<a href="https://kyzylorda-news.kz/ru">Kyzylorda-news.kz.</a> Адам көңілі құлазығанда, жаны жабыққанда жұбаныш іздейді. Еңсе езілмесе де зіл батпан ой сананы салмақтап тастағанда күйзелістен арылудың амалын қарастырады. Яғни жанының тыныштығын іздейді. Бірі әуеннен, бірі кітап оқудан, бірі сурет салудан тыныштық табады. Сүйікті ісімен сабақтастырып, жүрегіндегі жүкті жеңілдеткісі &nbsp;келеді. Иә, соңғы кезде күйзеліске түсіп, миға соққы, жүрекке салмақ түсіріп &nbsp;жүргендер көп. Адамға қазір тек медициналық емес, психологиялық көмек көбірек керек. Себебі бүгінде жоқшылық, қымбатшылық, жетіспеушіліктен шаршап жүргендер аз емес.Қарап отырсақ, еліміздің &nbsp;ірі қалаларында арт-терапияның көмегіне жүгінетін жандар көп. Күйбең тіршіліктің бітпейтін мәселесінен бір мезгіл арылып, уақытын өзіне арнайтындар арт-терапия орталығына барады. Бір сөзбен айтқанда арт-терапия – өнер арқылы адам жанын емдеу әдісі. Әсіресе ол психологияда жиі қолданылады. Бұл жаман ойлардан арылып, адам жанына тыныштық сыйлайды. Дәрі-дәрмексіз оның орнына бояулар, саз балшық, музыкалық аспап, қағаз, ағаш, құм секілді заттар жаныңды емдейді. Сонда қалай дерсіз…Бүгінде саздан жасалған құмыралар, мүсіндермен ыдыстарды жиі көреміз. Алайда көпшілігіміз оларға аса мән бермейміз. Дегенмен зерттеушілер саз балшықтың адамға тигізер пайдасының мол екенін жарыса айтуда. Қазір тіпті оған үлкеннің де кішінің де қызығушылығы жоғары. Жақында ғана әлеуметтік желіден Шымкент қаласында жеке өнер мектебінің ашылғаны жайлы ақпаратты көзім шалды. «Мұндай орталық біздің өңірде де бар ма екен? деген ой келді. Бір өкініштісі, жан-жақтан іздеп таба алмадық. Алайда сұраныс көп екен. Өйткені барлығы да «тапсаң маған да айтшы» деп қызығушылық білдірді.Сыр өңірінде тек оқушылар сарайы жанынан ашылған «Көркем қыш және мүсін өнері» үйірмесі ғана бар. Бұл үйірмеге келуші жастар қатары көп. Олардың барлығы да саз балшықтың сырын ұғып, қыш құмыра құпиясына терең бойлағысы келеді. Мұнда қазір 10 оқушы бұл өнерді үйренуде. Мүсін өнеріндегі алғашқы туындысын бірге жасайды.<blockquote>– Осы салаға қызығушылығы бар балаға әрдайым есігіміз ашық. Дәріс тегін. Баланың сурет салуға, бейнелеу және қолөнерге деген қабілетін анықтаймыз. Балаға бірінші құммен жұмыс істеу ережесін түсіндіреміз. Кейін сурет салуға кіріседі. Икемі бар балалар бір-екі рет бағыт-бағдар бергеннен-ақ әрі қарай алып кетеді. Бастысы, қол жаттығу керек. Тепе-теңдікті, дәлдікті, көз жоба бойынша есептей алуы шарт. Бұл өнер түрінің артықшылығы бір жағынан жастарды шығармашылыққа, эстетикалық көркемдікке, өнерге баулыса, екінші жағынан еңбекке, қол қимылының дамуына жәрдемдеседі. Әдетте, бірінші үйдің суретін салуды ұсынамын. Өйткені үй баланың өзін ең жайлы сезінетін жері. Сосын оның есігін, терезесін қалай салатынын байқаймыз, – деді үйірме жетекшісі Ескендір Серманов.</blockquote>Бүгінде үйірменің талантты әрі белсенді қатысушылары төл туындысын жасап, облыстық, республикалық деңгейдегі байқауларда бақ сынап жүр. Жүлделі орын биігінен көрініп жүрген өрендер де жоқ емес. Қазіргі таңда үйірме жұмысын жандандыру мақсатында айналмалы екі қондырғы сатып алған. Оның көмегімен балалар саз балшықтан қыш құмыралар жасауды меңгеруде. Оған қажетті шикізатты Алматы қаласы мен Жаңақорған ауданына арнайы тапсырыс береді. Бір жақсысы, алдын ала әзірленген саз балшықты полиэтиленді пакет пен дымқыл матаға орап тастаса, ұзақ уақытқа дейін қолдануға жарай береді екен.Британдық суретші Адриан Хилл 1938 жылы арт-терапия терминін алғаш қолданысқа енгізген. Науқастармен жұмыс істеу кезінде ол бір нәрсені байқады: шығармашылық қайғыны ұмыттырады. Науқас аурумен күресе алады. 1950 жылы АҚШ-та алғаш рет арт-терапия қолданылды. Арт-терапияның маңызды саласына жататын саз балшық терапиясының адам денсаулығына пайдасы ұшан-теңіз екені ғылымда әлдеқашан дәлелденген. Дегенмен бұл біздің елде әлі де толық, терең зерттеле қоймаған сала. Мамандардың айтуынша, өнер терапиясы көмегімен жеке тұлғаны мазалайтын өзекті мәселелер шешімін тауып, эмоционалдық қысым, агрессия төмендейді екен. Сондай-ақ алақанмен саз балшықты илеу арқылы ағза сүйектің қатаюына қажетті кальциймен байытылады.Үйірме жетекшісі Ескендір Серманов мың градусқа дейін күйді¬рілген құмыра бірнеше ғасыр бойы еш мінсіз сақталатынын айтты. Расында, ол жылдар жылнамасында сыр-сипаты мен сымбатын сол қалпында сақтаумен бірге, отқа да төзімді келеді. Мәселен, қас-қағымда сан мың шақырым қашықтыққа зулайтын зымыран моторы саз балшық керамикасынан құйылатынын бірі білсе, бірі білмес. Себебі мыңдаған градус ыстық шығаратын ғарыш кемесінің моторында жанған отқа ешқандай темір төтеп бере алмай, балқып кететін көрінеді. Ал біз білетін керамика керісінше, оттың қызуы күшейген сайын қатая түсетіні мәлім.Жалпы осындай балшықтан жасалған қыш құмыралар отандық археология тарихында қола дәуіріндегі заттай ескерткіштерді зерттеуде үлкен жетістікке қол жеткізуде. Мәселен, тарихшылар мен археологтар қыш ыдыстарды зерттей отырып, ертедегі қауымдық құрылыстың, тайпа ішіндегі адамдардың бір-бірімен өзара қатынасын, шаруашылық әрекеттің ерекшелігін, дүние-танымның кейбір қырын, археологиялық мәдениеттің туыстастығы мен олардың шығу тегі туралы мол мағлұматты зерттеді.Расында, ежелгі дәуірде-ақ қоныстарды мекендеушілерде қыш¬тан ыдыс-аяқ жасау едәуір дамыған. Оның барлығы өз кезегінде &nbsp;шаруашылық пен тұрмыста пайдалануға арналды. Бір қызығы, ыдыстарға қарап, олардың жасалу техникасы туралы сөз етуге болады. Сала мамандары арасында қалыптасқан бұл әдісті осы істің шебері ретінде Ескендір Серманов та қолдайды. Оның айтуынша, қыш құмыралар бедеріне қарап, оның қандай балшықтан, қалай жасалғанын анық аңғаруға болады екен. Ал қай заманда да қыш құмыра жасаушылар ең әуелі балшық таңдауда өте мұқият болған. Тіпті кейде ол бірнеше шақырым жерден арнайы әкелінген деседі. Содан соң жаз бойы әртүрлі арнайы қоспалар қосылып, иін қандырып, одан кейін ғана қолдануға жарамды еткен.Атадан жалғасқан бұл кәсіптің бойына қан жүгірткеніне қазір құмырашы Ескендір өнердің қасиетін өскелең ұрпақ бойына сіңіруге күш салып келеді. Бастысы оны балалардың өнерге деген ерекше қызығушылығы қуантатынын айтады. «Өнерді үйрен де, жирен» дейді дана халқымыз. Мамандардың айтуынша, арт-терапияға үш жастан бастап қатысуға болады. Дегенмен әр орталықтың балалар, ересектер, қарттар деген сияқты мақсатты аудиториясы бар. Бір өкініштісі, даун синдромы, аутизм сынды диагнозы бар балаларға арнап ашылған орталық жоқ. Қазір еліміздің ірі қалаларында &nbsp;өте тұйық, сөздік қоры аз, сөйлем құрастыра алмайтын, жаңа ортаға бейімделуі қиын балалар да құм терапиядан өтуде. Бұл тәжірибе біздің өңірде де жүзеге асса, аз да болса адам жанына жұбаныш болары анық. Сондықтан осындай үйірмелер мен жеке орталықтар көптеп қажет-ақ.

Сыр өңіріндегі өнер мектебі

Күре жолдың бойындағы Шағанның бірлігі бекем, тірлігі көркем

Kyzylorda-news.kz. Облыс әкімі Нұрлыбек Нәлібаев Жалағаш ауданына жұмыс сапары кезінде теміржол көпірінің іргетасын қалау рәсіміне қатысты.Жалпы теміржол өткелі – жалағаштықтарды көптен бері толғандырған мәселенің бірі. Аймақ басшысы аудан тұрғындарын жаңа құрылыстың басталуымен құттықтады.<blockquote>«Мемлекет басшысы Қасым-Жомарт Кемелұлы: «Аса маңызды мәселелердің бірі – ауылды кешенді түрде дамыту. Ауылдарға нақты қолдау көрсетіп, заманауи инфрақұрылымды дамытуымыз керек» – деген болатын. Президентіміз бен Үкіметтің Сыр өңірін ерекше қолдауының арқасында аймағымызда ауқымды жобалар жүзеге асуда. Кент орталығынан Дәуімбай елді мекеніне теміржол арқылы өтетін жаяу жүргіншілерге бұл мәселе қиындық туғызып келген еді. Жалағаш кентін екіге бөліп жатқан теміржолдың бергі бетінде 9 мың, арғы жағында 6 мыңдай халық қоныстанған. Осы тұстан пойыз өткенде жаяу жүргіншілер үшін өте қауіпті. Халықтың өткел салу туралы сұранысы назарға алынды. Кент тұрғындарының екі жаққа қатынауындағы қиын түйін осылайша шешілмек», – деді Нұрлыбек Машбекұлы.</blockquote>Іс-шара барысында аудандық ардагерлер кеңесінің төрағасы Садық Әлиев жерлестерін жаңа өткелдің іргетасы қалануымен құттықтады.Айта кетейік, мердігер «Гүлнұр МК» жауапкершілігі шектеулі серіктестігі &nbsp;құрылыс жұмыстарын 7 ай ішінде аяқтауды жоспарлауда. Құны 328,7 млн. теңге болатын көпірдің ұзындығы 55 метрді құрайды. Аспалы көпірге қозғалу мүмкіндігі шектеулі адамдарға арналған шахталық лифт орнатылады. &nbsp;Еске салсақ, аймақ басшысы күні кеше Арал ауданында да теміржол көпірінің іргетасын қалау рәсіміне қатысты. Облыс орталығындағы Ғ.Мұратбаев және Яссауи көшелерінің қиылысында да теміржол арқылы өтетін жаяу жүргіншілер көпірі салынуда. Оған қоса «Бәйтерек» ықшам ауданында «Қызылжарма» каналы арқылы өтетін көпір құрылысы жүргізілуде.Әрі қарай аймақ басшысы Жалағаш кенті М. Шәменов көшесіндегі күрделі жөндеу жұмыстарымен танысты. Жоба құны 359,1 млн. теңге, мердігер мекеме – «Қызылорда жолдары» ЖШС. Қазіргі таңда көшенің ескі асфальт жабындысы қырылып, тас төселген, жаяу жүргіншілер жолының бордюрлары салынуда.Биыл Жалағаш ауданының Мырзабай ахун, Есет батыр ауылдарында дәрігерлік амбулаторияның құрылысы басталмақ. Аудандағы автомобиль жолдарының сапасын жақсарту үшін 2023 жылға 2,2 млрд. теңге бөлінді. «Ауыл – ел бесігі» бағдарламасы шеңберінде жалпы құны 559 млн. теңгені құрайтын, ұзындығы 9,5 шақырым болатын 6 көше жөндеуден өткізілуде. Ақсу, М.Шәменов ауылдарына газ тарту жұмыстарын бастауға 40 млн. теңге қаржы бөлініп, мемлекеттік сатып алу рәсімдері жүргізілуде. Жобаның жалпы құны 1,2 млрд. теңгені құрайды.<img src="https://knadmin.beoblood.kz/uploads/IMG_20230517_WA_0013_a1e5f1529c.jpg" alt="IMG-20230517-WA0013.jpg"><img src="https://knadmin.beoblood.kz/uploads/IMG_20230517_WA_0011_f07914f13a.jpg" alt="IMG-20230517-WA0011.jpg"><img src="https://knadmin.beoblood.kz/uploads/IMG_20230517_WA_0014_9137d9e7cd.jpg" alt="IMG-20230517-WA0014.jpg">

Жалағаш ауданында теміржол өткелінің іргетасы қаланды

<a href="https://kyzylorda-news.kz/">Kyzylorda-news.kz.</a>&nbsp;&nbsp; Ара балының мың сан ауруға ем болатын қасиеті бар екені көпшілікке таныс. Тіпті, бала күнімізде ара шағып алса, аталарымыз «шаққанының өзі шипа, енді қыста ауырмайсың» деп жұбататын. Табиғатынан ерекше жаратылған араның қызыққан жанды өзіне баурап әкетер қасиеті өз алдына бір ғылым дерсің. Ал, оны өсіріп- баптап, балын алсаң, толағай табысқа кенелерің хақ.Хош делік... Құмбазар ауылының тұрғыны Серік Якудаев–ара өсіруді қолға алған омарташы. Ол 42 жыл ветеринария саласында абыройлы қыз-мет атқарып, зейнет демалысына шықан. Елге қызмет жасап, тынымсыз тірлік еткен жанға зейнет жасында бос жату ауыр, әрине. Бертін келе, кейіпкеріміз ара өсіру ісін қолға алу¬ды ойлап, отбасымен, достарымен ке¬ңеседі. Сөйтіп, Қызылорда қаласына барып, омарташылардан сабақ алып, 15 күндей арнайы курстарда оқып қайтады. Ә дегеннен ара шаруашылығы Серік ағаны өзіне баурап алады. Әбден ізденіп, жан-жақты саралаған соң, бар білім-білігін салып, бизнес жоспар дайындайды. Жоспарын «Атамекен» кәсіпкерлер палатасына ұсынады. Көп өтпей-ақ, жобасы үздік деп танылып, кәсіпкерге «Даму» қоры қайтарымсыз грант тағайындайды.<blockquote>«Даму» қоры арқылы 1 млн. 275 мың теңге қайтарымсыз грант ұтып алған соң, аталған қаржыға 20 ұя «карпат» тұқымды ара мен бал өндіруге қажетті құрал-жабдықтарымды сатып алдым. Қасыма көмекші ретінде бір жұмысшы бекіттім. Бастапқыда жергілікті ауа райының құбылмалдылығы аралардың үйренісуіне қиындық туғызды. Сондықтан, оларды 20 күндей қолдан шәрбат дайындап бақтым. Артынша, дарияның жиегіне апарып орналастырдым. Мұнда оларға азық боларлық жыңғыл, алма, өрік, шие гүлдеп жатыр. Аралар бал жи¬науды бастап кетті,–дейді омарташы.</blockquote>Расымен де, аралар айрықша тіршілік иелері. Олар бір ұяда бір аналық, бірнеше жүз аталық және 100 мыңнан астам жұмысшы аралар жанұя болып өмір сүреді. Бұдан бөлек, араның ауыз қуысы кішігірім цехқа баланады. Себебі, гүлден алған шырынды ұясынан жеткен ауыз қуысында балға айналдырады. Басты жауы–көгершін, тышқан мен құмырсқа көрінеді. Аралар да өздерінің бірнеше ауру түрлерімен ауырады. Біздің жердегі аралар көбіне іш ауруымен ауырады деседі. Тағы бір ерекшелігі, олар темекі мен ішімдіктің, әтірдің иісін жақтырмайды. Жанына жақындаған адамда осы аталған иіс болса ашуланып, тарпа бас салады. Үнемі қозғалыста болады. Содан да болар, оның ұясының ішінде қысы-жазы 30 - 35 градус температура сақталады. Міне, жоғарыдағы біз білмейтін тың мәлімметің бәрін кәсіпке ден қойған Серік аға құлшыныспен әңгімелеп берді.<blockquote>Араның тағы бір ерекшелігі – тазалықты жақсы көреді және асқан шебер. Тазалықты жақсы көретінің ұяның ішінен бір араның өлексесін, болмаса басқадай қоқыстарды кездестірмейсің. Ал, шеберлігі – біз рамкасын жасап, бетіне арнайы жабыстырғыш дәкесін бекітіп қоямыз. Соның үстіне аралар алты бұрышты етіп бал жинайтын ұяшықтарын өздері өріп шығады. Бұл жұмыстары адам қолымен жасаса да, мұндай мінсіз шықпас еді ,– деген омарташы, аралардың осындай ерекше қабілетін де тілге тиек етті.</blockquote>Көз алдымызда аралар осы мезгілден бастап бал жинау үстінде. Мамыр айының ортасынан бастап тамыз айына дейін жиналған балды алуға мүмкіндік бар. Бір ұядан аптасына 6-7 келі бал алынса, бір маусымда 100-200 келіге дейін бал қолға тиеді. Есептей беріңіз! Өз шаруашылығын бар жан-тәнімен жақсы көретін омарташы бұған дейін де ауыл шаруашылығы саласынан алыс болмаған. Яғни,1998 жылы мал шаруашылығымен айналысатын «Қоғам» шаруа қожалығын құрып, ет бағытында жылқы мен сиыр өсіріп келген. Осы еңбегі үшін 2012 жылы ІІІ дәрежелі, 2013 жылы ІІ дәрежелі, 2015 жылы І дәрежелі «Еңбек даңқы» орденімен марапатталған. Тірліктің көзін тауып, тынымсыз тіршілік етіп жүрген Серік Якудаев ара шаруашылығын одан әрі дамытуды мақсат етіп, бар білгенін баласына үйретіп жүр.<blockquote>Мен бұл кәсіпті қолға алғанда толағай табысқа кенелсем деген жоқпын. Құдайға шүкір, балаларымның бәрін үйлі-жайлы қылдым. Өзім де заманымда еңбегіммен халқыма абыройлы болдым. Енді осы кәсібім жанданып кетіп жатса, жетім-жесірлерге, мүгедек жандарға, мешітке, жағдайы төмен отбасыларға көмек көрсетсем деймін. Бұлай жасауға міндеттімін де. Өйткені, Құрандағы ара сүресінде: «Арадан түскен пайданың он пайызын мұқтаж жандарға, он пайызын туысқандарға көмек ретінде бер» делінген. Және базарға бара қалсаң, түрлі қоспамен жасалып келген сырттың өнімдерін аламыз. Осыны да ескеріп, аудан халқын табиғи таза өніммен қамтамасыз етсем,–дейді Серік аға.</blockquote>Тыңнан басталған шаруашылық түріне қызығушылық танытушылар көп көрінеді. Омарташы үйренемін деушілерге де үйретуге дайын екендігін айтты.Иә, қызығы мен шыжығы көп ара шаруашылығы дамып, нарықта Аралдың балы саудаға салынып жатса, шынымен де, керемет болғалы тұр. Бұл кәсіпті бастаған омарташының еңбегі табысты боларына сеніміміз мол.

Аралдық кәсіпкер бал арасын баптап табысқа кенелуде 

<a href="https://kyzylorda-news.kz/ru">Kyzylorda-news.kz.</a> Қазалы аграрлы-техникалық колледжінде қыз бала тәрбиесі, ерте жүктілік, суицид, зорлық-зомбылықтың алдын алу және басқада өзекті мәселелерге байланысты қыз баланың өсіп дамуына қолайлы психологиялық және әлеуметтік жағдай жасау, оларды келеңсіз жағдайлар мен жат қылықтардың алдын алу, өмірге құштарлықтарын арттырып, қыз бала тәрбиесіне дұрыс көңіл бөлуге ақыл-кеңестер беру мақсатында қыз балалармен, олардың ата-аналарымен семинар-тренинг өткізілді.&nbsp;Шараға аудандық әйелдер кеңесінің төрайымы Роза Асанова, облыс әкімі жанындағы әйелдер істері және отбасылық-демографиялық саясат жөніндегі комиссия мүшесі, еңбек ардагері Гүлнар Тұяқбаева Қазалы АПб-нің ЮПт-ның аға инспекторы, полиция майоры М.Бегалиева Қазалы қалалық емхананың психологі Ж.Сағымбай, көпбалалы, «үшемдердің» анасы Б.Сағымбаева және колледж бен №16, №17, №95 мектептердің жоғары сыныптарында оқитын қыз балалар мен ата-аналар қатысты.&nbsp;Шара әлеуметтік педагог Г.Таңатова «Қыз тәрбиесі-ұлт тәрбиесі» атты баяндамасынан басталды.&nbsp;Онан кейін Роза Асанова мен Гүлнар Тұяқбаева «Қазақ қызы деген кім, оның қоғамдағы орны қандай?», «Қыз бала тәрбиесіндегі ананың рөлі» тақырыптарында ашық баяндап, өздерінің ақыл-кеңестерін, көпбалалы ана Б.Сағымбай ана ретінде бала тәрбиесі, оның ішінде қыз бала тәрбиесіне қатысты өз тәжірибесімен бөлісіп, қатысушылардың сауалдарына жауап берсе, Қазалы АПб-нің ЮПт-ның аға инспекторы, полиция майоры М.Бегалиева қыздардың тәртібі, түнгі мезгілдерде жүру, зиянды әдеттерден аулақ болу, зорлық-зомбылық, ерте жүктілік, олардың алдын алу бағытында хабарлама жасады.&nbsp;Қазалы қалалық емхана психологі Ж.Сағымбай шараға қатысушылардың қарым-қатынасын жақсартып, сергіту мақсатында «Сәлемдесу» тренингін жасатып, барлық қатысушыларға хормен, «Ана туралы жыр» әнін орындатты.&nbsp;Шара барысында «Қыздарға арналған тыйымдар» атты бейнеролик көрсетіліп, студент қыздардың сауалдары мен ата-аналардың ұсыныс пікірлері тыңдалып, ардагер апаның ақ батасымен шара қорытындыланды.

Қазалыда қыз бала тәрбиесіне қатысты жиын өтті

Социалистік еңбек еріне 110 жыл

<a href="https://kyzylorda-news.kz/">Kyzylorda-news.kz.</a> Жаңақорған аудан әкімінің мәжіліс залында &nbsp;облыс прокуроры Нұрлан Бижановпен аудан активінің &nbsp;басқосуында «Есірткісіз аймақ» жобасы құрылып, кешенді жұмыстар жан-жақты талқыланды.Жобаның мақсаты – есіртікі қылмысын жою. Осы ортақ міндет тұрғысында облыстық әкімиат, прокуратура, облыстық ішкі істер саласымен бірлесе іс-шара жоспары бекітілді. &nbsp;Қылмыстың бұл түрімен жылдар бойы күрес жүргізіліп келеді, – деген облыс прокуроры Нұрлан Дәуренбекұлы есірткі алқаптарын табуда және онымен күресте технологиялық жаңа тәсілдердің ендірілгені туралы баяндады. Бұл нәтижелі іске екпін береді. Мұнан әрі &nbsp;аудан прокуроры Дабыл Аянның хабарламасы тыңдалды.<blockquote>«Мемлекет басшысының тапсырмасына сәйкес нашақорлыққа және есірткі бизнесіне қарсы күрестің кешенді жоспары бекітілген. Оның негізгі мақсаты есірткінің қоғамға аса қауіпті түрі нашақорлыққа тәуелділікті ерте анықтау, есірткі қолданатындарды уақтылы құрықтау. Осының алдын алу бағытында «Есірткісіз аймақ» жобасы бірлескен іс-щаралар жоспары бойынша прокуратураның бастамасымен аудан әкімінің 17 мамырдағы өкімімен жұмысшы топ құрылып, аудан көлеміндегі есепте тұрған 19 &nbsp;тұлғамен кездесу ұйымдастырылып түсіндірме жұмысы жүргізілді. &nbsp;Прокуратура, полиция, жергілікті атқарушы органдар, орман шаруашылығы, төтенше жағдайлар, ақпараттық &nbsp;коммуникацияқызметкерлерінен құралған топтың міндеттері айқындалған, әлеуметтік желіде есірткіні жарнамалайтын сайттар анықталып отыр. Жұмысшы топпен бірлескен іс-шаралар нәтижесінде әлеуметтік желілерде сайттарға күнделікті мониторинг жұмысы жүргізілуде», – деді ол.&nbsp;</blockquote>Одан әрі &nbsp;ауданға қарасты 24 ауылдық округ және &nbsp;кентті қосқанда жалпы территорияны төрт аймаққа бөліп, ғарыштан жасалған түсірілімдер арқылы есірткі алқаптарының анықталғанын айтты. Cолардың ішінде есірткі алқабы қаупі басым Төменарық ауылына тоқталып, мұнда жайылымдық жері 11 мың 600 га жерді алып жатыр, көлі бар, оған қоса бес скважина, 23 құдық айналасында қолайлылық басым екен-дігін, екінші аймақ бойынша қаупі басым Байкенже мен Қыркеңсе, үшінші және төртінші аймақта Қандөз бен Талап елді мекендері ерекше қадағалауда тұрғанын жеткізді. Жалпы аймақтар бойынша ғарыштық электронды түсіру қондырғысы арқылы зерделеніп мони-торинг жасалғанын айтты. Сонда анықталғандай, Төменарық аумағында &nbsp;есірткіге ұқсас 222 өсімдік табылған, қазірде сотқа дейінгі зерделеу, тексеру жұмыстары жүріп, сараптама тағайындалғанын айтты. Есірткі аумағын әшкерелеу мақсатында атқарылып жатқан бұл амалдардың барлығын жеке назарында ұстап отырған аудан прокурорыаталмыш жоба аясында әрбір аймақта есірткінің заңсыз айналымын анықтау шарасына еріктілерді де тарту мақсатында 500 мың теңге ынталандыру сыйлығын тағайындау туралы облыс әкімдігіне ұсыныс түсіргенін айтты. Бұл нақты нәтиже беретін қадам болмақ Ауылдағы адамдардың не істеп, не қойып жүргенін қоңсы мен қолаң артық біледі. Еш жерде жұмыс жасамай, қапелімде қалтасы қалыңдап шыға келетін аяқалысы күмәнді ағайынды алды тар, алапат қатерден арашалап қалатын қамқор пейіл қараша қауымға бұл ретте үлкен жауапкершілік артылады. Жұмыла тізе қосып, түбі қайғыға батырар қарасораның тамырын қиюға жанашырлықпен атсалысуымыз қажет. Осы ретте айналамызға сергек көңілмен қарап, нобайы есірткіге келетін қай өсімдікті көзіміз шалса да прокуратураның “Сенім телефонына” қоңырау шалудың маңыздылығы ескертілді. Сонымен қатар аудан аумағындағы елдімекендер мен &nbsp;кент аймағында есірткі құралдары және психотропты заттарды өткізетін орындарды анықтау, әшкерелеу оны таратушылар мен тұтынушылардың жолын қиып, тиісті жауапқа тартылуына &nbsp;мүмкіндік беретінін де еске салып өтті. Тағы бір тоқтала кететін нәрсе, ауданның тау беткейлерінде есірткі &nbsp;тектес көкнәр өсімдігін арнайы баптап өсіріп, өткізіп жүрген күдіктінің қолға түскенін білдік. Ағымдағы жылдың бірінші маусымынан бастап ішкі істер министрлігі мен республикалық «Көкнәр» жедел профилактикалық іс шарасы аясында тікұшақты пайдаланып тау беткейлері мен құмды жерлерде есірткі алқаптарын анықтау жұмыстарын жүргізу жоспарлануда екен.&nbsp;Жалпы, аудан көлемінде барлық есепке алынған есірткіге тәуелді тұлғаның 180-і жұмыспен қамтылған, мал бағады, басқа да жеке кәсіптері бар. Бірақ осы азаматтардың кәсібін жүргізу бағытындақосымша «көлеңкелі» іске тәуекел етпесіне ешкім кепілдік бере алмайды, сондықтан ауыл әкімдері мен учаскелік инспекторларға қадағалауды күшейту талаптары қойылды. Аудан көлемінде орналасқан 44 білім беру ұйымдарындағы жоғары сынып оқушылары мен колледж студенттері арасында осы тақырыпта жасырын сауалнама жүргізу жөнінде нұсқау беріліп, ювеналдық полиция бөлімшесінде денсаулық сақтау және психолог мамандарымен бірлесіп, ата-аналармен мектеп оқушылары арасында түсіндірме жұмыстары жүргізіліпті.Аудан прокуроры одан әрі жүргізілген іс-шара барысында тап болған келеңсіздіктер жөнінде мәлімдеді, мәселен, &nbsp;жұмысшы топтың пайдалануындағы дрон құрылғысының көлемі тым шағын, салмағы аз болуынан желдің кезінде ұшуы қиындап, жұмысты сапалы жүргізуде көп кедергі келтірген. Сондаяқ, таулы аймақтарда жол талғамайтын көліктің &nbsp;жеткіліксіздігі де талапты іске кедергі болып тұрғанын жасырмады. Одан әрі сөз алған Жаңақорған аудандық полиция бөлімі басшысы Нұрлан Ибраев аудан көлемінде есірткі қылмысының алдын алу және есірткі алқаптарын анықтау бағытында &nbsp;жыл сайын профилактикалық іс шаралар кешені жоспарлы түрде жүргізіліп келе жатқанын айтты. Ол одан әрі соңғы бес жылда есірткі қылмыстары бойынша анықталған деректерді толығымен келтірді. Байқағанымыз, есірткіні заңсыз баптау және өсіру деректері далалық аймақтармен қатар тұрғын үй жанында кездесуі &nbsp;жағамызды ұстатты.Есірткімен күрес – жалғыз-жарым мекеме, ұжымдардың ғана міндеті емес, бүкілхалықтық сипат алуға тиіс міндеттілік. Сондықтан жиынға облыс прокурорының өзі арнайы келіп маңыз беруі құзырлы орындарға салмақты міндет жүктейтінін жеткізген жиын модераторы – аудан әкімі Мұрат Жолкелдіұлы бұл бағытта Мемлекет басшысының тапсырмасына сәйкес зерттеп-зерделеу жұмыстары тиянақты жүргізіліп, нақты нәтиже болатынына сендірді.

Жаңақорғанда «Есірткісіз аймақ» жобасы жүзеге асуда

<a href="https://kyzylorda-news.kz/">Kyzylorda-news.kz.</a> Қармақшы ауданына қарасты «Жаңажол» ЖШС директорымен сұқбаттасып, серіктестік атқарған жұмыстар легін тыңдаған едік. Шаруашылық басшысы Орынбасар Төлеповтоң айтуынша, шаруашылықта шаруа шашаусыз.Ауылдан бірнеше метр әріде орналасқан алма бағына апаратынын айтып, жеңіл көлікті оталдырды. Жүріп келеміз. Алма баққа жетпей анадай жерде көк-көмбек көлшік күнмен шағылыса, желмен арпалыса теңселіп жатыр.– Орынбасар аға, ана-а-а жақта не бар? – дедік бір кереметке қызыға.– Ол жақта Жаңабай Төребековтің шағын көл мен құс кәсібі бар, – деді Орынбасар Төлепов.– Барып көрсек бола ма?– Әрине, қазір апарамыз…Көлшік жаққа жақындай түстік. Қалың қамыстың айналасы айнадай жалтыраған кең жайқын. Сол жайқында қара-ала боп шақиып үйректер ақырын жүзіп көлбеңдейді. Тамаша көрініс. Күнделікті күйбең тірліктен, тоқтаусыз көз алмайтын компьютер, смартфоннан бір алшақтатып, миды тынықтырып барады. «Несие ала алмадым» деп бастады 69 жастағы ел ағасы әңгіменің тінін тарқата.<blockquote>«Анаубір жылы «Жаңажол» ЖШС директоры Орынбасар Төлеповтен осы көлшікті сұрадым. Шабақтар салайын, айналасын көркейтейін деп. Солай серіктестік иелігіндегі жерді берді. Өз қаражатыммен кәсіпті бастап та кеттім. Бір балықпен шектеліп қалмайын деп жиекке тауықкепе салдық. Ішінде қазір 400-ге жуық тауық пен &nbsp;үйректер бар. Өз үйімде қаздар бар. Соларды әкелгім келіп еді, оған көлде балық өсірген соң болмайды екен. Енді осылай бірте-бірте үйрек санын көбейту қажет. Айтпақшы, тауықтарымнан уызы сап-сары қолдың тамаша жұмыртқасы шығады. Ауылға, одан қалды ауданға жөнелтіп отырамын. Ал мынау көлге мыңдаған шабақ салып отырамын. Нәтижесі жаман емес», – деді Жаңабай Төребеков.</blockquote>Алда әлі жоспары көп екенін қуана жеткізген ол кезігетін қиындықтарын да жасырмады.– Бұл жерге күніне үш рет келіп, тексеріп, азығын беріп тұрамын. Мына үйректі алғаш суға жібергенім тіпті қызық. Басқа жаққа кетіп қалады деген қорқыныш болды. Солай не болса, ол болсын деп көлге ұшырдым. Рахаттанып жүзді де әріге кетіп бара жатыр. Апыл-ғұпыл катамаранға отырып әлгіні қудым. Ұстатпай жағаға шығып, қамыс арасынан көзден ғайып болды. Мейлі, бұйырмаған болар деп кейін қайттым. Сөйтсем арада өткен 2-3 күннен соң әлгі ала үйрегім келіп тұр, – деп күлді Жаңабай аға.Қазір үйректер көлге барып, одан кепеге келіп үйрене бастаған. Тауықтар да бір мезгіл тысқа шығып тынысын ашып алады. Ал көлде өскен балықтар балықшының қармағы мен ауына еркін түседі. Осылай көл мен жиекте еткен тіршілік үзіліссіз қайнап жатыр. «Келесі келерде ертерек айтыңдар. Балық аулап, одан сорпа қайнатып беремін» деген Жаңабай аға бізді жадырап шығарып салды. Көлдегі кәсіпті көріп, керемет көріністің куәсі болған біз де қолымызды бұлғай кете бардық.<img src="https://knadmin.beoblood.kz/uploads/1632544949_kol2_cdc0079845.jpg" alt="1632544949_kol2.jpg"> &nbsp;

Дүр Оңғар ауылында көл жиегіндегі кәсіп бар

<a href="https://kyzylorda-news.kz/">Kyzylorda-news.kz.</a>&nbsp; Елімізде жұмыссыздық деңгейін төмендетіп, білімі жоқ адамдарды аз уақытта оқытып, кәсіп меңгеруіне жол ашатын «Еңбек» бағдарламасы жүзеге асырылуда. Ауданда да бұл жоба арқылы мемлекет тарапынан грант ұтып алып, қолынан келер кәсібін ашып, халыққа қызмет етіп отырған азаматтар саны жылдан-жылға өсіп келеді.&nbsp;Қазіргі уақытта қала мен ауыл көшелерінен автокөліктің түр-түрін көруге болады. Осыған орай автокөліктерге қызмет көрсететін орындар да ашылуда. Бұрын ауданда дөңгелек жөндеу шеберханасын көру қиынға соғатын. Көліктің «тілін» түсінетін жандар үйінің жанындағы гаражынан оны-мұнысын жөндеп беретіндіктен, көлік иелері де соларға баратын. Ал қазір қалада арнайы сервистік қызмет көрсету орталықтары ашылып, талапқа сай қызмет түрлерін көрсетуде.Руслан Ібадатов мемлекеттік грантты иеленіп, көп жылдардан бері ойында жүрген өзінің жаңа бизнес-идеясын іске асырып, көлік дөңгелегін жөндеу орнын ашты.<blockquote>Талаптанып, қолынан келер іспен шұғылданғысы келетін адамға бүгінде Үкімет тарапынан қолдау көп. Оны өз ісімнің нәтижесінен көріп отырмын. Кішкене кезімнен машинаға қызығатын едім. Өз көлігімді өзім жөндей беретінмін. Қазір көліктен көп нәрсе жоқ. Техника болған соң бұзылмай тұрмайды. Содан көліктердің дөңгелектерін жөндейтін орын ашсам деген ой келді. Халық үшін бұл қызмет түрі бірден-бір қажет деп есептеймін. Алдағы уақытта қызмет көрсету аясын кеңейтуді мақсат етудемін, &nbsp;– дейді.</blockquote>Жас кәсіпкер арнайы орында автокөлік дөңгелегіне түрлі қызметтер көрсетуде. Дөңгелекті ашып жабу, босатып алу секілді жұмыстардан бастап, дөңгелек камераларын желімдеу, қысымын өлшеу қызметі де бар.&nbsp;«Еңбек» бағдарламасының демеуімен қолдан келетін кәсібінен береке тауып отырған Руслан Аралбекұлының бұл ісі жастарға үлгі.

Бағдарлама көмегін көрген кәсіпкер  

<a href="https://kyzylorda-news.kz/">Kyzylorda-news.kz.</a>&nbsp; Кез келген елдің экономикасының негізі – шағын және орта кәсіпкерлік. Дамыған елдердің тәжірибесіне сүйенетін болсақ, шағын және орта кәсіпкерлікті қалыптастыру мен дамыту елдің экономикасын көтеруде маңызды орынға ие. Шағын және орта кәсіпкерлікті дамыту арқылы салалық және өңірлік монополизмді жоюға, нарықта тауарлар мен қызметтерді көбейтуге, жаңа жұмыс орындарын ашуға, ғылыми-техникалық прогрестің жетістіктерін пайдалануға, қоғам тұрақтылығының кепілі болып табылатын орта тап қалыптастыруға үлкен мүмкіндіктер бар.Бұл бағытта мемлекет тарапынан жасалып жатқан қолдау да өте жоғары. Кәсіп жасаймын деген жанға біздің елімізде барлық жағдай жасалған. Елбасы кәсіпкерлік саласын жандандыру жайында: «Біздің стратегиялық мақсатымыздың бірі – елдің ішкі жалпы өніміндегі шағын және орта бизнестің үлесі 2050 жылға қарай кем дегенде 50% болуын қамтамасыз ету. «Бұл – өте өршіл мақсат, бірақ оған қол жеткізуге болады», – дей отырып, нақты қадамдарды да көрсетіп айтқан болатын. Солардың бірі – нәтижелі жұмыспен қамту және жаппай кәсіпкерлікті дамыту бағдарламасын іске қосу болса, екіншісі – Қазақстан азаматтары өз бизнесін жүргізу үшін ауылда да, қалада да 16 миллион теңгеге дейін шағын несие ала алады деген еді. Сонымен қатар, аймағымызда да 2018 жылдан бастау алған нәтижелі жұмыспен қамту және жаппай кәсіпкерлікті қолдау жылы да кәсіп ашамын деушілерге қол болып тұр.Міне, осынау мемлекеттің мол көмегіне кенеліп, өз кәсібінің көкжиегін кеңейтіп, кәсібі өрге домалаған жандардың бірі – жергілікті кәсіп иесі Нұрбол Жаниязов.Біз Нұрболдың шайханасына кіргенде керемет сезімге бөлендік. Қос қабатты шайхананың сәні келіскен. Есіктен кіргеннен құдды бір Шығыс елдеріндегі ертегі &nbsp;әлеміне еніп кеткендей күй кешесіз. Түрлі шырақтар мен шамдар, Шығыстың ескі құмыралары мен суреттері елітіп әкетеді. Рухани тұрғыдан да тынығып, шөліңіз бір қанып қалады. «Аладдин» деп аталуы да осынысында екен ғой дедім.&nbsp;<blockquote>&nbsp;Шайхана салу көп уақыттан бері ойда жүрген іс еді. Міне, сол мақсатыма жетуге мемлекеттің мүмкіндік сыйлауы арқау болды. Кәсіпкерлікті қолдау бағытындағы бағдарламалар бойынша төменгі пайызбен несие алдым. Соның көмегімен ғимарат тұрғызып, бүгінде жұмысымды бастап кеттім. Қазір тұрғындардың талғамы өте жоғары. Тазалықты да алдыңғы орынға қояды. Сол себепті барынша талғамға сай болғымыз келді. Сондай-ақ, «Аладдин» шығыс шайханасында аты айтып тұрғандай шығыстың тағамдары жасалады. Мақсатымыз–келушілерге шығыс асының өзіне тән ерекше дәмін ұсыну. Оның сапасына да, құрамына да ерекше мән беріледі. Себебі, қазіргі уақытта бізге келушілердің қатары көп. Жасы да, үлкені де бар. Шайхананың тағы бір ерекшелігі, тек қана халал өнімдер ұсынылады, бағасы да қымбат емес, – дейді нысанның иесі, кәсіпкер Н.Жаниязов.</blockquote>Талапты жігіттің беталысы көңіл қуантарлықтай. Есігінен адам арылмайтын шайхананың сапасын осыдан-ақ біле берсек болады. Сонымен қатар, шығыс шайханасының қожайыны 12 адамды жұмыспен қамтып отыр.&nbsp;Бұл нысан Нұрболдың жалғыз кәсіби нысаны емес, кәсіпке машықтанған азамат 2016 жылдан бері құрылыс заттарын сатумен де айналысып келеді. Сапалы өнімді жұртшылыққа ұсынған кәсіпкердің бұйымдары қашан да сұраныста. Қос кәсіптің де тұтқасын берік ұстаған жерлесімізге еңбегінен береке тапсын дейміз.

Аралдан ерекше тамақтану орнын ашқан кәсіпкер

<a href="https://kyzylorda-news.kz/">Kyzylorda-news.kz.</a>&nbsp;18 мамыр – Халықаралық музей күні қарсаңында халқымыздың ғасырлардан тамыр тартатын өткені мен бүгінін, жылдар қойнауындағы құндылығы мен тарихын халық арасына, кейінгі ұрпаққа жеткізуді мақсат тұтқан Ы.Жақаев атындағы күріш өсіру тарихы музейінің директоры Құттықыз Ыхановамен әңгімелесудің сәті түсті.– Қайырлы күн, Құттықыз ханым! Мерейлі мерекелеріңіз құтты болсын! Қайбір жылы шежірелі өлкемізде өлкетану музейінің болмауынан руханиятымыз ақсап тұратын-ды. Шүкір, қазіргі таңда сол ойықтың орны толып, жұрттар жиі бас сұғатын, тарихтан түрлі мәлімет алатын, құнды мекенге айналып үлгерді. Алдымен әңгімеміздің ауанын сіз басшылық етіп отырған тарихи орынның өткені мен бүгінінен бастасақ…– Ағылшындар «Қандай істің де табысты болуы – керекті жеріне керекті адамның келуінен» - деп айтады екен. Сол айтқандай қай деңгейдегі музей, не басқа да мәдениет ошақтарының гүлденуі, жақсы жұмыс істеуі жергілікті басшылардың көзқарасы мен қамқорлығына көп байланысты. Негізі қай жерде де жақсы музей болуы үшін материалдық жағынан басқа үш фактор қажет. Олар музейдің қоры – бар жиған-тергені, екіншісі – жасақталған ғылыми экспозицияны көрсете білу, үшіншісі – жан-жақты білімді, өз ісіне адал, жан-тәнімен берілген қызметкерлерді топтастыру. «Бар жаңалық негізгі – ұмыт болған көнеде» дейді халық даналығы. Музей мен тарих етене тығыз ¬байланыста. Тарихтың тірі куәлары – көнеден қалған қорымдар, құлпытастар, зергерлік және тағы басқа бұйымдардың уақыт өткен сайын мүжіліп, тозып, жоғалып бара жатқандығын, көнекөз қариялардың да мәңгілік өмір сүрмейтінін ескерген жөн. Бұл еңбекті жарыққа шығарудағы мақсатым да осы Ұла дала мәдениетінің қоламта шағын сөндірмей одан әрі үрлеп, жалындата түсу.&nbsp;Қазіргі қаржы қиындықтарына байланысты кейінге қалдырылып келе жатқан көнеден бүгінгі жеткен мәдени мұраларымызды көздің қарашығындай сақтай білу бүгінгі ұрпаққа аманат және сын болып қала бермек.Ы.Жақаев атындағы күріш өсіру тарихы музейі 1978 жылдан 1982 жылға дейін облыстық тарихи-өлкетану музейінің Шиелі ауданындағы филиалы негізінде құрылып 1982 жылы Ыбырай Жақаев атындағы күріш өсіру тарихы музейі болып ашылды. 2019 жылдың ақпан айынан бастап облыс әкімінің Қаулысымен Қызылорда облыстық тарихи-өлкетану музейінің Ы.Жақаев атындағы күріш өсіру тарихы музейі филиалы болып құрылды.&nbsp;Музей – ғылыми, мәдени-тарихи орталық. Бірнеше дәуірдің тарихын, этнографиясын, тарихи тұлғаларын, өнерін жинақы түрде ұрпақтан-ұрпаққа жалғап отыратын институт. Сонымен қатар ол жинақталған мұраны ғылыми түрде зерттеп, зерделеп, халықтың тарихын, мәдениетін, салт-дәстүрін танытып отыратын орын. Көненің көзіндей, тарихтың өзіндей болған жәдігерлерді жинақтап, жүйелеу, оларды келешекке сақтап жеткізу, өзге жұртқа барымызды көрсетіп насихаттау – абыройлы міндеттің бірі. Қазіргі таңда қоғамда мұражай ісіне, мұражай құндылықтарына деген талап пен қызығушылық артып келеді. Отандық мұражай қызметіне, ондағы тарихи-мәдени мұраларға деген сұраныс халықаралық деңгейге дейін көтерілді. Қоғамда мұражайдың тек әлеуметтік емес, тарихи-мәдени мұраларды сақтайтын мәдени-ғылыми институт, ғылыми ақпараттар жүйесінің орталығы ретінде маңыздылығы артты, музей ісіне деген қоғамның қызығушылығы да өсіп келеді.&nbsp;– Шежіреге құндақталған Шиелі – тарихқа бай аудандардың санатында. Осы тұста музейдегі құнды жәдігерлердің бірсыпырасын атап өтсеңіз?– Бүгінде музей қорында 10756 құнды жәдігерлер жинақталған. Негізгісі &nbsp;– 6967, көмекшісі – 3789.Әрине бұл саланың да қызықты тұстары көп. Кешеден қалған құнды жәдігерлерге қарап ата-баба жүріп өткен тарихи жолдар көз алдыңа келеді де тұрады. «Өз тарихын сыйламаған халық, өзін де сыйламайды» деген даналық бар ғой. Ғылым мен техника дамыған заманда халықтың сұранысы да арта түскені белгілі. Біз де сол талапқа сай қызмет етсек дейміз. Ы.Жақаев атындағы күріш өсіру тарихы музейінің құнды жәдігерлері – ¬Ыбырай атамыз өзі ұстап тұтынған заттары. Мысалы, кетпен, байтесе, қол орақ, 40 литрлік самаурын, қол шам, 1958 жылы Корей еліне сапарға барғанда корейліктердің кигізген жадағай шапаны мұражай төрінен орын алады.&nbsp;– Мұнан өзге музей қонақтарын селт еткізетін экспонаттарды сөйлетсеңіз…– Музейге келгендер қайың сапты үлкен диоганалды кетпенді көргенде «Мына кетпенді қария қалай көтерген?» деп таң қалады. Ең құнды экспонаттары кетпені, ағаш, темір соқалары,аяқ көрік пен қол көрік халықты таң қалдырады.Астана қаласындағы Ұлттық музейінен Алтын адам реконструкциясын 2016 жылы осы Жақаев музейіне алып келіп, аудан халқы, қонақтары, аудан көлеміндегі мектеп оқушылары тамашалады. Бұл ауданның жетістігі, Ы.Жақаев атамыздың құдіретті еңбегі.– Ерекшелігі сол, тарихқа тұнған музейдің табалдырығын аттай қалсақ, жайқалған гүлдер мен жасыл желек көздің жауын алады. Ерекше әсер сыйлайды. Біз мұны мұражай қызметкерлері экспонаттармен жұмыс істеп қоймай, ғимарат айналасына да жіті мән береді деп топшыладық.&nbsp;– Иә, гүл менің екінші демім десем де болады. Гүлсіз өмір мәз емес, мәнді де болмайды. Сондықтан да көркейту- көгалдандыру жұмысына етене көңіл бөлемін. Музей ауласының көз тартар келбетіне сүйсінгені соншалық, аудан тұрғындары арнайы келіп суретке түсіп кетіп жатады.– Күні бүгінге дейін сіздердің ұйымдастыруларыңызбен нендей іс-шаралар өтті? Жаңашылдықтарға да аз-кем аялдасақ…– Даталық мерекелік іс-шарадан басқа бізде жобамыз да бар. «Музейдегі сұхбат», «Кеше, бүгін, ертең», үш тілдегі экскурсияны мектеп оқушыларына «Мирас» клубы арқылы жәдігерлеріміз жоспарлы түрде жүргізіледі. Музей – өлкемнің тарихы, халқымның қазынасы, ел-жұрттың тағдыры, менің де тағдырым. Осының бәрі келешек ұрпаққа аманат.– Аудандық тарихи-өлкетану музейі жылдағы дәстүрден жаңылмай «Халықаралық музей күнін» өз деңгейінде атап өтетінін білеміз. Ал биыл аталған мерекеге қандай жоспар бар?– Биылғы жылы музей күнін Қызылорда облыстық тарихи-өлкетану музейінде «Әннің атасы – Нартай, Дәннің атасы – Ыбырай, Шежірелі Шиелі» атты шара ұйымдастырылады. Облыстық өлкетану музейіне Астана, Қарағанды қаласынан 3 Алтын адамның реконструкциясын әкеліп, халықтың назарына ұсынғалы жатыр. Сол күні Алтын адам реконструкциясын облыс әкімі ашылу сәтінің тұсаукесерін жасайды. Ал Шиелі ауданы яғни, бір аудандағы 3 музей этно ауыл көрінісін жасап, Шиелінің шежірелі тарихын сомдайды. Қазыналы қарттарымыздың өткен өмірінің тарихы біздің байлығымыз және құндылығымыз.Ал, Ы.Жақаев атындағы күріш өсіру тарихы музейінде 18 мамыр Халықаралық музейлер күніне байланысты Ашық есік күні өткізіледі. Ауданның барша халқын музейге тегін келіп көруге шақырамыз.– Сұхбатыңызға рақмет!

Бар жаңалық негізгі – ұмыт болған көнеде

<a href="https://kyzylorda-news.kz/">Kyzylorda-news.kz.</a> Қармақшы ауданына іргесі тиген Ақтөбе ауылында бүгінде кәсіптің көкжиегі дамыған. Мұнда атбасын тіресеңіз кәсібінің көзін тауып, тындырымды тірлік етіп отырған отбасыларды жолықтырасыз. Ауыл тұрғыны Нұрлан Шынарбаев ауылдастарына нәтижелі істің үлгісін көрсетуде. Ол ауласының бір бұрышынан шағын етіп қоғамдық монша ашып, халыққа қызмет істеп отыр. Қазіргі күні ауыл тұрғындары үшін аса қажет әлеуметтік нысанға айналған.Соңғы уақытта қанатын кеңге жайып келе жатқан жаһандану дәуірі күн санап бізге ауылды сақтау – ұлттық болмыс, ұлттық құндылықтарды, ұлттық рухты сақтаудың бірден-бір жолы екенін нақты ұғындыра бастағандай. Сондықтан ауылшаруашылығы мен кәсіпкерлігін дамыту бүгінде тек экономикалық емес, негізгі ұлттық мәселеге айналды. Ауылды әлеуетін көтеру ісіне әрбір азамат атсалысып, алтын бесіктегі тірлікті қайта түлетіп жүр.Ауыл кәсіпкерлігін дамыту бағытында мемлекеттік деңгейде түрлі бағдарламалар қабылданды. Соның нәтижесінде өткен ғасырдағы 90-жылдардың басында мүлдем тұралап қалған ауылдың тамырына ептеп қан жүгіре бастады. Көптеген іргелі шаруашылықтың негізі қаланды. Қазіргі заманның талабына сай кәсіпкерлік орындар бой тіктеді.Ақтөбе ауылында монша есік ашып, тұрғындарын шынайы қуанышқа бөлеген еді. Бұл сөзіміз асыра айтқандық емес. Себебі, мұндағы қауымның апта аяғында атбасын тірейтін бірден-бір тазалық орны – осы монша. Ал қыстың көзі қырауда монша жағып, оны қыздырудың аз бейнет емес екені үлкен-кішіге жақсы мәлім. Демек, моншасы болғанымен, оны апта сайын жағып отыруға жағдайы келмейтін тұрғындардың да жағалайтыны осы монша.Нұрлан Шынарбаев «Жұмыс жоқ» деп қарап отырмастан, несие алып, нартәуекелдікпен ауылдан монша ашып, ауылдастарына нәтижелі істің үлгісін көрсетуде. Ол ауласының бір бұрышынан шағын етіп қоғамдық монша ашып, халыққа қызмет істеп отыр. Қазіргі күні ауыл тұрғындары үшін қажетті әлеуметтік нысанға айналған.Аптаның аяғы келді дегенше Нұрлан ағаның ұялы телефонына қоңырау шалушылардың қатары былайғы күндегіден асып жығылады екен. Себебі мұндағылар ертемен моншаға түсуге жазылып қояды. Ауыл орталығындағы моншаның қызметі әлдеқашан тоқтап қалса да кәсіпкер бүгінгі таңда жұмысын қайта жалғастыруда.<blockquote>«Бұрын ауылымызда монша халыққа жұмыс жасайтын. Кейін оның қызметі тоқтап қалды. Бертін келе соның ізін қайта жандандырсам деген ой келді. Сөйтіп екі-үш жыл бұрын жоспар құрып, өз қаражатыммен іргетасын тұрғыздым. Қалған жабдықтарға ақшам жетпеген соң мемлекет қолдауымен 6 процент жеңілдетілген несиеге қол жеткіздім. 3 миллионға жуық қаржының жобасында ақша құйылып, моншаны іске қостық. Қазір шүкір, ауыл тұрғындары үйренді, алдын ала тапсырыс берушілердің қатары көбейіп келеді. Сенбі, жексенбі күндерінен бөлек 5-6 адам хабарласып жатса монша жаға беремін. Ақысы қолжетімді», – дейді кәсіпкер.</blockquote>Бөлмелері кең, жарық әрі түсем деушілерге жағдай жасалған. Жуынатын бөлмеден бөлек отырып демалатын дәлізі тағы бар. Ішінде санитарлық тазалыққа аса мән берілген. Қысқасы қаладағы қоғамдық моншадан кем түспейді.– Өз қолыңмен тірлік істесең тамағың тоқ болары сөзсіз. Қашанда еңбек еткен адамның еңсесі биік, ісі мығым болады. Еңбектену – береке, ырзықты шақырады. Кәсібімнің көкжиегі кеңеюі Алланың, одан соң халықтың арқасы, адал еңбегіміз, маңдай теріміздің жемісі. Несібе – еңбек еткенде. Бар күшімізді жиып, кәсібімізді одан әрі дамытқымыз келеді. Бизнесті сәтті жүргізу үшін күнделікті тынбай еңбектену қажет, сонымен қатар үнемі ізденіс үстінде жүріп білім алып, кәсіби деңгейін арттыруға ұмтылмаса барлығы бекер болады. «Адамды көркейтетін – еңбек» дегенді алға тартамын. Сондықтан аянбай еңбек етіп келеміз, – дейді моншаның иесі.Иә, әрқашан адал нәпақасын табуға талпынған жан жетістікке жетпей қоймайды. Ел батасымен көгеріп, адалынан еңбек еткенде ғана мақсатың айқын болары хақ. Қолда бар қаражатты кәсібіне құйып, кейін еселеп қайтару үшін алдымен істің көзіне машықтану керек. Осының барлығын бір арнаға ұштастырған жеке кәсіпкер Нұрлан Шынарбаевтың келер күннен күтер үміті көп.Ауыл – қазақтың алтын ұясы. Өңір экономикасын дамытуда ауылдың әлеуетін көтерудің де маңызы жоғары. Бүгінде түрлі бағдарлама біршама жылдан бері жүзеге асырылып, ауыл-аймақтың даму үдерісі назарға алынып келеді. Өңірдің көптеген аймақтарында ауыз су, жол, газдандыру, мектеп, балабақша секілді түйткілді мәселелер шешіліп, ауыл халқының тыныс-тіршілігінде жаңа бір леп пайда болғандай. Біз баяндаған Ақтөбе ауылының қазіргі келбеті ажарлана түскен. Онысын жүзеге асып жатқан жарқын жобаларынан, көкжиекке құлаш сермеген кәсіпкерлігінен байқадық. Тұрғындардың әлеуметтік әлеуеті жақсарған. Иә, ауыл – қазақ елінің жүрегі. Қазақтың қасиетті құт мекені, қайнар көзі, алтын бесігі. Өркениетті ел болып, даму жолын қаладан тапқанымызбен, ауылдың алар орны бөлек екені әмбеге аян. Ал ауылды өркендету – ұлттық экономикамыз бен мәдениетімізді жаңғыртудың тірегіне айналмақ. Ауылға көңiл бөлу, оның жағдайын жақсарту – мемлекеттiк мәнi зор iс. Кез келген экономикалық реформаның түпкi мақсаты – халықтың әл-ауқатын арттыру. Бұл жолда атқарылған, алдағы уақытта атқарылар жұмыс легі тоқтамақ емес. Демек, ауылдың шын мәнінде ел бесігіне айналып, отандық ауылшаруашылығы өнімімен ірі қалалардан артығымен қамтамасыз ете алатын деңгейге көтеріле алатынына да сеніммен қарауға болады. &nbsp;

Қазақстан және Қызылорда облысының жаңалықтары