<a href="https://kyzylorda-news.kz/">Kyzylorda-news.kz.</a> Синоптиктер Қазақстан бойынша 9 тамызға арналған ауа райы болжамын ұсынды – ел аумағында қатты жаңбыр жауады, найзағай ойнайды, екпінді жел соғады, бұршақ жаууы мүмкін, сондай-ақ қатты аптап ыстық және өте жоғары өрт қаупі бар.
<blockquote>
 Атмосфералық фронтальды бөліктердің өтуімен республиканың басым бөлігінде, орталықта, күндіз солтүстікте және оңтүстік-шығыстың таулы аймақтарында жаңбыр жауады – қатты жаңбыр жауады, ол күн күркіреп, екпінді желмен жүреді. күндіз – бұршақпен және оңтүстік-шығыста – бұршақпен. Республиканың солтүстігінде түнде және таңертең тұман күтіледі, оңтүстігінде таңертең және күндіз шаңды дауыл соғады.«Қазгидромет» РМК
</blockquote>
Болжам бойынша, Қарағандының солтүстігінде, шығысында, күндіз солтүстікте, Ұлытаудың шығысында, Ақмоланың шығыс жартысында, Жамбылдың таулы аймақтарында, күндіз Алматы облыстарының таулы аймақтарында қатты жауын-шашын болады.
Синоптиктер де:
Батыс Қазақстан облысының оңтүстігінде күндіз қатты ыстық күтіледі;
Атырау облысында қатты аптап ыстық сақталады.
Қызылорданың басым бөлігінде, Түркістан облыстарының оңтүстігінде, шығысында төтенше өрт қаупі сақталады, деп хабарлады «Қазгидромет» РМК.
Бұған дейін синоптиктер 2022 жылғы 9-11 тамызға арналған болжамды ұсынған болатын – Қазақстанның батысында құрғақ және күн ашық болады деп күтілуде.
Сондай-ақ, «Қазгидромет» РМК 9-11 тамыз күндері Нұр-Сұлтан, Алматы және Шымкент қалаларында ауа райы қандай болатынын айтты.

9 тамызға арналған ауа райы болжамы

<a href="https://kyzylorda-news.kz/">Kyzylorda-news.kz.</a> Облыстық жастар ресурстық орталығы мен қалалық жастар орталығы бірлесіп Арай сити сауда үйінін алдында «ЖазFEST» өнер фестивалін ұйымдастырды.
<blockquote>
 «12 тамыз жастар күніне орай, жастар апталығы жарияланды. Соның аясында осы жерде заманауи би өнерінен бүлдіршіндер сынға түсті. Сонымен қатар, «Атамекен» балалар ауылының қолөнер көрмесі ұйымдастырылды. Балалар бос уақыттарын тиімді пайдаланып түрлі қолөнер бұйымдарын дайындаған. Мұның бәрі жастардың, қала тұрғындарының уақытын тиімді пайдалану мақсатында фестивальді ұйымдастырып отыр. Мұндай көпшілік мәдени іс-шаралар алдағы уақытта да жалғасын табады», – деді облыстық жастар ресурстық орталығы директорының орынбасары Талғат Тілесов.
</blockquote>
Бұл іс-шарада халық арасынан шыққан бишілер мен «Qosyl Dance» тобының бишілері сынға түсті. Ақтық мәреде Сұлтана есімді кішкентай бүлдіршін жеңіске жетіп, 10 мың теңгелік сертификатқа қол жеткізсе, Гүлнұр есімді қызға 5 мың теңгелік сертификат берілді. Фестиваль би жарысымен шектеліп қалмады, әншілер де ортаға шығып, халықтың көңіл-күйін көтерді.
<blockquote>
 «Мен ата-анаммен сауда орталығында қыдырып жүріп биден жарыс өтіп жатқанын байқадым. Бағымды сынап көру үшін жарысқа қатыстым. Жеңіске жетемін деп ойламадым. Себебі өнерлі бүлдіршіндер өте көп екен. Ұйымдастырушылар рақмет», – деді жеңімпаз Сұлтана.
</blockquote>
<img src="https://kyzylorda-news.kz/wp-content/uploads/2022/08/297989815_1309516676489655_8013401625641198536_n.jpg" alt="" />
<img src="https://kyzylorda-news.kz/wp-content/uploads/2022/08/298285055_1309516746489648_7296698929501847170_n.jpg" alt="" />

Қызылордада «ЖазFEST» өнер фестивалі өтті

<a href="https://kyzylorda-news.kz/">Kyzylorda-news.kz.</a> Қызылорда қаласында өрт сөндіру-құтқару спорты бойынша жазғы чемпионаттың жеңімпаздарын марапаттау сәті мен аталған чемпионаттың жабылу салтанаты өтті.
Салтанатты жиында Қызылорда облысы Төтенше жағдайлар департаментінің бастығы полковниік Руслан Қайрақбаев сайыс барысында жоғары кәсіби-спорттық шеберлік көрсеткен қатысушыларды марапаттап, дипломдар мен естелік сый-сияпатты табыстады.
Ерлер арасындағы чемпионаттың нәтижесінде ұпай санымен І жалпыкомандалық орынды Атырау облысының командасы жеңіп алды. ІІ орынды Маңғыстау облысының командасы, ІІІ орынды Нұр-Сұлтан қаласының командасы қанжығаларына байлады.
Ал, әйелдер арасындағы І жалпыкомандалық орынды Түркістан облысының командасы иеленді. Нұр-Сұлтан қаласының әйелдер командасы ІІ орын алды. Алматы қаласының әйелдер командасы ІІІ орынға лайықты болды. Жалпыкомандалық жарыстың жеңімпаздарына кубоктар мен бағалы сыйлықтар табысталды. Сондай-ақ чемпионаттың жеңімпаздары қазан айында Өзбекстан Республикасында өтетін халықаралық чемпионатқа қатысатын болады.
Айта кетейік, чемпионатқа республикадағы барлық өңірлер мен Нұр-Сұлтан, Алматы, Шымкент қалаларының Төтенше жағдайлар департаменттері және Мәлік Ғабдуллин атындағы Азаматтық Қорғау академиясынан 18 үздік ерлер командасы, 13 әйелдер командасы қатысты. Жалпы турнирге 400-ден астам құтқарушы бақ сынады.
<img src="https://kyzylorda-news.kz/wp-content/uploads/2022/08/297982572_1592764174452422_7153851359184929958_n.jpg" alt="" />
<img src="https://kyzylorda-news.kz/wp-content/uploads/2022/08/298572900_1592764114452428_4241787691102659971_n.jpg" alt="" />

Өрт сөндіру-құтқару спорты бойынша Қазақстан чемпионатының жеңімпаздары анықталды

<a href="https://kyzylorda-news.kz/">Kyzylorda-news.kz.</a> Бүгін «AMANAT» партиясы аймақтық және аумақтық филиалдары жанындағы мониторингтік топтары мүшелерімен сауда орындарындағы әлеуметтік маңызы бар азық-түлік бағаларына кезекті бақылау жұмыстары жүргізілді. Өңірлік топ облыс орталығындағы Сырдария және Ажар Сити сауда үйлеріндегі бағаны бағамдады.
Зерделеу барысы көрсеткендей азық-түлік қоры жеткілікті, кейбір өнімдер бойынша бағаның төмендеуі бар. Дегенмен негізгі тауарлар бағасын тұрақты ұстау мәселесі кәсіп иелеріне түсіндіріліп, сауда жасаушылармен де сұхбаттар жүргізілді.
Сонымен бірге сауда үйлеріндегі әлеуметтік бұрыштар жұмысы, нан мен көкөністердің бағасы және сапасы ерекше назарда ұсталуда. Осыған орай өткен аптада ұйымдастырылған жиын қорытындысы бойынша тиісті мекемелерге жолданған ұсыныстарда кейбір ірі сауда орындарында әлеуметтік бұрыштардың болмауына орай «Байқоңыр» ӘКК бірлесіп негізгі азық-түлік өнімдерінің халыққа қолжетімділігін арттыру мақсатында аймақтағы барлық сауда үйлерімен қажетті меморандумдар жасау мен азық-түлік бағасын тұрақтандыру бағдарламасы шеңберінде қаладағы ірі сауда үйлерінде әлеуметтік сауда нүктелері мен олардағы өнімдер түрін көбейту мәселесіне басымдық берілді.
<img src="https://kyzylorda-news.kz/wp-content/uploads/2022/08/298162090_435301941968781_4785720141874632054_n.jpg" alt="" />

Әлеуметтік маңызы бар азық-түлік өнімдері бағаларына бақылау жалғасуда

<a href="https://kyzylorda-news.kz/">Kyzylorda-news.kz.</a>&nbsp; Әрбір ата-ана баланың ауыруы мен жарақатына қаншалықты төзімді екенін біледі. 6 жасар бала жазғы ас үйде ойнап жүрген. Орындыққа шығып, ыдыс-аяқ шкафтің үстіне мінгісі келді. Үлкен шкаф баланың үстіне құлап, орындықтың арқасы тамағына тиген.
Бала шұғыл түрде Арал ауданаралық ауруханасына жатқызылды. Содан кейін санавиациямен көпбейінді облыстық балалар ауруханасына жеткізілді. Хирургтар ота жасап, баланың өмірін сақтап қалды.
<blockquote>
 «Трахеясы жыртылып, өңеші зақымдалған. Шұғыл ота жасалды. Тамақтану үшін балаға гастростома орнатылды, бұл алдыңғы іш қабырғасы мен асқазанды байланыстыратын жасанды тесік. Сол күннен бастап бір жарым ай өтті, өңеш пен трахеядағы зақым сауығып кетті. Енді гастростоманы алып тастауды жоспарлап отырмыз. Аман-есен Мақсат үйреншікті өмір салтына оралады», – деп хабарлады облыстық көпбейінді балалар ауруханасының бөлім меңгерушісі Әлімжан Төлегенов.
</blockquote>
Мақсаттың анасы баласын құтқарып, мүгедектігіне жол бермегені үшін дәрігерлерге алғыс білдірді.
Көпбейінді облыстық балалар ауруханасында хирургияның үш бөлімі бар. Негізінен операциялар эндовидеохирургия әдістерімен өтеді. Бұл лапароскопия, торакоскопия, артроскопия және басқалар.
2022 жылдың 7 айында 8,5 мыңға жуық бала ем қабылдады, 2 мыңнан астам ота жасалды. Бұл мақсатқа Әлеуметтік медициналық сақтандыру қорынан 1 ,5&nbsp; млрд &nbsp;теңге бөлінді.
<img src="https://kyzylorda-news.kz/wp-content/uploads/2022/08/whatsapp-image-2022-08-04-at-16.42.58.jpeg" alt="" />

Қызылордада дәрігерлер 6 жасар баланың өмірін аман қалып қалды

<a href="https://kyzylorda-news.kz/">Kyzylorda-news.kz.</a> Қызылорда қаласындағы Назарбаев Зияткерлік мектебінің басшысы Бахыт Жұматай Мичиган мемлекеттік университетінің докторантура бағдарламасы бойынша оқуға қабылданды.
Michigan State University – әлемдегі жетекші зерттеу университеттерінің бірі. Студенттердің жалпы саны 50 000 – нан асады және бүгінгі таңда 540 000 түлек түлеп ұшқан. «Usnews.com» ақпараттық агенттігінің рейтінгісі бойынша аталмыш ЖОО-ның бастауыш және орта білім беру, оқу орындарында оқыту мен басқару салаларында мамандарды даярлауда озық тәжірибесі бар.
<blockquote>
 «Үздіксіз даму – педагогикалық шеберлігінің негізі. Қазіргі заманның талабына сәйкес үздіксіз білім алып, біліктілігіңді шыңдап, өзгеріс енгізу маңызды. Докторантура бағдарламасы мектеп ұйымдары мен жүйелерін жетілдіру үшін практикалық дағдылар мен білімді арттыруға бағытталған», – дейді болашақ PhD докторы.
</blockquote>
Бахыт Әмірханұлының білім беру саласында жұмыс өтілі 20 жылдан астам уақытты құрайды. «Қолданбалы математика» мамандығы бойынша білім алған ол өзінің еңбек жолын Көкшетау қаласындағы дарынды балаларға арналған мектеп-интернатында тәрбиеші болып бастады. 6 жылға жуық оқушыларға информатика ілімін оқытты, сонымен бірге облыстық олимпиадалық құраманы дайындауда табысты жұмыс жасады. Өз тәжірибесінде Атыраудағы білім ордасында директордың оқу ісі жөніндегі орынбасары, Шымкенттегі қазақ-түрік лицейінде, Астанадағы халықаралық мектепте директор қызметтерін атқарды. 2016 жылы Бахыт Әмірханұлы Назарбаев Зияткерлік мектебінің басшысы болып тағайындалып, абыроймен еңбек етті. Ол Сыр бойындағы NIS-те зерттеушілер қауымдастығын құрып, оқуда іс-әрекетті және сабақты зерттеуге байланысты тың жаңалықтар енгізді.
<blockquote>
 «Зияткерлік мектептің стратегиялық мақсаттарына қол жеткізуде ынтымақтастықта жұмыс жасаған «Назарбаев Зияткерлік мектептері» дербес білім беру ұйымына, облыс әкімдігіне, білім басқармасына, Қамқоршылық кеңеске, ата-аналар комитетінің құрамына және мектеп ұжымына үлкен алғыс білдіремін», – Бахыт Жұматай.
</blockquote>
Білікті басшы Назарбаев Университетінде магистратура бағдарламасы бойынша білім ала жүріп, Қазақстандағы ауыл мектептеріндегі білім сапасының мәселелеріне зерттеу жүргізді. Халықаралық Мектептер Кеңесі CIS аккредиттеу саласында тәуелсіз сарапшы атанып, Кембридж, Сингапур, Біріккен Араб Әмірліктерінде білім саласына қатысты өзекті мәселелер бойынша біліктілігін арттырды. Білім беру жүйесін дамытудағы мінсіз еңбегі үшін Құрмет Грамоталарымен және Ыбырай Алтынсарин төсбелгісімен марапатталды.

Қызылордадағы NIS директоры Американың үздік университетіне шақырту алды

<a href="https://kyzylorda-news.kz/">Kyzylorda-news.kz.</a> Ауылдық округ тұрғындарын жұмыспен қамтуды ұлғайту және еңбек табысын арттыру аясында қолға алынған «АУЫЛ АМАНАТЫ» жобасының алға қойған міндеттерін түсіндіруге арналған мобильді топ Арал ауданына қарасты Ақирек, Қамыстыбас ауылдарының тұрғындарымен кездесіп, жобаның мақсатын кеңінен түсіндірді.
Кездесуде мобильді топтың мүшелері «АУЫЛ АМАНАТЫ» жобасы аясында еліміздегі әрбір ауыл мен қаланың өндірісінің басым бағыттарын айқындап, географиялық ерекшеліктері, еңбек, қаржылық және басқа да ресурстары бойынша ақпараттар берді.
2,5 пайыздық жеңілдікпен несие беру, ауыл шаруашылығы техникасы мен құрал-жабдықтарын лизингке беру, кооперативтерге инвестициялық субсидия беру. Сонымен қатар, тұрғындарға ауыл шаруашылығы саласының дамуына және ауыл тұрғындарының табысын арттыруға ықпал ететін жобаның бірнеше ерекшеліктері атап көрсетілді.
Кездесу барысында жоба туралы толық ақпарат берген мобильді топ мүшелері ауыл азаматтарының сұрақтары мен ұсыныстарын тыңдап, нақты жауаптар берді. Ауыл тұрғындарының негізгі алаңдататын мәселелерінің бірі – кепілдік болды. Көп тұрғындардың айтуынша, кәсіппен айналысқысы келетін адамдар бар, бірақ осы құжаттарды рәсімдеу, кепілдікке қойылатын мүлік мәселесі бірқатар қиындықтар туғызуда. Сонымен қатар, мал шаруашылығымен айналысу үшін жайылымдық жерлердің, судың, жем-шөптің тапшылығы да өзекті мәселелердің қатарында. 
Мобильдік топ жұмысы әрі қарай Қазалы ауданында жалғасатын болады.
<img src="https://kyzylorda-news.kz/wp-content/uploads/2022/08/298378667_435277661971209_254784292182643131_n.jpg" alt="" />
<img src="https://kyzylorda-news.kz/wp-content/uploads/2022/08/298066369_435277821971193_3741379704870821051_n.jpg" alt="" />

«Ауыл аманаты» жобасының марафоны Арал ауданында басталды

<a href="https://kyzylorda-news.kz/">Kyzylorda-news.kz.</a>&nbsp;Қызылордалық шаруалар көктемгі және күзгі егін науқанына бөлінетін жанар-жағар май көлемін қайта қарауды сұрап отыр.
Бірнеше жылдан бері Қызылорда облысында орын алып отырған су тапшылығы салдарынан шаруалар егістікке су сорғыларын қолдануға мәжбүр. Бұл қадам жанар-жағар майды жоспарлаған көлемнен артық қолдануға алып келіп отыр. Қызылорда облысы кәсіпкерлер палатасы алаңында өткен бас қосуда осы және өзге де мәселелер қаралды.
Шараға облыстық және қала, аудандық ауыл шаруашылығына жауапты мемлекеттік орган басшылары мен облыстық экономикалық тергеп-тексеру департаментінің лауазымды тұлғалары, жанар-жағар май таратушы операторлар, сондай-ақ ауыл шаруашылығы саласында қызмет көрсететін кәсіпкерлер қатысты.
Отырыста облыстық ауыл шаруашылығы және жер қатынастары басқармасы басшысының орынбасары Қайратбек Сәрсенбаев Қазақстан Республикасының Энергетика министрлігі мен ауыл шаруашылығы министрлігі тарапынан жыл сайын облыс көлемінде егілетін ауыл шаруашылығы дақылдарының егіс көлеміне сәйкес, көктемгі дала жұмыстары және күзгі егін жинау науқанын жүргізу үшін жергілікті тауар өндірушілерге кепілді бағамен арзандатылған дизель отыны бөлініп жатқанын жеткізді.
Сала басшысының айтуынша, арзандатылған дизель отынының қажетті көлемі «Ы.Жақаев атындағы Қазақ күріш шаруашылығы ҒЗИ» ЖШС ұсынған ауыл шаруашылығы дақылдарының 1 гектарына жұмсалатын өндірістік шығындар нормативіне және орналастырылатын егіс көлеміне сәйкес нақтыланады екен.
Биыл көктемгі және күзгі дала жұмыстарын жүргізу үшін облысқа 24,3 мың тонна жанар-жағар май бөлінген. Бұл өткен жылмен салыстырғанда 1 000,0 тоннаға кем.
Қызылорда қалалық және аудан әкімдіктерінің ұсыныстарына сәйкес, осы жылы ауыл шаруашылығы тауар өндірушілеріне бөлінген дизель отынын жеткізіп беруге облысқа бірнеше оператор белгіленген. Олар «Нефтьтранс-Қызылорда» ЖШС, «РК Мұнай» ЖШС, «Жаңақорған OIL» ЖШС, «Petro Retail» ЖШС және «Қызылорда Мұнай Өнімдері» ЖШС-тері.
Кездесуде Қайратбек Сәрсенбаев проблеманы да жеткізді.
<blockquote>
 «Арзандатылған дизель отынын жеткізуші операторларды бекіту, дизель отынының көлемін операторлар бөлінісінде нақтылау, облыстағы операторлардың шектік санын және операторларды бекітетін органды айқындау тәртібі қандай да бір нормативтік құқықтық актімен реттелмеген. Жұмысты ұйымдастыру барысында осы жағдай қиындықтар тудырып отыр. Жергілікті атқарушы орган ретінде біз орталықтағы жауапты мемлекеттік мекемелерге ұсынысымызды беріп жатырмыз», – деді облыстық ауыл шаруашылығы және жер қатынастары басқармасы басшысының орынбасары Қайратбек Сәрсенбаев.
</blockquote>
Шараға қатысқан шаруалар өңірде жанар-жағар май алуда айтарлықтай қиындықтар жоқ екенін, жұмыс жүйелі ұйымдастырылғанын жеткізе келе өңірдің ерекшелігіне орай туындап отырған мәселені ортаға салды.
<blockquote>
 «Көктемгі егіс пен күзгі егінді жинау кезіне қажетті жанар-жағар майды уақытылы алып отырмыз. Дегенмен, қазір өңірдегі су тапшылығын барлығыңыз да білесіздер. Мәселені шешу үшін су сорғыларын пайдалануға мәжбүрміз. Салдарынан белгіленген көлемнен артық жанар-жағар май пайдаланамыз. Әсіресе, жаз мезгілінде бақшалық дақылдарға, басқа да технологиялық процестерге қажетті жанар-жағар майды там-тұмдап, әзер жеткізетін кезіміз болады. Осы жағын ескерулеріңізді сұраймын», – деді «Жаңажол» ЖШС директоры Орынбасар Төлепов.
</blockquote>
Кәсіпкердің ұсынысын Кәсіпкерлер палатасының директоры Пірмұхаммед Сыздықов та қолдады.
<blockquote>
 «Кәсіпкерлердің айтып отырғаны орынды. Расымен де, дақылға және технологиялық процестерге кететін жанар-жағар майдың нормативін мамандармен қайта қарау керек. Ол үшін облыстық ауыл шаруашылығы және жер қатынастары басқармасы, қала, аудандағы саладағы әріптестеріміз және «Ы.Жақаев атындағы Қазақ күріш шаруашылығы ҒЗИ» ЖШС өкілдерімен жақын күндері кездесіп, осы мәселені талқылауды ұсынамын. Биылға үлгермейтініміз анық. Дегенмен, бұл мәселе келесі жылы да өзекті екенін ескерсек, қазірден есеп-қисабымызды сайлай бергеніміз жөн», – деді Пірмұхаммед Сыздықов.
</blockquote>
Басқосуда облыс бойынша экономикалық тергеп-тексеру департаменті Жедел басқармасының басшысы Ахылхан Ермаханов жанар-жағар майдың бағасына немесе жетіспеушілігіне байланысты заңбұзушылық фактісі орын алған жағдайда кәсіпкерлердің экономикалық тергеу органдарына тікелей жүгіне алатынын жеткізді.
Шара қорытындысымен Кәсіпкерлер палатасы ауыл шаруашылығы басқармасымен бірлесе отырып алдағы жылға бөлінетін жанар-жағар май көлемін қайта қарауға және бұл жұмыстарды реттеуге арналған ереже қабылдауға қатысты орталықтағы мемлекеттік органдармен бірге жұмыс жасауға келісті.
<img src="https://kyzylorda-news.kz/wp-content/uploads/2022/08/img_7552-scaled.jpg" alt="" />

Қызылордалық шаруалардың айтары бар

<a href="https://kyzylorda-news.kz/">Kyzylorda-news.kz.</a> Қызылорда облысы прокурорының орынбасары болып әділет кеңесшісі Дүйсенбаев Нұрболат Серікұлы тағайындалды.
Дүйсенбаев Нұрболат Серікұлы прокуратура органдарындағы қызметін 2005 жылы Қызылорда қаласы прокурорының көмекшісі лауазымынан бастаған.
Әрі қарай Қызылорда қалалық прокуратурасының бөлім бастығы, облыстық прокуратурасының бөлім бастығы, облыстық прокуратурасының басқарма бастығының орынбасары, Жаңақорған ауданының прокуроры қызметтерін атқарған.
2019 жылдан бастап бүгінгі күнге дейін Шиелі ауданының прокуроры лауазымын атқарған.

Қызылорда облысы прокурорының орынбасары тағайындалды

<a href="https://kyzylorda-news.kz/">Kyzylorda-news.kz.</a>&nbsp;ҚР Цифрлық даму, инновациялар және аэроғарыш өнеркәсібі министрі Бағдат Мусин Қызылорда қаласының №3 қалалық емханасына барды. Емхананы аралау барысында Бағдат Мусин дәрігерлермен әңгімелесіп, ақпараттық жүйелерде жұмыс істеуде қандай мәселелерге тап болатынын сұрап білді.
Медицина мекемесін аралау барысында министр маммография кабинетіне өтіп, маммографиялық аппараттың PACS жүйесіне қалай қосылғанымен таныс болды.
Аталған жүйе пациенттің ауруының тарихын бірнеше дәрігердің бір жүйеден көруіне және уақытты барынша үнемдеуге көмек береді.
PACS жүйесі Қызылорда облысының 13 медициналық ұйымына енгізілген.
Министр сондай-ақ, облыстық денсаулық сақтау басқармасы медициналық ұйымдармен тығыз жұмыс істеп, цифрландыру бағытында жұмыстарды күшейту қажеттігін атап өтті.
Бұдан кейін Цифрлық даму министрі Қызылорда қаласының халыққа қызмет көрсететін цифрлық кеңсенің жұмысымен танысты.
Аталған цифрлық кеңседе 2022 жылдың 6 айында азаматтарға 22 129 мемлекеттік қызмет көрсетілген.
Цифрлық даму министрі Бағдат Мусин түстен кейін Қызылорда қаласындағы “Достық үйінде” өңір тұрғындарымен кездесіп олардың сұрақтарына жауап береді.
<img src="https://kyzylorda-news.kz/wp-content/uploads/2022/08/298199546_1179422285949173_1282058041622668058_n.jpg" alt="" />
<img src="https://kyzylorda-news.kz/wp-content/uploads/2022/08/298198751_1179422232615845_8185974733487422753_n.jpg" alt="" />

Цифрлық даму министрі Бағдат Мусин Қызылорда облысына іссапармен келді

<a href="https://kyzylorda-news.kz/">Kyzylorda-news.kz.</a>&nbsp;«Қарасора-2022» іс-шарасы барысында қызылордалық полицейлермен 10 мың түптен аса сора өсімдігі жойылды.
Биылғы жылдың 1 маусым – 30 қазан аралығында «Қарасора-2022» кең ауқымды арнайы жедел-профилактикалық іс-шарасы өткізілуде. Осыған орай, қарасораның егістерін анықтаудың және жоюдың іс-әрекеттерін іске асыру үшін, жергілікті құқық қорғау, атқарушы органдардың өкілдерімен жұмыс кездесуі ұйымдастырылып, арнайы жоспарлар бекітілді.
Іс-шараның мақсаты – есірткі заты бар өсімдіктерді өсіп-баптаудың алдын алу, героин трафигін жою, сондай-ақ есірткі, оның ішінде жаңа түрлерін таратумен айналысатын ұйымдасқан қылмыстық топтардың қызметіне тосқауыл қоюға бағытталған.
Атқарылған ауқымды іс-шаралар нәтижесінде барлығы 54 есірткі қылмысы тіркелді. Оның ішінде есірткі өсірудің 36 дерегі, есірткіні аса ірі мөлшерде сақтаудың 2 дерегі және есірткі сатудың 3 дерегі анықталды. Есірткі өсіргені үшін барлығы 44 күдікті ұсталса, оның 13-і қамаққа алынды. 
Оқиға орнынан 10 мың түптен аса сора өсімдігі жойылды, заңсыз айналымнан 23 кг жуық марихуана және 5 гр аса синтетикалық есірткі заты тәркіленді.
Мысалы, 7 тамыз күні Шиелі ауданында үйінің ауласына 41түп биіктігі 65-70 см болатын сора өсімдігін еккені үшін 46 жастағы аудан тұрғыны құрықталды. Сараптама қорытындысына сәйкес заттай дәлелдеме ретінде алынған зат жалпы салмағы 5 кг жуық сора өсімдігі болып шықты. Күдікті Шиелі аудандық полиция бөлімінің уақытша ұстау изоляторына оқшауландырылды.
Аталған дерек бойынша Қазақстан Республикасы Қылмыстық кодексінің 300 – бабының 2 – бөлігімен (ірі мөлшерде құрамында есірткі заттар бар, өсіруге тыйым салынған өсімдіктерді заңсыз егіп-өсіру) сотқа дейінгі тергеп-тексеру әрекеттері жүргізілуде.
Қазіргі уақытта далалық аймақтардан ірі көлемдегі есірткі алқабын анықтау мақсатында топтар құрылып, шолу жұмыстары жүргізілуде.
<img src="https://kyzylorda-news.kz/wp-content/uploads/2022/08/whatsapp-image-2022-08-08-at-09.52.42.jpeg" alt="" />

«Қарасора-2022»: Қызылордадад 10 мың түптен аса сора өсімдігі жойылды

<a href="https://kyzylorda-news.kz/">Kyzylorda-news.kz.</a> Қызылорда облысы прокурорының бірінші орынбасары болып аға әділет кеңесшісі Төлегенов Исламбек Тынарбайұлы тағайындалды.
Төлегенов Исламбек Танырбайұлы прокуратура органдарындағы қызметін 1998 жылы Қызылорда облысы Жалағаш ауданы прокурорының көмекшісі лауазымынан бастаған.
Әрі қарай Қызылорда қалалық прокуратурасының бөлім бастығы, облыстық прокуратураның басқарма бастығының орынбасары, Сырдария, Шиелі аудандарының прокуроры, Қызылорда қаласы прокурорының орынбасары, облыстық прокуратураның кадр жұмысы басқармасының бастығы, Бас Прокурордың аға көмекшісі қызметтерін атқарған.
2020 жылдан бастап бүгінгі күнге Қазақстан Республикасы Бас прокуратурасының өтініштермен жұмыс және іс жүргізу департаментінің Азаматтарды жеке қабылдау басқармасының бастығы лауазымын атқарған.
Прокуратура органдарындағы еңбек өтілі 24 жылдан астам.

Қазақстан және Қызылорда облысының жаңалықтары