халықаралық қазақ-түрік университеті, Шет тілдері және іскерлік карьера университетінен «Дінтану», «Исламтану», «Теология» мамандықтарын игеруге болады.
Бұдан бөлек, рухани ізденістегі, өздерін діни мәселелер мазалап жүрген азаматтар үшін ҚР «Діни қызмет және діни бірлестіктер туралы» Заңына сәйкес ҚР Әділет министрлігіне тіркелген, базалық сапасы қалыптасқан, Қазақстан Республикасы аумағында ислам дінін насихаттауға құқық берілген – Қазақстан мұсылмандары діни басқармасы жұмыс жасайды. Қазақстандағы ресми тіркелген діни оқу орындар туралы ақпаратты осы басқарманың өкілдерінен тікелей сұрай алады және сайттарынан алуға мүмкіндіктер жасалған. 
&nbsp; 
&nbsp; 
Дархан ЕРНАЗАРОВ
**Қызылорда облысы дін істері басқармасының маманы 
**

Шетелде діни білім алудың қауіптілігі қандай?

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a>&nbsp; Бүгін А.Тоқмағамбетов атындағы қалалық мәдениет үйінде сұлу Сырдың ақын қызы, халықаралық «Алаш» әдеби сыйлығының иегері Қатира Жәленованың «Өмірімнің өрнегі өлеңімде» атты шығармашылық кеші өтті.
Қызылордалықтар тағылымды шараны Қатира Сыздыққызының 70 жылдық мерейтойына орай ұйымдастырған. Әдеби мазмұны бай, әсерлі кешке қала әкімінің орынбасары Асқарбек Есжанов және аймағымыздың белгілі қаламгерлері, ақынның достары мен шәкірттері де қатысты.
<blockquote>
 Өлең сүйер қауым жиылған кешті қала әкімінің орынбасары Асқарбек Есжанов ашып, мерейтой иесіне «Сіздің жырларыңыз сан алуан тақырыпты қамтиды. Өмірін өлеңмен өрнектеп, жүректегі қуаныш, мұңын, нәзік сезімін өлең жолдарына сыйғыза білген талантты ақын ретінде жыр сүйер қауым үшін орныңыз ерекше» – деп, ыстық ықыласын білдіріп, ақын шығармашылығына зор табыс тілеп, сый-құрмет көрсетті.
</blockquote>
Сондай-ақ, қалалық ардагерлер кеңесінің төрағасы, ақынның замандасы Сайлаубай Әбішев ақын шығармаларындағы адами асқақ сезім, өрелі ой, өмірлік рухани құндылықтар туралы пікірін ортаға салып, Қатира Жәленоваға құттықтау лебізін білдірді.
Ал ҚР Мәдениет саласының үздігі, белгілі айтыскер ақын Серік Ыдырысов «Қатираның қаламы» атты арнауын оқып, ақын қаламынан туған қуатты жырлардың өнегелі де өміршеңдігін өлеңге арқау етті.
Рухани шарада жас өрендер ақынның өлеңдерін оқып, қаламгер сөзіне жазылған әндер орындалды. Бұл кеште жас күйшілер де өз өнерлерін ортаға салып, «Жастар театрының» актерлары көрерменге сахналық қойылымдарын ұсынды.
Шара соңында ақын Қатира Жәленова шығармашылық кешін ұйымдастырушыларға және қатысушыларға алғысын білдіріп, ризашылығын жеткізді.
<img src="https://kyzylorda-news.kz/wp-content/uploads/2021/04/169795300_2809028676030539_428897301687455867_n.jpg" alt="" />

Қазақстан және Қызылорда облысының жаңалықтары