<a href="https://kyzylorda-news.kz/">Kyzylorda-news.kz.</a>&nbsp;кеше Ақшабұлақ кен орнына барып, жұмысшылармен кездескен облыс әкімі Нұрлыбек Нәлібаев бүгін де өңірдің бірқатар ірі компания ұжымдарымен тілдесіп, өзекті мәселелерді талқылады.
«ПетроҚазақстан Құмкөл Ресорсиз» АҚ-ның еңбек ұжымымен кездесу барысында аймақ басшысы мұнай-газ секторындағы соңғы ахуалға қарамастан әлеуметтік мәселелерді оңтайлы шешіп, жұмыс орындарын қысқартпау қажет екенін алға тартты.
Сондай-ақ, кәсіпорын әлеуметтік міндеттемелерді жыл сайын толық көлемде орындап, 2013-2021 жылдар аралығында жергілікті бюджетке 2 млрд. теңге аударғанын және компания 1,5 мыңға жуық адамды жұмыспен қамтығанын атап өтті. Өз кезегінде туындаған мәселелердің шешілуіне атсалысуға әрқашан дайын екенін жеткізді.
Жиында «ПетроҚазақстан Құмкөл ресорсиз» АҚ-ның президенті Ян Миньюй және басқарма төрағасы Чжао Сяомин әлеуметтік міндеттемелерін орындау барысын баяндады.
Ұжым атынан компания қызметкері Бақыт Мұқашева өндірістегі қызметкерлерді біріктіріп, олардың мүдделерін қорғауда және еңбек қатынастарына байланысты туындаған мәселелерді шешуде кәсіподақ жұмысын таныстырды.
Жиын соңында облыс әкімдігі мен «Петро Қазақстан» кәсіпорны өзара ынтымақтастық туралы үшжақты Меморандумға қол қойды.
<img src="https://kyzylorda-news.kz/wp-content/uploads/2022/06/288450800_323447749976476_5142875093715537533_n.jpg" alt="" />
<img src="https://kyzylorda-news.kz/wp-content/uploads/2022/06/288429085_323447746643143_1878682313557372760_n.jpg" alt="" />

«Петро Қазақстан» компаниясы 9 жылда жергілікті бюджетке 2 млрд. теңге аударды

<a href="https://kyzylorda-news.kz/">Kyzylorda-news.kz.</a> Медицина қызметкерлерінің кәсіби мерекесі қарсаңында Сыр төрінде салтанатты шара өткізіліп, аймақтың бірқатар дәрігері құрмет төрінен көрінді.
Мерейлі мерекеге облыс әкімі Нұрлыбек Нәлібаев қатысып, абзал жандарды иелерін мерекемен құттықтады.
Дәрігер мамандығын таңдауға үлкен жүрек керек. Сонан соң сүйіспеншілігің мен өзіңе деген сенімің болуы қажет. Өйткені, өлім мен өмір арасындағы жанталастың жауабын нағыз дәрігер ғана дөп басады. Адам денсаулығын сақтау мен нығайту, сырқатты емдеу мен аурудың алдын алу жауапкершілігін кездейсоқ кісі атқара алмайды.
<blockquote>
 «Екі жыл бойына әлемді әурелеген коронавирус кезінде ақ халатты абзал жандар ерен ерлікке пара-пар еңбек етті. Олар отбасынан жырақ жүріп, басын қатерге тігіп, қауіпті індетпен қаймықпай күресті. Осы ретте, батылдық танытқан барша медицина саласының мамандарына Сыр жұртшылығы атынан зор ризашылығымды білдіремін», – деді Нұрлыбек Нәлібаев.
</blockquote>
Аймақ медицинасының дамуына сүбелі үлес қосып, салада табысты еңбек еткен бірқатар дәрігерлер мен сала ардагерлері түрлі марапатқа ие болды. Атап айтқанда 70-тен астам дәрігерге түрлі дәрежедегі наградалар табысталды. Оның ішінде 11 азамат «Еңбек ардагері» медалімен, 19 азамат «Денсаулық сақтау саласының үздігі» төсбелгісімен, 22 азамат «Денсаулық сақтау ісіне қосқан үлесі үшін» төсбелгісін тақты.
Мұнан бөлек, «Алтын дәрігер» төсбелгісімен №1 қалалық емханасының дәрігер-педиатры, медицина саласының ардагері Бибізат Бермаханова марапатталды.
Облыс әкімі медицина қызметкерлерінің дәстүрлі спартакиадасының жеңімпазы атанған «Облыстық психикалық денсаулық орталығына» 200 мың теңгенің сертификатын табыс етті. Сондай-ақ, «Медицина үздіктеріне» 500 мың теңгелік сертификат берілді.
Мерекелік іс-шарада дәрігерлер әріптестеріне деген жүрекжарды тілегін әнмен жеткізді. Ал, белгілі әнші-композитор, Қазақстанның еңбек сіңірген қайраткері Елена Әбдіқалықова медицина қызметкерлерін төл мерекемен құттықтап, Сыр төрін әнге бөледі.
<img src="https://kyzylorda-news.kz/wp-content/uploads/2022/06/288668649_323500066637911_8587464826806050292_n.jpg" alt="" />
<img src="https://kyzylorda-news.kz/wp-content/uploads/2022/06/288638095_323500139971237_6484363472645867982_n.jpg" alt="" />
<img src="https://kyzylorda-news.kz/wp-content/uploads/2022/06/288643096_323500176637900_4254658315426602937_n.jpg" alt="" />
<img src="https://kyzylorda-news.kz/wp-content/uploads/2022/06/288664345_323500209971230_5415160218374715734_n.jpg" alt="" />
<img src="https://kyzylorda-news.kz/wp-content/uploads/2022/06/288638095_323500139971237_6484363472645867982_n-1.jpg" alt="" />
<img src="https://kyzylorda-news.kz/wp-content/uploads/2022/06/288805695_323500256637892_1319465999801918432_n.jpg" alt="" />

Қызылордада «Медицина үздіктеріне» 500 мың теңге берілді

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Нұрлыбек Нәлібаев «ҚТЖ-Жүк тасымалы» ЖШС – «Батыс» филиалы – Қызылорда қосалқы бөлімінің еңбек ұжымымен кездесті.
Аймақ басшысы теміржол ел экономикасын алға сүйреуші негізгі күш, күретамыры екенін атап өтіп, жұмысшылардың еңбек құқықтарын қорғау, олардың жалақысын кезең-кезеңімен көтеру үшін маңызды шешімдер қабылдау қажет екенін еске салды.
<blockquote>
 «Біз әрбір ұжыммен жеке кездесіп, ортақ мәселелерді талқылап келеміз. Қазіргі таңда 49 ірі компаниялармен бірлескен меморандумға қол қою туралы шешім қабылдадық. Мұндағы мақсат – жұмыс орындарын қысқартпау, жалақыны кезең-кезеңімен көтеру. Сондай-ақ, бизнестің әлеуметтік жауапкершілігін арттыру арқылы түрлі әлеуметтік жобалар мен әлеуметтік нысандар салып, халықтың әл-ауқатын көтеруді басты мақсат еттік», – деді Нұрлыбек Нәлібаев.
</blockquote>
Басқосуда «ҚТЖ-Жүк тасымалы» ЖШС – «Батыс» филиалы – Қызылорда қосалқы бөлімінің басшысы Батырхан Базарбаев пен ұжымның кәсіподақ төрағасы Бауыржан Қайбалдыұлы әлеуметтік міндеттемелерді орындау және қызметкерлердің мүдделерін қорғау бағытында атқарған жұмыстарды тізбектеді.
Кездесу аясында облыс әкімдігі, жұмыс беруші және кәсіподақ арасындағы үшжақты меморандумға қол қойылды.

Үшжақты меморандумға қол қойылды

<a href="https://kyzylorda-news.kz/">Kyzylorda-news.kz.</a> Елімізде маусымның үшінші жексенбісі медицина қызметкерлерінің кәсіби мерекесі атап өтіледі. Сын сағатта алдыңғы шептен көрінетін бүгінгінің батырлары – медицина қызметкерлерінің кәсіби мерекесі.
Аса жауапкершілікті талап ететін дәрігер мамандығын игеру үшін көп тер төгу қажет. Қызығынан қиындығы басым бұл салада еңбек етіп жүрген мамандар аз емес. Солардың бірі облыстық көпбейінді балалар ауруханасының хирург-дәрігері Әділбек Сәтбаев.
<blockquote>
 «Дәрігер болу бала күннен бергі арманым. Бүгінде еңбегім жемісті болып, бала арманымның орындалғанына қуанамын. Әрине оңай сала емес. Хирург болу үшін арыстанның жүрегі, мергендей дәлдік, мүсіншідей ептілік, суретшідей шебер болу керек дейтін ұстазым. Десек те, алдымызға келген балаға көмектесіп, ауруынан айықтыра алсақ жылдар бойығы еңбегіміздің еш кетпегені»,- деді дәрігер-хирург Әділбек Сәтбаев.
</blockquote>
Алтын қолды дәрігер қазіргі жұмысына пандемия кезінде орналасқан. Күніне екі жүзге жуық балаға алғашқы көмек көрсететін облыстық балалар ауруханасының қабылдау бөлімінде жұмыс істеу оңайға соқпағанын айтты. Бірақ антқа адал ақ халаттылар жан тыныштығын ойлап, қиындыққа жеңілген жоқ. Себебі әлемді дүрліктірген пандемия кезінде халықтың бар сенері дәрігерлер еді.
<blockquote>
 «2020 жылы облыстық көпбейінді балалар ауруханасындағы қабылдау бөліміне хирург-дәрігер болып орналастым. Сын сағатта уақытпен санаспай жаһанды жайлаған індетпен күресте аянып қалған жоқпыз. Оқыған білім, жинаған тәжірибемізді пайдаланып халыққа көмек көрсеттік», – дейді дәрігер.
</blockquote>
<img src="https://kyzylorda-news.kz/wp-content/uploads/2022/06/a49eb9e2-c64c-489e-a186-8090de395c22.jpg" alt="" />
<img src="https://kyzylorda-news.kz/wp-content/uploads/2022/06/84e89785-0e43-446d-ad13-1de62f75fd79.jpg" alt="" />

Әділбек Сәтбаев: Науқасты сырқатынан айықтыра алсақ еңбегіміздің еш кетпегені

<a href="https://kyzylorda-news.kz/">Kyzylorda-news.kz.</a> Соңғы кезде кен орындарының сарқылуына байланысты мұнай өндірісінің көлемі жылдан-жылға қысқарып келеді. Бұл жағдай облыс тұрғындарына да елеулі әсер етеді. Себебі өңірде мұнай-газ саласында 10 мыңға жуық адам жұмыс жасайды. Бұл ретте ірі компанияларда қызмет атқаратын жұмысшылардың жалақысын қысқартпау, еңбек құқықтарын сақтау маңызды.
Облыс әкімі Нұрлыбек Нәлібаев «Торғай-Петролеум» акционерлік қоғамының ұжымымен кездескенде осы мәселеге ерекше екпін берді.
100-ден аса қызметкермен өткен басқосуда облыс әкімі компанияның әлеуметтік жауапкершілігі мен өңір экономикасын дамытудағы орнын атап өтті.
<blockquote>
 «Қазіргі таңда «Торғай-Петролеум» компаниясы 500-ге жуық адамды жұмыспен қамтып отыр. Компания өндірілген мұнайдың 36,2%-ын экспорттады, ал, 2020 жылы экспорт 16,4%-ды құрады, яғни экспорт көлемі 2,2 есеге ұлғайған. Бұдан басқа, «Кеңқияқ-Атырау” реверсін пайдалануға беру арқылы «Торғай-Петролеум» компаниясында мұнай экспортына квота артты. Бүгінгі таңда компания өндіру көлемінің төмендеуі, кен орындарының сулануы секілді қиындықтарға тап болды. Бірақ осы қиындықтарға қарамастан, компания әлеуметтік қолдауға, жұмыс орындарын сақтауға, жұмыскерлердің табысын арттыруға ерекше назар аударуда», – деді Нұрлыбек Нәлібаев.
</blockquote>
Жиында «Торғай Петролеум» компаниясының бас директоры Қайрат Арынғазиев әлеуметтік міндеттемелерін орындау барысын баяндады, ал ұжым өкілі Марзия Амраева өндірістегі қызметкерлерді біріктіру және олардың мүдделерін қорғау бойынша кәсіподақ тарапынан атқарылған жұмысты таныстырды.
Кездесу соңында облыс әкімдігі мен «Торғай Петролеум» кәсіпорны және кәсіподақ арасында өзара ынтымақтастық туралы үшжақты Меморандумға қол қойды.
<img src="https://kyzylorda-news.kz/wp-content/uploads/2022/06/288605530_323490439972207_2816121603203507916_n.jpg" alt="" />

Нұрлыбек Нәлібаев «Торғай Петролеум» компаниясының қызметкерлерімен кездесті

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Нұрлыбек Нәлібаев экономикалық тергеп-тексеру органдарында орын алған кадрлық өзгерістерге байланысты актив отырысын өткізді.
иынға ҚР Қаржылық мониторинг агенттігі төрағасының орынбасары Жеңіс Елемесов және құқық қорғау органдарының басшылары қатысты.
Рашид Темірбеков Қызылорда облысы бойынша экономикалық тергеп-тексеру департаментінің басшысы лауазымынан босатылып, Жамбыл облысы бойынша экономикалық тергеп-тексеру департаментінің басшысы қызметіне тағайындалды.
Аймақ басшысы Рашид Темірбекұлы қызмет еткен жылдары 9,5 млрд. теңге көлемінде мемлекетке келтірілген залалды анықтап, оның 70 пайызын, яғни 6,5 млрд. теңгесін мемлекет мүддесіне өндіруге атсалысқанын тілге тиек етіп, аймақта атқарған зор еңбегі үшін «Құрмет грамотасымен» марапаттады.
Ал, жаңа лауазымға Бақыт Қайшыбеков тағайындалды. Өңір басшысы Бақыт Сапарғалиұлының жинақтаған мол тәжірибесін облыстағы экономикалық және қаржылық бұзушылықтардың алдын алуда, қоғам мен мемлекеттің мүдделерін қорғауда және аймағымыздың дамуына өз тарапынан үлес қосады деп сенім білдірді.
Айта кетейік, Бақыт Қайшыбеков, білімі жоғары. Заңгер, бизнес және экономиканың бакалавры. 2007-2012 жылдар аралығында Қаржы полициясында әртүрлі қызметтерде, сондай-ақ, басшылық лауазымдарда қызмет еткен. 2014-2019 жылдары ҚР Мемлекеттік кірістер органдарында қызмет атқарды. 2019 жылдың маусым айынан бастап ҚР ҚМ Қаржы мониторинг комитеті Солтүстік Қазақстан облысы бойынша Экономикалық тергеу департаментінің басшысы ретінде, 2020 жылдан бастап Түркістан облысы бойынша Экономикалық тергеу Департаментінің басшысы қызметін атқарып келді.
<img src="https://kyzylorda-news.kz/wp-content/uploads/2022/06/288731537_323463483308236_6012544120143808357_n.jpg" alt="" />

Қызылорда облысы бойынша экономикалық тергеп-тексеру департаментіне жаңа басшы тағайындалды

<a href="https://kyzylorda-news.kz/">Kyzylorda-news.kz.</a>&nbsp;ҚР аумағының басым бөлігіне бұрынғысынша атмосфералық фронтальды бөлімдер әсер етеді, осыған байланысты тұрақсыз ауа райы сақталады, найзағай ойнап, жаңбыр жауады, сондай-ақ бұршақ, дауыл күтіледі, деп хабарлайды Қазгидромет.
Шығыста, оңтүстік–шығыста қатты жаңбыр жауады. Еліміздің батысында, солтүстік-батысында, оңтүстігінде, орталығында жауын-шашынсыз ауа райы күтіледі. Республика бойынша желдің күшеюі, оңтүстік-батыста, оңтүстікте шаңды дауыл күтіледі.
Қызылорда облысында&nbsp;төтенше өрт қауіпі күтіледі. Ауа температурасы +35 +37 градусты көрсетеді.

16 маусымға арналған ауа райы болжамы

<a href="https://kyzylorda-news.kz/">Kyzylorda-news.kz.</a>&nbsp; «AMANAT»партиясы облыстық филиалының Атқарушы хатшысы Ләйлә Төрешова Арал ауданына қарасты Беларан ауылдық округі, Құланды елді мекені тұрғындарын өтініштерін тыңдады.
Онлайн ұйымдастырылған қабылдау барысында ауыл тұрғындары медициналық пункт, ауылдық клуб, жол, интернет желісін қосу секілді мәселелерді алға тартты.
Нақтырақ айтсақ, ауыл ардагерлері кеңесінің төрағасы Сағидулла Дәулетов ақсақал, халықтың сапалы медициналық қызметке қол жеткізу үшін елді мекендегі медициналық пункті Қаратерең амбулаториясынан шығарып, Арал қаласындағы емханалардың біріне қаратса дейді. Сондай-ақ, зейнеткер 1970 жылы іргетасы қаланған Құланды ауылдық клубты заману үлгіде қайтадан салып берсе деген өтінішін білдірді.
Қарияның өтінішін мұқият тыңдаған Атқарушы хатшы сол жерде нақты жауап берді. Яғни, медициналық пункті Қаратерең амбулаториясынан шығарып, Арал қаласындағы емханалардың біріне қарату мәселесі бойынша қаладағы емханаға қарайтын халық саны мен Құланды халқын қоса есептегенде заңнамалық нормаларға сәйкес халық санының тым көрсеткіштен асып кететіндігі түсіндіріліп, аудандық емханаға көмекке жүгінген науқастарға кезек күттірмей жұмыс жасау, сонымен қатар, Құланды ауылының тұрғындарына айына 2 рет, 3 күн бойы медициналық тексеру жүргізу мәселелі жауапты мамандармен келісілгендігін атап өтті.
Ал ауылға жаңа мәдениет үйін салу мәселесінің елді мекенде халық санының аз болуына байланысты өткен жылы 24 қарашада бекітілген «Құрылыс нысандарын салуға жататын білім, денсаулық сақтау, мәдениет, спорт нысандары туралы» тізбеге енгізілмегендігін жеткізді. Яғни, тұрғындар саны 1000 адамнан асса ғана жаңа ғимарат салынатындығын нақты жеткізіп, әзірге жөндеу жұмыстарын жүргізуге ықпал ететіндігін айтты.
Ауыл тұрғыны Жакуп Жұбанышов Бейнеу – Шымкент газ құбыры жанындағы автожолдан бастап, Құланды елді мекеніне дейінгі кіре беріс жолға тас төсеп, асфальт салып беруге ықпал етуді сұрады.
Партия филиалының Атқарушы хатшысы жалпы ұзындығы 35 шақырымды құрайтын бұл жолды бүгінгі таңда ауданның коммуналдық мешігіне алу жұмыстарының жүріп жатқандығын тілге тиек етіп, келер жылы кезекке сай құрылыс жұмыстары жүргізілетіндігін жеткізді.
Қабылдау барысында Ләйлә Төрешова мобильді интернет желісін қосуға қатысты ауыл тұрғындарының өтінішіне нақты жауаптар беріп, барлық мәселелер оң шешімін тапқанша партиялық бақылауда болатындығын атап өтті.

Ләйлә Төрешова шалғайдағы тұрғындардың өтінішін тыңдады

<a href="https://kyzylorda-news.kz/">Kyzylorda-news.kz.</a> Қызылордада кәсіпкерлердің сұранысы бойынша И.Әбдікәрімов атындағы Қызылорда аграрлық техникалық жоғары колледжі эксперименттік жоба аясында алғашқы 6 студентке негізгі мамандығына қосымша «токарь» біліктілігін берді.
Эксперименттік жобаның бастамашысы – Қызылорда облысы кәсіпкерлер палатасы.
Былтыр Кәсіпкерлер палатасы Өңірлік кеңесінің Адами капиталды дамыту комитетінде бизнес иелері маман тапшылығы мәселесін көтерген. Сол кезде шараға облыстағы колледж басшылары мен облыстық білім басқармасының өкілдері де қатысты.
Аталған отырыста «Квант» ЖШС мен «Қызылорда жылу электр орталығы» ЖШС басшылары мамандарының зейнет жасына келгенін айтып, орнына маман таппай отырғанын жеткізді.
<blockquote>
 «Жалпы дуалдық оқыту бағдарламасы аясында қазір колледждерде мамандар дайындалып жатыр. Дегенмен кей мамандыққа қатысты оқу орындарының лицензиясы болмағандықтан кәсіпкерлердің сұранысы қанағаттандырылмай келді. Былтырғы кездесуде «Білім беру қызметіне қойылатын біліктілік талаптары және оларға сәйкестікті растайтын құжаттар тізбесіне» енгізілген өзгерістерді негізге ала отырып, эксперименттік жобаны бастауды ұсындық.Облыстық білім басқармасы да, колледждер де қолдады. Алғашқы эксперименттік режимді енгізуге И.Әбдікәрімов атындағы Қызылорда аграрлық техникалық жоғары колледжі келісім берді», – деді Кәсіпкерлер палатасының директоры Пірмұхаммед Сыздықов.
</blockquote>
«Білім беру қызметіне қойылатын біліктілік талаптары және оларға сәйкестікті растайтын құжаттар тізбесіне» сәйкес кәсіпкерлердің сұранысы бойынша кәсіптік және техникалық білім беру ұйымдары негізгі мамандыққа қосымша модуль енгізу арқылы жаңа біліктілікті игеруге мүмкіндік бере алады. Мәселен, дәнекерлеуші мамандығының білім бағдарламасы оқу жоспарына қосымша токарь модулін қосу арқылы студентке екі біліктілікті қатар алуға немесе соңғысын таңдауға болады.
И.Әбдікәрімов атындағы Қызылорда аграрлық техникалық жоғары колледжі эксперименттік жоба аясында 6 студентін қосымша «токарь» біліктілігі бойынша «Квант» ЖШС базасында оқытты. Ол үшін кәсіпкерге мемлекеттен тәлімгерлерлік еңбекақы төленді.
Кеше колледжде «токарь» біліктілігін алған студенттерге сертификат тапсырылды. Шара аясында Кәсіпкерлер палатасының директоры Пірмұхаммед Сыздықов пен облыстық білім басқармасының бөлім басшысы Біржан Есенбаев, «Квант» ЖШС директоры Жаңабай Бекішев пен колледж директоры Бақытхан Әбдікәрімов жобаны жетілдіру тетіктерін талқылады.
<blockquote>
 «Тәлімгерлдік үшін кәсіпкерге төленіп отырған еңбекақы көлемі аз. Еңбекақы практикаға бөлінген сағат көлеміне сәйкес беріліп жатыр. Бұл бір топ үшін күніне шамамен 700 теңге. Аталған қаржы жұмыс берушінің студенттерді жұмыс орнында оқытуға жұмсаған шығындарымен салыстырғанда өте аз. Жақын уақытта облыстық білім басқармасымен бірге ұсыныс әзірлеп, мәселені республикалық деңгейде шешуді көздеп отырмыз», – деді Палата директоры.
</blockquote>
Шарада «Квант» ЖШС басшысы жоба аясында «токарь» біліктілігін алып шыққан студенттерді жұмыспен қамтуға әзір екенін, облыстық білім басқармасының өкілі кәсіпкерлерден маман даярлауға қатысты өзге де ұсыныстарын қарауға дайын екенін жеткізді.

Қызылордада кәсіпкерлер мен колледждердің эксперименттік жобасы алғашқы нәтижесін берді

<a href="https://kyzylorda-news.kz/">Kyzylorda-news.kz.</a>&nbsp; Бүгін Сырдария ауданында журналистердің кәсіби мерекесі қарсаңында редакция ардагерлерімен кездесу ұйымдастырылды. Басқосуда «Сыр медиа» серіктестігінің бас директоры, облыстық мәслихат депутаты Аманжол Оңғарбаев пен аудан әкімінің орынбасары Димаш Байдушев сала ардагерлерін мерекемен құттықтап, ұзақ жылдар баспасөз саласында атқарған еңбектеріне алғыс айтып, құрмет көрсетті.
Іс-шараға бас директордың орынбасары А.Абдуллаева, облыстық «Сыр бойы» газетінің бас редакторы Қ.Шарабидинов, қалалық «Ақмешіт апталығы» газетінің бас редакторы Ә.Батырбеков, аудандық газет редакциясының ардагерлері мен қызметкерлері қатысты. Кездесу барысында «Сыр журналистикасының тарихы» 5 томдығы жинағының таныстырылымы да ұйымдастырылды.
Аудан әкімінің орынбасары Д.Байдушев пен «Сыр медиа» серіктестігінің бас директоры, облыстық мәслихат депутаты А.Оңғарбаев сала ардагерлерінің өңір журналистикасының қалыптасуы мен дамуына сіңірген еңбегі және кітаптың ұлт руханиятына қосқан үлесі мен маңызы жөнінде кеңінен айтып өтті.
<blockquote>
 «Алаш ардақтыларының «Қай елдің баспасөзі мықты болса, сол елдің болашағы мықты» деп ХХ ғасырдың басында айтқан сөзі ХХІ ғасырда да өз маңызын жойған жоқ. Қазіргідей ақпараттық технологиялар мен жаңалық таратудың жаңа форматы, медиа мүмкіндіктер қарқынды дамыған заманда сапалы және толық таразыдан өткен шынайы ақпарат таратудың маңыздылығы зор. Осы ретте жергілікті газеттің жұмысына аудан әкімдігі тарапынан жан-жақты қолдау көрсетіліп жатқанын атап өтуіміз қажет», – деді аудан әкімінің орынбасары.
</blockquote>
Өз кезегінде «Сыр медиа» серіктестігінің бас директоры, облыстық мәслихат депутаты А.Оңғарбаев газет бетінде әр кезеңнің тыныс-тіршілігі айқын көрініп тұратындықтан кітаптың ел шежіресі деп атауға лайық екенін айтты.
<blockquote>
 «Бүгінде облыстың медиа кеңістігінде 100-ден аса бұқаралық ақпарат құралы жұмыс істеуде. Оның ішінде, 8 электронды, 3 ақпараттық агенттік, 3 интернет сайт, 87 баспа бұқаралық ақпарат құралы бар. Бұл салада 2,5 мыңға жуық қалам иелері аймақ халқын жедел және сапалы ақпараттармен қамту жолында тынымсыз еңбек етуде. Нақты және жедел ақпарат таратуды мақсат етіп, заман талабына сай дамудың жолын ұстанған бұл сала – іргелі индустрияға айналды. 5 томдық «Сыр журналистикасының тарихы» кітабында аймақтың ақпарат айдынында талай жылдар жаңалық пен жақсылықтың жаршысы болған басылымдардың тарихы баяндалады. Өткен ғасырдың 1925 жылы бүкіл қазақтың басын қосқан алқалы жиын өтіп, бұған дейін Қырғыз аталып келген еліміздің ҚАЗАҚ деген тарихи атауы, сол кездегі қазақ елінің астанасы болған Ақмешітте, осы киелі топырақта қайтарылғанын Сіздер жақсы білесіздер. Сол себепті, Сыр топырағы – қазақ руханиятының киелі ордасы және өңір журналистикасының ғана емес, Қазақ журналистикасының бастау бұлағы. Бұл көптомдық – бұған дейін жарық көрген Жарылқасын Нұсқабайұлы мен Қырықбай Аллабергеннің«Қазақ журналистикасының тарихы» атты еңбегінің заңды жалғасы», – деді «Сыр медиа» серіктестігінің бас директоры.
</blockquote>
Бұл 5 томдық жинақтың ерекшелігі сол, мұнда баспасөз шежіресі ғана емес бүтін бір өңірдің тарихи шежіресі жазылып, жинақталған. Оның ішінде Сыр өңіріндегі журналистика саласының қалыптасуы мен дамуы, бағындырған белестері мен жетістіктері де кеңінен қамтылған. Жинақта «Сталин жолы», «Еңбек майданы», «Сырдария», «Еңбек Туы», «Тереңөзек тынысы» және «Тіршілік тынысы» атауымен аудан жаңалықтарының жаршысына айналған аудандық басылымның тарихы, қайраткер қаламгерлердің өмірі мен шығармашылығы туралы жазылған. Сондықтан «Сыр журналистикасының тарихы» 5 томдығының ауданымыз үшін маңызы ерекше және бұл кітаптың жарыққа шығуы бәріміз үшін зор қуаныш болды.
Кітаптың таныстырылымында редакция ардагерлері С.Тоқсанбаев, М.Қалмұратұлы, С.Ерімбет, Қ.Балшықбаева, Ж.Тасымбаева, Ш.Нұрсейітов өз естеліктерімен бөлісті. Сала ардагерлері кейінгі буын қаламгерлердің еңбегі жемісті болуына тілектестігін жеткізді. Іс-шара соңында ардагерлерге аудан әкімі мен «Сыр медиа» серіктестігі бас директорының арнайы Алғыс хаттары мен «Сыр журналистикасының тарихы» кітабы табысталды.
<img src="https://kyzylorda-news.kz/wp-content/uploads/2022/06/288539582_1143143539581870_419180055564190630_n.jpg" alt="" />
<img src="https://kyzylorda-news.kz/wp-content/uploads/2022/06/288448001_1143143542915203_1431055304644396457_n.jpg" alt="" />
<img src="https://kyzylorda-news.kz/wp-content/uploads/2022/06/288626208_1143143616248529_126662901361912456_n.jpg" alt="" />

Сырдарияда қаламгерлерге құрмет көрсетілді

<a href="https://kyzylorda-news.kz/">Kyzylorda-news.kz.</a>&nbsp;Бүгін Қазалыда жазушы, Халықаралық «Алаш» әдеби сыйлығының иегері Қуаныш Жиенбайдың 70 жылдық мерейтойына арналған шығармашылық кеш өтті.
Роза Бағланова атындағы мәдениет үйінде өткен «Теңізбен тағдырлас қаламгер» атты шығармашылық кеште ҚР Мәдениет қайраткері. «Құрмет», «Парасат» ордендерінің иегері Қуаныш Жиенбай мен оның жары құрметпен сахна төріне шығарылды.
Шығармашылық кеште аудан әкімі Мұхтар Оразбаев құттықтау сөз сөйлеп, қарымды қаламгердің еліміздің рухани-мәдени өмірінде өзіндік дара қолтаңбасы қалған тұлға екенін атап өтті.
Мұнан соң Қуаныш Әлмұратұлы мен оның жарының иығына қазақы дәстүрмен шапан мен ақ жаулық жауып, сый-құрмет көрсетті.
Мерекелік кеште медицина саласының ардагері, Қазалы ауданының құрметті азаматы Құлпыбай Ысқақов, Қазақстан Журналистер Одағының мүшесі, Қазалы ауданының құрметті азаматы Қасқырбек Мәмбетжан, ҚР мәдениет қайраткері Шаһизада Әбдікәрімов және жазушының қаламдас достары, «Егемен Қазақстан» газетінің тілшісі Сүлеймен Мәмет пен Толыбай Абылаев сөз сөйлеп, жазушыға деген ізгі лебіздерін білдірді.
Сондай-ақ, кеш барысында қазалылық өнер иелері — Оспанова Галя, Жәнібек Құтмаханов, Мұрат Әділ сахнада әннен шашу шашып, күй үнін күмбірлетті.
Шығармашылық кешті ақын, аудандық «Қазалы» газетінің бас редакторы, «Ғани Мұратбаев» сыйлығының иегері Есет Табынбаев әсерлі әңгімелермен өрбітіп, сұрақ қою арқылы жазушының өміріндегі қызықты да қиын сәттерді айтқыза білді. Сондай-ақ, оқырмандар да жазушының шығармашылығына қатысты өз сауалдарын қойып, пікір алмасты.
<img src="https://kyzylorda-news.kz/wp-content/uploads/2022/06/285557910_3380022765551980_5954157002519526298_n.jpg" alt="" />
<img src="https://kyzylorda-news.kz/wp-content/uploads/2022/06/285546566_3380023388885251_4576857202638337706_n.jpg" alt="" />
<img src="https://kyzylorda-news.kz/wp-content/uploads/2022/06/285700890_3380023065551950_1546954455719953414_n.jpg" alt="" />

Қазалыда жазушы Қуаныш Жиенбайдың шығармашылық кеші өтті

<a href="https://kyzylorda-news.kz/">Kyzylorda-news.kz.</a> Қазақстан президенті Қасым-Жомарт Тоқаев қазақ композиторы Шәмші Қалдаяқовқа аса жоғары ерекшелік дәрежесі «Қазақстанның Еңбек ері» атағымен, сондай-ақ орден&nbsp;және&nbsp; төсбелгісімен наградтау туралы жарлыққа қол қойды, деп хабарлайды Ақорда.
<blockquote>
 «Композитор Қалдаяқов Шәмшіге қазақ халқының музыка өнерін дамытудағы&nbsp;еңбегі үшін ерекше атақ «Алтын Жұлдыз» және «Отан» ордендерімен марапаттаумен қатар «Қазақстанның Еңбек ері» атағын беруді ұйғардым», –&nbsp;&nbsp;делінген хабарламада.
</blockquote>
Қаулы қол қойылған күнінен бастап қолданысқа енгізіледі.

Қазақстан және Қызылорда облысының жаңалықтары