<a href="https://kyzylorda-news.kz/">Kyzylorda-news.kz.</a> Бүгінде әр адамның азаматтық ұстанымы маңызды. Құқық бұзушылықтар мен қылмыстарға бей-жай қарамай, белсенді азаматтық ұстаным таныту, тұрғындардың қауіпсіздігін қамтамасыз ету бағытындағы жұмыстардың тиімділігін арттыруға септігін тигізеді.
Міне, елімізде орын алған жаппай тәртіпсіздік кезінде азаматтық ұстанымын танытып, қала аумағында болып жатқан дүрбелең кезінде полиция қызметкерлеріне көмек берген Мақсат СейтжапбарұлынПолиция басқармасының бастығы Жаназаров Әбдібек Сламбекұлы марапаттады.
Осы ретте басқарма бастығы қала тұрғынына құқық қорғау саласының қызметкерлеріне қиын сәтте демеу болғаны үшін ​ өз алғысын білдірді.
<blockquote>
 «Қаламызда 4-5 қаңтар күні Назарбаев даңғылы бойында қала тұрғындарының жиналуымен ​ бейбіт шеру ұйымдастырылған болатын. 5 қаңтар күні бейбіт шеруіміз жанжалға айналып, ойда жоқта бүлікшілер араға от салып, полиция қызметкерлерін соққыға жығып жатқан оқиғаның куәсі болдым. Тез арада ортаға араша түсіп, оларды барынша қорғауға тырыстым. Біз ортаға кіріп, басу айтып жатсақта бүлікшілер бізді тыңдар емес.
 «Тәртіпсіз ел болмайды, тәртіпке бағынған құл болмайды» – демекші, ел президентінің сындарлы саясатының арқасында елдегі шиеленіскен жағдай тұрақталды.
 Айта кетерлік жәйт тәртіп сақшылары анттарына берік болып, күндіз-түні қызметте жүріп, ел тыныштығын сақтау, бүлікшілерді құрықтау, ​ үшін аянбай еңбек етті. Қызылорда қалалық Полиция басқармасының бастығы Әбдібек Сламбекұлы Сізге, айтар алғысым шексіз. Осылай мені елеп, марапаттап өзіңіздіңжеке қабылдауыңызға қабылдап, жылы лебіз білдіріп, жатқандарыңызға алғыс білдіремін.​ Жұмыста тек абыройлы болып, шендеріңіз өсе берсін» -деді, Мақсат Сейтжапбарұлы.
</blockquote>

Қызылордада полицейлерге көмектескен қала тұрғыны марапатталды

<a href="https://kyzylorda-news.kz/">Kyzylorda-news.kz.</a> Бүгінгі таңда Қазақстанда 15,3 млн адам немесе 80,1 % сақтандырылған болып табылады.
Сонымен қатар 3,8 млн адам немесе халықтың 19,8%-ы сақтандырылмаған мәртебеде қалып отыр. Бірақ өзінің мәртебесіне қарамастан, азаматтардың бұл санаты тегін медициналық көмектің кепілдік берілген көлемі шеңберінде медициналық қызметтерге де сенім арта алады.
Сақтандырылмаған азаматтар сенім арта алатын тегін медициналық көмектің кепілдік берілген көлеміне (ТМККК) не кіреді:
<ol>
<li>Жедел жәрдем қызметтері;</li>
<li>Белгілі бір жағдайларда медициналық авиацияны тарта отырып көрсетілетін жедел медициналық көмек;</li>
<li>Медициналық-санитариялық алғашқы көмек (МСАК) қызметтері, оның ішінде: 
1) ең көп таралған ауруларды диагностикалау, емдеу және басқару; 
2) халықтың нысаналы топтарын (балаларды, ересектерді) профилактикалық тексеру; 
4) иммундау (вакцинация); 
5) салауатты өмір салтын қалыптастыру және насихаттау; 
6) репродуктивті денсаулықты қорғау жөніндегі іс-шаралар; 
7) босанғаннан кейінгі кезеңдегі және жүкті әйелдерді бақылау; 
8) инфекциялық аурулар ошақтарындағы санитариялық-эпидемияға қарсы және санитариялық-профилактикалық іс-шаралар.</li>
<li>Амбулаториялық жағдайда мамандандырылған медициналық көмек: 
1) АИТВ-инфекциясының және туберкулездің профилактикасы, диагностикасы; 
2) жарақаттар, уланулар немесе басқа да шұғыл жағдайлар кезіндегі қызметтер, оның ішінде елдегі эпидемиологиялық жағдайдың нашарлауын тудыратын аурулар кезіндегі және оларға күдік туындаған жағдайларда сақтандырылған мәртебесіне қарамастан барлық адамдар үшін мобильді бригаданың қызметтері; 
3) әлеуметтік маңызды аурулар кезіндегі диагностика және емдеу; 
4) динамикалық бақылауға жататын созылмалы аурулар кезіндегі диагностика және емдеу.</li>
<li>Стационарды алмастыратын жағдайлардағы мамандандырылған медициналық көмек: 
1) әлеуметтік мәні бар аурулар кезіндегі емделулер; 
2) елдегі эпидемиологиялық ахуалдың нашарлауын тудыратын аурулар кезінде және оларға күдік туындаған жағдайларда сақтандырылған мәртебесіне қарамастан жалпыға бірдей үйдегі стационардың қызметтері; 
3) динамикалық бақылауға жататын созылмалы аурулар кезіндегі емдеу.</li>
<li>Стационарлық жағдайда көрсетілетін мамандандырылған медициналық көмек: 
1) айналасындағыларға қауіп төндіретін инфекциялық немесе паразиттік аурумен ауыратын науқаспен қатынаста болған адамдарды, сондай-ақ бактерия тасымалдаушыларды, вирус тасымалдаушыларды және қауіп төндіретін инфекциялық немесе паразиттік ауруға күдікті адамдарды оқшаулау кезінде; 
2) инфекциялық, паразиттік ауруларды және айналасындағыларға қауіп төндіретін ауруларды емдеу кезінде; 
3) сақтандырылу мәртебесіне қарамастан адамдарға шұғыл көмек көрсету, оның ішінде тәулік бойы стационардың қабылдау бөлімшесінде емдеу-диагностикалық іс-шаралар өткізу; 
4) жоспарлы тәртіпте.</li>
<li>Медициналық оңалту: 
1) негізгі ауруды емдеуде; 
2) туберкулезбен ауыратын науқастар үшін.</li>
<li>Паллиативті медициналық көмек;</li>
<li>Мамандандырылған медициналық көмек көрсету кезінде медициналық көрсетілімдер болған кезде қан препараттарымен және оның компоненттерімен қамтамасыз ету;</li>
<li>Амбулаториялық, стационарды алмастыратын және стационарлық жағдайларда мамандандырылған медициналық көмек көрсету кезіндегі патологиялық-анатомиялық диагностика;</li>
<li>Қазақстандықтарды шетелге емделуге жіберу және (немесе) отандық медициналық ұйымдарда емделу үшін шетелдік мамандарды тарту;</li>
<li>Дәрілік заттармен, медициналық бұйымдармен, мамандандырылған емдік өнімдермен, иммундық-биологиялық дәрілік препараттармен қамтамасыз ету;</li>
</ol>
Егер сізде қосымша сұрақтар туындаса, сіз емхананың анықтама қызметіне немесе сізге ыңғайлы байланыс арнасы арқылы әлеуметтік медициналық сақтандыру қорына жүгіне аласыз: fms.kz ресми сайты, 1406 байланыс орталығы, Qoldau 24/7 мобильді қосымшасы және Telegram-дағы SaqtandyryBot.

Сақтандырылмаған қазақстандықтар қандай медициналық көмек алады?

<a href="https://kyzylorda-news.kz/">Kyzylorda-news.kz.</a> ​ Бұған дейін дүкенге ұрлыққа түскен ұрыға іздеу жарияланған болатын. Ол 19 қаңтар күні кешкілік уақытта сауда үйінің жанында дүңгіршектің есігінің​ ілмелі құлпын бұзып кіріп, ішінен киім кешектерін, 14 дана ұялы телефон құлаққабын, ойыншықтарын ұрлап кеткен.
Қызылорда қалалық Полиция басқармасының қызметкерлерімен дүңгіршекке ұрлыққа түскен қала тұрғыны ұсталды. Жәбірленушіге өз заттары ​ толықтай қайтарылып, ол басқарма қызметкерлеріне өз алғысын білдірді.
Қазіргі уақытта аталған дерек бойынша, сотқа дейінгі тергеп-тексеру амалдары жүргізілуде. Оқиғаның мән-жайлары анықталуда.
<img src="https://kyzylorda-news.kz/wp-content/uploads/2022/01/img_5422-scaled.jpg" alt="" />
<img src="https://kyzylorda-news.kz/wp-content/uploads/2022/01/img_0767.jpg" alt="" />

Дүкенге ұрлыққа түскен қызылордалық ұсталды

<a href="javascript:void(0)"><img src="https://www.akorda.kz/img/close_button.png" alt="Close button" /></a>
<a href="https://kyzylorda-news.kz/">Kyzylorda-news.kz.</a> Қасым-Жомарт Тоқаев Орталық Азия елдері мен Қытай арасындағы дипломатиялық қатынастардың 30 жылдығына орай бейнебайланыс режимінде «Орталық Азия – Қытай» саммитіне қатысты, деп хабарлайды <a href="https://www.akorda.kz/kz/prezident-kasym-zhomart-tokaev-ortalyk-aziya-kytay-atty-memleket-basshylarynyn-sammitine-katysty-2501130">Ақорда</a>.
Іс-шараға Қазақстан Президентінен бөлек, ҚХР төрағасы Си Цзиньпин, Қырғызстан Президенті Садыр Жапаров, Тәжікстан Президенті Эмомали Рахмон, Түрікменстан Президенті Гурбангулы Бердімұхамедов және Өзбекстан Президенті Шавкат Мирзиёев қатысты.
Қазақстан Президенті сөйлеген сөзінде Қытай басшысының осындай маңызды әрі дер кезінде қолға алынған іс-шараны өткізу туралы бастамасына ризашылығын білдірді.
<blockquote>
 – Біз бірнеше ғасырдан бері тарихи қарым-қатынас орнатып келеміз. Тату көрші болғанымызды және өзара тиімді ынтымақтастықтың осындай табысты тәжірибесін шын жүректен бағалаймыз. Құрметті Төраға Си Цзиньпин, Сіздің беделді және тиімді басқаруыңызбен Қытай Халық Республикасы өзінің дамуында таңғаларлық жетістіктерге жетті. Қытай қазір өрлеудің барлық негізгі көрсеткіштері бойынша әлемдік көшбасшылар тобына кіруге лайық, – деді Мемлекет басшысы.
</blockquote>
Қасым-Жомарт Тоқаев Қазақстан-Қытай ынтымақтастығының зор қарқындылығымен, жоғары сенімге және шынайы тату көршілікке негізделуімен ерекшеленетінін атап өтті.
<blockquote>
 – Бүгінде екіжақты сауда жаңа рекордтық деңгейге жетіп отыр.&nbsp; Өткен жылдың 11 айының қорытындысы бойынша бұл көрсеткіш 17 миллиард долларға дейін жеткен. Қытайдың Орталық Азия елдеріне құйған 40 миллиард доллар инвестициясының жартысы Қазақстанға тиесілі. Сондықтан біздің еліміздің Қытайға аймақтағы ең ірі сауда-инвестициялық серіктес атануы заңды, – деді Президент.
</blockquote>
Президент шетелдік инвесторларды, оның ішінде қытайлық серіктестерін одан әрі жан-жақты қолдауға мүдделі екенін жеткізді.
<blockquote>
 – Қазіргі кезде Қазақстан Үкіметі инвесторларға барынша қолайлы жағдай жасауға бағытталған жаңа инвестициялық саясат әзірлеуде. Мұндай саясат – Қазақстанның жаңа экономикалық бағдарының ажырамас бөлігі, – деді Мемлекет басшысы.
</blockquote>
Қасым-Жомарт Тоқаев энергетика саласындағы өзара ықпалдастықтың және инфрақұрылымдық, оның ішінде «Бір белдеу – бір жол» мегажобасы аясындағы жобаларды іске асырудың стратегиялық сипатын атап өтті. Президенттің айтуынша, өткен 30 жылдың ішінде Орталық Азия мемлекеттері тату көршілікке және бір-біріне тұрақты қолдау көрсетуге негізделген шынайы ынтымақтастық орната алды.
<img src="https://www.akorda.kz/public/assets/media/uploadMedia/1643108068_KZ4_2334.jpg" alt="" />
Мемлекет басшысы Қытайдың БҰҰ Қауіпсіздік Кеңесінің тұрақты мүшесі ретінде еуразиялық кеңістікте бейбітшілікті, қауіпсіздік пен ілгерілеу ісін нығайтуда маңызды рөл атқаратынын айтты. Бұл, әсіресе, терроризм, экстремизм және трансұлттық қылмысқа қарсы күреске байланысты. Бұл ретте, Қасым-Жомарт Тоқаев биылғы қаңтар айының басында елімізге лаңкестердің асқан қаныпезерлікпен шабуыл жасаны туралы айтты.
<blockquote>
 – Мемлекет, ұлт ретінде бұл қайғылы оқиғадан сабақ алдық және тез арада қалпымызға келетініміз сөзсіз. Қазіргі кезде мемлекеттік басқару ісін, ұлттық қауіпсіздік жүйесін және экономикалық саясатты қайта форматтау және реформалау бағытында барынша жұмыс жүргізілуде. Осылайша жаңа Қазақстан құру ісіне кірісіп кеттік, – деді Қазақстан Президенті.
</blockquote>
Мемлекет басшысы Орталық Азияның зор әлеуетін ашуға бағытталған жаңа шешімдер мен тетіктерді іздеу мәселесіне ерекше мән берді. Президенттің айтуынша,&nbsp; соңғы жылдары өңіраралық ынтымақтастық жаңа әрі сапалы деңгейге көтерілді және мемлекеттердің қарқынды және сенімді диалогы, оның ішінде тұрақты консультативті кездесулер форматындағы шаралар негізгі рөл атқарады.
<img src="https://www.akorda.kz/public/assets/media/uploadMedia/1643108068_KZ4_2421.jpg" alt="" />
Сонымен қатар бірлескен кәсіпорындар санының артқаны, өнеркәсіп, энергетика, машина жасау, ауыл шаруашылығы және басқа да секторлардағы маңызды жобалардың іске асырылып жатқаны айтылды. Сауда кедергілері біртіндеп жойылуда. Заманауи өткізу бекеттері ашылып, қосымша әуе және теміржол бағыттары іске қосылып жатыр.
<blockquote>
 – Біз шекарадағы кедендік тәртіпті ретке келтіру үшін заңсыз әрекет етіп, бизнеске түрлі кедергі жасаған теріс пиғылды кәсіпкерлермен күрес жүргізе бастадық. Заңға қайшы мұндай әрекеттермен күрестің нәтижесін жақын арада көретінімізге сенімдімін. Қазақстанға келетін импорттарға және үшінші елдерге жасалатын транзитке зиян келмейді. Үкіметке және құқық қорғау органдарына тиісті тапсырмалар бердім, – деді Қасым-Жомарт Тоқаев.
</blockquote>
Қазақстан Президенті «Орталық Азия – Қытай» өзара іс-қимыл форматының үлкен мүмкіндіктерін тиімді пайдалану қажеттігіне баса мән берді. Осыған байланысты Мемлекет басшысы ортақ мүдделерді ескере отырып, мынадай міндеттерді шешуді назарға алу қажеттігін атап өтті.
Ең алдымен, Мемлекет басшысы сауда-экономикалық ынтымақтастықты одан әрі нығайту үшін барынша күш салу керек екенін айтты. Оның пікірінше, бұл сауда айналымы құрылымын әртараптандыруды, кедергілерді жоюды, кеден ісін ретке келтіруді және инновациялық шешімдер енгізуді көздейді.
<blockquote>
 – Қазақстан Қытайға экспортталатын тауар түрлерін 135-ке жеткізуге әзір, оның ішінде ауыл шаруашылығы және азық-түлік өнімдерінің ақшалай көлемі бір миллиард доллардан асады. Осыған байланысты сауда және көлік бойынша өзара бірлескен тәсілдерді әзірлеу үшін министрліктер деңгейінде «Орталық Азия – Қытай» консультациялар механизмін іске қосуды ұсынамын, – деді Президент.
</blockquote>
<img src="https://www.akorda.kz/public/assets/media/uploadMedia/1643108171_KZ4_2836.jpg" alt="" />
Қасым-Жомарт Тоқаев «Бір белдеу – бір жол» жобасын одан әрі&nbsp; ілгерілетуді, оның ішінде жоғары қосымша құн салығы бар ірі жобаларды іске асыру арқылы бірлескен жұмыстарды жандандыруды екінші міндет ретінде атады.
<blockquote>
 – Ең алдымен, бұл цифрландыру, жасыл технологиялар және инновациялар салаларына қатысты. Себебі Қытайдың бұл салалардағы табысы айқын, – деді Президент.
</blockquote>
Мемлекет басшысы көлік-транзит бағыттарын әртараптандыруды және интеграцияланған логистикалық шешімдерді, соның ішінде жаңа құрлықтық дәліздерді іске қосу арқылы енгізу мәселесін келесі басым міндет ретінде белгілеп берді. Оның айтуынша, Қазақстан осы мақсатқа 2025 жылға дейін 20 миллиард доллар&nbsp; инвестиция салуды жоспарлап отыр. Бұның Қытайдан келетін транзит ағынын кеңейтуге және аймақтағы елдердің артып келе жатқан сұраныстарын қанағаттандыруға ықпал ететіні сөзсіз.
Сонымен қатар Қасым-Жомарт Тоқаев орнықты дамудың жаңа моделін енгізудің, атап айтқанда 2060 жылға қарай экономиканы декарбонизациялаудың және көміртегінен бейтараптыққа қол жеткізудің өзектілігін атап өтіп, осы саладағы тығыз ықпалдастықты жолға қоюды және озық тәжірибелерді алмасуды ұсынды.
Президент аймақтағы қауіпсіздікті қамтамасыз ету мәселесіне арнайы тоқталды. Осы ретте Мемлекет басшысы Азиядағы өзара іс-қимыл және сенім шаралары жөніндегі кеңестің айтарлықтай мүмкіндігіне назар аударды. Мемлекет басшысының айтуынша, АӨСШК-ті трансформациялау ісі қазіргі сын-қатерлер мен қауіптерге қарсы іс-қимыл жөніндегі ұжымдық күш-жігерді сапалы әрі жаңа деңгейге шығаруға мүмкіндік береді.
<img src="https://www.akorda.kz/public/assets/media/uploadMedia/1643109368_KZ3_5250.jpg" alt="" />
Бүгінгі саммит барысында айтылған бастамаларды жүзеге асыру үшін Қасым-Жомарт Тоқаев сыртқы саяси ведомстволардың басшыларына тиісті іс-қимылдар жоспарын қабылдауды және оның сапалы орындалуын қамтамасыз етуге тапсырма беруді ұсынды.
Мемлекет басшысы сөзінің соңында ҚХР Төрағасы Си Цзиньпинді және бүкіл қытай халқын ай күнтізбесі бойынша келе жатқан Жаңа жылмен құттықтап,&nbsp; Бейжіңде өтетін алдағы XXIV Қысқы Олимпиада ойындарының табысты болуына тілектестік білдірді.
<blockquote>
 – Олимпиаданың «Ортақ болашақ үшін бірге!» атты ұраны Орталық Азия мемлекеттері мен Қытайдың орнықты дамуы үшін қолайлы жағдай жасау ісіне темірқазықтай жол сілтесін, – деді Қазақстан Президенті.
</blockquote>
Қасым-Жомарт Тоқаевтың сөзін тыңдаған Си Цзиньпин Қазақстанның тәуелсіздігін, егемендігін және қауіпсіздігін қорғау жөніндегі күш-жігеріне Қытай тарапынан жан-жақты қолдау көрсетілетінін мәлімдеді.
<blockquote>
 – Сіздің сенімді басшылығыңызбен барлық келеңсіздіктің еңсерілетініне, ал Қазақстанның қуаты артып, орнықтылығы күшейе түсетініне сенімдімін, – деді ҚХР Төрағасы.
</blockquote>
Саммит қорытындысы бойынша дипломатиялық қатынастардың 30 жылдығына орай Бірлескен мәлімдеме қабылданды.

Президент Қасым-Жомарт Тоқаев «Орталық Азия – Қытай» атты мемлекет басшыларының саммитіне қатысты

“KEGOC” АҚ Қазақстан, Өзбекстан және Қырғызстанда электр энергиясының өшу себебін атады.&nbsp;
2022 жылдың 25 қаңтарында сағат 11.59-да (Нұр-Сұлтан уақытымен) Орталық Азияның (Өзбекстан, Қырғызстан) энергия жүйесінде туындаған айтарлықтай апатты теңгерімсіздік салдарынан 500 кВ “Солтүстік-Шығыс-Қазақстанның оңтүстігі” электр энергиясы транзитінде электр қуаты күрт ұлғайды.
Салдарынан “Солтүстік-Шығыс-Қазақстанның оңтүстігі” транзиті апатты түрде бөлініп, Қазақстанның оңтүстік аймағындағы тұтынушылардың басым бөлігі жарықсыз қалды.
Шектеу көлемі шамамен 1500 мегаватты құрайды.
Қазіргі таңда оператор апатты жою шараларын қабылдап жатыр, деп мәлімдеді компания.
<a href="https://m.sputnik.kz/society/20220125/19211278/KEGOC-jaryq.html">Sputnik Қазақстан.</a>

KEGOC Қазақстанда  неге жарық өшіп қалғанын түсіндірді

<a href="https://kyzylorda-news.kz/">Kyzylorda-news.kz.</a> Қызылорда облысындағы 230 елді мекеннің 85 пайызы орталықтандырылған ауыз су жүйесіне қосылған. Биылғы жылы қаладағы қуаты тәулігіне 70 мың м3 болатын ағынды суды биологиялық тазарту станциясын жаңарту және кәріз жүйелері мен сорғы станцияларын жөндеуге 6 жоба жүзеге аспақ.
Бұл туралы Өңірлік коммуникациялар қызметінде өткен баспасөз конференциясында облыстық энергетика тұрғын үй-коммуналдық шаруашылық басқармасы басшысының орынбасары Ерлан Жоламанов мәлімдеді.
<blockquote>
 -2021-2025 жылдар аралығында облыстағы орталықтандырылмаған 17 ауылды сумен жабдықталуын қамтамасыз ету үшін топтық су құбырларына қосу, су жүйесін жүргізу жұмыстары қолға алынбақ. Сонымен қатар, Жалағаш ауданына қарасты Мәдениет және Аққұм елді мекендерін сумен қамтамасыз ету жоспарланды. Арал және Қазалы аудандарындағы 65 елді мекенді ауыз сумен қамтитын стратегиялық маңызы бар Арал-Сарыбұлақ топтық су құбырының екінші желісін салу жобасы әзірленуде. Сондай-ақ, Тақыркөл бас су тоғанынан Жаңақорған кентіне дейін магистральдық су құбырының екінші желісінің құрылысы басталады. Тағы бір айта кететін жайт, алдағы уақытта ауыз су бағасы өспейді,- деді Ерлан Ералыұлы.
</blockquote>

Қызылордада елді мекеннің 85 пайызы орталықтандырылған ауыз су жүйесіне қосылған

<a href="https://kyzylorda-news.kz/">Kyzylorda-news.kz.</a> Бүгін «Nur Otan» партиясы Қызылорда облыстық филиалы Саяси кеңесінің отырысы өтті. Онда 28 қаңтар күні өтетін партияның кезектен тыс ХХІ Съезіне Сыр өңірінен қатысатын делегаттар сайланды.
Жиында облыстық партия филиалының төрағасы, облыс әкімі Г.Әбдіқалықова кеңес мүшелерін Мемлекет басшысы алға қойған міндеттерді жұмыла жүзеге асыруға шақырды.
<blockquote>
 Біздің алдымызда үлкен міндеттер тұр. Біз партияның барлық құрылымдық бөлімшелерін қажетті тәжірибе мен мүмкіндіктерді, күш-жігерімізді Мемлекет басшысы алға қойған міндеттердің толыққанды орындалуына жұмсап, осы бағыттағы жұмыстарды үздіксіз жалғастыруымыз керек»,- деді филиал төрағасы.
</blockquote>
Атап өту керек, 28 қаңтарда партияның кезектен тыс ХХІ Съезі өтеді. Онда партияның алда тұрған негізгі міндеттері мен бағыттары айқындалатын болады.

«Nur Otan» партиясының съезіне қатысатын Сыр өңірінен делегаттар сайланды

<a href="https://kyzylorda-news.kz/">Kyzylorda-news.kz.</a> Бүгін аймағымызда қаңтар айында өтетін ҰБТ басталды. Облыс бойынша 7 514 мектеп бітіруші түлектің 6 106-ы немесе 81% тестілеуге қатысуға өтініш білдірген. Бүгінгі алғашқы тестілеу күнінде 203 түлек білімлерін тексеріп, бақтарын сынауда.
Айта кету керек, биыл министрлік талапкерлерге қолайлы жағдай жасау үшін, сондай-ақ тестілеу тапсыру процесінің ашықтығы мен транспаренттілігін күшейту үшін бірқатар өзгеріс енгізді.
Ерекше білім беру қажеттіліктері бар түлектерге 2022 жылы қосымша уақыт берілді. Көру, есту, тірек-қимыл аппаратының функциялары бұзылған талапкерлерге тестілеу тапсырмаларын орындау үшін негізгі 240 минуттан бөлек қосымша 40 минут беріледі. Яғни, олар ҰБТ-ны 4 сағат 40 минут ішінде, басқаларға қарағанда ұзағырақ тапсыра алады. Сонымен қатар ерекше қажеттіліктері бар талапкерлерге арналған тапсырмалардың мазмұнына да өзгерістер енгізілді. Олар үшін суретсіз, сызбаларсыз және диаграммаларсыз тест нұсқалары жасалды.
Тестілеу «1 компьютер – 2 камера – 1 тестіленуші» қағидаты бойынша жүргізілуде. Оқуға түсушінің тест тапсыру орнында негізгі камерадан басқа, тестіленушінің дыбысын жазу және қозғалысын тіркеу үшін алдыңғы веб-камера орнатылады. Фронталды веб-камера талапкердің жеке басын сәйкестендіруге және ҰБТ кезінде бөгде адамдардың кіруін болдырмауға мүмкіндік береді. Сондай-ақ бұл қағидат емтихан тапсыру барысына бақылау жүргізу және тестілеудің ашықтығын қамтамасыз ету үшін қажет.
Сонымен қатар тапсыратын пәндер саны өзгерген жоқ – екі бейінді және үш міндетті пән қамтылады. Тест тапсырмалараның саны – 120. Оның ішінде Қазақстан тарихы бойынша – 15, математикалық сауаттылық бойынша – 15, оқу сауаттылығы – 20 және екі бейінді пәннен 35 тапсырмадан беріледі. Тестілеуді өткізу уақыты – 4 сағат (240 минут). ҰБТ нәтижесі бойынша талапкерлер ең жоғары 140 балл жинай алады.
Тестілеуге кірер кезінде қолмен тексеретін және рамалық металл іздегіштер қолданылады. Бұл талапкерлердің қауіпсіздігі үшін, ережелерді бұзудың және тыйым салынған заттарды (телефондар, шпаргалкалар және т.б.) алып өтудің алдын алу үшін де қажет. Қатысушылардан тыйым салынған заттар табылған жағдайда тестілеу автоматты түрде тоқтатылады.
Тестілеу кезінде мобильді және радиоэлектрондық байланыс сигналдарын басатын құрылғылар пайдаланылады. Ол аудиторияның (компьютерлік сыныптың) және бейнебақылау камераларының ауданына байланысты жұмыс істейді.
ҰБТ-2022 аяқталғаннан кейін күнтізбелік жылдың соңына дейін бейнежазбаларға талдау жүргізіледі. Тыйым салынған заттарды пайдалану және ережелерді бұзу фактілері анықталған жағдайда, оқуға түсушінің ҰБТ нәтижелері жойылады.
Қаңтар айындағы бұл ҰБТ қорытындысы бойынша ақылы негізде оқуға болады. Түлектер жазғы тестілеу негізінде грантқа үміткер бола алады.
Айта кетейік, Ұлттық бірыңғай тестілеу барлық санитарлық-эпидемиологиялық талаптарды қатаң сақтай отыра 22 ақпанға дейін жалғасады.

Қызылорда облысында ҰБТ басталды

<a href="https://kyzylorda-news.kz/">Kyzylorda-news.kz.</a> АО “KEGOK” мекемесінің меншігіндегі 220кВ әуе желісінің бойында ақау орын алуына байланысты электр жарығы уақытша өшірілді.
Қазіргі таңда қалпына келтіру жұмыстары жүргізілуде.
<img src="https://kyzylorda-news.kz/wp-content/uploads/2022/01/fb_img_1643090725060.jpg" alt="" />

Қызылордада электр жарығы уақытша өшірілді

<a href="https://kyzylorda-news.kz/">Kyzylorda-news.kz.</a> Мемлекет басшысының Жарлығымен Нұрлан Мәжитұлы Әбдіров Қазақстан Республикасы Орталық сайлау комиссиясының төрағасы лауазымына тағайындалды.
<img src="https://kyzylorda-news.kz/wp-content/uploads/2022/01/fb_img_1643087907541.jpg" alt="" />

ҚР Орталық сайлау комиссиясының төрағасы тағайындалды

<a href="https://kyzylorda-news.kz/">Kyzylorda-news.kz.</a> «Назарбаев Зияткерлік мектептері» дербес білім беру ұйымы 2022-2023 оқу жылында Назарбаев Зияткерлік мектептерінің 7-сыныптарында білім алу үшін «Өркен» білім грантын тағайындау конкурсын өткізуде.
Байқауға жалпы білім беретін мектептердің 6-сынып оқушылары қатыса алады. Ол үшін үміткерлер 21 ақпанға дейін келесі құжаттарды қабылдау комиссиясына өткізулері тиіс:
<ol>
<li>Конкурсқа қатысу үшін өтініш;</li>
</ol>
2. Сауалнама;
3. Үміткердің туу туралы куәлігінің көшірмесі, үміткердің ЖСН-і, бар болған жағдайда жеке бас құжатының көшірмесі, заңды өкілдің ЖСН-і көрсетілген жеке куәлігінің көшірмесі;
4. Үміткердің 6-сыныптың I жарты жылдығындағы үлгерімі мен тәртібі туралы табелінің көшірмесі. Талап етілген құжаттар оқитын мектеп басшысының қолымен расталып, тиісті білім беру ұйымының мөрімен бекітілуі керек.
5. Үміткердің графикалық файл түріндегі 1 МБ (мегабайт) кем емес көлемі 3х4 см. цифрлы фотосуреті немесе үміткердің фототүсірілімі құжат тапсыру кезінде қабылдау комиссиясында жасалынады.
Көрсетілген барлық құжаттар пластикалық тезтікпеге жинақталып, қабылдау комиссиясына ұсынылады.
Құжат қабылдау комиссиясы Қызылорда облысы бойынша Қызылорда қаласы Сұлтан Бейбарыс, 6 мекен-жайы бойынша дүйсенбі-жұма аралығында сағат 9.00-ден 18.00-ге дейін, ал сенбі күні 9.00-ден 13.00-ге дейін жұмыс жасайды. Үзіліс уақыты: 12.00-13.00.
Айта кету керек, келушілер ағымын реттеу үшін арнайы онлайн брондау қызметі іске қосылған. Бұл жүйе мектепке келу күні мен уақытын алдын ала белгілеуге мүмкіндік береді.
Онлайн брондау нұсқаулығы:
– Зияткерлік мектептің веб-сайтын ашу https://kzl.nis.edu.kz/
– «Үміткерлерге» / «Конкурстық іріктеу» бөліміне кіру;
– «Қабылдау комиссиясына арнайы кезекті брондау» қосымшасын ашу;
– Ашылған терезе арқылы күнтізбеде құжат тапсыру үшін мектепке келу күні мен уақытын таңдау;
– Өзіңіздің байланыс деректеріңізді көрсету;
– Брондауды растау;
– Барлық бөлімдер толтырылып, бронь жасалғаннан кейін сіз көрсеткен электрондық поштаға брондаудың расталғаны туралы хабарлама келеді.
Қабылдау комиссиясына құжаттарын ақпанның 21-не дейін толық өткізген үміткерлерге кешенді тестілеуге қатысу рұқсатнамасы беріледі. Кешенді тестілеу 2022 жылдың 14 және 15 сәуірінде өтеді. Бірінші күні үміткерлердің жаратылыстану-математикалық бағыттағы, яғни математика, сандық сипаттамалар мен жаратылыстану пәндерді игеру қабілеті бағаланса, екінші күні – қазақ, орыс және ағылшын тілдерінен тест тапсырмаларын орындайды.
Тестілеу нәтижелері кешенді тестілеудің екінші күнінен 40 күнтізбелік күн өткеннен кейін www.nis.edu.kz сайтында жарияланады. Соңғы шешім «Өркен» білім беру грантын тағайындау жөніндегі Республикалық комиссиямен қабылданады.
Құрметті жас өркен! Терең академиялық білім алып, кең ауқымды дағдыларды бойыңызға сіңіріп, үш немесе одан да көп тілді меңгеріп, еліміздің және әлемнің жетекші университеттеріне оқуға түсуді мақсат етсеңіз, біздің мектепке келіңіз!
Байланыс телефондары: 8 (7242) 40 23 75, 40 23 77

NIS-те білім алу үшін құжат қабылдау жалғасуда

<a href="https://kyzylorda-news.kz/">Kyzylorda-news.kz.</a> ҚР Президенті Қасым-Жомарт Тоқаевтың Жарлығымен Берік Имашев Орталық сайлау комиссиясының төрағасы қызметінен босатылды.
Мемлекет басшысы Орталық сайлау комиссиясының төрағасы лауазымында атқарған көп жылғы жемісті еңбегі үшін Берік Имашевқа алғыс білдірді.

Қазақстан және Қызылорда облысының жаңалықтары