<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Эпидемиологиялық ахуал күн санап жақсарып келеді. Сонғы тәулікте короновирус ифекциясының 14 жағдайы тіркелді. Бұл туралы Өңірлік коммуникациялар қызметінің ақпарат алаңында облыстық санитарлық-эпидемиологиялық бақылау департаменті басшысының орынбасары Әлия Әбдіқайымова мәлімдеді.
<blockquote>
 «Биыл қазан айының 18 күнінде 526 жағдай тіркелді, ал қыркүйек айының 18 күнінде 1494 жағдай тіркелген. Яғни қыркүйек айынан ауру саны 2,8 есеге төмендеген. Тамыз айының 18 күнінде 3523 жағдай тіркелген болатын. Яғни тамыз айының 18 күнімен 7 есеге ауру саны азайып отыр. Бұл алдын алу шарасының барысында қол жеткізілген жағдай деп айтуга болады. Ұжымдық иммунитеттің қалыптасқанын көріп отырмыз. Бұл ақпан айынан бастаған екпе жұмысының нәтижесі. Екпеге тоқтала кететін болсам, жоспар бойынша 452480 адам егілуге тиісті болса, оның 339703 бірінші турмен қамтылды ол 75,1% құрап отыр, ал екінші турмен 276351 егіліп 61% құрап отыр. Егумен қамтылған адамдар арасындағы ауру көрсеткіші небәрі 0,4 пайызды құрап отыр. Бұл жақсы көрсеткіш деп айтуға болады. 8-10 пайызға дейін егілгендер арасында ауру тіркелуі ықтимал. Аурудың алдын алу мақсатында әлі де сақтық шаралары жалғасуда. Мониторинг топтары және Ashyq бағдарламасы жұмыс жасап жатыр. Ашық бағдарламасына 3478 нысан қосылған. Бүгінде 398 адам сары статуспен анықталып отырса, 731 адам қызыл статуспен анықталып отыр. Қызыл статуспен анықталғандар ішіндегі 200 адамға айыппұл салынып бүгінгі күні 8 миллионға жуық қаржы өндірілді. Сары статуспен анықталған адамдарға ескертпе жұмыстар жасалды», – деді Әлия Мүтәліпқызы.
</blockquote>

Әлия Әбдіқайымова: Аурудың алдын алу мақсатында әлі де сақтық шаралары жалғасуда

<a href="https://kyzylorda-news.kz/ru/obshestvo/">Kyzylorda-news.kz</a>. Ертең еліміздің 5 өңірінде ауа райына қатысты ескерту жарияланды, деп хабарлайды Қазгидрометке.
20 қазанда&nbsp;Батыс Қазақстан&nbsp;облысының батысында тұман түсуі мүмкін. Жел солтүстік-батыстан соғады, күндіз облыстың оңтүстік-батысында желдің екпіні 15-20 м/с жетеді.
20 қазанда күндіз Қызылорда облысының солтүстігінде және орталығында батыстан, оңтүстік-батыстан жел соғады, күші 15-20 м/с жетеді, кей жерлерде арты шаңды дауылға айналуы мүмкін.
20 қазанда&nbsp;Маңғыстау&nbsp;облысының басым бөлігінде жаңбыр жаууы ықтимал. Солтүстік-батыстан жел соғады, облыстың батысында, солтүстігінде желдің екпіні 15-20 м/с жетеді.
Ертең Ақтау қаласында солтүстік-батыстан жел соғады, екпіні 15-20 м/с жетеді.
20 қазанда таңертең және күндіз&nbsp;Түркістан&nbsp;облысының таулы аудандарында оңтүстік-батыстан соққан жел күшейіп, екпіні 15-20 м/с жетеді.
20 қазанда&nbsp;Ақтөбе&nbsp;облысында оңтүстік-батыстан, батыстан жел соғады, облыстың оңтүстік-батысында желдің екпіні 15-20 м/с жетеді.

Қызылордада ауа райына қатысты ескерту  жарияланды

<a href="https://kyzylorda-news.kz/ru/obshestvo/">Kyzylorda-news.kz</a>. Елбасының жарлығымен 1995 жылы 19 қазанда ҚР Төтенше жағдайлар жөніндегі мемлекеттік комитеті құрылды. Содан бері дәл осы күн құтқарушылардың кәсіби мерекесі болып белгіленді. Биыл құтқару қызметінің құрылғанына − 26 жыл. Өңірлік коммуникациялар қызметінің баспасөз конференциясында облыстық төтенше жағдайлар департаментінің бастығы Руслан Қайрақбаев құтқарушы мамандығының маңызы жайлы айтты.
<blockquote>
 «Табиғи құбылыстар мен техногендік сипаттағы апаттардың қаупін азайту мәселесі мемлекеттің басты назарында. Бүгінде облыс бойынша 800-ден астам құтқарушы бар. Құтқарушы мамандығының басты міндеті − адам өмірін қауіп-қатерден құтқару. Бұл жоғары және жауапты миссия. Апат айтып келмейтіні рас. Тосыннан болған апат кезінде азаматтарға бірінші болып көмекке келетін төтенше жағдайлар қызметінің құтқарушылары. Төтенше жағдайлар департаментінің қызметкерлері облыс аумағындағы барлық төтенше жағдайлар мен өрт оқиғалары кезінде тәулік бойы тиісті жұмыстарды атқарады. Биыл төтенше жағдайлардың салдарын жою мақсатында 2153 жағдай тіркелді», – деді департамент бастығы Руслан Сламбекұлы.
</blockquote>
Одан әрі облыстық жұмылдыру дайындығы басқармасы басшысының орынбасары Бағдат Әлиев сала мамандарын кәсіби мерекемен құттықтап, ізгі тілегін білдірді.
<blockquote>
 «2020 жылдан бастап Мемлекет басшысының жарлығымен елімізде төтенше жағдайлар министрлігі қайта құрылды. Құтқарушылардың жұмысы өте күрделі. Себебі кәсіби борышын өтегенде өліммен бетпе-бет келетін сәттері көп болады. Жас ұрпаққа патриоттық тәрбие беріп, құтқарушылардың мерейін асқақтатуға үлкен үлес қосып жүрген ардагерлерімізге алғыс айтамыз. Барша құтқарушыларды айтулы мерекелерімен құттықтаймын», – деді Бағдат Исламбекұлы.
</blockquote>

Қызылордада ТЖ салдарын жою мақсатында 2153 жағдай тіркелді

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Соңғы уақытта Сырдария өзенінің төменгі ағысында вегетациялық кезең күрделі су тапшылығы жағдайында өтуде. Осы мәселеге байланысты бүгін Өңірлік коммуникациялар қызметінде облыстық табиғи ресурстар және табиғат пайдалануды реттеу басқарма басшысы Бауыржан Шаменов су тапшылығы жағдайына байланысты БАҚ өкілдеріне мәлімдеме жасады.
<blockquote>
 «Биылғы жылдың қыркүйек айынан бастап Шардара су қоймасынан Сырдария өзенінің төменгі ағысына жіберіліп жатқан су көлемі 30 текше метрді құраған болатын. Бұл су деңгейінің күрт төмендеуіне әкелуде. Осыған байланысты, облыс әкімдігімен ҚР Премьер-Министріне және Экология, геология және табиғи ресурстар министрлігіне Қырғызстан, Тәжікстан, Өзбекстан мемлекеттерімен Сырдария өзенінің төменгі ағысына су жіберу көлемін ұлғайту мәселесі бойынша келіссөздер жүргізу жөнінде ұсыныстар жолданды. 2021-2022 жылдардың вегетацияаралық кезеңінде мемлекеттердің су алу лимиттері мен Нарын-Сырдария су қоймалары каскадының болжамды жұмыс режимін келісу кезінде қаралатындығын жеткізді. Сонымен бірге, ағымдағы жылдың 18 қазаны сағат 18-00 ден бастап Шардара су қоймасынан Сырдария өзенінің төменгі ағысына 50 м3/с су тасталуда», – деді Бауыржан Серікұлы.
 «Сырдария өзені су деңгейіне байланысты өткен жылмен салыстырғанда біраз төмендеуі байқалады. Негізгі себебі – Сырдария өзені трансшекаралық өзен болып саналады. Жалпы жылына екі рет судың көлеміне байланысты халықаралық комиссия арнайы тексереді. Комиссия отырысының қорытындысы бойынша биыл Сырдария өзені арқылы Қазақстан териториясына сәуір мен қыркүйек айларында 4 млрд м3 су келуі керек деп болжанған. Қазіргі уақытта 2 млрд текше метрге жуық су келген. Бұл 60 пайызды қамтып отыр. Көксарай су реттегіші және Шардара су қоймасында толық пайдалануға және шекті пайдалануға ең төменгі шегі 650 млн текше метрге дейін су қалды. Осының себепті қыркүйек және қазан айларында жоғарыдан келіп жатқан су көбейген жоқ. Соның есебінен төменге тастайтын су 30 текше метрге дейін азайған. Қазіргі уақытта облыстың шекарасынан 60-65 текше метр. Ал Қызылорда қаласы тұсынан 66 текше метр су өтіп жатыр», – деді Арал-Сырдария бассейіндік инспекциясы басшысы Сейілбек Нұрымбетов.
 «Қыркүйек айынан бастап Шардара су қоймасынан төменгі ағысқа 30 текше метр, Қызылорда Су торабынан төменгі ағысқа 55-60 текше метр су жіберілген. Мәселен жаз мезгілінде егістік суару маусымы кезінде Қызылорда су торабынан төменгі ағысқа 75-80 текше метр су жіберілді. Сондықтан негізсіз ақпаратқа сенуге болмайды», – деді Қазсушар РММ Қызылорда облысы бойынша филиалы директорының орынбасары Жорабек Ерназаров.
</blockquote>

Сырдария өзенінде су деңгейін ұлғайту бойынша келіссөздер жүргізіледі

<a href="https://kyzylorda-news.kz/ru/obshestvo/">Kyzylorda-news.kz</a>. Биыл Шиелі ауданы бойынша 30 189,5 мың гектар жерге ауыл шаруашылығы дақылдары орналастырылды. Күрiштің көлемі 12039 гектарды құрады. Сондай-ақ, су тапшылығына байланысты негізгі дақыл күріш көлемі өткен жылмен салыстырғанда 2 314 гектарға дейін азайтылып, орнына суды аз қажет ететін көкөніс, бақша дақылдары егілді. Олардың көлемі өткен жылмен салыстырғанда 222,2 гектарға дейін артқан.
Күзгі егін жинау науқаны оңтайлы мерзімінде атқарылуда. Қазіргі таңда, ауданда күріштен басқа дәндік дақылдарды (күздік бидай, жаздық бидай, арпа, дән жүгері) және майлы дақылдардан мақсары мен сояны, картоп, көкөніс, бақша, дақылдарын жинау жұмыстары толығымен аяқталды. 8 915 гектар жерге егілген жоңышқадан 52 499 тонна ескі жоңышқа, 3 467 тонна жаңа жоңышқа өнім жиналды.
Аймақта күрішке орақ салу жұмыстары 27 тамызда басталды. Бүгінгі күні күріштің 11 931 гектарына (99,1%), орақ салынып, оның 11 321 гектары (94,0%) бастырылды. Әр гектарынан орташа 50-55 центнерден өнім алынуда.
Көктемгі егін егу жұмыс барысында жалпы 30 246 гектарға межеленген болатын.
Су тапшылығына байланысты 57 гектарға қысқартылды. Яғни 30 189,5 гектарға ауыл шаруашылығы дақылдары орналастырылды. Су тапшылығына байланысты суды көп қажет ететін дақылдардың көлемін азайтып, әртараптандыру бағытында дақыл көлемі ұлғайтылды. Жуантөбе ауылдық округіне қарасты «Жер-Жомарт Д» ЖШС-і, Жиделі ауылдық округіне қарасты «Апбасов» шаруа қожалықтары су тапшылығының аз болуына қарамастан жоғары өнімге қол жеткізіп отыр. Сонымен қатар, Бәйтерек, Ақмая, Керделі, Иіркөл, Тұран, Жаңатұрмыс ауылдық округтерінде өнім көрсеткіші жақсы болды.

Шиелі ауданында су тапшылығына байланысты күріш аз егілді

<a href="https://kyzylorda-news.kz/ru/obshestvo/">Kyzylorda-news.kz</a>. Облыс әкімінің орынбасары Б. Жаханов жұмыс сапарымен Арал ауданында болып, өңірдегі балық өңдеу мен түйе сүтінен құрғақ ұнтақ шығару жобасы бойынша салынған нысандарды аралап, жағдайымен танысты.
Алдымен «Қазақстан Аквакультура ЛТД» ЖШС-нің «Балықты тереңнен өңдеу және пластик қайық дайындау» цехына барып, жұмыс барысын көрді. Аталған цехта балықтар «Евростандарт» бойынша мақұлданған технологиямен өңделіп, ішкі нарыққа және ТМД елдеріне жөнелтіледі. Қазіргі таңда аталған зауыт аумағынан балық қалдықтарынан ұн шығару және пластик қайық дайындау цехының құрылысы аяқталған. Ұн шығаруға арналған цехқа қажетті құрылғылар да жеткізілген.
Мұнан кейін Арал қаласындағы индустриялық аймақта орналасқан «QAZAQ CAMEL» ЖШС -нің «Түйе сүтінен құрғақ ұнтақ дайындау» зауытында болды. Жоба бойынша екі ғимарат құрылысы – сүт қабылдап, жинау және құрғақ ұнтақ дайындау ғимараттарын салу жоспарланған. Қазіргі таңда сүт жинақтау ғимаратының құрылысы аяқталған. Құрғақ ұнтақтар шығару құралғыларының ғимараты бойынша жоба сметалық құжаттары дайындалуда.
Облыс әкімінің орынбасары ауданға жасаған сапары барысында Сырдария өзенінен келіп жатқан суды белгілі деңгейде ұстап, балықтың өсуі мен мал азығын дайындауға жағдай жасау үшін сол маңдағы көлдерге, шабындықтарға, каналдар арқылы су жіберілуін реттеп тұрған «Ақ лақ» су тоспасына және «Көкарал» бөгетіне барып, қазіргі жағдайымен таныс болды.
<img src="https://kyzylorda-news.kz/wp-content/uploads/2021/10/246420788_3100841766910855_322769753497552257_n.jpg" alt="" />
<img src="https://kyzylorda-news.kz/wp-content/uploads/2021/10/245870158_3100842050244160_8225534495276980094_n.jpg" alt="" />

Аралда балық қалдықтарынан ұн шығарылмақ

<a href="https://kyzylorda-news.kz/ru/obshestvo/">Kyzylorda-news.kz</a>. Қызылордалық полицейлер кезекті алаяқты қолға түсірді. Қызылорда қаласы полиция бөліміне жергілікті тұрғын арызданады.
Жәбірленушінің айтуынша, бір әйел кісі шілде айында ақшанды еселеп беремін деп алдап, қармағына түсірген. Салған ақшаң апта сайын көбейіп қайтарылатын болады деп сендіріп, 300 мың теңгесін алып, қайтармай қойған. Жүргізілген жедел-іздестіру шараларының нәтижесінде күдікті азаматша анықталып, ұсталды. Ол 27 жастағы қала орталығының тұрғыны екені белгілі болды.
Тәртіп сақшылары аталған жайтты Қазақстан Республикасы Қылмыстық кодексінің 190-бабының 1-бөлігі (Алаяқтық, яғни бөтеннің мүлкін жымқыру немесе алдау немесе сенімді теріс пайдалану жолымен бөтен мүлiкке құқықты иемдену) бойынша сотқа дейінгі тергеу әрекеттерін жүргізуде.

Қызылордалық полицейлер алаяқты қолға түсірді

<a href="https://kyzylorda-news.kz/ru/obshestvo/">Kyzylorda-news.kz</a>. Қызылордалық полицейлер биылғы жылдың 9 айында 169 есірткі қылмысын анықтады. Оның ішінде есірткіні аса ірі мөлшерде сақтаудың – 12, есірткі сатудың – 21, есірткі өсірудің – 43, есірткі жарнамалаудың- 2 дерегі және есірткімен байланысты қылмыстық теріс қылықтардың 90 дерегі анықталды. Заңсыз айналымнан барлығы 143 келі 30 грамм есірткі заты тәркіленсе, оның 352 грамм синтетикалық есірткі құралы.
Жыл басынан атқарылған іс-шаралар нәтижесінде Қызылорда облысы көлемінде есірткі насихаттау және жарнамалаудың 2 дерегі анықталып, Қызылорда қаласының 20 жастағы әйел азаматшасы ұсталып, тергеу әрекеттері кезінде өзінің көрсетуімен 110 граффити суреттер жойылды.
Сонымен қатар, әлеуметтік желі арқылы синтетикалық есірткіні Қызылорда қаласында таратудың 2 дерегі анықталып, Атырау және Семей қалаларының тұрғындары құрықталды. Тінту әрекеттері кезінде олардың қала орталығынан жалдаған пәтерлерінен, сондай-ақ әлеуметтік желілер арқылы тапсырыс қабылдап, жасырып қойған нүктелерінен жастар арасында «мефедрон», «эфедрон», «PVP» атауымен танымал синтетикалық есірткі құралдары заттай дәлелдеме ретінде алынды.
Есірткі қылмысына қарсы іс – қимыл басқармасының бастығы полиция майоры Тұңғышбай Еркіннің айтуынша, ағымдағы жылдың 4 қазан және 30 қараша аралығында өткізіліп жатқан «Рефлекс» жедел профилактикалық іс-шарасының барысында синтетикалық есірткі сақтаудың 3 дерегі анықталды.
Сонымен қатар, «Қызылорда облысы аумағында 2021 жылдың 1 маусым – 30 қазан аралығында «Қарасора-2021» арнайы жедел профилактикалық іс-шарасы да өткізілуде.
Іс-шара кезінде есірткі өсірудің 43 дерегі анықталса, оның 16 дерегі далалық аймақтан, 27 дерегі үй ауласы, саяжайдан табылды.
Есірткі өсіргені үшін барлығы 52 тұлға ұсталса, оның 30-ы қамаққа алынды. Оқиға орнынан барлығы 14 мың 360 түп сора өсімдігі жойылды.

Қызылорда: 9 айда 143 келі есірткі заты тәркіленді

<a href="https://kyzylorda-news.kz/ru/obshestvo/">Kyzylorda-news.kz</a>. Олимпиада чемпионы Серік Сәпиев мәдениет және спорт министрлігі спорт және дене шынықтыру істері комитетінің төрағасы қызметінен кетті, деп хабарлайды&nbsp;<a href="https://stan.kz/">Stan.kz</a>.
Бұл хабарды Спорт және дене шынықтыру істері комитетінің баспасөз қызметі растады. Комитеттің айтуынша, Серік Сәпиев өз еркімен жұмыстан кеткен.
Айта кетейік, жазда өткен Токио Олимпиада ойындарында қазақстандық боксшылар жоғары нәтиже көрсете алмаған еді.
“Басқа боксшылардың да нәтижесі мәз емес, кейбір спортшылар тиісті деңгейдегі дайындықпен келмеді. Жалпы боксшылар Олимпиадада “алтын” алмағандықтан көрсеткіш нашар деп есептеймін”, – деп бағалады Серік Сәпиев.
Серік Жұманғалиұлы Қарағанды облысы Абай қаласында 1983 жылғы 16 қарашада дүниеге келген. 2002-2004 жылдары – Қазақстан Республикасының Қарулы күштер қатарында борышын орындаған.
2003-2009 жылдары – Е.А.Букетов атындағы Қарағанды Мемлекеттік университетінде дене шынықтыру оқытушысы және құқықтану мамандықтары бойынша білім алған.
2011-2014 жылдары – тау-кен істерінің бакалаврі мамандығы бойынша ҚарМТУ-ді бітірген.
2014-2016 жылдары – Қазақ спорт және туризим академиясының академиялық педагогика ғылымының магистрі дәрежесін алған.
2014 жылы – “Болашақ” бағдарламасы бойынша спорт менеджері мамандығын алған.
2004-2014 жылдары – келісімшарт бойынша мерзімнен тыс әскери қызметте болған.
2010-2012 жылдары – “Қазақстанның бокс федерациясы” ФА ОЮЛ жаттықтырушы-оқытушы қызметін атқарған.
2013-2014 жылдары – “Қазақстанның бокс федерациясы” ФА ОЮЛ спорт жөніндегі директоры, 2005-2013 жылдары бокс жөніндегі Қазақстан Республикасының ұлттық командасының штаттында нұсқаушы-спортшы, 2014-2017 жылдары – ЖШС “Astana Arlans” КСК бас директоры болған.
2017-2019 жылдары VI сайланған ҚР Парламенті Мәжілісінің депутаты, Әлеуметтік-мәдени даму комитетінің мүшесі, “Нұр Отан” партиясының Қазақстан Республикасы Парламенті Мәжілісіндегі фракциясының мүшесі болған.
2019 жылы ҚР Мәдениет және спорт министрлігі спорт және дене шынықтыру комитетінің төрағасы болып тағайындалған еді.

Серік Сәпиев министрліктегі лауазымынан босатылды

<a href="https://kyzylorda-news.kz/ru/obshestvo/">Kyzylorda-news.kz</a>. Қызылорда облысындағы экологиялық жағдай Арал-Сырдария бассейнінің сулылығына тікелей байланысты. Арал-Сырдария бассейнінде 2019 жылдан бастап су аздығы циклы жалғасуда.
Сырдария өзенінің сулылығы Қырғызстан, Тәжікстан және Өзбекстан аумағындағы су шаруашылығы жағдайына байланысты және көбінесе «Тоқтоғұл» су қоймасында (Қырғызстан) судың жиналуымен айқындалады. Биыл Тоқтоғұл су қоймасында судың жинақталу көлемі 2019 жылға қарағанда 5 млрд. м3 кем, вегетациялық кезеңнің басында Тоқтоғұл су қоймасында шамамен 15 млрд. м3 су жинақталған. Биылғы жылдың 1 сәуірдегі жағдай бойынша су қоймасында 8,7 млрд. м3 ғана болды, бұл 2020 жылғы ұқсас кезеңге қарағанда 2,9 млрд-қа аз.
Нарын-Сырдария су қоймалары құламасы жұмысының энергетикалық режимге ауысуына байланысты Шардара су қоймасына ағын вегетациялық кезеңде азаяды және вегетация аралық кезеңде ұлғаяды.
Осыған байланысты Шардара су қоймасын су тастау және толтыру режимі Сырдария өзенінің жоғарғы ағысында орналасқан су қоймаларының жұмыс режиміне және көрші елдердегі су шаруашылығы жағдайына байланысты. 
Бүгінгі таңда Шардара су қоймасы толтыру режимінде жұмыс істейді. Су қоймасынан суды ағызу 50 м3/сек ағынмен жүзеге асырылады, келген судың көлемі 140 м3/сек құрайды.
Шардара су қоймасынан су ағызу ағындылықтың ұлғаюына қарай көбиетін болады.
Сонымен бірге Тәжікстан және Өзбекстан елдерінде вегетация кезеңі ағымдағы жылғы қазанның соңына дейін жалғасады. Сондықтан Шардара су қоймасына судың түсуі және Сырдария өзенінің төменгі ағысына су жіберу көлемін ұлғайту мәселесі ағымдағы жылғы қарашада Мемлекетаралық үйлестіру су шаруашылығы комиссиясының кезекті 81-ші отырысында Сырдария өзенінің бассейні бойынша 2021 жылғы вегетациялық кезеңнің қорытындылары шығарылып, 2021-2022 жылғы вегетацияаралық кезеңінде мемлекеттердің су алу лимиттері мен Нарын-Сырдария су қоймалары каскадының болжамды жұмыс режимін келісу кезінде қаралатын болады.

Арал-Сырдария бассейнінде 2019 жылдан бастап су аздығы циклы жалғасуда

<a href="https://kyzylorda-news.kz/ru/obshestvo/">Kyzylorda-news.kz</a>. Қызылорда облысы кәсіпкерлер палатасының мамандары бизнес өкілдеріне 9 айда 1320 экспорттық, 85 СТ-КЗ, 11 индустриалды сертификат берді. Кәсіпкерлерге берілетін сертификаттың түрлері, ерекшеліктері туралы сұрақтарымызға Палата сарапшысы Айман Шаймаханқызы Сәдуова жауап берді.
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – Айман Шаймаханқызы, сәлеметсіз бе. Кәсіпкерлер палатасымен кәсіпкерлерге қандай сертификаттар беріледі? Бір-бірінен айырмашылығы қандай?
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – Сәлеметсіз бе. Кәсіпкерлер палатасымен бизнеспен айналысатын азаматтарға сертификаттың үш түрі беріледі. Олар индустриалды сертификат, СТ-KZ және экспорттық сертификат.&nbsp; Индустриалды сертификаттың өзге сертификаттардан айырмашылығы – отандық қызмет, жұмыс және тауар өндірушілерге беріледі. Бұл құжатты рәсімдеу үшін кәсіпкер техникалық және технологиялық базасы, тауар, қызмет, жұмыс өндіруге қатысты нормативті құжаттары мен салаға қатысты мамандары бар екенін дәлелдеуі қажет.&nbsp; СТ-KZ сертификаты қазақстандық тауар өндірушіге беріледі, және қазақстандық үлестің пайызын көрсетеді және тауардың шығу тегін айқындайды. Ал экспорттық сертификат халықаралық экономикалық қарым-қатынас үшін, тауардың шыққан елін анықтау мақсатында, Қазақстан мен экспортқа шығарылатын елдердің арасында жасалған келісім-шарттар негізінде рәсімделеді.
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – Айман Шаймаханқызы, осы құжаттардың ішінде индустриалды сертификатқа тоқталып өтіңізші. Сертификатты алу үшін талаптары қандай?
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – Индустриалды сертификат – бұл ерікті түрде жасалатын сертификация. Өтініш берушінің техникалық, технологиялық, ресурстық мүмкіндіктері бар екенін көрсетеді, тауар, қызмет және жұмыс өндіруге шамасы жететіндігін айғақтайды, өтінімде көрсетілген өнімдер ауқымын өндіруге қауқары жететінін дәлелдейді. Кәсіпкерлер индустриалды сертификатты алу үшін 2 кезеңнен өтуі қажет. Бірінші кезеңде салалық қауымдастықпен ұсынылған сарапшы кәсіпорын тапсырған құжаттар топтамасын қарап шығады, кейін өндірістің базасына барып, талдау жүргізеді де берілген мәліметтерге сәйкестігін салыстырады. Сарапшы өндірісте болып, мәлімделген тауар, жұмыс, қызмет номенклатурасын шығаруға мүмкіндікті бағалап, тиісті біліктіліктегі қызметкерлер санын, өндірістік жабдық, өндіріс технологиясын тексереді. Талдау нәтижесі бойынша тауар, жұмыс, қызметті өндіру мүмкіндігін және мәлімденген өндірістік қуаттылық туралы сараптамалық қорытынды береді (сарапшылар тізімі Ұлттық палатаның сайтында қолжетімді). Екінші кезеңде кәсіпкер электрондық құжаттар алмасудың біріңғай жүйесіне тіркеліп (қазақстандық электрондық құжаттар алмасу орталығы DOC24), содан соң өңірлік кәсіпкерлер палатасына салалық сарапшының шығарған қорытындысымен қатар құжаттар пакетін қосып, өтініш ұсынады. Өңірлік кәсіпкерлер палатасы жергілікті атқарушы органның және аймақтық кеңес мүшесінің қатысуымен өндіріске тексеру жүргізеді. Кәсіпкердің өндірістік мүмкіндіктері дәлелденген кезде сертификат рәсімделеді. Аталмыш сертификат кәсіпкерге 3 жыл мерзіміне электронды түрде QR белгісімен тегін беріледі. Құжаты бар кәсіпорын автоматты түрде отандық тауар, жұмыс және қызмет өндірушілердің тізіміне енгізіледі.
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – Индустриалды сертификат 3 жылға беріледі дедіңіз. Үш жылға дейін кәсіпкер осы құжатпен жүре бере ме, әлде өзге де талаптар бар ма? Сондай-ақ сертификат қандай жағдайда кері қайтарылады?
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – Сертификат 3 жылға беріледі. Дегенмен 12 ай өткеннен кейін кәсіпкер көрсетіп отырған жұмыс, қызметі мен шығарып жатқан тауар түрлерінде, технологиялық құрал-жабдықтарында қандай да бір өзгерістер болмаса, жалпы бастапқы ұсынған түріне өзгерістер енгізілмеген жағдайда сол сертификатты келесі жылға актуализация жасайды. Ал сертификатты алғаннан кейін кәсіпорнын ұлғайтып немесе мамандар санын арттырған болса, технологиялық, техникалық өзгерістер жасап, жаңадан құрал-жабдықтар алған болса қосымша өзгерістер енгізуге өтініш береді. Индустриалды сертификат бірнеше жағдайда кері алып қойылуы мүмкін. Бұл Индустриалды сертификат Қағидасының 13 бөлімінде көрсетілген: кәсіпкер өз қызметін тоқтатып ликвидация болған жағдайда, қағиданың 5-ші бөліміндегі шарттар орындалмаса, верификация кезінде көрсететін қызметін, жұмысын, өнімін шығара алатындығын дәлелдей алмаса, 3-ші жағдайды есептемегенде, өтінім беруші ерікті түрде қайтарып алса, &nbsp;верификация комиссиясын технологиялық базаны тексеруге өтінім иесі рұқсат етпесе. Осындай жағдайларда, өтінім беруші арнайы тізілімге өтіп кетуі мүмкін. Бұл кезде кәсіпкер 24 айға дейін индустриалды сертификат алуға қайта өтініш бере алмайды.&nbsp; Жалпы сертификат алуға қатысты бизнес өкілдерінен сұрақтар туындаған жағдайда кеңес беруге әзірміз. Байланыс нөміріміз 8/7242/ 40-09-81.
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – Айман Шаймаханқызы, сұхбатыңызға рақмет. Жақсы, сау болыңыз.

Қызылордалық кәсіпкерлер 9 айда 1320 экспорттық сертификат алды

<a href="https://kyzylorda-news.kz/ru/obshestvo/">Kyzylorda-news.kz</a>. Қаңтар – жылдың ең суық айы болады, өйткені биыл Моңғол антициклонының әсері күшейе түседі. Түнде термометр бағандары ҚР солтүстік жартысында – 35-40°С, оңтүстігінде – 22-30°С дейін түсуі мүмкін, деп хабарлайды Қазгидромед.
Бір ай ішіндегі орташа ауа температура республика аумағының басым бөлігінде нормадан 1-2° төмен, елдің батысында, оңтүстік-батысында, солтүстігінде, оңтүстігінде және оңтүстік-шығысында нормаға жуық болады деп күтілуде.
Республика бойынша жауын-шашын мөлшері көпжылдық нормадан аз, ҚР солтүстік-батысында, солтүстік-шығысында және Алматы облысының оңтүстік-шығысында нормаға сай болады.
Ақпан қыс мезгілін аяқтайды, бірақ оның климаттық сипаттамалары мен айналым ерекшеліктері қаңтарға өте жақын.
Қазақстанның солтүстік жартысында қар мен боран сақталады.
Бір ай ішіндегі орташа ауа температура ҚР аумағының басым бөлігінде нормаға жуық, республиканың оңтүстік-шығысында нормадан 1°С жоғары болады деп күтілуде.
Жауын-шашын республиканың басым бөлігінде нормаға жуық, оңтүстік-батыс жартысында, Орталық Қазақстанның батысында нормадан аз, елдің оңтүстігі мен оңтүстік-шығысының таулы және тау бөктеріндегі аудандарында нормадан артық болады болжанады.

Қазақстан және Қызылорда облысының жаңалықтары