<a href="https://kyzylorda-news.kz/">Kyzylorda-news.kz</a> &nbsp;Қызылорда облыстық балалар ауруханасында жаңа Конституция жобасын түсіндіруге арналған кездесу өтті. Жиынға «Әділетті және Прогрессивті Қазақстанның Халықтық Конституциясы үшін!» Жалпыұлттық коалициясының өкілдері Балжан Шәменова, Әбіләзім Әбдіғабит, Гүлстан Мақсутова, Гүлнар Есқалиева, Динара Ибадуллаева қатысып, медицина қызметкерлерімен еркін форматта пікір алмасты.Кездесуде 2026 жылғы 15 наурызға жоспарланған республикалық референдум және Конституция жобасында қарастырылған негізгі өзгерістер сөз болды. Әсіресе денсаулық сақтау саласына қатысты нормаларға назар аударылды.Мәселен, коалиция мүшесі Әбіләзім Әбдіғабит жаңа жобада адам өмірі, денсаулығы және қадір-қасиеті басты құндылық ретінде көрсетілгенін айтты. Сонымен қатар «Заң және тәртіп» қағидатының енгізілуі құқықтық мәдениетті нығайтуға бағытталғаны жеткізілді.Коалиция мүшесі Балжан Шәменова мемлекет тұрақтылығының негізі ретінде егемендік, аумақтық тұтастық және унитарлық құрылым қағидаттары айқындалғанын атап өтті. Сондай-ақ ол жаңа Ата заң жобасындағы басқару жүйесінің теңгерімділігі мен қоғам мен мемлекет арасындағы ашық диалогты дамыту мәселелері бойынша пікірін білдірді.Гүлстан Мақсутова білім, ғылым және адами капиталды дамытуға басымдық берілгенін атап өтіп, заңдарға кері күш беруге тыйым салу құқықтық тұрақтылықты қамтамасыз ететінін айтса, Динара Ибадуллаева қауіпсіздік ұғымының кеңейтілгенін, соның ішінде жеке деректерді қорғау мен электрондық ақпараттың құпиялылығына қатысты нормалар қамтылғанын жеткізді.Жиын соңында дәрігерлер мен орта буын қызметкерлерінің сауалдарына жауап беріп ұжымды Ата заңды қолдап, референдумға қатысуға шақырды.&nbsp;

Коалиция мүшелері балалар ауруханасы ұжымын референдумға қатысуға шақырды

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінде БҰҰ-Әйелдер ұйымының Орталық Азия бойынша байланыс кеңсесінің басшысы, Қазақстандағы Өкілдігінің жетекшісі Джерен Гювеннің қатысуымен «Әйелдер мен қыздардың әділдікке тең қол жеткізуі: онлайн және офлайн кеңістікте» тақырыбында панельдік дискуссия өтті.Кездесуді Басқарма төрағасы–Ректор Наурызбай Байқадамов ашып, университеттің жетістіктері мен әйелдердің білім мен ғылымдағы рөлін атап өтті. Қазіргі таңда оқу орнында 1047 қызметкер еңбек етсе, оның 726-сы, яғни 70%-ы – әйелдер. Ал 11 мыңнан астам студенттің 7533-ін (65%) қыздар құрайды.<blockquote>«Бұл көрсеткіштер әйелдердің кәсіби және академиялық кеңістіктегі белсенділігін, олардың ғылым мен білімдегі әлеуетінің жоғары екенін көрсетеді. Біздің қыздарымыз тек білімде ғана емес, спортта да табысқа жетіп келеді. Университетімізде 2 халықаралық дәрежедегі спорт шебері, 13 ҚР спорт шебері және 21 спорт шеберлігіне кандидат білім алуда», – деді ректор.</blockquote>Өз кезегінде Джерен Гювен университетпен алдағы уақытта бірлесіп, академиялық бағытта серіктестік орнатуға ниетті екенін атап өтті. Ол Қызылордадағы алғашқы серіктес ретінде Қорқыт ата университетімен жұмыс жасауға қызығушылық білдірді.Дискуссия барысында Джерен Гювен «Серіктестік пен ықпал арқылы гендерлік теңдікті ілгерлету» тақырыбында баяндама жасап, БҰҰ Әйелдер құрылымының Еуропа және Орта Азия бойынша 18 ел мен аумақты қолдайтынын, сондай-ақ гендерлік теңдік пен зорлық-зомбылықтың алдын алу бағытында жүргізіліп жатқан жұмыстарды баяндады.<img src="https://knadmin.beoblood.kz/uploads/or_yt_ata_universitetinde_jelder_men_yzdardy_dildikke_te_ol_zhetkizui_ta_yrybynda_paneldik_diskussiya_tti_1_536b575bd7.jpg" alt="Қорқыт ата университетінде «Әйелдер мен қыздардың әділдікке тең қол жеткізуі» тақырыбында панельдік дискуссия өтті 1.jpg">Іс-шара аясында Ғылыми жұмыстар және халықаралық байланыстар жөніндегі проректор Майнура Бурибаева университеттегі ғылыммен айналысып жүрген әйелдердің жетістіктеріне тоқталды. Оның айтуынша, 2026 жылы ректор грантын иеленген 20 адамның 15-і нәзік жанды, ал орындалып жатқан 23 ғылыми жобаның 60%-ында қыз-келіншектер жұмыс істейді.Панельдік пікірталаста Құқықтану білім беру бағдарламасы бойынша аға оқытушы, заң ғылымдарының кандидаты Ляззат Қаржаубаева «Гендерлік теңсіздік мәселелері» тақырыбында баяндама жасады. Сонымен қатар, «Қызжібек» студенттік ұйымының өкілдері мен студенттер «Сталкингтің көрінбейтін шекарасы» тақырыбында өз ойларын ортаға салды.Жиын интерактивті форматта өтіп, қатысушылар әйелдердің құқықтары мен әділеттілікті қолдауға арналған өз ойларын тақтаға жазды. Іс-шара студенттердің нәзік жанды аруларға арналған әнімен қорытындыланды.

Қорқыт ата университетінде «Әйелдер мен қыздардың әділдікке тең қол жеткізуі» тақырыбында панельдік дискуссия өтті

<a href="https://kyzylorda-news.kz/">Kyzylorda-news.kz</a> Қызылорда қаласында жолаушылар тасымалы саласындағы тәртіпті күшейту мақсатында 21-25 ақпан аралығында «Тасымалдаушы» жедел профилактикалық іс-шарасы өткізілді.Бұл туралы Өңірлік коммуникациялар қызметінің баспасөз алаңында облыстық Полиция департаментінің Әкімшілік полиция қызметі басқармасының бастығы Мұратбек Манатов мәлімдеді.Іс-шараға Полиция департаментінің 445 қызметкері мен өзге де салалардан 15 маман жұмылдырылып, 134 бағыт бойынша мобильді топтар жұмыс жүргізді.<blockquote>"Профилактикалық іс-шарасы нәтижесінде 1436 әкімшілік хаттама рәсімделді. Атап айтқанда, қоғамдық орындарда такси қызметін заңсыз ұйымдастырудың 232 дерегі, рұқсатсыз қызмет көрсетудің 31 жағдайы, жолаушылар тасымалдау қағидаларын бұзудың 165 фактісі тіркелген. Бұдан бөлек, Қазалы, Шиелі аудандары мен Қызылорда қаласындағы автобус парктері жеті рет тексеріліп, бес құқық бұзушылық анықталды. 111 автокөлік айып тұрағына қойылып, 306 көліктің мемлекеттік тіркеу белгілері алынды. Облыс көлемінде жолаушы тасымалымен айналысатын көліктер тарапынан жол қозғалысы қауіпсіздігін қамтамасыз етуге бағытталған мұндай жедел-профилактикалық іс-шаралар алдағы уақытта да жалғасады, – деді Мұратбек Мейрамбекұлы.</blockquote><img src="https://knadmin.beoblood.kz/uploads/yzylordada_zholaushylar_tasymalyna_ba_ylau_k_shejtildi_60ca3accab.jpg" alt="Қызылордада жолаушылар тасымалына бақылау күшейтілді.jpg">Фото: Нұрболат Нұржаубай

Қызылордада жолаушылар тасымалына бақылау күшейтілді

<a href="https://kyzylorda-news.kz/">Kyzylorda-news.kz</a> Денсаулық – адам өміріндегі ең басты байлықтардың бірі. Денсаулығы мықты адам ғана өз мақсатына жетіп, өмірде белсенді бола алады. Ал денсаулықты сақтаудың ең тиімді жолдарының бірі – спортпен айналысу.Спорт адам ағзасын шынықтырады, денені сергек ұстайды және түрлі аурулардың алдын алады. Таңертеңгі жаттығу жасау, жүгіру, жүзу, футбол ойнау немесе кез келген дене белсенділігі адам денсаулығына пайдалы. Спортпен шұғылданатын адамның көңіл күйі де жақсы болады.Қазіргі заманда технологияның дамуына байланысты адамдардың қозғалысы азайып барады. Көп уақыт телефонға немесе компьютерге үңіліп отыру денсаулыққа кері әсер етеді. Әсіресе жастар арасында бұл мәселе жиі кездеседі. Сондықтан спортты күнделікті өмірдің бір бөлігіне айналдыру маңызды.Қазақтың белгілі ақыны Мағжан Жұмабаев жастар тәрбиесіне ерекше мән берген. Оның «Мен жастарға сенемін» атты өлеңі жастарды мықты, білімді, жігерлі болуға үндейді. Бұл ой қазіргі жастарды спортпен айналысып, денсаулығын күтуге де жігерлендіреді.Спорт тек денсаулықты жақсартып қана қоймайды, адамды тәртіпке, төзімділікке және табандылыққа үйретеді. Жарыстарға қатысу арқылы адам жеңісті де, жеңілісті де дұрыс қабылдауды үйренеді.Елімізде спортты дамытуға үлкен көңіл бөлінуде. Түрлі спорт кешендері салынып, халықаралық жарыстарда спортшыларымыз ел намысын қорғап жүр. Бұл жастарға үлкен үлгі береді.Спорт – салауатты өмір салтының негізі. Денсаулықты сақтау әр адамның өз қолында. Сондықтан спортпен айналысып, денсаулықты күту – әр адамның маңызды міндеті.Назым Әбілхай,Қорқыт ата атындағы Қызылорда университетінің 4-курс студентіФото: freepik.com

Спорт – денсаулық кепілі

<a href="https://kyzylorda-news.kz/">Kyzylorda-news.kz</a> Бейбітшілік – әрбір елдің арманы, әрбір адамның қалауы. Бейбіт өмір бар жерде даму бар, береке бар, болашаққа деген сенім бар. Бейбітшілікті сақтау – барша адамзаттың ортақ міндеті.Қазіргі таңда әлемнің кейбір елдерінде түрлі қақтығыстар орын алып жатыр. Мұндай жағдайлар бейбіт өмірдің қаншалықты маңызды екенін дәлелдейді. Бейбіт елде өмір сүріп жатқан адамдар оның қадірін білуі керек.Қазақстан – бейбітшілік пен келісімді басты орынға қоятын мемлекет. Елімізде түрлі ұлт өкілдері тату-тәтті өмір сүріп келеді. Бұл – халқымыздың кеңпейілділігі мен бірлігінің нәтижесі. Тыныштық бар жерде халық еркін еңбек етіп, білім алып, болашаққа жоспар құра алады.Бейбітшілік туралы терең ой айтқан ақындардың бірі – Олжас Сүлейменов. Ол өз шығармаларында адамзаттың бірлігі мен татулығын насихаттап, соғысқа қарсы көзқарасын білдірген. Ақын бейбіт өмірдің адамзат үшін ең үлкен бақыт екенін атап өткен.Бейбітшілікті сақтау тек мемлекет басшыларының ғана емес, әрбір азаматтың міндеті. Адамдар бір-біріне құрметпен қарап, татулықты сақтаса, қоғамда тұрақтылық орнайды.Жастар да бейбітшіліктің қадірін түсінуі керек. Олар елін сүйіп, қоғамдағы келісімді нығайтуға атсалысуы қажет. Білім алып, ел дамуына үлес қосу – бейбіт елдің жастарына жүктелетін маңызды міндет.Бейбітшілік – баға жетпес байлық. Оны сақтау және бағалау – әр адамның борышы. Бейбіт елдің болашағы әрқашан жарқын болады.Назым Әбілхай,Қорқыт ата атындағы Қызылорда университетінің 4-курс студенті

Бейбітшілік – адамзаттың ең асыл құндылығы

<a href="https://kyzylorda-news.kz/">Kyzylorda-news.kz</a> Қызылорда қаласындағы «Келешек мектебінде» «Әділетті және Прогрессивті Қазақстанның Халықтық Конституциясы үшін!» жалпыұлттық коалициясы өкілдерінің қатысуымен жаңа Конституция жобасын таныстыруға арналған кездесу өтті. Жиынға мектеп педагогтары мен қызметкерлері қатысып, 2026 жылғы 15 наурызда өтетін республикалық референдумға қатысты ақпарат тыңдады.Кездесуге коалиция мүшелері Гүлшат Мұсаева, Дәурен Сейтжанов, Мұрат Жұмаділдаев, Талғат Телеубаев және Берік Шайнұров қатысты. Олар жаңа Конституция жобасының негізгі қағидаттары мен мақсаттарын түсіндіріп, білім беру жүйесіне қатысты өзгерістерге назар аударды.<blockquote>«Жаңа Конституция жобасының негізгі идеясы – адам құқықтары мен қадір-қасиетіне бағытталған. Білім беру – осы қағидатты жүзеге асыратын басты институттардың бірі. Мектептерде сапалы білім беру арқылы елдің интеллектуалдық әлеуеті қалыптасады», – деді Гүлшат Мұсаева.</blockquote>«Respublica» партиясы Қызылорда облыстық филиалының төрағасы Дәурен Сейтжанов адами капиталға мән берілгенін атап өтіп, білім сапасын арттыруға арналған нормаларды түсіндірді. Заңдарға кері күш беруге тыйым салу құқықтық тұрақтылықты қамтамасыз етеді, бұл педагогтарға сенімді жоспар құруға мүмкіндік береді.Коалиция мүшесі Мұрат Жұмаділдаев ұлттық бірегейлік пен мемлекеттік тұтастыққа тоқталып, зайырлылық қағидаты білім беру саласының бейтараптығын сақтауға көмектесетінін тілге тиек етті.«Қазақстан Халық партиясы» Қызылорда облыстық филиалының мүшесі Талғат Телеубаев цифрлық қауіпсіздік пен жеке деректерді қорғауға қатысты нормаларды түсіндірді.<blockquote>&nbsp;“Кінәсіздік презумпциясы мен әділ сот қағидаттарының күшеюі құқықтық мәдениетті арттырады”, – деді.</blockquote>Коалиция мүшесі Берік Шайнұров Конституция жобасының кең қоғамдық талқылау негізінде әзірленгенін айтып, халықтың ұсыныстары ескерілгенін атап өтті.Жиында мектеп ұжымы жаңа Конституция жобасының негізгі бағыттарымен танысып, толғандырған сауалдарына жауап алды.Фото: Келешек мектебі

Жаңа Конституция – білім беру жүйесін ілгерілетудің негізі

<a href="https://kyzylorda-news.kz/">Kyzylorda-news.kz</a>&nbsp; «Әділетті және Прогрессивті Қазақстанның Халықтық Конституциясы үшін!» коалициясының аумақтық мүшелері Мұрат Тұрабаев, Қабілеш Бекішев, Жібек Баймұратова, Даурен Досмағанбетов, Қанат Жүсіпов және Гүлнара Тымбаулиева «KAP Logistics» ЖШС қызметкерлерімен кездесу өткізді.Кездесу барысында коалиция мүшелері еңбек ұжымымен пікір алмасып, Қазақстан Республикасының жаңа Конституция жобасының негізгі бағыттары мен мазмұны туралы кеңінен ақпарат берді. Сондай-ақ жаңа Конституция жобасының елдің саяси жүйесін жаңғыртуға, азаматтардың құқықтары мен бостандықтарын қорғауды күшейтуге, әлеуметтік әділеттілікті қамтамасыз етуге және мемлекет пен қоғам арасындағы жауапкершілікті арттыруға бағытталғаны айтылды.Жиында сөз алған коалиция мүшелері Конституциялық реформаның маңыздылығына тоқталып, бұл құжат Қазақстанның тұрақты дамуына, құқықтық мемлекет қағидаттарын нығайтуға және қоғамдық келісімді одан әрі дамытуға мүмкіндік беретінін атап өтті. Сонымен қатар азаматтардың конституциялық құқықтарын қорғау, мемлекеттік басқару жүйесін жетілдіру және қоғамдағы ашықтық пен әділдікті қамтамасыз ету мәселелері жаңа Конституция жобасында кеңінен қамтылғаны түсіндірілді. Кездесуде «Әділетті және Прогрессивті Қазақстанның Халықтық Конституциясы үшін!» коалициясының аумақтық жетекшісі Мұрат Тұрабаев жаңа Конституция жобасының елдің саяси және құқықтық жүйесін жетілдіруге бағытталған маңызды құжат екенін атап өтті. Оның айтуынша, жаңа Конституция жобасы азаматтардың құқықтары мен бостандықтарын қорғауды күшейтіп, әлеуметтік әділеттілікті қамтамасыз етуге және мемлекет басқару жүйесінің тиімділігін арттыруға мүмкіндік береді. Сондай-ақ бұл құжат қоғам мен мемлекет арасындағы жауапкершілікті арттырып, елдің тұрақты дамуына берік негіз қалайды. Мұрат Өскенбайұлы өз сөзінде жаңа Конституция жобасы халықтың талап-тілектері мен ұсыныстарын ескере отырып әзірленгенін айтып, алдағы республикалық референдумға белсенді қатысу әрбір азаматтың азаматтық жауапкершілігі екенін жеткізді. Сонымен қатар ол жаңа Конституция Қазақстанның демократиялық даму жолын нығайтып, құқықтық мемлекет қағидаттарын одан әрі жетілдіруге ықпал ететінін атап өтті.Шара соңында «KAP Logistics» ЖШС қызметкерлері өз пікірлерін білдіріп, ұсыныстарын ортаға салды. Кездесу ашық диалог форматында өтіп, коалиция мүшелері тарапынан қойылған сұрақтарға жан-жақты жауап берілді. Сонымен қатар қатысушылар ел болашағы үшін маңызды саяси науқанға белсенді қатысу қажеттігін атап өтті.Фото: «KAP Logistics» ЖШС

Коалиция мүшелері еңбек ұжымымен  кездесті

<a href="https://kyzylorda-news.kz/">Kyzylorda-news.kz</a> Сыр өңірінің әлеуметтік-экономикалық дамуына өлшеусіз үлес қосқан мемлекет және қоғам қайраткері Нәлқожа Ақбалаұлы Ергешбаевты еске алуға арналған тоғызқұмалақтан халықаралық турнирдің салтанатты ашылу рәсімі өтті.Тағылымы мол шараға облыс әкімінің бірінші орынбасары Данияр Еренғалиұлы, облыстық ардагерлер кеңесінің төрағасы Серік Дүйсенбаев, облыстық мәслихаттың тұрақты комиссия төрағасы Бауыржан Сәндібаев, қалалық ардагерлер кеңесінің төрағасы Өмірбек Шәменов, Қазақстанның Еңбек Ерлері Абзал Ералиев пен Имамзада Шағыртаев, облыстық мәслихат депутаты Жорабек Нұрымбетов, «Тоғызқұмалақ спорты федерациясы» заңды тұлғалар бірлестігінің вице-президенті, ұлттық құраманың бас жаттықтырушысы Айнұр Жақапбаева, Қожа Ахмет Яссауи университетінің «Халықаралық Түркі зияткерлік ойындар» орталығының басшысы, халықаралық дәрежедегі төреші Қашымхан Дәуренқұлов, Қызылорда облыстық тоғызқұмалақ зияткерлік қауымдастығының президенті Әбдіқадыр Ергешбаев қатысты.Салтанатты жиында &nbsp;сөз алған облыс әкімінің бірінші орынбасары Данияр Еренғалиұлы Нәлқожа Ақбалаұлының өнегелі ғұмыр жолы мен аймақ дамуына сіңірген елеулі еңбегіне тоқталды.<blockquote>— Аймағымыздың өркендеуіне бар күш-жігерін арнап, ел игілігі жолында аянбай қызмет еткен азаматтардың есімін ұлықтау – баршамызға ортақ парыз. Нәлқожа Ақбалаұлы – саналы ғұмырын халық игілігіне арнаған, жастардың білімді де бәсекеге қабілетті болып қалыптасуына айрықша көңіл бөлген бірегей тұлға. Оның бастамасымен өңірімізде бірқатар спорт нысандары мен мәдениет ошақтары бой көтерді. Бүгінгі дәстүрлі халықаралық турнир – сол еңбектің жарқын жалғасы деп білемін. Бүгінгі додада нағыз мықты спортшылар топ жарып, жеңіс тұғырынан көрінеді деп сенемін, — деді облыс әкімінің бірінші орынбасары.&nbsp;</blockquote>Сондай-ақ жиын барысында зиялы қауым өкілдері мен құрметті қонақтар құттықтау сөз сөйлеп, жарысқа қатысушыларға жеңіс тіледі. &nbsp;Айта кетейік, дәстүрге айналған халықаралық турнир биыл тоғызыншы рет ұйымдастырылып отыр. Байрақты бәсекеге Қырғызстан, Әзірбайжан, Түрікменстан, Ауғанстан мемлекеттерінен және еліміздің барлық өңірінен келген 450-ге жуық спортшы өзара сайысады.7-ші наурызға дейін жалғасатын жарыс қорытындысы бойынша жеңімпаздар мен жүлдегерлер арнайы медальдар және дипломдармен марапатталады.<img src="https://knadmin.beoblood.kz/uploads/To_yz_mala_respublikaly_turnir_2_1152ae4665.jpg" alt="Тоғызқұмалақ республикалық турнир 2.jpg">

Тоғызқұмалақтан халықаралық турнир басталды

<a href="https://kyzylorda-news.kz/">Kyzylorda-news.kz</a> Қазақстан Республикасы Ішкі істер министрлігінің нұсқаулығына сәйкес 28 ақпан – 2 наурыз аралығында республикалық «Жасөспірім» жедел-профилактикалық іс-шарасы басталды.Іс-шараның негізгі мақсаты – жасөспірімдер қылмысының алдын алу, кәмелетке толмағандар тарапынан кешкі және түнгі уақытта жасалатын құқық бұзушылықтардың жолын кесу, олардың құқықтарын қорғау саласындағы әкімшілік құқық бұзушылықтарды анықтау, сондай-ақ балаларға қатысты қылмыстық қол сұғушылықтардың алдын алу.Іс-шараның екі күнінің қорытындысымен барлығы 221 әкімшілік хаттама рәсімделді. 12 кәмелетке толмаған ішкі істер органдарының есебіне алынды. Қадағалаусыз және панасыз қалған 1 жасөспірім кәмелетке толмағандарды бейімдеу орталығына орналастырылды.Әкімшілік құқық бұзушылықтар бойынша:• ҚР ӘҚБтК-нің 127-бабы (ата-аналардың немесе заңды өкілдердің бала тәрбиесі жөніндегі міндеттерін орындамауы) бойынша 19 ата-анаға хаттама толтырылды.• 127-2-бап (кәмелетке толмаған адамды жәбірлеу – буллинг, кибербуллинг) бойынша 1 дерек анықталып, ата-анасына хаттама рәсімделді.• 132-бап (кәмелетке толмағандардың түнгі уақытта ойын-сауық мекемелерінде болуына жол беру) бойынша 15 құқық бұзушылық анықталып, мекеме иелері мен әкімшілік өкілдеріне шара қолданылды.• 423-1-бап (21 жасқа толмаған адамдарға темекі және темекі бұйымдарын сату) бойынша 1 дерек тіркелді.• 435-бап (кәмелетке толмағанның ұсақ бұзақылығы) бойынша 2 дерек анықталып, заңды өкілдеріне хаттама толтырылды.• 437-бап (түнгі тыныштықты бұзу) бойынша 3 дерек тіркелді.• 442-бап (кәмелетке толмағандардың түнгі уақытта заңды өкілдерінсіз жүруі) бойынша барлығы 175 жасөспірім анықталып, олардың заңды өкілдеріне әкімшілік хаттамалар рәсімделді.Сонымен қатар, кәмелетке толмағандарды тәрбиелеу, оқыту және бағып-күту жөніндегі міндеттерін тиісінше орындамайтын 15 ата-ана профилактикалық есепке алынды.

Республикалық «Жасөспірім» жедел-профилактикалық іс-шарасы өтуде

<a href="https://kyzylorda-news.kz/">Kyzylorda-news.kz</a> Ғасырлық тарихы бар, бүгінде мыңнан астам адам еңбек ететін “Аралтұз” АҚ ұжымы жаңа конституцияны қолдайтынын мәлімдеді.Зауыт директорының жалпы сұрақтар бойынша орынбасары Ғани Сисекешов мемлекетіміздің болашағы мен дамуы баршаға ортақ құндылық екенін атап өтті.<blockquote>“Арал өңірінде көп жылдан бері еңбек етіп келе жатқан бір ғасырлық тарихы бар жауапты әлеуметтік компаниямыз. Елдің болашағы барлығымыздың жауапкершілігімізден тұратынын түсінеміз. Референдумға қатысу бұл - жай ғана рәсім емес, бұл - азаматтық кемелдік пен жауапкершілік көрінісі. Бұл - Қазақстанның тұрақтылық пен өркендеуіне қосатын үлес. Әділетті Қазақстан - халық тілегі. Бұл - біздің болашағымыз. Жаңа конституцияны қолдаймыз” - деді ол.</blockquote>Зауыт директорының орынбасары Бержан Рысмамбетов “Аралтұз” жүз жыл бойында елмен бірге даму барысында түрлі кезеңдерден өткенін жеткізді. Оның айтуынша, күрделі уақыттардан сенімді өрлеуге дейінгі әр кезеңде компания тұрақтылығының негізі - заң үстемдігі, тәртіп және болашақ алдындағы ортақ жауапкершілік болған.<blockquote>“Бүгін біз Республикалық Референдумды қолдаймыз. Конституция мемлекеттің берік іргетасы, бұл - әрбір азаматтың құқықтары мен бостандықтарының кепілі. Бұл - әділетті қоғам мен тұрақты дамудың негізі”, - дейді Бержан Рысмамбетов.</blockquote>Зауыттың Еңбекті қорғау және өнеркәсіптік қызметінің аға инженері Гаухар Рысмаханова алдағы референдум ел тарихындағы елеулі оқиға екенін жеткізді.<blockquote>“Біз “Аралтұз” ұшымы 15 наурызда өткізілетін республикалық референдумды әрбір азаматтың тарихи таңдауы және ел тағдырына тікелей әсер ететін маңызды кезең деп есептейміз”, - дейді ол.</blockquote>

“Аралтұз” АҚ зауытының ұжымы жаңа Конституцияны қолдайды

Құрметті референдумға қатысушы!Егер сіз 2026 жылғы 15 наурызда дауыс беру күні өзіңіздің тіркелген жеріңізден тыс жерге баратын болсаңыз, қалай дауыс бере аласыз?Ол үшін 2026 жылғы 14 наурызда сағат 18:00-ге дейін Сіз өзіңіздің учаскелік комиссияңызға жазбаша өтінішпен жүгініп, жеке басыңызды куәландыратын құжатты ұсынуыңыз қажет. Комиссия сізге есептен шығару куәлігін табыс етедi.Есептен шығару куәлігін сенімхат негізінде өкіл арқылы да алуға болады. Сенімхатты нотариаттық куәландыру талап етілмейді.Есептен шығару куәлігі жоғалған жағдайда ол қалпына келтірілмейді және оның телнұсқасы берілмейді.Бір елді мекен шегіндегі басқа учаскеде дауыс бергісі келетін азаматтарға есептен шығару куәлігі берілмейтініне назар аударыңыз.Дауыс беру күні өзіңіз болатын жердегі учаскеде есептен шығару куәлігін көрсетіңіз. Учаскелік комиссия сізді дауыс беруге арналған тізімге енгізеді.Толық ақпарат алу үшін өзіңіздің елді мекеніңіздің әкімдігінің Сall-орталығына хабарласуға болады.Әрқайсымыздың дауысымыз маңызды!

2026 жылғы референдум: Тұрғылықты жерде болмаса қалай дауыс беруге болады?

<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаев, ҚР Бас прокуратурасы жанындағы Құқық қорғау органдары академиясының ректоры Нұрғалым Әбдіров құқық қорғау органдарының, басқармалардың, жергілікті оқу орындарының басшыларымен, профессорлар және студенттермен, адам және бала құқықтары жөніндегі уәкілдермен кездесті.Онда«Заң мен тәртіп»қағидатын өңірлік деңгейде нақты іске асыру, құқық қорғау органдарының кәсіби әлеуетін арттыру, ғылым мен практиканың өзара байланысын күшейту мәселелері талқыланды. Нұрлыбек Машбекұлы еліміздің құқық қорғау, заң шығару салаларындағы ауқымды реформаларға тоқталды.<blockquote>«Мемлекет басшымыз 2026 жылғы 15 наурызда жаңа Конституцияға арналған республикалық референдум өткізу жөнінде Жарлыққа қол қойды.Конституция жобасында Ұлы Даланың мыңжылдық тарихының сабақтастығы сақталып, мемлекеттің унитарлы сипаты мен шекарасына, аумақтық тұтастығына қол сұғуға болмайтыны нақтыланған. Біздің мақсатымыз ортақ, ол – Тәуелсіз еліміздің тұрақтылығын қамтамасыз етіп, халқымыздың өмір сүру сапасын арттыру. Ал «Заң мен тәртіп» қағидатының Конституция деңгейінде бекітілуі заң үстемдігі мемлекет пен қоғам өмірінің басты құндылығына айналатынын білдіреді. Бұл міндет, ең алдымен, құқық қорғау жүйесінің кәсібилігіне, кадр сапасы мен басқару мәдениетіне тікелей байланысты. Былтыр 30 желтоқсанда Мемлекет басшымыз «Құқықбұзушылық профилактикасы туралы» заңға қол қойды. Бұл заң құқықбұзушылықтың алдын алуды жазалау шараларынан басым қойып, профилактиканың бірыңғай жүйесін қалыптастырады. Кәмелетке толмағандар арасындағы құқыққа қайшы мінез-құлықтың, тұрмыстық зорлық-зомбылықтың, әлеуметтік тәуекелдердің алдын алу бойынша кешенді әрі ведомствоаралық жұмысты күшейтуге мүмкіндік береді. Президентіміздің тапсырмасымен «Адал азамат» біртұтас тәрбие бағдарламасы әзірленіп, барлық білім беру ұйымына енгізілді. Бүгінде бағдарлама «Заң мен тәртіп», «Еңбек адамы», «Таза Қазақстан» ұстанымдары аясына жүйеленді.Бұл – болашағына алаңдайтын, ұрпақ тәрбиесін басты құндылық санайтын еліміз үшін айрықша маңызға ие бағыттар», – деді Н.Нәлібаев.</blockquote>Жиында Нұрғалым Әбдіров сөз сөйлеп, академия білікті кадрлар даярлап, құқықтық сауаттылықты арттыруға бағытталған жүйелі жұмыстар жүргізетінін, оның түлектері құқық қорғау жүйесінің кәсіби әлеуетін нығайтып, «Адал азамат» қағидатын іске асыруға белсенді үлес қосатынын айтты.Қызылорда облысының прокуроры Ризабек Ожаров, Қорқыт ата атындағы университетінің ректоры Наурызбай Байқадамов, академияның кафедра меңгерушісі Артур Баймаханов күн тәртібіндегі мәселе бойынша баяндама жасады.Сөз қорытындысында облыс әкімі барша жұртшылықты алдағы маңызды саяси кезеңде елдік мүдде жолындағы іске жоғары жауапкершілікпен белсенді атсалысуға шақырды.Жиын соңында аймақ басшысы, ҚР Бас прокуратурасы жанындағы Құқық қорғау органдары академиясының ректоры, облыс прокуроры мен облыстық полиция департаментінің бастығы Қызылорда облысында кәмелетке толмағандардың қатысуымен жасалатын құқықбұзушылықтардың профилактикасы саласындағы ведомствоаралық өзара іс-қимыл туралы келісімге қол қойды.<img src="https://knadmin.beoblood.kz/uploads/Za_men_t_rtip_a_idaty_3_c41281963c.jpg" alt="Заң мен тәртіп қағидаты 3.jpg">

Қазақстан және Қызылорда облысының жаңалықтары