<a href="https://kyzylorda-news.kz/">Kyzylorda-news.kz</a>. Ауыр атлетикадан бірнеше дүркін әлем чемпионы Илья Ильин қызылордалықтарға үндеу жасады. Ол шомылу маусымының соңына дейін барлық су айдынындағы қауіпсіздік шараларын сақтауға шақырды.
Зілтемірші өзінің бейнеүндеуінде су айдыны маңындағы демалыс кезінде өзіне және өз балаларына сақ болу керектігін атап өтті.
<blockquote>
 «Егер сіз бос уақытыңызды су айдыны жағасында өткізуді шешсеңіз, онда ол демалыс орны жабдықталған жағажай болуы керек. Оған қоса балалармен бірге баратын болсаңыз, онда балаларды ұдайы көзден таса қылмаңыз», – деді Илья Ильин.
</blockquote>
Қызылорда облысы Төтенше жағдайлар департаментінің қызметкерлері су айдыны жағасындағы қауіпсіз жүріс-тұрыс ережелерін ұдайы сақтау қажеттігін ескертеді:
Балаларды су айдыны жағасында бір минутқа да қараусыз қалдырмаңыз! Су айдыны маңындағы демалысыңыз қайғылы жағдайға айналмауы үшін өз қауіпсіздігіңізді нығайтыңыз!

Ауыр атлет Илья Ильин үндеу жасады

<a href="https://kyzylorda-news.kz/">Kyzylorda-news.kz</a>. Қасым-Жомарт Тоқаев Орталық Азия мемлекеттері тәуелсіздігінің 30 жылдығы қарсаңында өтіп жатқан кездесудің ерекше екенін атап өтті, деп хабарлайды Ақорданың баспасөз қызметі.
<img src="https://kyzylorda-news.kz/wp-content/uploads/2021/08/2_9-scaled.jpg" alt="" />
Осы уақыт аралығында мемлекеттеріміз қалыптасып, әлеуметтік-экономикалық дамуда айтарлықтай табыстарға қол жеткізді және мәдени-рухани мұрамызды жаңғыртты.
<blockquote>
 «Тәуелсіздіктің алғашқы жылынан бастап, біз иық тіресе, бір-біріміздің табыстарымызға қуанып, қиын кезеңдерде өзара қолдау көрсетіп келеміз. Солай болуы – заңдылық. Бізді ғасырлар бойы қалыптасқан тарихымыз, рухани жақындығымыз, ортақ салт-дәстүрлеріміз байланыстырып келеді. Мемлекеттер басшылары&nbsp;Консультативтік кездесуінің форматы аймақтың ынтымақтастығына тың серпін береді. Нұр-Сұлтан мен Ташкентте өткен саммиттердің нәтижесінде байланыстарымыздың тұрақты, дәстүрлі, ең бастысы, өзіндік сипаты қалыптасты. Аймақтағы ынтымақтастықты арттырудың негізі – жоғары деңгейдегі сенімді диалог», – деді Қасым-Жомарт Тоқаев.
</blockquote>
<img src="https://kyzylorda-news.kz/wp-content/uploads/2021/08/3_8-scaled.jpg" alt="" />
Қазақстан Президенті мемлекеттер арасындағы экономикалық байланыстардың нығая түскенін атап өтті. Бірлескен кәсіпорындардың саны артып, өнеркәсіп, энергетика, машина жасау, ауыл шаруашылығы және басқа да салалардағы ірі жобалар іске асырылып келеді.
<blockquote>
 «Қазақстанның Орталық Азия мемлекеттерімен тауар айналымы соңғы бес жылдың ішінде бір жарым есе артып, 4,6 миллиард долларды құрады. Жүйелі диалог және үйлесімді іс-әрекеттер – ортақ мәселелерді шешудің тиімді әрі баламасыз тетігі», – деді Мемлекет басшысы.
</blockquote>
Президенттің айтуынша, әлем елдері күрделі кезеңді бастан өткеріп жатыр. Ауғанстандағы қазіргі жағдай ерекше алаңдатып отыр. Коронавирус індеті жағдайды одан сайын ушықтыруда. Қасым-Жомарт Тоқаев жаңа кезеңде Орталық Азияда тұрақты дамуды қамтамасыз ету үшін аймақ елдері бірлесіп әрекет етуі тиіс деп санайды.
<blockquote>
 «Елдеріміз арасындағы тауар айналымын арттыру, оның құрылымын жақсарту және жеткізілетін тауар түрлерін кеңейту бойынша жұмысты жандандыру қажет. Қазақстан Орталық Азия елдеріне экспорттық тасымалды 1 миллиард АҚШ долларына дейін ұлғайта алады. Мұндай қор аймақтың басқа да елдерінде бар екеніне сенімдімін. Орталық Азияның көлік дәліздеріне интеграцияланған тауар өткізудің бірыңғай желісін құруда күш жұмылдыруды ұсынамыз. Бұл көтерме-бөлу және агрологистикалық орталықтардан тұратын жаңа инфрақұрылым тауарларымызды Еуразия экономикалық одақтың, ТМД және үшінші мемлекеттердің нарығына шығаруға мүмкіндік береді. Маусымаралық кезеңде өз нарығымызды да ауыл шаруашылығы өнімдерімен қамтамасыз етуге жағдай жасайды», – деді Президент.
</blockquote>
Мемлекет басшысы табысты серіктестіктің үлгісі ретінде Қазақстан мен Өзбекстанның ортақ шекарасында құрылған «Орталық Азия» халықаралық сауда-экономикалық ынтымақтастық орталығын атап өтті. Қасым-Жомарт Тоқаев президенттерді аймақтық экономиканың стратегиялық маңызды салаларына инвестиция тарту үшін күш-жігерді біріктіруге шақырды.
Президент ұлттық экономикаларды инновациялық-цифрлық платформаға ауыстыру дамудың баламасыз жолы деп атап өтті. Сондай-ақ, Қазақстанда өнеркәсіпті, энергетика, көлік және әлеуметтік салаларды цифрландыру, «ақылды» қалаларды дамыту жобалары белсенді жүзеге асырылып келе жатқанын айтты.
Қасым-Жомарт Тоқаевтың пікірінше, аймақ мемлекеттері Азия мен Еуропаны байланыстырушы көпір рөлін атқарып отыр. Бұл ретте, Қазақстан Транскаспий халықаралық көлік дәлізінің транзиттік әлеуетін біртіндеп дамытуда. Одан бөлек, «Қытай – Еуропа – Қытай» трансқұрлықтық бағдарының қазақстандық бөлігінің әлеуеті нығайып келеді.
<blockquote>
 «2025 жылға дейін екінші жолдардың құрылысы аяқталып, «Достық – Мойынты» теміржол учаскесі толықтай электрмен жабдықталады. Нәтижесінде аталған бағыттың өткізу мүмкіндігі бес есе ұлғаяды. Жобаға 2 миллиард АҚШ долларынан астам қаржы салынады. «Қазақстан – Түрікменстан – Иран» теміржолы да үлкен мүмкіндіктер береді. Елдеріміз үшін Парсы шығанағы мемлекеттеріне&nbsp;шығудың қысқа жолы осы. Жыл сайын аймақтағы жүк тасымалы артып келе жатқандықтан Трансазиялық теміржол магистралінің оңтүстік дәлізін дамыту қажеттігі туындап отыр. Мысалы, «Дарбаза – Мақтаарал» теміржол желісін іске қосу жүк тасымалы мерзімін 1,5 есе қысқартады. Оңтүстік Азия нарықтарына жол ашатын «Мазари – Шариф – Кабул – Пешавар» теміржолы құрылысы&nbsp;жобасының келешегі бар деп есептейміз. Қазақстан және Түрікменстан айлақтары қуатының әлеуеті зор», – деп атап өтті Мемлекет басшысы.
</blockquote>
Соңғы үш жылдың ішінде Транскаспий бағыты арқылы өтетін контейнерлердің легі 13 есеге артты. Қазақстан Ақтау айлағының базасында әлемнің озық операторларын тарта отырып, «контейнерлік хабты» ашуды жоспарлап отыр (Cosco, Maersk, CMA CGM және т.б.). Еліміз аймақ ішінде көлік коммуникацияларын дамыту мақсатында өзара тиімді ынтымақтастық жасасуға әзір.
<blockquote>
 «Өзбекстанмен арадағы жаңа жобалар белсенді түрде пысықталып жатыр. Ең алдымен, «Түркістан – Шымкент – Ташкент» жоғары жылдамдықтағы теміржол құрылысы туралы айтып отырмыз (жоба құны шамамен 70 миллион АҚШ доллары). Бұдан бұрын «Бейнеу – Ақжігіт» автожолының құрылысы аяқталған болатын. Аталған бағыт арқылы өзбек серіктестерімізге Құрық және Ақтау айлақтарына шығатын қысқа жол ашылды. «Түрікменбашы – Гарабоғаз – Қазақстанның шекарасы» автомагистралінің әлеуеті зор. Осы бағдар Түрікменстанмен арадағы жолаушы және жүк тасымалын арттыруға мүмкіндік береді. Жалпы, Дүниежүзілік банктің бағалауынша, Орталық Азиядағы көлік коммуникацияларын дамыту барлық елдердің ішкі жалпы өнімін 15 пайызға арттыруға жағдай жасайды. Бұл – ауқымды қор. Осы ретте, күш-жігерімізді біріктіре отырып, аймақтың көлік байланысын арттырып, дәліз жағдайын жақсартуымыз қажет», – деді Қазақстан Президенті.
</blockquote>
Мемлекет басшысы су ресурстарымен қамтамасыз ету мен аймақтың био және экожүйесін сақтауды Орталық Азиядағы негізгі мәселенің бірі ретінде атап өтті.
<blockquote>
 «Біз қазірдің өзінде климаттың жаһандық жылынуы салдарын судың азаюы мен құрғақшылық арқылы көріп отырмыз. Бұл, әсіресе, Сырдария бассейнінде ерекше сезіліп отыр. Кейінгі екі жылдағы вегетациялық кезеңде Шардара су қоймасына жиналатын су көлемі 40 пайызға, Кіші Арал теңізіне келетін су мөлшері 60 пайызға азайып кетті. Трансшекаралық өзендер ресурстарын тиімді басқару мен алдыңғы қатардағы технологиялық шешімдерді енгізу үшін бірлескен&nbsp;су саясатын енгізу маңызды. Біздің өзара іс-қимылымыз тараптардың мүддесін ескерген және өзара міндеттерді толықтай орындайтын, тең дәрежеде қолдану принципі негізінде жүзеге асуы тиіс. Су – Орталық Азия елдерінің арасын ашудың басы емес, керісінше, біріктіретін ресурс болуы керек», – деді Қасым-Жомарт Тоқаев. &nbsp;
</blockquote>
Баяндамада коронавирус пандемиясы&nbsp;сынағы кезінде халықтарымыздың бірлігі мен бір-біріне деген көмегі туралы айтылды.
<blockquote>
 «Қазақстан достық пен ынтымақтастық аясында бауырлас мемлекеттер мен халықтарға барынша көмек көрсетті және жәрдемдесе де береді. Ғылыми-зерттеу саласында жинақталған тәжірибемізбен бөлісуге де әзірміз. Түрікменстан Президентінің вирусология және эпидемиология орталығын құру туралы ұсынысын қолдаймыз. Шын мәнінде,&nbsp;осы салада ғылыми ынтымақтастықты күшейту маңызды. Жақында қазақ вакцинасы Қырғызстанға жіберілді. Ресейлік «Спутник-V» вакцинасын өндіру де жолға қойылды», – деді Мемлекет басшысы.
</blockquote>
Қасым-Жомарт Тоқаев терроризм, діни экстремизм, есірткі тасымалы, трансұлттық қылмыс сияқты сынақтардың сақталып отырғанына тоқталды.
<blockquote>
 «Бірлігімізді бекемдеп, бір-бірімізбен болмашы бәсекелестікке жол бермеуіміз қажет. Бұл мәселеде ХХІ ғ. Орталық Азияны дамыту мақсатындағы достық, тату көрші, ынтымақтастық жөніндегі Келісімге тез арада қол қоюдың маңызы артып келеді. Тараптардың жуық арада осынау тарихи келісімге қол қоюға дайын болуын құптаймыз. Халықаралық аса маңызды мәселелерде барынша ортақ ұстаным білдірсек, әлемдік қауымдастыққа келісім тапқан ортақ тәсілімізді көрсетер едік. Халықаралық алаңдардағы бәсекелестік ұлттық мүдделерімізге қайшы келеді», – деп атап өтті Қазақстан Президенті. &nbsp;
</blockquote>
Алдағы уақытта бауырлас халықтарды жақындата түсуде мәдени-гуманитарлық өзара іс-қимылдар маңызды рөл атқарады. Мемлекет басшысы туыстық байланысты сақтап, күшейту және мәдени-гуманитарлық күн тәртібін жаңа мазмұнмен толықтыру жөніндегі пікірін айтты. Сондай-ақ Қазақстан білім саласындағы өзара іс-қимылды кеңейтуді қолдайды.&nbsp;&nbsp;
<blockquote>
 «Көңіл бөлуді қажет ететін тағы бір сала – елдеріміздің жастары арасындағы байланысты дамыту. Тереңде жатқан тарихи қарым-қатынасымызды сақтап қалуда жастарымыз маңызды рөл атқарады. Студенттер алмасуды кеңейтуді, олардың жақсы білім алуға ұмтылысын жан-жақты қолдауды, Орталық Азия азаматтарының Қазақстандағы алдыңғы қатарлы жоғары оқу орындарында білім алуына квота көбейтуді маңызды деп есептейміз», – деді Қасым-Жомарт Тоқаев.
</blockquote>
Барлық ұсыныстар аймақтағы мемлекеттер мен халықтардың мүддесі жолында жан-жақты әрі өзара тиімді ынтымақтастықты тереңдете түсуге деген шынайы ниеттен туындағаны айтылды.
<blockquote>
 «Біздің басты мақсатымыз Орталық Азияны тұрақты, экономикалық жағынан дамыған, өркендеген өңірге айналдыру. Достық, тату көрші әрі өзара сенім негізінде барша қиындықтарды еңсеріп, алға қойған игі мақсатымызға қол жеткізе алатынымызға сенемін», – деп сөзін қорытындылады Мемлекет басшысы.
</blockquote>
Консультативтік кеңесте, сондай-ақ, Түрікменстан Президенті Гурбангулы Бердімұхамедов, Қырғыз Республикасының Президенті Садыр Жапаров, Тәжікстан Президенті Эмомали Рахмон, Өзбекстан Президенті Шавкат Мирзиёев, БҰҰ Бас хатшысының Орталық Азиядағы арнайы өкілі Наталья Герман сөз сөйледі.
Кездесу қорытындысы бойынша Бірлескен мәлімдеме қабылданды.

Қасым-Жомарт Тоқаев Орталық Азия елдері басшыларының Консультативтік кездесуіне қатысты

<a href="https://kyzylorda-news.kz/">Kyzylorda-news.kz</a>.&nbsp;Жалағаш ауданындағы 2 мектептің күрделі жөндеу жұмыстары жаңа оқу жылы басталғанға дейін аяқталады деп күтілуде. Өңірлік коммуникациялар қызметінің баспасөз алаңында өткен брифингте Қызылорда облыстық білім басқармасы басшысы Ақзира Қасымова ауылдардағы мектептердің жаңа оқу жылына дайындығы туралы айтты.
Аудандағы Таң ауылдық округінде орналасқан №118 мектептің жөндеу жұмыстары «Ауыл ел бесігі» жобасы арқылы жүзеге асуда. Бұл білім беру ұйымына республикалық және жергілікті бюджеттен қаржы бөлінген. Ал Есет батыр ауылындағы №124 орта мектептің күрделі жөндеу жұмыстарына облыстық бюджеттен қаржы қарастырылған.
<blockquote>
 «Есет батыр ауылындағы №124 мектепте 353 оқушы білім алады. Мектеп ғимараты 140 орындық және 200 орындық 2 блоктан тұрады. Биылғы жылдың мамыр айында мектептің 200 орындық корпусының күрделі жөндеу жұмыстарына облыстық бюджеттен қаражат бөлініп, мемлекеттік сатып&nbsp;алу заңдылығына сәйкес хабарландыру жарияланды. Құрылыс жұмыстары 1 тамызда басталды. », – дейді Ақзира Қасымова.
</blockquote>
Сонымен қатар жаңа оқу жылына Арал ауданы Сексеуіл кентіндегі 300 орындық мектеп пен 2 жеке мектепті пайдалануға беру жоспарланып отыр.

Қызылорда: Ауылдағы мектептер жаңа оқу жылына дайын ба?

<a href="https://kyzylorda-news.kz/">Kyzylorda-news.kz</a>.&nbsp;Сырдария өзенінің сол жағалауынан 2022-2023 жылдары мемлекеттік бағдарлама аясында 9 және 12 қабатты үйлер салынады деп жоспарлануда. Бұл туралы Өңірлік коммуникациялар қызметінде өткен баспасөз конференциясында облыстық құрылыс, сәулет және қала құрылысы басқармасы басшысының орынбасары Арнұр Нұрмағанбетов хабарлады.
Брифингте құрылыс саласында ағымдағы жылы іске асатын жобалар да айтылды. Мәселен, биыл облыста «Нұрлы жер» мемлекеттік бағдарламасы аясында 2158 пәтерді құрайтын 105 тұрғын үйдің құрылысы жүргізілмек. Ал жыл аяғына дейін 1608 пәтерді құрайтын 94 тұрғын үй пайдалануға беріледі деп күтілуде.
<blockquote>
 «Нұрлы жер» мемлекеттік бағдарламасы аясында ағымдағы жылы 695 пәтерді құрайтын 49 арендалық тұрғын үй пайдалануға беріледі. Оның ішінде 232 пәтер халықтың әлеуметтік жағынан осал топтарына табысталса, 463 пәтер аз қамтылған көп балалы отбасыларына беріледі. Сонымен қатар, ҚР Ұлттық қор есебінен бөлінген 2.8 млрд. теңгеге аз қамтылған көп балалы отбасылар үшін 342 жалға берілетін пәтер сатып алынады», – деді А.Нұрмағанбетов
</blockquote>

Қызылорда: Сол жағалаудан 9 және 12 қабатты үйлер салынады

<a href="https://kyzylorda-news.kz/">Kyzylorda-news.kz</a>. Қызылорда облысындағы барлық мектеп бейнебақылау камераларымен қамтылды. Бұл туралы облыстық білім басқармасының басшысы Ақзира Қасымова хабарлады.
Қызылорда облысында 304 мектеп&nbsp;бар. Оның 10-ы жеке мектеп. Қазіргі таңда аймақтағы мектептер толығымен бейнебақылау&nbsp;камераларымен қамтамасыз етілген. 2021 жылы 35 мектеп бейнебақылау жүйесімен жабдықталып,&nbsp;жедел басқару орталығына қосылады.
<blockquote>
 «Облыстағы&nbsp;110&nbsp;мектепте ювеналды&nbsp;полиция қызметкері жұмыс атқарады. Барлық білім&nbsp;беру&nbsp; ұйымдарында&nbsp;882&nbsp;қарауыл жұмыс жасайды. Облыс орталығындағы 42&nbsp;білім&nbsp;беру&nbsp;ұйымдарында турникет, мамандандырылған күзет және&nbsp;дабыл түймелерімен қамту шаралары жүзеге асырылуда», – дейді Ақзира Қасымова.
</blockquote>
Айта кетейік, қазіргі күні облыста 29 843 педагог бар. Мұғалімдер арасында вакцина қабылдау 95,7 пайызға орындалып отыр. Яғни, 28 585 педагог екпе қабылдаған.
Сонымен қатар, білім беру ұйымдарындағы 10885 техникалық қызметкер 100 пайыз вакцина салдырды.

Ақзира Қасымова: Биыл 35 мектеп бейнебақылау жүйесімен жабдықталды

<a href="https://kyzylorda-news.kz/">Kyzylorda-news.kz</a>. Қызылордада құтқарушылар Сырдарияда өзенінде суға түсіп, жағалауға жете алмай қалған 12 жастағы жасөспірімнің өмірін сақтап қалды.
5 тамызда сағат 19.00-дер шамасында құтқарушылар Сырдария өзенінде кезекшілік атқарған. Сол сәтте Сырдария өзеніне суға шомылып, жағалауға жете алмай қалған жасөспірімді байқады.
<blockquote>
 «Құтқарушылар дереу іске кірісті. Жасөспірімді жағалауға шығарды. Оқиға орнында құтқарушылар судан шығарылған азаматқа психологиялық көмек көрсетті. Қазір жағдайы жақсы», – деп мәлім етті Қызылорда облыстық Төтенше жағдайлар департаменті Өрт сөндіру және авариялық-құтқару жұмыстары қызметінің баспасөз хатшысы Әлия Ережепова.
</blockquote>

Қызылордада дария жағалауына жете алмай қалған жасөспірім құтқарылды

<a href="https://kyzylorda-news.kz/">Kyzylorda-news.kz</a>. Жаңа оқу жылында жаңалық көп. Биылдан бастап балалар бастауышты «Әліппемен» бастап, қайтадан «Ана тілі» оқулығын оқитын болды.
1 қыркүйекте мектеп табалдырығын алғаш аттаған бүлдіршіндерге «Әліппе» салтанатты түрде табысталады. Бұл туралы бүгін Өңірлік коммуникациялар қызметінде өткен баспасөз конференциясында облыстық білім басқармасының басшысы Ақзира Қасымова мәлімдеді.
1 сынып оқушыларының оқулықтары толығымен жаңартылған. Республикалық бюджеттен бөлінген 1,1 млрд теңгеге жаңа оқулықтар алынып, бүгінде барлық оқушыларға түгелімен таратылды. Мектеп формасына қойылар талап та қатаң болмайды. Білім алушылар үшін мектеп формасымен қатар классикалық үлгідегі киімдерді киюге рұқсат етіледі.
<blockquote>
 «Облыс бойынша 12 940 балаға тегін мектеп формасы, аяқ киім және оқуға қажетті құрал-жабдықтар берілмек. Ол үшін арнайы 5 категория түзіліп, жәрдемді қажет ететін отбасылар тізімі жасақталды. Осы тізімге енген әрбір ата-ана басқарма тарапынан келісілген тігін шеберханаларына барып, балаларын киіндіре алады. Айта кету керек, ата-аналардың есепшотына ешқандай қаржы аударылмайды. Заң аясында төтенше жағдай салдарынан шұғыл жәрдемді қажет ететін отбасыларға ғана ақшалай көмек беріледі», – деді Ақзира Бақтыбайқызы.
</blockquote>

Ақзира Қасымова: 1 қыркүйекте «Әліппе» салтанатты түрде табысталады

<a href="https://kyzylorda-news.kz/">Kyzylorda-news.kz</a>. Биыл Қызылорда облысында 17 746 бала 1 сыныпқа барады. Бұл туралы Өңірлік коммуникациялар қызметінде өткен брифингте облыстық білім басқармасының басшысы Ақзира Қасымова мәлімдеді.
Биылғы жаңа оқу жылына дайындық жұмыстары қазіргі таңда жоспарға сәйкес жүргізілуде.
<blockquote>
 «Алдағы оқу жылында 294 мемлекеттік және 10 жеке мектепте 173&nbsp;796 оқушы білім алады деп жоспарлануда. Облысы көлемінде алдағы оқу жылына 5 тамызға дейінгі мәлімет бойынша 1 сыныпқа 17 746 бала қабылданды. Оның 1066-ы жеке мектепке барады. Оның ішінде 16916 баланың құжаты электронды форматта e-gov порталы арқылы келіп түссе, 830 құжат қолма-қол өткізілді», – дейді Ақзира Қасымова.
</blockquote>
Басқарма басшысының айтуынша, жаңа оқу жылында оқулықтармен қамтамасыз етуге 1,1 млрд. теңге қаржы бөлініп, 15 баспамен келісім шарт жасалды. Қазіргі таңда барлық мектептегі кітаптар ата-аналарға түгелімен таратылды. Сонымен қатар, биылғы жаңа оқу жылына жаңа оқулықтар әкелінуде.
Айта кету керек, 1 сынып оқушыларының оқулықтары толығымен жаңартылаған.
Қазіргі таңда білім беру ұйымдарында санитарлық талаптарды сақтау мақсатында дизенфекциялық кілемше, кварц шамдары, санитайзерлер орналастыру, антисептиктермен өңдеу құрал-жабдықтармен қамтамасыз етілді.
Сонымен қатар, облыс бойынша барлық мектепке дейінгі ұйымдар мен кәсіптік және техникалық білім беру ұйымдарында «ASHYQ» қосымшасына қосылу жұмыстары аяқталды. Нәтижесінде 294 мектеп пен 669 балабақша «ASHYQ» қосымшасына қосылды.
<img src="https://kyzylorda-news.kz/wp-content/uploads/2021/08/8599371c-42f6-499a-a6ed-b405d645e143.jpg" alt="" />

Қызылорда: Биыл 17 746 бала 1 сыныпқа барады

<a href="https://kyzylorda-news.kz/">Kyzylorda-news.kz</a>. Қазақстанның солтүстігінде, орталығында және шығысында жаңбыр жауады, деп хабарлайды Қазгидромет.
Атмосфералық фронталды бөліктердің әсерінен еліміздің солтүстігінде, орталығында, шығысында және оңтүстік-шығысын да күн күркіреп, жаңбыр жауады, елдің солтүстігінде және орталығында кей жерлерде қатты жаңбыр, бұршақ жауады. Сондай-ақ солтүстік өңірлерде желдің күшеюі және жылудың 20-25 жылуға дейін әлсіреуі күтіледі. Республиканың қалған аумағында жауын-шашынсыз ыстық ауа райы сақталады, республиканың батысында 45 градусқа дейін қатты ыстық күтіледі.

Алдағы үш күнге арналған ауа райы болжамы

<a href="https://kyzylorda-news.kz/">Kyzylorda-news.kz</a>.&nbsp;«COVID-19» инфекциясы таралуының алдын алу мақсатында Қазалы ауданы әкімдігі «Ashyq» жобасына қосылды.
Енді Қазалы ауданы әкімдігі мен дербес бөлім қызметкерлерінің және аудан әкімдігіне келушілердің статусы «Ashyq» мобильдік қосымшасы арқылы анықталады.Қосымшаның негізгі міндеті – «COVID-19» инфекциясын жұқтырғандар мен байланыста болған тұлғаларға ғимаратқа кіруді шектеу әрі ауру тәуекелін азайту болып табылады.

Қазалы ауданының әкімдігі «ASHYQ» жобасына қосылды

<a href="https://kyzylorda-news.kz/">Kyzylorda-news.kz</a>.&nbsp;Қазақстанда тұрғындарды емханаға тіркеу қатысты ережеге өзгеріс енгізілді, деп хабарлайды <a href="https://lenta.inform.kz/kz/elimizde-azamattardy-emhanaga-tirkeu-erezhesi-ozgerdi_a3820790">ҚазАқпарат</a>.
ҚР Денсаулық сақтау министрі «Медициналық-санитариялық алғашқы көмек көрсететін денсаулық сақтау ұйымдарына жеке тұлғаларды бекіту қағидаларын бекіту туралы» 2020 жылғы 13 қарашадағы&nbsp;<a href="https://adilet.zan.kz/kaz/docs/V2100023753">бұйрығына</a>&nbsp;өзгерістер мен толықтырулар енгізді.
Жеке тұлғалардың емханаға тіркелуі оларға ТМККК (тегін медициналық көмектің кепілдік берілген көлемін) аясында және МӘМС (міндетті әлеуметтік-медициналық сақтандыру) жүйесінде жеке сәйкестендіру нөмірі арқылы алғашқы медициналық-санитарлық көмекті алуға мүмкіндік береді.
Құжатта көрсетілгендей, тегін медициналық көмектің кепілдік берілген көлемі аясында азаматтарға ұсынылатын алғашқы медициналық-санитарлық көмек ел азаматтарымен қатар қандастарға, босқындарға, шетел азаматтары мен Қазақстанда тұрақты тұратын азаматтарға келісімшарт аясында көрсетіледі.
«Жеке тұлға емханаға немесе медициналық орталыққа тіркелген кезде, осыған дейінгі медициналық қызмет алған мекемеден автоматты түрде шығарылады», – делінген бұйрықта.
Сондай-ақ, азаматтарды емханаға тіркеу тұрақты және уақытша мекенжай бойынша жүзеге асырылады. Және азаматқа емхананы таңдау мүмкіндігі беріледі.
Сол сияқты азаматтар емханаға «Электронды үкімет» веб-порталы арқылы өтініш беріп, өздігінен тіркеле алады. Емхана азаматтарға қатысты жеке мәліметтерді тиісті мемлекеттік ақпараттық жүйеден алады.

Қазақстанда азаматтарды емханаға тіркеу ережесі өзгерді

<a href="https://kyzylorda-news.kz/">Kyzylorda-news.kz</a>. Сырдария өзеніндегі су тапшылығы мен көктемгі жауын-шашын мөлшерінің аз болуының салдары егін мен мал шаруашылығын кәсіп етіп отырған аудан тұрғындары үшін үлкен мәселеге айналып отыр. Осыған орай қазіргі таңда Қазалы ауданы Қызылқұм және Тасарық ауылдық округтеріндегі шабындық жерлерден аудан тұрғындары жем-шөп дайындауда.
Аудан әкімі Мұхтар Оразбаев шөп дайындап жатқан бригадалармен кездесу үшін Кәукей ауылына жолға шықты. Бұған дейін Бозкөл мен Кәукей ауылының арасындағы жол жөндеу жұмыстары жоба-сметалық құжаттарға өзгеріс енгізілуіне байланысты тоқтап тұрған болатын. Қазіргі таңда тиісті жұмыстар шешімін тауып, мердігер мекеме «Қыран» ЖШС 5 тамыздан бастап жол жөндеу жұмыстарын жалғастыруда.
Аудан әкімі Мұхтар Оразбаев алдымен Қызылқұм ауылдық округіндегі «Жоңышқалық» учаскесінде болып, аудан тұрғындарына шабындық шөп дайындап жатқан бригадамен кездесті. Мұнда шабындық шөптің 60-70 пайызы дайын.
Шабылған шөпті аудан тұрғындарына қолжетімді бағада ұсынуды қадағалау жөнінде аудан әкімінің орынбасары Күнтілес Назымбеков пен Қызылқұм ауылдық округінің әкімі Оңталап Мүсілімге тапсырды.
Айта кету керек, аталған учаскеде Арықбалық ауылдық округінен келген бригада да шөп шабу жұмыстарымен айналысуда.
Сондай-ақ, аудан басшысы Мұхтар Әуесұлы Тасарық ауылдық округіндегі қорғаныс бөгеттеріне жүргізіліп жатқан орташа жөндеу жұмыстарымен танысты. Бұл жұмыстардың сапалы жүргізілуіне күнделікті бақылау жасап тұру жөнінде аудандық тұрғын үй коммуналдық шаруашылығы, жолаушылар көлігі және автомобиль жолдары бөлімінің басшысы Мұрат Әбсұлтанов пен Тасарық ауылдық округінің әкімі Әлмұқан Кәрібаевқа тапсырма берді.
Еске салсақ, Тасарық ауылдық округінің аумағындағы қорғаныс бөгеттерін 2020 жылы су бұзып кеткен болатын. Қазіргі таңда әкімшілік-аумақтық бірліктің экономикалық және әлеуметтік тұрақтылығы мен адамдардың өміріне қатер төндіретін жайларды жою мақсатында тиісті қаржы бөлініп, «Сарым-Құрылыс» ЖШС тарапынан тиісті жұмыстар жасалуда.
Бөгет басындағы жұмыспен танысқан аудан Мұхтар Оразбаев Мәриямкөл жағалауындағы шабындық шөптерді шауып алуға болатындығын да тілге тиек етті.
<img src="https://kyzylorda-news.kz/wp-content/uploads/2021/08/228986990_3123289967891929_783817315616368092_n.jpg" alt="" />
<img src="https://kyzylorda-news.kz/wp-content/uploads/2021/08/228856149_3123290021225257_5399993317251312503_n.jpg" alt="" />
<img src="https://kyzylorda-news.kz/wp-content/uploads/2021/08/229393943_3123289874558605_5726587011565518930_n.jpg" alt="" />
<img src="https://kyzylorda-news.kz/wp-content/uploads/2021/08/229708967_3123289847891941_2891488212457300671_n.jpg" alt="" />

Қазақстан және Қызылорда облысының жаңалықтары