<a href="https://kyzylorda-news.kz/">Kyzylorda-news.kz.</a>&nbsp; “Қазгидромет” синоптиктері 31 мамыр мен 1-2 маусымдағы ауа райын болжады.
<blockquote>
 “Мамырдың соңғы күні Қазақстан аумағының басым бөлігі Сібірдің үстіндегі циклон жырасының ықпалында болады. Найзағай ойнап, оңтүстік-шығыста қатты жаңбыр, бұршақ, дауыл болады. Республика бойынша жел күшейеді”, – делінген хабарламада.
</blockquote>
Алайда метеорологтар 1 маусымда Батыс Қазақстанға Солтүстік антициклон әсер ете бастайтынын, ол республика аумағы арқылы шығыс бағытқа ауыса отырып, жауын-шашынның біртіндеп тоқтауына және температураның көтерілуіне алып келетінін&nbsp;айтты.
<blockquote>
 “1-2 маусымында еліміздің батысында, солтүстік-батысында, солтүстігінде, орталығында түнгі және таңертеңгі сағаттарда топырақ бетінде 2 градусқа дейін үсік жүреді деп болжанады”, – дейді синоптиктер.
</blockquote>

Алдағы үш күнге арналған ауа райы болжамы

<a href="https://kyzylorda-news.kz/">Kyzylorda-news.kz.</a>&nbsp; Әскери қызметшілердің балалары Қызылорда облыстық тарихи-өлкетану мұражайында болды.
Мемлекет басшысы Қасым-Жомарт Тоқаев 2022 жылды «Балалар жылы» деп жариялағаны белгілі. Осы орайда Қызылорда гарнизонында балаларға арналған түрлі іс-шараларды ұйымдастыру дәстүрге айналғанын атап өткен жөн. Демалыс күндері әскери қызметшілердің балалары облыстық тарихи-өлкетану мұражайына экскурсия жасап, ондағы бай тарихи жәдігерлермен танысты. 
Іс-шараны ұйымдастырудағы мақсат жас ұрпақтың шығармашылық қабілетін жетілдіру, балалардың бойында өткен тарихқа деген құрметті қалыптастыру.
Балалар мұражайдағы қазақ халқының зергерлік, этнографиялық бұйымдарымен, екінші дүниежүзілік соғыста қолданылған қару-жарақ түрлерімен танысты. Әсіресе, оларды Қазақстанның тәуелсіздік жылдарына арналған жәдігерлер қызықтырды. Әскери қызметшілердің қыздары КСРО халық әртісі, Халық қаһарманы Роза Бағланова мен Қазақстан Республикасының еңбек сіңірген әртісі Мәдина Ералиеваға арналған экспозиция ерекше таңдандырғанын атап өтті.
<blockquote>
 Балалар жылына арналған шаралардың бірі – тарихи-өлкетану мұражайына саяхат болды. Бүгінгі шарамыз Халықаралық балалар күнімен тұспа-тұс келіп отыр. Мұражайды тамашалау барысында балалардың өткен тарихымызға ерекше қызығушылық танытқанын көріп қуандым. Әскери қызметшілердің балаларымен осындай рухани маңызы бар шараларды алдағы уақытта да жиі-жиі өткізіп тұру жоспарда бар, – дейді Әуе шабуылына қарсы қорғаныс әскерлері әскери бөлімі командирінің орынбасары аға лейтенант Ақылбек Болат.
</blockquote>
«Өткенді білмей, болашақты болжау мүмкін емес» деген. Балалардың музейден еліміздің мәдениетімен, туған өлке тарихымен танысып, таным-түсініктерін молайтып шыққаны анық.
<img src="https://kyzylorda-news.kz/wp-content/uploads/2022/05/284555500_508651340959002_5225532878406607552_n.jpg" alt="" />
<img src="https://kyzylorda-news.kz/wp-content/uploads/2022/05/283984873_508651314292338_2172096053545598746_n.jpg" alt="" />

Әскери қызметшілердің балалары мұражайда болды

<a href="https://kyzylorda-news.kz/">Kyzylorda-news.kz.</a>&nbsp; Халықаралық пәндік олимпиадалардың, спорттық жарыстардың және әлемдік деңгейдегі шығармашылық байқау жеңімпаздары мен жүлдегерлері ҰБТ тапсырмай-ақ ЖОО-ға грантқа түсуге мүмкіндік алады. Осыған қатысты тиісті бұйрыққа Білім және ғылым министрі Асхат Аймағамбетов қол қойды.
<blockquote>
 «Халықаралық олимпиадалардың, спорттық және шығармашылық байқаулардың тізбесін бекіту туралы бұйрыққа қол қойдым. Бүгін Білім және ғылым министрлігі Дүниежүзілік гимназиада – 2022-нің жеңімпаздары мен жүлдегерлерін марапаттау рәсімін өткізеді. Оқушыларымыз әлемнің 70-тен астам елінен келген жасөспірімдерді басып озып, 86 медаль жеңіп алды. Осылайша ұлттық құрамамыз ІІІ орынды иеленген болатын. Енді олар бірінші болып ЖОО-да оқу үшін гранттар алады. Жас дарындар Мемлекет басшысының шешімі арқасында осындай қолдауға ие болып отыр», – деп жазды министр желідегі парақшасында.
</blockquote>

Халықаралық жарыс жеңімпаздары ҰБТ тапсырмай-ақ білім грантына ие болады

<a href="https://kyzylorda-news.kz/">Kyzylorda-news.kz.</a>&nbsp; Референдум — мемлекеттік маңызы бар мәселені халықтық дауысқа салу. Мұндай демократиялық институт алғаш рет Швейцарияда қолданылды. Референдумға заң немесе халықаралық шарт жобасы, басқару сипатындағы мәселелер ұсынылады.
Тәуелсіз Қазақстан тарихындағы алғашқы Референдум 1995 жылы өткізіліп, халық бірауыздан Ата Заңды, яғни қазіргі қолданыстағы Конституцияны қабылдады. Кеше ғана өткен Қазақстан халқы Ассамблеясының «Ел бірлігі – жаңарған Қазақстанның тірегі » атты ХХХІ сессиясында Мемлекет басшысы Қасым-Жомарт Тоқаев Ата заңға өзгерістер мен толықтырулар енгізу жөнінде республикалық референдум өткізу жөнінде ұсынды.
«Конституцияны жалпыхалықтық дауыс беру арқылы өзгерту халық қалауының айқын көрінісі болады деп есептеймін. Референдум әрбір азаматқа ел тағдырын шешуге тікелей қатысуға мүмкіндік береді және жан-жақты демократияландыру мен Жаңа Қазақстанды құру жолындағы бағытымызды нығайтады» –деді ел президенті. Сондай-ақ Президент: «Жаңа Қазақстан дегеніміз – бұл Әділетті Қазақстан. Оны құруға әрқайсымыз өз үлесімізді қосуымыз керек». Біз Екінші Республиканы бірге құрамыз, Жаңа Қазақстанды бірге өркендетеміз! Әр азаматқа бірдей мүмкіндік беретін әділ әрі дамыған мемлекет боламыз! – деді. «Екінші Республика» – суперпрезиденттік республикадан мықты Президенттік-Парламенттік басқару жүйесіне көшуді көздейді деп ойлаймын. Ол қазіргі таңда заман талабы, уақыт талабынан туындап отыр. Тәуелсіздіктің алғашқы жылдарында бұл басқару жүйесі қажет болды да, бірақ қазіргі уақыт, қоғам басқа. Әділдік – адамзаттың басты құндылығы. Бүгінгі қоғам азаматтардың әділ болуын қалайды. Әділеттілік салтанат құрған жағдайда өркениетті даму болатындығы айдан-анық. Мемлекет және ел азаматтары заң, тәртіп мәселесінде ешқашан бей-жай болмау керек деп ойлаймын, өйткені тәртіп бар жерде — әділдік болады, әділдік бар жерде жеңістің жалауы желбірейтіні анық. Сондықтан: 
Көлдің суын жамандап – Еділ қайдан табарсың, 
Әкіміңді жамандап – әділ қайдан табарсың, 
Өз барыңды жамандап – асыл қайдан табарсың.- деп Асан Қайғы бабамыз жырлағандай саяси реформаларды жүзеге асыру үшін бізге қазіргі таңда бірлік пен ынтымақ, ауызбіршілік пен сенім басты тірегіміз болу қажет деп санаймын. Тек қана ел ішінде ғана емес, әлемде әділдікті, бейбітшілікті, ауызбіршілікті қолдаған елдің ертеңі жарқын болары сөзсіз. Лайым солай болғай.
Дәулет Омаров,
Облыстық ҚХА жанындағы ғылыми-сарапшылық тобының мүшесі

Референдум әрбір азаматқа ел тағдырын шешуге тікелей қатысуға мүмкіндік береді

<a href="https://kyzylorda-news.kz/">Kyzylorda-news.kz.</a> Шиелі ауданында ауыл шаруашылығы дақылдарын егу оңтайлы мерзімдеріне сәйкес жүргізілуде.
Су тапшылығына байланысты ауданда әртараптандыру дақылдарын егуге басымдық беріліп жатыр. Ауданның азық-түлік қауіпсіздігін қамтамасыз ету мақсатында ағымдағы жылы картоп 1201 гектарға, көкөніс 1701 гектарға және бақша дақылдары да 2457 гектарға ұлғайған.
Облыстық ауыл шаруашылық басқармасының дерегінше қазіргі таңда Шиелі ауданының шаруалары суды үнемдеу технологиясын пайдалана отырып, «СЕРІК» шаруа қожалығы тамшылатып суғару әдісімен қызанақ, қияр, қауын, қарбыз егіп жатыр. Сонымен қатар, жаңбырлатып суғару жобасын қолдану арқылы «Ұлытау Агро» ЖШС-гі 40 гектар жоңышқа екті.
Шаруалар тамшылатып суғарудың пайдасы мен тиімділігін байқауда. Бұл өз кезегінде мол өнім алуға мүмкіндік береді.

Шиеліде бақша дақылдарын егу 2457 гектарға ұлғайды

<a href="https://kyzylorda-news.kz/">Kyzylorda-news.kz.</a>&nbsp;Еңбек және халықты әлеуметтік қорғау министрлігі «Еңбек ресурстарын дамыту орталығы» АҚ және Eurasian Resources Group компаниялар тобымен бірлесіп «Жастарды жұмысқа орналастыру» бірлескен жобасын іске қосты.
Жоба аясында 35 жасқа дейінгі 10 мың жасқа жұмыс орындарын ұсыну жоспарланған.
Жоба аясында мамырдан бастап «Enbek.kz» электрондық еңбек биржасында кез келген адам ERG компаниялар тобынан жұмыс таба алады.
<blockquote>
 «Enbek.kz» порталының басты бетінде&nbsp; баннер орналасқан, оны басу арқылы жұмыс іздеушілер ERG тобындағы компаниялардың HR-қызметтері орналастырған бос жұмыс орындарының тізімімен таныса алады», – делінген хабарламада.
</blockquote>
Жоба іске қосылғаннан бері әртүрлі мамандықтар бойынша 346 бос жұмыс орны орналастырылды. Олардың арасында техникалық немесе медициналық біліктілікті қажет ететін және арнайы білімі жоқ адамдарға арналған бос жұмыс орындары да бар.
<blockquote>
 «ERG 28 жылдан бері табысты жұмыс тәжірибесі бар, табиғи ресурстарды өндіру мен өңдеу саласындағы жетекші компаниялардың қатарында. ERG құрамына «Қазхром» Трансұлттық компаниясы» АҚ, «Соколов-Сарыбай тау-кен байыту өндірістік бірлестігі» АҚ, «Қазақстан алюминийі» АҚ, «Қазақстан электролиз зауыты» АҚ, «Еуроазиялық энергетикалық корпорация» АҚ, «Еуразия» Медициналық орталығы» ЖШС және басқа да ірі кәсіпорындар кіреді», – делінген хабарламада.
</blockquote>
<a href="https://turkystan.kz/article/182402-zhastardy-zhumyska-ornalastyratyn-zhana-zhoba-iske-kosyldy/">Turkystan.kz.</a>

Жастарды жұмысқа орналастыратын жаңа жоба іске қосылды

<a href="https://kyzylorda-news.kz/">Kyzylorda-news.kz.</a> Нұрсұлтан Назарбаев белгілі саясаттанушы Данияр Әшімбаевқа сұхбат беріп, алдағы референдум жайында ойымен бөлісті.&nbsp;
Сұхбат барысында&nbsp;Әшімбаев түзетулер арасында Қазақстанның Тұңғыш Президентінің мәртебесіне қатысты өзгерістер де бар екенін атап өтті.&nbsp;
Назарбаев Конституцияға түзетулер енгізу бойынша өткізілетін бүкілхалықтық референдумға баратынын айтты.&nbsp;
<blockquote>
 “Иә, 5 маусымда Конституция берген құқығымды міндетті түрде қолданып, референдумда дауыс беруге қатысамын. Мен еліміздің Негізгі Заңы – қатып қалған құқықтық реликт емес, қазақстандық қоғамның өмірін, ондағы болып жатқан өзгерістерді көрсететін тірі тетік екенін үнемі айтып келемін. Өзгерістер бұрын да енгізілген.&nbsp;
 Бұл уақыт талабы болса және қоғамның ілгерілеуіне, демократиялық дамуына ықпал етсе, әр ұрпақтың негізгі заңға өзгерістер енгізуге құқығы бар деп санаймын. Мені, бәріңіз сияқты болып жатқан жағдайдың бәрі мемлекет пен біздің халқымыздың мүддесі үшін болғаны алаңдатады”, – деді Назарбаев.
</blockquote>
Қазақстанның Тұңғыш Президенті “артында халқы мен елі үшін” не қалдыратыны әрқашан бәрінен де маңызды екенін атап өтті.
<blockquote>
 “2019 жылы саналы қадам жасап, көпшіліктің қарсылығына қарамастан Мемлекет басшысы қызметінен кеттім. Халықтық қолдауымен кеттім. Мұны 2015 жылғы соңғы президенттік сайлау дәлелдейді, ол кезде мен 97,7 пайыз дауыс алдым. Иә, менде белгілі бір өкілеттіктер қалды. Бірақ бұл тегіс саяси транзит үшін және қоғам мен билік элитасында болуы мүмкін қайшылықтарды жеңілдету үшін жасалды.
 Конституцияға сәйкес президент ретіндегі өкілеттілігімді Сенат Төрағасы Қасым-Жомарт Кемелұлы Тоқаевқа тапсырдым. Кейінгі жалпыхалықтық сайлауда ол жеңіске жетті. Осы жылдар ішінде мен оның еліміздің реформалануы мен одан әрі дамуы жөніндегі іс-әрекеттерін жан-жақты қолдадым. Бұл жолы да қолдау&nbsp;көрсететініме күмәнданбасаңыздар болады”, – деді Назарбаев.
</blockquote>
Саясаттанушы Назарбаевтан заңсыз байыды деген күдікке ілінген туыстары туралы не ойлайтынын сұраған.
<blockquote>
 “Біз ұзақ жыл бойы Қазақстанда құқықтық мемлекет құрып келеміз. Оның негізгі қағидаты: заң – бәріне ортақ. Егер туыстарымның бірі заңды бұзу үшін менің атымды жамылса, онда олар тиісті жазаға тартылуы керек. Оның кінәсі сотта дәлелденуге тиіс. Әр азамат заңды түрде қорғануға құқылы екенін ұмытпаған жөн”, – деді Назарбаев сұхбатында.
</blockquote>
Сондай-ақ,&nbsp;президенттік&nbsp;жылдарында халқымыз үшін үлкен жұмыстар атқарылғанын, кейбіреулер мұны ұмытып кететінін жеткізді.&nbsp;
<blockquote>
 “Халықтың дана екеніне және бәрін есте сақтайтынына сенімдімін.&nbsp;Қазақстан саяси да, экономикалық та халықаралық процестердің толыққанды қатысушысына айналды. Тәуелсіздік жылдары елімізге 360 млрд. доллардан астам тікелей шетелдік инвестиция тартылды.&nbsp;Халықаралық валюта қорының (ХВҚ) деректері бойынша Қазақстанның ЖІӨ 1993 жылғы 5,15 млрд.доллардан 2020 жылы 164,79 млрд. долларға дейін 32 есе өсті. Жан басына шаққандағы ЖІӨ 1993 жылғы 304,85 доллардан 2020 жылы 8,7 мың долларға дейін 28 есе өсті”, –&nbsp;деді экс-президент.&nbsp;
</blockquote>
Бұнымен қоса Қазақстан экономикасының көлемі Орта Азияның барлық елдерінің экономикасынан 2 есе артық екенін еске салды.
<blockquote>
 “Біз 1991 жылы неден бастадық және бүгінге дейін не нәрсеге қол жеткіздік. Жер мен көктей. Тәуелсіздігімізді нығайттық. Барлық көршілерімізбен&nbsp;шекараны анықтадық және қазіргі уақытта бізге қатысты кез-келген аумақтық шағымдар толығымен алынып тасталды.&nbsp;Тәуелсіз болу үшін мемлекет әлем мойындаған шекараларға, өзінің соғысқа қабілетті армиясына, ұлттық валютасына, халықаралық мойындауға ие болуы керек. Мұның бәрі бізде болған жоқ. Бұған менің президент болған&nbsp;жылдарымда және менің басшылығыммен қол жеткізе алдық”, –&nbsp;дейді Назарбаев.
</blockquote>

Нұрсұлтан Назарбаев алдағы референдум туралы көзқарасын айтты

<a href="https://kyzylorda-news.kz/">Kyzylorda-news.kz.</a> «Евразия» спорт кешенінде қазақ күресінен XIІI облыстық «Алтын белбеу» сайысы өтті.
Өңіріміздің барлық аймағынан құралған 9 командадан 200-ден аса ең мықты балуандар өзара белдесті.
Ауыр салмақта өнер көрсететін түйе палуандар сайысына қатысқан 16 спортшының арасынан 1 орын «Сыр барысы» – Мақсат Исақабыловқа бұйырды. 2-орынды «Сыр арланы» Нұрым Сәлімгереев жеңіп алды. 3-орынды «Сыр сұңқары» – Жұмахан Сағыныш иемденді.
Сонымен, «Алтын белбеу» белдігінің иегері Қызылордалық Мақсат Исағабылов атанды.
1 және 2-орын алған балуандар 3 шілде күні Нұр-Сұлтан қаласында ҚР Президенті жүлдесі үшін өтетін «Қазақстан Барысы» республикалық турниріне жолдама алды. Қос спортшы “Астана күні” мерекесі қарсаңында ел астанасында облыс намысын қорғайтын болады.
<img src="https://kyzylorda-news.kz/wp-content/uploads/2022/05/284473081_170304972103396_6964925866582156235_n.jpg" alt="" />
<img src="https://kyzylorda-news.kz/wp-content/uploads/2022/05/284682986_170305592103334_7298692682713692669_n-2.jpg" alt="" />

Қызылордада қазақ күресінен «Алтын белбеу» жарысы өтті

<a href="https://kyzylorda-news.kz/">Kyzylorda-news.kz.</a> Қызылордада еліміздің дамуына ерекше үлес қосқан адамдар туралы энциклопедия қайта басылатын болады. Оған Орынбор облысының мемлекеттік мұрағаттарынан жергілікті этнографтар тапқан мәліметтер енгізіледі.
Мәселен, ресейлік сақтау орнының сөрелерінен Әбілқайыр ханның жақын адамы – Кедей би туралы белгісіз фактілер табылды. Мәселен, белгілі болғандай, көрнекті қайраткер 1740 жылдан 1750 жылға дейін Петерборда Қазақ хандығының мүддесін қорғаған. Сонымен қатар, экспедиция құрамында ол қазақ жерлерін зерттеді, ол туралы кейінірек кітаптарында жазды. Қызылордалық ғалымдардың зерттеулері әлі де жалғасуда. Бұл жұмыстардың барлығы “Рухани жаңғыру”бағдарламасы аясында жүзеге асырылуда.
<blockquote>
 – 21 ғасырда инновацияға, ғылымға, техникаға көп көңіл бөлінеді. Бірақ рухани факторды, ұлт тарихын ұмытпауымыз керек. Өз тарихын білмейтін халықтың болашағы жоқ екені белгілі. Біз тарихымыздағы ақтаңдақтардың орнын толтыру үшін жұмыс істеп қана қоймай, осы білімді болашақ ұрпаққа аман — есен жеткізуіміз керек, – деді тарих ғылымдарының докторы Берекет Кәрібаев.
</blockquote>

Қызылордада энциклопедия қайта басылады

<a href="https://kyzylorda-news.kz/">Kyzylorda-news.kz.</a>&nbsp; «Әскери қызметшілердің мәртебесі туралы» Заңға енгізілген өзгерістерге орай, әскери қызметшілердің зейнетке шығу жасын 5 жылға созуға болады. Бұл туралы онлайн-брифингіде Қорғаныс министрлігі Зейнетақымен қамсыздандыру орталығының бастығы полковник Қайыржан Бимолдин мәлім етті, деп хабарлайды ҚазАқпарат.
<blockquote>
 «Үкімет бекіткен ең басты норма – барлық әскери қызметшілер мемлекеттік бюджет арқылы зейнетақы тағайындау жүйесіне көшті. Бұрын 2016 жылға дейін жинақтау жүйесінде болғанбыз. Бұл – өте жақсы жетістік деп ойлаймын. Зейнет жасы бойынша ұзарту «Әскери қызметшілердің мәртебесі туралы» заңда қарастырылған. Биыл ол заңға өзгерістер енгізілді. Соған сәйкес, әскери қызметшінің жасын 5 жылға дейін созуға болады», – деді Қайыржан Бимолдин.
</blockquote>
Сондай-ақ, орталық бастығы әскери қызметшілердің зейнетақысы қалай есептелетінін де түсіндіріп өтті.
<blockquote>
 «Әскери қызметшілерге зейнетақы тағайындау нормалары «Қазақстан Республикасының Зейнетақы туралы» заңында қарастырылған. Ол әскери қызметшінің еңбек өтіліне тікелей байланысты. Нақты айтсақ, егер 25 жыл еңбек өтілі болса, әскери қызметшіге 50 пайыз зейнетақы тағайындалады. Ал 25-тен астам әр жылға 2 пайыздан қосылып отырады. Мысалы, 30 жыл еңбек өтілі бар әскери қызметшіге өзінің алып отырған жалақысының 60 пайыз зейнетақы тағайындалады», – деді ол.
</blockquote>
Айтуынша, «Цифрлық Қазақстан» бағдарламасы шеңберінде министрліктің әскери қызметшілерді зейнетақымен қамсыздандыру процестері автоматтандырылған.
<blockquote>
 «Оның ішінде зейнетақы тағайындау, қайта қарау, жаңғырту процестері автоматтандырылды. Бұрынғы жүйе бойынша мұның бәрі қолмен істелінетін. Зейнетақы төлемдерінің көшірмелері пошта арқылы жіберілетін. Бүгінде интеграциялық жүйе бойынша бірнеше секундтың ішінде жетеді. Бұрын тағайындау туралы құжаттар 2 айдың ішінде поштамен барып жатса, қазір екі жұма, бір айдың ішінде іске асатын жағдайға жетті», – деді орталық бастығы.
</blockquote>

Әскерилердің зейнетке шығу жасын 5 жылға созуға болады 

<a href="https://kyzylorda-news.kz/">Kyzylorda-news.kz.</a> Қазақ халқы қуғын-сүргінді патшалық Ресейдің кезінен бастап бастан кешірді десек, қателеспейміз. Өйткені «аға ұлт» бұратана халықтарға аяушылықпен қарамай, оларды барынша ашса алақанында, жұмса жұдырығында ұстағанын тарихтан білеміз. Қазақ жеріне орыс және украин шаруаларын әкеліп төгіп, атамекен жерлерінен айыруы, қайырымдылық деген желеумен қазақтарды шоқындыруы, Бірінші дүниежүзілік соғыс кезінде Орта Азияны мекен еткен халықтардың жастарын қанды қырғынның қара жұмысына айдауы және тағы басқадай қатігездік жағдайлар дәлел бола алады.
Кеңестік кезеңде қазақ халқы ерекше аяусыздықпен басып-жаншылды және оған қолдан қырғын жасалды. 1917 жылы Қазан төңкерісі орнағаннан кейін, қолына билік алған большевиктер алдымен бас көтерер ауқатты адамдарды қуғындай бастады. Малы мен жерін тартып алған адам еріксіз шет елге бас сауғалап қаша бастады. Үдере көшіп, басқа елге, басқа жерге бару дегеніңіз, оңай дүние емес. Жол-жөнекей ұры-қары мен өзара соғысқан Ресейдің қызылдары да, ақтары да аяусыз талаған талай көш қашып құтыла алмай жолда қалып, қырылды. Одан бергі уақытта ұжымдастыру басталып, қара халықтың қолындағы азын-аулақ малын сол қызыл өкімет тартып алды. Қазақ малдан айырылған соң күнін көре алмады. Отызыншы жылдардың басында ашаршылық кесірінен халқымыз баудай қырылды. Түлкі-тышқан тұрмақ, адам етін жеген қатігез заман сол кезде орнап еді.
Осындай халге елді душар еткен кеңестік Қазақ республикасын басқарған қандықол Филипп Голощекин 1941 жылы атылса да кейіннен Сталин өлген соң ақталған. Бұл кеңестік «қамқор ұлттың» қазаққа деген шынайы көзқарасын көрсетеді. Коммунистік империя дәл сол кезеңде қазақ пен украин халықтарын неге ерекше қаніпезерлікпен қырып-жойғанын әлі ешкім түсіндіре алмай келеді және ол тыңғылықты зерттелмеген тақырып болып қала береді. Ашаршылық кезінде 2 миллионнан аса қазақ құрбан болған деген мәліметтер бар. Бұл ауызбен айтып қана қоя салатын құрғақ сан емес. Әр қазақтың отбасы осы трагедиядан тыс қалмады. Бұрындары ашық айтылмайтын бұл әңгімені қазір көзі тірі кез келген қария еңірегенде етегі жасқа тола отырып айтады. Саяси көзқарасы мен сталиндік билікке өз наразылығын білдірген зиялы қауым, әсіресе Алаш орда өкілдері қуғын-сүргінге ұшырады. Большевиктер партиясының жеңісі анық нақтыланған соң, оған көздері жеткен алашордалықтардың кейбіреулері еріксіз түрде билікпен келісімге келіп, ұлтты сақтап қалу үшін ағартушылық қызметтерін жалғастыратын болды. Оған себеп, коммунистер көсемі В.Ленинмен жасалған келіссөздер болды. Соның негізінде қазіргі Қазақ республикасының территориясы айқындалған еді. Кеңестік басшы тарапынан құптау алғаннан кейін ұлт қаймақтары жаңа леппен жұмыс істеуге дайын болған еді. Өкінішке орай, билікке И.Сталин келген соң барлық жағдай өзгеріп сала берді. Оның жеке дара қолға алуымен барлық Алаш белсенділері қуғындала бастады. Бірде қапасқа қамап, бірде бостандыққа шығарған болып Ә.Бөкейханұлы, А.Байтұрсынұлы және М.Дулатұлы сияқты Алашқа бас болғандарды да, кеңестік өкіметті толық мойындап оған қызмет еткен С.Сейфуллин, Б.Майлин және І.Жансүгіровтерді оңдырған жоқ. Олардың өздерін ғана атып-шауып тастаған жоқ, оған қоса әйелі мен бала-шағаларына дейін өмір бойы қудалап күн көрсетпеді. Қазақ елі тәуелсіздігі қолына тигеннен кейін бар-жоғын түгендеген заман келді. 
Қуғын-сүргін құрбандарын ақтау мақсатында 1993 жылдың 14 сәуірінде арнайы заң қабылданды.
Елімізде 1997 жылдан бері 31 мамыр саяси саяси қуғын-сүргін және ашаршылық құрбандарын еске алу күні деп атап өтіліп келеді. Тарихшы ғалымдардың зерттеушілерінше өткен ғасырдың 20-шы және 50-ші жылдар аралығында Қазақстанда 125 мыңнан астам адам қуғын-сүргінге ұшырап, олардың 25 мыңы ату жазасына кесілген. Қазақ жерінде осындай саяси тұтқындардың жиырмадан астам лагері болды. Саны аз халықтың осындай бастан кешкен трагедиясы ешқашан естен шықпақ емес. Социалистік режим ашаршылық пен саяси қуғын-сүргін арқылы халқымызды көп жағынан жайратып, халқымызды қаймағынан айырды. Оның зардабы талай жылдарға созылды. Ұлттық сананың құлдықтан арылуы мен ойдың азат болуы тек қана еліміз тәуелсіздік алғаннан кейін ғана өз арнасына біртіндеп түсіп келеді.
Қазақ елі жыл сайын осы күні барлық құрбандардың аруақтарына тағзым етеді және өткеннен сабақ алып, қаралы тарихын ұмытпайды.
Сүйіндік Нұралиев,
Ы.Жақаев атындағы күріш өсіру тарихы музейінің ғылыми қызметкері

Тарихтың ақтаңдақ парақтары

<a href="https://kyzylorda-news.kz/">Kyzylorda-news.kz.</a>&nbsp; Мерекелік концертте ел аймақтарынан келген 800-ге жуық бала және эстрада жұлдыздары өнер көрсетеді, деп хабарлайды ҚазАқпарат.
«Balapan әлемі» фестивалі 1 маусым – халықаралық балаларды қорғау күні мерекесіне арналып отыр.
Мәдени шара сағат 11:00-де Нұр-Сұлтан қаласы Есіл өзені жағасындағы амфитеатрда өтпек.
Ұйымдастырушылардың айтуынша, концерттік бағдарламада ел аймақтарынан келген 800-ге жуық талантты бала және эстрада жұлдыздары өнер көрсетеді.
<blockquote>
 «Фестиваль аясында амфитеатр аумағында ұлттық спорт және ойын-сауық алаңдары ұйымдастырылып, асфальтқа сурет салу байқауы өтеді. Сонымен қатар «Balapan» әлемі» кітап көрмесі мен астаналық мектепішілік қолөнер үйірмелері мен шебер балалар дайындаған қолөнер бұйымдарының жәрмеңкесі ұйымдастырылады. Одан бөлек, шара аясында балалар көңілді аниматорлар мен цирк әртістерінің өнерін тамашалай алады» делінген хабарламада.
</blockquote>
Фестиваль барысында Ақтау, Жезқазған, Қызылорда және Семей қалаларындағы балаларға арналған іс-шаралардан тікелей қосылым жасалады.
Мерекелік концертті елорда тұрғындары мен қонақтары тегін тамашалай алады.
Телеарна көрермендері үшін «Balapan Әлемі» фестивалі «Balapan» телеарнасынан сағат 12:00-ден бастап тікелей эфирде көрсетіледі.
Айта кетейік, аталған мерекелік шараны «Balapan» телеарнасы Нұр-Сұлтан қаласы әкімдігімен бірлесіп ұйымдастырып жатыр.

Қазақстан және Қызылорда облысының жаңалықтары