<a href="https://kyzylorda-news.kz/">Kyzylorda-news.kz.</a> Бүгінгі таңда аймақтың ауыл шаруашылығы саласы тұрақты дамып келеді. Әсіресе егін, мал шаруашылығы мен экспорт және инвестициялық жобалар бойынша өсім бар.
<blockquote>
 Аймақтың күретамыры болып табылатын салаға қатысты аймақ басшысы Н.Нәлібаев облыстық мәслихат сессиясында: «Біз қазіргі кезде азық-түлік бағасын тұрақтандыру мақсатында әр ауылдың мүмкіндігіне қарай көкөніс және бақша өнімдерін өзімізде өндіру үшін бос жатқан жерлерді икемдеп, егін егуге ынталы азаматтарға бөліп беруіміз қажет», – деп, баса назар аударған болатын. 
 Биыл облыс көлемінде барлығы 188,6 мың гектарға егiс егілді. Оның ішінде негізгі дақыл – күрiш көлемі 78,6 мың га.
</blockquote>
Биылғы жылы егіс көлемдерін әртараптандыру бағытында қосымша соя дақылының егіс көлемі 189 гектарға, қант құмайын 358 гектарға жетті.
Сонымен қатар, су үнемдеу технологиясын қолдану арқылы биылғы жылы барлығы 607 гектар жерге ауыл шаруашылығы дақылдары егіледі.
Бүгінгі күні, егін жинау жұмыстары басталып, облыс бойынша егілген 5593 га күздік бидайдан – 9 306 тонна, 5813 гектар жаздық бидайдан – 3289 тонна, 375 гектар арпадан – 145 тонна өнім жиналды. Дәнді дақылдарды жинау әлі де жалғасуда.
Ал мал шаруашылығы саласында оң динамика қалыптасып, мал басы тұрақты өсіп, өндірілген өнім көлемі артуда.
2022 жылдың 1 шілдесіне 420,3 мың бас МІҚ, 895,7 мың бас қой мен ешкі, 210,9 мың бас жылқы, 61,6 мың бас түйе және 128,0 мың бас құс тіркелген.
Мал басын былтырғы жылдың еспті кезеңімен салыстырғанда МІҚ-8,6%-ға, қой мен ешкі-5,7%-ға, жылқы 17,1%-ға, түйе 7,1%-ға, құс 2,7%-ға көбейген.
Есепті кезеңде 17,7 мың тонна ет, 41,6 мың тонна сүт және 3,3 млн. дана жұмыртқа өндіріліп, 2021 жылдың сәйкесті кезеңімен салыстырғанда ет өндірісі 1,8%-ға, сүт өндірісі 1,7%-ға, жұмыртқа өндірісі 3,1%-ға артты.
Жалпы 2022 жылдың 1 маусымына облыстан 19,8 млн. долларды құрайтын 39,8 мың тонна ауыл шаруашылығы өнімдері (күріш, балық өнімдері, бидай қалдығы, қамыс) экспортталып, өткен жылдың сәйкесті кезеңімен салыстырғанда 125,9 пайызды құрап отыр. Өнімдер әлемнің 20 мемлекетіне экспортталды.
Жалпы биыл егіншілік саласына 4,3 млрд. теңге, мал шаруашылығын субсидиялауға 4 млрд.теңге қаржы қаралған. Ендігі кезекте мал өнімдерін өндірумен бірге оны терең өңдеуге мән берілетін болады.
Сонымен қатар, ағымдағы жылы облыс бойынша жалпы құны 10,3 млрд.теңгені құрайтын 14 инвестициялық жобаны іске асыру жоспарлануда. Нәтижесінде бұл салада 271 жаңа жұмыс орындары құрылатын болады.

Қызылордада ауыл шаруашылығы саласы тұрақты дамып келеді

<a href="https://kyzylorda-news.kz/">Kyzylorda-news.kz.</a> Жаз – жарқын мезгіл. Бұл балалардың демалып, уақыттарын қызықты әрі көңілді өткізетін кезең. Оқу жылы аяқталысымен жазғы тынығу лагерлеріне асыққан оқушылардың лагерлердегі демалысы бүгінде төртінші маусымға қадам басты.
Аймағымыздағы 10 қала сыртындағы лагер жұмыс істеуде. Жалпы 7 ауысымда қала сыртындағы лагерлерде 8 960 оқушыны жазғы тынығумен қамту жоспарланған. Бүгінгі күні төрт ауысым бойынша 4 мыңнан астам бала тынығуда.
Биылғы жылы балалардың жазғы демалысын ұйымдастыру «Қазақстан балалары – жазды қуанышқа толтырайық!» тұжырымдамасының негізінде жүргізілуде. Тұжырымдамаға сәйкес барлық лагерьлер жанынан үйірмелер мен секциялардың жұмысы ұйымдастырылып, туристік бағыттағы экскурсиялар, тарихи танымдық саяхаттар қарастырылған. Сонымен қатар балалардың қауіпсіздігін қамтамасыз ету үшін қала сыртындағы лагерьлер бейнебақылау жүйелерімен толық жабдықталған. Барлық лагерлер санитарлық-эпидемиологиялық сәйкестігі туралы қорытынды алып жұмыс жасауда.
Мысалы, Арал ауданындағы “Қамбаш” олимпиадалар және қосымша білім беру орталығында балалар демалыстарын көңілді өткізуде. Төрт корпустан тұратын лагерь ғимаратында жайлы жатын бөлмелер мен 5 уақыт тамақ мәзірі, көптеген үйірме қарастырылған. Мұнда жыл бойы мектеп партасынан шаршаған балалардың көңілді демалуына және сауығуына барлық жағдай жасалған. Лагерьде спорттық (тренажер мен фитнес) залдар және бассейн бар. Орталықтың тағы бір ерекшелігі – мектеп оқушылары педагогтердің қатысуымен Ұлттық бірыңғай тестілеуге, пәндік олимпиадалар мен ғылыми жобаларға дайындала алады.
Ал Жаңақорған ауданы, Талап ауылында орналасқан облыстық олимпиада және қосымша білім беру орталығы енді жыл бойы жұмыс істейтін болады. Облыс әкімінің қолдауымен мұнда балалар демалып қана қоймай, жылдың басқа уақыттарында ҰБТ мен пәндік олимпиадаларға дайындалады. Демыс орнында бес мезгіл тамақтанатын заманауи асхана мен екі спорт алаңы, бассейн және монша қарастырылған. Орталықта ұлттық тәрбие клубы да жұмыс істейді. Оқушылар үшін Қаратау тауларына, Бесарық өзеніне, Қостөбе және Сауран ежелгі қалаларына экскурсиялар ұйымдастырылады. Сонымен қатар мұнда Саураннан табылған ыдыс-аяқ пен тұрмыстық заттардан құралған ашық аспан астындағы мұражай балалар игілігі үшін жұмыс жасауда.
Балалар жылына орай лагерлерде әр ауысым үшін әртүрлі тақырыптық бағыттар мен атаулар қарастырылған. Тақырыптық бағыттар аясында қала сыртындағы және мектеп жанындағы лагерьлерде 55 800 баланы қамтитын 1860 шара ұйымдастырылады. Олар әр баланың қабілеттерін ашуға, жасөспірімдерде патриотизм мен азаматтықты тәрбиелеуге бағытталған.
Маусым айында лагерьлердің жұмысы азаматтық-патриоттық, отбасылық, рухани-адамгершілік бағытта ұйымдастырылды. Балалар арасында отбасылық, рухани-адамгершілік құндылықтарды насихаттауды мақсат еткен шығармашылық байқаулар, зияткерлік ойындары мен шеберлік сағаттары өткізілді. Сонымен қатар, азаматтық-патриоттық бағытта Мемлекеттік рәміздер күніне арналған патриоттық акциялар ұйымдастырылды.
Шілде айындағы шаралар тарихи-мәдени, спорттық, көркемдік-эстетикалық бағытта ұйымдастырылуда. Атап айтқанда, барлық лагерьлерде 6 шілде – Елорда күніне арналған «Асқақтай бер, Елордам» мерекелік концерттері, «Еңселі Елорда» сурет салу, ән айту байқаулары, сондай-ақ «Біздің жеңімпаз команда» шағын футболдан турнирі, спорттық эстафеталары, шахмат, дойбы, үстел теннисі, ұлттық спорт түрлерінен сайыстар ұйымдастырылды.
Тамыз айында лагерь жұмыстары тарихи-өлкетану, волонтерлік тәрбие бағытына арналмақ. Мысалы, балалар үшін тарихи-мәдени орындарға экскурсиялар ұйымдастырылып, музейлерде презентациялар мен танымдық көрмелер өткізіледі.
Айта кетейік, облыс бойынша лагерлердің жұмысы тамыз айының соңында аяқталып, балалардың сауықтыру демалысын жоғары деңгейде ұйымдастыруға жұмылдырылған педагогтер үшін «Балалар демалысын ұйымдастырудың үздік бағдарламасы», «Жазғы педагогикалық идеялар-2022», «Жыл тәлімгері» арнайы конкурстары өткізіледі. Сондай-ақ, жазғы маусым қорытындысымен лагерьлерде белсенді жұмыс жасаған педагогтер, тәрбиешілер марапатталатын болады.

Қызылорда облысында жазғы лагерлердің жұмысы қалыпты жүргізілуде

<a href="https://kyzylorda-news.kz/">Kyzylorda-news.kz.</a> «Қазгидромет» РМК-сы шілденің 27-сі күнгі күн райы болжамын жариялады.
Кәсіпорын таратқан деректерге қарағанда, 27- шілде күні ҚР батыс, солтүстік-батыс, солтүстік жартысында оңтүстік циклонның ықпалынан жаңбыр жауып, найзағай ойнайды, сондай-ақ бұршақ жауып, солтүстік-батыста дауыл тұрады, оңтүстік-батыста түнде және таңертең тұман түседі.
Республика бойынша жел 15-20 м/с-қа дейін күшейеді. Қазақстанның оңтүстігінде, шығысында, орталығында жоғары қысымды алқапта күн жауын-шашынсыз болады.

Сәрсенбіге арналған ауа райы болжамы

Kyzylorda-news.kz. Бүгін ауыл шаруашылығы саласындағы негізгі мәселелерді талқылау мақсатында «Шопан Ата» Қазақстан Ұлттық мал өсірушілер қауымдастығының бастамасымен шаруалардың ортақ мәселесі талқыланды.
Жиында басқарма басшысы Талғат Дүйсебаев мал шаруашылығы саласындағы өзекті мәселелер бойынша фермерлердің ұсыныс-пікірлерін тыңдады.
Атап айтқанда, шаруа қожалықтары малдарының азығына жұмсалған шығындар құнын арзандатуға субсидияның бөлінбегені наразылық туғызды.
Айта кету керек, өткен жылы орын алған қуаңшылық зардабынан мал азығы дақылдарының өнімділігі төмендеп, шаруашылықтардың мал азығын дайындауда көптеген қиыншылықтар туғызды. Бұл өз кезегінде мал азығы дақылдары бағасының күнделікті қымбаттауына әкеліп, жем-шөптің құны 2 есеге қымбаттап кеткен болатын. Осыған сәйкес, ҚР Үкіметінің резервінен 1,9 млрд. теңге қаржы бөлініп, облыстың 1100 тауарөндірушілеріне төленді.
Биылғы жылы жергілікті бюджеттен мал шаруашылығын субсидиялауға 3,2 млрд. теңге қаржы бөлініп, бүгінгі күні субсидия төлеу жұмыстары жүргізілуде.
Бұдан бөлек, 2021 жылы күту парағына түскен өтінімдерге сәйкес республикалық бюджеттен қосымша 744,9 млн. теңге бөлініп, қаулыға өзгеріс енгізу жұмыстары жүргізіліп, тамыз айында субсидия төленетін болады.
ҚР Ауыл шаруашылығы министрлігінің Қағидасына сәйкес мал азығына кеткен шығындар құнын субсидиялауға қаржы тек жергілікті бюджет қаражаты есебінен жүргізіледі және жергілікті бюджеттің тиісті қаржы жылына көзделген қаражат шегінде субсидияларды беру тәртібі айқындалады. 
Осыған сәйкес, биылғы жылы бюджет тапшылығына орай жем-шөпке қаржы бөлінбеді. Кездесу барысында тиісті түсіндірме берілді.

Басқарма басшысы шаруа қожалық иелерімен кездесті

<a href="https://kyzylorda-news.kz/">Kyzylorda-news.kz.</a> Қазіргі таңда, Қызылорда облысында құрылыс және инженерлік-коммуникациялық инфрақұрылымды дамыту жобалары жүзеге асырылуда.
Атап айтқанда, биыл облыс әкімінің тапсырмасына сәйкес Сыр өңірінде энергетика және тұрғын үй коммуналдық шаруашылығы саласында 17,3 млрд.теңгені құрайтын 106 жоба жүзеге асырылуда.
Солардың бірі Қызылорда қаласында көпбалалы аналарға пайдалануға берілген Бәйтерек тұрғын ауданындағы тұрғын сектордың инженерлік-коммуникациялық инфрақұрылымын дамытуға 1 млрд. 060 млн. теңге бөлінсе, Жаңақорған кентіндегі 10/0,4 кв электржелілік жүйені жаңғыртуға &nbsp;898 млн. 787 мың теңге қаралған.
Сонымен қатар, Қызылорда қаласы мен Жалағаш, Шиелі аудандарында тұрғын үйді жаңғырту жұмыстарын жүргізуге 622 млн. 160 мың теңге бөлінген.
<img src="https://kyzylorda-news.kz/wp-content/uploads/2022/07/59834ec2-fb05-418c-83fa-05d2963e52bd.jpg" alt="" />
Айта кету керек, Қызылорда қаласының тұрғын үй қорында 800-ден астам көпқабатты тұрғын үй болса, соңғы 10 жылдың ішінде 185 көпқабатты үйлерге жаңғырту жұмыстары жүргізілген. Биылғы жылы да осы жұмыстардың жалғасы ретінде облыс орталығындағы 11 үйге қайта жаңғырту жұмыстары жүргізіледі.
Сонымен қатар биыл мемлекеттік бюджет есебінен құрылыс саласында жалпы көлемі 60,6 млрд. теңгені құрайтын 108 жоба жүзеге асыру жоспарлануда.
Оның ішінде облыстық құрылыс, сәулет және қала құрылысы басқармасы арқылы 27, Арал ауданында 5, Қазалы ауданында 13, Қармақшыда 13, Жалағаш пен Сырдарияда 4, Шиелі 5, Жаңақорған 2, Қызылорда қаласында 35 жоба жүзеге асырылмақ.
Бұл жобалардың ішінде: облыстық қан орталығы, неке сарайы, мәдениет саласындағы көпсалалы кешен және 2 оқу корпустарының құрылысы бар.
<img src="https://kyzylorda-news.kz/wp-content/uploads/2022/07/c4d5f752-b222-4d7f-8785-bedc87f503aa.jpg" alt="" />
Аймақ басшысы Нұрлыбек Нәлібаевтың тапсырмасымен жобалардың тиімділігін әрі сапасын қадағалайтын арнайы Кеңес құрылып, жұмыс жасауда.
Бұл кеңестің жұмысы ең алдымен бюджет қаржысының тиімді пайдалануын қадағалау жәнетұрғындар үшін қажетті нысандарды салуды көздейді.
<img src="https://kyzylorda-news.kz/wp-content/uploads/2022/07/9d8d64fc-3bb3-493b-aeb4-994372c9a356.jpg" alt="" />

Сыр елiнде құрылыс және инфрақұрылымды дамыту жобалары қарқынды жүзеге асуда

<a href="https://kyzylorda-news.kz/">Kyzylorda-news.kz.</a> Жаз мезгілі – демалыс пен саяхат кезеңі. Осыған байланысты жаз мезгілінде Қазақстанның ХҚКО-ларында жеке куәлік пен төлқұжатты ресімдеу үшін өтініш білдіретін клиенттер саны артады.&nbsp;
2022 жылдың алты айында қазақстандықтарға 1 353 590 жеке куәлік пен паспорт берілді. Рәсімделген құжаттардың ең көбі маусым айында тіркелген,саны – 266&nbsp;668.&nbsp;
Осы ретте ХҚКО-да төлқұжат пен жеке куәлікті ыңғайлы әрі жылдам жолмен қалай алуға болатынын айтқымыз келеді.
Паспорт алу
Паспорт пен жеке куәлікті алу қызметі әлі онлайн режимінде қолжетімді болмай тұр. Бұл құжаттарды рәсімдеу үшін міндетті түрде ХҚКО-ға жүгіну қажет.Десе де, қызмет эксаумақтылық қағидаты бойынша көрсетіледі – өзіңіздің тіркелген мекенжайыңызға қарамастан кез келген ХҚКО-ға бара аласыз. ХҚКО-ларда жеке куәлік пен паспортты ресімдеу бойынша операцияны көші-қон қызметікөрсетеді.&nbsp;
Егер төлқұжат алу үшін бірінші рет келіп тұрсаңыз, сізге тек жеке куәлік қажет болады. Егер сіздің төлқұжатыңыздың мерзімі аяқталса, оны мерзімі аяқталғанға дейін 1-2 ай бұрын ауыстыра аласыз. Төлқұжаттың мерзімі аяқталғаннан кейін жаңа төлқұжат алу үшін өтініш білдірсеңіз, кешіктіргеніңіз үшін айыппұл қарастырылмайды.
Төлқұжат үшін мемлекеттік баж – 8 АЕК (2022 жылдың 1 қаңтарында белгіленген АЕК) немесе24 504 теңге. Қызмет көрсетудің стандартты мерзімі –&nbsp; 15 жұмыс күні. Алайда, қосымша төлем жасау арқылы бұл процесті жеделдетуге болады. Нұр-Сұлтан, Алматы, Шымкент және Ақтөбе тұрғындары процесті осы әдіс бойынша үш күннен бір жұмыс күніне дейін қысқарта алады:
1 жеделділік санаты – 1 жұмыс күніне дейін – 4 983 теңге;
2 жеделділік санаты– 3 жұмыс күніне дейін-2 752 теңге.
Облыс орталықтары үшін басқа әдіс қарастырылған:
1 жеделділік санаты– 3 жұмыс күніне дейін-4 983 теңге;
2 жеделділік санаты– 5 жұмыс күніне дейін-2 752 теңге.
Ал аудандар мен облыстардағы қалалар үшін тек үшінші санат қолжетімді: 1 116 теңге қосымша төлем арқылы 7 жұмыс күніне дейін жеделдете алады.
Баланың төлқұжатын рәсімдеу кезінде оның туу туралы куәлігін ұсынып, баж салығын төлеу қажет. Қызметке өтініщ білдіру үшін баланың ата-анасының бірі келуі міндетті.
Жеке куәлік алу
ҚР азаматтары жеке куәлікті 16 жасқа толған кезде алады. Осы жасқа жеткен кезде құжатты бір ай ішінде рәсімдеу керек, әйтпесе 7 АЕК немесе 21 441 теңге айыппұл төлеу керек болады. Сонымен қатар, егер мерзімі аяқталған жеке куәлік бір ай ішінде жаңартылмаса, дәл осы мөлшердегі айыппұл қарастырылған.Егер айыппұлды бір апта ішінде төлейтін болсаңыз, онда сомма 50 пайызға төмендейді. Егер сізде паспорт бар болса, жеке куәлікті рәсімдеу үшін оны да өзіңізбен бірге алып келу керек.&nbsp;&nbsp;Бұл ретте жеке куәлік үшін мемлекеттік баж 0,2 АЕК немесе 613 теңге болады.
Қызметті төлқұжатпен бірдей әдіс бойынша жеделдетуге болады. Сонымен қатар, жеке куәлік пен төлқұжат үшін мемлекеттік баж салығын төлеуден босатылған клиенттердің жеңілдетілген санаты бар екенін ескертеміз. Олар:
<ul>
<li>ҰОС ардагерлері және оларға теңестірілген тұлғалар;</li>
<li>Кеңес одағының батырлары және Социалистік еңбек ерлері;</li>
<li>барлық топтағы мүгедектер, сондай-ақ бала кезінен мүгедек болған клиенттің ата-анасының бірі;</li>
<li>қарттар мен мүгедектерге арналған мекемелерде тұратын егде жастағы адамдар;</li>
<li>жетім балалар және балалар үйлерінде немесе интернаттарда тұратын ата-анасының қамқорлығынсыз қалған балалар;</li>
<li>«Батыр Ана» атағы бар, “Алтын алқа” және “Күміс алқа” төсбелгілерімен наградталған көпбалалы аналар;</li>
<li>Чернобыль апатының салдарынан зардап шеккен азаматтар.</li>
</ul>
Айыппұл төлемеу үшін және ХҚКО-ға баруды алдын ала брондау үшін клиенттерден өз құжаттарын уақытылы жаңартып отыруды сұраймыз.

ХҚКО-дан төлқұжат пен жеке куәлікті қалай тез алуға болады?

<a href="https://kyzylorda-news.kz/">Kyzylorda-news.kz.</a> Облыста наурыз айында ашылған Кәсіпкерлер палатасы жанындағы Әйелдер кәсіпкерлігін дамыту орталығы бүгінге дейін 245 адамға кеңес беріп, 50 қыз-келіншекті оқытуды ұйымдастырды. Қызметтердің барлығы тегін көрсетіледі.
«Әйелдер кәсіпкерлігін дамыту орталығы» жобасын Азия даму банкінің қаржылай қолдауымен Қазақстандағы БҰҰ Даму бағдарламасы мен «Атамекен» ҰКП жүзеге асырып жатыр.
Орталықтың мақсаты – кәсіпкерлікпен айналысуға ниетті әйелдердің кәсіби құзыретін арттыру.
Облыста соңғы 5 айда кеңес алған 245 қызылордалықтың 98-інің жеке кәсібі бар. Орталық маманы кеңес берумен қатар оқуға ниетті жандарға өздері таңдаған сала бойынша оқыту курстарын ұйымдастырып жатыр.
Тігін тігу бағыты бойынша курс жеке кәсіпкер Гүлжан Қуаңбаеваның орталығында өтуде. Гүлжан Амандыққызы осыдан алты жыл бұрын тігін цехын оқу орталығына айналдырып, мемлекеттік тапсырыс аясында жұмыссыз азаматтарды оқытуды қолға алды. Енді міне жоба аясында биыл 25 қыз-келіншекке тігіп-пішуді үйретуде. &nbsp;
<blockquote>
 «Қазір оқып жатқан жандардың басым бөлігі тігіннен хабардар. Бірі құрақ тігумен айналысса, енді бірі сумка, тұрмыстық заттар, ойыншықтар әзірлей алады. Дегенмен араларында киімді пішіп, тіге алатындары жоқтың қасы. Оқуды бастағанымызға бір айға жуықтап қалды. Жақын күндері курсты аяқтап, қатысушыларға біліктілік алғаны жөнінде сертификат табыстаймыз», – деді оқу орталығының жетекшісі Гүлжан Қуаңбаева.
</blockquote>
Тігіп-пішуді үйренген қызылордалықтардың бірі Серіккүл Байжанова. 54 жаста. Бұрын медбике болып жұмыс істеген.
<blockquote>
 «Карантинде құрақ көрпе тігуді үйреніп алдым. Қазір тапсырыспен тігемін. Әйелдер кәсіпкерлігін дамыту орталығы тігін бағытында курс ұйымдастыратынын естіп, қатысамын деп шештім. Себебі тұтынушыларға ұсынатын өнім түрлерін арттырғым келеді. Мысалы, қазір балаларға арналған ұлттық киімдер, әйелдердің камзолдары сұранысқа ие. Курста соның қыр-сырымен танысып жатырмын. Өзіме көйлек тігіп алдым», – деп Серіккүл Байжанова сұхбат барысында үстіне киген көйлегін көрсетті. Ол алдағы уақытта кәсіпкер ретінде тіркеліп, ресми қызмет көрсеткісі келеді.&nbsp; &nbsp;
</blockquote>
Курсқа қатысып жатқан Айдана Капакова жеке кәсіпкер. Ол ерекше балаларды дамытуға арналған ойыншықтар тігумен айналысады.
<blockquote>
 «Отбасылымын. Ерекше бала тәрбиелеп отырмын. Осы баламды дамытып, жетілдіру үшін ойыншықтар әзірлеп бастағанмын. Кейін өзге де ата-аналардан сұраныс болып, сонымен жеке кәсібімді аштым. Бұрын тігінді көз мөлшермен тігетінмін. Осы курсқа келіп, өлшеудің, пішудің арнайы формулалары болатынын үйрендім. Алдағы уақытта ойыншықтармен бірге киімдерге де тапсырыс алғым келеді. Оқу жақсы өтіп жатыр. Тек уақыты өте аз. Қалағанымыздай үйреніп шығу үшін бір ай жеткіліксіз. Жоба алдағы уақытта жалғасатын болса мерзімін ұзартуды сұраймыз», – деді Айдана Капакова.
</blockquote>
Қызылордадағы Әйелдер кәсіпкерлігін дамыту орталығы осыған дейін 10 әйелді SMM-ге оқытқан. Тігіп-пішу курсындағы 25 келіншекпен бірге жақында кондитерлік курс оқып жатқан 15 азамат арнайы сертификатқа ие болады.
Аймақта кәсіппен айналысамын деген қыз-келіншектер Қызылорда облысы кәсіпкерлер палатасындағы Әйелдер кәсіпкерлігін дамыту орталығынан кеңес ала алады. Мекенжайы: Қызылорда қ., Қорқытата көш.,123, 1-қабат («Бизнеске арналған Үкімет» ғимараты), 8/7242/400202. Кеңесші: Нұрханова Жадыра Мейрамбекқызы, 8 705 116 19 10 (Whatsapp).
<img src="https://kyzylorda-news.kz/wp-content/uploads/2022/07/img_7224-scaled.jpg" alt="" />

Қызылордада әйелдер кәсіпкерлігін дамыту орталығы қыз-келіншектерге тегін кәсіби білім беруді ұйымдастырып жатыр

<a href="https://kyzylorda-news.kz/">Kyzylorda-news.kz.</a> Өңірде жеке кәсіпкерлік саласы қарқынды дамып келеді. Әсіресе шикізат өндірісін қолға алып, ішкі нарықты толықтай қамтамасыз етіп отырған жергілікті өнімдер үлкен сұранысқа ие.
Мәселен «ВЕГА-Пром» ЖШС құрғақ құрылыс қоспаларын өндіру цехы 2015 жылы іске қосылған. Бұл жобаның жалпы құны – 103 млн теңгені құрайды. Бүгінде аталған цехтан 10 түрлі құрғақ құрылыс өнімі шығарылады. Бүгін Өңірлік коммуникациялар қызметінің ұйымдастыруымен өткен баспасөз-туры барысында БАҚ өкілдеріне өндірістің жұмыс барысы таныстырылды.
<blockquote>
 «Бүгінде жеке кәсіпкерлерге мемлекет тарапынан қолдау көп. Соның бірі – «Бизнестің жол картасы 2020» мемлекеттік бағдарламасы арқылы жеке кәсібімді ашу үшін 3 гектар жер алдым. Қазіргі уақытта күніне 75 тоннадан астам өнім өндіреміз. Қазіргі таңда өндіріс қуаттылығын 24 мың тоннаға дейін ұлғайту мақсатында нысанның екінші кезеңін жүзеге асырудамыз. Алдағы уақытта 50 адамға дейін жұмыспен қамтуды жоспарлап отырмыз», – деді «ВЕГА-Пром» ЖШС құрылтайшысы Әбдіхалық Ділманов.
</blockquote>
Ал «Әділханова» ЖК құрылысқа қажетті металл өнімдері өндірісі 2020 жылы іске қосылған. Мұнда күніне 1500 м2 құрылысқа қажетті өнім өндіріледі. Шығарылған тауарлар ішкі нарықты толық қамтамсыз етуде.
<blockquote>
 «Біздің негізгі шығаратын өнімдеріміз құрылысқа қажетті тауарлар. Екі жыл бойы жеке тапсырыстар бойынша жұмыс істеудеміз. Жылдан жылға цехың көлемі ұлғайып, шығаратын өнімнің түрлері көбейіп келеді. Бүгінде 8 адам тұрақты жұмыспен қамтылған. Алдағы уақытта автоматтандыру жүйесіне көшуді жоспарлаудамыз. Бұл өз кезегінде еңбек өнімділігін арттыруға септігін тигізбек», – деді Әділханова» ЖК директоры Исатай Нұржанов.
</blockquote>
<img src="https://kyzylorda-news.kz/wp-content/uploads/2022/07/296205473_1584114941984012_2008785177696570461_n.jpg" alt="" />

Қызылорда облысында өнеркәсіп өндірісі ұлғайып келеді

<a href="https://kyzylorda-news.kz/">Kyzylorda-news.kz.</a> Қазақстанның Ұлттық банкі 27 шілдеден бастап ROZA BAǴLANOVA. 100 JYL коллекциялық монеталары сатылымға шығарылатынын хабарлады.
Монеталар “Есте қалатын оқиғалар мен біртуар адамдар” атты сериядан шыққан. 
Номиналы 100 теңгелік мельхиордан соғылған монеталар қазақтың опера және эстрада әншісі Роза Бағланованың 100 жылдығына арналған.
Монеталар <a href="http://kazcoins.nationalbank.kz/kz/shop_disabled">www.kazcoins.nationalbank.kz</a> платформасында Ұлттық банктің интернет-дүкені арқылы сатылады.
<img src="https://kyzylorda-news.kz/wp-content/uploads/2022/07/2207261622155481g.jpg" alt="" />
Монетаның сипаттамасы
Монета аверсінің орталық бөлігінде Қазақстанның мемлекеттік елтаңбасы бейнеленген. Елтаңбаның оң жағы мен сол жағында ою-өрнек элементтері орналасқан. QAZAQSTAN ULTTYQ BANKI • NATIONAL BANK OF KAZAKHSTAN деген жазу монета жиегімен айналдыра жазылған. Төменгі бөлігінен монетаның номиналын білдіретін 100 TEŃGE жазуын көруге болады.
Монета реверсінде Роза Бағланованың суреті, портреттің сол жағында мерейтойлық датаны білдіретін 100 JYL деген жазу бар, монета жиегінде “Ах, Самара-городок” әнінің ноталары, ROZA BAǴLANOVA деген жазу айналдыра басылған, сол жағында – монетаның шыққан жылын білдіретін “2022” деген жазу бар.
МН25 қоспасынан жасалған номиналы 100 теңгелік монетаның массасы – 15 грамм, диаметрі – 33 мм, дайындау сапасы – brilliant uncirculated, таралымы – 15 000 дана.
Монета коллекциялық құны тұрғысынан сатуға арналған. Оны белгіленген құнына сай Қазақстанның бүкіл аумағында барлық төлем түрі бойынша, сондай-ақ банк шоттарына аударуға, Қазақстанның барлық банкінде аудару, ұсақтау және айырбастау үшін пайдалануға болады. 
Коллекциялық монета Қазақстанның теңге сарайында жасалған.

ROZA BAǴLANOVA коллекциялық монеталары сатылымға шығарылады

<a href="https://kyzylorda-news.kz/">Kyzylorda-news.kz.</a>&nbsp; Қызылорда облысында болған жол апатынан бес адам қайтыс болды, деп хабарлайды&nbsp;<a href="https://sputnik.kz/">Sputnik Қазақстан</a>.
Ресми мәліметке сәйкес, таңғы сағат үш кезінде “Самара – Шымкент” тасжолының 1713-ші шақырымында Toyota Camry мен Daewoo Nexia соқтығысқан.
“Жол апаты Жалағаш ауданындағы Таң ауылына жақын жерде болған. Toyota Camry-дің 26 жастағы жүргізушісі және Daewoo Nexia-ның 42 жастағы иесі оқиға орнында қайтыс болды. Nexia салонында болған тағы үш жолаушы көз жұмды”, – деді облыстық төтенше жағдайлар департаментінің мамандары.
<a href="https://sputnik.kz/20220726/qyzylorda-oblysynda-zhol-apaty-26351082.html#"></a>Қайтыс болғандардың арасында 6 және 10 жасар екі бала бар. Қайтыс болған бес адам да Ордабасы ауданының тұрғындары.
Оқиға орнына құтқарушылар, тасжолдағы медициналық-құтқару қызметі, жедел жәрдемнің екі бригадасы, аудандық полиция барды. Қазіргі кезде тергеу шаралары басталды.

Қызылорда облысында жол апатынан 5 адам көз жұмды

<a href="https://kyzylorda-news.kz/">Kyzylorda-news.kz.</a>&nbsp; Республика бойынша тұрақсыз ауа райы сақталады, жаңбыр жауады. 26 шілдеде батыста, 27-28 шілдеде елдің солтүстік-батысында, солтүстігінде найзағай, дауыл, бұршақ күтіледі.
Күндізгі уақытта республиканың батыс өңірлерінде ауа температурасының +25 +35°С-тан +30 +40°с-қа дейін көтерілуі күтілуде, ал елдің солтүстік-батысында, солтүстігінде ауа температурасының күндіз +30 +35°С-тан +20 +30°с-қа дейін біртіндеп төмендеуі болжануда.
Қазақстанның орталығында ауа температурасы +30 +38°С-тан +27 +35°С-қа дейін төмендейді, елдің шығыс облыстарында болса ауа температурасы +22 +32°С-тан +27 +38°С-қа дейін көтеріледі. Ал Қазақстанның оңтүстігінде, оңтүстік-шығысында өте қатты ыстық сақталады: +40 +45°С.

Қазақстанда 26-28 шілдеде қатты ыстық сақталады

<a href="https://kyzylorda-news.kz/">Kyzylorda-news.kz.</a>&nbsp;Қызылорда облыстық халық шығармашылығын дамыту және мәдени-продюсерлік орталығының басшысы, айтыскер ақын, үш дүркін “Алтын домбыра” иегері Мұхтар Ниязов Қырғызстан Республикасында өткен халықаралық ақындар айтысында Бас бәйге иегері атанған болатын.
Бүгін Сыр еліне Мұхтар Мәуленұлы жүлдемен оралып, жерлестері құрметпен күтіп алды. Аймағымыздың өнер жанашырлары мен Сыр жастары Тұңғыш Президент саябағында жиналып, мәдениет және спорт басқармасының басшысы Руслан Рүстемов ақынның халықаралық айтыста ел мәртебесін биіктеткен жеңісімен құттықтап, шығармашылық табыс тіледі. Жас ақын Сандыбай Піржан өз арнау өлеңін жолдады.
<img src="https://kyzylorda-news.kz/wp-content/uploads/2022/07/295622453_1996531057401059_4754169596106143138_n.jpg" alt="" />

Қазақстан және Қызылорда облысының жаңалықтары